Ирмос: Царя́ Небе́снаго, Его́же пою́т во́и а́нгельстии, хвали́те и превозноси́те во вся ве́ки.

Во утро́бе Твое́й Бы́вшаго пре́жде Тебе́ заче́нши, Мари́е Нескве́рная, родила́ еси́ неизрече́нно Христа́ Царя́.

Да сла́влю, Отрокови́це, и покланя́юся стра́хом всечестно́му и́мени Твоему́, ско́рби вся́кия мя изба́ви и вре́да.

Но́сиши я́ко Младе́нца на святу́ю руку́ Твое́ю вся Нося́щаго сло́вом; те́мже с Ним Тя воспева́ем во ве́ки.

Яко кре́пкую наде́жду еди́ну Тя содержа́й, молю́ся: грехо́в и бед, Богома́ти Мари́е, изба́ви мя ско́ро.