Ирмос: Образу злато́му на по́ле Деи́ре служи́му, трие́ Твой о́троцы небрего́ша безбо́жнаго веле́ния, посреде́ же огня́ вве́ржени, ороша́еми поя́ху: «Благослове́н еси́, Бо́же оте́ц на́ших».

Житие́, душе́, я́ко торг яве све́дущи, до́бре дей, да велича́йшая приобря́щеши, Ца́рство Небе́сное и сла́ву неизрече́нную; а́ще же мимо и́деши к ма́лу, ино́го не возы́маши вре́мене.

На путь живота́, Христа́ Ро́ждшая, Ты мя наста́ви, на путь пра́вый, в ра́йская жили́ща вводя́й и к та́мошнему упокое́нию, пу́ть исправля́ющи и души́ моея́, Блага́я, стопы́.

Яд греха́ лю́та кре́пость мою́ иждива́ет, но ма́нием многоблагоутро́бным Твоим, дла́нию благода́тною предвари́вши, сей изчерпи́, я́ко ми́ра Взе́мшаго грех на земли́ еди́на Поро́ждшая.

Сы́на Бо́жия ро́ждшая, Иже за милосе́рдие щедро́т Сы́на Челове́ческаго бы́вша, сы́на све́та и дне мене́, сы́на но́щи и тьмы, Пренепоро́чная, сотвори́, и Небе́снаго Отца́ досто́йна покажи́ сы́на.