Ирмос: Тебе́, на вода́х пове́сившаго всю зе́млю неодержи́мо, тварь ви́девши на ло́бнем ви́сима, у́жасом мно́гим содрога́шеся, «Несть свят, ра́зве Тебе́, Го́споди» взыва́ющи.

Зной согреше́ний сожже́ окая́нную ду́шу мою́, и искуше́ния пра́ведно те́ло изнури́ша; те́мже, Чи́стая, моле́нием Твоим сия́ изгла́ди и жития́ пода́ждь исправле́ние.

Пе́ти Тебе́, Богоро́дице, сподо́би в безмо́лвии се́рдца Твоего́ мя раба́, я́ко мно́жаи́шее растли́ся живота́ моего́ в озлобле́ниих; те́мже предста́ни ми, и жития́ пода́ждь исправле́ние.

Яже Вы́шняго Ро́ждшая, возвлецы́ из ро́ва мя согреше́ний, и поста́ви на ка́мени ми́лости но́зе мои, и к сла́ве напра́ви стопы́, и жития́ пода́ждь исправле́ние.

Ру́це к Тебе́ простира́ю, коле́на прекло́нь, со слеза́ми, Отрокови́це, и Твое́ призыва́ю те́пле ско́рое заступле́ние: озлобле́ния измени́, Богора́дованная, и жития́ пода́ждь исправле́ние.