Ирмос: Положи́л еси́ к нам тве́рдую любо́вь, Го́споди, Единоро́днаго бо Твоего́ Сы́на за ны на смерть дал еси́. Те́мже Ти зове́м, благодаря́ще: сла́ва си́ле Твое́й, Го́споди.

Утверди́ ны, коле́блемыя ве́тры скорбе́й, искуше́ний и нужд, на ка́мени спасе́ния, Чи́стая, всяк отрева́ющи на нас вред льсти́внаго зми́я.

Ми́лостивна к нам всех Спа́са и Го́спода, Влады́чице ми́ра, Блага́я и Ми́лостивая, рабо́м Твоим сотвори́ Твоими проше́нии и те́плыми моли́твами.

Побо́рница и Засту́пница нам яви́ся, Влады́чице, сокруша́ющи бра́ни лука́вныя мы́сленных враг и неуя́звлены соблюда́ющи и покрыва́ющи ны от вся́каго вре́да и озлобле́ния.

Ускори́, Чи́стая, во е́же помоги́ и изба́ви ти вся прибега́ющия к Тебе́, льсти́вых челове́к язы́ки обуздова́ющи и нам спасе́ние подающи.