Ирмос: Покры́ла есть небеса́ доброде́тель Твоя́, Христе́; из киво́та бо проше́д святы́ни, Твоея́ Нетле́нныя Ма́тере, в хра́ме сла́вы Твоея́ яви́лся еси́, я́ко Младе́нец руконоси́мь, и испо́лнишася вся Твоего́ хвале́ния.

Виде́нием мя сатана́ в раи́ иногда́ взят я́ко пле́нника, Де́во, и ны́не у́бо виде́нием покуша́ется чистоты́ отъя́ти Боже́ственную оде́жду, и облещи́ мя в ри́зу греха́.

Вонзе́ враг во вся́ко чу́вство мое́ волхвова́ния своя́, Богома́ти Отрокови́це, и те́ми низвлачи́т мене́ в смерть. Еди́на Ро́ждшая Сло́во, ки́та вели́каго[36]одоле́вша, того́ многоплете́нных сете́й изми́ мя.

Приседи́т на пути́ плотски́ми двиза́нии змий, враг льсти́вый, и пу́тнику уму́ прилага́ется, пробода́я неча́янно, Де́во, жа́лом страсте́й, и к сме́рти душе́вней мене́ приво́дит, те́мже помози́ ми.

Ору́жием сла́сти мя низложи́ти зави́стно и́щут врази́, наляко́ша бо ми лук душепа́губный их и в нем сосу́д угото́ваша сме́ртный; жезло́м желе́зным Твоим я́ко скуде́лей сосу́д сокруши́ я́, Влады́чице.