Ирмос: Услы́шах слух си́лы Креста́, я́ко рай отве́рзеся им, и возопи́х: сла́ва си́ле Твое́й, Го́споди.

Ра́дуйся, всезлата́я пала́то Царя́ и Бо́га; ра́дуйся, Всечи́стая, проро́ков печа́те; ра́дуйся, честно́е иере́ев всех украше́ние.

Ра́дуйся, сосу́де чисте́йший всех Творца́; ра́дуйся, стене́ безопа́сная благочести́вых; ра́дуйся, незы́блемое всех челове́к огражде́ние.

Ра́дуйся, ле́ствице, возводя́щая от земли́ на не́бо; ра́дуйся, всех скорбя́щих ра́досте; ра́дуйся, крепча́йшее согреша́ющих прибе́жище.

Ра́дуйся, купине́ неопа́льная, ю́же Моисе́й ви́де; ра́дуйся, же́зле, прозя́бшии́ нам Цвет честны́й, зе́млю украси́вый.