Псаломтӕ (Псалмы на осетинском языке)

• Псаломтӕ

• Псаломтӕ ирон ӕвзагыл

• Разныхас

• ПСАЛОМТӔ

• 1 Псалом

• 2 Псалом

• 3 Псалом

• 4 Псалом

• 5 Псалом

• 6 Псалом

• 7 Псалом

• 8 Псалом

• 9 Псалом

• 10 Псалом

• 11 Псалом

• 12 Псалом

• 13 Псалом

• 14 Псалом

• 15 Псалом

• 16 Псалом

• 17 Псалом

• 18 Псалом

• 19 Псалом

• 20 Псалом

• 21 Псалом

• 22 Псалом

• 23 Псалом

• 24 Псалом

• 25 Псалом

• 26 Псалом

• 27 Псалом

• 28 Псалом

• 29 Псалом

• 30 Псалом

• 31 Псалом

• 32 Псалом

• 33 Псалом

• 34 Псалом

• 35 Псалом

• 36 Псалом

• 37 Псалом

• 38 Псалом

• 39 Псалом

• 40 Псалом

• 41 Псалом

• 42 Псалом

• 43 Псалом

• 44 Псалом

• 45 Псалом

• 46 Псалом

• 47 Псалом

• 48 Псалом

• 49 Псалом

• 50 Псалом

• 51 Псалом

• 52 Псалом

• 53 Псалом

• 54 Псалом

• 55 Псалом

• 56 Псалом

• 57 Псалом

• 58 Псалом

• 59 Псалом

• 60 Псалом

• 61 Псалом

• 62 Псалом

• 63 Псалом

• 64 Псалом

• 65 Псалом

• 66 Псалом

• 67 Псалом

• 68 Псалом

• 69 Псалом

• 70 Псалом

• 71 Псалом

• 72 Псалом

• 73 Псалом

• 74 Псалом

• 75 Псалом

• 76 Псалом

• 77 Псалом

• 78 Псалом

• 79 Псалом

• 80 Псалом

• 81 Псалом

• 82 Псалом

• 83 Псалом

• 84 Псалом

• 85 Псалом

• 86 Псалом

• 87 Псалом

• 88 Псалом

• 89 Псалом

• 90 Псалом

• 91 Псалом

• 92 Псалом

• 93 Псалом

• 94 Псалом

• 95 Псалом

• 96 Псалом

• 97 Псалом

• 98 Псалом

• 99 Псалом

• 100 Псалом

• 101 Псалом

• 102 Псалом

• 103 Псалом

• 104 Псалом

• 105 Псалом

• 106 Псалом

• 107 Псалом

• 108 Псалом

• 109 Псалом

• 110 Псалом

• 111 Псалом

• 112 Псалом

• 113 Псалом

• 114 Псалом

• 115 Псалом

• 116 Псалом

• 117 Псалом

• 118 Псалом

• 119 Псалом

• 120 Псалом

• 121 Псалом

• 122 Псалом

• 123 Псалом

• 124 Псалом

• 125 Псалом

• 126 Псалом

• 127 Псалом

• 128 Псалом

• 129 Псалом

• 130 Псалом

• 131 Псалом

• 132 Псалом

• 133 Псалом

• 134 Псалом

• 135 Псалом

• 136 Псалом

• 137 Псалом

• 138 Псалом

• 139 Псалом

• 140 Псалом

• 141 Псалом

• 142 Псалом

• 143 Псалом

• 144 Псалом

• 145 Псалом

• 146 Псалом

• 147 Псалом

• 148 Псалом

• 149 Псалом

• 150 Псалом

• Жанртӕ

Псаломтӕ

Библи тӕлмацгӕнӕг институт

Мӕскулы 2012

Псаломтӕ ирон ӕвзагыл

Псалмы на осетинском языке

Уӕ фиппаинӕгтӕ ӕрвитут:

ibt_inform@ibt.org.ru

Тӕлмацгӕнӕг – Уанеты Сурен

Аивадон рецензент – Джуссойты Нафи

ISBN 978-5-93943-165-1

© Институт перевода Библии, 2012

Разныхас

Зынаргъ чиныгӕсӕг! Дӕ къухы ис Библийы «Рагон Фӕдзӕхст»-ы иу хай – «Псаломтӕ» ирон ӕвзагмӕ тӕлмацӕй. Дзырд «псалом» равзӕрд грекъаг «псалмос»-ӕй. Афтӕ хонынц дины зарджытӕ, зарыдысты сӕ алыхуызон музыкалон инструментты цагъдмӕ.

Ацы зарджыты ӕмбырдгонд дзуттӕгтӕ схуыдтой «Кадджын кӕныны Чиныг», «Ӕппӕлд». Хуыцауӕй ӕппӕлын, Уымӕ дзурын, Ууыл хъуыды кӕнын у ацы чиныгӕн йӕ сӕйраг нысан. Ӕппӕт псаломтӕ дӕр алы хуызты дзурынц Хуыцауы стыр кадыл.

Уымӕй дарддӕр ма Псаломтӕ сты адӕймагӕн йӕ цины, йӕ хъыджы, знӕт ӕмӕ тасы ӕнкъарантӕ ӕвдисӕг, радӕттынц ын знаджы ныхмӕ йӕ тохы монц, цы тӕригъӕдтӕ ракӕны, уыдоныл йӕ фӕсмон.

Афтӕмӕй ацы чиныджы ӕвзагӕй алы адӕймагӕн дӕр йӕ бон у, цы ахсджиагдӕр хъуагтӕ ӕййафы, уыдон ӕппӕтхъомыс ӕмӕ хорзӕхӕй дзаг Хуыцауӕн раргом кӕнын. Иу ныхасӕй, Псаломты Чиныг у, ӕнусты сӕрты чи ахызт, Хуыцауы адӕмы ахӕм кадӕджы (гимны) ӕмӕ кувыны чиныг.

Псаломты чиныг ирон ӕвзагмӕ тӕлмацгонд ӕрцыд ӕппӕтӕй рагондӕр ӕмӕ ӕххӕстдӕр дзуттаг манускриптмӕ гӕсгӕ (Ленинградаг кодекс), Biblia Hebraica Stutgartensia бындурыл. Чиныджы сӕргӕндтӕ арӕзт сты уырыссаг синодалон тӕлмацмӕ гӕсгӕ.

Псаломты аивадон гуырӕн у рагон дзуттаг поэзи. Уый мидаг нӕй фӕлхатон ӕмзӕлдтӕ ӕмӕ бӕрцбаст рӕнхъытӕ. Йӕ сӕйраг хицӕндзинад у параллелизм. Ома дыккаг рӕнхъ фыццагӕн вӕййы ӕмбарынгӕнӕн, йӕ хъуыды йын фӕбӕлвырддӕр кӕны, кӕронмӕ йӕ райхалы. Стӕй иуӕй-иу зарджыты фыццаг рӕнхъыты ис иу кӕнӕ цалдӕр дзырды ӕмӕ амонынц, мелоди куыд аразгӕ у, уый.

Фондз ӕмӕ ссӕдз псаломы та райдайынц, «Зарӕггӕнджыты разамонӕгмӕ», зӕгъгӕ, ахӕм дзырдтӕй. Уыдон аргъуаны зарӕггӕнджыты разамонӕгӕн нысан сты. Алы чиныг дӕр фӕвӕййы Хуыцауӕн кад кӕнынӕй. Зӕгъӕм, псалом 40:14 фӕвӕййы афтӕ: «Арфӕгонд уӕд Дунедарӕг, Израилы Хуыцау, мыггагӕй-мыггагмӕ! Амен! Амен!»

Иуӕй-иу псаломтӕ фыст сты акростихы хуызы. Уый у поэзийы ахӕм архайдхуыз, ӕмӕ дзы алы рӕгъ кӕнӕ строфайы фыццаг дамгъӕтӕ ӕмдзыд сты рагон дзуттаг алфавиты фӕткимӕ. Ахӕм хуызы фыст сты 9, 24, 33, 36, 110, 111, 118 ӕмӕ 144 псаломтӕ. Цӕвиттойнаг у 118-ӕм псалом, уый сымах бакӕсдзыстут нӕ тӕлмацы.

Псаломтӕ фыстой ӕндӕр ӕмӕ ӕндӕр автортӕ, стӕй уӕд иумӕ ӕмбырдгонд ӕрцыдысты. 150 псаломы ӕмбырдгонд адихгӕнӕн ис фондз хайыл. Фыццаг хай – 1–40-ӕмы онг, дыккаг – 41–71, ӕртыккаг – 72–88, цыппӕрӕм – 89–105 ӕмӕ фӕндзӕм – 106–150-ӕммӕ.

Ацы Псалтир ирон ӕвзагмӕ фыццаг хатт тӕлмац нӕ цӕуы. 1848-ӕм азы псаломтӕ – «Стауыны (Стыдай) чиныг» – хицӕн чиныгӕй рацыдысты Санкт-Петербурджы.

1994-ӕм азы сӕ рауагътой евангелион чырыстонтӕ Ног Фӕдзӕхстимӕ иумӕ.

Ацы чиныг у ӕртыккаг тӕлмац. Ноджы раздӕр, 1798-ӕм азы, хицӕн псаломтӕ хаст ӕрцыдысты фыццаг ирон мыхуыргонд чиныг катехизисмӕ.

Библи тӕлмацы Институт арфӕ кӕны тӕлмацгӕнджытӕн, редактортӕн ӕмӕ ацы куысты чи архайдта, уыдонӕн се 'ппӕтӕн дӕр. Махӕн ӕхсызгон у, ацы чиныг ирон адӕмӕн сӕ мадӕлон ӕвзагыл кӕсыны фадат кӕй ис, уый.

Библи тӕлмацы Институт ма фӕстаг азты рауагъта Ног Фӕдзӕхст 2004 азы, Райдиан ӕмӕ Рацыд – 2006 азы.

Библи тӕлмацы Институт, Мӕскуы.

ПСАЛОМТӔ

1 Псалом

¹ Тӕхудиаг у уыцы адӕймаг,
      фыдлӕгты уынаффӕйыл чи нӕ цӕуы,
      тӕригъӕдджынты фӕндагыл лӕуд чи нӕу,
      ӕнӕхуыцӕутты ныхасы чи нӕ бады.
² Фӕлӕ йын ӕхцон у Хуыцауы ӕгъдау,
      ӕмӕ ӕхсӕвӕй-бонӕй ууыл сты йӕ хъуыдытӕ.
³ Уый у, афоныл дыргъ чи дӕтты
      ӕмӕ йӕ сыфтӕр кӕмӕн нӕ руайы,
      донбыл сагъд ахӕм бӕласау;
      цавӕрфӕнды хъуыддагмӕ ма бавналӕд – бантысдзӕн ын.

⁴ Фыдлӕгты хабар та афтӕ нӕу:
      уыдон сты, дымгӕ кӕй ныффӕйлауы,
⁵ уыцы зыгуымау. Уымӕ гӕсгӕ фыдлӕгтӕ
      не сраст уыдзысты тӕрхоны,
      тӕригъӕдджынтӕ – рӕстыты ӕхсӕн.
⁶ Уымӕн ӕмӕ Хуыцау Йӕ цӕст дары рӕстыты фӕндагмӕ,
      фыдлӕгты фӕндаг та байсӕфдзӕни.

2 Псалом

¹ Цӕмӕн сызнӕт сты адӕмтӕ,
      дзыллӕтӕ цӕмӕн нывӕндынц,
      кӕмӕй ницы рауайдзӕн, ахӕм фӕнд?
² Сыстадысты зӕххон паддзӕхтӕ,
      ӕлдӕрттӕ иумӕ уынаффӕ кӕнынц
      Хуыцауы ӕмӕ Йе 'взӕрсты ныхмӕ:
³ «Арӕдувӕм сын сӕ рӕхыстӕ
      ӕмӕ нӕ бӕрзӕйӕ аппарӕм се 'фсондз».

⁴ Уӕлӕрвты Цӕрӕг бахуддзӕн уыдоныл,
      Хуыцау сӕ фегад кӕндзӕн.
⁵ Уӕд сын зӕгъдзӕни тызмӕгӕй
      ӕмӕ сӕ Йӕ карзӕй ӕркӕндзӕни фӕдисы уавӕрмӕ:
⁶ «Ӕз Мӕ Паддзахы сӕвӕрдтон Сионы[1] сӕргъы –
      Мӕ сыгъдӕг хохы сӕргъы».

⁷ Ӕз расиддзынӕн Хуыцауы уынаффӕ:
      Уый Мын загъта: «Ды Мӕ Фырт Дӕ,
      Ӕз абон сдӕн Дӕ Фыд.
⁸ Ракур ӕмӕ Дын адӕмты бакӕндзынӕн Дӕ бар,
      зӕхх кӕрӕй-кӕронмӕ уыдзӕни Дӕ дӕлбар.
⁹ Цӕвдзынӕ сӕ ӕфсӕн лӕдзӕгӕй,
      ӕлыг мигӕнӕнау сӕ ныппырх кӕндзынӕ».

¹⁰ Уӕдӕ уӕм ныр зонд ӕрцӕуӕд, паддзӕхтӕ,
      уӕхи ӕрӕмбарут, зӕххон хицӕуттӕ!
¹¹ Лӕггад кӕнут Хуыцауӕн тӕрсгӕйӕ,
      цин кӕнут Уый разы ризгӕйӕ.
¹² Ӕрзоныг ут Фырты раз,
      цӕмӕй ма смӕстджын уа,
      ӕмӕ фӕндагыл ма бабын уат.
      Уымӕн ӕмӕ рӕхджы Йӕ маст рафыцдзӕн.
      Тӕхудиаг сты,
      йӕ зӕрдӕ Йыл чи дары, уыдон се 'ппӕт дӕр.

3 Псалом

¹ Давиды псалом.
      Йӕ фыртӕй, Авессаломӕй, куы фӕлыгъди,
      уый фӕдыл.

² О Дунедарӕг, куыд сбирӕ сты ме знӕгтӕ!
      Бирӕтӕ сыстадысты мӕ ныхмӕ,
³ Бирӕтӕ фӕзӕгъынц мӕнӕй:
      «Хуыцауӕй йын ӕххуыс нӕ уыдзӕни». ||

⁴ Фӕлӕ Ды, Хуыцау, мӕ уарт Дӕ, мӕ намыс;
      мӕ сӕр мын ӕгадмӕ нӕ уадзыс.
⁵ Хъӕрӕй кувын Хуыцаумӕ,
      ӕмӕ мын дзуапп дӕтты Йӕ сыгъдӕг хохӕй. ||

⁶ Ӕрхуыссын, бафынӕй вӕййын ӕмӕ сыстын,
      уымӕн ӕмӕ Хуыцау хъахъхъӕны мӕн.
⁷ Фӕйнӕрдыгӕй мыл мингӕйттӕй чи ӕртыхст,
      уыдонӕй нӕ фӕтӕрсдзынӕн.

⁸ Рахӕц мӕ сӕрыл, Дунедарӕг,
      фервӕзын мӕ кӕн, мӕ Хуыцау!
      Уымӕн ӕмӕ Ды ныццӕвыс
      ме 'ппӕт знӕгты ӕхсӕрфӕрстӕ,
      ныссӕттыс фыдлӕгты дӕндӕгтӕ.

⁹ Ирвӕзындзинад Хуыцауӕй у.
      Дӕ адӕмыл уӕд Дӕ арфӕ. ||

4 Псалом

¹ Зарӕггӕнджыты разамонӕгмӕ;
      хъисфӕндыртыл цӕгъдынӕн.
      Давиды псалом.
² Куы Дӕм скувын, уӕд-иу мӕ фехъус,
      мӕ рӕстады Хуыцау!
      Мӕ тыхсты бон Ды уыдтӕ мӕ удӕнцой.
      Батӕригъӕд мын кӕн,
      дзуапп ратт мӕ куывдӕн.

³ О адӕм, кӕдмӕ калдзыстут цъыф мӕ кадыл?
      Кӕдмӕ уарздзыстут мӕнг хъуыддӕгтӕ,
      кӕдмӕ ӕмхиц уыдзыстут фӕливынмӕ? ||

⁴ Фӕлӕ зонут: Хуыцау Йӕхицӕн
      сӕвзӕрста Йӕ сыгъдӕджы;
      куы скувын Хуыцаумӕ, уӕд мӕ фехъусы.
⁵ Уӕ масты фӕдыл ма цӕут –
      тӕригъӕды бафтдзыстут.
      Уӕ фынӕйы размӕ
      зӕрдиагӕй ахъуыды кӕнут ӕмӕ ӕрӕнцайут. ||
⁶ Хӕссут рӕстады нывондтӕ
      ӕмӕ Дунедарӕгыл дарут уӕ зӕрдӕ.

⁷ Бирӕтӕ зӕгъынц:
      «Чи нын ӕрхӕсдзӕни фарн?»
      Равдис нӕм, Хуыцау, Дӕ цӕсгомы рухс!
⁸ Ды мӕ зӕрдӕйӕн ӕрхастай цин,
      ӕмӕ уый уыдоны бирӕ хор ӕмӕ сӕнӕй
      фылдӕр у.
⁹ Ӕнцад-ӕнцойӕ ӕрхуыссын ӕз
      ӕмӕ бафынӕй вӕййын,
      уымӕн ӕмӕ, мӕ Хуыцау,
      ӕрмӕст Дӕ фӕрцы цӕрын ӕдасӕй.

5 Псалом

¹ Зарӕггӕнджыты разамонӕгмӕ;
      уадындзтыл цӕгъдынӕн.
      Давиды псалом.

² О Хуыцау, фехъус мӕ ныхӕстӕ,
      бамбар мын мӕ уынӕргъын.
³ Дӕ хъус ӕрдар мӕ дзыназынмӕ,
      мӕ Паддзах ӕмӕ мӕ Хуыцау!
      Уымӕн ӕмӕ Дӕумӕ кувын.
⁴ О Хуыцау, сӕумӕйӕ фехъус мӕ хъӕлӕс,
      боныцъӕхтыл Дӕм ӕрхӕссдзынӕн мӕ курдиӕттӕ
      ӕмӕ ӕнхъӕлмӕ кӕсдзынӕн.

⁵ Фыдмитӕ Чи нӕ уарзы, Ды уыцы Хуыцау дӕ;
      фыдлӕгӕн бынат нӕй Дӕумӕ.
⁶ Сӕрыстыртӕн Дӕ цӕсгомы раз
      ӕрлӕууын сӕ бон нӕу;
      ӕппӕт фыдгӕнджытӕ Дын ӕнӕуынон сты.
⁷ Ды фесафдзынӕ фӕлитойты;
      Хуыцауӕн ӕлгъаг сты тугцъир ӕмӕ мӕнгард.
⁸ Ӕз та Де стыр хорзӕхмӕ гӕсгӕ
      бацӕудзынӕн Дӕ Хӕдзармӕ;
      нымдгӕнгӕйӕ ныллӕг акувдзынӕн Дӕуӕн
      Дӕ рухс Кувӕндоны.

⁹ О Дунедарӕг, бацамон мын Дӕ рӕстад,
      уымӕн ӕмӕ ме знӕгтӕ мӕ алыварс сты –
      ӕмраст скӕн мӕ размӕ Дӕ фӕндаг.
¹⁰ Уымӕн ӕмӕ сӕ дзыхӕй раст ныхас нӕ рацӕуы;
      сӕ зӕрдӕ – фыдбылызмӕ арӕзт,
      сӕ хурх – гом ингӕн, фӕливынц ӕвзагӕй.
¹¹ Стӕрхон сын кӕн, Хуыцау,
      сӕ фыдвӕндтӕ сын сӕфтыхос фӕуӕнт;
      сӕ фыдмитӕ бирӕ сты,
      ӕмӕ сыл Дӕхи атигъ кӕн,
      уымӕн ӕмӕ Дӕ ныхмӕ сыстадысты.

¹² Цин кӕнӕнт, Дӕуыл йӕ зӕрдӕ чи дары,
      райӕнт мыггагмӕ се 'ппӕт дӕр.
      Дӕ ном чи уарзы, уыдон бакӕн Дӕ дӕлбазыр,
      ӕмӕ уыдзынӕ сӕ цины сӕр.
¹³ Уымӕн ӕмӕ рӕстгӕнӕгӕн
      арфӕ кӕныс, Дунедарӕг,
      Дӕ хорзӕх ӕй, уартау, ӕмбӕрзы алырдыгӕй.

6 Псалом

¹ Зарӕггӕнджыты разамонӕгмӕ;
      хъисфӕндыртыл: астхъисоныл.
      Давиды псалом.

² О Дунедарӕг, тызмӕгӕй мын ма уайдзӕф кӕн;
      карзӕй мӕ ма бафхӕр.
³ Батӕригъӕд мын кӕн, Хуыцау,
      уымӕн ӕмӕ ӕз ӕнӕбон дӕн;
      сдзӕбӕх мӕ кӕн, Дунедарӕг,
      ме стджытӕ ӕддӕг-мидӕг ауадысты.
⁴ Мӕ уд хъизӕмары бахауд.
      Кӕдмӕ афтӕ уыдзӕни, Дунедарӕг, кӕдмӕ?

⁵ Де 'ргом мӕм раздах, Хуыцау,
      мӕ цард мын бахъахъхъӕн;
      фервӕзын мӕ кӕн Дӕ хорзӕхы руаджы.
⁶ Марды зӕрдыл нал ӕрлӕудзынӕ,
      ингӕны чи стаудзӕни Дӕу?

⁷ Сфӕлмӕцыдтӕн мӕ уынӕргъынӕй;
      ӕрвылӕхсӕв фӕкӕуын мӕ сынтӕджы,
      мӕ цӕссыгӕй цӕхсын мӕ хуыссӕн;
⁸ Сагъӕсӕй бамынӕг мӕ цӕсты рухс,
      ме знӕгты аххосӕй рӕстмӕ нал уынын.

⁹ Аиуварс ут мӕнӕй уе 'ппӕт дӕр,
      фыдӕхӕн кусджытӕ;
      Дунедарӕг фехъуыста мӕ кӕуын.
¹⁰ Фехъуыста Хуыцау мӕ лӕгъстӕ,
      Дунедарӕг айста мӕ куывд.
¹¹ Фӕхудинаг уыдзысты ме 'ппӕт знӕгтӕ,
      баззайдзысты састы бынаты,
      аздӕхдзысты ӕмӕ ӕваст фегад уыдзысты.

7 Псалом

¹ Вениамины хӕдзарвӕндагӕй рацӕуӕг
      Кушы ныхӕсты фӕдыл
      Давид Хуыцауӕн кӕй азарыд,
      уыцы ӕнкъард зарӕг.

² О Дунедарӕг, мӕ Хуыцау,
      Дӕ дӕлбазыр ӕмбӕхсын;
      фервӕзын мӕ кӕн,
      баиргъӕв мӕ ме 'ппӕт фӕдылзилджытӕй.
³ Науӕд, тугдзых домбӕйттау,
      фелвасдзысты мӕ уд
      ӕмӕ йӕ ныскъуыдтӕ кӕндзысты,
      ирвӕзынгӕнӕг мын куынӕ уа, уӕд.

⁴ О Дунедарӕг, мӕ Хуыцау,
      кӕд ӕвзӕрӕй исты сарӕзтон,
      кӕд мӕ къухтӕй фыд ракодтон,
⁵ Кӕд хорз ӕвзӕрӕй бафыстон
      кӕнӕ, ӕназымӕй ӕнӕуынон кӕмӕн сдӕн,
      уымӕн фыдбылыз сарӕзтон,
⁶ Уӕд знаг мӕн амарынмӕ зилӕд мӕ фӕдыл
      ӕмӕ йын бантысӕд,
      зӕххы хай мӕ бакӕнӕд,
      мӕ кад рыгӕй уӕлдай мауал уӕд. ||

⁷ Рацу тызмӕгӕй, Дунедарӕг;
      сыст ме схъӕл знӕгты ныхмӕ.
      Райхъал у ӕмӕ рахӕсс тӕрхон
      Дӕ уагӕвӕрдмӕ гӕсгӕ.
⁸ Ӕрӕмбырд уӕнт алы адӕмтӕ
      ӕмӕ ӕрлӕууӕнт Дӕ алыварс;
      бӕрзондӕй сыл Дӕ цӕст ахӕсс.
⁹ Дунедарӕг тӕрхон кӕны адӕмтӕн.
      Тӕрхон мын рахӕсс, Хуыцау,
      куыд раст дӕн ӕмӕ куыд ӕназым дӕн, афтӕ.
¹⁰ О рӕстгӕнӕг Хуыцау,
      фыдлӕгты хӕрам митӕн ӕрцӕуӕд кӕрон,
      рӕстылдзӕуӕгӕн та ратт хъару –
      Ды фӕлварыс зӕрдӕтӕ ӕмӕ фӕндтӕ.

¹¹ Хуыцау мӕ уарт у –
      ирвӕзын кӕны рӕстзӕрдӕты.
¹² Хуыцау ӕнӕхӕрам тӕрхонгӕнӕг у,
      Хуыцау алы бон дӕр карзӕй домы дзуапп.
¹³ Куы нӕ Йӕм раздӕхой,
      уӕд сцыргъ кӕндзӕн Йӕ цирхъ,
      айваздзӕн Йӕ ӕрдынбос,
      сараздзӕн ӕй бӕлвырд мысанмӕ.
¹⁴ Цӕттӕ кӕны мӕлӕтхӕссӕг хӕцӕнгӕрзтӕ;
      аразы Йӕ зынг фаттӕ.

¹⁵ Мӕнӕ фыдлӕг йӕ зӕрдӕйы
      байтыдта тӕригъӕды нӕмыг,
      уый ауагъта фыдӕхы уидӕгтӕ
      ӕмӕ ӕрхаста дыргъ – мӕнгдзинад.
¹⁶ Иннӕмӕн къахта дзыхъхъ,
      сцӕттӕ йӕ кодта,
      ӕмӕ йӕ къахт уӕрмы ныххаудта йӕхӕдӕг.
¹⁷ Йӕ хӕрам ӕрцӕудзӕн йӕхи сӕрыл,
      йӕ фыдми ӕрхаудзӕн йӕ тенкайыл.

¹⁸ Ӕз Дунедарӕджы стауын Йӕ рӕстады тыххӕй,
      зарын Бӕрзонд Хуыцауы номы кадӕн.

8 Псалом

¹ Зарӕггӕнджыты разамонӕгмӕ;
      «Гат»-ы[2] зӕлтӕм гӕсгӕ.
      Давиды псалом.

² О Дунедарӕг, нӕ Хуыцау,
      куыд нӕры ӕппӕт зӕххыл Дӕ ном!

      Ды скодтай Дӕ кад уӕлӕрвтӕй бӕрзонддӕр.
³ Сабитӕ ӕмӕ ноггуырдтӕ Дӕу кӕй стауынц,
      уымӕй скодтай тых
      ӕмӕ йӕ ӕрӕвӕрдтай Де знӕгты ныхмӕ,
      фыдгул ӕмӕ мастисӕг
      ӕнӕдзырды бон куыд фӕуой, афтӕ.

⁴ Дӕ къухты фӕллойыл –
      арвыл Ды кӕй сӕвӕрдтай,
      уыцы мӕй ӕмӕ стъалытыл
      куы ахӕссын мӕ цӕст,
⁵ Уӕд фӕзӕгъын: цы у адӕймаг,
      ӕмӕ Дӕ зӕрдыл лӕууа,
      кӕнӕ цы у лӕджы фырт, ӕмӕ йыл мӕт кӕнай?
⁶ Зӕдтӕй[3] йӕ бирӕ дӕлдӕр не 'вӕрыс,
      паддзахау ӕй скодтай
      кадджын ӕмӕ намысджын.
⁷ Дӕ къухтӕй цы сарӕзтай,
      ӕппӕт уыдонӕн ӕй сӕвӕрдтай хицауӕй;
      ӕппӕт дӕр ын бакодтай йӕ дӕлбар:
⁸ Ӕппӕт фысты ӕмӕ галты, сырдты,
⁹ Уӕларвон мӕргъты, денджызон кӕсӕгты –
      фурды арф фӕндӕгтыл ӕппӕт змӕлджыты.

¹⁰ О Дунедарӕг, нӕ Хуыцау,
      куыд нӕры ӕппӕт зӕххыл Дӕ ном!

9 Псалом

¹ Зарӕггӕнджыты разамонӕгмӕ;
      «Лабены мӕлӕт»-ы зӕлтӕм гӕсгӕ.
      Давиды псалом.

² Зӕрдӕбынӕй стаудзынӕн Дӕу, Хуыцау,
      дзурдзынӕн Дӕ бирӕ диссӕгты тыххӕй.
³ Дӕуыл уыдзӕни мӕ цин ӕмӕ райдзынӕн,
      зардзынӕн Дӕ номыл, Бӕрзонд Хуыцау.

⁴ Ме знӕгтӕ лидзынмӕ фесты
      ӕмӕ бындзагъд фесты Дӕ разы.
⁵ Уымӕн ӕмӕ Ды ӕвзӕрстай мӕ хъуыддаг
      ӕмӕ мӕ рӕстад;
      Ды сбадтӕ паддзахы бадӕны
      раст тӕрхон рахӕссынмӕ.
⁶ Ды фӕзылын кодтай адӕмты,
      бабын кодтай фыдлӕгты,
      сӕ фӕд дӕр сын фесӕфтай мыггагмӕ.
⁷ Знӕгтӕ бынысӕфт фесты,
      ныппырх сын кодтай сӕ сахартӕ;
      сӕ кой дӕр нал ис.
⁸ Дунедарӕг та паддзахиуӕг кӕны мыггагмӕ!
      Йӕ паддзахы бадӕн фидаргонд у
      тӕрхон рахӕссынмӕ.
⁹ Дун-дунейӕн кӕндзӕн раст тӕрхон,
      адӕмты хъысмӕт ӕвзардзӕн ӕнӕхӕрамӕй.
¹⁰ Ӕфхӕрд адӕймагӕн
      Дунедарӕг уыдзӕн йӕ мӕсыг,
      мӕсыг ын уыдзӕн йӕ зыны бон.
¹¹ Дӕ ном чи зоны, Хуыцау,
      уыдонӕн сӕ ныфс дӕ;
      уымӕн ӕмӕ Дӕу чи агуры, уыдон нӕ ныууадзыс.

¹² Зарут Сионыл цӕрӕг Дунедарӕгӕн,
      адӕмтӕн хъусын кӕнут Йӕ хъуыддӕгтӕ!
¹³ Уымӕн ӕмӕ Уый тугкалджытӕй
      дзуапп домӕг у;
      Йӕ зӕрдыл дары ӕфхӕрдтыты,
      нӕ дзы рох кӕны сӕ дзыназын.

¹⁴ Батӕригъӕд мын кӕн, Дунедарӕг!
      Ме сӕфтмӕ бӕлджытӕ
      мӕн удхарӕй куыд марынц,
      уымӕ ӕркӕс Ды,
      байс мӕ мӕлӕты комӕй.
¹⁵ Ӕмӕ ӕппӕлдзынӕн Дӕуӕй
      Сионы чызджы[4] кулдуары раз,
      цин кӕндзынӕн, кӕй мӕ фервӕзын кодтай, ууыл.

¹⁶ Адӕмтӕ ныххаудысты,
      сӕхӕдӕг цы уӕрм къахтой, уым;
      сусӕг ран цы къӕппӕг сӕвӕрдтой,
      уый сӕ ӕрцахста сӕ къахӕй.
¹⁷ Дунедарӕг Йӕ раст тӕрхонӕй
      базонын кодта Йӕхи;
      фыдлӕгӕн йӕ хъуыддӕгтӕ
      йӕхицӕн уыдзысты къӕппӕг. ||

¹⁸ Фыдлӕгтӕ, Хуыцауы рохгӕнӕг адӕмтӕ –
      се 'ппӕт дӕр ацӕудзысты дӕлдзӕхмӕ.
¹⁹ Уымӕн ӕмӕ гӕвзыкк
      рохуаты нӕ баззайдзӕн мыггагмӕ,
      мӕгуыртӕн сӕ зӕрдӕдарӕн нӕ фесӕфдзӕн.

²⁰ Рацу, Дунедарӕг, цӕмӕй адӕймаг
      бӕрзонд ма сӕвӕра йӕхи;
      уадз адӕмтӕн тӕрхон цӕуа Дӕ цӕсгомы раз.
²¹ Тас сӕ бауадз, Хуыцау!
      Уадз ӕмӕ адӕмтӕ зоной,
      адӕймӕгтӕ йеддӕмӕ кӕй ницы сты, уый. ||

²² Дӕрддзӕф цӕмӕн лӕууыс, Дунедарӕг,
      цӕмӕн ӕмбӕхсыс зын заманы Дӕхи?
²³ Фыдлӕг схъӕл у, ӕгъатырӕй зилы мӕгуыры
      фӕдыл, ӕмӕ
      йӕ фыдвӕндты къӕппӕджы бахауы уый.
²⁴ Уымӕн ӕмӕ фыдлӕг хъал у йӕ монцтӕй;
      буц у йе 'нӕфсисӕй ӕмӕ фауы Дунедарӕджы.
²⁵ Фыдлӕг йӕ сӕрыстырӕй нӕ агуры Хуыцауы:
      «Хуыцау нӕй», – ахӕм сты йе 'ппӕт хъуыдытӕ;
²⁶ Кӕддӕриддӕр уый пайдайыл хӕст у;
      Дӕ уынаффӕтӕм дӕрддзӕф лӕууы;
      йе 'ппӕт знӕгтӕм ӕнӕрвӕссон цӕстӕй кӕсы.
²⁷ Йӕхицӕн фӕзӕгъы:
      «Ницы хуызы фӕцуддзынӕн,
      фӕлтӕрӕй-фӕлтӕрмӕ мыл
      фыдбылыз не 'рцӕудзӕн».
²⁸ Йӕ ком дзаг у ӕлгъыстӕй,
      хин ӕмӕ ӕртхъирӕнӕй;
      йӕ дӕлӕвзаг – знаггад ӕмӕ фыдӕх.
²⁹ Кӕйдӕр размӕ бабады фӕскъул;
      кӕм ӕй ничи уыны, уым амары ӕназымы,
      сусӕгӕй йӕ цӕст дары мӕгуырмӕ.
³⁰ Хуыккомы домбай куыд ӕрхуыссы,
      афтӕ ӕрӕмбӕхст фӕсвӕд
      ӕмӕ ӕнхъӕлмӕ кӕсы;
      сусӕгӕй дары йӕ цӕст,
      цӕмӕй йӕхи ныццӕва мӕгуырыл;
      йӕхи йыл ныццӕвы
      ӕмӕ йӕ баппары йӕ къӕппӕджы.
³¹ Ӕрӕмбӕхсы, ӕрбырсы ӕнӕбоны
      ӕмӕ дзы йӕ фидар ныхтӕ ныссадзы.
³² Йӕхицӕн фӕзӕгъы:
      «Йӕ хъуыдыйы нӕ дӕн Хуыцауӕн!
      Йӕ цӕсгом бамбӕрзта, никуы мӕ фендзӕни».

³³ Рацу, Дунедарӕг Хуыцау, равдис Дӕ цонджы тых,
      ма ферох кӕн ӕфхӕрдты.
³⁴ Фыдлӕг цӕмӕн фауы Хуыцауы,
      хинымӕр цӕмӕн фӕзӕгъы:
      «Нӕ мӕ бадомдзынӕ дзуапп, Хуыцау!»
³⁵ Ды уыныс, Ды бафиппайыс маст ӕмӕ бӕллӕх
      ӕмӕ кӕддӕриддӕр цӕттӕ дӕ ӕххуысмӕ;
      мӕгуыр Дӕуыл фӕдзӕхсы йӕхи;
      сидзӕрӕн Ды дӕ ӕххуысгӕнӕг.
³⁶ Фыдлӕджы ӕмӕ галиуы тых басӕтт,
      бафхӕр ӕй йе 'взӕр миты тыххӕй,
      йӕ фӕд дӕр куыд нал уа, афтӕ.

³⁷ Мыггагмӕйы Паддзах у Дунедарӕг;
      муртаттӕн Йӕ зӕххыл сӕ фӕд дӕр нал уыдзӕн.
³⁸ Ды зоныс, Хуыцау, сӕрныллӕджыты бӕллицтӕ;
      сӕ зӕрдӕты сын бауадзыс ныфс,
      сӕ курдиат сын хъусыс,
³⁹ Цӕмӕй бахъахъхъӕнай сидзӕры ӕмӕ ӕфхӕрды,
      ӕмӕ зӕххон адӕймаг а-дунейыл мауал ӕфтауа тас.

10 Псалом

¹ Зарӕггӕнджыты разамонӕгмӕ.
      Давиды псалом.

      Хуыцауыл дарын мӕ зӕрдӕ.
      Уый куыд дзурут мӕ удӕн:
      «Маргъау атӕх дӕхи хӕхтӕм»?
² Мӕнӕ фыдлӕгтӕ айвӕзтой ӕрдынбос –
      сӕ фат ӕрӕвӕрдтой ӕрдыныл,
      талынджы йӕ рӕстгӕнӕджы зӕрдӕйыл
      бауадзынӕввонг.
³ Бындуртӕ пырхгонд куы уой,
      уӕд ма рӕстгӕнӕджы бон дӕр цы у?

⁴ Хуыцау Йӕ сыгъдӕг Кувӕндоны ис,
      Йӕ паддзахы бадӕн – уӕлӕрвты;
      Йӕ цӕст нӕ исы адӕмӕй,
      фӕлвары сӕ Йӕ цӕстӕнгасӕй.
⁵ Хуыцау фӕлвары рӕстгӕнӕджы ӕмӕ фыдлӕджы,
      тыхмимӕ ӕмхиц чи у, уыдон Ын ӕнӕуынон сты.
⁶ Фыдлӕгыл уарынау ӕркалдзӕни
      судзгӕ цӕхӕр ӕмӕ сондон;
      уыраугӕ дымгӕ – сӕ хай.

⁷ Уымӕн ӕмӕ Хуыцау рӕстгӕнӕг у
      ӕмӕ уарзы рӕстдзинад;
      рӕстылдзӕуӕг ын фендзӕн Йӕ цӕсгом.

11 Псалом

¹ Зарӕггӕнджыты разамонӕгмӕ;
      астхъисоныл.
      Давиды псалом.

² Баххуыс кӕн, Дунедарӕг,
      уымӕн ӕмӕ нал ис рӕстгӕнӕг,
      адӕмы ӕхсӕн Дӕуыл ӕнувыдтӕ нал баззади.
³ Алчидӕр хионӕн дзуры мӕнг; се 'взӕгтӕ сты козбау,
      дзурынц хинӕйдзаг зӕрдӕйӕ.

⁴ Дунедарӕг сӕхгӕнӕд алы козбауы
      ӕмӕ алы схъӕлдзырд лӕджы дзых,
⁵ Афтӕ чи дзуры: «Не 'взаджы фӕрцы
      сбӕрзонд уыдзыстӕм, нӕ дзыхтӕ нӕ уӕлӕ сты,
      ӕлдар нын чи у?»

⁶ «Ӕфхӕрдтыты хъизӕмары
      ӕмӕ мӕгуырты хъӕрзыны сӕраппонд
      рацӕудзынӕн Ӕз, зӕгъы Дунедарӕг,
      ӕмӕ хинӕй рацӕуынмӕ кӕуыл хъавынц,
      уыдоны баиргъӕвдзынӕн».
⁷ Дунедарӕджы ныхӕстӕ – сыгъдӕг ныхӕстӕ;
      уыдон сты сыгъдӕг ӕвзистау,
      ӕлыгӕй конд пецы фӕлвӕрд, авд хатты фӕлвӕрд.

⁸ Ды, Дунедарӕг, бахъахъхъӕндзынӕ ӕфхӕрдтыты,
      ӕнусмӕ сӕ бахиздзынӕ ацы мыггагӕй,
⁹ Науӕд адӕмы ницӕйӕгтӕ сбӕрзонд сты,
      ӕмӕ алы ран дӕр сарӕх сты фыдлӕгтӕ.

12 Псалом

¹ Зарӕггӕнджыты разамонӕгмӕ.
      Давиды псалом.
² Кӕдмӕ уыдзынӕн рох Дӕуӕй, Дунедарӕг,
      кӕдмӕ ӕмбӕхсдзынӕ мӕнӕй Дӕ цӕсгом?
³ Кӕдмӕ нывӕндон мӕ фӕндтӕ мӕ зӕрдӕйы,
      кӕдмӕ хӕссон мӕ уды хъыг бонӕй-бонмӕ?
      Ме знаг мыл кӕдмӕ уӕлахиз уыдзӕни?

⁴ Ӕркӕс мӕм, Дунедарӕг, мӕ Хуыцау!
      Царды рухс ратт мӕ цӕстытӕн,
      цӕмӕй мӕрдвынӕй ма бауон,
⁵ Ӕмӕ знаг ма зӕгъа: «Ӕз ыл фӕтых дӕн»;
      науӕд куы фӕцудон,
      уӕд цины хос уыдзынӕн ме знӕгтӕн.

⁶ Ӕз та мӕ зӕрдӕ Дӕ бирӕ уарзтыл дарын,
      Ды мын ӕрхастай ирвӕзындзинад,
      ӕмӕ сцин кӕндзӕн мӕ уд;
      зардзынӕн Хуыцауӕн – Уый хорзы бацыди мӕнӕн.

13 Псалом

¹ Зарӕггӕнджыты разамонӕгмӕ.
      Давиды псалом.

      Ӕнӕзонд хинымӕр загъта: «Хуыцау нӕй».
      Уыдон фехӕлдысты, бакодтой ӕбуалгъ митӕ;
      хӕрзгӕнӕг нӕй. Иу дӕр нӕй.

² Дунедарӕг уӕлӕрвтӕй ӕркасти адӕммӕ:
      Хуыцауы чи агуры, ахӕм ӕмбаргӕ нӕй? Иу дӕр нӕй?
³ Се 'ппӕт дӕр ныдздзӕгъӕл сты, сӕфтмӕ ӕрцыдысты;
      хӕрзгӕнӕг нӕй, нӕй иу дӕр.

⁴ Мӕ адӕмы дзулау чи хӕры
      ӕмӕ Дунедарӕджы чи нӕ агуры,
      ӕппӕт уыцы фыдгӕнджытӕ
      сӕхи никуы ӕрӕмбардзысты?
⁵ Бӕлвырд, стыр азар сӕ бацӕудзӕн,
      уымӕн ӕмӕ Хуыцау рӕстгӕнӕгимӕ ис.
⁶ Сымах худут мӕгуыры фӕндиӕгтыл,
      фӕлӕ уымӕн Дунедарӕг йӕ хъахъхъӕнӕг у.

⁷ Израилӕн ирвӕзындзинад Сионӕй ӕрцӕудзӕн!
      Дунедарӕг Йӕ адӕмы уацарӕй куы ракӕна,
      уӕд райдзӕн Иаков[5], ӕмӕ цин кӕндзӕн Израил.

14 Псалом

¹ Давиды псалом.

      Дунедарӕг, кӕй бон у Дӕ рухс цатыры ӕрлӕууын?
      Кӕй бон у Дӕ сыгъдӕг хохыл ӕрцӕрын?

² Ӕнаиппӕй чи цӕры, раст кӕй хъуыддӕгтӕ сты,
      ӕцӕгад кӕй зӕрдӕйӕ рацӕуы, уый бон бауыдзӕн.
³ Хахуыр кӕй ӕвзагыл нӕ бады,
      йӕ хӕларӕн фыдбылыз чи нӕ аразы,
      иннӕйы фыдгой чи нӕ кӕны, уый бон бауыдзӕн.
⁴ Хуыцауӕй хъодыгонд ӕлгъаг кӕмӕн у,
      фӕлӕ Дунедарӕджы нымайӕгӕн аргъ чи кӕны,
      уый бон бауыдзӕн;
      йӕ сомы сӕххӕст кӕнын кӕй нал фӕнды,
      фӕлӕ йӕ уӕддӕр чи нӕ сайы, уый бон бауыдзӕн.
⁵ Лӕскъыл ӕхца чи нӕ дӕтты,
      расты фӕзылын кӕныны тыххӕй
      гӕртам чи нӕ исы, уый бон бауыдзӕн.
      Афтӕ чи кӕны,
      уый мыггагмӕ дӕр нӕ фӕцуддзӕн.

15 Псалом

¹ Давиды кадӕг.

      О Хуыцау, бахиз мӕ – Дӕуӕй ӕвӕрын ныфс.

² Ӕз загътон Хуыцауӕн: «Ды мӕ Паддзах дӕ,
      ме 'ппӕт хӕрзтӕ Дӕуӕй сты.
³ Зӕххыл Дын чи ис,
      Дӕ уыцы сыгъдӕджытӕм,
      Де 'взӕрстытӕм тырны мӕ зӕрдӕ.
⁴ Ӕндӕр хуыцӕутты фӕдыл цӕуджытӕ
      хъыгтыл бафтӕнт;
      семӕ сӕ нывӕндты туг нӕ рауадздзынӕн,
      ме 'взагыл сӕ ном нӕ уыдзӕн.

⁵ Хуыцау – мӕ амонд ӕмӕ мӕ дзаг кӕхц;
      Дӕ къухы ис мӕ хъысмӕт.
⁶ Мӕ хуымы ауӕдзтӕ ацыдысты
      тӕккӕ хуыздӕр рӕтты;
      райгонд дӕн мӕ амондӕй.
⁷ Арфӕ кӕнын мӕнӕн зонд бацамонӕг Дунедарӕгӕн;
      мӕ зӕрдӕ мӕ ахуыр кӕны суанг ӕхсӕв дӕр.

⁸ Ӕз кӕддӕриддӕр мӕ разы уынын Дунедарӕджы;
      уымӕн ӕмӕ Уый мӕ рахиз фарс лӕууы –
      нӕ фӕцуддзынӕн.
⁹ Уый тыххӕй райы мӕ зӕрдӕ, ӕмӕ цин кӕны мӕ уд;
      суанг мӕ буар дӕр ӕрӕнцади ӕдасӕй.
¹⁰ Ды мӕ уды нӕ ныууадздзынӕ мӕрдты бӕстӕйы
      ӕмӕ Дӕ сыгъдӕджы ӕмбийын нӕ бауадздзынӕ.
¹¹ Ды мын бацамондзынӕ царды фӕндаг;
      ӕрмӕст Демӕ базонӕн ис ӕххӕст цины ад;
      тӕхудиаджы хорзӕх Дӕ рахиз къухы ис ӕнусмӕ.

16 Псалом

¹ Давиды куывд.

      Фехъус, Дунедарӕг, мӕ рӕстдзинад,
      Де 'ргом раздах мӕ дзыназынмӕ,
      Дӕ хъус ӕрдар ӕнӕхин ӕвзаджы куывдмӕ.
² Дӕуӕй мын рацӕуӕд тӕрхон,
      Дӕ цӕстытӕ фенӕнт мӕ рӕстад.

³ Ды бафӕлвӕрдтай мӕ зӕрдӕ,
      бабӕрӕг мӕ кодтай ӕхсӕв,
      басгӕрстай мӕ ӕмӕ мӕм ницы ссардтай;
      мӕ хъуыдыты цы ис, мӕ былалгъыл дӕр уый ис.
⁴ Ме 'рвылбоны хъуыддӕгты, Дӕ ныхасмӕ гӕсгӕ,
      мӕхи хызтон ӕфхӕрӕг разынынӕй.
⁵ Фидар сты мӕ къахдзӕфтӕ Дӕ фӕндагыл;
      нӕ фӕцуддзӕн мӕ фад.

⁶ Дӕумӕ сидын, Хуыцау,
      уымӕн ӕмӕ ӕрмӕст Ды фехъусдзынӕ мӕн;
      раздах мӕм Де 'ргом ӕмӕ фехъус мӕ дзырдтӕ.
⁷ Равдис Дӕ диссаджы хорзӕх;
      Дӕуыл йӕ зӕрдӕ чи дары, уыдон ирвӕзын кӕныс
      Дӕ рахиз цонджы ныхмӕ цӕуджытӕй.
⁸ Бахъахъхъӕн мӕ цӕстыгагуыйау,
      Дӕ дӕлбазыр мӕ бамбӕхс
⁹ Мӕнмӕ лӕбурӕг фыдлӕгтӕй,
      чи мыл ӕртыхсти, уыдонӕй – мӕ уды знӕгтӕй.
¹⁰ Сӕ дурзӕрдӕтӕ ныхгӕдтой, сты схъӕлдзырд.
¹¹ Зилынц мӕ фӕдыл, мӕнӕ мыл ӕртыхстысты;
      ӕрӕвӕрдтой мыл сӕ цӕст,
      зӕхмӕ мӕ куыд ӕрӕппарой, афтӕ.
¹² Уыдон сты йӕ амӕддагмӕ гӕппӕввонг домбайау,
      пыхсбыны ӕрӕмбӕхсӕг ӕрыгон домбайау.

¹³ Рацу, Дунедарӕг, сӕ разӕй фӕу
      ӕмӕ сӕ ныддӕрӕн кӕн;
      Дӕ цирхъӕй мын мӕ уд баиргъӕв фыдлӕгӕй.
¹⁴ Дӕ цонгӕй мӕ бахъахъхъӕн адӕмӕй, Дунедарӕг,
      ӕрмӕст зӕххон цард йӕ хай кӕмӕн у,
      Дӕ хӕзнадӕттӕй кӕй гуыбын ӕфсадыс,
      уыцы адӕмӕй.
      Сӕ фырттӕ хъуаг ницӕмӕй сты,
      сӕ мулкӕй ма баззайдзӕни сӕ цотӕн дӕр.
¹⁵ Ӕз та рӕстӕй кӕсдзынӕн Дӕ цӕсгоммӕ.
      Куы-иу райхъал уон,
      уӕд ӕфсӕддзынӕн Дӕ фӕлгонцӕй.

17 Псалом

¹ Зарӕггӕнджыты разамонӕгмӕ.
      Хуыцауы цагъар Давид
      ацы зарӕджы ныхӕстӕ ракодта Хуыцауӕн,
      йе 'ппӕт знӕгты къухтӕй
      ӕмӕ йӕ Саулӕй куы бахызта, уӕд.

      Давид загъта:
² Дӕу уарзын, Дунедарӕг, мӕ тыхдӕттӕг!
³ Дунедарӕг мӕ цӕугӕ хох, мӕ фидар у,
      мӕ сӕрибаргӕнӕг, мӕ Хуыцау;
      мӕ къӕдзӕх у, ӕмӕ дзы бамбӕхсдзынӕн;
      Уый у мӕ уарт, мӕнӕн уӕлахиздӕттӕг тых, мӕ мӕсыг.
⁴ Ӕрсиддзынӕн кадджын Хуыцаумӕ
      ӕмӕ фервӕздзынӕн ме знӕгтӕй.

⁵ Ӕрбалвӕстой мӕ мӕлӕты рӕхыстӕ;
      нуӕрдынц мӕ фыдӕхы гуылфӕнтӕ.
⁶ Ингӕны рӕхыстӕ мӕ ӕрбалхъывтой,
      мӕлӕты сахсӕнтӕ мӕ ӕрцахстой.
⁷ Мӕ тыхстӕй фӕсидтӕн Дунедарӕгмӕ,
      ӕххуысагур дзынӕзтон мӕ Хуыцаумӕ;
      фехъуыста мын мӕ хъӕлӕс,
      сыхъуыст Ӕм мӕ дзыназын.

⁸ Уӕд зӕхх нынкъуыст ӕмӕ ныррызти,
      хӕхтӕ сӕ бындурмӕ фестъӕлфыдысты
      ӕмӕ базмӕлыдысты,
      уымӕн ӕмӕ смӕсты ис Хуыцау.
⁹ Йӕ мӕстӕй хӕрдмӕ фӕцыди фӕздӕг,
      Йӕ комӕй рацыди бынгӕнӕг арт,
      ӕрызгъӕлди дзы цӕхӕр.
¹⁰ Ӕркъул кодта уӕлӕрвтӕ ӕмӕ ӕрхызти,
      сау мылаз фӕци Йӕ къӕхты бын.
¹¹ Сбадти херувимыл[6] ӕмӕ атахт,
      Йӕхи систа дымгӕйы базыртыл.
¹² Талынгӕй Йӕ алыварс скодта ӕмбӕрзӕн;
      Йӕ агъуыст – саувадыг уӕззау мигътӕ.
¹³ Нырттывта, ӕмӕ Йӕ разӕй азгъордтой мигътӕ,
      ихуард ӕмӕ судзгӕ цӕхӕр.
¹⁴ Ныннӕрыди Дунедарӕг уӕлӕрвты,
      Бӕрзондбадӕгӕн райхъуыст Йӕ хъӕлӕс,
      рарвыста ихуард ӕмӕ цӕхӕр.
¹⁵ Ауагъта Йӕ фаттӕ, ӕмӕ фӕйнӕрдӕм апырх сты –
      ӕрвӕрттывды бирӕ тӕгтӕ,
      ӕмӕ сӕ ныффӕйлыдта.
¹⁶ Дӕ тызмӕг уайдзӕфӕй,
      Дӕ масты уддзӕфӕй, Дунедарӕг,
      райхъал сты доны гуырӕнтӕ,
      ӕмӕ байгом сты зӕххы бындуртӕ.

¹⁷ Хуыцау уӕлӕрвтӕй ӕрдардта Йӕ къух,
      схӕцыди мыл, систа мӕ доны арфӕй.
¹⁸ Мӕ тыхджын знагӕй мӕ бахызта,
      мӕнӕй йе сӕфт чи уыдта
      ӕмӕ мӕнӕй тыхджындӕр чи уыди, уыдонӕй.
¹⁹ Мӕ зыны бон мӕм ӕрбалӕбурдтой,
      фӕлӕ мын Хуыцау уыдис ахъазгӕнӕг.
²⁰ Уый мӕ ракодта ӕдас ранмӕ,
      бахызта мӕ знӕгтӕй, уымӕн ӕмӕ мыл ауды.

²¹ Дунедарӕг мӕ схорзӕхджын кодта
      мӕ рӕстадмӕ гӕсгӕ,
      бафыста мын мӕ къухты сыгъдӕгдзинадмӕ гӕсгӕ.
²² Уымӕн ӕмӕ ӕз
      Дунедарӕджы амынд фӕндӕгтыл цыдтӕн,
      Хуыцауӕй нӕ аздӕхтӕн фыдмитӕм;
²³ Йӕ фӕдзӕхстытӕ иууылдӕр мӕ разы уыдысты,
      Йӕ уагӕвӕрдты сӕрты никуы ахызтӕн.
²⁴ Йӕ разы ӕнаипп уыдтӕн ӕз,
      мӕхи хызтон тӕригъӕд ракӕнынӕй.
²⁵ Ӕмӕ Дунедарӕг схорзӕхджын кодта мӕн
      Йӕ рӕстадмӕ гӕсгӕ,
      мӕ къухты сыгъдӕгдзинадмӕ гӕсгӕ
      Йӕ цӕсгомы раз.

²⁶ Ӕнувыдыл Ды ӕнувыд Дӕ,
      ӕнаиппӕн дӕттыс, куыд ӕнаипп у, афтӕ,
²⁷ Сыгъдӕгӕн дӕттыс йӕ сыгъдӕг зӕрдӕмӕ гӕсгӕ,
      мӕнгардӕн – йӕ хинмӕ гӕсгӕ.
²⁸ Ды баиргъӕвыс сӕрныллӕг адӕмы,
      бӕрзӕндты кӕсджыты та ӕгадмӕ ӕртӕрыс.

²⁹ Ды ссудзыс, Дунедарӕг, мӕ цырагъ;
      мӕ Хуыцау Йӕ рухсӕй фӕсуры мӕ талынг.
³⁰ Демӕ басӕттын знаджы ӕфсад;
      мӕ Хуыцауимӕ схизын ӕнӕбасӕтгӕ сисмӕ.

³¹ Хуыцау – куыд ӕнаипп у Йӕ фӕндаг!
      Дунедарӕджы ныхас фӕлвӕрд у;
      йӕ зӕрдӕ Йыл чи дары, ӕппӕт уыдонӕн уарт у.
³² Уымӕн ӕмӕ Дунедарӕджы йеддӕмӕ Хуыцау чи у,
      ӕмӕ нӕ Хуыцауы йеддӕмӕ
      нӕ ныфсы къӕдзӕх чи у?
³³ Хуыцау мӕ астӕу ӕрбалвасы хъаруйӕ,
      скӕны мӕ фӕндаг ӕнӕфау.
³⁴ Мӕ къӕхтӕ скӕны саджы къӕхтау рог,
      бӕрзӕндтыл фидарӕй ӕрлӕууын кӕны мӕн.
³⁵ Мӕ къухтӕн амоны тох кӕнын,
      мӕ цӕнгтӕ ӕркъӕдз кӕнынц ӕрхуы ӕрдын.
³⁶ Ды мын радтай Дӕ ирвӕзты уарт,
      Дӕ рахиз цонг хӕцы мӕныл;
      Дӕ хорзӕх мӕ сисы бӕрзонд.
³⁷ Мӕ фӕндагыл уӕрӕх кӕныс мӕ къахдзӕф,
      мӕ фад нӕ фӕцуддзӕн.

³⁸ Ӕз асурын ме знӕгты ӕмӕ сӕ баййафын;
      нӕ раздӕхын, цалынмӕ сӕ нӕ фӕцӕгъдын.
³⁹ Ныддӕрӕн сӕ кӕнын,
      ӕмӕ сӕ бон сыстын нал вӕййы,
      ӕрхауынц мӕ къӕхты бынмӕ.
⁴⁰ Уымӕн ӕмӕ хъаруйӕ
      сифтонг кодтай мӕн хӕцынмӕ;
      мӕ ныхмӕ сыстджыты
      ӕрӕппӕрстай мӕ къӕхты бынмӕ.
⁴¹ Ме знӕгты лидзӕг фӕкодтай мӕнӕй,
      ӕмӕ цӕгъдын ме сӕфтмӕ бӕлджыты.
⁴² Курынц ӕххуыс,
      фӕлӕ сын нӕй ирвӕзынгӕнӕг;
      курынц Хуыцауӕй, фӕлӕ сын дзуапп нӕ дӕтты.
⁴³ Дымгӕмӕ рыг сдарӕгау сӕ ныффӕйлауын,
      уынджы цъыфау сӕ ныссӕндын.

⁴⁴ Ды мӕн баиргъӕвтай фыдӕх хӕссӕг адӕмӕй;
      сӕвӕрдтай мӕ ӕцӕгӕлон адӕмы сӕргъы;
      кӕй нӕ зыдтон, уыцы адӕм сты мӕ дӕлбар.
⁴⁵ Ӕрмӕст мӕ коймӕ дӕр кӕсынц мӕ коммӕ;
      ӕцӕгӕлон адӕм ӕлхӕнынц мӕ зӕрдӕ.
⁴⁶ Ӕцӕгӕлон адӕмы хуыз фӕцыди –
      фыртӕссӕй ризынц сӕ фидӕртты.

⁴⁷ Цардӕгас ӕмӕ арфӕгонд у, Дунедарӕг,
      мӕ къӕдзӕх!
      Кадджын уӕд мӕ ирвӕзынгӕнӕг Хуыцау,
⁴⁸ Мӕ мастисӕг ӕмӕ адӕмты
      мӕ дӕлбаргӕнӕг Хуыцау,
⁴⁹ Мӕн ме знӕгтӕй ирвӕзынгӕнӕг!
      Мӕ ныхмӕ сыстджыты сӕргъы сӕвӕрдтай мӕн,
      баиргъӕвтай мӕ фыдзӕрдӕ адӕймагӕй.
⁵⁰ Ӕппӕт уыдӕтты тыххӕй ӕцӕгӕлон адӕмы ӕхсӕн
      стаудзынӕн Дӕу, Дунедарӕг, зардзынӕн Дӕ номыл.
⁵¹ Уый стыр уӕлахиз дӕтты Йӕ паддзахӕн;
      мыггагмӕ ауды Йе 'взӕрст Давидыл
      ӕмӕ йӕ байзӕддӕгтыл.

18 Псалом

¹ Зарӕггӕнджыты разамонӕгмӕ.
      Давиды псалом.

² Уӕлӕрвтӕ дзурынц Хуыцауы кадыл,
      арвы зылд ӕвдисы Йӕ къухты хъуыддӕгтӕ.
³ Бон бонӕн ӕрвиты ныхас,
      ӕхсӕв ӕхсӕвӕн ӕргом кӕны зонынад.
⁴ Нӕй сын ӕвзаг, нӕй ныхасыгъӕд,
      нӕ хъуысы сӕ хъӕлӕс;
⁵ Фӕлӕ ӕппӕт зӕххыл айхъуысынц сӕ зӕлтӕ,
      дун-дунейы кӕронмӕ – сӕ ныхӕстӕ.
      Хурӕн дзы ӕрӕвӕрдта цатыр.
⁶ Ӕмӕ хур сиахсау рацӕуы
      йӕ чындзӕхсӕвы галуанӕй;
      цыма уӕлахиздзау у,
      афтӕ зӕрдӕрухсӕй згъоры йӕ фӕндагыл.
⁷ Ӕрзилы арвыл иу кӕронӕй иннӕ кӕронмӕ;
      ницы у ӕнӕхай йӕ хъармӕй.

⁸ Дунедарӕджы ӕгъдау ӕнаипп у, сног кӕны зӕрдӕ.
      Хуыцауы уынаффӕ ӕцӕг у –
      уӕлзонд дӕтты хуымӕтӕгӕн.
⁹ Хуыцауы уагӕвӕрдтӕ раст сты, зӕрдӕ сӕ райы;
      Дунедарӕджы фӕдзӕхст тӕмӕнкалгӕ у –
      гом кӕны цӕстытӕ.
¹⁰ Хуыцауы тас – сыгъдӕг цардыхос у,
      аххӕсдзӕни мыггагмӕ;
      Хуыцауы уынаффӕтӕ – ӕцӕгад,
      се 'ппӕт дӕр раст сты.
¹¹ Уыдон ӕхцондӕр сты сызгъӕринӕй,
      суанг бирӕ хӕттыты сыгъдӕггонд сызгъӕринӕй дӕр;
      мыдӕй ӕмӕ фӕзгъӕры ӕртӕхтӕй адджындӕр сты.
¹² Дӕ цагъары дӕр уыдон хъахъхъӕнынц,
      се 'ххӕст кӕнын стыр хӕрзиуӕг у.

¹³ Хи азымтӕ чи уыны?
      Мӕ сусӕг тӕригъӕдтӕй мӕ ссыгъдӕг кӕн,
¹⁴ Барӕй ракӕндтӕй дӕр бауром Дӕ цагъары,
      цӕмӕй мыл ма фӕуӕлахиз уой.
      Уӕд ӕз уыдзынӕн ӕнӕфау,
      уӕззау фыдракӕндтӕй сыгъдӕг.

¹⁵ Уадз мӕ дзыхӕй рацӕугӕ дзырдтӕ, мӕ хъуыдытӕ
      Дӕуӕн уой фӕндиаг, Дунедарӕг,
      мӕ къӕдзӕх ӕмӕ ме ссӕрибаргӕнӕг!

19 Псалом

¹ Зарӕггӕнджыты разамонӕгмӕ.
      Давиды псалом.

² Фехъусӕд дӕ Дунедарӕг дӕ хъыджы заман,
      бахъахъхъӕнӕд дӕ нӕ фыдӕл Иаковы Хуыцауы ном.
³ Рарвитӕд дын ӕххуыс Йӕ рухс Кувӕндонӕй,
      хъару – Сионӕй.
⁴ Ӕрымысӕд де 'ппӕт хуынтӕ,
      айсӕд дын дӕ иууылсудзинаг нывонд[7], ||
⁵ Дӕ зӕрдӕ цӕмӕ бӕллы, уый дын раттӕд,
      сӕххӕст дын кӕнӕд де 'ппӕт фӕндтӕ.
⁶ Мах цинӕй райдзыстӕм дӕ уӕлахизыл;
      Хуыцауы номы кадӕн сисдзыстӕм тырыса!
      Дунедарӕг дын сӕххӕст кӕнӕд де 'ппӕт курдиӕттӕ.

⁷ Ӕз ныр базыдтон:
      Дунедарӕг ирвӕзын кӕны Йе 'взӕрсты;
      Йӕ сыгъдӕг уӕлӕрвтӕй йын дзуапп дӕтты
      Йӕ рахиз цонджы ирвӕзынгӕнӕг хъомысӕй.
⁸ Чи йӕ бӕхуӕрдӕттӕй ӕппӕлы, чи йӕ бӕхтӕй,
      мах та – Дунедарӕгӕй,
      нӕ Хуыцауы номӕй ӕппӕлӕм.
⁹ Уыдон фӕцудыдтой ӕмӕ ахаудысты,
      мах та сыстадыстӕм ӕмӕ лӕууӕм фидар.

¹⁰ Дунедарӕг, фервӕзын кӕн паддзахы,
      ӕмӕ Дын куы фӕлӕгъстӕ кӕнӕм,
      уӕд-иу нӕ фехъус!

20 Псалом

¹ Зарӕггӕнджыты разамонӕгмӕ.
      Давиды псалом.

² О Дунедарӕг, Дӕ хъаруйӕ зӕрдӕрухс у паддзах;
      цы стыр цин ын ӕрхастой Дӕ уӕлахизтӕ!
³ Йӕ зӕрдӕ цӕмӕ бӕллыди, уый йын радтай,
      йӕ уды курдиатыл ын нӕ атигъ кодтай Дӕхи. ||
⁴ Уымӕн ӕмӕ йӕ Ды
      схайджын кодтай Дӕ бирӕ арфӕтӕй,
      йӕ сӕрыл ын ӕркодтай паддзахы худ –
      сыгъдӕг сызгъӕринӕй.
⁵ Дӕуӕй куырдта цард; Ды та йын радтай
      бирӕ цӕрӕнбонтӕ мыггагӕй-мыггагмӕ.
⁶ Стыр намыс ын ӕрхаста Дӕ уӕлахиз,
      скодтай йӕ кадджын ӕмӕ номдзыд.
⁷ Ды йыл ӕруагътай Дӕ арфӕтӕ мыггагмӕ,
      Дӕ цӕсгомы рухсӕй йӕ схъӕлдзӕг кодтай.
⁸ Уымӕн ӕмӕ Дунедарӕгыл дары паддзах йӕ зӕрдӕ,
      Бӕрзонд Хуыцауы уарзты фӕрцы нӕ фӕцуддзӕн.

⁹ Дӕ къухӕй нӕ аирвӕздзысты Де 'ппӕт знӕгтӕ;
      Дӕ рахиз цонг баххӕсдзӕн,
      Ды ӕнӕуынон кӕмӕн дӕ, уыдонмӕ.
¹⁰ Куы сӕм фӕзынай,
      уӕд сӕ фестын кӕндзынӕ судзгӕ пец;
      Дунедарӕг сӕ тызмӕгӕй байсафдзӕн,
      арт сӕ аныхъуырдзӕн.
¹¹ Зӕххыл сын фесафдзынӕ сӕ байзӕддаг,
      адӕмты ӕхсӕн – сӕ мыггаг.
¹² Уымӕн ӕмӕ хъавынц Дӕуӕн фыд ракӕнынмӕ,
      Дӕ ныхмӕ нывӕндынц фыдвӕндтӕ,
      фӕлӕ сын нӕ бантысдзӕн.
¹³ Дӕ фаттӕ сын сӕ цӕсгӕмттӕм куы саразай,
      уӕд лидзӕг фӕуыдзысты.

¹⁴ Сбӕрзонд у Дӕ хъомысӕй, Дунедарӕг!
      Мах зардзыстӕм ӕмӕ кад кӕндзыстӕм
      Де 'нӕкӕрон хъаруйӕн!

21 Псалом

¹ Зарӕггӕнджыты разамонӕгмӕ;
      «Сӕумӕйы хъуаз»-ы зӕлтӕм гӕсгӕ.
      Давиды псалом.

² Мӕ Хуыцау, мӕ Хуыцау, цӕмӕн ныууагътай мӕн?
      Куыд нӕ фӕзыныс мӕн фервӕзын кӕнынмӕ,
      куыд нӕ Дӕм хъуысы мӕ дзыназын!
³ Мӕ Хуыцау! Хъӕр Дӕм кӕнын бонӕй –
      дзуапп нӕ дӕттыс,
      хъӕр Дӕм кӕнын ӕхсӕв дӕр –
      ӕнцой не 'ссарын.
⁴ Ды, Сыгъдӕг, цӕрыс Израилы кады
      ныхӕсты ӕхсӕн;
⁵ Дӕуыл дардтой сӕ зӕрдӕ нӕ фыдӕлтӕ;
      сӕ зӕрдӕ Дыл дардтой, ӕмӕ-иу сӕ бахызтай.
⁶ Дӕумӕ дзынӕзтой, ӕмӕ-иу сӕ фервӕзын кодтай;
      сӕ зӕрдӕ Дыл дардтой,
      ӕмӕ никуы фӕфыдӕнхъӕл сты.

⁷ Ӕз та адӕймаг нӕ, фӕлӕ уаллон дӕн;
      дзыллӕйӕн ӕгад ӕмӕ адӕмӕн ӕлгъаг.
⁸ Мӕн чи уыны, уыдон мыл худынц;
      сӕ сӕртӕ тилынц ӕмӕ былысчъилӕй дзурынц:
⁹ «Дунедарӕгыл дардта йӕ зӕрдӕ –
      ныр ӕй фӕрвӕзын кӕнӕд;
      кӕд ыл ауды, уӕд ӕй ссӕрибар кӕнӕд».

¹⁰ Мӕ мады гуыбынӕй мӕ куы ракодтай,
      хъӕбысы ма куы уыдтӕн,
      уӕд дӕр мӕ хъахъхъӕдтай.
¹¹ Мӕ райгуырынӕй Дӕуыл фӕдзӕхст дӕн;
      мӕ мады гуыбыны ма куы уыдтӕн,
      уӕдӕй фӕстӕмӕ мӕ Хуыцау дӕ.
¹² Ма адард у мӕнӕй,
      уымӕн ӕмӕ мӕ хъизӕмары бон ӕввахс у,
      ӕххуысгӕнӕг та нӕй.

¹³ Бирӕ галтӕ мыл ӕрхъула,
      хӕрзхаст басайнаг галтӕ мыл ӕртыхстысты.
¹⁴ Байгом мӕм кодтой сӕ дзых,
      йӕ амӕддаджы баййафӕг
      ӕмӕ богътӕгӕнӕг домбайау.
¹⁵ Ӕз ныппырх дӕн донау;
      ме стджытӕ кӕрӕдзийыл нал хӕцынц;
      мӕ зӕрдӕ мыдадзау батади мӕ риуы.
¹⁶ Ӕлыгӕй конд дурынау мӕ тых бахус,
      ме 'взаг нындӕгъди мӕ комыл;
      ингӕны сыджыты нывӕрдтай мӕн.
¹⁷ Куыйтӕ мыл ӕрхъула сты,
      фыдлӕгты ӕрдонг мыл ӕртыхст,
      мӕ къухты ӕмӕ мӕ къӕхты
      ныххостой ӕфсӕйнӕгтӕ.
¹⁸ Мӕ фӕрсчытӕн ис банымайӕн;
      уыдон та мӕм кӕсынц,
      ӕмӕ сын сдӕн хиирхӕфсӕн.
¹⁹ Сӕ кӕрӕдзийыл уарынц мӕ дарӕс,
      мӕ пӕлӕзыл ӕппарынц хӕлттӕ.

²⁰ Фӕлӕ Ды, Дунедарӕг, ма адард у мӕнӕй!
      Ды мӕ тых дӕ,
      тагъддӕр мӕм фӕзын ӕххуысмӕ.
²¹ Мӕ уд мын бахиз цирхъӕй,
      мӕ иунӕг цард – куыйтӕй.
²² Баиргъӕв мӕ домбайы комӕй;
      бахиз мӕ хъӕддаг галты сыкъатӕй.
²³ Дӕ номы тыххӕй дзурдзынӕн ме 'фсымӕртӕн,
      Дӕ адӕмы ӕхсӕн ӕппӕлдзынӕн Дӕуӕй.
²⁴ Хуыцауӕй тӕрсджытӕ, стаут Ӕй!
      Иаковы ӕппӕт байзӕддӕгтӕ, скад Ын кӕнут.
      Нымайут Ӕй, Израилы ӕппӕт адӕм.
²⁵ Уымӕн ӕмӕ Хуыцау ӕнӕрвӕссон нӕ уыди
      ӕфхӕрд адӕймагыл
      ӕмӕ нӕ аздӕхти йӕ хъизӕмӕрттӕй;
      Йӕхи дзы нӕ бамбӕхста,
      фӕлӕ Йӕм уый ӕххуысмӕ куы фӕдзырдта,
      уӕд ӕй фехъуыста.

²⁶ Стыр ӕмбырды Дӕуӕй ӕппӕлдзынӕн;
      дзырд Дын цӕй тыххӕй радтон,
      уыдӕттӕ ӕххӕст кӕндзынӕн,
      Дӕу чи нымайы, уыдоны раз.
²⁷ Къӕбӕр хӕрдзысты мӕгуыртӕ
      ӕмӕ бафсӕддзысты;
      Хуыцауы скадджын кӕндзысты,
      чи Йӕ агуры, уыдон!
      Уадз мыггагмӕ уой цардӕфсӕст.
²⁸ Уый ӕрымысдзысты ӕппӕт зӕххы цӕрджытӕ
      ӕмӕ раздӕхдзысты Дунедарӕгмӕ;
      Дӕ разы ӕрзоныг уыдзысты адӕмтӕ иууылдӕр.
²⁹ Уымӕн ӕмӕ паддзахад Хуыцауы у,
      адӕмтӕн Уый у Бардарӕг.

³⁰ Ныллӕг акувдзысты Уымӕн
      ӕппӕт зӕххы цардӕфсӕст бонджынтӕ;
      Йӕ разы ӕрзоныг уыдзысты сыджытмӕ цӕуджытӕ
      ӕмӕ йӕ удӕн мадзал чи нӕ зоны,
      уыдон иууылдӕр.
³¹ Мӕ байзӕддӕгтӕ кусдзысты Уымӕн,
      мыггагмӕ хӕсдзысты Хуыцауы адӕмы ном.
³² Ӕмӕ цӕудзысты
      ӕмӕ дзурдзысты Йӕ рӕстдзинадыл,
      ӕрцӕуинаг фӕлтӕртӕн Йӕ хъуыддӕгты тыххӕй.

22 Псалом

¹ Давиды псалом.

      Хуыцау – мӕ фыййау,
      ӕз ницӕмӕй уыдзынӕн хъуаг.
² Хизы мӕ сойджын сӕрвӕтты,
      ахоны мӕ сабыр цӕугӕдӕттӕм.
³ Дӕтты мын ног тыхтӕ;
      аразы мӕ рӕстады фӕндагыл
      Йӕ номы сӕраппонд.
⁴ Мӕлӕты тар комы цӕугӕ мын куы фӕуа,
      уӕддӕр нӕ фӕтӕрсдзынӕн фыдбылызӕй,
      уымӕн ӕмӕ Ды мемӕ дӕ;
      Дӕ паддзахы бар ӕмӕ Дӕ фыййауы лӕдзӕг
      хъахъхъӕнынц мӕн.

⁵ Ды мын ахӕм фынг ӕрӕвӕрдтай
      ме знӕгты цӕсты раз!
      Мӕ сӕр мын байсӕрстай хӕрздӕф зетийӕ,
      мӕ кӕхц кӕлы йӕ былтӕй.
⁶ Уӕдӕ цалынмӕ удӕгас дӕн,
      уӕдмӕ мын Дӕ фарн ӕмӕ Дӕ хорзӕх
      уӕнт ӕмбӕлццӕттӕ,
      ӕмӕ мӕ царды ӕппӕт бонтӕ
      арвитдзынӕн Дунедарӕджы Хӕдзары.

23 Псалом

¹ Давиды псалом.

      Зӕхх ӕмӕ зӕххыл цыдӕриддӕр ис,
      дун-дуне ӕнӕхъӕнӕй ӕмӕ йе 'ппӕт цӕрджытӕ
      Хуыцауы сты.
² Уымӕн ӕмӕ дуне Уый ӕрӕвӕрдта денджызтыл,
      ӕрфидар ӕй кодта цӕугӕдӕттыл.
³ Чи схиздзӕни Хуыцауы хохмӕ,
      чи ӕрлӕудзӕн Йӕ сыгъдӕг бынаты?
⁴ Йӕ къухтӕ ӕназым кӕмӕн сты,
      сыгъдӕг кӕй зӕрдӕ у,
      мӕнгхуыцауӕн чи нӕ куывта,
      сомы чи нӕ сайы, ӕрмӕстдӕр уый.
⁵ Ахӕм адӕймагыл
      Дунедарӕг ӕруадздзӕн Йӕ арфӕ
      ӕмӕ йӕ ирвӕзынгӕнӕг Хуыцауӕй
      райсдзӕни хорзӕх.
⁶ Ахӕм у, Уый чи агуры,
      Дӕ цӕсгомы раз балӕууын кӕй фӕнды,
      уыдоны мыггаг, Иаковы Хуыцау! ||

⁷ Уӕхиуыл схӕцут, кулдуӕрттӕ,
      дӕрдтыл байгом ут, ӕнусон дуӕрттӕ,
      ӕмӕ бацӕуа цытджын Паддзах!
⁸ Чи у уыцы цытджын Паддзах? –
      Фидар ӕмӕ хъомысджын Дунедарӕг,
      тохы басӕттӕн кӕмӕн нӕй, уыцы Хуыцау.

⁹ Уӕхиуыл схӕцут, кулдуӕрттӕ,
      дӕрдтыл байгом ут, ӕнусон дуӕрттӕ,
      ӕмӕ бацӕуа цытджын Паддзах!
¹⁰ Чи у уыцы цытджын Паддзах? –
      Уӕлахизгӕнӕг Хуыцау;
      Уый у цытджын Паддзах. ||

24 Псалом

¹ Давиды псалом.

      Дӕумӕ бӕллы мӕ зӕрдӕ, Хуыцау.
² Дӕуӕй ныфсджын дӕн, мӕ Хуыцау.
      Ды мӕ не 'руадздзынӕ ӕгадмӕ,
      цӕмӕй мыл ме знӕгтӕ ферайой.
³ Дӕуыл йӕ зӕрдӕ чи дары,
      уыдон дӕр нӕ фегад уыдзысты.
      Кӕй фыдвӕндтӕй ницы рауайдзӕни,
      ӕгад уыдон фӕуыдзысты.

⁴ Бацамон мын, Хуыцау, Дӕ фӕндӕгтӕ
      ӕмӕ мӕ сахуыр кӕн Дӕ надвӕттыл цӕуын.
⁵ Сараз мӕ Дӕ ӕцӕгадыл, сахуыр мӕ кӕн,
      уымӕн ӕмӕ Ды мӕ ирвӕзынгӕнӕг Хуыцау дӕ;
      Дӕуыл дарын мӕ зӕрдӕ иудадзыг.
⁶ Ӕрымыс, Хуыцау, рагзамантӕй кӕй ӕвдисыс,
      Дӕ уыцы хорзӕх ӕмӕ уарзт.
⁷ Ме 'взонджыбонты тӕригъӕдтӕ
      ӕмӕ фыдмитӕ мын ма ӕрымыс;
      Дӕ уарзт ӕмӕ Дӕ хорзӕхмӕ гӕсгӕ
      ӕрымыс мӕн, Дунедарӕг.

⁸ Хуыцау хӕрзгӕнӕг ӕмӕ ӕнӕхӕрам у;
      уымӕн аразы тӕригъӕдджынты раст фӕндагыл.
⁹ Фӕлмас адӕймӕгты аразы рӕстдзинадыл,
      сабыртӕн амоны Йӕ фӕндаг.
¹⁰ Хуыцауы ӕппӕт фӕндӕгтӕ
      сты хорзӕх ӕмӕ ӕцӕгад,
      Йӕ фӕдзӕхстытӕм гӕсгӕ чи цӕры
      ӕмӕ йын Йӕ амындмӕ чи хъусы, уыдонӕн.
¹¹ Мӕ тӕригъӕд уӕззау у, ӕмӕ мын ӕй ныххатыр кӕн
      Дӕ номы сӕраппонд, Дунедарӕг!
¹² Хуыцауӕй чи тӕрсы, чи у уыцы адӕймаг?
      Хуыцау ын бацамондзӕни,
      цавӕр фӕндаг ӕй равзарын хъӕуы, уый.
¹³ Йӕ уд ссардзӕн фарн,
      зӕхх бауыдзӕн йӕ байзӕддӕгты.
¹⁴ Хуыцауӕй чи тӕрсы,
      уыдонӕй не 'мбӕхсы Йӕ сусӕгад,
      ӕргом сын кӕны Йӕ фӕдзӕхст.
¹⁵ Мӕ цӕстытӕ иудадзыг Дунедарӕгмӕ кӕсынц;
      мӕ къӕхтӕ мын хызӕй Уый суӕгъд кӕны.

¹⁶ Раздӕх мӕм Де 'ргом ӕмӕ мын батӕригъӕд кӕн,
      уымӕн ӕмӕ ӕз иунӕг ӕмӕ ӕфхӕрд дӕн.
¹⁷ Мӕ зӕрдӕйы мастыл
      ноджыдӕр бафтыди;
      фервӕзын мӕ кӕн мӕ бӕллӕхтӕй.
¹⁸ Ӕркӕс мӕ тыхстмӕ, мӕ хъизӕмармӕ
      ӕмӕ мын ныббар ме 'ппӕт тӕригъӕдтӕ.
¹⁹ Акӕс-ма ме знӕгтӕм – куыд бирӕ сты,
      куыд ӕбуалгъы ӕнӕуынон сын дӕн!
²⁰ Бахиз мын мӕ уд, баиргъӕв мӕ,
      ӕмӕ нӕ фегад уыдзынӕн,
      уымӕн ӕмӕ Дӕуыл дарын мӕ зӕрдӕ.
²¹ Ӕнӕфау цард ӕмӕ мӕ рӕстад
      уӕнт мӕ хъахъхъӕнджытӕ,
      уымӕн ӕмӕ Ды мӕ ныфс дӕ.

²² Хуыцау, фервӕзын кӕн Израилы
      йе 'ппӕт бӕллӕхтӕй.

25 Псалом

¹ Давиды псалом.

      Дӕхӕдӕг мын рахӕсс тӕрхон, Дунедарӕг,
      уымӕн ӕмӕ рӕстӕй цардтӕн.
      Хуыцауыл дарын мӕ зӕрдӕ,
      нӕ фӕдызӕрдыг уыдзынӕн.
² Сбӕрӕг мӕ кӕн, Хуыцау, бафӕлвар мӕ;
      раиртас мӕ хъуыдытӕ ӕмӕ мӕ зӕрдӕйы фӕндтӕ.

³ Дӕ хорзӕх ӕдзухдӕр мемӕ ис,
      ӕмӕ цӕрын Дӕ ӕцӕгадмӕ гӕсгӕ.
⁴ Фӕлывд адӕймӕгты ныхасы никуы бадтӕн,
      цӕстмӕхъусимӕ мын иумӕйагӕй ницы уыдзӕни.
⁵ Фыдлӕгты дзыгуырӕй ме сӕфт уынын,
      фыдгӕнджытимӕ не 'рбаддзынӕн.
⁶ Мӕ къухтӕ ӕрӕхсын ӕназымӕй, Дунедарӕг,
      афтӕмӕй ӕрзилын Дӕ нывондхӕссӕны алыварс –
⁷ Дӕу хъӕлӕсыдзагӕй стаугӕйӕ
      ӕмӕ Де 'ппӕт диссӕгтыл дзургӕйӕ.
⁸ Дунедарӕг, ӕз бауарзтон Дӕ Хӕдзар –
      Дӕ кады цӕрӕн бынат.

⁹ Мӕ уд мын тӕригъӕдджынтимӕ ма фесаф,
      мӕ цард – тугцъиртимӕ.
¹⁰ Сӕ къухтӕ фыдракӕндтӕй хъӕстӕ сты,
      сӕ рахиз къухтӕ – гӕртӕмттӕй дзаг.
¹¹ Ӕз та цӕрдзынӕн ӕназымӕй;
      равдис мӕм Дӕ хорзӕх ӕмӕ мӕ фервӕзын кӕн.
¹² Мӕ къӕхтӕ фидар лӕууынц раст фӕндагыл;
      ӕмбырдты ӕз стаудзынӕн Дунедарӕджы.

26 Псалом

¹ Давиды псалом.

      Дунедарӕг – мӕ царды рухс
      ӕмӕ мӕ ирвӕзынгӕнӕг –
      кӕмӕй мын у тас?
      Дунедарӕг – мӕ царды мӕсыг –
      кӕй тасӕй бариздзынӕн?
² Фыдлӕгтӕ, мӕ фыдгултӕ
      ӕмӕ ме знӕгтӕ куы тындзой мӕн аныхъуырынмӕ,
      уӕд сӕхӕдӕг сӕ къах скъуырдзысты
      ӕмӕ ӕрхаудзысты.
³ Ӕнӕхъӕн ӕфсад мыл куы ӕртыхса –
      мӕ зӕрдӕ нӕ фӕтӕрсдзӕни;
      мӕ ныхмӕ хӕст куы самайой,
      уӕддӕр ныфсджын уыдзынӕн.

⁴ Ӕрмӕстдӕр иу хорзӕх курын Дунедарӕгӕй
      ӕмӕ уымӕ тырнын, цӕмӕй мӕ цӕргӕбонтӕ
      ӕрвитон Хуыцауы Хӕдзары,
      мӕ цӕсты раз уа Хуыцауы рӕсугъддзинад –
      уынон Ӕй Йӕ Кувӕндоны.
⁵ Уымӕн ӕмӕ мӕ тыхсты бон
      Уый бамбӕхсдзӕн мӕн,
      Йӕ Цатыры мӕ бааууон кӕндзӕн,
      схӕссдзӕни мӕ къӕдзӕхы сӕрмӕ.
⁶ Уӕд ӕз фӕуӕлахиз уыдзынӕн,
      цы знӕгтӕ мыл ӕртыхст, уыдоныл;
      райгӕйӕ Йын ӕрхӕссдзынӕн нывондтӕ Йӕ Цатыры;
      зардзынӕн ӕмӕ цӕгъддзынӕн
      рӕсугъд зӕлтӕй Дунедарӕгӕн.

⁷ Дӕумӕ дзурын, Дунедарӕг, фехъус мӕ хъӕлӕс;
      батӕригъӕд мын кӕн ӕмӕ мын дзуапп ратт.
⁸ Мӕ зӕрдӕйы хъуысынц Дӕ ныхӕстӕ:
      «Агурут Мӕ цӕсгом».
      Ӕмӕ ӕз Дӕ цӕсгом агурдзынӕн, Хуыцау.
⁹ Ма аздах мӕнӕй Дӕ цӕсгом;
      тызмӕгӕй ма бахъоды кӕн Дӕ цагъарыл.
      Ды уыдтӕ ме 'ххуысгӕнӕг, ма мыл атигъ кӕн Дӕхи,
      ма мӕ ныууадз, Хуыцау, мӕ ирвӕзынгӕнӕг!
¹⁰ Мӕ фыд ӕмӕ мад куы ныууадзой мӕн,
      уӕддӕр мӕ Хуыцау райсдзӕни Йӕхимӕ.

¹¹ Сахуыр мӕ кӕн, Хуыцау, Дӕ надвӕдыл цӕуын,
      сараз мӕ раст фӕндагыл,
      уымӕн ӕмӕ ме знӕгтӕ мӕ алыварс сты.
¹² Ма бакӕн мӕ уды ме знӕгты бар,
      уымӕн ӕмӕ мыл сыстадысты мӕнг ӕвдисӕнтӕ
      ӕмӕ ӕхсидынц мастӕй.

¹³ Фӕлӕ мӕ уӕддӕр уырны:
      царды зӕххыл фендзынӕн Хуыцауы хорзӕх.
¹⁴ Дӕ зӕрдӕ дар Хуыцауыл,
      у ныфсджын ӕмӕ ӕхсарджын,
      дӕ зӕрдӕ дар Хуыцауыл!

27 Псалом

¹ Давиды псалом.

      Дӕуӕн лӕгъстӕ кӕнын, Дунедарӕг, мӕ къӕдзӕх,
      ма мӕ аздах Де 'ргом ӕнӕсымӕй;
      науӕд мын дзуапп куы нӕ раттай,
      уӕд ингӕнмӕ цӕуджытау суыдзынӕн.
² Фехъус мын мӕ лӕгъстӕ,
      ӕххуысагур Дӕм куы фӕдзыназын,
      ме 'рмттӕ Дӕ сыгъдӕг Кувӕндонмӕ
      куы фӕдарын, уӕд.

³ Ӕндӕрӕн «фарн» чи дзуры,
      афтӕмӕй та йӕ зӕрдӕйы фыдӕх кӕмӕн ис,
      уыцы фыдлӕгтӕ ӕмӕ ӕвзӕргӕнджытимӕ
      ма фесаф мӕн.
⁴ Ратт сын сӕ хъуыддӕгтӕм гӕсгӕ,
      сӕ фыдмитӕм гӕсгӕ,
      ратт сын сӕ къухты ракондмӕ гӕсгӕ;
      цы аккаг сты, уый сын бафид.
⁵ Уымӕн ӕмӕ Хуыцауы архайд
      ӕмӕ Йе 'рмдзӕфмӕ сӕ хъус нӕ дарынц;
      ныппырх сӕ кӕндзӕн сисау
      ӕмӕ сыл нал схӕцдзӕн.

⁶ Арфӕгонд у Хуыцау, уымӕн ӕмӕ фехъуыста мӕн,
      ӕххуысагур Ӕм куы куывтон, уӕд.
⁷ Хуыцау – мӕ хъару ӕмӕ мӕ уарт.
      Ууыл дардтон мӕ зӕрдӕ, ӕмӕ мын баххуыс кодта;
      мӕ зӕрдӕ райы фырцинӕй,
      ӕмӕ Йӕ стауын мӕ зарӕгӕй.

⁸ Хуыцау Йӕ адӕмӕн хъару у,
      Йе 'взӕрстӕн – хъахъхъӕнӕг ӕмӕ ирвӕзынгӕнӕг.
⁹ Хуыцау, фервӕзын кӕн Дӕ адӕмы
      ӕмӕ арфӕ ракӕн Дӕ бындартӕн;
      хиз сӕ ӕмӕ сӕ хӕсс мыггагмӕ.

28 Псалом

¹ Давиды псалом.

      Стаут Хуыцауы, уӕларвон цӕрджытӕ,
      стаут Дунедарӕджы кад ӕмӕ хъомыс.
² Стаут Хуыцауы, кад скӕнут Йӕ номӕн;
      бакувут Дунедарӕгӕн Йӕ Сыгъдӕг кады рухсы.

³ Дунедарӕджы хъӕлӕс – дӕтты сӕрмӕ;
      ныннӕрыди кады Хуыцау;
      Йӕ хъӕлӕс зӕлы стыр дӕтты сӕрмӕ.
⁴ Дунедарӕджы хъӕлӕс хъомысджын у,
      Хуыцауӕн ис алӕмӕттаг хъӕлӕс.
⁵ Хуыцауы хъӕлӕс дӕрӕн кӕны бӕрзонд нӕзытӕ,
      Дунедарӕг дӕрӕн кӕны ливайнаг нӕзытӕ;
⁶ Ливаны хӕхты бафтыдта родау гӕппытыл,
      Сирионы хохы та – ӕрыгон хъӕддаг галау.
⁷ Хуыцауы хъӕлӕс сирвӕзын кӕны пиллон арт.
⁸ Хуыцауы хъӕлӕсӕй баризы ӕдзӕрӕг быдыр;
      Дунедарӕг баризын кӕны Кадесы ӕдзӕрӕг быдыр.
⁹ Дунедарӕджы хъӕлӕс ныууигъы тулдзбӕлӕстӕ,
      ӕмӕ сбӕгънӕг вӕййы хъӕд.
      Уӕд Йӕ Кувӕндоны се 'ппӕт дӕр дзурынц:
      «Кадджын уӕд!»

¹⁰ Дунедарӕг паддзахиуӕг кӕны дӕтты сӕрмӕ;
      Хуыцау баддзӕни мыггагмӕ Йӕ паддзахы бадӕны.
¹¹ Дунедарӕг дӕтты Йӕ адӕмӕн хъару,
      Йӕ адӕмӕн дӕтты фарны арфӕ.

29 Псалом

¹ Давиды псалом.
      Зарӕг.
      Кувӕндон срухс кӕныны фӕдыл.

² Бӕрзонд скӕндзынӕн Дӕ кад, Дунедарӕг,
      уымӕн ӕмӕ схӕцыдтӕ мӕныл
      ӕмӕ ме знӕгты ферайын нӕ бауагътай.
³ Дунедарӕг, мӕ Хуыцау, ӕз Дӕм сдзынӕзтон,
      ӕмӕ мӕ Ды сдзӕбӕх кодтай.
⁴ Ды сластай мӕрдтыбӕстӕй мӕ уды, Хуыцау,
      райгас мӕ кодтай,
      цӕмӕй ингӕнмӕ ма ныххизон.

⁵ Зарут Хуыцауӕн, Йӕ рӕстгӕнджытӕ,
      ӕппӕлут Йӕ сыгъдӕг номӕй.
⁶ Уымӕн ӕмӕ Йӕ маст уысмӕй фылдӕр нӕ ахӕссы,
      Йӕ аудын та – цӕрӕнбонты.
      Изӕрӕй вӕййы хъарӕг,
      райсомӕй та – цин.

⁷ Ӕз мӕ фӕрнджын афон дзырдтон:
      «Мыггагмӕ дӕр нӕ фӕцуддзынӕн».
⁸ Дӕ аудынӕй, Дунедарӕг,
      Ды сфидар кодтай мӕ хох;
      фӕлӕ Де 'ргом аздӕхтай мӕнӕй,
      ӕмӕ ӕз фӕтыхстӕн.
⁹ Уӕд Дӕумӕ сдзырдтон, Дунедарӕг –
      мӕ Хицауӕн лӕгъстӕ кодтон:
¹⁰ «Куы амӕлон, ингӕнмӕ куы ныххизон,
      уӕд цы пайда у!
      Сыджыт Дӕ стаудзӕни, мыййаг,
      ӕмӕ хъусын кӕндзӕни Дӕ ӕцӕгад?
¹¹ Фехъус мӕ, Хуыцау, ӕмӕ мын батӕригъӕд кӕн.
      Дунедарӕг, у ме 'ххуысгӕнӕг».

¹² Мӕ хъарӕг мын раивтай зарынӕй,
      раластай мӕ хъисынтӕ[8]
      ӕмӕ мӕ астӕу ӕрбалвӕстай цинӕй.
¹³ Уымӕн Дӕ стауы мӕ уд,
      ӕмӕ Дӕу стауынӕй нӕ банцайдзӕн!
      Мыггагмӕ дӕр Дӕуӕй бузныг уыдзынӕн,
      Дунедарӕг, мӕ Хуыцау!

30 Псалом

¹ Зарӕггӕнджыты разамонӕгмӕ.
      Давиды псалом.

² Дӕумӕ ссардтон ӕз ӕмбӕхсӕн, Дунедарӕг –
      нӕ фегад уыдзынӕн мыггагмӕ дӕр;
      бахиз мӕ Дӕ рӕстадмӕ гӕсгӕ.
³ Фехъус мӕ, рӕвдздӕр мӕм ӕрцу ӕххуысмӕ;
      Ды мын у ӕнӕфӕцудгӕ къӕдзӕх,
      фидар бынат мӕ ирвӕзындзинадӕн.
⁴ Ды мӕ къӕдзӕх ӕмӕ мӕ фидар дӕ;
      кӕн мӕ размӕ ӕмӕ мын уынаффӕгӕнӕг у
      Дӕ номы сӕраппонд.
⁵ Суӕгъд мӕ кӕн, сусӕгӕй мӕнӕн
      цы къӕппӕг сӕвӕрдтой, уымӕй,
      уымӕн ӕмӕ Ды мӕ сӕрылхӕцӕг дӕ.
⁶ Дӕ къухмӕ дӕттын мӕ уд;
      Ды уыдтӕ мӕ ирвӕзынгӕнӕг,
      О Дунедарӕг, ӕцӕгады Хуыцау.

⁷ Ме сӕфт уынын
      ницӕйаг мӕнгхуыцӕуттӕм кувджытӕй;
      мӕнӕн та Хуыцау у мӕ ныфс.
⁸ Хъӕлдзӕг уыдзынӕн
      ӕмӕ цин кӕндзынӕн Дӕ хорзӕхыл,
      уымӕн ӕмӕ федтай мӕ тухӕнтӕ,
      базыдтай мӕ уды хъынцъым
⁹ Ӕмӕ мӕ нӕ радтай знаджы къухмӕ,
      мӕ къӕхтӕ мын ӕрӕвӕрдтай ӕдас ран.

¹⁰ Батӕригъӕд мын кӕн, Хуыцау,
      уымӕн ӕмӕ уынгӕг ран дӕн;
      мастӕй тайы мӕ цӕсты рухс, мӕ уд ӕмӕ мӕ буар.
¹¹ Мӕ цард ӕрвитын хъыггӕнгӕ,
      мӕ азтӕ – хъӕрзгӕйӕ;
      мӕ фыдӕбӕттӕй сфӕлахс и мӕ тых,
      ме стджытӕ баруадысты.
¹² Ме 'ппӕт знӕгтӕн сдӕн фидиссаг,
      уӕлдайдӕр та – мӕ сыхӕгтӕн,
      тасы хос – мӕ зонгӕтӕн.
      Фӕндагыл мӕ чи фены,
      уыдон ме 'мгӕрон нӕ цӕуынц.
¹³ Мӕрдырох фӕдӕн адӕмы зӕрдӕты,
      пырх мигӕнӕнӕй уӕлдай нал дӕн.
¹⁴ Бирӕтӕй хъусын мӕ фыдгой,
      алырдыгӕй дӕр – ӕртхъирӕн;
      мӕ ныхмӕ аразынц цӕдис,
      хъавынц мӕ уд сыскъуынынмӕ.

¹⁵ Ӕз та, Дунедарӕг, мӕ зӕрдӕ Дӕуыл дарын
      ӕмӕ зӕгъын: «Ды мӕ Хуыцау дӕ».
¹⁶ Дӕ къухы ис мӕ царды ӕмгъуыд;
      байс мӕ ме знӕгты къухӕй
      ӕмӕ мӕ фӕдылзилджытӕй.
¹⁷ Срухс кӕн мӕн, Дӕ цагъары, Дӕ цӕсгомы рухсӕй;
      Ды уарзӕгой дӕ ӕмӕ мӕ фервӕзын кӕн.
¹⁸ Дунедарӕг, нӕ фегад уыдзынӕн,
      уымӕн ӕмӕ Дӕумӕ дзыназын;
      уадз фыдлӕгтӕ фегад уой, бамыр уой дӕлдзӕхы.
¹⁹ Уадз багомыг уӕнт
      рӕстгӕнӕгыл сӕрбӕрзондӕй
      ӕмӕ ӕнӕрвӕссонӕй дамтӕ дзурӕг ӕвзӕгтӕ.

²⁰ Куыд бирӕ хӕрзтӕ Дӕм ис ӕвӕрд,
      Дӕуӕй чи тӕрсы, уыдонӕн;
      Дӕуыл зӕрдӕ дарджытӕн сӕ ратдзынӕ
      адӕмы цӕсты раз.
²¹ Ды Дӕ цӕстӕнгасӕй
      хъахъхъӕныс уыдон адӕмы фыдвӕндтӕй,
      фыдӕвзӕгтӕй сӕ ӕмбӕхсыс Дӕ аууоны.
²² Арфӕгонд у, Хуыцау,
      цы сахарыл ӕртыхстысты[9],
      уым мӕм Йӕ диссаджы хорзӕх Чи равдыста.
²³ Ӕз та мӕ тыхсты заман
      ӕнхъӕлдтон: «Ныууагътай мӕ»;
      фӕлӕ Ды, бӕлвырд, фехъуыстай мӕ лӕгъстӕ,
      ӕххуысагур Дӕм куы куывтон, уӕд.

²⁴ Уарзут Хуыцауы, Йе 'ппӕт сыгъдӕджытӕ;
      Дунедарӕг хъахъхъӕны Йӕ иузӕрдионты,
      сӕрыстыртӕн та бафиддзӕни ӕххӕстӕй.
²⁵ Ут ӕхсарджын ӕмӕ зӕрдӕфидар,
      ӕппӕт Хуыцауыл ӕууӕндджытӕ!

31 Псалом

¹ Давиды зондамонӕн псалом.

      Тӕхудиаг у,
      йӕ фыдмийы азым барст кӕмӕн у,
      ӕмӕ йӕ тӕригъӕд хатыргонд кӕмӕн у.
² Тӕхудиаг у,
      Хуыцау йӕ зылын кӕмӕн нӕ банымайдзӕн,
      йӕ уд ӕнӕхин кӕмӕн у, уыцы адӕймаг.

³ Мӕ тӕригъӕд куы нӕ хъӕр кодтон,
      уӕд ме 'рвылбоны хъӕрзынӕй
      ме стджытӕ скӕлӕддзаг сты.
⁴ Уымӕн ӕмӕ ӕхсӕвӕй-бонӕй
      ӕнкъардтон Дӕ къухы уӕз;
      ме уӕнгты тых айсӕфти,
      цыма сӕрдыгон хус рӕстӕджы. ||
⁵ Фӕлӕ Дын ӕз раргом кодтон мӕ тӕригъӕд
      ӕмӕ мӕ фыдми нӕ бамбӕхстон.
      Ӕз загътон:
      «Басӕттон Хуыцауы раз мӕ фыдмитыл»,
      ӕмӕ Ды систай мӕ азым,
      ныббарстай мӕ тӕригъӕд. ||

⁶ Афтӕ Дӕм алы рӕстгӕнӕг дӕр бакувӕд,
      цалынмӕ Дын ссарӕн ис;
      уӕд ӕм стыр дӕтты ивылӕнтӕ дӕр
      нӕ бахӕццӕ уыдзысты.
⁷ Ды ме 'мбӕхсӕн Дӕ, бахиздзынӕ мӕ хъыгтӕй
      ӕмӕ мын ратдзынӕ ирвӕзыны цины зард. ||

⁸ Ды загътай: «Раст зондыл дӕ сараздзынӕн,
      цы фӕндагыл дӕ цӕуын хъӕуы,
      уый дын бацамондзынӕн;
      уыдзынӕн дын уынаффӕгӕнӕг.
      Уӕларвӕй дӕумӕ у мӕ каст.
⁹ Ма ут ӕнӕрхъуыды бӕх кӕнӕ хӕргӕфсы хуызӕн,
      идонӕй кӕнӕ дзыларӕй здахын кӕй хъӕуы –
      кӕннод дӕм не 'рбахӕстӕг уыдзысты».

¹⁰ Бирӕ хъыгтӕ бавзардзӕн фыдлӕг;
      Хуыцауыл ӕууӕндӕг та хорзӕхтӕй ӕфсӕст у.
¹¹ Райут ӕмӕ цин кӕнут Хуыцауыл, рӕстгӕнджытӕ;
      зарут фырцинӕй уе 'ппӕт дӕр, рӕстзӕрдӕтӕ.

32 Псалом

¹ Зарут фырцинӕй, Дунедарӕгӕн, рӕстгӕнджытӕ;
      рӕстытыл фидауы Уый стауын.
² Кад кӕнут Хуыцауӕн дала-фӕндыртыл
      ӕмӕ дыууадӕстӕнонтыл,
      цӕгъдут Ын дӕсхъисонтыл.
³ Зарут Ын ног зарӕг,
      цӕгъдут Ын аив ӕмӕ хъӕлдзӕгӕй.

⁴ Уымӕн ӕмӕ Дунедарӕгӕн Йӕ дзырд раст у,
      ӕнувыд у Йӕ алы хъуыддаджы дӕр.
⁵ Хуыцау рӕстдзинад ӕмӕ ӕнӕхӕрам тӕрхон уарзы;
      зӕхх дзаг у Йӕ хорзӕхӕй.

⁶ Хуыцауы дзырдӕй сконд сты уӕлӕрвтӕ,
      Йӕ ныхасы хъаруйӕ – ӕппӕт стъалыты рӕдзагъд.
⁷ Хуыцау цӕндау ӕрӕмбырд кодта денджызты дон,
      Йе ӕвӕрӕнты уромы дӕтты арфытӕ.
⁸ Ӕппӕт зӕхх тӕрсӕд Дунедарӕгӕй,
      Йӕ тасӕй ризӕнт дун-дунейы ӕппӕт цӕрджытӕ.
⁹ Уымӕн ӕмӕ Хуыцау загъта, ӕмӕ сырӕзти;
      бардзырд радта, ӕмӕ сӕххӕст ис.

¹⁰ Хуыцау фехалы адӕмты фӕндтӕ,
      фӕмӕнг сын кӕны сӕ уынаффӕтӕ.
¹¹ Хуыцауы фӕнд та мыггагмӕ цӕры;
      Йӕ зӕрдӕйы цы уынаффӕтӕ ис,
      уыдон фӕлтӕрӕй-фӕлтӕрмӕ ахӕссынц.
¹² Тӕхудиаг сты уыцы адӕм,
      Дунедарӕг сӕ Хуыцау кӕмӕн у,
      ӕмӕ – адӕмыхӕттытӕ,
      Уый Йӕхицӕн бындартӕн кӕй сӕвзӕрста.

¹³ Дунедарӕг кӕсы уӕлӕрвтӕй,
      уыны алы адӕймаджы дӕр.
¹⁴ Йӕ паддзахы бадӕнӕй Йӕ цӕст дары
      зӕххыл цӕрӕг ӕппӕт адӕммӕ;
¹⁵ Уый у се 'ппӕты зӕрдӕты скӕнӕг,
      лӕмбынӕг кӕсы сӕ алы хъуыддагмӕ дӕр.

¹⁶ Паддзах йӕ бирӕ ӕфсады фӕрцы
      нӕ фервӕздзӕни;
      хъӕбатыры йе стыр тых нӕ бахъахъхъӕндзӕн.
¹⁷ Бӕхы стыр хъаруйыл ныфс ӕвӕрӕн дзӕгъӕлы у –
      йӕ цырд дугъӕй никӕй фервӕзын кӕндзӕни.
¹⁸ Фӕлӕ, Дунедарӕг Йӕ цӕст дары чи дзы тӕрсы
      ӕмӕ Йӕ хорзӕхмӕ чи ӕнхъӕлмӕ кӕсы, уыдонмӕ.
¹⁹ Цӕмӕй сын сӕ удтӕ бахиза мӕлӕтӕй
      ӕмӕ сӕ цард – стонг рӕстӕджы.

²⁰ Мах Дунедарӕгыл дарӕм нӕ зӕрдӕ;
      Уый у не 'ххуысгӕнӕг ӕмӕ нӕ уарт.
²¹ Хуыцауыл цин кӕны нӕ зӕрдӕ,
      уымӕн ӕмӕ Йӕ сыгъдӕг номӕй стӕм ныфсджын.
²² Уӕдӕ Дыл мах нӕ зӕрдӕ куыд дарӕм, Хуыцау,
      афтӕ Дӕ хорзӕх дӕр иудадзыг уӕд немӕ.

33 Псалом

¹ Давиды псалом.
      Давид Авимелехы раз
      ӕррайы ӕфсон куы скодта,
      ӕмӕ йӕ Авимелех куы фӕсырдта,
      ӕмӕ уырдыгӕй куы ацыд, уый фӕдыл.

² Кӕддӕриддӕр кад кӕндзынӕн Хуыцауӕн;
      Уымӕй ӕппӕлын уыдзӕн иудадзыг мӕ былалгъыл.
³ Мӕ уд ӕппӕлдзӕни Дунедарӕгӕй;
      уадз фехъусой уый ӕфхӕрдтытӕ ӕмӕ цин кӕной.
⁴ Стаут мемӕ Хуыцауы,
      иумӕ сбӕрзонд кӕнӕм Йӕ ном.

⁵ Ӕз агуырдтон Дунедарӕджы, ӕмӕ мӕ фехъуыста;
      бахызта мӕ, тас мын цӕмӕй уыд, ӕппӕт уыдӕттӕй.
⁶ Уымӕ йе 'ргом чи аздахы уыдон срухс вӕййынц;
      сӕ сӕртӕ нӕ фегад уыдзысты.
⁷ Мӕгуыр скуывта – Дунедарӕг ӕй фехъуыста,
      бахызта йӕ йе 'ппӕт бӕллӕхтӕй.
⁸ Хуыцауӕй чи тӕрсы,
      Йӕ зӕд уыдоны алыварс лӕууы
      ӕмӕ сӕ ирвӕзын кӕны.

⁹ Бафӕлварут ӕмӕ фендзыстут,
      Хуыцау куыд хорз у, уый!
      Тӕхудиаг у, Дунедарӕджы бар йӕхи чи бакӕны.
¹⁰ Тӕрсут Хуыцауӕй, Йӕ сыгъдӕджытӕ;
      чи Дзы тӕрсы, уыдон хъуаг ницӕмӕй ӕййафынц.
¹¹ Домбӕйттӕ дӕр слӕмӕгъ вӕййынц,
      баййафынц ӕххормаг;
      Хуыцауы чи агуры,
      уыдон та ӕнӕхай не сты иу хорзӕхӕй дӕр.

¹² Ӕрцӕут, мӕ хъӕбултӕ, ӕмӕ мӕм байхъусут;
      ӕз уӕ сахуыр кӕндзынӕн Хуыцауӕй куыд тӕрсын хъӕуы, ууыл.
¹³ Бӕллыс ды цардмӕ,
      уарзыс цӕрӕнбонтӕ ӕмӕ агурыс хӕрзӕбон?
¹⁴ Де 'взагӕй фыд ма ракӕн,
      ӕмӕ дӕ дзыхӕй мӕнгард ныхас ма рацӕуӕд.
¹⁵ Аиуварс у фыдмийӕ ӕмӕ у хӕрзгӕнӕг;
      ссар фидыды фӕндаг ӕмӕ йыл цу.

¹⁶ Хуыцауы цӕстытӕ сты рӕстгӕнджыты 'рдӕм,
      Йӕ хъустӕ та – сӕ дзыназынмӕ.
¹⁷ Фӕлӕ Хуыцауы цӕсгом фыдгӕнджыты ныхмӕ у,
      цӕмӕй сын зӕххыл сӕ кой дӕр фесафа.
¹⁸ Рӕстытӕ Йын балӕгъстӕ кӕнынц,
      Дунедарӕг сӕ фехъусы
      ӕмӕ сӕ бахизы се 'ппӕт бӕллӕхтӕй.
¹⁹ Хӕстӕг у Хуыцау састзӕрдӕтӕм,
      ирвӕзын кӕны рыстудты.

²⁰ Бирӕ зынтӕ ӕвзары рӕстгӕнӕг,
      фӕлӕ йӕ Дунедарӕг се 'ппӕтӕй дӕр бахизы.
²¹ Хуыцау ын хъахъхъӕны йе уӕнгтӕ,
      ӕмӕ дзы иу дӕр нӕ асӕтдзӕни.
²² Фыдлӕджы амардзӕни йӕхи фыдӕх;
      рӕстгӕнӕгӕй йе сӕфт чи уыны,
      уыдон баййафдзысты ӕфхӕрд.
²³ Хуыцау бахиздзӕн Йӕ цагъарты удтӕ,
      чи Йыл ӕууӕнды, уыдонӕй ӕфхӕрд ничи уыдзӕн.

34 Псалом

¹ Давиды псалом.

      Ӕрлӕуу сӕ ныхмӕ, Дунедарӕг,
      мӕ ныхмӕлӕуджытӕн;
      бацу тохы мемӕ тохгӕнджытимӕ.
² Райс Дӕ фидар уарт ӕмӕ згъӕрдарӕс,
      фӕзын мӕм ӕххуысмӕ.
³ Райс арц ӕмӕ ӕрлӕуу мӕн сурджыты развӕндагыл;
      мӕ удӕн зӕгъ: «Ӕз дӕ ирвӕзынгӕнӕг дӕн».

⁴ Фегад ӕмӕ фӕхудинаг уӕнт,
      мӕн амарынмӕ чи агуры, уыдон;
      мӕнӕн фыдвӕндгӕнджытӕ
      фӕуӕнт лидзинаг ӕмӕ фидисы хай;
⁵ Дымгӕ кӕй ныффӕйлауы,
      ахӕм зыгуымӕй уӕлдай ма уӕнт,
      Хуыцауы зӕд сӕ фӕсурӕд;
⁶ Талынг ӕмӕ бырынцъаг уӕд сӕ фӕндаг,
      ӕмӕ сӕ сурӕд Хуыцауы зӕд.
⁷ Уымӕн ӕмӕ мын ӕнаххосӕй
      сусӕгӕй сӕвӕрдтой къӕппӕг,
      ӕнаххосӕй мын скъахтой уӕрм.
⁸ Ӕнӕнхъӕлӕджы ӕрцӕуӕд се сӕфт,
      мӕнӕн цы къӕппӕг сӕвӕрдтой,
      уый сын ӕрцахсӕд сӕхи, бахауӕнт дзы се сӕфтӕн.
⁹ Мӕ уд та цин кӕндзӕни мӕ Хуыцауыл,
      райдзӕни, кӕй мӕ бахызта, ууыл.
¹⁰ Ме уӕнгтӕ иууылдӕр зӕгъдзысты:
      «Хуыцау, чи у Дӕ хуызӕн,
      Дӕуау чи ирвӕзын кӕны ӕдыхы тыхджынӕй,
      мӕгуыры ӕмӕ гӕвзыччы – стигъджытӕй?»

¹¹ Мӕ ныхмӕ рацыдысты ӕгъатыр ӕвдисӕнтӕ,
      фӕрсынц мӕ, ӕз цы нӕ зонын, уымӕй.
¹² Мӕ хорз мын фидынц фыдӕй,
      цӕмӕй дзӕгъӕлӕй баззайа мӕ уд.
¹³ Уыдон-иу куы фӕрынчын сты,
      уӕд-иу ӕз скодтон хъисынтӕ,
      мӕхи-иу бадомдтон ком дарынӕй.
      Мӕ куывд-иу здӕхти мӕ риуы арфмӕ.
¹⁴ Ӕз сӕм кастӕн лымӕн ӕмӕ ӕфсымӕры цӕстӕй;
      цыдтӕн-иу ӕнкъардӕй, сӕргуыбырӕй,
      мӕ мады мардыл кӕуӕгау.
¹⁵ Ӕз куы фӕкалдтӕн, уӕд уыдон
      ӕрбамбырд сты цингӕнгӕ;
      ме 'фхӕрджытӕ рамбырд сты мӕ ныхмӕ,
      нӕ зонын, цӕй аххосӕй, фӕлӕ кодтой мӕ фыдгой,
      банцайӕн сын нал уыди.
¹⁶ Ӕнӕхуыцӕутты ӕхсӕн мӕ хынджылӕг кодтой,
      ӕмӕ мӕм цыди сӕ дӕндӕгты къӕс-къӕс.

¹⁷ О Хицау Хуыцау, бирӕ ма сӕм кӕсдзынӕ?
      Байс мӕ уды сӕ тыхтонайӕ,
      мӕ иунӕг цард – ӕрыгон домбӕйттӕй.
¹⁸ Бузныг Дын зӕгъдзынӕн бирӕ адӕмы раз,
      дзыллӕты ӕхсӕн стаудзынӕн Дӕу.
¹⁹ Ӕнаххосӕй мӕм знаджы цӕстӕй чи кӕсы,
      уадз уыдон ма ферайой мӕныл,
      ӕнӕхъуаджы мӕ йе сӕфт чи уыны,
      уыдон кӕрӕдзимӕ сӕ цӕстытӕ ма ныкъулой.
²⁰ Сӕ ныхас нӕу фидыдыл,
      зӕххыл сабырӕй цӕрджыты ныхмӕ
      нывӕндынц фыдвӕндтӕ.
²¹ Се 'взӕгтӕ суагътой мӕнмӕ ӕмӕ дзурынц:
      «Афтӕ! Афтӕ! Уый дын нӕхи цӕстӕй кӕй федтам!»

²² Дӕхӕдӕг сӕ уыныс, Дунедарӕг,
      ӕмӕ ма у ӕнӕдзуапп;
      ма адард у мӕнӕй, мӕ Паддзах!
²³ Фӕзын ӕмӕ рахӕсс Дӕ тӕрхон,
      равзар мӕ хъаст, мӕ Паддзах, мӕ Хуыцау!
²⁴ Рахӕсс мын тӕрхон
      Дӕ рӕстадмӕ гӕсгӕ, Дунедарӕг, мӕ Хуыцау,
      ӕмӕ мыл ма ферайой,
²⁵ Сӕхинымӕр мауал дзурой:
      «Афтӕ, нӕ фӕндиаг фӕци!»,
      мауал дзурой: «Аныхъуырдтам ӕй»,
²⁶ Ӕмӕ ӕхсызгон кӕмӕн у мӕ бӕллӕх,
      уыдон се 'ппӕт дӕр фӕфидиссаг уой,
      схъӕлӕй мӕм чи кӕсы,
      уыдон фӕхудинаг ӕмӕ фегад уой.
²⁷ Мӕ рӕстад ӕхсызгон кӕмӕн у,
      уыдон та райой, цингӕнгӕ иудадзыг дзурой:
      «Скадджын уӕд Хуыцау,
      Йӕ цагъарӕн фарн Кӕй зӕрдӕ зӕгъы!»
²⁸ Ӕмӕ мӕ дзырды сӕр уыдзӕни Дӕ рӕстад,
      ӕрвылбон ӕппӕлдзынӕн Дӕуӕй.

35 Псалом

¹ Зарӕггӕнджыты разамонӕгмӕ.
      Хуыцауы цагъар Давиды псалом.

² Фыдзондӕн йӕ зӕрдӕйы рӕбынӕй
      хъуысы тӕригъӕды хъӕлӕс –
      Хуыцауы тас ницы у йӕ цӕсты.
³ Уый йӕхи зӕрдӕ ӕлхӕны,
      цыма йӕм йӕ тӕригъӕд феныны
      ӕмӕ ныууадзыны фӕнд ис.
⁴ Йӕ ныхас – фыдӕх ӕмӕ хин;
      нӕ йӕ фӕнды, ӕрсабыр уа, ӕрӕмбара,
      цӕмӕй кӕна хорз хъуыддӕгтӕ.
⁵ Йӕ хуыссӕны дӕр ма скӕрды фыдвӕндтӕ,
      ныллӕууы зылын фӕндагыл,
      фыдмитыл дӕр ӕлгъ нӕ кӕны.

⁶ Дунедарӕг, Дӕ хорзӕх у уӕлӕрвтӕм,
      Дӕ иузӕрдиондзинад – ӕврӕгъты онг.
⁷ Дӕ рӕстад – бӕрзонд хӕхтау,
      Дӕ уынаффӕтӕ – ӕнӕбын фурд.
      Адӕмы ӕмӕ цӕрӕгойты
      Ды хъахъхъӕныс, Хуыцау.
⁸ Аргъ нӕй Дӕ уарзтӕн, Хуыцау!
      Адӕмтӕ Дӕ дӕлбазыр ӕссарынц ӕнцой.
⁹ Дӕ Хӕдзары ӕфсӕдынц сойӕ,
      Де 'хцон цӕугӕдонӕй сын суадзыс сӕ дойны.
¹⁰ Уымӕн ӕмӕ Ды дӕ царды суадон;
      Дӕ рухсы мах уынӕм рухс.

¹¹ Афтӕ нырӕй фӕстӕмӕ дӕр
      Дӕ хорзӕх уӕд, Дӕу чи зоны, уыдонимӕ,
      Дӕ рӕстад – рӕстзӕрдӕтимӕ.
¹² Уадз сӕрыстыр мӕн йӕ къӕхты бын ма ныссӕндӕд,
      фыдлӕгты къух ма фӕсурӕд мӕн.
¹³ Кӕс, фӕкалдысты фыдгӕнджытӕ,
      ахаудтой, ӕмӕ сын рабадыны амал нал ис!

36 Псалом

¹ Давиды псалом.

      Ма бабӕлл фыдгӕнджытӕм,
      ма хӕлӕг кӕн уагхалджытӕм.
² Уыдон рӕхджы кӕрдӕгау ӕрхуыссдзысты зӕххыл
      ӕмӕ бампылдзысты зайӕгхалау.

³ Дӕ зӕрдӕ дар Хуыцауыл ӕмӕ у хӕрзгӕнӕг;
      цӕр зӕххыл ӕмӕ у иузӕрдион.
⁴ Агур удӕнцой Дунедарӕгмӕ,
      ӕмӕ дын сӕххӕст кӕндзӕни дӕ зӕрдӕйы бӕллицтӕ.

⁵ Хуыцауы бар бакӕн дӕ фӕндаг,
      ӕууӕнд Ыл, ӕмӕ Уый ӕппӕт дӕр сараздзӕни:
⁶ Сӕуӕхсидау сӕрттивын кӕндзӕни дӕ ӕцӕгад,
      боны рухсау – дӕ рӕстад.

⁷ Ссар ӕнцой Хуыцаумӕ ӕмӕ Йыл дӕ зӕрдӕ дар;
      ма бахӕлӕг кӕн, бирӕ кӕмӕн ӕнтысы,
      ахӕм хин адӕймагмӕ.
⁸ Мауал мӕсты кӕн ӕмӕ фыдӕх ма хӕсс;
      ма-иу стызмӕг у, кӕннод сараздзынӕ фыдбылыз.
⁹ Уымӕн ӕмӕ фыдлӕгтӕ фӕцагъды уыдзысты,
      Хуыцауыл ӕууӕндджытӕ та
      уыдзысты зӕххӕн бындартӕ.

¹⁰ Иучысыл ма, ӕмӕ фыдлӕгӕн
      йӕ кой дӕр нал уыдзӕни;
      акӕсдзынӕ сӕм ӕмӕ сӕ нал фендзынӕ.
¹¹ Зӕхх бауыдзӕн фӕлмас адӕмы
      ӕмӕ бафсӕддзысты бирӕ фарнӕй.

¹² Фыдлӕг фыдвӕндтӕ нывӕнды
      рӕстгӕнӕджы ныхмӕ,
      цӕуы йӕм йӕ дӕндӕгты къӕс-къӕс.
¹³ Хуыцау та йыл худы, уымӕн ӕмӕ уыны:
      фыдлӕгӕн ӕрӕввахс йӕ кӕрон.

¹⁴ Фыдлӕгтӕ сласынц цирхъ
      ӕмӕ айвазынц се 'рдынбос,
      ӕфхӕрд ӕмӕ мӕгуыры ӕрфӕлдахынӕввонг,
      цӕмӕй раст фӕндагыл цӕуджыты ӕрбамарой.
¹⁵ Сӕ цирхъ ныссӕдздзӕни сӕхи зӕрдӕты,
      се 'рдынтӕ асӕтдзысты.

¹⁶ Рӕстыты гыццыл мулк
      фыдлӕгты бирӕ бӕркадӕй хуыздӕр у.
¹⁷ Уымӕн ӕмӕ фыдадӕмӕн сӕ хъару асӕтдзӕни,
      рӕстытӕн та Дунедарӕг тых дӕтты.

¹⁸ Сыгъдӕджыты цӕргӕбонтӕ
      Хуыцауӕн зындгонд сты;
      сӕ исбон уыдзӕни мыггагмӕ дӕр.
¹⁹ Фыд рӕстӕджы нӕ фегад уыдзысты,
      стонг заманы хъуаг нӕ баййафдзысты.
²⁰ Фыдлӕгтӕ та бабын уыдзысты,
      Хуыцауы знӕгтӕ
      уыгӕрдӕны сойджын кӕрдӕгау фесӕфдзысты –
      фесӕфдзысты фӕздӕгау.

²¹ Фыдлӕг райсы хӕс ӕмӕ йӕ нӕ бафиды;
      рӕстгӕнӕг та рӕдауӕй дӕтты.
²² Уымӕн ӕмӕ Хуыцауӕй арфӕгонд адӕм
      уыдзысты зӕххы бындартӕ,
      кӕй ралгъита, уыдон та фӕцагъды уыдзысты.
²³ Хуыцау кӕй фӕндагыл ауды,
      уыцы адӕймаджы къахдзӕфтӕ
      скӕны ӕнӕфӕцудгӕ.
²⁴ Куы фӕцуда, уӕд дӕр не 'рхаудзӕн,
      уымӕн ӕмӕ йын Хуыцау хӕцы йӕ къухыл.

²⁵ Ӕз уыдтӕн ӕвзонг, зӕронд дӕр бадӕн,
      ӕмӕ нӕ федтон, рӕстгӕнӕджы Хуыцау ныууадза,
      ӕмӕ йӕ байзӕддӕгтӕ уой къӕбӕргур.
²⁶ Рӕстгӕнӕг кӕддӕриддӕр рӕдау у, дӕтты ӕфстау,
      ӕмӕ йӕ байзӕддӕгтӕ дӕр арфӕгонд уыдзысты.

²⁷ Аиуварс у фыдмийӕ, у хӕрзгӕнӕг
      ӕмӕ цӕрдзынӕ мыггагмӕ.
²⁸ Уымӕн ӕмӕ Дунедарӕг рӕстдзинад уарзы
      ӕмӕ Йӕ сыгъдӕджыты нӕ ныууадзы,
      хъахъхъӕны сӕ ӕнустӕм;
      фыдлӕгты байзӕддӕгтӕ та цагъды фӕуыдзысты.
²⁹ Зӕхх бауыдзӕни рӕстыты,
      ӕмӕ йыл цӕрдзысты мыггагмӕ.
³⁰ Рӕстгӕнӕджы дзыхӕй рацӕуы зондджын ныхас,
      йе 'взагӕй – рӕстдзинад.
³¹ Йӕ Хуыцауы ӕгъдау йӕ зӕрдӕйы ис;
      раст фӕндагӕй нӕ фӕивгъуыйдзӕн.
³² Фыдлӕг сусӕгӕй кӕсы рӕстгӕнӕджы фӕдыл,
      хъавы йӕм марынмӕ.
³³ Фӕлӕ йын ӕй Хуыцау йӕ къухтӕм нӕ ратдзӕни
      ӕмӕ йӕ тӕрхоны базылын кӕнын нӕ бауадздзӕни.
³⁴ Дӕ зӕрдӕ дар Хуыцауыл,
      цу Йӕ фӕндагыл, ӕмӕ дӕ сбӕрзонд кӕндзӕни;
      зӕххӕн уыдзынӕ бындар
      ӕмӕ фендзынӕ фыдлӕгты сӕфт.

³⁵ Федтон ӕз ӕгъатыр фыдлӕджы,
      хихджын хӕдӕвзӕрд бӕласау
      йӕхи дӕрдтыл айтындзгӕ.
³⁶ Фӕлӕ аивгъуыдта ӕмӕ нал ис,
      агурын ӕй ӕмӕ йӕ нӕ арын.

³⁷ Кӕс ӕнаипп адӕймагмӕ
      ӕмӕ дӕ цӕст дар рӕстгӕнӕгмӕ;
      уымӕн ӕмӕ ахӕм фарнхӕссӕг адӕймагӕн
      ис фидӕн.
³⁸ Тӕригъӕдджынтӕ та се 'ппӕт дӕр байсӕфдзысты –
      фыдлӕгтӕн фидӕн нӕй.

³⁹ Рӕстытӕн Хуыцауӕй у сӕ ирвӕзт;
      хъыг заман сын ӕмбӕхсӕн у.
⁴⁰ Дунедарӕг сын баххуыс кӕндзӕн
      ӕмӕ сӕ бахиздзӕни;
      бахиздзӕни сӕ фыдлӕгтӕй
      ӕмӕ сӕ фервӕзын кӕндзӕн;
      уымӕн ӕмӕ Уый у сӕ ныфс.

37 Псалом

¹ Давиды псалом.
      Ӕрымысынӕн.

² Тызмӕгӕй мын ма бауайдзӕф кӕн, Хуыцау,
      Дӕ карзӕй мӕ ма бафхӕр.
³ Уымӕн ӕмӕ Дӕ фаттӕ ныссагъдысты мӕ буары;
      Дӕ къух уӕз кӕны мӕныл.
⁴ Ды мӕм смӕсты дӕ,
      мӕ буарыл ӕгас бынат нал баззади;
      ме стджытӕ риссынц мӕ тӕригъӕдтӕй.
⁵ Мӕ азымтӕ мӕ сӕрӕй фӕуӕлдӕр сты,
      уӕззау ӕргъомау сӕ хӕссын нал фӕразын.
⁶ Ме 'нӕзонды тыххӕй
      мӕ цӕфтӕ тӕф кӕнынц ӕмӕ схӕф сты.
⁷ Ӕз ныггуыбыр дӕн ӕмӕ слӕмӕгъ дӕн бынтон,
      мӕ бон ӕгасӕй дӕр арвитын ӕнкъардӕй.
⁸ Артау судзынц ме уӕнгтӕ,
      ӕгас бынат нал ис мӕ буары.
⁹ Слӕмӕгъ дӕн ӕмӕ бынтон ӕрхаудтӕн;
      дзыназын мӕ зӕрдӕйы рыстӕй.

¹⁰ Мӕ Хуыцау, Дӕ разы сты ме 'ппӕт бӕллицтӕ,
      Дӕуӕй сусӕг нӕу мӕ уынӕргъын.
¹¹ Мӕ зӕрдӕ ризы, мӕ хъару атади,
      мӕ цӕсты рухс дӕр бамынӕг ис.
¹² Мӕ лымӕнтӕ ӕмӕ хӕлӕрттӕ
      иуварс лидзынц мӕ низӕй,
      мӕ хионтӕ лӕууынц дӕрддзӕф.
¹³ Мӕн амарынмӕ чи агуры,
      уыдон мын ӕвӕрынц къӕппӕг;
      ме 'взӕрмӕ бӕлджытӕ дзурынц мӕн фесафыныл,
      ӕрвылбон мӕ ныхмӕ фыдвӕндтӕ кӕнынц.

¹⁴ Ӕз та нӕ хъусын, къуырмайау, ӕмӕ
      ӕнӕсым дӕн, гобийау.
¹⁵ Ӕз фестадтӕн, хъусӕй чи нӕ хъусы
      ӕмӕ сын дзуапп раттын кӕй бон нӕу,
      ахӕм адӕймагау.
¹⁶ Уымӕн ӕмӕ Дӕумӕ ӕнхъӕлмӕ кӕсын, Дунедарӕг;
      Ды ӕнӕмӕнг дзуапп ратдзынӕ мӕнӕн,
      мӕ Паддзах, мӕ Хуыцау.
¹⁷ Ӕмӕ ӕз кувын:
      «Ма мыл ферайӕнт ме знӕгтӕ;
      мӕ къах куы фӕцуды,
      уӕд мӕм сӕрбӕрзондӕй ма кӕсӕнт».

¹⁸ Уымӕн ӕмӕ ӕрхауыны ӕввонг дӕн,
      мӕ рыст мӕ уӕгъд нӕ уадзы.
¹⁹ Мӕ азымыл сӕттын,
      фӕсмон кӕнын мӕ тӕригъӕдтыл.
²⁰ Мӕ фыдгултӕ та фидар кӕнынц сӕ царды;
      сбирӕ сты, мӕнмӕ ӕнаххосӕй
      чи сызнаг ис, уыдон.
²¹ Мӕ хорз фидынц ӕвзӕрӕй;
      хӕссынц мӕм фыдӕх,
      хорз аразынмӕ кӕй тырнын, уый тыххӕй.

²² Ма мӕ ныууадз, мӕ Армдарӕг,
      мӕ Хуыцау, ма адард у мӕнӕй.
²³ Ӕрцу мӕм рӕвдздӕр ӕххуысмӕ,
      мӕ Паддзах, мӕ ирвӕзынгӕнӕг!

38 Псалом

¹ Зарӕггӕнджыты разамонӕгмӕ; Едифумӕн.
      Давиды псалом.

² Ӕз загътон:
      «Мӕхи хиздзынӕн мӕ фӕндӕгтыл,
      цӕмӕй ме 'взагӕй тӕригъӕд ма ракӕнон;
      цалынмӕ фыдлӕг мӕ разы ис,
      уӕдмӕ мӕ дзых дардзынӕн ӕмырӕй».
³ Ӕз уыдтӕн ӕгомыг ӕмӕ ӕнӕсым,
      нӕ дзырдтон, суанг, хорз цы у, ууыл дӕр,
      ӕмӕ мӕ рыстыл бафтыди.
⁴ Мӕ зӕрдӕ ссыгъди мӕ риуы,
      мӕ хъуыдытӕй рацыди арт, ӕмӕ ӕз дзурын райдытон:

⁵ «Раргом мын кӕн, Дунедарӕг,
      кӕд уыдзӕни мӕ кӕрон,
      цас мын ис цӕрӕнбонтӕ,
      зӕгъ мын, мӕ цард куыд цыбыр у, уый.
⁶ Мӕнӕ мын Дӕ лӕвӕрд бонтӕ сты уылынгау,
      мӕ цардымгъуыд ницы у Дӕ разы.
      Ӕцӕгӕй дӕр:
      алы адӕймаджы цард дӕр у раулӕфтау. ||
⁷ Бӕлвырд, адӕймаг цӕры аууонау;
      дзӕгъӕлы у йӕ тухӕн, ӕмбырд кӕны
      ӕмӕ кӕмӕн баззайдзысты, уый нӕ зоны.

⁸ Ӕмӕ ныр цӕмӕ ӕнхъӕлмӕ кӕсон, Хуыцау?
      Мӕ ныфс ӕрмӕстдӕр Ды дӕ.
⁹ Ме 'ппӕт фыдмитӕй мӕ ссӕрибар кӕн,
      ӕнӕзонды къухтӕм мӕ хынджылӕгӕн ма ратт.
¹⁰ Ӕз багомыг дӕн,
      мӕ дзыхӕй ныхас нӕ хауы,
      уымӕн ӕмӕ Ды скодтай афтӕ.
¹¹ Аиуварс кӕн мӕнӕй Дӕ цӕфтӕ,
      Дӕ цонджы схуыстӕй сӕфын.
¹² Ды адӕймаджы йӕ рараст кӕнынӕн
      куы ӕфхӕрай йӕ азымы тыххӕй,
      уӕд ын ӕзгъӕлын кӕныс рӕмпӕг хӕрдау,
      зынаргъ ӕм цы ис, уый.
      Афтӕ, алы адӕймаджы цард дӕр мӕнг у.

¹³ Фехъус, Хуыцау, мӕ кувын
      ӕмӕ байхъус мӕ дзыназынмӕ,
      ма у ӕнӕдзуапп мӕ кӕуынмӕ;
      ме 'ппӕт фыдӕлтау Дӕм ӕз дӕр
      бӕлццон ӕмӕ ӕрцӕуӕггаг дӕн.
¹⁴ Аздах мӕ Дӕ тызмӕг цӕстӕнгас,
      цӕмӕй ма-иу бацин кӕнон,
      цалынмӕ нӕ аивгъуыдтон,
      ӕмӕ мӕ фӕд нӕ фесӕфти, уӕдмӕ».

39 Псалом

¹ Зарӕггӕнджыты разамонӕгмӕ.
      Давиды псалом.

² Фидарӕй мӕ зӕрдӕ дардтон Хуыцауыл,
      ӕмӕ мӕм Йе 'ргом раздӕхта,
      фехъуыста мӕ дзыназын.
³ Сласта мӕ талынг уӕрмӕй, арф цъыфдзастӕй,
      къӕдзӕхыл мӕ сӕвӕрдта,
      мӕ къахдзӕф мын скодта ӕнӕфӕцудгӕ;
⁴ Мӕ зӕрдӕйы мын сӕвӕрдта ног зарӕг –
      кады зарӕг нӕ Хуыцауӕн;
      бирӕтӕ фендзысты, ӕмӕ сӕм фӕзындзӕни тас,
      ныфс ӕвӕрдзысты Дунедарӕгӕй.

⁵ Тӕхудиаг у уыцы адӕймаг,
      Дунедарӕгыл йӕ зӕрдӕ чи дары,
      хъалтӕм ӕмӕ мӕнгдзинадмӕ здӕхджытӕм
      ӕмхиц чи нӕу.
⁶ Бирӕ диссӕгтӕ сарӕзтай Ды,
      Дунедарӕг, мӕ Хуыцау!
      Нӕ хорзӕхӕн сты Дӕ фӕндтӕ –
      чи уыдзӕн Дӕ хуызӕн!
      Ӕз сӕ радзурин, фӕлӕ сын нымӕц нӕй.

⁷ Нывондтӕ ӕмӕ Дын хуынтӕ фӕндон нӕ уыдысты,
      фӕлӕ мын Ды байгом кодтай мӕ хъустӕ;
      иууыл судзинаг ӕмӕ тӕригъӕды тыххӕй
      нывондтӕ не 'рцагуырдтай.
⁸ Уӕд загътон: «Мӕнӕ, фӕцӕуын;
      сыгъдӕг чиныджы фыст ис мӕн тыххӕй.
⁹ Мӕнӕн ӕхцон у Дӕ фӕнд сӕххӕст кӕнын,
      мӕ Хуыцау, Де 'гъдау мӕ зӕрдӕйы ис».
¹⁰ Стыр ӕмбырды ӕргом кодтон Дӕ рӕстад,
      мӕ дзых нӕ дардтон ӕмырӕй –
      Ды зоныс, Хуыцау.
¹¹ Дӕ рӕстдзинад нӕ бамбӕхстон мӕ зӕрдӕйы;
      Дӕ ӕнувыд ӕмӕ Дӕ ирвӕзындзинадыл
      дзырдтон ӕргомӕй.
      Стыр ӕмбырды нӕ басусӕг кодтон
      Дӕ уарзт ӕмӕ Дӕ ӕцӕгад.

¹² Дӕ хорзӕхӕй мӕ ӕнӕхай ма фӕкӕн, Хуыцау;
      Дӕ уарзт ӕмӕ Де 'цӕгад
      иудадзыг хъахъхъӕнӕд мӕн.
¹³ Уымӕн ӕмӕ мыл ӕртыхстысты
      ӕнӕнымӕц бӕллӕхтӕ;
      мӕ тӕригъӕдтӕ мӕ баййӕфтой,
      ӕмӕ цӕстӕй дӕр нал уынын.
      Мӕ сӕрыл цал ӕрдуйы ис, уымӕй фылдӕр сты;
      мӕ зӕрдӕйы ныфс фесӕфти.
¹⁴ Бацауд мыл ӕмӕ мӕ бахиз, Хуыцау;
      рӕвдздӕр мын баххуыс кӕн, Дунедарӕг.
¹⁵ Фегад ӕмӕ фӕхудинаг уӕнт,
      мӕн амарынмӕ чи хъавы, уыдон!
      Ӕвзӕр мын кӕй зӕрдӕ зӕгъы,
      уыдон лидзинаг фӕуӕнт ӕмӕ фегад уӕнт.
¹⁶ Мӕнӕн чи зӕгъы: «Афтӕ, афтӕ!»,
      уыдон сӕ фырхудинагӕй фӕсонт уӕнт.
¹⁷ Дӕумӕ чи тырны,
      уыдон райӕнт ӕмӕ цин кӕнӕнт;
      Дӕ ирвӕзтӕн аргъ чи кӕны,
      уыдон иудадзыг дзурӕнт: «Кадджын у, Хуыцау!»

¹⁸ Ӕз та ӕфхӕрд ӕмӕ мӕгуыр дӕн,
      фӕлӕ лӕууын Хуыцауы зӕрдыл.
      Ды ме 'ххуысгӕнӕг ӕмӕ мӕ сӕрибаргӕнӕг Дӕ,
      мӕ Хуыцау, ма фӕстиат кӕн.

40 Псалом

¹ Зарӕггӕнджыты разамонӕгмӕ.
      Давиды псалом.

² Тӕхудиаг у мӕгуырыл мӕтгӕнӕг;
      йӕ тыхст бон ӕй Хуыцау фервӕзын кӕндзӕни.
³ Дунедарӕг ӕй бахъахъхъӕндзӕн,
      бахиздзӕн ын йӕ цард,
      ӕмӕ тӕхудиаг уыдзӕни зӕххыл.
      Ды йӕ нӕ ратдзынӕ знӕгты къухтӕм.
⁴ Куы 'руатон уа, уӕд ын Хуыцау ратдзӕни хъару;
      Ды йын йӕ рынчыны сынтӕг
      раивдзынӕ ӕнӕниз цардӕй.

⁵ Ӕз загътон: «Хуыцау, бацауд мыл,
      сдзӕбӕх кӕн мӕ уды,
      уымӕн ӕмӕ Дӕ ныхмӕ сарӕзтон тӕригъӕд».
⁶ Ме знӕгтӕ бӕллынц ме сӕфтмӕ
      ӕмӕ дзурынц: «Кӕд амӕлдзӕни,
      йӕ кой кӕд фесӕфдзӕни?»
⁷ Бӕрӕг кӕнынмӕ мӕм чи ӕрбацӕуы,
      уый мын цӕстмӕхъус ныхӕстӕ фӕкӕны;
      йӕ зӕрдӕйы та ӕвӕры хахуыр
      ӕмӕ куы рацӕуы ӕддӕмӕ, уӕд кӕны мӕ фыдгой.
⁸ Йе сӕфт мӕ чи уыны,
      уыдон сусу-бусу кӕнынц мӕн тыххӕй,
      фыдӕх мын зӕгъы сӕ зӕрдӕ:
⁹ «Рын ӕй баййӕфта, фӕсӕйгӕ ӕмӕ нал сыстдзӕни».
¹⁰ Мемӕ хӕлар цы адӕймаг уыди,
      мӕ зӕрдӕ кӕуыл дардтон,
      мемӕ кӕрдзын чи хордта,
      уый дӕр мӕм йӕ къух систа.
¹¹ Ды та мын батӕригъӕд кӕн,
      Хуыцау, мӕ къӕхтыл мӕ слӕууын кӕн,
      ӕмӕ сын ӕз аккаг фӕуыдзынӕн.
¹² Ме знӕгтӕ мыл куы нӕ ферайой,
      уӕд базондзынӕн ӕз,
      Ды мӕныл кӕй аудыс, уый.
¹³ Мӕн та Ды хъахъхъӕныс ӕнаиппӕй,
      ӕмӕ мыггагмӕ уыдзынӕн Демӕ.

¹⁴ Арфӕгонд уӕд Дунедарӕг,
      Израилы Хуыцау, мыггагӕй-мыггагмӕ!
      Амен! Амен!

41 Псалом

¹ Зарӕггӕнджыты разамонӕгмӕ.
      Корейы фыртты зондамонӕн псалом.

² Саг суадонмӕ куыд фӕтырны,
      афтӕ мӕ уд Дӕумӕ тырны, мӕ Хуыцау!
³ Мӕ уд дойны кӕны Хуыцаумӕ,
      цардӕгас Хуыцаумӕ.
      Кӕд бацӕудзынӕн ӕмӕ кӕд балӕудзынӕн
      Хуыцауы цӕсгомы раз?
⁴ Ӕхсӕвӕй-бонӕй мӕ цӕссыгтӕ
      мӕнӕн уыдысты дзулау,
      ӕрвылбон мын куы дзырдтой:
      «Уӕдӕ кӕм ис дӕ Хуыцау?»
⁵ Ӕз уый куы ӕрымысын, уӕд мӕ зӕрдӕ фӕкӕуы;
      уымӕн ӕмӕ-иу ӕз,
      цинӕй заргӕйӕ ӕмӕ Хуыцауы стаугӕйӕ,
      цыдтӕн бӕрӕгбонхуыз дзыллӕйы разӕй
      Хуыцауы Хӕдзармӕ.

⁶ Цӕмӕн ӕрхӕндӕг дӕ, мӕ уд,
      цӕмӕн кӕныс мӕт?
      Ныфсджын у Хуыцауӕй;
      уымӕн ӕмӕ Йӕ ӕз ноджы стаудзынӕн,
      мӕ Ирвӕзынгӕнӕджы ӕмӕ мӕ Хуыцауы.

⁷ Мӕ уд мӕ риуы нырхӕндӕг,
      ӕмӕ Иорданы зӕххыл, Ермоныл,
      Цоары хохыл фӕмысын Дӕу.
⁸ Фурд сиды фурдмӕ Де 'хсӕрдзӕнты хъӕлӕсӕй;
      Дӕ дӕттӕ ӕмӕ Дӕ уылӕнтӕ
      ӕгасӕй дӕр ацыдысты мӕ сӕрты.
⁹ Фӕлӕ мӕм бонӕй Дунедарӕг равдисы Йӕ уарзт,
      Ууыл у ӕхсӕвы мӕ зарӕг,
      фӕкувын мӕ царддӕттӕг Хуыцаумӕ.
¹⁰ Зӕгъдзынӕн Хуыцауӕн, мӕ къӕдзӕхӕн:
      «Цӕмӕн мӕ ферох кодтай?
      Ме знаджы ӕфхӕрдӕй
      кӕугӕйӕ цӕмӕн цӕрын?»
¹¹ Ме стджытӕ бынтон ӕрызгъӕлдысты,
      мӕстӕй мӕ марынц мӕ фыдгултӕ
      ӕмӕ мын ӕрвылбон дзурынц:
      «Уӕдӕ кӕм ис дӕ Хуыцау?»

¹² Цӕмӕн ӕрхӕндӕг дӕ, мӕ уд,
      цӕмӕн кӕныс мӕт?
      Ныфсджын у Хуыцауӕй;
      уымӕн ӕмӕ Йӕ ӕз ноджы стаудзынӕн,
      мӕ Ирвӕзынгӕнӕджы ӕмӕ мӕ Хуыцауы.

42 Псалом

¹ Дӕ тӕрхон рахӕсс, Хуыцау, ӕмӕ сраст кӕн мӕн,
      ӕвзӕр адӕмы ныхмӕ тохы рахӕц мӕ сӕрыл;
      хин ӕмӕ ӕнӕраст адӕймагӕй баиргъӕв мӕн.
² Уымӕн ӕмӕ Ды мӕ хъахъхъӕнӕг Хуыцау дӕ;
      цӕмӕн мыл атигъ кодтай Дӕхи?
      Ме знаджы ӕфхӕрдӕй кӕугӕйӕ цӕмӕн цӕрын?
³ Рарвит мын Дӕ рухс ӕмӕ Де 'ӕцӕгад;
      уыдон мын уӕнт фӕндагамонӕг,
      ӕркӕнӕнт мӕ Дӕ сыгъдӕг хохмӕ
      ӕмӕ Дӕ Кувӕндонмӕ.
⁴ Бацӕудзынӕн Хуыцауы нывондхӕссӕнмӕ,
      Хуыцаумӕ – мӕ цины суадонмӕ,
      ӕмӕ Дӕ кадджын кӕндзынӕн хъисфӕндыртыл,
      Хуыцау, мӕ Хуыцау!

⁵ Цӕмӕн ӕрхӕндӕг дӕ, мӕ уд,
      цӕмӕн кӕныс мӕт?
      Ныфсджын у Хуыцауӕй;
      уымӕн ӕмӕ Йӕ ӕз ноджы стаудзынӕн,
      мӕ Ирвӕзынгӕнӕджы ӕмӕ мӕ Хуыцауы.

43 Псалом

¹ Зарӕггӕнджыты разамонӕгмӕ.
      Корейы фыртты зондамонӕн псалом.

² О Хуыцау, нӕхи хъустӕй фехъуыстам,
      ӕмӕ нын нӕ фыдӕлтӕ дзырдтой,
      сӕ заманы, рагзаманы
      Ды цы хъуыддӕгтӕ сарӕзтай, уыдоны тыххӕй.
³ Дӕхи къухӕй фӕсырдтай иннӕ адӕмты,
      уыдоны та дзы ӕрцӕрын кодтай;
      басастай адӕмыхӕттыты ӕмӕ сӕ фӕтардтай.
⁴ Афтӕмӕй нӕ рагфыдӕлтӕ
      зӕхх сӕ цирхъӕй нӕ байстой,
      уӕлахиз сын сӕхи къух не 'рхаста,
      фӕлӕ Дӕ рахиз цонг,
      Дӕ къух ӕмӕ Дӕ цӕсгомы рухс;
      уымӕн ӕмӕ сыл Ды аудыдтай.

⁵ Ды мӕ Хуыцау ӕмӕ мӕ Паддзах дӕ!
      Ды дӕттыс Иаковӕн уӕлахиз.
⁶ Дӕуимӕ басӕтдзыстӕм не знӕгты;
      къӕхтӕй ныссӕнддзыстӕм нӕ ныхмӕлӕуджыты.
⁷ Уымӕн ӕмӕ мӕ зӕрдӕ нӕ дарын ме 'рдыныл,
      мӕ цирхъ дӕр мӕ нӕ бахиздзӕни.
⁸ Фӕлӕ-иу нӕ Ды баиргъӕвтай не знӕгтӕй,
      махӕй йе сӕфт чи уыны,
      уыдоны-иу ӕртардтай ӕгадмӕ.
⁹ Хуыцауӕй уыди не 'ппӕлд алы бон дӕр,
      ӕмӕ стаудзыстӕм мыггагмӕ Дӕ ном. ||
¹⁰ Фӕлӕ ныл абон атигъ кодтай Дӕхи,
      ныууагътай нӕ ӕгады бынаты,
      нӕ рацӕуыс не 'фсадимӕ.
¹¹ Не знӕгтӕй нӕ лидзӕг фӕкодтай,
      махӕй йе сӕфт чи уыны, уыдон нӕ стигъынц.
¹² Фыстау нӕ радтай ӕргӕвдынмӕ,
      ныппырх нӕ кодтай иннӕ адӕмтыл.
¹³ Ӕгӕр аслам радтай Дӕ адӕмы –
      ӕфтиаг дзы нӕ райстай.
¹⁴ Ды нӕ фидиссаг фӕкодтай нӕ сыхӕгтӕн,
      нӕ алыварс чи цӕры,
      уыдон нӕ ӕфхӕрынц ӕмӕ ныл худынц.
¹⁵ Адӕмтӕ мах ӕрхӕссынц ӕмбисондӕн,
      сӕ сӕртӕ ныл тилынц иннӕ адӕмтӕ.
¹⁶ Ӕгад кӕй дӕн, уый уынын алы бон дӕр,
      мӕ цӕсгом судзы худинагӕй
¹⁷ Фидисгӕнӕджы ӕмӕ ӕфхӕрӕджы ныхӕстӕй,
      фыдгулы ӕмӕ мастисӕджы цӕстӕнгасӕй.

¹⁸ Ӕппӕт уыдӕттӕ баййӕфтой нӕ сӕртӕ;
      фӕлӕ Дӕ уӕддӕр мах нӕ ферох кодтам
      ӕмӕ Дӕ фидыд нӕ фехӕлдтам.
¹⁹ Нӕ зӕрдӕ Дыл не сивтам,
      нӕ адзӕгъӕл стӕм Дӕ фӕндагӕй.
²⁰ Ды та нӕ ныссӕстай
      хъӕддаг куыйты бӕстӕйы
      ӕмӕ нӕ бамбӕрзтай мӕлӕты аууонӕй.
²¹ Мах нӕ Хуыцауы ном куы ферох кодтаиккам,
      нӕ къухтӕ куы сдардтаиккам ӕндӕр хуыцаумӕ,
²² Уӕд нӕ Хуыцау нӕ федтаид, ӕви?
      Уымӕн ӕмӕ зӕрдӕйы ӕмбӕхст цы ис,
      уыдӕттӕ Хуыцау зоны.
²³ Фӕлӕ нӕ Дӕ номы тыххӕй марынц ӕрвылбон,
      нымайынц нӕ ӕргӕвдинаг фыстыл.

²⁴ Ракӕс, Дунедарӕг, цӕмӕн фынӕй кӕныс!
      Райхъал у, Дӕ къух ныл ма сис бынтондӕр.
²⁵ Дӕ цӕсгом нӕ цӕмӕн ӕмбӕхсыс?
      Цӕмӕн Дӕ ферох сты нӕ удхар ӕмӕ не 'фхӕрд?
²⁶ Рыгӕй уӕлдай нал стӕм, зӕххӕмвӕз систӕм.
²⁷ Рацу нӕм ӕххуысмӕ,
      ссӕрибар нӕ кӕн Дӕ хорзӕхмӕ гӕсгӕ!

44 Псалом

¹ Зарӕггӕнджыты разамонӕгмӕ.
      «Хъоппӕг дидинӕг»-ы зӕлтӕм гӕсгӕ.
      Корейы фыртты зондамонӕн,
      уарзондзинады зарӕг.

² Мӕ зӕрдӕйӕ рацыдысты фарны дзырдтӕ.
      Мӕ зарӕг – паддзахыл,
      ме 'взаг – азфыссӕджы тагъд сис.

³ Ды дӕ ӕппӕт адӕмы фырттӕй хуыздӕр;
      хорзӕх рацыди дӕ дзыхӕй, –
      афтӕ дыл Хуыцау Йӕ арфӕ бафтыдта мыггагмӕ.
⁴ Дӕхи сифтонг кӕн, тыхджын,
      дӕ цирхъӕй, дӕ цыт ӕмӕ де стырадӕй.
⁵ Рацу де стырады уӕлбӕхӕй,
      у уӕлахиз – ӕцӕгад, фӕлмас
      ӕмӕ рӕстады сӕраппонд;
      дӕ рахиз цонг саразӕд диссаджы хъуыддӕгтӕ.
⁶ Цыргъ сты дӕ фаттӕ –
      уыдон ахиздзысты паддзахы знӕгты зӕрдӕты;
      адӕмтӕ фӕуыдзысты дӕ къӕхты бын.
⁷ Дӕ Паддзахы бадӕн уыдзӕни мыггагмӕ, Хуыцау;
      Дӕ паддзахы лӕдзӕг – рӕстдзинады лӕдзӕг.
⁸ Ды бауарзтай рӕстдзинад,
      ӕнӕуынон дын у фыдми.
      Уымӕ гӕсгӕ Хуыцау, дӕ Хуыцау, сӕвзӕрста дӕу
      ӕмӕ дӕ сӕвӕрдта иннӕтӕй уӕлдӕр.
⁹ Дӕ дарӕстӕ ӕгасӕй дӕр кӕнынц мирройы,
      алойы ӕмӕ касийы[10] тӕф.
      Пылыстӕгӕй конд галуанӕй
      дӕу рӕвдауынц фӕндыры зӕлтӕ.
¹⁰ Паддзӕхты чызджытӕ – дӕ кадджын уазджытимӕ;
      ус-паддзах офираг сызгъӕрины фӕлыстӕй
      ӕрлӕууыди дӕ рахиз фарс.

¹¹ Байхъус, мӕ чызг, кӕс ӕмӕ айс дӕ зӕрдӕмӕ:
      ферох кӕн дӕ адӕмы ӕмӕ дӕ фыды хӕдзар,
¹² Ӕмӕ паддзахы зӕрдӕ
      бабӕлдзӕни дӕ рӕсугъддзинадмӕ;
      уымӕн ӕмӕ уый дӕ бардарӕг у, ӕмӕ йӕ нымай.
¹³ Тиры чызг ӕд лӕвӕрттӕ
      ӕмӕ адӕмты хъӕздыгдӕртӕ
      ӕнхъӕлмӕ кӕсдзысты дӕ хорз цӕстӕнгасмӕ.

¹⁴ Паддзахы чызгӕн йӕ намыс йӕ уды фидауцы ис;
      йӕ дарӕс – сызгъӕрин ӕндӕхтӕй уафт.
¹⁵ Аив нывӕфтыд дарӕсы йӕ фӕхонынц паддзахмӕ;
      йӕ фӕдыл дын фӕцӕуынц йӕ чызгӕмбӕлттӕ.
¹⁶ Фӕхонынц сӕ цингӕнгӕ ӕмӕ хъӕлдзӕгӕй,
      фӕхизынц паддзахы галуанмӕ.

¹⁷ Дӕ фырттӕ раивдзысты сӕ фыдӕлты;
      ды се 'ппӕт зӕххыл
      сӕвӕрдзынӕ кадджын хицӕуттӕй.
¹⁸ Дӕ ном дын скӕндзынӕн
      фӕлтӕрӕй-фӕлтӕрмӕ мысинаг,
      ӕмӕ дын адӕмтӕ кад кӕндзысты мыггагмӕ.

45 Псалом

¹ Зарӕггӕнджыты разамонӕгмӕ.
      Корейы фыртты зарӕг.
      «Аламоф»-ы зӕлтӕм гӕсгӕ.

² Хуыцау нын армдарӕг ӕмӕ тых,
      афоныл ӕххуысгӕнӕг нӕ бӕллӕхты.
³ Уымӕ гӕсгӕ нӕ фӕтӕрсдзыстӕм,
      зӕхх куы базмӕлид,
      хӕхтӕ денджызты хуыдымтӕм куы ныххауиккой,
⁴ Дӕтты уылӕнтӕ куы сабухой,
      ӕмӕ сӕ уынӕрӕй хӕхтӕ куы нынкъуысой, уӕд дӕр. ||

⁵ Донуайӕнтӕй райы Хуыцауы сахар –
      Бӕрзондбадӕджы сыгъдӕг цӕрӕнбынат.
⁶ Хуыцау уым ис, ӕмӕ сахар нӕ фӕцуддзӕн;
      Хуыцау ын баххуыс кӕндзӕни сӕумӕйӕ.
⁷ Скатай сты адӕмтӕ, базмӕлыдысты паддзахӕдтӕ:
      райхъуысти Дунедарӕджы хъӕлӕс,
      ӕмӕ бадон ис зӕхх.
⁸ Уӕлахизгӕнӕг Хуыцау немӕ ис,
      Иаковы Хуыцау нӕ мӕсыг у. ||

⁹ Ӕрцӕут ӕмӕ фенут Дунедарӕджы хъуыддӕгтӕ –
      зӕххыл цы дисӕфтауӕг митӕ бакодта, уый.
¹⁰ Зӕххы иу кӕронӕй иннӕмӕ баурӕдта хӕстытӕ,
      ацъӕл кодта ӕрдын ӕмӕ асаста арц,
      хӕстон уӕрдӕттӕ басыгъта арты.
¹¹ Уый зӕгъы: «Ныссабыр ут ӕмӕ базонут,
      Ӕз Дунедарӕг кӕй дӕн, уый.
      Мӕ кад бӕрзонд уыдзӕни адӕмты 'хсӕн,
      бӕрзонд уыдзӕни зӕххыл».
¹² Уӕлахизгӕнӕг Хуыцау немӕ ис,
      Иаковы Хуыцау нӕ мӕсыг у.

46 Псалом

¹ Зарӕггӕнджыты разамонӕгмӕ.
      Корейы фыртты псалом.

² Ӕмдзӕгъд кӕнут, ӕппӕт адӕмтӕ;
      хъӕлӕсыдзагӕй цингӕнгӕ стаут Хуыцауы.
³ Куыд тасӕфтауӕг у Бӕрзонд Хуыцау –
      ӕппӕт зӕххыл стыр Паддзах!
⁴ Уый нын басаста адӕмты,
      адӕмыхӕттыты фӕкодта нӕ къӕхты бын;
⁵ Сӕвзӕрста нын фыдӕй-фыртмӕйы бынтӕ –
      Йӕ уарзон Иаков буц кӕмӕй уыд, уыцы бынтӕ. ||

⁶ Цины уынӕримӕ Хуыцау ссыди Йӕ бадӕнмӕ,
      ссыди уадындзы зӕлтимӕ Дунедарӕг.
⁷ Зарут Хуыцауӕн, зарут;
      зарут нӕ Паддзахӕн, зарут.
⁸ Уымӕн ӕмӕ Хуыцау ӕппӕт зӕххы Паддзах у;
      зарут Ын кады зарӕг.

⁹ Хуыцау паддзахиуӕг кӕны адӕмтӕн;
      Хуыцау ӕрбадти Йӕ сыгъдӕг бадӕны.
¹⁰ Иннӕ адӕмты номдзыдтӕ
      ӕрӕмбырд сты Авраамы Хуыцауы адӕммӕ,
      уымӕн ӕмӕ зӕххы барджынтӕ[11] Хуыцауы сты.
      Бӕрзонд у Уымӕн Йӕ кад!

47 Псалом

¹ Зарӕг.
      Корейы фыртты псалом.

² Стыр у Дунедарӕг, бӕрзонд у Йӕ кад
      нӕ Хуыцауы сахары, Йӕ сыгъдӕг хохыл.
³ Сионы хох алӕмӕты уӕлвӕз у –
      ӕппӕт зӕххы цин,
      йӕ цӕгат хайы – цытджын Паддзахы сахар.
⁴ Йӕ галуанты Хуыцауы зонынц сӕрылхӕцӕгӕй:

⁵ Мӕнӕ адӕмты паддзӕхтӕ
      хӕстӕввонгӕй куы бамбырд сты
      ӕмӕ йӕм иумӕ куы бацыдысты,
⁶ Уӕд акастысты, дисы бафтыдысты,
      хорзау нал фесты ӕмӕ фӕлыгъдысты.
⁷ Уым сӕ тас бацыди,
      арӕг сылгоймагау хъизӕмары бафтыдысты.
⁸ Скӕсӕйнаг дымгӕйӕ сын
      ныссастай сӕ фарсисӕг наутӕ.
⁹ Цы фехъуыстам, уый нӕхи цӕстӕй федтам
      Уӕлахизгӕнӕг Хуыцауы сахары,
      нӕ Хуыцауы сахары.
      Дунедарӕг ӕй бахиздзӕни мыггагмӕ. ||

¹⁰ Нӕ Хуыцау, Дӕ Кувӕндоны
      нӕ хъуыдытӕ Дӕ уарзондзинадыл уыдысты.
¹¹ Дӕ номау, Хуыцау, Дӕ кад дӕр
      зӕххы иу кӕронӕй иннӕмӕ у;
      Дӕ рахиз къух рӕстдзинадӕй дзаг у.
¹² Райӕд Сионы хох,
      Иудӕйы чызджытӕ[12] цин кӕнӕнт Дӕ тӕрхонтыл.

¹³ Ацӕут Сионмӕ, ӕрзилут йӕ алыварс
      ӕмӕ йын банымайут йӕ мӕсгуытӕ.
¹⁴ Лӕмбынӕг ын акӕсут йӕ фидӕрттӕм,
      фенут ын йӕ галуантӕ, фенут,
      цӕмӕй фидӕны фӕлтӕрӕн
      уыдоны тыххӕй радзурат.
¹⁵ Уымӕн ӕмӕ Уый Хуыцау у,
      нӕ Хуыцау мыггагмӕ;
      ӕнустӕм Уый уыдзӕни нӕ фӕтӕг.

48 Псалом

¹ Зарӕггӕнджыты разамонӕгмӕ.
      Корейы фыртты псалом.

² Байхъусут, ӕппӕт адӕмтӕ,
      уӕ хъус ӕрдарут, дун-дунейы ӕппӕт цӕрджытӕ –
³ Хуымӕтӕгтӕ ӕмӕ номдзыдтӕ,
      бонджынтӕ ӕмӕ мӕгуыртӕ:
⁴ Мӕ дзыхӕй рацӕудзӕн уӕлзонд ныхӕстӕ,
      мӕ зӕрдӕйы хъуыдытӕ хӕсдзысты ӕмбарынад.
⁵ Мӕ зӕрдӕ сараздзынӕн фӕсномыг ныхасмӕ,
      хъисфӕндырыл райхалдзынӕн мӕ райхалинаг.

⁶ Цӕмӕн хъуамӕ тӕрсон
      уӕззау бон мыл куы скӕна,
      ме 'фхӕрджыты фыдӕх мыл куы ӕртыхса, уӕд?
⁷ Уыдон сты хъаруйӕ ныфсджын
      ӕмӕ бирӕ мулкӕй хъал!
⁸ Фӕлӕ адӕймаг ницы амалӕй балхӕндзӕн
      мӕлӕтӕй йӕ уды
      ӕмӕ Хуыцауӕн нӕ бафиддзӕн уый аргъ:
⁹ Стыр у уд балхӕныны аргъ –
      мыггагмӕ дӕр уый нӕ уыдзӕн,
¹⁰ Ӕмӕ исчи ӕнустӕм цӕра ӕмӕ мӕлӕт ма фена.
¹¹ Алчидӕр уыны: зондджынтӕ мӕлынц
      ӕнӕзондтимӕ иумӕ,
      амӕлынц ӕнӕфсистӕ дӕр
      ӕмӕ сӕ мулк ныууадзынц ӕндӕрӕн.
¹² Уыдон ӕнхъӕл сты,
      ӕмӕ сӕ хӕдзӕрттӕ мыггагмӕ сты,
      цӕрдзысты дзы фӕлтӕрӕй-фӕлтӕрмӕ;
      суанг сӕ зӕххытӕн дӕр радтой сӕхи нӕмттӕ.
¹³ Фӕлӕ бонджын дӕр бирӕ нӕ ахӕсдзӕн –
      фос куыд амӕлынц, уый дӕр афтӕ амӕлдзӕн.

¹⁴ Ахӕм у ӕнӕзондты хъысмӕт,
      ӕмӕ ма сӕ фӕндагыл цӕуын чи уарзы,
      уыдонӕн дӕр сӕ кӕрон. ||
¹⁵ Фыстау сӕ ныппардзысты дӕлдзӕхмӕ,
      мӕлӕт сын уыдзӕни фыййау;
      уайтагъд бамбийдзысты,
      дӕлдзӕх суыдзӕни сӕ цӕрӕн хӕдзар;
      рӕстытӕ сыл фӕуӕлахиз уыдзысты.
¹⁶ Мӕн та Хуыцау фервӕзын кӕндзӕни
      дӕлдзӕхы ӕлдарадӕй,
      куы мӕ акӕна Йӕхимӕ, уӕд. ||
¹⁷ Ма фӕдызӕрдыг у,
      исчи хъӕздыгӕй-хъӕздыгдӕр куы кӕна,
      йӕ хӕдзары кадыл куы ӕфта, уӕд;
¹⁸ Уымӕн ӕмӕ куы амӕла,
      уӕд йемӕ ницы ахӕсдзӕни,
      йӕ кад йӕ фӕдыл нӕ ныххиздзӕн,
¹⁹ Кӕд удӕгасӕй йӕ мӕт хи барӕвдауыныл уыди,
      ӕмӕ дӕуӕй дӕр ӕппӕлдзысты,
      дӕхицӕн амал кӕй зыдтай, уый тыххӕй,
²⁰ Уӕддӕр аивгъуыйдзӕни,
      рухс чи нал фендзӕн, йӕ уыцы фыдӕлтӕм.
²¹ Бонджын чи у, фӕлӕ зонынад кӕмӕ нӕй,
      уый дӕр амӕлы, фос куыд амӕлынц, афтӕ.

49 Псалом

¹ Асафы псалом.

      Хуыцӕутты Хуыцау,
      Дунедарӕг, райдыдта Йӕ ныхас
      ӕмӕ сиды зӕхмӕ – скӕсӕнӕй ныгуылӕнмӕ.
² Ӕмбисонды рӕсугъд Сионӕй
      тӕмӕнтӕ калы Хуыцау.
³ Ӕрцӕуы нӕ Хуыцау, фӕлӕ нӕ уыдзӕн ӕнӕсым:
      Йӕ разӕй – бынгӕнӕг арт,
      Йӕ алфамбылай – тыхджын уад.
⁴ Сиды уӕлейӕ арвмӕ ӕмӕ зӕхмӕ,
      цӕмӕй Йӕ адӕмӕн рахӕсса тӕрхон:
⁵ «Ӕрӕмбырд Мӕм кӕнут Мӕ сыгъдӕджыты,
      нывонд ӕрхӕсгӕйӕ Мемӕ фидыд чи сарӕзта».
⁶ Ӕмӕ уӕлӕрвтӕ расиддзысты Йӕ рӕстад;
      уымӕн ӕмӕ тӕрхонгӕнӕг Хуыцау Йӕхӕдӕг у. ||

⁷ «Байхъусут, Мӕ адӕм,
      Ӕз уын зӕгъон Мӕ ныхас;
      Израил, Ӕз ӕвдисӕн лӕудзынӕн дӕ ныхмӕ!
      Хуыцау дӕн Ӕз, дӕ Хуыцау дӕн.
⁸ Ӕз дын дӕ нывӕндты тыххӕй нӕ уайдзӕф кӕнын;
      дӕ иууылсудзинаг нывондтӕ ӕдзух Мӕ разы сты.
⁹ Нӕ бакомдзынӕн дӕ хӕдзарӕй род,
      нӕдӕр сӕгътӕ дӕ фосдарӕнтӕй.
¹⁰ Уымӕн ӕмӕ алы хъӕддаг сырд дӕр Мӕн у,
      фос мингай хӕхтыл Мӕн сты.
¹¹ Зонын алы маргъ дӕр хӕхтыл,
      цӕрӕгойтӕ быдыры – Мӕн сты.
¹² Ӕз куы сыстонг уаин, уӕд дын ӕй нӕ зӕгъин,
      уымӕн ӕмӕ ӕгас дун-дуне,
      стӕй дзы цыдӕриддӕр ис, уыдон Мӕн сты.
¹³ Ӕз, мыййаг, галы фыд хӕрын
      кӕнӕ сӕгъы туг нуазын?
¹⁴ Ӕрхӕсс Хуыцауӕн дӕ бузныджы нывонд,
      Бӕрзондбадӕгӕн цы дзырд радтай,
      уый сӕххӕст кӕн.
¹⁵ Ӕмӕ дӕ зыны бон ӕрцагур Мӕн;
      Ӕз дӕ бахиздзынӕн,
      ӕмӕ ды скадджын кӕндзынӕ Мӕн».

¹⁶ Фыдлӕгӕн та Хуыцау зӕгъы:
      «Цы амоныс Мӕ уагӕвӕрдтӕ
      ӕмӕ цы дзурыс Мӕ фӕдзӕхстытыл,
¹⁷ Дӕхӕдӕг та Мӕ ӕгъдауӕй де сӕфт куы уыныс,
      Мӕ ныхӕстӕ та иуварс куы аппарыс, уӕд?
¹⁸ Давӕджы куы феныс,
      уӕд сӕмдзӕхдон вӕййыс йемӕ,
      хӕтаг адӕмӕн хӕлар дӕ.
¹⁹ Дӕ дзыхӕй цӕуы фыдгой,
      де 'взаг уафы мӕнгдзинад.
²⁰ Иудадзыг дамтӕ мысыс де 'фсымӕрыл,
      хахуыр кӕныс дӕ мадызӕнӕгыл.
²¹ Ды кодтай уыдӕттӕ, ӕмӕ Ӕз ницы дзырдтон;
      ӕмӕ афтӕ банхъӕлдтай,
      цыма Ӕз дӕр дӕ хуызӕн дӕн.
      Базылын дӕ кӕндзынӕн,
      дӕ азымтӕ дын ӕрӕвӕрдзынӕн дӕ разы.

²² Сымах, Хуыцауы рохгӕнджытӕ, бамбарут уый,
      науӕд уӕ скуынӕг кӕндзынӕн,
      ӕмӕ уын иргъӕвӕг нӕ разындзӕн.
²³ Мӕнӕн бузныджы нывонд чи ӕрхӕссы,
      уый Мӕ нымайы,
      ӕмӕ раст фӕндагыл чи цӕуы,
      уымӕн Ӕз фенын кӕндзынӕн,
      Хуыцау ирвӕзынгӕнӕг кӕй у, уый».

50 Псалом

¹ Зарӕггӕнджыты разамонӕгмӕ.
      Давиды псалом,
² Вирсавиимӕ фӕрӕдийыны фӕстӕ
      Давидмӕ пехуымпар Нафан куы ӕрцыди,
      уый фӕдыл.

³ Батӕригъӕд мын кӕн, Хуыцау,
      Дӕ бирӕ хорзӕхмӕ гӕсгӕ;
      Де стыр уарзтмӕ гӕсгӕ
      мӕ ссыгъдӕг кӕн мӕ фыдмитӕй.
⁴ Бынтондӕр мын ӕрӕхс мӕ азым,
      ссыгъдӕг мӕ кӕн мӕ тӕригъӕдӕй.

⁵ Уымӕн ӕмӕ ӕз сӕттын мӕ фыдмитыл,
      мӕ тӕригъӕд ӕдзух мӕ разы ис.
⁶ Дӕ ныхмӕ, иунӕг Дӕ ныхмӕ ӕруагътон тӕригъӕд,
      фыдми Дӕ разы бакодтон,
      ӕмӕ Дӕ уынаффӕ раст у, Дӕ тӕрхон – ӕнӕхӕрам.
⁷ Ӕз тӕригъӕдджынӕй райгуырдтӕн,
      тӕригъӕдджынӕй сӕвзӕрдтӕн мӕ мады гуыбыны.
⁸ Бӕлвырд, Дӕуӕн ӕхцон у ӕргом зӕрдӕ;
      мӕ миддунейы мын рухс кӕныс Дӕ уӕлзондӕй.
⁹ Иссопӕй[13] мыл бапырх кӕн,
      ӕмӕ уыдзынӕн сыгъдӕг;
      цӕхс мӕ, ӕмӕ уыдзынӕн митӕй урсдӕр.
¹⁰ Ратт мын хъӕлдзӕг ӕмӕ цины зӕрдӕйыуаг,
      ӕмӕ райдзысты ме стджытӕ, Ды кӕй ныссастай.
¹¹ Аздах Дӕ цӕсгом мӕ тӕригъӕдтӕй,
      слӕгъз мын кӕн ме 'ппӕт азымтӕ.
¹² Сараз мын, Хуыцау, сыгъдӕг зӕрдӕ,
      раст уд сног кӕн мӕ мидӕг.
¹³ Ма мӕ фӕсур Дӕхицӕй,
      Дӕ Сыгъдӕг Уд ма байс мӕнӕй.
¹⁴ Раздах мын Дӕ ирвӕзты цин,
      Дӕ рӕвдауӕг Удӕй мӕ сфидар кӕн.
¹⁵ Галиу адӕмӕн бацамондзынӕн Дӕ фӕндӕгтӕ,
      тӕригъӕдджынтӕ раздӕхдзысты Дӕумӕ.
¹⁶ Туджы азымӕй мӕ суӕгъд кӕн, Хуыцау,
      мӕ ирвӕзынгӕнӕг Хуыцау,
      ӕмӕ цингӕнгӕ зардзынӕн Дӕ рӕстадыл.
¹⁷ О мӕ Хицау Хуыцау, байгом кӕн мӕ дзых,
      ӕмӕ стаудзынӕн Дӕу.
¹⁸ Уымӕн ӕмӕ нывонд бӕллиццаг нӕу Дӕуӕн,
      науӕд Дын ӕй ӕрхӕссин;
      иууылсудзинаг дӕр нӕу ӕхцон Дӕуӕн.
¹⁹ Саст зӕрдӕ – уый у аккаг нывонд Хуыцауӕн;
      саст зӕрдӕ ӕмӕ фӕсмонгӕнӕгыл
      Дӕхи нӕ атигъ кӕндзынӕ, Хуыцау.

²⁰ Дӕ хорз зӕрдӕйӕ фарн ӕруадз Сионыл;
      ногӕй самай Иерусалимы култӕ.
²¹ Уӕд Дын ӕхцон уыдзысты рӕстады нывондтӕ,
      судзинаг ӕмӕ иууылсудзинаг нывондтӕ;
      уӕд Дӕ нывондхӕссӕныл
      ӕрӕвӕрдзысты стыр кусӕрттӕ.

51 Псалом

¹ Зарӕггӕнджыты разамонӕгмӕ.
      Давиды зондамонӕн псалом,
² Идумейаг Доик Саулмӕ куы ӕрцыди
      ӕмӕ йын куы загъта,
      Давид Ахимелехы хӕдзары ис, зӕгъгӕ,
      уый фӕдыл.

³ Цы ӕппӕлыс дӕ фыдмитӕй, тыхджын?
      Хуыцауы хорзӕх иудадзыг мемӕ ис.
⁴ Иннӕйы фесафыныл архайы де 'взаг:
      цыргъ сӕрдасӕнау налат у.
⁵ Хӕрзӕбонӕй фыдбылыз фылдӕр уарзыс,
      раст дзурынӕй та – мӕнг. ||
⁶ Алы бынгӕнӕг ныхас уарзыс ды, фӕлитой ӕвзаг!
⁷ Уый тыххӕй дӕ Хуыцау
      ӕркӕндзӕн ӕнусон раууатмӕ;
      фелвасдзӕни дӕ, дӕ цатырӕй дӕ фехсдзӕни дард;
      ӕд уидӕгтӕ дӕ срӕдувдзӕн царды зӕххӕй. ||
⁸ Уый фендзысты рӕстгӕнджытӕ,
      тас сӕ бацӕудзӕн, стӕй йыл фӕхуддзысты:
⁹ «Кӕсут-ма, ацы адӕймагӕн
      йӕ ныфс Хуыцау нӕ уыди,
      фӕлӕ йӕ зӕрдӕ дардта йӕ бирӕ мулкыл,
      хъӕбатыр уыд йӕ ӕвзӕр митӕй».

¹⁰ Ӕз та Хуыцауы хӕдзары
      цъӕхдарӕг зетибӕласау дӕн
      ӕмӕ мыггагмӕ дӕр Хуыцауы хорзӕхыл
      дардзынӕн мӕ зӕрдӕ.
¹¹ Хуыцау, Ды цытӕ сарӕзтай,
      уый тыххӕй Дӕ стаудзынӕн мыггагмӕ;
      мӕ зӕрдӕ дардзынӕн Дӕ номыл,
      уымӕн ӕмӕ уый фарнӕй дзаг у.
      Стаудзынӕн Дӕу Дӕ сыгъдӕджыты раз.

52 Псалом

¹ Зарӕггӕнджыты разамонӕгмӕ;
      уадынгарзыл.
      Давиды зондамонӕн псалом.

² Ӕнӕзонд загъта хинымӕр: «Хуыцау нӕй».
      Уыдон фехӕлдысты,
      бафтыдысты ӕбуалгъ тӕригъӕдты;
      нӕй хӕрзгӕнӕг, иу дӕр нӕй.
³ Хуыцау уӕлӕрвтӕй ӕркаст адӕммӕ:
      Хуыцауы чи агуры, ахӕм ӕмбаргӕ нӕй? Иу дӕр нӕй?
⁴ Се 'ппӕт дӕр аздӕхтысты, ӕрцыдысты сӕфтмӕ;
      хӕрзгӕнӕг дзы нӕй, иу дӕр нӕй.

⁵ Мӕ адӕмы чи хӕры,
      дзулау ӕй чи хӕры ӕмӕ Хуыцауы чи нӕ агуры,
      уыцы фыдгӕнджытӕ
      сӕхи никуы ӕрӕмбардзысты?
⁶ Тӕссаг кӕм нӕу,
      уым сыл ӕртыхсдзӕн ӕвирхъау тас,
      уымӕн ӕмӕ Хуыцау ныффӕйлаудзӕн
      дӕ ныхмӕ тохгӕнджыты стджытӕ.
      Ды сӕ фегад кӕндзынӕ,
      уымӕн ӕмӕ сыл Хуыцау Йӕхи атигъ кодта.

⁷ Ӕнӕмӕнг, Израилӕн сӕрибар Сионӕй ӕрцӕудзӕн!
      Хуыцау Йӕ адӕмы уацарӕй куы ракӕна,
      уӕд райдзӕн Иаков, ӕмӕ цин кӕндзӕн Израил.

53 Псалом

¹ Зарӕггӕнджыты разамонӕгмӕ;
      хъисфӕндыртыл цӕгъдынӕн.
      Давиды зондамонӕн псалом,
² Зифӕгтӕ Саулмӕ куы ӕрцыдысты
      ӕмӕ йын куы загътой,
      Давид махмӕ ӕмбӕхсы, зӕгъгӕ,
      уый фӕдыл.

³ О Хуыцау, фервӕзын мӕ кӕн Дӕ номы руаджы,
      равзар мӕ хъаст Дӕ хъаруйы фӕрцы.
⁴ Фехъус мӕ куывд, Хуыцау,
      Дӕ хъус ӕрдар мӕ дзыхӕй рацӕугӕ ныхӕстӕм.
⁵ Уымӕн ӕмӕ ӕцӕгӕлӕттӕ сыстадысты мӕ ныхмӕ,
      ӕгъатыртӕ мӕ хъавынц амарынмӕ;
      уыдон Хуыцауы ницӕмӕ дарынц. ||

⁶ Ӕрмӕст мын Хуыцау у ахъазгӕнӕг,
      мӕ Хицау у мӕ удылхӕцӕг.
⁷ Уадз ме знӕгтӕн сӕ фыдӕх ӕрцӕуӕд сӕ сӕрыл;
      фесаф сӕ, уымӕн ӕмӕ Дӕ ныхасӕн хицау дӕ.
⁸ Ӕз Дын зӕрдиагӕй ӕрхӕсдзынӕн нывонд;
      стаудзынӕн Дӕ ном, Дунедарӕг,
      уымӕн ӕмӕ уый ӕхцон у мӕнӕн.
⁹ Ды мӕ фервӕзын кодтай ме 'ппӕт бӕллӕхтӕй,
      ӕмӕ ме знӕгтӕм кӕсдзынӕн дзагцӕстӕй.

54 Псалом

¹ Зарӕггӕнджыты разамонӕгмӕ;
      хъисфӕндыртыл цӕгъдынӕн.
      Давиды зондамонӕн псалом.

² Фехъус, Хуыцау, мӕ куывд,
      мӕ куырдиатыл ма атигъ кӕн Дӕхи.
³ Ӕркӕс ӕмӕ мын дзуапп ратт;
      ӕнцой мын нӕ дӕттынц мӕ мӕстытӕ,
      мӕ ныфс мын сӕтты
⁴ Знаджы хъӕлӕс, фыдлӕг мӕ кӕй ссӕнды, уый;
      уыдон мыл кӕнынц фыдаудӕн,
      ӕгъатырӕй лӕбурынц мӕнмӕ.
⁵ Мӕ зӕрдӕ мӕ риуы ӕнкъуысы,
      мӕлӕты азар мӕм ӕрбахӕстӕг ис.
⁶ Тас мӕ бацыди ӕмӕ ризын,
      ӕвирхъау адзал мӕ ӕрбалвӕста ӕмӕ уигъы мӕн.
⁷ Ӕмӕ загътон: «Чи мын раттид бӕлоны базыртӕ,
      ӕз атӕхин ӕмӕ ӕрӕнцаин.
⁸ Фӕцӕуин дард ӕмӕ ӕрулӕфин ӕдзӕрӕг ран. ||
⁹ Ӕвӕстиатӕй фӕлидзин тыхдымгӕ ӕмӕ уадӕй».

¹⁰ Ӕруадз сыл Дӕ фыдӕх, Дунедарӕг,
      сӕ ныхас кӕрӕдзийыл куыд нал бада;
      уымӕн ӕмӕ тыхми ӕмӕ быцӕу уынын сахары.
¹¹ Ӕхсӕвӕй-бонӕй сисы сӕртыл
      зилынц сахары алыварс;
      уым ис фыдӕх ӕмӕ удхар.
¹² Сахар цӕуы сӕфтмӕ;
      йӕ уынгты ӕрцардысты сайын ӕмӕ хин.

¹³ Знаг нӕ кӕны мӕ фыдгой –
      ӕз ын бафӕразин;
      мӕ фыдгул нӕ сыстади мӕ ныхмӕ –
      ӕз дзы бамбӕхсин,
¹⁴ Фӕлӕ уый ды дӕ, мӕ рахиз цонг чи уыди,
      мӕ уыцы ӕмбал ӕмӕ уарзон хӕлар –
¹⁵ Иумӕ-иу кодтам зӕрдӕбын ныхас,
      Хуыцауы Хӕдзармӕ цыдыстӕм дзыллӕимӕ.
¹⁶ Мӕлӕты хай фӕуӕнт,
      удӕгасӕй дӕлдзӕхмӕ ныххауӕнт;
      уымӕн ӕмӕ фыдӕх сӕ хӕдзӕртты
      ӕмӕ сӕ мидӕг ис.

¹⁷ Ӕз та кувын Хуыцаумӕ,
      ӕмӕ Дунедарӕг бахиздзӕни мӕн.
¹⁸ Изӕрӕй, сӕумӕйӕ, ӕмбисбон
      мӕ хъаст хӕссын Хуыцаумӕ,
      дзыназын ӕмӕ мын Уый фехъусдзӕн мӕ хъӕлӕс.
¹⁹ Мӕ уд мын дардзӕн ӕнӕзианӕй
      мӕ ныхмӕ тохгӕнджытӕй,
      кӕд мын бирӕ сты, уӕддӕр.
²⁰ Фехъусдзӕн ӕмӕ сӕ басӕтдзӕн,
      райдайӕн кӕмӕн нӕй, уыцы Хуыцау; ||
      уымӕн ӕмӕ цы сты, уымӕй баззадысты,
      Хуыцауӕй нӕ тӕрсынц.
²¹ Семӕ фидыдӕй чи цӕры,
      уыдонмӕ систой сӕ къухтӕ,
      фехӕлдтой сӕ цӕдис.
²² Сӕ ныхас – сойӕ лӕгъздӕр,
      сӕ зӕрдӕйы та – хӕст;
      сӕ дзырдтӕ зетийӕ фӕлмӕндӕр,
      фӕлӕ сын ӕлвӕст цирхъӕй уӕлдай не сты.

²³ Хуыцауы 'вджид бакӕн дӕ сагъӕстӕ,
      ӕмӕ дӕ Уый бахъахъхъӕндзӕн –
      никуы бауадздзӕн рӕстгӕнӕджы фӕцудын.
²⁴ Ды, Хуыцау, уыдон ныппардзынӕ ӕнӕбын уӕрмы;
      тугцъиртӕ ӕмӕ мӕнгӕрдтӕ
      ӕмбис дӕр нӕ фӕцӕрдзысты.
      Ӕз та Дӕуыл дарын мӕ зӕрдӕ.

55 Псалом

¹ Зарӕггӕнджыты разамонӕгмӕ;
      «Дард тулдзыл бадӕг бӕлон»-ы зӕлтӕм гӕсгӕ.
      Давиды кадӕг,
      Филистимӕгтӕ йӕ Гефы куы ӕрцахстой,
      уый фӕдыл.

² Батӕригъӕд мын кӕн, Хуыцау –
      адӕймаг зилы мӕ фӕдыл;
      лӕбуры мӕм ӕрвылбон, сулӕфын мӕ нӕ уадзы.
³ Мӕ фӕдылзилджытӕ мӕ ӕнӕхъӕн бон
      уӕгъд нӕ уадзынц;
      схъӕлӕй мӕ ныхмӕ чи цӕуы, уыдон бирӕ сты.
⁴ Тасы куы бацӕуын,
      уӕд мӕ зӕрдӕ Дӕуыл фӕдарын.
⁵ Ӕз Хуыцауимӕ дӕн ӕмӕ ӕппӕлын Йӕ ныхасӕй;
      мӕ ныфс Хуыцау у, нӕ тӕрсын.
      Цы мын ракӕндзӕн зӕххон адӕймаг?

⁶ Ӕрвылбон зыгъуыммӕ кӕнынц мӕ ныхӕстӕ;
      сӕ хъуыдытӕ иууылдӕр – мӕ фыдбылызӕн.
⁷ Ӕмбырдтӕ кӕнынц, зилынц мӕ къахвӕдтыл,
      ӕрӕмбӕхсынц, цӕмӕй мӕ уд сӕ ахӕсты бахауа.
⁸ Уымӕ гӕсгӕ сын фервӕзӕн нӕй
      сӕ фыдӕхы тыххӕй;
      смӕсты у адӕмтӕм, Хуыцау ӕмӕ сӕ бабын кӕн.

⁹ Дӕумӕ нымад сты ме 'ппӕт тухӕнтӕ,
      ӕмӕ мӕ цӕссыгтӕ нывӕр Дӕхимӕ мигӕнӕны –
      Дӕ чиныджы не сты уыдон?
¹⁰ Дӕуӕй ӕххуыс куы ракурын,
      уӕд ме знӕгтӕ лидзынмӕ фӕвӕййынц –
      уымӕй базонын, Хуыцау ме 'вварс кӕй у.
¹¹ Ӕз Хуыцауимӕ дӕн
      ӕмӕ ӕппӕлын Йӕ ныхасӕй,
      Ӕз Дунедарӕгимӕ дӕн
      ӕмӕ ӕппӕлын Йӕ дзырдӕй –
¹² Мӕ ныфс Хуыцау у, нӕ тӕрсын.
      Цы мын ракӕндзӕн адӕймаг?

¹³ Ӕз дзырд радтон Дӕуӕн, Хуыцау;
      ӕрхӕсдзынӕн Дын бузныджы нывондтӕ.
¹⁴ Уымӕн ӕмӕ мӕлӕтӕй Ды бахызтай мӕ уды,
      мӕ къӕхтӕ – фӕкӕлынӕй,
      цӕмӕй царды рухсы цӕуон Хуыцауы раз.

56 Псалом

¹ Зарӕггӕнджыты разамонӕгмӕ;
      «Ма мӕ фесаф»-ы зӕлтӕм гӕсгӕ.
      Давиды кадӕг,
      Саулӕй лӕгӕтмӕ куы алыгъди,
      уый фӕдыл.

² Батӕригъӕд мын кӕн, Хуыцау,
      батӕригъӕд мын кӕн,
      уымӕн ӕмӕ мӕ удӕн йӕ ныфс Ды дӕ;
      бамбӕхсдзынӕн Дӕ дӕлбазыр,
      цалынмӕ бӕллӕхтӕ аивгъуыйой, уӕдмӕ.

³ Ӕз ӕххуыс курын Бӕрзонд Хуыцауӕй,
      мӕныл аудӕг Хуыцауӕй.
⁴ Уый уӕлӕрвтӕй рарвитдзӕн ӕххуыс
      ӕмӕ бахиздзӕни мӕн,
      худинагмӕ ӕртӕрдзӕни,
      мӕ фӕдыл чи зилы, уыдоны; ||
      Хуыцау рарвитдзӕн Йӕ хорзӕх ӕмӕ Йӕ ӕцӕгад.
⁵ Ӕз тугдзых домбӕйтты ӕхсӕн цӕрын;
      арт кӕй комӕй цӕуы, уыцы адӕмы ӕхсӕн;
      сӕ дӕндӕгтӕ – ӕрцытӕ ӕмӕ фаттӕ,
      се 'взаг – цыргъ кард.
⁶ Арвӕй бӕрзонддӕр уӕд Дӕ ном, Хуыцау,
      ӕппӕт зӕххыл – Дӕ кад!

⁷ Мӕ къӕхтӕн ӕрцӕттӕ кодтой къӕппӕг –
      мӕ зӕрдӕ фӕтасыди.
      Мӕ фӕндагыл скъахтой уӕрм,
      ӕмӕ дзы сӕхӕдӕг ныххаудтой. ||
⁸ Мӕ зӕрдӕ цӕттӕ у, Хуыцау,
      мӕ зӕрдӕ цӕттӕ у:
      зардзынӕн ӕмӕ Дӕ стаудзынӕн зарджыты зӕлтӕй.
⁹ Райхъал у, мӕ уд, райхъал ут,
      дала-фӕндыр ӕмӕ дыууадӕстӕнон!
      Райхъал кӕндзынӕн сӕуӕхсид!
¹⁰ Адӕмты ӕхсӕн Дӕ стаудзынӕн, О Дунедарӕг;
      стаудзынӕн Дӕ мӕ зарджыты зӕлтӕй
      знӕгты ӕхсӕн.
¹¹ Уымӕн ӕмӕ стыр у Дӕ хорзӕх, арвы онг,
      Дӕ рӕстад – ӕврӕгъты онг.
¹² Арвӕй бӕрзонддӕр уӕд дӕ ном, Хуыцау,
      ӕппӕт зӕххыл – Дӕ кад!

57 Псалом

¹ Зарӕггӕнджыты разамонӕгмӕ;
      «Ма мӕ фесаф»-ы зӕлтӕм гӕсгӕ.
      Давиды кадӕг.

² Куы фӕдзурут, уӕд рӕстдзинадӕн
      йӕ дзых не 'хгӕнут?
      Уӕ тӕрхон, мыййаг, ӕнӕхӕрам у,
      адӕймаджы фырттӕ?
³ Хӕрам уӕ зӕрдӕтӕй рацӕуы;
      зӕххыл уӕ къухтӕ барыныл барынц тыхми.
⁴ Фыдлӕгтӕн суанг сӕ мады гуыбынӕй
      сӕ фӕндаг зылын у,
      ныдздзӕгъӕл вӕййынц,
      сӕ райгуырынӕй дзурынц мӕнг.
⁵ Сӕ марг у калмы маргау;
      сты ахӕм къуырма калмы хуызӕн,
      йӕ хъустӕ чи сӕхгӕны
⁶ Ӕмӕ кӕлӕнгӕнджыты хъӕлӕсмӕ чи нӕ хъусы,
      кӕд тӕккӕ дӕсныдӕр кӕлӕнгӕнӕг у, уӕддӕр.

⁷ О Хуыцау, сӕ дӕндӕгтӕ сын сӕ комы ныссӕтт;
      уыцы домбӕйтты ыссыртӕ
      ныппырх кӕн, Дунедарӕг!
⁸ Фесӕфӕнт зӕххы ахъарӕг донау;
      се 'рдынбостӕ куы айвазой,
      уӕд сӕ фаттӕ асӕттӕнт.
⁹ Фесӕфӕнт йӕ хъузгӕй ралӕсӕг сӕтӕлӕгау;
      фыдӕнхъӕл сылгоймаджы сывӕллонау
      хуры рухс ма фенӕнт.
¹⁰ Цалынмӕ уӕ цуайнӕгтӕ
      какон сындзыты артмӕ не схъарм сты –
      ӕнӕсыгъд ӕмӕ ӕрдӕгсыгъд –
      уӕдмӕ уӕ мӕлӕт фӕхӕссӕд.
¹¹ Рӕстгӕнӕг бацин кӕндзӕни,
      мастисыны бон куы фена, уӕд;
      ӕмӕ йӕ къӕхтӕ ӕрӕхсдзӕни фыдлӕджы туджы.
¹² Ӕмӕ адӕм зӕгъдзысты:
      «Рӕстгӕнӕг ӕцӕгӕй райсдзӕн йӕ хӕрзиуӕг!
      Уӕдӕ зӕххыл ӕцӕгӕйдӕр ис
      тӕрхонгӕнӕг Хуыцау!»

58 Псалом

¹ Зарӕггӕнджыты разамонӕгмӕ;
      «Ма мӕ фесаф»-ы зӕлтӕм гӕсгӕ.
      Давиды кадӕг,
      Йӕ амарыны тыххӕй йын Саул
      йӕ хӕдзармӕ хъусдарӕг куы арвыста,
      уый фӕдыл.

² Мӕ Хуыцау, бахиз мӕ ме знӕгтӕй;
      мӕ ныхмӕ чи сыстад, уыдонӕй мӕ бахъахъхъӕн.
³ Бахиз мӕ фыдгӕнджытӕй;
      фервӕзын мӕ кӕн тугцъиртӕй.
⁴ Кӕс, куыд къӕппӕввонгӕй лӕууынц мӕ удмӕ;
      тыхджынтӕ мӕ ныхмӕ мӕ фыдмийы
      ӕмӕ фыдракӕнды тыххӕй
      не 'рӕмбырд сты, Дунедарӕг.
⁵ Ӕз аххосджын нӕ дӕн,
      афтӕмӕй ӕмбырдтӕ кӕнынц гӕрзифтонгӕй;
      фӕзын, ӕркӕс мӕ дзыназынмӕ.
⁶ Ды, Дунедарӕг, Уӕлахизгӕнӕг Хуыцау,
      Израилы Хуыцау, рацу ӕппӕт адӕмы бафхӕрынмӕ,
      Дӕуыл гадзрахатӕй чи рацыди,
      уыдонӕй иуыл дӕр ма бацауӕрд. ||
⁷ Уыдон ӕрбаздӕхынц изӕрӕй,
      ниуынц куыйтау ӕмӕ зилынц сахары алыварс.
⁸ Кӕс-ма, сӕ дзыхӕй цы ныхӕстӕ рацӕуы,
      цыма се 'взӕгтӕ цирхъытӕ сты
      ӕмӕ фӕзӕгъынц: «Чи нӕ хъусы?»
⁹ Фӕлӕ сыл Ды фӕхуддзынӕ, Дунедарӕг;
      Ды фегад кӕндзынӕ ӕппӕт адӕмты.
¹⁰ Мӕ тых Ды дӕ, ме скаст Дӕумӕ у,
      уымӕн ӕмӕ Ды, Хуыцау, мӕ мӕсыг дӕ.

¹¹ Мӕ аудӕг Хуыцау мӕ разӕй цӕудзӕн;
      Хуыцау мын ратдзӕни ме знӕгтӕм
      райгӕйӕ кӕсыны фадат.
¹² Ма сӕ фӕцӕгъд ӕвиппайды,
      цӕмӕй мӕ адӕмӕй ма ферох уа;
      ныффӕйлау сӕ Дӕ хъаруйӕ,
      ӕрхауын сӕ кӕн, Дунедарӕг – нӕ уарт.
¹³ Сӕ тӕригъӕд – сӕ дзыхӕй рацӕугӕ ныхӕстӕ;
      уадз, куыд схъал сты, афтӕ сӕхи хызы бахауӕнт,
      уымӕн ӕмӕ ӕлгъыст ӕмӕ мӕнг – сӕ былалгъыл.
¹⁴ Кӕрон сын скӕн карзӕй, кӕрон, ӕмӕ мауал уой.
      Уӕд базондзысты зӕххы кӕронмӕ,
      Иаковӕн Хуыцау йӕ Паддзах кӕй у. ||

¹⁵ Уыдон ӕрбаздӕхынц изӕрӕй,
      ниуынц куыйтау ӕмӕ зилынц сахары алыварс.
¹⁶ Уыдон зилынц хойраг агурӕг
      ӕмӕ йӕ куы нӕ ссарынц, уӕд фӕниуынц.
¹⁷ Ӕз та зардзынӕн Дӕ тыхыл,
      сӕумӕйӕ расиддзынӕн Дӕ хорзӕх;
      уымӕн ӕмӕ мын фыдӕхы заман
      мӕсыг ӕмӕ хъахъхъӕнӕг Ды уыдтӕ.
¹⁸ Ды мӕ тых дӕ! Ӕз Дӕуыл зардзынӕн,
      уымӕн ӕмӕ Ды, Хуыцау, мӕнӕн мӕсыг дӕ,
      мӕ уарзӕгой Хуыцау.

59 Псалом

¹ Зарӕггӕнджыты разамонӕгмӕ;
      «Фарны кӕркусӕг дидинӕг»-ы зӕлтӕм гӕсгӕ.
      Давиды кадӕг.
      Ныффыста йӕ ахуыр кӕнынӕн,
² Месопотамаг Сириимӕ
      ӕмӕ Цованаг Сириимӕ куы хӕцыди,
      Иоав фӕстӕмӕ здӕхгӕйӕ Цӕхджын дӕлвӕзы
      дыууадӕс мин идумейагыл куы фӕуӕлахиз,
      уый фӕдыл.

³ О Хуыцау, Ды ныл атигъ кодтай Дӕхи;
      Ды нӕ ныссастай, смӕсты нӕм дӕ,
      фӕлӕ нӕм ныр Де 'ргом раздах.
⁴ Ды банкъуыстай зӕхх ӕмӕ аскъуыдтӕ;
      сдзӕбӕх ын кӕн йӕ цӕфтӕ,
      уымӕн ӕмӕ уый йӕ ризынӕй не 'нцайы.
⁵ Дӕ адӕмӕн бавзарын кодтай стыр зынтӕ,
      бадардтай нын Дӕ азары сӕн.
⁶ Сис тырыса, Дӕуӕй чи тӕрсы, уыдон сӕрмӕ,
      цӕмӕй йӕ иумӕ айтындзой фатты ныхмӕ, ||
⁷ Ӕмӕ фервӕзой Дӕ уарзон адӕм;
      ссӕрибар нӕ кӕн Дӕ рахиз цонгӕй,
      дзуапп ратт нӕ куывдӕн.

⁸ Хуыцау Йӕ рухс Кувӕндоны загъта:
      «Ӕз фӕуӕлахиз уыдзынӕн,
      Сихем байуардзынӕн,
      Сокхофы дӕлвӕз дӕр ныддихтӕ кӕндзынӕн.
⁹ Мӕн у Галаад, Мӕн у Манасси,
      Ефрем – мӕ сӕрӕн згъӕрхуд,
      Иуда – Мӕ паддзахы лӕдзӕг,
¹⁰ Моав Мӕ хихсӕн кӕхц у;
      Едомыл ӕрӕвӕрдзынӕн Мӕ къах.
      Мӕ размӕ рацу цины хъӕримӕ, филистимаг зӕхх!»
¹¹ Чи мӕ бакӕндзӕн фидар сахармӕ?
      Чи мӕ бахӕццӕ кӕндзӕн Едоммӕ?
¹² Уый Ды нӕ уыдзынӕ, мыййаг, Хуыцау,
      Йӕхи ныл чи атигъ кодта
      ӕмӕ не 'фсадимӕ чи нал рацӕуы, уыцы Хуыцау?
¹³ Баххуыс нын кӕн тыхӕвзарӕны,
      уымӕн ӕмӕ адӕймаджы ӕххуыс ницы у.
¹⁴ Хуыцауимӕ фӕуӕлахиз уыдзыстӕм;
      Уый ныссӕнддзӕн не знӕгты Йӕ къӕхты бын.

60 Псалом

¹ Зарӕггӕнджыты разамонӕгмӕ;
      хъисфӕндыртыл цӕгъдынӕн.
      Давиды псалом.

² О Хуыцау, фехъус мӕ дзыназын,
      байхъус мӕ куывдмӕ.
³ Зӕххы кӕронӕй Дӕм дзурын уынгӕг зӕрдӕйӕ;
      схон мӕ, мӕ бон кӕдӕм нӕу схизын,
      уыцы къӕдзӕхмӕ.
⁴ Ды дӕ ме 'мбӕхсӕн,
      Ды мӕ фидар мӕсыг дӕ ме знӕгты ныхмӕ.

⁵ Фӕнды мӕ Дӕ Кувӕндоны мыггагмӕ цӕрын,
      Дӕ дӕлбазыр ӕдас куыд уон, афтӕ. ||
⁶ Уымӕн ӕмӕ фехъуыстай мӕ зӕрдӕвӕрд, Хуыцау,
      ӕмӕ мын бынтӕ радтай,
      Дӕуӕй чи тӕрсы, уыдонимӕ.

⁷ Паддзахы цӕрӕнбонтыл бафтау,
      бирӕ фӕлтӕртимӕ куыд фӕцӕра, афтӕ.
⁸ Ӕмӕ мыггагмӕ дӕр Хуыцауы раз
      баддзӕни паддзахы бадӕны.
      Хъахъхъӕнӕд ӕй Дӕ уарзондзинад ӕмӕ рӕстад!

⁹ Ӕз та мыггагмӕ дӕр зардзынӕн
      Дӕ номы кадӕн,
      дзырд Дын цӕй тыххӕй радтон,
      уыдон ӕххӕст кӕндзынӕн ӕрвылбон.

61 Псалом

¹ Зарӕггӕнджыты разамонӕгмӕ;
      Едифумӕн.
      Давиды псалом.

² Ӕрмӕст Хуыцаумӕ ссары мӕ уд ӕнцой;
      Уымӕй у мӕ ирвӕзындзинад.
³ Ӕрмӕст Хуыцау у мӕ къӕдзӕх,
      мӕ ирвӕзынгӕнӕг, мӕ мӕсыг;
      нал фӕгуырысхо уыдзынӕн.

⁴ Сымах та кӕдмӕ знаггад кӕндзыстут
      адӕймагӕн уе 'ппӕт дӕр, куыд фӕцуда, афтӕ?
      Ӕнӕуый дӕр кӕлӕддзаг къулӕй
      ӕмӕ саст быруйӕ уӕлдай нӕу.
⁵ Уыдон хъавынц бӕрзондӕй йӕ раппарынмӕ;
      сайын сын у ӕхцон, ӕвзагӕй арфӕ кӕнынц,
      хинымӕр та – ӕлгъитгӕ. ||
⁶ Ӕрмӕст Хуыцаумӕ ссар, мӕ уд, ӕнцой;
      уымӕн ӕмӕ Уымӕй у мӕ ныфс.
⁷ Иунӕг Хуыцау у мӕ къӕдзӕх,
      мӕ ирвӕзынгӕнӕг, мӕ мӕсыг;
      нӕ фӕгуырысхо уыдзынӕн.
⁸ Хуыцауӕй аразгӕ сты мӕ ирвӕзт ӕмӕ кад;
      Уый мӕ фидар къӕдзӕх у, ме 'мбӕхсӕн.
⁹ О адӕм, уӕ зӕрдӕ Йыл дарут кӕддӕриддӕр;
      уӕ зӕрдӕты цы ис, уый Йын раргом кӕнут:
      Хуыцау нӕ сӕрылхӕцӕг у. ||

¹⁰ Мӕнг сты адӕймӕгтӕ,
      фӕлывд сты лӕджы фырттӕ.
      Барӕнтыл сӕ куы ӕрӕвӕрай,
      уӕд иууылдӕр иумӕ уӕлдӕфӕй рогдӕр сты.
¹¹ Ныфс уӕ ма уӕд стигъынӕй,
      давынӕй схъӕл ма ут;
      уӕ мулк куы сбирӕ вӕййы,
      уӕд ын уӕ зӕрдӕ ма раттут.

¹² Хуыцау загъта иу хатт,
      ӕмӕ йӕ ӕз дыууӕ хатты фехъуыстон,
      тых Хуыцаумӕ кӕй ис,
¹³ Ӕмӕ дӕумӕ кӕй ис, Дунедарӕг, хорзӕх.
      Бӕлвырд, Ды алкӕмӕн дӕр
      йӕ хъуыддӕгтӕм гӕсгӕ дӕттыс.

62 Псалом

¹ Давиды псалом.
      Иудейаг ӕдзӕрӕг быдыры куы уыди,
      уый фӕдыл.

² О Хуыцау, Ды мӕ Хуыцау дӕ!
      Сӕуӕхсидӕй агурын Дӕу.
      Слӕмӕги мӕ уд ӕнӕдон, хус
      ӕмӕ сыгъд быдыры Дӕумӕ бӕлгӕйӕ,
³ Цӕмӕй фенон Дӕ тых ӕмӕ Дӕ кад,
      Кувӕндоны Дӕ куыд уыдтон, афтӕ.
⁴ Уымӕн ӕмӕ Дӕ хорзӕх хуыздӕр у цардӕй,
      ӕмӕ Дӕуӕй ӕппӕлӕн ныхас
      уыдзӕни мӕ былалгъыл.

⁵ Цалынмӕ цӕрон, уӕдмӕ Дӕ стаудзынӕн;
      Дӕ номыл мӕ къухтӕ сдардзынӕн уӕлӕрвтӕм.
⁶ Сойӕ ӕмӕ фиуӕй бафсӕдӕгау
      бафсӕды мӕ уд,
      ӕмӕ райгӕ ӕппӕлын Дӕуӕй,
⁷ Мӕ хуыссӕны Дӕ куы ӕрымысын,
      ӕнӕхъӕн ӕхсӕв мӕ хъуыдытӕ
      Дӕуыл куы вӕййынц, уӕд.
⁸ Уымӕн ӕмӕ Ды ме 'ххуысгӕнӕг дӕ,
      ӕмӕ Дӕ дӕлбазыр цинӕй зардзынӕн.
⁹ Мӕ уд нӕ комы Дӕуӕй фӕхицӕн;
      Дӕ рахиз цонгӕй хӕцыс мӕныл.

¹⁰ Мӕ уд фесафынмӕ чи бӕллы,
      уыдон ингӕны хай бауыдзысты.
¹¹ Фӕцӕгъддзысты сӕ цирхъы комӕй
      ӕмӕ рувӕстӕн уыдзысты амӕддаг.

¹² Паддзахӕн та йӕ цин Хуыцау уыдзӕни;
      Хуыцауы номӕй алы сомыгӕнӕг дӕр
      Йӕ кадӕй хай райсдзӕни,
      мӕнгдзурджытӕ та багомыг уыдзысты.

63 Псалом

¹ Зарӕггӕнджыты разамонӕгмӕ.
      Давиды псалом.

² О Хуыцау, фехъус мӕ хъӕлӕс, мӕ лӕгъстӕ;
      мӕ цард мын бахиз ӕвирхъау знагӕй.
³ Фыдлӕгты сусӕгвӕндтӕй,
      змӕнтӕг фыдгӕнджытӕй бамбӕхс мӕн.

⁴ Уыдон сцыргъ кодтой се 'взӕгтӕ цирхъау,
      айвӕзтой се 'рдынбос – сӕ рӕхойӕн ныхас,
⁵ Рӕстаг адӕймаджы сусӕг ранӕй бахсынӕввонг;
      ӕнӕнхъӕлӕджы йӕ фехсынц
      ӕмӕ тӕрсгӕ дӕр нӕ кӕнынц.
⁶ Сӕ фыдвӕндтыл фидарӕй хӕцынц;
      сӕ уынаффӕ у сусӕгӕй къӕппӕг сӕвӕрыныл,
      ӕмӕ дзурынц: «Чи йӕ фендзӕн?»
⁷ Уыдон нывӕндынц сӕ хинтӕ ӕмӕ дзурынц:
      «Хорз фӕнд ӕрымысыдыстӕм».
      Ӕцӕгӕй дӕр, адӕймаджы хъуыдытӕм
      ӕмӕ зӕрдӕйы фӕндтӕм ныккӕсӕн нӕй.

⁸ Фӕлӕ сӕ Хуыцау бахсдзӕн фатӕй;
      ӕнӕнхъӕлӕджы бабын уыдзысты.
⁹ Хуыцау сын се 'взаг сӕхи ныхмӕ сараздзӕни
      ӕмӕ сӕ ӕркӕндзӕни сӕфтмӕ;
      чи сӕ уына, уыдон сыл сӕ сӕртӕ ӕнкъусдзысты.
¹⁰ Ӕмӕ ӕппӕт адӕмы бацӕудзӕн тас,
      дзурдзысты Хуыцауы хъуыддӕгтыл
      ӕмӕ уӕд базондзысты – уый Хуыцау сарӕзта.
¹¹ Рӕстгӕнӕг та сцин кӕнӕд Дунедарӕгыл,
      Уый йын уыдзӕн сӕрылхӕцӕг;
      ӕмӕ 'ппӕт рӕстытӕ зӕрдиагӕй стауӕнт Хуыцауы.

64 Псалом

¹ Зарӕггӕнджыты разамонӕгмӕ.
      Давиды псалом.
      Зарӕг.

² Сионыл ис Дӕуӕн Дӕ кад ӕмӕ Де 'нцой, Хуыцау;
      ӕмӕ сӕххӕст уыдзысты,
      Дӕуӕн дзырд лӕвӕрд цӕй тыххӕй уыд, уыдон.
³ Ды хъусыс адӕймаджы кувынмӕ;
      Дӕумӕ цӕуы алчидӕр ӕххуысагур.
⁴ Тӕригъӕды дӕлбар куы уыдыстӕм,
      уӕд нын ныббарстай нӕ фыдракӕндтӕ.
⁵ Тӕхудиаг сты, Дӕ кӕртмӕ
      цӕрынмӕ кӕй сӕвзӕрстай
      ӕмӕ Дӕхимӕ кӕй ӕрбахӕстӕг кодтай, уыдон.
      Мах уыдзыстӕм ӕфсӕст Дӕ Хӕдзары,
      Дӕ сыгъдӕг Кувӕндоны цы хорзӕхтӕ ис, уыдонӕй.
⁶ Ды хъусыс мӕнмӕ, О нӕ Хуыцау,
      Йӕ раст тӕрхон тас кӕмӕн ӕфтауы,
      ӕппӕт зӕххӕн ӕмӕ дард денджызтӕн ныфс Чи у,
⁷ Йӕ тыхӕй хӕхтӕ ӕрӕвӕрӕг,
      стыр хъомысӕй ифтонг,
⁸ Денджызты ӕмбухын, йӕ уылӕнты хъӕр
      ӕмӕ знӕт адӕмты сабыргӕнӕг!
⁹ Дард зӕххыл цӕрджыты
      тас бауадзынц Дӕ диссӕгтӕ;
      сӕуӕхсид ӕмӕ зӕрӕхсиды
      райхъал кӕнынц цинӕй зарынмӕ.

¹⁰ Барӕвдауыс зӕхх, бафсадыс ӕй донӕй,
      бафтауыс ын йӕ бӕркадыл;
      Хуыцауы донвӕдтӕ кӕддӕриддӕр дзаг сты донӕй,
      цӕмӕй зӕххыл зайа хор,
      уымӕн ӕмӕ йын ахӕм фӕтк сӕвӕрдтай.
¹¹ Йӕ ауӕдзтӕ йын бафсадыс донӕй,
      адӕг ауадзыс йӕ къуыбӕрттыл,
      сфӕлмӕн ӕй кӕныс къӕвдайы 'ртӕхтӕй,
      арфӕ бафтауыс хорыл.
¹² Бӕркадджын у Дӕ арфӕйы аз,
      Дӕ къахвӕдтӕй кӕлы сой.
¹³ Уыдон ӕдзӕрӕг хизӕнтыл пырх кӕнынц дон,
      обӕуттӕ дзаг кӕнынц цинӕй.
¹⁴ Уыгӕрдӕнтӕ сӕхи сфӕлыстой фосы дзугтӕй,
      дӕлвӕзты зӕу-зӕу кӕны хор –
      хъуысы сӕ цин ӕмӕ зарын.

65 Псалом

¹ Зарӕггӕнджыты разамонӕгмӕ.
      Зарӕг.
      Псалом.

      Стау Хуыцауы хъӕлӕсыдзагӕй, ӕппӕт дуне!
² Зарут Йӕ номы кадыл;
      скӕнут Ын Йӕ кад бӕрзонд,
³ Зӕгъут Хуыцауӕн:
      «Куыд тасӕфтауӕг сты Дӕ хъуыддӕгтӕ!
      Хъомысджын дӕ Ды,
      Де знӕгтӕ лӕгъстӕйаг уыдзысты Дӕуӕн.
⁴ Ӕппӕт зӕхх ӕрзоныг уыдзӕни Дӕ разы
      ӕмӕ Дыл зардзысты, зардзысты Дӕ номыл».

⁵ Рацӕут ӕмӕ фенут Хуыцауы ӕрмдзӕф,
      адӕмӕн куыд диссагӕн баззадысты Йӕ хъуыддӕгтӕ.
⁶ Денджыз фестын кодта сурзӕхх,
      цӕугӕдоныл ахызтысты фистӕгӕй –
      уӕдӕ цин кӕнӕм, Уый цы сарӕзта, ууыл.
⁷ Йӕ хъомысы руаджы
      Уый паддзахиуӕг кӕны мыггагмӕ;
      иудадзыг Йӕ цӕст дары адӕмтӕм –
      змӕнтджытӕ ма сыстӕнт Йӕ ныхмӕ.
⁸ Стаут, адӕмтӕ, нӕ Хуыцауы;
      айзӕлӕд Ыл кады зарджытӕ.
⁹ Уый нын нӕ удтӕ бахызта ацы царды,
      нӕ къах нын нӕ бауагъта фӕцудын.
¹⁰ Уымӕн ӕмӕ Ды, Хуыцау, бафӕлвӕрдтай мах;
      ссыгъдӕг нӕ кодтай, ӕвзист куыд батайын
      ӕмӕ ссыгъдӕг кӕнынц, афтӕ.
¹¹ Ды къӕппӕгмӕ бакодтай мах,
      нӕ бӕрзӕйтыл нын сӕвӕрдтай ӕфсондз.
¹² Бауагътай адӕймаджы нӕ сӕрыл сбадын;
      ахызтыстӕм арт ӕмӕ доныл,
      фӕлӕ нӕ ракодтай сӕрибармӕ.

¹³ Иууылсудзинаг нывондтимӕ
      бацӕудзынӕн Дӕ Кувӕндонмӕ
      ӕмӕ сӕххӕст кӕндзынӕн мӕ дзырд –
¹⁴ Уый мӕ уӕззау дуджы уыди ме 'взагыл
      ӕмӕ рацыд мӕ дзыхӕй.
¹⁵ Иууылсудзинаг нард нывондтӕ Дын ӕрхӕсдзынӕн,
      фысы фиуы хӕрздӕфимӕ;
      нывондӕн Дын ӕрхӕсдзынӕн галтӕ ӕмӕ сӕгътӕ. ||

¹⁶ Рацӕут ӕмӕ байхъусут,
      Хуыцауӕй чи тӕрсы, ӕппӕт уыдон,
      ӕмӕ уын радзурон, мӕ удӕн цы сарӕзта, уый.
¹⁷ Ӕз Ӕм куывтон хъӕрӕй,
      скад Ын кодтон ме 'взагӕй.
¹⁸ Ӕз мӕ зӕрдӕйы куы бамбӕхстаин фыдӕх,
      уӕд мӕ Хуыцау нӕ фехъуыстаид.
¹⁹ Фӕлӕ мӕ Хуыцау ӕцӕг фехъуыста,
      Йе 'ргом раздӕхта мӕ зӕрдӕбын куывдмӕ.

²⁰ Арфӕгонд у Хуыцау –
      мӕ куывдыл мын Йӕхи нӕ атигъ кодта,
      Йӕ хорзӕхӕй мӕ ӕнӕхайӕ нӕ ныууагъта.

66 Псалом

¹ Зарӕггӕнджыты разамонӕгмӕ;
      хъисфӕндыртыл.
      Псалом.
      Зарӕг.

² Хуыцауы хорзӕх ӕмӕ арфӕ нӕ уӕд,
      срухс нӕ кӕнӕд Йӕ цӕсгомы рухсӕй! ||
³ Цӕмӕй зоной зӕххыл Дӕ фӕндаг,
      ӕппӕт адӕмты ӕхсӕн – Дӕ ирвӕзындзинад.

⁴ О Хуыцау, стауӕнт Дӕу адӕмтӕ,
      стауӕнт Дӕ ӕппӕт адӕмтӕ!
⁵ Цин кӕнӕнт ӕмӕ зарӕнт адӕмтӕ!
      Уымӕн ӕмӕ Ды рахӕссыс дунейӕн
      ӕнӕхӕрам тӕрхон,
      адӕмтӕн Ды Дӕ раздзӕуӕг зӕххыл. ||
⁶ О Хуыцау, стауӕнт Дӕу адӕмтӕ,
      стауӕнт Дӕ ӕппӕт адӕмтӕ!

⁷ Зӕхх радта тыллӕг;
      арфӕ нын кӕны Хуыцау, нӕ Хуыцау.
⁸ Арфӕ нын кӕны Хуыцау,
      ӕмӕ Дзы тӕрсӕнт ӕппӕт зӕххы кӕрӕттӕм.

67 Псалом

¹ Зарӕггӕнджыты разамонӕгмӕ.
      Давиды псалом.
      Зарӕг.

² Рацӕуӕд Хуыцау ӕмӕ ныффӕйлауӕд Йе знӕгты;
      Йӕ фыдгултӕ лидзинаг фӕуӕнт Йӕ разӕй!
³ Фӕздӕг куыд апырх вӕййы,
      афтӕ сӕ Ды апырх кӕн;
      мыдадз артмӕ куыд атайы,
      афтӕ фӕтары уӕнт фыдлӕгтӕ
      ӕмӕ Хуыцауы цӕсгомы раз мауал уӕнт.
⁴ Рӕстгӕнджытӕ та цин кӕндзысты,
      хъӕлдзӕг уыдзысты Хуыцауы раз
      ӕмӕ фырцинӕй райдзысты.

⁵ Зарут Хуыцауӕн, ӕппӕлут Йӕ номӕй.
      Скадджын кӕнут ӕврӕгътыл Цӕуӕджы,
      Йӕ ном – Дунедарӕг; сцин кӕнут Йӕ цӕстыты раз.
⁶ Хуыцау – сидзӕрты фыд
      ӕмӕ идӕдзты сӕрылхӕцӕг –
      Йӕ сыгъдӕг цӕрӕнбынаты ис.
⁷ Хуыцау иунӕджыты бахоны хӕдзармӕ,
      ахстытӕн суадзы сӕ рӕхыстӕ;
      змӕнтджытӕ та баззайынц хурсыгъд зӕххыл.
⁸ О Хуыцау, Дӕ адӕмы разӕй-иу куы рахызтӕ,
      ӕдзӕрӕг быдыры-иу разӕй куы цыдтӕ, ||
⁹ Уӕд зӕхх ӕнкъуысыди,
      суанг арв дӕр лӕдӕрсӕнтӕ кодта Хуыцауы раз,
      Синайыл[14] Чи уыди, уыцы Хуыцауы,
      Израилы Хуыцауы раз.
¹⁰ Ды ӕруагътай бӕркады уарын, Хуыцау;
      Дӕ хуыскъ бындуртӕн уыдтӕ ӕгасгӕнӕг,
¹¹ Дӕ дзуг уым ӕрцарди;
      Дӕ хорзӕхмӕ гӕсгӕ, Хуыцау,
      мӕгуыртӕм уыдтӕ рӕдау.

¹² Хуыцау радта Йӕ ныхас,
      ӕмӕ уый хъусын кодтой стыр дзыллӕтӕ:
¹³ «Паддзахтӕ ӕмӕ се 'фсӕдтӕ
      лидзынц ӕмӕ лидзынц,
      хӕдзаргӕс сылгоймӕгтӕ та
      ныридӕгӕн амӕддаг уарынц.
¹⁴ Кӕд кӕртытӕй ӕддӕмӕ нӕ рахызтыстут,
      уӕддӕр, бӕлонӕн йӕ базыртӕ ӕвзист бамбӕрзта,
      йӕ систӕ та – сызгъӕрин.
¹⁵ Уӕд Ӕппӕтхъомыс[15] ныппырх кодта паддзӕхты,
      ӕмӕ уый уыди митуарынау Селмоны хохыл».
¹⁶ Басаны хох – бӕрзонд хох,
      Басаны хох – бирӕфцӕгджын хох!
¹⁷ Хӕлӕгӕй цӕмӕн кӕсут, цыргъсӕр хӕхтӕ,
      Хуыцауы цӕрын кӕуыл бафӕндыди
      ӕмӕ Дунедарӕг мыггагмӕ
      кӕуыл цӕрдзӕн, уыцы хохмӕ?
¹⁸ Хуыцауы хӕстон уӕрдӕттӕ –
      ӕнӕнымӕц, мингай-минтӕ;
      Дунедарӕг ӕрцыд Синайӕ
      Йӕ Сыгъдӕг Кувӕндонмӕ.
¹⁹ Ды схызтӕ бӕрзӕндмӕ, ракодтай уацайрӕгты;
      адӕмӕй райстай лӕвӕрттӕ,
      суанг ныхмӕцӕуджытӕй дӕр –
      Дунедарӕг Хуыцау уым куыд цӕра.

²⁰ Арфӕгонд у Хуыцау,
      нӕ Ирвӕзынгӕнӕг Хуыцау,
      Уый ӕрвылбон дӕр хӕссы нӕ зынтӕ. ||
²¹ Нӕ Хуыцау ирвӕзынгӕнӕг Хуыцау у;
      Хицау Хуыцау ракӕны мах мӕлӕтӕй.
²² Бӕлвырд, Хуыцау ныссӕтдзӕн Йе знӕгты сӕртӕ,
      йӕ азымыл чи нӕ сӕтты,
      уыдоны ӕнӕлвыд тенкатӕ.
²³ Дунедарӕг загъта: «Раздахдзынӕн сӕ Басанӕй,
      сласдзынӕн сӕ денджызы арфӕй,
²⁴ Де знӕгты туджы дӕ къах куыд аныгъуыла,
      дӕ куыйты ӕвзӕгтӕ дзы куыд фӕуой, афтӕ».
²⁵ Разӕй кӕй цӕуыс, Хуыцау, уый бӕлвырд у,
      разӕй цӕуыс, мӕ Хуыцау ӕмӕ мӕ Паддзах,
      рухс Кувӕндонмӕ.
²⁶ Разӕй – зарӕггӕнджытӕ,
      сӕ фӕстӕ – цӕгъдджытӕ,
      астӕуӕй – далатыл цӕгъдӕг ӕрыгон чызджытӕ.
²⁷ Стаут уе 'мбырдты Хуыцауы,
      стаут Дунедарӕджы сымах, Израилы байзӕддаг!
²⁸ Уым ис кӕстӕр Вениамин – сӕ разӕй,
      Иудӕйы хистӕрты стыр къорд,
      Завулоны хистӕртӕ ӕмӕ Неффалимы хистӕртӕ.

²⁹ О Хуыцау, равдис нын Дӕ тых,
      сфидар нӕ кӕн раздӕрау.
³⁰ Иерусалимы Кувӕндоны сӕраппонд
      паддзӕхтӕ Дӕуӕн ӕрхӕсдзысты лӕвӕрттӕ.
³¹ Хъамылы бадом сырдты,
      галты рӕгъау – адӕмы богъты ӕхсӕн;
      уыдон басӕттӕнт ӕмӕ Дын ӕвзисты къӕрттытӕ
      ӕрхӕссӕнт нывондӕн.
      Хӕстмондаг адӕмты ныффӕйлау.
³² Ӕрцӕудзысты ӕрвыст лӕгтӕ Мысырӕй;
      Ефиопи йӕ къухтӕ сдардзӕни Хуыцаумӕ.

³³ Зӕххон паддзахӕдтӕ, зарут Хуыцауӕн,
      уӕ зарджытӕй стаут Дунедарӕджы. ||
³⁴ Уый у уӕлӕрвтыл, ӕнусон уӕлӕрвтыл цӕуӕг;
      мӕнӕ ныртӕккӕ райхъуысдзӕн
      Йӕ тыхджын хъӕлӕс.
³⁵ Скад кӕнут Хуыцауӕн!
      Йӕ хъомысӕй ауды Израилыл,
      Йӕ тых зыны ӕврӕгътыл.

³⁶ Тӕссаг дӕ, Хуыцау, Дӕ Сыгъдӕг бынӕтты;
      Израилы Хуыцау дӕтты Йӕ адӕмӕн тых ӕмӕ хъару.

      Арфӕгонд у Хуыцау!

68 Псалом

¹ Зарӕггӕнджыты разамонӕгмӕ;
      «кӕркусӕг дидинӕг»-ы зӕлтӕм гӕсгӕ.
      Давиды псалом.

² О Хуыцау, фервӕзын мӕ кӕн,
      уымӕн ӕмӕ дон схӕццӕ мӕ хъуырмӕ.
³ Ӕз аныгъуылдтӕн лӕсӕны,
      ӕмӕ дзы ӕрлӕууӕн дӕр нӕй;
      бахызтӕн доны арфмӕ,
      ӕмӕ йӕ гуылфӕн скъӕфы мӕн.
⁴ Ӕз бафӕлладтӕн фӕдисы хъӕрӕй,
      мӕ хъуыр ныххус и, мӕ цӕстыты суадон басур и
      Хуыцаумӕ ӕнхъӕлмӕ кӕсынӕй.

⁵ Ницыгӕнӕгӕй мӕ йе сӕфт чи уыны,
      уыдон мӕ сӕры ӕрдутӕй фылдӕр сты;
      ӕнӕфсонӕй мын бирӕ знӕгтӕ ис,
      тыхджынты фӕнды мӕ фесӕфын.
      Цы сӕ нӕ байстон, уый раттын мӕ домынц.
⁶ Ды зоныс, Хуыцау, ме 'нӕзонд митӕ,
      мӕ тӕригъӕдтӕ не 'мбӕхсын Дӕуӕй.
⁷ Дунедарӕг, Уӕлахизгӕнӕг Хуыцау,
      Дӕуыл йӕ зӕрдӕ чи дары,
      уыдон мӕн аххосӕй ма фӕхудинаг уӕнт;
      Дӕу агурджытӕ мӕн тыххӕй ма фегад уӕнт,
      Израилы Хуыцау.
⁸ Уымӕн ӕмӕ Дӕ номы сӕраппонд дӕн ӕгад
      ӕмӕ мӕ цӕсгомыл ӕвӕрынц худинаджы гакк.
⁹ Ме 'фсымӕртӕн сдӕн искӕйон,
      мӕ мадызӕнӕгӕн – ӕцӕгӕлон.

¹⁰ Дӕ Хӕдзарыл мӕт мӕ ӕвдӕрзы,
      Дӕ фыдгойгӕнджыты фыдныхӕстӕ
      ӕмбӕлынц мӕныл.
¹¹ Фӕкӕуын ӕмӕ ком фӕдарын,
      ӕмӕ мын уый тыххӕй фидис кӕнынц.
¹² Дарӕсы бӕсты мӕ уӕлӕ скӕнын хъисын –
      ӕмбисондӕн мӕ хӕссынц.
¹³ Мӕ койыл сты кулдуары раз[16] бадӕг адӕм;
      карз нозт чи баназы,
      уыдон мыл кӕнынц сӕ зарджытӕ.

¹⁴ Мӕнӕн та мӕ куывд фӕхӕццӕ уӕд Дӕумӕ
      ӕхцон рӕстӕджы, Дунедарӕг;
      Де стыр хорзӕхмӕ гӕсгӕ мын, Хуыцау,
      Дӕ дзуапп уӕд Дӕ ӕцӕг ирвӕзындзинад.
¹⁵ Слас мӕ цъымарайӕ, ӕмӕ дзы ма аныгъуылон;
      уӕд ӕз фервӕздзынӕн,
      йе сӕфт мӕ чи уыны, уыдонӕй
      ӕмӕ дӕтты ӕрфытӕй.
¹⁶ Ма мӕ аскъӕфӕд гуылфӕн,
      ма мӕ аныхъуырӕд хуыдым,
      ӕнӕбын уӕрм мӕ сӕрмӕ ма сӕхгӕнӕд йӕ ком.
¹⁷ Фехъус мӕ, Хуыцау,
      уымӕн ӕмӕ Дӕ хорзӕх фӕрнджын у;
      Де стыр хорзӕхмӕ гӕсгӕ мӕм Де 'ргом раздах.
¹⁸ Дӕ цӕсгом ма аздах Дӕ цагъарӕй;
      батагъд кӕн – дзуапп мын ратт,
      уымӕн ӕмӕ тыхст дӕн.
¹⁹ Ӕрбаввахс у мӕ удмӕ, фервӕзын ӕй кӕн;
      ме знӕгтӕй мӕ баиргъӕв.
²⁰ Ды зоныс: нымайынц мӕ фидиссагыл,
      худинаггаг ӕмӕ ӕгадыл;
      мӕ фыдгултӕ ӕгасӕй дӕр Дӕ разы сты.
²¹ Фидис мӕ зӕрдӕсаст фӕкодта,
      ӕмӕ ӕз слӕмӕгъ дӕн;
      ӕнхъӕлмӕ кастӕн – чи мын батӕригъӕд кӕна,
      ӕмӕ ахӕм ничи разынди,
      ӕнхъӕлмӕ кастӕн ныфсӕвӕрӕгмӕ,
      фӕлӕ не ссардтон.
²² Хойрагӕн мын радтой марг,
      дойны мын уыди, ӕмӕ мын бадардтой дзмари.

²³ Сӕ фынг сын фестӕд къӕппӕг,
      сӕ бӕрӕгбоны минас – сахсӕн.
²⁴ Сӕ цӕстытӕ батар уӕнт, куыд нал уыной,
      се стджытӕ ризӕнт мыггагмӕ.
²⁵ Дӕ маст сыл ныккал;
      Дӕ судзгӕ азары цӕхӕры ныххауӕнт.
²⁶ Сӕ зӕхх сӕдзӕрӕг уӕд,
      сӕ цатырты цӕрӕг мауал уӕд.
²⁷ Дӕуӕй ӕфхӕрд чи баййӕфта,
      уыдоны фӕдыл нырма дӕр зилынц;
      Ды кӕй ӕрцавтай, уыдоны рыстыл ӕфтауынц.
²⁸ Бафтау сын се 'фхӕрдыл ӕфхӕрд,
      ӕмӕ ма ссарӕнт Дӕ хорзӕх.
²⁹ Сӕ нӕмттӕ ист ӕрцӕуӕнт царды Чиныгӕй
      ӕмӕ сӕ рӕстгӕнджытимӕ ма ныффыстӕуӕд.

³⁰ Ӕз та ӕфхӕрд дӕн ӕмӕ риссын;
      О Хуыцау, Дӕ ирвӕзындзинад мӕ бахъахъхъӕнӕд.
³¹ Зарӕджы стаудзынӕн Хуыцауы ном;
      Дӕуӕй ӕппӕлдзынӕн райгондӕй –
³² Уый Дунедарӕгӕн уӕныг ӕмӕ галӕй,
      сыкъа ӕмӕ сӕфтӕгджынӕй ӕхцондӕр уыдзӕн.
³³ Ай фендзысты ӕфхӕрдтытӕ
      ӕмӕ бацин кӕндзысты.
      Уӕ зӕрдӕ барухс уыдзӕни, Хуыцауы агурджытӕ!
³⁴ Уымӕн ӕмӕ Дунедарӕг хъусы хъуаг ӕййафджыты;
      уацары чи ис, уыдоныл ӕнӕрвӕссон нӕу.

³⁵ Ӕппӕлӕд Хуыцауӕй уӕлӕрвтӕ ӕмӕ зӕхх,
      денджызтӕ ӕмӕ се 'ппӕт змӕлджытӕ.
³⁶ Уымӕн ӕмӕ Хуыцау фервӕзын кӕндзӕни Сионы,
      самайдзӕн Иудӕйы сахартӕ.
      Уӕд дзы ӕрцӕрдзысты адӕм ӕмӕ уыдзысты сӕ бар,
³⁷ Ӕмӕ Йӕ цагъарты байзӕддӕгтӕн
      баззайдзысты бынтӕн,
      ӕмӕ, Йӕ ном чи уарзы,
      уыдон дзы ӕрбынат кӕндзысты.

69 Псалом

¹ Зарӕггӕнджыты разамонӕгмӕ.
      Давиды псалом.
      Ӕрымысынӕн.

² О Хуыцау, фервӕзын мӕ кӕн;
      О Дунедарӕг, рӕвдздӕр мӕм ӕрцу ӕххуысмӕ.
³ Мӕ удмӕ мын чи хъавы,
      уыдон фӕхудинаг ӕмӕ фегад уӕнт!
      Ме сӕфтмӕ чи бӕллы,
      уыдон ӕгадӕй аздӕхӕнт фӕстӕмӕ.
⁴ «Афтӕ, афтӕ» чи дзуры,
      уыдон фидиссаг фӕуӕнт ӕмӕ ныхъхъус уӕнт.
⁵ Дӕу чи агуры, уыдон райӕнт
      ӕмӕ цин кӕнӕнт Дӕуыл;
      Ды ирвӕзынгӕнӕг кӕмӕн дӕ,
      уыдон иудадзыг дзурӕнт:
      «Хъомысджын у Хуыцау!»

⁶ Ӕз та мӕгуыр ӕмӕ гӕвзыкк дӕн;
      рӕвдздӕр мӕм фӕзын, Хуыцау!
      Ды ме 'ххуысгӕнӕг
      ӕмӕ мӕ сӕрибаргӕнӕг дӕ;
      О Дунедарӕг, ма фӕстиат кӕн.

70 Псалом

¹ Дӕуыл дарын, О Хуыцау, мӕ зӕрдӕ;
      никуы фегад уыдзынӕн!
² Дӕ рӕстадмӕ гӕсгӕ бахиз
      ӕмӕ ссӕрибар кӕн мӕн;
      фехъус мӕ кувын, фервӕзын мӕ кӕн.
³ Ды мын у, кӕддӕриддӕр мӕ бон
      бамбӕхсын кӕм уа, уыцы къӕдзӕх;
      ратт фӕдзӕхст мӕн фервӕзыны тыххӕй,
      уымӕн ӕмӕ Ды къӕдзӕх ӕмӕ гӕнах дӕ мӕнӕн.
⁴ Мӕ Хуыцау, суӕгъд мӕ кӕн фыдлӕджы къухӕй,
      ӕнаккаг ӕмӕ ӕгъатыр адӕймаджы армӕй.
⁵ Уымӕн ӕмӕ, О Хицау Хуыцау,
      ме 'взонджы бонтӕй Дӕуыл дарын мӕ зӕрдӕ.
⁶ Мӕ райгуырынӕй фӕстӕмӕ
      Ды уыдтӕ мӕ иунӕг ныфс,
      Ды мӕ райстай мӕ мады гуыбынӕй;
      Дӕу стаудзынӕн иудадзыг.

⁷ Ӕз бирӕтӕн ӕнахуыр диссагау уыдтӕн,
      фӕлӕ Ды мӕ сӕрылхӕцӕг дӕ.
⁸ Мӕ дзыхӕй хъуысынц Дӕуӕй ӕппӕлыны дзырдтӕ;
      ӕрвылбон Дӕу кадджын кӕнын.
⁹ Мӕ зӕронды бонты мыл Дӕхи ма атигъ кӕн;
      мӕ хъару куы тайа, уӕд мӕ ма ныууадз.
¹⁰ Ногӕй та мӕ ныхмӕ дзурынц ме знӕгтӕ;
      мӕ удмӕ хъавджытӕ аразынц сусӕгвӕнд.
¹¹ Уыдон афтӕ дзурынц: «Хуыцау ӕй ныууагъта;
      зилут йӕ фӕдыл ӕмӕ йӕ ӕрцахсут,
      уымӕн ӕмӕ йын ирвӕзынгӕнӕг нӕй».
¹² О Хуыцау, ма адард у мӕнӕй;
      О мӕ Хуыцау, рӕвдздӕр мӕм фӕзын ӕххуысмӕ.

¹³ Фегад уӕнт ӕмӕ фесӕфӕнт,
      мӕ уды фӕдыл чи зилы, уыдон;
      мӕнӕн фыдбылыз саразынмӕ чи тырны,
      уыдон фӕхудинаг, фегад
      ӕмӕ ныффидиссаг уӕнт.

¹⁴ Ӕз та иудадзыг Дӕуыл дардзынӕн мӕ зӕрдӕ
      ӕмӕ Дӕ стаудзынӕн ноджы зӕрдиагдӕрӕй.
¹⁵ Ӕз ӕрвылбон дзурдзынӕн Дӕ рӕстдзинадыл
      ӕмӕ Дӕ хӕрзтыл – бирӕ сты, ӕз сын
      сӕ нымӕц нӕ зонын.
¹⁶ Расиддзынӕн
      Дунедарӕджы хъомысджын хъуыддӕгтӕ;
      фехъусын кӕндзынӕн Дӕ рӕстдзинад –
      ӕрмӕстдӕр Дӕ рӕстдзинад.
¹⁷ Ме 'взонджы бонтӕй мын
      Ды уыдтӕ зондамонӕг, Хуыцау,
      ӕмӕ ныронг дзурын Дӕ диссӕгты тыххӕй.
¹⁸ Куы базӕронд уон ӕмӕ мӕ сӕр урс куы адара,
      уӕд дӕр мӕ ма ныууадз, Хуыцау,
      цалынмӕ ног фӕлтӕртӕн
      нӕ радзурон Дӕ хъаруйы тыххӕй,
      нӕ фӕстагӕттӕн – Дӕ хъомысы тыххӕй.
¹⁹ Дӕ рӕстад, О Хуыцау, арвӕй уӕлдӕр у,
      стыр хъуыддӕгтӕ сарӕзтай Ды.
      Чи у Дӕ хуызӕн?
²⁰ Ды мын бавзарын кодтай
      судзгӕ хъизӕмӕрттӕ дзӕвгар,
      фӕлӕ мӕ ногӕй цардмӕ раздахдзынӕ,
      арф дӕлдзӕхӕй мӕ ракӕндзынӕ.
²¹ Ды схӕцыдтӕ мӕ кадыл,
      Дӕ рӕвдыдӕй мӕ цух нӕ ныууадздзынӕ.
²² Ӕз та Дӕ скадджын кӕндзынӕн хъисфӕндырыл,
      мӕ Хуыцау,
      Ды иузӕрдион кӕй Дӕ, уый тыххӕй;
      дала-фӕндырыл зардзынӕн Дӕуыл,
      Израилы Сыгъдӕг!
²³ Дӕ кады зарӕг ме 'взагӕй куы рацӕуы,
      уӕд фырцинӕй райын, райы мӕ уд дӕр,
      уымӕн ӕмӕ йӕ Ды фервӕзын кодтай.
²⁴ Ме 'взаг ӕрвылбон дзурдзӕн Дӕ рӕстадыл;
      уымӕн ӕмӕ мӕнӕн фыд ракӕнынмӕ чи хъавыд,
      уыдон фӕхудинаг ӕмӕ фегад сты.

71 Псалом

¹ Соломоны псалом.

      О Хуыцау, балӕвар кӕн паддзахӕн тӕрхоны
      Дӕ рӕстдзинад,
      паддзахы фыртӕн – Дӕ сыгъдӕгдзинад,
² Рӕстӕй куыд тӕрхон кӕна Дӕ адӕмӕн
      ӕмӕ ӕнӕхӕрамӕй – ӕфхӕрдтытӕн.
³ Хӕхтӕ адӕмӕн ӕрхӕсдзысты фарн,
      обӕуттӕ – рӕстад.
⁴ Ӕфхӕрд адӕмӕн уыдзӕни сӕрылхӕцӕг,
      фервӕзын кӕндзӕн мӕгуртӕн сӕ цоты
      ӕмӕ ныссӕнддзӕн ӕфхӕрджыты.
⁵ Ӕмӕ Дын кад кӕндзысты, Хуыцау,
      фӕлтӕрӕй-фӕлтӕрмӕ, цалынмӕ хур
      ӕмӕ мӕй сӕ бынӕтты сты, уӕдмӕ.
⁶ Паддзах адӕмӕн фӕуӕд,
      къӕвда карст уыгӕрдӕнтӕн куыд у,
      доны 'ртӕхтӕ зӕхх куыд ӕфсадынц, афтӕ.
⁷ Йӕ заманы дидинӕг рафтауӕд рӕстгӕнӕг,
      зӕххыл ӕнхъӕвзӕд фарн,
      цалынмӕ мӕй йӕ рухс дӕтта, уӕдмӕ.

⁸ Уый паддзахиуӕг кӕнӕд денджызӕй денджызмӕ,
      цӕугӕдонӕй[17] зӕххы кӕронмӕ.
⁹ Йӕ разы ӕрзоныг уӕнт ӕдзӕрӕг рӕтты цӕрджытӕ,
      йе къӕхты бынмӕ ӕрхауӕнт Йе знӕгтӕ.
¹⁰ Фарсисы ӕмӕ йын сакъадӕхты паддзӕхтӕ
      раттӕнт хъалон;
      Шевайы ӕмӕ Севӕйы паддзӕхтӕ йын
      ӕрхӕссӕнт лӕвӕрттӕ.
¹¹ Ӕппӕт паддзӕхтӕ йӕ разы ӕрзоныг уыдзысты;
      лӕггад ын кӕндзысты ӕппӕт адӕмтӕ.

¹² Уымӕн ӕмӕ уый бахиздзӕни дзыназӕг мӕгуыры
      ӕмӕ ӕххуысгӕнӕг кӕмӕн нӕй, уыцы ӕфхӕрды.
¹³ Ӕдыхтӕн ӕмӕ хъуаг ӕййафджытӕн
      батӕригъӕд кӕндзӕн,
      мӕгуырты удтӕ мӕлӕтӕй бахиздзӕн.
¹⁴ Ирвӕзын сӕ кӕндзӕн тыхми ӕмӕ 'фхӕрдӕй,
      уымӕн ӕмӕ йӕ зӕрдӕйӕн сӕ цард зынаргъ у.

¹⁵ Цӕрӕд бирӕ,
      Шевайы сызгъӕринӕй йын уӕд хай!
      Иудадзыг ын кувӕнт,
      арфӕ йын кӕнӕнт ӕрвылбон.
¹⁶ Хор тугыл аскъуыйӕд зӕххыл,
      ӕфсир ӕфтауӕнт хӕхты сӕртыл.
      Ливайнаг хуымтау уӕнт бӕркадджын;
      сахарты сбирӕ уӕнт адӕм зӕххы кӕрдӕгау.
¹⁷ Йӕ ном цӕрӕд мыггагмӕ;
      цалынмӕ хур йӕ бынаты ис,
      уӕдмӕ кадджын кӕнӕд йӕ ном.
      Адӕмтӕ иууылдӕр йӕ фӕрцы уӕнт арфӕгонд,
      ӕмӕ йӕ уыдон хондзысты тӕхудиаг.

¹⁸ Арфӕгонд у Дунедарӕг Хуыцау,
      Израилы Хуыцау;
      иунӕг Уый равдыста диссаджы хъуыддӕгтӕ.
¹⁹ Мыггагмӕ арфӕгонд уӕд Йӕ цытджын ном,
      ӕппӕт зӕхх байдзаг уӕд Йӕ кадӕй.
      Амен! Амен!

²⁰ Уыйадыл фесты Иессейы фырт
      Давиды куывдтытӕ.

72 Псалом

¹ Асафы псалом.

      Куыд ауды Хуыцау Израилыл,
      сыгъдӕгзӕрдӕ чи у, уыдоныл!
² Мӕнӕн та цыма мӕ къах фӕцудыдта,
      фӕкӕлынмӕ мӕ бирӕ нал хъуыди,
³ Уымӕн ӕмӕ бахӕлӕг кодтон хъалтӕм,
      фыдлӕгты фӕрныг цард куы федтон, уӕд.

⁴ Уыдон сӕ мӕлӕты онг фыдӕбон нӕ зонынц,
      сты ӕнӕниз ӕмӕ хӕрзхаст.
⁵ Куыстӕй сӕхи нӕ фӕлмӕцын кӕнынц,
      иннӕтау царды уӕз нӕ бавзарынц.
⁶ Уымӕ гӕсгӕ сӕрыстырад, фӕрдгуыты халау,
      ӕртыхсти сӕ хъуырыл;
      ӕгъатырдзинад сын дарӕсау у.
⁷ Фырнардӕй сӕ цӕстытӕ алӕбырдысты;
      сӕ зӕрдӕтӕ ӕнӕфсӕрм хъуыдытӕй – дзаг.
⁸ Алкӕмӕй хынджылӕг кӕнынц,
      сӕ фыдзӕрдӕйӕ хахуыртӕ дзурынц,
      сты схъӕлдзырд.
⁹ Сӕ дзыхтӕ ныххӕлиу кодтой арвмӕ,
      се 'взӕгтӕй схицӕуттӕ сты зӕххыл.
¹⁰ Уымӕ гӕсгӕ Йӕ адӕм дӕр сӕ фӕдыл аздӕхтысты;
      сӕ дон сын нуазынц кӕхцы дзагӕй,
¹¹ Ӕмӕ фӕзӕгъынц:
      «Куыд ӕй базондзӕн Хуыцау?
      Бӕрзондбадӕг ӕппӕт зонӕг у?»
¹² Ӕмӕ мӕнӕ ацы фыдлӕгтӕ – ницӕй мӕт сӕ ис,
      ӕфтауынц сӕ мулкыл.

¹³ Уӕдӕ ӕз цымӕ мӕ зӕрдӕ
      ӕнӕхъуаджы дардтон сыгъдӕгӕй,
      мӕ къухтӕ – ӕназымӕй?
¹⁴ Ӕмӕ ӕрвылбон дзӕгъӕлы истон ӕфхӕрд,
      алы райсом мӕхи уайдзӕфы хай кодтон?

¹⁵ Фӕлӕ куы загътаин: ай уыдзӕн мӕ ныхас,
      уӕд азымджын уаин Дӕ адӕмы фӕлтӕры раз.
¹⁶ Ӕмӕ архайдтон уый бамбарыныл,
      фӕлӕ зын бамбарӕн уыд уый,
¹⁷ Цалынмӕ Хуыцауы Кувӕндонмӕ бацыдтӕн
      ӕмӕ сӕ адзал базыдтон, уӕдмӕ.

¹⁸ Бӕлвырд сӕ бырынцъаг фӕндӕгтыл сӕвӕрдтай
      ӕмӕ сӕ сӕрсӕфӕны ныппардзынӕ.
¹⁹ Куыд ӕвиппайды сфӕлахс сты,
      ӕгасӕй дӕр сын ӕрцыди кӕрон –
      бӕллӕхты бын фесты!
²⁰ Райхъал уӕвгӕйӕ фын куыд айсӕфы,
      афтӕ сын Ды, Дунедарӕг, ӕрцӕугӕйӕ
      фесафдзынӕ сӕ бӕллицтӕ.

²¹ Мӕ зӕрдӕ куы хъынцъым кодта,
      ӕмӕ куы тыхсти мӕ уд,
²² Уӕд ӕз уыдтӕн ӕнӕзонд ӕмӕ ӕнӕмбарӕг,
      Дӕ разы фосӕй уӕлдай нӕ уыдтӕн.

²³ Фӕлӕ ӕз ӕдзух Демӕ дӕн;
      Ды хӕцыс мӕ рахиз къухыл.
²⁴ Дӕ уынаффӕйӕ мын амоныс фӕндаг,
      уый фӕстӕ та мӕ бакӕндзынӕ Дӕ кадмӕ.
²⁵ Чи мын ис уӕлӕрвты? Ды мемӕ куы уай,
      уӕд ницӕмӕ бабӕлдзынӕн зӕххыл.
²⁶ Мӕ буар ӕмӕ зӕрдӕ куы слӕмӕгъ уой,
      уӕддӕр Хуыцау мӕ зӕрдӕйӕн фидар ныфс у,
      мӕ амонды хай мыггагмӕ.

²⁷ Уымӕн ӕмӕ мӕнӕ, Дӕуӕй чи адард ис,
      уыдон сӕфынц;
      Дӕуӕй чидӕриддӕр аздӕхы, уыдон бабын кӕныс.
²⁸ Мӕнӕн та у ӕрмӕст ӕхцон –
      Дӕумӕ хӕстӕг куыд уон.
      Мӕ зӕрдӕ Хицау Хуыцауыл дарын
      ӕмӕ дзурдзынӕн Йе 'ппӕт хъуыддӕгтыл.

73 Псалом

¹ Асафы зондамонӕн псалом.

      Цӕмӕн ныл атигъ кодтай Дӕхи, Хуыцау?
      Цӕмӕн рафыхт Дӕ маст Дӕ сӕрвӕтты фыстӕм?
² Ӕрымыс Дӕ адӕмы ӕмбырдтӕ,
      рагӕй кӕй сӕвзӕрстай –
      Дӕхицӕн бындартӕн цы мыггаг балхӕдтай
      ӕмӕ Сионы хох, Дӕ цӕрӕн бынат.
³ Дӕ фӕндаг сараз ӕнусон халӕнтӕм:
      знаг Кувӕндоны ӕппӕтдӕр ныппырх кодта.

⁴ Де знӕгты богъ хъуысы Де 'мбырды рӕбын;
      се 'гъдӕуттӕ дзы ӕрӕвӕрдтой
      уӕлахизы нысанӕн.
⁵ Уыдон уыдысты, хъӕды къутӕртыл
      фӕрӕт ӕнауӕрдонӕй чи ауадзы, уый хуызӕн.
⁶ Ӕппӕт нывӕфтыдтӕ дзы фехӕлдтой
      фӕрӕттӕй ӕмӕ дзӕккортӕй.
⁷ Арты хай бакодтой Дӕ Кувӕндон;
      зӕххыл Дӕ номыл цы сыгъдӕг бынат уыди,
      уымӕй фӕхынджылӕг кодтой.
⁸ Хинымӕр загътой: «Цӕй-ма, иу февнӕлдӕй
      ныссӕндӕм се 'ппӕты дӕр».
      Ӕмӕ басыгътой, зӕххыл Хуыцаумӕ кӕм куывтам,
      ӕппӕт уыцы бынӕттӕ.
⁹ Дӕ нысӕнттӕ нал уынӕм, нал нӕм ис пехуымпар;
      кӕдмӕ афтӕ уыдзыстӕм,
      уый зонӕг дӕр нӕм ничи ис.
¹⁰ О Хуыцау, кӕдмӕ хынджылӕг кӕндзӕни знаг?
      Фыдгул кӕдмӕ цъыф калдзӕни Дӕ номыл?
      Дӕ ном мыггагмӕ?
¹¹ Цӕмӕн ныл систай Дӕ къух, Дӕ рахиз къух?
      Райс Дӕ къух Де тарӕй ӕмӕ сӕ бабын кӕн!

¹² Мӕ Хуыцау – рагзаманӕй мӕ Паддзах,
      зӕххыл Уый дӕтты уӕлахиз.
¹³ Ды Дӕ хъаруйӕ адих кодтай денджыз,
      дӕтты ныссастай егъау цӕрӕгойты сӕртӕ.
¹⁴ Кӕфхъуындартӕн ныссастай сӕ сӕртӕ
      ӕмӕ сӕ ӕдзӕрӕг быдыры
      цӕрӕгойтӕн радтай хӕрынӕн.
¹⁵ Ды гом кӕныс доны гуырӕнтӕ ӕмӕ цӕугӕдӕттӕ,
      басур кӕныс ӕнусон стыр дӕттӕ.
¹⁶ Дӕу у бон ӕмӕ ӕхсӕв дӕр Дӕу у;
      Ды сфӕлдыстай мӕй ӕмӕ хур.
¹⁷ Зӕххӕн ӕппӕт арӕнтӕ Ды ӕрӕвӕрдтай,
      Ды скодтай сӕрд ӕмӕ зымӕг.

¹⁸ Ӕрымыс-ма: знаг фауы Дунедарӕджы,
      ӕнӕзонд адӕм ӕлгъитынц Дӕ ном.
¹⁹ Сырдты ӕвджид ма бакӕ бӕлойнаг уды цард,
      ма ныууадз Дӕ зӕрдӕсаст адӕмы бынтон рохуаты.
²⁰ Ӕрымыс Дӕ фидыд!
      Науӕд зӕххы талынг бынӕттӕ
      байдзаг сты тыхгӕнджыты лӕгӕттӕй.
²¹ Ӕфхӕрд адӕймаджы ӕгадӕй ма раздах;
      мӕгуыр ӕмӕ гӕвзыкк стауӕнт Дӕ ном.

²² Рацу, Хуыцау, Дӕ хъуыддагыл тохмӕ;
      ӕрымыс, ӕнӕзӕндтӕ Дӕ ӕрвылбон куыд
      ӕгад кодтой, уый.
²³ Ма ферох кӕн Де знӕгты ӕнауӕрдон хъӕр
      ӕмӕ Дӕ ныхмӕлӕуджыты ӕнӕнцайгӕ цъӕххаст.

74 Псалом

¹ Зарӕггӕнджыты разамонӕгмӕ;
      «Ма мӕ фесаф»-ы зӕлтӕм гӕсгӕ.
      Асафы псалом.
      Зарӕг.
² Бузныг Дӕ стӕм, Хуыцау, бузныг –
      хӕстӕг у Дӕ ном Дӕ диссаджы хъуыддӕгтыл
      чи дзуры, уыдонмӕ.

³ Ды зӕгъыс:
      «Мӕ нысангонд рӕстӕг куы ралӕууа,
      уӕд рахӕсдзынӕн ӕнӕхӕрам тӕрхон.
⁴ Зӕхх ӕмӕ зӕххыл цӕрджытӕ
      ӕмризӕджы куы ризой,
      уӕд ын Ӕз сфидар кӕндзынӕн йӕ цӕджындзтӕ». ||
⁵ Хиппӕлойтӕн зӕгъын:
      «Уӕ сӕр бӕрзӕндты ма хӕссут»,
      фыдлӕгтӕн та зӕгъын: «Уӕ тыхӕй хъал ма ут,
⁶ Уӕ тыхыл уӕ зӕрдӕ ӕгӕр ма дарут,
      схъӕлбӕрзӕйӕ ма дзурут».

⁷ Уымӕн ӕмӕ бӕрзонддзинад не 'рцӕудзӕн
      нӕдӕр скӕсӕнӕй, нӕдӕр ныгуылӕнӕй,
      нӕдӕр ӕдзӕрӕг ранӕй.
⁸ Фӕлӕ Хуыцау у тӕрхонгӕнӕг:
      иуы ӕрныллӕг кӕндзӕн,
      иннӕйы та бӕрзонд сисдзӕн.
⁹ Хуыцауы къухы ис ӕхсидгӕ сӕны дзаг кӕхц,
      алыхуызон маст кӕрдӕджытимӕ.
      Уый йӕ ӕркалы ӕмӕ йӕ ӕппӕт зӕххы фыдлӕгтӕ
      быннозт кӕндзысты сӕны бынтимӕ.

¹⁰ Ӕз та мыггагмӕ дзурдзынӕн уый тыххӕй,
      зардзынӕн Иаковы Хуыцауӕн.
¹¹ Ӕппӕт фыдлӕгты сыкъатӕ асӕтдзынӕн,
      растгӕнӕгӕн та йӕ кад уыдзӕни бӕрзонд.

75 Псалом

¹ Зарӕггӕнджыты разамонӕгмӕ;
      хъисфӕндырыл.
      Асафы псалом.
      Зарӕг.

² Иудейӕйы зонынц Хуыцауы;
      Израилы стыр у Йӕ ном.
³ Салимы уыди Йӕ цатыр,
      Сионы – Йӕ цӕрӕн бынат.
⁴ Уым асаста Хуыцау зынг фаттӕ,
      уарт ӕмӕ цирхъ, тохы хӕцӕнгӕрзтӕ. ||

⁵ Дӕ рухс тӕмӕнтӕ калы,
      Ды кадджындӕр дӕ сырдарӕх хӕхтӕй.
⁶ Тыхджынтӕ фесты Дӕ амӕддаг,
      мӕрдвынӕй баисты;
      фидар лӕгтӕй йӕ къух сисын ничи бафӕрӕзта.
⁷ Дӕ уайдзӕфӕй, Иаковы Хуыцау,
      бандзыг сты хӕстон уӕрдӕттӕ ӕмӕ бӕхтӕ.
⁸ Тасӕфтауӕг дӕ Ды!
      Дӕ разы чи фӕлӕудзӕн Дӕ мӕсты афон?
⁹ Уӕлӕрвтӕй фехъусын кодтай Дӕ тӕрхон,
      ӕмӕ зӕхх фыртӕссӕй ныссабыр,
¹⁰ Ӕппӕт зӕххыл ӕфхӕрдтыты фервӕзыны тыххӕй
      Хуыцау тӕрхонмӕ куы сыстади, уӕд. ||
¹¹ Бӕлвырд адӕймаджы тызмӕгдзинад дӕр
      Дӕ кадӕн вӕййы,
      йӕ рохтӕ йын куы ӕрбалвасыс, уӕд.

¹² Дунедарӕгӕн, уӕ Хуыцауӕн
      раттут дзырд ӕмӕ йӕ сӕххӕст кӕнут;
      Йӕ алыварс чи ис, уыдон иууылдӕр
      нывӕндтӕ ӕрхӕссӕнт,
      тӕрсын Кӕмӕй хъӕуы, Уымӕн.
¹³ Уый басӕтты ӕлдӕрттӕн сӕ уд,
      зӕххон паддзӕхтӕ Дзы ӕмризӕджы ризынц.

76 Псалом

¹ Зарӕггӕнджыты разамонӕгмӕ;
      Едифумӕн.
      Асафы псалом.

² Хуыцаумӕ у мӕ ныхас,
      Хуыцаумӕ у мӕ дзыназыны хъӕлӕс;
      Уый фехъусдзӕни мӕн.
³ Мӕ хъыджы бон агурын Хуыцауы,
      ӕхсӕвдӕргъы Йӕм мӕ къухтӕ фӕдарын;
      мӕ уд нал исы ӕнцой.

⁴ Хуыцауы мысын ӕмӕ хъӕрзын;
      хъуыды кӕнын, ӕмӕ руайы мӕ уд.
⁵ Ды нӕ уадзыс мӕ цӕстытӕ ӕрцъынд кӕнын;
      фӕдӕн зӕрдӕсаст ӕмӕ дзурын нал фӕразын.
⁶ Мӕ хъуыдытӕ – нӕ рагбонтыл, ивгъуыд азтыл.
⁷ Ӕхсӕвыгон ӕрымысын мӕ зарджытӕ,
      мӕ зӕрдӕйы нывӕндын мӕ хъуыдытӕ,
      мӕ уд агуры дзуапп:
⁸ «Цымӕ нӕ Дунедарӕг бынтон ныууагъта
      ӕмӕ ныл нырӕй фӕстӕмӕ нал ауддзӕн?
⁹ Цымӕ нӕм Йӕ уарзт бынтондӕр ахуыссыди,
      нӕ фидӕны фӕлтӕртӕн Йӕ зӕрдӕвӕрдтӕ
      сӕ тыхы нал сты?
¹⁰ Хуыцауӕй ӕцӕг ферох хатыр кӕнын
      ӕмӕ фырмӕстӕй Йӕ хорзӕхы дуӕрттӕ сӕхгӕдта?» ||

¹¹ Уӕд загътон: «Мӕ зӕрдӕйы рыст уый у,
      ӕмӕ Бӕрзонд Хуыцау нӕ сӕрыл кӕй нал хӕцы».
¹² Фӕлӕ ӕрымысдзынӕн Дунедарӕгӕн Йе 'рмдзӕф;
      ӕрымысдзынӕн Дӕ рагзаманы диссӕгтӕ.
¹³ Мӕ зӕрдыл дардзынӕн Де 'ппӕт хъуыддӕгтӕ,
      мӕ хъуыдытӕ уыдзысты Де 'рмдзӕфыл.
¹⁴ Дӕ фӕндаг рухс у, Хуыцау!
      Кӕцы хуыцау у нӕ Хуыцауӕй стырдӕр!
¹⁵ Ды диссӕгтӕгӕнӕг Хуыцау дӕ;
      Ды равдыстай Дӕ хъомыс адӕмты ӕхсӕн.
¹⁶ Ды бахызтай Дӕ адӕмы Дӕ цонджы тыхӕй,
      Иаков ӕмӕ Иосифы фыртты. ||

¹⁷ Дӕу федтой, Хуыцау, дӕттӕ,
      Дӕу федта денджыз ӕмӕ банкъуысти;
      ӕнӕбын хуыдымтыл дӕр ризӕг бахӕцыди.
¹⁸ Ӕврӕгътӕй калди дон,
      мигътӕй-иу хъуысти гыбар-гыбур,
      Дӕ фаттӕ цӕхӕркалгӕйӕ тахтысты.
¹⁹ Зилгӕуады хъуысти Дӕ ӕрвнӕрд,
      ӕрвӕрттывд-иу ныррухс кодта дун-дуне;
      зӕхх ӕнкъуысыд ӕмӕ рызти.
²⁰ Дӕ фӕндаг – денджызыл,
      Дӕ надвӕд – стыр дӕттыл;
      Дӕ къахвӕндӕгтӕн раиртасӕн нӕй.
²¹ Кодтай Дӕ адӕмы фысты дзугау,
      Моисей ӕмӕ Аароны къухӕй.

77 Псалом

¹ Асафы зондамонӕн псалом.

      Байхъусут, мӕ адӕм, мӕ зондамындмӕ;
      ӕз цы зӕгъын, уымӕ уӕ хъус ӕрдарут:
² Ӕз уын радзурдзынӕн фӕсномыг ныхас,
      ӕрхӕсдзынӕн уын рагбонты ӕмбисӕндтӕ.
³ Мах цы фехъуыстам, цы базыдтам,
      нӕ фыдӕлтӕ нын цы ралӕвӕрдтой,
⁴ Уый ма бамбӕхсӕм сӕ байзӕддагӕй;
      нӕ фидӕны фӕлтӕртӕн радзурӕм
      Хуыцауы кадыл, Йӕ хъаруйыл,
      цы диссӕгтӕ равдыста, уыдоныл.
⁵ Уый радта Иаковӕн фӕдзӕхстытӕ,
      ӕрӕвӕрдта ӕгъдау Израилы;
      ӕмӕ нӕ фыдӕлты бар бакодта
      уыдон сӕ цотмӕ адӕттын,
⁶ Нӕ фӕстагӕттӕ сӕ куыд зоной,
      ӕрцӕуинаг фӕлтӕртӕ, ӕмӕ сӕ уыдон дӕр
      сӕ цотӕн куыд дзурой:
⁷ Хуыцауыл сӕ зӕрдӕ дарой,
      Хуыцауы хъуыддӕгтӕ ма ферох кӕной,
      Йӕ фӕдзӕхстытӕм гӕсгӕ цӕрой,
⁸ Ӕмӕ сӕ фыдӕлтау ма уой хивӕнд
      ӕмӕ змӕнтӕг фӕлтӕр –
      зӕрдӕйӕ ӕууӕнкджын чи нӕ уыд Хуыцауыл
      ӕмӕ удӕй ӕнувыд, ахӕм фӕлтӕр.
⁹ Ефремы гӕрзифтонг фырттӕ, фатӕхсджытӕ,
      тохы бон лидзынмӕ куыд фесты,
¹⁰ Уыдон не 'ххӕст кодтой Хуыцауы фӕдзӕхстытӕ,
      нӕ сӕ бафӕндыд Йе 'гъдауыл цӕуын;
¹¹ Сӕ зӕрдыл нал дардтой Йӕ хъуыддӕгтӕ,
      кӕй сын равдыста, Йӕ уыцы диссӕгтӕ.
¹² Сӕ фыдӕлты цӕсты раз Мысыры зӕхх,
      Цоаны быдыры, Уый скодта диссӕгтӕ.
¹³ Фӕдих кодта денджыз, акодта сӕ йӕ астӕуты,
      дон лӕууыди къулау.
¹⁴ Боныгон ӕврӕгъы сӕ разӕй цыди,
      ӕхсӕвдӕргъы – Йӕ арты рухсы.
¹⁵ Къӕдзӕх фӕдих кодта ӕдзӕрӕг ран
      ӕмӕ, цыма ӕнӕбын суадӕттӕй,
      афтӕ сӕ донӕй бафсӕста.
¹⁶ Уый рауагъта къӕдзӕхӕй ивылӕнтӕ,
      цӕугӕдӕттау рацыди дон.

¹⁷ Фӕлӕ уӕддӕр Йӕ ныхмӕ арӕзтой тӕригъӕдтӕ,
      Бӕрзонд Хуыцауы ныхмӕ-иу
      сыстадысты ӕдзӕрӕг ран.
¹⁸ Барӕй къахтой Хуыцауы зӕрдаивӕй,
      сӕ уды фӕндиаг хӕринӕгтӕ дзы домдтой.
¹⁹ Ӕмӕ дзырдтой Хуыцауы ныхмӕ, зӕгъгӕ:
      «Хуыцауӕн ӕдзӕрӕг ран
      фынг ӕрӕвӕрын Йӕ бон суыдзӕн?
²⁰ Уӕдӕ Хуыцау куы ӕрцавта къӕдзӕх,
      уӕд дзы ракалди дӕттӕ, рацыди дзы суадӕттӕ.
      Фӕлӕ Йӕ адӕмӕн Йӕ бон у дзул раттын
      ӕмӕ сӕ дзидзайӕ бафсадын?»
²¹ Уый фехъуыста Дунедарӕг,
      Йӕ маст сӕм рафыхти,
      ӕмӕ арт сирвӕзти Иаковыл,
      Хуыцауы азар раивылд Израилыл,
²² Уымӕн ӕмӕ Хуыцауыл не 'ууӕндыдысты,
      нӕ сӕ уырныдта – фервӕзын сӕ кӕндзӕни, уый.
²³ Фӕлӕ Хуыцау бардзырд радта
      уӕларвон ӕврӕгътӕн
      ӕмӕ байгом кодта арвы дуӕрттӕ,
²⁴ Ӕмӕ сын уарыди хӕрынӕн маннӕ,
      радта сын уӕларвон хойраг.
²⁵ Зӕдты дзул хордтой адӕм,
      Хуыцау сын радта фаг хӕринаг.
²⁶ Уӕлӕрвтӕй рауагъта скӕсӕйнаг дымгӕ,
      Йӕ тыхӕй ӕркодта хуссайраг.
²⁷ Ӕмӕ рыгау ӕруарын кодта дзидза,
      тӕхаг мӕргътӕ – денджызон змисау.
²⁸ Ӕмӕ сӕ асадӕнмӕ калдта,
      сӕ цатырты алыварс.
²⁹ Бахордтой ӕмӕ фелгъӕд ысты,
      уымӕн ӕмӕ сын Уый сӕ мондӕгтӕ суадзын кодта.
³⁰ Сӕ мондӕгтӕ нӕма суагътой,
      нӕма аныхъуырдтой сӕ комдзаг,
³¹ Афтӕ сӕ Хуыцауы фыдӕх баййӕфта –
      амардта тыхджындӕрты,
      Израилы ӕвзонг фыртты дӕлгоммӕ ӕрфӕлдӕхта.

³² Уӕддӕр адӕм тӕригъӕды ӕфтыдысты;
      уӕддӕр не 'ууӕндыдысты Хуыцауы диссӕгтыл.
³³ Афтӕ сын сӕ мӕнг бонтӕн кӕрон скодта
      ӕмӕ сын ӕвӕст сӕ царды дуг ӕрбайсӕфта.
³⁴ Куы сӕ мардта, уӕд-иу Ӕй райдыдтой агурын,
      здӕхтысты Йӕм сӕумӕрайсомӕй;
³⁵ Сӕ зӕрдыл-иу ӕрлӕууыди,
      Хуыцау сӕ къӕдзӕх кӕй у,
      Бӕрзонд Хуыцау сӕ ирвӕзынгӕнӕг кӕй у.
³⁶ Фӕлӕ Йын дзырдтой козбау ныхӕстӕ,
      сайдтой Йӕ се 'взагӕй.
³⁷ Сӕ зӕрдӕ раст нӕ уыди Йӕ разы,
      Йӕ фидыдыл ӕнувыд нӕ уыдысты.
³⁸ Фӕлӕ Уый уарзӕгой у, барста сын сӕ азымтӕ
      ӕмӕ-иу сӕ нӕ фесӕфта.
      Бирӕ хӕттыты Йӕ маст урӕдта,
      Йӕ фыдӕх сыл ӕххӕст нӕ уагъта.
³⁹ Хуыцау Йӕ зӕрдыл дардта, уыдон буар кӕй сты
      ӕмӕ уддзӕф – чи ацӕуы ӕмӕ нал раздӕхы.

⁴⁰ Цал хатты сыстадысты тыгъд быдыры Йӕ ныхмӕ,
      цал хатты Дзы бауагътой маст ӕдзӕрӕг бӕстӕйы!
⁴¹ Ӕмӕ та ноджыдӕр къахтой Хуыцауы,
      хъыг кодтой Израилы Сыгъдӕджы!
⁴² Ферох сӕ Йӕ хъомыс,
      ӕфхӕрӕджы къухӕй сӕ куы байста, уыцы бон –
⁴³ Мысыры куы равдыста Йӕ нысӕнттӕ
      ӕмӕ Цоаны дӕлвӕзы Йӕ диссӕгтӕ.
⁴⁴ Сӕ цӕугӕдӕттӕ сын туг фестын кодта,
      ӕмӕ сӕ дон нуазынӕн нал бӕззыди.
⁴⁵ Бафтыдта сыл уырынгонты ӕвзӕн,
      цӕмӕй сыл хӕцой, ӕмӕ галхӕфсыты,
      цӕмӕй сын хӕссой стыр зиан.
⁴⁶ Сӕ зайӕгхалмӕ сын бауагъта къуыдыркӕлмыты,
      сӕ тыллӕг сын фӕкодта мӕтыхты амӕддаг.
⁴⁷ Сӕ сӕнӕфсиртӕ сын ихӕй ныццагъта,
      сӕ легъуибӕлӕстӕ сын ныссӕлын кодта.
⁴⁸ Сӕ фос сын фӕцагъта ихӕй,
      сӕ дзугтӕ та сын арв ӕрцавта.
⁴⁹ Ныккалдта сыл Йӕ судзгӕ маст,
      Йӕ азар, Йӕ фыдӕх; фыдбон сыл ӕруагъта,
      фӕкодта сӕ бынгӕнӕг зӕдты амӕддаг.
⁵⁰ Йӕ маст нал баурӕдта,
      сӕ цард сын мӕлӕтӕй нӕ бахъахъхъӕдта,
      сӕ фос сын фӕцагъта рынӕй.
⁵¹ Мысыры амардта алы хистӕр фырты –
      Хамы цатырты фӕцагъта фыццаггуырдты.
⁵² Фыстау ракодта Йӕ адӕмы,
      дзугау сӕ кодта ӕдзӕрӕг ран.
⁵³ Кодта сӕ ӕдас фӕндӕгтыл,
      ӕмӕ ницӕмӕй тарстысты,
      се знӕгтӕ та денджызы фӕдӕлдон сты.
⁵⁴ Ӕрхуыдта сӕ Йӕ сыгъдӕг зӕххы арӕнтӕм,
      Йӕ рахиз цонгӕй кӕй райста, уыцы хохмӕ.
⁵⁵ Сӕ разӕй сын фӕсырдта муртӕтты,
      сӕ зӕххытӕ фыдӕй фыртмӕ радта уыдонӕн,
      сӕ цатырты сын ӕрцӕрын кодта израилаг адӕмы
      хӕдзарвӕндӕгты.

⁵⁶ Фӕлӕ уӕддӕр къахтой Хуыцауы,
      Бӕрзондбадӕджы ныхмӕ-иу сыстадысты,
      Йӕ фӕдзӕхстытӕм гӕсгӕ нӕ цардысты.
⁵⁷ Сӕ фыдӕлтау-иу Хуыцауӕй аздӕхтысты,
      цыдысты Йыл гадзрахатӕй,
      зылын фатау-иу фӕиппӕрд сты раст фӕндагӕй.
⁵⁸ Йӕ хъыджы цыдысты бӕрзӕндтӕн кувынӕй
      ӕмӕ Дзы маст уагътой мӕнгхуыцӕуттӕн кусынӕй.
⁵⁹ Уый Хуыцау куы фехъуыста,
      уӕд Йӕ маст рафыхти
      ӕмӕ Йӕхи атигъ кодта Израилыл.
⁶⁰ Ӕмӕ ныууагъта Силомы Йӕ цӕрӕн бынат –
      адӕмы ӕхсӕн Йе 'вӕрд цатыр.
⁶¹ Йӕ тыхы ӕвдисӕн радта уацарӕн,
      Йӕ кады бынат – знӕгты къухтӕм.
⁶² Йӕ адӕмы фӕкодта цирхъы амӕддаг;
      Уый смӕсты Йӕ бындар адӕммӕ.
⁶³ Ӕрыгон лӕппуты арт аныхъуырдта,
      чындзхӕсджыты зарджытӕ нал кодтой чызджытӕн;
⁶⁴ Сӕ сауджынтӕ фӕлдӕхтысты цирхъӕй,
      сӕ идӕдз устытӕн сӕ бон кӕуын нӕ уыд.

⁶⁵ Уӕд Дунедарӕг растади,
      цыма Йӕ фынӕй райхъал,
      сӕны тых чи банкъардта, уыцы бӕгъатырау,
⁶⁶ Ӕмӕ Йе знӕгты лидзинаг фӕкодта –
      мыггагмӕ сӕ ӕгадмӕ ӕртардта.
⁶⁷ Хуыцау Йӕ цӕст не 'рӕвӕрдта Иосифы цатыртыл,
      Ефремы хӕдзарвӕндаг дӕр нӕ сӕвзӕрста,
⁶⁸ Фӕлӕ сӕвзӕрста Иудӕйы хӕдзарвӕндаг,
      кӕй бауарзта, Сионы уыцы хох.
⁶⁹ Уым сӕвӕрдта Йӕ Кувӕндон хӕхтау бӕрзонд,
      сфидар ӕй кодта мыггагмӕ зӕххы бындурау.
⁷⁰ Ӕмӕ сӕвзӕрста Йӕ цагъар Давиды,
      ракодта йӕ фосдарӕнӕй,
⁷¹ Фысты хизӕнӕй йӕ ракодта Иаковмӕ,
      Йӕ адӕммӕ – Йӕ бындар адӕм, Израилы хизынмӕ.
⁷² Ӕмӕ сӕ хызта сыгъдӕг зӕрдӕйӕ,
      кодта сӕ размӕ арӕхстджын къухӕй.

78 Псалом

¹ Асафы псалом.

      О Хуыцау, ӕрцыдысты муртаттӕ
      ӕмӕ бацахстой Дӕ зӕхх;
      Дӕ рухс Кувӕндонӕй фӕхынджылӕг кодтой,
      Иерусалимӕй дур дурыл нал ныууагътой.
² Дӕ цагъарты мӕрдтӕ хӕрынӕн радтой мӕргътӕн,
      Дӕ сыгъдӕджыты буӕрттӕ – хъӕддаг сырдтӕн.
³ Сӕ туг сын донау ныккалдтой Иерусалимы алыварс,
      ныгӕнӕг дӕр сӕ нал уыд.
⁴ Фидиссаг фестӕм нӕ сыхӕгтӕн,
      ӕгад нӕ кӕнынц ӕмӕ ныл худынц
      нӕ алыварс чи цӕры, уыдон.

⁵ О Дунедарӕг, кӕдмӕ?
      Иудадзыг тызмӕг уыдзынӕ?
      Кӕдмӕ хъуамӕ судза, артау, Дӕ маст?
⁶ Дӕ фыдӕх ныккал,
      Дӕу чи нӕ зоны, уыцы адӕмтыл,
      Дӕ ном чи нӕ агуры, уыцы паддзахӕдтыл.
⁷ Уымӕн ӕмӕ уыдон аныхъуырдтой Иаковы
      ӕмӕ йын йӕ бӕстӕ раууатмӕ ӕркодтой.
⁸ Ма нын бадар нӕ цӕстмӕ нӕ фыдӕлты азымтӕ;
      рӕхджы ныл Дӕ хорзӕх ӕрцӕуӕд,
      уымӕн ӕмӕ мах фестӕм зӕрдӕсаст.

⁹ Дӕ номы кадӕн нын баххуыс кӕн,
      нӕ Хуыцау, нӕ ирвӕзынгӕнӕг;
      бахиз нӕ ӕмӕ нын ныббар нӕ тӕригъӕдтӕ
      Дӕ номы сӕраппонд.
¹⁰ Иннӕ адӕмтӕ цӕмӕн хъуамӕ дзурой:
      «Кӕм ис сӕ Хуыцау?»
      Дӕ цагъарты туг ныккалджытӕй Ды Дӕ маст исыс;
      уадз уый нӕхи цӕстӕй фенӕм,
      ӕмӕ адӕмтыл дӕр уый айхъуыса.

¹¹ Фехъуысӕд Дӕм ахӕстыты уынӕргъын;
      бахиз Дӕ цонджы хъаруйӕ,
      мӕлӕты цӕстытӕм чи кӕсы, уыдоны.
¹² Авд хатты фылдӕр ӕлгъыст
      сӕ зӕрдӕтӕм ӕрбаздах, Дунедарӕг,
      Дӕу чи ӕлгъыста, нӕ уыцы сыхӕгтӕн.
¹³ Мах та Дӕ адӕм стӕм, Дӕ сӕрвӕтты фыстӕ,
      мыггагмӕ Дӕ стаудзыстӕм
      ӕмӕ фӕлтӕрӕй-фӕлтӕрмӕ
      ӕппӕлдзыстӕм Дӕуӕй.

79 Псалом

¹ Зарӕггӕнджыты разамонӕгмӕ;
      «Фарны кӕркусӕг дидинӕг»-ы зӕлтӕм гӕсгӕ.
      Асафы псалом.

² Фехъус нӕ, Израилы Фыййау!
      Ды фысты дзугау кӕныс Иосифы,
      Дӕхи равдис, херувимтыл Бадӕг,
³ Ефрем, Вениамин ӕмӕ Манассийӕн;
      раргом кӕн Дӕ тых ӕмӕ ӕрцу
      нӕ фервӕзын кӕнынмӕ.

⁴ О Хуыцау, сног нын кӕн нӕ тых,
      срухс нӕ кӕн Дӕ цӕсгомы рухсӕй,
      ӕмӕ фервӕздзыстӕм мах.
⁵ О Дунедарӕг, Уӕлахизгӕнӕг Хуыцау,
      кӕдмӕ ахӕсдзӕни Дӕ маст,
      ӕмӕ Дӕ адӕмы куывд ма исай?
⁶ Дзулы бӕсты сӕ цӕссыгӕй бафсӕстай,
      баназын сын кодтай дзӕвгар цӕссыг.
⁷ Нӕ сыхӕгтӕн фестӕм хъаугъайы амӕддаг,
      ӕмӕ ныл худынц не знӕгтӕ.

⁸ О Уӕлахизгӕнӕг Хуыцау!
      Сног нын кӕн нӕ тых,
      срухс нӕ кӕн Дӕ цӕсгомы рухсӕй,
      ӕмӕ фервӕздзыстӕм мах.
⁹ Мысырӕй рахастай сӕнӕфсиры бӕлас;
      фӕсырдтай адӕмты ӕмӕ йӕ ныссагътай.
¹⁰ Ссыгъдӕг ын кодтай бынат,
      ауагъта уидӕгтӕ, ӕмӕ уый байдзаг и зӕххыл.
¹¹ Йӕ аууонӕй бамбӕрзта хӕхтӕ,
      йӕ къалиутӕй – егъау нӕзытӕ.
¹² Йӕ къабӕзтӕ денджызы онг ауагъта,
      йӕ талатӕ – цӕугӕдоны онг.

¹³ Цӕмӕн ын ныппырх кодтай йе 'мбонд,
      йӕ рӕзты чи фӕцӕйцӕуы, уыдонӕн тонынӕн?
¹⁴ Хъӕддаг хуытӕ йӕ сафынц,
      хӕрынц ӕй быдираг сырдтӕ.
¹⁵ Раздӕх нӕм, Уӕлахизгӕнӕг Хуыцау!
      Ӕркӕс арвӕй ӕмӕ фен,
      бабӕрӕг кӕн уыцы сӕнӕфсирдон,
¹⁶ бахъахъхъӕн, Дӕ рахиз къух цы ныссагъта, уый,
      ӕмӕ, Дӕхицӕн кӕй сфидар кодтай, уыцы талатӕ.

¹⁷ Сӕнӕфсирдон басыгъди, ныццагътой йӕ;
      Дӕ уайдзӕфӕй Дӕ адӕм сӕфынц.
¹⁸ Дӕ къух ӕрӕвӕр Дӕ рахиз цонджы ӕвзӕрстыл
      ӕмӕ адӕймаджы фыртыл,
      Дӕхицӕн кӕй сфидар кодтай.
¹⁹ Уӕд Дӕуӕй нӕ аздӕхдзыстӕм;
      райгас нӕ кӕн, ӕмӕ ссардзыстӕм Дӕ ном.

²⁰ О Дунедарӕг, Уӕлахизгӕнӕг Хуыцау!
      Сног нын кӕн нӕ тых,
      срухс нӕ кӕн Дӕ цӕсгомы рухсӕй,
      ӕмӕ фервӕздзыстӕм мах.

80 Псалом

¹ Зарӕггӕнджыты разамонӕгмӕ;
      «Гат»-ы зӕлтӕм гӕсгӕ.
      Асафы псалом.
² Цингӕнгӕ зарут Хуыцауӕн –
      Уый нӕ тых у;
      хъӕлӕсыдзагӕй стаут Иаковы Хуыцауы.
³ Райдайут зарын, рахӕссут гуымсӕг,
      ӕхцонзӕл дала-фӕндыр дыууадӕстӕнонимӕ.

⁴ Уасут сыкъа-уадындзӕй мӕйноджы
      ӕмӕ – мӕй куы уа цӕлхыдзаг – нӕ бӕрӕгбоны.
⁵ Уый Израилӕн ӕгъдау у,
      Иаковы Хуыцауӕй – фӕтк.
⁶ Уыцы уагӕвӕрд Хуыцау Иосифӕн радта,
      мысыраг зӕххӕй куы рацыди, уӕд.
      Уым фехъуыстон ӕнахуыр хъӕлӕс:
⁷ «Йе 'ргъом ын райстон йӕ уӕхсчытӕй;
      ссӕрибар сты тӕскъӕй йӕ къухтӕ.
⁸ Дӕ уынгӕджы бон Мӕм фӕдзырдтай,
      ӕмӕ дӕ бахызтон;
      ӕрвнӕрды бӕрзӕндӕй дын дзуапп радтон,
      бафӕлвӕрдтон дӕ Меривы дӕтты цур. ||
⁹ Байхъусут, Мӕ адӕм,
      развӕлгъау уӕ фӕдзӕхсдзынӕн:
      О, куы Мӕм байхъусис, Израил!
¹⁰ Ма дын уӕд ӕндӕр хуыцау,
      ӕцӕгӕлон хуыцауӕн ма кув.
¹¹ Ӕз дӕ Хицау Хуыцау дӕн,
      Мысыры зӕххӕй дӕ Ӕз ракодтон;
      сдар Мӕм дӕ цӕнгтӕ,
      ӕмӕ дӕ Ӕз хъуаг ницӕмӕй ныууадздзынӕн».

¹² Фӕлӕ Мӕм Мӕ адӕм нӕ хъуыстой,
      зӕгъы Хуыцау, Израил Мӕ коммӕ нӕ касти.
¹³ Уӕд сӕ Ӕз ныууагътон сӕ хивӕнд зӕрдӕйы
      ӕвджид,
      цӕмӕй, сӕхи куыд фӕнды, афтӕ цӕрой.
¹⁴ Мӕ адӕм бӕргӕ куы хъуыстаиккой мӕнмӕ,
      ӕмӕ Израил куы цыдаид Мӕ фӕндӕгтыл,
¹⁵ Уӕд сын рӕхджы Ӕз се знӕгты басастаин,
      Мӕ къух ӕртасыдаид се 'фхӕрджытӕм.
¹⁶ Хуыцауы знӕгтӕ сӕ разы сӕ зонгуытыл
      бырыдаиккой,
      ӕмӕ афтӕ уыдаид мыггагмӕ дӕр.
¹⁷ Ӕз сӕ хастаин хуыздӕр хорӕй,
      ӕфсӕстаин сӕ къӕдзӕхы мыдӕй.

81 Псалом

¹ Асафы псалом.

      Хуыцау ӕрлӕууыд бӕрзонд ныхасы,
      хуыцӕутты[18] 'хсӕн рахаста Йӕ тӕрхон:
² «Кӕдмӕ кӕндзыстут хӕрам тӕрхон,
      кӕдмӕ уыдзыстут фыдлӕгты фарс? ||
³ Уӕ тӕрхон бахъахъхъӕнӕд мӕгуыр ӕмӕ сидзӕры,
      ӕфхӕрд ӕмӕ ӕдыхӕн сӕ сӕрыл рахӕцут.
⁴ Бахизут гӕвзыкк ӕмӕ мӕгуыры,
      байсут сӕ фыдлӕгты къухтӕй».

⁵ Уыцы хицӕуттӕ нӕ зонынц ӕмӕ не 'мбарынц,
      дзӕгъӕл кӕнынц талынджы:
      халынц зӕххы ӕппӕт бындуртӕ.
⁶ Ӕз загътон: «Сымах хуыцӕуттӕ стут;
      уе 'ппӕт дӕр Бӕрзонд Хуыцауы фырттӕ стут.
⁷ Фӕлӕ сымах амӕлдзыстут иннӕ адӕймӕгтау;
      ӕндӕр ӕлдӕрттау ӕрхаудзыстут».

⁸ Рацу, Хуыцау, тӕрхон рахӕсс зӕххӕн;
      уымӕн ӕмӕ ӕппӕт адӕмтӕ –
      Дӕ бындар сты.

82 Псалом

¹ Зарӕг.
      Асафы псалом.

² О Хуыцау! Ма у ӕнӕсым, ма лӕуу ӕнцад,
      ма у ӕнӕдзуапп, Хуыцау!
³ Кӕс-ма, Де знӕгтӕ куыд базмӕлыдысты,
      Дӕуӕй йе сӕфт чи уыны,
      уыдон сӕ сӕрыл куыд схӕцыдысты.
⁴ Дӕ адӕмы ныхмӕ скодтой сусӕг фыдвӕнд,
      уынаффӕтӕ кӕнынц, кӕй хъахъхъӕныс,
      уыдоны ныхмӕ.
⁵ Уыдон зӕгъынц: «Цом, ӕмӕ сӕ фӕцӕгъдӕм
      иннӕ адӕмты ӕхсӕн,
      Израилӕн йӕ фӕд дӕр куыд нал уа, афтӕ».

⁶ Баныхас кодтой ӕмзӕрдӕйӕ,
      Дӕ ныхмӕ сарӕзтой цӕдис:
⁷ Едомы хъӕутӕ ӕмӕ измаилӕгтӕ,
      Моав ӕмӕ агарӕгтӕ,
⁸ Гевал, Аммон, Амалик
      ӕмӕ Филистим Тиры цӕрджытимӕ.
⁹ Семӕ баиу Ашур дӕр;
      уыдон бафтыдтой Лоты байзӕддаджы тыхыл. ||

¹⁰ Киссоны цӕугӕдоны былгӕрон
      Мадиамыл, Сисарайыл ӕмӕ Иавиныл цы ӕрцыд,
      уый сыл ӕруадз.
¹¹ Уыдон фӕцагъдӕуыд Ен-Доры
      ӕмӕ зӕххӕн фестадысты ӕппарӕнтау.
¹² Оривӕн ӕмӕ Зивӕн цы сарӕзтай,
      уый ӕруадз сӕ номдзыдтыл,
      Зевейӕн ӕмӕ Салманӕн цы сарӕзтай,
      уый ӕруадз се 'ппӕт уӕздӕттыл.
¹³ Уыдон дзырдтой:
      «Хуыцауы зӕххытӕ нӕхи бакӕнӕм».

¹⁴ Мӕ Хуыцау, фӕкӕн сӕ зилгӕуадау,
      зыгуымау – дымгӕйы хай.
¹⁵ Арт хъӕды къох куыд басудзы,
      зынгирвӕзт обӕутты куыд сарауы,
¹⁶ Афтӕ сӕ сурӕд Дӕ уад,
      Дӕ тыхдымгӕ сӕ баййафӕд.
¹⁷ Сӕ цӕсгом сын фегад кӕн, Хуыцау,
      Дӕ ном куыд ӕрцагурой, О Дунедарӕг.
¹⁸ Ӕгадӕй ӕмӕ тӕрсгӕйӕ цӕрӕнт мыггагмӕ,
      фӕхудинаг ӕмӕ бабын уӕнт.

¹⁹ Уадз базоной, Дунедарӕг ӕрмӕст Дӕ ном кӕй у –
      ӕппӕт зӕххы Бӕрзонд Хуыцау Ды дӕ.

83 Псалом

¹ Зарӕггӕнджыты разамонӕгмӕ;
      «Гат»-ы зӕлтӕм гӕсгӕ.
      Корейы фыртты псалом.

² Куыд бӕллиццаг у Дӕ цӕрӕн бынат,
      Уӕлахизгӕнӕг Хуыцау!
³ Тырны мӕ уд ӕмӕ бафӕллад
      Дунедарӕджы кӕртмӕ бӕлгӕйӕ;
      мӕ зӕрдӕ ӕмӕ мӕ буар цинӕй скъӕфынц мӕн
      цардӕгас Хуыцаумӕ.

⁴ Сырддонцъиу дӕр ма ссары йӕхицӕн хӕдзар,
      зӕрватыкк – ахстон йӕ лӕппынтӕн
      Дӕ нывондхӕссӕны рӕбын,
      О Уӕлахизгӕнӕг Хицау,
      мӕ Паддзах ӕмӕ мӕ Хуыцау!
⁵ Тӕхудиаг сты Дӕ Хӕдзары цӕрджытӕ:
      уыдон иудадзыг стауынц Дӕу. ||

⁶ Тӕхудиаг у уыцы адӕймаг,
      йӕ тых Дӕуӕй кӕмӕн у,
      Дӕ бӕрзонд фӕндаг кӕй зӕрдӕ равзӕрста.
⁷ Цӕссыджы дӕлвӕзы цӕугӕйӕ,
      уыдон уым ссарынц суадӕттӕ,
      ӕмӕ сын фыццаг къӕвда арфӕ ӕрхӕссы.
⁸ Уыдон цӕугӕйӕ кӕнынц тыхджынӕй тыхджындӕр,
      цалынмӕ Сионыл Хуыцауы раз не 'рлӕууынц.

⁹ О Дунедарӕг, Уӕлахизгӕнӕг Хуыцау,
      фехъус мӕ кувын;
      Дӕ хъус мӕм ӕрдар, Иаковы Хуыцау. ||
¹⁰ Ӕркӕс, О Хуыцау – нӕ хъахъхъӕнӕг
      ӕмӕ Дӕ цӕстӕнгас раздах Де 'взӕрстмӕ.
¹¹ Дӕ кӕрты иу бон, искуы мингай бонтӕ ӕрвитынӕй
      хуыздӕр у.
      Фыдӕхы цатыры цӕрынӕй
      мӕ Хуыцауы Хӕдзары къӕсӕры цур лӕууын
      ӕхцондӕр у.
¹² Уымӕн ӕмӕ Дунедарӕг Хуыцау
      нӕ хур ӕмӕ нӕ уарт у;
      Дунедарӕг дӕтты фарн ӕмӕ цыт.
      Ӕнаипп цардӕй чи цӕры,
      уыдоны ӕнӕхай нӕ уадзы хорзӕхӕй.

¹³ О Уӕлахизгӕнӕг Хуыцау!
      Тӕхудиаг у,
      Дӕуыл йӕ зӕрдӕ чи дары, уыцы адӕймаг.

84 Псалом

¹ Зарӕггӕнджыты разамонӕгмӕ.
      Корейы фыртты псалом.
² Дӕ хорзӕх равдыстай Дӕ зӕххмӕ, Дунедарӕг,
      Иаковы ракодтай уацарӕй.
³ Дӕ адӕмӕн ныббарстай сӕ азымтӕ,
      ныххатыр сын кодтай се 'ппӕт тӕригъӕдтӕ. ||
⁴ Аиуварс кодтай Де 'ппӕт азар уыдонӕй,
      Де 'хсидгӕ маст сӕ аздӕхтай.
⁵ Ӕмӕ та нын сног кӕн нӕ тых,
      нӕ ирвӕзынгӕнӕг Хуыцау,
      ӕмӕ нӕм мауал мӕсты кӕн.
⁶ Ау, мыггагмӕ нӕм тызмӕг уыдзынӕ,
      Дӕ маст фӕлтӕрӕй-фӕлтӕрмӕ хӕсдзынӕ?
⁷ Ау, нӕ тых нын нал сног кӕндзынӕ,
      Дӕ адӕмы цин Дӕуыл куыд уа, афтӕ?
⁸ Равдис нӕм, Дунедарӕг, Дӕ хорзӕх
      ӕмӕ нын ратт Дӕ ирвӕзындзинад.

⁹ Байхъусон, Дунедарӕг Хуыцау цы зӕгъдзӕни, уымӕ;
      Йӕ адӕмӕн, Йӕ сыгъдӕджытӕн
      Уый дзуры фарн –
      ӕрмӕст ногӕй ӕнӕзонд фӕндагыл ма ныллӕууӕд.
¹⁰ Бӕлвырд, чи Дзы тӕрсы,
      уыдонмӕ Йӕ ирвӕзындзинад хӕстӕг у,
      цӕмӕй Хуыцауы кад цӕра нӕ зӕххыл.

¹¹ Уарзт ӕмӕ иузӕрдиондзинад баиу уыдзысты;
      рӕстад ӕмӕ фарн кӕрӕдзийӕн батӕ кӕндзысты.
¹² Иузӕрдиондзинад зӕххӕй ссӕудзӕни,
      рӕстад ӕркӕсдзӕни уӕлӕрвтӕй;
¹³ Ӕмӕ нын Дунедарӕг ратдзӕни фарн,
      ӕмӕ нӕ зӕхх ӕрхӕсдзӕни тыллӕг.
¹⁴ Рӕстад цӕудзӕни Хуыцауы разӕй
      ӕмӕ цӕттӕ кӕндзӕн Йӕ къахвӕдтӕн фӕндаг.

85 Псалом

¹ Давиды куывд.

      Фехъус мӕ ӕмӕ мын дзуапп ратт, О Дунедарӕг,
      уымӕн ӕмӕ ӕз ӕфхӕрд ӕмӕ мӕгуыр дӕн.
² Мӕ уд мын бахиз,
      уымӕн ӕмӕ ӕз иузӕрдион дӕн Дӕуыл;
      Ды мӕ Хуыцау дӕ, фервӕзын кӕн мӕн –
      Дӕуыл йӕ ныфс ӕвӕрӕг цагъары.
³ Батӕригъӕд мын кӕн, мӕ Хицау Хуыцау,
      уымӕн ӕмӕ сӕумӕйӕ изӕрмӕ Дӕумӕ кувын.
⁴ Дӕ цагъары зӕрдӕ барухс кӕн, Хуыцау,
      уымӕн ӕмӕ Дӕумӕ хӕссын мӕ уды сагъӕс.

⁵ Ды фӕрнджын ӕмӕ хатыргӕнаг дӕ,
      мӕ Хицау Хуыцау,
      Дӕ хорзӕх ӕнӕкӕрон у Дӕумӕ кувджытӕм.
⁶ Фехъус, Дунедарӕг, мӕ кувын;
      ӕркӕс мӕ кӕуын ӕмӕ лӕгъстӕмӕ.
⁷ Мӕ тыхст бон Дӕумӕ сидын ӕххуысмӕ,
      уымӕн ӕмӕ Ды дзуапп ратдзынӕ мӕнӕн.

⁸ Нӕй хуыцӕутты ӕхсӕн Дӕу хуызӕн, Дунедарӕг,
      ӕмӕ нӕй Дӕ хъуыддӕгты хуызӕн.
⁹ Ды кӕй сфӕлдыстай, уыцы адӕмтӕ
      се 'ппӕт дӕр ӕрлӕудзысты Дӕ разы
      ӕмӕ Дын бакувдзысты, О Дунедарӕг;
      уыдон скадджын кӕндзысты Дӕ ном.
¹⁰ Уымӕн ӕмӕ стыр дӕ Ды,
      ӕмӕ аразыс диссӕгтӕ;
      иунӕг Ды дӕ Хуыцау.

¹¹ Сахуыр мӕ кӕн Дӕ фӕндагыл цӕуын, Дунедарӕг,
      ӕмӕ Дӕ ӕцӕгадмӕ гӕсгӕ цӕрдзынӕн;
      ратт мӕ зӕрдӕйӕн ӕххӕст фӕндон –
      Дӕуӕй куыд тӕрсон.
¹² Ӕппӕт зӕрдӕйӕ Дӕу стаудзынӕн,
      Дунедарӕг, мӕ Хуыцау;
      мыггагмӕ кадджын кӕндзынӕн Дӕ ном.
¹³ Уымӕн ӕмӕ стыр у Дӕ хорзӕх мӕнмӕ;
      мӕ уд мын бахызтай арф ингӕнӕй.

¹⁴ О Хуыцау, хъалтӕ сыстадысты мӕ ныхмӕ,
      тыхгӕнджыты бал мӕ агуры марынмӕ –
      уыдон нӕ нымайынц Дӕу.
¹⁵ Фӕлӕ Ды, Дунедарӕг, фӕлмӕнзӕрдӕ
      ӕмӕ хатыргӕнӕг,
      бирӕбыхсон ӕмӕ иузӕрдион дӕ,
      ӕнӕкӕрон у Дӕ уарзт.
¹⁶ Де 'ргом раздах мӕнмӕ, батӕригъӕд мын кӕн;
      Дӕ тыхӕй бахай кӕн Дӕ цагъарӕн –
      фервӕзын кӕн Дӕуӕн лӕггадгӕнӕг сылгоймаджы
      хъӕбулы!
¹⁷ Равдис мыл Дӕ аудыны нысан,
      мӕ фыдгултӕ йӕ куыд феной ӕмӕ фегад уой,
      уымӕн ӕмӕ Ды, Дунедарӕг,
      баххуыс кодтай мӕнӕн ӕмӕ мӕ барӕвдыдтай.

86 Псалом

¹ Корейы фыртты псалом.
      Зарӕг.

² Хуыцау сыгъдӕг хохыл сӕвӕрдта Йӕ бындур;
      Сионы кулдуар[19] Дунедарӕг
      Иаковы ӕппӕт цӕрӕн бынӕттӕй фылдӕр уарзы.
³ Де стырады кой хъуысы, Хуыцауы сахар! ||
⁴ Мӕн чи зоны, уыдонӕн ӕрымысдзынӕн Раав[20]
      ӕмӕ Вавилон;
      филистимӕгтӕ дӕр, Тир
      ӕмӕ Ефиопи дӕр зӕгъдзысты:
      «Ахӕм ӕмӕ ахӕм адӕймаг уым райгуырд».

⁵ Сионы тыххӕй дзурдзысты:
      «Ацы адӕймаг ӕмӕ уыцы адӕймаг дӕр
      уым райгуырдысты,
      ӕмӕ Бӕрзонд Хуыцау Йӕхӕдӕг ӕрӕвӕрдта
      бындур Сионӕн».
⁶ Адӕмты сфысты Дунедарӕг ныффысдзӕн:
      «Ахӕм ӕмӕ ахӕм адӕймаг уым райгуырд». ||
⁷ Уыдон цӕгъддзысты ӕмӕ зардзысты:
      «Ме 'ппӕт арфӕйы суадӕттӕ Дӕумӕ сты».

87 Псалом

¹ Зарӕг.
      Корейы фыртты псалом.
      Зарӕггӕнджыты разамонӕгмӕ, зарынӕн;
      уадынгарзыл.
      Еман Езрахийы зондамонӕн ныхас.

² Дунедарӕг, Мӕ ирвӕзынгӕнӕг Хуыцау,
      Дӕ разы дзыназын ӕхсӕв ӕмӕ бон.
³ Схӕццӕ Дӕм уӕд мӕ кувын,
      фехъус мӕ кӕуын.

⁴ Уымӕн ӕмӕ хъизӕмӕрттӕй байдзаг мӕ уд;
      мӕ къах – мӕрдты бӕстӕйы къӕсӕрыл.
⁵ Мӕн нымайынц, ингӕнмӕ чи фӕцӕуы,
      уыдонӕй иуыл;
      ӕз сдӕн, тых кӕмӕ нал ис, уыцы адӕймагау.
⁶ Мӕрдты ӕхсӕн дӕн ӕппӕрст –
      лӕджы къухӕй мардау хуыссын,
      Ды кӕй нал хъуыды кӕныс,
      ӕмӕ Дӕ арм кӕуыл нал ауды, уыдоны ингӕны.

⁷ Ныппӕрстай мӕ ӕнӕбын уӕрммӕ,
      сау дӕлдзӕхы хай мӕ фӕкодтай.
⁸ Дӕ судзгӕ маст уӕз кӕны мӕныл,
      Дӕ ӕппӕт абухгӕ уылӕнты бын мӕ фӕкодтай. ||
⁹ Мӕ зонгӕты адард кодтай мӕнӕй,
      скодтай мӕ уыдонӕн ӕлгъаг;
      ӕхгӕды дӕн, алидзӕн мын нӕй.
¹⁰ Сагъӕстӕй тайы мӕ цӕсты рухс;
      ӕрвылбон Дӕуӕн лӕгъстӕ кӕнын, Дунедарӕг,
      Дӕумӕ дарын мӕ цӕнгтӕ.
¹¹ Ау, мӕрдтыл равдисдзынӕ диссаг?
      Ау, мӕрдтӕ рабаддзысты
      ӕмӕ Дӕ уыдон стаудзысты?
¹² Дӕ хорзӕхыл ингӕны дзурдзысты
      ӕмӕ Дӕ иузӕрдиондзинадыл – мӕрдты дунейы?
¹³ Талынджы ма Дӕ диссӕгтӕ фенӕн ис,
      кӕнӕ рох зӕххы арфы – Дӕ рӕстдзинад?

¹⁴ Фӕлӕ ӕз Дӕумӕ сидын ӕххуысмӕ, Дунедарӕг;
      сӕумӕйӕ Дӕм мӕ кувын схӕццӕ вӕййы.
¹⁵ О Дунедарӕг, цӕмӕн атигъ кодтай мӕ удыл Дӕхи,
      ӕмӕ цӕмӕн аздӕхтай Де 'ргом мӕнӕй?
¹⁶ Ме 'взонджы бонтӕй-иу ӕфхӕрд
      ӕмӕ мӕлынӕввонг уыдтӕн;
      ныр дӕр Дӕ азар ӕвзарын, ӕмӕ мӕ ныфс сӕтты.
¹⁷ Мӕ сӕрты акалд Дӕ фыцгӕ маст;
      Дӕ судзгӕ азар мӕ раууатмӕ ӕркодта.
¹⁸ Сӕумӕйӕ изӕрмӕ мӕ алыварс сты донивылдау,
      иумӕ мӕ ӕрбалвӕстой.
¹⁹ Ды адард кодтай мӕнӕй мӕ зӕрдиаг ӕмбал
      ӕмӕ хӕлары;
      талынг – мӕ иунӕг ӕмбал.

88 Псалом

¹ Ефам Езрахийы зондамонӕн псалом.

² Мыггагмӕ зардзынӕн Дунедарӕджы стыр хорзӕхыл;
      фӕлтӕрӕй-фӕлтӕрмӕ хъусын кӕндзынӕн,
      Ды иузӕрдион кӕй дӕ, уый.
³ Дӕ хорзӕх ӕнусмӕ кӕй цӕрдзӕни;
      Дӕ иузӕрдиондзинад – ӕнӕфӕцудгӕ уӕлӕрвты.
      Ды загътай:
⁴ «Ӕз сарӕзтон фидыд Ме 'взӕрстимӕ,
      сомы ракодтон Мӕ цагъар Давидӕн:
⁵ Дӕ байзӕддагӕн мыггагмӕйы бындур
      сӕвӕрдзынӕн,
      дӕ паддзахы бадӕн фидаргонд у
      фӕлтӕрӕй-фӕлтӕрмӕ». ||

⁶ Уӕлӕрвтӕ скад кӕндзысты Дӕ диссаджы
      хъуыддӕгтӕн, Дунедарӕг,
      сыгъдӕджыты ӕмбырды стаудзысты Дӕ ӕцӕгад.
⁷ Дунедарӕгыл йӕхи чи абара,
      ахӕм чи разындзӕн уӕлӕрвты?
      Хуыцауы фыртты ӕхсӕн
      Дунедарӕджы хуызӕн чи у?
⁸ Сыгъдӕджыты ӕмбырды тынг тӕрсынц Хуыцауӕй;
      Йӕ алыварс чи ис, уыдонӕн се 'ппӕтӕй
      тӕссагдӕр у Уый.
⁹ Дунедарӕг, Уӕлахизгӕнӕг Хуыцау,
      чи у Дӕ хуызӕн?
      Ды ӕппӕтӕй тыхджындӕр дӕ, О Дунедарӕг,
      Дӕ иузӕрдиондзинад – Дӕ алыварс.

¹⁰ Ды паддзахиуӕг кӕныс знӕт денджызыл;
      йӕ уылӕнтӕ куы сыстынц,
      уӕд сӕ ныссабыр кӕныс.
¹¹ Цыма мард уыдис, афтӕ ӕнцонӕй фӕуӕлахиз дӕ
      Раавыл;
      Дӕ хъаруджын цонгӕй ныффӕйлыдтай Де знӕгты.
¹² Арв Дӕу у, Дӕу у зӕхх дӕр;
      дун-дуне ӕмӕ дзы цыдӕриддӕр ис,
      уыдон Ды скодтай.
¹³ Цӕгат ӕмӕ Хуссар Ды сфӕлдыстай;
      Фавор ӕмӕ Ермон Дӕ номы кадӕй райынц.
¹⁴ Хъӕддых у Дӕ цонг, тыхджын у Дӕ арм,
      Дӕ рахиз къух бӕрзонд систай адӕмты сӕрмӕ.

¹⁵ Дӕ паддзахады бындур –
      рӕстад ӕмӕ ӕнӕхӕрам тӕрхон.
      Хорзӕх ӕмӕ ӕцӕгад Дӕ разӕй цӕуынц.
¹⁶ Тӕхудиаг сты, Дӕу цытджын зарджытӕй
      чи стауы, уыцы адӕм!
      Уыдон Дӕ цӕсгомы рухсмӕ цӕрынц, Дунедарӕг.
¹⁷ Сӕумӕйӕ изӕрмӕ сӕ цин Дӕ номыл у,
      Дӕ рӕстад сӕ сисы бӕрзонд.
¹⁸ Сӕ кад ӕмӕ тых Ды дӕ,
      Дӕ аудынӕй ӕфты нӕ тыхыл.
¹⁹ Уымӕн ӕмӕ нӕ уарт Дунедарӕгӕй лӕвӕрд у,
      Израилы Сыгъдӕгӕй – нӕ паддзах.

²⁰ Кӕддӕр раргом кодтай Дӕ рӕстгӕнджытӕн
      ӕмӕ загътай:
      «Ӕз баххуыс кодтон ӕхсарджын фӕтӕгӕн;
      сбӕрзонд кодтон адӕмӕй Ме 'взӕрсты.
²¹ Ӕз ссардтон Мӕ цагъар Давиды,
      байсӕрстон ӕй Мӕ сыгъдӕг зетийӕ.
²² Мӕ арм ын уыдзӕни мыггагмӕ ӕххуыс,
      Мӕ цонг ӕй фидар кӕндзӕни.
²³ Знаг ӕй нӕ басӕтдзӕн,
      фыдлӕгтӕй йӕ ничи бафхӕрдзӕн.
²⁴ Йӕ размӕ йын ныддӕрӕн кӕндзынӕн
      йӕ фыдгулты,
      ӕнӕуынон кӕмӕн у, уыдоны ӕрцӕвдзынӕн.
²⁵ Ме 'нувыд ӕмӕ Мӕ хорзӕх уыдзысты йемӕ,
      Мӕ ном ын ратдзӕни уӕлахиз.
²⁶ Денджызыл ын ӕрӕвӕрдзынӕн йӕ къух,
      цӕугӕдӕттыл – йӕ рахиз цонг.
²⁷ Уый мӕ хондзӕни: „Ды мӕ Фыд дӕ,
      мӕ Хуыцау, мӕ ирвӕзынгӕнӕг къӕдзӕх“.
²⁸ Уый мӕнӕн уыдзӕни хистӕр фырт,
      зӕххон паддзӕхтӕй се 'ппӕтӕй стырдӕр.
²⁹ Мӕ хорзӕх йемӕ уыдзӕни мыггагмӕ,
      Мӕ фидыд йемӕ скӕндзынӕн ӕнӕфехӕлгӕ.
³⁰ Йӕ хӕдзарвӕндаг ын адаргъ кӕндзынӕн ӕнустӕм,
      йӕ паддзахы бадӕн – арвӕн йӕ бонтау.

³¹ Йӕ цот Ме 'гъдау куы фехалой,
      Мӕ уынаффӕтӕм гӕсгӕ куы нӕ цӕрой,
³² Мӕ уагӕвӕрдты сӕрты куы ахизой,
      Мӕ фӕдзӕхстытӕ Мын куы нӕ бавӕрой,
³³ Уӕд сӕ Мӕ лӕдзӕгӕй бафхӕрдзынӕн
      сӕ фыдмиты тыххӕй,
      цӕвынӕй – сӕ азымты тыххӕй.
³⁴ Фӕлӕ йӕ Мӕ хорзӕхӕй ӕнӕхай
      нӕ фӕкӕндзынӕн,
      кӕронмӕ йыл ӕнувыдӕй баззайдзынӕн.
³⁵ Мӕ фидыд нӕ аивдзынӕн,
      ӕмӕ мӕ дзыхӕй цы рацыд,
      уый нӕ фӕсайдзынӕн.
³⁶ Ӕз иухатт карз сомы ракодтон Мӕ сыгъдӕг номӕй –
      Давидӕн мӕнг нӕ зӕгъдзынӕн:
³⁷ Йӕ байзӕддаг цӕрдзӕн мыггагмӕ,
      йӕ паддзахы бадӕн, хурау, уыдзӕни Мӕ разы.
³⁸ Мӕйау фидар ӕвӕрд уыдзӕни мыггагмӕ,
      уый иузӕрдион ӕвдисӕн куыд у арвыл».

³⁹ Фӕлӕ ныр Дӕхи атигъ кодтай Де 'взӕрст паддзахыл,
      Де 'ргом дзы аздӕхтай, стызмӕг ӕм дӕ.
⁴⁰ Дӕ цагъаримӕ Дӕ фидыд фехӕлдтай,
      йӕ паддзахы худ ын ӕрӕппӕрстай зӕххмӕ.
⁴¹ Йе 'ппӕт къултӕ йын ныппырх кодтай,
      йӕ фидӕрттӕй йын дур дурыл нал ныууагътай.
⁴² Давынц дзы йӕ рӕзты ӕппӕт цӕуджытӕ;
      йӕ сыхаг адӕмтӕн фӕци фидиссаг.
⁴³ Йӕ фыдгулты рахиз къухтыл схӕцыдтӕ бӕрзонд,
      йе 'ппӕт знӕгтӕн радтай цин.
⁴⁴ Ды йын скъуымых кодтай йӕ цирхъы ком,
      тохы быдыры йын хъару нӕ радтай.
⁴⁵ Байстай йын йӕ намыс,
      йӕ паддзахы бадӕн ын раппӕрстай зӕхмӕ.
⁴⁶ Йе 'взонджыбонтӕ йын фӕцыбыр кодтай,
      ӕгады ном ыл сӕвӕрдтай. ||

⁴⁷ Кӕдмӕ, Дунедарӕг?
      Мыггагмӕ ӕмбӕхсдзынӕ Дӕхи?
      Артау кӕдмӕ судздзӕни Дӕ азар?
⁴⁸ Ӕрымыс, мӕ цард куыд цыбыр у:
      ахӕм хъысмӕтӕн сфӕлдыстай ӕппӕт адӕмы?
⁴⁹ Адӕмӕй чи царди, ӕмӕ мӕлӕт чи нӕ федта,
      ингӕны комӕй чи бахызта йӕхи?
⁵⁰ Кӕм ис Дӕ раздӕры хорзӕх, Дунедарӕг?
      Ды Давидӕн сомы кодтай Дӕ иузӕрдиондзинадӕй.
⁵¹ Ӕрымыс, Дунедарӕг, Дӕ цагъарты куыд ӕгад кодтой;
      адӕмты тыхджынтӕй уый мӕ зӕрдӕйы хӕссын.
⁵² Куыд ӕгад кӕнынц Де знӕгтӕ, Дунедарӕг,
      куыд ӕгад кӕнынц Де 'взӕрстӕн йӕ фӕндаг!
⁵³ Арфӕгонд у Дунедарӕг мыггагмӕ!
      Амен, амен!

89 Псалом

¹ Хуыцауы цагъар Моисейы куывд.

² Дунедарӕг, Ды уыдтӕ не 'нцойы бынат
      фӕлтӕрӕй-фӕлтӕрмӕ.
³ Цалынмӕ хӕхтӕ райгуырдысты,
      зӕхх ӕмӕ дун-дуне скодтай –
      ӕнустӕй ӕнустӕм Ды дӕ Хуыцау.

⁴ Адӕймаджы аздахыс сыджытмӕ ӕмӕ фӕзӕгъыс:
      «Аздӕхут сыджытмӕ, адӕймаджы фырттӕ!»
⁵ Уымӕн ӕмӕ Дӕ цӕсты мин азы сты зноны бонау,
      кӕркуасӕнты афонау чи аивгъуыйы.
⁶ Ивылд донау ахӕссыс адӕмы;
      уыдон – мӕрдон фынау,
      райсомы кӕрдӕгау ӕрбайсӕфынц.
      Уый райсомӕй ӕрзайы, изӕрмӕ та аивгъуыйы –
      бампылы ӕмӕ бахус вӕййы.

⁷ Уымӕн ӕмӕ нӕм тызмӕг кӕныс,
      ӕмӕ нын кӕрон ӕрхӕццӕ кӕны,
      Дӕ азарӕй нӕ тас бацӕуы.
⁸ Нӕ азымтӕ ӕрӕвӕрдтай Дӕ разы,
      нӕ сусӕггӕгтӕ – Дӕ цӕсгомы рухсмӕ.
⁹ Дӕ азары бын ӕрвыстам не 'ппӕт бонтӕ;
      уынӕргъынау фӕвӕййынц нӕ царды азтӕ.
¹⁰ Нӕ царды ӕмгъуыд – дӕс ӕмӕ ӕртиссӕдз азы,
      тыхджындӕртӕн – цыппарыссӕдз азы;
      сӕ хуыздӕр афон – уӕззау куыст ӕмӕ низтӕ.
      Уымӕн ӕмӕ аивгъуыйынц тагъд,
      ӕмӕ мах атӕхӕм бӕстон.
¹¹ Чи зоны Дӕ масты тых?
      Ды тас ӕфтауыс, ӕмӕ йын чи зоны йӕ бӕрц,
      Дӕ азар куы равдисыс, уӕд?
¹² Сахуыр кӕн нӕ царды бонтӕ афтӕ нымайын,
      цӕмӕй нӕ зӕрдӕ уӕлзонд ссара.

¹³ Кӕдмӕ, Дунедарӕг? Раздӕх нӕм!
      Батӕригъӕд кӕн Дӕ цагъартӕн.
¹⁴ Сӕумӕйӕ нӕ бафсад Де стыр хорзӕхӕй,
      ӕмӕ не 'ппӕт бонтӕ ӕрвитдзыстӕм райгӕ
      ӕмӕ цингӕнгӕйӕ.
¹⁵ Цал боны нӕ бафхӕрдтай, уал цины нын ратт,
      цал фыдӕхы аз бавзӕрстам, уыйбӕрц.
¹⁶ Уадз феной Дӕ цагъартӕ Дӕ ӕрмдзӕф,
      сӕ хъӕбултӕ – Де стырад.

¹⁷ Дӕ хорзӕх нӕ уӕд, Дунедарӕг Хуыцау,
      ратт нын ӕнтыст нӕ хъуыддӕгты,
      ратт ӕнтыст нӕ цӕнгты фӕллойы.

90 Псалом

¹ Бӕрзонд Хуыцауы агъуысты бын чи цӕры,
      уый Ӕппӕтхъомысы аууоны ссары ӕнцой,
² Зӕгъы Дунедарӕгӕн: «Ды мын хъахъхъӕнӕг
      ӕмӕ фидар дӕ, мӕ Хуыцау –
      Ууыл дарын мӕ зӕрдӕ!»

³ Уый дӕ бахиздзӕн цуангӕнӕджы сахсӕнӕй,
      мӕлӕт хӕссӕг рынӕй.
⁴ Йӕ систӕй дӕ бамбӕрздзӕн,
      ӕмӕ Йӕ дӕлбазыр уыдзынӕ ӕдас;
      Йӕ ӕнувыд – дӕ уарт ӕмӕ дӕ фидар.
⁵ Нӕ фӕтӕрсдзынӕ ӕхсӕвы фыдбылызӕй,
      тӕхгӕ фатӕй боныгон,
⁶ Талынджы ӕрбахъуызӕг рынӕй,
      ӕмбисбон бынгӕнӕг низӕй.
⁷ Мингӕйттӕй ӕрхаудзысты дӕ цуры,
      дӕсгай минтӕй – дӕ рахиз фарс,
      дӕумӕ та не 'рбахӕстӕг уыдзӕн.
⁸ Ӕрмӕст кӕсдзынӕ ӕмӕ дӕхи цӕстӕй фендзынӕ,
      фыдлӕгтӕ аккаг ӕфхӕрд куыд баййафдзысты, уый.

⁹ Уымӕн ӕмӕ Дунедарӕджы сӕвзӕрстай дӕхицӕн
      сӕрылхӕцӕгӕн;
      Бӕрзонд Хуыцауы равзӕрстай цӕрӕн бынатӕн.
¹⁰ Фыдбылыз не ‘рцӕудзӕн дӕуыл,
      бӕллӕх дӕ хӕдзармӕ не ‘рбахӕстӕг уыдзӕн,
¹¹ Уымӕн ӕмӕ Йӕ зӕдтӕн бафӕдзӕхсдзӕн -
      дӕ алы фӕндагыл дӕр хъахъхъӕндзысты дӕу.
¹² Сӕ къухтыл дӕ ахӕсдзысты,
      ӕмӕ дӕ къах дурыл дӕр не скъуырдзынӕ.
¹³ Маргджын калмыл ӕмӕ домбайыл алӕгӕрддзынӕ,
      дӕ къӕхты бын ныккӕндзынӕ тыхджын домбайы
      ӕмӕ залиаг калмы.

¹⁴ Хуыцау зӕгъдзӕн: «Уый бауарзта Мӕн,
      ӕмӕ йӕ бахиздзынӕн;
      бахъахъхъӕндзынӕн ӕй, уымӕн ӕмӕ уый
      базыдта Мӕ ном.
¹⁵ Сдзурдзӕни Мӕм, ӕмӕ йӕ фехъусдзынӕн,
      йӕ фыдбоны уыдзынӕн йемӕ;
      бахиздзынӕн ӕй ӕмӕ йӕ скадджын кӕндзынӕн.
¹⁶ Бафсаддзынӕн ӕй бирӕ цӕргӕбонтӕй
      ӕмӕ йын раргом кӕндзынӕн Мӕ ирвӕзындзинад».

91 Псалом

¹ Псалом.
      Сабаты зарынӕн.

² Ӕхцон у Дунедарӕджы стауын,
      Дӕ номы кадыл зарын, Бӕрзонд Хуыцау.
³ Райсомӕй Дӕ хорзӕх,
      ӕхсӕвы та Де 'цӕгад сидын –
⁴ Хъусын кӕнын дӕсхъисоны,
      дыууадӕстӕноны ӕмӕ дала-фӕндыры зӕлтӕй.

⁵ Уымӕн ӕмӕ мын Дӕ хъуыддӕгтӕй
      цин ӕрхастай, Дунедарӕг;
      Дӕ къухӕй цы сарӕзтай, ууыл райын.
⁶ Куыд стыр сты Дӕ хъуыддӕгтӕ, Дунедарӕг,
      куыд тынг арф сты Дӕ хъуыдытӕ!
⁷ Ӕнӕзонд адӕймаг не 'мбары уыдӕттӕ,
      ӕнӕмбаргӕ сӕ не 'нкъары;

⁸ Кӕд фыдлӕгтӕ рӕзынц кӕрдӕгау,
      ӕмӕ цардхуыз сты фыдӕхӕн кусджытӕ –
      уӕддӕр фӕтары уыдзысты мыггагмӕ.
⁹ Фӕлӕ Дӕуӕн, Дунедарӕг,
      Дӕ кад бӕрзонд у кӕддӕриддӕр!
¹⁰ Ӕмӕ ӕцӕгдӕр, Де знӕгтӕ, Дунедарӕг,
      Де знӕгтӕ ӕнӕмӕнг фӕцагъды уыдзысты,
      фыдӕхӕн кусджытӕ иууылдӕр
      ныппырхытӕ уыдзысты.

¹¹ Мӕнӕн та радтай уӕлахизгӕнӕг тых,
      байсӕрстай мӕ хӕрздӕф зетийӕ.
¹² Мӕ цӕстытӕ фендзысты ме знӕгты сӕфт,
      мӕ хъустӕ фехъусдзысты мӕ ныхмӕ рацӕуӕг
      фыдгӕнджыты хъӕр.

¹³ Рӕстгӕнӕг дидинӕг калы дыргъбӕласау,
      хӕрдмӕ фӕцыди ливайнаг нӕзыйау.
¹⁴ Уыдон сагъд сты Дунедарӕджы Хӕдзары
      ӕмӕ дидинӕг ӕфтауынц нӕ Хуыцауы кӕртыты.
¹⁵ Зӕрондӕй дӕр сты дыргъджын,
      ногхуыз ӕмӕ донджын,
¹⁶ Цӕмӕй хъусын кӕной, Дунедарӕг рӕстаг кӕй у;
      Уый мӕ мӕсыг у,
      ӕмӕ Йӕм ӕнӕрастдзинад нӕй.

92 Псалом

¹ Дунедарӕг паддзахиуӕг кӕны,
      Йӕ кад Йӕ фӕлыст у;
      Йӕ фӕлыст у Йӕ кад,
      гӕрзифтонг у хъомысӕй Дунедарӕг.
      Уымӕ гӕсгӕ лӕууы дун-дуне фидар,
      нӕ фенкъуысдзӕн.
² Дӕ паддзахы бадӕн ӕвӕрд у ӕнусты райдианӕй,
      Ды уыдтӕ кӕддӕриддӕр.

³ Хӕрдмӕ сӕхи систой дӕттӕ, Дунедарӕг,
      тынгӕй-тынгдӕр систой сӕ уынӕр;
      дӕттӕ хӕрдмӕ систой сӕ пырхкалгӕ уылӕнтӕ.
⁴ Фӕлӕ Хуыцау хъомысджындӕр у бирӕ дӕтты
      уынӕрӕй,
      денджызты хойгӕ уылӕнтӕй –
      хъомысджын у Дунедарӕг уӕлӕрвты.

⁵ Дӕ уынаффӕтӕ ӕнаивгӕ ӕмӕ ӕцӕг сты;
      Дӕ Хӕдзары фидауц у Дӕ сыгъдӕгад
      ӕнусы бонтӕм, Дунедарӕг.

93 Псалом

¹ О мастисӕг Хуыцау, Дунедарӕг,
      мастисӕг Хуыцау, равдис Дӕхи!
² Рацу, зӕххӕн Тӕрхонгӕнӕг,
      бафхӕр сӕрыстырты сӕ хъуыддӕгтӕм гӕсгӕ.
³ Уыцы фыдлӕгтӕ кӕдмӕ, О Дунедарӕг,
      уыцы фыдлӕгтӕ кӕдмӕ райдзысты?
⁴ Сӕ дзыхӕй ракалынц схъӕл дзырдтӕ;
      фыдгӕнджытӕ сты се 'ппӕт дӕр хиппӕлой.
⁵ Ссӕндынц Дӕ адӕмы, Хуыцау,
      ӕфхӕрынц Дӕ бындар адӕмы.
⁶ Марынц сидзӕргӕсы ӕмӕ ӕрцӕуӕггаджы,
      сафынц сидзӕрты
⁷ Ӕмӕ дзурынц: «Нӕ фендзӕн Дунедарӕг,
      нӕ базондзӕн Иаковы Хуыцау».

⁸ Уӕхи ӕрӕмбарут, ӕнӕзонд адӕм!
      Кӕд уӕм ӕрцӕудзӕн зонд, ӕнӕмбаргӕтӕ?
⁹ Хъус Чи скодта, Уый нӕ фехъусдзӕн?
      Цӕст Чи сарӕзта, уый нӕ фендзӕн?
¹⁰ Адӕмтӕй дзуапп домӕг не 'рфӕрсдзӕн?
      Адӕймагӕн зондамонӕг нӕ базондзӕн?
¹¹ Дунедарӕг зоны адӕймаджы фӕндтӕ –
      уыдон ӕдзӕлгъӕды кӕй сты, уый.

¹² Тӕхудиаг у,
      Ды йӕ рӕдыд кӕмӕн зӕгъыс, Дунедарӕг,
      Де 'гъдӕуттыл кӕй ахуыр кӕныс, уыцы адӕймаг;
¹³ Уымӕн ӕмӕ йын бӕллӕхы заман ратдзынӕ ӕнцой,
      цалынмӕ фыдлӕгӕн уӕрм скъахтӕуа, уӕдмӕ.
¹⁴ Бӕлвырд, Дунедарӕг нӕ ферох кӕндзӕн Йӕ адӕмы,
      нӕ ныууадздзӕн Йӕ бындарты.
¹⁵ Ӕмӕ тӕрхон ногӕй ӕрыздӕхдзӕн рӕстдзинадмӕ,
      ӕмӕ йӕ ӕххӕст кӕндзысты ӕппӕт рӕстзӕрдӕтӕ.

¹⁶ Чи сыстдзӕн мӕн тыххӕй фыдлӕгты ныхмӕ?
      Мемӕ фыдгӕнджыты ныхмӕ чи ӕрлӕудзӕн?
¹⁷ Хуыцау мын куы нӕ рарвыстаид ӕххуыс,
      уӕд рӕхджы мӕ уд ацыдаид ӕнӕсым ингӕнмӕ.
¹⁸ Ӕз куы фӕзӕгъын: «Мӕ къах цуды»,
      уӕд Дӕ уарзт, О Дунедарӕг, вӕййы мӕ фидаргӕнӕг.
¹⁹ Мӕ катайаг хъуыдытӕ куы сбирӕ вӕййынц,
      уӕд Дӕ рӕвдыд ӕхсызгон ӕрхӕссы мӕ удӕн.
²⁰ Хӕрам тӕрхонгӕнджытӕн Демӕ иумӕйагӕй
      исты ис, мыййаг –
      Де 'гъдауы ныхмӕ чи цӕуы, уыдонӕн?
²¹ Уыдон иумӕ ӕмдзырд бакӕнынц
      рӕстгӕнӕджы ныхмӕ,
      сӕ хӕрам тӕрхонӕй амарынц ӕназымы.
²² Фӕлӕ Дунедарӕг мӕ фидар у,
      мӕ Хуыцау – мӕ ӕмбӕхсӕн мӕсыг у.
²³ Сӕ фыдракӕндтӕ сын сӕхи сӕрмӕ раздахдзӕн,
      сӕ фыдмиты тыххӕй сӕ фӕцӕгъддзӕн;
      фӕцӕгъддзӕн сӕ Дунедарӕг, нӕ Хуыцау.

94 Псалом

¹ Ӕрцӕут, цингӕнгӕ азарӕм Дунедарӕгӕн,
      хъӕлӕсыдзагӕй арфӕ кӕнӕм
      нӕ ирвӕзындзинады Къӕдзӕхӕн,
² Йӕ разы ӕрлӕууӕм райгондӕй,
      арфӕ Йын кӕнӕм кады зарджытӕй.

³ Уымӕн ӕмӕ Дунедарӕг стыр Хуыцау у,
      ӕппӕт хуыцӕутты стыр Паддзах.
⁴ Зӕххы арфытӕ – Йӕ къухы,
      хӕхты сӕртӕ – Йӕхи сты.
⁵ Денджыз Йӕ денджыз у – Уый йӕ сфӕлдыста,
      сурзӕхх дӕр Йӕ къухтӕ скодтой.

⁶ Ӕрцӕут ӕмӕ Йын ныллӕг бакувӕм,
      ӕрхауӕм нӕ зонгуытыл не Сфӕлдисӕг Хуыцауы раз.
⁷ Уымӕн ӕмӕ Уый нӕ Хуыцау у,
      мах та – Йӕ дзуджы адӕм, Йӕ хӕсгӕ фыстӕ.

      О, бӕргӕ, сымах абон куы байхъусиккат
      Уымӕн Йӕ хъӕлӕсмӕ:

⁸ «Ма ныддур кӕнут уӕ зӕрдӕтӕ,
      Меривайы[21] ӕдзӕрӕг быдыры
      уыцы фӕлварӕн боны куыд кодтат, афтӕ.
⁹ Уым Мӕ къахтой уӕ фыдӕлтӕ, фӕлвӕрдтой Мӕ,
      кӕд Мӕ хъуыддӕгтӕ уыдтой, уӕддӕр.
¹⁰ Уыцы фӕлтӕрӕй дыууиссӕдз азы
      зӕрдӕцъӕх уыдтӕн Ӕз ӕмӕ загътон:
      „Ацы адӕм зӕрдӕйӕ фӕдзӕгъӕл сты“;
      Мӕ фӕндӕгтӕ нӕ базыдтой.
¹¹ Уымӕ гӕсгӕ карзӕй расомы кодтон –
      „Уыдон нӕ бацӕудзысты Ме 'нцойадмӕ“».

95 Псалом

¹ Зарут Дунедарӕгӕн ног зарӕг,
      зар Хуыцауӕн, ӕппӕт дуне!
² Зарут Хуыцауӕн, кад кӕнут Йӕ номӕн,
      бонӕй бонмӕ хъусын кӕнут Йӕ ирвӕзындзинад.
³ Адӕмтӕн дзурут Йе стырадыл,
      ӕппӕт бӕстӕтӕн – Йӕ диссӕгтыл.

⁴ Уымӕн ӕмӕ стыр у Дунедарӕг –
      ӕппӕлыны аккаг,
      тасӕфтауӕг у ӕппӕт хуыцӕутты ӕхсӕн.
⁵ Мӕнг сты адӕмты хуыцӕуттӕ иууылдӕр,
      Дунедарӕг та арв сфӕлдыста.
⁶ Кад ӕмӕ стырад Йӕ разы сты,
      тых ӕмӕ намыс – Йӕ Кувӕндоны.

⁷ Нымайут Дунедарӕджы, ӕппӕт бӕстӕты мыггӕгтӕ,
      нымайут Дунедарӕджы кад ӕмӕ тых.
⁸ Нымайут Дунедарӕджы кадджын ном,
      хӕссут лӕвӕрттӕ ӕмӕ цӕут
      Йӕ Кувӕндоны кӕртмӕ.
⁹ Бакувут Дунедарӕгӕн Йӕ Сыгъдӕг кады рухсы;
      риз Йӕ цӕсгомы раз, ӕппӕт дуне!

¹⁰ Зӕгъут адӕмтӕн: «Дунедарӕг – Паддзах у!
      Уымӕ гӕсгӕ фидар лӕууы дун-дуне,
      фӕцудӕн ын нӕй;
      Дунедарӕг Йӕ рӕстадмӕ гӕсгӕ тӕрхон кӕндзӕн
      адӕмтӕн».
¹¹ Цин кӕнӕд арв, райӕд зӕхх;
      нӕрӕд денджыз ӕмӕ дзы цыдӕриддӕр ис, уыдон.
¹² Райӕд быдыр ӕмӕ дзы цыдӕриддӕр ис, уыдон;
      уӕд фырцинӕй зардзысты ӕппӕт бӕлӕстӕ хъӕды,
¹³ Зардзысты Хуыцауы раз, уымӕн ӕмӕ
      Уый ӕрбацӕуы,
      ӕрбацӕуы зӕххӕн тӕрхон рахӕссынмӕ.
      Уый тӕрхон кӕндзӕн дун-дунейӕн
      Йӕ рӕстадмӕ гӕсгӕ,
      адӕмтӕн – Йӕ ӕцӕгадмӕ гӕсгӕ.

96 Псалом

¹ Дунедарӕг паддзахиуӕг кӕны;
      райӕд зӕхх, цин кӕнӕнт ӕппӕт сакъадӕхтӕ.

² Мигътӕ ӕмӕ тар – Йӕ алфамбылай;
      рӕстад ӕмӕ ӕнӕхӕрам тӕрхон –
      Йӕ паддзахады бындур.
³ Арт цӕуы Йӕ разӕй ӕмӕ зынг ӕфтауы
      Йе знӕгтыл Йӕ алыварс.
⁴ Йӕ арвӕрттывд ныррухс кӕны дун-дуне;
      зӕхх уый уыны ӕмӕ ризы.
⁵ Мыдадзау тайынц хӕхтӕ Дунедарӕджы раз,
      ӕппӕт зӕххы Хицауы цӕсгомы раз.
⁶ Арв сиды Йӕ рӕстад, ӕмӕ ӕппӕт адӕмтӕ
      уынынц Йӕ кад.
⁷ Фегад уӕнт, гуымирытӕм чи кувы,
      мӕнгхуыцӕуттӕй чи ӕппӕлы, уыдон иууылдӕр.
      Ӕрхаут Дунедарӕджы раз, ӕппӕт хуыцӕуттӕ[22]!

⁸ Хъусы Сион ӕмӕ цин кӕны,
      Дӕ раст тӕрхонтыл райынц, Дунедарӕг,
      Иудӕйы чызджытӕ;
⁹ Уымӕн ӕмӕ Ды Бӕрзонд Хуыцау Дӕ
      ӕппӕт зӕххӕн,
      бӕрзонд у Дӕ кад ӕппӕт хуыцӕутты сӕрмӕ.

¹⁰ Сымахӕн, Хуыцауы уарзджытӕн,
      фыдӕх уӕд ӕнӕуынон!
      Дунедарӕг хъахъхъӕны Йӕ сыгъдӕджыты цард;
      бахизы сӕ фыдлӕгты къухӕй.
¹¹ Рухс йӕ тынтӕ уары рӕстгӕнӕгыл,
      сыгъдӕгзӕрдӕтыл та – цин.
¹² Цин кӕнут, рӕстгӕнджытӕ, Дунедарӕгыл,
      скад кӕнут Йӕ сыгъдӕг номӕн.

97 Псалом

¹ Псалом.

      Зарут Дунедарӕгӕн ног зарӕг,
      уымӕн ӕмӕ Уый сарӕзта диссӕгтӕ;
      Йӕ рахиз къух ӕмӕ Йын Йӕ сыгъдӕг хъомыс
      ӕрхастой уӕлахиз.
² Хуыцау раргом кодта Йӕ ирвӕзындзинад
      ӕппӕт адӕмтӕн равдыста Йӕ рӕстад.
³ Йӕ зӕрдыл ӕрлӕууыд Израилы хӕдзармӕ
      Йӕ хорзӕх ӕмӕ Йӕ иузӕрдиондзинад;
      зӕххыл алы ран дӕр федтой
      нӕ Хуыцауы ирвӕзынгӕнӕг тых.
⁴ Стаут Дунедарӕджы хъӕлӕсыдзагӕй, ӕппӕт зӕхх;
      зӕрдӕбынӕй цин кӕнут ӕмӕ райут,
      зарут Ын кады зарӕг.
⁵ Цӕгъдут Хуыцауӕн дала-фӕндыртыл,
      хъисфӕндыртыл зарджыты зӕлтимӕ.
⁶ Цӕгъдут хӕтӕлтӕй ӕмӕ уасут сыкъа-уадындзтӕй,
      рӕцӕут цины хъӕримӕ Паддзахы,
      Дунедарӕджы размӕ.

⁷ Нӕрӕд денджыз ӕмӕ дзы цыдӕриддӕр ис, уыдон,
      дун-дуне ӕмӕ йӕ цӕрджытӕ.
⁸ Ӕмдзӕгъд кӕнӕнт цӕугӕдӕттӕ;
      иумӕ райӕнт хӕхтӕ,
⁹ Райӕнт Дунедарӕджы раз, уымӕн ӕмӕ Уый
      рацӕуы зӕххӕн тӕрхон рахӕссынмӕ;
      Йӕ тӕрхон дун-дунейӕн уыдзӕни раст,
      адӕмтӕн – ӕнӕхӕрам.

98 Псалом

¹ Дунедарӕг паддзахиуӕг кӕны –
      уадз ризӕнт адӕмтӕ!
      Уый уӕлвонг бады херувимтыл –
      уадз ӕнкъуысӕд зӕхх!
² Хуыцау цытджын у Сионыл,
      бӕрзонд у Йӕ кад ӕппӕт адӕмтӕм.
³ Уадз стауой Де стыр ӕмӕ тасӕфтауӕг ном –
      сыгъдӕг у уый.

⁴ Хъомысджын Паддзах раст тӕрхон уарзы –
      Ды сфидар кодтай рӕстдзинад;
      Иаковыл равдыстай ӕнӕхӕрам тӕрхон ӕмӕ рӕстад.
⁵ Сбӕрзонд кӕнут Дунедарӕджы, нӕ Хуыцауы,
      ныллӕг акувут Йӕ ӕрлӕууӕн бынаты онг –
      Сыгъдӕг у Хуыцау!
⁶ Моисей ӕмӕ Аарон уыдысты Йӕ кусджыты ӕхсӕн,
      Самуил та – Йӕ номӕн кувджыты 'хсӕн:
      уыдон Ӕм куывтой ӕмӕ сын дзуапп лӕвӕрдта.
⁷ Ӕврагъцӕджындзӕй дзырдта семӕ;
      уыдон цардысты Йӕ лӕвӕрд уаг
      ӕмӕ ӕгъдаумӕ гӕсгӕ.

⁸ Дунедарӕг, нӕ Хуыцау!
      Ды хъуыстай Дӕ адӕммӕ,
      уыдтӕ сын хатыргӕнӕг Хуыцау,
      фӕлӕ сӕ ӕфхӕрдтай сӕ фыдмиты тыххӕй.
⁹ Сбӕрзонд кӕнут Дунедарӕджы, нӕ Хуыцауы,
      кад Ын кӕнут Йӕ сыгъдӕг хохыл –
      уымӕн ӕмӕ сыгъдӕг у Дунедарӕг, нӕ Хуыцау.

99 Псалом

¹ Бузныджы псалом.

      Стаут Дунедарӕджы хъӕлӕсыдзагӕй,
      ӕппӕт дуне!
² Цингӕнгӕ кусут Дунедарӕгӕн;
      райгӕйӕ цӕут Йӕ рӕзты.
³ Дунедарӕг Хуыцау кӕй у, Уый базонут;
      Уый нӕ сфӕлдыста, ӕмӕ Йӕхи стӕм,
      Йӕ адӕм, Йӕ сӕрвӕтты фыстӕ.

⁴ Бацӕут Йӕ кулдуарыл Уый стаугӕйӕ,
      Йӕ кӕртмӕ – Уымӕй ӕппӕлгӕйӕ;
      кад Ын дӕттут, арфӕ кӕнут Йӕ номӕн!
⁵ Уымӕн ӕмӕ фӕрнджын у Дунедарӕг;
      Йӕ хорзӕх мыггагмӕ у,
      Йе 'цӕгад – фӕлтӕрӕй-фӕлтӕрмӕ.

100 Псалом

¹ Давиды псалом.

      Уарзт ӕмӕ рӕстадыл зардзынӕн ӕз;
      Дӕуыл у мӕ зарӕг, Дунедарӕг.
² Мӕ хъуыдытӕ бафтаудзынӕн ӕнӕфау фӕндагыл –
      кӕд мӕм ӕрцӕудзынӕ?
      Ӕнӕфауӕй цӕрдзынӕн мӕ хӕдзары,
      мӕ адӕмы ӕхсӕн.
³ Ӕлгъаг цы у, ахӕмӕй мӕ цӕсты раз ницы
      ӕрӕвӕрдзынӕн;
      Хуыцауы ныууадзӕг мын ӕнӕуынон у,
      ӕмгӕрон ӕм не 'рцӕудзынӕн.
⁴ Ӕнӕсыгъдӕг хъуыдытӕ фӕсурдзынӕн мӕхицӕй;
      фыдӕх мӕхимӕ хӕстӕг не 'руадздзынӕн.
⁵ Фӕсвӕд иннӕйыл чи хахуыр кӕны,
      уый ӕнӕдзырды бон фӕкӕндзынӕн;
      бӕрзӕндты кӕсӕг ӕмӕ хъал зӕрдӕйы
      нӕ бабыхсдзынӕн.

⁶ Мӕ цӕстӕнгас сарӕзтон бӕстӕйы иузӕрдионтӕм,
      цӕмӕй уой мӕ фарсмӕ;
      ӕнаипп фӕндагыл чи цӕуы, уый уыдзӕн мӕ кусӕг.
⁷ Мӕнгард мӕ хӕдзары нӕ цӕрдзӕн;
      мӕнг дзурӕгӕн мӕ цуры бынат нӕ разындзӕн.
⁸ Сӕумӕйӕ ӕнӕдзырды бон фӕкӕндзынӕн
      бӕстӕйы ӕппӕт фыдлӕгты
      ӕмӕ фыдгӕнджыты иууылдӕр фӕиппӕрд
      кӕндзынӕн Дунедарӕджы сахарӕй.

101 Псалом

¹ Ӕфхӕрд адӕймаджы кувын,
      йе 'нӕбонӕй Дунедарӕгӕн
      йӕ зӕрдӕйы хъыг куы раргом кодта, уӕд.

² О Дунедарӕг, фехъус мӕ куывд,
      фехъуысӕд Дӕм ӕххуысагур мӕ дзыназын.
³ Ма аздах Де 'ргом мӕнӕй мӕ хъыджы заман;
      мӕ дзыназыны бон мӕ фехъус,
      рӕвдздӕр мын дзуапп ратт.

⁴ Фӕздӕгау фӕивгъуыйынц мӕ бонтӕ,
      ӕхсидавау судзынц ме стджытӕ.
⁵ Мӕ зӕрдӕ бахус, кӕрдӕгау баруад;
      мӕ къӕбӕр бахӕрын дӕр мӕ ферох вӕййы.
⁶ Мӕ фырхъӕрзынӕй ме стджытӕ мӕ цармыл
      бандӕгъдысты.
⁷ Ӕз сдӕн ӕдзӕрӕг ран иунӕг сидахъау,
      хӕлддзӕгты цӕрӕг уыгау.
⁸ Хуыссӕг мыл нӕ хӕцы,
      уӕлхӕдзарыл иунӕгӕй бадӕг маргъау сдӕн.
⁹ Сӕумӕйӕ изӕрмӕ мӕстӕй марынц мӕн
      ме знӕгтӕ;
      чи мӕ ӕлгъиты, уыдон мӕ ном хӕссынц
      фидисӕн.
¹⁰ Дзулау хӕрын ӕртхутӕг,
      дон нуазын мӕ цӕссыгимӕ
¹¹ Дӕ судзгӕ масты тыххӕй мӕнмӕ;
      уымӕн ӕмӕ сбӕрзонд кодтай мӕн,
      стӕй мӕ иуварс аппӕрстай.
¹² Мӕ царды бонтӕ ивгъуыйынц изӕры аууонау,
      кӕрдӕгау баруадтӕн.

¹³ Ды та, Дунедарӕг, ӕнустӕм цӕрыс;
      Дӕ ном – фӕлтӕрӕй-фӕлтӕрмӕ.
¹⁴ Ды рацӕудзынӕ, батӕригъӕд кӕндзынӕ
      Сионӕн;
      уымӕн ӕмӕ ӕрцыд уымӕн хорзӕх
      ракӕныны афон,
      ӕрцыди уыцы афон.
¹⁵ Дӕ цагъартӕ йын уарзынц йӕ дуртӕ дӕр,
      сӕ мӕт – суанг йӕ рыгыл дӕр.
¹⁶ Адӕмтӕ тӕрсдзысты Дунедарӕджы номӕй,
      ӕппӕт зӕххон паддзӕхтӕ – Йӕ кадӕй.
¹⁷ Уымӕн ӕмӕ Дунедарӕг ногӕй самайдзӕн Сионы
      ӕмӕ йӕм фӕзындзӕн Йӕ кады;
¹⁸ Йӕ хъус ӕрдардзӕн мӕгуырты куывдмӕ,
      сӕ куывдыл нӕ атигъ кӕндзӕн Йӕхи.

¹⁹ Уадз уый ныффыстӕуӕд ног фӕлтӕртӕн,
      ӕмӕ стауой Дунедарӕджы
      зӕххыл ма чи райгуырдзӕн, уыдон.
²⁰ Уымӕн ӕмӕ Дунедарӕг ӕркӕсы
      Йӕ сыгъдӕг бӕрзӕндӕй,
      уӕлӕрвтӕй Йӕ цӕст дары зӕххмӕ,
²¹ Ӕмӕ фехъусдзӕн ахӕстыты хъӕрзын,
      ӕмӕ ссӕрибар кӕндзӕни,
      мӕлӕтмӕ лӕвӕрд чи у, уыдон,
²² Цӕмӕй Сионыл хъусын кӕной
      Дунедарӕджы кадджын ном,
      стауой Йӕ Иерусалимы,
²³ Адӕмтӕ куы ӕрӕмбырд уой иумӕ –
      паддзахӕдтӕ Дунедарӕгӕн лӕггад кӕнынмӕ, уӕд.

²⁴ Мӕ цардвӕндагыл мын басаста мӕ хъару,
      фӕцыбыр кодта мӕ бонтӕ.
²⁵ Ӕз загътон: «Мӕ Хуыцау!
      Мӕ бонтӕ мын ӕмбисыл ма аскъуын;
      азтӕ Дӕ бар сты фӕлтӕрӕй-фӕлтӕрмӕ.
²⁶ Райдианы ӕрӕвӕрдтай зӕхх,
      ӕмӕ арв – Дӕ къухты сконд.
²⁷ Уыдон аивгъуыйдзысты,
      Ды та уыдзынӕ мыггагмӕ;
      алӕзӕрдзысты пӕлӕзау, дарӕсау сӕ раивдзынӕ
      ӕмӕ нал уыдзысты.
²⁸ Ды та ӕнустӕм дӕр Уый дӕ,
      Дӕ азтӕн кӕрон нӕй.
²⁹ Дӕ цагъарты хъӕбултӕ цӕрдзысты
      ӕмӕ цӕрдзысты;
      сӕ байзӕддӕгтӕ ӕдзух уыдзысты
      Дӕ цӕсгомы раз».

102 Псалом

¹ Давиды псалом.

      Стау, мӕ уд, Хуыцауы,
      ӕппӕт мӕ мидзӕрдӕ Йӕ сыгъдӕг ном.
² Стау, мӕ уд, Хуыцауы,
      ма Йын рох кӕн Йӕ бирӕ хӕрзтӕ.
³ Уый бары ме 'ппӕт азымтӕ,
      дзӕбӕх кӕны ме 'ппӕт низтӕ.
⁴ Ирвӕзын мӕ кӕны ингӕнӕй,
      кады худау мын сты Йӕ уарзт ӕмӕ Йӕ рӕвдыд.
⁵ Ӕфсады мӕ хӕрзтӕй мӕ зӕрдӕйы фӕндиаг,
      сног мын кӕны ме 'взонгад, свӕййын цӕргӕсау.

⁶ Хуыцауӕй цӕуы рӕстдзинад,
      Йӕ тӕрхон – ӕппӕт ӕфхӕрдтыты бахизынӕн.
⁷ Моисейӕн раргом кодта Йӕ фӕндӕгтӕ,
      Израилы фырттӕн – Йӕ хъуыддӕгтӕ.
⁸ Фӕлмӕнзӕрдӕ ӕмӕ хатыргӕнаг у Дунедарӕг,
      бирӕ быхсы, ӕнӕкӕрон у Йӕ уарзт.
⁹ Ӕдзух тызмӕг нӕ кӕны,
      Йӕ маст мыггагмӕ нӕ ахӕссы.
¹⁰ Нӕ тӕригъӕдтӕм гӕсгӕ нын нӕ ракодта,
      нӕ азымтӕм гӕсгӕ нын нӕ бафыста.
¹¹ Уымӕн ӕмӕ, арв зӕххӕй цӕйбӕрц бӕрзонддӕр у,
      уыйбӕрц стыр у Йӕ уарзт,
      чи Дзы тӕрсы, уыдонмӕ.
¹² Скӕсӕн ныгуылӕнӕй куыд дард у,
      афтӕ махӕй адард кодта нӕ фыдракӕндтӕ.
¹³ Фыд йӕ хъӕбултыл куыд ауды,
      афтӕ Дунедарӕг ауды, чи Дзы тӕрсы, уыдоныл.
¹⁴ Уымӕн ӕмӕ зоны не сконд,
      сыджыт кӕй стӕм, уый Дзы нӕ ферох.

¹⁵ Адӕймаджы цард у кӕрдӕджы фӕзындау,
      быдираг дидинӕгау бирӕ нӕ ахӕссы.
¹⁶ Радымы йыл дымгӕ, ӕмӕ цыдӕр ӕрбавӕййы,
      ӕмӕ кӕм уыди, уыцы бынат ничиуал ӕрымысдзӕн.
¹⁷ Фӕлӕ Дунедарӕджы хорзӕх мыггагӕй-мыггагмӕ у,
      чи Дзы тӕрсы, уыдонмӕ,
      ӕмӕ Йӕ рӕстад – сӕ байзӕддӕгтӕм,
¹⁸ Йӕ фидыд Ын чи нӕ халы,
      Йӕ фӕдзӕхстытӕ йӕ зӕрдыл чи дары
      ӕмӕ сӕ чи ӕххӕст кӕны, уыдонмӕ.

¹⁹ Хуыцау уӕлӕрвты ӕрӕвӕрдта Йӕ паддзахы бадӕн,
      ӕмӕ паддзахиуӕг кӕны ӕппӕтӕн.
²⁰ Стаут Хуыцауы Йӕ хъомысджын зӕдтӕ –
      Йӕ дзырд ӕххӕстгӕнджытӕ,
      Йӕ ныхасӕн коммӕгӕстӕ.
²¹ Стаут Хуыцауы, Йе 'ппӕт уӕларвон ӕфсӕдтӕ,
      Йӕ фӕндон Ын чи ӕххӕст кӕны,
      Йӕ уыцы лӕггадгӕнджытӕ.
²² Стаут Хуыцауы Йе 'ппӕт скондтӕ,
      Йӕ паддзахады ӕппӕт бынӕтты.

      Стау, мӕ уд, Хуыцауы!

103 Псалом

¹ Стау, мӕ уд, Хуыцауы!

      О Дунедарӕг, мӕ Хуыцау,
      куыд диссаджы бӕрзонд у Дӕ ном!
      Ды фӕлыст дӕ кад ӕмӕ намысӕй.
² Рухсӕй Дӕхи сфӕлыстай дарӕсау,
      арв айтыгътай цатырау.
³ Дӕ уӕларвон галуан ӕрӕвӕрдтай дӕтты сӕрмӕ,
      ӕврӕгътӕй саразыс Дӕхицӕн уӕрдон,
      цӕуыс дымгӕйы базыртыл.
⁴ Дымгӕтӕй Дӕхицӕн кӕныс фидиуджытӕ,
      пиллон артӕй – Дӕ кусджытӕ.

⁵ Зӕхх ӕрӕвӕрдтай фидар бындурыл –
      нӕ фӕцуддзӕн ӕнусӕй-ӕнустӕм.
⁶ Хъӕццулау айтыдтай дӕттӕ,
      уыдон хӕхты дӕр бамбӕрзтой.
⁷ Дӕ барджын ныхасӕй згъорынц,
      Дӕ ӕрвнӕрды хъӕлӕсӕй лидзынц дӕттӕ,
⁸ Схӕццӕ вӕййынц хӕхтӕм,
      рацӕуынц дӕлвӕзтӕм,
      Ды сын цы бынат раттыс, уырдӕм.
⁹ Донӕн ӕрӕвӕрдтай арӕн
      ӕмӕ йын уыцы арӕны сӕрты рахизӕн нӕй,
      ӕмӕ нал раздӕхдзӕн ногӕй
      зӕххы фӕдӕлдон кӕнынмӕ.

¹⁰ Донгуырӕнтӕ арвитыс адгуытӕм,
      кӕлынц хӕхты ӕхсӕнты,
¹¹ Ӕфсадынц ӕппӕт быдираг сырдты;
      суанг хъӕддаг хӕрджытӕ дӕр суадзынц сӕ дойны.
¹² Донбылтыл цӕрынц уӕларвон мӕргътӕ,
      сыфтӕрты ӕхсӕнӕй райхъуысы сӕ зарын.
¹³ Бӕрзӕндтӕй Ды басӕттыс сӕ дойны хӕхтӕн,
      Де сконд дыргътӕй бафсадыс зӕхх.
¹⁴ Фосӕн ӕрзайын кӕныс кӕрдӕг,
      халсартӕ – адӕймаджы пайдайӕн,
      цӕмӕй зӕххӕн йӕхицӕй раттай хойраг:
¹⁵ Адӕймаджы зӕрдӕ хъӕлдзӕггӕнӕг сӕн,
      йӕ цӕсгом кӕмӕй ӕрттивы, уыцы зети,
      адӕймагӕн тыхдӕттӕг дзул.
¹⁶ Донӕфсӕст сты Дунедарӕджы бӕлӕстӕ –
      Йӕхӕдӕг кӕй ныссагъта, уыцы ливайнаг нӕзытӕ.
¹⁷ Мӕргътӕ сыл сбийынц ахстӕттӕ;
      зазбӕлӕсты – кӕсагласы цӕрӕн бынат;
¹⁸ Бӕрзонд хӕхтӕ – сычъитӕн,
      айнӕг къӕдзӕхтӕ – тӕрхъустӕн ӕмбӕхсӕн.

¹⁹ Рӕстӕг зонынӕн Ды сфӕлдыстай мӕй;
      хур зоны йӕ аныгуылӕн.
²⁰ Ды айтындзыс талынг – ӕрлӕууы ӕхсӕв
      ӕмӕ хъӕддаг сырдтӕн тезгъойы афон.
²¹ Ӕрыгон домбӕйттӕ богътӕгӕнгӕ агурынц сӕ
      амӕддӕгты,
      Хуыцауӕй курынц сӕ хӕринаг.
²² Хур куы скӕсы, уӕд аздӕхынц
      ӕмӕ схуыссынц сӕ хуыккӕмтты.
²³ Рацӕуы адӕймаг дӕр йӕ куыст кӕнынмӕ
      ӕмӕ фӕархайы суанг изӕрмӕ.

²⁴ Куыд ӕнӕнымӕц сты Дӕ хъуыддӕгтӕ, Дунедарӕг!
      Ӕппӕтдӕр сфӕлдыстай Дӕ уӕлзондӕй;
      зӕхх дзаг у Де скондӕй.
²⁵ Уый дын стыр ӕмӕ уӕрӕх денджыз;
      ӕмызмӕлд дзы кӕнынц хилджытӕ,
      стыр ӕмӕ чысыл цӕрӕгойтӕ – нымӕц сын нӕй.
²⁶ Ленк дзы кӕнынц наутӕ,
      хъылдымтӕ дзы кӕны, Ды кӕй сфӕлдыстай,
      уыцы кӕфхъуындар.
²⁷ Уыдон иууылдӕр Дӕумӕ ӕнхъӕлмӕ кӕсынц,
      цӕмӕй сын раттай хӕринаг йӕ афоныл.
²⁸ Ды сын дӕттыс, ӕмӕ уыдон хӕрынц;
      байгом кӕныс Дӕ арм –
      ӕмӕ бафсӕдынц Дӕ бӕркадӕй.
²⁹ Де 'ргом сӕ аздахыс – ӕмӕ стыхсынц;
      сӕ улӕфт сын байсыс – ӕмӕ амӕлынц,
      аздӕхынц сыджытмӕ.
³⁰ Дӕ Уд куы рарвитыс, уӕд сӕвзӕрынц,
      ӕмӕ сног кӕныс зӕххы уӕлцъар.
³¹ Кад уӕд Дунедарӕгӕн мыггагмӕ;
      цин кӕнӕд Дунедарӕг Йӕ хъуыддӕгтыл!
³² Уый ӕркӕсы зӕххмӕ, ӕмӕ зӕхх баризы;
      андзӕвы хӕхтыл – сӕ фӕздӕг скӕлы.

³³ Зардзынӕн Дунедарӕгӕн мӕ цӕргӕбонты;
      цалынмӕ удӕгас дӕн, уӕдмӕ зардзынӕн
      мӕ Хуыцауы кадӕн.
³⁴ Уадз ӕмӕ Йын ӕхцон уой мӕ хъуыдытӕ дӕр;
      мӕ цин Дунедарӕгыл уыдзӕни.
³⁵ Уадз зӕххыл ӕрцӕуӕд кӕрон тӕригъӕдджынтӕн,
      фыдлӕгтӕн сӕ кой дӕр мауал уӕнт!

      Стау, мӕ уд, Хуыцауы!
      Алилуйа!

104 Псалом

¹ Стаут Дунедарӕджы, арут Ын Йӕ ном;
      адӕмтӕн хъусын кӕнут Йӕ хъуыддӕгтӕ.
² Зарут Ын, зарут Йӕ кадӕн,
      радзурут Йе 'ппӕт диссӕгты тыххӕй.
³ Ӕппӕлут Йӕ сыгъдӕг номӕй;
      райӕнт сӕ зӕрдӕтӕ,
      Дунедарӕджы чи агуры, уыдонӕн.
⁴ Агурут Дунедарӕджы, агурут Ын Йӕ хъомыс,
      иудадзыг агурут Йӕ цӕсгом.

⁵ Ӕрымысут, кӕй сарӕзта, уыцы диссӕгтӕ,
      Йӕ нысӕнттӕ ӕмӕ Йӕ рахӕсгӕ тӕрхонтӕ,
⁶ О, Йӕ цагъар Авраамы байзӕддӕгтӕ,
      Йӕ ӕвзӕрстытӕ, Иаковы хъӕбултӕ.
⁷ Уый нӕ Дунедарӕг Хуыцау у –
      ӕппӕт зӕххыл Йӕ тӕрхонтӕ.

⁸ Мыггагмӕ Йӕ зӕрдыл дары Йӕ фидыд,
      мингай фӕлтӕртӕн цы ныхас бафӕдзӕхста, уый;
⁹ Сарӕзта фидыд Авраамимӕ,
      расомы кодта Исаакӕн.
¹⁰ Иаковӕн ӕй ӕгъдауӕн радта,
      уыцы ӕнусон фидыд – Израилӕн,
¹¹ Зӕгъгӕ: «Ханааны зӕхх дӕуӕн ратдзынӕн,
      уый уыдзӕн уӕ исбоны хай фыдӕй-фыртмӕ».

¹² Уӕд ма сӕ нымӕц чысыл уыди, тынг чысыл,
      уӕд ма уыцы зӕххыл ӕрцӕуӕггӕгтӕ уыдысты
¹³ Ӕмӕ цыдысты иу адӕмӕй иннӕ адӕммӕ,
      иу паддзахадӕй иннӕмӕ.
¹⁴ Дунедарӕг никӕмӕн лӕвӕрдта
      сӕ хъыджы бацӕуыны бар,
      паддзӕхтӕн карзӕй бафӕдзӕхста:
¹⁵ «Ме 'взӕрстытӕм ма фӕцагайут,
      Мӕ пехуымпартӕн мацы фыд ракӕнут».

¹⁶ Ӕмӕ зӕххыл ӕруагъта стонг рӕстӕг;
      иу ӕфсир дӕр нал ныууагъта.
¹⁷ Сӕ разӕй сын арвыста лӕг:
      Иосиф уӕйгонд ӕрцыд цагъарау.
¹⁸ Йӕ къӕхтӕ йын ӕрбалхъывтой хъадамантӕй,
      ӕрбалвӕстой йӕ ӕфсӕн рӕхыстӕй,
¹⁹ Цалынмӕ Хуыцауы ныхас сӕххӕст уа, уӕдмӕ:
      Дунедарӕджы ныхас ӕй бафӕлвӕрдта.
²⁰ Паддзах ӕм арвыста ӕмӕ йӕ суӕгъд кодта –
      рауагъта йӕ ахӕстонӕй адӕмты сӕргълӕууӕг
²¹ Ӕмӕ йӕ сӕвӕрдта йӕ хӕдзарӕн
      уынаффӕгӕнӕгӕй,
      йе 'ппӕт исбонӕн сӕргълӕууӕгӕй,
²² Цӕмӕй йӕхи фӕндонӕй уынаффӕ кӕна
      ӕлдӕрттӕн,
      адӕмы хистӕртӕн амона зонд.

²³ Уӕд Израил ӕрцыди Мысырмӕ,
      Иаков ӕрцарди Хамы[23] зӕххыл.
²⁴ Ӕмӕ Хуыцау тынг сбирӕ кодта Йӕ адӕмы,
      скодта сӕ бирӕ тыхджындӕр се знӕгтӕй,
²⁵ Уыдон зӕрдӕты ӕруагъта фыдӕх Йӕ адӕммӕ,
      ӕмӕ сусӕгвӕнд скодтой Йӕ цагъарты ныхмӕ.

²⁶ Арвыста Йӕ цагъар Моисейы
      ӕмӕ Йе 'взӕрст Аароны,
²⁷ Уыдон уым Хуыцауы ныхасмӕ гӕсгӕ
      равдыстой Йӕ нысӕнттӕ,
      Хамы зӕххы скодтой диссӕгтӕ.
²⁸ Хуыцау рарвыста талынг,
      ӕмӕ зӕхх аныгъуылд талынджы –
      Йӕ ныхасы ныхмӕ ӕрлӕууын никӕй бон уыди.
²⁹ Сӕ дон сын фестын кодта туг,
      сӕ кӕсӕгтӕ сын ныццагъта.
³⁰ Сӕ зӕхх ӕмызмӕлд скодта галхӕфсытӕй,
      суанг паддзӕхты уатты онг.
³¹ Хуыцау загъта, ӕмӕ ӕрбатахт уырынгонты ӕвзӕн,
      се 'ппӕт бӕстӕ дзаг уыди къогъотӕй.
³² Къӕвдайы бӕсты сыл рауагъта их,
      ӕрттивгӕ цӕхӕр – сӕ зӕххмӕ.
³³ Ныддӕрӕн сын кодта сӕ сӕнӕфсирдӕттӕ
      ӕмӕ легъуибӕлӕстӕ,
      ӕппӕт зӕххыл фесӕфта бӕлӕстӕ.
³⁴ Хуыцау загъта, ӕмӕ ӕртахтысты мӕтыхтӕ
      ӕмӕ къуыдыркӕлмытӕ – нымӕц сын нӕ уыд;
³⁵ Ӕмӕ сын сӕ быдырты кӕрдӕг быныл бахордтой,
      бахордтой сын сӕ зӕххы тыллӕг.
³⁶ Хуыцау фӕцагъта бӕстӕйы
      ӕппӕт хистӕр фыртты –
      сӕ адӕмы ӕмӕ фосы алы нӕлдых фыццаггуырды.

³⁷ Ӕмӕ израилӕгты ракодта ӕвзист
      ӕмӕ сызгъӕринимӕ,
      дыууадӕс хӕдзарвӕндагӕй ничи фӕцудыдта.
³⁸ Мысырӕн ӕхсызгон уыди сӕ рацыд,
      уымӕн ӕмӕ сӕ израилӕгтӕй тас бацыди.
³⁹ Хуыцау сын ӕмбӕрзӕнӕн айтыгъта ӕврагъ
      ӕмӕ судзгӕ цӕджындз ӕхсӕвы рухс кӕнынӕн.
⁴⁰ Куырдтой Дзы, ӕмӕ сын рарвыста уӕрццытӕ,
      ӕфсӕста сӕ уӕларвон дзулӕй.
⁴¹ Къӕдзӕх сын фегом кодта,
      ӕмӕ рацыдысты дӕттӕ,
      цӕугӕдӕттау ракалдысты хус быдырты.
⁴² Уымӕн ӕмӕ Дзы нӕ ферох
      Йӕ сыгъдӕг зӕрдӕвӕрд Авраамӕн, Йӕ цагъарӕн.

⁴³ Ӕмӕ ракодта Йӕ адӕмы хъӕлдзӕгӕй,
      Йӕ ӕвзӕрстыты – райгӕйӕ.
⁴⁴ Радта сын адӕмты зӕххытӕ,
      ӕндӕр адӕмы фӕллой сын баззади бынтӕн,
⁴⁵ Цӕмӕй цӕрой Хуыцауы ӕгъдаумӕ гӕсгӕ,
      ӕххӕст кӕной Йӕ фӕдзӕхстытӕ.

      Алилуйа!

105 Псалом

¹ Алилуйа!

      Стаут Дунедарӕджы, арфӕ кӕнут,
      уымӕн ӕмӕ Уый фӕрнджын у,
      уымӕн ӕмӕ Йӕ хорзӕх мыггагмӕ у.
² Чи радзурдзӕн Дунедарӕджы хъомысы тыххӕй,
      Йе 'ппӕт кад чи расиддзӕн?
³ Тӕхудиаг сты, раст тӕрхоныл чи хӕцы
      ӕмӕ кӕддӕриддӕр рӕстӕй чи цӕры, уыдон.

⁴ Дӕ адӕмыл аудгӕйӕ ӕрымыс мӕн дӕр;
      раздах мӕнмӕ дӕр Де 'ргом,
      фервӕзын мӕ кӕн уыдонимӕ,
⁵ Цӕмӕй уынон Де 'взӕрстыты фӕрнджын цард,
      цин кӕнон Дӕ адӕмы цинӕй,
      Дӕ бындар адӕмимӕ ӕппӕлон Дӕуӕй.

⁶ Мах дӕр-иу, нӕ фыдӕлтау, бафтыдыстӕм
      тӕригъӕды,
      кодтам ӕнӕгъдау митӕ, арӕзтам
      фыдракӕндтӕ.
⁷ Нӕ фыдӕлтӕ Мысыры куы уыдысты,
      уӕд Дӕ диссӕгтӕ не 'мбӕрстой,
      сӕ зӕрдыл нӕ дардтой Дӕ бирӕ хӕрзтӕ,
      Дӕ ныхмӕ-иу сыстадысты денджызы былыл,
      Сырх денджызы былыл.
⁸ Фӕлӕ сӕ Дунедарӕг фервӕзын кодта
      Йӕ номы сӕраппонд,
      цӕмӕй равдиса Йӕ хъомыс.
⁹ Бардзырд радта Сырх денджызӕн, ӕмӕ бахус;
      акодта сӕ арф дӕтты ӕхсӕнты, цыма хус зӕххыл.
¹⁰ Ӕмӕ сӕ фервӕзын кодта сӕ фыдгулы къухӕй,
      се знаджы къухӕй сӕ байста.
¹¹ Доны бын фесты се знӕгтӕ – се 'ппӕт знӕгтӕ,
      иу дӕр дзы нал баззад.
¹² Уӕд баууӕндыдысты Йӕ ныхӕстыл,
      кад Ын кодтой сӕ зарджытӕй.

¹³ Фӕлӕ сӕ рӕхджы ферох сты Йӕ хъуыддӕгтӕ,
      нӕ банхъӕлмӕ кастысты Йӕ уынаффӕмӕ.
¹⁴ Ӕдзӕрӕг быдыры ацыдысты сӕ мондӕгты фӕдыл,
      къахтой Хуыцауы ӕдзӕрӕг ран.
¹⁵ Ӕмӕ Дзы цы куырдтой, уый сын радта,
      фӕлӕ сыл бафтыдта тыхсӕттӕг рын.

¹⁶ Асадӕны израилӕгтӕ бахӕлӕг кодтой Моисеймӕ
      ӕмӕ Хуыцауы сыгъдӕг кусӕг Ааронмӕ.
¹⁷ Уӕд зӕхх аскъуыд ӕмӕ аныхъуырдта Дафаны,
      бануӕрста Авироны ӕрдонг.
¹⁸ Зынг сирвӕзт сӕ къордыл,
      арт басыгъта фыдлӕгты.

¹⁹ Хоривы сарӕзтой род –
      куывтой згъӕрӕй конд фӕлгонцӕн.
²⁰ Сӕ кады Хуыцауы баивтой
      кӕрдӕгхор галы нывыл.
²¹ Ферох кодтой, Чи сӕ фервӕзын кодта,
      уыцы Хуыцауы,
      Мысыры стыр хъуыддӕгтӕ,
²² Хамы зӕххы диссӕгтӕ,
      Сырх денджызы былыл
      ӕвирхъау тасӕфтауӕг митӕ Чи сарӕзта, Уый.
²³ Хуыцауы зӕрды уыди сӕ фӕцӕгъдын,
      фӕлӕ Моисей, Йе 'взӕрст,
      ӕрлӕууыд Йӕ разы ӕхсӕнлӕууӕгӕй,
      цӕмӕй Хуыцау Йӕ масты фӕдыл ма ацӕуа
      ӕмӕ сӕ ма фесафа.

²⁴ Сӕхи атигъ кодтой бӕллиццаг зӕххыл,
      Хуыцауы ныхасыл нӕ баууӕндыдысты
²⁵ Ӕмӕ хъуыр-хъуыр кодтой сӕ цатырты,
      нӕ хъуыстой Дунедарӕгмӕ.
²⁶ Ӕмӕ сӕм систа Йӕ къух,
      цӕмӕй сӕ ныццӕгъда ӕдзӕрӕг быдыры,
²⁷ Ныппырх кӕна сӕ байзӕддӕгты адӕмты ӕхсӕн,
      ныффӕйлауа сӕ зӕххы цъарыл.

²⁸ Уыдон куывтой Ваал-Фегормӕ
      ӕмӕ хордтой, мард хуыцӕуттӕн кӕй хастой,
      уыцы нывондтӕ.
²⁹ Сӕ хъуыддӕгтӕй-иу стызмӕг кодтой Хуыцауы,
      ӕмӕ-иу сыл рын сыстади.
³⁰ Уӕд рацыд Финес, слӕууыд се 'хсӕн,
      ӕмӕ сӕ рын ныууагъта.
³¹ Уый тыххӕй нымад ӕрцыд рӕстгӕнӕгыл
      фӕлтӕрӕй-фӕлтӕрмӕ, ӕнусты кӕронмӕ.

³² Фӕлӕ та Меривы дӕтты цур
      смӕсты кодтой Хуыцауы,
      ӕмӕ Моисей баййӕфта ӕфхӕрд уыдоны тыххӕй.
³³ Уымӕн ӕмӕ Хуыцауы Уды ныхмӕ рацыдысты,
      ӕмӕ Моисей фӕрӕдыд ӕнӕрхъуыды ныхасӕй.

³⁴ Дунедарӕг сын кӕмӕй загъта,
      уыцы адӕмты нӕ фӕцагътой.
³⁵ Фӕлӕ схӕццӕ сты муртаттимӕ,
      сахуыр сты уыдоны ӕгъдӕуттыл.
³⁶ Куывтой сӕ мӕнгхуыцӕуттӕм,
      ӕмӕ сын уыдон систы къӕппӕг.
³⁷ Сӕ фыртты ӕмӕ сӕ чызджыты
      хӕйрӕджытӕн хастой нывондӕн.
³⁸ Ныккалдтой-иу ӕназым туг,
      сӕ лӕппуты ӕмӕ чызджыты туг –
      нывондӕн сӕ хастой Ханааны мӕнгхуыцӕуттӕн;
      афтӕмӕй зӕхх фӕчъизи тугӕй.
³⁹ Сӕ хъуыддӕгтӕй сӕхи стылдтой цъыфы,
      сӕ митӕ уыдысты хӕтаджы митӕ.

⁴⁰ Хуыцауы маст рафыхт Йӕ адӕммӕ,
      сӕнад Ын сты Йӕ бындар адӕм.
⁴¹ Ӕмӕ сӕ радта муртатты къухтӕм,
      сӕ фыдгултӕ сын систы ӕлдӕрттӕ.
⁴² Се знӕгтӕ сӕ ӕфхӕрдтой,
      ӕмӕ уыдысты сӕ дӕлбар.
⁴³ Хуыцау сӕ бирӕ хӕттыты бахызта,
      фӕлӕ та-иу сфыдзонд сты;
      арфдӕр ныгъуылдысты сӕ азымты.

⁴⁴ Фӕлӕ-иу сӕм ӕркасти сӕ зынты,
      сӕ дзыназын-иу сын куы фехъуыста, уӕд.
⁴⁵ Семӕ цы фидыд сарӕзта,
      уый-иу ӕрлӕууыд Йӕ зӕрдыл,
      батӕригъӕд-иу сын кодта
      Йӕ бирӕ хорзӕхмӕ гӕсгӕ.
⁴⁶ Уацары кӕмӕ уыдысты,
      уыдонӕн дӕр-иу сфӕлмӕн кодта сӕ зӕрдӕтӕ
      йӕ адӕммӕ.
⁴⁷ Фервӕзын нӕ кӕн, Дунедарӕг,
      нӕ Хуыцау, рамбырд нӕ кӕн дунейы адӕмтӕй,
      ӕмӕ стауӕм Дӕ сыгъдӕг ном,
      ӕппӕлӕм Дӕ кадӕй.

⁴⁸ Арфӕгонд у Дунедарӕг,
      Израилы Хуыцау ӕнусӕй-ӕнустӕм!
      Уадз ӕппӕт адӕм зӕгъӕд: «Амен!»

      Алилуйа!

106 Псалом

¹ Стаут Дунедарӕджы, уымӕн ӕмӕ Уый
      фӕрнджын у,
      уымӕн ӕмӕ Йӕ хорзӕх мыггагмӕ у.
² Афтӕ зӕгъӕнт, Дунедарӕг кӕй фервӕзын кодта,
      фыдгулы къухӕй кӕй бахызта,
³ Ӕппӕт бӕстӕтӕй кӕй ӕрӕмбырд кодта –
      скӕсӕнӕй ӕмӕ ныгуылӕнӕй,
      цӕгатӕй ӕмӕ хуссарӕй – уыдон.

⁴ Ӕдзӕрӕг быдыры хауӕггаг уыдысты
      ӕдзӕуӕг фӕндагыл,
      кӕм ӕрцӕрой, ахӕм сахар нӕ ардтой.
⁵ Ӕййӕфтой стонг ӕмӕ дойны,
      сӕ уд тухӕнӕй сфӕлахс и.
⁶ Уӕд сӕ тыхстӕй сдзынӕзтой Дунедарӕгмӕ,
      ӕмӕ сӕ фервӕзын кодта сӕ зынтӕй.
⁷ Ахуыдта сӕ раст фӕндагыл, цӕмӕй цӕуой,
      ӕрцӕрӕн кӕм уыди, уыцы сахармӕ.
⁸ Уӕдӕ стауӕнт Дунедарӕджы Йӕ хорзӕхы тыххӕй,
      адӕмӕн цы диссаджы хъуыддӕгтӕ сарӕзта,
      уыдоны тыххӕй!
⁹ Уымӕн ӕмӕ дойныгӕнӕг удтӕн суагъта сӕ дойны,
      хӕрзтӕй бафсӕста ӕххормӕгты зӕрдӕтӕ.

¹⁰ Уыдон цардысты талынджы ӕмӕ мӕлӕты тары –
      тухӕйнаг ӕмӕ рӕхыстӕй баст ахстытӕ;
¹¹ Уымӕн ӕмӕ Хуыцауы ныхасы ныхмӕ цыдысты,
      ницӕмӕ дардтой Бӕрзондбадӕджы уынаффӕтӕ.
¹² Хуыцау сын ӕрсаста сӕ зӕрдӕ уӕззау куыстытӕй;
      фӕкалдысты, ӕмӕ сын ӕххуысгӕнӕг нӕ уыд.
¹³ Уӕд сӕ тыхстӕй сдзынӕзтой Дунедарӕгмӕ,
      ӕмӕ сӕ фервӕзын кодта сӕ зынтӕй.
¹⁴ Ракодта сӕ талынгӕй, мӕлӕты аууонӕй,
      арӕдывта сын сӕ рӕхыстӕ.
¹⁵ Уӕдӕ стауӕнт Дунедарӕджы Йӕ хорзӕхы тыххӕй,
      адӕмӕн цы диссаджы хъуыддӕгтӕ сарӕзта,
      уыдоны тыххӕй!
¹⁶ Уымӕн ӕмӕ Уый басаста ӕрхуы дуӕрттӕ,
      арӕмыгъта ӕфсӕн ӕхгӕнӕнтӕ.

¹⁷ Ӕнӕзӕндтӕ сӕ галиу фӕндӕгты тыххӕй,
      сӕ азымты тыххӕй хъизӕмары хай фесты.
¹⁸ Сӕ зӕрдӕ ницыуал хӕринаг иста,
      ӕмӕ ингӕны къӕсӕрмӕ ӕрбахӕстӕг сты.
¹⁹ Уӕд сӕ тыхстӕй сдзынӕзтой Дунедарӕгмӕ,
      ӕмӕ сӕ фервӕзын кодта сӕ зынтӕй.
²⁰ Рарвыста Йӕ ныхас ӕмӕ сӕ сдзӕбӕх кодта,
      ингӕнӕй сӕ бахызта.
²¹ Уӕдӕ стауӕнт Дунедарӕджы Йӕ хорзӕхы тыххӕй,
      адӕмӕн цы диссаджы хъуыддӕгтӕ сарӕзта,
      уыдоны тыххӕй!
²² Ӕрхӕссӕнт Ын бузныджы нывонд,
      цинӕй заргӕйӕ хъусын кӕнӕнт Йӕ хъуыддӕгтӕ!

²³ Денджызмӕ-иу сӕ наутыл чи араст и,
      фурды донвӕндӕгтыл йӕ куыст чи кодта,
²⁴ Уыдон уыдтой Дунедарӕджы хъуыддӕгтӕ
      ӕмӕ Йӕ диссӕгтӕ донзилӕны.
²⁵ Йӕ ныхасӕй-иу сыстади уад,
      хӕрдмӕ иста уылӕнтӕ;
²⁶ Наудзаутӕ-иу ссыдысты арвмӕ,
      ныццыдысты дӕлдзӕхмӕ;
      сӕ ныфс састи фыдӕвзарӕнты.
²⁷ Зилдух кодтой ӕмӕ, расгуытау, цудыдтой;
      се 'ппӕт арӕхстдзинад-иу цыдӕр ӕрбаци.
²⁸ Уӕд сӕ тыхстӕй сдзынӕзтой Дунедарӕгмӕ,
      ӕмӕ сӕ ракодта сӕ зынтӕй.
²⁹ Уый ныссабыр кодта уад,
      ӕмӕ уылӕнтӕ банцадысты.
³⁰ Ирвӕзтытӕ сцин кодтой, уыдон кӕй банцадысты,
      ӕмӕ сӕ Хуыцау ӕркодта сӕ бӕллиццаг наулӕууӕнмӕ.
³¹ Уӕдӕ стауӕнт Дунедарӕджы Йӕ хорзӕхы тыххӕй,
      адӕмӕн цы диссаджы хъуыддӕгтӕ сарӕзта,
      уыдоны тыххӕй!
³² Уадз сбӕрзонд кӕной Йӕ ном адӕмы ӕмбырды,
      кад Ын кӕнӕнт хистӕртӕ ныхасы.

³³ Хуыцау цӕугӕдӕттӕй саразы хус быдыртӕ,
      згъоргӕ суадӕттӕй – хуыскъ зӕхх,
³⁴ Бӕркадджын зӕххӕй – цӕхджын быдыр,
      чи йыл цӕры, уыдоны фыдӕхы тыххӕй.
³⁵ Хус быдыр фестын кӕны цад,
      хуыскъ зӕхх – згъоргӕ суадӕттӕ;
³⁶ Ӕмӕ уым ӕрцӕрын кӕны цардмондӕгты,
      цӕмӕй саразой сахар ӕмӕ дзы ӕрцӕрой.
³⁷ Байтауынц быдырты, ныссадзынц сӕнӕфсирдӕттӕ
      ӕмӕ сын ӕрхӕссынц бирӕ дыргъ.
³⁸ Йӕ арфӕ сыл ӕруадзы, ӕмӕ тынг сбирӕ вӕййынц,
      сӕ фосы нымӕц дӕр сын нӕ цух кӕны.

³⁹ Чысыл куы вӕййы сӕ нымӕц,
      дӕлбарӕй ныллӕггонд ӕфхӕрд ӕмӕ ӕрхӕндӕг,
⁴⁰ Уӕд сын ӕгадмӕ ӕртӕры се 'лдӕртты,
      ныдздзӕгъӕл сӕ кӕны ӕдзӕрӕг, ӕвӕндаг быдырты.
⁴¹ Хъуагӕййафӕджы та ссӕрибар кӕны йӕ зынтӕй,
      фысты дзугау ын сбирӕ кӕны йӕ мыггаг.
⁴² Рӕстгӕнджытӕ уый уынынц ӕмӕ цин кӕнынц,
      алы фыдзӕрдӕйӕн та йӕ бон зӕгъын
      ницыуал вӕййы.

⁴³ Зондджын чи у, уый раиртасӕд адон
      ӕмӕ бамбарӕд Хуыцауы хорзӕх.

107 Псалом

¹ Зарӕг.
      Давиды псалом.

² Мӕ зӕрдӕ цӕттӕ у, Хуыцау;
      зардзӕни мӕ уд ӕмӕ Дӕ стаудзӕни
      зарджыты зӕлтӕй.
³ Райхъал ут, хъисфӕндыр ӕмӕ уадындз!
      Ӕз райхъал кӕндзынӕн сӕуӕхсид.
⁴ Адӕмты ӕхсӕн стаудзынӕн Дӕу, Дунедарӕг;
      зардзынӕн Дыл знӕмты ӕхсӕн.
⁵ Уымӕн ӕмӕ стыр у Дӕ хорзӕх, арвӕй уӕлдӕр,
      Дӕ рӕстад – ӕврӕгъты онг.
⁶ Арвӕй бӕрзонддӕр уӕд дӕ ном, Хуыцау,
      ӕппӕт зӕххыл – Дӕ кад,
⁷ Цӕмӕй ссӕрибар уой, Ды кӕй уарзыс, уыдон.
      Фервӕзын мӕ кӕн Дӕ рахиз цонджы руаджы,
      ратт дзуапп мӕ куывдӕн.

⁸ Хуыцау Йӕ рухс Кувӕндоны загъта:
      «Ӕз фӕуӕлахиз уыдзынӕн, Сихем байуардзынӕн,
      Сокхофы дӕлвӕз дӕр ныддихтӕ кӕндзынӕн,
⁹ Мӕн у Галаад, Мӕн у Манасси,
      Ефрем – Мӕ сӕрӕн згъӕрхуд,
      Иудӕ – Мӕ паддзахы лӕдзӕг.
¹⁰ Моав – Мӕ хихсӕн кӕхц у,
      Едомыл ӕрӕвӕрдзынӕн Мӕ къах,
      филистимаг зӕххыл азӕлдзӕн Мӕ хъӕлӕс».

¹¹ Чи мӕ бакӕндзӕн фидар сахармӕ?
      Чи мӕ бахӕццӕ кӕндзӕн Едоммӕ,
¹² Кӕд уый Ды нӕ уыдзынӕ, Хуыцау,
      Йӕхи ныл чи атигъ кодта
      ӕмӕ не 'фсадимӕ чи нал рацӕуы, уыцы Хуыцау?
¹³ Баххуыс нын кӕн тыхӕвзарӕны,
      уымӕн ӕмӕ адӕймаджы ӕххуыс ницы у.
¹⁴ Хуыцауимӕ фӕуӕлахиз уыдзыстӕм;
      Уый ныссӕнддзӕн не знӕгты Йӕ къӕхты бын.

108 Псалом

¹ Зарӕггӕнджыты разамонӕгмӕ.
      Давиды псалом.

      О Хуыцау, Дӕуӕн кад кӕнын, ма у ӕнӕдзуапп.
² Уымӕн ӕмӕ фыдлӕгтӕ ӕмӕ мӕнгдзурджытӕ
      сластой се 'взаг мӕ ныхмӕ;
      мемӕ кӕнынц фӕлывд ныхас.
³ Ӕртыхстысты мыл се 'фхӕрӕн ныхӕстимӕ;
      лӕбурынц мӕм ӕнӕфсонӕй.
⁴ Мӕ уарзтӕн дзуапп дӕттынц знаггадӕй,
      ӕз та уӕддӕр кувын.
⁵ Мӕ хорз мын фидынц ӕвзӕрӕй,
      мӕ уарзт – фыдӕхӕй.

⁶ Фыдлӕджы дӕлбар бакӕн ме знаджы,
      зылынгӕнӕг ӕрлӕууӕд йӕ рахиз фарс.
⁷ Тӕрхон ын куы хӕссой, уӕд разынӕд азымджын,
      йӕ куывд нымад ӕрцӕуӕд тӕригъӕдыл.
⁸ Йӕ бонтӕ фӕцыбыр уӕд,
      йӕ бынат ын бацахсӕд ӕндӕр.
⁹ Йӕ хъӕбултӕ баззайӕнт сидзӕрӕй,
      йӕ ус – идӕдзӕй.
¹⁰ Йӕ хъӕбултӕ баззайӕнт дзӕгъӕл ӕмӕ мӕгуырӕй,
      курӕг цӕуӕд сӕ хӕдзары пырхӕнтӕй.
¹¹ Цыдӕриддӕр ӕм ис, уый бауӕд
      йе 'фстаудӕттӕджы,
      ӕцӕгӕлӕттӕ йын фӕхӕссӕнт
      йӕ цӕнгты фӕллӕйттӕ.
¹² Батӕригъӕдгӕнӕг ын мачи уӕд,
      йӕ сидзӕртӕн рӕвдауӕг ма разынӕд.
¹³ Йӕ байзӕддаг фӕцагъды уӕд,
      фӕстагӕтты ӕхсӕн сӕ ном фесӕфӕд.
¹⁴ Хуыцау ын ӕрымысӕд йӕ фыдӕлты азымтӕ,
      йӕ мады тӕригъӕд ӕхсад ма 'рцӕуӕд.
¹⁵ Сӕ тӕригъӕдтӕ иудадзыг уӕнт
      Дунедарӕджы цӕсты раз,
      зӕххыл фыдлӕгтӕн сӕ кой дӕр куыд фесафа.

¹⁶ Йӕ зӕрды кӕй нӕ уыди хорзӕх кӕнын,
      фӕлӕ мӕгуыр, ӕфхӕрд ӕмӕ зӕрдӕсаст
      адӕймаджы фӕдыл йӕ амарынмӕ кӕй зылди,
      уый тыххӕй.
¹⁷ Уарзта ӕлгъитын – ӕмӕ йӕхиуыл ӕрцӕуӕд;
      нӕ йӕ бафӕндыд арфӕдзинад –
      ӕмӕ дзы уый адард уӕд.
¹⁸ Ӕлгъыстӕй йӕхи фӕлыста дарӕсау,
      уӕдӕ донау ацӕуӕд йӕ хуылфы,
      зетийау – йе стджыты.
¹⁹ Ӕмӕ йыл ӕртыхсӕд уӕлӕдарӕсау,
      кӕддӕриддӕр йӕ астӕуыл баст ронау.
²⁰ Ахӕм уӕд сӕ мызд Дунедарӕгӕй
      мӕ ныхмӕлӕуджытӕн,
      мӕ уды фыдгой чи кодта, уыдонӕн.

²¹ Мӕныл та, мӕ Хицау Хуыцау,
      Ды бацауд Дӕ номы сӕраппонд;
      Дӕ хорзӕх фӕрнджын у – фервӕзын мӕ кӕн.
²² Уымӕн ӕмӕ ӕз ӕфхӕрд ӕмӕ мӕгуыр дӕн,
      мӕ зӕрдӕ мӕ риуы фӕцӕф.
²³ Ӕз тайын изӕры аууонау;
      мӕтых куыд риза, афтӕ ризын.
²⁴ Мӕ уӕрджытӕ слӕмӕгъ сты комдардӕй,
      мӕ буар сфӕлахс и сойцухӕй.
²⁵ Сдӕн сын хынджылӕггаг;
      мӕн фенгӕйӕ сӕ сӕртӕ фӕтилынц.

²⁶ Баххуыс мын кӕн, Дунедарӕг, мӕ Хуыцау;
      Ды уарзӕгой дӕ, ӕмӕ фервӕзын кӕн мӕн.
²⁷ Уадз базоной – уый Дӕ ӕрмдзӕф у,
      уый Ды бакодтай, Дунедарӕг.
²⁸ Уыдон кӕд ӕлгъитынц,
      уӕддӕр Ды арфӕ кӕндзынӕ,
      кӕд ныхмӕ рацӕуынц,
      уӕддӕр фегад уыдзысты;
      Дӕ цагъар та сцин кӕндзӕни.
²⁹ Фӕлыстау сын уыдзӕни фидисы ном
      мӕ ныхмӕлӕуджытӕн,
      худинаг сыл ӕрбатыхсдзӕни пӕлӕзау.

³⁰ Ӕз та зӕрдӕбынӕй ӕппӕлдзынӕн Дунедарӕгӕй,
      стаудзынӕн Ӕй стыр ӕмбырды ӕхсӕн.
³¹ Уымӕн ӕмӕ Уый мӕгуырӕн йӕ рахиз фарс лӕууы,
      цӕмӕй йӕ фервӕзын кӕна,
      мӕлӕты тӕрхон ын чи хӕссы, уыдонӕй.

109 Псалом

¹ Давиды псалом.

      Хуыцау загъта мӕ Хицауӕн:
      «Сбад Мӕ рахиз фарс, цалынмӕ Де знӕгты
      Дӕ къӕхтӕн бынӕн ӕрӕвӕрон, уӕдмӕ».

² Хуыцау Дын хъомысы барлӕдзӕг арвитдзӕн
      Сионӕй,
      ӕмӕ ӕлдариуӕг кӕндзынӕ Де 'ппӕт знӕгтыл.
³ Дӕ тохы бон Дӕ адӕм ӕмвӕндӕй уыдзысты Демӕ;
      Дӕ бӕрзонд кады рухс – сӕуӕхсиды райгуырдӕй,
      Ды йӕ райстай сӕууон ӕртӕхау Дӕ ӕрыгонӕй.

⁴ Дунедарӕг расомы кодта,
      ӕмӕ Йӕ сомы нӕ басӕтдзӕн:
      «Ды Мелхиседекы хуызӕн Алчер дӕ мыггагмӕ».

⁵ Дунедарӕг – Дӕ рахиз фарс;
      Йӕ азары бон ныппырх кӕндзӕн паддзӕхты.
⁶ Адӕмтӕн рахӕсдзӕн тӕрхон,
      мӕрдтӕй байдзаг кӕндзӕн бӕстӕ,
      ӕппӕт зӕххыл ныппырх кӕндзӕн хицӕутты.

⁷ Фӕндагыл нуаздзӕни доны ивылӕнӕй,
      уымӕ гӕсгӕ Йын сбӕрзонд кӕндзӕни Йӕ кад.

110 Псалом

¹ Алилуйа!

      Стаудзынӕн Дӕ, Дунедарӕг, ӕппӕт зӕрдӕйӕ
      рӕстгӕнджыты ӕхсӕн ӕмӕ адӕмы ӕмбырды.

² Диссаг сты Хуыцауы хъуыддӕгтӕ,
      ӕхцон сты, чи сӕм бӕллы, уыдонӕн.
³ Йӕ хъуыддӕгтӕ – стырад ӕмӕ кад,
      йӕ рӕстдзинад цӕры мыггагмӕ.
⁴ Ӕнӕферохгӕнгӕ скодта Уый Йӕ диссӕгтӕ;
      хӕрзгӕнӕг ӕмӕ фӕлмӕнзӕрдӕ у Дунедарӕг.
⁵ Чи Йӕ нымайы, уыдонӕн дӕтты хойраг;
      Йӕ фӕдзӕхст Дзы мыггагмӕ дӕр нӕ рох кӕны.
⁶ Йӕ хъуыддӕгты Йӕ тых равдыста Йӕ адӕмӕн,
      муртатты зӕхх сын бынтӕн куы радта, уӕд.
⁷ Йӕ армӕй сконд – ӕнувыд ӕмӕ раст тӕрхон,
      Йӕ уынаффӕтӕ се 'ппӕт дӕр сты ӕцӕг.
⁸ Фидаргонд сты мыггагмӕ,
      арӕзт сты ӕнувыддзинад ӕмӕ рӕстадӕй.
⁹ Уый Йӕ адӕмӕн рарвыста ирвӕзындзинад;
      Йӕ фӕдзӕхст снысан кодта мыггагмӕ –
      сыгъдӕг ӕмӕ тасӕфтауӕг у Йӕ ном.

¹⁰ Хуыцауы тас зонды гуырӕн у;
      Йӕ фӕдзӕхстытӕ ӕххӕстгӕнджытӕн раст зонд ис.
      Кад уӕд Уымӕн мыггагмӕ!

111 Псалом

¹ Алилуйа!

      Тӕхудиаг у уыцы адӕймаг, Хуыцауӕй чи тӕрсы,
      Уый фӕдзӕхстытӕ тынг ӕхцон кӕмӕн сты.
² Тыхджын уыдзысты зӕххыл йӕ байзӕддаг,
      арфӕгонд уыдзысты йӕ фӕстагӕттӕ.
³ Йӕ хӕдзары – бӕркад ӕмӕ хъӕздыгад,
      йӕ рӕстдзинад цӕрдзӕни мыггагмӕ.
⁴ Рӕстгӕнӕгӕн талынджы скӕсы рухс,
      уый рӕдау, фӕлмӕнзӕрдӕ ӕмӕ хатыргӕнаг у.
⁵ Фӕрнджын у фӕлмӕнзӕрдӕ
      ӕмӕ ӕфстау дӕттӕг адӕймаг;
      йӕ алы хъуыддаг дӕр аразы рӕстӕй,
⁶ Мыггагмӕ дӕр нӕ фӕцуддзӕни;
      рӕстгӕнӕг мыггагмӕ дӕр никуы уыдзӕн рох.
⁷ Нӕ фӕтӕрсдзӕн фыдцауӕй – фидар у йӕ зӕрдӕ,
      уымӕн ӕмӕ йӕ ныфс Хуыцауыл ӕвӕры.
⁸ Ӕдас у йӕ зӕрдӕ,
      йе знӕгты фендӕй никуы фӕтӕрсдзӕн.
⁹ Цы йӕм уыди, уый бахардз кодта,
      байуӕрста мӕгуыртӕн;
      Йӕ рӕстдзинад цӕрдзӕн мыггагмӕ;
      йӕ кад уыдзӕни бӕрзонд.

¹⁰ Фыдлӕг уый куы фена,
      уӕд мастӕй байдзаг уыдзӕни,
      цӕудзӕн йӕ дӕндӕгты хъыррыст, баруайдзӕн.
      Фыдлӕгты фӕндтӕ се 'ппӕт дӕр фехӕлдзысты.

112 Псалом

¹ Алилуйа!

      Ӕппӕлут Дунедарӕгӕй, Йӕ цагъартӕ,
      ӕппӕлут Дунедарӕджы номӕй.
² Арфӕгонд уӕд Дунедарӕджы ном абон дӕр
      ӕмӕ мыггагмӕ дӕр.
³ Скӕсӕнӕй ныгуылӕнмӕ скадджын уӕд
      Хуыцауы ном.

⁴ Бӕрзонд у ӕппӕт адӕмты сӕрмӕ Хуыцау,
      Йӕ кад арвӕй уӕлдӕр у.
⁵ Чи уыдзӕн Дунедарӕджы, нӕ Хуыцауы хуызӕн,
      Йӕ паддзахы бадӕн бӕрзонд кӕмӕн у,
⁶ Чи баввӕрсы арв ӕмӕ зӕххыл ӕмӕ сӕм Чи ӕркӕсы?!

⁷ Мӕгуыры сисы зӕххы рыгӕй,
      гӕвзыччы сласы фӕныкӕй,
⁸ Цӕмӕй йӕ сбадын кӕна адӕмы уӕздӕттимӕ,
      Йӕ адӕмы уӕздӕттимӕ.
⁹ Ӕнӕзӕнӕг хӕдзары сылгоймаджы скӕны мад –
      йӕ хъӕбултыл цингӕнӕг.

      Алилуйа!

113 Псалом

¹ Израил куы рацыд Мысырӕй,
      Иаковы хӕдзарвӕндаг – ӕцӕгӕлон ӕвзагыл дзурӕг адӕмӕй,
² Уӕд Иудӕ сси Хуыцауӕн сыгъдӕг,
      Израил – Йӕ исбон.

³ Денджыз уый куы федта, уӕд лидзынмӕ фӕци;
      Иорданы цӕугӕдон фӕстӕрдӕм фӕцыд.
⁴ Хӕхтӕ гӕппытӕ кодтой фырытау,
      обӕуттӕ – уӕрыччытау.

⁵ Цы дыл ӕрцыд, денджыз, лидзынмӕ цы фӕдӕ,
      ӕмӕ дӕуыл, Иордан, фӕстӕрдӕм цы фӕцыдтӕ?
⁶ Цы гӕппытӕ кӕнут, фырытау, хӕхтӕ,
      уӕрыччытау – обӕуттӕ?

⁷ Бариз, зӕхх, Дунедарӕджы цӕсгомы раз,
      Иаковы Хуыцауы цӕсгомы раз.
⁸ Дунедарӕг къӕдзӕх фестын кӕны цад,
      айнӕг – доны гуырӕн.

⁹ Мах нӕ, Дунедарӕг, мах нӕ,
      фӕлӕ Дӕ ном скадджын кӕн,
      уымӕн ӕмӕ ӕнӕкӕрон у Дӕ уарзт
      ӕмӕ Дӕ иузӕрдиондзинад.
¹⁰ Цӕмӕн хъуамӕ дзурой муртаттӕ:
      «Кӕм ис, уӕдӕ, сӕ Хуыцау?»
¹¹ Нӕ Хуыцау уӕлӕрвты ис;
      ӕмӕ Йӕ цыдӕриддӕр фӕнды, уый кӕны.

¹² Уыдонӕн та сӕ гуымирытӕ –
      ӕвзист ӕмӕ сызгъӕрин –
      адӕймаджы къухтӕй конд.
¹³ Ис сын дзыхтӕ, фӕлӕ дзурын нӕ зонынц;
      ис сын цӕстытӕ, фӕлӕ нӕ уынынц.
¹⁴ Ис сын хъустӕ, фӕлӕ нӕ хъусынц;
      ис сын фындзтӕ, фӕлӕ не 'мбудынц.
¹⁵ Ис сын къухтӕ, фӕлӕ уырзӕй не 'нкъарынц;
      ис сын къӕхтӕ, фӕлӕ цӕуын нӕ зонынц;
      ис сын хъуыртӕ, фӕлӕ сӕ уынӕр нӕ райхъуысы.
¹⁶ Чи сӕ аразы ӕмӕ сыл йӕ зӕрдӕ чи дары,
      уыдон дӕр уыцы гуымирытӕй уӕлдай не сты.
¹⁷ Израилы адӕм!
      Уӕ зӕрдӕ дарут Дунедарӕгыл –
      Уый у не 'ххуысгӕнӕг ӕмӕ нӕ уарт.
¹⁸ Аароны хӕдзарвӕндаг!
      Уӕ зӕрдӕ дарут Дунедарӕгыл –
      Уый у не 'ххуысгӕнӕг ӕмӕ уарт.
¹⁹ Дунедарӕгӕй чи тӕрсы, уыдон!
      Уӕ зӕрдӕ дарут Дунедарӕгыл –
      Уый у не 'ххуысгӕнӕг ӕмӕ уарт.

²⁰ Дунедарӕг нӕ рох кӕны мах,
      арфӕ нын кӕндзӕни:
      арфӕ кӕндзӕни Израилы хӕдзарыл,
      арфӕ кӕндзӕни Аароны хӕдзарыл.
²¹ Арфӕ кӕндзӕн, Дунедарӕджы чи нымайы,
      уыдонӕн стырӕй-чысылӕй.

²² Дунедарӕг уӕ скӕнӕд фылдӕрӕй-фылдӕр –
      сымах дӕр ӕмӕ уӕ цоты дӕр.
²³ Арфӕгонд стут сымах арв ӕмӕ зӕхх
      сфӕлдисӕг Хуыцауӕй.

²⁴ Уӕлӕрвтӕ – Хуыцауы сты уыдон,
      зӕхх та радта Уый лӕджы фырттӕн.
²⁵ Мӕрдтӕ нӕ кад кӕндзысты Дунедарӕгӕн,
      нӕдӕр ӕнӕсым ингӕнмӕ цӕуджытӕ;
²⁶ Мах та стаудзыстӕм Дунедарӕджы,
      абон дӕр ӕмӕ мыггагмӕ.

      Алилуйа!

114 Псалом

¹ Ӕз уарзын Дунедарӕджы,
      Уый фехъуыста мӕн,
      дзуапп радта мӕ лӕгъстӕйӕн.
² Айста мӕ кувын, ӕмӕ Йын ардзынӕн Йӕ ном
      мӕ цӕргӕбонты.

³ Ӕртыхстысты мыл мӕлӕты бӕндӕнтӕ,
      фыдохы азар мӕ ӕрсырдта мӕ тыхсты бон,
      фыдбылыз мӕ баййӕфта.
⁴ Уӕд Хуыцаумӕ Йӕ номӕй сдзырдтон,
      балӕгъстӕ Йын кодтон:
      «Хуыцау, бахиз мын мӕ уды».

⁵ Рӕдау ӕмӕ рӕстаг у,
      фӕлмӕнзӕрдӕ у нӕ Хуыцау.
⁶ Дунедарӕг хъахъхъӕны ӕнӕхинты –
      ӕдых уыдтӕн ӕмӕ мӕ фервӕзын кодта.

⁷ Ӕрбаздӕх, мӕ уд, Де 'нцой бынатмӕ –
      Дунедарӕг хорзы бацыди дӕуӕн.

⁸ Ды мӕ уды бахызтай мӕлӕтӕй,
      мӕ цӕстытӕ – цӕссыгӕй,
      мӕ къӕхтӕ – фӕкӕлынӕй,
⁹ Цӕмӕй ӕз Хуыцауы раз
      цӕуон царды зӕххыл.

115 Псалом

¹ Ӕз фидарӕй ӕууӕндыдтӕн Хуыцауыл,
      «тынг ӕфхӕрд дӕн» куы дзырдтон, уӕд дӕр.
² Ӕмӕ мӕ тыхстӕй загътон:
      «Алы адӕймаг дӕр мӕнгард у».

³ Цӕмӕй бафиддзынӕн Хуыцауӕн Йӕ бирӕ хӕрзтӕ?
⁴ Хуыцауӕй ирвӕзындзинады кӕхц райсдзынӕн
      ӕмӕ Йӕ ном ссардзынӕн.
⁵ Дунедарӕгӕн дзырд цӕй тыххӕй радтон,
      уый ӕппӕт адӕмы раз сӕххӕст кӕндзынӕн.
⁶ Хуыцауы цӕсты тынг ахадгӕ у
      Йӕ сыгъдӕджыты мӕлӕт.
⁷ О Дунедарӕг! Дӕ цагъар дӕн ӕз, Дӕ цагъар дӕн
      ӕмӕ Дӕ цагъар сылгоймаджы хъӕбул;
      Ды мӕ суӕгъд кодтай рӕхыстӕй.

⁸ Дӕуӕн ӕрхӕсдзынӕн бузныджы нывонд
      ӕмӕ ссардзынӕн Хуыцауы ном.
⁹ Дунедарӕгӕн дзырд цӕй тыххӕй радтон,
      уый ӕппӕт адӕмы раз сӕххӕст кӕндзынӕн,
¹⁰ Хуыцауы Кувӕндоны кӕртыты,
      дӕ бӕстастӕу, Иерусалим!

      Алилуйа!

116 Псалом

¹ Стаут Дунедарӕджы, ӕппӕт адӕмтӕ,
      кад Ын кӕнут, ӕппӕт адӕмыхӕттытӕ.
² Уымӕн ӕмӕ стыр у Йӕ хорзӕх махмӕ,
      Дунедарӕг иузӕрдион у мыггагмӕ.

      Алилуйа!

117 Псалом

¹ Стаут Дунедарӕджы, уымӕн ӕмӕ Уый
      фӕрнджын у,
      Йӕ хорзӕх мыггагмӕ у.

² Уӕдӕ зӕгъӕд Израил:
      «Йӕ хорзӕх мыггагмӕ у».
³ Уӕдӕ зӕгъӕд Аароны хӕдзарвӕндаг:
      «Йӕ хорзӕх мыггагмӕ у».
⁴ Уӕдӕ зӕгъӕнт, Хуыцауӕй чи тӕрсы, уыдон:
      «Йӕ хорзӕх мыггагмӕ у».
⁵ Мӕ тыхстӕй сдзырдтон Дунедарӕгмӕ;
      Уый мӕ фехъуыста, мӕ цӕуӕнтӕ мын скодта
      уӕрӕх.
⁶ Хуыцау мемӕ ис, нӕ фӕтӕрсдзынӕн:
      цы мын у адӕймаджы бон?
⁷ Хуыцау мемӕ ис, Уый ме 'ххуысгӕнӕг у.
      Ӕз кӕсдзынӕн ме знӕгтӕм мӕ цӕстыдзагӕй.
⁸ Адӕймагӕй ныфс ӕвӕрыны бӕсты
      Хуыцауӕй ӕххуыс агурын хуыздӕр у.
⁹ Ӕлдӕрттӕй ныфс ӕвӕрыны бӕсты
      Хуыцауӕй ӕххуыс агурын хуыздӕр у.

¹⁰ Ӕртыхстысты мыл ӕппӕт адӕмтӕ,
      фӕлӕ сӕ ӕз Хуыцауы номӕй фӕсырдтон.
¹¹ Ӕрӕмбырд мыл сты, ӕртыхстысты мыл,
      фӕлӕ сӕ ӕз Хуыцауы номӕй фӕсырдтон.
¹² Цӕваг бындзытау мыл ӕртыхстысты,
      фӕлӕ бамынӕг сты сындзджын артау;
      Хуыцауы номӕй сӕ фӕсырдтон.
¹³ Тынг мӕ асхуыстат, куыд ӕрхауон, афтӕ;
      фӕлӕ мын Хуыцау баххуыс кодта.
¹⁴ Дунедарӕг – мӕ тых ӕмӕ мӕ зарӕг;
      Уый сси мӕ ирвӕзынгӕнӕг.

¹⁵ Рӕстгӕнджыты хӕдзӕрттӕй хъуысы
      уӕлахиз ӕмӕ цины уынӕр:
      «Хуыцау ӕвдисы Йӕ рахиз цонджы тых!
¹⁶ Дунедарӕджы рахиз цонджы уӕлахиз бӕрзонд у;
      Хуыцау ӕвдисы Йӕ рахиз цонджы тых!»

¹⁷ Нӕ амӕлдзынӕн, фӕлӕ цӕрдзынӕн
      ӕмӕ хъусын кӕндзынӕн Хуыцауы хъуыддӕгтӕ.
¹⁸ Карз мӕ бафхӕрдта Хуыцау,
      фӕлӕ мӕ мӕлӕтмӕ нӕ радта.

¹⁹ Байгом мын кӕнут рӕстады кулдуар –
      бацӕудзынӕн ӕмӕ скад кӕндзынӕн Хуыцауӕн.
²⁰ Уый Хуыцауы кулдуар у –
      рӕстгӕнджытӕ бацӕудзысты уыцы кулдуарыл.
²¹ Бузныг дӕн Дӕуӕй, Ды мӕ кӕй фехъуыстай;
      Ды сдӕ мӕ ирвӕзындзинад.

²² Амайджытӕ сӕхи цы дурыл атигъ кодтой,
      уый сси сӕрӕвӕрӕн.
²³ Уый Хуыцауӕй уыди, ӕмӕ диссаг кӕсы махмӕ.
²⁴ Абоны бон Хуыцау сфӕлдыста;
      хъӕлдзӕг уӕм ӕмӕ йыл цин кӕнӕм.

²⁵ О Дунедарӕг, фервӕзын нӕ кӕн;
      О Хуыцау, ратт нын ӕнтыст.
²⁶ Арфӕгонд у Хуыцауы номӕй ӕрцӕуӕг!
      Арфӕ уын кӕнӕм Хуыцауы Хӕдзарӕй.
²⁷ Хуыцау у Дунедарӕг, срухс нӕ кодта Йӕ тӕмӕнӕй.
      Сбӕттут бӕттӕнтӕй бӕрӕгбоны кусӕрттаджы,
      ракӕнут ӕй нывондхӕссӕны сыкъатӕм хӕстӕг.

²⁸ Ды мӕ Хуыцау дӕ – стаудзынӕн дӕ;
      Ды мӕ Хуыцау дӕ –
      бӕрзонд скӕндзынӕн Дӕ кад.

²⁹ Стаут Дунедарӕджы, уымӕн ӕмӕ Уый
      фӕрнджын у,
      Йӕ хорзӕх мыггагмӕ у.

118 Псалом

¹ Тӕхудиаг сты уыдон,
      йӕ цардвӕндаг ӕнаипп кӕмӕн у,
      Хуыцауы ӕгъдаумӕ гӕсгӕ чи цӕры.
² Тӕхудиаг сты уыдон,
      Хуыцауы уагӕвӕрдтӕ чи 'ххӕст кӕны,
      ӕппӕт зӕрдӕйӕ Уый чи агуры.
³ Уыдон фыдми нӕ ракӕнынц,
      фӕлӕ цӕуынц Хуыцауы фӕндагыл.
⁴ Ды бафӕдзӕхстай Дӕ амындтӕ,
      цӕмӕй сӕ кӕронмӕ ӕххӕст кӕнӕм.
⁵ О, куы цӕуин ӕз Дӕ фӕндӕгтыл,
      цӕмӕй Дӕ уагӕвӕрдтӕ ӕххӕст кӕнон!
⁶ Уӕд нӕ фегад уаин,
      куы исин мӕхимӕ Де 'ппӕт фӕдзӕхстытӕ.
⁷ Стаудзынӕн Дӕ раст зӕрдӕйӕ,
      Дӕ ӕнӕхӕрам уынаффӕтыл ахуыр кӕнгӕйӕ.
⁸ Дӕ уагӕвӕрдтӕн уыдзынӕн коммӕгӕс;
      ӕрмӕст мӕ ма ныууадз бынтон!

⁹ Куыд бавӕра ӕвзонг лӕппу йӕ цардвӕндаг
      сыгъдӕгӕй? –
      Дӕ ныхасмӕ гӕсгӕ цӕргӕйӕ.
¹⁰ Агурын Дӕ ӕппӕт зӕрдӕйӕ;
      ма бауадз мӕн Дӕ фӕдзӕхстытӕй аздӕхын.
¹¹ Ӕз мӕ зӕрдӕйы рӕбын дарын Дӕ ныхас,
      цӕмӕй Дӕ разы тӕригъӕд ма аразон.
¹² Арфӕгонд дӕ Ды, Дунедарӕг;
      бацамон мын Дӕ уагӕвӕрдтӕ.
¹³ Ӕргомӕй хъусын кӕндзынӕн
      Дӕуӕй рацӕугӕ ӕппӕт уынаффӕтӕ.
¹⁴ Цыфӕнды хӕзнайӕ мын стырдӕр цин хӕссы
      Дӕ уынаффӕты фӕндагыл цӕуын.
¹⁵ Мӕ хъуыдытӕ сты Дӕ фӕдзӕхстытыл;
      цӕуын Дӕ амынд фӕндагыл.
¹⁶ Дӕ уагӕвӕрдтӕ мын ӕхсызгон сты,
      Дӕ ныхас нӕ рох кӕнын.

¹⁷ Дӕ хорзӕх ӕруадз Дӕ цагъарыл, ӕмӕ цӕрдзынӕн;
      ӕххӕст кӕндзынӕн Дӕ ныхас.
¹⁸ Байгом кӕн мӕ цӕстытӕ,
      ӕмӕ фендзынӕн диссӕгтӕ Дӕ фӕдзӕхстыты.
¹⁹ Ӕз зӕххыл фӕндаггон дӕн,
      ма бамбӕхс мӕнӕй Дӕ уынаффӕтӕ.
²⁰ Мӕ уд бастади ӕдзух Дӕ раст тӕрхонмӕ бӕлгӕйӕ.
²¹ Ды бауайдзӕф кодтай хъалтӕн;
      уыдон ӕлгъыст сты –
      Дӕ фӕдзӕхстытӕй аздӕхтысты.
²² Аиуварс кӕн мӕнӕй ӕгад ӕмӕ худинаг,
      уымӕн ӕмӕ ӕз Дӕ уынаффӕтӕм гӕсгӕ цӕрын.
²³ Кӕд ӕлдӕрттӕ бадынц ӕмӕ тӕрхӕттӕ кӕнынц
      мӕ ныхмӕ,
      уӕддӕр Дӕ цагъары хъуыдытӕ
      Дӕ уагӕвӕрдтыл сты.
²⁴ Дӕ уынаффӕтӕ мын ӕхсызгон сты,
      уыдон мын – ӕгас зондамонджытӕ.

²⁵ Зӕххы рыг ӕмвӕз сси мӕ уд;
      райгас мӕ кӕн Дӕ ныхасмӕ гӕсгӕ.
²⁶ Ӕз радзырдтон мӕ цардвӕндӕгты тыххӕй,
      ӕмӕ мӕ Ды фехъуыстай;
      бацамон мын Дӕ уагӕвӕрдтӕ.
²⁷ Бамбарын мын кӕн Дӕ уынаффӕты фӕндаг,
      ӕмӕ уӕд мӕ хъуыдытӕ Дӕ диссаг хъуыддӕгтыл
      уыдзысты.
²⁸ Мӕты бацыди мӕ уд;
      сфидар мӕ кӕн Дӕ ныхасмӕ гӕсгӕ.
²⁹ Аиуварс мӕ кӕн мӕнг фӕндагӕй;
      батӕригъӕд мын кӕн Дӕ ныхасмӕ гӕсгӕ.
³⁰ Ӕз равзӕрстон ӕцӕгады фӕндаг,
      ӕмӕ мӕ цӕстӕнгас сарӕзтон Дӕ рӕстдзинадмӕ.
³¹ Ӕз фидар хӕцын Де 'гъдӕуттыл,
      О Дунедарӕг, ма мӕ ратт ӕгадмӕ.
³² Ӕз згъордзынӕн Дӕ фӕдзӕхст фӕндагыл;
      Ды мӕ зӕрдӕйӕн уӕрӕх ӕмбарынад дӕттыс.

³³ Сахуыр мӕ кӕн, О Дунедарӕг,
      Дӕ уагӕвӕрдты фӕндагыл лӕууын,
      ӕмӕ йыл ӕз кӕронмӕ цӕудзынӕн.
³⁴ Зонд мын бацамон, ӕмӕ ӕххӕст кӕндзынӕн
      Де 'гъдау,
      ӕмӕ йын ӕппӕт зӕрдӕйӕ уыдзынӕн коммӕгӕс.
³⁵ Бафтау мӕ Дӕ фӕдзӕхстытӕ ӕххӕст кӕныныл,
      уымӕн ӕмӕ мӕ зӕрдӕйӕн уыцы фӕндаг ӕхцон у.
³⁶ Мӕ зӕрдӕ аздах хипайдамӕ нӕ,
      фӕлӕ Дӕ уынаффӕтӕм.
³⁷ Аздах мӕ цӕстӕнгас цӕмӕй ма уынон,
      мӕнг цы у, уый;
      сног мын кӕн мӕ цард Дӕ фӕндагыл.
³⁸ Дӕ цагъарӕн Дӕ зӕрдӕвӕрд сӕххӕст кӕн,
      цӕмӕй Дӕ ӕндӕртӕ дӕр нымайой.
³⁹ Цы ӕгадӕй тӕрсын уый аиуварс кӕн мӕнӕй;
      куыд фӕрнджын сты Дӕ уынаффӕтӕ!
⁴⁰ О, куыд бӕллын ӕз дӕ амындтытӕм;
      сног мын кӕн мӕ цард Дӕ рӕстдзинадӕй.

⁴¹ Уадз мӕн баййафӕд Де 'нӕаивгӕ уарзт, Дунедарӕг
      ӕмӕ мын фервӕзынӕй цы ныфс ӕвӕрдтай, уый.
⁴² Ӕмӕ ӕз дзуапп ратдзынӕн мӕ фыдгойгӕнӕгӕн,
      уымӕн ӕмӕ Дӕ ныхасыл дарын мӕ зӕрдӕ.
⁴³ Бынтон ӕнӕхай ма фӕкӕн мӕн
      Де 'цӕгады ныхас дзурынӕй,
      уымӕн ӕмӕ мӕ зӕрдӕ Дӕ рӕстдзинадыл дарын,
⁴⁴ Ӕмӕ ӕз Де 'гъдауыл хӕцдзынӕн кӕддӕриддӕр
      ӕмӕ мыггагӕй-мыггагмӕ.
⁴⁵ Мӕ къахайст уыдзӕни уӕрӕх,
      уымӕн ӕмӕ ӕз Дӕ уынаффӕтӕ бацагуырдтон.
⁴⁶ Паддзӕхты раз дзурдзынӕн Дӕ уагӕвӕрдты тыххӕй
      ӕмӕ нӕ фефсӕрмы уыдзынӕн.
⁴⁷ Мӕнӕн ӕхцон сты Дӕ фӕдзӕхстытӕ,
      уымӕн ӕмӕ ӕз бауарзтон уыдон.
⁴⁸ Бӕрзонд хӕсдзынӕн Дӕ фӕдзӕхстытӕ –
      уыдон бауарзтон ӕз,
      мӕ хъуыдытӕ уыдзысты Дӕ уагӕвӕрдтыл.

⁴⁹ Ӕрымыс, Дӕ цагъарӕн ныфсӕвӕрынӕн
      цы дзырд радтай, уый.
⁵⁰ Дӕ ныхас мӕ раздахы цардмӕ,
      мӕ хъыгты мын дӕтты рӕвдыд.
⁵¹ Хъалтӕ мӕ тынг ӕфхӕрдтой,
      фӕлӕ ӕз Дӕ уагӕвӕрдтӕй нӕ аздӕхтӕн.
⁵² Мӕ зӕрдыл дарын Дӕ ӕнусон фӕдзӕхстытӕ,
      О Дунедарӕг,
      ӕмӕ сӕ исын рӕвдыд.
⁵³ Маст мын ме уӕнгтӕ сбӕтты,
      Дӕ уагӕвӕрдтӕ ныууадзӕг фыдгӕнджыты
      куы фенын, уӕд.
⁵⁴ Кӕмдӕриддӕр цардтӕн, уым мын
      Дӕ фӕдзӕхстытӕ уыдысты мӕ зарӕджы сӕр.
⁵⁵ Ӕхсӕвыгӕтты-иу ӕрымысыдтӕн Дӕ ном,
      О Дунедарӕг,
      ӕмӕ мӕ зӕрдыл дардтон Дӕ уынаффӕтӕ.
⁵⁶ Уый сси мӕнӕн ӕгъдау –
      цӕрын Дӕ уагӕвӕрдтӕм гӕсгӕ.

⁵⁷ О Дунедарӕг, Ды дӕ мӕ Хуыцауы хай;
      ӕз загътон: ӕххӕст кӕндзынӕн Дӕ ныхӕстӕ.
⁵⁸ Ӕппӕт зӕрдӕйӕ агурын Дӕ хорз цӕстӕнгас;
      батӕригъӕд мын кӕн
      Дӕ зӕрдӕвӕрдмӕ гӕсгӕ.
⁵⁹ Ӕз хъуыды кодтон мӕ фӕндӕгтыл
      ӕмӕ мӕ къахдзӕфтӕ сарӕзтон Дӕ амындтытӕм.
⁶⁰ Ӕз тагъд кодтон, фӕстӕ нӕ лӕууыдтӕн
      Дӕ фӕдзӕхстытӕ ӕххӕст кӕнынӕй.
⁶¹ Фыдлӕгты сахсӕнтӕ – мӕ алыварс,
      фӕлӕ ӕз дӕ ныхас нӕ рох кодтон.
⁶² Ӕмбисӕхсӕв-иу сыстадтӕн
      Дӕ раст тӕрхонты тыххӕй
      Дӕуӕн кад скӕнынмӕ.
⁶³ Хӕлар дӕн ӕз, Дӕуӕй чи тӕрсы
      ӕмӕ Дӕ уынаффӕтӕ чи ӕххӕст кӕны,
      ӕппӕт уыдонӕн.
⁶⁴ Де стыр хорзӕхӕй, Хуыцау, ӕмыдзаг у зӕхх;
      бацамон мын Дӕ уагӕвӕрдтӕ.

⁶⁵ Ды хорзы бацыдтӕ Дӕ цагъарӕн, О Дунедарӕг,
      зӕрдӕ куыд бавӕрдтай, афтӕ.
⁶⁶ Бацамон мын хорз зонд ӕмӕ мӕ скӕн ӕмбаргӕ,
      уымӕн ӕмӕ ӕз ӕууӕндын Дӕ фӕдзӕхстытыл.
⁶⁷ Мӕ хъизӕмары агъоммӕ ӕз рӕдыдтӕн,
      ныр та Дӕ ныхасӕн дӕн коммӕгӕс.
⁶⁸ Ды фӕрнджын ӕмӕ фарн тауӕг дӕ;
      бацамон мын Дӕ уагӕвӕрдтӕ.
⁶⁹ Ӕнӕхуыцӕуттӕ мыл ӕндадзынц сӕ мӕнг ныхӕстӕ;
      ӕз та зӕрдиагӕй ӕххӕст кӕндзынӕн
      Дӕ уагӕвӕрдтӕ.
⁷⁰ Сӕ зӕрдӕтыл фырнӕрдӕй схӕцыд фиу,
      мӕнӕн та Дӕ ныхас ӕхцон у.
⁷¹ Хуыздӕрӕн мын уыдысты мӕ хъизӕмӕрттӕ,
      цӕмӕй базонон Дӕ амындтӕ.
⁷² Дӕ комӕй рацӕугӕ фӕдзӕхст мӕнӕн
      мингай сызгъӕрин ӕмӕ ӕвзистӕй хуыздӕр у.

⁷³ Дӕ къухтӕ сфӕлдыстой ӕмӕ снывӕзтой мӕн;
      скӕн мӕ ӕмбаргӕ ӕмӕ базондзынӕн,
      Дӕ фӕдзӕхстытӕ.
⁷⁴ Дӕуӕй чи тӕрсы, уыдон мӕ фендзысты ӕмӕ цин
      кӕндзысты,
      уымӕн ӕмӕ Дӕ ныхасыл мӕ зӕрдӕ дарын.
⁷⁵ Дӕ тӕрхонтӕ раст кӕй сты,
      уый мын зындгонд у, О Дунедарӕг;
      Дӕ иузӕрдионӕй бафхӕрдтай мӕн.
⁷⁶ Уадз Дӕ хорзӕх уӕд мӕ рӕвдауӕг,
      Дӕ цагъарӕн зӕрдӕ куыд бавӕрдтай, афтӕ.
⁷⁷ Ӕрцӕуӕд мыл Дӕ рӕвдыд, ӕмӕ ӕз цӕрдзынӕн,
      уымӕн ӕмӕ Дӕ фӕдзӕхстытӕ ӕхцон сты мӕнӕн.
⁷⁸ Уадз фегад уой хъалтӕ,
      уымӕн ӕмӕ ӕнаххосӕй уынгӕг кӕнынц мӕн;
      мӕ хъуыдытӕ та уыдзысты Дӕ уагӕвӕрдтыл.
⁷⁹ Дӕуӕй чи тӕрсы, Дӕ уынаффӕтӕ чи зоны,
      уыдон раздӕхӕнт мӕнмӕ.
⁸⁰ Уадз ӕмӕ мӕ зӕрдӕ уа ӕнаипп Дӕ амындмӕ гӕсгӕ,
      цӕмӕй ма фегад уон.

⁸¹ Руайы мӕ уд Дӕ ирвӕзындзинадмӕ бӕлгӕйӕ;
      мӕ зӕрдӕ Дӕ ныхасыл дарын.
⁸² Руайынц мӕ цӕстытӕ Дӕ зӕрдӕвӕрӕнмӕ бӕлгӕйӕ,
      ӕмӕ фӕзӕгъын: «Кӕд мӕ барӕвдаудзынӕ?»
⁸³ Лалым фӕздӕгмӕ куыд бампылы, афтӕ сдӕн ӕз,
      фӕлӕ Дӕ уагӕвӕрдтӕ нӕ ферох кодтон.
⁸⁴ Цас ӕнхъӕлмӕ кӕсон ӕз – Дӕ цагъар?
      Кӕд стӕрхон кӕндзынӕ мӕ сурджытӕн?
⁸⁵ Дӕ ӕгъдау ницӕмӕ даргӕйӕ,
      сӕрыстыртӕ мӕнӕн скъахтой уӕрм,
⁸⁶ Мӕ фӕдыл зилынц ӕнаххосӕй;
      баххуыс мын кӕн, уымӕн ӕмӕ
      Де 'ппӕт фӕдзӕхстытӕ ӕцӕг сты.
⁸⁷ Бирӕ сӕ нал хъуыди а-дунейӕ мӕн фесафынмӕ,
      фӕлӕ ӕз Дӕ уагӕвӕрдтӕ нӕ ныууагътон.
⁸⁸ Дӕ хорзӕхы руаджы мын бахиз мӕ цард,
      ӕмӕ ӕххӕст кӕндзынӕн Дӕ комӕй рацӕугӕ
      уынаффӕтӕ.

⁸⁹ Дӕ ныхас, О Дунедарӕг,
      уӕлӕрвты фидаргонд у мыггагмӕ.
⁹⁰ Дӕ иузӕрдиондзинад фӕлтӕрӕй-фӕлтӕрмӕ у;
      Ды ӕрфидар кодтай зӕхх, ӕмӕ лӕууы.
⁹¹ Дӕ уынаффӕмӕ гӕсгӕ нырмӕ лӕууы ӕппӕт дӕр,
      уымӕн ӕмӕ коммӕгӕс сты Дӕуӕн.
⁹² Дӕ ныхасӕй куы нӕ исин рӕвдыд,
      уӕд афонмӕ мӕ хъизӕмӕртты амӕддаг фӕуыдаин.
⁹³ Мыггагмӕ дӕр нӕ ферох кӕндзынӕн
      Дӕ уагӕвӕрдтӕ –
      цард мын уыдоны фӕрцы дӕттыс.
⁹⁴ Ӕз Дӕу дӕн – фервӕзын мӕ кӕн,
      уымӕн ӕмӕ Дӕ амындтытӕ бацагуырдтон.
⁹⁵ Фыдлӕгтӕ цӕттӕйӕ лӕууынц мӕн бабын
      кӕнынмӕ;
      ӕз та арфдӕр хъуыды кӕнын Дӕ уагӕвӕрдтыл.
⁹⁶ Ӕз федтон, алцӕмӕй ӕххӕст цы у,
      ӕппӕт уыдонӕн сӕ кӕрон,
      фӕлӕ Дӕ фӕдзӕхстытӕн кӕрон нӕй.

⁹⁷ Куыд уарзын ӕз Дӕ ныхас! Мӕ хъуыдытӕ
      боны дӕргъы дӕр ууыл вӕййынц.
⁹⁸ Дӕ фӕдзӕхстытӕ мӕ ме знӕгтӕй скодтой
      зондджындӕр,
      уымӕн ӕмӕ кӕддӕриддӕр мемӕ сты.
⁹⁹ Ме 'ппӕт ахуыргӕнджытӕй ӕз фӕзонӕгдӕр дӕн,
      уымӕн ӕмӕ мӕ хъуыдытӕ Дӕ уагӕвӕрдтыл сты.
¹⁰⁰ Ӕмбаргӕдӕр дӕн ӕз кардзыдтӕй,
      уымӕн ӕмӕ Дӕ уынаффӕтӕ ӕххӕст кӕнын.
¹⁰¹ Алы галиу фӕндагыл цӕуынӕй мӕхи хизын,
      цӕмӕй коммӕгӕс уон Дӕ ныхасӕн.
¹⁰² Дӕ уынаффӕтӕй ӕз нӕ аздӕхтӕн,
      уымӕн ӕмӕ Дӕхӕдӕг ахуыр кӕныс мӕн.
¹⁰³ Куыд адджын сты Дӕ ныхӕстӕ мӕ зӕрдӕйӕн!
      Уыдон мӕ дзыхы адджындӕр сты мыдӕй.
¹⁰⁴ Дӕ амындтытӕ мӕ кӕнынц ӕмбаргӕ;
      уымӕ гӕсгӕ мын алы мӕнгдзинады фӕндаг
      ӕнӕуынон у.

¹⁰⁵ Дӕ ныхас – цырагъ мӕ развӕдӕн
      ӕмӕ рухс мӕ фӕндагӕн.
¹⁰⁶ Ӕз дзырд радтон ӕмӕ йӕ сӕххӕст кӕндзынӕн –
      коммӕгӕс уыдзынӕн Дӕ раст уынаффӕтӕн.
¹⁰⁷ Уӕззау ӕфхӕрд бавзӕрстон, О Дунедарӕг,
      сног мын кӕн мӕ цард Дӕ ныхасмӕ гӕсгӕ.
¹⁰⁸ Ӕхцон Дын уӕд, О Хуыцау, мӕ нывонд –
      Дӕуӕй мӕ барвӕндон ӕппӕлд;
      сахуыр мӕ кӕн Дӕ уагӕвӕрдтыл.
¹⁰⁹ Мӕ уд ӕдзух ӕрдуйыл хӕцы тасдзинады,
      фӕлӕ Дӕ ныхас нӕ рох кӕнын.
¹¹⁰ Фыдлӕгтӕ мын сӕвӕрдтой хыз,
      фӕлӕ ӕз Дӕ амындтӕй нӕ адзӕгъӕл дӕн.
¹¹¹ Дӕ уагӕвӕрдтӕ райстон бынтӕн мыггагмӕ –
      уыдон сты мӕ зӕрдӕйы цин.
¹¹² Ӕз мӕ зӕрдӕ радтон Дӕ фӕдзӕхстытӕ ӕххӕст
      кӕнынмӕ,
      мыггагмӕ, мӕ царды кӕронмӕ.

¹¹³ Дыууӕ зондыл хӕст чи у,
      ахӕм адӕймаг мын ӕнӕуынон у,
      Дӕ ӕгъдау та уарзын.
¹¹⁴ Ды мӕ хъахъхъӕнӕг ӕмӕ мӕ уарт дӕ;
      Дӕ ныхасыл дарын мӕ зӕрдӕ.
¹¹⁵ Аиуварс ут мӕнӕй, фыдгӕнджытӕ, ӕз та
      мӕ Хуыцауы фӕдзӕхстытӕм гӕсгӕ цӕрдзынӕн.
¹¹⁶ Сфидар мӕ кӕн Дӕ ныхасмӕ гӕсгӕ,
      ӕмӕ цӕрдзынӕн;
      ныфс цӕмӕй ӕвӕрын, уымӕй мӕ фыдӕнхъӕл
      ма фӕкӕн.
¹¹⁷ Ратт мын тых ӕмӕ фервӕздзынӕн;
      ӕдзух ахуыр кӕндзынӕн Дӕ уагӕвӕрдтӕ.
¹¹⁸ Дӕ уагӕвӕрдтӕ чидӕриддӕр ныууадзы,
      уыдоныл Дӕхи атигъ кӕныс,
      уымӕн ӕмӕ сӕ хинвӕндтӕ мӕнгард сты.
¹¹⁹ Ды дунейы ӕппӕт фыдлӕгты амӕрзыс,
      чи нызгӕ ӕмӕ ныссыгъд,
      уыцы ӕфсӕн быгъуыйау.
      Уымӕ гӕсгӕ мын зынаргъ сты Дӕ уынаффӕтӕ.
¹²⁰ Дӕ азарӕй ризы мӕ буар,
      тас мыл ӕфтауынц Дӕ тӕрхонтӕ.

¹²¹ Ӕз арӕзтон рӕстдзинад ӕмӕ, ӕцӕгад цы у, уый;
      ма мӕ ныууадз мӕ ныхмӕлӕуджыты ӕвджид.
¹²² Дӕ фӕдзӕхст бакӕн Дӕ цагъарӕн йӕ фӕрныгад,
      сӕрыстыртӕ мӕ куыд нӕ ӕфхӕрой, афтӕ.
¹²³ Тайынц мӕ цӕстытӕ Дӕ ирвӕзындзинадмӕ
      ӕмӕ Дӕ растады зӕрдӕвӕрдмӕ ӕхъӕлмӕ кӕсгӕйӕ.
¹²⁴ Фӕу Дӕ цагъарӕн Дӕ хорзӕхмӕ гӕсгӕ;
      сахуыр мӕ кӕн Дӕ уагӕвӕрдтыл.
¹²⁵ Ӕз Дӕ цагъар дӕн;
      скӕн мӕ ӕмбаргӕ ӕмӕ базонон Дӕ амындтӕ.
¹²⁶ Ралӕууыд Хуыцауӕн Йӕхи равдисыны рӕстӕг:
      халынц Дын Дӕ уагӕвӕрдтӕ.
¹²⁷ Ӕз та Дӕ фӕдзӕхстытӕ сызгъӕринӕй фылдӕр
      уарзын,
      сыгъдӕг сызгъӕринӕй фылдӕр.
¹²⁸ Афтӕ Де 'ппӕт уынаффӕтӕ дӕр
      ӕз растыл нымайын;
      цавӕрфӕнды мӕнгдзинады фӕндаг дӕр
      мӕнӕн ӕнӕуынон у.

¹²⁹ Диссаг сты Дӕ амындтытӕ;
      уымӕ гӕсгӕ сӕ мӕ зӕрдӕйы хӕссын.
¹³⁰ Дӕ ныхӕсты раргомад рухс дӕтты,
      хуымӕтӕг адӕмы кӕны ӕмбаргӕ.
¹³¹ Байгом кӕнын мӕ дзых ӕмӕ сулӕфын –
      Дӕ фӕдзӕхстытӕ мӕ уӕлдӕфау хъӕуынц.
¹³² Де 'ргом мӕм раздах ӕмӕ мын батӕригъӕд кӕн,
      Дӕ ном уарзджытӕн ӕрвылхатт куыд
      бакӕныс, афтӕ.
¹³³ Сфидар мын кӕн мӕ къахдзӕфтӕ
      Дӕ ныхасмӕ гӕсгӕ
      ӕмӕ цыфӕнды фыдӕхӕн дӕр ма ратт мӕныл
      фӕуӕлахизы бар.
¹³⁴ Бахиз мӕ адӕймаджы ӕфхӕрдӕй,
      ӕмӕ Дӕ уагӕвӕрдтӕн уыдзынӕн коммӕгӕс.
¹³⁵ Срухс кӕн Дӕ цагъары Дӕ цӕсгомы рухсӕй
      ӕмӕ мӕ сахуыр кӕн Дӕ уынаффӕтыл.
¹³⁶ Адӕм Дӕ ныхас кӕй не 'ххӕст кӕнынц,
      уый тыххӕй мӕ цӕстытӕй кӕлынц цӕссыджы
      суадӕттӕ.

¹³⁷ Рӕстаг дӕ Ды, О Дунедарӕг,
      ӕмӕ раст сты Дӕ уынаффӕтӕ дӕр.
¹³⁸ Ды радтай раст фӕдзӕхстытӕ,
      ӕххӕст ӕцӕгад сты уыдон.
¹³⁹ Фыр мӕтӕй ӕз ӕнцой нал зонын,
      уымӕн ӕмӕ ме знӕгтӕ ферох кодтой Дӕ ныхӕстӕ.
¹⁴⁰ Дӕ ныхас фӕлтӕрд у,
      ӕмӕ йӕ Дӕ цагъар бауарзта.
¹⁴¹ Ӕз ӕнӕахадгӕ ӕмӕ ӕгад дӕн,
      фӕлӕ Дӕ уынаффӕтӕ нӕ рох кӕнын.
¹⁴² Дӕ рӕстдзинад мыггагмӕйы рӕстдзинад у,
      Дӕ ныхас ӕцӕг у.
¹⁴³ Мӕт ӕмӕ хъыг ӕртыхстысты мӕныл,
      фӕлӕ мын Дӕ фӕдзӕхстытӕ дӕттынц
      ӕхцондзинад.
¹⁴⁴ Дӕ уагӕвӕрдты рӕстдзинад мыггагмӕ у;
      ратт мын ӕмбарынад, ӕмӕ цӕрдзынӕн.

¹⁴⁵ Дӕумӕ кувын ӕппӕт зӕрдӕйӕ –
      фехъус мӕ, О Дунедарӕг,
      ӕмӕ уыдзынӕн коммӕгӕс Дӕ уагӕвӕрдтӕн.
¹⁴⁶ Дӕумӕ кувын – фервӕзын мӕ кӕн,
      ӕмӕ хӕцдзынӕн Дӕ амындтыл.
¹⁴⁷ Боныцъӕхтӕй фӕраздӕр вӕййын
      ӕмӕ Дӕм дзыназын ӕххуысагур;
      Дӕ ныхасыл дарын мӕ зӕрдӕ.
¹⁴⁸ Бонивӕнтӕй раздӕр мӕ цӕстытӕ гом вӕйынц,
      цӕмӕй арфдӕр хъуыды кӕнон Дӕ ныхӕстыл.
¹⁴⁹ Ды уарзӕгой дӕ, О Дунедарӕг,
      ӕмӕ мын фехъус мӕ хъӕлӕс;
      Дӕ рӕстдзинадмӕ гӕсгӕ мын бахиз мӕ цард.
¹⁵⁰ Ӕрбаввахс мӕм сты мӕ фӕдылзилджытӕ
      сӕ хинвӕндимӕ – уыдон дард сты Дӕ ныхасӕй.
¹⁵¹ Хӕстӕг дӕ Ды, О Дунедарӕг,
      Де 'ппӕт фӕдзӕхстытӕ дӕр ӕцӕг сты.
¹⁵² Ӕз раджы базыдтон Дӕ уагӕвӕрдтӕй,
      мыггагмӕ сӕ кӕй сфидар кодтай, уый.

¹⁵³ Ӕркӕс мӕ тухӕнмӕ ӕмӕ мӕ фервӕзын кӕн,
      уымӕн ӕмӕ Дӕ ныхас нӕ рох кӕнын.
¹⁵⁴ Мӕ хъуыддаджы балӕуу ӕмӕ мӕ бахъахъхъӕн;
      Дӕ зӕрдӕвӕрдмӕ гӕсгӕ мын мӕ цард бахиз.
¹⁵⁵ Дард у фыдлӕгтӕй ирвӕзындзинад –
      уыдон Дӕ уынаффӕтӕ нӕ агурынц.
¹⁵⁶ Диссаг у Дӕ рӕвдыд, О Дунедарӕг;
      бахиз мӕ Дӕ рӕстдзинадмӕ гӕсгӕ.
¹⁵⁷ Бирӕ сты мӕ фӕдылзилджытӕ ӕмӕ ме знӕгтӕ;
      фӕлӕ ӕз Дӕ уагӕвӕрдтӕй нӕ аздӕхын.
¹⁵⁸ Дӕу чи ныууагъта, уыдонмӕ ӕз кӕсын зӕрдӕлгъӕдӕй;
      уыдон ӕгоммӕгӕс сты Дӕ ныхасӕн.
¹⁵⁹ Ӕркӕс, Дӕ уынаффӕтӕ куыд уарзын, уымӕ;
      Ды уарзӕгой дӕ, О Хуыцау,
      ӕмӕ мын бахиз мӕ цард.
¹⁶⁰ Дӕ ныхасы бындур ӕцӕгад у,
      ӕмӕ мыггагмӕ у Дӕ алы раст уынаффӕ.

¹⁶¹ Ӕнаххосӕй мӕ фӕдыл зилынц ӕлдӕрттӕ,
      фӕлӕ ӕрмӕст Дӕ ныхасӕй ризы мӕ зӕрдӕ.
¹⁶² Цин кӕнын Дӕ ныхасыл,
      цыма стыр ӕфтиаг райстон, афтӕ.
¹⁶³ Ме сӕфт уынын мӕнгдзинадӕй
      ӕмӕ йыл ӕлгъ кӕнын, Дӕ ныхас та уарзын.
¹⁶⁴ Стауын Дӕ бон авд хатты
      Дӕ раст уынаффӕты тыххӕй.
¹⁶⁵ Дӕ ныхас чи уарзы, уыдон ссардтой ӕгӕрон фарн
      ӕмӕ сын фӕкӕлӕн нӕ уыдзӕн.
¹⁶⁶ Дӕ ирвӕзындзинадыл дарын мӕ зӕрдӕ, О Хуыцау,
      ӕмӕ ӕххӕст кӕнын Дӕ фӕдзӕхстытӕ.
¹⁶⁷ Мӕ зӕрдӕйы хӕссын Дӕ уагӕвӕрдтӕ
      ӕмӕ сӕ уарзын тынг.
¹⁶⁸ Хӕцын ӕз Дӕ амындтыл ӕмӕ Дӕ уагӕвӕрдтыл,
      уымӕн ӕмӕ ме 'ппӕт цӕуӕнтӕ Дӕ цӕсты раз сты.

¹⁶⁹ Схӕццӕ Дӕм уӕд мӕ дзыназын, О Дунедарӕг;
      ратт мын ӕмбарынад Дӕ дзырдмӕ гӕсгӕ.
¹⁷⁰ Сыхъуысӕд Дӕм мӕ куывд;
      Дӕ зӕрдӕвӕрдмӕ гӕсгӕ мӕ фервӕзын кӕн.
¹⁷¹ Мӕ дзыхӕй рацӕудзысты Дӕуӕй ӕппӕлыны
      дзырдтӕ,
      уымӕн ӕмӕ мын амоныс Дӕ уагӕвӕрдтӕ.
¹⁷² Дӕ ныхасыл зарӕг уыдзӕни мӕ былалгъыл –
      Дӕ фӕдзӕхстытӕ ӕгасӕй дӕр раст сты.
¹⁷³ Дӕ цонг мын уӕд ӕххуысгӕнӕг;
      уымӕн ӕмӕ ӕз Дӕ амындтӕ сӕвзӕрстон.
¹⁷⁴ Дӕ ирвӕзындзинадмӕ бӕллын, О Дунедарӕг,
      Дӕ ныхас мын у ӕхцон.
¹⁷⁵ Уадз цӕрӕд мӕ уд ӕмӕ ӕппӕлӕд Дӕуӕй;
      ӕххуысгӕнӕг мын уӕнт Дӕ уынаффӕтӕ.
¹⁷⁶ Сӕфт фысау фӕиппӕрд дӕн.
      Ӕрцагур Дӕ цагъары, уымӕн ӕмӕ ӕз
      Дӕ фӕдзӕхстытӕ нӕ ферох кодтон.

119 Псалом

¹ Бӕрзонд Кувӕндонмӕ цӕуджыты зарӕг.

      Мӕ хъыджы заман сдзырдтон Хуыцаумӕ,
      ӕмӕ Уый фехъуыста мӕн.

² Загътон: «О Дунедарӕг, фервӕзын мӕ кӕн,
      мӕнг чи дзуры ӕмӕ фӕлитой ӕвзаг кӕмӕн ис,
      уыдонӕй».
³ Дӕуӕн та, фӕлитой ӕвзаг, цы бафиддзӕн Уый,
      ӕмӕ дын цы фидӕн ӕрхӕсдзӕн?
⁴ Хӕстоны цыргъ фаттӕ
      ӕмӕ ӕрцыты судзгӕ цӕхӕртӕ.

⁵ Додойаг дӕн, Мешехы кӕй цӕрын,
      Кедары цатырты ӕхсӕн мӕ бонтӕ кӕй ӕрвитын,
      уый тыххӕй.
⁶ Ӕгӕр бирӕ фӕцардтӕн, фарн ӕнӕуынон кӕмӕн у,
      уыдонимӕ.
⁷ Ӕз фарнагурӕг дӕн, фӕлӕ куыддӕр сдзурын,
      афтӕ уыдон хӕстӕввонг свӕййынц.

120 Псалом

¹ Бӕрзонд Кувӕндонмӕ цӕуджыты зарӕг.

      Мӕ цӕстӕнгас систон хӕхтӕм –
      кӕцӕй мӕм ӕрцӕудзӕн ӕххуыс?
² Арв ӕмӕ зӕхх сфӕлдисӕг
      Хуыцауӕй мӕм ӕрцӕуы ӕххуыс.

³ Дӕ къах дын фӕцудын нӕ бауадздзӕни,
      дӕ хъахъхъӕнӕг фынӕй нӕ кӕны.
⁴ Бӕлвырд, Йӕ цӕстыл хуыссӕг нӕ хӕцы,
      нӕ фынӕй кӕны Израилы хъахъхъӕнӕг.

⁵ Дунедарӕг дӕ хъахъхъӕнӕг у;
      Хуыцау дӕ аууондарӕг у Дӕ рахиз фарс.
⁶ Бонӕй дӕ хур нӕ ныццӕвдзӕн,
      ӕхсӕвыгон та – мӕй.

⁷ Хуыцау дӕ бахиздзӕн алы фыдбылызӕй дӕр;
      бахиздзӕн дын дӕ уд.
⁸ Хуыцау дын хъахъхъӕндзӕн дӕ ацыд
      ӕмӕ де 'рбацыд нырӕй фӕстӕмӕ
      ӕмӕ мыггагмӕ дӕр.

121 Псалом

¹ Бӕрзонд Кувӕндонмӕ цӕуджыты зарӕг.
      Давиды псалом.

      Мӕ цинӕн кӕрон нал уыди,
      «Цом Хуыцауы хӕдзармӕ» мын куы загътой, уӕд.
² Ӕмӕ мӕнӕ, Иерусалим,
      Дӕ кулдуары цурмӕ ӕрбавӕрдтам нӕ къах.

³ Иерусалимы сахар арӕзт ӕрцыд
      иугонд ӕмӕ ӕмхӕстӕй.
⁴ Ӕмӕ уырдӕм ссӕуынц адӕмы мыггӕгтӕ,
      Израилы мыггӕгтӕ, Израилы ӕгъдаумӕ гӕсгӕ
      Дунедарӕгӕн кад кӕнынмӕ.
⁵ Уым ӕвӕрд сты тӕрхоны бадӕнтӕ –
      Давиды хӕдзарвӕндаджы цытджын бадӕнтӕ.

⁶ Курут ӕнцойад Иерусалимӕн:
      «Дӕу чи уарзы, уыдон фӕрнджын уӕнт!
⁷ Фарн уӕд дӕ фидӕртты,
      ӕдасдзинад – дӕ мӕсгуыты!»
⁸ Ме 'фсымӕрты ӕмӕ хионты сӕраппонд
      зӕгъын ӕз: «Фарн дӕм уӕд!»
⁹ Дунедарӕджы, нӕ Хуыцауы хӕдзары сӕраппонд,
      мӕ зӕрдӕйы бӕллиц – дӕ фӕрныгад.

122 Псалом

¹ Бӕрзонд Кувӕндонмӕ цӕуджыты зарӕг.

      Мӕ цӕстӕнгас Дӕумӕ сисын,
      уӕлӕрвты Цӕрӕг!
² Цагъартӕ сӕ хицӕутты къухмӕ куыд кӕсынц,
      цагъар сылгоймаг йӕ ус-хицауы къухмӕ куыд кӕсы,
      афтӕ нӕ каст дӕр Дунедарӕг Хуыцаумӕ у,
      цалынмӕ нӕм Йӕ хорзӕх равдиса, уӕдмӕ.

³ Батӕригъӕд нын кӕн, Дунедарӕг,
      батӕригъӕд нын кӕн,
      уымӕн ӕмӕ ӕгӕр бавзӕрстам ӕгад.
⁴ Ӕгӕр бавзӕрста нӕ уд хъалтӕй ӕфхӕрд,
      сӕрыстыртӕй – ӕгад.

123 Псалом

¹ Бӕрзонд Кувӕндонмӕ цӕуджыты зарӕг.
      Давиды псалом.

      Хуыцау немӕ куы нӕ уыдаид –
      Израил зӕгъӕд йӕхӕдӕг –
² Дунедарӕг немӕ куы нӕ уыдаид,
      адӕм нӕ ныхмӕ куы сыстадысты –
³ Уӕд нӕ удыгасӕй аныхъуырдтаиккой
      сӕ судзгӕ фыдӕхӕй;
⁴ Фӕдӕлдон уыдаиккам,
      дӕттӕ цыдаиккой нӕ сӕрты,
⁵ Нӕ сӕрты донивылӕнтӕ цыдаиккой.

⁶ Арфӕгонд уӕд Дунедарӕг,
      мах уыдон дӕндӕгты амӕддаг Чи нӕ фӕкодта.
⁷ Нӕ уд, маргъау, фервӕзт цъиуахсджыты хызӕй;
      хыз атындӕуыд, ӕмӕ фервӕзтыстӕм.
⁸ Дунедарӕджы номӕй нӕм ӕрцӕуы ӕххуыс,
      арв ӕмӕ зӕхх сфӕлдисӕгӕй.

124 Псалом

¹ Бӕрзонд Кувӕндонмӕ цӕуджыты зарӕг.

      Хуыцауыл ӕууӕндджытӕ Сионы хохы хуызӕн сты:
      уый нӕ фӕцуддзӕн, лӕудзӕни мыггагмӕ.
² Иерусалимы алыварс хӕхтӕ куыд лӕууынц,
      афтӕ Дунедарӕг дӕр Йӕ адӕмы алыварс лӕууы
      нырӕй ӕмӕ мыггагмӕ.
³ Уымӕ гӕсгӕ рӕстгӕнджыты хъысмӕты сӕргъыл
      бирӕ нӕ баззайдзӕн фыдлӕгты барлӕдзӕг,
      цӕмӕй рӕстгӕнджытӕн сӕ къух ма фӕтаса
      фыдмимӕ.

⁴ Дӕ хӕрзтӕ ратт, Хуыцау, хӕрзгӕнджытӕн
      ӕмӕ рӕстзӕрдӕтӕн.
⁵ Фӕлӕ зылын фӕндагыл чи ныллӕууыди,
      уыдон фыдгӕнджытимӕ фесафдзӕни Хуыцау.

      Фӕрнджын уӕд Израил!

125 Псалом

¹ Бӕрзонд Кувӕндонмӕ цӕуджыты зарӕг.

      Хуыцау Сионы уацарӕй куы ракодта,
      уӕд – цыма уыдӕттӕ фыны уыдтам.
² Уӕд нӕ цины уынӕрӕн кӕрон нал уыди,
      ӕвзаг нӕ фӕллад зарынӕй.
      Уӕд адӕмтӕ дзырдтой: «Хуыцау уыцы адӕмӕн
      диссаджы хъуыддӕгтӕ скодта».
³ Ӕцӕгӕйдӕр, Дунедарӕг махӕн диссаджы
      хъуыддӕгтӕ скодта,
      ӕмӕ куыд цин кодтам мах!

⁴ Раздах, Хуыцау, нӕ адӕмы уацарӕй,
      донивылӕнтӕ Негевы хусмӕ куыд раздӕхынц, афтӕ.
⁵ Цӕссыг калгӕйӕ чи тауы,
      уыдон цинӕй райгӕйӕ кӕрддзысты.
⁶ Хуыммӕ чи рацӕуы ӕмӕ йӕ тауинаг кӕугӕйӕ
      чи фӕхӕссы,
      уый цинӕй райгӕйӕ ӕрбаздӕхдзӕни,
      йӕ куыристӕ хӕсгӕйӕ.

126 Псалом

¹ Бӕрзонд Кувӕндонмӕ цӕуджыты зарӕг.
      Соломоны псалом.

      Хуыцау куы нӕ снывӕнда хӕдзар,
      уӕд дзӕгъӕлы у аразджыты фыдӕбон;
      Дунедарӕг куы нӕ бахъахъхъӕна сахар,
      уӕд дзӕгъӕлы лӕууынц цырддзастӕй
      йӕ хъахъхъӕнджытӕ.
² Дзӕгъӕлы сыстут сӕумӕйӕ, бадут ӕнафонмӕ,
      хӕрут уӕ тухӕйнаджы къӕбӕр;
      Хуыцау кӕй уарзы, уыдоныл ауды,
      фынӕй куы вӕййынц, уӕд дӕр.

³ Хуыцау кӕй дӕтты, мӕнӕ уыцы бынтӕ –
      фырттӕ;
      хъӕбултӕ – хӕрзиуӕг Дунедарӕгӕй.
⁴ Хъӕбатыры къухы фаттӕ куыд сты,
      афтӕ сты фырттӕ дӕр се 'рыгонӕй.
⁵ Тӕхудиаг у уыцы адӕймаг,
      уыдонӕй йӕ фатдон чи байдзаг кодта.
      Сахары кулдуармӕ, йӕ ныхмӕлӕуджытимӕ
      быцӕуныхасы нӕ фегад уыдзӕн.

127 Псалом

¹ Бӕрзонд Кувӕндонмӕ цӕуджыты зарӕг.

      Тӕхудиаг у уыцы адӕймаг,
      Хуыцауы тас кӕмӕ ис
      ӕмӕ Уый фӕндӕгтыл чи цӕуы.
² Ӕхцон дын уыдзысты дӕ цӕнгты фӕллӕйттӕ;
      тӕхудиаг ӕмӕ фӕрнджын уыдзынӕ.
³ Дӕ хӕдзары ӕфсин уыдзӕн дыргъджын
      сӕнӕфсиры бӕласау;
      дӕ фырттӕ дӕ фынгты алыварс
      уыдзысты зетибӕласы ӕвзартау.
⁴ Афтӕ арфӕгонд уыдзӕни,
      Хуыцауы тас кӕмӕ ис, уыцы адӕймаг.

⁵ Хуыцау дын арфӕ рарвитӕд Сионӕй,
      ӕмӕ де 'ппӕт цӕрӕнбонты Иерусалимы фарн
      уӕд дӕ цӕсты раз,
⁶ Ӕмӕ фендзынӕ дӕ фыртты фыртты.

      Фӕрнджын уӕд Израил!

128 Псалом

¹ Бӕрзонд Кувӕндонмӕ цӕуджыты зарӕг.

      Ме 'взонджы бонтӕй фӕстӕмӕ мӕн куыд тынг
      ӕфхӕрдтой – зӕгъӕд Израил –
² Ме 'взонджы бонтӕй фӕстӕмӕ мӕн тынг
      ӕфхӕрдтой,
      фӕлӕ мыл нӕ фӕтых сты.
³ Ме рагъыл хуым кодтой хуымгӕнджытӕ,
      ауагътой-иу ыл даргъ ауӕдзтӕ.
⁴ Фӕлӕ Дунедарӕг ӕнӕхӕрам у:
      арӕдывта фыдлӕгты рӕхыстӕ.
⁵ Фегад уӕнт ӕмӕ фӕстӕмӕ аздӕхӕнт
      Сионӕн йӕ фыдгултӕ.
⁶ Уыдон уӕнт, уӕлхӕдзӕртты чи нӕма сырӕзти,
      афтӕмӕй чи бахус,
⁷ Хуымгӕрдӕг йӕ къух кӕмӕй нӕ байдзаг кӕндзӕн,
      куырисбӕттӕг – йӕ арм, ахӕм кӕрдӕгау.
⁸ Ӕмӕ йӕ фӕрсты цӕуджытӕ макуы зӕгъӕнт:
      «Уыдоныл Хуыцауы арфӕ ис,
      арфӕ уын кӕнӕм Хуыцауы номӕй».

129 Псалом

¹ Бӕрзонд Кувӕндонмӕ цӕуджыты зарӕг.

      Мӕ зӕрдӕйы арфӕй дӕм дзыназын, О Дунедарӕг.
² Мӕ Хицау Хуыцау, фехъус мӕ хъӕлӕс!
      Лӕмбынӕг байхъус мӕ лӕгъстӕмӕ, бацауд мыл.

³ Ды алы тӕригъӕд дӕр куы фиппайай, мӕ Паддзах,
      уӕд чи бафӕраздзӕн?
⁴ Фӕлӕ Ды хатыргӕнаг дӕ,
      ӕмӕ Дӕ уый тыххӕй аргъуц кӕнынц.

⁵ Хуыцауыл дарын мӕ зӕрдӕ, Уымӕ у ме скаст;
      ныфсджын дӕн Йӕ ныхасӕй.
⁶ Боны ӕрцыдмӕ хъахъхъӕнӕг куыд ӕнхъӕлмӕ кӕсы,
      уымӕй мӕ уд Хуыцаумӕ тынгдӕр бӕллы,
      уымӕй тынгдӕр.

⁷ Израил, Дӕ зӕрдӕ дар Дунедарӕгыл,
      уымӕн ӕмӕ Дунедарӕг уарзӕгой у,
      Уымӕ ис ӕгӕрон ирвӕзынгӕнӕг тых.
⁸ Ӕмӕ Уый фервӕзын кӕндзӕн Израилы
      йе 'ппӕт тӕригъӕдтӕй.

130 Псалом

¹ Бӕрзонд Кувӕндонмӕ цӕуджыты зарӕг.
      Давиды псалом.

      Мӕ зӕрдӕ ӕнӕрвӕссон нал у,
      мӕ сӕр бӕрзӕндты нӕ хӕссын;
      нӕ тырнын стырадмӕ ӕмӕ ӕнӕбаххӕсгӕ цы у,
      уымӕ.
² Фӕлӕ ӕз ӕрсабыр ӕмӕ ӕрӕнцайын кодтон
      мӕ уды,
      мады риуӕй иртӕст сывӕллонау йӕ мады
      хъӕбысы,
      мады риуӕй иртӕст сывӕллонау;
      мӕ уд дӕр мӕ мидӕг ӕрӕнцад.

³ О Израил, Дӕ зӕрдӕ дар Дунедарӕгыл нырӕй
      ӕмӕ мыггагмӕ дӕр.

131 Псалом

¹ Бӕрзонд Кувӕндонмӕ цӕуджыты зарӕг.

      О Хуыцау, ӕрымыс Давиды ӕмӕ кӕй бавзӕрста,
      йе 'ппӕт уыцы хъизӕмӕрттӕ.
² Куыд сомы кодта уый Дунедарӕгӕн,
      дзырд куыд лӕвӕрдта
      Иаковы Ӕппӕтхъомыс Хуыцауӕн:
³ «Нӕ бацӕудзынӕн мӕ хӕдзары агъуыстмӕ,
      нӕ ӕрӕнцайдзынӕн мӕ сынтӕгыл,
⁴ Мӕ цӕстытӕ не 'рцъынд кӕндзынӕн,
      мӕ уӕлтъыфылты фынӕй нӕ бауадздзынӕн,
⁵ Цалынмӕ Дунедарӕгӕн бынат,
      Иаковы ӕппӕтхъомыс Хуыцауӕн
      цӕрӕнуат не ссарон, уӕдмӕ».

⁶ Мах фехъуыстам Фидыды Чырыны тыххӕй
      Ефрафы,
      ссардтам ӕй Иаримы быдырты.
⁷ «Фӕцӕуӕм Йӕ цӕрӕн бынатмӕ,
      ӕрзоныг кӕнӕм Йӕ къӕхтӕ ӕрӕвӕрӕны цур».
⁸ О Дунедарӕг, рацу Де 'нцойы бынатмӕ, –
      Ды ӕмӕ Дӕ хъомыс кӕм ис,
      уыцы Фидыды Чырын дӕр Демӕ.
⁹ Дӕ сауджынтӕ сӕхи сфӕлындзӕнт рӕстадӕй,
      Дӕ сыгъдӕджытӕ зарӕнт цингӕнгӕ.

¹⁰ Дӕ цагъар Давиды сӕраппонд
      Де 'взӕрсты цӕсгом ма фӕиппӕрд кӕн Дӕхицӕй.
¹¹ Хуыцау сомы кодта Давидӕн,
      ӕмӕ Уый Йӕ сомы никуы басӕтдзӕн:
      «Дӕ байзӕддӕгты сбадын кӕндзынӕн
      дӕ паддзахы бадӕны.
¹² Дӕ фырттӕ Мӕ фӕдзӕхстмӕ гӕсгӕ куы цӕрой,
      ӕмӕ сӕ Ӕз цы ӕгъдӕуттыл сахуыр кӕнон,
      уыдоныл куы хӕцой,
      уӕд уыдоны фырттӕ дӕр мыггагмӕ баддзысты
      дӕ паддзахы бадӕны».

¹³ Уымӕн ӕмӕ Хуыцау Сион сӕвзӕрста,
      Уый бафӕндыди Йӕхицӕн дзы
      цӕрӕнбынат скӕнын,
¹⁴ Ӕмӕ загъта: «Уый у Ме 'нцойы бынат
      мыггагӕй мыггагмӕ: уым ӕрцӕрдзынӕн,
      уымӕн ӕмӕ Мын уый ӕхцон у.
¹⁵ Арфӕ ракӕндзынӕн йӕ хойраджы бӕркадыл,
      бафсаддзынӕн дзулӕй йӕ мӕгуырты.
¹⁶ Йӕ сауджынтыл скӕндзынӕн
      ирвӕзындзинады фӕлыст,
      йӕ сыгъдӕджытӕ цинӕй райдзысты.

¹⁷ Уым стыхджын кӕндзынӕн Давиды,
      уым Ме 'взӕрстӕн йӕ рухсгӕнӕн
      ӕрмынӕг нӕ бауадздзынӕн.
¹⁸ Йе знӕгтыл ын скӕндзынӕн худинаджы фӕлыст,
      йӕ сӕрыл та тӕмӕнтӕ калдзӕн кадыхуд».

132 Псалом

¹ Бӕрзонд Кувӕндонмӕ цӕуджыты зарӕг.
      Давиды псалом.

      Куыд хорз ӕмӕ куыд ӕхсызгон у
      ӕфсымӕртӕн фидыдӕй иумӕ цӕрын!
² Уый у сӕрыл хӕрздӕф зетийау,
      цӕсгомы хилтыл чи тӕдзы,
      Аароны цӕсгомы хилтӕй
      йӕ дарӕсы кӕрӕттӕм чи тӕдзы;
³ Уый у Ермоны ӕртӕхау,
      Сионы хӕхтӕм чи ӕрцӕуы.
      Уымӕн ӕмӕ Дунедарӕг уым балӕвар кодта
      Йӕ арфӕ ӕмӕ цард мыггагмӕ.

133 Псалом

¹ Бӕрзонд Кувӕндонмӕ цӕуджыты зарӕг.

      Цӕй, уӕдӕ кад кӕнут Дунедарӕгӕн, Йӕ цагъартӕ,
      ӕхсӕвыгӕтты Хуыцауы Хӕдзары
      чи лӕггад кӕны, уыдон.
² Уӕ къухтӕ сдарут Рухс Кувӕндоны,
      ӕмӕ скад кӕнут Дунедарӕгӕн.

³ Арв ӕмӕ зӕхх сфӕлдисӕг Хуыцау дын
      арфӕ ракӕнӕд Сионӕй.

134 Псалом

¹ Алилуйа!

      Ӕппӕлут Дунедарӕджы номӕй,
      ӕппӕлут дзы, Хуыцауы цагъартӕ –
² Дунедарӕджы хӕдзары,
      нӕ Хуыцауы хӕдзары кӕртыты лӕггадгӕнджытӕ.
³ Ӕппӕлут Дунедарӕгӕй,
      уымӕн ӕмӕ Дунедарӕг фӕрнджын у;
      зарут Йӕ номыл, уымӕн ӕмӕ уый ӕхцон у.
⁴ Дунедарӕг Иаковы сӕвзӕрста Йӕхицӕн,
      Израилы адӕмы – Йӕхицӕн исбонӕн.

⁵ Ӕз базыдтон: Хуыцау стыр у,
      ӕппӕт хуыцӕуттӕй нӕ Дунедарӕг
      у иунӕг Бӕрзонд Хуыцау.
⁶ Уӕлӕрвты ӕмӕ зӕххыл,
      денджызты ӕмӕ ӕппӕт фурдты ӕрфӕнты
      Хуыцау кӕны, цыдӕриддӕр Ӕй фӕнды, уый.
⁷ Зӕххы кӕрӕттӕй сисы мигътӕ,
      къӕвдаимӕ рауадзы ӕрвӕрттывд,
      Йӕ ӕвӕрӕнтӕй рарвиты дымгӕ.

⁸ Уый фесӕфта Мысыры фыццаг гуырдты –
      адӕймагӕй фосы онг;
⁹ Равдыста нысӕнттӕ ӕмӕ диссӕгтӕ Мысыры ӕхсӕн –
      фараоны ӕмӕ йӕ цагъарты ныхмӕ.
¹⁰ Ныддӕрӕн кодта бирӕ адӕмты,
      мӕлӕты хай бакодта тыхджын паддзӕхты:
¹¹ Амморейаг паддзах Сигоны басайнаг паддзах Огы,
      ӕмӕ ханаанаг ӕппӕт паддзӕхты.
¹² Ӕмӕ уыдоны зӕхх радта исбонӕн,
      исбонӕн Израилӕн – Йӕ адӕмӕн.

¹³ Хуыцау, мыггагмӕ у Дӕ ном,
      Дӕ кадыл дзурдзысты фӕлтӕрӕй-фӕлтӕрмӕ.
¹⁴ Уымӕн ӕмӕ Дунедарӕг сӕрылхӕцӕг у Йӕ адӕмӕн
      ӕмӕ бацауддзӕн Йӕ цагъартыл.

¹⁵ Муртатты гуымирытӕ – ӕвзист ӕмӕ сызгъӕрин,
      адӕймаджы къухтӕй конд сты.
¹⁶ Ис сын дзыхтӕ, фӕлӕ ницы дзурынц,
      ис сын цӕстытӕ, фӕлӕ ницы уынынц;
¹⁷ Ис сын хъустӕ, фӕлӕ ницы хъусынц,
      нӕдӕр улӕфт цӕуы сӕ комӕй.
¹⁸ Уыдоны хуызӕн суыдзысты се скӕнджытӕ,
      стӕй сыл чидӕриддӕр йӕ зӕрдӕ дары, уыдон дӕр.

¹⁹ Скад кӕнут Хуыцауӕн, Израилы хӕдзар!
      Скад кӕнут Хуыцауӕн, Аароны хӕдзар!
²⁰ Скад кӕнут Хуыцауӕн, Левийы хӕдзар!
      Скад кӕнут Хуыцауӕн, чи Дзы тӕрсы, уыдон.
²¹ Кад уӕд Сионӕй Дунедарӕгӕн,
      Иерусалимы цӕрӕгӕн.

      Алилуйа!

135 Псалом

¹ Стаут Дунедарӕджы – Уый фӕрнджын у,
      Йӕ хорзӕх мыггагмӕ у.
² Стаут хуыцӕутты Хуыцауы –
      Йӕ хорзӕх мыггагмӕ у.
³ Стаут хицӕутты Хицауы –
      Йӕ хорзӕх мыггагмӕ у.

⁴ Стаут Ӕй – стыр диссӕгтӕ ӕрмӕстдӕр Уый кӕны,
      Йӕ хорзӕх мыггагмӕ у.
⁵ Стаут, Йӕ уӕлзондӕй уӕлӕрвтӕ Чи скодта –
      Йӕ хорзӕх мыггагмӕ у.
⁶ Зӕхх дӕтты сӕрмӕ Уый айтыгъта –
      Йӕ хорзӕх мыггагмӕ у.
⁷ Арвы стыр рухсгӕнӕнтӕ Уый сфӕлдыста –
      Йӕ хорзӕх мыггагмӕ у.
⁸ Боны фӕткӕн сӕвӕрдта хур –
      Йӕ хорзӕх мыггагмӕ у.
⁹ Ӕхсӕвы фӕткӕн сӕвӕрдта мӕй ӕмӕ стъалытӕ –
      Йӕ хорзӕх мыггагмӕ у.

¹⁰ Уый радта мӕлӕтмӕ мысыраг фыццаггуырдты –
      Йӕ хорзӕх мыггагмӕ у.
¹¹ Израилы Уый ракодта се 'хсӕнӕй –
      Йӕ хорзӕх мыггагмӕ у.
¹² Йӕ хъомысджын цонгӕй ӕмӕ
      Йӕ тыхджын къухӕй –
      Йӕ хорзӕх мыггагмӕ у.
¹³ Сырх денджыз Уый фӕдих кодта –
      Йӕ хорзӕх мыггагмӕ у.
¹⁴ Ӕмӕ Израилы Уый ракодта
      денджызы хӕдастӕуты –
      Йӕ хорзӕх мыггагмӕ у.
¹⁵ Фараоны йе 'фсадимӕ Сырх денджызы
      Уый фӕдӕлдон кодта –
      Йӕ хорзӕх мыггагмӕ у.

¹⁶ Йӕ адӕмы ахизын кодта ӕдзӕрӕг быдырыл –
      Йӕ хорзӕх мыггагмӕ у.
¹⁷ Ныддӕрӕн кодта стыр паддзӕхты –
      Йӕ хорзӕх мыггагмӕ у.
¹⁸ Фӕцагъта тыхджын паддзӕхты –
      Йӕ хорзӕх мыггагмӕ у.
¹⁹ Аморрейаг паддзах Сигоны –
      Йӕ хорзӕх мыггагмӕ у.
²⁰ Ӕмӕ басайнаг паддзах Огы –
      Йӕ хорзӕх мыггагмӕ у.
²¹ Сӕ зӕххытӕ сын радта бынтӕн –
      Йӕ хорзӕх мыггагмӕ у.
²² Бынтӕн Израилӕн, Йӕ цагъарӕн –
      Йӕ хорзӕх мыггагмӕ у.

²³ Ныллӕггонд куы уыдыстӕм,
      уӕд Уый мах нӕ рох кодта –
      Йӕ хорзӕх мыггагмӕ у.
²⁴ Ирвӕзын нӕ кодта не знӕгтӕй –
      Йӕ хорзӕх мыггагмӕ у.
²⁵ Зӕххыл ӕппӕт цӕрджытӕн хойраг Уый дӕтты –
      Йӕ хорзӕх мыггагмӕ у.

²⁶ Стаут уӕларвон Хуыцауы –
      Йӕ хорзӕх мыггагмӕ у!

136 Псалом

¹ Мах Вавилоны донгӕрӕтты бадтыстӕм
      ӕмӕ нӕ цӕссыг калдтам,
      Сионы-иу куы ӕрымысыдыстӕм, уӕд.
² Уым донхӕристыл ӕрцауыгътам
      нӕ дала-фӕндыртӕ.
³ Уымӕн ӕмӕ нӕ уацары чи райста,
      уыдон махӕй зарыны ныхӕстӕ домдтой,
      не 'фхӕрджытӕ – цин кӕнын:
      «Азарут нын Сионы зарджытӕй».

⁴ Фӕлӕ куыд зарӕм Хуыцауы зарджытӕ
      кӕйдӕр зӕххыл?
⁵ Ӕз дӕу куы ферох кӕнон, Иерусалим,
      уӕд мӕ рахиз цонг мацыуалхъом уӕд;
⁶ Ме 'взаг баныхӕсӕд мӕ хъуырыл,
      ӕз дӕу куы ферох кӕнон, Иерусалим,
      мӕ цины сӕр дӕ куы нӕ скӕнон, уӕд.

⁷ О Дунедарӕг, ӕрымыс Едомы фырттӕн
      Иерусалимы уыцы бон,
      афтӕ куы дзырдтой: «Фехалут ӕй,
      фехалут ӕй бындзарӕй».
⁸ Вавилоны чызг – раууатгӕнӕг!
      Тӕхудиаг уыдзӕн, ды махӕн цытӕ бакодтай,
      уый дын чи бафида.
⁹ Тӕхудиаг уыдзӕн, дӕ хъӕбулты чи сиса
      ӕмӕ сӕ дурыл чи ныппырх кӕна, уый.

137 Псалом

¹ Давиды псалом.

      Стауын Дӕ, О Дунедарӕг, ӕппӕт зӕрдӕйӕ;
      зарын Дӕ кадӕн хуыцӕутты раз.
² Мӕ зонгуытыл лӕууын
      Дӕ Сыгъдӕг Кувӕндоны раз,
      ӕмӕ стауын Дӕ ном, Дӕ уарзт
      ӕмӕ Де 'нувыды тыххӕй.
      Уымӕн ӕмӕ ӕппӕтӕй стырдӕр
      скодтай Дӕ ном ӕмӕ Дӕ ныхас.
³ Ӕз Дӕм ӕххуысмӕ куы фӕдзырдтон,
      уыцы бон мӕ фехъуыстай
      ӕмӕ стыр ныфс бауагътай мӕ зӕрдӕйы.

⁴ Скадджын Дӕ кӕндзысты, О Дунедарӕг,
      ӕппӕт зӕххон паддзӕхтӕ,
      Дӕ дзыхӕй рацӕугӕ дзырдтӕ куы фехъусой, уӕд.
⁵ Ӕмӕ зардзысты Хуыцауы диссаджы
      фӕндӕгты тыххӕй,
      уымӕн ӕмӕ стыр у Хуыцауы кад.
⁶ Хуыцау бӕрзонд ран ис, уыны сӕрныллӕджы дӕр,
      сӕрыстыры базоны дардмӕ.

⁷ Бӕллӕхты ӕхсӕнты куы цӕуа мӕ фӕндаг,
      уӕддӕр мын бахиздзынӕ мӕ цард;
      адардзынӕ Дӕ къух мӕ тызмӕг знӕгтӕм,
      ӕмӕ Дӕ рахиз цонг фервӕзын кӕндзӕн мӕн.
⁸ Хуыцау сӕххӕст кӕндзӕн Йӕ ныфсӕвӕрд мӕнӕн;
      Дӕ хорзӕх, Хуыцау, мыггагмӕ у –
      Дӕ къухӕй цы скодтай, уый ма ныууадз.

138 Псалом

¹ Зарӕггӕнджыты разамонӕгмӕ.
      Давиды псалом.

      О Дунедарӕг, Ды мӕ бафӕлвӕрдтай
      ӕмӕ зоныс мӕн.
² Кӕд сбадын ӕмӕ кӕд сыстын,
      уый Дын зындгонд у;
      Ды дардмӕ дӕр ӕмбарыс мӕ хъуыдытӕ.
³ Цӕугӕ кӕнон, мӕ фӕллад уадзон –
      ӕдзух Дӕ разы дӕн,
      ӕмӕ Дын мӕ фӕндӕгтӕ ӕгасӕй дӕр зындгонд сты.
⁴ Мӕ дзыхӕй ныхас нӕма рацӕуы, Хуыцау,
      афтӕмӕй Ды фӕзоныс ӕппӕтдӕр.

⁵ Фӕстӕрдыгӕй дӕр мӕ хъахъхъӕныс Ды
      ӕмӕ разӕрдыгӕй дӕр –
      Дӕ армӕй бамбӕрзтай мӕн.
⁶ Де стыр зонынад дис ӕфтауы мӕныл –
      бӕрзонд у, мӕ зонд ыл не 'ххӕссы.

⁷ Кӕдӕм ацӕудзынӕн Дӕ Удӕй,
      кӕдӕм алидздзынӕн Дӕуӕй?
⁸ Уӕлӕрвтӕм ссӕуон – Ды уым дӕ;
      дӕлдзӕхмӕ ныххизон – уым дӕр дӕ.
⁹ Сӕуӕхсиды базыртӕ куы райсин
      ӕмӕ куы атӕхин –
      денджызы иннӕ кӕрон куы ӕрцӕрин дард,
¹⁰ Уӕд мӕ уым дӕр Дӕ арм кӕндзӕни размӕ,
      хӕцдзынӕ мыл Дӕ рахиз цонгӕй.

¹¹ Куы зӕгъин афтӕ дӕр: «Талынг бамбӕрзӕд мӕн,
      ӕмӕ рухс фестӕд мӕ алыварс ӕхсӕв»,
¹² Уӕддӕр Дӕуӕн талынг дӕр нӕу тар,
      ӕхсӕв та Дын бонау ӕрттивы:
      Дӕуӕн талынг дӕр бонау рухс у.

¹³ Ды сфӕлдыстай, мӕ мидӕг цы ис, уыдон,
      бауафтай мӕн мӕ мады гуыбыны.
¹⁴ Стауын дӕ, уымӕн ӕмӕ диссаг
      ӕмӕ ӕмбисонды сконд дӕн ӕз.
      Диссаг сты Дӕ хъуыддӕгтӕ,
      ӕмӕ иттӕг ӕмбары уый мӕ уд.
¹⁵ Ды ме стджыты ӕнӕуынӕг нӕ уыдтӕ,
      сусӕг ран мӕ куы арӕзтӕуыд,
      гуыбыны арфы нывӕст куы цыдтӕн, уӕд.
¹⁶ Дӕ цӕстӕй федтай мӕ гуырдз;
      иу бон дӕр нӕма рацардтӕн,
      афтӕмӕй Дӕ чиныджы фыст уыдысты
      мӕнӕн нысангонд царды бонтӕ.

¹⁷ Куыд ӕнӕсгӕрст мын сты Дӕ хъуыдытӕ, О Хуыцау,
      ӕмӕ куыд бирӕ сты уыдон!
¹⁸ Райдаин сӕ нымайын,
      фӕлӕ змисӕй фылдӕр сты.
      Куы райхъал вӕййын, уӕддӕр ма демӕ вӕййын.

¹⁹ О мӕ Хуыцау, куы ныццӕгъдис Ды фыдлӕгты!
      Аиуварс ут мӕнӕй, тугмондӕгтӕ!
²⁰ Уыдон фыдзондӕй дзурынц Дӕ ныхмӕ,
      Дӕ кой кӕнынц дзӕлгъӕды Де знӕгтӕ.
²¹ Куыд нӕ хъуамӕ уынон ме сӕфт Дӕ фыдгултӕй,
      О Дунедарӕг, куыд нӕ хъуамӕ ӕлгъ кӕнон
      Дӕ ныхмӕ тохгӕнджытыл?
²² Бынтондӕр, бынтондӕр сӕ ме сӕфт уынын;
      уыдон мын знӕгтӕ сты.

²³ Бафӕлвар мӕ, Хуыцау, ӕмӕ базон мӕ зӕрдӕ;
      раиртас ӕмӕ базон мӕ хъуыдытӕ.
²⁴ Ӕркӕс мӕм ӕмӕ, кӕд сӕфты фӕндагыл лӕуд дӕн,
      уӕд мӕ сараз мыггагмӕйы царды фӕндагыл.

139 Псалом

¹ Зарӕггӕнджыты разамонӕгмӕ.
      Давиды псалом.

² Бахиз мӕ, Дунедарӕг, фыдзӕрдӕ адӕймагӕй;
      бахъахъхъӕн мӕ тыхгӕнӕгӕй.
³ Уыдон кӕнынц фыдвӕндтӕ,
      хӕст амайынц ӕрвылбон.
⁴ Калмы ӕвзагау сцыргъ кӕнынц се 'взӕгтӕ;
      залиаг калмы марг – сӕ дӕлӕвзаг. ||

⁵ Бахъахъхъӕн мӕ, Дунедарӕг, фыдлӕджы къухтӕй,
      бахиз мӕ тыхгӕнджытӕй,
      мӕ къӕхты фӕцудынмӕ чи бӕллы, уыдонӕй.
⁶ Сӕрыстыртӕ ме 'рцахсынӕн сӕвӕрдтой сахсӕнтӕ,
      мӕ фӕндагыл айтыгътой сӕ хызты бӕндӕнтӕ,
      сӕвӕрдтой мын къӕппӕджытӕ. ||

⁷ Ӕз загътон Дунедарӕгӕн: «Ды мӕ Хуыцау дӕ»;
      фехъус, Дунедарӕг, мӕ кувыны хъӕлӕс,
      батӕригъӕд мын кӕн.
⁸ О мӕ Хицау Хуыцау,
      Ды дӕ мӕ ирвӕзынгӕнӕг тых!
      Ды рахӕцыс мӕ сӕрыл тохы бон.
⁹ Дунедарӕг, фыдлӕгмӕ цы фӕнд ис,
      уым ын ма ратт ӕнтыст;
      ма йӕ бауадз йӕ фыдвӕнд сӕххӕст кӕнын,
      цӕмӕй уыдон сӕхи ма сбӕрзонд кӕной. ||
¹⁰ Мӕныл чи ӕртыхсти,
      уыдонӕн сӕхи сӕрыл ӕрцӕуӕд
      се 'взӕгтӕй рацӕугӕ фыдӕх.
¹¹ Судзгӕ цӕхӕр сыл ракӕлӕд;
      ӕппӕрст ӕрцӕуӕд арты, ӕнӕбын уӕрмы,
      цӕмӕй дзы мауал схизой.
¹² Маргӕвзаг адӕймагӕн зӕххыл бынат ма разынӕд;
      фыдӕх зилӕд тыхгӕнӕджы фӕдыл,
      йӕ уӕззау цӕфтӕ йӕ сурӕнт.

¹³ Ӕз зонын, Хуыцау балӕудзӕн
      ӕфхӕрдтытӕн сӕ хъуыддаджы,
      рахӕсдзӕн ӕнӕхӕрам тӕрхон мӕгуыртӕн.
¹⁴ Бӕлвырд, сыгъдӕджытӕ стаудзысты Дӕ ном,
      рӕстытӕ цӕрдзысты Дӕ цӕсгомы раз.

140 Псалом

¹ Давиды псалом.

      О Дунедарӕг, Дӕумӕ дзурын: тагъддӕр мӕм ӕрцу.
      Куы Дӕм фӕкувын, уӕд-иу фехъус мӕ хъӕлӕс.
² Мӕ куывд фӕхӕццӕ уӕд Дӕ размӕ
      буды хӕрздӕфау;
      мӕ къухтӕ Дӕм куы сдарын, уӕд иу-ӕй айс
      изӕры нывондӕн.

³ О Дунедарӕг, уромӕг сӕвӕр ме 'взагӕн,
      мӕ комы дуар мын бахъахъхъӕн.
⁴ Баххуыс мын кӕн, цӕмӕй мӕ зӕрдӕ
      ма аздӕха фыдӕхмӕ,
      ӕвзӕр митӕ чи кӕны, уыцы фыдлӕгты хъуыддӕгты
      архайаг ма уон;
      хорз сӕм цы кӕсы, уымӕй хай ма райсон.
⁵ Уадз, мӕ азым мын зӕгъа рӕстгӕнӕг,
      уый – хорзӕх у;
      уадз ӕмӕ мын бауайдзӕф кӕна –
      уый хӕрздӕф зети у мӕ сӕрӕн,
      мӕхи дзы нӕ аиуварс кӕндзынӕн.
      Фӕлӕ мӕ кувын фыдлӕгты миты ныхмӕ у.

⁶ Сӕ тӕрхоны лӕгтӕ ӕппӕрст ӕрцӕудзысты
      къӕдзӕхтӕй ӕмӕ уӕд бамбардзысты,
      мӕ ныхӕстӕ ахсджиаг кӕй уыдысты, уый.
⁷ Ӕмӕ зӕгъдзысты: «Зӕхх куыд бахуым кӕнынц
      ӕмӕ йын йӕ къуыбӕрттӕ куыд фехалынц,
      афтӕ згъӕлынц не стджытӕ дӕр
      гом ингӕны былмӕ».

⁸ Фӕлӕ мӕнӕн та Дӕумӕ у мӕ каст,
      мӕ Хицау Хуыцау;
      Дӕумӕ ссарын фидар ӕнцой –
      ма ныууадз мӕ уды дзӕгъӕлӕй.
⁹ Бахиз мӕ, кӕй мын сӕвӕрдтой,
      уыцы сахсӕнтӕй,
      фыдгӕнджыты ӕвӕрд къӕппӕджытӕй.
¹⁰ Фыдлӕгтӕ се 'ппӕт дӕр бахауӕнт
      сӕхи ӕвӕрд сахсӕнты,
      ӕз та сӕ иувӕрсты ацӕудзынӕн ӕдасӕй.

141 Псалом

¹ Давиды зондамонӕн псалом.
      Афтӕ куывта, лӕгӕты куы уыди, уӕд.

      Хъӕрӕй кувын Дунедарӕгмӕ,
      Хуыцауӕн лӕгъстӕ кӕнын хъӕлӕсыдзагӕй.
² Мӕ хъӕстытӕ Йын ракодтон зӕрдӕбынӕй,
      Йӕ разы радзырдтон мӕ хъыгтӕ.

³ Мӕ уд мӕ мидӕг куы сӕдых,
      уӕд ӕрмӕст Ды зыдтай мӕ цӕуӕнтӕ.
      Ӕз цы фӕндагыл цӕуын,
      ууыл сусӕгӕй айтыгътой хыз.
⁴ Кӕсын рахизырдӕм ӕмӕ уынын –
      ничи мӕ нымайы.
      Кӕм ма балӕууон, уый мын нал ис;
      мӕ удыл ничи тыхсы.

⁵ Ӕз сдзынӕзтон Дӕумӕ, О Дунедарӕг,
      ӕмӕ загътон: «Ды дӕ мӕ сӕрылхӕцӕг,
      мӕ амонды хай царды зӕххыл».
⁶ Фехъус мын мӕ дзыназын,
      уымӕн ӕмӕ тынг слӕмӕгъ дӕн;
      мӕ фӕдыл чи зилы, уыдонӕй мӕ бахиз,
      уымӕн ӕмӕ мӕнӕй тыхджындӕр сты.
⁷ Ссӕрибар кӕн ахӕстонӕй мӕ уды,
      ӕмӕ стаудзынӕн Дӕ ном.
      Дӕ арфӕйӕ мӕ куы схайджын кӕнай,
      уӕд рӕстытӕ ӕрӕмбырд уыдзысты мӕ алыварс.

142 Псалом

¹ Давиды псалом.

      О Дунедарӕг, фехъус мӕ куывд,
      Дӕ хъус ӕрдар мӕ лӕгъстӕмӕ;
      ратт мын дзуапп, уымӕн ӕмӕ Ды иузӕрдион
      ӕмӕ рӕстаг Дӕ.
² Тӕрхонмӕ ма 'ркӕн Дӕ цагъары,
      уымӕн ӕмӕ иу адӕймаг дӕр
      не сраст уыдзӕни Дӕ разы.

³ Знаг зилы мӕ фӕдыл, зӕххӕмвӕз скодта мӕ цард;
      рагон мард цыма дӕн, уыйау мӕ ӕппары талынджы.
⁴ Мӕ уд баруад мӕ мидӕг, мӕ зӕрдӕ тыхсы мӕ риуы.

⁵ Мысын рагон бонтӕ, хъуыды кӕнын
      Де 'ппӕт хъуыддӕгтыл,
      дис кӕнын Дӕ къухты скондыл.
⁶ Дӕумӕ дарын мӕ цӕнгтӕ;
      дойныгӕнӕг зӕххау мӕ уд Дӕумӕ тырны. ||

⁷ Батагъд кӕн мӕнӕн дзуапп раттыныл, Дунедарӕг –
      мӕ уд баруад мӕ мидӕг;
      Де 'ргом ма аздах мӕнӕй,
      цӕмӕй ингӕнмӕ цӕуджытау ма суон.
⁸ Уадз сӕуӕхсид ӕрхӕсса мӕнӕн
      Дӕ уарзондзинады уац –
      ӕз мӕ зӕрдӕ Дӕуыл дарын.
      Бацамон мын, цы фӕндагыл мӕ
      цӕуын хъӕуы, уый –
      мӕ уды куывд Дӕумӕ хӕссын.
⁹ Фервӕзын мӕ кӕн, О Дунедарӕг, ме знӕгтӕй –
      Дӕ дӕлбазыр бакӕндзынӕн мӕхи.

¹⁰ Сахуыр мӕ кӕн Дӕ фӕндон ӕххӕст кӕнын,
      уымӕн ӕмӕ Ды мӕ Хуыцау дӕ;
      уадз ӕмӕ мӕ Дӕ фӕрнӕйдзаг Уд
      кӕна раст фӕндагыл.
¹¹ Дӕ номы сӕраппонд мӕ райгас кӕн, Дунедарӕг;
      Дӕ рӕстадмӕ гӕсгӕ рахизын кӕн мӕ уды
      йӕ хъизӕмӕрттӕй.
¹² Дӕ хорзӕхмӕ гӕсгӕ кӕрон скӕн ме знӕгтӕн;
      ме 'ппӕт фыдгулты бабын кӕн,
      уымӕн ӕмӕ ӕз Дӕ цагъар дӕн.

143 Псалом

¹ Давиды псалом.

      Арфӕгонд у Хуыцау, мӕ къӕдзӕх;
      Уый мын ме 'рмттӕ цӕттӕ кӕны хӕцынмӕ,
      мӕ къухы хилтӕ – тохмӕ.
² Уый мӕ уарзӕгой Хуыцау у, мӕ фидар,
      мӕ мӕсыг, мӕ Ирвӕзынгӕнӕг ӕмӕ мӕ уарт –
      Уый у мӕ хъахъхъӕнӕг.
      Уый мӕ адӕмы кӕны мӕ дӕлбар.

³ О Дунедарӕг! Цы у адӕймаг, ӕмӕ йыл Ды аудай,
      кӕнӕ цы у лӕджы фырт, ӕмӕ йӕ Дӕ зӕрдыл дарай?
⁴ Адӕймаджы цард уддзӕфау у;
      йӕ бонтӕ айсӕфынц аууонау.

⁵ О Дунедарӕг! Ӕркъул кӕн Дӕ уӕлӕрвтӕ ӕмӕ ӕрцу;
      андзӕв хӕхтыл, ӕмӕ сӕ фӕздӕг скӕлдзӕни.
⁶ Рарвит Дӕ ӕрвӕрттывд ӕмӕ ныффӕйлау знӕгты;
      рауадз Дӕ фаттӕ ӕмӕ сӕ лидзӕг фӕкӕн.
⁷ Бӕрзондӕй ӕрдар Дӕ къух,
      фервӕзын мӕ кӕн ӕмӕ мӕ бахиз стыр дӕттӕй,
      ӕцӕгӕлон адӕмы къухӕй;
⁸ Уыдонӕн сӕ дзыхӕй рацӕуы фӕлывд ныхас,
      сӕ рахиз къух мӕнгардӕй дзаг у.

⁹ Азардзынӕн Дын ног зарӕг, Хуыцау;
      дӕсхъисон фӕндыры зӕлтӕй зардзынӕн Дӕуӕн –
¹⁰ Паддзӕхтӕн уӕлахиз дӕттӕгӕн
      ӕмӕ Давиды, Дӕ цагъары,
      мӕлӕтхӕссӕг цирхъӕй Ирвӕзынгӕнӕгӕн.

¹¹ Бахиз мӕ, фервӕзын мӕ кӕн
      ӕцӕгӕлон адӕмы къухӕй;
      уыдонӕн сӕ дзыхӕй рацӕуы фӕлывд ныхас,
      сӕ рахиз къух мӕнгардӕй дзаг у.

¹² Уадз нӕ фырттӕ се 'рыгонӕй уой,
      бӕрзонд чи фӕцыд, ахӕм бӕлӕстау,
      нӕ чызджытӕ – галуаны аив нывӕфтыд
      цӕджындзтау.
¹³ Нӕ хордӕттӕ уӕнт дзаг алыхуызон хоры бӕркадӕй;
      нӕ фыстӕ дӕттӕнт уӕрыччытӕ мингӕйттӕй,
      ӕмӕ дӕсгай минтӕй нӕ сӕрвӕтты;
¹⁴ Уадз нӕ галтӕ уӕнт хӕрзхаст.
      Ма нӕм ӕрбацӕуӕд бырсджытӕ,
      ма уӕд ам уацаргӕнджытӕ,
      ма хъуысӕд нӕ уынгты хъарӕг.

¹⁵ Тӕхудиаг сты ӕппӕт уыдӕттӕй хайджын адӕм!
      Тӕхудиаг сты,
      Дунедарӕг сӕ Хуыцау кӕмӕн у, уыцы адӕм!

144 Псалом

¹ Давиды кады зарӕг Хуыцауӕн.

      Бӕрзонд скӕндзынӕн Дӕ кад,
      мӕ Хуыцау ӕмӕ мӕ Паддзах,
      стаудзынӕн Дӕ ном мыггагӕй-мыггагмӕ.
² Ӕрвылбон стаудзынӕн Дӕу ӕмӕ ӕппӕлдзынӕн
      Дӕ номӕй мыггагӕй-мыггагмӕ.

³ Стыр у Хуыцау ӕмӕ у ӕппӕтӕй бӕрзонддӕр
      кады аккаг;
      Йе стырадыл зонд не 'ххӕссы.
⁴ Иу фӕлтӕр иннӕмӕн ӕппӕлдзӕн
      Дӕ хъуыддӕгтӕй;
      Де стыр хъомыс уыдзӕни сӕ дзырды сӕр.
⁵ Дзурдзысты Дӕ бӕрзонд кады рухсы тыххӕй,
      ӕмӕ мӕнӕн мӕ хъуыдытӕ уыдзысты
      Дӕ диссаджы хъуыддӕгтыл.
⁶ Уыдон дзурдзысты Дӕ тасӕфтауӕг хъаруйыл,
      ӕмӕ ӕз хӕсдзынӕн Де стырады тыххӕй уац.
⁷ Де стыр хорзӕхы мысинӕгтӕ дзурдзысты
      кӕрӕдзийӕн,
      цин кӕндзысты Дӕ рӕстадыл.

⁸ Хатыргӕнаг ӕмӕ фӕлмӕнзӕрдӕ у Дунедарӕг,
      бирӕ быхсы, ӕнӕкӕрон у Йӕ уарзт.
⁹ Зӕрдӕхӕларӕй кӕсы алкӕмӕ дӕр Дунедарӕг,
      фӕлмӕн у Йӕ зӕрдӕ Йе 'ппӕт скондмӕ.
¹⁰ Уадз ӕмӕ Дын кад кӕнӕнт Дӕ ӕппӕт сконд,
      О мӕ Хуыцау,
      Дӕ сыгъдӕджытӕ стауӕнт Дӕу.
¹¹ Уыдон дзурдзысты Дӕ паддзахады кадыл,
      хъусын кӕндзысты Де стыр хъомысы уац;
¹² Цӕмӕй адӕм базоной Де стыр хъомысы тыххӕй,
      Дӕ паддзахады кад ӕмӕ стырады тыххӕй.
¹³ Дӕ паддзахад – ӕппӕт ӕнусты паддзахад,
      Ды паддзахиуӕг кӕндзынӕ фӕлтӕрӕй-фӕлтӕрмӕ.
      Хуыцау иузӕрдион у Йӕ алы ныфсӕвӕрды,
      фӕлмӕн у Йӕ зӕрдӕ Йе 'ппӕт скондмӕ.

¹⁴ Чи фӕкӕлы, Хуыцау уыдоныл схӕцы,
      сӕргуыбыртӕн ратты ныфс.
¹⁵ Зӕххы ӕппӕт цӕрджытӕн Дӕумӕ у се скаст,
      ӕмӕ сын Ды дӕттыс хойраг сӕ афоныл.
¹⁶ Байгом кӕныс Дӕ арм ӕмӕ бафсадыс,
      ӕппӕт зӕххыл цӕрджыты сӕ зӕрдӕйы фӕндиаг.

¹⁷ Хуыцау Йӕ алы хъуыддаджы дӕр рӕстаг у,
      фӕлмӕн у Йӕ зӕрдӕ Йе 'ппӕт скондмӕ.
¹⁸ Хуыцау ӕввахс у, чи Йӕм кувы, ӕппӕт уыдонмӕ –
      рӕстзӕрдӕйӕ Йӕм чи кувы, уыдонмӕ се 'ппӕтмӕ дӕр.
¹⁹ Чи Йӕ нымайы, уыдонӕн ӕххӕст кӕны
      сӕ бӕллицтӕ,
      хъусы сын сӕ дзыназын ӕмӕ сӕ ирвӕзын кӕны.
²⁰ Чи Йӕ уарзы, уыдон се 'ппӕты дӕр
      хъахъхъӕны Дунедарӕг,
      ӕппӕт фыдлӕгты та байсафдзӕн.

²¹ Хуыцауӕн кады ныхӕстӕ уыдзысты
      мӕ былалгъыл;
      алы адӕймаг дӕр стауӕнт Йӕ сыгъдӕг ном
      мыггагӕй-мыггагмӕ!

145 Псалом

¹ Алилуйа!

      Ӕппӕл, мӕ уд, Хуыцауӕй.
² Цалынмӕ цӕрон, уӕдмӕ ӕппӕлдзынӕн
      Дунедарӕгӕй;
      цалынмӕ удӕгас дӕн, уӕдмӕ зардзынӕн
      мӕ Хуыцауӕн.

³ Уӕ ныфс ма ӕвӕрут тыхджынтыл,
      стӕй адӕймаджы фырттӕй иунӕгыл дӕр –
      уымӕ нӕй ирвӕзындзинад.
⁴ Йӕ уд дзы ахицӕн вӕййы,
      ӕмӕ йӕхӕдӕг сыджытмӕ ныздӕхы;
      уыцы бон ӕрбайсӕфынц йӕ фӕндтӕ.

⁵ Тӕхудиаг сты, Иаковы Хуыцау ӕххуысгӕнӕг
      кӕмӕн у,
      ӕмӕ Дунедарӕгыл, йӕ Хуыцауыл
      йӕ зӕрдӕ чи дары, уыдон;
⁶ Уыцы Хуыцау сфӕлдыста арв ӕмӕ зӕхх,
      денджыз ӕмӕ дзы цыдӕриддӕр ис, уыдон;
      Уый иузӕрдион у мыггагмӕ.
⁷ Уый рахӕцы ӕфхӕрдты сӕрыл,
      дӕтты хойраг ӕххормӕгтӕн;
      Дунедарӕг сӕрибар кӕны ахстыты.
⁸ Хуыцау куырмытӕн ратты цӕсты рухс,
      Уый сӕргуыбыртӕн ратты ныфс;
      Хуыцау уарзы рӕстгӕнджыты.
⁹ Дунедарӕг хъахъхъӕны ӕрцӕуӕггӕгты,
      ӕххуыс кӕны сидзӕрӕн ӕмӕ идӕдзӕн;
      фыдлӕгтӕн та Уый байсафдзӕни сӕ фӕндӕгтӕ.

¹⁰ Дунедарӕг паддзахиуӕг кӕндзӕн мыггагмӕ,
      Дӕ Хуыцау, Сион, фӕлтӕрӕй-фӕлтӕрмӕ.

      Алилуйа!

146 Псалом

¹ Алилуйа!

      Куыд ӕхцон у нӕ Хуыцауы кадӕн зарын;
      Уый аккагӕй стауын куыд адджын у зӕрдӕйӕн.

² Дунедарӕг амайы Иерусалим,
      ӕмбырд кӕны Израилы уацарӕй;
³ Дзӕбӕх кӕны састзӕрдӕты,
      хос кӕны сӕ хъӕдгӕмттӕн.

⁴ Уый бӕлвырд кӕны стъалыты нымӕц;
      алкӕйдӕр дзы хоны йӕ номӕй.
⁵ Стыр у нӕ Хицау Хуыцау, стыр у Йӕ хъомыс;
      Йӕ зондӕн кӕрон нӕй.
⁶ Дунедарӕг сбӕрзонд кӕны сӕрныллӕджыты,
      фыдлӕгты та зӕххы онг ӕрӕппары.

⁷ Зарут Дунедарӕгӕн бузныджы зарӕг,
      кад кӕнут нӕ Хуыцауӕн аив зӕлтӕй
      дала-фӕндырыл.
⁸ Уый арв бамбӕрзы мигътӕй,
      зӕххмӕ рарвиты уарынтӕ,
      хӕхтӕ сфӕлындзы зайӕг халӕй.
⁹ Фосӕн дӕтты холлаг,
      халоны лӕппынтӕн дӕр, куы схъӕр кӕнынц, уӕд.

¹⁰ Уымӕн ахсджиаг нӕу бӕхы тых,
      нӕдӕр Ын тагъд згъораг адӕймаг у бӕллиццаг;
¹¹ Дунедарӕгӕн бӕллиццаг сты, чи Йӕ нымайы,
      Йӕ хорзӕхыл Ын йӕ зӕрдӕ чи дары, уыдон.

147 Псалом

¹ Зар Дунедарӕгӕн, Иерусалим;
      Сион, ӕппӕл Хуыцауӕй;
² Уый фидар кӕны Дӕ кулдуары ӕхгӕнӕнтӕ,
      арфӕ кӕны дӕ цӕрджытӕн;
³ Дӕ арӕнтыл тауы фарн;
      ӕфсады дӕ мӕнӕуы хуыздӕрӕй.

⁴ Ӕрвиты Йӕ уынаффӕ зӕххӕн;
      Йӕ ныхас ӕвиппайды ныххӕццӕ вӕййы.
⁵ Ӕркалы мит, къуымбилау урс;
      ӕртхутӕгау згъалы халас.
⁶ Йӕ их ӕрӕппары къӕртгай;
      Йӕ уазалӕн чи бафӕраздзӕн?
⁷ Рарвиты Йӕ ныхас ӕмӕ их батайын кӕны;
      радымы Йӕ дымгӕ ӕмӕ азгъорынц дӕттӕ.

⁸ Уый Йӕ ныхас раргом кодта Иаковӕн,
      Йӕ фӕдзӕхстытӕ ӕмӕ Йӕ уынаффӕтӕ –
      Израилӕн.
⁹ Хуыцау ӕппӕт уыдӕттӕ иннӕ адӕмӕй
      никӕмӕн скодта,
      ӕмӕ Йын уыдон Йӕ уынаффӕтӕ нӕ зонынц.

      Алилуйа!

148 Псалом

¹ Алилуйа!

      Стаут Дунедарӕджы уӕлӕрвтӕй,
      стаут Ӕй ӕрвон бӕрзӕндты.
² Стаут Ӕй, ӕппӕт Йӕ зӕдтӕ,
      стаут Ӕй, Йӕ ӕппӕт уӕларвон ӕфсӕдтӕ.
³ Стаут Ӕй, хур ӕмӕ мӕй,
      стаут Ӕй, ӕппӕт ӕрттиваг стъалытӕ.
⁴ Стаут Ӕй, ӕппӕтбӕрзонд уӕлӕрвтӕ
      ӕмӕ арвы сӕрмӕ чи ис, уыцы дӕттӕ.
⁵ Уӕдӕ стауӕнт се 'ппӕт дӕр Дунедарӕджы ном,
      уымӕн ӕмӕ Уый радта бардзырд,
      ӕмӕ уыдон сырӕзтысты.
⁶ Сӕвӕрдта сӕ ӕнусты кӕронмӕ;
      радта сын уагӕвӕрдтӕ, ӕмӕ сӕ ничи аивдзӕн.

⁷ Стаут Дунедарӕджы зӕххӕй,
      егъау денджызон цӕрӕгойтӕ
      ӕмӕ дӕтты ӕппӕт ӕрфытӕ,
⁸ Зынг ӕмӕ ихуард, мит ӕмӕ мигъ,
      ӕвирхъау уад – Уымӕн Йӕ дзырд ӕххӕстгӕнӕг,
⁹ Хӕхтӕ ӕмӕ ӕппӕт обӕуттӕ,
      дыргъбӕлӕстӕ ӕмӕ ӕппӕт нӕзытӕ,
¹⁰ Сырдтӕ ӕмӕ ӕппӕт фос,
      хилджытӕ ӕмӕ базырджын мӕргътӕ.
¹¹ Зӕххон паддзӕхтӕ ӕмӕ ӕппӕт адӕмтӕ,
      уӕздӕттӕ ӕмӕ ӕппӕт тӕрхонгӕнджытӕ зӕххыл,
¹² Ӕрыгон лӕппутӕ ӕмӕ чындздзон чызджытӕ,
      зӕрӕдтӕ ӕмӕ кӕстӕртӕ
¹³ Стауӕнт Дунедарӕджы ном;
      иунӕг Уый ном – ӕппӕтӕй бӕрзонддӕр,
      Йе стырад – зӕхх ӕмӕ арвӕй уӕлдӕр.

¹⁴ Хуыцау радта Йӕ адӕмӕн тых,
      скадджын кодта Йӕ ӕппӕт сыгъдӕджыты,
      Израилы хъӕбулты, ӕввахс Ӕм чи у, уыцы адӕмы.

      Алилуйа!

149 Псалом

¹ Алилуйа!

      Зарут Хуыцауӕн ног зарӕг,
      Йӕ кадӕн сыгъдӕджыты ӕмбырды.

² Сцин кӕнӕд Израил Йе Сфӕлдисӕгыл;
      Сионы хъӕбултӕ райӕнт сӕ Паддзахыл.
³ Ӕппӕлут Йӕ номӕй цӕугӕзардӕй,
      зарут Ын гуымсӕгыл ӕмӕ дала-фӕндыртыл
      цӕгъдгӕйӕ,

⁴ Уымӕн ӕмӕ Хуыцау ауды Йӕ адӕмыл,
      сӕрныллӕджытӕн дӕтты ирвӕзындзинады
      кады худ.
⁵ Сыгъдӕджытӕ райӕнт уыцы уӕлахизыл,
      фырцинӕй зарӕнт сӕ сынтӕджытыл дӕр.

⁶ Стауӕнт Хуыцауы хъӕлӕсыдзагӕй,
      дыком цирхъ уӕд сӕ къухы,
⁷ Цӕмӕй адӕмтӕй райса Йӕ маст,
      бафхӕра адӕмыхӕттыты,
⁸ Сӕ паддзӕхты сын сбӕтта рӕхыстӕй,
      се 'лдӕртты – ӕфсӕн хъадамантӕй,
⁹ Йӕ дзырдмӕ гӕсгӕ сын куыд стӕрхон кӕна.
      Уый кад у Йӕ ӕппӕт сыгъдӕджытӕн.

      Алилуйа!

150 Псалом

¹ Алилуйа!

      Стаут Хуыцауы Йӕ рухс Кувӕндоны;
      стаут Ӕй хъомысджын уӕлӕрвты.
² Стаут Йӕ тыхджын хъуыддӕгтӕ,
      стаут Йӕ ӕгӕрон стырад.
³ Стаут Ӕй сыкъауадындзы зӕлтӕй;
      стаут Ӕй дыууадӕстӕнонтыл
      ӕмӕ дала-фӕндыртыл.
⁴ Стаут Ӕй дала ӕмӕ цӕугӕзардӕй,
      стаут Ӕй хъисфӕндыртыл ӕмӕ уадындзыл.
⁵ Стаут Ӕй ӕмдзӕвдгӕнӕнты зӕлтӕй,
      стаут Ӕй ӕмдзӕвдгӕнӕнты зылангӕй.

⁶ Алы удгоймаг дӕр стауӕнт Хуыцауы!

      Алилуйа!

Жанртӕ

Ӕппӕт зарджытӕ дӕр адихгӕнӕн ис цалдӕр сӕйраг хуызыл: арфӕ кӕнын, бузныг зӕгъын, кӕуыны, Йерусалимы кадыл зарджытӕ, Хуыцауыл ӕууӕндыны гимн, Израилы паддзӕхтыл сӕрмагонд худтӕ ныккӕныны гимнтӕ, куырыхондзинад, рӕстзӕрдӕ амоныны, стӕй, аргъуаны кӕй кӕнынц, уыцы зарджытӕ.

Псалом ныффыссӕг йӕ разы цы хӕс ӕвӕрдта, куыд сарӕзта йӕ псалом, ууыл баст у, йӕ ирон тӕлмацы чиныг жанртӕм гӕсгӕ дихгонд куыд ӕрцыд, уый.

1. Кадгӕнӕг псаломтӕ

Уыдон вӕййынц ӕртӕ хайӕ арӕзт: 1 – Хуыцауӕн кад кӕнынмӕ сидт, 2 – кад цӕй тыххӕй чындӕуы, уый, 3 – фыццаг дыууӕ хайы ногӕй зӕгъын.

Уыдон сты 8, 23, 28, 32, 99, 104, 110, 112, 116, 134, 135, 146 ӕмӕ 147 псалом.

2. Арфӕйы псаломтӕ

Адон вӕййынц арфӕтӕ Хуыцауӕн иу адӕймаджы кӕнӕ цалдӕр адӕмы фервӕзын кӕныны тыххӕй, зын уавӕры куы бахауынц, уӕд.

Уыдон сты 17, 20, 29, 31, 33, 39, 65, 66, 106, 115, 117, 123 ӕмӕ 137 псалом.

3. Кӕуыны псаломтӕ

Ацы псаломты хицӕн адӕймаг кӕнӕ къорд, ӕхсӕнад тыхст рӕстӕг фӕсидынц Хуыцаумӕ, сӕ хъаст Ӕм хӕссынц, курынц, цӕмӕй сын баххуыс кӕна, зӕрдӕ Йын бавӕрынц уыцы ӕххуысы тыххӕй нывонд ӕрхӕссынӕй.

Хицӕн (иу адӕймаджы) куыдтытӕ: 3, 5, 6, 12, 21, 41, 42, 50, 53, 54, 58, 60, 61, 63, 68, 69, 70, 85, 87, 140 ӕмӕ 142 псаломтӕ.

Иумӕйаг (коллективон) куыдтытӕ: 11, 43, 59, 73, 78, 79, 82, 89, 93, 105, 122 ӕмӕ 136 псаломтӕ.

4. Паддзахы псаломтӕ

Ацы зарджытӕ дзурӕг сты израилаг паддзахыл, Хуыцау иннӕ израилаг паддзӕхты ӕхсӕн кӕй равзӕрста ӕмӕ Йӕ нысан кӕуыл сӕвӕрдта, ууыл: 2, 17, 19, 20, 44, 60, 62, 71, 88, 100, 109, 131 ӕмӕ 144 псалом.

5. Зарджытӕ Иерусалимыл

Ацы зарджыты къорд нысангонд у Иерусалимӕн (Сионӕн) – Израилы политикон, культурон ӕмӕ дины центрӕн: 45, 47, 75, 83, 86 ӕмӕ 121 псалом.

6. Кувӕндонмӕ цӕуыны зарджытӕ

Ацы зарджытӕ-иу кодтой, Иерусалимы Кувӕндонмӕ (Сионмӕ) чи цыди, уыцы бӕлццӕттӕ, фӕндагыл цӕугӕйӕ: 119–133-ӕм псаломтӕ.

7. Бӕрӕгбоны псаломтӕ Хуыцауы кадӕн

Ацы къордмӕ хауынц, ӕртӕ стыр дзуттаг бӕрӕгбӕтты рӕстӕг кӕй зарыдысты, уыдон: Куадзӕны, Хорысӕры ӕмӕ Халагъудты бӕрӕгбӕтты рӕстӕг. Куадзӕны рӕстӕг зарыдысты ӕхсӕвӕры размӕ 112–113-ӕм псаломтӕ, ӕхсӕвӕры фӕстӕ та – 114–117.

8. Куырыхондзинады псаломтӕ

Адонӕн сӕ сӕйраг нысан у адӕмы Хуыцауы Фӕдзӕхстыл ахуыр кӕнын. Сӕ мидис у хӕрзӕгъдаудзинадӕй ӕппӕлын ӕмӕ мӕстӕлгъӕд ӕнӕуаг митӕ фауын. Уырнӕг адӕймагӕн ӕмбарын кӕнынц, Хуыцауы Фӕдзӕхстмӕ хъусын фарн ӕмӕ ӕнӕниздзинад кӕй хӕссы, уый. Зӕгъӕм, 1, 18, 31, 36, 48, 72, 110, 111, 118-ӕм псаломы фылдӕр хай, стӕй 132 ӕмӕ 138-ӕм псалом.

9. Паддзахы (галуаны) псаломтӕ

Ацы псаломтӕ Хуыцауы арӕх схонынц Паддзах. Иуӕй-иу иртасджытӕ сӕ бӕттынц Ног азы бӕрӕгбонимӕ. Уыцы бон-иу дзырдтой, Хуыцау, дам, Израилӕн ӕмӕ ӕппӕт дунейӕн дӕр хицауиуӕг кӕны.

Уыдон сты 28, 46, 92, 94–98 псаломтӕ.

10. Кувыны псаломтӕ

Адон ӕнгом баст сты кувӕндоны архайынимӕ ӕмӕ уырнондзинадимӕ: 4, 10, 14, 15, 22, 24, 26, 45, 61, 62, 84, 89, 90, 120, 124 ӕмӕ 130 псалом.