После обычного начала и 90-го псалма произносится мирная ектения.

На мирной ектении прилагаются сия прошения:

О еже простити нам вся согрешения наша, и милостивно избавити нас от обстояния врагов наших, Господу помолимся.

О еже не воздати врагом нашим по делом их, ни по лукавству начинания их, но обратити их от злаго их предложения ко благотворению и любви, Господу помолимся.

О еже неверных к правоверию обратити, верных же к благочестию, всех же вражду и ненависть в братолюбие, мир и совершенную любовь претворити, Господу помолимся.

О еже не оставити ни единаго от них нас ради погибнути, но еже уклонитися от зла, и творити благое, благодатию Своею всех привлещи, Господу помолимся.

О еже вражды, ненависти же и вся злая дела во всех нас искоренити, любовь же нелицемерную, и мирное и добродетельное житие в преспеянии веры вкоренити, Господу помолимся.

О еже не оставити их нас ради погибнути, ниже нас, тех ради, но всех к разуму истины привести и благодатию Своею спасти, Господу помолимся.

На Бог Господь

Тропарь, глас 4:

О распенших Тя моливыйся, любодушне Господи, и рабом Твоим о вразех молитися повелевый, ненавидящих и обидящих нас прости, и от всякаго зла и лукавства, к братолюбному и добродетельному настави жительству, смиренно мольбу Тебе приносим: да в согласном единомыслии славим Тя, единаго Человеколюбца.

Слава и ныне, глас 5.

Якоже первомученик Твой Стефан, о убивающих его моляше Тя Господи, и мы припадающе молим, ненавидящих всех и обидящих нас прости, во еже ни единому от них нас ради погибнути, но всем спастися, благодатию Твоею, Боже Всещедрый.

Прокимен, глас 4:Да возвратятся врази мои вспять, воньже аще день призову Тя.

Стих:На Бога уповах, не убоюся, что сотворит мне человек?

Апостол: Рим. зач. 110.

Евангелие:Мф.зач. 15.

На сугубой ектении прилагаются сия прошения (о ненавидящих и обидящих нас):

Заповедь Твою, Спасе, еже любити враги наша и благотворити ненавидящим нас, по силе исполняюще, прилежно молим, обрати, яко Милостив, всех врагов наших лукавое на нас и на Церковь Твою намерение — к любви и примирению, и ко всякой благостыни, да не в злобах своих погибнут, молим Ти ся, Всемилостивый Господи, услыши и помилуй.

О распенших Тя моливыйся, Человеколюбче Владыко, и нас озлобляющия враги от злоб к добродетельному жительству обрати, яко да ни един нас ради погибнет, но вси в покаянии да спасемся, молим Ти ся, любодушне Господи, услыши и помилуй.

Неверных врагов наших к правоверию и благочестию, верных же к примирению и братолюбию обратитися принуди, Всещедрый Господи, да в любви и согласии заповеди Твоя исполняюще, Тебе славим всех Благодателя, молим Ти ся, услыши и помилуй.

Со святым Стефаном вопием к Тебе: Боже отмщений, Господи, не постави греха врагом, ненавидящим и обидящим нас, но по велицей милости Твоей к покаянию обрати и помилуй их; нас же от всякаго злаго их обстояния (советы лукавыя и коварства их разорив), всесильною Твоею десницею изми и избави, молим Ти ся, Вседержавный Царю, скоро услыши и милостивно помилуй.

Зри:Сия вся прошения на молебнах: общия, покаянныя, благодарственная, о путешествующих, о недужных, о всяком добром деле, о умножении любве и о ненавидящих нас — печатаны суть в Иерейском молитвослове и Книге молебных пений.