Господь наш Иисус Христос, Божественною Своею благодатию, даром же и властию, данною святым Его учеником и апостолом, во еже вязати и решити грехи человеков, (рек им: приимите Духа Святаго, ихже отпустите грехи, отпустятся им: ихже удержите, удержатся: и елика аще свяжете и разрешите на земли, будут связана и разрешена и на небеси). От онех же и на ны друг другоприимательно пришедшею, да сотворит чрез мене смиреннаго прощенно и сие по духу чадо(имя)от всех, елика яко человек согреши Богу словом или делом, или мыслию, и всеми своими чувствы, волею или неволею, ведением или неведением. Аще под клятвою или отлучением архиерейским бысть, или аще клятву отца своего или матере своея наведе на ся, или своему проклятию подпаде, или клятву преступи, или иными некиими грехи яко человек связася: но о всех сих сердцем сокрушенным покаяся, и от тех всех вины и юзы да разрешит его (ю); елика же за немощь естества забвению предаде, и та вся да простит ему (ей), человеколюбия ради Своего, молитвами Пресвятая и Преблагословенныя Владычицы и Приснодевы Марии, святых славных и всехвальных апостол, и всех святых. Аминь.