На сугубой ектении

(прошения общие):

Еще молимся Тебе, Господу Богу нашему, еже услышатися гласу моления нашего и молитве, и помиловати рабов Твоих(имена)благодатию и щедротами Твоими, и исполнити вся прошения их, и простити им вся согрешения вольная и невольная; благоприятным же быти мольбам и милостыням их пред Престолом Владычествия Твоего, и покрыти их от враг видимых и невидимых, от всякия напасти, беды и скорби, и недугов избавити, подати здравие с долгоденствием; рцем вси: Господи, скоро услыши и милостивно помилуй.

Призри, Владыко Человеколюбче, милостивным Твоим оком на рабы Твоя(имена)и услыши моления наша с верою приносимая, яко Сам рекл еси: «Вся елика молящеся просите, веруйте, яко приимете, и будет вам», и паки: «Просите, и дастся вам». Сего ради и мы, аще и недостойнии, уповающе на милость Твою, просим: подаждь благость Твою рабом Твоим(имена), и исполни благая желания их, мирно же и тихо в здравии и долгоденствии их соблюди, рцем вси: Господи, скоро услыши и милостивно помилуй.

По потребе прилагают и из сих прошений:

Ангела Твоего, Всемилостиве Господи, хранителя душ и телес рабов Твоих сих, сохраняюща и от всех видимых и невидимых врагов покрывающа, — посли, силою же Твоею Божественною от всякия скорби, беды, нужды, недуга и смертоносныя раны избавляюща, молим Ти ся, Всемогий Владыко, услыши и милостивно помилуй.

О еже утолити в нас вся вражды и нестроения, подати же мир и нелицемерную любовь, благочинное же строение и добродетельное житие, молим Ти ся, Всеблагий Господи, услыши и помилуй.

О еже не помянута безчисленная беззакония и лукавая наша деяния в минувшая лета жизни нашея, и не воздати нам по делом нашим, но в милости и щедротах помянути нас, молим Ти ся, Милосердый Господи, услыши и помилуй.

О еже помянути Церковь Святую Свою, и укрепити, утвердити же, разширити и умирити ю, и невредиму адовы враты и всеми наветы видимых и невидимых врагов непреобориму во веки соблюсти, молим Ти ся, Вседержавный Владыко, услыши и помилуй.

О еже избавити Церковь Святую Свою и всех нас от всякия скорби, беды, гнева и нужды, и от всех врагов видимых и невидимых, здравием же и долгоденствием и миром, и Ангелов Своих ополчением верных Своих всегда оградити, Господу помолимся.

О еже и ныне послушати глас моления нас, недостойных рабов Своих, и добрая намерения и желания верных Своих во благое всегда исполнити, и всегда, яко Щедр, благодеяти нам в Церкви Своей Святей, и всякому верному Своему рабу прошения даровати, Господу помолимся.

На мирной ектении прошения покаянные:

О еже отвратити от нас весь гнев Свой, праведно на ны грех ради наших движимый, и милостивну и благоуветливу быти нам недостойным, Господу помолимся.

О еже благоприятным быти молениям нашим, и простити нам и всем людем Своим вся прегрешения вольная и невольная, в мимошедшия дни и лета зле нами содеянная, Господу помолимся.

О еже отгнати от нас вся душетленная страсти и растленныя обычаи; страх же Свой Божественный всадити в сердца наша, ко исполнению всех заповедей Его, Господу помолимся.

О еже обновити дух правый во утробах наших и укрепити нас в православней вере, и спешных к деланию добрых дел и исполнению всех заповедей Его сотворити, Господу помолимся.

О еже не помянути беззаконий и соблазнов нас, грешных и недостойных рабов Своих, но милостивно очистити грехи наша, и отвратити гнев Свой, праведно движимый на ны, Господу помолимся.

О еже не внити в суд с рабы Своими, и не назрити беззакония наша, но очистити я (их), и милостиву быти, и пощадити люди согрешшия, Господу помолимся.

О еже помянути щедроты и милости Своя, яко от века суть, грехов же юности и неведения нашего не помянути, и помиловати нас, Господу помолимся.

О еже милостивно продолжити рабом Своим покаяния время, и не безгодно яко неплодную смоковницу посещи, но благосердием окопати, и милосердия росою напоити, плодов покаяния и обращения нашего человеколюбне еще ожидая, Господу помолимся.

О еже искоренити вся зависти, рвения, гневы и братоненавидения и вся прочая страсти в нас обретающияся, из нихже истекают вся раздоры и нестроения, Господу помолимся.

О еже услышати молитву нашу и моление наше внушити, и слез наших не премолчати, но ослабити нам и милостивно помиловати, Господу помолимся.

На Бог Господь тропари покаянные, глас 2:

Призри милостивно, Боже, на люди согрешшия, и не презри в покаянии к Тебе припадающих, но яко Благ помилуй, и вскоре праведнаго Твоего избави прещения, молитвами Богородицы, едине Человеколюбче.

Слава, глас тойже:

Не отрини до конца согрешшыя люди Твоя, Владыко, ниже отстави милости и щедроты Твоя от нас, но яко бездна сый щедрот, и милосердия пучина, приими мольбы наша, и избави нас от належащия беды и нужды, Един бо еси благоуветлив.

И ныне, Богородичен:

Скорая миру помощнице, Дево Богородице, Твоего предстательства и крепкаго заступления усердно просим, умилосердися на скорбящия люди и умоли Милостиваго Сына Твоего и Бога, от належащия нас избавити беды и праведнаго Своего прещения, едина в женах Благословенная.

На сугубой ектении — прошения покаянные:

Еще молимся Господу Богу нашему о еже призрети на стенание, слезы и вопль людей Своих и видев озлобление, нищету и смирение наше, милостиву быти и отвратити от нас весь гнев Свой, праведно движимый на ны, и помиловати нас.

Согрешихом и беззаконновахом, и сего ради праведный Твой гнев постиже нас, Господи Боже наш, и сень смертная обыде нас, и ко адовым вратом приближихомся; но к Тебе Богу нашему в болезни нашей умильно вопием: пощади, пощади люди Твоя, и не погуби до конца, смиренно молим Ти ся, услыши и помилуй.

Паче всех согрешихом Тебе и беззаконновахом, Владыко, и аще покаяния не стяжахом, предложение наше вместо покаяния приими, и на милость преложися, молим Ти ся, скоро услыши и помилуй.

Примечание.

Молитвы покаянные и проч., читаемые после молебна, Господу Иисусу Христу и Пресвятой Богородице, помещены в Молитвослове изд. Московской Патриархии. М., 1956.