На великой ектенийи (после «о плавающих»):

О еже помиловати рабы Своя (раба Своего, рабу Свою) —имя— и простити им (ему, ей) всякое прегрешение, вольное же и невольное, и благословити путьшествие их (его, ея), Господу помолимся.

О еже послати им (ему, ей) Ангела мирна, спутника и наставника, сохраняюща, защищающа, заступающа и невредимы (невредимаго, невредиму) соблюдающа от всякаго злаго обстояния, Господу помолимся.

О еже покрыти их (его, ю) и невредимых (невредимаго, невредиму) соблюсти от всех вражиих наветов и обстояний и безпакостны (безпакостна, безпакостну) препроводити и возвратити, Господу помолимся.

О еже безбедно и мирно путьшествие и благополучно возвращение во здравии и всяком благочестии и честности подати им (ему, ей), Господу помолимся.

Тропарь, глас 2:

Путь и истина сый, Христе, спутника Ангела Твоего рабом Твоим (рабу Твоему, рабе Твоей) ныне, якоже Товии иногда, посли, сохраняюща и невредимых (невредимаго, невредиму) к славе Твоей, от всякаго зла во всяком благополучии соблюдающа, молитвами Богородицы, едине Человеколюбче.

Кондак, глас тойже:

Луце и Клеопе во Еммаус спутьшествовавый, Спасе, сшествуй и ныне рабом Твоим (рабу Твоему, рабе Твоей), путьшествовати хотящим (хотящему, хотящей), от всякаго избавляя их (его, ю) злаго обстояния: вся бо Ты, яко Человеколюбец, можеши хотяй.

Прокимен, глас 4:Скажи ми, Господи, путь, воньже пойду, яко к Тебе взях (подъях) душу мою.

Стих:Изми мя от враг моих, Господи, к Тебе прибегох.

Апостол:Деян.зач. 20.

Евангелие:Мф.зач. 34.

На сугубой ектении:

Стопы человеческии исправляяй, Господи, призри милостивно на рабы Твоя (раба Твоего, рабу Твою) —имя, — и простив им (ему, ей) всякое прегрешение, вольное и невольное, благослови благое намерение совета их (его, ея), и исходы и входы со путьшествием исправи, прилежно молим Ти ся, услыши и помилуй.

Исааку и Товии Ангела спутника пославый, и тем путьшествие и возвращение их мирно и благополучно сотворивый, и ныне, Преблаже, Ангела мирна рабом Твоим (рабу Твоему, рабе Твоей), нами Тебе молящимся (молящемуся, молящейся), посли, во еже наставити их (его, ю) на всякое дело благое, и избавити от враг видимых и невидимых и от всякаго злаго обстояния, здраво же, мирно и благополучно к славе Твоей возвратити, усердно молим Ти ся, услыши и помилуй.

Луце и Клеопе в Еммаус спутьшествовавый и весело во Иерусалим возвратитися Твоим преславным познанием сотворивый, спутьшествуй Твоею благодатию, и Божественным благословением, и ныне рабом Твоим сим (рабу Твоему сему, рабе Твоей сей), нами Тебе прилежно молящимся (молящемуся, молящейся) и во всяком деле блазе, к славе пресвятаго Твоего имене благопоспеши, во здравии и благополучии соблюдая и возвращая во время благоподобно, яко Всещедрому Благодетелю молим Ти ся, скоро услыши и милостивно помилуй.

(Причастен:Настави мя, Господи, на путь Твой, и пойду во истине Твоей.)

Молитва (о путешествующих):

Господи Иисусе Христе Боже наш, истинный и живый путю, состранствовати мнимому Твоему отцу Иосифу и Пречистей Ти Деве Матери во Египет изволивый, и Луце и Клеопе во Еммаус спутьшествовавый! И ныне смиренно молим Тя, Владыко Пресвятый, и рабом Твоим сим (рабу Твоему сему, рабе Твоей сей) Твоею благодатию спутьшествуй. И якоже рабу Твоему Товии, Ангела Хранителя и наставника посли, сохраняюща и избавляюща их (его, ю) от всякаго злаго обстояния видимых и невидимых врагов, и ко исполнению заповедей Твоих наставляюща, мирно же и благополучно и здраво препровождающа, и паки цело и безмятежно возвращающа; и даждь им все благое свое намерение ко благоугождению Твоему благополучно в славу Твою исполнити. Твое бо есть, еже миловати и спасати нас, и Тебе славу возсылаем, со Безначальным Твоим Отцем и со Пресвятым и Благим и Животворящим Твоим Духом, ныне и присно и во веки веков. Аминь.