На великой ектении (после «о плавающих...») прилагаются сии прошения:

О еже милостивно нынешнее благодарение и мольбу нас, недостойных рабов Своих (раба Своего, рабы Своея) —имя— в пренебесный Свой жертвенник прияти и благоутробно помиловати нас (его, ю), Господу помолимся.

О еже не возгнушатися благодарением нас непотребных рабов Своих (раба Своего, рабы Своея), еже о приятых от Него благодеяниих во смиренном сердце приносим, но, яко кадило благовонное и всесожжение тучное, благоприятно Ему да будет, Господу помолимся.

О еже и ныне послушати глас моления нас, недостойных рабов Своих (раба Своего, рабы Своея) и доброе намерение и желание верных Своих во благое всегда исполнити и всегда, яко Щедр, благодеяти им (ему, ей), и Церкви Своей Святей и всякому верному Своему рабу прошения даровати, Господу помолимся.

О еже избавити Церковь Свою Святую и рабы Своя (раба Своего, рабу Свою) —имя— и всех нас от всякия скорби, беды, гнева и нужды и от всех врагов видимых и невидимых, здравием же, долгоденствием и миром и Ангел Своих ополчением всегда оградити, Господу помолимся.

Тропарь, глас 4.

Благодарни суще недостойнии раби Твои, Господи, о Твоих великих благодеяниих на нас бывших, славяще Тя хвалим, благословим, благодарим, поем и величаем Твое благоутробие, и рабски любовию вопием Ти: Благодетелю Спасе наш, слава Тебе.

Кондак, глас 3.

Твоих благодеяний и даров туне, яко раби непотребнии, сподобльшеся, Владыко, к Тебе усердно притекающе, благодарение по силе приносим, и Тебе, яко Благодетеля и Творца, славяще, вопием: слава Тебе, Боже Прещедрый.

Прокимен, глас 4:Воспою Господеви, благодеявшему мне, и пою имени Господа Вышняго.

Стих:Возрадуется сердце мое о спасении Твоем.

Апостол:Еф.зач. 229 и 230 (гл. 5).

Аллилуиа, гл. 4.

Стихи:1. Восхвалю имя Бога моего с песнию, возвеличу Его во хвалении.

2. Яко услыша убогия Господь и окованныя Своя не уничижи.

Евангелие:Лк.зач. 4 или зач. 85.

Прошения на сугубой ектений:

Благодаряще со страхом и трепетом, яко раби непотребнии, Твоему благоутробию, Спасе и Владыко наш, Господи, о Твоих благодеяниих, яже излиял еси изобильно на рабы Твоя (раба Твоего, рабу Твою), припадаем, и славословие Тебе, яко Богу, приносим, и умиленно вопием: избави от всех бед рабы Твоя (раба Твоего, рабу Твою) и всегда, яко Милостив, исполни во благих желание всех нас (их, его, ея), прилежно молим Ти ся, услыши и помилуй.

Якоже ныне милостивно услышал еси молитвы рабов Твоих (раба Твоего, рабы Твоея), Господи, и явил еси на них (нем, ней) благоутробие человеколюбия Твоего, сице и в предняя не презирая, исполни во славу Твою вся благая хотения верных Твоих (вернаго Твоего, верныя Твоея) и яви всем нам богатую милость Твою, вся нам согрешения презирая, молим Ти ся, услыши и помилуй.

Благоприятно, яко кадило благовонное и яко тучная всесожжения, да будет, Всеблагий Владыко, благодарение сие наше пред величеством славы Твоея, и низпосли всегда, яко Щедр, рабом Твоим (рабу Твоему, рабе Твоей) богатыя милости и щедроты Твоя, и от всех сопротивлений видимых и невидимых врагов Церковь Твою Святую, обитель сию (илиград сей,иливесь сию) избави, людем же Твоим всем безгрешное со здравием долгоденствие и во всех добродетелех преспеяние даруй, молим Ти ся, Всещедре Царю, милостивно услыши и скоро помилуй.

(На литургии причастен: Благословен Бог, Иже не отстави молитвы моея и милости Своея от мене).