На мирной ектении:

О еже очистити нас от грехов и беззаконий наших, изсушающих в нас, яже к Нему (Богу) и к искреннему любовь, водрузити же ю (ее) силою, действом, и благодатию Пресвятаго Своего Духа, и вкоренити в сердца всех нас, прилежно Господу помолимся.

О еже всеяти, и вкоренити благодатию Пресвятаго Своего Духа новую Своего Новаго Завета заповедь, еже любити друг друга, и не себе угождати, но (вся) яже к славе Его (Божией), и созиданию искренняго всегда искати, Господу помолимся.

О еже искоренити в нас ненависти, зависти же и рвения, и вся прочия страсти, братолюбие разрушающия, и нелицемерную любовь всеяти, усердно Господу помолимся.

О еже теплую любовь к Богу и к искреннему в нас, благодатию Пресвятаго Своего Духа распалити, и тою вся страсти душ и телес наших искорене сожещи, Господу помолимся.

О еже искоренити в нас страсть самолюбия, братолюбия же добродетель силою Пресвятаго Своего Духа вкоренити, сердцем сокрушенным Господу помолимся.

О еже не любити нам мира, и яже в мире, но истинною любовию Бога, и славу Его, и искренняго пользу и спасение возлюбити, и яже на небеси уготованная благая присно зрети, и сих искати, вседушно, Господу помолимся.

О еже не точию други и братию нашу, но и враги наша истинно любити, и ненавидящим нас благотворити, о них молитися, и о спасении их тщание творити, — силою, действом и благодатию Пресвятаго Своего Духа принудити нас, — Господу помолимся.

О еже себе внимати, себе окаявати, и своя согрешения всегда зрети, себе пред Богом и пред всеми смиряти, брата же николиже осуждати, но, яко самого себе, того любити, — силою, действом и благодатию Пресвятаго Духа, — Господу помолимся.

О еже поревновати нам древних христиан к Богу и к искреннему горящей любви, и наследником и преемником тех быти, не образом точию, но детельною истиною, — силою, действом, и благодатию Пресвятаго Духа, — Господу помолимся.

О еже в правоверии непозыблемых, в мире и союзе любве горящих и во всех добродетелех преспевающих нас всегда сохранити, и от всех душетленных страстей невредимых, силою, действом и благодатию Пресвятаго Духа соблюсти, — Господу помолимся.

На Бог Господь

Тропарь, глас 4:

Союзом любве апостолы Твоя связавый, Христе, и нас Твоих верных рабов к Себе тем крепко связав, творити заповеди Твоя, и друг друга любити нелицемерно сотвори, молитвами Богородицы, едине Человеколюбче.

Слава и ныне, глас 5:

Пламенем любве распали к Тебе сердца наша, Христе Боже, да тою разжизаеми, сердцем, мыслию же и душею, и всею крепостию нашею возлюбим Тя, и искренняго своего яко себе, и повеления Твоя храняще, славим Тя всех благ Дателя.

Прокимен, глас 7:Возлюблю Тя, Господи, крепосте моя, Господь утверждение мое.

Стих:Бог мой, помощник мой, и уповаю на Него.

Апостол:1 Ин.зач. 72 и 73 (до главы 4-й).

Евангелие:Ин.зач. 46 (до стиха 36).

На сугубой ектении прошения

(о умножении любви):

Господи, Боже наш, милостивно яко Благ призри на изсохшую в любви землю сердца нашего, и тернием ненависти, самолюбия же и неисчетных беззаконий люте оляденевшую, и каплю благодати Пресвятаго Твоего Духа испустив, богатно ороси ю, во еже плодоносити и возрастите от горящия к Тебе любве всех добродетелей корень — страх Твой, и о искренняго спасении неленостное попечение, всех же страстей, и многообразных лукавств, и лицемерия искоренение, прилежно яко всех Благодателя молим, скоро услыши и человеколюбно помилуй.

Заповедь новую Твоим учеником, еже любити друг друга, давый, Владыко, обнови сию благодатию Пресвятаго Твоего Духа действительно в душах, и в сердцах наших, да николиже о своих си, но всегда о Твоем благоугодии, и искренняго спасении и пользе попечение творити потщимся, молим Ти ся, Благодателю Милостивый, услыши и милостивно помилуй.

Первую и большую заповедь давый, еже любити Тебе Бога и Творца нашего от всея души, от всея мысли и крепости нашея, и вторую, подобную ей, еже любити искренняго, яко самех себе, и в сию двою всему закону и пророком висети научивый, делом исполняти сия всех нас благодатию Пресвятаго Твоего Духа убеди, да Тебе Спасу нашему, и искренняго спасению угождающе, обетованная Твоя получим благая, яко Владыце и Спасу нашему прилежно припадающе молимся, скоро услыши и милостивно помилуй.

Да совершени в любви Твоей, Боже наш, будем, ко искреннему нелицемерную имети любовь принуди нас Твоего Духа благодатию, Владыко: к Тебе бо любовь имети мняйся, брата же своего ненавидяй ложь есть, и во тьме ходит. Темже, Милостиве, в любви Твоей и братней распали души и сердца наша, молим Ти ся, яко Милостив, скоро услыши и, яко Щедр, помилуй.

Сице в нас Твою любовь, силою благодати Пресвятаго Твоего Духа, всели, Всещедрый Господи, еже не точию братию и друга, но и врагов наших по Твоему Божественному повелению, истинно любити, и ненавидящим нас благотворити, и о спасении их искренно тщатися, молим Ти ся, благости источниче, и человеколюбия пучино, скоро услыши и яко Благосерд помилуй.