Во святую и великую Четыредесятницу, первые недели первый день, сиесть в понедельник, отнюдь ясти не подобает такожде и во вторый. В среду же по совершении преждесвященных, трапеза поставляется, и ядим хлеб тепл, и от снедей овощных теплых, дается же и укроп с медом. Не могущий же сохранити дву дней первых, ядят хлеб и квас по вечерни, во вторник: подобие же и старин творят. В субботы же и недели разрешаем на елей точию, и вино. В прочих же седмицах постимся до вечера 5-ти дней, и ядим сухоядение, кроме суббот и недель: рыбы же во всю святую Четыредесятницу никакоже дерзнем ясти, кроме праздника Благовещения Пресвятой Богородицы, и недели Цветоносные. В пяток первой недели, и в среду великого канона, и в великий четверток, аще неции уставы и повелевают на елей разрешати, но не творится за честность дней. В навечерие же праздника Благовещения, прежде субботы святого праведного Лазаря, разрешаем на елей и вино. И аще монах святую Четыредесятницу своим лакомством разорит, еже ясти рыбу, кроме праздника Благовещения, и недели Цветоносные, то не причастится Святых Тайн и на святую Пасху: но друзии две недели покается, а поклонов на день, и на нощь 300 (л. 36).