…аще в твоем житии не бых исповедания738.

1 Родихся аз в сословии воинстем, в роду кшатриев739, сиречь войников, из старыя Индии некогда пришедшем на зов Господень и святое крещение приявшем.

2 Беспечально младость провождах: бияся в ратех с идущими на ны, а во дни мирны веселяся с удалыми соратники, в превратностех бранных и приятностях невозбранных, в небрежении убо временным жизне и вечным.

3 Случилось же мне, в полку ристающу, приближитися воеводе неустрашну, старцу мниху, иже бе страны нашея правитель, рекомый ексарх740, и благолепие старца узрев, уязвлен бе любве жалом ко Отцу моему сущу на небесех, и сердца моего ожесточение ужасе мя.

4 И приступив старцу рех: «Жалость по доме Отчем снедает мя; потрудитися восхотех в вертограде Его; приими мя яко единого от наемник Его».

5 Рече старец: «Еда возлюбил еси Господа Бога твоего всем сердцем твоим, мыслию <твоею> (Матф. 22, 37), и всею душею твоею, и всею крепостию твоею (умом, Марк 12, 30)?»741 Отвечах аз: «Отца взыскую, якоже сын блудный»742.

6 И вземь с собою в землю срединную, предаде мя ексарх под начало старцу подвижнику молчаливу, иже наказа ми плоть измождати постом и молитвою и поклоны, и в нощи бдением молебным, во дни же и древосечьца труждением.

7 Во всем послушествовах старцу моему бессловесно и боязненно, и времена забых, и годин скоротекущих не счетох.

8 И по долгом искусе молчания возглагола старец и повеле ми топор и мотыку оставите и чтению книг божественных прилежати; и учаше мя Писание и догматы веры унее разумети, наипаче же от умного делания николи не престати.

9 И мимотекшу тако довольну времени, срете мя в церкви молящася нощию, и, помолився со мною и исповедав мя, рече: «Понеже в духе помалу возрастаеши, прииде час, да великую земле нашея увидети тайну.

10 Царство Иоанново есть, и держит ю не правитель видимый, но с нами зде пребываяй апостол Христов Иоанн».

11 Аз же ужасься вопросих: «Како может с нами жити во славе небесней живый, в соборе апостольстем?»

12 Отвеща старец: «Писано есть: Петр виде ученика, его–же любляше Иисус, вослед идуща, иже и возлеже на вечери на перси Его743. Сего видев Петр, глаголе Иисусови: “Господи, сей же что?” Глагола ему Иисус: “Атце хощу, да той пребывает, дондеже прииду, что в тебе?744 Ты по Мне гряди”».

13 Памятуя же, яко о себе повествует, приписа пишущий, да не мнят его бессмертна быти: «Не рече Иисус, яко не умрет, но: аще хощу тому пребывати, дондеже прииду, что в тебе?»745

14 Аще убо и умрет, но жив на земли пребудет, и дано бысть исполнение слову сему746. В теле бо прославлением общее всех воскресение упреди747, земле же богоносныя ктому не остави, якоже и ученик оный, Кресту предстоящ по завещанию Спасителеву с Материю Божиею пребысть748.

15 И суть посреде нас, иже и осязати его и видети сподобишася, и сии рекутся Запечатленнии; печать бо Духа Свята рука Иоаннова на них наложи; от них же и аз есмь, слуга Господень».

16 Преклонь колене со страхом и трепетом, пиях словеса старцеви, яко злак росу; обаче, умолкшу ему, о нищете моей и недостоинстве моем возрыдах. Той же воздвиже мя и облобыза мя, глаголя: «Дерзай, чадо!749 Не у явися, что будем»750.

17 И абие, яко чадце мало утешено, возрадовахся зело и возвеселихся, еже близ быти Иоанну, и воскрилися дух мой, даже до исступления. Но утиши мя старец, сорадуяся ми, и укроти движение нестройно словом уветливым, и отпуская мя рече: «Изыди с миром и в тишине на ложе твоем опочи».

18 И исшед из церкве, воззрел на звезды небесныя и умилихся, и найде на мя тишина благая751.

XI

1 Паки глагола ми старец: «Вонми, сыне, слову новому, и поведанное в сердце соблюди. Достоит бо тебе и сказание знаменовательное слышат, еже о начале и кончине царства сего велию в прообразех возвещает тайну.

2 Ходит по всей земли Мати Божия, и рай первый окрест Ея цветет; переди же едет всадник светлый: Георгий имя ему752.

3 Бе Иоанн в горах мрачных моляся и сетуя о чадех Адамовых спасения своего, Иисус—Христом бывша, не ведущих. И прииде утешить его Благодатная, и, простерши руку свою на Георгия, рече:

4 «Сий юный обитель тебе под Моим покровом устроит, царство верных, в нем–же незримо воцаришися и верних многих любовию спасе ши».

5 Глагола апостол: «Прочил же что?» Отвеща Владычица: «И в тех вселишися, и йно царство ти будет, егда сие в горняя прейдет»753.

6 И утешися Иоанн и рече Георгию: «Архистратиг воинств небесных десницу твою да укрепит»754. И зача той стрелы метати на восток солнца и запад, и полдень, и полнощь далече755.

7 И где те стрелы легли, оплоты незримые воздвигаются, их–же никая сила изрыти не возможет, и положены быша пределы царства756, не преступные внешним на долгии веки.

8 И рече Матерь Божия: «Ныне огради нами в новозданной стране сей область внутреннюю, в ней–же токмо кроткии и чисти сердцем и прохождением Духа бурна испытанные обитати будут, и каждый зверь дивий и каждый стебель сельный добр будет, и каждое дыхание восхвалит Господа»757.

9 Тогда сел Георгий на коня белого и копие пламенеющее к земле склонил, и помчался на коне, копием бразду ведя по земле глубокую, и превеликую округу обвел, яже есть земля наша срединная758.

10 И в иных местах почву копием прободал, и вырывалась там из расселины волна воздушная от Фисона реки, под браздой текущей, и наполнилась вся бразда быстротекущим потоком эфира чистого из сокровенных недр Едема первого. И обтецает с тоя годины землю нашу река эфира премiрного.

11 И возвращься Георгий, и рече Богородице: «Се, Мати Божия, дело соверших, еже дала еси мне, да сотворю.

12 Правы сотворих стези Твои759, и напредь земли Твоея, сохраняя, не оставлю»760.

13 И рече Иоанн: «Глагола нам Сын Твой: “в дому Отца Моего обители многи суть”761. На сей же земле богострадной едина ли обретается святым обитель? И не мнози ли суть кротцы и чисти сердцем, иже в места сии прийти не возмогут?»762

14 Отвеща Матерь Божия:763 «Не тужи, Иоанне. Будет и иная страна святым, егда исполнятся сроки, и обитель нашу инде сотворим764, сия же земля отыдет в покой Господень.

15 Сыне Георгие, почто сестер твоих в земле полнощной, в дубравах темных оставил еси? Тамо оне, во мраке неведения сидящи, со древами срослися765 и волчим млеком младенцев своих питают766.

16 Иди и сам просвети их благодатию святого крещения, и всю землю ту и все в ней живуще, и дубравы те окрести767. Естество не премени, но и волков Слову Божию научи.

17 И не прежде изыди из страны оной, неже стрелу свою в недрах ея оставиши: обретет ее некогда избранный, и ею места те и народ свой всем племенам на спасение768.

XII

1 По сем внезапу нападе на мя ужас греховного корене моего769, и внутренняя скверна моя помыслу испытующу сицева обличися, якоже мало не впасти ми в горший грех, еже есть уныние.

2 И бия перси своя, совесть вопрошах, како от слов старцевых абие не убегох ниже сокрыхся, обаче в чертог брачный восшел есмь в одеянии небрачне770, облаку святых приближался771, смраден и срамотен сый.

3 И мышлю: бес бе, за безмерие и безнадежие мое послан мучити мя, иже, подобие плоти моея приемь, образ мой показа нага и пьяна, и растленна, и гнусна, и ругашеся ми, аки во скит заблудшу из блудилища, и укоряше мя, почто, от него отлучься, особь утвердехся самовольно772.

4 И приступив ко мне требоваше, да вниду дыханием в ноздри его, и паки едино будема773. Аз же возгорехся гневом при слове том и силу крестную призвах с упованием, и исчезе призрак.

5 Толкаше во дверь мою старец и, вошед в келлию, рече: «Не ведаши ли, яко днесь тридесять лет исполнишася жития твоего; начаток убо деяний твоих день сий да будет. Отпускаю тебя из–под начала моего; отпуская же тебя на единоборство с князем мipa сего, не повеление тебе даю, но благословение774, во еже, аще совет мой возлюбиши, первее убо оженитися, последи же сана священнического взыскати. Дерзай, чадо, яко время приспе и уже и ексарх тебя зовет на некое дело».

6 Глагола ми ексарх: «Вооружися в бой и возьми под руку твою сотню конников с проводником испытанным: прискакати настоит к некоему кастелю уединенному окрай пустыни персидской775, прежде неже вселится вонь сила вражия.

7 Спасается в стенах тех сирота гонимая, царевна Параскева праведная, с девами христолюбицами, сама возрастом юная, старица мудростию и муки крестныя претерпением: убиены быша отец и два брата ея за имя Христово.

8 Гонение же воздвиже брат отчев: сей, щедрот великого всея земли оныя государя взыскуя, наипаче же диадимы братнея, святого крещения отречеся, неверных закону присягнув. Ктому и некоему владыке радетелю, Параскевы прекрасныя вожделеющу, угождая, деву, под рукою родичи сущу, отдати обещася. Тем убо, сыне, исхитити ю из зева адова не укосни».

9 Единовременне рать наша и спира вражия, злодеем предводима, к острожцу малому приближишася, и воскрича чрез поле, гласом зычным военачальник: «Прочь за рубеж, шайка разбойничья! Вем, почто пришли есте: царевну украсти и земли ея присвоити».

10 Отвещах аз: «Именем Георгия, его же копия крещением, повелеваю тебе:

отыди от стен святых, христопродавче!» Ярым распалися гневом и меч воевода обнажи; аз же нань устремихся, и щит его сулицею раздробих, и самого из седла испихнух, и наземь повержену шлем на главе мечом разрубих, главы же не повредих.

11 Возгоревшуся же свару воинску, во прахе простертый, малодушен сый и боязлив: «Гоните коней, кметы!»776 возопи: «к войску возвратимся и полки приведем, за сим бо сила идет великая». И погнаша коней борзи и утекаша.

XIII

1 Возведе на мя представша очи своя царевна777, и мняшеся ми зрети синь прозрачну и множество светов в ней, и множество ликов, некогда знаемых778, и ее самое узрех в духе, стоящу у подножия креста Христова779.

2 И рече ми: «Благословен приход твой во спасение нам, витязю Господенью из царства Иоаннова». И яко аз безмолвствовах, паки рече: «Почто на мя дивишися?

3 Почитаю ангела моего, святую Параскеву, и ея ты душу сквозь мою видиши;780 ей–же дано бысть Христовы страсти лицезрети и Ему священно–тайне сораспятися»781.

4 И найде на мя по молитве мгновенной дерзновение, и возгласих: «Не прежде спасешься на земли (на небесех бо уже спасена еси), неже под рукою мужнею будеши, ибо ныне под рукою брата отчева пребываеши опасно.

5 Иди за меня, аз же за отца тебе и за брата буду». И вопроси дева: «Како сие будет, поелику единый мне Жених, Его же сретаю, Христос Иисус есть?»782

6 Отвещах убо и рек: «Ниже аз брака хощу, да плотию брачуся, и обое нерушимый обет принесеми в девстве сожительствовати, аще и нарицаемися от людей муж и жена».

7 И отпусти мя рекущи: «Господня раба есмь, и якоже указано ми свыше будет, тако сотворю»783. И исшед помышлях в себе, в том свете синем душу мою омывая чисту:784 «Не мню Жених быти, но друг Женихов»785.

8 И внезапу уведех, яко тоя благостыня в сердце лиющияся рекою небесною николи не избуду786.

XIV

1 Кастеля защитников вооружих и рати нашей придадех; дев же и домочадцев на вельбудов посадих с достоянием царевниным; царевна же на вельбуда бела златообуздана вседе.

2 И отьиде поезд царевнин, путь держа в серединную землю, мы же на ночь в кастеле водворихшися, и наутрие тем же путем последовахом, во еже поезд ограждати с тылу.

3 Но не быстъ за нами погони, не преуспе предатель, восвояси пришед, на землю нашу поход воздвигнута, и поднесь сохранила Параскева царство свое в пределах державы нашей.

4 Егда же приближашеся поезд к царствующему граду нашему, догнах аз, ратников моих упредив, путешественницу, покрывалом белым одеяну и на вельбуде белом, аки в зыбке колеблему; но на слово приветствия моего молчаше царевна.

5 Сошедшема же наю наземь в садах ексарховых, в сретение изыде ексарх и с ним запечатленных двое; и рече единый, на царевну указуя: «Се невеста твоя», и другой, к царевне обращься: «Сей есть жених твой».

6 И простре мне та руку свою, и обручили ю со мною запечатленные, и в церковь ведоша, идеже на брак девственный повенчена быхом. И дана бысть Параскеве с девами ея обитель в башне из кости слоновыя787, мне же в келлиях, близь лежащих.

7 Вскоре же яша мя запечатленных шесть и изведша в места пустынныя рекша: «Взойдем, труждающеся, на крутизны сия и узрим обитель Иоаннову».

8 И помыслих в себе: «Никто же, разве орли горние семо обитати может».

Воздвигахуся бо окрест, едина на другую налегающе, скал неприступных с остриями и обрывами громады, око ужасающия теснотою дикою788.

9 И внезапу узрех в глубине ущелия, расселине узкой и мрачной подобна, свод округлый и соразмерный, в скале иссеченный и изящными украшенный с высоты донизу изваяниями листия и цветов и плодов, и одесную свода Агнца изображением с титлом Христовым, слева же сердца, семью мечами иронзенна789, а в венце свода орла паряща790.

10 И преступихом праг камня белого и внидохом во мрак пещерный;791 и на мгновение ока оглядехся в церкви круглыя и светлыя, но абие сомкнув очи и на колени в молитве упав, восхищен был в духе камо не вем792. Памятую токмо яко перста мироточива касание и руку кропильну на плечи моя и на главу мою нисхождение793.

11 И изведоша мя братия за праг до преддверия, и лобызаша мя глаголюще:

«Днесь имя тебе Иоанн; запечатлен еси Духа Свята печатню, и священник стал Бога Живаго, и поставлен правити землею нашею державно794. Достоин, достоин, достоин»795.

12 И возвратихомся запечатленных седмь;796 последи же и самого любови апостола лицезрети удостоен бых797 в отсиянии некоем славы его798.

XV

1 Царицу именуют Параскеву людие и за святую почитают, меня же не супруга ей быти гадают, но обручника и блюстителя; и праве сие рекут, блаженства же, от избытка ея текуща в лоно блюстителево, не ведят799.

2 Но и сами часть имут в благостыни ея, и прикоснутся желают покрывалу ея, да укрепятся и утешатся и в домы своя принесут отраду и мир.

3 И тоскующие в разлуке с милыми и об отошедших плачущие, яко Рахиль о чадех800, яко не суть, чудесно утешены бывают: приподыме пред ними покрывало свое, и на мгновение ока увидят скорбящие лицо любимое и весть некую в сердце приимут801.

4 И пред слепыми лик свой открывши, зрение тем не единожды возврати; еже тако ли случашеся или ни, аз не вем, Бог весть.

5 В пяток же великий, до зари из обители своея исшедши, по дальним дорогам боса ходит и, где на пути отдыхает, народу сопровождающу о страстях рече Господних с силою самовидческою; и на тех местах церкви воздвигают во имя ангела ея — святыя Параскевии Пятницы.

6 Но и сказанное довлеет, дабы ты ведал, каковый вождь на путях моих мне ниспослан есть, яко Раф<а>ил архангел Товии802.

XVI

1 Се великое, брате добролюбивый, поведах и тайное, сие же под печатию молчания, да никому не открыши.

2 Токмо боголюбивой царице, боголюбезней Отраде, от Господа тебе посланной во спасение, и слепцу великому и славному, родичу твоему Радивою, иже и Светомира ко мне приведет, зане сын твой с любовию за ним последует.

3 Аз же и посольство к тебе нарядах и послание сие написах не братолюбием токмо движимый, но и по приказанию свыше, да заповедаю ти сына твоего в царство Иоанново отпустити, идеже и воцелен, и возрощен, и воспитан и укреплен будет на дело великое, еже избран есть да совершит.

4 Извести хотят в дому твоем слабоумного, того, кто умудрен снов памятию предмiрною; но спасется, и царство, еже строишь, обличье даст упованию земли; под Иоанновым прикровением мipy сохранен будет.

5 Размыслите убо о словесех моих, друзи любезные и боголюбивые, и дерзайте Вседержителя волю исполнити, Ему же подобает честь и хвала во веки веков. Аминь.