Седален,глас 4:

Искупи́л ны еси́ от кля́твы законный честно́ю Твое́ю Кро́вию: на Кресте́ пригвозди́вся и копие́м пробо́дся, безсме́ртие источи́л еси́ челове́ком: Спа́се наш, сла́ва Тебе́.

Шестое Евангелие Святых Страстей(Мк. 15, 16–32)

Во вре́мя о́но во́ини ведо́ша Иису́са внутрь двора́, е́же есть прето́р, и созва́-ша всю спи́ру. И облеко́ша Его́ в препря́ду, и возложи́ша на Него́ спле́тше терно́в вене́ц. И нача́та целова́ти Его и глаго́лати: ра́дуйся, Царю́ Иуде́йский. И бия́ху Его́ по главе́ тро́стию и плюва́ху на Него: и прегиба́юще коле́на покланя́хуся Ему́. И егда́ поруга́шася Ему́, совлеко́ша с Него́ препря́ду и облеко́ша Его́ в ри́зы своя́: и изведо́ша Его́, да про́пнут Его́. И задо́ша мимоходя́щу не́коему Си́мону Кирине́ю, гряду́щу с села́, отцу́ Алекса́ндрову и Ру́фову, да во́зьмет Крест Его́. И приведо́ша Его́ на Голго́фу место, еже есть сказа́емо Ло́бное ме́сто. И дая́ху Ему́ пи́ти есмирнисме́но вино́: Он же не прия́т. И распе́ншии Его́ раздели́ша ри́зы Его́, мета́юще жре́бий о них, кто что во́зьмет. Бе же час тре́тий, и распя́та Его́. И бе написа́ние вины́ Его́ напи́сано: Царь Иуде́йск. И с ним распя́та два разбо́йника: еди́наго одесну́ю и еди́наго ошу́юю Его́. И сбы́стся писа́ние, е́же глаго́лет: и со беззако́нными вмени́ся. И мимоходя́щии ху́ляху Его́, покива́юще глава́ми свои́ми и глаго́люще: уа́, разоря́яй це́рковь и тре́ми де́ньми созида́яй, спаси́ся Сам и сни́ди со Креста́. Та́коже и архиере́е руга́ющеся, друг ко дру́гу с кни́жники глаго́лаху: и́ны спасе́, Себе́ ли не мо́жет спасти́?

Христо́с, Царь Изра́илев, да сни́дет ны́не со Креста́, да ви́дим и веру и́мем Ему́.

Блаженны,глас 4:

Во Царствии Твоем помяни́ нас, Господи, егди́ прии́деши во Царствии Твоем.

Блажени ни́щий духом, я́ко тех есть Царство Небесное.

Блажени плачущий, я́ко ти́и утешатся.

Блажени кротции, я́ко ти́и наследят землю.

Блажени алчущий и жа́ждущий правды, я́ко ти́и насы́тятся.

Древом Ада́м рая́ бысть изселен, древом же кре́стным разбо́йник в рай всели́ся: ов у́бо вкушь, за́поведь отве́рже сотво́ршаго, о́в же распина́ем, Бо́га Тя испове́да тая́щагося. Помяни́ и нас, Спа́се, во Ца́рствии Твое́м.

Блажени ми́лостивые, я́ко ти́и поми́лованы будут.

Зако́ну Творца́ от ученика́ купи́ша беззако́ний и, я́ко законопресту́пника, Того́ Пила́тову суди́щу предста́виша, зову́ще: распни́, в пусты́ни сим Маннода́вшаго. Мы же, пра́веднаго разбо́йника подража́вше, верою зовем: помяни́ и нас, Спа́се, во Ца́рствии Твоем.

Блаже́ни чистии сердцем, я́ко тии Бога узрят.

Богоуби́йц собо́р, иуде́йский язы́к беззако́нный, к Пила́ту неи́стовне зовы́й глаго́лаше: распни́ Христа́ непови́ннаго, Варавву́ же па́че нам отпусти́. Мы же веща́им к Нему́ разбо́йника благоразу́мнаго глас: помяни́ и нас, Спа́се, во Ца́рствии Твое́м.

Блажени миротворцы, я́ко тии сынове Божии нарекутся.

Живоно́сная Твоя́ ре́бра, я́ко из Еде́ма исто́чник источа́ющая, Це́рковь Твою́, Христе́, я́ко слове́сный напая́ет рай, отсю́ду разделя́лся, я́ко в нача́ла, в четы́ри Ева́нгелия, мир напая́я, тварь веселя́ и язы́ки ве́рно науча́я покланя́тися Ца́рствию Твоему́.

Блаже́ни изгнани правды ради, я́ко тех есть Царство Небесное.

Распя́лся еси́ мене́ ра́ди, да мне источи́ши оставле́ние; прободе́н был еси́ в ре́бра, да ка́пли жи́зни источи́ши ми; гвоздьми́ пригвозди́лся еси́, да аз, глубино́ю Страсте́й Твои́х в высоте́ держа́вы Твоей уверя́ем, зову́ Ти, Живода́вче Христе́: сла́ва Кресту́, Спа́се, и Стра́сти Твое́й.

Блажени есте, егда́ поносят вам, и изженут, и рекут всяк зол глагол на вы, лжуще Мене ради.

Распина́ему Тебе́, Христе́, вся тварь ви́дящи трепета́ше, основа́ния земли́ колеба́хуся, стра́хом держа́вы Твоей, свети́ла скрыва́хуся и церко́вная раздра́ся заве́са, го́ры вострепета́ша и ка́мение разсе́деся, и разбо́йник ве́рный зове́т с на́ми, Спа́се, е́же помяни́ во Ца́рствии Твое́м.

Радуйтеся и веселитеся, яко мзда ваша многа на Небесех.

Рукописа́ние на́ше на Кресте́ растерза́л еси́, Го́споди, и вмени́вся в ме́ртвых, та́мошняго мучи́теля связа́л еси́, изба́вль всех от уз сме́ртных Воскресе́нием Твои́м, и́мже просвети́хомся, Человеколю́бче Го́споди, и вопием Тебе: помяни́ и нас, Спа́се, во Ца́рствии Твоем.

Слава:Отца́ и Сы́на и Ду́ха Свята́го вси единому́дренно во́рнии славосло́вити досто́йно помо́лимся, Еди́ницу Божества́ в трио́х су́щую Ипоста́сех, неслия́нну пребыва́ющу, про́сту, нераздо́льну и непристу́пну, Еюже избавля́емся о́гненнаго муче́ния.

И ныне, Богородичен: Ма́терь Твою́, Христе́, пло́тию безсеменно ро́ждшую Тя, и Деву вои́стинну, и по рождестве пребы́вшую нетленну, Сию́ Тебе́ приво́дим в моли́тву, Влады́ко Многоми́лостиве, прегрешений прощению дарова́тися всегда́ зову́щим: помяни́ нас, Спа́се, во Ца́рствии Твоем.