Канонник (цсл)

КАНОН СВЯТЕЙ И ЖИВОНАЧАЛЬНЕЙ ТРОИЦЕ

Тропарь, глас 8:

Благослове́н еси́, Христе́ Бо́же наш, / И́же прему́дры ловцы́ явле́й, / низпосла́в им Ду́ха Свята́го, / и те́ми уловле́й вселе́нную, / Человеколю́бче, сла́ва Тебе́.

Канон, егоже краестрочие: Едино Тя пою Трисолнечное Естество. Творение Митрофаново, глас 1.

Песнь 1.

Ирмос: Твоя́ победи́тельная десни́ца / Боголе́пно в кре́пости просла́вися: / та бо, Безсме́ртне, / я́ко всемогу́щая, проти́вныя сотре́, / Изра́ильтяном / путь глубины́ новосоде́лавшая.

Припев: Пресвята́я Тро́ице, Бо́же наш, сла́ва Тебе́.

Еди́но Триипоста́сное Нача́ло, / Серафи́ми немо́лчно сла́вят: / Безнача́льное, Присносу́щное, твори́тельное всех, непостижи́мое, / е́же и всяк язы́к ве́рно почита́ет пе́сньми.

Да челове́ком еди́нственное, / трисия́тельное Твое́ яви́ши Божество́, / созда́вый пре́жде челове́ка, / по Твоему́ о́бразу воо́бразил еси́, / ум ему́, и сло́во и дух дав, / я́ко Человеколю́бец.

Слава: Свы́ше показу́я еди́нственную / Богонача́льных в трие́х Ипоста́сех держа́ву, О́тче, / рекл еси́ равноде́тельному Твоему́ Сы́ну, и Ду́ху: / прииди́те соше́дше, язы́ки их слия́им.

И ныне: Ум у́бо есть нерожде́нный Оте́ц, / обра́зно прему́дрыми предрече́ся, / Сло́во же собезнача́льно, соесте́ственный Сын, / и Дух Святы́й, и́же в Де́ве Сло́ва созда́вший воплоще́ние.

Песнь 3.

Ирмос: Еди́не ве́дый челове́ческаго существа́ не́мощь / и ми́лостивно в не вообра́жся, / препоя́ши мя с высоты́ си́лою, / е́же вопи́ти Тебе́, Святы́й, / одушевле́нный хра́ме / неизрече́нныя сла́вы Твоея́, Человеколю́бче.

Припев: Пресвята́я Тро́ице, Бо́же наш, сла́ва Тебе́.

Ты дре́вле я́ве Авраа́му / я́ко яви́лся еси́ Триипоста́сный, / еди́нствен же естество́м Божества́, / богосло́вия и́стиннейшее обра́зно яви́л еси́, / и ве́рно пое́м Тя, / единонача́льнаго Бо́га и трисо́лнечнаго.

Из Тебе́ роди́выйся боголе́пно нетле́нно О́тче, / возсия́ свет от све́та, Сын непреме́нен, / и Дух Боже́ственный, свет изы́де, / еди́наго Божества́ све́тлости триипоста́сней / покланя́емся ве́рно и сла́вим.

Слава: Еди́ница Тро́ица преесте́ственне, / неизрече́нно па́че смы́сла, у́мными существы́ сла́вится, / трисвяты́ми гла́сы немо́лчную вопию́щими хвалу́, / и́миже согла́сно пое́тся и на́ми / триипоста́сный Госпо́дь.

И ныне: Из Тебе́ вре́менне без се́мене / произы́де Вышшеле́тный, / уподо́бивыйся нам неви́димый, / и еди́ному естеству́ и госпо́дству О́тчу научи́в, / и Сыно́вню, и Ду́хову, Богоро́дице, / те́мже Тя сла́вим.

Го́споди, поми́луй, трижды.

Седален, глас 1. Подобен: Гроб Твой Спасе:

Отцу́ и Сы́ну поклони́мся вси, / и Ду́ху пра́вому и равноче́стну, / сла́ва Тро́ице несозда́нней, и пребоже́ственней Си́ле, / Ю́же сла́вят безпло́тных чи́нове, / Сию́ днесь и земноро́днии / со стра́хом ве́рно восхва́лим.

Слава, и ныне, Богородичен: Наста́ви ны на путь покая́ния, / уклоня́ющияся при́сно к безпу́тием зол, / и преблага́го прогне́вающия Го́спода, / неискусобра́чная благослове́нная Мари́е, / прибе́жище отча́янных челове́ков, / Бо́жие пребыва́ние.

Песнь 4.

Ирмос: Го́ру Тя благода́тию Бо́жиею приосене́нную, / прозорли́выма Авваку́м / усмотри́в очи́ма, / из Тебе́ изы́ти Изра́илеву провозглаша́ше Свято́му, / во Спасе́ние на́ше / и обновле́ние.

Припев: Пресвята́я Тро́ице, Бо́же наш, сла́ва Тебе́.

Возсия́й ми Богонача́лие трисо́лнечное, / сия́ньми Твои́х богоде́тельных озаре́ний, / в серде́чных очесе́х добро́те мечта́тися, / е́же па́че ума́ богонача́льныя Твоея́ све́тлости, / и светоде́тельнаго и сла́дкаго прича́стия.

Пе́рвее небеса́ утверди́л еси́, Го́споди, / и всю си́лу их сло́вом Твои́м вседе́тельным, / и Ду́хом уст соесте́ственным, / с ни́миже влады́чествуеши вся́ческими / в трисия́тельне единонача́лии Божества́.

Слава: Я́ко созда́л еси́ мя по о́бразу Твоему́ и по подо́бию, / Богонача́льная и вседе́тельная Тро́ице, / неслия́нная Еди́нице, / вразуми́, просвети́, во е́же твори́ти во́лю Твою́ святу́ю, / благу́ю в кре́пости, и соверше́нную.

И ныне: Родила́ еси́ от Тро́ицы Еди́наго Пречи́стая, / Богонача́льнейша Сы́на, / вопло́щшася нас ра́ди из Тебе́, / озаря́юща земноро́дных, трисо́лнечнаго Божества́ / невече́рним све́том и сия́ньми.

Песнь 5.

Ирмос: Просвети́вый сия́нием прише́ствия Твоего́, Христе́, / и освети́вый Кресто́м Твои́м / ми́ра концы́, / сердца́ просвети́ / све́том Твоего́ Богоразу́мия, / правосла́вно пою́щих Тя.

Припев: Пресвята́я Тро́ице, Бо́же наш, сла́ва Тебе́.

Я́же пе́рвой а́нгельской непосре́дственне у́твари, / непристу́пными Твоея́ добро́ты луча́ми осиява́емой бы́ти баговоли́вши, / Твои́ми све́тлостьми просвети́, / Тро́ице единонача́льственнейшая, / правосла́вно Тебе́ пою́щих.

Ны́не естество́, еди́нственное Богонача́лия трисо́лнечное, / воспева́ет Тя, Е́же осуществова́ла еси́ за бла́гость, / прегреше́ний избавле́ние и напа́стей испроша́ющи, / и бед, и скорбе́й.

Слава: Отца́, и Сы́на, и Ду́ха Свята́го, / Еди́но Естество́ и Божество́ ве́рою сла́вим, / дели́тельное, неразде́льное, / еди́наго Бо́га неви́димыя и ви́димыя же тва́ри.

И ныне: Рече́ния вся проро́ческая преднаписа́ша, / Пречи́стая, Твое́ рождество́, / неизрече́нное и неудо́бь сказу́емое, / е́же мы позна́хом, / тайноводи́тельное еди́нственнаго и трисо́лнечнаго Божества́.

Песнь 6.

Ирмос: Обы́де нас после́дняя бе́здна, / несть избавля́яй, / вмени́хомся, / я́ко о́вцы заколе́ния, / спаси́ лю́ди Твоя́, Бо́же наш, / Ты бо кре́пость немощству́ющих и исправле́ние.

Припев: Пресвята́я Тро́ице, Бо́же наш, сла́ва Тебе́.

Равноста́тную си́лу я́ко иму́щи, / Тро́ице пресу́щественная, в то́ждестве хоте́ния, / Еди́ница еси́ проста́ и неразде́льна: / Ты у́бо нас си́лою Твое́ю соблю́ди. [Дважды]

Слава: Ты вся ве́ки хоте́нием Твои́м, / я́ко бла́га соста́вила еси́ от не су́щих, непостижи́мая Тро́ице, / та́же и челове́ка создала́ еси́, / но и ны́не от вся́каго изба́ви мя обстоя́ния.

И ныне: Со́лнца незаходи́маго дом была́ еси́, / созда́вшаго и в чину́ поста́вльшаго свети́ла вели́кая Всеси́льне, / Пречи́стая Де́во Богоневе́стная, / но и ны́не страсте́й мя изба́ви помраче́ния.

Го́споди, поми́луй, трижды. Сла́ва, и ны́не:

Седален, глас 1. Подобен: Гроб Твой Спасе:

Тро́ице святе́й, и неразде́льному Естеству́, / в Тре́х Ли́цех секо́мей несе́чено, / и пребыва́ющей неразде́льней по существу́ Божества́, / поклони́мся земноро́днии со стра́хом, / и сла́вим я́ко Творца́ и Влады́ку, Бо́га преблага́го.

Слава, и ныне, Богородичен: Упра́ви Чи́стая, окая́нную мою́ ду́шу, / и уще́дри ю́ от мно́жества прегреше́ний, / во глубину́ попо́лзшуюся поги́бели, Всенепоро́чная, / и в час мя стра́шный сме́ртный Ты исхити́ / оглаго́лующих де́монов, и вся́кия му́ки.

Песнь 7.

Ирмос: Тебе́ у́мную, Богоро́дице, пещь / разсмотря́ем, ве́рнии, / я́коже бо о́троки спасе́ три Превозноси́мый, / мир обнови́, / во чре́ве Твое́м всеце́л, / хва́льный отце́в Бог и препросла́влен.

Припев: Пресвята́я Тро́ице, Бо́же наш, сла́ва Тебе́.

Сло́ве Бо́жий, соесте́ственное сия́ние Вседержи́теля Бо́га, / я́коже обеща́л еси́ е́же у Тебе́, / богоде́тельное вселе́ние сотвори́, я́ко благоутро́бен, / со Отце́м Твои́м и Ду́хом, / и стра́шна бесо́м мя покажи́, и страсте́м. [Дважды]

Слава: Да Твоего́ благоутро́бия, Влады́ко, / пока́жеши пучи́ну нам, / Сы́на Твоего́ посла́в к на́шему смире́нию, / па́ки вообрази́л еси́ на пе́рвую све́тлость, / но и ны́не Боже́ственным мя вразуми́ Ду́хом.

И ныне: И́же на херуви́мстем престо́ле носи́мый, / и всех Царь, во чре́ве Твое́м де́вственнем всели́ся Пречи́стая, / всех избавля́я от истле́ния, я́ко Человеколю́бец, / но и ны́не Твои́ми мя моли́твами сохрани́.

Песнь 8.

Ирмос: Чу́да преесте́ственнаго / росода́тельная изо́брази́ пещь о́браз: / не бо, я́же прия́т, пали́т ю́ныя, / я́ко ниже́ огнь Божества́ Де́вы, / в Ню́же вни́де утро́бу. / Тем воспева́юще, воспое́м: / да благослови́т тварь вся Го́спода / и превозно́сит во вся ве́ки.

Припев: Пресвята́я Тро́ице, Бо́же наш, сла́ва Тебе́.

Ма́нием богоде́тельным, Го́споди всех, / Триипоста́сне и Вседержи́телю, / небеса́ просте́рл еси́ я́ко ко́жу, / та́же и земли́ пове́сил еси́ глубину́, / всемогу́щею Твое́ю дла́нию. / Те́мже и рабы́ Твоя́ укрепи́ любо́вию и ве́рою Твое́ю, Человеколю́бче, / да Тя сла́вим жела́нием во ве́ки. [Дважды]

Слава: Просвети́ Богонача́льным све́том / пою́щих Тя, Трисо́лнечный Све́те Ли́цы, / еди́нственный же па́ки существо́м, / и к Твои́м светода́тельным луча́м взира́ти при́сно, / и́миже насы́щуся сла́вы Твоея́ сла́дкия, / и светода́тельныя, и пребога́тыя, / и превозношу́ Тя ве́рно во ве́ки.

И ныне: Вознесе́ на небеса́, челове́ческое прие́м естество́ / непрело́жен Сын Твой, Пречи́стая Богоро́дице, / превосхожде́нием бла́гости избавль дре́вния тли. / Ему́же благода́рственно воспева́ем: / да благослови́т тварь вся Го́спода, / и превозно́сит во вся ве́ки.

Песнь 9.

Ирмос: О́браз чи́стаго рождества́ Твоего́, / огнепали́мая купина́ / показа́ неопа́льная; / и ны́не на нас / напа́стей свире́пеющую угаси́ти, мо́лимся, пещь, / да Тя, Богоро́дице, / непреста́нно велича́ем.

Припев: Пресвята́я Тро́ице, Бо́же наш, сла́ва Тебе́.

Спаси́, Спаси́телю тва́ри, чу́вственныя же и у́мныя / рабы́ Твоя́ от вра́жия наве́та и озлобле́ния, / Пресвята́я Тро́ице Единосу́щная, / и соблюда́й ста́до Твое́ вы́ну ненаве́тно. [Дважды]

Слава: Да глубину́ неизче́тную / су́щественныя пока́жеши Твоея́ бла́гости, / дал еси́ нам обе́ты, / трисо́лнечный и единонача́льный Бо́же Всеси́льный, / спаси́тельныя Твои́м рабо́м, / и́хже соверши́ти сподо́би.

И ныне: При́зри на на́ша моле́ния, / и́же в трие́х Богонача́льных Ипоста́сех, / еди́н сый Бог во и́стине ве́руемый, / и пода́ждь Твои́м рабо́м утеше́ние, / моли́твами Пречи́стыя и препе́тыя Богома́тере.

Молитва Пресвятей Троице, творение Марка монаха:

Всемогу́щая и Животворя́щая Свята́я Тро́ице и светонача́льная, я́же мíрную вся́кую и премíрную тварь, за еди́ну бла́гость от не су́щих приведы́й, и промышля́я и содержа́. И́же по про́чих Твои́х неизрече́нных о земно́м ро́де благодея́ниих, и покая́ние нам ра́ди плотска́го неможе́ния до сме́рти дарова́вый: не оста́ви нас окая́нных в лука́вых на́ших дея́ниих умре́ти, ниже́ злонача́льнику и зави́стцу, и губи́телю посме́шство бы́ти. Зри́ши бо Благосе́рде, ели́к у́бо о́наго на нас наве́т и вражду́, ели́ко же и на́ше страстова́ние, и сла́бость, и небреже́ние. Но неоску́дныя Твоя́ бла́гости соде́лай на нас, мо́лим на вся́кий день и час прогне́вающии Тя честны́х и животво́рных за́поведей преступле́нием. И вся у́бо всего́ преше́дшаго живота́ на́шего, и до ны́нешняго часа́ согреше́нная на́ми, в дея́ниих, или́ глаго́ланиих, или́ в помышле́ниих, оста́ви и прости́. Сподо́би же нас, про́чее сконча́ти житие́ в покая́нии, и умиле́нии, и соблюде́нии святы́х Твои́х повеле́ний. А́ще у́бо сла́достию прельсти́вшеся, многообра́зне согреши́хом, или́ ме́рзкими похотьми́ неполе́зными и вре́дными обольсти́вшеся препроводи́хом: а́ще гне́вом и я́ростию подви́гшеся безслове́сною, кого́ бра́та на́шего оскорби́хом, а́ще язы́ком неизбе́жных и стро́потных и кре́пких сете́й объя́хомся: а́ще ко́им чувств на́ших, или́ все́ми, во́лею или́ нево́лею, ве́дуще или́ не ве́дуще, от восхище́ния, или́ поуче́ния безу́мно поползо́хомся: а́ще же лука́выми по́мыслы и су́етными со́весть оскверни́хом: а́ще ли ко́им други́м о́бразом прегреши́хом, от предприя́тия и обы́чая томи́ми зла́го: прости́ нам и оста́ви вся, Всеще́дре, Пребла́же и Многоми́лостиве: и да́руй нам про́чее бо́дрость и си́лу, во е́же твори́ти во́лю Твою́ бла́гу, и благоуго́дну и соверше́нну: да нощна́го и мра́чнаго зла, светови́дным покая́нием преме́ншеся, и я́ко во дни благообра́зно ходя́ще, и очище́ни объяви́мся человеколю́бию Твоему́ недосто́йнии, воспева́юще Тя и велича́юще во ве́ки, ами́нь.

КАНОН ПОКАЯННЫЙ КО ГОСПОДУ НАШЕМУ ИИСУСУ ХРИСТУ

Тропарь Всемилостивому Спасу, глас 8:

С вы́шних призира́я, убо́гия прие́мля, / посети́ нас, озло́бленныя грехи́, Влады́ко Всеми́лостиве, / моли́твами Богоро́дицы да́руй душа́м на́шим ве́лию ми́лость.

Канон, глас 6.

Песнь 1.

Ирмос: Я́ко по су́ху пешеше́ствовав Изра́иль, / по бе́здне стопа́ми, / гони́теля фарао́на / ви́дя потопля́ема, / Бо́гу побе́дную песнь / пои́м, вопия́ше.

Припев: Поми́луй мя, Бо́же, поми́луй мя.

Ны́не приступи́х аз гре́шный и обремене́нный / к Тебе́, Влады́це и Бо́гу моему́; / не сме́ю же взира́ти на не́бо, / то́кмо молю́ся, глаго́ля: / даждь ми, Го́споди, ум, / да пла́чуся дел мои́х го́рько.

О, го́ре мне гре́шному! / Па́че всех челове́к окая́нен есмь, / покая́ния несть во мне; / даждь ми, Го́споди, сле́зы, / да пла́чуся дел мои́х го́рько.

Слава: Безу́мне, окая́нне челове́че, / в ле́ности вре́мя губи́ши; / помы́сли житие́ твое́, / и обрати́ся ко Го́споду Бо́гу, / и пла́чися о де́лех твои́х го́рько.

И ныне: Ма́ти Бо́жия Пречи́стая, / воззри́ на мя гре́шного, / и от се́ти диа́воли изба́ви мя, / и на путь покая́ния наста́ви мя, / да пла́чуся дел мои́х го́рько.

Песнь 3.

Ирмос: Несть свят, / я́коже Ты, Го́споди Бо́же мой, / вознесы́й рог ве́рных Твои́х, Бла́же, / и утверди́вый нас на ка́мени / испове́дания Твоего́.

Припев: Поми́луй мя, Бо́же, поми́луй мя.

Внегда́ поста́влени бу́дут престо́ли на Суди́щи Стра́шнем, / тогда́ всех челове́к дела́ облича́тся; /го́ре та́мо бу́дет гре́шным, в му́ку отсыла́емым; / и то ве́дущи, душе́ моя́, / пока́йся от злых дел твои́х.

Пра́ведницы возра́дуются, а гре́шнии воспла́чутся, / тогда́ никто́же возмо́жет помощи́ нам, / но дела́ на́ша осу́дят нас, / те́мже пре́жде конца́ / пока́йся от злых дел твои́х.

Слава: Увы́ мне великогре́шному, / и́же де́лы и мы́сльми оскверни́вся, / ни ка́пли слез име́ю от жестосе́рдия; / ны́не возни́кни от земли́, душе́ моя́, / и пока́йся от злых дел твои́х.

И ныне: Се, взыва́ет, Госпоже́, Сын Твой, / и поуча́ет нас на до́брое, / аз же гре́шный добра́ всегда́ бе́гаю; / но Ты, Ми́лостивая, поми́луй мя, / да пока́юся от злых мои́х дел.

Го́споди, поми́луй, трижды.

Седален, глас 6:

Помышля́ю день стра́шный / и пла́чуся дея́ний мои́х лука́вых: / ка́ко отвеща́ю Безсме́ртному Царю́, / или́ ко́им дерзнове́нием воззрю́ на Судию́, блу́дный аз? / Благоутро́бный О́тче, Сы́не Единоро́дный / и Ду́ше Святы́й, поми́луй мя.

Слава, и ныне, Богородичен: Свя́зан мно́гими ны́не плени́цами грехо́в / и содержи́мь лю́тыми страстьми́ и беда́ми, / к Тебе́ прибега́ю, моему́ спасе́нию, и вопию́: / помози́ ми, Де́во, Ма́ти Бо́жия.

Песнь 4.

Ирмос: Христо́с моя́ си́ла, / Бог и Госпо́дь, честна́я Це́рковь / боголе́пно пое́т, взыва́ющи / от смы́сла чи́ста, о Го́споде пра́зднующи.

Припев: Поми́луй мя, Бо́же, поми́луй мя.

Широ́к путь зде и уго́дный сла́сти твори́ти, / но го́рько бу́дет в после́дний день, / егда́ душа́ от те́ла разлуча́тися бу́дет: / блюди́ся от сих, челове́че, / Ца́рствия ра́ди Бо́жия.

Почто́ убо́гаго оби́диши, / мзду нае́мничу уде́ржуеши, / бра́та твоего́ не лю́биши, / блуд и го́рдость го́ниши? / Оста́ви у́бо сия́, душе́ моя́, / и пока́йся Ца́рствия ра́ди Бо́жия.

Слава: О, безу́мный челове́че, / доко́ле углеба́еши, я́ко пчела́, собира́ющи бога́тство твое́? / Вско́ре бо поги́бнет, я́ко прах и пе́пел: / но бо́лее взыщи́ Ца́рствия Бо́жия.

И ныне: Госпоже́ Богоро́дице, поми́луй мя гре́шного, / и в доброде́тели укрепи́, и соблюди́ мя, / да на́глая смерть не похи́тит мя негото́ваго, / и доведи́ мя, Де́во, Ца́рствия Бо́жия.

Песнь 5.

Ирмос: Бо́жиим / све́том Твои́м, Бла́же, / у́тренюющих Ти ду́ши / любо́вию озари́, молю́ся, / Тя ве́дети, Сло́ве Бо́жий, / и́стиннаго Бо́га, / от мра́ка грехо́внаго взыва́юща.

Припев: Поми́луй мя, Бо́же, поми́луй мя.

Воспомяни́, окая́нный челове́че, / ка́ко лжам, клевета́м, разбо́ю, не́мощем, лю́тым звере́м, / грехо́в ра́ди порабоще́н еси́; / душе́ моя́ гре́шная, того́ ли восхоте́ла еси́?

Трепе́щут ми у́ди, все́ми бо сотвори́х вину́: / очи́ма взира́яй, уши́ма слы́шай, язы́ком зла́я глаго́ляй, / всего́ себе́ гее́не предая́й; / душе́ моя́ гре́шная, сего́ ли восхоте́ла еси́?

Слава: Блудника́ и разбо́йника ка́ющася прия́л еси́, Спа́се, / аз же еди́н ле́ностию грехо́вною отягчи́хся / и злым дело́м порабо́тихся, / душе́ моя́ гре́шная, сего́ ли восхоте́ла еси́?

И ныне: Ди́вная и ско́рая помо́щнице всем челове́ком, Ма́ти Бо́жия, / помози́ мне недосто́йному, / душа́ бо моя́ гре́шная того́ восхоте́.

Песнь 6.

Ирмос: Жите́йское мо́ре, / воздвиза́емое зря напа́стей бу́рею, / к ти́хому приста́нищу Твоему́ прите́к, вопию́ Ти: / возведи́ от тли живо́т мой, / Многоми́лостиве.

Припев: Поми́луй мя, Бо́же, поми́луй мя.

Житие́ на земли́ блу́дно пожи́х / и ду́шу во тьму преда́х, / ны́не у́бо молю́ Тя, Ми́лостивый Влады́ко: / свободи́ мя от рабо́ты сея́ вра́жия, / и даждь ми ра́зум твори́ти во́лю Твою́.

Кто твори́т такова́я, я́коже аз? / Я́коже бо свиния́ лежи́т в калу́, / та́ко и аз греху́ слу́жу. / Но Ты, Го́споди, исто́ргни мя от гну́са сего́ / и даждь ми се́рдце твори́ти за́поведи Твоя́.

Слава: Воспряни́, окая́нный челове́че, к Бо́гу, / воспомяну́в своя́ согреше́ния, / припа́дая ко Творцу́, слезя́ и стеня́; / Той же, я́ко милосе́рд, / даст ти ум зна́ти во́лю Свою́.

И ныне: Богоро́дице Де́во, / от ви́димаго и неви́димаго зла сохрани́ мя, Пречи́стая, / и приими́ моли́твы моя́, / и донеси́ я́ Сы́ну Твоему́, / да даст ми ум твори́ти во́лю Его́.

Го́споди, поми́луй, трижды. Сла́ва, и ны́не:

Кондак, глас 6:

Душе́ моя́, / почто́ греха́ми богате́еши, / почто́ во́лю диа́волю твори́ши, / в чесо́м наде́жду полага́еши? / Преста́ни от сих / и обрати́ся к Бо́гу с пла́чем, зову́щи: / милосе́рде Го́споди, поми́луй мя гре́шнаго.

Икос: Помы́сли, душе́ моя́, го́рький час сме́рти / и стра́шный суд Творца́ твоего́ и Бо́га: / А́нгели бо гро́знии по́ймут тя, душе́, / и в ве́чный огнь введу́т: / у́бо пре́жде сме́рти пока́йся, вопию́щи: / Го́споди, поми́луй мя гре́шнаго.

Песнь 7.

Ирмос: Росода́тельну у́бо пещь / соде́ла А́нгел / преподо́бным отроко́м, / халде́и же опаля́ющее / веле́ние Бо́жие, / мучи́теля увеща́ вопи́ти: / благослове́н еси́, Бо́же оте́ц на́ших.

Припев: Поми́луй мя, Бо́же, поми́луй мя.

Не наде́йся, душе́ моя́, / на тле́нное бога́тство и на непра́ведное собра́ние, / вся бо сия́ не ве́си кому́ оста́виши, но возопи́й: / поми́луй мя, Христе́ Бо́же, недосто́йнаго.

Не упова́й, душе́ моя́, на теле́сное здра́вие / и на скоромимоходя́щую красоту́, / ви́диши бо, я́ко си́льнии и млади́и умира́ют; но возопи́й: / поми́луй мя, Христе́ Бо́же, недосто́йнаго.

Слава: Воспомяни́, душе́ моя́, ве́чное житие́, / Ца́рство Небе́сное, угото́ванное святы́м, / и тьму кроме́шную и гнев Бо́жий злым, и возопи́й: / поми́луй мя, Христе́ Бо́же, недосто́йнаго.

И ныне: Припади́, душе́ моя́, к Бо́жией Ма́тери и помоли́ся Той, / есть бо ско́рая помо́щница ка́ющимся, / умо́лит Сы́на Христа́ Бо́га, / и поми́лует мя недосто́йнаго.

Песнь 8.

Ирмос: Из пла́мене преподо́бным ро́су источи́л еси́ / и пра́веднаго же́ртву водо́ю попали́л еси́: / вся бо твори́ши, Христе́, то́кмо е́же хоте́ти. / Тя превозно́сим во вся ве́ки.

Припев: Поми́луй мя, Бо́же, поми́луй мя.

Ка́ко не и́мам пла́катися, егда́ помышля́ю смерть, / ви́дех бо во гро́бе лежа́ща бра́та моего́, безсла́вна и безобра́зна? / Что у́бо ча́ю, и на что наде́юся? / То́кмо даждь ми, Го́споди, / пре́жде конца́ покая́ние. [Дважды]

Слава: Ве́рую, я́ко прии́деши суди́ти живы́х и ме́ртвых, / и вси во свое́м чи́ну ста́нут, / ста́рии и млади́и, влады́ки и кня́зи, де́вы и свяще́нницы; где обря́щуся аз? / Сего́ ра́ди вопию́: / да́ждь ми, Го́споди, пре́жде конца́ покая́ние.

И ныне: Пречи́стая Богоро́дице, / приими́ недосто́йную моли́тву мою́ / и сохрани́ мя от на́глыя сме́рти, / и да́руй ми пре́жде конца́ покая́ние.

Песнь 9.

Ирмос: Бо́га / челове́ком невозмо́жно ви́дети, / на Него́же не сме́ют чи́ни А́нгельстии взира́ти; / Тобо́ю же, Всечи́стая, яви́ся челове́ком / Сло́во Воплоще́нно, / Его́же велича́юще, / с небе́сными во́и Тя ублажа́ем.

Припев: Поми́луй мя, Бо́же, поми́луй мя.

Ны́не к вам прибега́ю, / А́нгели, Арха́нгели и вся небе́сныя си́лы, / у Престо́ла Бо́жия стоя́щии, / моли́теся ко Творцу́ Своему́, / да изба́вит ду́шу мою́ от му́ки ве́чныя.

Ны́не пла́чуся к вам, / святи́и патриа́рси, ца́рие и проро́цы, / апо́столи и святи́телие и вси избра́ннии Христо́вы: / помози́те ми на суде́, / да спасе́т ду́шу мою́ от си́лы вра́жия.

Слава: Ны́не к вам воздежу́ ру́це, / святи́и му́ченицы, пусты́нницы, де́вственницы, пра́ведницы / и вси святи́и, моля́щиися ко Го́споду за весь мир, / да поми́лует мя в час сме́рти моея́.

И ныне: Ма́ти Бо́жия, помози́ ми, / на Тя си́льне наде́ющемуся, / умоли́ Сы́на Своего́, / да поста́вит мя недосто́йнаго одесну́ю Себе́, / егда́ ся́дет судя́й живы́х и ме́ртвых. Ами́нь.

Молитва:

Влады́ко Христе́ Бо́же, И́же страстьми́ Свои́ми стра́сти моя́ исцели́вый и я́звами Свои́ми я́звы моя́ уврачева́вый, да́руй мне, мно́го Тебе́ прегреши́вшему, сле́зы умиле́ния; сраствори́ моему́ те́лу от обоня́ния Животворя́щего Те́ла Твоего́, и наслади́ ду́шу мою́ Твое́ю Честно́ю Кро́вию от го́рести, е́юже мя сопроти́вник напои́; возвы́си мой ум к Тебе́, до́лу пони́кший, и возведи́ от про́пасти поги́бели: я́ко не и́мам покая́ния, не и́мам умиле́ния, не и́мам слезы́ уте́шительныя, возводя́щия ча́да ко своему́ насле́дию. Омрачи́хся умо́м в жите́йских страсте́х, не могу́ воззре́ти к Тебе́ в боле́зни, не могу́ согре́тися слеза́ми, я́же к Тебе́ любве́. Но, Влады́ко Го́споди Иису́се Христе́, сокро́вище благи́х, да́руй мне покая́ние всеце́лое и се́рдце люботру́дное во взыска́ние Твое́, да́руй мне благода́ть Твою́ и обнови́ во мне зра́ки Твоего́ о́браза. Оста́вих Тя, не оста́ви мене́; изы́ди на взыска́ние мое́, возведи́ к па́жити Твое́й и сопричти́ мя овца́м избра́ннаго Твоего́ ста́да, воспита́й мя с ни́ми от зла́ка Боже́ственных Твои́х Та́инств, моли́твами Пречи́стыя Твоея́ Ма́тере и всех святы́х Твои́х. Ами́нь.

КАНОН ВО СВЯТУЮ И ВЕЛИКУЮ НЕДЕЛЮ ПАСХИ

Тропарь, во глас 5:

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

Первый стих: Да воскре́снет Бог, и расточа́тся врази́ Его́, / и да бежа́т от Лица́ Его́ ненави́дящии Его́.

И на кийждо стих мы поем тропарь: Христо́с воскре́се: весь по единожды.

Вторый стих: Я́ко исчеза́ет дым, да исче́знут, / я́ко та́ет воск от лица́ огня́.

Третий стих: Та́ко да поги́бнут гре́шницы от Лица́ Бо́жия, / а пра́ведницы да возвеселя́тся.

Четвертый стих: Сей день, его́же сотвори́ Госпо́дь, / возра́дуемся и возвесели́мся в онь.

Слава: Христо́с воскре́се:

И ныне: Христо́с воскре́се:

Канон, творение господина Иоанна Дамаскина, глас 1

Песнь 1.

Ирмос: Воскресе́ния день, / просвети́мся, лю́дие. / Па́сха, Госпо́дня Па́сха: / от сме́рти бо к жи́зни, / и от земли́ к небеси́, / Христо́с Бог нас преведе́, / побе́дную пою́щия.

Припев: Христо́с воскре́се из ме́ртвых.

Очи́стим чу́вствия, и у́зрим / непристу́пным све́том / Воскресе́ния, Христа́ / блиста́ющася, / и ра́дуйтеся, реку́ща, / я́сно да услы́шим, / побе́дную пою́ще.

Припев: Христо́с воскре́се из ме́ртвых.

Небеса́ у́бо досто́йно да веселя́тся, / земля́ же да ра́дуется, / да пра́зднует же мир, / ви́димый же весь и неви́димый: / Христо́с бо воста́, / весе́лие ве́чное.

Припев: Пресвята́я Богоро́дице, спаси́ нас.

Умерщвле́ния преде́л сломи́ла еси́, / ве́чную жизнь ро́ждшая Христа́, из гро́ба возсия́вшаго днесь, / Де́во Всенепоро́чная, и мир просвети́вшаго.

Припев: Пресвята́я Богоро́дице, спаси́ нас.

Воскре́сшаго ви́девши Сы́на Твоего́ и Бо́га, / ра́дуйся со апо́столы Богоблагода́тная чи́стая: / и е́же ра́дуйся пе́рвее, я́ко всех ра́дости вина́, / восприя́ла еси́, Богома́ти Всенепоро́чная.

Песнь 3.

Ирмос: Прииди́те, пи́во пие́м но́вое, / не от ка́мене непло́дна чудоде́емое, / но нетле́ния исто́чник / из гро́ба одожди́вша Христа́, / в Не́мже утвержда́емся.

Припев: Христо́с воскре́се из ме́ртвых.

Ны́не вся испо́лнишася све́та, / не́бо же и земля́, и преиспо́дняя: / да пра́зднует у́бо вся тварь / воста́ние Христо́во, / в не́мже утвержда́ется.

Припев: Христо́с воскре́се из ме́ртвых.

Вчера́ спогребо́хся Тебе́ Христе́, / совостаю́ днесь / воскре́сшу Тебе́, / сраспина́хся Тебе́ вчера́, / Сам мя спросла́ви Спа́се во Ца́рствии Твое́м.

Припев: Пресвята́я Богоро́дице, спаси́ нас.

На нетле́нную жизнь / прихожду́ днесь бла́гостию ро́ждшагося из Тебе́, Чи́стая, / и всем конце́м свет облиста́вшаго.

Припев: Пресвята́я Богоро́дице, спаси́ нас.

Бо́га, Его́же родила́ еси́ пло́тию, из ме́ртвых, / я́коже рече́, воста́вша ви́девши, Чи́стая, лику́й, / и Сего́ я́ко Бо́га Пречи́стая возвелича́й.

Ипакои, глас 4:

Предвари́вшия у́тро я́же о Мари́и, / и обре́тшия ка́мень отвале́н от гро́ба, / слы́шаху от А́нгела: во све́те присносу́щнем Су́щаго, / с ме́ртвыми что и́щете, я́ко челове́ка? / Ви́дите гро́бныя пелены́, тецы́те и ми́ру пропове́дите, / я́ко воста́ Госпо́дь, умертви́вый смерть, / я́ко есть Сын Бо́га, спаса́ющаго род челове́ческий.

Песнь 4.

Ирмос: На Боже́ственней стра́жи / богоглаго́ливый Авваку́м / да ста́нет с на́ми, и пока́жет / светоно́сна А́нгела, / я́сно глаго́люща: / днесь спасе́ние ми́ру, / я́ко воскре́се Христо́с, / я́ко всеси́лен.

Припев: Христо́с воскре́се из ме́ртвых.

Му́жеский у́бо пол, / я́ко разве́рзый де́вственную утро́бу, / яви́ся Христо́с: / я́ко челове́к же, / А́гнец нарече́ся: / непоро́чен же, / я́ко невку́сен скве́рны, / на́ша Па́сха, / и я́ко Бог и́стинен / соверше́н рече́ся.

Припев: Христо́с воскре́се из ме́ртвых.

Я́ко единоле́тный а́гнец, / благослове́нный нам вене́ц Христо́с, / во́лею за всех закла́н бысть, / Па́сха чисти́тельная, / и па́ки из гро́ба кра́сное / пра́вды нам возсия́ Со́лнце.

Припев: Христо́с воскре́се из ме́ртвых.

Богооте́ц у́бо Дави́д / пред се́нным ковче́гом скака́ше игра́я, / лю́дие же Бо́жии святи́и, / образо́в сбытие́ зря́ще, / весели́мся Боже́ственне, / я́ко воскре́се Христо́с, / я́ко Всеси́лен.

Припев: Пресвята́я Богоро́дице, спаси́ нас.

Созда́вый Ада́ма, Твоего́ пра́отца, Чи́стая, / зи́ждется от Тебе́, и сме́ртное жили́ще разори́ Свое́ю сме́ртию днесь, / и озари́ вся / боже́ственными блиста́ньми воскресе́ния.

Припев: Пресвята́я Богоро́дице, спаси́ нас.

Его́же родила́ еси́ Христа́, / прекра́сно из ме́ртвых возсия́вша, Чи́стая зря́щи, / до́брая и непоро́чная в жена́х и кра́сная, / днесь во спасе́ние всех, со апо́столы ра́дующися, / Того́ прославля́й.

Песнь 5.

Ирмос: У́тренюем у́треннюю глубоку́, / и вме́сто ми́ра песнь принесе́м Влады́це, / и Христа́ у́зрим / пра́вды Со́лнце, / всем жизнь возсия́юща.

Припев: Христо́с воскре́се из ме́ртвых.

Безме́рное Твое́ благоутро́бие, / а́довыми у́зами содержи́мии зря́ще, / к све́ту идя́ху Христе́, / весе́лыми нога́ми, / Па́сху хва́ляще ве́чную.

Припев: Христо́с воскре́се из ме́ртвых.

Присту́пим свещено́снии, / исходя́щу Христу́ из гро́ба, я́ко жениху́, / и спра́зднуем любопра́зднственными чи́нми / Па́сху Бо́жию спаси́тельную.

Припев: Пресвята́я Богоро́дице, спаси́ нас.

Просвеща́ется боже́ственными луча́ми и живоно́сными / воскресе́ния Сы́на Твоего́, Богома́ти Пречи́стая, / и ра́дости исполня́ется / благочести́вых собра́ние.

Припев: Пресвята́я Богоро́дице, спаси́ нас.

Не разве́рзл еси́ врата́ де́вства в воплоще́нии, / гро́ба не разруши́л еси́ печа́тей, Царю́ созда́ния: / отону́дуже воскре́сшаго Тя зря́щи / Ма́ти, ра́довашеся.

Песнь 6.

Ирмос: Снизше́л еси́ в преиспо́дняя земли́, / и сокруши́л еси́ вереи́ ве́чныя, / содержа́щия свя́занныя, Христе́, / и тридне́вен, я́ко от ки́та Ио́на, / воскре́сл еси́ от гро́ба.

Припев: Христо́с воскре́се из ме́ртвых.

Сохрани́в це́ла зна́мения Христе́, / воскре́сл еси́ от гро́ба, / ключи́ Де́вы не вреди́вый в рождестве́ Твое́м, / и отве́рзл еси́ нам ра́йския две́ри.

Припев: Христо́с воскре́се из ме́ртвых.

Спа́се мой, / живо́е же и неже́ртвенное заколе́ние, / я́ко Бог Сам Себе́ / во́лею приве́л Отцу́, / совоскреси́л еси́ всеро́днаго Ада́ма, / воскре́с от гро́ба.

Припев: Пресвята́я Богоро́дице, спаси́ нас.

Возведе́ся дре́вле держи́мое сме́ртию и тле́нием, / воплоти́вшимся от Твоего́ пречи́стаго чре́ва, / к нетле́нней и присносу́щней жи́зни, / Богоро́дице Де́во.

Припев: Пресвята́я Богоро́дице, спаси́ нас.

Сни́де в преиспо́дняя земли́, / в ложесна́ Твоя́, Чи́стая, сше́дый, / и всели́выйся и воплоти́выйся па́че ума́, / и воздви́же с Собо́ю Ада́ма, / воскре́с от гро́ба.

Таже кондак, глас 8:

А́ще и во гроб снизше́л еси́, Безсме́ртне, / но а́дову разруши́л еси́ си́лу, / и воскре́сл еси́, я́ко победитель, Христе́ Бо́же, / жена́м мироно́сицам веща́вый: ра́дуйтеся, / и Твои́м апо́столом мир да́руяй, / па́дшим подая́й воскресе́ние.

Икос: Е́же пре́жде со́лнца Со́лнце заше́дшее иногда́ во гроб, / предвари́ша ко у́тру, и́щущия я́ко дне мироно́сицы де́вы, / и друга́ ко друзе́й вопия́ху: / о други́ни! Прииди́те, воня́ми пома́жем те́ло живоно́сное и погребе́ное, / плоть воскреси́вшаго па́дшаго Ада́ма, лежа́щую во гро́бе. / И́дем, потщи́мся я́коже волсви́, и поклони́мся, / и принесе́м мv́ра я́ко да́ры, не в пелена́х, но в плащани́це обви́тому, / и пла́чим, и возопии́м: о Влады́ко, воста́ни, / па́дшим подая́й воскресе́ние.

Таже глаголем: Воскресе́ние Христо́во ви́девше, / поклони́мся Свято́му Го́споду Иису́су, / еди́ному безгре́шному, / Кресту́ Твоему́ покланя́емся, Христе́, / и свято́е Воскресе́ние Твое́ пое́м и сла́вим: / Ты бо еси́ Бог наш, / ра́зве Тебе́ ино́го не зна́ем, / и́мя Твое́ имену́ем. / Прииди́те вси ве́рнии, / поклони́мся Свято́му Христо́ву Воскресе́нию: / се бо прии́де Кресто́м ра́дость всему́ ми́ру. / Всегда́ благословя́ще Го́спода, / пое́м Воскресе́ние Его́: / распя́тие бо претерпе́в, / сме́ртию смерть разруши́. [Трижды]

Воскре́с Иису́с от гро́ба, / я́коже прорече́, / даде́ нам живо́т ве́чный / и ве́лию ми́лость. [Трижды]

Песнь 7.

Ирмос: О́троки от пе́щи изба́вивый, / быв Челове́к, / стра́ждет я́ко сме́ртен, / и стра́стию сме́ртное, / в нетле́ния облачи́т благоле́пие, / Еди́н благослове́н / отце́в Бог, и препросла́влен.

Припев: Христо́с воскре́се из ме́ртвых.

Жены́ с ми́ры богому́дрыя в след Тебе́ теча́ху: / Его́же, я́ко ме́ртва, со слеза́ми иска́ху, / поклони́шася ра́дующияся Живо́му Бо́гу, / и Па́сху та́йную / Твои́м, Христе́, ученико́м благовести́ша.

Припев: Христо́с воскре́се из ме́ртвых.

Сме́рти пра́зднуем умерщвле́ние, / а́дово разруше́ние, / ино́го жития́ ве́чнаго нача́ло, / и игра́юще пое́м Вино́внаго, / Еди́наго благослове́ннаго / отце́в Бо́га, и препросла́вленнаго.

Припев: Христо́с воскре́се из ме́ртвых.

Я́ко вои́стинну свяще́нная, / и всепра́зднственная сия́ спаси́тельная нощь, / и светоза́рная, / светоно́снаго дне, / воста́ния су́щи провозве́стница: / в не́йже безле́тный Свет из гро́ба пло́тски всем возсия́.

Припев: Пресвята́я Богоро́дице, спаси́ нас.

Умертви́в Сын Твой смерть, Всенепоро́чная / днесь, всем сме́ртным пребыва́ющий живо́т во ве́ки веко́в дарова́, / еди́н благослове́нный / отце́в Бог и препросла́вленный.

Припев: Пресвята́я Богоро́дице, спаси́ нас.

Всем ца́рствуяй созда́нием, / быв челове́к, / всели́ся в Твою́, Богоблагода́тная, утро́бу, / и распя́тие претерпе́в и смерть, / воскре́се боголе́пно, / совозста́вив нас я́ко всеси́лен.

Песнь 8.

Ирмос: Сей нарече́нный и святы́й день, / Еди́н суббо́т Царь и Госпо́дь, / пра́здников пра́здник / и торжество́ есть торже́ств, / во́ньже благослови́м Христа́ во ве́ки.

Припев: Христо́с воскре́се из ме́ртвых.

Прииди́те, но́ваго виногра́да рожде́ния, / Боже́ственнаго весе́лия, / в наро́читом дни Воскресе́ния, / Ца́рствия Христо́ва приобщи́мся, / пою́ще Его́ / я́ко Бо́га во ве́ки.

Припев: Христо́с воскре́се из ме́ртвых.

Возведи́ о́крест о́чи твои́, Сио́не, и виждь: / се бо приидо́ша к тебе́, / я́ко богосве́тлая свети́ла, / от за́пада, и се́вера, и мо́ря, / и восто́ка ча́да твоя́, / в тебе́ благословя́щая Христа́ во ве́ки.

Припев: Пресвята́я Тро́ице, Бо́же наш, сла́ва Тебе́.

Троичен: О́тче Вседержи́телю, и Сло́ве, и Ду́ше, / треми́ соединя́емое во Ипоста́сех Естество́, / Пресу́щественне и Пребоже́ственне, / в Тя крести́хомся, / и Тя благослови́м во вся ве́ки.

Припев: Пресвята́я Богоро́дице, спаси́ нас.

Прии́де Тобо́ю в мир Госпо́дь, / Де́во Богоро́дице, / и чре́во а́дово расто́рг, / сме́ртным нам воскресе́ние дарова́: / Те́мже благослови́м Его́ во ве́ки.

Припев: Пресвята́я Богоро́дице, спаси́ нас.

Всю низложи́в сме́рти держа́ву / Сын Твой, Де́во, Свои́м воскресе́нием, / я́ко Бог кре́пкий совознесе́ нас и обожи́: / те́мже воспева́ем Его́ во ве́ки.

Песнь 9.

Ирмос: Свети́ся, свети́ся, / но́вый Иерусали́ме: / сла́ва бо Госпо́дня / на тебе́ возсия́. / Лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.

Припев: Христо́с воскре́се из ме́ртвых.

О Боже́ственнаго, о любе́знаго, / о сладча́йшаго Твоего́ гла́са! / С на́ми бо нело́жно / обеща́лся еси́ бы́ти, / до сконча́ния ве́ка Христе́: / Его́же, ве́рнии, / утвержде́ние наде́жди иму́ще, ра́дуемся.

Припев: Христо́с воскре́се из ме́ртвых.

О Па́сха ве́лия и свяще́ннейшая, Христе́! / О му́дросте, и Сло́ве Бо́жий, и си́ло! / Подава́й нам и́стее Тебе́ причаща́тися, / в невече́рнем дни Ца́рствия Твоего́.

Припев: Пресвята́я Богоро́дице, спаси́ нас.

Согла́сно Де́во, Тебе́ блажи́м ве́рнии: / ра́дуйся две́ре Госпо́дня: / ра́дуйся гра́де одушевле́нный: / ра́дуйся, Ея́же ра́ди нам ны́не возсия́ свет, / из Тебе́ Рожде́ннаго из ме́ртвых Воскресе́ния.

Припев: Пресвята́я Богоро́дице, спаси́ нас.

Весели́ся и ра́дуйся боже́ственная две́ре Све́та: / заше́дый бо Иису́с во гроб возсия́, / просия́в со́лнца светле́е, / и ве́рныя вся озари́в, / Богора́дованная Влады́чице.

Ексапостиларий. Самогласен:

Пло́тию усну́в, / я́ко мертв, / Царю́ и Го́споди, / тридне́вен воскре́сл еси́, / Ада́ма воздви́г от тли, / и упраздни́в смерть: / Па́сха нетле́ния, / ми́ра спасе́ние. [Трижды]

Стихиры Пасхи, глас 5:

Стих: Да воскре́снет Бог, / и расточа́тся врази́ Его́.

Па́сха / свяще́нная нам днесь показа́ся; / Па́сха но́ва свята́я; / Па́сха та́инственная; / Па́сха всечестна́я. / Па́сха Христо́с Изба́витель; / Па́сха непоро́чная; / Па́сха вели́кая; / Па́сха ве́рных. / Па́сха две́ри ра́йския нам отверза́ющая. / Па́сха всех освяща́ющая ве́рных.

Стих: Я́ко исчеза́ет дым, / да исче́знут.

Прииди́те / от виде́ния жены́ благове́стницы, / и Сио́ну рцы́те: / приими́ / от нас ра́дости благове́щения, Воскресе́ния Христо́ва: / красу́йся, лику́й / и ра́дуйся, Иерусали́ме, / Царя́ Христа́ узре́в из гро́ба, / я́ко жениха́ происходя́ща.

Стих: Та́ко да поги́бнут гре́шницы от Лица́ Бо́жия, / а пра́ведницы да возвеселя́тся.

Мироно́сицы жены́, / у́тру глубоку́, / предста́вша гро́бу Живода́вца, / обрето́ша А́нгела / на ка́мени седя́ща, / и той провеща́в им, / си́це глаго́лаше: / что и́щете Жива́го с ме́ртвыми; / что пла́чете Нетле́ннаго во тли? / Ше́дше, пропове́дите ученико́м Его́.

Стих: Сей день, его́же сотвори Госпо́дь, / возра́дуемся и возвесели́мся в онь.

Па́сха кра́сная, / Па́сха, Госпо́дня Па́сха! / Па́сха всечестна́я / нам возсия́. Па́сха, / ра́достию друг дру́га обы́мем. / О Па́сха! / Избавле́ние ско́рби, / и́бо из гро́ба днесь, / я́ко от черто́га / возсия́в Христо́с, / жены́ ра́дости испо́лни, глаго́ля: / пропове́дите апо́столом.

Слава, и ныне, глас 5: Воскресе́ния день, / и просвети́мся торжество́м, / и друг дру́га обы́мем. / Рцем бра́тие, / и ненави́дящим нас, / прости́м вся Воскресе́нием, / и та́ко возопии́м: / Христо́с воскре́се из ме́ртвых, / сме́ртию смерть попра́в, / и су́щим во гробе́х живо́т дарова́в.

КАНОН ЕЖЕ ПО ПЛОТИ РОЖДЕСТВУ ГОСПОДА БОГА И СПАСА НАШЕГО ИИСУСА ХРИСТА

Тропарь, глас 4:

Рождество́ Твое́, Христе́ Бо́же наш, / возсия́ ми́рови свет ра́зума, / в нем бо звезда́м служа́щии / звездо́ю уча́хуся / Тебе́ кла́нятися, Со́лнцу Пра́вды, / и Тебе́ ве́дети с высоты́ восто́ка. / Го́споди, сла́ва Тебе́.

Канона два. Канон первый, глас 1, творение кир Космы. Другий канон, глас тойже, творение кир Иоанна.

Песнь 1.

Ирмос: Христо́с ражда́ется – сла́вите, / Христо́с с Небе́с – сря́щите. / Христо́с на земли́ – возноси́теся. / По́йте Го́сподеви, вся земля́, / и весе́лием воспо́йте, лю́дие, / я́ко просла́вися.

Припев: Сла́ва Тебе́, Бо́же наш, сла́ва Тебе́.

Истле́вша преступле́нием, по Бо́жию о́бразу бы́вшаго, всего́ тле́ния су́ща, / лу́чшия отпа́дша Боже́ственныя жи́зни, / па́ки обновля́ет му́дрый Соде́тель, я́ко просла́вися.

Ви́дев Зижди́тель ги́блема челове́ка, рука́ми его́же созда́, / приклони́в Небеса́, схо́дит; / Сего́ же от Де́вы Боже́ственныя Чи́стыя / всего́ осуществу́ет, вои́стинну вопло́щься, я́ко просла́вися.

Му́дрость, Сло́во и Си́ла, / Сын Сый О́тчий и сия́ние, Христо́с Бог, сил утаи́вся, / ели́ко преми́рных и ели́ко на земли́, / и, вочелове́чся, обнови́л есть нас, / я́ко просла́вися.

Канон 2.

Слава: Изнесе́ чре́во свяще́нное Сло́во, я́ве неопа́льно живопи́санное купино́ю, / смеше́на зра́ком челове́чим Бо́га, / Е́вы окая́нную утро́бу кля́твы дре́вния разреша́ющее го́рькия, / Его́же, земни́и славим.

И ныне: Показа́ звезда́ пре́жде со́лнца Сло́во, прише́дшее уста́вити грехи́, / волхво́м я́ве во убо́зем верте́пе, ми́лостиваго Тебе́, пелена́ми пови́та, / Его́же, ра́дующеся, ви́дяху Самого́ – и Челове́ка, и Го́спода.

Песнь 3.

Ирмос: Пре́жде век от Отца́ рожде́нному нетле́нно Сы́ну / и в после́дняя от Де́вы / воплоще́нному безсе́менно, / Христу́ Бо́гу возопии́м: / вознесы́й рог наш, / свят еси́, Го́споди.

Припев: Сла́ва Тебе́, Бо́же наш, сла́ва Тебе́.

И́же дохнове́ния прича́щся лу́чшаго Ада́м пе́рстный / и к тле́нию попо́лзся же́нскою ле́стию, / Христа́ от Жены́ ви́дя, вопие́т: / И́же мене́ ра́ди по мне быв, Свят еси́, Го́споди.

Сообра́зен бре́нному умале́нию растворе́нием, Христе́, быв / и прича́стием пло́ти го́ршия, пода́в Боже́ственнаго естества́, / зе́млен быв, и пребы́в Бог, / и возвы́сивый рог наш, / Свят еси́, Го́споди.

Вифлее́ме, весели́ся, князе́й Иу́довых Сый Царь: / Изра́иля бо пасы́й на ра́мех херуви́мских, из тебе́ про́йде Христо́с я́ве / и вознесы́й рог наш над все́ми воцари́ся.

Канон 2.

Слава: Неве́сты Пречи́стыя пребога́тое Рождество́ ви́дети па́че ума́ сподо́бився, / лик свиря́ющих преклоня́шеся стра́нным о́бразом, / чин же пою́щих Безпло́тных, Царя́ Христа́, безсе́менно вопло́щшагося.

И ныне: Высото́ю ца́рствуяй Небе́с / милосе́рдием соверша́ет о нас из Безневе́стныя Отрокови́цы: / невеще́ствен Сый пре́жде, / но по́слежде Сло́во, одебеле́вшо пло́тию, / да па́дшаго к Себе́ привлече́т первозда́ннаго.

Го́споди, поми́луй, трижды.

Ипакои, глас 8:

Нача́ток язы́ков Не́бо Тебе́ принесе́, лежа́щему Младе́нцу во я́слех, / звездо́ю волхвы́ призва́вый, я́же и ужаса́ше / не ски́птры и престо́ли, но после́дняя нищета́: / что́ бо ху́ждше верте́па? / Что́ же смире́ншее пеле́н? / В ни́хже просия́ Божества́ Твоего́ бога́тство. / Го́споди, сла́ва Тебе́.

Песнь 4.

Ирмос: Жезл из ко́рене Иессе́ева / и цвет от него́, Христе́, / от Де́вы прозя́бл еси́, / из горы́, Хва́льный, приосене́нныя ча́щи, / прише́л еси́, вопло́щся от Неискусому́жныя, / Невеще́ственный и Бо́же: / сла́ва си́ле Твое́й, Го́споди.

Припев: Сла́ва Тебе́, Бо́же наш, сла́ва Тебе́.

Его́же дре́вле прорече́ Иа́ков, / язы́ков ожида́ние, Христе́, от коле́на Иу́дова возсия́л еси́ / и си́лу Дама́скову, Самари́йскую же коры́сть прише́л еси́ испроврещи́, / лесть пременя́я в ве́ру боголе́пну: / сла́ва си́ле Твое́й, Го́споди.

Волхва́ дре́вле Валаа́ма словесы́ ученики́, / му́дрыя звездоблюсти́тели, / ра́дости испо́лнил еси́, / звезда́ от Иа́кова, возсия́в, Влады́ко, / язы́ков нача́ток вводи́мый прия́л же еси́ я́ве: / сла́ва си́ле Твое́й, Го́споди.

Я́ко на руно́, во чре́во Де́вы сшел еси́ дождь, Христе́, / и я́ко ка́пли, на зе́млю ка́плющия. / Ефио́пия, и Фарси́с, и Арави́тстии о́строви же, / Сава́, Ми́дов всю зе́млю держа́щии, припадо́ша Тебе́, Спа́се: / сла́ва си́ле Твое́й, Го́споди.

Канон 2.

Ра́вен произы́де челове́ком Вы́шний, / во́лею плоть прии́м от Де́вы, / яд очи́стити зми́евы главы́, / приводя́ вся к Све́ту живоно́сному, / Бог Сый, от врат безсо́лнечных.

Слава: Язы́цы, и́же дре́вле тле́ю погруже́ни, / па́губы зело́ вра́жия убежа́вше, / возно́сят ру́ки с похва́льными пе́сньми, / еди́наго чту́ще Христа́, я́ко Благоде́теля, / к нам ми́лостивно прише́дшаго.

И ныне: Из ко́рене изра́стши Иессе́ева, Де́во, / уста́вы прешла́ еси́ челове́ческаго существа́, / О́тчее ро́ждши Преве́чное Сло́во, / я́ко благоволи́ Сам запеча́танную утро́бу проити́ / истоща́нием стра́нным.

Песнь 5.

Ирмос: Бог сый ми́ра, Оте́ц щедро́т, / Вели́каго Сове́та Твоего́ А́нгела, / мир подава́юща, посла́л еси́ нам: / тем, Богоразу́мия к све́ту наста́вльшеся, / от но́щи у́тренююще, / славосло́вим Тя, Человеколю́бче.

Припев: Сла́ва Тебе́, Бо́же наш, сла́ва Тебе́.

В рабе́х ке́саревым повеле́нием написа́тися поко́рься, / и нас, рабы́ су́щия, врага́ и греха́ свободи́л еси́, Христе́, / весь же по нам обнища́в, / и пе́рстнаго от самаго́ едине́ния и обще́ния богосоде́лал еси́.

Се Де́ва, я́коже дре́вле рече́, / во чре́ве прие́мши, родила́ есть Бо́га вочелове́чшася и пребыва́ет Де́ва. / Ея́же ра́ди примири́вшеся Бо́гу, гре́шнии, / Богоро́дицу су́щую вои́стинну, ве́рнии, воспои́м.

Канон 2.

Слава: Лю́тую вражду́, ю́же к нам Влады́ка отсека́я па́ки плотски́м прише́ствием, / да держа́щаго разруши́т душетле́ющаго, / мир сочета́я с невеще́ственными существы́, / положи́в присту́пна, Ро́ждшаго, тва́ри.

И ныне: Лю́дие ви́деша, дре́вле омраче́ннии, по днех свет вы́шния све́тлости, / язы́ки же Бо́гу насле́дие Сын прино́сит, / подая́ та́мо неизрече́нную благода́ть, / иде́же мно́жайший процвете́ грех.

Песнь 6.

Ирмос: Из утро́бы Ио́ну младе́нца изблева́ морски́й зверь, / якова́ прия́т, / в Де́ву же все́льшееся Сло́во / и плоть прие́мшее про́йде сохра́ншее нетле́нну. / Его́же бо не пострада́ истле́ния, / Ро́ждшую сохрани́ неврежде́нну.

Припев: Сла́ва Тебе́, Бо́же наш, сла́ва Тебе́.

Прии́де, вопло́щься, Христо́с Бог наш из чре́ва, / Его́же Оте́ц пре́жде денни́цы ражда́ет; / правле́ния же держа́ пречи́стых сил, / в я́слех ско́тиях возлежи́т и пелена́ми повива́ется, / разреша́ет же многоплете́нныя плени́цы прегреше́ний.

Ю́но из Ада́ма отроча́ смеше́ния, роди́ся Сын и ве́рным даде́ся, / бу́дущаго ве́ка Сей есть Оте́ц и Нача́льник / и нарица́ется Вели́каго Сове́та А́нгел. / Сей кре́пок Бог есть / и держа́й о́бластию всю тварь.

Канон 2.

Слава: И́же бе испе́рва к Бо́гу, Бог Сло́во / ны́не утвержда́ет немощно́е дре́вле / ви́дев сохрани́ти, е́же по нам существо́, / и́мже Себе́ вторы́м обще́нием а́бие проявля́я страсте́й свобо́дное.

И ныне: Гряде́т нас ра́ди из Авраа́млих чресл / темнопа́дшия во мра́це прегреше́ний / сы́ны воздви́гнути, до́лу пони́кших, / и́же во све́те обита́яй и я́слех чрез достоя́ние, / ны́не благоволи́в в челове́ческое спасе́ние.

Го́споди, поми́луй, трижды. Сла́ва, и ны́не:

Кондак, глас 3. Самоподобен:

Де́ва днесь Пресу́щественнаго ражда́ет, / и земля́ верте́п Непристу́пному прино́сит. / А́нгели с па́стырьми славосло́вят, / волсви́ же со звездо́ю путеше́ствуют: / нас бо ра́ди роди́ся / Oтроча́ Мла́до, Преве́чный Бог.

Икос: Еде́м Вифлее́м отве́рзе, / прииди́те, ви́дим, пи́щу в та́йне обрето́хом; / прииди́те, прии́мем су́щая ра́йская внутрь верте́па: / та́мо яви́ся ко́рень ненапое́н, / прозяба́я отпуще́ние, / та́мо обре́теся кла́дезь неиско́пан, / из него́же Дави́д пи́ти дре́вле возжада́ся. / Та́мо Де́ва ро́ждши Младе́нца, / жа́жду уста́ви а́бие Ада́мову и Дави́дову. / Сего́ ра́ди к Нему́ и́дем, / где роди́ся Отроча́ Мла́до, Преве́чный Бог.

Песнь 7.

Ирмос: О́троцы, благоче́стию совоспита́ни, / злочести́ваго веле́ния небре́гше, / о́гненнаго преще́ния не убоя́шася, / но, посреде́ пла́мени стоя́ще, поя́ху: / отце́в Бо́же, благослове́н еси́.

Припев: Сла́ва Тебе́, Бо́же наш, сла́ва Тебе́.

Па́стырие, свиря́юще, ужа́сно светоявле́ние получи́ша: / сла́ва бо Госпо́дня облиста́ их, и А́нгел, воспо́йте, – вопия́, – я́ко роди́ся Христо́с, отце́в Бог благослове́нный.

Внеза́пу с сло́вом А́нгеловым Небе́сная во́инства, / сла́ва, – вопия́ху, – Бо́гу в Вы́шних, на земли́ мир, в челове́цех благоволе́ние: / Христо́с возсия́, отце́в Бог благослове́нный.

Глаго́л что сей? – реко́ша па́стырие, – / прише́дше, уви́дим бы́вшее, Боже́ственнаго Христа́. / Вифлее́ма же доше́дше, с Ро́ждшею покланя́хуся, воспева́юще: / отце́в Бо́же, благослове́н еси́.

Канон 2.

Слуги́ у́бо неи́стовно попаля́ет, / спаса́ет же всепаля́щая со стра́хом ю́ныя, / седмочи́сленным разжже́нием возвы́шена; / и́хже венча́ пла́мень, незави́стно Го́споду подаю́щу благоче́стия ра́ди ро́су.

Слава: Помо́щниче, Христе́, челове́ком, / проти́вное гада́ние, воплоще́ние неизглаго́ланное име́яй, посрами́л еси́; / бога́тство обоже́ния нося́й, вообра́жся ны́не, / Его́же ра́ди упова́нием свы́ше в преиспо́дний приидо́хом мрак.

И ныне: Зле неудержа́нно возвыша́емый, / нече́стно беся́щийся от развраще́ния ми́ра, / низложи́л еси́ всемо́щне грех, / я́же привлече́ пре́жде, днесь же от се́тей спаса́еши, / вопло́щся во́лею, Благоде́телю.

Песнь 8.

Ирмос: Чу́да преесте́ственнаго / росода́тельная изобрази́ пещь о́браз: / не бо, я́же прия́т, пали́т ю́ныя, / я́ко ниже́ огнь Божества́ Де́вы, / в Ню́же вни́де утро́бу. / Тем воспева́юще, воспое́м: / да благослови́т тварь вся Го́спода / и превозно́сит во вся ве́ки.

Припев: Сла́ва Тебе́, Бо́же наш, сла́ва Тебе́.

Влече́т Вавило́ня дщи о́троки плене́нныя Дави́довы от Сио́на к себе́, / дароно́сцы же слет волхвы́ де́ти, / Дави́дове Богоприя́тней дще́ри моля́щияся. / Тем, воспева́юще, воспои́м: / да благослови́т тварь вся Го́спода и превозно́сит во вся ве́ки.

Орга́ны уклони́ша плаче́вныя пе́сни, / не поя́ху бо в земли́ чужде́й о́троцы Сио́новы, / вавило́нскую же разреша́ет лесть всю и мусики́йския соста́вы, / в Вифлее́ме возсия́в, Христо́с. / Тем, воспева́юще, воспои́м: / да благослови́т тварь вся Го́спода и превозно́сит во вся ве́ки.

Коры́сти Вавило́н ца́рства Сио́ня и плене́нное бога́тство прия́т, / сокро́вища же Христо́с в Сио́н сего́, / и цари́ звездо́ю наставля́я, звездоблюсти́тели влече́т. / Тем, воспева́юще, воспои́м: / да благослови́т тварь вся Го́спода и превозно́сит во вся ве́ки.

Канон 2.

Слава: Па́губы убежа́вши, / е́же обожи́тися пре́лестию, непреста́нно пое́т излия́вшагося Сло́ва / ю́ношески вся с тре́петом тварь, / несла́вну хвалу́, боя́щися, прино́сит, тле́нна су́щи, / а́ще и му́дре терпя́ше.

И ныне: Гряде́ши, заблу́ждшее на па́жить обраща́я цветотво́рную / из пусты́нных холмо́в язы́ков воста́ние, челове́ческое естество́, / си́лу ну́жную человекоуби́йцы угаси́ти, / муж же яви́вся и Бог промышле́нием.

Песнь 9.

Ирмос: Та́инство стра́нное ви́жу и пресла́вное: / Не́бо – верте́п, Престо́л Херуви́мский – Де́ву, / я́сли – вмести́лище, / в ни́хже возлеже́ Невмести́мый – Христо́с Бог, / Его́же, воспева́юще, велича́ем.

Припев: Сла́ва Тебе́, Бо́же наш, сла́ва Тебе́.

Изря́дное тече́ние зря́ще / волсви́ необы́чныя но́выя звезды́ новосия́ющия, / Небеса́ просвеща́ющия, Христа́ Царя́ зна́менующия на земли́, / ро́ждшагося в Вифлее́ме на спасе́ние на́ше.

Новорожде́нное, – волхво́м, глаго́лющим, – / Отроча́ Царь, Его́же звезда́ яви́, где есть? / Тому́ бо поклони́тися приидо́хом. / Яря́ся, И́род смуща́шеся, / Христа́ уби́ти богобо́рец шата́яся.

Испыта́ И́род вре́мя звезды́, / ея́же вожде́нием волсви́ в Вифлее́ме покланя́хуся Христу́ с да́ры; / е́юже, ко оте́честву наставля́еми, / лю́таго детоуби́йцу оста́виша пору́гана.

Канон 2.

Слава: О́бразы несве́тлы и се́ни приведе́ны, / о Ма́ти Чи́стая, ви́девше Сло́ва, / но́ва я́вльшагося от врат заключе́нных, / мня́щии же и́стинную све́тлость, досто́йно Твою́ благослови́м утро́бу.

И ныне: Жела́ние получи́вше и Бо́жия прише́ствия христокра́снии лю́дие сподо́бльшеся, / ны́не утеша́ются па́ки бытие́м: / я́ко живоно́сну благода́ть дае́ши, Де́во Чи́стая, / поклони́тися сла́ве.

Светилен:

Посети́л ны есть свыше Спас наш, Восто́к восто́ков, / и су́щии во тьме и се́ни обрето́хом и́стину, / и́бо от Де́вы роди́ся Госпо́дь.

КАНОН ЧЕСТНОМУ И ЖИВОТВОРЯЩЕМУ КРЕСТУ ХРИСТОВУ

Тропарь Креста, глас 1:

Спаси́, Го́споди, лю́ди Твоя́, / и благослови́ достоя́ние Твое́, / побе́ды на сопроти́вныя да́руя, / и Твое́ сохраня́я Кресто́м Твои́м жи́тельство.

Канон, творение Григория Синаита, глас 4.

Песнь 1.

Ирмос: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.

Припев: Сла́ва, Го́споди, Кресту́ Твоему́ Честно́му.

Кре́сте всеси́льне, апо́столов похвала́, / преподо́бных утвержде́ние, и ве́рных зна́мение, / и иера́рхов и му́чеников сла́ва, / побе́да и утвержде́ние всех хва́лящих тя.

Кре́сте всечестны́й, четвероконе́чная си́ла, / апо́столов благоле́пие, и му́чеников кре́пость, / немощны́х здра́вие показа́лся еси́, / ме́ртвым воскресе́ние, па́дающим воздви́жение.

Слава: Кре́сте, ты ми си́ла бу́ди, кре́пость и держа́ва, / изба́витель и предра́тник на борю́щия мя, / щит и храни́тель, побе́да и утвержде́ние мое́, / при́сно соблюда́я мя и покрыва́я.

И ныне: На Кре́сте, Всенепоро́чная, Твоего́ Сы́на я́ко узре́ла еси́, / ору́жие ско́рбное утро́бу Твою́ растерза́, / и восклица́ла еси́ рыда́ющи в боле́зни, / но а́бие просла́вила еси́ Креста́ си́лу.

Песнь 3.

Ирмос: Твоя́ песносло́вцы, Богоро́дице, / живы́й и незави́стный исто́чниче, / лик Себе́ совоку́пльшия духо́вно, утверди́, / в Боже́ственней Твое́й сла́ве / венце́в сла́вы сподо́би.

Припев: Сла́ва, Го́споди, Кресту́ Твоему́ Честно́му.

Кре́сте, преподо́бных ору́жие, обою́дный меч Христо́в, / ве́рных удобре́ние, боля́щих исцеле́ние и заступле́ние, / и воздви́жение уме́рших, Всече́стне.

Кре́сте, основа́ние благоче́стия, / бесо́м показа́лся еси́ губи́тель, Це́рквам благоле́пие, / нечести́вым поги́бель, враго́м посрамле́ние на день су́дный.

Слава: Кре́сте живоно́сный, / ты ми бу́ди кре́пость и побе́да, и щит, / и стена́ нера́туема, бесо́м отгна́ние, / и помысло́м погаше́ние, и ума́ моего́ сохране́ние.

И ныне: Распя́тие поно́сное, Де́во Влады́чице, Твой Сын претерпе́л есть, и сме́рть неподо́бную. / Но возне́сся, низве́рже проти́вныя вра́жия си́лы, я́ко безсме́ртен.

Го́споди, поми́луй, трижды.

Седален, глас 8. Подобен: Повеленное тайно:

Прообража́ше та́йне дре́вле Иису́с Нави́н Креста́ о́браз, / егда́ ру́це простре́ крестови́дне, Спа́се мой, / и ста со́лнце, до́ндеже враги́ низложи́, противостоя́щия Ти, Бо́гу; / ны́не же за́йде, на Кресте́ Тя зря, / и, держа́ву сме́ртную разруши́в, / весь мир совоздви́гл еси́.

Песнь 4.

Ирмос: Седя́й в сла́ве на Престо́ле Божества́, / во о́блаце ле́гце, / прии́де Иису́с Пребоже́ственный, / нетле́нною дла́нию, и спасе́ зову́щия: / сла́ва, Христе́, си́ле Твое́й.

Припев: Сла́ва, Го́споди, Кресту́ Твоему́ Честно́му.

Четвероконе́чный сый мир, / и я́ко триобою́дный меч, нача́ла тьмы сече́ши, / на́ми вообража́емь, Кре́сте, ору́жие вели́кое Христо́во, / и непобеди́мое победи́тельство всеси́льное.

Твоя́ высота́, Живоно́сне Кре́сте, возду́шнаго кня́зя бие́т, / и глубина́ всея́ бе́здны закала́ет зми́я, / широту́ па́ки вообража́ет, / низлага́я мирска́го кня́зя кре́постию Твое́ю.

Слава: Возне́сся сопривле́кл еси́ па́дшия, / воздви́гл еси́ естество́ земно́е, / Престо́лу Бо́жию спросла́вился еси́, Кре́сте, / высото́ вели́кая, мирски́й мо́сте, / ду́шу мою́ от страсте́й глубины́ вознеси́ вско́ре.

И ныне: Крестообра́зно, Пречи́стая Отрокови́це Богоро́дице, / дла́ни Твои́ распросте́рши ко и́же на Кресте́ Воздви́женному, / и моли́твы, Де́во, ны́не принеси́, / за всех ве́рно моля́щихся Тебе́.

Песнь 5.

Ирмос: Ужасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.

Припев: Сла́ва, Го́споди, Кресту́ Твоему́ Честно́му.

Кре́сте, небе́сная ле́ствице святы́ни, степе́нем наста́вниче, / Христо́ва высота́ и сла́ва еси́, / Бо́жий о́браз назнамена́телен миру, / неви́димому же и ви́димому, единоче́стне.

Кре́сте, о́бразе неиспи́санный си́лою, / освяще́ние вода́м, очище́ние возду́ху, / освяще́ние и просвеще́ние вся́кому, му́жества зна́мение, / и Христо́в ски́птр непрело́жный, проти́вныя в зе́млю попира́я.

Слава: Кре́сте всеси́льне, / злочести́выя низложи́ враги́, ненави́дящия и ху́лящия тя безу́мно, / язы́ки попали́ и угаси́ шата́ния их. / О Кре́сте всесвяты́й и Христоно́сный, / сохрани́ нас держа́вою Твое́ю.

И ныне: Всех Цари́це Влады́чице, ски́птром Рождества́ Твоего́ / разруши́, Деви́це, воста́ние ху́лящих кре́стную си́лу. / Даждь кре́пость и очище́ние, / побе́ду и по́мощь ве́рным лю́дем Твои́м.

Песнь 6.

Ирмос: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.

Припев: Сла́ва, Го́споди, Кресту́ Твоему́ Честно́му.

Кре́сте всех воскресе́ние, / Крест па́дших исправле́ние, / страсте́й умерщвле́ние и пло́ти пригвожде́ние, / Крест душа́м сла́ва и свет ве́чный.

Крест враго́в губи́тель, / Крест злочести́вых я́зва и плене́ние, и ве́рных держа́ва, / благочести́вых храни́тель и бесо́в отгони́тель.

Слава: Крест страсте́й па́губа, / Крест помысло́в отгна́ние, / Крест сокруше́ние язы́ческо искуси́тельно / и духово́м показа́ся лови́тельство.

И ныне: Крест воздви́жется и па́дают духо́в возду́шных чи́нове, / Крест снизхо́дит, и нечести́вии вси ужаса́ются, / я́ко мо́лнию ви́дяще кре́стную си́лу.

Го́споди, поми́луй, трижды. Сла́ва, и ны́не:

Кондак, глас 4. Самоподобен:

Вознесы́йся на Крест во́лею, / тезоимени́тому Твоему́ но́вому жи́тельству / щедро́ты Твоя́ да́руй, Христе́ Бо́же, / возвесели́ нас си́лою Твое́ю, / побе́ды дая́ нам на сопоста́ты, / посо́бие иму́щим Твое́ oру́жие ми́ра, / непобеди́мую побе́ду.

Икос: И́же до тре́тияго Небесе́ восхище́н бысть в рай / и глаго́лы слы́шав неизрече́нныя и Боже́ственныя, / и́хже не леть язы́ки [челове́ческими] глаго́лати, / что Гала́том пи́шет, я́ко рачи́телие Писа́ний прочто́сте и позна́сте: / мне, глаго́лет, хвали́тися да не бу́дет, то́кмо во еди́ном Кресте́ Госпо́дни, / на не́мже, страда́в, уби́ стра́сти. / Того́ у́бо и мы изве́стно держи́м, Крест Госпо́день, хвалу́ вси: / есть бо нам спаси́тельное сие́ Дре́во / oру́жие ми́ра, непобеди́мая побе́да.

Песнь 7.

Ирмос: Не послужи́ша тва́ри Богому́дрии, / па́че Созда́вшаго, / но о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог благослове́н еси́.

Припев: Сла́ва, Го́споди, Кресту́ Твоему́ Честно́му.

Неразде́льную Тро́ицу и неслия́нну, / естество́ еди́нством благосло́вим, / Отца́ нерожде́нна, и рожде́нна Сы́на, / и Свята́го исходи́тельнаго Боже́ственнаго Ду́ха, пе́сньми пою́ще: / благослове́н Бог оте́ц на́ших.

Незаходи́тельными мо́лниями Твои́ми, Триипоста́сне, / на́ша озари́ у́мныя о́чи, / добро́ту Твою́, Трисве́тне, пресу́щественную зре́ти, / я́же челове́ком недове́домая и непристу́пная А́нгелом.

Слава: Луча́ми све́та Твоего́ / па́дшую мою́ ду́шу возведи́ от глубины́, / благи́й Бо́же, препе́тый и всеси́льный, / попо́лзшуюся от све́та благода́тнаго и во тьму воглу́бльшуюся.

И ныне: Крестообра́зно просте́рши ру́це, Чи́стая, / к распросте́ршему свои́ ру́це на Дре́ве Кре́стнем, / и возне́сшему естество́ на́ше, и умертви́вшему вражде́бныя полки́, / моля́щи не преста́й.

Песнь 8.

Ирмос: О́троки благочести́выя в пещи́ / Рождество́ Богоро́дично спасло́ есть, / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте дела́ / и превозноси́те Его́ во вся ве́ки.

Припев: Сла́ва, Го́споди, Кресту́ Твоему́ Честно́му.

Высота́ Христо́вых страсте́й и лук, и ору́жие, и меч, / ору́жие непосты́дное, и си́ла непобеди́мая, / Христо́во подно́жие и победи́тельство на враги́, / зна́мения Ца́рствия, ски́птре ве́рных, / показа́лся еси́, Кре́сте победоно́сне.

Воздви́гл еси́ на́ше па́дшее естество́, Христо́м распе́ншимся, совозста́вив; / высото́ Боже́ственная, глубино́ неизглаго́ланная, / Христо́во ты еси́ зна́мение, Кре́сте пребога́те, и широта́ безме́рная, / и зна́мение непостижи́мыя Тро́ицы, жизноно́сче.

Слава: Устна́ми, душе́ю же и се́рдцем Крест Госпо́день лобыза́юще, / прииди́те ны́не вознесе́м вси и возвели́чим, / покланя́ющеся рцем вку́пе, песнь пречи́стую, вопию́ще: / pа́дуйся, вели́кое бога́тство, Кре́сте, церко́вное украше́ние.

И ныне: Дре́во жи́зни и спасе́ния, / Дре́во безсме́ртия, Дре́во ра́зума, / Дре́во трилюбе́зно, нетле́нно и неизнуря́емо, / Крест трисоста́вный, честно́е Дре́во, / Тро́ицы бо но́сит Триипоста́сныя о́браз.

Песнь 9.

Ирмос: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная, / Богоро́дице Чи́стая Присноде́во.

Припев: Сла́ва, Го́споди, Кресту́ Твоему́ Честно́му.

Кто слы́шана сотвори́т, я́коже пи́шется, де́йствия твоя́, миролюбе́зный Кре́сте, / си́лы и чудеса́, уме́ршим воста́ние; / и мир весь совозне́сл еси́, вознесы́йся к Бо́гу многожела́емый.

Утвержде́ние ве́рным Крест треблаже́нный, / зна́мение и похвала́, Дре́во всеси́льное, / Крест Христо́в вели́кий и соверше́нный, / апо́столом похвала́, преподо́бным утвержде́ние / и му́чеником кре́пость и держа́ва, / ве́рным побе́да и похвала́.

Слава: Ра́дуйся, Кре́сте, о́бразе неопи́санный и многоимени́тый, / Дре́во требога́тное, стра́шно же и всеблаже́нно; / ра́дуйся, Кре́сте всесвяты́й и всеси́льный; / ра́дуйся, храни́телю жи́зни на́шея, / Госпо́день Кре́сте многопе́тый.

И ныне: Кре́сте Честны́й, храни́тель души́ и те́ла бу́ди ми, / о́бразом свои́м бе́сы низлага́я, враги́ отгоня́я, стра́сти упраждня́я, / и благослове́ние да́руя ми, и жизнь и си́лу, / соде́йствием Свята́го Ду́ха, и честны́ми Пречи́стыя мольба́ми.

Светилен, глас 2. Подобен: Учеником:

Крест храни́тель всея́ вселе́нныя, / Крест красота́ Це́ркве, / Крест царе́й держа́ва, / Крест ве́рных утвержде́ние, / Крест А́нгелов сла́ва и де́монов я́зва.

Слава, и ныне, Крестобогородичен: У Креста́ предстоя́щи, Тя безсе́менно Ро́ждшая, / и рыда́ющи вопия́ше: / увы́, сладча́йшее Ча́до, / ка́ко заше́л еси́ от о́чию Мое́ю; / ка́ко в ме́ртвых вмени́лся еси́.

Молитва Честному и Животворящему Кресту:

Го́споди Иису́се Христе́, Сы́не Бо́га жива́го, Тво́рче не́ба и земли́, Спаси́телю мира, се аз, недосто́йный и па́че всех грешне́йший, смире́нно коле́на се́рдца моего́ пред сла́вою вели́чества Твоего́ преклоня́я, воспева́ю и велича́ю безме́рное страда́ние Твое́, и благодаре́ние Тебе́, Царю́ всех и Бо́гу приношу́, я́ко благоизво́лил еси́ сни́ти с небе́снаго Престо́ла Твоего́ и воплоти́тися от Пречи́стыя Де́вы Мари́и, ра́ди спасе́ния челове́ческаго; безпло́тен сый, плотско́е естество́ Божеству́ совокупля́я; бога́т сый, во́лею обнища́л еси́, да челове́ка во Ца́рствии Твое́м обогати́ши; труды́ и вся́кия челове́ческия беды́, я́ко челове́к, на Себе́ поне́сл еси́, да всем во вся́ких печа́лех и ну́ждах посо́бствуеши; четы́редесять дней пости́выйся, всем к воздержа́нию путь показа́л еси́; мно́жицею от лука́вых искуше́н был еси́, всех от искуше́ний вся́ких избавля́я. Вем, всеси́льный Влады́ко, я́ко вся сия́ Тебе́ непотре́бна бы́ша, но челове́ческаго ра́ди спасе́ния вся претерпе́л еси́: пре́дан был еси́ за три́десять сре́бреник, да челове́ка иску́пиши от лю́тыя рабо́ты вра́жия; от неми́лостивых Иуде́й, я́ко незло́бивый а́гнец, похище́н был еси́, род челове́ческий от поглоще́ния во́лка мы́сленнаго исторга́я; на суди́щи пред А́нною и Каиа́фою предста́л еси́, всех от осужде́ния огня́ ве́чнаго отводя́; свя́зан, пору́ган, оплева́н, от ло́жных свиде́телей оклевета́н и на поно́сную смерть осужде́н, челове́ка от вся́кия напа́сти, муче́ния и от ве́чныя сме́рти свобожда́я; Пила́ту, нико́его зла соде́явый, пре́дан был еси́ и ко И́роду по́слан, и па́ки пору́ган, челове́ка от зла́го обстоя́ния и от поруга́ний вра́жиих избавля́я. Что у́бо возда́м Тебе́, Влады́ко Человеколю́бче, о всех, я́же претерпел еси́ мене́ ра́ди гре́шнаго? Не вем. Ду́ша бо и те́ло, и вся блага́я от Тебе́ суть, и вся моя́ Твоя́ суть, и аз Твой есмь; то́чию на безчи́сленное Твое́ милосе́рдие, благоутро́бне Го́споди, наде́яся, пою́ Твое́ неизрече́нное долготерпе́ние, велича́ю неисповеди́мое смотре́ние Твое́, сла́влю Твою́ безме́рную ми́лость, и́миже преклони́лся еси́ мене́ ра́ди осужде́ннаго, да аз оправда́н бу́ду. К столпу́, Спа́се, привя́зан и без ми́лости бие́н, ми́лостив сый, разреши́ мя, молю́ся, от грехо́в мои́х; те́рнием венча́н, души́ моея́ грехо́вное те́рние искорени́; тро́стию бие́н по главе́, сокруши́ главу́ зми́я, уязвля́ющаго мя жа́лом греха́; в багря́ну ри́зу оболче́н и мучи́телем пре́дан, просвети́ ми, Царю́ Пресвяты́й, одея́ние душе́вное, да вни́ду в черто́г Твой всекра́сный; с разбо́йники вмене́н и Крест на ра́му Свое́ю понесы́й, разбо́йника врага́, и́щущаго ду́шу мою́ уби́ти, Твои́м Кресто́м прожени́. Вем Тя, Иису́се долготерпели́ве, лю́те уя́звленнаго; от верху́ главы́ Твоея́ святы́я, да́же до стопы́ ножны́я, не бе в Тебе́ ме́ста це́ла. Что же возглаго́лю о неизрече́нном человеколю́бии Твое́м, Христе́ Спаси́телю? То́чию в сокруше́нии се́рдца моего́, покланя́яся Твои́м Пречи́стым страсте́м и вселюбе́зно ты́я лобыза́я, вопию́: поми́луй мя, гре́шнаго. На Кресте́ пригвозди́тися изво́ливый, пригвозди́ за́поведем Твои́м се́рдце мое́; воздви́жен со Кресто́м на горе́ Голго́фе, воздви́гни мы́сли моя́ к небеси́, да всегда́ го́рняя му́дрствую; же́лчию со о́цтом напое́н, огорче́нное ми грехо́м се́рдце услади́ любо́вию Твое́ю, и жа́ждуща напо́й пото́ком сла́дости Твоея́; ру́це Свои́ пречи́стеи распростры́й на прия́тие всех, приими́ мя, гре́шнаго; но́зе пригвожде́ны име́вый, хотя́ всегда́ со гре́шники бы́ти, бу́ди со мно́ю, гре́шным, возбраня́я нога́м мои́м от вся́каго пути́ лука́ваго; се́рдце отве́рсто име́вый, яви́ мне благода́ть Свою́, гре́шному; главу́ пресвяту́ю на Кресте́ преклони́вый, услы́ши недосто́йныя моли́твы моя́. О, пречу́дная и неизме́римая глубино́ милосе́рдия, Христе́ Бо́же, за враги́ распина́тели Своя́ Бо́гу Отцу́ моли́выйся, даждь и мне, гре́шному, сию́ благода́ть, люби́ти враги́ моя́ и моли́тися за них; разбо́йнику ка́ющемуся рай отве́рзый, воззри́, Све́те мой, на мя, гре́шнаго, пода́ждь покая́ние и отве́рзи ми две́ри ми́лости Твоея́, и помяни́ мя, недосто́йнаго, во Ца́рствии Твое́м. Наконе́ц, ду́ха Своего́ пресвята́го преда́вый в ру́це Бо́гу Отцу́, приими́, Созда́телю, дух мой во вре́мя кончи́ны моея́; со Креста́ снят и во гро́бе я́ко мертв положе́н, Спа́се, живы́й во све́те непристу́пнем, возьми́ от мене́ тя́жкое бре́мя грехо́вное, и не возгнуша́йся, Человеколю́бче, всели́тися во гроб се́рдца моего́ недосто́йнаго, на умерщвле́ние моего́ плотска́го мудрова́ния; я́ко да не ктому́ себе́, бре́нное созда́ние Твое́, но Тебе́, Го́сподеви и Бо́гу моему́ живы́й, Твои́м, о Всемилости́ве, благоутро́бием, слодо́блюся ви́дети Тебе́, Созда́теля и Спаси́теля моего́, за прия́тие сме́рти кре́стныя, сла́вою и че́стию венча́ннаго, во све́те неприкоснове́нныя Твоея́ сла́вы; иде́же со Безнача́льным Твои́м Отце́м, и со Пресвяты́м, и Благи́м, и Животворя́щим и Единосу́щным Твои́м Ду́хом ца́рствуеши пре́жде век, ны́не и при́сно и во ве́ки веко́в, ами́нь.

КАНОН МОЛЕБНЫЙ ПРЕСВЯТЕЙ БОГОРОДИЦЕ

Поемый во всякой скорби душевней и обстоянии. Tворение Феостирикта монаха.

Тропарь Богородице, глас 4:

К Богоро́дице приле́жно ны́не притеце́м, / гре́шнии и смире́ннии, и припаде́м, / в покая́нии зову́ще из глубины́ души́: / Влады́чице, помози́, на ны милосе́рдовавши, / потщи́ся, погибáем от мно́жества прегреше́ний, / не отврати́ Твоя́ рабы́ тщи, / Тя бо и еди́ну наде́жду и́мамы.

Слава, и ныне: Не умолчи́м никогда́, Богоро́дице, / си́лы Твоя́ глаго́лати, недосто́йнии: / áще бо Ты не бы предстоя́ла моля́щи, / кто бы нас избáвил от толи́ких бед; / кто же бы сохрани́л до ны́не свобо́дны; / не отсту́пим, Влады́чице, от Тебе́, / Твоя́ бо рабы́ спасáеши при́сно от вся́ких лю́тых.

Канон Пресвятыя Богородицы, глас 8.

Песнь 1.

Ирмос: Во́ду проше́д, я́ко су́шу, / и еги́петскаго зла избежáв, / изрáильтянин вопия́ше: / Избáвителю и Бо́гу на́шему пои́м.

Припев: Пресвята́я Богоро́дице, спаси́ нас.

Мно́гими содержи́мь напáстьми, / к Тебе́ прибега́ю, спасе́ния иски́й: / о, Мáти Сло́ва и Де́во, / от тя́жких и лю́тых мя спаси́.

Страсте́й мя смущáют прило́зи, / мно́гаго уны́ния испо́лнити мою́ ду́шу; / умири́, Отрокови́це, / тишино́ю Сы́на и Бо́га Твоего́, Всенепоро́чная.

Слава: Спáса ро́ждшую Тя и Бо́га, / молю́, Де́во, избáвитися ми лю́тых: / к Тебе́ бо ны́не прибегáя, / простирáю и ду́шу и помышле́ние.

И ныне: Неду́гующа те́лом и душе́ю, / посеще́ния Боже́ственнаго и промышле́ния от Тебе́ сподо́би, еди́на Богомáти, / я́ко блага́я, Благáго же Роди́тельница.

Песнь 3.

Ирмос: Небе́снаго кру́га Верхотво́рче, Го́споди, / и Це́ркве Зижди́телю, / Ты ме́не утверди́ в любви́ Твое́й, / желáний крáю, ве́рных утвержде́ние, / Еди́не Человеколю́бче.

Припев: Пресвята́я Богоро́дице, спаси́ нас.

Предстáтельство и покро́в жи́зни моея́ / полагáю Тя, Богороди́тельнице Де́во: / Ты мя окорми́ ко пристáнищу Твоему́, благи́х вино́вна; / ве́рных утвержде́ние, еди́на Всепе́тая.

Молю́, Де́во, душе́вное смуще́ние и печа́ли моея́ бу́рю разори́ти: / Ты бо, Богоневе́стная, / нача́льника тишины́ Христа́ родилá еси́, еди́на Пречи́стая.

Слава: Благоде́теля ро́ждши до́брых вино́внаго, / благодея́ния бога́тство всем источи́, / вся бо мо́жеши, / я́ко си́льнаго в кре́пости Христа́ ро́ждши, Богоблаже́нная.

И ныне: Лю́тыми неду́ги и боле́зненными страстьми́ истязáему, Де́во, Ты ми помози́: / исцеле́ний бо неоску́дное Тя зна́ю сокро́вище, Пренепоро́чная, неиждивáемое.

Спаси́ от бед рабы́ Твоя́, Богоро́дице, / я́ко вси по Бо́зе к Тебе́ прибегáем, / я́ко неруши́мей стене́ и предстáтельству.

При́зри благосе́рдием, всепе́тая Богоро́дице, / на мое́ лю́тое телесе́ озлобле́ние, / и исцели́ души́ моея́ боле́знь.

Го́споди, поми́луй, трижды.

Тропарь, глас 2:

Моле́ние те́плое и стенá необори́мая, / ми́лости исто́чниче, мирови прибе́жище, / приле́жно вопие́м Ти: / Богоро́дице Влады́чице, предвари́, / и от бед избáви нас, / еди́на вско́ре предстáтельствующая.

Песнь 4.

Ирмос: Услы́шах, Го́споди, / смотре́ния Твоего́ тáинство, / разуме́х дела́ Твоя́ / и прослáвих Твое́ Божество́.

Припев: Пресвята́я Богоро́дице, спаси́ нас.

Страсте́й мои́х смуще́ние, / ко́рмчию ро́ждшая Го́спода, / и бу́рю утиши́ мои́х прегреше́ний, Богоневе́стная.

Милосе́рдия Твоего́ бе́здну призывáющу подáждь ми, / я́же Благосе́рдаго ро́ждшая и Спáса всех пою́щих Тя.

Наслаждáющеся, Пречи́стая, Твои́х даровáний, / благодáрственное воспевáем пе́ние, / ве́дуще Тя Богомáтерь.

Слава: На одре́ боле́зни моея́ и не́мощи низлежáщу ми, / я́ко благолюби́ва, помози́, Богоро́дице, / еди́на Присноде́во.

И ныне: Наде́жду и утвержде́ние и спасе́ния сте́ну недви́жиму иму́ще Тя, Всепе́тая, / неудо́бства вся́каго избавля́емся.

Песнь 5.

Ирмос: Просвети́ нас повеле́нии Твои́ми, Го́споди, / и мы́шцею Твое́ю высо́кою / Твой мир подáждь нам, Человеколю́бче.

Припев: Пресвята́я Богоро́дице, спаси́ нас.

Испо́лни, Чи́стая, весе́лия се́рдце мое́, / Твою́ нетле́нную даю́щи ра́дость, / весе́лия ро́ждшая Вино́внаго.

Избáви нас от бед, Богоро́дице Чи́стая, / ве́чное ро́ждши избавле́ние, / и мир, всяк ум преиму́щий.

Слава: Разреши́ мглу прегреше́ний мои́х, Богоневе́сто, / просвеще́нием Твоея́ све́тлости, / Свет ро́ждшая Боже́ственный и преве́чный.

И ныне: Исцели́, Чи́стая, души́ моея́ неможе́ние, / посеще́ния Твоего́ сподо́бльшая, / и здрáвие моли́твами Твои́ми подáждь ми.

Песнь 6.

Ирмос: Моли́тву пролию́ ко Го́споду, / и Тому́ возвещу́ печа́ли моя́, / я́ко зол душа́ моя́ испо́лнися, / и живо́т мой а́ду прибли́жися, / и молю́ся, я́ко Ио́на: / от тли, Бо́же, возведи́ мя.

Припев: Пресвята́я Богоро́дице, спаси́ нас.

Сме́рти и тли я́ко спасл есть, / Сам Ся издáв сме́рти, / тле́нием и сме́ртию мое́ естество́, я́то бы́вшее, Де́во, / моли́ Го́спода и Сы́на Твоего́, / враго́в злоде́йствия мя избáвити.

Предстáтельницу Тя живота́ вем и храни́тельницу тве́рду, Де́во, / и напáстей решáщу молвы́, и нало́ги бесо́в отгоня́ющу; / и молю́ся всегда́, от тли страсте́й мои́х избáвити мя.

Слава: Я́ко сте́ну прибе́жища стяжáхом, / и душ всесоверше́нное спасе́ние, / и прострáнство в ско́рбех, Отрокови́це, / и просвеще́нием Твои́м при́сно рáдуемся: / о, Влады́чице, и ны́не нас от страсте́й и бед спаси́.

И ныне: На одре́ ны́не немощству́яй лежу́, / и несть исцеле́ния пло́ти мое́й: / но, Бо́га и Спáса ми́ру и Избáвителя неду́гов ро́ждшая, / Тебе́ молю́ся, Благо́й: / от тли неду́г возстáви мя.

Го́споди, поми́луй, трижды. Сла́ва, и ны́не:

Кондaк, глас 6:

Предстáтельство христиа́н непосты́дное, / ходáтайство ко Творцу́ непрело́жное, / не пре́зри гре́шных моле́ний глáсы, / но предвари́, я́ко Благáя, на по́мощь нас, / ве́рно зову́щих Ти; / ускори́ на моли́тву, и потщи́ся на умоле́ние, / предстáтельствующи при́сно, Богоро́дице, чту́щих Тя.

Икос: Простри́ дла́ни Твоя́, и́миже всех Влады́ку я́ко Младе́нца прия́ла еси́ за мно́жество бла́гости, / не оста́ви нас, всегда́ наде́ющихся на Тя, бо́дренною Твое́ю моли́твою, / и неисче́тною просты́нею уще́дри нас, / и пода́ждь душа́м на́шим милосе́рдие Твое́, во ве́ки источа́ющи, / Тебе́ бо и́мамы гре́шнии Засту́пницу от находя́щих на ны бед и зол. / Но я́ко иму́щи милосе́рдия щедро́ты, / ускори́ на моли́тву и потщи́ся на умоле́ние, / предста́тельствующи при́сно, Богоро́дице, чту́щих Тя.

Иный кондaк, глас тот же:

Не и́мамы ины́я по́мощи, / не и́мамы ины́я наде́жды, / ра́зве Тебе́, Пречи́стая Де́во. / Ты нам помози́, / на Тебе́ наде́емся, и Тобо́ю хвáлимся, / Твои́ бо есмы́ рабы́, да не постыди́мся.

Стихира, глас тот же:

Не вве́ри мя челове́ческому предстáтельству, / Пресвята́я Влады́чице, / но приими́ моле́ние раба́ Твоего́: / скорбь бо обдержи́т мя, / терпе́ти не могу́ де́монскаго стреля́ния, / покро́ва не и́мам, / ниже́ где прибе́гну, окая́нный, / всегда́ побеждáемь, / и утеше́ния не и́мам, ра́зве Тебе́, Влады́чице мира, / уповáние и предстáтельство ве́рных, / не пре́зри моле́ние мое́, поле́зно сотвори́.

Песнь 7.

Ирмос: От Иуде́и доше́дше о́троцы, / в Вавило́не иногдá, / ве́рою Тро́ическою плáмень пе́щный попрáша, пою́ще: / отце́в Бо́же, благослове́н еси́.

Припев: Пресвята́я Богоро́дице, спаси́ нас.

На́ше спасе́ние я́коже восхоте́л еси́, Спáсе, устро́ити, / во утро́бу Де́выя всели́лся еси́, / Ю́же ми́ру предстáтельницу показа́л еси́: / оте́ц на́ших Бо́же, благослове́н еси́.

Воли́теля ми́лости, Его́же родилá еси́, Мáти чи́стая, / умоли́ избáвитися от прегреше́ний и душе́вных скверн ве́рою зову́щим: / оте́ц на́ших Бо́же, благослове́н еси́.

Слава: Сокро́вище спасе́ния и Исто́чник нетле́ния, Тя Ро́ждшую, / и столп утвержде́ния, и дверь покая́ния, зову́щим показа́л еси́: / оте́ц на́ших Бо́же, благослове́н еси́.

И ныне: Теле́сныя сла́бости и душе́вныя неду́ги, Богороди́тельнице, / любо́вию приступáющих к кро́ву Твоему́, Де́во, исцели́ти сподо́би, / Спáса Христа́ нам ро́ждшая.

Песнь 8.

Ирмос: Царя́ Небе́снаго, / Его́же пою́т во́и А́нгельстии, / хвали́те и превозноси́те во вся ве́ки.

Припев: Пресвята́я Богоро́дице, спаси́ нас.

По́мощи я́же от Тебе́ тре́бующия не пре́зри, Де́во, / пою́щия и превознося́щия Тя во ве́ки.

Неможе́ние души́ моея́ исцеля́еши и теле́сныя боле́зни, Де́во, / да Тя прослáвлю, Чи́стая, во ве́ки.

Слава: Исцеле́ний бога́тство изливáеши ве́рно пою́щим Тя, Де́во, / и превознося́щим неизрече́нное Твое́ рождество́.

И ныне: Напáстей Ты прило́ги отгоня́еши и страсте́й нахо́ды, Де́во: / те́мже Тя пое́м во вся ве́ки.

Песнь 9.

Ирмос: Вои́стинну Богоро́дицу / Тя испове́дуем, / спасе́ннии Тобо́ю, Де́во чи́стая, / с безпло́тными ли́ки Тя величáюще.

Припев: Пресвята́я Богоро́дице, спаси́ нас.

То́ка слез мои́х не отврати́ся, / Я́же от вся́каго лица́ вся́ку сле́зу отъе́мшаго, / Де́во, Христа́ ро́ждшая.

Ра́дости мое́ се́рдце испо́лни, Де́во, / Я́же ра́дости прие́мшая исполне́ние, / грехо́вную печа́ль потребля́ющи.

Пристáнище и предстáтельство к Тебе́ прибегáющих / бу́ди, Де́во, и стена́ неруши́мая, / прибе́жище же и покро́в и весе́лие.

Слава: Све́та Твоего́ заря́ми просвети́, Де́во, / мрак неве́дения отгоня́ющи, / благове́рно Богоро́дицу Тя испове́дающих.

И ныне: На ме́сте озлобле́ния не́мощи смири́вшагося, Де́во, исцели́, / из нездрáвия во здрáвие претворя́ющи.

Богородичны, глас 2:

Вы́шшую небе́с, / и чи́стшую све́тлостей со́лнечных, / изба́вльшую нас от кля́твы, / Влады́чицу ми́ра / пе́сньми почти́м.

От мно́гих мои́х грехо́в / немощству́ет те́ло, / немощству́ет и душа́ моя́: / к Тебе́ прибега́ю Благода́тней, / наде́жде ненаде́жных, / Ты ми помози́.

Влады́чице и Ма́ти Изба́вителя, / приими́ моле́ние / недосто́йных раб Твои́х, / да хода́тайствуеши к Ро́ждшемуся от Тебе́. / О Влады́чице ми́ра, бу́ди Хода́таица!

Пое́м приле́жно Тебе́ песнь ны́не / всепе́той Богоро́дице ра́достно, / со Предте́чею, и все́ми святы́ми, / моли́ Богоро́дице, / е́же уще́дрити ны.

(Не́мы устне́ нечести́вых, / не покланя́ющихся о́бразу Твоему́ честно́му, / и́же напи́сан бысть от Апо́стола Луки́ свяще́ннейша, / Одиги́трии.)

Вся А́нгелов во́инства, / Предте́че Госпо́день, / апо́столов двоенадеся́тице, святи́и вси / с Богоро́дицею, сотвори́те моли́тву, / во е́же спасти́ся нам.

Молитвы ко Пресвятой Богородице:

Цари́це моя́ преблага́я, наде́ждо моя́ Богоро́дице, прия́телище си́рых и стра́нных предстáтельнице, скорбя́щих рáдосте, оби́димых покрови́тельнице! Зри́ши мою́ беду́, зри́ши мою́ скорбь, помози́ ми я́ко не́мощну, окорми́ мя я́ко стрáнна. Оби́ду мою́ ве́си, разреши́ ту, я́ко во́лиши: я́ко не и́мам ины́я по́мощи ра́зве Тебе́, ни ины́я предстáтельницы, ни благи́я уте́шительницы, то́кмо Тебе́, о Богомáти, я́ко да сохрани́ши мя и покры́еши во ве́ки веко́в. Ами́нь.

К кому́ возопию́, Влады́чице? К кому́ прибе́гну в го́рести мое́й, áще не к Тебе́, Цари́це Небе́сная? Кто плач мой и воздыха́ние мое прии́мет, áще не Ты, Пренепоро́чная, наде́ждо христиа́н и прибе́жище нам, гре́шным? Кто пáче Тебе́ в напáстех защити́т? Услы́ши у́бо стена́ние мое́, и приклони́ у́хо Твое́ ко мне, Влады́чице Мáти Бо́га моего́, и не пре́зри мене́, тре́бующаго Твоея́ по́мощи, и не отри́ни мене́, гре́шнаго. Вразуми́ и научи́ мя, Цари́це Небе́сная; не отступи́ от мене́, раба́ Твоего́, Влады́чице, за ропта́ние мое́, но бу́ди мне Мáти и засту́пница. Вручáю себе́ ми́лостивому покро́ву Твоему́: приведи́ мя, гре́шнаго, к ти́хой и безмяте́жной жи́зни, да плáчуся о гресе́х мои́х. К кому́ бо прибе́гну пови́нный аз, áще не к Тебе́, упова́нию и прибе́жищу гре́шных, наде́ждою на неизрече́нную ми́лость Твою́ и щедро́ты Твоя́ окриля́емь? О, Влады́чице Цари́це Небе́сная! Ты ми уповáние и прибе́жище, покро́в и заступле́ние и по́мощь. Цари́це моя́ преблага́я и ско́рая засту́пнице! Покры́й Твои́м хода́тайством моя́ прегреше́ния, защити́ мене́ от враг ви́димых и неви́димых; умягчи́ сердца́ злых челове́к, возстаю́щих на мя. О, Мáти Го́спода моего́ Творцá! Ты еси́ ко́рень де́вства и неувяда́емый цвет чистоты́. О, Богороди́тельнице! Ты подáждь ми по́мощь немощству́ющему плотски́ми страстьми́ и боле́знующему се́рдцем, еди́но бо Твое́ и с Тобо́ю Твоего́ Сы́на и Бо́га на́шего и́мам заступле́ние; и Твои́м пречу́дным заступле́нием да избáвлюся от вся́кия беды́ и напа́сти, о Пренепоро́чная и Пресла́вная Бо́жия Мáти Мари́е. Те́мже со упова́нием глаго́лю и вопию́: ра́дуйся, благода́тная, ра́дуйся, обра́дованная; ра́дуйся, преблагослове́нная, Госпо́дь с Тобо́ю.

КАНОН РОЖДЕСТВУ ПРЕСВЯТЫЯ ВЛАДЫЧИЦЫ НАШЕЯ БОГОРОДИЦЫ И ПРИСНОДЕВЫ МАРИИ

Тропарь, глас 4:

Рождество́ Твое́, Богоро́дице Де́во, / ра́дость возвести́ всей вселе́нней: / из Тебе́ бо возсия́ Со́лнце Пра́вды, Христо́с Бог наш, / и, разруши́в кля́тву, даде́ благослове́ние, / и, упраздни́в смерть, дарова́ нам живо́т ве́чный.

Канон первый, творение кир Иоанна, глас 2. Иный канон, кир Андрея, глас 8.

Песнь 1.

Ирмос: Гряди́те, лю́дие, / пои́м песнь Христу́ Бо́гу, / разде́льшему мо́ре и наста́вльшему лю́ди, / я́же изведе́ из рабо́ты еги́петския, / я́ко просла́вися.

Припев: Пресвята́я Богоро́дице, спаси́ нас.

Гряди́те, ве́рнии, Ду́хом Боже́ственным ра́дующеся, / Ю́же от непло́дове днесь прише́дшую челове́ков на спасе́ние / Присноде́ву Отрокови́цу пе́сньми почти́м.

Ра́дуйся, Чи́стая, Ма́ти и Рабо́ Христа́ Бо́га, / Я́же пе́рвому Хода́таица блаже́нству, / челове́ческий род, Тя вси досто́йно пе́сньми сла́вим.

Жи́зни ражда́ется днесь мост, / и́мже челове́цы, воззва́ние паде́ния, еже от а́да, обре́тшии, / Христа́ Живнода́вца пе́сньми прославля́ют.

Ин канон.

Да ликовству́ет вся тварь, да весели́тся же и Дави́д, / я́ко от коле́на и от се́мене его́ произы́де жезл, / Цвет нося́щи, Го́спода, Творца́ вся́ческих.

Свята́я Святы́х, во святе́м святи́лищи Младе́нец возлага́ется / воспита́тися от руки́ А́нгеловы. / Вси у́бо ве́рно спра́зднуим в рождестве́ Ея́.

Непло́ды неражда́ющая А́нна, но не безча́дна Бо́гу: / се бо пронарече́ся от родо́в Чи́стая Де́ва Ма́ти. / Те́мже естества́ израсти́ Зижди́теля в ра́бии о́бразе.

Тя, незло́бивую А́гницу, / А́гнца Христа́ Младе́нца от чре́ва Твоего́ приве́дшую в на́ше существо́, / вси от А́нны рожде́нную Тя пе́сньми почита́ем.

Слава: Три Безнача́льна сла́влю, / Три Свя́та пою́, / Три Соприсносу́щна в Существе́ Еди́ном пропове́дую: / Еди́н бо во Отце́, и Сы́не, и Ду́се славосло́вится Бог.

И ныне: Кто ви́де Отроча́, Его́же не все́я Оте́ц, млеко́м пита́емое? Или́ где ви́дена бысть Де́ва Ма́ти? / И́стинно па́че ума́ обоя́, Богороди́тельнице Чи́стая.

Песнь 3.

Ирмос: Утверди́ нас в Тебе́, Го́споди, / Дре́вом умерщвле́й грех, / и страх Твой всади́ / в сердца́ нас, пою́щих Тя.

Припев: Пресвята́я Богоро́дице, спаси́ нас.

Непоро́чно Бо́гу пожи́вшии, / всех роди́сте Спасе́ние, / богому́дрии роди́теле / Зижди́теля Ро́ждшия и Бо́га на́шего.

Всем жизнь источа́яй Госпо́дь / от непло́дове произведе́ Де́ву, / в Ню́же всели́тися изво́ли, / и по Рождестве́ сохрани́в нетле́нну.

А́ннин плод, Мари́ю, днесь, / Грозд ро́ждшую живоно́сный, / я́ко Богоро́дицу воспои́м, / Предста́тельницу же всех, и Помо́щницу.

Ин канон.

Воспита́вшися во Свята́я Святы́х, / Де́во Пречи́стая Богоро́дице, / вы́шши яви́лася еси́ тва́ри, / Зижди́теля пло́тию поро́ждши.

Благослове́нно чре́во твое́, целому́дренная А́нно, / плод бо израсти́ла еси́ де́вства, / Ю́же безсе́менно Пита́теля тва́ри ро́ждшую / и Изба́вителя Иису́са.

Тя блажи́т, Присноде́во, вся тварь, / от А́нны днесь ро́ждшуюся, / от ко́рене Иессе́ева жезл, / пречи́ст цвет, Христа́, израсти́вшую.

Тя вы́шшую всея́ тва́ри, Богоро́дице, / показу́я, Чи́стая, Сын Твой, / е́же от А́нны вели́чит Твое́ рождество́ / и всех весели́т днесь.

Слава: Тебе́ покланя́емся, О́тче, Безнача́льне Существо́м, / пое́м Безле́тнаго Сына Твоего / и чтем Соприсносу́щнаго Ду́ха Твоего́, / я́ко Еди́наго Тро́е естество́м Бо́га.

И ныне: Светода́вца и Нача́льника жи́зни челове́ческия ро́ждшая, Чи́стая Богоро́дице, / яви́лася еси́ сокро́вище жи́зни на́шея / и дверь непристу́пнаго Све́та.

Го́споди, поми́луй, трижды.

Седален, глас 4. Подобен: Удивися Иосиф:

Де́ва Мари́я и Богоро́дица и́стинно, / я́ко о́блак све́та, днесь возсия́ нам / и от пра́ведных предгряде́т в сла́ву на́шу. / Не ктому́ Ада́м осужда́ется, / и Е́ва от уз свободи́ся, / и сего́ ра́ди зове́м, вопию́ще со дерзнове́нием еди́ней Чи́стей: / ра́дость возвеща́ет рождество́ Твое́ всей вселе́нней.

Песнь 4.

Ирмос: Услы́шах, Го́споди, / слух Твоего́ смотре́ния / и просла́вих Тя, / Еди́не Человеколю́бче.

Припев: Пресвята́я Богоро́дице, спаси́ нас.

Воспева́ем Тя, Го́споди, / ве́рным спаси́тельное приста́нище пода́вшаго всем, / Тебе́ Ро́ждшую.

Тя, Богоневе́сто, / похвалу́ всем Христо́с яви́ и держа́ву / пою́щим ве́рно Твое́ та́инство.

Неискусобра́чная Влады́чице, / Твои́ми моли́твами избавля́еми прегреше́ний, / благоразу́мно вси Тя ублажа́ем.

Ин канон.

Патриа́рх Иа́ков, прови́дев, Спа́се, вели́чия я́сно строе́ния Твоего́, / вопия́ше Ду́хом, ко Иу́де глаго́ля та́йно: / от ле́торасли возше́л еси́, Сы́не мой, / возвеща́я Тя от Де́вы Бо́га.

Ны́не жезл Ааро́нов, от ко́рене Дави́дова прозя́бший, / ны́не Де́ва Чи́стая происхо́дит, / и сликовству́ет Не́бо и земля́, и вся оте́чествия язы́ков, / и А́нна и Иоаки́м та́инственно.

Ны́не да весели́тся Не́бо, да ра́дуется же земля́, и да лику́ет Иоаки́м и Дави́д: / ов у́бо я́ко роди́тель Твой, и́стинно ро́ждшия Бо́га, / ов же я́ко пра́отец Твой, / пропове́дая Твоя́ вели́чествия, Чи́стая.

Сра́дуется Тебе́ днесь, богому́дренная А́нно, вселе́нная: / Изба́вителя бо тоя́ Ма́терь процвела́ еси́, / Ю́же от ко́рене прозя́бшую Дави́дова, / жезл си́лы, нам нося́щую Цвет, Христа́.

Слава: Сла́влю Безнача́льна Бо́га, Отца́ и Сы́на и Свята́го Ду́ха, / Единосу́щную Тро́ицу Несозда́нную, / Е́йже предстоя́т Серафи́ми благогове́йно, зовуще: / Свят, Свят, Свят еси́, Бо́же.

И ныне: Пребезнача́льное Нача́ло нача́ло прие́млет из Тебе́, Богороди́тельнице, плотски́м вре́менем / и пребыва́ет собезнача́льно и вопло́щься Сло́во О́тчее и Ду́ху соприсносу́щное, / сохраня́я Боже́ственное досто́инство.

Песнь 5.

Ирмос: Сеннопи́санный мрак гада́ний разори́в / и ве́рных прибы́тием и́стины, / Богоотрокови́цею, озари́в сердца́, / и нас све́том Твои́м, Христе́, наста́ви.

Припев: Пресвята́я Богоро́дице, спаси́ нас.

Воспои́м, лю́дие, всех вину́ / су́щаго по нам бы́ти Вино́внаго: / Ея́же о́бразу ра́довахуся сподобля́еми проро́цы, / явле́нное спасе́ние от Тоя́ плодя́ще.

От су́ха прозябе́ние жезла́ иере́ева / Изра́илю показа́ проразсужде́ние, / и ны́не све́тлость прозя́бших пресла́вно све́тит, / от непло́дове всесла́вное рожде́ние.

Ин канон.

Пречи́стое Твое́ рождество́, Де́ва Непоро́чная, несказа́нное, / и зача́тие неизглаго́ланно, и рожде́ние Твое́, / Неве́сто неневе́стная, / Бог бо бе, весь в мя облеки́йся.

Днесь да веселя́тся а́нгельстии чи́ни, / пе́сньми да лику́ют су́щии из Ада́ма: / роди́ся бо жезл, Цвет возрасти́вший, Христа́, / Еди́наго Изба́вителя на́шего.

Днесь Е́ва разреша́ется осужде́ния, / разреша́ется же и непло́дство, / и Ада́м дре́вния кля́твы о рождестве́ Твое́м, / Тобо́ю бо от тли изба́вихомся.

Сла́ва Тебе́, Просла́вльшему непло́дную днесь: / роди́ бо жезл присноцвету́щий от обеща́ния, / от него́же прозябе́ Христо́с, / Цвет жи́зни на́шея.

Слава: Сла́ва Тебе́, О́тче Святы́й, Бо́же Нерожде́нне; / сла́ва Тебе́, Сы́не Безле́тне, Единоро́дне; / сла́ва Тебе́, Ду́ше Боже́ственный и Сопресто́льный, / от Отца́ происходя́й и в Сы́не пребыва́яй.

И ныне: Бысть чре́во Твое́ Со́лнца носи́ло, / пребы́сть чистота́ Твоя́, я́коже пре́жде, невреди́ма, Де́во, / Христо́с бо Со́лнце, / я́ко от черто́га жени́х, яви́ся из Тебе́.

Песнь 6.

Ирмос: Ко Го́споду от ки́та Ио́на возопи́: / Ты мя возведи́ из глубины́ а́да, молю́ся, / да я́ко Изба́вителю, во гла́се хвале́ния, / и́стины же ду́хом пожру́ Тебе́.

Припев: Пресвята́я Богоро́дице, спаси́ нас.

Ко Го́споду в ско́рби непло́дства возопи́ша / Богома́тере богому́дрии роди́тели / и Сию́ в ро́ды родо́в роди́ша, / на о́бщее спасе́ние и похвалу́.

Прия́ша Небе́сный дар от Бо́га досто́ин / Богома́тере богому́дрии роди́тели, / саме́х Херуви́мов превы́шшее носи́ло, / Сло́ва и Зижди́теля Роди́тельницу.

Ин канон.

Святу́ю Святы́х су́щу, / целому́дреннии роди́тели Твои́, Чи́стая, / возложи́ша Тя в хра́ме Госпо́дни воспита́тися че́стно / и угото́ватися в Ма́терь Ему́.

Непло́ды и ма́тери, лику́йте, / дерза́йте и игра́йте, безча́дныя: / безча́дна бо непло́ды Богоро́дицу прозяба́ет, / Я́же изба́вит от боле́зней Е́ву и кля́твы Ада́ма.

Слы́шу Дави́да, пою́ща Тебе́: / приведу́тся де́вы во след Тебе́, / приведу́тся в храм Царе́в. / И с ним Тя и аз, Дщерь Царе́ву, воспева́ю.

Пое́м свято́е Твое́ рождество́, / чтим и непоро́чное зача́тие Твое́, / Неве́сто Богозва́нная и Де́во; / сла́вят же с на́ми А́нгелов чи́ни и святы́х ду́ши.

Слава: В Тебе́ Тро́ическое та́инство пое́тся и сла́вится, Чи́стая: / Оте́ц бо благоволи́, / и Сло́во всели́ся в Тя, / и Боже́ственный Дух Тебе́ осени́.

И ныне: Злата́я кади́льница была́ еси́, / Огнь бо во утро́бе Твое́й всели́ся, Сло́во от Ду́ха Свя́та, / и челове́ческим зра́ком в Тебе́ ви́деся, / Богороди́тельнице Чи́стая.

Го́споди, поми́луй, трижды. Сла́ва, и ны́не:

Кондак, глас 4:

Иоаки́м и А́нна поноше́ния безча́дства / и Ада́м и Éва от тли сме́ртныя свободи́стася, Пречи́стая, / во святе́м рождестве́ Твое́м. / То пра́зднуют и лю́дие Твои́, / вины́ прегреше́ний изба́вльшеся, / внегда́ зва́ти Ти: / непло́ды ражда́ет Богоро́дицу и Пита́тельницу Жи́зни на́шея.

Икос: Моли́тва ку́пно и воздыха́ние непло́дства и безча́дства Иоаки́ма же и А́нны благоприя́тное / и во у́ши Госпо́дни вни́де, и прозябе́ плод живоно́сен ми́ру. / Ов бо моли́тву на горе́ творя́ше, о́ва же в саде́ поноше́ние ноша́ше, / но с ра́достию непло́ды ражда́ет Богоро́дицу и Пита́тельницу Жи́зни на́шея.

Песнь 7.

Ирмос: Купина́ в горе́ огненеопа́льная и росоно́сная пещь халде́йская / я́ве предписа́ Тя, Богоневе́сто, / Боже́ственный бо невеще́ственный в веще́ственнем чре́ве Огнь неопа́льно прия́ла еси́. / Те́мже из Тебе́ Ро́ждшемуся пое́м: / благослове́н еси́, Бо́же оте́ц на́ших.

Припев: Пресвята́я Богоро́дице, спаси́ нас.

Твое́ в веще́ственных явле́ниих / законополо́жник возбрани́ся разуме́ти / и вели́кое, Пречи́стая, та́инство, / не му́дрствовати земноре́вностная обра́зно наказу́емь иногда́. / Те́мже, уди́влься чудеси́, глаго́лаше: / благослове́н Бог оте́ц на́ших.

Го́ру и дверь Небе́сную и мы́сленную Тя ле́ствицу / боголе́пно лик боже́ственный пронарече́, / от Тебе́ бо Ка́мень отсече́ся не рука́ми му́жескими, / и дверь, Е́юже про́йде Госпо́дь, И́же чуде́с Бог оте́ц на́ших.

Ин канон.

Пра́зднуем, Чи́стая, / и ве́рно покланя́емся свято́му Твоему́ Рождеству́, / пою́ще Сы́на Твоего́, / И́мже изба́вихомся дре́вняго Ада́мова ны́не осужде́ния.

Ны́не А́нна весели́тся и вопие́т, хва́лящися: / непло́ды су́щи, роди́х Бо́жию Ма́терь, / Ея́же ра́ди осужде́ние Е́вино разреши́ся / и я́же в печа́лех боле́знь.

Ада́м свободи́ся, и Е́ва лику́ет, / и вопию́т ду́хом к Тебе́, Богоро́дице: / Тобо́ю изба́вихомся перворо́дныя кля́твы, / я́вльшуся Христу́.

О чре́во, вмести́вшее Бо́жие селе́ние! / О утро́бо, носи́вшая Небе́с ши́ршую, престо́л святы́й, / мы́сленный киво́т свяще́ния!

Слава: Отца́ просла́вим, Сы́на и Ду́ха, / во Еди́нстве Божества́, / Тро́ицу Пресвяту́ю, Неразде́льную, Несозда́нную, / и Соприсносу́щную, и Единосу́щную.

И ныне: Ты Бо́га еди́на родила́ еси́, Де́во, пресла́вно, / Ты естество́ обнови́ла еси́ Рождество́м Твои́м, Мари́е, / Ты Е́ву разреши́ла еси́ перворо́дныя кля́твы, / Богороди́тельнице Чи́стая.

Песнь 8.

Ирмос: В пещи́ о́трочестей прообрази́л еси́ иногда́ Твою́ Ма́терь, Го́споди, / о́браз же Сия́ из огня́ изыма́ше неопа́льно входя́щия, / Ю́же пое́м, я́вльшуюся Тобо́ю конце́м днесь, / и превозно́сим во вся ве́ки.

Припев: Пресвята́я Богоро́дице, спаси́ нас.

Я́же к Бо́гу на́шего примире́ния предопределе́нная ски́ния / е́же бы́ти ны́не начина́ет, / иму́щи роди́ти Сло́ва, нам дебельство́м Пло́ти я́вльшася, / Его́же пое́м, из не су́щих во е́же бы́ти Тем прие́мшии, / и превозно́сим во вся ве́ки.

Непло́дства преложе́ние мирско́е благи́х разреши́ непло́дство / и я́сно чу́до Христа́ показа́, к земны́м прише́дша, / Его́же пое́м, из не су́щих во е́же бы́ти Тем прие́мшии, / и превозно́сим во вся ве́ки.

Ин канон.

Сотвори́вый пресла́вная непло́дней утро́бе, / отве́рзый А́нны неражда́ющая ложесна́ и плод ей дав, / Ты, Бо́же Святы́й, Ты, Сы́не Де́вы, / Ты от Сея́ Плоть прия́л еси́, / присноцвету́щия Де́вы и Богоро́дицы.

Затворя́яй бе́здну и отверза́яй ю, / вознося́й во́ду во о́блацех и дая́й дождь, / Ты, да́вый, Го́споди, от непло́днаго ко́рене / прозя́бнути А́нны святы́я пречи́ст плод / и роди́ти Богоро́дицу.

Де́лателю мы́слей на́ших / и Насади́телю душ на́ших, / Ты, непло́дную зе́млю благопло́дну показа́вый, / Ты дре́вле суху́ю родови́ту, благокла́сну, бразду́ плодоно́сну соде́лал еси́ А́нну святу́ю, / пречи́ст плод израсти́ти, Богоро́дицу.

Прииди́те, вси у́зрим, / я́ко от черто́га ма́ла, Бо́жий град, ны́не ражда́емый, / и́же от две́ри утро́бныя исхо́д иму́щую, / вход же не ве́дущу обще́ния: / Еди́н Бог Зижди́тель Се́ю про́йде стезе́ю стра́нною.

Слава: О Тро́ице Пресу́щная, Еди́нице Собезнача́льная! / Тя пое́т и трепе́щет мно́жество А́нгел, / Не́бо и земля́ и бе́здны ужаса́ются, / челове́цы благословя́т, огнь рабо́тает, / вся послу́шают Тебе́, Тро́ице Свята́я, со стра́хом, я́же в тва́ри.

И ныне: О нове́йшаго слы́шания: Бог Сын Жены́! / О безсе́меннаго Рождества́! Безму́жныя Ма́ти и рожде́нное Бог! / О ужа́снаго виде́ния! О зача́тия стра́ннаго Де́вы! О несказа́ннаго Рождества́! / И́стинно па́че ума́ вся и виде́ния.

Песнь 9.

Ирмос: Я́же пре́жде Со́лнца Свети́льника Бо́га возсия́вшаго, / пло́тски к нам прише́дшаго, / из боку́ Деви́чу неизрече́нно воплоти́вшая, / Благослове́нная Всечи́стая, / Тя, Богоро́дице, велича́ем.

Припев: Пресвята́я Богоро́дице, спаси́ нас.

И́же непокори́вым лю́дем из ка́мене источи́в во́ду, / благопокори́вым же язы́ком да́рует от чресл непло́дных плод на весе́лие нам, / Тя, Богома́ти Пречи́стая, / Ю́же досто́йно велича́ем.

Напра́снаго дре́вняго Отъя́тельницу осужде́ния и прама́тере исправле́ние, / Ю́же ро́да к Бо́гу вину́ присвое́ния, к Зижди́телю мост, / Тя, Богоро́дице, велича́ем.

Ин канон.

Досто́йное, Богома́ти, / Твоея́ чистоты́ рождество́ насле́довала еси́ чрез обеща́ние: / иногда́ бо непло́дней богопрозябе́н плод вдала́ся еси́. / Тем Тя, вся племена́ земна́я, непреста́нно велича́ем.

Испо́лнися вопию́щаго проро́чество, / глаго́лет бо: возста́влю ски́нию па́дшую свяще́ннаго Дави́да, / в Тебе́, Чи́стая, прообрази́вшуюся, / Ея́же ра́ди всех челове́ков персть в Те́ло созда́ся Бо́жие.

Пелена́м покланя́емся Твои́м, Богоро́дице, / сла́вим Да́вшаго плод пре́жде непло́дней / и Отве́рзшаго ложесна́ неражда́ющей пресла́вно. / Твори́т бо вся, ели́ка хо́щет, Бог сый самовла́стен.

Я́ко дар Тебе́, Богоро́дице, песнопе́ние, от А́нны ро́ждшейся, ве́рно дароно́сим: / ма́тери Ма́терь, де́вы же Де́ву еди́ну, / славосло́вяще, покланя́емся Тебе́, пое́м и сла́вим.

Слава: Чу́жде есть беззако́нным сла́вити Безнача́льную Тро́ицу, / Отца́, и Сы́на же, и Свята́го Ду́ха, / несозда́нное Вседержа́вство, / Е́юже мир весь содержи́тся ма́нием держа́вы Ея́.

И ныне: Вмести́ла еси́ во утро́бе Твое́й, Де́во Ма́ти, Еди́наго от Тро́ицы, Христа́ Царя́, / Его́же пое́т вся тварь и трепе́щут вы́шнии чи́ни: / Того́ моли́, Всечи́стая, спасти́ся душа́м на́шим.

Светилен:

От непло́дныя днесь А́нны цвет произы́де, Богоро́дица, / вся благово́ния Боже́ственнаго исполня́ющи концы́ ми́ра / и ра́дости всю наполня́ющи тварь, / Ю́же пою́ще, досто́йно восхваля́ем, / я́ко су́щу земноро́дных превы́шшую.

Слава, и ныне: Ада́ме, обнови́ся, и Е́ва, возвели́чися, / проро́цы, со апо́столы лику́йте и пра́ведными, / о́бщая бо ра́дость возсия́, А́нгелов же и челове́ков / от пра́ведных днесь Иоаки́ма и А́нны, Богоро́дица Мари́я.

КАНОН ПОКРОВУ ПРЕСВЯТЫЯ ВЛАДЫЧИЦЫ НАШЕЯ БОГОРОДИЦЫ И ПРИСНОДЕВЫ МАРИИ

Тропарь, глас 4:

Днесь благове́рнии лю́дие све́тло пра́зднуем, / осеняе́ми Твои́м, Богома́ти, прише́ствием, / и к Твоему́ взира́юще пречи́стому о́бразу, уми́льно глаго́лем: / покры́й нас честны́м Твои́м Покро́вом / и изба́ви нас от вся́каго зла, / моля́щи Сы́на Твоего́, Христа́ Бо́га на́шего, / спасти́ ду́ши на́ша.

Канон Богородицы, глас 4.

Песнь 1.

Припев: Пресвята́я Богоро́дице, спаси́ нас.

С чи́нми святы́х А́нгел и с собо́ры проро́к и апо́стол, / в сла́ве вели́цей, я́ко Ма́ти Бо́жия, / днесь в це́рковь вше́дши, за христиа́ны мо́лишися, / от напа́сти и печа́ли избавля́еши вся, / покрыва́ющи Твое́ю ми́лостию.

Ски́нию Тя Моисе́й и жезл Ааро́нов именова́: / Ты бо живо́тное дре́во, Христа́, процвела́ еси́, / к Нему́же дерзнове́ние иму́щи, за ны, че́ствующия Тя, Цари́це, помоли́ся / изба́вити нас от вся́каго зла, / да Твоего́ Покро́ва пра́здник сла́вим.

Слава: Не я́ко пред киво́том дре́вле, собра́в, Дави́д, ли́ки, игра́ет, / но па́че ны́не с чи́нми святы́х пред Тобо́ю теку́ще в це́рковь, Тебе́ кла́няющеся, глаго́лют: / моли́ за че́ствующия Тя лю́ди, / да Твой сла́вяще Покро́в, че́стно пра́зднуем.

И ныне: Пою́т Тя, Богоро́дице, А́нгельстии чи́ни, / и сла́вят патриа́рси со святи́тели пред лице́м Ти, теку́ще в це́рковь. / С ни́миже Тя тогда́ святы́й Андре́й ви́де, за ны гре́шныя, к Бо́гу моля́щуюся, / поми́ловати лю́ди, сла́вящия Твоего́ Покро́ва пра́здник.

Песнь 3.

Припев: Пресвята́я Богоро́дице, спаси́ нас.

Клас прозя́бшая Боже́ственный, / я́ко ни́ва неора́нная я́ве, / ра́дуйся, одушевле́нная трапе́зо, / Хлеб Живо́тный вме́щшая. / Ра́дуйся, Живо́тныя воды́ исто́чниче неистощи́мый, Влады́чице.

Твои раби́, Влады́чице, / в це́ркви Твое́й ве́рою предстоя́ще, Твоея́ ожида́ем ми́лости: / посети́ на́ше смире́ние и Твои́м святы́м Покро́вом защити́ лю́ди от вся́каго зла.

Многоимени́тая Де́во, / проро́ки проображена́ че́стно, и́же Тебе́ ны́не со А́нгелы слу́жат. / С ни́миже о нас к Бо́гу моли́ся, / да Твоего́ Покро́ва святы́й день, ра́дующеся, вси све́тло пра́зднуем.

Слава: Гедео́н Тя руно́ прообрази́, / на Тя бо, я́ко роса́, Христо́с Бог сни́де, / к Нему́же, Богоро́дице, моли́ся, побе́ду да́ти во́инству на́шему на враги́, / да я́ко Мадиа́мы низложи́в, просла́вим святы́й Твой пра́здник.

И ныне: Па́че со́лнечных луч Твои́м блиста́ющим омофо́ром освеща́еши Це́рковь и лю́ди / и тьму грехо́в на́ших отго́ниши посеще́нием Твои́м, Богоро́дице, / к Сы́ну Твоему́ и Бо́гу за ны моля́щися.

Го́споди, поми́луй, трижды.

Седален, глас 5:

Те́плая Предста́тельнице и непобеди́мая, / упова́ние изве́стное и непосты́дное, / стено́, и покро́ве, и приста́нище прибега́ющим к Тебе́, / Присноде́во Чи́стая, / Сы́на Твоего́ и Бо́га моли́ со А́нгелы / умире́ние да́ти ми́ру, и спасе́ние, / и ве́лию ми́лость.

Песнь 4.

Припев: Пресвята́я Богоро́дице, спаси́ нас.

Во гла́сех пе́ний, Де́во, Тебе́ вопие́м, Всепе́тая: / ра́дуйся, ту́чная горо́ и усыре́нная Ду́хом. / Ра́дуйся, све́щниче и ста́мно, Ма́нну нося́щая, / услажда́ющая всех благочести́вых чу́вства.

Па́че Ааро́ня киво́та всю Тя Бог освяти́л есть Ду́хом, Богоро́дице, Святы́м, / и А́нгелом служи́ти Тебе́ повеле́, / с ни́миже за град и лю́ди моли́ся, / Твой сла́вящих честны́й пра́здник.

Прииди́ ны́не в сла́ве в Твою́, Богоро́дице, це́рковь с собо́ры всех святы́х, / я́коже иногда́ Тя святы́й Андре́й ви́де на возду́се све́тле, за христиа́ны моля́щуюся, / и пода́ждь нам Твою́ ми́лость.

Слава: Укрепи́, Влады́чице, сла́вящее Тя во́инство на́ше на проти́вныя враги́, / я́ко Дави́да на Голиа́фа; / да Тебе́, веселя́щеся, вопие́м: / ра́дуйся, покро́ве святы́й и Засту́пнице гра́ду на́шему.

И ныне: Тебе́ припа́даем, Госпоже́, ве́рою и, покланя́ющеся, благода́рно вопие́м Ти: / ра́дуйся, Богоблагода́тная Де́во, покро́ве, и огражде́ние на́ше, и Помо́щнице в беде́ су́щим, / спаси́ нас, к Тебе́ прибега́ющих, на Тя бо наде́емся.

Песнь 5.

Припев: Пресвята́я Богоро́дице, спаси́ нас.

Одр Тя дре́вле Соломо́н написа́ / и ло́жницу Небе́снаго Царя́, обступа́ему Серафи́мы, е́же о Тебе́ рече́ся, Богоро́дице. / Тем Тя ны́не мо́лим, Ма́ти Бо́жия Всесвята́я: / покры́й нас от всех бед.

Тебе́ А́нгелов старе́йшины и честни́и проро́цы со апосто́лы / я́ко Ма́тери Бо́жии че́стно слу́жат, / ви́дяще Тя за мир моли́тву творя́щу; / Твоя́ же проше́ния послу́шав, Госпо́дь спаса́ет град и лю́ди, на Тя наде́ющияся.

Слава: Вели́кий Тя во проро́цех Иса́иа прорече́, глаго́ля, Бо́га роди́ти неискусобра́чно: / Ты бо, Чи́стая Мари́е, святе́йши всех бы́ла е́си, / Бо́га бо во утро́бе и на руку́ носи́ла еси́. / Ему́же за ны моли́ся, Твои́м осеня́ющи Покро́вом ве́рою Тя сла́вящих.

И ныне: Духо́вными паря́ще кри́лы, святы́х собо́ри та́йно приидо́ша Тебе́ послужи́ти, Богоро́дице, / ви́дяще Тя на ле́гце о́блаце сла́вы, ко Спа́су Христу́ моля́щуюся / пода́ти побе́ду во́инству на́шему, погуби́ти вою́ющих нас.

Песнь 6.

Припев: Пресвята́я Богоро́дице, спаси́ нас.

Иере́и Богому́дрии, в це́ркви Твое́й с людьми́ благочести́выми предстоя́ще, / Твое́й ожида́ют, Богоро́дице, ми́лости: / премени́ на ра́дость на́шу печа́ль, Ра́дость бо родила́ еси́, / всех челове́ков грехи́ отпусти́вшаго.

Тебе́ вся земля́ да́ры прино́сит / я́ко Цари́це Бо́жии Ма́тери: / архиере́и кла́няются и лю́дие вси веселя́тся, / покрыва́еми от вся́каго зла Твои́ми, Богоро́дице, моли́твами.

Слава: Го́ру Тя вели́ку Дании́л пронаписа́: / из Тебе́ бо без се́мене роди́ся Христо́с / и сокруши́ всю де́монскую лесть, и всю Своея́ ве́ры испо́лни зе́млю. / К Не́муже за ны, Богоро́дице, моли́ся, сла́вящия Твоего́ Покро́ва пра́здник.

И ныне: А́нгельский глас взыва́ем Ти, Пречи́стая: / ра́дуйся, Престо́ле Бо́жий, на не́мже Иезекии́ль ви́де Го́спода в подо́бии челове́ка, носи́ма Херуви́мы. / С ни́миже за ны, Богоро́дице, моли́ся, да спасе́т ду́ши на́ша.

Го́споди, поми́луй, трижды. Сла́ва, и ны́не:

Кондак, глас 3. Подобен: Дева днесь:

Де́ва днесь предстои́т в це́ркви / и с ли́ки святы́х неви́димо за ны мо́лится Бо́гу, / А́нгели со архиере́и покланя́ются, / апо́столи же со проро́ки ликовству́ют: / нас бо ра́ди мо́лит Богоро́дица Преве́чнаго Бо́га.

Икос: Тоя́ пресла́вных чуде́с, / прииди́те, лю́дие, наслади́мся: / Се́ю бо Ада́м от тли изба́вися. / Та бо и ковче́г, не Но́ем, но Бо́гом сотворе́н бысть. / Дре́вле у́бо Моисе́й в купине́ о́гненней Бо́га ви́дети не возмо́же, / ны́не же от Тоя́ Ро́ждшагося вся земля́ зна́ет Сы́на Бо́жия, / к Нему́же за ны мо́лится. / Сего́ ра́ди прославля́ем Ю́ я́ко Бо́жию Ма́терь: / нас бо ра́ди Богоро́дица мо́лит Преве́чнаго Бо́га.

Песнь 7.

Припев: Пресвята́я Богоро́дице, спаси́ нас.

Неиспи́санная мно́гими проро́ки, / несве́дома же бысть, Де́во, Небе́сными служа́щими Бо́гу А́нгелы; / ны́не же вси ве́мы Тя Богоро́дицу, / и Твоея́ тре́буем по́мощи и заступле́ния, Благослове́нная.

Гора́, усыре́нная Ду́хом, / ю́же Авваку́м ви́де точа́щу ве́рным целе́бную сла́дость, Богоро́дице Де́во, / исцели́ ны, Сы́ну Твоему́ вопию́щия: / благослове́н Бог оте́ц на́ших.

Слава: Преклони́вый Небеса́ в Тя, Де́во, всели́ся / и ны́не на моли́тву Твою́ зрит, Богоро́дице Чи́стая, Твое́, Цари́це, исполня́я проше́ние: / Ему́же за ны усе́рдно помоли́ся, на Тя бо наде́емся, Благослове́нная.

И ныне: Тво́рче, Спа́се наш, Христе́ Бо́же, приими́ моли́тву Твоея́ Ма́тере, / ю́же Тебе́ за ны, гре́шныя, прино́сит, / да Тебе́, ра́дующеся, пое́м: / препе́тый оте́ц на́ших Бо́же, благослове́н еси́.

Песнь 8.

Припев: Пресвята́я Богоро́дице, спаси́ нас.

С чи́нми А́нгел, Влады́чице, / с честны́ми и сла́вными проро́ки, с верхо́вными апо́столы, и со священному́ченики, и со архиере́и за ны, гре́шныя, Бо́гу помоли́ся, / Твоего́ Покро́ва пра́здник в Росси́йстей земли́ просла́вльшия.

Горды́ню и шата́ния низложи́ и сове́ты непра́ведных разори́, / зачина́ющих ра́ти погуби́, о Бо́жия Ма́ти, Цари́це Всечестна́я, / и правосла́вных рог возвы́си, да Твой пра́здник сла́вим, Пречи́стая Богоро́дице Де́во, зову́ще: / Го́спода воспева́йте дела́ и превозноси́те Его́ во вся ве́ки.

Слава: Усты́ принося́ще Тебе́ пе́ние, и душе́ю ве́рно покланя́емся, / и́бо внутрь сердца́ на́ша горя́т. / Ма́ти Бо́жия Пречи́стая, поми́луй нас, моля́щихся Тебе́, и Го́спода воспева́ющих, / и превознося́щих Его́ во вся ве́ки.

И ныне: Мно́гими отягчи́хся грехи́, недоуме́ю по достоя́нию написа́ти Твоего́ Покро́ва, Богоро́дице, похвалы́, / но я́ко Ма́ти Бо́жия украси́ Твой пра́здник чудесы́, / да вси, ра́дующеся, пое́м Го́спода и превозно́сим Его́ во вся ве́ки.

Песнь 9.

Припев: Пресвята́я Богоро́дице, спаси́ нас.

Высо́кий Царю́, со Отце́м седя́й и от Серафи́м воспева́емый, / при́зри на моли́тву Ма́терню, ю́же Тебе́ за ны, гре́шныя, прино́сит, / и очи́сти грехи́ на́ша, спаси́ град, и лю́ди умно́жи, / даждь нам здра́вие телесе́ и на пога́ныя побе́ды, моли́твами Ро́ждшия Тя.

А́нгельский глас вопие́м Тебе́, Де́во Богоизбра́нная: / ра́дуйся, я́же Ада́ма па́ки в рай вве́дшая; / ра́дуйся, де́моны прогоня́щи Твои́м и́менем; / ра́дуйся, наде́жде христиа́н; / ра́дуйся, освяще́ние душ; / ра́дуйся, Храни́тельнице гра́да на́шего.

Слава: Помяни́ нас во Твоих моли́твах, Госпоже́ Де́во Богоро́дице, / да не поги́бнем за умноже́ние грехо́в на́ших. / Покры́й нас от вся́каго зла и лю́тых напа́стей: / на Тя бо упова́ем и, Твоего́ Покро́ва пра́здник че́ствующе, Тя велича́ем.

И ныне: Дар от Бо́га прия́ла еси́ я́ко Ма́ти Бо́жия / всех христиа́н неду́ги исцеля́ти, / и от бед избавля́ти, и грехи́ отпуща́ти, / и от плене́ния спаса́ти и вся́кия ну́жды. / Но и нас не пре́зри, Госпоже́: ве́си бо, и́хже тре́буем, / здра́вия телесе́м и душа́м спасе́ния.

Светилен. Подобен: Жены, услышите:

О Пресвята́я Госпоже́, Де́во Богоро́дице! / Покры́й нас чуде́сным Твои́м омофо́ром, / сохраня́я град и лю́ди от вся́каго зла, / я́коже Тя пречу́дный Андре́й ви́де во Влахе́рнстей це́ркви моля́щуюся; / и ны́не нам, Госпоже́, посли́ вели́кую Твою́ ми́лость.

КАНОН ПРЕСВЯТЕЙ БОГОРОДИЦЕ ПРЕД ИКОНОЮ ЕЯ, НАРИЦАЕМОЮ ФЕОДОРОВСКАЯ

Тропарь, глас 4:

Прише́ствием честны́я Твоея́ ико́ны, Богоотрокови́це, / обра́дованный днесь Богохрани́мый град Кострома́, / я́коже дре́вний Изра́иль к киво́ту Заве́та, / притека́ет ко изображе́нию лица́ Твоего́ / и воплоти́вшагося от Тебе́ Бо́га на́шего, / да Твои́м Ма́терним к Нему́ предста́тельством / при́сно хода́тайствуеши всем, / под сень кро́ва Твоего́ прибега́ющим, / мир и ве́лию ми́лость.

Канон Пресвятыя Богородицы, глас 4

Песнь 1.

Припев: Пресвята́я Богоро́дице, спаси́ нас.

Отве́рзый ум разуме́ти Писа́ния ученико́м Твои́м, Го́споди, / отве́рзи ны́не и на́ша сердца́ к разуме́нию вели́чия Твоего́ и Ма́тери Твоея́, / да с Не́ю боголе́пно просла́вим Тя.

Отве́рсти толку́щим две́ри милосе́рдия Твоего́ обетова́вый, Влады́ко наш, / отве́рзи нам утро́бы человеколю́бия Твоего́, / име́я на сие́ моля́щую Тя Хода́таицу.

Слава: Отве́рсто иногда́ бысть моли́твою Илиино́ю не́бо, / ра́ди беззако́нновавшаго Изра́иля заключе́нное, / отве́рст да бу́дет и нам, гре́шным, вход в Небе́сная предста́тельством Твои́м, Богороди́тельнице.

И ныне: Отве́рзшая рождество́м Твои́м врата́ ве́чная, Богороди́тельнице Пречи́стая, / отве́рзи предста́тельством Твои́м заключе́нныя серде́ц на́ших две́ри, / да Сын Твой и Бог наш вни́дет и освяти́т я.

Песнь 3.

Припев: Пресвята́я Богоро́дице, спаси́ нас.

Твоего́ плотска́го е́же на земли́ смотре́ния / да незабве́нно устро́иши воспомина́ние, / дал еси́ нам, Влады́ко, ико́ну Твою́ и Ро́ждшия Тя, / те́мже, взира́юще на о́ную, мо́лим Тя: / руководи́ нас к позна́нию и любле́нию Тебе́, / воплоще́ннаго Бо́га и Спа́са душ на́ших.

Твоея́ Пренепоро́чныя Ма́тере всечестны́й о́браз любо́вию объе́млюще, / из глубины́ души́ взыва́ем к Тебе́, живу́щему на Небесе́х: / начерта́й на сердца́х на́ших кра́сный о́браз доброде́телей Ея́, / да велича́ем Тя, Го́спода и Спа́са на́шего.

Слава: Твой всечестны́й о́браз, Влады́чице, любе́зно на земли́ прие́млюще, / зове́м к Тебе́, су́щей во сла́ве Небе́сней, / да при́сно хода́тайствуеши нам благода́ть мы́слити и твори́ти досто́йная Твоего́ вели́чия, / е́же сотвори́ Тебе́ Си́льный.

И ныне: Твои́х благодея́ний воспомина́ние, твори́мое днесь, / дви́жет сердца́ на́ша со устна́ми к благохвале́нию Твоему́, Влады́чице, / но сотвори́, да и кра́сный лик Твои́х доброде́телей / привлече́т сердца́ на́ша к любле́нию и подража́нию о́ных.

Го́споди, поми́луй, трижды.

Седален, глас 3:

Сии́ лю́дие устна́ми чтут Мя, / се́рдце же их дале́че отстои́т от Мене́, – / рече́ иногда́ Госпо́дь Вседержи́тель ко иуде́ем, еди́н вне́шний вид благоче́стия явля́ющим. / Но да и мы не ту́южде с ни́ми часть и осужде́ние восприи́мем, бра́тие, / вся́чески блюде́мся дел, подо́бных лицеме́рию. / Сего́ ра́ди пра́зднующе и всечестны́й сей пра́здник, / да не яви́мся извне́ то́чию благогове́йны, / внутрь же у́ду зли и нечести́вии пред Испыту́ющим сердца́ и утро́бы, / в простоте́ се́рдца поклони́мся Ему́, я́коже Сам рече, Ду́хом и и́стиною, / да та́ко бу́дем подража́тели Пресвяте́й Де́ве, / в Не́йже не глас то́чию, но па́че душа́ велича́ше Го́спода / и Дух ра́довашеся о Бо́зе, Спа́се Свое́м.

Слава, и ныне: Покро́ва Твоего́ Боже́ственнаго, Пречи́стая Богоро́дице Влады́чице, / да не отъи́меши от рабо́в Твои́х, мо́лят Тя уго́дники Сы́на Твоего́: / великому́ченик Фео́дор Стратила́т и преподо́бнии чудотво́рцы, / страны́ сея́ Костромски́я и Га́лицкия засту́пницы, / и́хже моле́ние приими́ и поми́луй нас.

Песнь 4.

Припев: Пресвята́я Богоро́дице, спаси́ нас.

Седя́й одесну́ю Престо́ла вели́чествия на высо́ких, / снизше́л еси́ к до́льнейшим страна́м земли́ / и, всели́вся во чре́во смиренному́дрыя Ма́тере Де́вы, / яви́л еси́ ми́рови, я́ко Ты призира́еши на смире́ние рабо́в Твои́х / и дае́ши им благода́ть Твою́, / ея́же да и мы сподо́бимся, да́руй нам бы́ти ревни́тели смиренному́дрыя Твоея́ Ма́тере.

Седя́й на ра́мех Херуви́м и Серафи́м, / благоволи́л еси́ пло́тию седе́ти на объя́тиих Чисте́йшия Отрокови́цы, / да сим пока́жеши нам, я́ко Ты, Свя́те святы́х, / обита́еши в сердца́х еди́ных люби́телей чистоты́ и целому́дрия, / его́же рачи́тели и нас покажи́ моли́твами ро́ждшия Тя.

Слава: Седя́щему во сла́ве на Престо́ле Божества́ / сподо́билася еси́ Ма́терь бы́ти, / ра́ди изя́щнейшия чистоты́ и смиренному́дрия, / и́хже люби́тели и нас покажи́ моли́твами Твои́ми, / да и мы сподо́бимся ча́сти, угото́ванной рачи́телем чи́стоты и смиренному́дрия Твоего́.

И ныне: Седе́ти во сла́ве Сы́на Твоего́ сподо́бившаяся, Пренепоро́чная Де́во, / не преста́й моля́щи бла́гость Его́, / да и мы, взира́юще на о́браз святы́я жи́зни Твоея́ / и о́ному на́шим жи́тельством сообразу́ющеся, / тоя́жде сла́вы на Небесе́х бу́дем прича́стницы.

Песнь 5.

Припев: Пресвята́я Богоро́дице, спаси́ нас.

Ужаса́хуся и смуща́хуся костромсти́и жи́телие, / мне́вше зна́мение Твоего́ о них про́мысла, / ико́ну Ма́тере Твоея́, во пла́мени сгоре́вшу, / но сие́ смуще́ние премени́л еси́ в ра́дость, Го́споди, / показа́в им а́бие о́браз сей, от огня́ и пе́пела невреди́м. / Си́це да и мы, по обурева́ющих нас искуше́ниях и напа́стех, / при́сно ра́дуемся о Твое́м, е́же о нас благоволе́нии, / мо́лим Тя, Человеколю́бче.

Ужасо́шася иногда́ полки́ наше́дших на град Кострому́ супоста́тов, / егда́ от воображе́ния зра́ка лиц́а Твоего́, Го́споди, и Пресвяты́я Твоея́ Ма́тере / пусти́л еси́ на сих стре́лы мо́лниины, / но сей ужас да вложи́ши в сердца́ / и всех, стремя́щихся ратобо́рствовати достоя́ние Твое́, мо́лим Тя с Хода́таицею на́шего избавле́ния.

Слава: Ужа́сни и ско́рбни бы́вше жи́телие Городца́, / узре́вше ико́ну Твою́, Богома́ти, пренесе́ну во град Кострому́: / мня́ху бо себе́ сим пренесе́нием лише́нных бы́ти Твоего́ о них Ма́терняго благоволе́ния, / но да не и мы, таково́ю же иногда́ ско́рбию объя́ти, / бу́дем лише́ни зна́мений Твоего́ покрови́тельства, / не преста́й, Влады́чице, пребыва́ющи с на́ми Твое́ю ми́лостию.

И ныне: Я́ко о́чи рабы́ни в руку́ госпожи́ своея́, / та́ко о́чи на́ши всегда́ к Тебе́ возво́дим, / о Многоблагоутро́бная Госпоже́ на́ша и Спаси́тельнице Всесвята́я Богоро́дице! / При́зри у́бо на ны ми́лостивно, / ца́рствующая на Небеси́ с Сы́ном Твои́м и Бо́гом, / и уще́дрити ны, гре́шныя, потщи́ся, / я́ко вся Тебе́ возмо́жна суть.

Песнь 6.

Припев: Пресвята́я Богоро́дице, спаси́ нас.

Боже́ственное Твое́ разуме́ем истоща́ние, Иису́се, Бо́же наш, / егда́, взира́юще на о́браз Ма́тере Твоея́, / зрим Тя с Не́ю я́ко Младе́нца, рука́ми Ея́ держи́ма, / те́мже благодаря́ще сему́ Твоему́ е́же к нам снизхожде́нию, / мо́лим Тя, нас ра́ди младе́нствовавшаго, / бы́ти нам ми́лостива о гресе́х на́ших.

Боже́ственнаго Твоего́ воплоще́ния е́же от Де́вы, да при́сно сла́вится та́инство, / дарова́л еси́ нам, Христе́ Царю́, всечестну́ю Ма́тере Твоея́ ико́ну / с воображе́нным на ней ви́дом Пречи́стаго лица́ Твоего́, / те́мже и мо́лим Тя, Вседарови́тый Го́споди, / да да́си нам при́сно сла́вити воплоще́ние Твое́, / и́мже челове́цы Божеству́ соедини́хомся.

Слава: Боже́ственнаго Ду́ха наше́ствие бысть на де́вственную утро́бу Твою́, Богома́ти, / егда́ Сы́на Преве́чнаго пло́тию зачала́ еси́, / Его́же да и мы в сердца́х на́ших при́сно и́мамы, / хода́тайствуй нам благода́ть Того́жде Всесвята́го Ду́ха, / е́юже быва́ют челове́цы та́инственною оби́телию Отца́ и Сы́на.

И ныне: Боже́ственных писа́ний любому́дрое раче́ние с при́сным во хра́ме Госпо́дни пребыва́нием / сотвори́ Тя избра́нный ипоста́сныя Бо́жия прему́дрости Храм, / но да и мы устро́имся хра́мы Того́жде Бо́га Жи́ва, / исхода́тайствуй нам благода́ть усе́рдно внима́ти и после́довати Сы́на Твоего́ гла́су, / И́же при́сно во хра́мех Его́ пропове́дуется.

Го́споди, поми́луй, трижды. Сла́ва, и ны́не:

Кондак, глас 8:

Благода́рственная принося́ще Ти, раби́ Твои́, Богороди́тельнице, о всех, / и́миже благоде́яла еси́ гра́ду на́шему, / из глубины́ души́ взыва́ем к Тебе́ и ми́ли ся де́ем: / не преста́ни, Влады́чице, / Ма́терними к Сы́ну Твоему́ и Бо́гу на́шему моли́твами / подава́ти вся блага́я и спаси́тельная всем, / ве́рою и любо́вию вопию́щим Ти: / ра́дуйся, Де́во, христиа́н похвало́.

Икос: Стена́ еси́ де́вам, Богоро́дице Де́во, / и всем, к Тебе́ прибега́ющим, / и́бо Небесе́ и земли́ Творе́ц устро́и Тя, Пречи́стая, все́лься во утро́бе Твое́й / и вся приглаша́ти Тебе́ научи́в: / ра́дуйся, сто́лпе де́вства; / ра́дуйся, дверь спасе́ния. / Ра́дуйся, Нача́льнице мы́сленнаго назда́ния; / ра́дуйся, Пода́тельнице Боже́ственныя бла́гости. / Ра́дуйся, Ты бо обнови́ла еси́ зача́тыя сту́дно; / ра́дуйся, Ты бо наказа́ла еси́ окра́денныя умо́м. / Ра́дуйся, тли́теля смы́слов упраждня́ющая; / ра́дуйся. Се́ятеля чистоты́ ро́ждшая. / Ра́дуйся, черто́же безсе́меннаго уневе́щения; / ра́дуйся, ве́рных Го́сподеви сочета́вшая. / Ра́дуйся, до́брая Младопита́тельнице де́вам; / ра́дуйся, Невестокраси́тельнице душ святы́х. / Ра́дуйся, Неве́сто Неневе́стная.

Песнь 7.

Припев: Пресвята́я Богоро́дице, спаси́ нас.

Не служи́ти тва́ри па́че Творца́ законоположи́вый челове́ком, Спа́се наш, / сотвори́, усе́рдно мо́лим Тя с Богоро́дицею, / да, Ду́хом Твои́м просвеща́еми, / не к рукотворе́нным изображе́нием отно́сим Боголе́пное служе́ние, / но чрез о́браз Твой возно́симся умы́ и се́рдцы, / к Еди́ному Тебе́, отце́в Бо́гу благослове́нному.

Не послужи́ша бы́вшии в пещи́ Вавило́нстей му́дрии ю́ноши безду́шному истука́ну, / но Еди́ному Тебе́, во о́бразе А́нгела посреде́ пла́мене я́вльшемуся Сы́ну Бо́жию, поклони́шася, / и́хже ли́ку и ча́сти сопричти́ и всех, изображе́нием сладча́йшаго зра́ка Твоего́ дви́жимых / к прославле́нию Тебе́, отце́в Бо́га благослове́ннаго.

Слава: Не послужи́ла еси́ Бо́гу нра́вом плотски́х иуде́ев, Пренепоро́чная Де́во, / но ду́хом и и́стиною, я́ко и́стинная Раба́ Его́, покланя́лася еси́ Ему́. / Те́мже да и мы с Тобо́ю и́стиннии бу́дем покло́нницы Его́, / хода́тайствуй нам благода́ть, / е́же не в суеве́рном Богопочита́нии, но во и́стинном благоче́стии и ве́ре / служи́ти отце́в Бо́гу благослове́нному.

И ныне: Не послужи́ла еси́ ми́ру и суете́ его́, Богороди́тельнице, / но, всему́ предпоче́тши еди́наго Бо́га и зако́н Его́, / была́ еси́ усе́рднейшая всех Раба́ Госпо́дня, / те́мже и сподо́билася еси́ послужи́ти ве́лией та́йне Бо́жия воплоще́ния, я́ко Богома́терь, / но сотвори́, да и мы, отве́ргшеся ми́ра и я́же суть в ми́ре, / вседу́шно прилепи́мся и послу́жим Еди́ному Отце́в Бо́гу благослове́нному.

Песнь 8.

Припев: Пресвята́я Богоро́дице, спаси́ нас.

Отроча́ мла́до на́шего ра́ди спасе́ния был еси́, Безле́тный Бо́же наш Иису́се, / Его́же воображе́ние зря́ще на свяще́нней ико́не, / усе́рдною в Тя ве́рою вопие́м Ти: / бу́ди Воспита́тель, Наста́вник и Покрови́тель младе́нцем и отроко́м на́шим, / да и си́и во и́стинней ве́ре навы́кнут глаго́лати Тебе́: / Го́спода по́йте, дела́, / и превозноси́те Его́ во вся ве́ки.

О́трок дванадесятоле́тен бы́вый, Иису́се, / посреде́ ста́рец и учи́телей во святи́лищи пребыва́я, послу́шал еси́ их / и, совопроша́ся с ни́ми, явля́л еси́ святу́ю ре́вность к Боже́ственному зако́ну, / да сим и на́ша о́троки наста́виши / тща́тися во вре́мя ю́ности стяжава́ти духо́вную, я́же от зако́на Твоего́ прему́дрость, / да и они́ науча́тся сердцы́ и усты́, / словесы́ же и де́лы превозноси́ти Тя во вся ве́ки.

Слава: О́троки от пе́щи Вавило́нския изба́вльшему Го́споду / моли́ся приле́жно, Богоневе́стная Отрокови́це, / да да́рует всем, под кров Твой прибега́ющим, / неврежде́нным бы́ти от огня́ искуше́ний и пла́мене по́хотей, / да, та́ко Тобо́ю изба́вльшеся, / чи́стыми душа́ми и нескве́рными устна́ми благослови́м с Тобо́ю Еди́наго Изба́вителя Го́спода / и превозно́сим Его́ во вся ве́ки.

И ныне: Отрокови́цам Твое́ целому́дрие и чистота́ да бу́дет красота́ и сла́ва, / чревонося́щим Твое́ безболе́зненное и свято́е рождество́ / да бу́дет сла́дкое утеше́ние и отра́да, / всем же, вся́каго по́ла и во́зраста чту́щим Тя, Богоневе́сто, / доброде́тели Твоя́ да бу́дут еди́ным упражне́нием их, / я́ко си́ми то́кмо досто́йне от челове́ка прославля́ется Госпо́дь, живы́й во ве́ки.

Песнь 9.

Припев: Пресвята́я Богоро́дице, спаси́ нас.

Вся́кое коле́но Небе́сных, и земны́х, и преиспо́дних да покланя́ется Тебе́, / я́ко нося́щему в Себе́ неизме́нный Преблаже́ннаго Отца́ Твоего́ о́браз, Иису́се. / С ни́миже и мы, ве́рою просвеща́еми, / Тя, И́стиннаго Бо́га, о́браз челове́ч от Де́вы прии́мшаго, боголе́пно велича́ем.

Вся́ка уста́ да заградя́тся суесло́вящих, / я́ко несть досто́йно чествова́ти Твою́ и Пречи́стыя Ма́тере Твоея́ ико́ну, Влады́ко: / се бо, просла́вив сию́ чудеса́ми, / научи́л еси́ достоя́ние Твое́ Тебе́ и во о́бразе пло́ти Твоея́ / с Пренепоро́чною Твое́ю Ма́терию прославля́ти и велича́ти.

Слава: Вси ро́ди ве́рных, по прорече́нию Твоему́, блажа́т Тя, / Благослове́нная, Христа́ Бо́га на́шего Ма́ти. / С ни́ми же и мы, ве́рою совоку́плени, / благогове́йно чту́ще свяще́нное лица́ Твоего́ изображе́ние, / прославля́ем Твоя́ вели́чия, я́же сотвори́ Тебе́ Госпо́дь сил, / с Ним же Тя велича́ем.

И ныне: Всяк язы́к сме́ртных, по достоя́нию, изнемога́ет велича́ти Тя, / над все́ми превознесе́нную, о Богоневе́сто! / Те́мже и мы, прославля́юще Тя днесь, испове́дуем на́ше кра́йнее неможе́ние, / но, сие́ испове́дующе, мо́лим Тя, / да по мно́жеству щедро́т Твои́х, прии́меши ма́лое сие́ приноше́ние, / во зна́мение мно́гия любве́ и усе́рдия нас, велича́ющих Тя.

Светилен:

Свет Лица́ Твоего́ и Пресвяты́я Твоея́ Ма́тере / яви́вый нам, Влады́ко, во всечестне́й ико́не сей, / сотвори́ нас, я́ко ча́да све́та ходи́ти во све́те за́поведей Твои́х, / да, егда́ яви́шися во сла́ве с Ро́ждшею Тя, / сообра́зны бу́дем светле́йшему со́лнца о́бразу Твоея́ сла́вы.

Слава, и ныне: Бо́жия тезоимени́тый да́ра страда́лец Христо́в Фео́дор / Боже́ственный вои́стинну дар, пречестну́ю Пречи́стыя Богома́тере ико́ну, / гра́ду на́шему Костроме́ прине́с, вруча́ет, / ю́же мы с неизрече́нною ра́достию, я́ко Небе́сное сокро́вище, прие́млюще, / игра́им духо́вне и ликовству́ем, просвеща́еми све́том Боже́ственнаго лица́ Мари́и Присноде́вы, / от Нея́же возсия́ Пра́ведное Со́лнце – Христо́с, / просвеща́яй вся́каго челове́ка, гряду́щаго в мир.

Молитва:

О Премилосе́рдая Госпоже́, Цари́це, Богоро́дице, приими́ смире́нное моле́ние на́ше, и не отри́ни нас, заступле́ние и прибе́жище на́ше, и не возгнуша́йся нас, недосто́йных, но, я́ко Милосе́рдая, не преста́ни моля́щи, Его́же родила́ еси́, да да́рует нам проще́ние мно́гих согреше́ний на́ших, да спасе́т нас, и́миже весть судьба́ми. Поми́луй нас, Влады́чице, поми́луй нас, несмь бо нам спасе́ние от дел. Те́мже ве́рно вопие́м Ти: поми́луй рабы́ Твоя́ и непло́дное се́рдце на́ше покажи́ плодоно́сно благи́х дел. При́зри на нас, недосто́йных, Ты бо упова́ние и покро́в наш, жизнь и свет се́рдцу на́шему. Я́ко Невече́рний Свет от чре́ва Твоего́ воздви́гшая, озари́ ду́шу на́шу, Чи́стая, и отжени́ вся́ку мглу се́рдца на́шего. Да́руй нам умиле́ние, покая́ние и сокруше́ние серде́чное. Сподо́би нас по вся дни живота́ на́шего твори́ти во́лю Сы́на Твоего́ и Бо́га на́шего и во всем благоугожда́ти Ему́ Еди́ному. О Богома́ти, не преста́ни моля́щи Ро́ждшагося от Тебе́ за вся, притека́ющия с ве́рою к сему́ чудотво́рному о́бразу Твоему́, и подава́й им ско́рую по́мощь и утеше́ние в ско́рбех и напа́стех и злострада́ниих, изба́ви их от клеветы́ и зло́бы челове́ческия, от враг ви́димых и неви́димых и вся́кия ну́жды и печа́ли. Спаси́ оте́чество на́ше, град сей и вся гра́ды и страны́ от вся́ких бед и нужд и сотвори́ ми́лостива нам бы́ти Бо́га на́шего, отврати́ вся́кий гнев Его́, на ны дви́жимый, и изба́ви ны от належа́щаго и пра́веднаго Его́ преще́ния. О Боголюби́вая Влады́чице, А́нгелов украше́ние, му́чеников сла́во и всех святы́х ра́досте, с ни́ми моли́ Го́спода, да сподо́бит нас в покая́нии сконча́ти живота́ на́шего тече́ние. В сме́рти же час, Пресвята́я Де́во, изба́ви нас от вла́сти бесо́вския и осужде́ния, и отве́та, и стра́шнаго испыта́ния, и мыта́рств го́рьких, и огня́ ве́чнаго, да, сподо́бльшеся сла́внаго Ца́рствия Бо́жия, велича́ем Тя и сла́вим вопло́щшагося от Тебе́ Христа́, Бо́га на́шего, Ему́же сла́ва со Отце́м и Святы́м Ду́хом, ны́не, и при́сно, и во ве́ки веко́в. Ами́нь.

Молитва иная:

К кому́ воззову́, Влады́чице, к кому́ прибе́гну в печа́ли мое́й; к кому́ принесу́ сле́зы и воздыха́ния моя́, а́ще не к Тебе́, Цари́це Небесе́ и земли́; кто исто́ргнет мя от ти́ны грехо́в и беззако́ний, а́ще не Ты, о Ма́ти Живота́, Засту́пнице и Прибе́жище ро́да челове́ческаго. Услы́ши стена́ние мое́, уте́ши мя и поми́луй в го́рести мое́й, защити́ в бе́дах и напа́стях, изба́ви от озлобле́ний и ско́рбей и вся́ких неду́гов и боле́зней, от враг ви́димых и неви́димых, умири́ вражду́ стужа́ющих мне, да изба́влен бу́ду от клеветы́ и зло́бы челове́ческия; та́кожде от своея́ ми пло́ти гну́сных обы́чаев свободи́ мя. Укры́й мя под се́нию ми́лости Твоея́, да обря́щу поко́й и ра́дость и от грехо́в очище́ние. Твоему́ Ма́тернему заступле́нию себе́ вруча́ю; бу́ди мне Ма́ти и наде́жде, покро́в и по́мощь и заступле́ние, ра́дость и утеше́ние и ско́рая во всем Помо́щнице. О чу́дная Влады́чице! Всяк, притека́ющий к Тебе́, без Твоея́ всеси́льныя по́мощи не отхо́дит, сего́ ра́ди и аз, недосто́йный, к Тебе́ прибега́ю, да изба́влен бу́ду от внеза́пныя и лю́тыя сме́рти, скре́жета зубна́го и ве́чнаго муче́ния. Небе́сное же Ца́рствие получи́ти сподо́блюся и Тебе́ во умиле́нии се́рдца реку́: ра́дуйся, Ма́ти Бо́жия, Предста́тельница и Засту́пница на́ша усе́рдная, во ве́ки веко́в. Ами́нь.

КАНОН ИНЫЙ ПРЕСВЯТЕЙ БОГОРОДИЦЕ ПРЕД ИКОНОЮ ЕЯ, НАРИЦАЕМОЮ ФЕОДОРОВСКАЯ

Тропарь, глас 4:

Днесь све́тло красу́ется преимени́тый град Кострома́ / и вся Ру́сская страна́, / созыва́ющи к весе́лию вся боголюби́выя наро́ды христиа́нския, / на пресла́вное торжество́ Бо́жия Ма́тере, / прише́ствия ра́ди чудотво́рнаго Ея́ и многоцеле́бнаго о́браза, / днесь бо яви́ся нам пресве́тлое вели́кое со́лнце, / прииди́те, вси Богоизбра́ннии лю́дие, но́вый Изра́иль, / ко исто́чнику цельбоно́сному, / источа́ет бо нам неоску́дныя ми́лости Пресвята́я Богоро́дица / и избавля́ет вся гра́ды и страны́ христиа́нския / невреди́мы от всех наве́т вра́жиих. / Но, о Всеми́лостивая Госпоже́, Де́во Богоро́дице, Влады́чице, / спаси́ страну́ на́шу, и архиере́и, и вся лю́ди Твоего́ достоя́ния от всех бед / по вели́цей Твое́й ми́лости, да зове́м Ти: / ра́дуйся, Де́во, христиа́ном похвало́.

Ин тропарь, глас 4:

Канон Пресвятыя Богородицы, глас 4.

Песнь 1.

Припев: Пресвята́я Богоро́дице, спаси́ нас.

Отве́рзем уста́, челове́цы, / и язы́к уясни́м в наро́читый день пра́здника на́шего, / явле́ния Бо́жия Ма́тере, чу́днаго Ея́ о́браза прише́ствия, и воскли́кнем, ра́дующеся, / воспева́юще Ея́ пресла́вная чудеса́.

Отве́рзите врата́ душе́вная и слу́хи разу́мныя, дще́ри Росси́йския, / изыди́те на сре́тение Бо́жия Ма́тере о́браза, / одева́ет бо наги́я и просвеща́ет те́мныя, / подава́ющи всем ве́рным целе́бныя ми́лости.

Слава: Отве́рзем сон ле́ности и греха́ тя́гость отложи́м, / очи́стивше со́весть и ум, вни́дем во врата́ Иерусали́ма прекра́снаго, Це́ркве Бо́жия, / и у́зрим Небе́сную зарю́, чу́дную ико́ну Бо́жия Ма́тере, / всем подаю́щу бога́тыя ми́лости.

И ныне: Отве́рзи не́дра своя́, Бо́жия Це́ркве, / и восприими́ в сокро́вище всего́ све́та зарю́ чу́дную, Бо́жия Ма́тере ико́ну, / се бо созыва́ет ве́рныя, исцеля́ет боля́щия, и прогоня́ет от челове́к ду́хи лука́выя, / и твори́т ве́рным пресла́вная чудеса́.

Песнь 3.

Припев: Пресвята́я Богоро́дице, спаси́ нас.

Твои́м певце́м, Богоро́дице, ми́лости Твоя́ да́руй, / сохраня́ющи нас от всех бед и напа́стей Твои́ми Ма́терними моли́твами / к ро́ждшемуся из Тебе́ Христу́ Бо́гу на́шему, / да спасе́т ду́ши на́ша от всех наве́т вра́жиих / и пода́ст нам ве́лию ми́лость.

Твоего́ о́браза прише́ствием, Богоро́дице Де́во, вся́ческая ра́дости испо́лнила еси́, / Вы́шняя и ни́жняя Ты совокупи́ла еси́, / А́нгелом и челове́ком еди́на бысть Цари́ца. / Мо́лимтися приле́жно, Влады́чице, / посети́ на́ша не́мощи, исцели́ боле́зни душе́вныя же и теле́сныя.

Слава: Твой о́браз, Богоро́дице Де́во, на обновле́ние на́ше прии́де к нам, / и свет и́стинный яви́ся нам, просвеща́я омраче́нныя, исцеля́я боля́щия, / всем в ну́ждах Ско́рая Помо́щнице и заступле́ние, / Ю́же мы, я́ко животу́ на́шему Хода́таицу / и тве́рдое христиа́ном огражде́ние, велича́ем.

И ныне: Твоего́ о́браза чу́дному явле́нию, Влады́чице Богоро́дице, / удиви́шася костромсти́и жи́телие, / ви́дяще пресла́вная и уми́льно облобыза́юще, созыва́юще вся ро́ды христиа́нския: / прииди́те, Богоизбра́ннии лю́дие, духо́вно возвесели́теся, пою́ще Христа́ Бо́га, / дарова́вшаго нам таково́е многоце́нное сокро́вище, / христиа́нское тве́рдое огражде́ние.

Го́споди, поми́луй, трижды.

Ин кондак, глас 8:

Седален, глас 3:

Днесь яви́ла еси́ нам чу́дную ико́ну Твою́, Ма́ти Бо́жия, / ея́же ди́вным прише́ствием вся лю́ди Своя́ возвесели́ла еси́, / я́ко тве́рдое ору́жие на враги́ дарова́ла еси́, / гра́ду Твоему́ Костроме́ и всей Росси́йстей стране́ вели́кая похвало́ и утвержде́ние.

Песнь 4.

Припев: Пресвята́я Богоро́дице, спаси́ нас.

Седя́й во сла́ве, хвалу́ прие́млеши от А́нгел, / посла́л бо еси́, Го́споди, к нам о́браз Ма́тере Своея́, подая́ ве́рным целе́бныя ми́лости. / Возвесели́ся днесь, вся тварь, / возду́х же и мо́ре да кропя́т ра́дость, / я́ко прише́ствием преми́рным Цари́цына о́браза пресла́вно вси освяти́шася.

Седя́й на Престо́ле высо́це, Влады́ко Человеколю́бче, / благоволи́л еси́ яви́ти пречи́стый о́браз Ма́тере Своея́. / Днесь да возвеселя́тся правосла́вных собо́ри, / ерети́ческий же полк да посрами́тся, ви́дяще Покланя́емую ве́рными, / прогоня́ет бо Та ду́хи лука́выя и подае́т боля́щим здра́вие и душа́м на́шим спасе́ние.

Слава: Сему́ чу́дному Бо́жия Ма́тере о́бразу а́нгельстии чи́нове раболе́пно слу́жат, / почита́юще, воспева́ют Тя, Цари́цу и Богоро́дицу. / Мы же ка́ко Тебе́ воспое́м, недосто́йнии, / или́ ко́е Тебе́ принесе́м похвале́ние за мно́гое Твое́ к нам милосе́рдие? / Я́ко явле́нием Твоего́ чу́днаго о́браза прии́де, / вся озаря́ющи и подаю́щи всем разреше́ние.

И ныне: Сироты́ и вдови́цы, не пла́чите, ра́дость ва́ша прии́де днесь, / ме́ртвым живо́т возсия́, слепы́м свет облиста́, / немощны́м врачевство́ отве́рзеся и всем ве́рным спасе́ние соде́яся / Бо́жия Ма́тере чу́днаго о́браза явле́нием, / подава́ет бо всем исцеле́ние.

Песнь 5.

Припев: Пресвята́я Богоро́дице, спаси́ нас.

Удиви́шася вся ви́димая и неви́димая созда́ния, / стра́нствует ум челове́ческий Боже́ственныя ико́ны чу́дному явле́нию, / исто́чник бо животеку́щий яви́ся нам, / исцеле́ния во́ды источа́ющи, Всенепоро́чная, / и приста́нище в лю́тых небу́рное, / и всем в ну́ждах гото́вое спасе́ние, печа́льным утеше́ние.

Удиви́шася вся Небе́сная во́инства, ра́дуютжеся христиа́нстии ро́ди, / возвесели́шася вси пресла́вному прише́ствию ико́ны Бо́жия Ма́тере / и, Гаврии́лов глас восприи́мше, вопию́т: / ра́дуйся, ра́досте А́нгелов и челове́ков, славя́щих Тя вои́стинну, / Ты бо еси́ ра́дости Хода́таица и всем ве́рным спасе́ние.

Слава: Удивля́ет всяк град и страны́ пресла́вное ико́ны Твоея́ явле́ние / и ужаса́ет но́ваго Изра́иля, наро́ды Росси́йския, / притека́ющия к Твое́й ми́лости и о́чи се́рдца возпуща́ющия Тебе́, Де́во Богоро́дице. / Не пре́зри, Пречи́стая, на́шего воздыха́ния, / с пла́чем Тебе́ вопию́щих и коле́ни к земли́ преклоня́ющих, / мо́лимтися, Всепе́тая, бу́ди нам всегда́ покро́в и Помо́щница во ве́ки.

И ныне: Удиви́ся, черто́же, Бо́жия Це́ркве свята́я, / восприими́ Цари́цу Небе́сную и всея́ вселе́нныя Помо́щницу, / и ра́дуйся со дще́рьми Росси́йскими, / Засту́пница бо на́ша прии́де к нам ди́вным явле́нием Своего́ чу́днаго о́браза, / всех нас на духо́вное весе́лие созыва́ющи, / одева́ет бо наги́я и просвеща́ет те́мныя, / пита́ет а́лчущия, и напая́ет жа́ждущия, / и всем прося́щим дае́т поле́зная.

Песнь 6.

Припев: Пресвята́я Богоро́дице, спаси́ нас.

Боже́ственное есть зело́ честно́е торжество́ Бо́жия Ма́тере, созыва́юще на весе́лие ве́рныя, / обновля́етбося всяк, приступа́яй с ве́рою, / скве́рны бо Та вся́кия чисти́тельна есть. / Свяще́нницы, в пра́вду вси облецы́теся, и преподо́бнии, возра́дуйтеся, / му́жие и жены́, ю́ноши и де́вы, возвесели́теся, / и вси раби́ Бо́га на́шего, воспо́йте, / почти́м Чи́стую в чистоте́ Богоро́дицу, / подае́т бо нам неизрече́нныя Своя́ ми́лости.

Боже́ственная и а́нгелогове́йная ико́на Твоя́, Богоро́дице, / прии́де к нам за кра́йнее Твое́ человеколю́бие, / неизрече́нныя да́ры всем подава́ющи, / но, о Преблага́го Бо́га Ма́ти, / умоли́ Свое́ Рожде́ние всем нам поле́зная да́ти, / изба́вится лю́тых, гла́да же и мо́ра, / и сопроти́внаго нахожде́ния, и во́днаго истопле́ния, / тру́са и озлобле́ния от тлетво́рных ветро́в. / Ты бо еси́ гото́вая Помо́щница и нело́жная на́ша всем ве́рным Засту́пница.

Слава: Боже́ственное и чу́дное явле́ние Бо́жия Ма́тере, / ди́вное Пречи́стыя о́браза прише́ствие, / горе́ удивля́ет А́нгелы, до́ле же созыва́ет род челове́ческий еди́ногласно вопи́ти: / сла́ва Христу́ Бо́гу, / благоизво́лившему таково́е неизрече́нное сокро́вище нам объяви́ти, / и ми́лость удиви́ти, и от пла́мени и огня́ невреди́му сохрани́ти ико́ну Богома́тере. / О, Бо́жие дарова́ние дарова́ся! / Ея́же моли́твами, Христе́, спаси́ ду́ши на́ша, я́ко Милосе́рд.

И ныне: Боже́ственнаго Твоего́ чу́днаго о́браза явле́ние, Богоро́дице Влады́чице, / всем ве́рным свет возсия́: / ме́ртвым живо́т, слепы́м свет, глухи́м слы́шание, / немы́м глаго́лание, разсла́бленным здра́вие, прокаже́нным очище́ние, / бесну́ющимся целому́дрие, младе́нцем воспита́ние, вдови́цам и сирота́м промышле́ние, / непло́дным жена́м разреше́ние, / плод нося́щим неболе́зненное рожде́ние, / деви́ческая чистота́ и воздержа́ние всем. / В ну́ждах, Ско́рая Помо́щнице, мо́лимтися, поми́луй нас.

Го́споди, поми́луй, трижды. Сла́ва, и ны́не:

Кондак, глас 8:

Притеце́м, лю́дие, вси к ти́хому и до́брому приста́нищу, / в дом Бо́жия Ма́тере, / чу́дному о́бразу Цари́цы и Богоро́дицы, / за неизрече́нную ми́лость Ея́ явле́нному, / ве́рно припа́дающе и вопию́ще: / о Всеми́лостивая Влады́чице, / за спаси́тельное Твое́ смотре́ние, / чу́днаго о́браза к нам прише́ствие, / посети́ нас, гре́шных, све́тло сотворя́ющих пра́зднество Твое́, / укрепи́ страну́ на́шу, / ди́вно на враги́ побе́ду подаю́щи, и ве́ру утверди́. / Це́рковь Сы́на Твоего́ непоколеби́му соблюди́, / притека́ющих к Тебе́ спаси́, от вся́ких напа́стей изба́ви, / сохраня́ющи в ми́ре все Правосла́вие, да зове́м Ти: / ра́дуйся, Неве́сто Неневе́стная.

Икос: Пречу́днаго Цари́цына о́браза, к нам прише́дшего, явле́ние ви́дяще, / на высоту́ доброде́телей вознесе́мся, ум прело́жше на Не́бо, / Ея́же ра́ди Вы́шний на земли́ яви́ся, хотя́ привлещи́ к высоте́ вопию́щих Ей: / ра́дуйся, Благослове́нная Де́во, от всех родо́в Богоизбра́нная; / ра́дуйся, Небе́сная Цари́це, Ма́ти Го́спода Бо́га, Творца́ всех. / Ра́дуйся, всера́достное а́нгельское немо́лчное пе́ние; / ра́дуйся, всегда́ жела́тельное и несы́тное челове́ческое зре́ние. / Ра́дуйся, кре́пкое ве́ры обновле́ние; / ра́дуйся, и́стинное ве́ры позна́ние. / Ра́дуйся, небе́сных со земны́ми соедини́вшая; / ра́дуйся, земны́х к Бо́гу присвое́ние. / Ра́дуйся, печа́льным душа́м утеше́ние; / ра́дуйся, больны́м посеще́ние и прокаже́нным очище́ние. / Ра́дуйся, глухи́м слы́шание и хромы́м хожде́ние; / ра́дуйся, у́зником свобожде́ние и гре́шным проще́ние. / Ра́дуйся, а́лчущим Корми́тельнице и наги́м одея́ние; / ра́дуйся, стра́нным путю́ води́тельный и обурева́емым приста́нище. / Ра́дуйся, ста́рости же́зле и сирота́м промышле́ние; / ра́дуйся, младе́нческое воспита́ние и де́вствующим целому́дрие. / Ра́дуйся, всех родо́в весе́лие и всем христиа́ном поможе́ние и заступле́ние, / и́хже соблюда́й от всех бед, да зове́м Ти: / ра́дуйся, Неве́сто Неневе́стная.

Песнь 7.

Припев: Пресвята́я Богоро́дице, спаси́ нас.

Не послужи́ша тва́ри па́че Творца́ Богому́дрии наро́ди Росси́йстии, / но прииди́те, почти́м Чи́стую в чи́стоте Бо́жия Ма́тере ико́ну, / возде́вше ру́це на высоту́, вопие́м Ей: / о Преблагослове́нная в жена́х, Де́во, Бо́жие жили́ще, / христиа́ном еси́ по́мощь и заступле́ние, / правове́рным и покланя́ющимся Твое́й чудотво́рней ико́не, / всем поле́зная подаю́щи.

Небе́снии чи́нове со земны́ми веселя́тся / в све́тлое торжество́, явле́ние Бо́жия Ма́тере ико́ны, / нас же, предстоя́щих, просвети́, Пресвята́я, све́том Твоея́ ми́лости, / умоли́ Свое́ Рожде́ние пода́ти стране́ на́шей на враги́ побежде́ние / и всем ве́рным по́мощь и одоле́ние, / и от всех наве́т свобожде́ние, и грехо́в оставле́ние, / и душа́м спасе́ние дарова́ти, мо́лимся.

Слава: Не́бо и земля́ днесь проро́чески да возвеселя́тся, / А́нгели и челове́цы духо́вно да торжеству́ют / и вся тварь да пое́т Го́сподеви песнь немо́лчную, сотво́ршему вся, / почита́юще свяще́нное торжество́ Бо́жия Ма́тере, чу́днаго о́браза явле́ние. / О, па́че ума́ чуде́с Твои́х, Го́споди, я́же сотвори́л еси́ на Тя наде́ющимся, / сте́ну и по́мощь необори́му лю́дем Свои́м дарова́л еси́, о́браз Ма́тере Своея́, / Ю́же мы почита́юще, вопие́м: / ра́дуйся, Всеблагослове́нная Богоро́дице, Чи́стая Присноде́во.

И ныне: Ны́не наста́ вре́мя, освяща́ющее нас / и очище́ние подаю́щее обремене́нным грехи́ мно́гими, / Ма́ти Бо́га Вы́шняго ди́вным прише́ствием пречи́стаго Своего́ о́браза / всем поле́зная подае́т и вся спаса́ет. / О лени́вии, бо́дренно ста́ните, и спя́щии, от сна воста́ните / и разсла́бленнии, у́ды укрепи́те, к цельбоно́сному Исто́чнику усе́рдно притецы́те. / Покланя́емся чу́дней ико́не Бо́жия Ма́тере и почита́ем ю́ раболе́пно, / непокланя́ющихся бо омрача́ет и непочита́ющих погубля́ет, / и покланя́ющихся и чту́щих избавля́ет от вели́ких бед и зол, / благонра́вныя и богобоя́щияся рабы́ Своя́.

Песнь 8.

Припев: Пресвята́я Богоро́дице, спаси́ нас.

О, пресла́вных чуде́с Твои́х, Пречи́стая Де́во! / Кто по достоя́нию похвали́ти возмо́жет днесь / или́ воспе́ти пресла́вная Твоя́ вели́чия? / Днесь бо ра́дости вся испо́лнила еси́, Вы́шняя и ни́жняя, / явле́нием чу́дныя Твоея́ ико́ны, ве́рным яви́ся сокро́вище неоску́дное, / и правосла́вных ро́ди вси просвети́шася, / басурма́нския и ерети́ческия ко́зни вся посрами́шася. / Бе́гают же ро́ди че́рнии, не сме́ют взира́ти на си́лу Твою́, / нас же, ве́рных всех, поми́луй и спаси́, Влады́чице.

О Пресвята́я Де́во Богоро́дице и Небе́сная Цари́це, / Ма́ти Христа́ Бо́га и Царя́ всех, / вы́шши еси́ всех А́нгел и Арха́нгел и всея́ тва́ри честне́йши, / Помо́щница еси́ оби́димых и ненаде́ющимся наде́жда, / печа́льным утеше́ние и всем в ну́ждах Ско́рая Помо́щница, тве́рдое на́ше огражде́ние. / Что принесе́м Твоему́ вели́честву, / или́ ка́ко похва́лим, недосто́йнии? / Но то́чию: ра́дуйся, живота́ на́шего и воскресе́ния Ма́ти, / всех нас поми́луй, Благослове́нная.

Слава: О вели́кое на́ше заступле́ние и похвало́, / ра́досте на́ша и весе́лие, Пресвята́я Богоро́дице, / христиа́нский щи́те и ору́жие на враги́, кре́посте на́ша и заступле́ние! / Кто, притека́я к Тебе́, и посра́млен от Тебе́ исхо́дит, / или́, призыва́я Тя, не услы́шан быва́ет, / или́, прося́ от Тебе́, что не прие́млет? / Ничто́же бо невозмо́жно хода́тайству Твоему́, / но, о Всепе́тая, мо́лимтися, Пречи́стая: / Исто́чниче приснотеку́щий, исцели́ не́мощи на́ша, рабо́в Твои́х.

И ныне: О ди́вная на́ша похвало́, па́стырю наш до́брый и учи́телю наш прему́дрый, / Небе́сныя прему́дрости испо́лнена, Пресвята́я Богоро́дице, / приими́ моле́ние на́ше, раб Свои́х, / испо́лни ра́дости вся правосла́вныя, / не и́мамы бо ины́я по́мощи, кроме́ Тебе́, / на Тебе́ бо наде́емся и Тобо́ю хва́лимся всегда́, / Ты бо еси́ неле́стное на́ше приста́нище, поми́луй сро́дное Твое́ достоя́ние, / пода́ждь утеше́ние всем, поле́зное рабо́м Свои́м.

Песнь 9.

Припев: Пресвята́я Богоро́дице, спаси́ нас.

Всяк земноро́дный пои́стинне да взыгра́ется, Ду́хом просвеща́емь. / Но кто от челове́к не почуди́тся пресла́вному Бо́жия Ма́тере явле́нию? / Никто́же бу́ди уны́л, / отложи́вше се́тование, в ра́дость облецы́теся вси, / прииди́те на виде́ние пресла́внаго чудесе́. / Ка́ко прии́де к нам Засту́пница ро́да на́шего? / О, чудесе́ но́ваго! / Ея́же ра́ди, Христе́ Бо́же, спаси́ ду́ши на́ша, я́ко Милосе́рд.

Всяк род Небе́сных, и земны́х, и преиспо́дних да покло́нится и пое́т, / всяк язы́к испове́сть, я́ко вои́стинну чу́до пресла́вно Бо́жия Ма́тере. / О Всепе́тая Чи́стая, Пресвята́я Влады́чице, / в ми́лости Ско́рая Помо́щнице, при́зри оком Своим, Милосе́рдая, / и изба́ви рабы́ Своя́, Тебе́ призыва́ющий, от лю́тых боле́зней и стрел лука́ваго. / Вели́чия бо Твоя́ кто пове́сть? / Всем бо тре́бующим то́чиши чудеса́, и излива́еши исцеле́ние, / и мо́лишися за ду́ши на́ша, я́ко су́щи Ми́лостивая всем Засту́пница.

Слава: Воспои́м, вси ве́рнии, Бо́жию Ма́терь, / созыва́юще на пе́ние вся чи́ны Небе́сныя, А́нгелов и Арха́нгелов, / проро́ков и апо́столов, иера́рхов и му́чеников, / преподо́бных и пра́ведных и всех святы́х Бо́жиих уго́дников. / Ты же, Влады́чице, плач рабо́в Свои́х обрати́ на весе́лие, / и исцели́ боле́зни тя́жкия, / и пода́ждь вме́сто печа́ли весе́лие, / о Кре́пкая на́ша Помо́щнице, всем печа́льным утеше́ние, / вонми́ моле́нию раб Твои́х и спаси́ Тебе́ велича́ющих.

И ныне: О Всепе́тая Ма́ти Благослове́нная, / ро́ждшая всех святы́х Святе́йшее Сло́во, Христа́ Бо́га на́шего, / ны́нешнее приноше́ние приими́, от недосто́йных усте́н приноси́мое, бре́нною руко́ю сотворе́нное, / ника́коже досто́ин есмь на сие́, Влады́чице, / но, наде́яся на Твоя́ щедро́ты и милосе́рдие, / препро́стое пе́ние принесо́х Ти, Всепе́тая. / Вем, Спаси́теля всех родила́ еси́, нас ра́ди на зе́млю соше́дшаго, / не возгнуша́йся, Де́во, непотре́бнаго, / но приими́, Цари́це, сие́ и поми́луй мя.

Светилен:

Пречи́стый о́браз Твой, Богоро́дице Влады́чице, и́мже посети́ла еси́ нас, / я́ко неизрече́нный не́кий дар восприе́мше, / мы, недосто́йнии, пра́зднуем све́тло и ве́село вси торжеству́ем, веселя́щеся, / от бед и напа́стей свобожда́емся / и здра́вие прие́млем Твои́ми Богома́терними к Бо́гу моли́твами.

Молитва:

О Пресвята́я Влады́чице Богоро́дице и Присноде́во Мари́е, еди́ная наде́ждо нам, гре́шным! К Тебе́ прибега́ем и Тебе́ мо́лим, я́ко ве́лие и́маши дерзнове́ние пред ро́ждшимся от Тебе́ по пло́ти Го́сподем Бо́гом и Спаси́телем на́шим Иису́сом Христо́м. Не пре́зри слез на́ших, не возгнуша́йся воздыха́ний на́ших, не отри́ни ско́рби на́шея, не посрами́ упова́ния на́шего на Тя, но ма́терними моле́нии Твои́ми умоли́ Го́спода Бо́га, да сподо́бит нас, гре́шных и недосто́йных, свободи́тися от грехо́в и страсте́й, душе́вных и теле́сных, умре́ти ми́ру и жи́ти Ему́ Еди́ному по вся дни живота́ на́шего. О Пресвята́я Влады́чице Богоро́дице, путеше́ствующим спутеше́ствуй и огражда́й и охраня́й о́ныя, изба́ви пле́нных от плене́ния, свободи́ стра́ждущих от бед, уте́ши су́щих в печа́ли, ско́рбех и напа́стех, облегчи́ нищету́ и вся́ко злострада́ние теле́сное и да́руй всем вся потре́бная к животу́, благоче́стию и жи́зни вре́менней. Спаси́, Влады́чице, вся страны́ и гра́ды и сию́ страну́ и сей град, и́мже сия́ чудотво́рная и свята́я ико́на Твоя́ даде́ся в утеше́ние и огражде́ние, изба́ви я́ от гла́да, губи́тельства, тру́са, пото́па, огня́, меча́, наше́ствия иноплеме́нных, междоусо́бныя бра́ни и отврати́ вся́кий гнев, на ны пра́ведно дви́жимый. Да́руй нам вре́мя на покая́ние и обраще́ние, изба́ви нас от внеза́пныя сме́рти и во вре́мя исхо́да на́шего предста́ни нам, я́вльшися, Де́во Богоро́дице, и изба́ви нас от возду́шных мыта́рств кня́зей ве́ка сего́, сподо́би на стра́шнем Суди́щи Христо́ве ста́ти одесну́ю и соде́лай нас насле́дники ве́чных благ, да сла́вим во ве́ки великоле́пое И́мя Сы́на Твоего́ и Бо́га на́шего, со Безнача́льным Его́ Отце́м и Святы́м, и Благи́м, и Животворя́щим Его́ Ду́хом, ны́не, и при́сно, и во ве́ки веко́в. Ами́нь.

КАНОН ПРЕСВЯТЕЙ БОГОРОДИЦЕ ПРЕД ИКОНОЮ ЕЯ, НАРИЦАЕМОЮ УТОЛИ МОЯ ПЕЧАЛИ

Тропарь, глас 5:

Утоли́ боле́зни / многовоздыха́ющия души́ моея́, / утоли́вшая вся́ку слезу́ от лица́ земли́, / Ты бо челове́ком боле́зни отго́ниши / и гре́шных ско́рби разруша́еши, / Тебе́ бо вси стяжа́хом наде́жду и утвержде́ние, / Пресвята́я Ма́ти Де́во.

Канон Пресвятыя Богородицы, глас 2.

Песнь 1.

Ирмос: Во глубине́ постла́ иногда́ / фараони́тское всево́инство преоруже́нная си́ла, / вопло́щшееся же Сло́во всезло́бный грех потреби́ло есть, / препросла́вленный Госпо́дь сла́вно бо просла́вися.

Припев: Пресвята́я Богоро́дице, спаси́ нас.

Я́же всем удо́бь послу́шная в ско́рби / и в печа́ли помога́ющая, Богоро́дице блага́я, / благода́ть пода́ждь пе́ти Тя дерза́ющим, Влады́чице, скорбя́щих Ра́досте.

Многобога́тную благода́ть стяжа́вши, Влады́чице, / дерзнове́нною Твое́ю моли́твою пресла́вно изми́ мя от напа́стей, / убо́гаго раба́ Твоего́, скорбя́щих Ра́досте.

Слава: От враг ви́димых и неви́димых изба́ви, мо́лимся, к Тебе́ прибега́ющих, Богоро́дице, / и разори́ всяк сове́т борю́щих нас.

И ныне: Отыми́ поноше́ние челове́ческое / и клеветы́ наве́тник от мене́, Богоро́дице, молю́ Тя, / да усе́рдно сла́влю Го́спода, Его́же пита́ла еси́.

Песнь 3.

Ирмос: Утверди́ нас в Тебе́, Го́споди, / Дре́вом умерщвле́й грех, / и страх Твой всади́ в сердца́ нас, пою́щих Тя.

Припев: Пресвята́я Богоро́дице, спаси́ нас.

Враго́в наве́ты разори́ су́етныя, Всепе́тая Богоро́дице, / и не оскуде́й моли́твами Твои́ми, / снабдя́щи нас, восхваля́ющих Тя.

При́зри, Чи́стая, ми́лостивным Твои́м о́ком / и изба́ви мя вся́каго наве́та ви́димых и неви́димых враго́в, / ослепи́вши зени́цы оче́с их.

Слава: Зло́е нападе́ние враго́в, я́ко огнь, паля́щее, / и́щущих всегда́ погуби́ти нас, Де́во, / росо́ю моли́тв Твои́х угаси́.

И ныне: Неугаси́мая лампа́до, / заря́ присносия́тельная, / но́щию мя скорбе́й одержи́ма просвети́ моли́твами Твои́ми, / ро́ждшая Со́лнце сла́вы – Христа́.

Го́споди, поми́луй, трижды.

Кондак, глас 6:

Предста́тельство христиа́н непосты́дное, / хода́тайство ко Творцу́ непрело́жное, / не пре́зри гре́шных моле́ний гла́сы, / но предвари́, я́ко Блага́я, на по́мощь нас, / ве́рно зову́щих Ти, / ускори́ на моли́тву и потщи́ся на умоле́ние, / предста́тельствующи при́сно, Богоро́дице, чту́щих Тя.

Седален, глас 2:

Моле́ние те́плое и стена́ необори́мая, / ми́лости исто́чниче, ми́рови прибе́жище, / приле́жно вопие́м Ти: / Богоро́дице Влады́чице, предвари́ / и от бед изба́ви нас, / Еди́на, вско́ре предста́тельствующая.

Песнь 4.

Ирмос: Услы́шав, Го́споди, глас Твой, его́же рекл еси́, / глас вопию́щаго в пусты́ни, / я́ко возгреме́л еси́ над вода́ми мно́гими, / Твоему́ свиде́тельствуяй Сы́ну, / весь быв соше́дшаго Ду́ха, возопи́: / Ты еси́ Христо́с, Бо́жия му́дрость и си́ла.

Припев: Пресвята́я Богоро́дице, спаси́ нас.

Моли́тву неусы́пну, заступле́ние тве́рдо мо́лим: / умилосе́рдися, и виждь на́шу нестерпи́мую печа́ль, боле́зни, ско́рби, стра́сти, / и благопреме́нно посети́, Ма́ти Бо́жия, / ра́дость ско́рую подаю́щи.

Не неприча́стни есмы́, Влады́чице, Твоего́ заступле́ния в ско́рбех, / те́мже и ны́не нам помози́ вско́ре, лю́те обурева́емым, ру́ку простира́ющи, Чи́стая. / Бу́ди ми́лостива боле́знем на́шим, Ма́ти Бо́жия, / ра́дость ско́рую подаю́щи.

Слава: Не упова́ша, Влады́чице, на Тя беззако́ннующии, / но упова́ша на язы́к челове́ч, при́сно зави́стно излия́вшийся, / непра́ведно пролия́ти кровь и́скренняго, рыка́юще, / Ты же, Чи́стая, че́люсти их сокруши́.

И ныне: Смири́, Влады́чице, враго́в вознесе́нную вы́ю велере́чующих, / сове́ты, и злонра́вия, и сердца́, поуча́ющаяся злым, на мя по вся дни, / кре́пость же и побе́ду пода́ждь призыва́ющым Тя, Ма́ти Бо́жия, / ра́дость ско́рую подаю́щи.

Песнь 5.

Ирмос: Угль, Иса́ии проявле́йся, / Со́лнце из де́вственныя утро́бы / возсия́ во тьме заблу́ждшим, / Богоразу́мия просвеще́ние да́руя.

Припев: Пресвята́я Богоро́дице, спаси́ нас.

Моли́твеннице нело́жная, упова́ние христиа́н, Обра́дованная, / приими́ мольбы́ от нас, приле́жно призыва́ющих и моля́щихся Тебе́.

Исто́чник Тя жи́зни су́щий, Чи́стая, / безсме́ртия источа́ющий во́ды, / земноро́днии, позна́вше, ублажа́ем.

Слава: Вооружи́ся на ны лука́вно враг, / язы́ком, я́коже мече́м, погуби́ти хотя́, / но Твое́ю, Богороди́тельнице, кре́постию предвари́.

И ныне: Пучи́ну, Чи́стая, заступле́ний кто изочте́т си́лы Твоея́? / Те́мже нас, су́щих в нужде́, ско́ро предвари́.

Песнь 6.

Ирмос: В бе́здне грехо́вней валя́яся, / неизсле́дную милосе́рдия Твоего́ призыва́ю бе́здну: / от тли, Бо́же, мя возведи́.

Припев: Пресвята́я Богоро́дице, спаси́ нас.

Целому́дрия су́щи Хода́таица, / призыва́ющим Тя ны́не яви́ся / и от вся́ких изба́ви напа́стей и бед, Богоневе́сто.

Злоде́йства вра́жия разори́ / и клеветы́ непра́ведныя уста́ви, Благослове́нная Пречи́стая, / избавля́ющи непови́нныя от ско́рби.

Слава: Лю́тыми грехи́ окруже́ни / и напа́стными беда́ми потопля́еми, / под Боже́ственный покро́в Твой прибега́ем, Ма́ти Христа́ Бо́га.

И ныне: Неискусому́жно ро́ждши Го́спода, / яви́ся по рождестве́ па́ки де́вствующи. / О, пресла́внаго чудесе́, в Тебе́ соде́ланнаго, Богоневе́сто.

Го́споди, поми́луй, трижды. Сла́ва, и ны́не:

Кондак, глас 6:

Не вве́ри мя челове́ческому предста́тельству, / Пресвята́я Влады́чице, / но приими́ моле́ние раба́ Твоего́, / скорбь бо обдержи́т мя, / терпе́ти не могу́ де́монскаго стреля́ния, / покро́ва не и́мам, / ниже́ где прибе́гну, окая́нный, / всегда́ побежда́емь, / и утеше́ния не и́мам, ра́зве Тебе́, Влады́чице ми́ра, / упова́ние и предста́тельство ве́рных, / не пре́зри моле́ние мое́, / поле́зно сотвори́.

Икос: Простри́ дла́ни Свои́, / и́миже всех Влады́ку, я́ко Младе́нца, прия́ла еси́, / не оста́ви нас, всегда́ наде́ющихся на Тя. / Бо́дренною Твое́ю моли́твою и неисче́тною бла́гостию уще́дри нас / и пода́ждь душа́м на́шим милосе́рдие Свое́, в ве́ки источа́ющи, / Тебе́ бо и́мамы, гре́шнии, Засту́пницу от находя́щих на ны бед и зол, / но, я́ко иму́щая милосе́рдия щедро́ты, / ускори́ на моли́тву и потщи́ся на умоле́ние, / заступа́ющи при́сно, Богоро́дице, чту́щих Тя.

Песнь 7.

Ирмос: Да пресла́вное рождество́ Твое́, Христе́, е́же от Де́вы, / прообрази́ши я́ве, / неопали́мы в пещи́ о́троки сохрани́л еси́, / пе́сньми пою́щия Тебе́: / оте́ц Бо́же, благослове́н еси́.

Припев: Пресвята́я Богоро́дице, спаси́ нас.

О, благоутро́бия Твоего́, Де́во Чи́стая, / реши́ши бо безме́рныя печа́ли и напа́сти призыва́ющим в нужде́ и обстоя́нии. / Те́мже и ны́не помози́, Благослове́нная, Тя восхваля́ющим.

Покажи́ ско́рое твое́ заступле́ние, / покажи́, я́ко мо́жеши я́ко Ма́ти Бо́га, / призыва́ем Тя от се́рдца, со слеза́ми припа́дающе, / скорбь укроти́ и боле́знь рабо́в Твои́х вско́ре.

Слава: Уста́ челове́ков, я́ко львов лю́тых, / гро́ба тяжча́йше отверзо́шася го́рько поглоти́ти мя, / но Ты, Богоро́дице, яви́ся наде́жда ненаде́ющимся / и низложи́ кре́пость их, Благослове́нная.

И ныне: Да у́зрят врази́ и постыдя́тся, / да уразуме́ют и ви́дят Твою́, е́же по нам сопроти́в борю́щую си́лу, / и в про́пасть преиспо́днюю низложи́ их, Благослове́нная, Наде́ждо ненаде́ющихся.

Песнь 8.

Ирмос: Пещь иногда́ о́гненная в Вавило́не де́йства разделя́ше, / Бо́жиим веле́нием халде́и опаля́ющая, / ве́рныя же ороша́ющая, пою́щия: / благослови́те, вся дела́ Госпо́дня, Го́спода.

Припев: Пресвята́я Богоро́дице, спаси́ нас.

Прибе́жище на́ше и ми́ру ра́дование, Богороди́тельнице, / умилосе́рдитися потщи́ся / и спе́шно благода́ть Твою́ пода́ждь нам, оскорбле́нным, / и заступи́, Блага́я, Твоя́ рабы́.

Сове́т су́етен совеща́ша лю́те на ны безбо́жных со́нмища, / я́коже пре́жде Ахитофе́л. / Но вопие́м: / Твои́ми моли́твами сей разори́, / низло́жши сих кре́пость, Богоро́дице.

Слава: Призыва́ющих Тя, Богоро́дице, от души́ нело́жно / во вся́кой ско́рби, и в боле́знех разли́чных, и беда́х лю́тых / спе́шно услы́ши, Влады́чице, / сих избавля́ющи при́сно моли́твами Твои́ми.

И ныне: Да и́мя Твое́, Богоро́дице, на земли́ славосло́вится, / И́же, из Тебе́ возсия́в, гре́шником держа́вную наде́жду и сте́ну Тя дарова́: / Тобо́ю бо вся́кое дыха́ние к Бо́гу притека́ет.

Песнь 9.

Ирмос: Недоуме́ет всяк язы́к благохвали́ти по достоя́нию, / изумева́ет же ум и преми́рный пе́ти Тя, Богоро́дице, / оба́че, Блага́я су́щи, ве́ру приими́, / и́бо любо́вь ве́си Боже́ственную на́шу, / Ты бо христиа́н еси́ Предста́тельница, Тя велича́ем.

Припев: Пресвята́я Богоро́дице, спаси́ нас.

Да загради́тся всяк язы́к, лука́вым поуча́яйся, / да молча́т устна́ льсти́вая и уста́, непра́ведно глаго́лющая на пра́веднаго беззако́ние / горды́нею и за́вистию вражде́бною вку́пе, / Богоро́дицы моли́твою и святы́х Христо́вых.

В моли́твах бо́друю, Чи́стую Богоро́дицу призыва́ем вси, / боле́знию и ско́рбию одержи́ми, взыва́юще: / Влады́чице Чи́стая, ско́ро изба́ви от обдержа́щих боле́зней рабы́ Твоя́ при́сно, / я́ко по Бо́зе Засту́пницы ины́я не и́мамы.

Слава: Отча́явшихся ве́лие прибе́жище, / обурева́емых ти́хое приста́нище Ты еси́, Богоро́дице. / Те́мже и мы притека́ем, взыва́юще: / да не постыди́мся, Ма́ти и́стиннаго Живота́, / но да, благодаря́ще, усе́рдно Тя велича́ем.

И ныне: Приими́, Отрокови́це Пречи́стая, Боже́ственную песнь, / воздава́ющи благода́ть на Тя наде́ющимся, / и мир испроси́ Це́рквам при́сно посла́ти / и оте́честву на́шему одоле́ния и побе́ды, / да христиа́нский всяк язы́к Тя велича́ет.

Светилен:

Те́плое заступле́ние в беда́х, / в печа́лех утеше́ние, и к Бо́гу примире́ние, / Е́юже тли изба́вихомся, / Богоро́дицу, ве́рнии, ублажа́ем.

Слава, и ныне, Богородичен: Тя Предста́тельницу и́мамы, гре́шнии, о Пресвята́я Де́во, / Ты ми́лостива к нам сотвори́ Сы́на Твоего́ и Бо́га на́шего / ма́терними Твои́ми моли́твами.

Молитва:

Наде́ждо всех конце́в земли́, Пречи́стая Де́во, Госпоже́ Богоро́дице, утеше́ние мое́! Не гнуша́йся мене́, гре́шнаго, на Твою́ бо ми́лость упова́ю: угаси́ ми пла́мень грехо́вный и покая́нием ороси́ изсо́хшее мое́ се́рдце, очи́сти ум мой от грехо́вных по́мыслов, приими́ мольбу́, от души́ и се́рдца со воздыха́нием приноси́мую Тебе́. Бу́ди о мне Хода́таица к Сы́ну Твоему́ и Бо́гу и укроти́ гнев Его́ ма́терними Твои́ми моли́твами, душе́вныя и теле́сныя я́звы исцели́, Госпоже́ Влады́чице, утоли́ боле́зни души́ и те́ла, утиши́ бу́рю злых нападе́ний вра́жеских, отыми́ бре́мя грехо́в мои́х, и не оста́ви мене́ до конца́ поги́бнути, и печа́лию сокруше́нное се́рдце мое́ утеши́, да сла́влю Тя до после́дняго издыха́ния моего́. Ами́нь.

Молитва ко Пресвятей Богородице святаго Ефрема Сирина:

Де́во Влады́чице Богоро́дице, па́че естества́ и сло́ва ро́ждшая Единоро́дное Сло́во Бо́жие, Творца́ и Влады́ку вся́ческих, ви́димых же и неви́димых, Еди́наго от Тро́ицы Бо́га, Бо́га и Челове́ка, оби́тель Божества́ и вся́кия святы́ни и благода́ти вмести́лище, в не́мже, Бо́га и Отца́ благоволе́нием и Свята́го Ду́ха соде́йствием, теле́сне обита́ исполне́ние Божества́, без сравне́ния преиспо́лненная ца́рскаго и боголе́пнаго досто́инства и всея́ тва́ри честне́йшая, сла́во и утеше́ние и неизрече́нное весе́лие А́нгелов, ца́рственный ве́нче апо́столов и проро́ков, преесте́ственное и чу́дное му́жество му́чеников, в по́двизех побо́рнице и побе́д пода́тельнице, уготовля́ющая венцы́ подви́жником и воздая́ния ве́чная и боголе́пная, превы́шшая вся́кой че́сти, честь и сла́во преподо́бных, непогреши́тельная путеуказа́тельнице и наста́внице безмо́лвия, дверь открове́ний и та́ин духо́вных, Све́та исто́чниче, врата́ жи́зни ве́чныя, неоскудева́ющая реко́ милосе́рдия, неисчерпа́емое мо́ре боголе́пных дарова́ний и чуде́с. Тебе́ про́сим и Тебе́ умоля́ем, благоутро́бную Ма́терь человеколюби́ваго Влады́ки: бу́ди ми́лостива нам, смире́нным и недосто́йным рабо́м Твои́м, воззри́ благосе́рдно на плене́ние и смире́ние на́ше, уврачу́й неисце́льныя я́звы душ и теле́с на́ших, разсе́й ви́димых и неви́димых враго́в, бу́ди нам недосто́йным пред лице́м враго́в на́ших кре́пкий столп, бра́нное ору́жие, си́льное ополче́ние, воево́да и необори́мая помо́щница, покажи́ ны́не на нас дре́вния и чу́дныя Твоя́ ми́лости, да позна́ют беззако́ннии врази́ на́ши, я́ко Сын Твой и Бог еди́н есть Царь и Влады́ка, я́ко Ты еси́ вои́стинну Богоро́дица, пло́тию ро́ждшая и́стиннаго Бо́га, я́ко вся Тебе́ возмо́жна суть и а́ще что восхо́щеши, Влады́чице, си́льна еси́ вся сия́ сотвори́ти на Небеси́ и на земли́ на вся́кое проше́ние дарова́ти коему́ждо поле́зная: неду́жным здра́вие, на мо́ри су́щим тишину́ и до́брое здра́вие кораблепла́вание. Путеше́ствующим спутеше́ствуй, охраня́ющи я́, плене́нных спаса́й от го́рькаго ра́бства, утеша́й печа́льных, облегча́й нищету́ и и́но вся́ко теле́сное злострада́ние; всех свобожда́й от теле́сных неду́гов и страсте́й неви́димым Твои́м предста́тельством и вразумле́нием, да сконча́вше богоуго́дно и непреткнове́нно путь сея́ привреме́нныя жи́зни, сподо́бимся Тобо́ю улучи́ти и о́ная ве́чная бла́га во Ца́рствии Небе́снем.

Спаси́ моли́твами Твои́ми, Влады́чице, сию́ Тебе́ предстоя́щую и моля́щуюся па́ству, весь град и страну от глада, труса, пото́па, огня́, меча́, наше́ствия иноплеме́нных, междоусо́бныя бра́ни и вся́кий пра́ведно подви́гшийся на нас гнев обрати́, благоволе́нием и благода́тию Единоро́днаго Сы́на Твоего, Ему́же подоба́ет вся́кая сла́ва, честь и поклоне́ние, со безнача́льным Его́ Отце́м, с сове́чным и животворя́щим Его́ Ду́хом, ны́не и при́сно и во ве́ки веко́в. Ами́нь.

КАНОН ПРЕСВЯТЕЙ БОГОРОДИЦЕ ПРЕД ИКОНОЮ ЕЯ, НАРИЦАЕМОЮ СКОРОПОСЛУШНИЦА

Тропарь, глас 4:

К Богоро́дице притеце́м, су́щии в беда́х, / и святе́й ико́не Ея́ ны́не припаде́м, / с ве́рою зову́ще из глубины́ души́: / ско́ро на́ше услы́ши моле́ние, Де́во, / я́ко Скоропослу́шница наре́кшаяся. / Тебе́ бо раби́ Твои́ в ну́ждах / гото́вую Помо́щницу и́мамы.

Канон, творение преподобнаго Никодима Святогорца, глас 8.

Песнь 1.

Припев: Пресвята́я Богоро́дице, спаси́ нас.

Чуде́с Твои́х Боже́ственных мно́жество благохвали́ти предпринима́я, / Тя молю́, Де́во, от се́рдца, Скоропослу́шнице, / благода́ть подаждь ми.

Кто не изуми́тся Твоего́ о́браза чудесе́м, Де́во? / От него́ бо служи́телю трапе́зы возгласи́ла еси́ три́жды, / Скоропослу́шница наре́кшися.

Слава: Ка́ко чудодея́ние Твое́ изрещи́ возмогу́, Отрокови́це? / Ты бо пре́жде непоко́рнаго и́нока безо́чна соде́лала еси́ / и па́ки сего́ устро́ила еси́ ви́дяща.

И ныне: Ра́дуйся, свяще́нная оби́тель Дохиа́рская: / ты бо и́маши всех Госпожу́ Предста́тельницу и покро́в, / я́коже Сама́ Она́ я́сно возвести́.

Песнь 3.

Припев: Пресвята́я Богоро́дице, спаси́ нас.

Безча́дных благоча́дных Ты, Мари́е, показа́ла еси́ / и непло́дных жен соде́лала еси́, Скоропослу́шнице, веселя́щихся о ча́дех. / Кто у́бо не изуми́тся, Де́во, вели́чию Твоему́?

Булга́рия пропове́дует Твоего́ о́браза чудеса́, о Скоропослу́шнице, / восто́к же и за́пад. / Исто́чник бо соде́лалася еси́, / точа́щий благода́ти всем призыва́ющим и́мя Твое́.

Слава: Ра́ка боле́знь от руки́ исчеза́ет честны́я жены́, Де́во, посеще́нием Твои́м, / те́мже стра́ждущая, от неду́га свободи́вшися, / ра́дующися, пропове́да благода́рственная.

И ныне: Чу́дно украси́ся ико́на Твоя́, Скоропослу́шнице, / и па́че луче́й со́лнечных освеща́ет всех благода́тию Твое́ю, Пречи́стая. / Кто у́бо не восхва́лит Тя, на Небеси́ и на земли́ сла́вимую!

Го́споди, поми́луй, трижды.

Седален:

Влады́чицу Тя ми́ра ве́мы, Мари́е Всепе́тая, / я́ко родила́ еси́ нам всех Творца́, Спаси́теля ми́ра, / И́же и просла́ви Тебе́, Пречи́стую Ма́терь Свою́, / подая́ Тобо́ю благода́ть и ми́лость чту́щим Тя / и моля́щимся Тебе́, Богоро́дице.

Песнь 4.

Припев: Пресвята́я Богоро́дице, спаси́ нас.

Во всех конце́х чудотво́рный Твой о́браз просла́вися, / и ны́не вси уста́ми Скоропослу́шницу произно́сят.

И во сне, Всецари́це, и я́ве, Скоропослу́шнице, явля́яся, / чудеса́ соверша́еши в ми́ре пресла́вная.

Слава: Кто Твое́, Де́во, и́мя в нужде́ вся́кой призыва́ше, / и ско́ро того́ не услы́шала еси́, я́ко Скоропослу́шница су́щая?

И ныне: Блаже́нна еси́ Дохиа́рская оби́тель сла́вная, / ико́ною бо обогати́лася еси́ Скоропослу́шницы всечестно́ю.

Песнь 5.

Припев: Пресвята́я Богоро́дице, спаси́ нас.

Ка́ко на Твой пречи́стый о́браз / аз, недосто́йный, воззрю́, Скоропослу́шнице, / нечи́стыми очесы́ мои́ми!

Мо́ре и земля́, Всецари́це, / Твоея́ ико́ны чудеса́ пропове́дуют: / Твои́х бо благода́тей сия́ обоя́ наслади́шася.

Слава: Та́тя явля́еши, пе́нязи похи́тивша бли́жняго, Матероде́во, / и возвраща́еши пра́ведно сия́ иму́щему.

И ныне: Что воздади́м Тебе́, Всеблага́я, за благода́ть мно́гую, / ю́же яви́ла еси́ нам, / дарова́в ико́ну Твою́, бога́тство свяще́нное.

Песнь 6.

Припев: Пресвята́я Богоро́дице, спаси́ нас.

Я́ко любвеоби́льная Ма́терь я́вльшися, призыва́ла еси́ о́трока к Себе́, / до́ндеже изба́вила еси́ от руки́ разбо́йников, Матероде́во. / Но да обрете́м Тя и мы, Ма́терь любвеоби́льную!

Не и́мамы раби́ Твои́ ино́го, ра́зве Тебе́, предста́тельства и покро́ва. / Те́мже, Чи́стая, от се́рдца вопие́м: / вся́кия беды́ свободи́ ста́до Твое́ / и ве́рных, к Тебе́ прибега́ющих.

Слава: Я́коже спасла́ еси́ от морски́я бу́ри призва́вших Боже́ственное и́мя Твое́, / та́ко и нас от чу́вственнаго круше́ния и мы́сленнаго, Де́во, спаси́ / и в ти́хия приста́нища спасе́ния упра́ви.

И ныне: Мир Тя прибе́жище стяжа́ и спасе́ние; / тем, Чи́стая, к честне́й Твое́й ико́не отвсю́ду притека́ют лю́дие, / и вси ско́ро их слу́шающую обрета́ют Тя.

Го́споди, поми́луй, трижды. Сла́ва, и ны́не:

Кондак, глас 8:

В мо́ри жите́йстем обурева́емии, / треволне́нию подпа́даем страсте́й и искуше́ний. / Пода́ждь у́бо нам, Госпоже́, ру́ку по́мощи, я́коже Петро́ви Сын Твой, / и ускори́ от бед изба́вити ны, да зове́м Ти: / ра́дуйся, Всеблага́я Скоропослу́шнице.

Икос: Иде́же осени́т благода́ть Твоя́, Влады́чице, / та́мо неду́жнии здра́ви быва́ют, бе́дствующии во благополу́чие прихо́дят, / и всяк скорбя́щий ра́дости исполня́ется. / Те́мже благода́тию Твое́ю осени́ и нас, сицева́я ра́достная Тебе́ глаго́лющих: / ра́дуйся, Богоблагода́тная, Непристу́пнаго Божества́ селе́ние; / ра́дуйся, свята́я трапе́зо, хле́бом жи́зни нас снабдева́ющая; / ра́дуйся, ми́ро многоце́нное, облагоуха́ющее ве́рных; / ра́дуйся, ма́слино, еле́ем милосе́рдия нас умаща́ющая; / ра́дуйся, неистощи́мое сокро́вище даро́в; / ра́дуйся, приснотеку́щий исто́чниче чуде́с; / ра́дуйся, оби́димых заступле́ние; / ра́дуйся, обурева́емых благоути́шное приста́нище; / ра́дуйся, глухи́х слы́шание и све́те слепы́х; / ра́дуйся, разсла́бленных укрепле́ние; / ра́дуйся, свобожде́ние плене́нных; / ра́дуйся, ми́ра всего́ упова́ние; / ра́дуйся, Всеблага́я Скоропослу́шнице.

Песнь 7.

Припев: Пресвята́я Богоро́дице, спаси́ нас.

Слепы́м дарова́ла еси́ де́йствие очесе́м, Де́во, е́же ви́дети, / но и на́ша зе́ницы души́ и телесе́ просвети́, / да пое́м при́сно вели́чия Твоя́.

Глухи́м слы́шание дарова́ла еси́, Мари́е Скоропослу́шнице, / но и нас всех отве́рзи ушеса́ души́ и телесе́, / я́ко да пое́м при́сно вели́чия Твоя́.

Слава: Я́коже дре́вле от пруго́в изба́вила еси́ прибе́гших к Тебе́, Пречи́стая, / та́ко и нас от сих и вся́каго вре́да изба́ви, / да пое́м при́сно вели́чия Твоя́.

И ныне: Я́ко испра́вила еси́ пре́жде разсла́бленнаго, / та́ко и нас, по обою́ разсла́бленных, те́плым Твои́м предста́тельством испра́ви, / да пое́м при́сно вели́чия Твоя́.

Песнь 8.

Ирмос: Царя́ Небе́снаго, / Его́же пою́т во́и А́нгельстии, / хвали́те и превозноси́те во вся ве́ки.

Припев: Пресвята́я Богоро́дице, спаси́ нас.

От вся́ких боле́зней, Скоропослу́шнице, нас изба́ви, / я́коже от сих мно́гих изба́вила еси́.

Ико́на Твоя́, Де́во, показа́ся исто́чник чуде́с, / от него́же жа́ждущии снабдева́ются изоби́льно.

Слава: Поги́бшаго Ты явля́еши, Госпоже́, / и подае́ши ра́дость обре́тшим. / Коль мно́гая есть о́браза Твоего́ благода́ть!

И ныне: Повеле́нию Твоему́, Влады́чице, повину́ются вся стихи́и, / от ни́хже вре́да да избавля́еши Тя призыва́ющих.

Песнь 9.

Ирмос: Вои́стинну Богоро́дицу Тя испове́дуем, / спасе́ннии Тобо́ю, Де́во чи́стая, / с Безпло́тными ли́ки Тя величáюще.

Припев: Пресвята́я Богоро́дице, спаси́ нас.

Собери́теся усе́рдно в оби́тель Боже́ственную Арха́нгелов, боля́щии: / Врач бо в ней пребыва́ет безме́здный.

Свяще́нная ико́на Твоя́ друга́я показа́ся Силоа́мская купе́ль, Де́во, / очища́ющая и целя́щая боле́зни души́ и телесе́.

Слава: Воспламеня́ет мя раче́ние зре́ти Твоего́ о́браза благода́тную ле́поту, / и насыще́ния не и́мам велича́ти Тя!

И ныне: Да уви́жду Тя, Всеблага́я Скоропослу́шнице, во вре́мя сме́рти утеша́ющую мя / и зра́ки де́монов отгоня́ющую!

Светилен:

Зря́щии Тя ны́не на ико́не с Предве́чным Младе́нцем, / про́сим Тебе́, Богоневе́сто: / не лиши́ нас и в бу́дущем ве́це всеблаже́ннаго лицезре́ния Твоего́ / и воплоти́вшагося от Тебе́ Сы́на Бо́жия, / да со благоугоди́вшими Ему́ И́мя Его́ и Твое́ велича́ем.

Молитва:

Преблагослове́нная Влады́чице, Присноде́во Богоро́дице, Бо́га Сло́ва па́че вся́каго сло́ва на спасе́ние на́ше ро́ждшая, и благода́ть Его́ преизоби́льно па́че всех прия́вшая, мо́ре я́вльшаяся Боже́ственных дарова́ний и чуде́с приснотеку́щая река́, излива́ющая бла́гость всем, с ве́рою к Тебе́ прибега́ющим! Чудотво́рному Твоему́ о́бразу припа́дающе, мо́лимся Тебе́, всеще́дрей Ма́тери человеколюби́ваго Влады́ки, удиви́ на нас пребога́тыя ми́лости Твоя́ и проше́ния на́ша, приноси́мая Тебе́, Скоропослу́шнице, ускори́ испо́лнити все, е́же на по́льзу во утеше́ние и спасе́ние коему́ждо устроя́ющи. Посети́, Преблага́я, рабы́ Твоя́ благода́тию Твое́й, пода́ждь неду́гующим цельбу́ и соверше́нное здра́вие, обурева́емым тишину́, плене́нным свобо́ду, и разли́чными о́бразы стра́ждущих уте́ши. Изба́ви, всеми́лостивая Госпоже́, всяк град и страну́ от гла́да, я́звы, тру́са, пото́па, огня́, меча́ и ины́я ко́зни вре́менныя и ве́чныя, Ма́терним Твои́м дерзнове́нием отвраща́ющи гнев Бо́жий; и душе́вного расслабле́ния, обурева́ния страсте́й и грехопаде́ний свободи́ рабы́ Твоя́, я́ко да непреткнове́нно во вся́ком благоче́стии пожи́вше в сем веце, и в бу́дущем ве́чных благ сподо́бимся благода́тию и человеколю́бием Сы́на Твоего́ и Бо́га, Ему́ же подоба́ет всякая сла́ва, честь и поклоне́ние со Безнача́льным Его́ Отце́м и Пресвяты́м Ду́хом, ны́не и при́сно и во ве́ки веко́в. Ами́нь.

Молитва иная:

О, Пресвята́я Де́во, Ма́ти Го́спода Вы́шняго, скоропослу́шная засту́пнице всех, к Тебе́ с ве́рою прибега́ющих! При́зри с высоты́ Небе́снаго вели́чия Твоего́ на мя, непотре́бнаго, ко святе́й ико́не Твое́й припа́дающа, услы́ши ско́ро смире́нную моли́тву мене́, гре́шнаго, и принеси́ ю́ к Сы́ну Твоему́, умоли́ Его́, да озари́т мра́чную ду́шу мою́ све́том Боже́ственным благода́ти Своея́ и очи́стит ум мой от по́мыслов су́етных, да умири́т стра́ждущее мое́ се́рдце и исцели́т ра́ны его́, да вразуми́т мя на до́брая дела́ и укрепи́т рабо́тати Ему́ со стра́хом, да прости́т вся соде́янная мно́ю зла́я, да изба́вит от ве́чныя му́ки и не лиши́т Небе́снаго Своего́ ца́рствия. О Преблагослове́нная Богоро́дице, Ты благоизво́лила еси́ нарещи́ся во о́бразе Твое́м Скоропослу́шница, повелева́ющи всем притека́ти к Тебе́ с ве́рою, не пре́зри у́бо мене́, ско́рбнаго, и не попусти́ поги́бнути мне в бе́здне грехо́в мои́х, на Тя по Бо́зе все мое́ упова́ние и наде́жда спасе́ния, и Твоему́ покро́ву и предста́тельству вруча́ю себе́ во ве́ки веко́в. Ами́нь.

КАНОН ПРЕСВЯТЕЙ БОГОРОДИЦЕ ПРЕД ИКОНОЮ ЕЯ, НАРИЦАЕМОЮ ТРОЕРУЧИЦА

Тропарь, глас 4:

Я́ко звезда́ светозаря́ющая, / из Се́рбии на Афо́н чуде́сно прии́де / всечестна́я ико́на Твоя́ Троеру́чица, / ю́же оби́тель Хиланда́рская благогове́йно восприе́мши, / я́ко Боже́ственный дар свы́ше, / прославля́ет Тя, Влады́чицу, / и уми́льно вопие́т: / не оста́ви ми́лость Твою́ от нас, / но пребу́ди с на́ми во ве́ки.

Иной тропарь, глас 4:

Днесь всеми́рная ра́дость возсия́ нам ве́лия: / дарова́ся святе́й горе́ Афо́нстей / цельбоно́сная Твоя́, Влады́чице Богоро́дице, ико́на, / со изображе́нием тричи́сленно и неразде́льно пречи́стых рук Твои́х / в прославле́ние Святы́я Тро́ицы, / созыва́еши бо ве́рных и моля́щихся Тебе́ о сем позна́ти, / я́ко двема́ и́маши Сы́на и Го́спода держа́ти, / тре́тию же яви́ на прибе́жище и покро́в чту́щим Тя, / от вся́ких напа́стей и бед избавля́ти, / да вси, притека́ющии к Тебе́ ве́рою, прие́млют неоску́дно от всех зол свобожде́ние, / от враго́в защище́ние, / сего́ ра́ди и мы вку́пе со Афо́ном вопие́м: / ра́дуйся, Благода́тная, Госпо́дь с Тобо́ю.

Иной тропарь, глас 4:

Днесь све́тло красу́ется ца́рствующий град Москва́, / име́ющи в себе́, о Всеми́лостивейшая, всея́ тва́ри Честне́йшая, / Засту́пнице на́ша Де́во Богоро́дице, / честны́й о́браз Твой, / и́мже подсо́лнечныя концы́ земли́ удивля́еши / и мир ми́рови да́руеши, / во о́браз бо Святы́я Тро́ицы явля́еши три ру́ки: / двема́ у́бо Сы́на Своего́, Христа́ Бо́га на́шего, но́сиши, / тре́тиею от напа́стей и бед / ве́рно к Тебе́ прибега́ющих избавля́еши, / и от потопле́ния изыма́еши, / и всем поле́зная да́руеши, / и преподо́бному Михаи́лу Малео́нскую го́ру показа́, / и всех всегда́ ми́луеши, / честно́ю ри́зою Свое́ю покрыва́еши жи́тельство сие́ / и вся гра́ды и страны́ на́ша, да зове́м Ти: / ра́дуйся, Обра́дованная.

Канон Пресвятыя Богородицы, глас 4.

Песнь 1.

Ирмос: Несть Тебе́ подо́бен, / препросла́вленный Го́споди, / руко́ю бо кре́пкою изба́вил еси́ лю́ди, / я́же стяжа́л еси́, Человеколю́бче.

Припев: Пресвята́я Богоро́дице, спаси́ нас.

Просвети́ ду́шу мою́, ум и се́рдце, Преми́лостивая Ма́ти Бо́жия, / и даждь ми дар воспе́ти Тя, / кре́пкую Предста́тельницу, благи́х Хода́таицу и в печа́лех сла́дкое утеше́ние.

О́блак светоза́рный яви́лася еси́ преподо́бному Иоа́нну Дамаски́ну, / егда́ моли́тву его́ ско́ро услы́шала еси́ / и отсече́нную десни́цу его́ здра́ву сотвори́ла еси́.

Слава: Днесь согла́сно торжеству́ют вси концы́ земли́, вку́пе Тя воспева́юще, / тве́рдую По́мощь и Храни́тельницу жи́зни на́шея.

И ныне: Твою́ всечестну́ю и чудотво́рную ико́ну Троеру́чицу стяжа́вши, / свята́я оби́тель Хиланда́р вопие́т Ти: / ра́дуйся, стено́ неруши́мая и кре́пкое заступле́ние оби́тели сея́.

Песнь 3.

Ирмос: Свят еси́, Го́споди Бо́же наш, / утверди́ и на́ша сердца́ непреста́нно вопи́ти Тебе́: / пра́веден несть, па́че Тебе́, Го́споди.

Припев: Пресвята́я Богоро́дице, спаси́ нас.

Ве́рных собо́ри совокупля́ются днесь к прославле́нию Твоего́ благосе́рдия, / е́же яви́ла еси́ преподо́бному Иоа́нну Дамаски́ну, / исцели́вши отсече́нную десни́цу его́.

О́чи серде́ц на́ших воспуща́ем к Тебе́, Влады́чице, / егда́ взира́ем на чудотво́рную ико́ну Троеру́чицу, / бу́ди нам держа́ва и огражде́ние и Вы́шняго прича́стия сподо́би нас.

Слава: Ю́же славосло́вят си́лы Небе́сныя, / пое́м Тя, Всепе́тая Де́во, / спаси́ ны от грехо́внаго плене́ния / и вся́кия ско́рби, находя́щия на ны.

И ныне: Моли́, Его́же родила́ еси́, Ма́ти Безневе́стная, / о всех, притека́ющих к честне́й ико́не Твое́й, / я́ко да защити́т их и просвети́т.

Го́споди, поми́луй, трижды.

Седален, глас 4:

Егда́ и́ноцы Хиланда́рстии ви́деша пречестну́ю ико́ну Твою́, Влады́чице, / на осля́ти, ники́мже води́мем, ко врато́м оби́тели Хиланда́рския принесе́нную, / ра́достию ве́лиею возра́довашася / и, покланя́ющеся ей, прославля́ху Твое́ к ним благоволе́ние.

Песнь 4.

Ирмос: Услы́шах слух Твой, Го́споди, / я́ко яви́лся еси́ на земли́, / и просла́вих Твою́ си́лу.

Припев: Пресвята́я Богоро́дице, спаси́ нас.

Исто́чника Приснотеку́щаго источи́ла еси́, Пречи́стая Де́во, / вся удо́лия напая́юща, / погрузи́ и вся на́ша собла́зны и до конца́ потреби́.

Ле́ствицу Иа́ковлю, Гедео́ново руно́, / ра́дости Хода́таицу, кре́пость и похвалу́ всех ве́рных, / прииди́те, вси воспои́м, глаго́люще: / ра́дуйся, Де́во Чи́стая.

Слава: О́браз Твой честны́й целу́юще, Всечи́стая, / к Твое́й бла́гости прибега́ем / и, коле́на преклоня́юще, с пла́чем мо́лим Тя: / не пре́зри на́шего воздыха́ния, / но в День су́дный бу́ди нам покро́в и Помо́щница.

И ныне: Сло́во Бо́жие ро́ждшая, / посети́ нас благода́тию Твое́ю, / и омраче́нныя на́ша ду́ши и сердца́ просвети́, / и пода́ждь нам от бед избавле́ние и всех грехо́в оставле́ние.

Песнь 5.

Ирмос: Зако́ном за́поведей Твои́х, / Еди́не Человеколю́бче, / просвети́ се́рдце мое́, / молю́ся, Го́споди, и поми́луй мя.

Припев: Пресвята́я Богоро́дице, спаси́ нас.

Твоя́ всечестна́я ико́на Троеру́чица / я́сно всем свиде́тельствует, / я́ко Ты кре́пость на́ша и си́ла еси́, / сего́ ра́ди прославля́ем ма́тернее Твое́ к нам милосе́рдие.

Преподо́бный Иоа́нн Дамаски́н сле́зно моля́шеся Тебе́ пред честно́ю ико́ною Твое́ю, / Ты же моли́тву его́ ско́ро услы́шала еси́ / и усече́нней руце́ его́ исцеле́ние дарова́ла еси́.

Слава: Ра́дости Хода́таице, / мольбы́ раб Твои́х приими́, вся проти́вных враго́в сове́ты разжени́ / и ста́до Твое́ невреди́мо сохрани́ и от всех скорбе́й спаси́.

И ныне: Избавля́емы прегреше́ний Твои́ми святы́ми моли́твами, Благослове́нная Богоро́дице, / благоразу́мно Тя вси ублажа́ем.

Песнь 6.

Ирмос: Ве́чер, и у́тро, и полу́дне / хва́лим Тя, Го́споди Бо́же наш, / услы́ши глас наш.

Припев: Пресвята́я Богоро́дице, спаси́ нас.

Блажи́м Тя и сла́вим, Богоро́дице Де́во, / и́бо Ты, о Благода́тная, благода́тию Твое́ю всегда́ нас осеня́еши, / покрыва́ющи, и заступа́ющи, и от лука́вых враго́в избавля́ющи.

Е́здяй на Херуви́мех и Пева́емый от Серафи́м / из Твои́х ложе́сн яви́ся, и все челове́чество спасе́но бысть, / сего́ ра́ди сла́вим Тя, я́ко Засту́пницу на́шу Непосты́дную.

Слава: Гряди́те, лю́дие, на поклоне́ние Бо́жией Ма́тери, / благода́ть бо све́та Ея́ и нам возсия́ и научи́ пе́ти: / сподо́би нас, о Благода́тная, Вы́шняго прича́стия.

И ныне: А́нгелов ра́дость Ты еси́, Богоро́дице, / и всех челове́ков вои́стину весе́лие; / спаси́ ду́ши всех, пою́щих Тя, Чи́стая.

Го́споди, поми́луй, трижды. Сла́ва, и ны́не:

Кондак, глас 3:

Де́ва днесь благоволе́ние к нам явля́ет, / гора́ же Афо́н благодаре́ние Ей прино́сит, / А́нгели и и́ноцы славосло́вят, / Троеру́чица из Се́рбии чуде́сно путеше́ствует: / нас бо ра́ди прии́де / и всели́ся во святу́ю оби́тель Хиланда́рскую.

Икос: Вои́стину пречу́дное явле́ние: / пресла́вная ико́на Твоя́ Троеру́чица, / ю́же первосвяти́тель се́рбский, Са́вва, / от святы́я Ла́вры Са́ввы Освяще́ннаго, / со благогове́нием, я́ко многоце́нен дар, в страну́ Се́рбскую принесе́, / на безслове́снем осля́ти от Се́рбии на Афо́н чуде́сно прино́сится / и ко святе́й оби́тели Хиланда́рстей прии́де. / И́ноцы же оби́тели сея́, восприи́мше сию́ с ра́достию, я́ко дар Небе́сный, / поста́виша ю́ в олтари́ собо́рныя це́ркве оби́тели, / и́бо разуме́ша сбытие́ сие́ я́ко я́вное Твое́ к ним благоволе́ние. / Сего́ ра́ди с ра́достию и любо́вию покланя́хуся всечестне́й ико́не Твое́й, целу́юще ю́ и Тебе́ воспева́юще: / ра́дуйся, святу́ю ико́ну Твою́ зало́гом ми́лости нам дарова́вшая, / всем ве́рным ско́рое поможе́ние.

Песнь 7.

Ирмос: В нача́ле Безнача́льное Сло́во, / со Отце́м и Ду́хом Сын Единоро́дный, благослове́н еси́, / и превозноси́мый Бо́же оте́ц на́ших.

Припев: Пресвята́я Богоро́дице, спаси́ нас.

Еди́ну Тя обре́те Чи́стую Соде́тель всех / и всели́ся в Тя, я́ко в храм прекра́сный, / сего́ ра́ди пое́м Ти: / Христа́ Бо́га на́шего Ма́ти, благослове́нна еси́.

Ми́лостию Твое́ю весь мир обогаща́еши / и ду́ши просвеща́еши, Еди́на Всепе́тая, / те́мже воспева́ем Ти: / Христа́ Бо́га на́шего Ма́ти, благослове́на еси́.

Слава: Безневе́стная Де́во, / многопло́дное дре́во яви́лася еси́, / сне́дию Небе́сною вся насыща́ющее, / доброде́яния всем источи́, да вси пое́м Ти: / Христа́ Бо́га на́шего Ма́ти, благослове́на еси́.

И ныне: О́браза Твоего́ прише́ствием от злых избавля́емся / и посрамля́ются вси, рабо́м Твои́м зла́я явля́ющии, / сего́ ра́ди вопие́м: / благослове́на еси́, Ма́ти Христа́ Бо́га на́шего.

Песнь 8.

Ирмос: Во о́бразе А́нгела, / я́вльшагося в пещи́ о́гненней песносло́вцем, / Христа́ Бо́га по́йте, о́троцы, / свяще́нницы, благослови́те, / лю́дие, превозноси́те во вся ве́ки.

Припев: Пресвята́я Богоро́дице, спаси́ нас.

Гла́сы моле́бными, прииди́те, вси воспое́м Чи́стую Де́ву, / се бо ны́не весе́лие приближа́ется, ве́рнии спаса́ются, и воскли́кнем в весе́лии: / Богоро́дицу по́йте и превозноси́те во вся ве́ки.

Очи́ма а́нгельскима глубина́ неудобозри́мая, / челове́ческими по́мыслы высота́ неудобовосходи́мая / прии́де к нам во о́бразе Троеру́чицы, / поклони́мся у́бо честно́му о́бразу и возопии́м: / Богоро́дицу по́йте и превозноси́те во вся ве́ки.

Слава: Ра́дующеся, приступа́ем о́бразу Твоему́ честно́му / и, уми́льно моля́щеся, из глубины́ души́ взыва́ем: / Богоро́дицу по́йте и превозноси́те во вся ве́ки.

И ныне: Огне́м возгара́шеся гора́ Сина́йская, / не терпя́ше бо сни́тия сла́вы Бо́жия, / Ты же, весь Боже́ственный Огнь сущ, / Бо́жие Сло́во во чре́ве Твое́м неопа́льно носи́ла еси́, / сего́ ра́ди пое́м: / Богоро́дицу по́йте и превозноси́те во вся ве́ки.

Песнь 9.

Ирмос: Безсе́менное Рождество́ Твое́, Богоро́дице Чи́стая, / Христа́ Бо́га на́шего / пе́сньми немо́лчными велича́ем.

Припев: Пресвята́я Богоро́дице, спаси́ нас.

Днесь ра́дуется Правосла́вная Се́рбия и вся гора́ Афо́нская, / изря́днее же оби́тель Хиланда́рская, / и́бо прии́де и всели́ся в ню всечестна́я ико́на Троеру́чица, / явля́ющи к нам благоволе́ние Бо́жия Ма́тере.

Име́ющи святу́ю ико́ну Твою́ Троеру́чицу во игу́мена себе́, / я́коже Твоя́ во́ля бысть, Богоро́дице, / оби́тель Хиланда́рская благоуха́нием святы́ни исполня́ется / и непреста́нно славосло́вит и́мя Твое́.

Слава: Цве́те прекра́сный, облагоуха́яй вся, / проти́вных нахожде́ния отгоня́яй и весе́лия всех исполня́яй, / бу́ди нам стена́, и огражде́ние, и спаси́тельное прибе́жище.

И ныне: Его́же воспева́ют А́нгели, родила́ еси́, / но и Де́вою пребыла́ еси́, / сего́ ра́ди вопие́м Ти: / ра́дуйся, ско́рая Помо́щнице и кре́пкая Засту́пнице всего́ ми́ра.

Светилен:

Све́том благосе́рдия Твоего́ всех озаря́ющи, / вся́кую боле́знь и неду́г исцеля́еши, / не забу́ди и нас, ве́рных раб Твои́х, / но да зна́менается на нас свет лица́ Твоего́ / во вся дни живота́ на́шего.

Слава, и ныне, Богородичен: Ико́на Твоя́ пречу́дная, Богоро́дице, / да бу́дет нам столп о́гненный, руководя́щий нас к ве́чному насле́дию, / и да зна́менается на нас свет лица́ Твоего́ / во вся дни живота́ на́шего.

Молитва первая:

О Пресвята́я и Преблагослове́нная Де́во Богоро́дице Мари́е! Припа́даем и покланя́емся Ти пред свято́ю ико́ною Твое́ю, воспомина́юще пресла́вное чу́до Твое́, исцеле́нием усече́нныя десни́цы преподо́бнаго Иоа́нна Дамаски́на, от ико́ны сея́ явле́нное, его́же зна́мение доны́не ви́димо есть на ней, во о́бразе тре́тия руки́, к изображе́нию Твоему́ приложе́нныя. Мо́лимся Ти и про́сим Тя, Всеблагу́ю и Всеще́друю ро́да на́шего Засту́пницу: услы́ши нас, моля́щих Ти ся, и я́коже блаже́ннаго Иоа́нна, в ско́рби и боле́зни к Тебе́ возопи́вшаго, услы́шала еси́, та́ко и нас не пре́зри, скорбя́щих и боле́знующих ра́нами страсте́й многоразли́чных и к Тебе́ от души́ сокруше́нныя и смире́нныя усе́рдно прибега́ющих. Ты зри́ши, Госпоже́ Всеми́лостивая, не́мощи на́ша, озлобле́ние на́ше, ну́жду, потре́бу на́шу в Твое́й по́мощи и заступле́нии, я́ко отвсю́ду враги́ окруже́ни есмы́, и несть помога́ющего, ниже́ заступа́ющего, а́ще не Ты умилосе́рдишися о нас, Влады́чице. Ей, мо́лим Ти ся, вонми́ гла́су боле́зненному на́шему и помози́ нам святооте́ческую Правосла́вную ве́ру до конца́ дней на́ших непоро́чно сохрани́ти, во всех за́поведех Госпо́дних неукло́нно ходи́ти, покая́ние и́стинное о гресе́х на́ших всегда́ Бо́гу приноси́ти и сподо́битися ми́рныя христиа́нския кончи́ны и до́браго отве́та на Стра́шнем Суде́ Сы́на Твоего́ и Бо́га на́шего, Его́же умоли́ за нас Ма́тернею моли́твою Твое́ю, да не осу́дит нас по беззако́нием на́шим, но да поми́лует нас по вели́цей и неизрече́нней ми́лости Свое́й. О Всеблага́я, услы́ши нас и не лиши́ нас по́мощи Твоея́ держа́вныя, да, Тобо́ю спасе́ние получи́вше, воспое́м и просла́вим Тя на земли́ живы́х и ро́ждшагося от Тебе́ Искупи́теля на́шего, Го́спода Иису́са Христа́, Ему́же подоба́ет сла́ва и держа́ва, честь и поклоне́ние, ку́пно со Отце́м и Святы́м Ду́хом, всегда́, ны́не и при́сно, и во ве́ки веко́в. Ами́нь.

Молитва вторая:

О Пресвята́я Госпоже́ Влады́чице Богоро́дице, ве́лие чу́до свято́му Иоа́нну Дамаски́ну яви́вшая, я́ко ве́ру и́стинную и наде́жду несумне́нную показа́вшему! Услы́ши нас, гре́шных, пред чудотво́рною Твое́ю ико́ною усе́рдно моля́щихся и прося́щих Твоея́ по́мощи: не отри́ни моле́ния сего́ мно́гих ра́ди прегреше́ний на́ших, но, я́ко Ма́ти милосе́рдия и ще́дрот, изба́ви нас от боле́зней, скорбе́й и печа́лей, прости́ соде́янныя на́ми грехи́, испо́лни ра́дости и весе́лия всех, чту́щих святу́ю ико́ну Твою́, да ра́достно воспое́м и любо́вию просла́вим и́мя Твое́, я́ко Ты еси́ от всех родо́в избра́нная и благослове́нная во ве́ки веко́в. Ами́нь.

КАНОН ПРЕСВЯТЕЙ БОГОРОДИЦЕ ПРЕД ИКОНОЮ ЕЯ, НАРИЦАЕМОЮ УМИЛЕНИЕ ИЛИ РАДОСТЬ ВСЕХ РАДОСТЕЙ

Тропарь, глас 4:

К Богоро́дице со умиле́нием припаде́м, / вси, грехми́ обремене́ннии, / чудотво́рную Ея́ ико́ну Умиле́ния облобыза́юще / и вопию́ще со слеза́ми: / Влады́чице, приими́ моле́ние недосто́йных раб Твои́х / и пода́ждь нам, прося́щим, / ве́лию Твою́ ми́лость.

Канон Пресвятыя Богородицы, глас 4.

Песнь 1.

Припев: Пресвята́я Богоро́дице, спаси́ нас.

Умили́ся, уми́лостивися, умилосе́рдися, Влады́чице, / на мя, гре́шнаго и недосто́йнаго раба́ Твоего́, / дерза́ющаго воспе́ти Твоя́ чудеса́.

Ма́ти Бо́жия Пречи́стая, / не отри́ни мене́, окая́ннаго и нечи́стаго, / дерза́ющаго пе́ти Твоя́ чудеса́, Умиле́ние.

Слава: Ина́го прибе́жища и те́плаго предста́тельства / к Сы́ну Твоему́ и Бо́гу на́шему не и́мам, Всепе́тая, / те́мже сподо́би мя, многогре́шнаго, восхвали́ти Твоя́ чудеса́.

И ныне: Ле́ностию одержи́мь и страстьми́ обурева́емь есмь аз, / неключи́мый раб Твой, Влады́чице, / недоуме́ю по достоя́нию восхвали́ти и просла́вити Твоя́ чудеса́.

Песнь 3.

Ирмос: Твоя́ песносло́вцы, Богоро́дице, / живы́й и незави́стный Исто́чниче, / лик себе́ совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.

Припев: Пресвята́я Богоро́дице, спаси́ нас.

Еди́н аз, окая́нный, житие́м согреши́х па́че всех челове́к, Пречи́стая, / но, на щедро́ты Твоя́ упова́я, зову́: / душе́внаго мя умиле́ния сподо́би.

Никто́же, прибега́яй с ве́рою под Боже́ственный Покро́в Твой, Влады́чице, / тощь от Тебе́ исхо́дит, / те́мже и аз, многогре́шный, дерза́я, зову́: / Боже́ственнаго мя умиле́ния сподо́би.

Слава: Иа́ков, ле́ствицу Боже́ственную ви́дев, рече́: / степе́нь Бо́жия сия́, Я́же еси́ Ты, Препе́тая; / те́мже молю́ Тя: / блага́го восхожде́ния к доброде́тели и мене́, лю́те недосто́йнаго, сподо́би.

И ныне: Ю́же всем благопослу́шную в ско́рбех и обстоя́ниих душе́вных и теле́сных / яви́ Тя Госпо́дь, Богоро́дице Блага́я, / та́ко и мне, лю́те обурева́емому страстьми́ безме́стными, сле́зы умиле́ния пода́ждь / и Твоего́, Де́во, Ма́терняго заступле́ния сподо́би.

Го́споди, поми́луй, трижды.

Седален, глас 5:

Превзыдо́ша главу́ мою́ греси́ мои́, Влады́чице, / оскверне́н и́ми есмь, и несть исцеле́ния в пло́ти мое́й, / но Ты, Многоблагоутро́бная, да́руй души́ мое́й сле́зы покая́ния на очище́ние скверн грехо́вных / и теле́сныя неду́ги уврачу́й, Врача́ вся́ческих и Го́спода ро́ждшая.

Слава, и ныне: Ра́ны душе́вныя привлеко́ша на мя и боле́зни теле́сныя, Влады́чице, / но Ты, я́ко Преми́лостивая, обоя́ исцели́, подава́ющи мне неоску́дный дар духо́внаго умиле́ния, / и да непреста́нно сла́влю Твое́ всемо́щное заступле́ние.

Песнь 4.

Припев: Пресвята́я Богоро́дице, спаси́ нас.

Иде́же осени́т благода́ть Твоя́, Влады́чице, / та́мо вся́кая скорбь потребля́ется, весе́лие же водворя́ется, / ея́же и мене́, недосто́йнаго, сподо́би, вопию́ща: / ра́дуйся, Богоро́дице, всех ра́достей Ра́досте.

Слез не и́мам, окая́нный аз, ниже́ душе́внаго умиле́ния, / но Сама́, я́ко Милосе́рдая, сия́ ми пода́ти благоволи́, да взыва́ю: / ра́дуйся, Де́во Пречи́стая, всех ра́достей Ра́досте.

Слава: Не́мощна мя су́ща и окая́нна стру́пы грехо́вными, / уврачу́й, Пречи́стая, милосе́рдия Твоего́ еле́й излива́ющи, / и воздви́гни пе́ти Тебе́: / ра́дуйся, Влады́чице, всех ра́достей Ра́досте.

И ныне: Омрачи́хся умо́м в жите́йских сласте́х, / но Ты, Влады́чице, све́те помраче́нныя души́ моея́, разгони́ тьму страсте́й мои́х, / да просве́щся Тобо́ю, вопию́: / ра́дуйся, Неве́сто Неневе́стная.

Песнь 5.

Ирмос: Ужасо́шася вся́ческая / о Боже́ственней сла́ве Твое́й, / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ безле́тнаго Сы́на, / всем воспева́ющим Тя / мир подава́ющая.

Припев: Пресвята́я Богоро́дице, спаси́ нас.

Доко́ле поно́сит враг и низлага́ет до́лу мя, немощна́го и разсла́бленнаго лю́те душе́ю и те́лом: / умили́ся, Влады́чице, и низложи́ борю́щих мя враго́в, Всепе́тая, / души́ мое́й мир подава́ющи.

Вы́шши всех А́нгел и Арха́нгел яви́лася еси́, Чи́стая Богоотрокови́це, / те́мже молю́ Тя, стре́лы вра́жия, на мя изощре́нныя, сокруши́ти, / души́ мир подава́ющи.

Слава: Доко́ле, душе́ моя́, пребыва́еши в прегреше́ниих, конца́ не иму́щи грехо́вному обы́чаю, / возни́кни из глубины́ зол, взира́ющи держа́вному заступле́нию Пречи́стыя, всегда́ на по́мощь тебе́ ско́рыя / и благода́тию Свое́ю мир души́ и те́лу подава́ющия.

И ныне: Ра́дость, и весе́лие, и ра́дование Боже́ственное, / Де́во Неискусому́жная, нам умно́жися Бо́жие: / се бо, пла́чущиися лю́те, ра́дуемся моли́твами Твои́ми.

Песнь 6.

Припев: Пресвята́я Богоро́дице, спаси́ нас.

Ра́дости Боже́ственнаго вели́чия, я́ко от нача́ла нам весе́лия, / благодаре́ния гла́сы прино́сим, / приле́жно почита́юще Ю́, я́ко Предста́тельницу на́шу.

Досто́йно Ти песнь ра́дования, Чи́стая Де́во, веселя́щеся, прино́сим, / изба́вльшеся от бед Твои́ми моли́твами.

Слава: А́нгельстии язы́цы досто́йно Твоя́ хвалы́ воспе́ти не мо́гут, Чи́стая, / мы же ны́не, ра́бски взе́мшеся, / ра́дование Гаврии́лово прино́сим Ти.

И ныне: Я́ко Боже́ственное прибе́жище, мы покро́в Твой вси стяжа́вше к Бо́гу, / в напа́стех, и в гоне́ниих, и гресе́х к Тебе́ прибега́ем / и Тобо́ю измене́ние прие́млем, Пречи́стая.

Го́споди, поми́луй, трижды. Сла́ва, и ны́не:

Кондак, глас 3:

Ю́же подража́я непло́дную смоко́вницу, / аз, окая́нный, умиле́ния плода́ отню́д не приношу́ и посече́ния страшу́ся, / но, взира́я к чудотво́рней ико́не Твое́й Умиле́ния, Влады́чице, / стеню́ от се́рдца и вопию́: / умили́ся, Благосе́рдая, / и мне, окамене́нному се́рдцем, / благоволи́ пода́ти душе́вное и серде́чное умиле́ние.

Икос: Превзыдо́х грехи́ мои́ми блудни́цу, и блу́днаго, и мытаря́, / и разбо́йника, и ниневи́тяны, аз еди́н, окая́нный па́че всех челове́к, / и, лиши́вся благода́ти и дерзнове́ния ко Го́споду, стеню́ от се́рдца и вопию́: / Тя Хода́таицу и Спору́чницу спасе́ния многогре́шней души́ мое́й благосотвори́, / подаю́щи ми душе́вное и серде́чное умиле́ние.

Песнь 7.

Ирмос: Не послужи́ша тва́ри Богому́дрии / па́че Созда́вшаго, / но о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог благослове́н еси́.

Припев: Пресвята́я Богоро́дице, спаси́ нас.

Ре́ку неисчерпа́емую ми́лости Твоея́ / к гре́шным всем, Влады́чице, излива́еши, те́мже молю́: / напои́ мою́ жа́ждущую ду́шу и изсо́хшее грехи́ се́рдце мое́ ороси́, да, благословя́, воспою́: / препе́тый отце́в Госпо́дь и Бог, благослове́н еси́.

Я́же всем благопослу́шная в ско́рбех и обстоя́ниих душе́вных и теле́сных, Влады́чице, / не отве́ржи и мене́, недосто́йнаго, но сподо́би пе́ти: / отце́в Госпо́дь и Бог, благослове́н еси́.

Слава: Не отри́ни, Богоро́дице, мене́, уязвле́ннаго сове́том змии́ным, / не возгнуша́йся мене́, смра́днаго грехи́ мно́гими, / но сподо́би всегда́ пе́ти: / отце́в Госпо́дь и Бог, благослове́н еси́.

И ныне: Егда́ престо́ли на Суд поста́вятся и Суди́щу Христо́ву предста́нут вси земноро́днии, / тогда́ яви́ мне, Влады́чице, Ма́тернее Твое́ заступле́ние, неоску́дную по́мощь, вопию́щу: / отце́в Госпо́дь и Бог, благослове́н еси́.

Песнь 8.

Ирмос: О́троки благочести́выя в пещи́ / Рождество́ Богоро́дично спасло́ есть, / тогда́ у́бо о́бразу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте, дела́, / и превозноси́те Его́ во вся ве́ки.

Припев: Пресвята́я Богоро́дице, спаси́ нас.

Стра́ха мя изба́ви, о Влады́чице, зло́бы и возду́шных мыта́рств. / Покажи́ на мне, недосто́йнем, ве́лию ми́лость Твою́, воспева́ющем: / Го́спода по́йте, дела́, и превозноси́те Его́ во вся ве́ки.

Изба́ви мя, Пренепоро́чная, озлобле́ния злых челове́ков и лука́вых бесо́в, / трепе́щут бо и́мене Твоего́ вели́каго, я́ко дым исчеза́ют; / мене́ же во умиле́нии се́рдца сподо́би пе́ти: / Го́спода по́йте, дела́, и превозноси́те Его́ во вся ве́ки.

Слава: Те́мныя вла́сти кня́зя, всегда́ борю́щаго мя, немощна́го и уны́лаго, разжже́нныя стре́лы угаси́, Всепе́тая, / и сподо́би мя благода́рственно воспева́ти: / Го́спода по́йте, дела́, и превозноси́те Его́ во ве́ки.

И ныне: Пе́ние мое́ приими́ убо́гое, Всеми́лостивая Госпоже́ Де́во, Влады́чице Богоро́дице, / Ма́терним Твои́м милосе́рдием покрыва́ющи пою́щия: / Го́спода по́йте, дела́, и превозноси́те Его́ во вся ве́ки.

Песнь 9.

Ирмос: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная Богоро́дице, / Чи́стая Присноде́во.

Припев: Пресвята́я Богоро́дице, спаси́ нас.

Егда́ изнемога́ти кре́пости мое́й / во исхо́де души́ мое́й гре́шней от окая́ннаго и скве́рнаго сего́ телесе́, / тогда́ наипа́че яви́ на мне, недосто́йнем, кре́пкую мы́шцу Твою́, Всеблага́я, / даждь в час сме́рти моея́ ра́достно взыва́ти Тебе́: / ра́дуйся, Всеблаже́нная Богоро́дице, Чи́стая Присноде́во.

Нищ и убо́г есмь от дел благи́х, не имы́й умиле́ния душе́внаго, Преми́лостивая, / Ты Сама́ да́рствуй ми, да благода́рственно вопию́: / ра́дуйся, Всеблаже́нная Богоро́дице, Чи́стая Присноде́во.

Слава: Иссо́пом милосе́рдия Твоего́ окропи́ мя, Пречи́стая, / да очи́щуся от тя́жких и лю́тых беззако́ний мои́х и во умиле́нии души́ да взыва́ю от се́рдца: / ра́дуйся, Всеблаже́нная, Чи́стая Присноде́во.

И ныне: Е́же помы́слих в души́ мое́й, по си́ле принесо́х пе́ние Тебе́, Влады́чице, / не отри́ни у́бо обы́чным Твои́м милосе́рдием / и не омерзи́ мно́ю, многогре́шным и нечи́стым, / но сподо́би всегда́ во умиле́нии пе́ти Тебе́: / ра́дуйся, Всеблаже́нная Богоро́дице, Чи́стая Присноде́во.

Светилен. Подобен: Посетил ны есть:

Те́плое заступле́ние в беда́х, и Помо́щницу, и к Бо́гу примире́ние, / Е́юже тли изба́вихомся, / Богоро́дицу, ве́рнии, ублажи́м.

Слава, и ныне: Тя Предста́тельницу и́мамы, гре́шнии, о Пречи́стая Де́во, / Ты благопремене́нна сотвори́ Сы́на Твоего́ и Бо́га на́шего / Ма́терними Твои́ми моли́твами.

Молитва:

О Пресвята́я Госпоже́ Влады́чице, Богоро́дице Де́во! Приими́ недосто́йныя моли́твы на́ша, сохрани́ нас от наве́тов злых челове́к и от напра́сныя сме́рти, пода́ждь нам пре́жде конца́ покая́ние, на моле́ния на́ша умилосе́рдися и ра́дость в печа́ли ме́сто да́руй. И изба́ви нас, о Госпоже́ Влады́чице Богоро́дице, от вся́кия беды́, напа́сти, ско́рби, боле́зни и вся́каго зла, и сподо́би нас, гре́шных рабо́в Твои́х, одесну́ю ста́ти во второ́м прише́ствии Сы́на Твоего́, Христа́ Бо́га на́шего, и насле́дники нас бы́ти сподо́би Ца́рствия Небе́снаго и жи́зни ве́чныя со все́ми святы́ми в безконе́чныя ве́ки. Ами́нь.

Молитва иная:

Приими́, всеблагомо́щная, Пречи́стая Госпоже́, Влады́чице Богороди́тельнице, сия́ честны́я дары́, Тебе́ еди́ней прикла́дныя, от нас, недосто́йных рабо́в Твои́х: от всех родо́в и́збранная, всех тва́рей Небе́сных и земны́х вы́сшая я́вльшаяся, поне́же бо Тебе́ ра́ди бысть Госпо́дь Сил с на́ми, и Тобо́ю Сы́на Бо́жия позна́хом и сподо́бихомся свята́го Те́ла Его́ и пречи́стыя Кро́ве Его́; те́мже блаже́нна еси́ в ро́дех родо́в, Богоблаже́нная, херуви́мов светле́йши и серафи́мов честне́йши су́щая. И ны́не, всепе́тая Пресвята́я Богоро́дице, не преста́й моля́щися о нас, недосто́йных рабе́х Твои́х, е́же изба́витися нам от вся́каго сове́та лука́ваго и вся́каго обстоя́ния и сохрани́тися нам неврежде́нным от вся́каго ядови́таго прило́га диа́вольскаго; но да́же до конца́ моли́твами Твои́ми неосужде́нных нас соблюди́, я́ко да Твои́м заступле́нием и по́мощию спаса́еми, сла́ву, хвалу́, благодаре́ние и поклоне́ние за вся в Тро́ице Еди́ному Бо́гу и всех Созда́телю возсыла́ем, ны́не и при́сно, и во ве́ки веко́в. Ами́нъ.

КАНОН ПРЕСВЯТЕЙ БОГОРОДИЦЕ ПРЕД ИКОНОЮ ЕЯ, НАРИЦАЕМОЮ СПОРИТЕЛЬНИЦА ХЛЕБОВ

Тропарь, глас 3:

О, Пречи́стая Де́во Мари́е, / Ма́ти Царя́ небесе́ и земли́, / благоутро́бно призира́еши на лю́бящих Сы́на Твоего́, / Христа́ Бо́га на́шего, / и тружда́ющихся во и́мя Его́ / ве́чнаго ра́ди спасе́ния, / и подае́ши им вся оби́льно к наслажде́нию, / Спори́тельнице су́щи хлебо́в им, / избавля́я их вся́кия ну́жды и утесне́ния / и устроя́я им, рабо́м Твои́м су́щим, / избавле́ние ве́чныя му́ки и жизнь ве́чную.

Канон Пресвятыя Богородицы, глас 8.

Песнь 1.

Ирмос: Во́ду проше́д я́ко су́шу, / и еги́петскаго зла избежáв, / изрáильтянин вопия́ше: / избáвителю и Бо́гу на́шему пои́м.

Припев: Пресвята́я Богоро́дице, спаси́ нас.

Бо́жиею си́лою благоче́стно укрепи́ мя, / ра́достно сла́вити ико́ну Твою́, Пречи́стая, / заступле́ние гра́ду Твоему́, / и всем лю́дем Твои́м держа́ву неразруши́му, Пресвята́я, / и ста́ду Твоему́ утвержде́ние.

Благосты́ню и ми́лость почерпа́ем Твои́ми моли́твами: / Ты бо Бо́га Си́льнаго родила́ еси́, / спаса́ющая вся благове́рныя моле́нием Твои́м, Пренепоро́чная. / Его́же ра́ди Тя ублажа́ем вси, Влады́чице.

Слава: Твою́ святу́ю ико́ну, почита́юще, Пречи́стая Богоро́дице, / Тобо́ю спасе́ние нетле́нно дарова́ся, / и неразруши́мо весе́лие и наде́жда, покро́в и держа́ва, / и душа́м на́шим прибе́жище.

И ныне: Под Твой кров притека́ем, Влады́чице, / лю́дие Твои́, Пренепоро́чная, / Помо́щница бу́ди нам рабо́м Твои́м, / и спасе́нию проше́ние подаю́щи, / любо́вию пою́щим Тя.

Песнь 3.

Ирмос: Небе́снаго кру́га Верхотво́рче, Го́споди, / и Це́ркве Зижди́телю, / Ты ме́не утверди́ в любви́ Твое́й, / желáний крáю, ве́рных утвержде́ние, / еди́не Человеколю́бче.

Припев: Пресвята́я Богоро́дице, спаси́ нас.

Всечестну́ю Твою́ ико́ну, Пресвята́я Де́во Чи́стая, / а́нгел мно́жество на небесе́х, / и челове́ческий род на земли́ блажи́т: / я́ко Ма́ти бысть Творца́ всех Христа́ Бо́га. / Того́ моля́щи за ны не преста́й мо́лим Тя, / и́же на Тя с Бо́гом упова́ние возложи́хом, / Богоро́дица препе́тая и неискусобра́чная.

Освяща́еши благоче́стно, ве́рно притека́ющих ко хра́му Твоему́, / и припа́дающих любо́вию к ико́не Твое́й. / Изба́ви нас от вся́ких бед, / и побе́ды да́руй правосла́вным христиа́ном на пога́ныя, / и ми́лостива сотвори́ нам Сы́на Твоего́ и Бо́га на́шего.

Слава: Деви́ческаго Твоего́ чре́ва красе́н Клас я́влься, / израсти́ла бо еси́ ми́рови Жизнь. / Сего́ ра́ди си́лы Небе́сныя вопию́т Тебе́, Богоро́дице: ра́дуйся, Благода́тная, Госпо́дь с Тобо́ю.

И ныне: Ра́достными душа́ми, и в весе́лии се́рдца / прии́мше ум к Твоему́ честно́му и свято́му о́бразу, / и вси ве́рнии мо́лим Тя, Богоро́дице, / я́ко Пречи́стому Сы́ну Твоему́ млеко́ подала́ еси́, / И́же нас пита́вый ми́лостию Свое́ю.

Го́споди, поми́луй, трижды.

Седален, глас 4:

Це́рковь Твоя́ све́тло пра́зднует Твоего́ сла́внаго о́браза явле́ние, / и вси ве́рнии, пою́ще, зове́м Ти приле́жно, Чи́стая Де́во: / вся ве́рныя укрепи́ на вра́жию си́лу, и сове́ты беззако́нных разори́: / и живо́т наш напра́ви, твори́ти Боже́ственную во́лю Сы́на Твоего́.

Песнь 4.

Припев: Пресвята́я Богоро́дице, спаси́ нас.

Ты у́бо, Де́во Чи́стая, / к Све́ту незаходи́мому прише́дши помяни́ нас, / моля́щи Сы́на Твоего́ и Бо́га на́шего, / Твою́ честну́ю ико́ну пра́зднующих, / пода́ти грехо́в оставле́ние.

Я́коже со́лнце светоза́рное, не́бо преходя́ще сия́ет, / и Твой Боже́ственный лик лучи́ испуща́ет, / страсте́й же мглу от нас отгоня́я, / да́рует душа́м на́шим очище́ние и от бед свобожде́ние.

Слава: Ны́не мрак зло́бный потреби́ся, / и со́лнечный и душе́вный свет возсия́, / Всенепоро́чныя Бо́жия Ма́тере, / пра́здник честна́го о́браза его́же благоче́стно пра́зднуем.

И ныне: Прибе́жище вели́кое и похвала́, / Пречи́стая и Пренепоро́чная Ма́ти всепе́тая. / Ты киво́т у́мныя святы́ни, / Ты целе́б исто́чник неисчерпа́емый, / чту́щих Тя покрыва́й от вся́каго зла.

Песнь 5.

Ирмос: Вску́ю мя отри́нул еси́ / от лица́ Твоего́, Све́те незаходи́мый, / и покры́ла мя есть чужда́я тьма, окая́ннаго? / Но обрати́ мя / и к све́ту за́поведей Твои́х / пути́ моя́ напра́ви, молю́ся.

Припев: Пресвята́я Богоро́дице, спаси́ нас.

Исполня́ется святы́ни вся́ческая, к Тебе́ прибега́ющим, / и проще́ние ве́рнии прие́млюще, / пра́зднуем Твою́ святу́ю ико́ну, / и мо́лим Тя, Пречи́стая, / пода́ти нам благода́ть и ми́лость в день су́дный.

Вельми́ добро́тою укра́си Тя Бог, / я́ко в челове́цех свет на руку́ Твое́ю, / Я́же еди́на во све́те Его́, упова́ние христиа́ном, / помо́щница су́щим в ну́ждах и ско́рбех, / и приста́нище в пучи́не тружда́ющимся, / моли́ изба́витися от напа́стей, / любо́вию чту́щия ико́ну Твою́.

Слава: Я́ко други́й рай всем познава́ется, / стяжа́вый посреде́ благоуха́ния цвет, / Твой честны́й пра́здник, / Бо́жиим благоуха́нием ве́рных сердца́ исполня́ет, / и́же любо́вию чту́щих Тя, Пренепоро́чная Влады́чице.

И ныне: О́блак была́ еси́, Де́во, дождю́ Бо́жию, / Пренепоро́чная Влады́чице, / во́ду спаси́тельную испуща́ющи, / зе́млю грехми́ изсо́хшую напои́вши, / приводя́щи плод творе́нию доброде́тели, / сего́ ра́ди ублажа́ем Тя.

Песнь 6.

Ирмос: Очи́сти мя, Спа́се, / мно́га бо беззако́ния моя́, / и из глубины́ зол возведи́, молю́ся: / к Тебе́ бо возопи́х, и услы́ша мя, / Бо́же спасе́ния моего́.

Припев: Пресвята́я Богоро́дице, спаси́ нас.

Пре́жде всех век Су́щаго, я́ко отроча́ родила́ еси́, / и на́ша сердца́ обнови́ла еси́, мно́гими грехи́ обетша́вшая: / и обновле́ние приими́ на́шего пе́ния, / принося́ще Твоему́ пра́зднику, Богоро́дице Присноде́во.

Де́ва Мари́я Богоро́дица вои́стинну, / я́ко о́блак све́тлый нам возсия́. / Ктому́ Ада́м не осужда́ется, и Е́ва от уз свободи́ся. / Сего́ ра́ди и мы зове́м, вопию́ще с дерзнове́нием еди́ней чи́стей: / Пресвята́я Де́во, моли́ Сы́на Твоего́, пода́ти грехо́в оставле́ние.

Слава: Душа́ вся́ка весели́тся, соше́дшеся в це́рковь Твою́, / и пред ико́ной Твое́й взыва́юще, Де́во Богоро́дице, / всех и нас озари́, и просвети́ сердца́ на́ша, / Де́во Ма́ти Влады́чице.

И ныне: Днесь Небе́сная врата́ отверза́ются, / и дверь Боже́ственная предгряде́т. / Днесь ра́дости благода́ть начина́ется, / явля́юще ми́рови ико́ну Бо́жия Ма́тере, / к Не́йже вси ве́рнии возопи́им: / ра́дуйся, Благода́тная, Госпо́дь с Тобо́ю.

Го́споди, поми́луй, трижды. Сла́ва, и ны́не:

Кондак, глас 6:

Икос: К Богоро́дице вопие́м любо́вию: / ра́дуйся, гра́де Госпо́день, / ра́дуйся, ски́птре Дави́дов, / ра́дуйся, пала́то одушевле́нная, / ра́дуйся, ру́чко Боже́ственныя ма́нны, / ра́дуйся, неопали́мая купино́, / ра́дуйся, све́щниче златы́й, / ра́дуйся, свеще́ неугаси́мая, / ра́дуйся, горо́ Бо́жия приосене́нная, / ра́дуйся, огнено́сный престо́ле, / ра́дуйся, ле́ствице и дверь Небе́сная, / ра́дуйся, же́зле Ааро́нов невла́жно прозябы́й, / ра́дуйся, всех спаса́ющи от вся́ких бед и скорбе́й, / и моли́, Пречи́стая, Сы́на Твоего́, / получи́ти нам ми́лость в день су́дный.

Песнь 7.

Ирмос: Бо́жия снизхожде́ния / огнь устыде́ся в Вавило́не иногда́, / сего́ ра́ди о́троцы в пещи́, ра́дованною ного́ю, / я́ко во цве́тнице, лику́юще, поя́ху: / благослове́н еси́, Бо́же оте́ц на́ших.

Припев: Пресвята́я Богоро́дице, спаси́ нас.

Цари́ца всех прише́дши, / Небе́сный кров на сла́ву нам уста́ви, / притека́ющих к ико́не Твое́й святе́й, / ею́же спаса́емся от неви́димых враг нахожде́ния, / к Сы́ну Твоему́ вопию́ще: / благослове́н Бог оте́ц на́ших.

Рождество́м Твои́м, госпоже́ Богоро́дице Де́во, / и все́ми Твои́ми пра́здники, круг ле́та венча́ся, / и ны́не украси́ день честны́я Твоея́ ико́ны, благода́ть источа́ющи, / мы же вси ве́рнии во храм Твой притека́юще.

Слава: Вся си́лы Небе́сныя восхваля́ют Ро́ждшую Го́спода, / и ро́ди челове́честии прославля́ют Ю́ и ра́достно взыва́ют: / о, прибе́жище на́ша, наде́ждо и покро́в, / и огражде́ние от вра́жиих нахожде́ний.

И ныне: Благода́тный о́блаче, окропи́ нас свы́ше / росо́ю благода́ти и ми́лости Твоея́, / чту́щих день пра́здника Твоея́ святы́я ико́ны, / е́же почита́ет, пое́т и сла́вит вся́ка душа́ ра́дующися: / благослове́на Ты в жена́х и благослове́н Плод чре́ва Твоего́.

Песнь 8.

Ирмос: Безнача́льнаго Царя́ сла́вы, / Его́же трепе́щут Небе́сныя си́лы, / по́йте, свяще́нницы, / лю́дие, превозноси́те во вся ве́ки.

Припев: Пресвята́я Богоро́дице, спаси́ нас.

Цари́ца еси́ всех еди́на Бо́гу, Богороди́тельнице Чи́стая, / святы́й престо́л и пала́та Христа́ Бо́га, / Его́же моли́ о чту́щих Твою́ честну́ю ико́ну, / пода́ти грехо́в оставле́ние.

Рука́ми святы́ми и́стинно понесла́ еси́, / в Тебе́ воплоти́вшагося Го́спода, на земли́, Пресла́вная, / и ны́не восшла́ еси́ превы́ше небе́с, / и оста́вльши челове́ком пресве́тлый о́браз Твой, / моли́ Сы́на Твоего́ и Бо́га на́шего / пода́ти нам оставле́ние грехо́в.

Слава: Боже́ственнии игра́йте проро́цы, / чту́ще Де́вы Богоро́дицы ико́ну, Та бо испо́лни всех рече́ния, / ва́ми сказу́емаго, ро́ждши Христа́ всех Царя́, / Его́же превозно́сим во ве́ки.

И ныне: Па́дшим воста́ние, уныва́ющим ра́дование, заблу́ждшим наста́внице, / боля́щим посеще́ние и исцеле́ние, и всем христиа́ном спасе́ние; / соблюди́ нас, Госпоже́, вопию́щих и чту́щих ико́ну Твою́, / и изба́ви нас от вся́ких бед.

Песнь 9.

Ирмос: Устраши́ся всяк слух / неизрече́нна Бо́жия снизхожде́ния, / я́ко Вы́шний во́лею сни́де да́же и до пло́ти, / от деви́ческаго чре́ва быв Челове́к. / Те́мже Пречи́стую Богоро́дицу, ве́рнии, велича́ем.

Припев: Пресвята́я Богоро́дице, спаси́ нас.

Пресла́вная глаго́лашася о Тебе́, Гра́де Бо́жий, / и при́сно ца́рствующаго Небе́сными и земны́ми, от Тебе́ Ро́ждшагося, / и от земли́ Тя на Не́бо возве́дша; / Ему́же непреста́нно моли́ся о чту́щих пресла́внаго ли́ка Твоего́ изображе́ние, / с ни́мже Тя велича́ем.

Безпло́тных чи́нове, патриа́рх собо́р, / и апо́столов Боже́ственный соста́в, / проро́ческий лик, и му́ченичестии полцы́, / святи́телей и преподо́бных оте́ц ли́ки, / и вси святи́и, весели́теся с на́ми, / пра́зднующе Бо́жия Ма́тере честну́ю ико́ну и велича́юще.

Слава: Вся́ческая освяти́ла еси́ Рождество́м Твои́м, Пречи́стая Де́во, / и яви́ла еси́ бо́льшее просвеще́ние, / пречестны́й день о́браза Твоего́, / его́же пра́зднующе, Тебе́ велича́ем.

И ныне: Вознеси́ рог правосла́вных христиа́н, / и низложи́ иноплеме́нных шата́ния, Богороди́тельнице Пречи́стая, / невоева́ны соблюди́ гра́ды Твоя́, / и вся страны́ христиа́нския сохрани́, / в ни́хже вели́кое Твое́ и́мя и многосла́вное велича́ется, / и ве́рно сла́вится от всех, Влады́чице Чи́стая.

Светилен, глас 8:

Богоро́дицу Мари́ю вси воспои́м: / ра́дуйся, Ма́ти Бо́жия, / ра́дуйся, ле́ствице одушевле́нная и разу́мная, / ра́дуйся, купино́ неопали́мая, / ра́дуйся, ста́мно всесвята́я, / ра́дуйся, цве́те ве́ры, / ра́дуйся, же́зле прозя́бший, / ра́дуйся, злата́я кади́льнице, / ра́дуйся, горо́ Бо́жия приосене́нная Де́во, / ра́дуйся, разреше́ние пе́рвыя Е́вы, / ра́дуйся, престо́ле Бо́жий, / ра́дуйся, благода́тная, Госпо́дь с Тобо́ю, / пода́ждь и нам, недосто́йным, ро́су благода́ти Твоея́ / и яви́ милосе́рдие Твое́.

Моли́тва:

Пресвята́я Де́во Богоро́дице, преми́лостивая Влады́чице, Цари́це Небесе́ и земли́, вся́каго до́ма и семе́йства христиа́нскаго благоустрои́тельнице, тружда́ющихся благослове́ние, нужда́ющихся неистощи́мое бога́тство, си́рых и вдови́ц и всех люде́й корми́тельнице и пита́тельнице, ро́ждшая Пита́теля вселе́нныя и спори́тельнице хлебо́в на́ших! Ты, Влады́чице, низпосыла́еши Твое́ Ма́тернее благослове́ние гра́дом на́шим, се́лам и ни́вам, и коему́ждо до́му, на Тя упова́ние иму́щему. Те́мже с благогове́йным тре́петом и сокруше́нным се́рдцем смире́нно мо́лим Тя: бу́ди и нам, гре́шным и недосто́йным рабо́м Твои́м, му́драя домострои́тельнице, житие́ на́ше до́бре устроя́ющая. Вся́кий дом и семе́йство во благоче́стии и правосла́вии, единомы́слии, послуша́нии и дово́льстве соблюди́, ни́щия и неиму́щия пропита́й, ста́рость поддержи́, младе́нцы воспита́й, всех вразуми́ преи́скренне взыва́ти ко Го́споду: хлеб наш насу́щный даждь нам днесь. Сохрани́, Пречи́стая Ма́ти, лю́ди Твоя́ от вся́кия ну́жды, боле́зни, гла́да, губи́тельства, гра́да, огня́, от вся́каго зла́го обстоя́ния и вся́каго нестрое́ния. Оби́тели на́шей, дома́м и семе́йствам и вся́кой души́ христиа́нстей и всей стране́ на́шей исхода́тайствуй мир и ве́лию ми́лость, да сла́вим Тя, преми́лостивую пита́тельницу и корми́тельницу на́шу, ны́не и при́сно и во ве́ки веко́в.

КАНОН ПРЕСВЯТЕЙ БОГОРОДИЦЕ ПРЕД ИКОНОЮ ЕЯ, НАРИЦАЕМОЮ ВСЕЦАРИЦА

Тропарь, глас 4:

О́бразом радостотво́рным че́стныя Всецари́цы, / жела́нием те́плым взыска́ющих благода́ти Твоея́, спаси́, Влады́чице; / изба́ви от обстоя́ний к Тебе́ прибега́ющих, / от вся́кия напа́сти огради́ ста́до Твое́, / к заступле́нию Твоему́ взыва́ющее при́сно.

Канон Пресвятыя Богородицы, глас 4.

Песнь 1.

Припев: Пресвята́я Богоро́дице, спаси́ нас.

О, Преблага́я Засту́пнице на́ша, / недоуме́ем песносло́вити Тя по достоя́нию, / оба́че любо́вию понужда́еми, мо́лим Тя: / сподо́би принести́ Ти пе́сни благода́рственныя.

Прииди́те, ве́рнии, / ко всечестно́му о́бразу Богоро́дицы Всецари́цы припаде́м, / обы́мем се́рдцем и лобыза́ем устна́ми, / со умиле́нием моля́щеся Всеми́лостивой Влады́чице.

Слава: От Небе́сных сла́вимая и от земны́х ублажа́емая, / де́вственными добро́тами преиспо́лненная, Пречи́стая Де́во, / приими́ моле́ния на́ша / и при́зри на нас благоуве́тливым взо́ром Твои́м.

И ныне: Ди́вны чудеса́ Твоя́, Го́споди, / я́ко дарова́л еси́ ми́ру пресла́вную Богоотрокови́цу Мари́ю, / от всех родо́в произбра́нную / во спасе́ние ро́да челове́ческаго.

Песнь 3.

Припев: Пресвята́я Богоро́дице, спаси́ нас.

Ты еси́ исто́чник златостру́йный, / ро́су утеше́ния точа́щий / сердца́м скорбя́щим, о Цари́це Де́во. / Ободри́ ны в час испыта́ния, / от отча́яния изба́ви и сле́зы претвори́ / в ро́су небе́сныя ра́дости.

Мо́лим Тя о сро́дницех на́ших, Госпоже́ Всецари́це, / исцели́ неду́ги неисце́льныя, / уста́ви ра́ковыя я́звы стуже́ние, / терпе́ние неистощи́мое стра́ждущим да́руй / и вода́ми покая́ния омы́й сердца́ их.

Слава: Любы́ Твоя́, о Богома́ти, я́коже огнь небе́сный, / да зате́плит в сердца́х на́ших / светлосия́нныя свети́льники моли́твы и любве́.

И ныне: О Всесве́тлая Влады́чице, / покры́й нас честны́м Твои́м омофо́ром и светоно́сными благода́ти луча́ми / отжени́ те́мный о́блак печа́лей на́ших.

Го́споди, поми́луй, трижды.

Седален, глас 8:

Днесь пра́зднуем прише́ствие честна́го о́браза Твоего́, Ма́ти Бо́жия, / к нему́же с ве́рою припа́даем, Всеблаже́нная, и мо́лим Тя: / посети́ су́щия в боле́знех и печа́лех / и покры́й от бед и зол рабы́ Твоя́.

Песнь 4.

Припев: Пресвята́я Богоро́дице, спаси́ нас.

В зно́и неисце́льных боле́зней стра́ждущим / одожди́ ка́пли небе́снаго милосе́рдия Твоего́, Пречи́стая, / и благода́ти прохла́дою услади́ ду́ши изнемога́ющия.

Купина́ Тя неопа́льная проо́бразоваше, о Цари́це Де́во, / и́бо не опали́ Твое́ чре́во огнь Божества́. / Те́мже мо́лим Тя: / огня́ ве́чнующаго изба́ви ны.

Слава: Ты от свята́го А́нгела пи́щу небе́сную прие́млющи, / под се́нию хра́ма Госпо́дня пребыва́ла еси́, Де́во нетле́нная, / напита́й у́бо и нас животворя́щим Хле́бом Небе́сным, / Пречи́стым Те́лом и Боже́ственною Кро́вию Христа́, Спа́са на́шего.

И ныне: Ра́дуйся, Богоизбра́нная Отрокови́це, / одушевле́нный хра́ме, черто́же Сло́ва Бо́жия, / во святы́й храм во младе́нческих ле́тех введе́нная и та́мо воспита́нная. / Те́мже мо́лим Тя: / научи́ ны ко хра́му Бо́жию прилежа́ти / и сподо́би Святы́х Та́ин в снабде́ние душ на́ших причаща́тися. / Та́кожде по кончи́не на́шей благоволи́ отве́рсти нам две́ри ра́йския / и введи́ нас в Небе́сный храм Сы́на Твоего́.

Песнь 5.

Ирмос: Ужасо́шася вся́ческая / о Боже́ственней сла́ве Твое́й: / Ты бо, неискусобра́чная Де́во, / име́ла еси́ во утро́бе над все́ми Бо́га / и родила́ еси́ безле́тнаго Сы́на, / всем воспева́ющим Тя / мир подава́ющая.

Припев: Пресвята́я Богоро́дице, спаси́ нас.

О, Всеблаже́нная Богома́ти, согреша́ющих исправле́ние, / умягчи́ изсо́хшую зе́млю серде́ц на́ших, / да прие́мше семена́ сло́ва Бо́жия, / плоды́ досто́йныя принесе́м Влады́це Христу́.

Поги́бших Ты еси́ взыска́ние, Присноде́во Мари́е, / и хода́таица о нас к Сы́ну Твоему́ и Бо́гу, / Ты еси́ приста́нище спаси́тельное / обурева́емым в мо́ре жите́йстем и погружа́емым напа́стьми мно́гими.

Слава: То́ками благода́ти, / чрез святы́й о́браз Твой, Всецари́це, на нас излива́емыми, / омы́й на́ших грехо́в скве́рну и угаси́ страсте́й пещь, / да обря́щем чистоту́ серде́чную / и да уневе́стим ду́ши Христу́, Спа́су на́шему.

И ныне: О, ра́дуйся, всепе́тая Цари́це! / Зарю́, наставля́ющую к све́ту, возсия́й душа́м на́шим, / ро́ждшая Со́лнце пра́вды Христа́, / ра́дость и спасе́ние ми́ру.

Песнь 6.

Припев: Пресвята́я Богоро́дице, спаси́ нас.

Не возгнуша́йся нас многогре́шных, / о сладкоуха́нный кри́не чистоты́, / отжени́ от нас плотско́е мудрова́ние, / уста́ви молву́ лука́вых помышле́ний / и сподо́би доброде́телей благоуха́ние Творцу́ вы́ну приноси́ти.

Помози́ нам, Богоневе́сто, / смире́н нрав стяжа́ти, всегда́ ра́доватися, / за вся Творца́ благодари́ти, и непреста́нно моли́тися / ко Христу́, Спаси́телю на́шему, научи́ ны.

Слава: Прише́ствием ико́ны Твоея́ озаря́еми, / мо́лим Тя, Всецари́це, / бу́ди нам гре́шным спору́чница, / на стези́ спаси́тельныя наста́ви, / побори́ борю́щия ны / и побе́ду непобеди́мую во бране́х да́руй.

И ныне: О, чи́стая Голуби́це, нескве́рная А́гнице, / А́гнца и Па́стыря неизрече́нно ро́ждшая, / вои́стину Ты еси́ а́нгельских чино́в превы́сшая, / умоли́ о нас Боже́ственнаго Сы́на Твоего́.

Го́споди, поми́луй, трижды. Сла́ва, и ны́не:

Кондак, глас 8:

Новоявле́нней Твое́й ико́не, предстоя́ще ве́рнии уми́льно, / воспева́ем Ти, Всецари́це, раби́ Твои́; / низпосли́ цельбы́ к Тебе́ притека́ющим ны́не рабо́м Твои́м, / да вси ра́достно зове́м Ти: ра́дуйся, Всецари́це, / неду́ги на́ша благода́тию исцеля́ющая.

Икос: А́нгел предста́тель с небесе́ сшед, / рече́ Всецари́це: ра́дуйся! / И боговеща́нным гла́сом воплоща́ема Тя зря, Го́споди, / возопи́ к Ней такова́я: / ра́дуйся, глави́зно на́шего спасе́ния, / ра́дуйся, исполне́ние Зижди́телева смотре́ния, / ра́дуйся, я́ко Тобо́ю Бог воплоти́ся, / ра́дуйся, я́ко Неви́димый в Тебе́ изобрази́ся, / ра́дуйся, ми́лость ми́ра внутрь прия́вшая, / ра́дуйся, одея́ние пло́ти Сло́ву сотка́вшая, / ра́дуйся, уму́ непости́жная го́рняя сла́во, / ра́дуйся, сердца́ оживи́вшая небе́сная ма́нно, / ра́дуйся, звездо́, благода́ти сия́ние, / ра́дуйся, исто́чниче, живы́я воды́ излия́ние, / ра́дуйся, Богоро́дице, в жена́х благослове́нная, / ра́дуйся, ро́ждшая Спа́са, Де́во нетле́нная, / ра́дуйся, Всецари́це, / неду́ги на́ша благода́тию исцеля́ющая.

Песнь 7.

Припев: Пресвята́я Богоро́дице, спаси́ нас.

Сподо́би ны, преблага́я Богороди́тельнице, / пресла́вное и́мя Иису́сово умо́м и се́рдцем призыва́ти / и се́ю моли́твою услади́ го́речь печа́лей и скорбе́й на́ших.

Притецы́те, вси здра́вия и́щущие, / ко благосе́рдой Де́ве Мари́и Богоро́дице / и почерпи́те во́ду жи́зни от исто́чника спаси́тельнаго.

Слава: Благослове́н еси́, Го́споди Иису́се Христе́, Спаси́телю наш, / я́ко в час кре́стных страда́ний Твои́х / благоволи́л еси́ поручи́ти ны заступле́нию Пречи́стыя Ма́тере Твоея́ / и нас недосто́йных ча́дами Ея́ соде́лал еси́.

И ныне: Ра́дуйся, одушевле́нная Пала́то Божества́, / еди́на неискусому́жная Де́во Мари́е, / во утро́бу неискусобра́чную Бо́га вмести́вшая. / С Гаврии́лом Арха́нгелом вопие́м Ти: / благослове́нна Ты в жена́х и благослове́н Плод чре́ва Твоего́.

Песнь 8.

Припев: Пресвята́я Богоро́дице, спаси́ нас.

О Богома́ти Всецари́це, / просвети́ ны позна́нием Сы́на Твоего́, да насле́дствуем Ца́рствие Небе́сное / и да восхва́лим и воспое́м Го́спода / и превозно́сим Его́ во вся ве́ки.

В не́мощи на́шей да соверша́ется си́ла Бо́жия, / исцеля́ющая ду́ши и телеса́ на́ша / и ве́чное спасе́ние нам да́рующая. / Те́мже сподо́би ны, Госпоже́, / со благодаре́нием терпе́ти вся посыла́емая нам / и Твои́ми те́плыми моли́твами к Боже́ственному Сы́ну Твоему́ / исхода́тайствуй нам благода́тную по́мощь.

Слава: Умири́ сердца́ на́ша / и в тишине́ по́мысла соблюди́, Всесвята́я Ма́ти Де́во, / да моля́щеся на вся́ко вре́мя ду́хом, Го́спода благослови́м / и превозно́сим Его́ во вся ве́ки.

И ныне: Во успе́нии ми́ра не оста́вила еси́, о Богома́ти, / но при́сно с на́ми пребыва́еши / и предста́тельством Твои́м нас спаса́еши.

Песнь 9.

Припев: Пресвята́я Богоро́дице, спаси́ нас.

О, Цари́це Де́во, / ра́ковыя я́звы преди́вная Цели́тельнице, / яви́ Свое́ благоволе́ние в долгонеду́жии су́щим / и пода́ждь им здра́вие, / да воспева́ют вы́ну Тя, всеблага́я Ма́ти Бо́жия.

Виждь, Влады́чице, на́ше неможе́ние, / оба́че приими́ смире́нная моле́ния на́ша, / бу́ди нам блага́я путеводи́тельница ко спасе́нию / и наста́ви ны путе́м те́сным ше́ствовати к простра́нству жи́зни ве́чныя. / Мы же не преста́нем благодаря́ще велича́ти Тя.

Слава: О, Ма́ти милосе́рдия и утеше́ния, / уще́дри ны неизрече́нною Твое́ю благосты́нею / и благослови́ ны те́пле воспева́ющия Тя.

И ныне: Вси ро́ди христиа́нстии / ублажа́ют Тя, Богороди́тельнице Пречи́стая, / я́ко призре́ Госпо́дь на смире́ние Твое́ / и сотвори́ Ти вели́чие неисповеди́мое.

Светилен:

Све́тел есть честны́й пра́здник ико́ны Твоея́, Всецари́це, / его́же в торжестве́ духо́внем благоле́пно соверша́юще, велича́ем Тя, / о светоно́сная ски́ние Христа́, Царя́ и Бо́га на́шего.

Молитва первая:

О всеблага́я, досточу́дная Богоро́дице, Пантана́сса, Всецари́це! Несмь досто́ин да вни́деши под кров мой, но я́ко ми́лостиваго Бо́га любоблагоутро́бная Ма́ти, рцы сло́во, да исцели́тся душа́ моя́ и укрепи́тся немощству́ющее те́ло мое́. И́маши бо держа́ву непобеди́мую и не изнемо́жет у Тебе́ всяк глаго́л, о Всецари́це! Ты за мя упроси́, Ты за мя умоли́, да прославля́ю пресла́вное и́мя Твое́ всегда́, ны́не и в бесконе́чныя ве́ки. Ами́нь.

Молитва вторая:

О Пречи́стая Богома́ти, Всецари́це! Услы́ши многоболе́зненное воздыха́ние на́ше пред чудотво́рною ико́ною Твое́ю, из уде́ла Афо́нскаго в Росси́ю принесе́нною, при́зри на чад Твои́х, неисце́льными неду́ги стра́ждущих, ко свято́му о́бразу Твоему́ с ве́рою припа́дающих! Я́коже пти́ца крило́ма покрыва́ет птенцы́ своя́, та́ко и Ты ны́не, при́сно жива́ су́щи, покры́й нас многоцеле́бным Твои́м омофо́ром, терпе́нием и осла́бою яви́ся; та́мо, иде́же наде́жда исчеза́ет, несумне́нною наде́ждою бу́ди; та́мо, иде́же лю́тыя ско́рби превозмога́ют; та́мо, иде́же мрак отча́яния в души́ всели́ся, да возсия́ет неизрече́нный свет Божества́! Малоду́шных уте́ши, немощны́я укрепи́, ожесточе́нным сердца́м умягче́ние и просвеще́ние да́руй. Исцели́ боля́щия лю́ди Твоя́, о Всеми́лостивая Цари́це! Ум и ру́ки врачу́ющих нас благослови́, да послу́жат ору́дием всемо́щнаго Врача́, Христа́ Спа́са на́шего. Я́ко живе́й Ти, су́щей с на́ми, мо́лимся пред ико́ною Твое́ю, о Влады́чице! Простри́ ру́це Твои́, испо́лненныя исцеле́ния и врачбы́, ра́досте скорбя́щих, в печа́лех утеше́ние, да чудотво́рную по́мощь ско́ро получи́в, прославля́ем живонача́льную неразде́льную Тро́ицу, Отца́, Сы́на, и Свята́го Ду́ха во ве́ки веко́в. Ами́нь.

КАНОН СВЯТЫМ НЕБЕСНЫМ СИЛАМ

Тропарь, глас 4:

Небе́сных во́инств Архистрати́зи, / мо́лим вас при́сно мы, недосто́йнии, / да ва́шими моли́́твами оградите́ нас / кро́вом крил невеще́ственныя ва́шея сла́вы, / сохраня́юще ны, припа́дающия приле́жно и вопию́щия: / от бед изба́вите ны, / я́ко чинонача́льницы Вы́шних сил.

Канон Безплотных, творение Иоанна монаха, глас 8.

Песнь 1.

Ирмос: Песнь возсле́м, лю́дие, / чу́дному Бо́гу на́шему, / свободи́вшему Изра́иля от рабо́ты, / песнь побе́дную пою́ще и вопию́ще: / пои́м Тебе́, Еди́ному Влады́це.

Припев: Святи́и Арха́нгели и А́нгели, моли́те Бо́га о нас.

Вси воспои́м, ве́рнии, / вся управля́ющую невеще́ственныя Го́рних лико́в чинонача́лия, Тро́ицу несозда́нную: / Свят, Свят, Свят еси́, вопию́ще, Бо́же Вседержи́телю.

Положи́л еси́ тва́рей Нача́ло, существо́ Безпло́тное, Тво́рче А́нгелов, / пречи́стый Твой Престо́л окружа́ющее, зва́ти Тебе́: / Свят, Свят, Свят еси́, Бо́же Вседержи́телю.

Слава: Ра́дуйся, Гаврии́ле, тайнови́дче Бо́жия воплоще́ния, / Михаи́ле же, чино́в невеще́ственных первостоя́телю, непреста́нно зову́ще: / Свят, Свят, Свят еси́, Бо́же Вседержи́телю.

И ныне: Трепе́щу та́инства, Христе́, Твоего́ снизхожде́ния, / я́ко И́же естество́м Бог, прия́л еси́ от Де́вы роди́тися я́ко Челове́к, / да спасе́ши мир от рабо́ты проти́внаго.

Песнь 3.

Ирмос: Страх Твой, Го́споди, / всади́ в сердца́ раб Твои́х / и бу́ди нам утвержде́ние, / Тя во и́стине призыва́ющих.

Припев: Святи́и Арха́нгели и А́нгели, моли́те Бо́га о нас.

Кре́постию поста́вил еси́, Безсме́ртне, си́льныя, / соверша́ющия всесвяту́ю Твою́ во́лю, / Тебе́ в вы́шних всегда́ предстоя́щия.

Таи́нники Твоего́ вочелове́чения и честна́го воста́ния, / А́нгельския чинонача́льники, Христе́, за ны приими́ моля́щияся.

Слава: А́нгелы приста́вил еси́ храни́тели челове́ком, я́ко Благоутро́бен, / служи́тели же показа́л еси́, Христе́, спасе́ния Твои́х уго́дников.

И ныне: Неизрече́нно зачала́ еси́ Го́спода и Спа́са Богоневе́сто, / избавля́ющаго ны от лю́тых, Тя вои́стинне призыва́ющия.

Го́споди, поми́луй, трижды.

Седален, глас 8. Подобен: Повеленное:

Небе́сных нача́льницы и первостоя́телие высокопресто́льных и стра́шных / Боже́ственныя сла́вы Михаи́ле и Гаврии́ле Архистрати́зи, / А́нгелов чинонача́льницы, со всеми Безпло́тными, / о служи́телие Влады́чни! / О ми́ре непреста́нно моля́щеся, / испроси́те оставле́ние прегреше́ных на́ми, / и ми́лость, и благода́ть обрести́ в день су́дный.

Слава, и ныне, Богородичен: Богоблагода́тная, Чи́стая, Благослове́нная, / благоутро́бия ра́ди ще́дрот из Тебе́ Ро́ждшагося / с вы́шними Си́лами, и Арха́нгелы, и всеми Безпло́тными моли́ непреста́нно / пода́ти нам пре́жде конца́ ми́лостивно проще́ние грехо́в / и жития́ исправле́ние, я́ко да обря́щем ми́лость.

Песнь 4.

Ирмос: Всел еси́ на ко́ни, апо́столы Твоя́, Го́споди, / и прия́л еси́ рука́ма Твои́ма узды́ их, / и спасе́ние бысть ежде́ние Твое́ / ве́рно пою́щим: / сла́ва си́ле Твое́й, Го́споди.

Припев: Святи́и Арха́нгели и А́нгели, моли́те Бо́га о нас.

Всел еси́ на А́нгелы, я́коже на ко́ни, Человеколю́бче, / и прия́л еси́ руко́ю Твое́ю брозды́ их, / и спасе́ние бысть ежде́ние Твое́ непреста́нно вопию́щим: / сла́ва си́ле Твое́й, Го́споди.

Покрыва́ет А́нгелы доброде́тель Твоя́, Человеколю́бче, / и земли́ исполня́ет концы́ Твоего́ сла́внаго, Безнача́льне, Боже́ственнаго хвале́ния, / с ни́ми Тебе́ вопию́щия: / сла́ва си́ле Твое́й, Го́споди.

Слава: Изше́л еси́, Ще́дре, на спасе́ние люде́й Твои́х, Христе́, / созыва́еши же дру́ги, Си́лы Твоя́, / и весе́лие бысть прише́ствие Твое́ ве́рно Тебе́ вопию́щим: / сла́ва си́ле Твое́й, Го́споди.

И ныне: Де́ва и Ма́ти преесте́ственно яви́лася еси́, Всечи́стая, / я́ко Бо́га, Того́жде и Челове́ка Христа́, ро́ждшая. / Ему́же со стра́хом вопию́т А́нгельския чи́ни: / сла́ва си́ле Твое́й, Го́споди.

Песнь 5.

Ирмос: От но́щи неве́дения / по душелови́тельному пути́ при́сно блудя́щаго, / све́том ра́зума Твоего́, Го́споди, преднаставля́я мя, / на стезю́ за́поведей Твои́х напра́ви.

Припев: Святи́и Арха́нгели и А́нгели, моли́те Бо́га о нас.

Невозвра́тным жела́нием при́сно к высоте́, / к Тебе́, Христе́, носи́ми, кра́йнейшему всех жела́ний, / А́нгельския си́лы непреста́нно Тя сла́вят.

Ты у́мныя по существу́, нетле́нныя благода́тию Твое́ю, Христе́, / устро́ил еси́ песнопе́вцы Твоего́ вели́чества, / А́нгелы Твоя́, по о́бразу соде́лав, Непостижи́ме.

Слава: Ты непрекло́нны на го́ршее к Тебе́ приближе́нием, Христе́, / сохрани́л еси́ Твоя́ слуги́, / исто́чник бо бла́гости Ты еси́, / благотвори́ши досто́йно Тебе́ служа́щия.

И ныне: Умерщвле́нную мою́ ду́шу страстьми́ ме́рзкими, Всенепоро́чная оживи́, / жи́зни Храни́теля ро́ждшая, / и к стези́ ве́чней, и блаже́нней жи́зни упра́ви.

Песнь 6.

Ирмос: Ио́ну в ки́те, Го́споди, / еди́наго всели́л еси́, / мене́ же, свя́заннаго мре́жами вра́жиими, / я́ко от тли о́наго спаси́.

Припев: Святи́и Арха́нгели и А́нгели, моли́те Бо́га о нас.

Боголе́пне от не су́щих, Го́споди, / сло́вом Твои́м приве́л еси́ существа́ Небе́сных безсме́ртных во́инств, / светови́дны ты́я соде́ловая.

Таи́нницы честни́и Бо́жия хвале́ния бы́сте Безпло́тнии, / гра́ждане Небе́сныя и Боже́ственныя и́стинно ски́нии, / Творцу́ досто́йно служа́ще.

Слава: Безпло́тных чи́ни у́мнии / Тя, Сы́не Бо́жий пребезнача́льный, хва́лят непреста́нно / и славосло́вят, я́ко Творца́ и Созда́теля вся́ческих.

И ныне: Со Отце́м в вы́шних, Пречи́стая, безнача́льне седя́щаго, / на объя́тиих Твои́х восклони́ти сподо́билася еси́: / Его́же нам пода́ждь, Чи́стая, рабо́м Твои́м, Ми́лостива.

Го́споди, поми́луй, трижды. Сла́ва, и ны́не:

Кондак, глас 2:

Архистрати́зи Бо́жии, / служи́телие Боже́ственныя сла́вы, / А́нгелов нача́льницы и челове́ков наста́вницы, / поле́зное нам проси́те и ве́лию ми́лость, / я́ко Безпло́тных Архистрати́зи.

Икос: Рекл еси́, Человеколю́бче, в писа́ниих Твои́х / мно́жеству ра́доватися А́нгелов на Небеси́ / о челове́це еди́ном ка́ющемся, Безсме́ртне. / Те́мже мы, и́же в беззако́ниих, Безгре́шне, / еди́не Сердцеве́дче, / Тя моли́ти всегда́ дерза́ем, я́ко Благоутро́бнаго, / уще́дрити и низпосла́ти недосто́йным умиле́ние, Влады́ко, / подая́й нам проще́ние: / о всех бо нас мо́лятся Тебе́ Безпло́тных Архистрати́зи.

Песнь 7.

Ирмос: О́троцы евре́йстии в пещи́ / попра́ша пла́мень дерзнове́нно / и на ро́су огнь преложи́ша, вопию́ще: / благослове́н еси́, Го́споди Бо́же, во ве́ки.

Припев: Святи́и Арха́нгели и А́нгели, моли́те Бо́га о нас.

Све́ты яви́л еси́, Ще́дре, А́нгелов Твои́х невеще́ственное существо́, / неизрече́ннаго све́та исполня́еми непреста́нно, / благослове́н еси́, зову́щия, Бо́же во ве́ки.

Ему́же предстоя́т непреста́нно, служа́ще тьмы А́нгелов, / ли́ца же зре́ти не терпя́т зре́ния, / благослове́н еси́, зову́ще, Го́споди Бо́же, во ве́ки.

Слава: Сло́вом Твои́м Ипоста́сным А́нгельское естество́ соде́лал еси́, / освяти́в же Боже́ственным Ду́хом, / Тро́ицу Богосло́вити научи́л еси́, Бо́же, во ве́ки.

И ныне, Троичен: Три у́бо, у́мствующе Ипоста́си, неопи́санное сла́вим Существо́, / Отца́, Сло́ва со Ду́хом, вопию́ще: / благослове́н еси́, Го́споди Бо́же, во ве́ки.

Песнь 8.

Ирмос: На горе́ святе́й просла́вльшася, / и в купине́ огне́м Присноде́вы Моисе́ови та́йну я́вльшаго, / Го́спода по́йте / и превозноси́те во вся ве́ки.

Припев: Святи́и Арха́нгели и А́нгели, моли́те Бо́га о нас.

А́нгельскому поревну́им житию́, и мы́сли впери́м к высоте́, / и с ни́ми невеще́ственно воспои́м Го́спода, / пою́ще и превознося́ще во вся ве́ки.

Лико́вственницы ликова́ния Небе́снии, / Престо́л обстоя́ще сла́вы, / о́крест Бо́га же всегда́ обраща́ющеся, / А́нгели пою́т и превозно́сят Его́ во вся ве́ки.

Слава: Невеще́ственнаго огня́ творя́щей пла́мень, / на высоте́ непреста́нно служа́щия, и А́нгелы ду́хи явля́ющей, / Тро́ице покланя́емся и славосло́вим во вся ве́ки.

И ныне: Ему́же на Небеси́ предстоя́т с тре́петом тьмы А́нгел и Арха́нгел, / Того́ на объя́тиих носи́ти сподо́билася еси́, Богоро́дице, / моли́ спасти́ся славосло́вящим Его́ во вся ве́ки.

Песнь 9.

Ирмос: Уста́вы прешла́ еси́ естества́, / Соде́теля заче́нши и Го́спода, / и дверь спасе́ния ми́рови была́ еси́. / Тем Тя, Богоро́дице, / непреста́нно велича́ем.

Припев: Святи́и Арха́нгели и А́нгели, моли́те Бо́га о нас.

Тя, неизрече́нно соедини́вшаго Небе́сным, Христе́, земна́я / и еди́ну Це́рковь соверши́вша А́нгелов и челове́ков, / непреста́нно велича́ем.

А́нгели же и Арха́нгели, / Престо́ли, Вла́сти и Госпо́дьства, / Нача́ла же и Си́лы, Херуви́ми и Серафи́ми, / с Богоро́дицею о ми́ре моли́теся.

Слава: Всех предста́телие показу́ющиися, Михаи́л с Гаврии́лом, / посети́те от любве́ чту́щия всепра́зднственную па́мять ва́шу и ве́рно воспева́ющия: / спаса́йте от вся́каго обстоя́ния.

И ныне: Ра́дуйся, свята́я Богоневе́сто! / Ра́дуйся, Свет ми́ру ро́ждшая ве́рным! / Ра́дуйся, стено́ и покро́ве всех нас: / Бо́га, я́ко Благоде́теля за ны непреста́нно моли́.

Светилен. Подобен: Духом во святилищи:

О́гненных, Архистрати́же, слуг предста́тельство от Отца́ прия́л еси́ Михаи́ле, све́тов, / тем и сия́ние Того́ сла́вы сия́ющее и́маши, / окру́г пречи́стаго Престо́ла ты предстоя́, / я́ко пе́рвый Невеще́ственных чино́в.

Слава, подобен: Со ученики: Невеще́ственных Сил, Арха́нгел и А́нгел, / Госпо́дьств, и Престо́л, и Нача́л предста́тель пред Бо́гом постоя́нный, / Архистрати́же Боже́ственне, Михаи́ле пресла́вне, / нестерпи́мому бо Престо́лу предстоя́й, / покры́й, соблюди́, сохрани́ и спаси́ вся, ве́рою тя почита́ющия, / мирска́го предста́теля.

И ныне, Богородичен: Честне́йшая еси́ Херуви́м сла́вных и Серафи́м, Всепе́тая, / стра́шных без сравне́ния сла́внейшая / и всех святы́х А́нгел святе́йшая, Пречи́стая: / Зижди́теля бо всех пло́тски неизрече́нно родила́ еси́, Богоро́дице. / Его́же моли́ рабо́м Твои́м разреше́ние дарова́ти прегреше́ний.

Молитва всем чинам Ангельским:

Вси святи́и Небе́сные беспло́тные Си́лы, удосто́йте меня́ си́лы сокруша́ть все зло и стра́сти под но́ги мои́. Святи́и беспло́тные Серафи́мы, удосто́йте меня́ име́ть пламене́ющее се́рдце к Бо́гу. Святи́и беспло́тные Херуви́мы, удосто́йте меня́ име́ть прему́дрость для сла́вы Бо́жией. Святи́и беспло́тные Престо́лы, удосто́йте меня́ различа́ть и́стину от непра́вды. Святи́и беспло́тные Го́сподства, удосто́йте меня́ госпо́дствовать над страстя́ми, что́бы дух поработи́л плоть. Святи́и беспло́тные Си́лы, удосто́йте меня́ име́ть му́жество в исполне́нии во́ли Бо́жией. Святи́и беспло́тные Вла́сти, удосто́йте меня́ име́ть си́лу побе́ды над злом. Святи́и беспло́тные Нача́ла, удосто́йте меня́ служи́ть Го́споду Бо́гу в непоро́чности се́рдца и дел рук мои́х. Святи́и беспло́тные Арха́нгелы, удосто́йте меня́ исполня́ть во́лю Го́спода на́шего на́шего Иису́са Христа́. Святи́и беспло́тные А́нгелы, удосто́йте меня́ руково́дствоваться за́поведями Бо́жиими во все дни жи́зни мое́й.

Молитва всем святым и безплотным Небесным Силам:

Бо́же Святы́й и во святы́х почива́яй, трисвяты́м гла́сом на Небеси́ от А́нгел воспева́емый, на земли́ от челове́к во святы́х Свои́х хва́лимый; да́вый Святы́м Твои́м Ду́хом коему́ждо благода́ть по ме́ре дарова́ния Христо́ва, и то́ю поста́вивый Це́ркви Твое́й святе́й о́вы Апо́столы, о́вы проро́ки, о́вы же благове́стники, о́вы па́стыри и учи́тели, и́хже сло́вом про́поведи, Тебе́ Самому́ де́йствующему вся во всех, мно́зи соверши́шася святи́и в ко́емждо ро́де и ро́де, разли́чными доброде́тельми благоугоди́вшии Тебе́, и к Тебе́, нам о́браз до́брых по́двигов свои́х оста́вивше, в ра́дости преше́дшии, гото́ви, в не́мже са́ми искуше́ни бы́ша, и нам напа́ствуемым помога́ти. Сих святы́х всех воспомина́я и их богоуго́дное похваля́я житие́, Тебе́ Самаго́ в них де́йствовавшаго восхваля́ю и о́нех благотворе́ния Твоя́ дарова́ния бы́ти ве́руя, приле́жно молю́ Тя, Свя́те святы́х, даждь ми, гре́шному, после́довати их уче́нию, житию́, любве́, ве́ре, долготерпе́нию, и их моли́твенною по́мощию, па́че же Твое́ю вседе́йствующею благода́тию, небе́сныя с ни́ми сподо́битися сла́вы, хва́ляще Пресвято́е и́мя Твое́, Отца́ и Сы́на и Свята́го Ду́ха во ве́ки. Ами́нь.

КАНОН СВЯТОМУ АРХИСТРАТИГУ БОЖИЮ МИХАИЛУ

Тропарь, глас 4:

Небе́сных во́инств Архистрати́же, / мо́лим тя при́сно мы, недосто́йнии, / да твои́ми моли́твами огради́ши нас / кро́вом крилу́ невеще́ственныя твоея́ сла́вы, / сохраня́я нас, припа́дающих приле́жно и вопию́щих: / от бед изба́ви нас, / я́ко чинонача́льник Вы́шних Сил.

Канон Архангела, глас 4.

Песнь 1.

Припев: Святы́й Архистрати́же Бо́жий Михаи́ле, моли́ Бо́га о нас.

Боже́ственными светлостьми́ облистава́емь всегда́, / ум мой озари́, е́же воспе́ти тя, Архистрати́же го́рних во́инств, / всех утвержде́ние притека́ющих к тебе́.

Ум Пребезнача́льный, / преми́рнаго чинонача́льника показа́ чи́на тя, пресла́вне Архистрати́же, / и свет су́щих во тьме, и Боже́ственное украше́ние Це́ркве Своея́.

Слава: Умо́в предворя́я Небе́сных в Ду́се, / до́льним же всеизря́днейшее Михаи́ле, да́лся еси́ огражде́ние, и утвержде́ние, / и ору́жие, враги́ закала́ющее и потребля́ющее.

И ныне: Де́во Всенепоро́чная, Я́же А́нгелов благоле́пие, челове́ков по́моще, / Ты мне помози́, морепла́вающему / и в бу́ри греха́ при́сно впа́дающу и бе́дствующу.

Песнь 3.

Припев: Святы́й Архистрати́же Бо́жий Михаи́ле, моли́ Бо́га о нас.

Кре́постию боже́ственною, воево́до А́нгелов всехва́льне, / обхо́диши всю зе́млю, от лю́тых ны изыма́я, / призыва́ющия твое́ боже́ственное и́мя.

Я́ко боже́ствен пропове́дник, я́ко предста́тель ве́рных непосты́ден, / заблу́ждших путево́ждь и наказа́тель был еси́, / Бо́жий Архистрати́же богови́днейший.

Слава: Боже́ственнаго сия́ния чи́стшее зерца́ло был еси́, / явле́ния честна́го све́тло прие́м Ду́ха, / Михаи́ле Первоа́нгеле досточу́дне.

И ныне: Невеще́ственныя умы́ Соста́вивый во́лею / в веще́ственное Твое́ чре́во всели́ся хоте́нием, Всенепоро́чная, / пло́тию зримь Незре́нный.

Го́споди, поми́луй, трижды.

Седален, глас 1. Подобен: Лик ангельский:

Лик а́нгельский Архистрати́га име́я, боже́ственнаго Михаи́ла, / с ним Святе́й Тро́ице немо́лчное приноша́ет песнопе́ние, / из не су́щих бо Соде́тель вся́ческих / во́инства огнезра́чных чино́в Сло́вом приведе́.

Слава, и ныне, Богородичен: Упова́ние христиа́н, Пресвята́я Де́во, / Его́же родила́ еси́ Бо́га, па́че ума́ же и сло́ва, / непреста́нно моли́ с вы́шними Си́лами, / пода́ти нам оставле́ние грехо́в на́ших всех и исправле́ние жития́, / ве́рою и любо́вию при́сно Тя славя́щим.

Песнь 4.

Ирмос: Седя́й в сла́ве на Престо́ле Божества́, / во о́блаце ле́гце / прии́де Иису́с Пребоже́ственный / нетле́нною дла́нию / и спасе́ зову́щия: / сла́ва, Христе́, си́ле Твое́й.

Припев: Святы́й Архистрати́же Бо́жий Михаи́ле, моли́ Бо́га о нас.

Ум сый Пе́рвый, соста́вил еси́ боже́ственныя умы́ хоте́нием, / нача́льника посреде́ сих Михаи́ла соде́ла, / всеблаже́нным прича́стием просвеща́ема и у́мными богонача́лии облиста́ема.

Пе́ние свято́е со Престо́лы и Нача́лы, и Си́лами, и Властьми́, / и Свяще́нными Госпо́дьствы возглаша́еши Тро́ице, / пресла́вне Михаи́ле, спаса́я ны пою́щия тя.

Слава: Велича́ем всех Творца́ же и Го́спода, / за благоутро́бие да́вшаго обхране́ние велича́йшее и необори́му сте́ну, и забра́ло, / Михаи́ла нам светоза́рнаго Архистрати́га.

И ныне: Мы́сленно, Де́во, Твоего́ Рождества́ пресла́вное ска́зоваше дре́вле, священноявле́нный / Ду́хом го́ру присе́нную ви́дя Тя ясне́йше, / из Нея́же Святы́й прии́де Бог воплоща́емь.

Песнь 5.

Припев: Святы́й Архистрати́же Бо́жий Михаи́ле, моли́ Бо́га о нас.

Яви́лся еси́ предводя́щ дре́вняго Изра́иля, / повеле́нием Су́щаго из Иа́кова, / челове́ком я́вльшагося дебельство́м те́ла, / Михаи́ле безтеле́сный, А́нгелов Архистрати́же.

Невеще́ственными сия́нии обожа́емь при́сно, прича́стием богонача́льным, / и нам осия́ние светода́тельное подава́еши, / Первоа́нгеле, пресла́вно удивля́емь.

Слава: Украси́ся благода́тию боже́ственный твой храм, / в той бо прише́д, враче́вств пучи́ну его́ показа́л еси́, / Михаи́ле Первоа́нгеле, и страсте́й потреби́теля.

И ныне: У́мных А́нгелов Тя показа́ Бог вы́шшую, / всели́вся в Твоя́ ложесна́, Чи́стая Всенепоро́чная, / Его́же моли́ всегда́, уще́дрити пою́щия Тя.

Песнь 6.

Припев: Святы́й Архистрати́же Бо́жий Михаи́ле, моли́ Бо́га о нас.

Ра́дуется ве́рных мно́жество, благохва́лящее тя, / и сла́вит Всесвята́го Сло́ва, / совоку́пльшаго земны́я со А́нгелы, Михаи́ле, Свое́ю бла́гостию.

Во́инства Изра́илева спасл еси́, явля́яся, / и боже́ственная подая́ повеле́ния, Архистрати́же, / враги́ низложи́л еси́ и в коне́ц сия́ истреби́л еси́.

Слава: Я́ко ви́де тя Иису́с Нави́н, поклони́ся, / вопроси́в честна́го твоего́ и свята́го и́мене, нача́льниче А́нгелов, / благогове́нием и стра́хом держи́мь.

И ныне: Блаже́ни лю́дие, при́сно блажа́щии Тя, Блаже́нная, / я́ко Бо́га Блаже́ннаго ро́ждшая, / земны́я за милосе́рдие неизрече́нным едине́нием обо́жившаго.

Го́споди, поми́луй, трижды. Сла́ва, и ны́не:

Кондак, глас 2. Подобен: Твердыя:

Архистрати́же Бо́жий, / служи́телю Боже́ственныя сла́вы, / А́нгелов нача́льниче и челове́ков наста́вниче, / поле́зное нам проси́ и ве́лию ми́лость, / я́ко Безпло́тных Архистрати́г.

Икос: Рекл еси́, Человеколю́бче, в Писа́ниих Твои́х, / мно́жеству ра́доватися А́нгел на Небеси́ о челове́це еди́ном ка́ющемся, Безсме́ртне. / Те́мже мы, и́же в беззако́нниих, Безгре́шне еди́не Сердцеве́дче, / Тя моли́ти всегда́ дерза́ем, я́ко Благоутро́бнаго, / уще́дрити и низпосла́ти недосто́йным умиле́ние, Влады́ко, подая́й нам проще́ние: / о всех бо нас мо́лится Тебе́ Безпло́тных Архистрати́г.

Песнь 7.

Припев: Святы́й Архистрати́же Бо́жий Михаи́ле, моли́ Бо́га о нас.

Усмотри́в, Дании́л, ви́де купностоя́ща тя, блаже́нне, / и умудря́юща Того́ в Хова́ре, / виде́ние, е́же ви́де, Гаврии́ле молниезра́чне, / Михаи́ла чинонача́льника тому́ явля́юща.

Нача́льник А́нгелов бысть Михаи́л Арха́нгел, / но сла́вится с ним светле́е таи́нник благода́ти и Де́вы обручи́тель честны́й, / воево́да Безпло́тных, досто́йно ра́дость предвозвеща́я, Гаврии́л, вопию́щим: / лю́дие, превозноси́те Христа́ во вся ве́ки.

А́нгелов наста́вники, богови́дныя и светоно́сныя, Михаи́ла и Гаврии́ла, / на́ша благи́я уте́шители, и предста́тели, и храни́тели, / восхва́лим ве́рою велегла́сно.

Слава: Красе́н и всеблаголе́пен, и богови́ден сый, / вождь па́че ума́ невеще́ственных духо́в был еси́, Михаи́ле светоза́рнейше, / с ни́ми у́бо о всех нас моли́ся.

И ныне: Ума́ Вели́каго и́стинно Сло́во Присносу́щное, Де́во, / в Тя неизглаго́ланно и стра́шно всели́вшася ви́дя, / возопи́ Гаврии́л Арха́нгел: / ра́дуйся, Престо́ле Высоча́йшаго, Благослове́нная.

Песнь 8.

Припев: Святы́й Архистрати́же Бо́жий Михаи́ле, моли́ Бо́га о нас.

Мы́сленных безтеле́сных чинонача́льник, моли́твенник челове́ков спаси́телен, / боже́ствен Бо́жий служи́тель, Михаи́ле, показа́лся еси́, поя́ непреста́нно: / вся дела́, благослови́те, по́йте Го́спода.

Свети́льника два всесве́тлая, Михаи́ле и Гаврии́ле Арха́нгели, / Трисве́тлаго Божества́ сия́ньми тварь просвеща́ющии, / лю́тых мглу отгоня́ете.

Слава: Я́ко до́брии ко́рмчии, Арха́нгели, / ко приста́нищу Боже́ственныя во́ли душе́вный кора́бль мой спаса́йте, / от бу́ри грехо́в па́дший и бе́дствующий.

И ныне: Невестокраси́тель боже́ственный Арха́нгел, предста́в, / приглаша́ше Тебе́, е́же ра́дуйся, Неве́сто Бо́жия Безневе́стная, / А́нгелов сла́во и челове́ков спасе́ние и огражде́ние.

Песнь 9.

Припев: Святы́й Архистрати́же Бо́жий Михаи́ле, моли́ Бо́га о нас.

Се благоле́пие твоего́, Арха́нгеле, боже́ственнаго хра́ма, / осия́ющее, светоза́рным твои́м прису́тствием, чуде́с мо́лнии испуща́ет / и тьмы неду́гов всегда́ отгоня́ет Боже́ственною благода́тию.

Я́ко дво́ица прекра́сная и светоле́пная су́ще, / Влады́чним повеле́нием су́щим на земли́ слу́жите, Михаи́ле пресла́вне и Гаврии́ле досточу́дне, / от лю́тых изыма́юще и всем просвеще́ние посыла́юще / спаси́тельное Боже́ственным Ду́хом.

Днесь ра́дуются с на́ми безтеле́снии боже́ственнии у́ми, / воспева́ема, ви́дяще сего́ от всех, вели́каго и све́тлаго Архистрати́га, / и любо́вию с на́ми пра́зднуют, Жизнода́вца велича́юще.

Слава: Боже́ственная дво́ице и светоза́рна, / Арха́нгели Михаи́ле всече́стне и Гаврии́ле препросла́вленне, / Тро́ице Честне́й предстоя́ще, прегреше́ний вины́ и му́ки хва́лящия вас изба́вите.

И ныне: Глас боже́ственнаго Гаврии́ла прино́сим Тебе́ ра́достно, Всечи́стая, и взыва́ем: / ра́дуйся ра́ю, посреде́ дре́во жи́зни име́яй, / ра́дуйся Бо́га Сло́ва жили́ще и черто́же, / ра́дуйся воззва́ние Ада́ма и всего́ ро́да челове́ча.

Светилен, глас 8:

Я́коже дре́вле погрузи́л еси́ реки́ безчи́нная ше́ствия и шуме́ния, Архистрати́же сла́вы, / та́ко и ны́не, Арха́нгеле, язы́ков горды́ню и де́монов свере́пства потреби́, / я́ко да по до́лгу тя чтим в пе́снех досто́йно.

Слава, и ныне, Богородичен: Почита́ют Рождество́ Твое́ безпло́тных чи́ни: / ра́дости бо земна́я Ты напо́лнила еси́ еди́на. / Тем Тя, Всенепоро́чную, ве́рнии, сла́вим, в пе́ниих славосло́вяще, / Свет бо су́щим во тьме возсия́ла еси́, / я́ко у́тренний возсия́вший день.

Молитва первая:

Святы́й и вели́кий Арха́нгеле Бо́жий Михаи́ле, неисповеди́мыя и пресу́щественныя Тро́ицы пе́рвый во А́нгелех предстоя́телю, ро́да же челове́ческаго приста́вниче и храни́телю, сокруши́вый с во́инствы свои́ми главу́ прего́рдаго денни́цы на небеси́ и посрамля́яй вы́ну зло́бу и кова́рства его́ на земли́. К тебе́ прибега́ем с ве́рою и тебе́ мо́лимся с любо́вию: бу́ди щит несокруши́м и забра́ло тве́рдо святе́й Це́ркви и правосла́вному Оте́чествию на́шему, огражда́я их молниено́сным мече́м твои́м от всех враг, ви́димых и неви́димых. Не оста́ви же, о Арха́нгеле Бо́жий, по́мощию и заступле́нием твои́м и нас, прославля́ющих днесь свято́е и́мя твое́: се бо, а́ще и многогре́шни есмы́, оба́че не хо́щем в беззако́ниих на́ших поги́бнути, но е́же обрати́тися ко Го́споду и оживле́нным бы́ти от Него́ на дела́ блага́я. Озари́ у́бо ум наш све́том лица́ Бо́жия, и́же вы́ну сия́ет на молниеви́днем челе́ твое́м, да возмо́жем разуме́ти, что есть во́ля Бо́жия о нас, блага́я и соверше́нная, и ве́дети вся, я́же подоба́ет нам твори́ти и я́же презира́ти, и оставля́ти. Укрепи́ благода́тию Госпо́днею сла́бую во́лю и немощно́е произволе́ние на́ше, да утверди́вшеся в зако́не Госпо́днем, преста́нем про́чее вла́ятися земны́ми по́мыслы и похоте́нии пло́ти, увлека́ющеся по подо́бию несмы́сленных дете́й скороги́бнущими красо́тами ми́ра сего́, я́ко ра́ди тле́ннаго и земна́го безу́мне забыва́ти ве́чная и небе́сная. Над все́ми же си́ми испроси́ нам свы́ше дух и́стиннаго покая́ния, нелицеме́рную печа́ль по Бо́зе и сокруше́ние о гресе́х на́ших, да остаю́щее нам число́ дний вре́меннаго живота́ на́шего иждиве́м не во угожде́нии чувств и рабо́те страсте́м на́шим, но во изглажде́нии зол, соде́янных на́ми, слеза́ми ве́ры и сокруше́ния серде́чнаго, по́двигами чи́стоты и святы́ми дела́ми милосе́рдия. Егда́ же прибли́зится час оконча́ния на́шего, освобожде́ния от уз бре́ннаго сего́ телесе́, не оста́ви нас, Арха́нгеле Бо́жий, беззащи́тных проти́ву духо́в зло́бы поднебе́сных, обы́кших прегражда́ти душе́ челове́честей восхо́д в го́рняя, да, охраня́еми тобо́ю, безпреткнове́нне дости́гнем о́ных пресла́вных селе́ний ра́йских, иде́же несть печа́ль, ни воздыха́ние, но жизнь безконе́чная, и, сподо́бльшеся узре́ти пресве́тлое лице́ Всеблага́го Го́спода и Влады́ки на́шего, па́дше со слеза́ми у ног Его́, в ра́дости и умиле́нии воскли́кнем: сла́ва Тебе́, дража́йший Искупи́телю наш, И́же за премно́гую любо́вь Твою́ к нам, недосто́йным, благоволи́л еси́ посла́ти а́нгелы Твоя́ в служе́ние спасе́нию на́шему, ами́нь.

Молитва вторая:

О святы́й Михаи́ле Арха́нгеле, поми́луй нас, гре́шных, тре́бующих твоего́ заступле́ния, сохрани́ нас, раб Бо́жиих (имя рек), от всех ви́димых и неви́димых враг, па́че же подкрепи́ от у́жаса сме́ртнаго и от смуще́ния диа́вольскаго и сподо́би нас непосты́дно предста́ти Созда́телю на́шему в час стра́шнаго и пра́веднаго Суда́ Его́. О всесвяты́й, вели́кий Михаи́ле Архистрати́же, не пре́зри нас, гре́шных, моля́щихся тебе́ о по́мощи и заступле́нии твое́м в ве́це сем и в бу́дущем, но сподо́би нас та́мо ку́пно с тобо́ю сла́вити Отца́ и Сы́на и Свята́го Ду́ха во ве́ки веко́в.

Молитва третия:

Го́споди, Бо́же вели́кий, Царю́ безнача́льный, посли́ Арха́нгела Твоего́ Михаи́ла на по́мощь раба́м Твои́м (имя рек). Защити́, Арха́нгеле, нас от вся́ких враго́в, ви́димых и неви́димых. О, Госпо́день вели́кий Арха́нгеле Михаи́ле, де́монов сокруши́телю, запрети́ всем враго́м, борю́щимся со мно́ю, и сотвори́ их я́ко о́вцы, и смири́ их зло́бные сердца́, и сокруши́ их, я́ко прах пе́ред лице́м ве́тра. О, Госпо́день вели́кий Арха́нгеле Михаи́ле, шестикры́лый пе́рвый кня́же и воево́до Небе́сных Сил, Херуви́мов и Серафи́мов, бу́ди нам помо́щник во всех бе́дах, ско́рбях, в печа́лех, в пусты́ни и на моря́х ти́хое приста́нище. О, Госпо́день вели́кий Арха́нгеле Михаи́ле, изба́ви нас от вся́кия пре́лести диа́вольския, егда́ услы́шишь нас, гре́шных, моля́щихся Тебе́, и призыва́ющих и́мя твое́ свято́е. Ускори́ нам на по́мощь и побори́ всех, проти́вящихся нам, си́лою Честна́го и Животворя́щего Креста́ Госпо́дня, моли́твами Пресвяты́я Богоро́дицы, моли́твами святы́х апо́столов, святи́теля чудотво́рца Никола́я, Андре́я, Христа́ ра́ди, юро́диваго, свята́го проро́ка Илии́ и всех святы́х великому́чеников, святы́х му́чеников Ники́ты и Евста́фия и всех преподо́бных отцо́в на́ших, от ве́ка Бо́гу угоди́вших и всех святы́х Небе́сных Сил. О, Госпо́день вели́кий Арха́нгеле Михаи́ле, помози́ нам, гре́шным (имя рек), и изба́ви нас от тру́са, пото́па, огня́, меча́ и напра́сныя сме́рти, от вели́каго зла, от врага́ льсти́ваго, от бу́ри наноси́мой, от лука́ваго изба́ви нас всегда́, ны́не и при́сно, и во ве́ки веко́в, ами́нь. Святы́й Архистрати́же Бо́жий Михаи́ле, молниено́сным мече́м Твои́м отжени́ от мене́ ду́ха лука́ваго, искуша́ющего и томя́щего мя. Ами́нь.

Молитва четвертая:

Го́споди Бо́же вели́кий Царю́, Безнача́льный, посли́, Го́споди, Арха́нгела Твоего́ Михаи́ла на по́мощь рабу́ Твоему́ (имя рек) изъя́ти мя от враг мои́х ви́димых и неви́димых. О, Госпо́день Михаи́ле Арха́нгеле, де́монов сокруши́телю: запрети́ всем врага́м борю́щимся со мно́ю, сотвори́ их, я́ко о́вцы и сокруши́ их, я́ко прах пред лице́м ве́тра. О, Госпо́день вели́кий Арха́нгеле Михаиле, шестокрыла́тый пе́рвый кня́же, воево́до Небе́сных сил Херуви́м и Серафи́м. О, угодный Михаи́ле Арха́нгеле, бу́ди ми помо́щник во всех де́лех, в ско́рбях, печа́лех, в пусты́нях, на распу́тиях, на река́х и на моря́х – ти́хое приста́нище. Изба́ви мя, вели́кий Михаи́ле Арха́нгеле, от вся́ких пре́лестей ди́авольских, егда́ услы́шиши мя, гре́шнаго раба своего́ (имя рек), моля́щегося тебе́ и призыва́ющаго и́мя твое́ свято́е, ускори́ на по́мощь мне и услы́ши моли́тву мою́.

О, вели́кий Арха́нгеле Михаи́ле, победи́ вся проти́вящияся мне си́лою Честна́го и Животворя́щаго Небе́снаго Креста́ Госпо́дня, моли́твами Пресвяты́я Богоро́дицы и святы́х апо́столов, свята́го проро́ка Бо́жия Илии́, святи́теля Никола́я чудотво́рца, свята́го Андре́я юро́диваго, святы́х великому́чеников Ники́ты и Евста́фия, преподо́бных оте́ц и святы́х святи́телей, му́чеников и всех святы́х Небе́сных сил. Ами́нь.

Молитва сия древняя, написана на паперти Чудова монастыря в Кремле – в Церкви Михаила.

Молитва пятая:

О святы́й Михаи́ле Арха́нгеле, светлообра́зный и гро́зный Небе́снаго Царя́ воево́до, пре́жде Стра́шнаго Суда́ осла́би ми пока́ятися от грехо́в мои́х, от се́ти ловя́щих изба́ви ду́шу мою́ и приведи́ ю́ к сотво́ршему ю́ Бо́гу, седя́щему на Херуви́мех, и моли́ся о ней приле́жно, да твои́м хода́тайством по́слет ю́ в ме́сто поко́йное. О гро́зный воево́до Небе́сных Сил, предста́телю всех у Престо́ла Влады́ки Христа́, храни́телю тве́рдый всем челове́ком и му́дрый ору́жниче, кре́пкий воево́до Небе́снаго Царя́, поми́луй мя, гре́шнаго, тре́бующаго твоего́ заступле́ния, сохрани́ мя от всех ви́димых и неви́димых враг, па́че же подкрепи́ от у́жаса сме́ртнаго и от смуще́ния диа́вольскаго и сподо́би мя непосты́дно предста́ти Созда́телю на́шему в час стра́шнаго и пра́веднаго Суда́ Его́. О всесвяты́й вели́кий Михаи́ле Архистрати́же, не пре́зри мене́, гре́шнаго, моля́щагося тебе́ о по́мощи и заступле́нии твое́м, в ве́це сем и в бу́дущем, но сподо́би мя та́мо ку́пно с тобо́ю сла́вити Отца́ и Сы́на и Свята́го Ду́ха во ве́ки веко́в. Ами́нь.

КАНОН СВЯТОМУ АРХАНГЕЛУ БОЖИЮ ГАВРИИЛУ

Тропарь, глас 4:

Канон Архангела, творение Иосифово, глас 4.

Песнь 1.

Припев: Святы́й Архистрати́же Бо́жий Гаврии́ле, моли́ Бо́га о нас.

Я́ко Cве́та су́ща, к Cве́ту кра́йнейшему невеще́ственными причаще́нии, / Боже́ственнаго и невеще́ственнаго, молю́ тя, Арха́нгеле Госпо́день: / ум мой просвети́ моли́твами твои́ми, я́ко да воспеваю тя.

Соста́вим днесь лик Боже́ственный, веселя́щеся, / пе́рваго почита́юще безпло́тных умо́в, / неизрече́нную ра́дость возвести́вшаго, / в мир прише́дшую за бла́гость.

Слава: Предста́теля тя велича́йша, и к Бо́гу засту́пника, / и сте́ну, и утвержде́ние, Гаврии́ле, иму́ще, / лю́бящии тя, избавля́емся от бед и вре́да змии́на, восхваля́ющии тя.

И ныне: Чи́сту Тя, Всенепоро́чную Гаврии́л я́ко узре́, / ра́дуйся, Тебе́ Влады́чице, све́тло возопи́, / браконеиску́сная, челове́ков спасе́ние, а́нгелов похвала́ и честносло́вие.

Песнь 3.

Припев: Святы́й Архистрати́же Бо́жий Гаврии́ле, моли́ Бо́га о нас.

Прича́стием Све́та невеще́ственнейшаго, я́ко невеще́ствен вои́стинну, Гаврии́ле, / невеще́ственно просвеща́емь, / Свет ви́ден был еси́ вторы́й, / веще́ственныя всегда́ челове́ки просвеща́я, пою́щия тя.

Велича́йшаго благосла́вия сподо́бился еси́, / вели́кое та́инство нам откры́в, велича́йше А́нгелов, / и́мже взя́ти бы́хом от земли́ к велича́йшей высоте́, / вельми́ чту́щии тя.

Слава: Яви́ся всем с Небесе́, любо́вию и́щущим тя при́сно, / и уста́ви бу́рю на ны дви́жимую напа́стей же и скорбе́й, / о Гаврии́ле Архистрати́же!

И ныне: Сказу́я е́же дре́вле сокрове́нное та́инство, Отрокови́це, / Тебе́ иногда́ Гаврии́л взыва́ше: / ра́дуйся, Бо́жия пала́то, / в ню́же всели́вся, вся челове́ки обожи́ есть, / я́ко Благоутро́бен.

Го́споди, поми́луй, трижды.

Кондак, глас 8:

Пресве́тлыя, и Честны́я, и Вседе́тельныя, / пренеисче́тныя и стра́шныя Тро́ицы / Ты еси́, Архистрати́же, сла́вный служи́телю и моли́твенниче, / ны́не непреста́нно моли́ / изба́витися нам от вся́ких бед и мук, да зове́м ти: / ра́дуйся, покро́ве рабо́м твои́м.

Седален, глас 4. Подобен: Вознесыйся:

Безпло́тных служи́телей ты пе́рвствуяй, / пре́жде век определе́нное стра́шное та́инство, / тебе́ еди́ному, Гаврии́ле сла́вне, вве́рися, / рождество́ неизрече́нное Святы́я Де́вы, / ра́дуйся, провозглаша́я Ей, Обра́дованная. / Те́мже тя до́лжно, ве́рнии, с весе́лием при́сно ублажа́ем.

Слава, и ныне, Богородичен: Я́ко невозде́ланная, Де́во, лоза́, красне́йший Грозд прозябла́ еси́, / источа́ющ нам вино́ спасе́ния, всех веселя́щее ду́ши же и телеса́. / Те́мже, я́ко вину́ Тя до́брых блажа́ще при́сно, со А́нгелом вопие́м Ти:/ ра́дуйся, Благода́тная.

Песнь 4.

Ирмос: Неизсле́дный Бо́жий сове́т, / е́же от Де́вы воплоще́ния Тебе́, Вы́шняго, / проро́к Авваку́м, усмотря́я, зовя́ше: / сла́ва си́ле Твое́й, Го́споди.

Припев: Святы́й Архистрати́же Бо́жий Гаврии́ле, моли́ Бо́га о нас.

Стоя́л еси́, прича́стиями Богонача́льными дре́вле, / Гаврии́ле досточу́дне, просвеща́я проро́ка Дании́ла / и изложи́в явле́ние недове́домых ду́хом.

Усты́ бре́нными тя ра́достно, о́гненна естество́м су́ща, восхваля́ем: / изми́ ны огня́ всегда́ паля́щаго, / Боже́ственными, Гаврии́ле, хода́тайствы твои́ми.

Слава: Па́че со́лнца в Боже́ственную оде́жду, / сла́вою непристу́пною блиста́ющуся, одева́емь, / Архистрати́же служи́телей, Царю́ предстои́ши Небе́сному, веселя́ся.

И ныне: Всю Тя, ду́хом Гаврии́л преочище́ну, Всенепоро́чная, разуме́в, / вопие́т Тебе́ я́вственно: / ра́дуйся, кля́твы избавле́ние и пра́отцев воззва́ние.

Песнь 5.

Припев: Святы́й Архистрати́же Бо́жий Гаврии́ле, моли́ Бо́га о нас.

Ума́ прича́стием пе́рваго просвеща́емь, / вторы́й ви́ден был еси́ Свет, зовы́й со безчи́сленными А́нгел чи́нми: / Свят Оте́ц Вседе́тель, Сын Собезнача́лен и Дух Сопресто́лен.

Вид твой о́гнен, добро́та пречу́дна, вся́ку мысль ужаса́я, / ве́лия сла́ва, Гаврии́ле велича́йше, / Боже́ственных безпло́тных нача́льниче, всех удобре́ние, / ве́рно воспева́ющих тя.

Слава: Боже́ственный я́ко виде тя, / во вре́мя кажде́ния дре́вле стоя́ща, Заха́рия, быва́ет нем: / не ве́рова бо твоему́ возвеще́нию стра́шному, / его́же изгласи́л еси́, Гаврии́ле Архистрати́же.

И ныне: Храм свяще́ния су́щи, Всенепоро́чная, гла́сом Гаврии́ла Арха́нгела, / во святы́х почива́ющаго родила́ еси́ Всесвята́го Бо́га, / вся освяща́ющаго и лю́тых изыма́ющего.

Песнь 6.

Припев: Святы́й Архистрати́же Бо́жий Гаврии́ле, моли́ Бо́га о нас.

Земни́и язы́цы почести́ тя, ума́ светоза́рнаго и Небе́снаго, не возмо́гут, / пресве́тло просвеща́ема па́че ума́ / неизрече́нно Боже́ственными светлостьми́.

Заря́ со́лнца многосве́тлая, о́гненных слуг Архистрати́же, / светоно́сными твои́ми ко Влады́це мольба́ми / пою́щия тя тьмы страсте́й исхи́ти.

Слава: Сове́ты язы́ков разори́, ве́ру правосла́вную утверди́, / уста́ви раздо́ры церко́вныя, Арха́нгеле, / ко всех Творцу́ твои́ми моли́твами.

И ныне: Глаго́лов Боже́ственных послушли́ва, Чи́стая, Гаврии́ловых была́ еси́ / и Пребезнача́льнаго Сло́ва пло́тию родила́ еси́, / безслове́сия мир изба́вльшаго.

Го́споди, поми́луй, трижды. Сла́ва, и ны́не:

Кондак, глас 2. Подобен: Твердыя:

Архистрати́же Бо́жий, / служи́телю Бо́же́ственныя сла́вы, / А́нгелов нача́льниче и челове́ков наста́вниче, / поле́зное нам проси́ и ве́лию ми́лость, / я́ко Безпло́тных Архистрати́г.

Песнь 7.

Припев: Святы́й Архистрати́же Бо́жий Гаврии́ле, моли́ Бо́га о нас.

Иоа́нново рождество́, сла́вне, / возвести́л еси́ Заха́рии иногда́, внутрь Боже́ственнаго хра́ма / предстоя́щу и пою́щу Изба́вителю и Бо́гу: / препе́тый отце́в Госпо́дь и Бог, благослове́н еси́.

Пресла́вное хра́ма твоего́ благоле́пие пресве́тло, Гаврии́ле, освя́щает ду́ши ве́рных / и повелева́ет велегла́сно вопи́ти: / препе́тый отце́в Госпо́дь и Бог, благослове́н еси́.

Слава: Просвеща́ем прича́стием, Архистрати́же, пе́рваго Све́та та́йно, / вторы́й Свет вои́стинну ви́ден был еси́, пою́щия просвеща́я всегда́: / препе́тый отце́в Госпо́дь и Бог, благослове́н еси́.

И ныне: По́слан бысть Гаврии́л Архистрати́г, / ра́дость возвеща́я Тебе́, Де́во Ма́ти Чи́стая, / Ея́же ра́ди печа́ль преста́, и кля́тва вои́стинну онепло́дствися, / и благослове́ние процвете́ ве́рным во ве́ки.

Песнь 8.

Ирмос: О́троки благочести́выя в пещи́ / Рождество́ Богоро́дично спасло́ есть, / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте, дела́, / и превозноси́те Его́ во вся ве́ки.

Припев: Святы́й Архистрати́же Бо́жий Гаврии́ле, моли́ Бо́га о нас.

Свяще́ннословии свяще́нными тя лю́дие свяще́ннии пою́т, веселя́щеся, / ты бо всевино́вное Сло́во воплоща́емо, е́же по нам, Арха́нгеле, / су́щей от нас приглаша́еши Де́ве па́че ума́ же и сло́ва. / Те́мже тя почита́ем во вся ве́ки.

Уму́ вели́кому же и пе́рвому невеще́ственно, Арха́нгеле, соединя́яся / усты́ о́гненными твои́ми пое́ши песнопе́ние стра́шное, / е́же пою́т вси А́нгельстии ли́цы: / Го́спода по́йте дела́, и превозноси́те Его́ во вся ве́ки.

Благосла́виями я́ве испещре́н Боже́ственными, / прехо́диши Небе́сная, та́же и земна́я, / соверша́я свяще́нная хоте́ния Христа́, всех Бо́га, / А́нгелов нача́льниче Гаврии́ле, красота́ ве́рою при́сно тя хва́лящих.

Слава: Пло́тию по ипоста́си Сло́во челове́ком примеси́тися хотя́, / имя́ше тя, предтеку́ща и предугото́вающа свяще́нную пала́ту, о свяще́нный Гаврии́ле, / Го́спода по́йте, вопию́ща, и превозноси́те Его́ во вся ве́ки.

И ныне: Я́ко престо́л красе́н Царе́в, / я́ко всех тва́рей преиму́щую, / я́ко Пресу́щнаго еди́ну осуществова́вшую, / челове́ки обожи́вшаго соедине́нием лу́чшим рождества́ неизрече́ннаго и стра́ннаго, / благослове́нную воспои́м Де́ву.

Песнь 9.

Припев: Святы́й Архистрати́же Бо́жий Гаврии́ле, моли́ Бо́га о нас.

Предстои́ши, стра́шно престо́лу благода́ти служа́, / и облиста́ем светоли́тии су́щими па́че ума́, / и свяще́нно обожа́ем, и Свет зрим, / и просвеща́я ве́рою честву́ющая тя, свяще́нне Гаврии́ле Архистрати́же.

Я́коже Не́бо, зри́шися, звезда́ми укра́шено, Боже́ственными светлостьми́, / и, я́коже воево́да, рука́ми держи́ши скиптр пресве́тлый / и претека́еши всю зе́млю, / во́лю Влады́чню всегда́ творя́ и лю́тых ве́рныя изыма́я.

Утиши́ лю́тую ва́рварскую бу́рю, воздви́жемую всегда́ на рабы́ твоя́, / церко́вныя уста́ви раздо́ры, / пою́щим тя пода́ждь прегреше́ний избавле́ние, / ве́рным же да́руй победи́тельная, Гаврии́ле, те́плым предста́тельством твои́м.

Слава: Предо́брая дво́ице и пресла́вная, Михаи́ле и Гаврии́ле, / престо́лу предстоя́ще Боже́ственныя сла́вы, / всем проси́те грехо́в проще́ния и злых премене́ния, / я́ко предста́телие и я́ко бла́гости Влады́чни во всем подо́бящеся.

И ныне: Свет блиста́ния рождество́м Твои́м возсия́, и просвети́ всю подсо́лнечную, / и предста́теля тьмы погуби́, Богороди́тельнице Всечи́стая, / А́нгелов хвало́ и челове́ков всех спасе́ние, непреста́нными гла́сы восхваля́ющих Тя.

Светилен, глас 8. Подобен: Посетил ны:

Архистрати́же Бо́жий, в кро́ве крилу́ твое́ю ополчи́вся, / огради́ мя, прибега́ющего к тебе́, и во исхо́де изба́ви мя го́рьких истяза́телей, / и спаси́ мя мольба́ми твои́ми.

Слава, и ныне, Богородичен: Бог нам, Чи́стая, прибе́жище, и си́лу, и по́мощь Тя подаде́ / в ско́рбех на́ших и во обстоя́ниих, / всех у́бо нас изба́ви от бед на́ших.

Молитва:

О святы́й Арха́нгеле Гаврии́ле! Всеусе́рдно мо́лим тя, наста́ви нас, раб Бо́жиих (имя рек), к покая́нию от злых дел и ко утвержде́нию в ве́ре на́шей, укрепи́ и огради́ ду́ши на́ша от искуше́ний прельсти́тельных и умоли́ Созда́теля на́шего о отпуще́нии грехо́в на́ших. О святы́й вели́кий Гаврии́ле Арха́нгелe! He пре́зри нас, гре́шных, моля́щихся тебе́ о по́мощи и заступле́нии твое́м, в ве́це сем и в бу́дущем, но при́сно помо́щник нам яви́ся, да непреста́нно сла́вим Отца́ и Сы́на и Свята́го Ду́ха держа́ву и твое́ предста́тельство во ве́ки веко́в.

КАНОН АНГЕЛУ ХРАНИТЕЛЮ

Тропарь, глас 6:

А́нгеле Бо́жий, храни́телю мой святы́й, / живо́т мой соблюди́ во стра́се Христа́ Бо́га, / ум мой утверди́ во и́стиннем пути́, / и к любви́ го́рней уязви́ ду́шу мою́, / да тобо́ю направля́емь, / получу́ от Христа́ Бо́га ве́лию ми́лость.

Канон, глас 8.

Песнь 1.

Ирмос: Пои́м Го́сподеви, / прове́дшему лю́ди Своя́ сквозе́ Чермно́е мо́ре, / я́ко еди́н сла́вно просла́вися.

Припев: Го́споди Иису́се Христе́ Бо́же мой, поми́луй мя.

Песнь воспе́ти и восхвали́ти, Спа́се, / Твоего́ раба́ досто́йно сподо́би, / безпло́тному Áнгелу, наста́внику и храни́телю моему́.

Припев: Святы́й Áнгеле Бо́жий, храни́телю мой, моли́ Бо́га о мне.

Еди́н аз в неразу́мии и в ле́ности ны́не лежу́, / наста́вниче мой и храни́телю, / не оста́ви мене́, погиба́юща.

Слава: Ум мой твое́ю моли́твою напра́ви, / твори́ти ми Бо́жия повеле́ния, / да получу́ от Бо́га отда́ние грехо́в, / и ненави́дети ми злых наста́ви мя, молю́ся ти.

И ныне: Моли́ся, Деви́це, о мне, рабе́ Твое́м, ко Благода́телю, / со храни́телем мои́м Áнгелом, / и наста́ви мя твори́ти за́поведи Сы́на Твоего́ и Творца́ моего́.

Песнь 3.

Ирмос: Ты еси́ утвержде́ние / притека́ющих к Тебе́, Го́споди, / Ты еси́ свет омраче́нных, / и пое́т Тя дух мой.

Припев: Святы́й Áнгеле Бо́жий, храни́телю мой, моли́ Бо́га о мне.

Все помышле́ние мое́ и ду́шу мою́ к тебе́ возложи́х, храни́телю мой; / ты от вся́кия мя напа́сти вра́жия изба́ви.

Враг попира́ет мя, и озлобля́ет, / и поуча́ет всегда́ твори́ти своя́ хоте́ния; / но ты, наста́вниче мой, / не оста́ви мене́ погиба́юща.

Слава: Пе́ти песнь со благодаре́нием и усе́рдием / Творцу́ и Бо́гу даждь ми, / и тебе́, благо́му Áнгелу храни́телю моему́: / изба́вителю мой, изми́ мя от враг озлобля́ющих мя.

И ныне: Исцели́, Пречи́стая, моя́ многонеду́жныя стру́пы, я́же в души́, / прожени́ враги́, и́же при́сно бо́рются со мно́ю.

Го́споди, поми́луй, трижды.

Седален, глас 2. Подобен: Вышних ища:

От любве́ душе́вныя вопию́ ти, / храни́телю моея́ души́, всесвяты́й мой Áнгеле: / покры́й мя и соблюди́ от лука́ваго ловле́ния всегда́, / и к жи́зни наста́ви небе́сней, / вразумля́я и просвеща́я и укрепля́я мя.

Слава, и ныне, Богородичен: Богоро́дице безневе́стная Пречи́стая, / Я́же без се́мени ро́ждши всех Влады́ку, / Того́ со Áнгелом храни́телем мои́м моли́, / изба́вити ми ся вся́каго недоуме́ния, / и да́ти умиле́ние и свет души́ мое́й и согреше́нием очище́ние, / Я́же еди́на вско́ре заступа́ющи.

Песнь 4.

Ирмос: Услы́шах, Го́споди, / смотре́ния Твоего́ та́инство, / разуме́х дела́ Твоя́, / и просла́вих Твое́ Божество́.

Припев: Святы́й Áнгеле Бо́жий, храни́телю мой, моли́ Бо́га о мне.

Моли́ Человеколю́бца Бо́га ты, храни́телю мой, / и не оста́ви мене́, / но при́сно в ми́ре житие́ мое́ соблюди́ / и пода́ждь ми спасе́ние необори́мое.

Я́ко засту́пника и храни́теля животу́ моему́ прие́м тя от Бо́га, Áнгеле, / молю́ тя, святы́й, / от вся́ких мя бед свободи́.

Слава: Мою́ скве́рность твое́ю святы́нею очи́сти, храни́телю мой, / и от ча́сти шу́ия да отлуче́н бу́ду моли́твами твои́ми / и прича́стник сла́вы явлю́ся.

И ныне: Недоуме́ние предлежи́т ми от обыше́дших мя зол, Пречи́стая, / но изба́ви мя от них ско́ро: / к Тебе́ бо еди́ней прибего́х.

Песнь 5.

Ирмос: У́тренююще вопие́м Ти: / Го́споди, спаси́ ны; / Ты бо еси́ Бог наш, / ра́зве Тебе́ ино́го не ве́мы.

Припев: Святы́й Áнгеле Бо́жий, храни́телю мой, моли́ Бо́га о мне.

Я́ко име́я дерзнове́ние к Бо́гу, / храни́телю мой святы́й, / Сего́ умоли́ от оскорбля́ющих мя зол изба́вити.

Све́те све́тлый, све́тло просвети́ ду́шу мою́, / наста́вниче мой и храни́телю, / от Бо́га да́нный ми Áнгеле.

Слава: Спя́ща мя зле тягото́ю грехо́вною, / я́ко бдя́ща сохрани́, Áнгеле Бо́жий, / и возста́ви мя на славосло́вие моле́нием твои́м.

И ныне: Мари́е, Госпоже́ Богоро́дице безневе́стная, наде́ждо ве́рных, / вра́жия возноше́ния низложи́, / пою́щия же Тя возвесели́.

Песнь 6.

Ирмос: Ри́зу ми пода́ждь све́тлу, / одея́йся све́том я́ко ри́зою, / многоми́лостиве Христе́ Бо́же наш.

Припев: Святы́й Áнгеле Бо́жий, храни́телю мой, моли́ Бо́га о мне.

Вся́ких мя напа́стей свободи́, и от печа́лей спаси́, / молю́ся ти, святы́й Áнгеле, да́нный ми от Бо́га, / храни́телю мой до́брый.

Освети́ ум мой, бла́же, и просвети́ мя, / молю́ся ти, святы́й Áнгеле, / и мы́слити ми поле́зная всегда́ наста́ви мя.

Слава: Уста́ви се́рдце мое́ от настоя́щаго мяте́жа, / и бде́ти укрепи́ мя во благи́х, храни́телю мой, / и наста́ви мя чу́дно к тишине́ живо́тней.

И ныне: Сло́во Бо́жие в Тя всели́ся, Богоро́дице, / и челове́ком Тя показа́ небе́сную ле́ствицу; / Тобо́ю бо к нам Вы́шний соше́л есть.

Го́споди, поми́луй, трижды. Сла́ва, и ны́не:

Кондак, глас 4:

Яви́ся мне милосе́рд, святы́й Áнгеле Госпо́день, храни́телю мой, / и не отлуча́йся от мене́, скве́рнаго, / но просвети́ мя све́том неприкоснове́нным / и сотвори́ мя досто́йна Ца́рствия Небе́снаго.

Икос: Уничиже́нную ду́шу мою́ мно́гими собла́зны, / ты, святы́й предста́телю, / неизрече́нныя сла́вы небе́сныя сподо́би, / и певе́ц с ли́ки безпло́тных сил Бо́жиих, / поми́луй мя и сохрани́, и по́мыслы до́брыми ду́шу мою́ просвети́, / да твое́ю сла́вою, Áнгеле мой, обогащу́ся, / и низложи́ зломы́слящия мне враги́, / и сотвори́ мя досто́йна Ца́рствия Небе́снаго.

Песнь 7.

Ирмос: От Иуде́и доше́дше о́троцы, / в Вавило́не иногда́, / ве́рою Тро́ическою пла́мень пе́щный попра́ша, пою́ще: / отце́в Бо́же, благослове́н еси́.

Припев: Святы́й Áнгеле Бо́жий, храни́телю мой, моли́ Бо́га о мне.

Ми́лостив бу́ди ми, и умоли́ Бо́га, Госпо́день Áнгеле, / име́ю бо тя засту́пника во всем животе́ мое́м, наста́вника же и храни́теля, / от Бо́га дарова́ннаго ми во ве́ки.

Не оста́ви в путь ше́ствующия души́ моея́ окая́нныя / уби́ти разбо́йником, святы́й Áнгеле, / я́же ти от Бо́га предана́ бысть непоро́чне; / но наста́ви ю́ на путь покая́ния.

Слава: Всю посра́млену ду́шу мою́ / привожду́ от лука́вых ми по́мысл и дел: / но предвари́, наста́вниче мой, / и исцеле́ние ми пода́ждь благи́ми по́мыслы, / уклоня́ти ми ся всегда́ на пра́выя стези́.

И ныне: Прему́дрости испо́лни всех и кре́пости Боже́ственныя, / Ипоста́сная Прему́дросте Вы́шняго, Богоро́дицы ра́ди, ве́рою вопию́щих: / оте́ц на́ших Бо́же, благослове́н еси́.

Песнь 8.

Ирмос: Царя́ Небе́снаго, / Его́же пою́т во́и а́нгельстии, / хвали́те и превозноси́те во вся ве́ки.

Припев: Святы́й Áнгеле Бо́жий, храни́телю мой, моли́ Бо́га о мне.

От Бо́га по́сланный, / утверди́ живо́т мой, раба́ твоего́, преблаги́й Áнгеле, / и не оста́ви мене́ во ве́ки.

А́нгела тя су́ща бла́га, / души́ моея́ наста́вника и храни́теля, преблаже́нне, / воспева́ю во ве́ки.

Слава: Бу́ди ми покро́в и забра́ло / в день испыта́ния всех челове́к, / во́ньже огне́м искуша́ются дела́ блага́я же и зла́я.

И ныне: Бу́ди ми помо́щница и тишина́, Богоро́дице Присноде́во, рабу́ Твоему́, / и не оста́ви мене́ лише́на бы́ти Твоего́ влады́чества.

Песнь 9.

Ирмос: Вои́стинну Богоро́дицу / Тя испове́дуем, / спасе́ннии Тобо́ю, Де́во чи́стая, / с безпло́тными ли́ки Тя велича́юще.

Припев: Го́споди Иису́се Христе́ Бо́же мой, поми́луй мя.

Поми́луй мя, еди́не Спа́се мой, / я́ко ми́лостив еси́ и милосе́рд, / и пра́ведных лико́в сотвори́ мя прича́стника.

Припев: Святы́й Áнгеле Бо́жий, храни́телю мой, моли́ Бо́га о мне.

Мы́слити ми при́сно и твори́ти, Госпо́день Áнгеле, / блага́я и поле́зная да́руй, / я́ко си́льна яви́ в не́мощи и непоро́чна.

Слава: Я́ко име́я дерзнове́ние к Царю́ Небе́сному, Того́ моли́, / с про́чими безпло́тными, поми́ловати мя, окая́ннаго.

И ныне: Мно́го дерзнове́ние иму́щи, Де́во, к Вопло́щшемуся из Тебе́, / преложи́ мя от уз и разреше́ние ми пода́ждь и спасе́ние, моли́твами Твои́ми.

Молитва:

А́нгеле Христо́в святы́й, к тебе́ припа́дая молю́ся, храни́телю мой святы́й, прида́нный мне на соблюде́ние души́ и те́лу моему́ гре́шному от свята́го креще́ния, аз же свое́ю ле́ностию и свои́м злым обы́чаем прогне́вах твою́ пречи́стую све́тлость и отгна́х тя от себе́ все́ми сту́дными де́лы: лжа́ми, клевета́ми, за́вистию, осужде́нием, презо́рством, непоко́рством, братоненавиде́нием, и злопомне́нием, сребролю́бием, прелюбодея́нием, я́ростию, ску́постию, объяде́нием без сы́тости и опи́вством, многоглаго́ланием, злы́ми по́мыслы и лука́выми, го́рдым обы́чаем и блу́дным возбеше́нием, имы́й самохоте́ние на вся́кое плотско́е вожделе́ние. О, зло́е мое́ произволе́ние, его́же и ско́ти безслове́снии не творя́т! Да ка́ко возмо́жеши воззре́ти на мя, или́ приступи́ти ко мне, а́ки псу смердя́щему? Кото́рыма очи́ма, А́нгеле Христо́в, воззри́ши на мя, опле́тшася зле во гну́сных де́лех? Да ка́ко уже́ возмогу́ отпуще́ния проси́ти го́рьким и злым мои́м и лука́вым дея́нием, в ня́же впа́даю по вся дни и но́щи и на всяк час? Но молю́ся ти припа́дая, храни́телю мой святы́й, умилосе́рдися на мя гре́шнаго и недосто́йнаго раба́ твоего́ (имя рек), бу́ди ми помо́щник и засту́пник на зла́го моего́ сопроти́вника, святы́ми твои́ми моли́твами, и Ца́рствия Бо́жия прича́стника мя сотвори́ со все́ми святы́ми, во ве́ки, ами́нь.

КАНОН СВЯТОМУ ИОАННУ ПРЕДТЕЧИ

Тропарь, глас 2:

Па́мять пра́веднаго с похвала́ми, / тебе́ же довле́ет свиде́тельство Госпо́дне, Предте́че: / показа́л бо ся еси́ вои́стинну и проро́ков честне́йший, / я́ко и в струя́х крести́ти сподо́бился еси́ Пропове́даннаго. / Те́мже за и́стину пострада́в ра́дуяся, / благовести́л еси́ и су́щим во а́де Бо́га, я́вльшагося пло́тию, / взе́млющаго грех ми́ра / и подаю́щаго нам ве́лию ми́лость.

Канон святаго, глас 2.

Песнь 1.

Ирмос: Во глубине́ постла́ иногда́ / фараони́тское всево́инство преоруже́нная си́ла, / вопло́щшееся же Сло́во всезло́бный грех потреби́ло есть: / препросла́вленный Госпо́дь сла́вно бо просла́вися.

Припев: Святы́й вели́кий Иоа́нне Предте́че Госпо́день, моли́ Бо́га о нас.

Крести́телю и Предте́че Христо́в, / погружа́емый всегда́ сластьми́ теле́сными ум мой упра́ви / и во́лны страсте́й укроти́, / я́ко да в тишине́ Боже́ственней быв, песносло́влю тя.

Недоуме́нным просвети́вся просвеще́нием, / я́ко многосве́тлая звезда́, мы́сленному Восто́ку предте́кл еси́, / И́мже озари́тися се́рдцу моему́, Крести́телю, моли́, / омраче́нному все́ми бесо́вскими приложе́нии.

Слава: В реце́ бе́здну иногда́, Всему́дре, погрузи́л еси́, / пото́п содева́ющую благода́тию всего́ преступле́ния. / Но молю́ся, пото́ки, блаже́нне, мои́х прегреше́ний изсуши́, / Боже́ственным хода́тайством твои́м.

И ныне: Чи́стыя Де́вы, Бо́га воплоти́вшия, / сро́дник был еси́, блаже́нне Предте́че, / с Не́ю же тя чтим и мо́лим, / и́же в Боже́ственнем хра́ме твое́м ны́не живу́ще, / хра́мы и нас сотвори́ Ду́ха Свята́го.

Песнь 3.

Ирмос: На ка́мени мя ве́ры утверди́в, / разшири́л еси́ уста́ моя́ на враги́ моя́, / возвесели́бося дух мой, внегда́ пе́ти: / несть свят, я́коже Бог наш, / и несть пра́веден, па́че Тебе́, Го́споди.

Припев: Святы́й вели́кий Иоа́нне Предте́че Госпо́день, моли́ Бо́га о нас.

Исцели́ стру́пы души́ моея́ / и ум мой, омраче́нный небреже́нием, / озари́ Боже́ственным твои́м хода́тайством, Госпо́день Предте́че, / и вся́каго изба́ви мя сопроти́внаго обстоя́ния, молю́ся.

Непло́дствие разреши́л еси́ ро́ждшия, / роди́вся Бо́жиим промышле́нием, прему́дре проро́че; / непло́дное у́бо се́рдце мое́ / плодоно́сно ны́не соде́лай, Госпо́день Предте́че, хода́тайством твои́м, / доброде́телей приноси́ти прозябе́ния.

Слава: Любо́вию твое́ю созида́ющаго Боже́ственный дом, / вы́шняго жития́ улучи́ти моли́, / и́же ве́рою храму твоему́ служа́щия, / хра́мы Ду́ха Боже́ственнаго сотвори́, / Крести́телю и Предте́че, хода́тайствы твои́ми.

И ныне: Веселя́шеся Предте́ча, в ложесна́х носи́м ма́терних, / и покланя́шеся Го́споду, носи́му в ложесна́х Благода́тныя, / Его́же моли́ от вся́кия ско́рби изба́вити мя.

Го́споди, поми́луй, трижды.

Седален, глас 8. Подобен: Повеленное:

Заха́риин глас све́тло разреши́ / Словесе́ глас ро́ждься, Предте́ча, / и зако́на непло́дие всем показа́, зовы́й: / пока́йтеся, су́щии на земли́, / се бо прии́де и яви́ся Иису́с, / вся хотя́ изба́вити от пе́рвыя кля́твы, просвеща́я Креще́нием. / Вои́стинну чу́до пресла́вно!

Сла́ва, глас 4. Подобен: Удивися: Я́коже со́лнце све́тло, из чре́ва Елисаве́ти возсия́ нам Заха́риин сын, / и о́тчее разреши́ безгла́сие́, / и всем лю́дем в дерзнове́нии мно́зе, испра́вите, – вопия́, – путь Госпо́день, / и́бо Той свободи́т и спасе́т к Нему́ притека́ющия. / Его́же пропове́дал еси́, Иоа́нне, моли́ спасти́ся душа́м на́шим.

И ны́не, Богородичен: Обнови́ла еси́, Чи́стая, Бо́же́ственным Рождество́м Твои́м / истле́вшее во страсте́х земноро́дных ме́ртвенное существо́ / и воздви́гла еси́ вся от сме́рти к животу́ нетле́ния. / Те́мже Тя по до́лгу блажи́м вси, Де́во Препросла́вленная, я́коже прорекла́ еси́.

Песнь 4.

Ирмос: Прише́л еси́ от Де́вы не хода́тай, ни А́нгел, / но Сам, Го́споди, вопло́щся, / и спасл еси́ всего́ мя, челове́ка. / Тем зову́ Ти: сла́ва си́ле Твое́й, Го́споди.

Припев: Святы́й вели́кий Иоа́нне Предте́че Госпо́день, моли́ Бо́га о нас.

Прекло́ншему небеса́ и челове́ком бесе́довавшу, / главу́ приклони́л еси́ десни́цею твое́ю, пребога́те; / е́юже мя соблюди́, / во смире́нии соблюда́я се́рдце мое́.

Пусты́ня тебе́ граждани́на непрохо́дная имя́ше, блаже́нне Предте́че, / те́мже вопию́ ти: / пу́сту вся́каго Боже́ственнаго дея́ния бы́вшу, / ду́шу мою́ снабди́.

Зако́н Боже́ственный управля́я, / беззако́нно закла́н был еси́. / Те́мже молю́ся тебе́: / беззако́ннующа мя всегда́ / и прельща́ема бесо́вскими прельще́ньми испра́ви.

Слава: Созда́в себе́ храм Влады́це Царю, / к Боже́ственным селе́нием ны́не преше́л еси́, Предте́че, / и́хже получи́ти моли́, тебе́ пресвяты́й дом Воздви́гшаго.

И ныне: При́зри на мя неду́гующаго, Всенепоро́чная, / и разреши́ стра́сти моя́ лю́тыя и неудобоисце́льныя, / я́ко да велича́ю Тя, / возвели́чившую все челове́чество.

Песнь 5.

Ирмос: Просвеще́ние во тьме лежа́щих, / спасе́ние отча́янных, Христе́, Спа́се мой, / к Тебе́ у́тренюю, Царю́ ми́ра, / просвети́ мя сия́нием Твои́м, / ино́го бо, ра́зве Тебе́, бо́га не зна́ю.

Припев: Святы́й вели́кий Иоа́нне Предте́че Госпо́день, моли́ Бо́га о нас.

В тече́ниих Иорда́нских струя́ нетле́ния, / Предте́че, крести́в Христа́, моли́, / истека́ния страсте́й мои́х изсуши́ти, / и пото́ки сла́достныя насле́довати, / и пра́ведных кра́снаго ра́дования.

Уже́ рыда́ю, и содрага́юся стра́хом, / и недоуме́нием всегда́ содержи́мь есмь, / помышля́я моя́ соде́ланная / и бу́дущий суд ужа́сный, Благоутро́бне Го́споди, / пощади́ мя Твоего́ Крести́теля мольба́ми.

Законополага́яй лю́дем спасе́ние, / в раска́янии Предте́че, прегреше́ний бы́вшее, / посреде́ зако́на и благода́ти стал еси́. / Сего́ ра́ди мо́лим тя: / образми́ покая́ния нас просвети́.

Слава: Даждь ми вре́мя покая́ния, / уны́нно преше́дшее все ижди́вшему Благоде́телю, / име́я на сие́ моля́щаго Тя, Сло́ве, / Иоа́нна вели́каго, Предте́чу и покая́ния всеми́рнаго пропове́дника.

И ныне: Наве́ты и ловле́нии льсти́ваго умертви́хся, Влады́чице Всенепоро́чная, / оживи́ мя, я́же ро́ждшая Живо́т всех, Богоро́дице, ипоста́сный, / да Тя пою́ благоче́стно Всенепоро́чную.

Песнь 6.

Припев: Святы́й вели́кий Иоа́нне Предте́че Госпо́день, моли́ Бо́га о нас.

Глас Сло́ва пропове́давый, / всех гла́сы восприе́м, / проси́ грехо́в проще́ние дарова́ти / ве́рою пою́щим тя.

Сокруше́ние души́ моея́ исцели́, / и грехо́в бре́мя разреши́, / и па́че наде́жды спаси́ мя моли́твами твои́ми, / блаже́нне Предте́че.

Слава: Иису́са, Его́же руко́ю твое́ю крести́л еси́, Предте́че, моли́, / руки́ мя изба́вити греха́, / взима́юща к Нему́ ру́це при́сно, всесла́вне.

И ныне: Дрема́нием ле́ностным одержи́мь есмь, / сон грехо́вный тяготи́т се́рдце мое́: / Твои́м, Пречи́стая, бде́нным хода́тайством, / воздви́гни и спаси́ мя.

Го́споди, поми́луй, трижды. Сла́ва, и ны́не:

Кондак, глас 3. Подобен: Дева днесь:

Пре́жде непло́ды днесь Христо́ва Предте́чу ражда́ет, / и той есть исполне́ние вся́каго проро́чества: / Его́же бо проро́цы пропове́даша, / на Сего́ во Иорда́не ру́ку положи́в, / яви́ся Бо́жия Сло́ва проро́к, пропове́дник, вку́пе и Предте́ча.

Икос: Восхва́лим ны́не Госпо́дня Предте́чу, / его́же свяще́ннику Елисаве́ть роди́ из ложе́сн непло́дных, но не без се́мене: / Христо́с бо еди́н вмести́лище про́йде непроходи́мо без се́мене. / Иоа́нна непло́ды роди́, без му́жа же сего́ не роди́, / Иису́са же, осене́нием Отца́ и Ду́ха Бо́жия, Де́ва роди́ Чи́стая. / Но Безсе́менному яви́ся от непло́дныя проро́к и пропове́дник, вку́пе и Предте́ча.

Песнь 7.

Ирмос: Богопроти́вное веле́ние беззако́ннующаго мучи́теля / высо́к пла́мень вознесло́ есть. / Христо́с же простре́ Богочести́вым отроко́м ро́су духо́вную, / Сый благослове́н и препросла́влен.

Припев: Святы́й вели́кий Иоа́нне Предте́че Госпо́день, моли́ Бо́га о нас.

Из ко́рене секи́рою твоего́ покая́ния / исто́рг я́звы стра́стнаго се́рдца моего́, / всади́, Предте́че, Боже́ственное безстра́стие / и страх чисте́йший Бо́жий, / вся́кия зло́бы отчужда́ющий мя.

Во струя́х Иорда́нских, я́ко крести́л еси́ / покрыва́ющаго вода́ми превы́спренняя Го́спода, / Того́ моли́ во́ду дарова́ти Боже́ственнаго умиле́ния / при́сно очи́ма мои́ма, сла́вный Предте́че.

Слава: И́же ми́ру взе́млющаго грех, / А́гнца Бо́жия, Предте́че, пропове́дав, / Того́ моли́ от ко́злищ ча́сти яви́ти мя чу́жда, / и десны́м Его́ овца́м и мене́ сочета́ти, сла́вне.

И ныне: Непло́дная утро́ба нося́ше Тя, Де́во, / во чре́ве носи́вшую Сло́во воплоще́нно, / Его́же Боже́ственными взыгра́нии вели́кий Предте́ча, / непло́дный всесвяты́й плод, / позна́ ра́дуяся и поклони́ся.

Песнь 8.

Припев: Святы́й вели́кий Иоа́нне Предте́че Госпо́день, моли́ Бо́га о нас.

Даждь десни́цу мне, на земли́ лежа́щему, Предте́че, / и́же десни́цу просте́р и омы́л еси́ вода́ми Нескве́рнаго: / и изба́ви мя скве́рны теле́сныя, / всего́ мя очища́я покая́нием, и спаси́ мя.

Иму́щи, душе́, вре́мя пока́ятися, / ле́ности тяжча́йший сон оттряси́ / и спе́шно побди́, вопию́щи Влады́це твоему́: / Милосе́рде, уще́дри мя, / Крести́теля Твоего́ мольба́ми.

Пото́цы страсте́й и во́ды зло́бы / до души́ моея́ внидо́ша, блаже́нне Предте́че, / потщи́ся ско́ро изъя́ти мя, / и́же ре́чными струя́ми измы́в / безстра́стия тиша́йшую пучи́ну.

Слава: Увы́ мне, мно́га зла сотво́ршему! / Увы́ мне, еди́ному прогне́вавшему Бо́га Преблага́го! / Крести́телю Христо́в, помози́ ми, / и пода́ждь прегреше́ний мои́х разреше́ние, / и долго́в мои́х отсече́ние твои́ми хода́тайствы.

И ныне: Вы́шняго Бо́га пло́тию ро́ждшая, / от гно́я мя возста́ви страсте́й, оскорбля́ющих мя: / и лю́те всего́ обнища́вша, / Боже́ственными обогати́, Пречи́стая, доброде́тельми, / я́ко да воспою́ Тя спаса́емь.

Песнь 9.

Ирмос: Безнача́льна Роди́теля Сын, Бог и Госпо́дь, / вопло́щся от Де́вы, нам яви́ся, / омраче́нная просвети́ти, собра́ти расточе́нная. / Тем Всепе́тую Богоро́дицу велича́ем.

Припев: Святы́й вели́кий Иоа́нне Предте́че Госпо́день, моли́ Бо́га о нас.

Ка́ла мя изба́ви грехо́внаго, Го́споди, / Безгре́шне Еди́не и Многоми́лостиве, / Крести́теля мольба́ми, / и́же Тебе́ пропове́давый всему́ ми́ру А́гнца Бо́жия, / взе́млющаго челове́ков грехи́.

Я́ко ши́пок благово́нен, я́ко благоуха́нный кипари́с, / я́ко неувяда́емый крин, я́ко ми́ро че́стно / име́яй тя, Госпо́день Предте́че, / мои́х дел злосмра́дия избавля́юся моли́твами твои́ми, / притека́я к покро́ву твоему́.

Непло́дствовати мя непло́дными де́лы, всеблаже́нне, сотвори́, / доброде́телей благопло́дие при́сно принося́ща, / ча́до мя Госпо́дне творя́, / и прича́стника Боже́ственному Ца́рствию, / и святы́х собо́ру купножи́теля.

Слава: Нам лю́бящим тя, любо́вию почита́ющим, / и в Боже́ственнем хра́ме твое́м лику́ющим, / даждь с небесе́ разреше́ние лю́тых, Предте́че Госпо́день, / и жития́ исправле́ние, и прегреше́ний избавле́ние.

И ныне: Носи́му во утро́бе Богома́терни, вся нося́щему ма́нием, / поклони́лся еси́, проро́че: / с Не́юже моли́ смире́нней спасти́ся души́ мое́й, / во мно́гая впа́дающей по вся дни согреше́ния.

Светилен, глас 4:

Предте́чу Иоа́нна, и крести́теля Спа́сова, / во проро́цех проро́ка и пусты́ни воспита́ние, / Елисаве́тино рожде́ние восхва́лим вси.

Слава, и ныне, Богородичен: Сла́дость А́нгелов, скорбя́щих ра́дость, / христиа́н предста́тельница, Де́во Ма́ти Госпо́дня, / заступи́ нас, и изба́ви ве́чных мук.

Молитва:

Крести́телю Христо́в, пропове́дниче покая́ния, ка́ющагося не пре́зри мене́, но совокупля́яся с во́и Небе́сными, моли́ся ко Влады́це за мене́ недосто́йнаго, уны́лаго, немощна́го и печа́льнаго, во мно́гия беды́ впа́дшаго, утружде́ннаго бу́рными по́мыслы ума́ моего́; аз бо есмь верте́п злых дел, отню́дь не име́яй конца́ грехо́вному обы́чаю; пригвожде́н бо есть ум мой земны́м ве́щем, что сотворю́, не вем, и к кому́ прибе́гну, да спасе́на бу́дет душа́ моя́? То́кмо к тебе́, святы́й Иоа́нне, благода́ти тезоимени́те, я́ко тя пред Го́сподем по Богоро́дице вем бо́льша бы́ти рожде́нных всех, и́бо ты сподо́бился еси́ косну́тися верху́ Царя́ Христа́, взе́млющаго грехи́ ми́ра, А́гнца Бо́жия. Его́же моли́ за гре́шную мою́ ду́шу, да поне́ от ны́не, в пе́рвыйна́десять час, понесу́ тяготу́ благу́ю и прииму́ мзду с после́дними. Ей, Крести́телю Христо́в, честны́й Предте́че, кра́йний проро́че, пе́рвый во благода́ти му́чениче, по́стников и пусты́нников наста́вниче, чи́стоты учи́телю и бли́жний дру́же Христо́в, тя молю́, к тебе́ прибега́ю: не отри́ни мене́ от твоего́ заступле́ния, но возста́ви мя па́дшагося мно́гими грехи́, обнови́ ду́шу мою́ покая́нием, я́ко вторы́м креще́нием, поне́же обоего́ нача́льник еси́, креще́нием омыва́яй прароди́тельный грех, покая́нием же очища́яй коего́ждо де́ло скве́рно. Очи́сти мя, греха́ми оскверне́ннаго и пону́ди вни́ти, а́може ничто́же скве́рно вхо́дит, во Ца́рствие Небе́сное, ами́нь.

КАНОН СВЯТИТЕЛЮ НИКОЛАЮ, АРХИЕПИСКОПУ МИР ЛИКИЙСКИХ, ЧУДОТВОРЦУ

Тропарь, глас 4:

Пра́вило ве́ры и о́браз кро́тости, / воздержа́ния учи́теля / яви́ тя ста́ду твоему́ / Я́же веще́й И́стина. / Сего́ ра́ди стяжа́л еси́ смире́нием высо́кая, / нището́ю бога́тая, / о́тче священнонача́льниче Нико́лае, / моли́ Христа́ Бо́га, / спасти́ся душа́м на́шим.

Канон святаго, глас 4.

Песнь 1.

Припев: Святи́телю о́тче Нико́лае, моли́ Бо́га о нас.

Па́стырю до́брый Христо́ва ста́да, ра́дуйся, Нико́лае, / я́ко ми́ряном оте́ц че́стен и учи́тель был еси́, / и мне пода́ждь, ра́дуйся тебе́ приноси́ти.

Ро́ди земни́и стеце́мся, / ра́дуйся приноси́ти святи́телю, / ра́дость бо прино́сит вселе́нней неоску́дно.

Слава: Изба́вльшему три воево́ды от убие́ния непра́веднаго вопие́м ти: / ра́дуйся, Нико́лае, засту́пниче прибега́ющим под кров твой.

И ныне: Богоро́дице Де́во, ра́дуйся, / ра́дость от А́нгела прие́мшая, / и спаси́ Тебе́ велича́ющих.

Песнь 3.

Припев: Святи́телю о́тче Нико́лае, моли́ Бо́га о нас.

Никто́же прибега́яй под кров наде́жды твоея́, о́тче, тощь от тебе́ исхо́дит, / но ра́дуйся принося́ ти, по́мощь прие́млет, Нико́лае, / ю́же и мне пода́ждь, всеблаже́нне.

А́нгели дивя́тся твоему́, преподо́бне, те́плому заступле́нию, / челове́цы же ра́дуются, прие́млюще моли́твами твои́ми избавле́ние от напа́стей бесовских, / те́мже ра́дуйся, прино́сим ти, Нико́лае прехва́льне.

Слава: Шлем, и ору́жие непобеди́мое на диа́вола ты еси́, / христиа́ном же утвержде́ние, и иера́рхом удобре́ние, Нико́лае чу́дне; / ра́дуйся, чудотво́рче вели́кий, обурева́емым ти́хое приста́нище.

И ныне: Заче́нши Зижди́теля Своего́, Богоро́дице, / родила́ еси́ Творца́ всех и Го́спода, / Того́ моли́ изба́вити нас от напа́стей; / ели́ка бо хо́щеши, вся мо́жеши, / я́ко блага́я Блага́го же Роди́тельница.

Го́споди, поми́луй, трижды.

Седален, глас 8. Подобен: Премудрости:

Возше́д на высоту́ доброде́телей / и Боже́ственными отту́ду, о́тче, озари́вся сия́нии чуде́с, / пресве́тел вои́стинну яви́лся еси́ мирови па́стырь, / нам в напа́стех сый предста́тель непобеди́мь; / те́мже, пресла́вно врага́ победи́в, лжу отгна́л еси́ / и челове́ки спасл еси́ от сме́рти, Нико́лае, / моли́ Христа́ Бо́га грехо́в оставле́ние дарова́ти / чту́щим любо́вию святу́ю па́мять твою́.

Слава, другий седален, глас тойже: Реку́ исцеле́ний, оби́льне излива́ющую, / и исто́чник тя чуде́с неоску́дный показа́, Нико́лае, ми́лости бе́здна: / тя́жкими бо неду́гами го́рце дручи́мии / и злоключе́ньми жития́ лю́те му́чимии / вся́кия ско́рби целе́бную вои́стинну обрета́ют лечбу́, / те́плое твое́ защище́ние. / Сего́ ра́ди вопие́м ти: / моли́ся Христу́ Бо́гу прегреше́ний оставле́ние дарова́ти / пра́зднующим любо́вию святу́ю па́мять твою́.

И ныне, Богородичен: Я́ко Де́ву и еди́ну в жена́х, / Тя, без се́мене ро́ждшую Бо́га пло́тию, вси ублажа́ем, ро́ди челове́честии: / огнь бо всели́ся в Тя Божества́, / и я́ко Младе́нца дои́ши Зижди́теля и Го́спода. / Тем, А́нгельский и челове́ческий род, досто́йно сла́вим пресвято́е Рождество́ Твое́ / и согла́сно вопие́м Ти: / моли́ Христа́ Бо́га согреше́ний оставле́ние дарова́ти / покланя́ющимся ве́рою пресвято́му Рождеству́ Твоему́.

Песнь 4.

Припев: Святи́телю о́тче Нико́лае, моли́ Бо́га о нас.

Апо́столом равнопресто́льне, ра́дуйся, Нико́лае, / я́ко А́риеву е́ресь посрами́л еси́, / и велиа́рова шата́ния низложи́л еси́, твои́ми моли́твами; / не преста́й моля́ о рабе́х твои́х.

Ю́ношу о́наго от руки́ Ами́ры срацы́нскаго изба́вил еси́, / роди́телем же его́ ра́дость дарова́л еси́, / тем ти с ни́ми и мы ра́дуйся прино́сим, Нико́лае преподо́бне.

Слава: Три воево́ды от убие́ния непра́веднаго, чудотво́рче, спасл еси́, / я́влься во сне царю́ благочести́вому, и запрети́в ему́, / и от них ра́дуйся, прия́л еси́, Нико́лае, / и мене́ укрепи́ твои́ми моли́твами.

И ныне: Преблагослове́нная Богоро́дице, ра́дуйся, / я́ко еси́ Царя́ всех престо́л, херуви́мов вы́шший, / не закосни́, моля́ Своего́ Сы́на и Бо́га на́шего, / о чту́щих Тя при́сно, с Никола́ем блаже́нным.

Песнь 5.

Припев: Святи́телю о́тче Нико́лае, моли́ Бо́га о нас.

Апо́столов тезоиме́нне, / со А́нгелы равностоя́телю Престо́ла Влады́чня неотсту́пне, / А́рия безу́мновавшаго посрами́л еси́; / сего́ ра́ди вопие́м ти, Нико́лае, ра́дуйся, / святи́телем удобре́ние и сто́лпе церко́вный.

Ру́ку ми даждь, Нико́лае, по́мощи, моля́ся ко Го́споду, / зане́же бу́ря потопля́ет мя грехо́вная, / и приведи́ к ти́хому приста́нищу покая́ния, о́тче, твои́ми моли́твами.

Слава: А́ще и мно́го беззако́нновах, Нико́лае, / но не отступа́ю наде́жды покро́ва твоего́, / всегда́ ра́дуйся, принося́ ти; / ты мя изба́ви от вся́кия ско́рби и беды́, / ели́ка бо хо́щеши, вся мо́жеши.

И ныне: О́блаче превы́шший небе́с, ра́дуйся, / иска́пающий нам ка́плю, Богоро́дице всеблага́я, / пода́ждь от Бо́га лю́дем на́шим побе́ду на ва́рвары, / со иера́рхом Никола́ем Того́ моля́.

Песнь 6.

Припев: Святи́телю о́тче Нико́лае, моли́ Бо́га о нас.

Друг Христо́в и вторы́й Петр, яви́лся еси́, о́тче, ра́дуйся, / я́ко еси́ столп церко́вный и чуде́сный орга́н, / Ду́хом Святы́м чудоде́йствуяй и бряца́яй: / те́мже, Нико́лае, ра́дуйся прино́сим ти всегда́.

Услы́шав Константи́н царь благочести́вый во сне преще́ния твоя́, со Авла́вием епа́рхом, / о муже́х о́нех непра́ведно име́вших поги́бнути, / вско́ре повеле́ отпусти́ти их, / тебе́ же ра́дуйся вопия́ше, Нико́лае.

Слава: Кораблю́ о́ному потопа́ющу в мо́ри ты, о́тче, был еси́ ко́рмчий, / и мне лю́те обурева́ему от помышле́ний бесо́вских, / даждь я́дрило блага́го ра́зума во уме́ и в се́рдце, / я́ко да всегда́ ра́дуйся приношу́ ти, Нико́лае прехва́льне.

И ныне: Ра́дуйся, Пречи́стая Де́во, / ра́дуйся, миру утвержде́ние, / ра́дуйся, я́ко родила́ еси́ Сы́на, всех Бо́га, / Того́ моли́, Богоро́дице пренепоро́чная, / спасти́ся душа́м на́шим.

Го́споди, поми́луй, трижды. Сла́ва, и ны́не:

Кондак, глас 3. Подобен: Дева днесь:

В Ми́рех, свя́те, священноде́йствитель показа́лся еси́, / Христо́во бо, преподо́бне, Ева́нгелие испо́лнив, / положи́л еси́ ду́шу твою́ о лю́дех твои́х / и спасл еси́ непови́нныя от сме́рти. / Сего́ ра́ди освяти́лся еси́, / я́ко вели́кий таи́нник Бо́жия благода́ти.

Икос: Воспои́м ны́не святи́теля пе́сньми, / ми́рским лю́дем па́стыря и учи́теля, / да моли́твами его́ просвети́мся: / се бо яви́ся чист весь, нетле́нен ду́хом, / Христу́ принося́ же́ртву непоро́чну, чи́сту, Бо́гу благоприя́тну, / я́ко святи́тель, очище́н и душе́ю и те́лом, / те́мже сый и́стинно Це́ркве предста́тель и побо́рник сея́, / я́ко вели́кий таи́нник Бо́жия благода́ти.

Песнь 7.

Припев: Святи́телю о́тче Нико́лае, моли́ Бо́га о нас.

Святе Нико́лае, святи́телю Христо́в / ра́дуйся, ты бо еси́ ра́дость всем неизглаго́ланная, / и мне пода́ждь ру́ку по́мощи, да глаго́лю ти: / ра́дуйся, всеблаже́нне.

Егда́ услы́шаша воево́ды отпуще́ние из темни́цы повеле́нием твои́м, / взе́мше све́щники принесо́ша ти со свеща́ми, ве́лиим вопию́ще гла́сом: / ра́дуйся, о́тче преподо́бне, избавле́ние на́ше.

Слава: Не́когда услы́шал еси́ в темни́це свя́занныя, / услы́ши и мене́, Нико́лае, ра́дуйся принося́ща ти, / и исхи́ти мя огня́ гее́нскаго.

И ныне: Мари́е Госпоже́, Ма́ти Изба́вителя, / приими́ мя, ка́ющагося и прибега́ющаго под кров Твой, / я́ко да не престая́ вопию́ Тебе́: / ра́дуйся, Благода́тная Богоро́дице Присноде́во.

Песнь 8.

Припев: Святи́телю о́тче Нико́лае, моли́ Бо́га о нас.

Апо́столов сопресто́льниче, / со А́нгелы служи́телю Святе́й Тро́ице, / Нико́лае прехва́льне, ра́дуйся, / и мне да́руй ра́дость моли́твами твои́ми.

Ко́рмчий обурева́емых, Нико́лае, ра́дуйся, / и бу́рю мои́х страсте́й, я́же от прило́га бесо́вскаго, ути́ши, / я́ко про́чее не могу́ терпе́ти, но вопию́: / ра́дуйся, помо́щниче мой и те́плый предста́телю.

Слава: О, коли́ка туга́ обдержи́т мя от стреля́ний бесо́вских, / и я́звы терпе́ти ми несть мо́щно, / пла́стыря приложи́ти несть врача́, / но ты ми приложи́ пла́стырь, и еле́й моли́тв твои́х, Нико́лае, да зову́ ти: / ра́дуйся, о́тче преподо́бне.

И ныне: Купино́ неопали́мая, ра́дуйся, / ю́же Моисе́й ви́де на Сина́и, / и ле́ствице, ю́же Иа́ков ви́де, / Преблагослове́нная Богоро́дице Присноде́во.

Песнь 9.

Припев: Святи́телю о́тче Нико́лае, моли́ Бо́га о нас.

Льсти́ваго стреля́ния обдержа́т мя, и стремле́ния грехо́вная, / но наде́яся на покро́в твой, к тебе́ прибега́ю, о́тче, / я́ко да отжене́ши от мене́ вся ле́сти лука́ваго, да зову́ ти: / ра́дуйся, Нико́лае.

А́рия безу́мновавшаго посрами́л еси́, / пла́мень же ересе́й угаси́л еси́, / воево́ды в темни́це свя́занныя услы́шал еси́, / и от них ра́дуйся прия́л еси́, / и мы вопие́м ти, Нико́лае: / ра́дуйся, всеблаже́нне.

Слава: А́грика о́наго услы́шавый, / и сы́на его́ Васи́лия от Ами́ры восхи́тивый, / и предста́вивый роди́телем здра́ва во еди́н час от срацы́н, / и мне моля́щуся, исхи́ти неду́гущую мою́ ду́шу, и грехи́ обложе́нную, / от огня́ гее́нскаго, Нико́лае.

И ныне: Цари́це, всех Царя́ ро́ждшая / и носи́вшая Нося́щаго всю тварь, / спаси́ мя, велича́ющаго Тя, Пресвята́я Влады́чице.

Светилен. Подобен: Жены, услышите:

Вели́каго архипа́стыря и иера́рха вси, / председа́теля Мирлики́йскаго Никола́я восхва́лим: / мно́ги бо му́жи спасе́, непра́ведно умре́ти иму́щия, / и царю́ явля́ется со Авла́вием во сне, / реша́ непра́ведный суд.

Слава: Вельми́ тя просла́ви в чудесе́х Госпо́дь / и жи́ва и по конце́, иера́рше Нико́лае: / кто бо от любве́ ве́ры то́кмо святое́ твое́ и́мя призове́т и не а́бие услы́шан, / те́пла тя предста́теля обрета́ет?

И ныне, Богородичен: Му́дрость Ипоста́сную, и Сло́во пресу́щественное, / и Врача́ всех Христа́ ро́ждши, Де́во, / гное́ния и я́звы души́ моея́ исцели́ лю́тыя и многовре́менныя / и се́рдца моего́ стра́стная помышле́ния умертви́.

Молитва святому Николаю.

О всехва́льный и всечестны́й архиере́ю, вели́кий чудотво́рче, святи́телю Христо́в, о́тче Нико́лае, челове́че Бо́жий и ве́рный ра́бе, му́жу жела́ний, сосу́де избра́нный, кре́пкий сто́лпе церко́вный, свети́льниче пресве́тлый, звездо́ осиява́ющая и освеща́ющая всю вселе́нную; ты еси́ пра́ведник, я́ко фи́никс процве́тший, насажде́нный во дво́рех Го́спода своего́, живы́й в Ми́рех, мv́ром облагоуха́л еси́ и мv́ро приснотеку́щее благода́ти Бо́жия источа́еши. Твои́м ше́ствием, пресвяты́й о́тче, мо́ре освяти́ся, егда́ многочуде́сныя твоя́ мо́щи ше́ствоваху во град Ба́рский, от восто́ка до за́пада хвали́ти и́мя Госпо́дне. О преизя́щный и преди́вный чудотво́рче, ско́рый помо́щниче, те́плый засту́пниче, па́стырю предо́брый, спаса́ющий слове́сное ста́до от вся́ких бед! Тебе́ прославля́ем и тебе́ велича́ем, я́ко наде́жду всех христиа́н, исто́чника чуде́с, защи́тителя ве́рных, прему́драго учи́теля, а́лчущих корми́теля, пла́чущих весе́лие, наги́х одея́ние, боля́щих врача́, по мо́рю пла́вающих управи́теля, пле́нников свободи́теля, вдов и сиро́т пита́теля и засту́пника, целому́дрия храни́теля, младе́нцев кро́ткаго наказа́теля, ста́рых укрепле́ние, по́стников наста́вника, тружда́ющихся упокое́ние, ни́щих и убо́гих изоби́льное бога́тство. Услы́ши нас, моля́щихся тебе́ и прибега́ющих под кров твой, яви́ предста́тельство твое́ о нас к Вы́шнему и исхода́тайствуй твои́ми Богоприя́тными моли́твами вся поле́зная ко спасе́нию душ и теле́с на́ших; сохрани́ святу́ю оби́тель сию́ [или храм сей], вся́кий град и весь, и вся́кую страну́ христиа́нскую, и лю́ди живу́щия от вся́каго озлобле́ния по́мощию твое́ю, ве́мы бо, ве́мы, я́ко мно́го мо́жет моли́тва пра́веднаго, поспешеству́ющая во благо́е; тебе́ же, пра́веднаго, по Преблагослове́нней Де́ве Мари́и, предста́теля ко Всеми́лостивому Бо́гу и́мамы, и к твоему́, преблаги́й о́тче, те́плому хода́тайству и заступле́нию смире́нно притека́ем; ты нас соблюди́, я́ко бо́дрый и до́брый па́стырь, от вся́ких враго́в, губи́тельства, тру́са, гра́да, гла́да, пото́па, огня́, меча́, наше́ствия иноплеме́нников, и во вся́ких беда́х и ско́рбех на́ших подава́й нам ру́ку по́мощи, и отве́рзи две́ри милосе́рдия Бо́жия; поне́же недосто́йни есмы́ зре́ти высоту́ небе́сную от мно́жества непра́вд на́ших, свя́зани есмы́ у́зами грехо́вными, и николи́же во́ли Созда́теля на́шего сотвори́хом, ни сохрани́хом повеле́ний Его́. Те́мже приклоня́ем коле́на сокруше́нна и смире́нна се́рдца на́шего к Зижди́телю своему́, и твоего́ оте́ческаго заступле́ния к Нему́ про́сим: помози́ нам, уго́дниче Бо́жий, да не поги́бнем со беззако́нии на́шими, изба́ви нас от вся́каго зла и от вся́кия ве́щи сопроти́вныя, упра́ви ум наш и укрепи́ се́рдце на́ше в пра́вой ве́ре, в не́йже твои́м предста́тельством и хода́тайством, ни ра́нами, ни преще́нием, ни мо́ром, ни ко́им гне́вом от Созда́теля своего́ ума́лени бу́дем, но ми́рное зде поживе́м житие́ и да сподо́бимся ви́дети блага́я на земли́ живы́х, сла́вяще Отца́, и Сы́на, и Свята́го Ду́ха, Еди́наго в Тро́ице сла́вимаго Бо́га и покланя́емаго, ны́не и при́сно, и во ве́ки веко́в, ами́нь.

Молитва вторая.

О всесвяты́й Нико́лае, уго́дниче преизря́дный Госпо́день, те́плый наш засту́пниче, и везде́ в ско́рбех ско́рый помо́щниче! Помози́ мне, гре́шному и уны́лому, в настоя́щем житии́, умоли́ Го́спода Бо́га дарова́ти ми оставле́ние всех мои́х грехо́в, ели́ко согреши́х от ю́ности моея́, во всем житии́ мое́м, де́лом, сло́вом, помышле́нием и все́ми мои́ми чу́вствы; и во исхо́де души́ моея́ помози́ ми, окая́нному, умоли́ Го́спода Бо́га, всея́ тва́ри Соде́теля, изба́вити мя возду́шных мыта́рств и ве́чнаго муче́ния; да всегда́ прославля́ю Отца́, и Сы́на, и Свята́го Ду́ха, и твое́ ми́лостивное предста́тельство, ны́не и при́сно и во ве́ки веко́в, ами́нь.

Молитва третия.

О всеблаги́й о́тче Нико́лае, па́стырю и учи́телю всех, ве́рою притека́ющих к твоему́ заступле́нию и те́плою моли́твою тебе́ призыва́ющих, ско́ро потщи́ся и изба́ви Христо́во ста́до от волко́в, губя́щих е́, и вся́ку страну́ христиа́нскую огради́ и сохрани́ святы́ми твои́ми моли́твами от мирска́го мяте́жа, тру́са, на́шествия иноплеме́нников и междоусо́бныя бра́ни, от гла́да, пото́па, огня́, меча́ и напра́сныя сме́рти. И я́коже поми́ловал еси́ трие́х муже́й, в темни́це седя́щих, и изба́вил еси́ их царе́ва гне́ва и посече́ния ме́чнаго. Та́ко поми́луй и мене́, умо́м, сло́вом и де́лом во тьме грехо́в су́ща, и изба́ви мя гне́ва Бо́жия и ве́чныя ка́зни, я́ко да твои́м хода́тайством и по́мощию, Свои́м же милосе́рдием и благода́тию Христо́с Бог ти́хое и безгре́шное житие́ даст ми пожи́ти в ве́це сем и изба́вит мя шу́ияго стоя́ния, сподо́бит же десна́го со все́ми святы́ми, ами́нь.

КАНОН СВЯТИТЕЛЮ СПИРИДОНУ, ЕПИСКОПУ ТРИМИФУНТСКОМУ, ЧУДОТВОРЦУ

Тропарь, глас 1:

Собо́ра Пе́рваго показа́лся еси́ побо́рник и чудотво́рец, / Богоно́се Спиридо́не, о́тче наш. / Те́мже ме́ртву ты во гробе возгласи́в, / и змию́ в зла́то претвори́л еси́, / и внегда́ пе́ти тебе́ святы́я моли́твы, / А́нгелы, сослужа́щия тебе́, име́л еси́, свяще́ннейший. / Сла́ва Да́вшему тебе́ кре́пость, / сла́ва Венча́вшему тя, / сла́ва Де́йствующему тобо́ю всем исцеле́ния.

Канон святаго, глас 2.

Песнь 1.

Припев: Святи́телю о́тче Спиридо́не, моли́ Бо́га о нас.

Кро́тких зе́млю дости́г, о́тче, я́ко кро́ток, и ми́лостив, и чи́ст быв, / настоя́щую се́рдца моего́ укроти́ бу́рю, / я́ко да, в тишине́ Боже́ственней быв, песносло́влю тя.

Де́лании Боже́ственными ду́шу, о́тче, очи́стив, / Богови́ден, Спиридо́не, был еси́ / и Боже́ственнаго Ду́ха пресве́тлым обогати́лся еси́ осия́нием; / тем озаря́еши чи́сто блажа́щия тя.

Слава: От па́ствы, я́коже Дави́д, тя восприе́м, Соде́тель / слове́сныя тя поста́ви па́ствы па́стыря всеизя́щнейша, / простото́ю и кро́тостию сия́юща / и беззло́бием, преподо́бне па́стырю, украша́ема.

И ныне: Пресвята́я Де́во Чи́стая, / просвети́ и освяти́ помышле́ния и ду́шу мою́, молю́ся, / о́блаки разоря́ющи неве́жества моего́ и тьму отъе́млющи грехо́вную, / я́ко да по до́лгу ублажа́ю Тя.

Песнь 3.

Припев: Святи́телю о́тче Спиридо́не, моли́ Бо́га о нас.

Ум твой безстра́стием просвети́в и Боже́ственным смире́нием украси́вся, / дарова́ния Ду́ха прия́л еси́ отгони́ти ду́хи / и реши́ти неду́ги ве́рно чту́щих тя, свяще́ннейше.

Зми́я началозло́бнаго уби́в, / нрав сребролю́бный попра́в, ми́луя тре́бующаго, святи́телю, / зми́я преложи́л еси́ в злату́ю у́тварь свяще́нными твои́ми моли́твами, / о́тче преподо́бне.

Слава: Возше́л еси́ на го́ру безстра́стия, / вшел еси́ во храм Боговиде́ния, / в скрижа́ли же се́рдца твоего́ прия́л еси́ зако́н спаси́тельный, / я́ко свяще́ннейший и уго́дник при́сный Влады́ки Твоего́.

И ныне: Уврачи́ стру́пы души́ моея́, / ум мой, омраче́нный нераде́нием, Богоневе́сто, озари́, да пою́: / несть непоро́чны, па́че Тебе́, Непоро́чная, / и несть чи́сты, па́че Тебе́, Влады́чице.

Го́споди, поми́луй, трижды.

Седален, глас 8. Подобен: Премудрости:

От па́ствы ове́ц предста́тельствовати Христо́ве Це́ркви вручився, / па́стырь Богопроизведе́н ты, Спиридо́не, возсия́л еси́, / злосла́вия во́лки отгна́л еси́ словесы́ твои́ми, на благоче́стия па́жити сию́ воспита́в. / Те́мже посреде́ Богоно́сных отце́в ве́ру утверди́л еси́ му́дростию ду́ха, / иера́рше блаже́нне, моли́ Христа́ Бо́га, прегреше́ний оставле́ние дарова́ти / пра́зднующим любо́вию святу́ю па́мять твою́.

Слава, и ныне, Богородичен: Я́ко Всенепоро́чная Неве́сто Творцу́, / я́ко Неискусому́жная Ма́ти Изба́вителя, прия́телище я́ко су́щи Уте́шителя, Всепе́тая, / беззако́ния мя су́ща скве́рное оби́телище / и де́монов игра́лище в ра́зуме бы́вша, / потщи́ся от тех злоде́йства мя изба́вити / и све́тлое жили́ще доброде́телей соверши́, светоно́сная, нетле́нная. / Отжени́ о́блак страсте́й и Вы́шняго прича́стия сподо́би / и све́та невече́рняго моли́твами Твои́ми.

Песнь 4.

Припев: Святи́телю о́тче Спиридо́не, моли́ Бо́га о нас.

У́гльми Честна́го разже́гся Ду́ха, / страсте́й удобопопаля́емую вещь, всеблаже́нне, поже́гл еси́, / мир же огнесия́ньми доброде́телей твои́х, Спиридо́не, просвети́л еси́.

Умертви́в твоя́ плотска́я движе́ния, Богодохнове́нне, / ме́ртвыя возста́вил еси́ животво́рным твои́м приглаго́ланием. / Те́мже молю́ тя: / умерщвле́нную ду́шу мою́, о́тче, оживи́.

Слава: Повину́ющися, ме́ртвая тебе́ глас, о́тче, даде́ / и ре́чная стремле́ния твои́ми удержа́шася повеле́нии: / яви́лся еси́ бо, блаже́нне, чудоде́латель, / Боже́ственную благода́ть прие́мь.

И ныне: Проро́цы Твоего́ та́инства глубину́ провозвести́ша недомы́сленную: / еди́на бо родила́ еси́, Чи́стая, Недоразумева́емаго, / воплоще́нна за милосе́рдие неисповеди́мое.

Песнь 5.

Припев: Святи́телю о́тче Спиридо́не, моли́ Бо́га о нас.

Река́ су́щих в тебе́ дарований вся́кое напоя́ет, преподо́бне, се́рдце, / всем да́рует бога́тно здра́вие, / вся Бо́га к сла́ве возставля́ет, тебе́ просла́вльшаго / и чудоде́йствы вся́кими почествова́вшаго.

Тя царь земны́й, блаже́нне, / Царя́ Небе́снаго я́ве позна́ и́скренняго раба́ / и дарова́ний Боже́ственных испо́лненнаго, внегда́ приити́ тебе́ к нему́ / вели́каго врача́ к Бо́гу возвеща́я.

Слава: Авраа́мову страннолю́бному нра́ву ты уподо́бився, / всем до́ма твоего́ вхо́ды отве́рзл еси́, / и всем всяк был еси́, и промышля́я су́щими во обстоя́нии, / Спиридо́не блаже́нне.

И ныне: Но́ва нам породила́ еси́ Младе́нца, / пре́жде веко́в, Отрокови́це, рожде́нна от Отца́ Безнача́льна. / Его́же умоли́, я́ко Сы́на и Бо́га Твоего́, / уще́дрити Богоро́дицу Тя, Пречи́стая, душе́ю чи́стою возвеща́ющия.

Песнь 6.

Припев: Святи́телю о́тче Спиридо́не, моли́ Бо́га о нас.

Зла́то, я́ко кал, тебе́ вмени́ся, па́че зла́та безстра́стием сия́ющу / и обогати́вшуся, преподо́бне, дарова́нии всезлаты́ми Ду́ха.

Чи́сто служа́ Влады́це Твоему́, / мно́жество име́л еси́, преподо́бне, послу́шающее Тебе́ а́нгельских сил / неви́димыми гла́сы, свяще́ннейше.

Слава: Пресла́вное, всему́дре, житие́ твое́ ми́ру тя пресла́вна, о́тче, соде́ла. / Те́мже Боже́ственную па́мять твою́, / ра́дующеся, соверша́ем, пою́щии Тя.

И ныне: Небе́с ши́рши чре́во Твое́ бысть, Неискусому́жная, Бо́га вмести́вшее, / нигде́же вмести́маго, Всесвята́я Де́во Богоневе́сто.

Го́споди, поми́луй, трижды. Сла́ва, и ны́не:

Кондак, глас 2:

Любо́вию Христо́вою уязви́вся, свяще́ннейший, / ум впери́в заре́ю Ду́ха, / де́тельным виде́нием твои́м дея́ние обре́л еси́, Богоприя́тне, / же́ртвенник Боже́ственный быв, / прося́ всем Боже́ственнаго сия́ния.

Икос: Из чре́ва освяще́ннаго иера́рха Госпо́дня, восхва́лим ны́не Спиридо́на, / благода́ти скрижа́ли прие́мшаго Боже́ственныя сла́вы, / и в чудесе́х пресла́внаго всей тва́ри, / и я́ко те́пла и самови́дца Боже́ственнаго осия́ния, / я́ко ни́щих предста́теля и согреша́ющих душево́дца: / той бо Боже́ственна Престо́лу Христо́ву же́ртва бысть, / прося́ всем Боже́ственнаго сия́ния.

Песнь 7.

Припев: Святи́телю о́тче Спиридо́не, моли́ Бо́га о нас.

Моисе́ево незло́бие, Дави́дову кро́тость, И́ова Авси́тидскаго непоро́чное стяжа́в, / Ду́ха был еси́ жили́ще, поя́, свяще́ннейше: / Сый благослове́н и препросла́влен.

Проше́ния на главу́ твою́ во вре́мя жа́твы небеса́ иска́паша, бу́дущее прозна́меноваша: / Бог бо, я́коже рече́, Боже́ственную па́мять твою́, преподо́бне, просла́ви, / ве́рныя освяща́я хода́тайством твои́м.

Слава: В собо́ре отце́в тя Бог прославля́ет, / на суде́ словеса́ твоя́ сохра́ньша, блаже́нне, / я́же ве́рою прине́сл еси́, безслове́снейшаго А́рия обуя́ющая я́ве / и упраздня́ющая сего́ противле́ние.

И ныне: Грозд возрасти́ла еси́ неизрече́нным сло́вом, / я́ко лоза́, Де́во, Еди́наго невозде́ланнаго, / вино́ источа́юща, вся веселя́щее, вся освяща́юща земны́я / и вся́ко пия́нство лю́тых отъе́млюща.

Песнь 8.

Припев: Святи́телю о́тче Спиридо́не, моли́ Бо́га о нас.

Пещь страсте́й Боже́ственными одожде́ньми Боже́ственнаго Ду́ха погаси́л еси́ / и ро́су источи́л еси́ неду́гов, о́тче, зной отъе́млющую / ве́рно к тебе́ приходя́щих всегда́, блаже́нне Спиридо́не пребога́те.

Беззло́бив, прав, кро́ток же, и ми́лостив, и незлопа́мятлив был еси́, / любо́вен, страннолю́бец, иера́рх свяще́ннейший, / му́дростию укра́шен, преподо́бне, Правосла́вия. / Те́мже тя ве́рою почита́ем.

Слава: Дре́вле тебе́ глас, я́ко жива́, уме́ршая вопро́шшу ти, о́тче, даде́. / О, чудесе́ изря́дна! / О, пресла́внаго та́инства! / О, благода́ти, ю́же получи́л еси́, / житие́м украша́емь а́нгельским, досточу́дне!

И ныне: Стра́сти моего́ се́рдца исцели́ ми́лостию Твое́ю, Всепе́тая, / ум мой умири́, и ду́шу мою́ просвети́, / и ходи́ти мя возблагопу́тстви на стези́ спаси́тельныя, / я́ко да при́сно пою́ Тя, Всепе́тая.

Песнь 9.

Припев: Святи́телю о́тче Спиридо́не, моли́ Бо́га о нас.

Безнача́льна Роди́теля Сы́на я́сно пропове́дал еси́, / Единосу́щна Отцу́ и Соприсносу́щна, / посреде́ Богоно́сных отце́в возвели́чився, / и беззако́ннующих загради́л еси́ уста́, / святи́телю всеблаже́нне.

Многосве́тлое со́лнце, отце́в украше́ние, / иере́ев сла́ва, А́нгелов совсе́льниче, / твою́ светоно́сную па́мять ра́достно ны́не соверша́ющия / Све́та сподо́би невече́рняго моли́твами твои́ми.

Слава: Боже́ственная селе́ния, град Небе́сный, пра́зднующих кра́сный лик / освяще́нную ду́шу твою́ и доброде́тельми укра́шенную, всеблаже́нне, / прия́т во гла́се ра́дования.

И ныне: Ве́лие та́инство па́че ума́ Рождества́ Твоего́ удивля́ет А́нгелы, Богора́дованная, / наслажда́ет преподо́бных собо́р, свяще́нныя же весели́т отцы́, / Боже́ственно пою́щия тя, наде́жду душ на́ших.

Светилен. Подобен: Небо звездами:

Тя от безслове́сныя па́ствы преведе́ в слове́сную Дух, Богоно́се, / я́коже Моисе́я и Дави́да, и́хже уподо́бился еси́ нра́ву, Спиридо́не, / све́те вселе́нныя.

Слава, и ныне, Богородичен: Су́щих от Бо́га ми́ру пода́нных благи́х Ты вина́ была́ еси́, Богоро́дице, / но и ны́не уми́лостиви о о́бщем спасе́нии благопреме́ннаго Бо́га.

Молитва первая:

О вели́кий и пречу́дный святи́телю Христо́в и чудотво́рче Спиридо́не, Керки́рская похвало́, всея́ вселенныя свети́льниче пресве́тлый, те́плый к Бо́гу моли́твенниче и всем к тебе́ прибега́ющим и с ве́рою моля́щимся скоропредста́тельный засту́пниче! Ты веру правосла́вную на Нике́йстем Собо́ре посреде́ отце́в пресла́вно изъясни́л еси́, ты Еди́нство Святы́я Тро́ицы чуде́сною си́лою показа́л еси́ и еретико́в до конца́ посрами́л еси́. Услы́ши нас, гре́шных, святи́телю Христо́в, моля́щихся тебе́ и си́льным твои́м предста́тельством у Го́спода изба́ви нас от вся́каго зла́го обстоя́ния: от гла́да, пото́па, огня́ и сме́ртоносныя я́звы.

Ты бо во вре́менней жи́зни своей от всех сих бед́ствий избавля́л еси́ люде́й твои́х: от наше́ствия ага́рян и от гла́да стра́ну твою́ сохрани́л еси́, царя́ от неисце́льнаго неду́га изба́вил и мно́гия гре́шники к покая́нию приве́л еси́, ме́ртвых пресла́вно воскреша́л еси́, за свя́тость жития́ твоего́ А́нгелы, неви́димо в це́ркви пою́щия и сослужа́щия тебе́, име́л еси́. Си́це у́бо просла́ви тебе́, ве́рнаго Своего́ раба́, Влады́ко Христо́с, я́ко вся та́йная челове́ческая дея́ния дарова́ тебе́ разуме́ти и облича́ти непра́ведно живу́щия. Мно́гим, в ску́дости и недоста́точестве живу́щим, ты усе́рдно помога́л еси́, лю́ди убо́гия изоби́льно во вре́мя гла́да напита́л еси́ и и́на мно́га знаме́ния си́лою в тебе́ живу́щаго Ду́ха Бо́жия сотвори́л еси́. Си́це и нас не оста́ви, святи́телю Христо́в, помина́й нас, чад свои́х, у Престо́ла Вседержи́теля и умоли́ Го́спода, да пода́ст мно́гих на́ших грехо́в проще́ние, безбе́дное и ми́рное житие́ да да́рует нам, кончи́ны же живота́ непосты́дныя и ми́рныя, и блаже́нства ве́чнаго в бу́дущем ве́це сподо́бит нас, да вы́ну возсыла́ем сла́ву и благодаре́ние Отцу́ и Сы́ну и Ду́ху Свято́му, ны́не и при́сно и во ве́ки веко́в.

Молитва вторая:

О всеблаже́нный святи́телю Спиридо́не, вели́кий уго́дниче Христо́в и пресла́вный чудотво́рче! Предстоя́й на Небеси́ Престо́лу Бо́жию с ли́ки А́нгел, при́зри ми́лостивым о́ком на предстоя́щия зде лю́ди и прося́щия си́льныя твоея́ по́мощи. Умоли́ благоутро́бие Человеколю́бца Бо́га, да не осу́дит нас по беззако́ниим на́шим, но да сотвори́т и с на́ми по ми́лости Своей! Испроси́ нам у Христа́ и Бо́га на́шего ми́рное и безмяте́жное житие́, здра́вие душе́вное и теле́сное, земли́ благопло́дие и во всем вся́кое изоби́лие и благоде́нствие, и да не во зло обрати́м блага́я, да́руемая нам от ще́драго Бо́га, но во сла́ву Его́ и прославле́ние твоего́ заступле́ния! Изба́ви всех ве́рою несумне́нною к Бо́гу приходя́щих от вся́ких бед душе́вных и теле́сных, от всех томле́ний и диа́вольских наве́тов! Бу́ди печа́льным уте́шитель, неду́гующим врач, в напа́стех помо́щник, наги́м покрови́тель, вдови́цам засту́пник, си́рым защи́тник, младе́нцем пита́тель, ста́рым укрепи́тель, стра́нствующим путево́ждь, пла́вающим ко́рмчий и исхода́тайствуй всем кре́пкия по́мощи твоея́ тре́бующим вся, я́же ко спасе́нию, поле́зная! Я́ко да, твои́ми моли́твами наставля́еми и соблюда́еми, дости́гнем в ве́чный поко́й и ку́пно с тобо́й просла́вим Бо́га, в Тро́ице Святе́й сла́вимаго, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Молитва третия:

О преблаже́нне святи́телю Спиридо́не! Умоли́ благосе́рдие Человеколю́бца Бо́га, да не осу́дит нас по беззако́нием на́шим, но да сотвори́т с на́ми по ми́лости Свое́й. Испроси́ нам, раба́м Бо́жиим (имя рек), у Христа́ и Бо́га на́шего ми́рное и безмяте́жное житие́, здра́вие душе́вное и теле́сное. Изба́ви нас от вся́ких бед душе́вных и теле́сных, от всех томле́ний и диа́вольских наве́тов. Помина́й нас у престо́ла Вседержи́теля и умоли́ Го́спода, да пода́ст мно́гих на́ших грехо́в проще́ние, безбе́дное и ми́рное житие́, да да́рует нам, кончи́ны же живота́ непосты́дныя и ми́рныя и блаже́нства ве́чнаго в бу́дущем ве́це сподо́бит нас, да непреста́нно возсыла́ем сла́ву и благодаре́ние Отцу́ и Сы́ну и Ду́ху Свято́му, ны́не и при́сно и во ве́ки веко́в.

КАНОН СВЯЩЕННОМУЧЕНИКУ КИПРИАНУ И СВЯТЕЙ МУЧЕНИЦЕ ИУСТИНЕ

Тропарь, глас 4:

И нра́вом прича́стник, / и престо́лом наме́стник апо́столом быв, / дея́ние обре́л еси́, Богодухнове́нне, / в виде́ния восхо́д: / сего́ ра́ди, сло́во и́стины исправля́я, / и ве́ры ра́ди пострада́л еси́ да́же до кро́ве, / священному́чениче Киприа́не, / моли́ Христа́ Бо́га / спасти́ся душа́м на́шим.

Канон святых, глас 4.

Песнь 1.

Ирмос: Мо́ря чермну́ю пучи́ну / невла́жными стопа́ми / дре́вний пешеше́ствовав Изра́иль, / крестообра́зныма Моисе́овыма рука́ма / Амали́кову си́лу в пусты́ни победи́л есть.

Припев: Священному́чениче Киприа́не и му́ченице Иусти́но, моли́те Бо́га о нас.

С Преми́рными чи́нми ны́не водворя́яся, о свяще́нная и Боже́ственная главо́, / с Небесе́ при́зри на благоче́стно пою́щия тя / и твои́ми моли́твами сохраня́й.

Во мра́це неве́дения, преподо́бне, лю́те одержи́м / и душегу́бными страстьми́ пло́ти невоздержа́нием ты разжига́ем, / преложе́ние пресла́вно обре́л еси́ внеза́пу, всеблаже́нне.

Слава: Губи́телей у́бо на седа́лищи пре́жде, о́тче, седе́л еси́ / и на седа́лищи пресви́теров па́ки Христа́ просла́вил еси́, / измени́вся явле́нно Влады́чнею Боже́ственною благода́тию.

И ныне: Де́ва по рождестве́ пребыла́ еси́: / Сама́го бо ро́ждши Творца́ всех и Го́спода, / необы́чно и стра́нно нам я́вльшася те́лом, / Богороди́тельнице Ма́ти Присноде́во.

Песнь 3.

Ирмос: Весели́тся о Тебе́ Це́рковь Твоя́, Христе́, зову́щи: / Ты моя́ кре́пость, Го́споди, / и прибе́жище, и утвержде́ние.

Припев: Священному́чениче Киприа́не и му́ченице Иусти́но, моли́те Бо́га о нас.

Я́ко Па́вел, ко Христу́ / душе́вную любо́вь преложи́в, Киприа́не всему́дре, / того́ учени́к был еси́.

Обручает ти Христо́с, / вме́сто риз стра́стных одея́ние сла́вы да́руя / и возрожде́ния оде́жду.

Слава: Поу́стник по́стнический пре́жде бы́вый терпели́в, / по́слежде, Киприа́не всехва́льне, / свиде́тель И́стины был еси́.

И ныне: Го́сподьственно и и́стинно Тя, Богоро́дицу, ве́рнии почита́ем, / Ты бо Бо́га родила еси́, / плоть бы́вша, Всенепоро́чная.

Го́споди, поми́луй, трижды.

Седален, глас 8. Подобен: Премудрости:

Нака́зан в пре́лести приле́жно, / я́ко Па́вел, зван бысть с Небесе́, / Кресто́м наставля́ем к све́ту зна́ния, / честны́я бо де́вы любо́вию разжига́ем, / тоя́ ра́ди сочета́лся еси́ Зижди́телю челове́ков. / Тем обличи́в не́мощь вра́жию, / с не́ю сподо́бился еси́ ли́ку му́чеников, / Киприа́не, архиере́ев удобре́ние, / моли́ Христа́ Бо́га грехо́в оставле́ние пода́ти / че́ствующим любо́вию святу́ю па́мять твою́.

Слава, и ныне, Богородичен: В напа́сти многоплете́нныя впад / от враг ви́димых и неви́димых, / бу́рею одержи́м безчи́сленных согреше́ний мои́х, / и, я́ко к те́плому заступле́нию и покро́ву моему́, Чи́стая, / ко приста́нищу притека́ю Твоея́ бла́гости. / Те́мже, Пречи́стая, из Тебе́ Воплоще́нному без се́мене / моли́ся приле́жно о всех рабе́х Твои́х, / непреста́нно моля́щихтися, Богоро́дице Пречи́стая, / моля́щи Его́ при́сно согреше́ний оставле́ние дарова́ти / воспева́ющим досто́йно сла́ву Твою́.

Песнь 4.

Ирмос: Вознесе́на Тя ви́девши Це́рковь на Кресте́, / Со́лнце пра́ведное, / ста в чи́не свое́м, / досто́йно взыва́ющи: / сла́ва си́ле Твое́й, Го́споди.

Припев: Священному́чениче Киприа́не и му́ченице Иусти́но, моли́те Бо́га о нас.

Возбну́в, Богогла́се, от неи́стовства пе́рваго, / де́монскую лесть и душетле́нную пре́лесть всю обличи́л еси́ и, ра́дуяся, взыва́л еси́: / сла́ва си́ле Твое́й, Го́споди.

До́блественно Иусти́на укрепля́ема / и Чи́стую Де́ву и Обра́дованную зело́ моля́щи, / се́тей избеже́ и ко́зней же вра́жиих.

Слава: Укрепля́ема ве́рою твоего́ Жениха́ / и Кре́стною си́лою оде́яна, / де́моны нея́тна, вопию́щи, пребыла́ еси́: / сла́ва си́ле Твое́й, Го́споди.

И ныне: И́же естество́м свобо́ден сый, / о́бразом раба́ обнища́ бога́тством бла́гости, Ма́ти Присноде́во, / из Тебе́ по Ипоста́си все прие́мь челове́чество.

Песнь 5.

Ирмос: Ты, Го́споди, мой свет, / в мир прише́л еси́. / Свет Святы́й, обраща́яй из мра́чна неве́дения / ве́рою воспева́ющих Тя.

Припев: Священному́чениче Киприа́не и му́ченице Иусти́но, моли́те Бо́га о нас.

Побо́рницу иму́щи я́ве Чи́стую Богома́терь, обога́щшися, Иусти́но, / честно́е де́вство сохрани́ла еси́ невре́дно.

Одушевле́нный Христо́в и красне́йший о́браз, / почти́м Иусти́ну, / сокрове́нную добро́ту и некра́домое возложе́ние.

Слава: Неве́ста Христо́ва при́сная и нескве́рная, / страда́нием и поще́нием восприе́мши, / пра́ведно сугу́б вене́ц но́сит.

И ныне: Ум А́нгельский и челове́ческий не мо́жет сказа́ти / неизрече́ннаго и пресла́внаго чудесе́ Рождества́ Твоего́, / Всечи́стая.

Песнь 6.

Ирмос: Пожру́ Ти со гла́сом хвале́ния, Го́споди, / Це́рковь вопие́т Ти, / от бесо́вския кро́ве очи́щшися, / ра́ди ми́лости от ребр Твои́х / исте́кшею Кро́вию.

Припев: Священному́чениче Киприа́не и му́ченице Иусти́но, моли́те Бо́га о нас.

Зло́бы дна преиспо́дняго доше́л еси́, / к кра́йнейшей же па́ки доброде́тели, о́тче, / возше́л еси́ на высоту́, / пресла́вно измени́вся Боже́ственным Креще́нием.

Был еси́ служи́тель де́монов пе́рвее, / но Христо́в Богоявле́нный учени́к показа́лся еси́, / при́сною любо́вию жела́ние возлюби́в после́днее.

Слава: Мно́гия ты Влады́це приве́л еси́ му́ченики, / ку́плей велича́йшую явля́я, / кро́вию мале́йшею Ца́рство Небе́сное, Богому́дре, купи́ти.

И ныне: Расто́ргни моя́ плени́цы согреше́ний, Богоневе́сто, грехо́внаго зако́на, / Жи́зни зако́ном свобо́ду да́рующи, / Влады́ку зако́на ро́ждшая.

Го́споди, поми́луй, трижды. Сла́ва, и ны́не:

Кондак, глас 1. Подобен: Лик Ангельский:

От худо́жества волше́бнаго обрати́вся, Богому́дре, / к позна́нию Боже́ственному, / показа́лся еси́ ми́ру врач мудре́йший, / исцеле́ния да́руя че́ствующим тя, Киприа́не со Иусти́ною: / с не́юже моли́ся Человеколю́бцу Влады́це / спасти́ ду́ши на́ша.

Икос: Целе́ний твои́х, свя́те, дарова́ния мне низпосла́в, / и неду́гующее мое́ се́рдце гно́ем грехо́вным / моли́твами твои́ми исцели́, / я́ко да сло́во пе́ния от скве́рных усте́н мои́х ны́не принесу́ ти / и воспою́ боле́зни твоя́, я́же показа́л еси́, священному́чениче, / покая́нием до́брым и блаже́нным и Бо́гу приближа́ющимся. / Того́ бо удержа́н руко́ю, / напра́вился еси́, я́ко по ле́ствице, к Небе́сным, / непреста́нно моля́ся спасти́ ду́ши на́ша.

Песнь 7.

Ирмос: Спасы́й во огни́ Авраа́мския Твоя́ о́троки / и, халде́и уби́в, / я́же пра́вда пра́ведно уловля́ше, / препе́тый Го́споди, / Бо́же оте́ц на́ших, благослове́н еси́.

Припев: Священному́чениче Киприа́не и му́ченице Иусти́но, моли́те Бо́га о нас.

На свяще́нноначальство вшед, / свяще́ннейший о́браз священнонача́льником себе́ и пра́вило яви́л еси́, взыва́я: / препе́тый Го́споди, Бо́же оте́ц на́ших, благослове́н еси́.

Живонача́льныя тебе́ десни́цы и́стинно измене́ние, о́тче, наше́дшее, / му́дра тя сотвори́ Боговеща́теля, пою́ща: / препе́тый Го́споди, Бо́же оте́ц на́ших, благослове́н еси́.

Слава: Ору́жие непобеди́мое нам на проти́внаго, блаже́нне, ты яви́лся еси́, / того́ облича́я ле́сти, пою́щим: / препе́тый Го́споди, Бо́же оте́ц на́ших, благослове́н еси́.

И ныне: Небе́снии ли́цы и Пренебе́снии собо́ри / песносло́вят из Тебе́, Богоро́дице, Рожде́ннаго, зову́ще: / препе́тый Го́споди, Бо́же оте́ц на́ших, благослове́н еси́.

Песнь 8.

Ирмос: Весели́ся, Иерусали́ме, торжеству́йте, лю́бящии Сио́на: / ца́рствуяй бо во ве́ки, Госпо́дь Сил прии́де. / Да благогове́ет вся земля́ от Лица́ Его́ / и да вопие́т: / благослови́те, вся дела́ Госпо́дня, Го́спода.

Припев: Священному́чениче Киприа́не и му́ченице Иусти́но, моли́те Бо́га о нас.

Прему́дро е́ллинския му́дрости небре́гл еси́, сла́вне, / апо́столов же Боже́ственное веща́ние, Ду́хом бряца́емо, о́тче, / и о́гненными язы́ки я́сно изглаша́емо, вопия́л еси́: / благослови́те, вся дела́ Госпо́дня, Го́спода.

Восте́кл еси́ на высо́кая и преми́рная све́тло селе́ния, / Христу́ кро́вию, я́ко же́ртвою непоро́чною, прино́сим, о́тче, / заколе́ние жи́во, прия́тно и благоуго́дно, воспева́я: / благослови́те, вся дела́ Госпо́дня, Го́спода.

Слава: Побежда́еми от в тебе́ все́льшияся благода́ти, / де́монстии полцы́ отгоня́ются и отбега́ют стра́сти неду́гующих, Богому́дре, / ве́рнии же Боже́ственнаго све́та насыща́емся, вопию́ще: / благослови́те, вся дела́ Госпо́дня, Го́спода.

И ныне: Лику́ют со А́нгельскими, Пречи́стая, си́лами о Рождестве́ Твое́м, Богома́ти, / и Богоро́дицу ве́рою Тя имену́ющии: / Ты бо Влады́ку и Изба́вителя нам родила́ еси́, Ему́же пое́м: / благослови́те, вся дела́ Госпо́дня, Го́спода.

Песнь 9.

Ирмос: Е́ва у́бо неду́гом преслуша́ния / кля́тву всели́ла есть, / Ты же, Де́во Богоро́дице, / Прозябе́нием чревоноше́ния ми́рови благослове́ние процвела́ еси́, / тем Тя вси велича́ем.

Припев: Священному́чениче Киприа́не и му́ченице Иусти́но, моли́те Бо́га о нас.

Свы́ше нас, благоче́стно пою́щих тя, назира́еши Боже́ственною благода́тию, / твои́ми моли́твами, Богоглаго́льниче, и ору́жием благоволе́ния венчава́я, / мир и спасе́ние да́руй нам, / я́ко свяще́нноначальник боже́ственнейший.

Тече́ние исцеле́ний оби́льно персть твоя́ лю́бящим тя воздае́т; / тебе́ же, Киприа́не, жены́ Богоно́сны я́ко Боже́ственно сокро́вище прие́млют / и усе́рдно явля́ют сокрове́ннаго, / да вси тебе́ наслади́мся.

Слава: Напра́вити на́ше ко Христу́, пребога́те, ше́ствие дея́нием, / и Богоуго́дным житие́м, и чисте́йшим очище́нием / су́що Бо́жию ти́хость умоли́, я́ко иера́рх сострада́тельнейший.

И ныне: Укрепи́ на́шу душе́вную не́мощь, Богома́ти, си́лою Твое́ю, / разреши́ тяготу́, Пресвята́я, налага́емую рабо́м Твои́м, / ми́ру пра́вды Со́лнце несказа́нно возсия́вшая.

Светилен. Подобен: Жены, услышите:

В волхва́х несосужде́нна и еди́наго пребо́льша, / преме́ншаго нрав и попали́вшаго кни́ги, наставля́ющия ко пре́лести, / и свиде́тельства вене́ц странноле́пно прие́мшаго, / Киприа́на похва́лим, страда́льцев зерца́ло.

Слава, и ныне: Дре́вле божества́ наде́ждею прельсти́вый мя злоко́зненный, / пло́тным предложе́нием прему́дренно па́ки прельща́ется от Де́вы Возсия́вшаго; / и си́це осужде́ние пло́тное пло́тию разреши́ся, / сме́рти умертви́вшейся.

Молитва священномученику Киприану:

О святы́й уго́дниче Бо́жий, священному́чениче Киприа́не, ско́рый помо́щниче и моли́твенниче о всех к тебе́ прибега́ющих! Приими́ от нас, недосто́йных, хвале́ние сие́; испроси́ у Го́спода Бо́га в не́мощех укрепле́ние, в печа́лех уте́шение и всем вся поле́зная в жи́зни на́шей; вознеси́ ко Го́споду благомо́щную твою́ моли́тву, да огради́т нас от паде́ний грехо́вных, да научи́т нас и́стинному покая́нию, да изба́вит нас от плене́ния диа́волъскаго и вся́каго де́йствия духо́в нечи́стых и укроти́т оби́дящих нас. Бу́ди нам кре́пкий побо́рник на вся враги́ ви́димыя и неви́димыя; пода́ждь нам терпе́ние в искуше́ниих и в час кончи́ны на́шея яви́ нам заступле́ние от истяза́телей на возду́шных мыта́рствех; да води́мии тобо́ю, дости́гнем Го́рняго Иерусали́ма и сподо́бимся в Небе́снем Ца́рствии со все́ми святы́ми сла́вити и воспева́ти пресвято́е и́мя Отца́ и Сы́на и Свята́го Ду́ха во ве́ки веко́в. Ами́нь.

Молитва святым Киприану и Иустине:

О святи́и священному́чениче Киприа́не и му́ченице Иусти́на! Внемли́те смире́нному моле́нию на́шему. А́ще бо вре́менное житие́ ва́ше му́ченически за Христа́ сконча́ли есте́, но ду́хом от нас не отступа́ете есте́, при́сно по за́поведем Госпо́дним ше́ствовати нас науча́юще и крест свой терпели́во нести́ нам посо́бствующе. Се, дерзнове́ние ко Христу́ Бо́гу и Пречи́стей Его́ Ма́тери стяжа́ли есте́. Те́мже и ны́не бу́дите моли́твенницы и хода́таи о нас, недосто́йных (имя рек). Бу́дите нам засту́пницы кре́пции, да заступле́нием ва́шим сохраня́еми невреди́мы от бесо́в, волхво́в и от челове́к злых пребу́дем, сла́вяще Святу́ю Тро́ицу, Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.

КАНОН ВЕЛИКОМУЧЕНИКУ И ЦЕЛИТЕЛЮ ПАНТЕЛЕИМОНУ

Тропарь, глас 3:

Страстоте́рпче святы́й и целе́бниче Пантелеи́моне, / моли́ ми́лостиваго Бо́га, / да прегреше́ний оставле́ние / пода́ст душа́м на́шим.

Канон святаго, глас 2.

Песнь 1.

Ирмос: Во глубине́ постла́ иногда́ / фараони́тское всево́инство преоруже́нная си́ла, / вопло́щшееся же Сло́во всезло́бный грех потреби́ло есть; / препросла́вленный Госпо́дь сла́вно бо просла́вися.

Припев: Святы́й великому́чениче и целе́бниче Пантелеи́моне, моли́ Бо́га о нас.

Присту́пль усе́рдно ко Христу́, / пре́жде сконча́ния, е́же о Христе́, мертвеца́ пе́рвее воздви́гл еси́. / Ны́не же мя, пребога́те, умерщвле́на грехо́вным угрызе́нием, / твои́ми моли́твами, о Пантелеи́моне, оживотвори́.

Возсия́, я́коже звезда́, нося́ в ю́ности ста́ростный и богому́дрый ра́зум, / добро́тою же те́ла благоле́пие души́ стяжа́в, / препросла́вленному Сло́ву яви́лся еси́ прекра́сен.

Умертви́вся ми́ру и во Христа́, блаже́нне, оде́явся ба́нею Креще́ния, / был еси́ богоно́сен орга́н и прия́телище де́йства Ду́ху, / всем угожда́я, всем уврачу́я неду́ги.

Слава: Прему́дрость сестру́ себе́ притвори́в и прича́стник жи́зни ведо́м, / от нея́ почти́лся еси́ / и венце́м дарова́ний украси́лся еси́, / Боже́ственныя зари́, блаже́нне, облиста́я све́тлостию.

И ныне: Благослове́ньми, Пресвята́я Чи́стая, / естество́, уда́лено преслуша́нием бы́вшее от Зижди́теля, / Христа́ ро́ждши, венча́ла еси́ и тле́ния свободи́ла еси́. / Те́мже, ра́дующеся, вси в́ернии, Тя ублажа́ем.

Песнь 3.

Ирмос: Процвела́ есть пусты́ня, я́ко крин, Го́споди, / язы́ческая неплодя́щая Це́рковь / прише́ствием Твои́м, / в не́йже утверди́ся мое́ се́рдце.

Припев: Святы́й великому́чениче и целе́бниче Пантелеи́моне, моли́ Бо́га о нас.

Словеса́ Ду́ха услы́шав, / был еси́ я́ко земля́ до́брая и благопло́дная, / прие́мый се́мя многоце́нно / и роди́вый, треблаже́нне, спасе́ние душа́м.

Умертви́л еси́ мудрова́ние змии́на угрызе́ния и ду́шу оживи́л еси́, / богодохнове́нно возроди́вся и Царю́ всех предстоя́.

Посрами́л еси́ безбо́жное мучи́телей повеле́ние и ко Христу́ прите́кл еси́, / вме́сто всех Сего́ стяжа́в, / и был еси́, Богому́дре, вели́кий купе́ц.

Слава: Ма́тере твоея́ благоче́стие возлю́бль, сла́вне, / о́тчее же возненави́дел еси́ безбо́жие многомяте́жное, / я́ко име́я ра́зум, лу́чшее избра́л еси́.

И ныне: Нося́й Боже́ственным манове́нием всю тварь, Госпо́дь / на руку́ но́сится Твое́ю, Де́во. / Его́же ны́не моли́ изба́вити от бед пою́щия Тя.

Го́споди, поми́луй, трижды.

Седален, глас 4. Подобен: Удивися Иосиф:

До́бляго страда́льца благоче́стия Христо́ва восхва́лим све́тло Пантелеи́мона, ве́рнии, / псалмы́, и пе́нии и пе́сньми духо́вными, / и́мже мучи́тельство неви́димаго врага́ си́лою Боже́ственною попра́ся / и неду́гов исцеле́ние бога́тно от Го́спода дарова́ся / творя́щим ве́рно Боже́ственный и честны́й пра́здник его́.

Слава, глас тойже: Ермола́я му́драго, му́чениче, слове́с послу́шал еси́ / и оста́вил еси́ а́бие худо́жество земно́е, я́ко ме́рзко, я́ко не кре́пко, я́ко губи́тельно, / име́я Христо́вы стра́сти, уче́ния жи́зни в се́рдце твое́м, / неисце́льно стра́ждущим здра́вие, Пантелеи́моне, да́руя. / Те́мже моли́ся о творя́щих любо́вию па́мять твою́.

И ныне, Богородичен: Треволне́нии страстны́ми, безсо́вестный аз, обурева́емь, Чи́стая, призыва́ю Тя те́пле: / да не пре́зриши мене́, окая́ннаго, поги́бнути, бе́здну милосе́рдия ро́ждши, / ра́зве бо Тебе́ наде́жды не и́мам, / да не враго́м у́бо обра́дование и смех, наде́явся на Тя, явлю́ся, / и́бо мо́жеши, ели́ко хо́щеши, я́ко Ма́ти су́щи всех Бо́га.

Песнь 4.

Припев: Святы́й великому́чениче и целе́бниче Пантелеи́моне, моли́ Бо́га о нас.

После́дуя Влады́це любо́вию, / расточи́л еси́ бога́тство ни́щим, / себе́ обнажа́я к страда́нию, / е́же и проше́л еси́, ве́чныя наде́жды прови́дев.

Хвале́ния Бо́гу же́ртву прине́сл еси́, / я́ве возгнуша́вся и́дольских треб, / все же шата́ние нечести́вых, страстоте́рпче, попра́л еси́.

Снеда́емым за́вистию и гне́вом бори́мым, / непобори́мую си́лу сим предста́вил еси́, му́чениче, / и победи́л еси́ злочести́вое томле́ние, вооружи́вся.

Слава: И́же ста́рца Симео́на рука́ми держи́мый, / ста́рца тя глаго́лы, Пантелеи́моне, улови́ к Боже́ственному разуме́нию / и ко мно́гих спасе́нию и избавле́нию.

И ныне: Ю́ныя и де́вы во след Тебе́ потеко́ша, / Де́ву и Отрокови́цу Тя и Ма́терь зря́ще, / еди́на бо обоя́ во еди́но собрала́ еси́ несказа́нно, Богоневе́сто.

Песнь 5.

Ирмос: Просвеще́ние во тьме лежа́щих, / спасе́ние отча́янных, Христе́, Спа́се мой, / к Тебе́ у́тренюю, Царю́ мира, / просвети́ мя сия́нием Твои́м, / ино́го бо, ра́зве Тебе́, бо́га не зна́ю.

Припев: Святы́й великому́чениче и целе́бниче Пантелеи́моне, моли́ Бо́га о нас.

Ра́достно по́двиги подъя́л еси́ муче́ния, огражде́н си́лою Боже́ственною, / и, терпе́нием тве́рдо муче́ния подъе́мля, ра́дуяся, вопия́л еси́: / ино́го бо, ра́зве Тебе́, бо́га не зна́ем.

На по́двиг борьбы́ вступи́в, блаже́нне, Боже́ственною си́лою превозмо́гл еси́ / безбо́жных нечести́вое тира́нство и неи́стовство идолослуже́ния, / обле́кся во Христа́, Судию́ и Венча́теля по́двигов.

Ю́ношеско ты противле́ние име́я и тве́рдостию души́ возставле́ние стяжа́в, / вся́ку я́зву до́блественне претерпе́л еси́, / и му́жеским, блаже́нне, умо́м, / благода́тию Боже́ственнаго Креста́ укрепля́емь.

Слава: Несогла́сное отри́ну веща́ние заблу́ждших, / Небе́сным уче́нием страда́лец и мно́гим спасе́нию пресла́вну бысть вино́вник, / Твои́м де́йством, Христе́, укрепля́емь.

И ныне: Рече́ния прему́дрых, и гада́ния вся, Препросла́вленная, / и проро́к прорече́ния Тя прообража́ху проявле́нно напосле́док бьѓги Бо́жию Роди́тельницу, / ины́я бо, ра́зве Тебе́, чи́стыя не знаем.

Песнь 6.

Припев: Святы́й великому́чениче и целе́бниче Пантелеи́моне, моли́ Бо́га о нас.

И́долы ле́стныя оплева́л еси́ / и возноси́мую пре́лесть упраздни́л еси́, / чудоде́йствуя ди́вная и творя́ исцеле́ния, Богому́дре.

Вене́чник показа́лся еси́, всеизря́дне, / сквозе́ бо огнь ты проше́л еси́ и во́ду, / и, на колеси́ протяза́емь, / пресла́вно погуби́л еси́ безу́мныя.

Слава: Мучи́телей суровство́ низложи́в, / неудо́бь носи́мая бие́ния теле́сная душе́вною кре́постию, / пострада́л еси́, Богому́дре, благода́тию.

И ныне: Содержа́й концы́ земли́, я́ко Бог, / Твои́ми, рука́ми, Чи́стая, держи́тся описа́нием те́ла, / И́же Боже́ственным зра́ком неопи́санный.

Го́споди, поми́луй, трижды. Сла́ва, и ны́не:

Кондак, глас 5:

Подража́тель сый Ми́лостиваго / и исцеле́ний благода́ть от Него́ прие́м, / страстоте́рпче и му́чениче Христа́ Бо́га, / моли́твами твои́ми душе́вныя на́ша неду́ги исцели́, / отгоня́ при́сно борца́ собла́зны от вопию́щих ве́рно: / спаси́ ны, Го́споди.

Икос: Безсре́бренника па́мять, до́бляго страда́льца, ве́рнаго целе́бника, / благоче́стно воспое́м, христолю́бцы, да прии́мем ми́лость, / па́че же оскве́рншии, я́коже и аз, своя́ хра́мы, / душа́м бо и те́лом, возлю́бленнии, исцеле́ния подава́ет. / Потщи́мся у́бо, ве́рная бра́тия, в сердца́х на́ших име́ти его́ кре́пость, / избавля́юща от ле́сти вопию́щия: / спаси́ ны, Го́споди.

Песнь 7.

Ирмос: Те́лу злато́му прему́дрый де́ти не послужи́ша, / и в пла́мень са́ми поидо́ша, / и бо́ги их обруга́ша, / среди́ пла́мене возопи́ша, и ороси́ я́ А́нгел: / услы́шася уже́ уст ва́ших моли́тва.

Припев: Святы́й великому́чениче и целе́бниче Пантелеи́моне, моли́ Бо́га о нас.

Зако́нно стражда́ и победи́в врага́, / приста́нище благоути́шно су́щим в мо́ри, сла́вне, обурева́емым был еси́, / свет же су́щим во тьме жития́, / и пе́ти научи́л еси́: / благослове́н Бог оте́ц на́ших.

Блаже́н еси́, и добро́ тебе́ есть ны́не, преблаже́нне, / восприи́мшему пребога́тную и блаже́нную наде́жду твою́, / угото́ванную ве́рою Го́сподеви зову́щим: / благослове́н Бог оте́ц на́ших.

Слава: Святы́х ду́ши, и пра́ведных ли́цы, / и Безпло́тных чи́ни А́нгельстии прия́ша слико́вника тя, блаже́нне, / мече́м бо усе́чен быв во главу́, пое́ши, ра́дуяся: / благослове́н Бог оте́ц на́ших.

И ныне: Ору́жие, е́же пре́жде дре́ва живо́тнаго нас отлучи́вшее, / ны́не, обраща́емо, прие́млет зна́менавшияся Кро́вию, из ребр Сы́на Твоего́ изше́дшею, Пренепоро́чная. / Благослове́на еси́, Бо́га пло́тию ро́ждшая.

Песнь 8.

Ирмос: В пещь о́гненную ко отроко́м евре́йским снизше́дшаго / и пла́мень в ро́су прело́жшаго Бо́га / по́йте, дела́, я́ко Го́спода / и превозноси́те во вся ве́ки.

Припев: Святы́й великому́чениче и целе́бниче Пантелеи́моне, моли́ Бо́га о нас.

Благоприя́тное твоея́ хи́трости душе́вное ослепле́ние о́тчее исцеля́ет, / подаю́щее свет ве́рою, преблаже́нне, притека́ющим / и ко Спа́су Христу́ наставля́ющее.

За Христа́ закла́н быв, к ве́чней жи́зни премину́л еси́ / и Богозва́нен яви́лся еси́ именова́нием Бо́жиим, Богому́дре. / Тем почита́ем тя и превозно́сим Христа́ во ве́ки.

Слава: Вити́йское отложи́в лю́тое му́дрых глумле́ние, / Христо́вым призыва́нием боле́зненных страсте́й коре́ния посека́еши, / исцеля́я превознося́щия Христа́ во ве́ки.

И ныне: Безсме́ртия зарю́ ве́мы исто́чника Тя, Богоро́дице, / я́ко ро́ждшую Сло́во Безсме́ртнаго Отца́, всех сме́рти избавля́ющего, / превознося́щих Его́ во ве́ки.

Песнь 9.

Припев: Святы́й великому́чениче и целе́бниче Пантелеи́моне, моли́ Бо́га о нас.

Преста́вился еси́, ра́дуяся, к жела́нию коне́чному, / иде́же всели́вcя, преблаже́нне, блаже́нный коне́ц прия́ти вои́стинну сподо́бился еси́, / сый со Влады́кою твои́м во ве́ки безконе́чныя.

Жела́ние получи́л еси́ и любве́ твоея́ исполне́ние, / ка́плющей еще́ те́плей кро́ви, за Христа́ излия́вшейся, / от Него́же, ра́дуяся, прия́л еси́ венцы́ по́двигов твои́х.

Львов уста́ и звере́й зия́ния, я́коже Дании́л дре́вле, ты обузда́л еси́, / весть бо стыде́тися, му́чениче, доброде́тели и безслове́сное естество́. / Те́мже тя, пресла́вне, соше́дшеся, ублажа́ем.

Слава: Бога́тную бла́гость тебе́ Христо́с да́рует, / сокро́вище исцеле́ний нам да́руя / и всеми́лостива изволе́нием тя пода́в вся́кому скорбя́щему, / и приста́нище ти́хое, и предста́теля, и защи́тителя.

И ныне: Я́ко руно́, Всенепоро́чная, дождь Небе́сный во утро́бе заче́нши, / нам родила́ еси́ тишину́ Даю́щаго / я́ко Бо́га Того́ пою́щим / и Тя, Всепе́тую Богоро́дицу, пропове́дающим.

Светилен. Подобен: Учеником:

Ми́лостивую твою́ ду́шу прови́де Бог, Пантелеи́мона тя пропове́да, / безсре́бренно бо тре́бующим исцеле́ние источа́еши, свя́те, / мучи́телей свире́пство терпе́нием твои́м победи́вый.

Слава, и ныне, Богородичен: Богоро́дицу пе́сньми немо́лчными благоче́стно пое́м, вопию́ще: / ра́дуйся, горо́ свята́я, / ра́дуйся, престо́ле огнено́сный всех Царя́, / ра́дуйся, похвало́ А́нгелов и святы́х сла́во.

Молитва:

О, вели́кий Христо́в уго́дниче и пресла́вный целе́бниче, великому́чениче Пантелеи́моне! Душе́ю на Небеси́ Престо́лу Бо́жию предстоя́й и Триипоста́сныя сла́вы Его́ наслажда́яйся, те́лом же и ли́ком святы́м на земли́ в Боже́ственных хра́мех почива́яй и да́нною ти свы́ше благода́тию разли́чная источа́яй чудеса́, при́зри ми́лостивым твои́м о́ком на предстоя́щия лю́ди и честне́й твое́й ико́не уми́льно моля́щияся и прося́щия от тебе́ целе́бныя по́мощи и заступле́ния. Простри́ ко Го́споду Бо́гу на́шему те́плыя своя́ моли́твы и испроси́ душа́м на́шим оставле́ние согреше́ний. Се бо мы за беззако́ния на́ша не сме́юще возвести́ оче́с на́ших к высоте́ Небе́сней, ниже́ вознести́ глас моле́бный к Его́ в Божестве́ непристу́пней сла́ве, се́рдцем сокруше́нным и ду́хом смире́нным тебе́, хода́тая ми́лостива ко Влады́це и моли́твенника за ны, гре́шныя, призыва́ем, я́ко ты прия́л еси́ благода́ть от Него́ неду́ги отгоня́ти и стра́сти исцеля́ти. Тебе́ у́бо про́сим: не пре́зри нас, недосто́йных, моля́щихся тебе́ и твоея́ по́мощи тре́бующих. Бу́ди нам в печа́лех уте́шитель, в неду́зех лю́тых стра́ждущим врач, напа́ствуемым ско́рый покрови́тель, очесе́м неду́гующим прозре́ния да́тель, ссу́щим и младе́нцем в ско́рбех гото́вейший предста́тель и исцели́тель. Исхода́тайствуй всем вся, я́же ко спасе́нию поле́зная, я́ко да твои́ми ко Го́споду Бо́гу моли́твами получи́вше благода́ть и ми́лость, просла́вим всех благи́х Исто́чника и Даропода́теля, Бо́га Еди́наго в Тро́ице Святе́й сла́вимаго, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

КАНОН СВЯТОМУ МУЧЕНИКУ ТРИФОНУ

Тропарь, глас 4:

Му́ченик Твой, Го́споди, Три́фон, / во страда́нии свое́м вене́ц прия́т нетле́нный от Тебе́, Бо́га на́шего: / име́яй бо кре́пость Твою́, / мучи́телей низложи́, / сокруши́ и де́монов немощны́я де́рзости. / Того́ моли́твами / спаси́ ду́ши на́ша.

Ин тропарь, глас 4:

Пи́щи Боже́ственныя, треблаже́нне, / наслажда́яся на Небесе́х неоску́дно, / сла́вящих пе́сньми па́мять твою́ покры́й / и сохрани́ от вся́кия ну́жды, / отжени́ вредя́щих ни́вам живо́тных, / да тебе́ от любве́ вопие́м всегда́: / ра́дуйся, Три́фоне, му́чеников укрепле́ние.

Канон мученика, глас 8.

Песнь 1.

Ирмос: Во́ду проше́д, я́ко су́шу, / и еги́петскаго зла избежа́в, / изра́ильтянин вопия́ше: / Изба́вителю и Бо́гу на́шему пои́м.

Припев: Святы́й му́чениче Три́фоне, моли́ Бо́га о нас.

Вои́стину Боже́ственныя на Небесе́х сла́дости наслажда́яся, / я́ко непобеди́м страда́лец, / твои́ми моли́твами ду́шу мою́ изба́ви от страст́ей смуще́ния.

Глаго́лы Боже́ственными огласи́вся, / соверши́л еси́ сия́ пресла́вне де́ятельно, / святы́ню возлюби́в и целому́дрие облобыза́в.

Слава: Был еси́ и́стинно па́стырь, / пасы́й души́ твоея́ в му́дрости помышле́ния, / ду́ши обраща́я заблужда́ющия / и Бо́гу приводя́, сла́вне.

И ныне: Просвеща́еши мя сия́нием мы́сленным, / осия́ние сла́вы ро́ждшая О́тчее, / Всенепоро́чная Отрокови́це, / и мрак грехо́вный разори́.

Песнь 3.

Ирмос: Ты еси́ утвержде́ние притека́ющих к Тебе́, Го́споди, / Ты еси́ Свет омраче́нных, / и пое́т Тя дух мой.

Припев: Святы́й му́чениче Три́фоне, моли́ Бо́га о нас.

Притупи́л еси́ си́лу го́рдаго, / сла́вный му́чениче Христо́в, / свы́ше оде́явся си́лою.

Пло́тию обложе́н, / шата́ния безпло́тнаго угаси́л еси́ врага́ / и воплоще́ннаго Бо́га Сло́ва пропове́дал еси́.

Слава: Еди́ным то́кмо прише́ствием твои́м / ду́хи лука́вствия отгоня́ются, / Ду́ха Свята́го гони́ми благода́тию.

И ныне: Име́я Тя по́мощь, не постыжду́ся, / Пречи́стая Ма́ти Бо́жия, / име́я Тя предста́тельницу Жи́зни моея́, спасу́ся.

Го́споди, поми́луй, трижды.

Седален, глас 4. Подобен: Скоро предвари:

Боле́зньми, блаже́нне, наслажда́яся плотски́ми, / Боже́ственную и неболе́зненную пи́щу досто́йно восприя́л еси́, / вене́ц безсме́ртия от Бо́га прие́м. / Те́мже и исцеле́ний ре́ки источа́еши / любо́вию прибега́ющим, му́чениче, в кров твой.

Песнь 4.

Припев: Святы́й му́чениче Три́фоне, моли́ Бо́га о нас.

Зря́щих удиви́л еси́ терпе́ния, блаже́нне, тве́рдостию: / му́ки бо претерпе́л еси́, / я́ко в чужде́м стражда́ телеси́, / му́дре Три́фоне.

Пита́лся еси́, блаже́нне, ра́нами боле́зней, бие́мь, / ны́не же наслажда́ешися чи́стее, / присносу́щныя сла́вы насыща́яся.

Слава: Стру́жему телеси́ твоему́ / желе́зных ногте́й острото́ю, / вжиля́шеся, чу́дне, твоея́ души́ кре́пость Боже́ственною благода́тию.

И ныне: На Тя упова́ние мое́ все возлага́ю, / Ма́ти Де́во: / ду́шу мою́ сохрани́, я́же Бо́га ро́ждшая, Спа́са моего́.

Песнь 5.

Ирмос: У́тренююще, вопие́м Ти: / Го́споди, спаси́ ны, / Ты бо еси́ Бог наш, / ра́зве Тебе́, ино́го не ве́мы.

Припев: Святы́й му́чениче Три́фоне, моли́ Бо́га о нас.

Куми́ры преле́стныя упраздни́л еси́, страстоте́рпче, / то́кмо бо возлюби́л еси́ / Христо́ву о́бразу покланя́тися.

Разуме́в пресве́тлую, сла́вне страстоте́рпче, / благода́ть Бо́га на́шего, / тоя́ ра́ди пострада́л еси́.

Слава: Боже́ственною озари́вся благода́тию, / усе́рдно, страда́льче, / Христа́ ра́ди пострада́л еси́.

И ныне: Неизрече́нно бысть зача́тие Твое́, / и Рождество́ несказа́нно: / пребыла́ бо еси́ Чи́стая Присноде́ва.

Песнь 6.

Ирмос: Очи́сти мя, Спа́се, / мно́га бо беззако́ния моя́, / и из глубины́ зол возведи́, молю́ся, / к Тебе́ бо возопи́х, и услы́ши мя, / Бо́же спасе́ния моего́.

Припев: Святы́й му́чениче Три́фоне, моли́ Бо́га о нас.

Изсуши́в ме́рзкия же́ртвы, / и приноше́ния скве́рная, и неи́стовства и́дольская, / твои́ми кровьми́, сла́вне, напои́л еси́ / вся церко́вная благоро́дная, Три́фоне, прозябе́ния.

Слава: Стру́пи му́ченичестии, я́ко ми́ро, благоуха́ют, / кровь страда́лец источа́ет исцеле́ния, / оста́нцы же те́ла ду́ши освяща́ют / ве́рою каса́ющихся им.

И ныне: Я́ко одушевле́н киво́т, / прия́ла еси́ Сло́во Безнача́льное, / я́ко Свято́е Святи́лище, Зижди́теля вмести́ла еси́, / я́ко Престо́л огнезра́чен, но́сиши Влады́ку, Богома́ти, всея́ тва́ри.

Го́споди, поми́луй, трижды. Сла́ва, и ны́не:

Кондак, глас 8. Подобен: Яко начатки:

Тро́ическою тве́рдостию / многобо́жие разруши́л еси́ от коне́ц, всесла́вне, / че́стен во Христе́ быв, и, победи́в мучи́тели во Христе́ Спаси́теле, / вене́ц прия́л еси́ му́ченичества твоего́ / и дарова́ния Боже́ственных исцеле́ний, / я́ко непобеди́мь.

Икос: Свяще́нная трапе́за предлага́ется, / празднолю́бных собо́р днесь, предпра́зднственная нося́щи зна́мения, / Го́спода четыредесятодне́вна, из Де́вы стра́шное рождество́, / и ста́рца честна́го объя́тие, / и че́стна страда́льца па́мять, / Самаго бо ра́ди Христа́ сконча́ся победоно́сно, / я́ко непобеди́мь.

Песнь 7.

Ирмос: От Иуде́и доше́дше, о́троцы, / в Вавило́не иногда́ / ве́рою Тро́йческою пла́мень пе́щный попра́ша, пою́ще: / отце́в Бо́же, благослове́н еси́.

Припев: Святы́й му́чениче Три́фоне, моли́ Бо́га о нас.

Венцено́сец, лику́еши с ли́ки му́ченик, веселя́ся, / пре́лесть бо победи́в сло́вом и́стинным, / воспева́еши, ра́дуяся: / оте́ц на́ших Бо́же, благослове́н еси́.

Слава: Влады́ка вся́ческих Свои́ми страда́ньми венча́ет му́ченика / и сего́ водворя́ет в се́лех Небе́сных, / зову́ща и глаго́люща: / оте́ц на́ших Бо́же, благослове́н еси́.

И ныне: Мла́да нося́щи Младе́нца, / пре́жде всех век Бо́га, Всенепоро́чная, из Тебе́ воплоще́нна, / не преста́й моля́щи спасти́ пою́щия: / оте́ц на́ших Бо́же, благослове́н еси́.

Песнь 8.

Ирмос: Седмери́цею пещь / халде́йский мучи́тель, / Богочести́вым неи́стовно разжже́; / си́лою же лу́чшею спасе́ны, сия́ ви́дев, / Творцу́ и Изба́вителю вопия́ше: / о́троцы, благослови́те, / свяще́нницы, воспо́йте, / лю́дие, превозноси́те во вся ве́ки.

Припев: Святы́й му́чениче Три́фоне, моли́ Бо́га о нас.

Да́же до усекнове́ния и опале́ния, / да́же до кровепроли́тия, / да́же и до сме́ртныя кончи́ны пострада́л еси́, / сопротивля́яся проти́ву греху́, му́чениче Христо́в, / ны́не же, жизнь во Христе́ сокрове́нную прие́м, взыва́еши: / свяще́нницы, благослови́те, / лю́дие, превозноси́те во вся ве́ки.

На земли́ подвиза́лся еси́, с нечести́выми боря́ся, / проти́ву ле́стней и богобо́рней ле́сти го́рце ну́дящим; / на Небесе́х же, Три́фоне, наслажда́ешися, вене́ц нося́, / и со А́нгелы лику́еши, поя́: / о́троцы, благослови́те, / свяще́нницы, воспо́йте, / лю́дие, превозноси́те Го́спода во ве́ки.

Слава: Мучи́тельское изобличи́л еси́ безбо́жие, всему́дре, / и де́монское богобо́рство угаси́л еси́ струя́ми крове́й твои́х; / в Тро́ице Еди́наго Бо́га достоле́пне и чи́сте возвеща́я / и че́ствуя, взыва́л еси́: / о́троцы, благослови́те, / свяще́нницы, воспо́йте, / лю́дие, превозноси́те Го́спода во ве́ки.

И ныне: Глаго́лом Твои́м после́дующе, / ублажа́ем, Пречи́стая, Тя, Блаже́нную, / пло́тию ро́ждшую вои́стину Блаже́ннаго, / Све́та живу́щаго незаходи́маго, / и Светонаста́вника, и Светода́вца Влады́ку. / Его́же о́троцы благословя́т, / свяще́нницы воспева́ют / и превозно́сят во вся ве́ки.

Песнь 9.

Ирмос: Тя, неискусобра́чную Ма́терь Бо́га Вы́шняго, / Тя, па́че ума́ ро́ждшую сло́вом вои́стинну Бо́га, / вы́шшую Пречи́стых сил, / немо́лчными славословле́нии велича́ем.

Припев: Святы́й му́чениче Три́фоне, моли́ Бо́га о нас.

Па́че ви́димых му́ченическое ча́яние по́лно безсме́ртнаго наслажде́ния: / ви́дится сих наде́жда, полна́ благоуха́ния, / и ра́дости, и све́тлости неизрече́нныя. / Те́мже досто́йно ублажа́ются.

Свет был еси́ вторы́й, к Све́ту пе́рвому прибли́жився, / заре́ю Его́ просвеща́емь и вообража́емь, Три́фоне му́дре, / и Того́ пода́тельными светлостьми́ сия́я; / тем тя вси ублажа́ем.

Слава: Яви́лся еси́ неужа́сен в по́двизех, страстоте́рпче, / яви́лся еси́ и́стинно тезоимени́т Боже́ственней и святе́й пи́щи, / ея́же ны́не восприе́мля и я́сно наслажда́яся, / спасе́ние чту́щим тя нам испроси́.

И ныне: Умертви́ мудрова́ние, Богороди́тельнице, пло́ти моея́ / и оживи́ душе́вное умерщвле́ние де́йством И́стинныя Жи́зни, / из Тебе́ ро́ждшияся пло́тию за неизрече́нное благоутро́бие / и спасе́ние пою́щих Тя.

Светилен:

Пи́щи наслажда́яся пресла́вныя и Боже́ственныя, / А́нгелом еди́ножи́тель был еси́, блаже́нне: / гу́си пасы́й в лузе́х, от Бо́га прия́л еси́ благода́ть исцеле́ний, / Три́фоне великому́чениче, / исцеля́ти челове́ческия не́мощи и неду́ги.

Молитва:

О, святы́й му́чениче Христо́в Три́фоне, ско́рый помо́щниче всем, к тебе́ прибега́ющим и моля́щимся пред святы́м твои́м о́бразом скоропослу́шный предста́телю! Услы́ши у́бо ны́не и на вся́кий час моле́ние нас, недосто́йных рабо́в твои́х, почита́ющих святу́ю па́мять твою́. Ты у́бо, уго́дниче Христо́в, сам обеща́лся еси́ пре́жде исхо́да твоего́ от жития́ сего́ тле́ннаго моли́тися за ны ко Го́споду и испроси́л еси́ у Него́ дар сей: а́ще кто в ко́ей-ли́бо нужде́ и печа́ли свое́й призыва́ти начне́т свято́е и́мя твое́, той да изба́влен бу́дет от вся́каго прило́га зла́го. И я́коже ты иногда́ дщерь царе́ву в Ри́ме гра́де от диа́вола му́чиму исцели́л еси́, си́це и нас от лю́тых его́ ко́зней сохрани́ во вся дни живота́ на́шего, наипа́че же в день стра́шный после́дняго на́шего издыха́ния предста́тельствуй о нас, егда́ те́мнии зра́ки лука́вых бе́сов окружа́ти и устраша́ти нас начну́т. Бу́ди нам тогда́ помо́щник и ско́рый прогони́тель лука́вых бе́сов, и к Ца́рствию Небе́сному предводи́тель, иде́же ты ны́не предстои́ши с ли́ком святы́х у Престо́ла Бо́жия, моли́ Го́спода, да сподо́бит и нас прича́стниками бы́ти присносу́щнаго весе́лия и ра́дости, да с тобо́ю ку́пно удосто́имся сла́вити Отца́ и Сы́на и Свята́го Уте́шителя Ду́ха во ве́ки. Ами́нь.

Молитва иная:

О святы́й му́чениче Христо́в Три́фоне, услы́ши ны́не и на вся́кий час моле́ние нас, раб Бо́жиих (имя рек), и предста́тельствуй о нас пред Го́сподем. Ты не́когда дщерь царе́ву, во гра́де Ри́ме от диа́вола му́чиму, исцели́л еси́: сице и нас от лютых его козней сохрани во вся дни жития нашего, наипа́че же в день после́дняго на́шего издыха́ния предста́тельствуй о нас. Моли́ Го́спода, да сподо́бит и нас прича́стники бы́ти присносу́щнаго весе́лия и ра́дости, да с тобо́ю ку́пно удосто́имся сла́вити Отца́ и Сы́на и Свята́го Уте́шителя Ду́ха во ве́ки веко́в.

КАНОН ПРЕПОДОБНОМУ СЕРГИЮ, ИГУМЕНУ РАДОНЕЖСКОМУ И ВСЕЯ РОССИИ ЧУДОТВОРЦУ

Тропарь, глас 4:

И́же доброде́телей подви́жник, / я́ко и́стинный во́ин Христа́ Бо́га, / на стра́сти вельми́ подвиза́лся еси́ в жи́зни вре́менней, / в пе́ниих, бде́ниих же и поще́ниих о́браз быв твои́м ученико́м; / те́мже и всели́ся в тя Пресвяты́й Дух, / Его́же де́йствием све́тло укра́шен еси́. / Но я́ко име́я дерзнове́ние ко Святе́й Тро́ице, / помина́й ста́до, е́же собра́л еси́, му́дре, / и не забу́ди, я́коже обеща́лся еси́, / посеща́я чад твои́х, / Се́ргие преподо́бне, о́тче наш.

Ин тропарь, глас 8:

От ю́ности восприя́л еси́ Христа́ в души́ твое́й, преподо́бне, / и па́че всего́ вожделе́л еси́ мирска́го мяте́жа уклони́тися, / му́жески в пусты́ню всели́лся еси́ / и ча́да послуша́ния в ней, плоды́ смире́ния, возрасти́л еси́. / Тем быв Тро́ице вселе́ние, / чудесы́ твои́ми всех просвети́л еси́, приходя́щих к тебе́ ве́рою, / и исцеле́ния всем подая́ оби́льно. / О́тче наш Се́ргие, моли́ Христа́ Бо́га, да спасе́т ду́ши на́ша.

Канон преподобнаго, глас 8.

Песнь 1

Ирмос: Колесницегони́теля фарао́ня погрузи́ / чудотворя́й иногда́ / Моисе́йский жезл, крестообра́зно порази́в / и раздели́в мо́ре, / Изра́иля же беглеца́, пешехо́дца спасе́, / песнь Бо́гови воспева́юща.

Припев: Преподо́бне о́тче наш Се́ргие, моли́ Бо́га о нас.

Христа́, нас ра́ди во́лею смири́вшагося да́же до ра́бия о́браза, подража́в, / возлюбил еси́ смире́ние / и, зе́льным бде́нием и моли́твами душегу́бныя стра́сти умертви́в, / на го́ру безстра́стия возше́л еси́, Се́ргие пребога́те.

Я́ко свети́льник све́та, / твою́ ду́шу сле́зными пото́ки украша́я, / и друга́го Исаа́ка подо́бно сам себе́ возне́сл еси́, преподо́бне, / и се́рдце твое́ Бо́гу поже́рл еси́.

Слава: И́же во чре́ве ма́терни трикра́ты проглаше́нием / Тро́ицы служи́тель показа́лся еси́ / и, Трисо́лнечным све́том озаря́емь, / де́монская ополче́ния, я́ко паучи́ну, разори́л еси́, преблаже́нне Се́ргие.

И ныне: Зако́нов кроме́ есте́ственных родила́ еси́ Законода́вца Бо́га и Челове́ка бы́вша, / Того́, я́ко Бла́га, моли́, Всенепоро́чная, / на́ша беззако́ния презре́ти, вопию́щих всегда́: / пои́м Го́споду, сла́вно бо просла́вися.

Песнь 3

Ирмос: Утвержде́й в нача́ле Небеса́ ра́зумом / и зе́млю на вода́х основа́вый, / на ка́мени мя, Христе́, за́поведей Твои́х утверди́, / я́ко несть свят па́че Тебе́, / Еди́не Человеколю́бче.

Припев: Преподо́бне о́тче наш Се́ргие, моли́ Бо́га о нас.

Благи́х о́браз тебе́ дав твои́м ученико́м, / и привле́кл еси́ мно́ги ду́ши во спасе́ние, отлучи́вшихся мирска́го пристра́стия, / и́же утеше́ния улучи́ша ра́йскаго наслажде́ния.

Я́ко добропло́дная ма́слина в дому́ Бо́жии, блаже́нне, процве́л еси́, / и еле́ем умаща́я ду́ши любо́вию тя пою́щих, преблаже́нне Се́ргие, / и ве́рою Христу́ вопию́щих: / несть свят па́че Тебе́, Человеколю́бче.

Слава: Стра́сти душетле́нныя успи́л еси́ бо́дренными бде́нии, блаже́нне, / и сих ра́ди в черто́г Небе́сный всели́лся еси́, / прие́м, богому́дре Се́ргие, благода́ть исцеле́ний.

И ныне: Херуви́мов и Серафи́мов превы́шши яви́лася еси́, Богоро́дице: / Ты бо еди́на прия́ла еси́ невмести́маго Бо́га во чре́ве Твое́м, Нескве́рная. / Те́мже Тя, вси ве́рнии, пе́сньми, Чи́стая, ублажа́ем.

Го́споди, поми́луй, трижды.

Седален, глас 4. Подобен: Вознесыйся на Крест:

Я́ко вои́стину тле́нных оста́вив нестоя́нное, / Христу́ от души́ после́довал еси́ / и боле́зньми, и труды́, и зе́льным воздержа́нием, / я́ко безпло́тен пожи́в, преблаже́нне Се́ргие, / моли́ Христа́ Бо́га, спасти́ся душа́м на́шим.

Слава, и ныне, Богородичен: Херуви́мов и Серафи́мов превы́шши еси́, Богоро́дице, / Небесе́ же и земли́ простра́ннейши, / ви́димыя тва́ри и неви́димыя яви́лася еси́ преиму́щи / несосу́дным сосужде́нием: / Его́же бо простра́нствия Небеса́ не вмеща́ют, / в Твое́й утро́бе вмести́ла еси́, Чи́стая, / Его́же моли́ спасти́ся рабо́м Твои́м.

Песнь 4

Ирмос: Ты моя́ кре́пость, Го́споди, / Ты моя́ и си́ла, / Ты мой Бог, Ты мое́ ра́дование, / не оста́вль не́дра О́тча / и на́шу нищету́ посети́в. / Тем с проро́ком Авваку́мом зову́ Ти: / си́ле Твое́й сла́ва, Человеколю́бче.

Припев: Преподо́бне о́тче наш Се́ргие, моли́ Бо́га о нас.

Ду́ха Пресвята́го храм, о́тче, был еси́, и жи́зненных вод река́ исполня́ема, / основа́ние непоколеби́мо Це́ркве, мона́шествующих утвержде́ние, / Се́ргие досточу́дне.

Проро́чески сле́зными ка́плями на всяк день посте́лю омоча́я, Се́ргие сла́вне, / до́ндеже до конца́ страсте́й пучи́ну изсуши́л еси́; / те́мже па́мять твою́ почита́ем, присночестну́ю и свяще́нную.

Слава: Лице́ Христо́во лице́м, преподо́бне Се́ргие, зре́ти сподо́бился еси́, / зерца́лом вои́стинну разре́шшимся. / Сие́ бо и от ми́ра отлучи́ тя к возлю́бленному жела́нию.

И ныне: Очище́ние на́ших да́руй неве́дений, я́ко безгре́шен, / и умири́ мир Твой, Бо́же, моли́твами Ро́ждшия Тя.

Песнь 5

Ирмос: Вску́ю мя отри́нул еси́ / от лица́ Твоего́, Све́те незаходи́мый, / и покры́ла мя есть чужда́я тьма, окая́ннаго? / Но обрати́ мя и к све́ту за́поведей Твои́х / пути́ моя́ напра́ви, молю́ся.

Припев: Преподо́бне о́тче наш Се́ргие, моли́ Бо́га о нас.

В поще́ниих непрекло́нен пребы́л еси́, му́дре, / и до отше́ствия своего́ храня́ сие́ опа́сно, / и́мже сподо́бился еси́ я́ве нетле́ннаго блаже́нства.

Остр ум име́я к Бо́гу внима́ти, стра́сти душетле́нныя успи́л еси́, о́тче, / и снопы́ благопло́дия пожа́л еси́, / пита́я благоче́стно восхваля́ющия тя, преподо́бне о́тче Се́ргие.

Слава: Све́тло житие́ твое́, преподо́бне Се́ргие, и изве́стно всем конце́м яви́ся, / и боже́ственныя добро́ты испо́лнено, / моли́твами же, и поще́ньми, и любо́вию, я́же ко Христу́ Человеколю́бцу.

И ныне: Тя сте́ну иму́ще и заступле́нием Твои́м соблюда́еми, / Твое́ю боже́ственною сла́вою хва́лящеся, Тя ублажа́ем. / Ты бо, Пречи́стая, душа́м на́шим источа́еши весе́лие и ра́дование.

Песнь 6

Ирмос: Очи́сти мя, Спа́се, / мно́га бо беззако́ния моя́, / и из глубины́ зол возведи́, молю́ся: / к Тебе́ бо возопи́х, и услы́ши мя, / Бо́же спасе́ния моего́.

Припев: Преподо́бне о́тче наш Се́ргие, моли́ Бо́га о нас.

Па́мять твою́ творя́щим свяще́нную, о́тче, / не преста́й моля́ Изба́вителя дарова́ти согреше́ний оставле́ние / и Небе́сное Ца́рство восприя́ти, иде́же глас пра́зднующих весели́т вся.

О Христе́ укрепля́емь, / вся кова́рствия лука́ваго тве́рдым умо́м, Се́ргие, / я́коже сеть, расто́ргнул еси́ / и пресве́тло свети́ло ми́ру, о́тче, показа́лся еси́.

Слава: Све́том Боже́ственным осия́емь / и со А́нгелы ны́не на Небесе́х водворя́яся, / помина́й ве́рою чту́щих па́мять твою́, / преподо́бне Се́ргие приснопа́мятне.

И ныне: Возвы́сила еси́ вои́стинну па́дшее челове́ческое существо́, / и́же о́бразом Боже́ственным и Отца́ ра́венством, / ви́димым Сы́ном неизме́нным, Богома́ти, / без се́мене во чре́ве поноси́вши.

Го́споди, поми́луй, трижды. Сла́ва, и ны́не:

Кондак, глас 8. Подобен: Взбранной Воеводе:

Христо́вою любо́вию уязви́вся, преподо́бне, / и Тому́ невозвра́тным жела́нием после́довав, / вся́кое наслажде́ние плотско́е возненави́дел еси́ / и, я́ко со́лнце, Оте́честву твоему́ возсия́л еси́; / тем и Христо́с да́ром чуде́с обогати́ тя. / Помина́й нас, чту́щих пресве́тлую па́мять твою́, да зове́м ти: / ра́дуйся, Се́ргие богому́дре.

Икос: Ева́нгельский глас, о́тче, услы́шав, / вся оста́вил еси́ плотска́я мудрова́ния, / бога́тство же и сла́ву, я́ко прах, вмени́в, / и на стра́сти, я́ко безпло́тен, подвиза́вся, / и безпло́тных ликостоя́нием че́сти сподо́бился еси́. / Ра́зума дарова́ние прия́л еси́, / е́же и пода́ждь в пе́снех пою́щим ти си́це: / ра́дуйся, Се́ргие преподо́бне и богоно́се, Небе́сный челове́че, земны́й А́нгеле; / ра́дуйся, Ду́ха Свята́го оби́тель; / ра́дуйся, моли́твами богода́нен дар прие́мый; / ра́дуйся, я́ко пре́жде рожде́ния проглаше́нием просла́вив Святу́ю Тро́ицу, Я́же тя просла́ви в жи́зни сей и по сме́рти; / ра́дуйся, целому́дрия сто́лпе, и́мже вся́ка страсть попра́ся; / ра́дуйся, я́ко от млады́х ногте́й после́дствовал еси́ Христу́; / ра́дуйся, притека́ющим к тебе́ спасе́ния хода́тай; / ра́дуйся, свети́льниче многосве́тлый, возведы́й ко Христу́ мона́хов мно́жества; / ра́дуйся, похвало́ Оте́честву твоему́; / ра́дуйся, проро́чеством укра́шенный, во е́же прорица́ти я́ко настоя́щая, бу́дущая; / ра́дуйся, я́ко моли́твами твои́ми сопроти́внии побежда́ются; / ра́дуйся, правосла́вному во́инству на́шему похвала́ и утвержде́ние, / его́же соблюди́ моли́твами твои́ми от враг ненаве́тно, да зове́м ти: / ра́дуйся, Се́ргие Богому́дре.

Песнь 7

Припев: Преподо́бне о́тче наш Се́ргие, моли́ Бо́га о нас.

В пещи́ искуше́ний разжже́ния / Боже́ственная благода́ть ороси́ тя, преподо́бне, / и многосве́тла Тро́ическим жела́нием показа́, зову́ща: / благослове́н Бог оте́ц на́ших.

Мир преоби́дев, сла́вне Се́ргие, / на земли́, я́ко безпло́тен, пожи́л еси́ / и а́нгельским ликостоя́нием сподо́бился еси́. / Тем тя ве́рою почита́ем, досточу́дне.

Слава: В приста́нище ти́хое вшед, богому́дре, / жите́йских пла́ваний отбегл еси́ / и волну́ющимся жите́йскими спаси́тельное окормле́ние был еси́, воспева́ющим: / благослове́н Бог оте́ц на́ших.

И ныне: Жезл прорасте́, Де́во, из ко́рене Иессе́ева, / всеблаже́нный Плод, Цвет нося́щи спаси́тельный / ве́рою Сы́ну Твоему́ вопию́щим: / отце́в на́ших Бо́же, благослове́н еси́.

Песнь 8

Ирмос: Седмери́цею пещь / халде́йский мучи́тель / богочести́вым неи́стовно разжже́, / си́лою же лу́чшею спасе́ны сия́ ви́дев, / Творцу́ и Изба́вителю вопия́ше: / о́троцы, благослови́те, / свяще́нницы, воспо́йте, / лю́дие, превозноси́те во вся ве́ки.

Припев: Преподо́бне о́тче наш Се́ргие, моли́ Бо́га о нас.

Светоно́сный твой пра́здник, преблаже́нне Се́ргие, / испо́лни ра́дости и весе́лия духо́внаго, благоуха́ния же и просвеще́ния / тя иму́щим засту́пника и пра́вило мона́шествующим.

Моли́твою непреста́нною к Бо́гу восте́кл еси́ / и отту́ду Трисо́лнечными сия́нии озари́лся еси́, / на враги́ боре́ния поста́вив, приводя́ по́стников собо́ры но́вым житие́м, Христу́ вопию́щим: / де́ти, благослови́те, свяще́нницы, воспо́йте, лю́дие, превозноси́те Его́ во ве́ки.

Слава: В поще́ниих кре́пкое, в моли́твах неле́ностное / терпе́ние в искуше́ниих, Се́ргие, на земли́ показа́л еси́, зовы́й: / де́ти, благослови́те, свяще́нницы, воспо́йте, лю́дие, превозноси́те Его́ во ве́ки.

И ныне: Богороди́тельнице Чи́стая, души́ моея́ я́звы грехо́вныя и собла́зны очи́сти, / ко исто́чником примеша́ющи, я́же из ребр Рождества́ Твоего́, и́же от них поте́кшим струя́м; / к Тебе́ бо взыва́ю, и к Тебе́ прибега́ю, и Тя призыва́ю, Богоблагода́тную.

Песнь 9

Ирмос: Ужасе́ся о сем Не́бо, / и земли́ удиви́шася концы́, / я́ко Бог яви́ся челове́ком пло́тски / и чре́во Твое́ бысть простра́ннейшее Небе́с. / Тем Тя, Богоро́дицу, / А́нгелов и челове́к чинонача́лия велича́ют.

Припев: Преподо́бне о́тче наш Се́ргие, моли́ Бо́га о нас.

Светоявле́ния духо́внаго испо́лнен быв, преподо́бне Се́ргие, / свети́льник сия́я издале́ча, яви́лся еси́, / слове́сныя зари́ нам облиста́я, / и Пребоже́ственныя Тро́ицы жили́ще показа́лся еси́.

Вои́стинну тя вели́ка учи́теля, му́дре Се́ргие, Росси́йским страна́м Христо́с дарова́, / нело́жным правле́нием пра́вяща Оте́чество свое́ / и уче́ния сладча́йша ме́да излива́юща, / и́хже, я́ко от окри́на, и мы, ве́рнии, почерпа́ем незави́стно.

Слава: Душетле́нныя стра́сти победи́в, / я́ко па́стырь и́стинный, упа́сл еси́ слове́сное Христо́во ста́до, / е́же вы́ну благода́тию Ду́ха, я́ко цве́ты ра́йския, пита́я, преподо́бне.

И ныне: Псалмы́ Тя воспева́ем, Обра́дованная, / и немо́лчно Ти, е́же ра́дуйся, вопие́м: / Ты бо источи́ла еси́ всем ра́дование.

Светилен:

Процве́л еси́, я́ко фи́никс, Дави́дски, о́тче, / и оби́тель яви́лся еси́ Ду́ха Всесвята́го, / И́же сла́вна тя вселе́нней показа́, / о нас непреста́нно Христа́ моли́, / почита́ющих ве́рою пречестну́ю па́мять твою́, / преподо́бне Се́ргие.

Слава, и ныне, Богородичен: Тя пе́сньми немо́лчными ублажа́ем, Де́во, / я́ко от Тро́ицы Еди́наго родила́ еси́, Богоро́дице, / и но́сиши на боже́ственных объя́тиих / Пребога́тое Сло́во, Невра́щное и Неизме́нное.

Молитва первая:

О свяще́нная главо́, преподо́бне и богоно́сне о́тче наш Се́ргие, моли́твою твое́ю, и ве́рою, и любо́вию, я́же к Бо́гу, и чистото́ю се́рдца, еще́ на земли́ во оби́тель Пресвяты́я Тро́ицы ду́шу твою́ устро́ивый, и а́нгельскаго обще́ния и Пресвяты́я Богоро́дицы посеще́ния сподо́бивыйся, и дар чудоде́йственныя благода́ти прие́мый, по отше́ствии же твое́м от земны́х наипа́че к Бо́гу прибли́живыйся, и небе́сныя си́лы приобщи́выйся, но и от нас ду́хом любве́ своея́ не отступи́вый и честны́я твоя́ мо́щи, я́ко сосу́д благода́ти по́лный и преизлива́ющийся, нам оста́вивый! Ве́лие име́я дерзнове́ние ко Всеми́лостивому Влады́це, моли́ спасти́ рабы́ Его́, су́щей в тебе́ благода́ти Его́ ве́рующия и к тебе́ с любо́вию притека́ющия. Испроси́ нам от Великодарови́таго Бо́га на́шего вся́кий дар, всем и коему́ждо благопотре́бен, ве́ры непоро́чны соблюде́ние, градо́в на́ших утвержде́ние, ми́ра умире́ние, от гла́да и па́губы избавле́ние, от наше́ствия иноплеме́нных сохране́ние, скорбя́щим утеше́ние, неду́гующим исцеле́ние, па́дшим возставле́ние, заблужда́ющим на путь и́стины и спасе́ния возвраще́ние, подвиза́ющимся укрепле́ние, благоде́лающим в дела́х благи́х преспе́яние и благослове́ние, младе́нцам воспита́ние, ю́ным наставле́ние, неве́дущим вразумле́ние, сиро́там и вдови́цам заступле́ние, отходя́щим от сего́ вре́меннаго жития́ к ве́чному благо́е уготовле́ние и напу́тствие, отше́дшим блаже́нное упокое́ние, и вся ны споспешеству́ющими твои́ми моли́твами сподо́би в день Стра́шнаго суда́ шу́ия ча́сти изба́вится, десны́я же страны́ о́бщники бы́ти и блаже́нный о́ный глас Влады́ки Христа́ услы́шати: прииди́те, благослове́ннии Отца́ Моего́, насле́дуйте угото́ванное вам ца́рствие от сложе́ния ми́ра. Ами́нь.

Молитва вторая:

О свяще́нная главо́, преподо́бне о́тче, преблаже́нне а́вво Се́ргие вели́кий! Не забу́ди убо́гих свои́х до конца́, но помина́й нас во святы́х свои́х и благоприя́тных моли́твах к Бо́гу. Помяни́ ста́до твое́, е́же сам упа́сл еси́, и не забу́ди посеща́ти чад свои́х. Моли́ за ны, о́тче свяще́нный, за де́ти своя́ духо́вныя, я́ко име́я дерзнове́ние к Небе́сному Царю́, не премолчи́ за ны ко Го́споду и не пре́зри нас, ве́рою и любо́вию чту́щих тя. Помина́й нас, недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо и те́лом преста́вился еси́ от нас, но и по сме́рти жив сый пребыва́еши. Не отступа́й от нас ду́хом, сохраня́я нас от стрел вра́жиих, и вся́кия пре́лести бесо́вския, и ко́зней диа́вольских, па́стырю наш до́брый; а́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ душа́ со а́нгельскими во́инствы, со безпло́тными ли́ки, с Небе́сными Си́лами, у престо́ла Вседержи́теля предстоя́щи, досто́йно весели́тся. Ве́дуще бо тя вои́стинну и по сме́рти жи́ва су́ща, тебе́ припа́даем и тебе́ мо́лимся, е́же моли́тися о нас Всеси́льному Бо́гу о по́льзе душ на́ших, и испроси́ти вре́мя на покая́ние, и о невозбра́нном преи́тии от земли́ на Не́бо, мыта́рств же го́рьких, бесо́в, возду́шных князе́й и ве́чныя му́ки изба́витися, и Небе́сному Ца́рствию насле́дником бы́ти со все́ми пра́ведными, от ве́ка угоди́вшими Го́споду на́шему Иису́су Христу́. Ему́же подоба́ет вся́кая сла́ва, честь и поклоне́ние со Безнача́льным Его́ Отце́м, и с Пресвяты́м, и Благи́м, и Животворя́щим Его́ Ду́хом ны́не, и при́сно, и во ве́ки веко́в. Ами́нь.

Молитва третия:

О небе́снаго граждани́не Иерусали́ма, преподо́бне о́тче Се́ргие! Воззри́ на нас ми́лостиво и к земли́ приве́рженных возведи́ к высоте́ Небе́сней. Ты горе́, на Небеси́; мы, на земли́ ни́зу, удалены́ от тебе́ не толи́ко ме́стом, ели́ко греха́ми свои́ми и беззако́ниями; но к тебе́, я́ко нам сро́дному, прибега́ем и взыва́ем: наста́ви нас ходи́ти путе́м твои́м, вразуми́ и руково́дствуй. Сво́йственно есть тебе́, о́тче наш, благоутро́бие и человеколю́бие на земли́ живу́щу, не о свое́м то́кмо спасе́нии бысть тебе́ попече́ние, но и о всех к тебе́ притека́ющих. Наставле́ния твоя́ бы́ша тро́стию кни́жника скоропи́сца, на се́рдце ка́ждаго глаго́лы жи́зни начертава́ющаго. Не теле́сныя то́кмо врачева́л еси́ боле́зни, но па́че душе́вных врач изя́щный яви́лся еси́; и вся твоя́ свята́я жизнь бысть зерца́лом вся́кия доброде́тели. А́ще толи́к был еси́, свя́тче Бо́жий, на земли́, коли́к ны́не еси́, на Небеси́! Ты днесь предстои́ши Престо́лу Све́та Непристу́пнаго и в нем, я́ко в зерца́ле, зри́ши вся на́ша ну́жды и проше́ния; ты водворя́ешися вку́пе со А́нгелы, о еди́нем гре́шнице ка́ющемся ра́дующимися. И человеколю́бие Бо́жие есть неистощи́мо, и твое́ к Нему́ дерзнове́ние мно́го, не преста́ни о нас вопия́ ко Го́споду. Испроси́ предста́тельством свои́м у Всеми́лостиваго Бо́га на́шего мир Це́ркви Его́, под зна́мением креста́ во́инствующей, согла́сие в ве́ре и единому́дрие, суему́дрия же и раско́лов истребле́ние, утвержде́ние во благи́х де́лех, больны́м исцеле́ние, печа́льным утеше́ние, оби́женным заступле́ние, бе́дствующим по́мощь. Не посрами́ нас, к тебе́ с ве́рою притека́ющих. А́ще бо и недосто́йни есмы́ толи́каго отца́ и хода́тая, но ты, подража́тель человеколю́бия Бо́жия, сотвори́ нас досто́йны чрез обраще́ние от злых дел к благо́му житию́. Вся богопросвеще́нная Росси́я, твои́ми чудесы́ испо́лненная и ми́лостями облагоде́тельствованная, испове́дает тя бы́ти своего́ покрови́теля и засту́пника. Яви́ дре́вния ми́лости твоя́ и и́хже отце́м спомоществова́л еси́, не отри́ни и нас, чад их, стопа́ми их к тебе́ ше́ствующих. Ве́руем, я́ко ду́хом нам сопрису́тствуеши. Иде́же бо есть Госпо́дь, я́коже сло́во Его́ учи́т нас, та́мо и слуга́ Его́ бу́дет. Ты ве́рный еси́ раб Госпо́день, и Бо́гу везде́ су́щу, ты в Нем еси́, и Он в тебе́ есть, па́че же и те́лом с на́ми еси́. Се нетле́нныя и живоно́сныя твоя́ мо́щи, я́ко сокро́вище безце́нное, вручи́ нам чуде́с Бог. Предстоя́ще им, я́ко тебе́ жи́ву су́щу, припа́даем и мо́лимся: приими́ моле́ния на́ша и вознеси́ их на же́ртвенник благоутро́бия Бо́жия, да прии́мем тобо́ю благода́ть и благовре́менну в ну́ждах на́ших по́мощь. Укрепи́ на́ше малоду́шие и утверди́ нас в ве́ре, да несомне́нно упова́ем получи́ти вся блага́я от благосе́рдия Влады́ки моли́твами твои́ми. Па́ству же твою́ духо́вную, тобо́ю со́бранную, не преста́ни управля́ти жезло́м духо́вныя му́дросте: подвиза́ющимся помози́, разсла́бленных возста́ви, споспеши́ и́го Христо́во нести́ во благоду́шии и терпе́нии и всех нас упра́ви в ми́ре и покая́нии сконча́ти живо́т наш и пресели́тися со упова́нием в блаже́нная не́дра Авраа́мова, иде́же ты ра́достно по труде́х и по́двизех ны́не почива́еши, прославля́я со все́ми святы́ми Бо́га, в Тро́ице сла́вимаго, Отца́, и Сы́на, и Свята́го Ду́ха. Ами́нь.

Молитва четвертая:

О преподо́бне и богоно́сне о́тче наш Се́ргие! Воззри́ на нас (имя рек) ми́лостивно и, к земли́ приве́рженных, возведи́ к высоте́ Небе́сней. Укрепи́ на́ше малоду́шие и утверди́ нас в ве́ре, да несомне́нно упова́ем получи́ти вся блага́я от благосе́рдия Влады́ки Бо́га моли́твами твои́ми. Испроси́ предста́тельством твои́м вся́кий дар всем и коему́ждо благопотре́бен и вся ны споспе́шествующими твои́ми моли́твами сподо́би в день Стра́шнаго суда́ шу́ия ча́сти изба́витися, десны́я же страны́ о́бщники бы́ти и блаже́нный о́ный глас Влады́ки Христа́ услы́шати: прииди́те, благослове́ннии Отца́ Моего́, насле́дуйте угото́ванное вам Ца́рствие от сложе́ния ми́ра. Ами́нь.

КАНОН ПРЕПОДОБНОМУ АЛЕКСАНДРУ СВИРСКОМУ

Тропарь, глас 4:

От ю́ности, Богому́дре, / жела́нием духо́вным в пусты́ню всели́вся, / еди́наго Христа́ возжела́л еси́ усе́рдно / стопа́м в след ходи́ти. / Те́мже и а́нгельстии чи́ни, зря́ще тя, удиви́шася: / ка́ко, с пло́тию к неви́димым ко́знем подвиза́вся, прему́дре, / победи́л еси́ полки́ страсте́й воздержа́нием / и яви́лся еси́ равноа́нгелен на земли́. / Алекса́ндре преподо́бне, / моли́ Христа́ Бо́га, да спасе́т ду́ши на́ша.

Канон преподобнаго, глас 4.

Песнь 1.

Припев: Преподо́бне о́тче наш Алекса́ндре, моли́ Бо́га о нас.

Боже́ственнаго и Пресвята́го Ду́ха блиста́яся благода́тию, / светоно́сное, Алекса́ндре, и честно́е соверша́ющих твое́ успе́ние, / све́тлою моли́твою́ твое́ю страсте́й мглу очи́сти.

От ю́ности, преподо́бне, яре́м Госпо́день восприе́м, / в бразда́х твоего́ се́рдца пшени́цу се́ял еси́ духо́вну / и клас пожа́л еси́, утвержда́ющ ду́ши, Богоблаже́нне.

Слава: Светоно́сная па́мять твоя́ нам днесь возсия́, / я́ко со́лнечная луча́, Алекса́ндре, исправле́ний твои́х, страсте́й на́ших отъе́млющи о́блак, / ю́же сотворя́юще, ве́рою тя и любо́вию ублажа́ем.

И ныне: Зачала́ еси́, Пречи́стая, / неизрече́нным сло́вом содержа́щаго земны́я концы́ и Сего́ родила́ еси́, / Его́же моли́ приле́жно поми́ловати нас.

Песнь 3.

Припев: Преподо́бне о́тче наш Алекса́ндре, моли́ Бо́га о нас.

Жезло́м воздержания страстное море, о́тче, раздели́в, преше́л еси́ неистопле́н, / и преде́л дости́гл еси́ и́стиннаго безстра́стия, / и, Бо́гу предстоя́, бесе́довал еси́ ума́ чистото́ю.

Кто твоя́ по́двиги, Алекса́ндре, по достоя́нию изрещи́ возмо́жет? / Ты бо, пути́ жесто́кия в пусты́ни ше́ствуя, су́рово бы́лие ял еси́, / вкуше́ние же отлага́л еси́ пи́щи боле́зньми воздержа́ния.

Слава: Я́ко ма́слина плодови́та в дому́ Госпо́дни, прозя́бл еси́, / ма́слом трудо́в твои́х, Алекса́ндре, умаща́я на́ша ли́ца; / пою́щия тя, преподо́бне и Богоблаже́нне, вся ны посети́, моля́ся Человеколю́бцу.

И ныне: Из Тебе́, Чи́стая, Цвет неувяда́емый, / благоуха́я все челове́чество Боже́ственным ми́ром естества́ Своего́, / И́же Отцу́ Собезнача́льный, из Тебе́ быв под ле́том, Де́во Всенепоро́чная.

Го́споди, поми́луй, трижды.

Седален, глас 8. Подобен: Премудрости:

От ю́ности вся оста́вль жите́йская, кра́сная же и ле́потная, / и в пусты́ню всели́вся, усе́рдно после́довал еси́ Зва́вшему тебе́, преподо́бне, / в труде́х же и посте́х, о́тче, те́ло твое́ изнури́л еси́. / Отону́дуже тя па́стыря свои́м овца́м до́бре устроя́ет всебога́тый Госпо́дь, Алекса́ндре блаже́нне. / Моли́ Христа́ Бо́га прегреше́ний оставле́ние дарова́ти / чту́щим любо́вию святу́ю па́мять твою́.

Слава, и ныне, Богородичен: Я́ко Де́ву и еди́ну в жена́х, Тя, без се́мене ро́ждшую Бо́га пло́тию, / вси ублажа́ем, ро́ди челове́честии: / огнь бо всели́ся в Тя Божества́, / и я́ко Младе́нца млеко́м пита́еши Зижди́теля и Го́спода. / Тем, а́нгельский и челове́ческий род, досто́йно сла́вим пресвято́е рождество́ Твое́ / и согла́сно вопие́м Ти: / моли́ Христа́ Бо́га согреше́ний оставле́ние дарова́ти / покланя́ющимся ве́рою пресвято́му рождеству́ Твоему́.

Песнь 4.

Припев: Преподо́бне о́тче наш Алекса́ндре, моли́ Бо́га о нас.

Ве́трилом, о́тче, Креста́, душе́вный твой кора́бль окорми́в, / благоути́шно же и легко́ жите́йскаго лю́таго потопле́ния избегл еси́ / и к тишине́ Боже́ственных извле́кл еси́ приста́нищ, ра́дуяся.

Обрета́я, о́тче, сам себе́, всеблаже́нне, / всю нощь стоя́л еси́, я́ко безпло́тен, / недрема́нно о́ко име́л еси́ и чи́сто, я́коже зерца́ло, духо́вною заре́ю / и Боже́ственная явле́ния чи́стым по́мыслом прие́мля.

Слава: Я́ко Боже́ственный зри́тся рай, прему́дре, храм, име́я в себе́ твои́х моще́й ра́ку, / цве́ты принося́ чуде́сныя, и́миже сердца́ наслажда́ются / ве́рою, Алекса́ндре, при́сно хва́лящих тя.

И ныне: Свята́я Богоро́дице, освяти́ нас, / Я́же Пресвята́го Бо́га ро́ждши пло́тию, / уподо́битися восхоте́вша челове́ком, / и Небе́снаго жития́ вся покажи́, Пречи́стая, прича́стники моли́твами Твои́ми.

Песнь 5.

Припев: Преподо́бне о́тче наш Алекса́ндре, моли́ Бо́га о нас.

Просвеща́емь заре́ю, о́тче, невече́рнею и Боже́ственным облиста́нием, / бесо́вский мрак и страстну́ю мглу отгна́л еси́, / и яви́лся еси́ столп светоза́рен, / ле́ствица вои́стинну, к Бо́гу ве́рныя возводя́щи.

Бодр ум всегда́ име́я, о́тче Богому́дре Алекса́ндре, / стра́сти успи́л еси́ душетле́нныя, / к Боже́ственному светозаре́нию хотя́ дости́гнути, к незаходи́маго Све́та све́тлости, / иде́же есть веселя́щихся жили́ще.

Слава: Я́ко очи́стившу помышле́ния, преподо́бне, / благода́ть тебе́ даде́ся, я́ко проро́ку: / я́ко настоя́щая, глаго́леши бу́дущая, / зри́ши же да́льняя, я́ко бли́жняя, Алекса́ндре, Бо́жие оби́телище.

И ныне: Ро́ждши, Пренепоро́чная, Бо́га Емману́ила, / и Челове́ка я́ве за милосе́рдие бы́вша, / Его́же моли́, я́ко Человеколю́бца, Чи́стая, уще́дрити лю́ди согре́шшия.

Песнь 6.

Припев: Преподо́бне о́тче наш Алекса́ндре, моли́ Бо́га о нас.

Неболе́зненную жизнь в боле́знех восприя́л еси́ / и боле́зней лю́тых уставля́еши озлобле́ния / ве́рою прося́щим прия́ти исцеле́ние, Алекса́ндре всече́стне. / Те́мже разреши́ боле́зни на́ша душе́вныя и теле́сныя.

К ра́це твое́й свяще́нней приступа́юще, / благоуха́ния Боже́ственнаго ра́зума исполня́емся, преблаже́нне Алекса́ндре, / смра́да избавля́ющеся страсте́й, любо́вию тя чту́щии, о́тче преподо́бне.

Слава: Исправля́еши, о́тче, хромы́х и о́чи просвеща́еши слепы́х, / ходи́ти же твори́ши разсла́бленных о Христе́ / и отго́ниши ду́хи лука́выя, Алекса́ндре преподо́бне.

И ныне: На Тя, я́ко дождь на руно́, сшед, Богоро́дице, Спас / изсуши́ я́ве пото́ки безбо́жия, / ду́ши же на́ша напая́я всегда́, при́сно чту́щия Тя.

Го́споди, поми́луй, трижды. Сла́ва, и ны́не:

Кондак, глас 8:

Я́ко многосве́тлая звезда́, / днесь в страна́х росси́йских возсия́л еси́, о́тче, / всели́вся в пусты́ню, / Христо́вым стопа́м после́довати усе́рдно возжеле́л еси́ / и, Того́ свято́е и́го на ра́мо твое́ взем, Честны́й Крест, / умертви́л еси́ труды́ по́двиг твои́х теле́сная взыгра́ния. / Те́мже вопие́м ти: / спаси́ ста́до твое́, е́же собра́л еси́, му́дре, да зове́м ти: / ра́дуйся, преподо́бне Алекса́ндре, о́тче наш.

Икос: Ка́ко восхвалю́ твоя́ по́двиги и боре́ния, преподо́бне Алекса́ндре? / Я́ко невеще́ствен ра́зум стяжа́в смире́нием, / житие́ твое́ препроводи́л еси́ зе́льным воздержа́нием трудо́в твои́х. / А́ще у́бо и челове́к был еси́ естество́м, / но Вы́шняго Иерусали́ма яви́лся еси́ граждани́н: / с пло́тию бо на земли́ пожи́л еси́, / но а́нгельское пребыва́ние проше́д и был еси́ столп, страстьми́ непотрясо́м. / Тем вся Росси́йская земля́, тобо́ю обога́щшися, хва́лит тя / и ве́рою велича́ет, взыва́ющи тебе́ такова́я: / ра́дуйся, оте́честву твоему́ похвала́, / Вели́кому же Новугра́ду и всей стране́ Росси́йстей пресве́тлый свети́льниче. / Ра́дуйся, и́же благочести́ва отца́ пресла́вная о́трасль / и благогове́йны ма́тере ветвь многопло́дна. / Ра́дуйся, целому́дрия непрекло́нный сто́лпе и мона́хов пресве́тлая сла́ва. / Ра́дуйся, па́стырю Христо́вы огра́ды слове́сных ове́ц, / и́хже к Бо́жию приводя́ ра́зуму. / Ра́дуйся, ты бо многоча́дну пусты́ню возде́лал еси́ высото́ю смире́ния твоего́. / Ра́дуйся, мона́шествующих всех о́браз доброде́тели и еди́нообра́зных ла́вры спасе́ние. / Ра́дуйся, кра́сное доброде́телей храни́лище и всем, в печа́ли уныва́ющим, утеше́ние. / Ра́дуйся, я́ко, вся ми́ра сего́ мудрова́ния презре́в, стра́сти плотски́я умертви́л еси́. / Ра́дуйся, я́ко А́нгелом собесе́дник бы́ти сподо́бился еси́ / и вся бесо́вския полки́ посрами́л еси́. / Ра́дуйся, ты бо во всех страна́х просла́влен был еси́, / о Христе́ бо мно́га чудеса́ сотвори́л еси́. / Ра́дуйся, я́ко вои́стинну обре́л еси́ Бо́жию благода́ть / и со А́нгелы при́сно зре́ти сподо́бился еси́ лице́м к лицу́ Святу́ю Тро́ицу. / Ра́дуйся, я́ко второ́е со́лнце, сия́я чудесы́, всем да́руеши благода́ть исцеле́ний. / Ра́дуйся, преподо́бне Алекса́ндре, о́тче наш.

Песнь 7.

Ирмос: В пещи́ авраа́мстии о́троцы перси́дстей, / любо́вию благоче́стия па́че, / не́жели пла́менем, опаля́еми, взыва́ху: / благослове́н еси́ в хра́ме сла́вы Твоея́, Го́споди.

Припев: Преподо́бне о́тче наш Алекса́ндре, моли́ Бо́га о нас.

Освя́щься от младе́нства доброгла́сною трубо́ю моли́твы твоея́, / и непло́дныя утро́бы многопло́дны сотвори́л еси́, / слепы́м подае́ши прозре́ние и хромы́м благотече́ние, Алекса́ндре преблаже́нне.

Сле́зными излия́нии погаси́л еси́ страсте́й разжже́ния, Алекса́ндре блаже́нне, / чуде́с источи́л еси́ струи́ присноживо́тны, / и́миже омыва́ются душ же и теле́с неду́зи, пресла́вне.

Слава: Терпе́ние стяжа́в мно́гое, прему́дре, воздержа́ние, ве́ру и любо́вь и́стинну, / яви́лся еси́ оте́ц си́рым, / вдови́цам – засту́пник ми́лостив и смире́н, Алекса́ндре, / мона́хом – сла́ва и похвала́.

И ныне: Ка́ко дои́ши млеко́м Сы́на, Чи́стая, без отца́, / пита́ющаго вся́кое дыха́ние, Ма́ти Пречи́стая? / Ка́ко на руку́ но́сиши вся содержа́щаго? / Па́че ума́ чу́до Твое́. / Тем пое́м вели́чия Твоя́.

Песнь 8.

Ирмос: Ру́це распросте́р Дании́л, / львов зия́ния в ро́ве затче́; / о́гненную же си́лу угаси́ша, / доброде́телию препоя́савшеся, / благоче́стия рачи́тели, о́троцы, взыва́юще: / благослови́те вся дела́ Госпо́дня, Го́спода.

Припев: Преподо́бне о́тче наш Алекса́ндре, моли́ Бо́га о нас.

Умо́м безстра́стия очище́н, бесе́довал еси́ Го́сподеви Вседержи́телю, / от Него́же неизглаго́ланно, преподо́бне, науча́емь, проро́чески предглаго́лал еси́, / просвеща́я ду́ши, я́ко вели́к, всеблаже́нне, проро́к. / Тем тя согла́сно, Алекса́ндре прему́дре, ве́рнии, похваля́ем, пою́ще: / благослови́те вся дела́ Госпо́дня, Го́спода.

Подава́я тебе́, я́же проти́ву любве́, Зижди́тель и от ю́ности соблюда́я тя десни́цею, / ма́лым бы́лием, самовозра́стшим от земли́, пита́ет тя боголе́пно, / я́ко от младе́нства вся́ко похоте́ние попра́вша и пою́ща: / благослови́те вся дела́ Госпо́дня, Го́спода.

Слава: Я́ко струя́ боже́ственна исцеле́ний, происходя́щи от ра́ки твоея́, вся исцеля́ет, / и омыва́ет скве́рны страсте́й, и гное́ние лю́тых очища́ет, / и ве́рных напая́ет всех сердца́, Алекса́ндре прему́дре, любо́вию пою́щих: / благослови́те вся дела́ Госпо́дня, Го́спода.

И ныне: Вопло́щся Безпло́тный из Тебе́ боголе́пно, / Его́же моли́, Пречи́стая, стра́сти пло́ти моея́ умертви́ти / и оживи́ти мою́ умерщвле́нную ду́шу грехми́.

Песнь 9.

Ирмос: Ка́мень нерукосе́чный / от несеко́мыя горы́ Тебе́, Де́во, / краеуго́льный отсече́ся, / Христо́с, совокупи́вый разстоя́щаяся естества́. / Тем, веселя́щеся, Тя, Богоро́дице, велича́ем.

Припев: Преподо́бне о́тче наш Алекса́ндре, моли́ Бо́га о нас.

Твоя́ свяще́нныя и святы́я мо́щи, во гро́бе лежа́ща, / многоразли́чныя неду́ги исцеля́ют и попаля́ют полки́ бесо́вския всегда́, му́дре Алекса́ндре: / Бо́жиею бо благода́тию то́чиши всем исцеле́ния, ве́рно тя при́сно блажа́щим.

Струи́ нам исцеле́ний всегда́ честна́я твоя́ ра́ка яви́ся, о́тче, / страсте́й излия́ние вся́ческих изсуша́ющи / и вся напоя́ющи ду́ши ко благопло́дию Боже́ственному, прему́дре Алекса́ндре, Христо́в уго́дниче.

Слава: Па́мять твоя́ днесь, я́ко со́лнце, возсия́, Алекса́ндре преблаже́нне, / благочести́вых сердца́ озаря́ющи боле́зней твои́х и чуде́с сия́нием, / я́ко вои́стинну просвеща́ющи, о́тче, / в ню́же вся ны помяни́, ве́рно чту́щия тя.

И ныне: Глас прино́сим Ти Гаврии́лов, ра́дующеся: / ра́дуйся, глаго́люще, ме́сто свяще́ния, / ра́дуйся, преподо́бных сла́во и всех ве́рных спасе́ние, / ея́же ра́ди обожи́хомся, Богоро́дице Присноде́во.

Светилен. Подобен: Духом во святилищи:

Благода́ть преизбы́сть Бо́жия в души́ твое́й, прему́дре Алекса́ндре, / и, я́ко безпло́тен, на земли́ пожи́л еси́. / Тем почита́ющих тя страсте́й изба́ви те́мных о́блак, к ти́хому приста́нищу приводя́ / и отгоня́я ополче́ния бесо́вская Боже́ственною си́лою.

Слава, и ныне, Богородичен: Сотвори́ вои́стинну с Тобо́ю вели́чия Сын Преве́чный О́тчим сове́том: / Жизнь бо нетле́нную без стра́сти родила́ еси́ / и пребы́ла еси́, я́коже пре́жде рождества́, Де́ва, ма́терских избе́гши боле́зней / и по рождестве́ Де́вою пребы́вши.

Молитва:

О свяще́нная главо́, А́нгеле земны́й и челове́че Небе́сный, преподо́бне и Богоно́сне о́тче наш Алекса́ндре, изря́дный уго́дниче Пресвяты́я и Еди́носущныя Тро́ицы, явля́яй мно́гия ми́лости живу́щим во святе́й оби́тели твое́й и всем с ве́рою и любо́вию притека́ющим к тебе́! Испроси́ нам вся благопотре́бная к житию́ сему́ вре́менному и ну́жная к ве́чному спасе́нию на́шему. Посо́бствуй и предста́тельством твои́м, уго́дниче Бо́жий, на враги́ ви́димыя и неви́димыя, да в ми́ре глубо́це пребу́дет Свята́я Правосла́вная Це́рковь Христо́ва и благострое́нии зи́ждется, во вся́ком благоче́стии неруши́мо. Бу́ди всем нам, чудотво́рче святы́й, помо́щник ско́рый во вся́кой ско́рби и обстоя́нии. Наипа́че же в час кончи́ны на́шея яви́ся нам засту́пник благосе́рдый, да не пре́дани бу́дем на мыта́рствех возду́шных вла́сти зло́бнаго мироде́ржца, но да сподо́бимся непреткнове́ннаго восхо́да в Ца́рствие Небе́сное. Ей, о́тче, моли́твенниче наш при́сный! Не посрами́ упова́ния на́шего, не пре́зри смире́нная моле́ния на́ша и предста́тельствуй за нас пред Престо́лом Живонача́льныя Тро́ицы, да сподо́бимся вку́пе с тобо́ю и со все́ми святы́ми мы, недосто́йнии, в селе́ниих ра́йских сла́вити вели́чие, благода́ть и ми́лость Еди́наго в Тро́ице Бо́га, Отца́, и Сы́на, и Свята́го Ду́ха, во ве́ки веко́в. Ами́нь.

Молитва преподобнаго Александра Свирскаго Господу Богу и Пресвятей Богородице:

Бо́же, очи́сти мя, гре́шнаго, и поми́луй мя, и прости́ ми, Го́споди Бо́же, Спа́се Ми́лостивый! Даждь ми, Го́споди, христиа́нский коне́ц с Пречи́стым Те́лом и с Честно́ю Кро́вию, со слеза́ми и покая́нием. Изба́ви, Го́споди, му́ки ве́чныя, огня́ негаси́маго, и че́рвия неусыпа́ющаго, и смолы́ кипя́щия. Го́споди, Ты созда́л мя еси́, Го́споди, Ты поми́луй. Го́споди, Твое́ есмь созда́ние.

Пречи́стая Госпоже́ Ми́лостивая, Цари́це Небе́сная, помоли́ся Го́споду Бо́гу и Спа́су на́шему Иису́су Христу́, Сы́ну Твоему́, за мене́, гре́шнаго раба́ Твоего́ (имя рек). Даждь ми, Госпоже́, христиа́нский коне́ц с Пречи́стым Те́лом и с Честно́ю Кро́вию и со слеза́ми и покая́нием. Изба́ви, Госпоже́, му́ки ве́чныя, огня́ неугаси́маго, и че́рвия неусыпа́ющаго, и смолы́ кипя́щия. Пречи́стая Госпоже́, Ми́лостивая Цари́це Небе́сная, Ты еси́ Моле́бница ко Го́споду Бо́гу и Спа́су на́шему Иису́су Христу́ за мене́, гре́шнаго и окая́ннаго раба́ Твоего́ (имя рек), Ты еси́ Помо́щница, Ты Засту́пница от вся́каго зла и сопоста́та, не забу́ди, Пречи́стая Госпоже́, ни́щаго Твоего́ до конца́.

Посем: Засту́пнице Усе́рдная, Благоутро́бная Го́спода Ма́ти, к Тебе́ прибега́ю аз, окая́нный и па́че всех челове́к грешне́йший. Вонми́ гла́су моле́ния моего́ и вопль мой и стена́ние услы́ши. Я́ко беззако́ния моя́ превзыдо́ша главу́ мою́ и аз, я́коже кора́бль в пучи́не, погружа́юся в мо́ре грехо́в мои́х. Но Ты, Всеблага́я и Милосе́рдая Влады́чице, не пре́зри мене́, отча́яннаго и во гресе́х погиба́ющаго. Поми́луй мя, ка́ющагося в злых де́лех мои́х, и обрати́ на путь пра́вый заблу́ждшую окая́нную ду́шу мою́. На Тебе́, Влады́чице моя́ Богоро́дице, возлага́ю все упова́ние мое́. Ты, Ма́ти Бо́жия, сохрани́ и соблюди́ мя под кро́вом Твои́м ны́не, и при́сно, и во ве́ки веко́в. Ами́нь.

Таже молитва по вся дни:

Душе́, душе́ моя́, почто́ жа́луешися на Го́спода? Я́ко ле́ность твоя́ ве́чней му́це хода́тай есть. А́ще бы ве́дала дар Бо́жий, пла́кала бы ся горя́щими слеза́ми, стена́ющи со воздыха́нием, скорбя́щи о вся́ком гресе́, о ма́лем и о вели́цем. Возопи́й ко Своему́ Влады́це, да не предвари́т тебе́ я́рость одержа́щаго всеси́льною руко́ю пра́ведною. Аз же, гре́шный и лени́вый и льсти́вый язы́к име́яй, ка́ко помолю́ся Влады́це моему́, да изба́вит мя Госпо́дь от Стра́шнаго Суда́? Всегда́ бо трепе́щу по́мыслом в се́рдцы мое́м о Стра́шнем Суде́, да изба́вит мя от му́ки ве́чныя, и че́рвия неусыпа́ющаго, и тьмы кроме́шныя, и от грозы́ несогре́емыя. Поми́луй мя, гре́шнаго раба́ Твоего́ (имя рек), я́ко Па́вла апо́стола, его́же любля́ше па́че всех, и от нас, убо́гих, не отврати́ лица́ Твоего́ во он День Стра́шный, его́же трепе́щет душа́ моя́ и соста́вы те́ла моего́ ужаса́ются. Го́споди, изба́ви мя стра́шнаго часа́, да не отпаду́ от ми́лости Твоея́. Но молю́ святы́я А́нгелы и Арха́нгелы, и проро́ки, и му́ченики, и вся святы́я, да мо́лят Бо́га за мою́ ду́шу. Ва́шего ра́ди моле́ния да возврати́т Влады́ка тре́бы Своя́ от мене́, гре́шнаго. И ты, Пречи́стая Госпоже́ Де́во, иму́щи дерзнове́ние к Сы́ну о рабе́х Твои́х, не забу́ди трудо́в раба́ Твоего́ (имя рек). Влады́ко Спа́се, от убо́гия души́ Тебе́ молю́ся, изба́ви мя от печа́ли грехо́в мои́х и введи́ в ра́дость безконе́чнаго жития́, иде́же прославля́ется всесвято́е И́мя Твое́, Отца́ и Сы́на и Свята́го Ду́ха, всегда́, ны́не, и при́сно, и во ве́ки веко́в. Ами́нь.

КАНОН ПРЕПОДОБНОМУ ОТЦУ НАШЕМУ СЕРАФИМУ, САРОВСКОМУ ЧУДОТВОРЦУ

Тропарь, глас 4:

От ю́ности Христа́ возлюби́л еси́, блаже́нне, / и, Тому́ Еди́ному рабо́тати пла́менно вожделе́в, / непреста́нною моли́твою и трудо́м в пусты́ни подвиза́лся еси́, / умиле́нным же се́рдцем любо́вь Христо́ву стяжа́в, / избра́нник возлю́блен Бо́жия Ма́тере яви́лся еси́. / Сего́ ра́ди вопие́м ти: / спаса́й нас моли́твами твои́ми, Серафи́ме, преподо́бне о́тче наш.

Канон преподобнаго, глас 8.

Песнь 1.

Припев: Преподо́бне о́тче наш Серафи́ме, моли́ Бо́га о нас.

По за́поведи Влады́ки Христа́ у́зким и те́сным путе́м вшел еси́, преподо́бне, в Ца́рство Небе́сное, / широ́кий и простра́нный путь возненави́дев, / и ны́не моли́ся о нас, творя́щих пресве́тлую па́мять твою́.

От ю́ности на безстра́стия го́ру возше́д и крест свой взем, / невозвра́тно Христу́ после́довал еси́ / и, духо́вную му́дрость стяжа́в, Го́рняго Иерусали́ма дости́гл еси́, преподо́бне, / моли́ о нас Еди́наго Человеколю́бца.

Слава: Ны́не предстоя́, преподо́бне Престо́лу Бо́жию, / моли́ся о стране́ на́шей, изба́витися от наше́ствия иноплеме́нных, / и христолюби́вым лю́дем земли́ Росси́йския спасе́ние испроси́ моли́твами твои́ми, преподо́бне.

И ныне: С ве́рою и любо́вию притека́ющих к Тебе́ / и со стра́хом пою́щих Тя / моли́твенный глас услы́ши, Влады́чице.

Песнь 3.

Ирмос: Небе́снаго кру́га / Верхотво́рче, Го́споди, / и Це́ркве Зижди́телю, / Ты мене́ утверди́ в любви́ Твое́й, / жела́ний кра́ю, ве́рных утвержде́ние, / Еди́не Человеколю́бче.

Припев: Преподо́бне о́тче наш Серафи́ме, моли́ Бо́га о нас.

Моли́ся, блаже́нне, Христу́ Бо́гу / изба́витися нам от гла́да и па́губы, / от напра́сныя сме́рти, от та́йных прегреше́ний и помышле́ний лука́вых, / да чи́стым се́рдцем Христу́ возопии́м: / моли́твами преподо́бнаго спаси́ нас, Го́споди.

Кро́тостию и смире́нием после́дуя Влады́це Христу́, / всем вся вои́стинну был еси́, / бога́тых же и убо́гих неосла́бно благоче́стию поуча́я, / бу́дущая, я́ко настоя́щая, прови́дел еси́. / Моли́ Христа́ Бо́га, преподо́бне, согреше́ний на́ших оставле́ние дарова́ти.

Слава: Изба́ви оби́тель твою́, преподо́бне, от вся́каго наве́та вра́жия / и испо́лни ю́ любве́ и благода́ти, е́же не помышля́ти о жите́йских, / но душеспаси́тельныя дости́гнути добро́ты моли́твами твои́ми.

И ныне: Упова́ние и наде́жда на́ша Ты еси́, Пречи́стая Влады́чице, / спаси́ страну́ и лю́ди Твоя́, / моля́щияся и и́мя Твое́ призыва́ющия.

Го́споди, поми́луй, трижды.

Седален, глас 4:

Жите́йское мо́ре страсте́й воздержа́нием препобеди́в / и в приста́нище безстра́стия прите́к, / сосу́д воздержа́ния яви́лся еси́, преподо́бне Серафи́ме, / моли́ Христа́ Бо́га дарова́ти нам ве́лию ми́лость.

Слава, и ныне, Богородичен: Превзыдо́ша главу́ мою́ греси́ мои́, Влады́чице, / оскверне́н и́ми есмь, и несть исцеле́ния в пло́ти мое́й, / но Ты, Многоблагоутро́бная, да́руй души́ мое́й сле́зы покая́ния на очище́ние скверн грехо́вных / и теле́сныя неду́ги уврачу́й, Врача́ вся́ческих и Го́спода ро́ждшая.

Песнь 4.

Ирмос: Услы́шах, Го́споди, / смотре́ния Твоего́ та́инство, / разуме́х дела́ Твоя́ / и просла́вих Твое́ Божество́.

Припев: Преподо́бне о́тче наш Серафи́ме, моли́ Бо́га о нас.

Не то́кмо свята́я оби́тель Саро́вская, / но и вся Росси́йская земля́ име́ет тя, блаже́нне, моли́твенника те́плаго и ско́раго помо́щника, / кре́пкаго и непобеди́маго засту́пника и хода́тая о душа́х на́ших.

Бу́ди о нас моле́бник и хода́тай ко Пресвяте́й Тро́ице / и подви́гни на моли́тву с тобо́ю ли́ки святы́х, / и́хже житию́ поревнова́л еси́, преподо́бне, / с ни́миже ку́пно моли́ся о ми́ре и устрое́нии всего́ ми́ра, / да ти́хое и безмо́лвное житие́ поживе́м в ве́це сем / и в бу́дущем жизнь ве́чную насле́дуем.

Слава: В по́стницех вели́к быв, преподо́бне, / те́сное и́ноческое в пусты́ни житие́ проходи́л еси́ / и сие́ во умиле́нней моли́тве сконча́л еси́, / Моли́ спасти́ся нам.

И ныне: Ты еси́, Пречи́стая Богоро́дице, прибе́жище на́ше и утвержде́ние, / моли́ Сы́на Твоего́ и Бо́га на́шего / пода́ти нам спасе́ние и грехо́в оставле́ние.

Песнь 5.

Ирмос: Просвети́ нас повеле́нии Твои́ми, Го́споди, / и мы́шцею Твое́ю высо́кою / Твой мир пода́ждь нам, / Человеколю́бче.

Припев: Преподо́бне о́тче наш Серафи́ме, моли́ Бо́га о нас.

Посто́м и непреста́нною моли́твою просла́вил еси́, преподо́бне, оби́тель Саро́вскую, / еле́ем от ико́ны Влады́чицы помазу́я неду́жныя / и тем исцеле́ние неоску́дно подава́я, / и ны́не моли́ся спасти́ся душа́м на́шим.

Святи́телие и свяще́нницы, сора́дуйтеся и́ноком Саро́вским, / и прости́и лю́дие, вку́пе воспо́йте блаже́ннаго отца́, / обурева́емых скорбьми́ ти́хое приста́нище, / врача́ душе́вным и теле́сным неду́гом ско́раго.

Слава: Принеси́ моли́твы твоя́, преподо́бне, / я́ко же́ртву благоприя́тну и непоро́чну, ко Пресвяте́й Тро́ице, / и не забу́ди нас, ны́не творя́щих па́мять твою́, / ми́лость испроси́ ненави́дящим, оби́дящим и вражду́ющим на нас / и изба́ви всех от вся́кия ско́рби.

И ныне: Упра́ви ум мой, Влады́чице, обурева́емый страстьми́ мно́гими, / спаси́, Богоро́дице, к Тебе́ прибега́ющия, / ины́я бо по́мощи, Чи́стая, ра́зве Тебе́, не зна́ем.

Песнь 6.

Ирмос: Моли́тву пролию́ ко Го́споду / и Тому́ возвещу́ печа́ли моя́, / я́ко зол душа́ моя́ испо́лнися / и живо́т мой а́ду прибли́жися, / и молю́ся, я́ко Ио́на: / от тли, Бо́же, возведи́ мя.

Припев: Преподо́бне о́тче наш Серафи́ме, моли́ Бо́га о нас.

Грехо́в испо́лнени вси есмы́, / твоя́ же моли́твы, преподо́бне Серафи́ме, я́ко кади́ло благово́нню, ко Го́сподеви восхо́дят. / Ны́не мо́лим тя: / волну́ющееся в земли́ на́шей мо́ре зла́го неве́рия изсуши́ / и спасе́ние душа́м на́шим от Го́спода испроси́.

Блаже́н вои́стинну был еси́, преподо́бне Серафи́ме, / нището́ю бога́тство и пла́чем ра́дость стяжа́в, / ю́же приходя́щим оби́льно подава́л еси́, / и ны́не лучи́ чуде́с источа́еши / и исцеля́еши всех, с ве́рою к тебе́ притека́ющих.

Слава: В пусты́ни кладене́ц ископа́в твои́ма рука́ма, преподо́бне, / приходя́щия жа́ждущия лю́ди напои́л еси́, / и ны́не мно́гим неду́жным водо́ю кладенца́ сего́ боле́зни исцеля́еши; / вои́стинну ди́внаго моли́твенника и чудотво́рца всем, преподо́бне, Влады́ка тя показа́.

И ныне: Вои́стинну Тя, Ма́терь Бо́жию, испове́дуем, и́стинную Богоро́дицу: / Твои́м бо Рождество́м тле́ннаго осужде́ния изба́вихомся, / милосе́рдия ра́ди Человеколю́бца Бо́га, / и к жи́зни нетле́нней воззва́ни бы́хом.

Го́споди, поми́луй, трижды. Сла́ва, и ны́не:

Кондак, глас 2:

Ми́ра красоту́ и я́же в нем тле́нная оста́вив, преподо́бне, / в Саро́вскую оби́тель всели́лся еси́ / и, та́мо а́нгельски пожи́в, / мно́гим путь был еси́ ко спасе́нию, / сего́ ра́ди и Христо́с тебе́, о́тче Серафи́ме, просла́ви / и да́ром исцеле́ний и чуде́с обогати́. / Те́мже вопие́м ти: / ра́дуйся, Серафи́ме, преподо́бне о́тче наш.

Икос: Оста́вив род и дру́ги, / бога́тство, я́ко прах, вмени́в, / в пусты́ни Саро́встей водвори́лся еси́ / и, на стра́сти, я́ко безпло́тен, подвиза́вся. А́нгелов ликостоя́ния сподо́бился еси́. / Те́мже духо́вная разуме́ния прии́м, / пода́ждь и нам, преподо́бне, разу́мно пе́сньми воспе́ти тя, си́це глаго́лющим: / ра́дуйся, Серафи́ме блаже́нне, Небе́сный челове́че и земны́й А́нгеле; / ра́дуйся, в любви́ Христу́ подража́телю; / ра́дуйся, Свята́го Ду́ха оби́тель; / ра́дуйся, уныва́ющим ве́лие ра́дование; / ра́дуйся, исто́чниче исцеле́ний; / ра́дуйся, скорбя́щим душа́м сла́дкое утеше́ние; / ра́дуйся, и́ноком ти́хое приста́нище и учи́телю прему́дрый; / ра́дуйся, похвало́ земли́ Росси́йския; / ра́дуйся, Серафи́ме, преподо́бне о́тче наш.

Песнь 7.

Ирмос: От Иуде́и доше́дше, о́троцы / в Вавило́не иногда́ / ве́рою Тро́ическою пла́мень пе́щный попра́ша, пою́ще: / отце́в Бо́же, благослове́н еси́.

Припев: Преподо́бне о́тче наш Серафи́ме, моли́ Бо́га о нас.

Поми́луй нас, Го́споди, / и от вся́каго зла душетле́ннаго сохрани́ моли́твами уго́дника Твоего́, преподо́бнаго Серафи́ма, / да вси уми́льно вопие́м Ти: / оте́ц на́ших Бо́же, благослове́н еси́.

Кто не почуди́тся, кто не просла́вит неизсле́димую глубину́ милосе́рдия Твоего́, Го́споди, / я́ко яви́л еси́ всему́ ми́ру уго́дника Твоего́, преподо́бнаго Серафи́ма, / моли́твенника те́плаго о нас, вопию́щих Тебе́: / оте́ц на́ших Бо́же, благослове́н еси́.

Слава: Благода́рное сие́ пе́ние, от нас приноси́мое тебе́, преподо́бне Серафи́ме, приими́ / и всем нам, пра́зднующим святу́ю па́мять твою́ / и покланя́ющимся моще́м твои́м, исцеле́ние да́руй, вопию́щим: / оте́ц на́ших Бо́же, благослове́н еси́.

И ныне: Ты еси́, Пресвята́я Богоро́дице, прибе́жище на́ше и утвержде́ние, / моли́ Сы́на Твоего́ и Бо́га на́шего / пода́ти нам спасе́ние и грехо́в оставле́ние.

Песнь 8.

Ирмос: Царя́ Небе́снаго, / Его́же пою́т во́и Áнгельстии, / хвали́те и превозноси́те во вся ве́ки.

Припев: Преподо́бне о́тче наш Серафи́ме, моли́ Бо́га о нас.

Доброде́тельному житию́ твоему́, преподо́бне, позави́дев, враг вселука́вый / восхоте́ запя́тие тебе́ сотвори́ти, / ты же, благода́тию Бо́жиею и моли́твами Влады́чицы посрами́в того́, / Бо́га просла́вил еси́, песносло́вя: / Го́спода по́йте, дела́, и превозноси́те Его́ во ве́ки.

Я́ко мо́лния, блиста́ющися, све́тится на поднебе́сней, / та́ко и веща́ния о твои́х, преподо́бне, чудесе́х во всю зе́млю изыдо́ша. / Мы же, дивя́щеся сла́ве твое́й, вопие́м: / де́ти, благослови́те, свяще́нницы, воспо́йте, / лю́дие, превозноси́те Го́спода во ве́ки.

Слава: Су́етными и стра́стными помышле́нии мяту́щийся ум наш исцели́, преподо́бне, / во́лны зла́го нече́стия укроти́, / разсла́бленная жите́йскими попече́нии сердца́ на́ша укрепи́, / да сла́вим Христа́ Соде́теля во вся ве́ки.

И ныне: Ра́дуйся, престо́ле Госпо́день огнезра́чный; / ра́дуйся, заре́ невеще́ственнаго блиста́ния; / ра́дуйся, о́блаче возсия́вшаго Со́лнца преди́внаго, Христа́ Спа́са на́шего, / Его́же превозно́сим во вся ве́ки.

Песнь 9.

Ирмос: Вои́стинну Богоро́дицу / Тя испове́дуем, / спасе́ннии Тобо́ю, Де́во Чи́стая, / с Безпло́тными ли́ки Тя велича́юще.

Припев: Преподо́бне о́тче наш Серафи́ме, моли́ Бо́га о нас.

Вели́ким отце́м, дре́вле в посте́ и по́двизех просия́вшим, поревнова́в, преподо́бне, / чрез вся дни живо́та твоего́ в моли́тве, слеза́х и труде́х пребы́л еси́, / до́ндеже дости́гл еси́ Небе́сныя оби́тели, / те́мже тя досто́йно ублажа́ем.

Кре́пкою си́лою Христо́с Бог тя препоя́са и укрепи́ побежда́ти ко́зни де́монския, преподо́бно. / Те́мже ны́не мо́лим тя: / моли́ Человеколю́бца Бо́га, / да изба́вит всех нас от вра́жиих нахожде́ний и искуше́ний и спасе́т ду́ши на́ша.

Слава: В боле́знех и ско́рбех на́ших к тебе́, преподо́бне, прибега́ем / и из глубины́ душе́вныя вопие́м: / бу́ди нам небу́рное приста́нище и боле́знем ско́рый цели́тель / и изба́ви нас от вся́каго неду́га и ну́жды, / да тя непреста́нно велича́ем.

И ныне: Еди́наго от Святы́я Тро́ицы, Сло́ва и Сы́на родила́ еси́, Де́во Пречи́стая, / Его́же с преподо́бными и пра́ведными моли́ о рабе́х Твои́х, / ве́рою прося́щих грехо́в проще́ния.

Светилен. Подобен: Жены, услышите:

Прииди́те, вси ве́рнии, / свяще́нными пе́сньми восхва́лим ди́внаго в чудесе́х преподо́бнаго Серафи́ма, / но́ваго свети́льника Росси́йския земли́, / А́нгелом собесе́дника и те́плаго моли́твенника к Бо́гу / о чту́щих святу́ю па́мять его́.

Слава, и ныне, Богородичен: По Бо́зе упова́ние иму́ще на Тя, / Пречи́стая Богоро́дице, / мо́лим Ти ся: / Ро́ждшагося из Тебе́ умоли́ / дарова́ти мир вселе́нней / и ве́лию ми́лость.

Молитва:

О пречу́дный о́тче Серафи́ме, вели́кий Саро́вский чудотво́рче, всем прибега́ющим к тебе́ скоропослу́шный помо́щниче! Во дни земна́го жития́ твоего́ никто́же от тебе́ тощ и неуте́шен оты́де, но всем в сла́дость бысть виде́ние ли́ка твоего́ и благоуве́тливый глас слове́с твои́х. К сим же и дар исцеле́ний, дар прозре́ния, дар немощны́х душ врачева́ния оби́лен в тебе́ яви́ся. Егда́ же призва́ тя Бог от земны́х трудо́в к Небе́сному упокое́нию, николи́же любы́ твоя́ преста́ от нас, и невозмо́жно есть исчи́слити чудеса́ твоя́, умно́жившаяся, я́ко зве́зды небе́сныя: се бо по всем конце́м земли́ на́шея лю́дем Бо́жиим явля́ешися и да́руеши им исцеле́ния. Те́мже и мы вопие́м ти: о прети́хий и кро́ткий уго́дниче Бо́жий, дерзнове́нный к Нему́ моли́твенниче, николи́же призыва́ющия тя отрева́яй! Вознеси́ о нас благомо́щную твою́ моли́тву ко Го́споду сил, да да́рует нам вся благопотре́бная в жи́зни сей и вся к душе́вному спасе́нию поле́зная, да огради́т нас от паде́ний грехо́вных и и́стинному покая́нию да научи́т нас, во е́же безпреткнове́нно вни́ти нам в ве́чное Небе́сное Ца́рство, иде́же ты ны́не в незаходи́мей сия́еши сла́ве, и та́мо воспева́ти со все́ми святы́ми Живонача́льную Тро́ицу во ве́ки веко́в. Ами́нь.

Молитва вторая:

О вели́кий уго́дниче Бо́жий, преподо́бне и Богоно́сне о́тче наш Серафи́ме! При́зри от Го́рния сла́вы на нас, смире́нных и немощны́х, обремене́нных грехми́ мно́гими, твоея́ по́мощи и утеше́ния прося́щих. Прини́кни к нам благосе́рдием твои́м и помози́ нам за́поведи Госпо́дни непоро́чно сохраня́ти, ве́ру Правосла́вную кре́пко содержа́ти, покая́ние во гресе́х на́ших усе́рдно Бо́гу приноси́ти, во благоче́стии христиа́нстем благода́тно преуспева́ти и досто́йным бы́ти твоего́ о нас моли́твеннаго к Бо́гу предста́тельства. Ей, свя́тче Бо́жий, услы́ши нас, моля́щихся тебе́ с ве́рою и любо́вию, и не пре́зри нас, тре́бующих твоего́ заступле́ния; ны́не и в час кончи́ны на́шея помози́ нам и заступи́ нас моли́твами твои́ми от зло́бных наве́тов диа́вольских, да не облада́ет на́ми тех си́ла, но да сподо́бимся по́мощию твое́ю насле́довати блаже́нство оби́тели ра́йския. На тя бо упова́ние на́ше ны́не возлага́ем, о́тче благосе́рдый, бу́ди нам вои́стинну ко спасе́нию путево́ждь и приведи́ нас к невече́рнему све́ту жи́зни ве́чныя богоприя́тным предста́тельством твои́м у Престо́ла Пресвяты́я Тро́ицы, да сла́вим и пое́м со все́ми святы́ми достопокланя́емое И́мя Отца́ и Сы́на и Свята́го Ду́ха во ве́ки веко́в. Ами́нь.

Молитва третия:

О преподо́бне о́тче Серафи́ме! Вознеси́ о нас, рабе́х Бо́жиих (имя рек), благомо́щную твою́ моли́тву ко Го́споду Сил, да да́рует нам вся благопотре́бная в жи́зни сей и вся к душе́вному спасе́нию поле́зная, да огради́т нас от паде́ний грехо́вных и и́стинному покая́нию да нау́чит нас, во е́же безпреткнове́нно вни́ти нам в ве́чное Небе́сное Ца́рство, иде́же ты ны́не в незаходи́мей сия́еши сла́ве, и та́мо воспева́ти со все́ми святы́ми Живонача́льную Тро́ицу во ве́ки веко́в.

КАНОН СОБОРУ ПРЕПОДОБНЫХ ОТЦЕВ И СТАРЦЕВ, В ОПТИНОЙ ПУСТЫНИ ПРОСИЯВШИХ

Тропарь, глас 5:

Правосла́вныя ве́ры свети́льницы, / мона́шества непоколеби́мии столпи́, / земли́ Росси́йския уте́шителие, / преподо́бнии ста́рцы О́птинстии, / любо́вь Христо́ву стяжа́вшии / и ду́ши своя́ за ча́да полага́вшии, / моли́теся ко Го́споду, / да утверди́т земно́е Оте́чество ва́ше в Правосла́вии и благоче́стии / и спасе́т ду́ши на́ша.

Канон, глас 8.

Песнь 1.

Припев: Святи́и преподо́бнии отцы́, в О́птиной Пу́стыни просия́вшии, моли́те Бо́га о нас.

Ка́ко восхва́лим вас, / преподо́бнии отцы́ О́птины Пу́стыни, / до́бре по́двиги соверши́сте, ве́ру спаси́тельную соблюдо́сте, / и весь мир свои́м богоуго́дным житие́м удиви́сте.

Взе́мше на ра́мена своя́ / благо́е и́го Христо́во, / подвиза́лися есте́, отцы́ преблаже́ннии, / ше́ствовати в Ца́рство ве́чныя жи́зни те́сным путе́м / и дости́гли есте́ сла́вы небе́снаго предстоя́ния / пред Престо́лом Бо́га Вы́шняго.

Слава: Кто испыта́ труды́ ва́ша и боле́зни, отцы́ святи́и, / кто ви́де сле́зы и по́ты ва́шего многоско́рбнаго жития́, / и́миже соде́лали есте́ ду́ши ва́ша / сосу́ды мно́гия благода́ти Бо́жия?

И ныне: Ма́ти Бо́га И́стиннаго, / приими́ мольбы́ рабо́в Твои́х, / и́щущих Твоего́ заступле́ния. / Ты бо еси́ приста́нище необурева́емое правосла́вных христиа́н.

Песнь 3.

Припев: Святи́и преподо́бнии отцы́, в О́птиной Пу́стыни просия́вшии, моли́те Бо́га о нас.

Сла́ву ми́ра сего́ ни во что́же вмени́в, / житие́ чи́стое избра́л еси́, преподо́бне о́тче Льве, / восприя́в вели́кую схи́му, я́ко огнепа́льньй щит / непреста́нныя моли́твы проти́ву ко́зней де́монских, / и Ца́рство ве́чное насле́довал еси́, Христу́ подража́я всем житие́м твои́м.

Бо́гу соде́йствующу, и́стинное жи́тельство духо́вное / во оби́тели О́птине насади́л еси́, / я́коже дре́внии учи́телие мона́шескаго де́лания, / блаже́нне о́тче Льве, моли́ся о спасе́нии душ на́ших.

В Бо́зе ре́вностию испо́лненный, / духо́вное окормле́ние по́двигом ста́рчества лю́дем яви́л еси́, / и тем просия́л еси́ я́ко первонача́льник сего́ спаси́тельнаго де́лания, / преподо́бне Льве, о́тче наш.

Слава: Научи́ нас, достоблаже́нне о́тче Льве, / чту́щих святу́ю па́мять твою́, / житию́ во Христе́, и́мже сам угоди́л еси́ Бо́гу, / да и нас, неклю́чимых рабо́в Свои́х, / Всеще́дрый Го́сподь просвети́т све́том ра́зума / и спасе́т ду́ши на́ша.

И ныне: Бо́га воплоща́ема из Тебе́ зря́ще, Де́во, / ужаса́хуся стра́хом и тре́петом го́рния си́лы, / и я́ко Су́щую Богоро́дицу тя непреста́нно велича́ют.

Го́споди, поми́луй, трижды.

Седален, глас 4:

Жите́йское мо́ре воздержа́нием без труда преплы́вше, / ко приста́нищу мы́сленному безстра́стия приста́ли есте́, / преподо́бнии отцы́ и Богому́дрии.

Слава, и ныне, Богородичен: Де́вство и рождество́ вы́ше естества́ и сло́ва / в Тебе́, Богоро́дице, стеко́стеся, / я́ко Бо́га Воплоти́вшагося родила́ еси́, / Спа́са душ на́ших.

Песнь 4.

Припев: Святи́и преподо́бнии отцы́, в О́птиной Пу́стыни просия́вшии, моли́те Бо́га о нас.

Житие́ твое́, преподо́бне о́тче Амвросие, / я́ко со́лнце в сердца́х ве́рных возсия́, зарю́ чуде́с явля́я, / сего́ ра́ди не забу́ди и нас, недосто́йных чад твои́х, / чту́щих блаже́нную па́мять твою́, / и любо́вию твое́ю просвети́ ду́ши на́ша, / омраче́нныя грехо́в мно́жеством.

Вся земля́ росси́йская позна́ и́мя твое́, / святы́й о́тче Амвро́сие, / осиява́емая благода́тию чуде́с твои́х, / и ны́не притека́юще к ра́це цельбоно́сных моще́й твои́х, про́сим тя, / да моли́твами твои́ми Го́сподь / спасе́т ду́ши наша.

Прославля́юще твоя́ по́двиги, / преблаже́нне о́тче Амвро́сие, / в со́нме вели́ких ста́рцев О́птинских, мо́лим тя: / не оста́ви нас, не́мощных и убо́гих, в ско́рбех и боле́знех на́ших, / но помо́зи и изба́ви нас от бед / и напа́стей губи́тельных.

Слава: Я́ко пе́рвая звезда́, / возсия́ на небеси́ от О́птины Пу́стыни / твое́ пресла́вное и́мя, преподо́бне о́тче Амвро́сие, / возвеща́я гряду́щее торжество́ / собо́ра всех отпе́в, зде просия́вших.

И ныне: Еди́н от Святы́я Тро́ицы / воплоти́ся от Тебе́, Пречи́стая, / да спасе́т весь род челове́ческий / от рабо́ты вра́жия и ве́чнаго осужде́ния.

Песнь 5.

Припев: Святи́и преподо́бнии отцы́, в О́птиной Пу́стыни просия́вшии, моли́те Бо́га о нас.

Всего́ себе́ покори́л еси́ Христу Жизнода́вцу, / преподо́бне о́тче Моисе́е, / исполня́я Боже́ственныя за́поведи Свята́го Ева́нгелия, / стяжа́л еси́ Ду́ха Свята́го в се́рдце свое́м, / всеусе́рдно трудя́ся в Пустыни, / я́ко ве́рный раб Христо́в.

Блага́го единоревни́теля обрел еси́, о́тче Моисе́е, / взира́я на по́двиги бра́та своего́ по пло́ти боголюби́ваго Анто́ния, / и́же вку́пе с тобо́ю прише́дый спаса́тися в оби́тель О́птину.

Послуша́ния до́брый рачи́тель был еси́, / преподо́бне о́тче Анто́ние, / вся претерпе́л еси́ скорби, боле́зни / и лю́тая искуше́ния от лука́вых ду́хов / и по кончи́не своея́ земны́я жи́зни / пресели́лся еси́ в черто́г сла́вы ве́чныя.

Слава: До́брая дво́ица яви́лася еси́ / преподо́бных отце́в и бра́тий по пло́ти Моисе́е и Анто́ние, / свои́ми мно́гими по́двиги и труды́ укра́сивши духо́вный вертогра́д оби́тели О́птины, / и́миже просла́вися Бог Го́сподь, / ди́вный во святы́х Свои́х.

И ныне: Все на́ше упова́ние на Тя возложи́хом, Де́во Мари́е, / при́зри на ны, лю́ди согреши́вшия, / с ве́рою ча́ющия от Тебе́ заступле́ния и спасе́ния.

Песнь 6.

Припев: Святи́и преподо́бнии отцы́, в О́птиной Пу́стыни просия́вшии, моли́те Бо́га о нас.

Я́ко свети́льник Бо́жия благода́ти / явился еси́, преподо́бне о́тче Мака́рие, / дале́че простира́я лучи́ своего́ равноа́нгельнаго жития́, / и́миже просвеще́ни бы́ша / сидя́щии во тьме и се́ни сме́ртней.

Испыту́я творе́ния богопросвеще́нных отце́в Дре́вния Це́ркве, / пораде́л еси́ зело́, о́тче Мака́рие, / о умноже́нии их духоно́сных писа́ний, / да всяк жа́ждай гряде́т и да пие́т во́ду жи́ву / во спасе́ние души́ своея́.

Многотру́дным и ско́рбным путе́м / шед в земно́м житии́ свое́м, преподо́бне о́тче Анато́лие, / быв достохва́льный учени́к Богоно́сных ста́рцев Мака́рия и Амвро́сия, / прии́де к ним от калу́жския земли́ / и с ра́достию всели́ся в сей оби́тели / во спасе́ние души́ своея́.

Слава: Сотаи́нник был еси́, преподо́бне о́тче Ио́сифе, / свята́го ста́рца Амвро́сия и восприя́л еси́ от него́ по́двиг духо́внаго окормле́ния чад его́, / наипа́че же оби́тели Шаморди́нския, / не оста́ви любо́вию твое́ю и нас, / чту́щих святу́ю па́мять твою́.

И ныне: Влады́чице Богоро́дице, / отве́рзи нам дв́ери милосе́рдия Твоего́, / Ты бо еси́ спасе́ние ро́да христиа́нскаго.

Го́споди, поми́луй, трижды. Сла́ва, и ны́не:

Кондак, глас 3:

Вои́стину ди́вен Бог во святы́х Свои́х, / пу́стынь О́птину я́коже вертогра́д ста́рчества яви́вый, / иде́же богопросвеще́ннии отцы́, / та́йная се́рдца челове́ческаго ве́дуще, / наро́да Бо́жия печа́льницы до́блии яви́шася: / си́и бо на путь покая́ния грехо́м отягоще́нныя наста́виша, / в ве́ре коле́блющияся све́том Христо́ва уче́ния просвети́ша / и Бо́жии прему́дрости научи́ша, / стра́ждущим и немощны́м спострада́ша и исцеле́ния дарова́ша. / Ны́не же, во сла́ве Бо́жии пребыва́юще, / мо́лятся непреста́нно о душа́х на́ших.

Песнь 7.

Припев: Святи́и преподо́бнии отцы́, в О́птиной Пу́стыни просия́вшии, моли́те Бо́га о нас.

Тле́нную красоту́ ми́ра сего́ и сла́ву земну́ю презре́в, / преподо́бне о́тче Варсоно́фие, / стопы́ своя́ напра́вил еси́ во оби́тель О́птину / и та́мо дости́гл еси́ у́мною моли́твою́ и благоче́стием духо́внаго соверше́нства, поя́ Го́споду: / Бо́же, благослове́н еси́.

Моли́ся о нас, преподо́бне о́тче Варсоно́фие, / да спасе́т Го́сподь милосе́рдием Свои́м ду́ши на́ша, / почита́ющих всех отце́в, в О́птине подвиза́вшихся, / да зове́м вку́пе с ни́ми: / Бо́же, благослове́н еси́.

Узре́л еси́ ты, преподо́бне о́тче Анато́лие, / исполне́ние проро́ческих глаго́лов ста́рца Варсоно́фия о гряду́щих бе́дах Росси́и / и сам претерпе́л еси́ ско́рби и бу́рю искуше́ний, / с упова́нием неся́ крест свой, зовя́: / Бо́же, благослове́н еси́.

Слава: Изря́дный учени́к вели́каго учи́теля мона́шества / преподо́бнаго Амвро́сия / был еси́, блаже́нне о́тче Некта́рие, / многосве́тлыми доброде́телями просия́в, / в после́док жития́ своего́ претерпе́л еси́ изгна́ние / и в Бо́зе сконча́л еси́ земно́е стра́нствование, поя́: / Бо́же, благослове́н еси́.

И ныне: Простри́ ру́це Своя́, Преблагослове́нная Де́во, / к Сы́ну Твоему́, Христу́ Бо́гу на́шему, / моля́щи усе́рдно, да поми́лует нас, гре́шных, / по вели́цей Свое́й ми́лости.

Песнь 8.

Ирмос: Царя́ Небе́снаго, / Его́же пою́т во́и Áнгельстии, / хвали́те и превозноси́те во вся ве́ки.

Припев: Святи́и преподо́бнии отцы́, в О́птиной Пу́стыни просия́вшии, моли́те Бо́га о нас.

Венцы́ нетле́нныя прия́ли есте́, / Богоно́снии отцы́ Иларио́не, Исаа́кие и про́чия ста́рцы О́птинстии, / испо́лнивше в житии́ свое́м зако́н Христо́в, / и насле́довали есте́ го́рнии оби́тели / Отца́ на́шего Небе́снаго, зову́ще: / благослови́те, вся дела́ Госпо́дня, Го́спода.

В смире́нии претерпе́ли есте́ вся злострада́ния, / отцы́ святи́и Ни́коне и Иса́акие, / крест взя́вше на ра́мо, я́ко испове́дницы и му́ченицы Христо́ви, / добропобе́дно житие́ свое́ сконча́ли есте́, / и та́ко внидо́сте в ра́дость Го́спода своего́, воспева́я: / благослови́те, вся дела́ Госпо́дня, Го́спода.

Ве́ра ва́ша приведе́ вас ко Христу́, преподо́бнии отцы́, / наде́ждою на Его́ всеблагу́ю во́лю укрепля́емии: / до́брыя плоды́ любве́ принесли́ есте́ Бо́гу Небе́сному, зову́ще: / благослови́те, вся дела́ Госпо́дня, Го́спода.

Слава: Прославля́ющего днесь собо́р О́птинских старце́в, / небе́сным о́блаком сих свиде́телей пра́вды Бо́жия осеня́емии, / воспои́м, ве́рнии лю́дие, песнь Бо́гу, взыва́юще: / благослови́те, вся дела́ Госпо́дня, Го́спода.

И ныне: Неусыпа́емую в моли́твах Засту́пницу / обре́те Тя, Непоро́чная Де́во, челове́ческий род. / Те́мже ра́дующеся, пое́м: / благослови́те, вся дела́ Госпо́дня, Го́спода.

Песнь 9.

Припев: Святи́и преподо́бнии отцы́, в О́птиной Пу́стыни просия́вшии, моли́те Бо́га о нас.

Се отве́рзеся вам, отцы́ святи́и, Ца́рство Небе́сное, / сконча́вшим до́брое житие́ на земли́, / и ны́не зри́те Сла́ву Бо́жию, я́коже А́нгельское во́инство, / непреста́нно славосло́вяще Триипоста́сное Божество́.

Вознеси́те, преподобнии отцы́, моли́твы ва́ша горе́, / я́ко кади́ло благоуха́нное, о всех чту́щих ва́шу святу́ю па́мять, / споспе́шествующе нам в ско́рбных обстоя́ниих благоугоди́ти Бо́гу / и сподо́битися насле́довати жизнь ве́чную.

Мно́жество мона́хов ны́не во святе́й О́птине оби́тели / торжеству́ет, велича́я собо́р Богоно́сных ста́рцев, / Бо́гом ди́вно просла́вленных, / принесе́м и мы хвалу́ Христу́ Спаси́телю на́шему, / прославля́ющему просла́вльших Его́.

Слава: Воспои́м, бра́тие, песнь но́ву Го́споду Иису́су, / просла́вльшему днесь ве́лий сонм ста́рцев О́птинских, / и с ве́рою поклони́мся Ему́, / да не отри́нет от Лица́ Своего́ и нас гре́шных рабо́в Свои́х, / ча́ющих се́бе спасе́ния их моли́твами.

И ныне: Родила́ еси́ безле́тнаго Сы́на, Пречи́стая, / плоть на́шу прии́мшаго, / Кро́вию Свое́ю на Кресте́ омы́вшаго от грехо́в па́дшаго Ада́ма, / умоли́ у́бо Спа́са на́шего / изба́вити нас от ве́чныя сме́рти.

Светилен:

Процвели́ есте́, я́ко финикс, дави́дски, / и оби́тели яви́стеся Ду́ха Пресвята́го: / и сла́внии вселе́нней показа́шеся. / О нас непреста́нно моли́те, почита́ющих ве́рою / пречестну́ю па́мять ва́шу, преподо́бнии.

Слава, и ныне, Богородичен: Тя пе́сньми немо́лчными ублажа́ем Де́во. / Я́ко от Тро́ицы Еди́наго родила́ еси́, Богоро́дице, / и но́сиши на Боже́ственную руку́ Пребога́тое Сло́во, / непреме́нно и неизме́нно.

Молитва Оптинских старцев на начало дня:

Го́споди, дай мне с душе́вным споко́йствием встре́тить все, что даст мне сей день. Го́споди, дай мне вполне́ преда́ться во́ле Твое́й свято́й. Го́споди, на вся́кий час сего́ дня во всем наста́вь и поддержи́ меня́. Го́споди, откро́й мне во́лю Твою́ для меня́ и окружа́ющих меня́. Го́споди, каки́е бы я ни получи́л изве́стия в тече́ние дня, дай мне приня́ть их со споко́йной душо́й и тве́рдым убежде́нием, что на все свята́я во́ля Твоя́. Го́споди, Вели́кий и Милосе́рдный, во всех мои́х дела́х и слова́х руководи́ мои́ми мы́слями и чу́вствами, во всех непредви́денных обстоя́тельствах не дай мне забы́ть, что все ниспо́слано Тобо́й. Го́споди, дай мне разу́мно де́йствовать с ка́ждым из бли́жних мои́х, никого́ не огорча́я и никого́ не смуща́я. Го́споди, дай мне си́лу перенести́ утомле́ние сего́ дня и все собы́тия в тече́ние его́. Руководи́ мое́ю во́лею и научи́ меня́ моли́ться, наде́яться, ве́рить, люби́ть, терпе́ть и проща́ть. Ами́нь.

КАНОН СВЯТОМУ ПРАВЕДНОМУ ИОАННУ КРОНШТАДТСКОМУ, ЧУДОТВОРЦУ

Тропарь, глас 1:

Правосла́вныя ве́ры побо́рниче, / земли́ Росси́йския печа́льниче, / па́стырем пра́вило и о́бразе ве́рным, / покая́ния и жи́зни во Христе́ пропове́дниче, / Бо́же́ственных Та́ин благогове́йный служи́телю / и дерзнове́нный о лю́дех моли́твенниче, / о́тче пра́ведный Иоа́нне, / цели́телю и преди́вный чудотво́рче, / гра́ду Кроншта́дту похвало́ / и Це́ркве на́шея украше́ние, / моли́ всеблага́го Бо́га / умири́ти мир и спасти́ ду́ши на́ша.

Ин тропарь, глас 4:

Росси́йския земли́ па́стырь до́брый показа́лся еси́, / в служе́нии пресви́терстем жизнь во Христе́ стяжа́в, / богому́дре о́тче Иоа́нне. / Благода́ть изоби́льную от Влады́ки Христа́ прия́л еси́: / неду́ги отгоня́ти, / малоду́шныя утеша́ти, / в Та́йне Пречи́стаго Те́ла и Кро́ве ве́рныя со Христо́м соединя́ти. / Сего́ ра́ди восхваля́ем тя, / я́ко моли́твенника о душа́х на́ших

Канон святаго, глас 1.

Песнь 1.

Ирмос: Песнь побе́дную пои́м вси Бо́гу, / сотво́ршему ди́вная чудеса́ мы́шцею высо́кою / и спа́сшему Изра́иля, / я́ко просла́вися.

Припев: Святы́й пра́ведный о́тче наш Иоа́нне, моли́ Бо́га о нас.

Чистоту́ помышле́ний даждь ми, Спа́се мой, / е́же воспе́ти чистото́ю А́нгелом подо́бнаго, пра́веднаго Иоа́нна пресви́тера, / я́ко А́нгела Го́спода Вседержи́теля.

Е́же люби́ти Христа́ и Ему́ служи́ти, Иоа́нне свя́те, / де́лом и сло́вом испо́лнил еси́, / во свяще́нстве ве́рным о́браз быв сло́вом и житие́м.

Слава: Иоа́нну Крести́телю подража́я, / покая́ния пропове́дниче, о́тче Иоа́нне пра́ведне, / о́браз воздержа́ния, целому́дрия и де́вственника чистоту́ яви́л еси́.

И ныне: Облагода́ти нас, Ма́ти Бо́жия, / е́же к богоугожде́нию житие́ на́ше упра́вити, / да Твое́ю по́мощию и моли́твами пра́веднаго Иоа́нна живо́т ве́чный насле́дуем.

Песнь 3.

Ирмос: Ка́мень, его́же небрего́ша зи́ждущии, / сей бысть во главу́ угла́: / Той есть Ка́мень, / на не́мже утверди́ Це́рковь Христо́с, / Ю́же от язы́к искупи́.

Припев: Святы́й пра́ведный о́тче наш Иоа́нне, моли́ Бо́га о нас.

Апо́стольски труди́лся еси́ / от у́тра па́стырскаго жития́ твоего́ да́же до ве́чера, о́тче Иоа́нне, / николи́же в любви́ к Бо́гу и бли́жнему оскудева́я.

Небе́снаго Ца́рствия взыску́я, / усе́рдный де́латель благи́х на земли́ яви́лся еси́, / моли́твою ве́ры неду́ги исцеля́я и заблу́ждшия к покая́нию призыва́я, свя́те.

Слава: Никого́же отвраща́лся еси́, / то́кмо отверга́ющихся Го́спода Иису́са Христа́ и Це́ркве Его́ Святы́я, / Е́йже сыны́ ве́ка сего́ противля́ются. / Но и о сих заблу́ждших в ско́рби мно́зей моле́ние твое́ к Бо́гу возноси́ти не престава́л еси́.

И ныне: Едине́ние ве́рных в Це́ркви Сы́на Твоего́ и Бо́га на́шего сохрани́, / Пречи́стая Де́во Ма́ти, / да при́сно в любви́ Христо́ве друг ко дру́гу утверди́мся.

Го́споди, поми́луй, трижды.

Седален, глас 2:

Мы, не́мощнии, к тебе́, пра́ведне Иоа́нне, / я́ко си́льному моли́твеннику пред Бо́гом, притека́ем, / прося́ще неду́гом душе́вным и теле́сным исцеле́ния, / в ско́рбех о гресе́х на́ших покая́нием избавле́ния, / стране́ на́шей и лю́дем ея́ ми́рное жи́тельство / и вся потре́бная ко спасе́нию.

Слава, и ныне, Богородичен: Отрокови́це благода́тная, / Ма́ти безневе́стная, Наде́ждо на́шего спасе́ния, / даждь нам в ве́ре утвержде́ние и во благочести́вем житии́ преуспея́ние, / в ско́рбех и печа́лех утеше́ние. / Тя бо, я́ко Ро́ждшую Спа́са Христа́, при́сно велича́ем.

Песнь 4.

Ирмос: Ду́хом прови́дя, проро́че Авваку́ме, Словесе́ воплоще́ние, / пропове́дал еси́, вопия́: / внегда́ прибли́житися ле́том – позна́ешися, / внегда́ приити́ вре́мени – пока́жешися. / Сла́ва си́ле Твое́й, Го́споди.

Припев: Святы́й пра́ведный о́тче наш Иоа́нне, моли́ Бо́га о нас.

Ло́жная мудрова́ния сыно́в ве́ка сего́, возстаю́щих проти́ву и́стины Святы́я Це́ркве Христо́вы, / отвергл еси́, свя́те Иоа́нне, / сло́вом и житие́м Правосла́вие утвержда́л еси́, поя́: / сла́ва си́ле Твое́й, Го́споди.

И́мя Христо́во при́сно в се́рдце нося́, свято́му Богоно́сцу Игна́тию подража́я, / в себе́ само́м вся́кое прираже́ние греха́ истреби́л еси́, поя́: / сла́ва си́ле Твое́й, Го́споди.

Слава: Си́ла Бо́жия, в не́мощи соверша́ющаяся, яви́ тя ди́внаго чудотво́рца, / цели́теля неду́жных и немощны́х, учи́теля покая́ния, моли́твы де́лателя, пою́ща: / сла́ва си́ле Твое́й, Го́споди.

И ныне: Яви́лася еси́, Влады́чице Богоро́дице, благода́тная Помо́щница пра́ведному пресви́теру Иоа́нну, / при́сно моля́щемуся Ти и Сы́ну Твоему́ и благода́рно пою́щему: / сла́ва си́ле Твое́й, Го́споди.

Песнь 5.

Ирмос: Твой мир даждь нам, / Сы́не Бо́жий: / ино́го бо ра́зве Тебе́ бо́га не зна́ем, / и́мя Твое́ имену́ем, / я́ко Бог живы́х и ме́ртвых еси́.

Припев: Святы́й пра́ведный о́тче наш Иоа́нне, моли́ Бо́га о нас.

Бла́го мне, я́ко смири́л мя еси́, Го́споди, – / си́це моли́лся еси́, терпя́ поноше́ния хули́телей твои́х, свя́те Иоа́нне, / храня́ мир се́рдца твоего́ непреста́нною моли́твою и незло́бием.

Обле́кся во Христа́ ве́рою и прича́стием Святы́х Та́ин, / был еси́ тверд, я́ко скала́, глаго́ля: / мне Христо́с полнота́ всех благ, живо́т и мир, превосходя́й всяк ум.

Слава: Госпо́дни Трапе́зы при́сно причаща́яся, / стяжа́л еси́ свет Христо́в, просвеща́ющий вся́каго челове́ка, гряду́щаго в мир. / Сим же и нас просвети́, Иоа́нне светоно́сче, тя почита́ющих.

И ныне: Ужасо́шася вся́ческая о Боже́ственней сла́ве Твое́й, Пречи́стая Де́во, / о́бщники сла́вы Твоея́ соде́лай и нас, / Тя при́сно ублажа́ющих.

Песнь 6.

Ирмос: Проро́ка Ио́ну подража́я, вопию́: / живо́т мой, Бла́же, свободи́ из тли / и спаси́ мя, Спа́се ми́ра, зову́ща: сла́ва Тебе́.

Припев: Святы́й пра́ведный о́тче наш Иоа́нне, моли́ Бо́га о нас.

Оживля́я ду́шу непреста́нною ко Го́споду моли́твою, / си́це взыва́л еси́, Иоа́нне богому́дре: / Го́споди, даждь ми люби́ти вся́каго челове́ка, я́ко самаго́ себе́. / Сию́ доброде́тель помози́ и нам стяжа́ти.

Призыва́я и́мя Бо́жие во спасе́ние твое́, / спасе́нию мно́гих послужи́л еси́. / Да пребу́дем и мы в едине́нии с Бо́гом и любви́ между́ собо́ю, / мо́лимтися, о́тче Иоа́нне.

Слава: Ра́зум богопросвеще́нный стяжа́л еси́, Иоа́нне прему́дре, / о Святе́й Тро́ице богосло́вствуя, рекл еси́, / высота́ и́стины сея́ животво́рна душе́, в простоте́ се́рдца ве́рующей.

И ныне: Изба́вителя на́шего неизрече́нно ро́ждшая, Пресвята́я Де́во, / бу́ди нам гре́шным прибе́жище спасе́ния / и ве́чныя жи́зни Хода́таица.

Го́споди, поми́луй, трижды. Сла́ва, и ны́не:

Кондак, глас 3:

Днесь па́стырь Кроншта́дтский / предстои́т Престо́лу Бо́жию / и усе́рдно мо́лит о ве́рных / Христа́ Пастыренача́льника, / обетова́ние да́вшаго: / сози́жду Це́рковь Мою́ / и врата́ а́дова / не одоле́ют ей.

Икос: Восхва́лим, ве́рнии, ди́внаго па́стыря Кроншта́дтскаго, благода́ти тезоимени́таго, / свети́льника присногоря́щаго у Престо́ла Святы́я Тро́ицы, / с Богоро́дицею и со все́ми святы́ми земли́ Росси́йския / моля́щагося о спасе́нии всех, и́мя Госпо́дне призыва́ющих, / да укрепи́тся в стране́ на́шей Правосла́вие / си́лою Христа́ Пастыренача́льника, обетова́ние да́вшаго: / сози́жду Це́рковь Мою́ и врата́ а́дова не одоле́ют ей.

Песнь 7.

Ирмос: Су́щим в пещи́ отроко́м Твои́м, Спа́се, / не прикосну́ся, ниже́ стужи́ огнь. / Тогда́ трие́, я́ко еди́неми усты́ поя́ху, / и благословля́ху, глаго́люще: / благослове́н Бог оте́ц на́ших.

Припев: Святы́й пра́ведный о́тче наш Иоа́нне, моли́ Бо́га о нас.

Наста́ви нас, па́стырю до́брый, жи́зни во Христе́, / по сло́ву бо твоему́, вели́ко де́лание есть, е́же побежда́ти грех, в нас живу́щий. / Да не опали́тся душа́ на́ша пла́менем его́, помоли́ся.

Очище́ние на́ше и избавле́ние есть Христо́с Спаси́тель, / Ему́же ты, па́стырю пречу́дный, / о на́шем духо́внем возрожде́нии, чрез покая́ние и исправле́ние, помоли́ся.

Слава: Си́лою Ду́ха Свята́го в непреста́нней моли́тве / безстра́стие стяжа́вый, до́брый па́стырю Иоа́нне, / страсте́й любогрехо́вных нам изба́витися помоли́ся.

И ныне: Яви́ нам ми́лость Твою́, Богоро́дице Де́во, Ма́ти Живота́, / к Тебе́ с ве́рою притека́ющим / и Сы́ну Твоему́ и Бо́гу покая́ние принося́щим.

Песнь 8.

Ирмос: Его́же ужаса́ются А́нгели и вся во́инства, / я́ко Творца́ и Го́спода, / по́йте, свяще́нницы, просла́вите, о́троцы, / благослови́те, лю́дие, / и превозноси́те во вся в́еки.

Припев: Святы́й пра́ведный о́тче наш Иоа́нне, моли́ Бо́га о нас.

Ще́дрою руко́ю твое́ю ми́лостыню прося́щим подава́л еси́, Иоа́нне ми́лостиве. / Не ве́де бо шу́йца, е́же твори́ десни́ца твоя́, / тщету́ бо земна́го стяжа́ния на Небе́сная премени́л еси́.

Иму́щему дано́ бу́дет и преизбу́дет, рече́ Госпо́дь, / та́ко и ты, о́тче Иоа́нне, тща́нием ве́лиим благода́ть Ду́ха Свята́го стяжа́л еси́, / е́юже и нас моли́твами твои́ми ны́не уще́дри.

Слава: Хране́ние усто́м полага́я, николи́же су́етная возглаго́лал еси́, Иоа́нне, / зако́на Госпо́дня взыску́я, / и нас в нем ходи́ти при́сно науча́еши.

И ныне: Тя, Богоро́дицу, вы́шшую Небе́с и чи́стшую све́тлостей со́лнечных, / в пе́снех немо́лчных воспева́ют Херуви́ми и Серафи́ми. / С ни́миже и мы, недосто́йнии, Тя ублажа́ем.

Песнь 9.

Ирмос: Живоприе́мный Исто́чник приснотеку́щий, / светоно́сный Свети́льник благода́ти, / Храм одушевле́нный, Сень пречи́стую, / Небесе́ и земли́ простра́ннейшую, / Богоро́дицу, ве́рнии, велича́ем.

Припев: Святы́й пра́ведный о́тче наш Иоа́нне, моли́ Бо́га о нас.

Иису́са Христа́ Пастыренача́льника о́браз в себе́ нося́, Иоа́нне, / угото́вал еси́ по вся дни ду́шу твою́ за па́ству полага́ти / и во гресе́х погиба́ющих к Бо́гу обраща́ти.

Принося́щих ти похвалу́ сию́, о́тче Иоа́нне, / не отри́ни, но ми́лость Христа́ Бо́га испроси́ / к проще́нию мно́гих прегреше́ний.

Слава: Очи́ма твои́ма при́сно взира́я ко Го́споду, о́тче Иоа́нне, / врата́ се́рдца твоего́ отве́рста Ему́ име́л еси́, / да отве́рзется и нам дверь покая́ния моли́твами твои́ми.

И ныне: Христа́ Бо́га на́шего, пре́жде век от Отца́ рожде́ннаго без ма́тере, / Ро́ждшагося же от Тебе́ без отца́ нас ра́ди, / моли́, Чи́стая Богоневе́сто, да спасе́ние улучи́м, Тя велича́юще.

Светилен:

Весь испо́лнился еси́ Све́та Христо́ва, освяти́в себе́ Бо́гови, / просвети́ и нас све́том благода́ти Ду́ха Свята́го / моли́твами твои́ми, Иоа́нне светоно́сне.

Слава, и ныне, Богородичен: А́нгели на Небеси́ и челове́цы на земли́ Тя, / Богоро́дице, я́ко Ма́терь Све́та, / непреста́нно велича́ем.

Молитва:

О вели́кий чудотво́рче и преди́вный уго́дниче Бо́жий, богоно́сне о́тче Иоа́нне! При́зри на нас и внемли́ благосе́рдно моле́нию на́шему, я́ко вели́ких дарова́ний сподо́би тя Госпо́дь, да хода́тай и при́сный моли́твенник за нас бу́деши. Се бо страстьми́ грехо́вными обурева́еми и зло́бою снеда́еми, за́поведи Бо́жия пренебрего́хом, покая́ния серде́чнаго и слез воздыха́ния не принесо́хом, сего́ ра́ди мно́гим ско́рбем и печа́лем досто́йни яви́хомся.

Ты же, о́тче пра́ведне, ве́лие дерзнове́ние ко Го́споду и сострада́ние к бли́жним свои́м име́я, умоли́ Всеще́драго Влады́ку ми́ра, да проба́вит ми́лость Свою́ на нас и потерпи́т непра́вдам на́шим, не погуби́т нас грех ра́ди на́ших, но вре́мя на покая́ние ми́лостивно нам да́рует.

О свя́тче Бо́жий, помози́ нам ве́ру Правосла́вную непоро́чно соблюсти́ и за́поведи Бо́жии благоче́стно сохрани́ти, да не облада́ет на́ми вся́кое беззако́ние, ниже́ посрами́тся пра́вда Бо́жия в непра́вдах на́ших, но да сподо́бимся дости́гнути кончи́ны христиа́нския, безболе́зненныя, непосты́дныя, ми́рныя и Та́ин Бо́жиих прича́стныя.

Еще́ мо́лим тя, о́тче пра́ведне, о е́же Це́ркви на́шей Святе́й до сконча́ния ве́ка утвержде́нней бы́ти, оте́честву же на́шему мир и пребыва́ние в пра́вде Бо́жией испроси́ и от всех зол сохрани́, да та́ко наро́ди на́ши, Бо́гом храни́ми, в единомы́слии ве́ры и во вся́ком благоче́стии и чистоте́, в ле́поте духо́внаго бра́тства, трезве́нии и согла́сии свиде́тельствуют: я́ко с на́ми Бог! В Не́мже живе́м, и дви́жемся, и есмы́, и пребу́дем во ве́ки. Ами́нь.

КАНОН ПРЕПОДОБНОЙ МАТЕРИ НАШЕЙ МАРИИ ЕГИПТЯНЫНЕ

Тропарь, глас 8:

В тебе́ ма́ти изве́стно спасе́ся е́же по о́бразу: / прии́мши бо крест, после́довала еси́ Христу́ / и де́ющи учи́ла еси́: презира́ти у́бо плоть, прехо́дит бо, / прилежа́ти же о души́ ве́щи безсме́ртней. / Те́мже и со а́нгелы сра́дуется, преподо́бная Мари́е, дух твой.

Канон преподобныя, глас 6.

Песнь 1.

Ирмос: Волно́ю морско́ю / Скры́вшаго дре́вле / гони́теля мучи́теля – под земле́ю скры́ша / спасе́нных о́троцы; / но мы, я́ко отрокови́цы, / Го́сподеви пои́м, / сла́вно бо просла́вися.

Припев: Преподо́бная ма́ти Мари́е, моли́ Бо́га о нас.

Любо́вию светоно́сную и боже́ственную твою́ па́мять пра́зднующему, / свет низпосли́ ми, / предстоя́щая преподо́бная све́ту непристу́пному Христу́, / искуше́ний вся́ческих мя жития́ избавля́ющи.

К еги́птяном пло́тию отше́дый, Неопи́санный и Преве́чный, / из Еги́пта показу́ет всесве́тлую тя звезду́, / ве́дый Госпо́дь вся пре́жде бытия́.

Слава: Боже́ственных за́поведей честна́я не ве́дущи, / боже́ственный о́браз Бо́жий окаля́ла еси́: / Боже́ственным же про́мыслом па́ки очи́стила еси́ всехва́льная, / обожи́вшися дея́ньми боже́ственными преподо́бная твои́ми.

И ныне: О Твоего́ Бо́же мой мно́гаго благоутро́бия, / и неизрече́ннаго Твоего́ снизхожде́ния! / Ка́ко пе́рвее блудни́цу, Ма́тере Твоея́ мольба́ми, / я́ко чи́стую и непоро́чную, а́нгелом уподо́бил еси́.

Песнь 3.

Ирмос: Тебе́, на вода́х / пове́сившаго / всю зе́млю неодержи́мо, / тварь, ви́девши / на ло́бнем ви́сима, / у́жасом мно́гим содрога́шеся, / несть свят, / ра́зве Тебе́, Го́споди, взыва́ющи.

Припев: Преподо́бная ма́ти Мари́е, моли́ Бо́га о нас.

Ко врато́м поги́бели прибли́жшуюся дея́ньми безме́стными, / врата́ пре́жде а́дова сокруши́вый си́лою Божества́, / врата́ покая́ния тебе́ отверза́ет всечестна́я, / дверь сый Сам живота́.

Ору́жие греха́ Долготерпели́ве пре́жде бы́вшую, / ору́жию Креста́ Боже́ственнаго поклоне́нием показа́л еси́, / ору́жия бесо́в вся, и ко́зни вся́ко побежда́ющую, Благоутро́бне.

Слава: Це́ну за всех, Свою́ пре́жде излия́вый кровь, / ба́нею слез чи́стую тя соде́ловает, / прока́зою лю́тою боле́вшую зле́йшаго дея́ния, / вся́ко е́же бы́ти всем да́вый.

И ныне: Сло́ва вся́каго есть вы́шшее, е́же на Тебе́ Де́во: / Сло́во бо О́тчее в Тебе́ боголе́пно всели́ся, / разреше́ние согреше́ний всем согреша́ющим, / сло́вом еди́нем подава́яй.

Го́споди, поми́луй, трижды.

Седален, глас 8. Подобен: Премудрость и слово:

Взыгра́ния вся плотска́я обузда́вши труды́ по́стническими, / му́жественное яви́ла еси́ души́ твоея́ мудрова́ние. / Крест бо Госпо́день ви́дети возжела́вши, / саму́ю себе́ всечестна́я ми́рови распя́ла еси́: / отню́дуже и к жела́нию а́нгельскаго жи́тельства / любе́зно упра́вила еси́ себе́ всеблаже́нная. / Моли́ Христа́ Бо́га, оставле́ние согреше́ний дарова́ти, / чту́щим любо́вию святу́ю па́мять твою́.

Слава, и ныне, Богородичен: Небе́сная врата́ и ковче́г, всесвяту́ю го́ру, / светоза́рный о́блак воспои́м, неопали́мую купину́, / слове́сный рай, Е́вино воззва́ние, / вселе́нныя всея́ вели́кое сокро́вище: / я́ко спасе́ние в Ней соде́яся ми́рови, / и оставле́ние дре́вних согреше́ний. / Тем и вопие́м Ей: / моли́ся Сы́ну Твоему́ и Бо́гу, / согреше́ний оставле́ние дарова́ти, / благоче́стно покланя́ющимся всесвято́му Рождеству́ Твоему́.

Песнь 4.

Ирмос: На Кресте́ Твое́ / Боже́ственное истоща́ние / прови́дя, Авваку́м, / ужа́сся, вопия́ше: / Ты си́льных пресе́кл еси́ / держа́ву, Бла́же, / приобща́яся су́щим во а́де, я́ко Всеси́лен.

Припев: Преподо́бная ма́ти Мари́е, моли́ Бо́га о нас.

Я́ко Соде́тель челове́ческаго естества́, / я́ко ми́лости исто́чник, и благоутро́бия бога́тство, / уще́дрил еси́ Человеколю́бче прибе́гницу Твою́, / и исхи́тил еси́ сию́ губи́тельнаго зве́ря.

Крест ви́дети потща́вшися, / кре́стным просвеще́нием Мари́е озари́лася еси́, / Кресто́м бесе́довавшаго, / ма́нием Боже́ственным распе́ншися ми́рови досточу́дная.

Слава: Злых вина́ пе́рвее, сласть лука́вая, мно́гим бы́вши, / а́ки со́лнце просия́вши, / всем наста́вница преподо́бная яви́ся согреша́ющим.

И ныне: Ум превозшла́ еси́ и небе́сный, / мы́сленное не́бо всех Царя́: / зако́нов бо естества́ вне Чи́стая / Законода́теля и Созда́теля всех родила́ еси́.

Песнь 5.

Ирмос: Богоявле́ния Твоего́, Христе́, / к нам ми́лостивно бы́вшаго, / Исаия, Свет ви́дев Невече́рний, / из но́щи у́треневав, взыва́ше: / воскре́снут ме́ртвии, / и воста́нут су́щии во гробе́х, / и вси земноро́днии возра́дуются.

Припев: Преподо́бная ма́ти Мари́е, моли́ Бо́га о нас.

Моисе́й просла́вися иногда́ на Сина́и, / Бо́жия за́дняя та́инственно ви́дев пресла́вный, / подпису́я стра́нное та́инство: / манноприе́млющия же ста́мны ны́не, / о́бразу пречи́стому те́пле припа́дши, / Мари́я а́нгельское житие́ но́сит.

Храм благоле́пия Твоего́ вожделе́вши псало́мски ви́дети, / у́мное же селе́ние сла́вы Твоея́, Твой храм оскверни́вшая: / у́мными моли́твами Христе́, Твоего́ хра́ма неискусому́жныя бы́вшия, / храм мя вседе́тельнаго сотвори́ Ду́ха.

Слава: У́дою пло́ти, очесы́ мно́гих улови́вшая, сла́стию кра́ткою, / снедь же диа́волу сих сотво́ршая, / уловлена́ бысть всеи́стинно / Боже́ственною благода́тию Креста́ честна́го / сладча́йшая Христо́ви снедь бы́вши.

И ныне: Науче́н лик проро́ческий та́инству е́же в Тебе́, / та́инственными богоглаго́ланьми Пречи́стая, / Тебе́ многообра́зно предглаго́ла: / манноприе́млющия же ста́мны ны́не, / о́бразу пречи́стому сия́ припа́дши, / Мари́я спору́чница гре́шных к Бо́гу.

Песнь 6.

Ирмос: Бе́здна после́дняя грехо́в обы́де мя, / и, волне́ния не ктому́ терпя́, /я́ко Ио́на, Влады́це, вопию́ Ти: /от тли мя возведи́.

Припев: Преподо́бная ма́ти Мари́е, моли́ Бо́га о нас.

Ра́дуются, Мари́е, а́нгельская во́инства, / ра́вное преподо́бная житие́ сим в тебе́ зря́ще, / и сла́ву Го́сподеви зову́т.

Ужаса́ются бесо́в мра́чных состоя́ния, / терпели́ваго твоея́ кре́пости, / я́ко жена́ пресла́вно, и нага́я, / и еди́ная сим возмогла́ еси́.

Слава: Просия́ла еси́ а́ки со́лнце Мари́е всехва́льная, / и пусты́ню чудесы́ всю просвети́ла еси́. / Те́мже и мене́ све́том уясни́.

И ныне: А́нгели, просвети́вшеся сла́вою Рождества́ Твоего́, / на земли́ мир всем нам, / и благоволе́ние челове́ком, Де́во, возопи́ша.

Го́споди, поми́луй, трижды. Сла́ва, и ны́не:

Кондак, глас 3. Подобен: Дева днесь:

Блуда́ми пе́рвее преиспо́лнена вся́ческими, / Христо́ва неве́ста днесь покая́нием яви́ся, / а́нгельское жи́тельство подража́ющи, / де́моны Креста́ ору́жием погубля́ет. / Сего́ ра́ди Ца́рствия неве́ста яви́лася еси́ Мари́е пресла́вная.

Икос: А́гницу Христо́ву и дщерь пе́сньми восхва́лим ны́не, / Мари́ю приснопа́мятную, я́вльшуюся Еги́петское овча́: / и пре́лести сих всея́ избеже́, / и еди́на принесе́ся Це́ркви соверше́нное возраще́ние, / воздержа́нием и моли́твою подвиза́ющися па́че ме́ры челове́ческаго естества́. / Те́мже и возвы́си ея́ и житие́ и дея́ние, еди́н Вседержи́тель, / Мари́и пресла́вныя.

Песнь 7.

Ирмос: О́троцы в Вавило́не / пе́щнаго пла́мене не убоя́шася, / но, посреде́ пла́мене вве́ржени, / ороша́емы поя́ху: / благослове́н еси́ Го́споди / Бо́же оте́ц на́ших.

Припев: Преподо́бная ма́ти Мари́е, моли́ Бо́га о нас.

Превели́кий во отце́х, обхожда́ пусты́ню, Зоси́ма му́дрый, / преподо́бную ви́дети сподо́бися: / благослове́н еси́, зове́т же, Бо́же оте́ц на́ших.

Что о́тче, стра́нное вся́кия доброде́тели де́тельныя, / ви́дети прише́л еси́ жени́ще? / преподо́бная вопия́ше ста́рцу: / благослове́н еси́, зове́т же, Бо́же оте́ц на́ших.

Слава: Умертви́вши блаже́нная страсте́й твои́х взыгра́ния, / к безстра́стия ны́не устреми́лася еси́ приста́нищу, зову́щи: / благослове́н еси́ Го́споди Бо́же оте́ц на́ших.

И ныне: Зачала́ еси́ неизрече́нно, Де́ва пребы́вши Пречи́стая, / и родила́ еси́ ми́рови спасе́ние, Христа́ Бо́га на́шего: / те́мже Тя вси пе́сньми ве́рнии велича́ем.

Песнь 8.

Ирмос: Ужасни́ся, боя́йся, Не́бо, / и да подви́жатся / основа́ния земли́: / се бо в мертвеце́х вменя́ется / в Вы́шних Живы́й / и во Гроб мал / странноприе́млется. / Его́же, о́троцы, благослови́те, / свяще́нницы, воспо́йте, / лю́дие, превозноси́те во вся ве́ки.

Припев: Преподо́бная ма́ти Мари́е, моли́ Бо́га о нас.

Глубины́ се́рдца испыту́яй, / пре́жде бытия́ предве́дый вся на́ша, / ну́жнаго жития́ исхити́л еси́ прибе́гшую к Тебе́ Спа́се, / ну́ждно Твоему́ человеколю́бию вопию́щую немо́лчно: / свяще́нницы благослови́те, / лю́дие превозноси́те во вся ве́ки.

О измене́ния честна́го, к лу́чшему преложе́ния твоего́ честна́я! / О любве́ Боже́ственныя, возненави́девшия плотски́я сла́сти! / О ве́ры горя́щия и Боже́ственныя, всехва́льная Мари́е! / Ю́же ве́рно хва́лим, и превозно́сим во ве́ки.

Слава: Обрела́ еси́ боле́зней возме́здие, / и трудо́в твои́х воздая́ние честна́я Мари́е, / и́миже низложи́ла еси́ уби́йцу врага́: / и ны́не со а́нгелы зове́ши, песнь немо́лчно вопию́щи, / и превознося́щи Христа́ во ве́ки.

И ныне: Всего́ обнови́ мя бла́гости ра́ди, во утро́бе Твое́й Чи́стая, / не растли́в обоего́ естества́ свойств, / я́ко всех веко́в Влады́ка: / отню́дуже Тя, я́ко вину́ на́шего спасе́ния, / пе́сньми пое́м во вся ве́ки.

Песнь 9.

Ирмос: Не рыда́й Мене́, Ма́ти, / зря́щи во Гро́бе, / Его́же во чре́ве без се́мене зачала́ еси́, Сы́на: / воста́ну бо, / и просла́влюся, / и вознесу́ со сла́вою / непреста́нно я́ко Бог / ве́рою и любо́вию Тя велича́ющия.

Припев: Преподо́бная ма́ти Мари́е, моли́ Бо́га о нас.

Удо́бь претерпе́ла еси́, ма́ти, пусты́нный труд, / укрепля́ема держа́вною си́лою Христо́вою: / скве́рная бо помышле́ния находя́щая, / струя́ми боже́ственных слез угаси́ла еси́ чи́стая, / по́стников высото́, преподо́бных похвало́.

Пресветле́йшими луча́ми, / просвеща́ет тя еди́на свет ро́ждшая Христа́, Де́ва и Чи́стая: / стра́шную враго́м тя поставля́ет честна́я: / я́вственную же всем Мари́е явля́ет тя, / страда́лец красото́, преподо́бных утвержде́ние.

Слава: Оста́вивши му́дренно земна́я вся, / жили́ще честно́е Ду́ха яви́лася еси́: / мирски́х у́бо лю́тых свободи́тися, / моли́ еди́наго Христа́ свободи́теля, / ве́рно соверша́ющим Боже́ственную па́мять твою́.

И ныне: Зако́нов естества́ Де́во, па́че естества́ утаи́вшися, / но́вое Отроча́ на земли́ родила́ еси́ Чи́стая, / Законода́вца су́ща и Ве́тха де́ньми, / мы́сленное не́бо всех Творца́: / тем ве́рою и любо́вию Тя ублажа́ем.

Светилен преподобныя. Подобен: Небо звездами:

О́браз покая́ния тебе́ иму́ще всепреподо́бная Мари́е, Христа́ моли́, / во вре́мени Поста́, сему́ нам дарова́тися, / я́ко да в ве́ре и любви́, тя пе́сньми восхва́лим.

Слава, и ныне, Богородичен: Сла́досте а́нгелов, скорбя́щих ра́досте, христиа́н предста́тельнице, / Де́во Ма́ти Госпо́дня, / заступи́ нас, и изба́ви ве́чных мук.

Молитва:

О вели́кая Христо́ва уго́днице, преподо́бная Мари́е! На Небеси́ Престо́лу Бо́жию предстоя́щи, на земли́ же ду́хом любве́ с на́ми пребыва́ющи, име́ющи дерзнове́ние ко Го́споду, моли́ спасти́ рабы́ Его́, к тебе́ с любо́вию притека́ющия. Испроси́ нам у Великоми́лостиваго Влады́ки и Го́спода ве́ры непоро́чное соблюде́ние, градо́в и ве́сей на́ших утвержде́ние, от гла́да и па́губы избавле́ние, скорбя́щим – утеше́ние, неду́гующим – исцеле́ние, па́дшим – возста́ние, заблу́ждщим – укрепле́ние, в дела́х благи́х преспе́яние и благослове́ние, си́ротам и вдови́цам – заступле́ние и отше́дшим от сего́ жития́ – ве́чное упокое́ние, всем же нам в день стра́шнаго Суда́ одесну́ю страны́ о́бщники бы́ти и блаже́нный глас Судии́ ми́ра услы́шати: прииди́те, благослове́ннии Отца́ Моего́, насле́дуйте угото́ванное вам Ца́рствие от сложе́ния ми́ра, и та́мо пребыва́ния во ве́ки получи́ти. Ами́нь.

КАНОН СВЯТЫМ ЧУДОТВОРЦЕМ МУРОМСКИМ КНЯЗЮ ПЕТРУ, ВО ИНОЦЕХ ДАВИДУ, И КНЯГИНЕ ФЕВРОНИИ, ВО ИНОКИНЯХ ЕВФРОСИНИИ

Тропарь, глас 8

Я́ко благочести́ваго ко́рене пречестна́я о́трасль был еси́, / до́бре во благоче́стии пожи́в, блаже́нне Пе́тре, / та́ко и с супру́жницею твое́ю, прему́дрою Февро́ниею, / в ми́ре Бо́гу угоди́вше и преподо́бных житию́ сподо́бистеся. / С ни́миже моли́теся Го́сподеви / сохрани́ти без вре́да оте́чество ва́ше, / да вас непреста́нно почита́ем.

Канон святым, глас 8.

Песнь 1

Припев: Го́споди Иису́се Христе́, Бо́же мой, поми́луй мя.

Песнь Твоему́ уго́днику, на земли́ Тебе́ просла́вльшему, / Петру́ принести́, Бо́же, да́руй ми, / я́ко да Смыслода́вца пе́сньми возвели́чу Тя.

Припев: Святи́и благове́рнии Пе́тре и Февро́ние, моли́те Бо́га о нас.

Вас, преблаже́ннии, оте́честву ва́шему, / я́ко пресве́тлое со́лнце, Христо́с показа́, / чудесы́ всех озаря́ющее, ве́рою к вам приходя́щих.

Слава: Я́ко о теле́сных небре́гше, и земна́я, я́ко тле́нная, возненави́девше, / и сего́ ра́ди ми́ра отре́кшеся, преподо́бных че́сти сподо́бистеся, / с ни́миже о ми́ре моли́теся.

И ныне: Пречи́стая Богоро́дице, ро́ждшая пло́тию присносу́щное Сло́во Безнача́льнаго Отца́, Присноде́во, / Ему́же ны́не взыва́ем: / Изба́вителю Бо́гу на́шему пои́м.

Песнь 3.

Ирмос: Небе́снаго кру́га Верхотво́рче, Го́споди, / и Це́ркве Зижди́телю, / Ты мене́ утверди́ в любви́ Твое́й, / желáний крáю, ве́рных утвержде́ние, / Еди́не Человеколю́бче.

Припев: Святи́и благове́рнии Пе́тре и Февро́ние, моли́те Бо́га о нас.

Безпомо́щным бу́ди помо́щник, блаже́нне Пе́тре, / и печа́льным ми́лостивное утеше́ние, / да, твои́ми моли́твами избавля́еми, почита́ем тя.

Я́коже иногда́ зми́я уби́в, коне́чному безве́стию пре́дал еси́, / та́ко и ны́не твое́ оте́чество борю́щих победи́, треблаже́нне, / да тя прославля́ем.

Слава: Виждь уны́ние, виждь печа́ль, виждь беду́, на ны напа́дающую от проти́вных, / те́мже моли́твою твое́ю ко Го́споду премени́, Пе́тре, / да благоче́стно тя почита́ем.

И ныне: Тебе́ вси стяжа́хом, христиа́не, прибе́жище и сте́ну / и Тебе́ славосло́вим немо́лчно, Безневе́стная.

Го́споди, поми́луй, трижды.

Седален, глас 4:

Благослове́нному и светоно́сному торжеству́, / я́коже со́лнцу возсия́вшему, Петра́ и Февро́нии, во всем ми́ре, / к ни́мже стеце́мся, ве́рнии, и непреста́нно вопие́м си́це: / а́ще и преидо́сте от земли́, пресла́внии, но нас не отлучи́стеся / и та́мо со А́нгелы Тро́ице предстои́те, / Ю́же моли́те спасти́ ду́ши на́ша.

Слава, и ныне, Богородичен: Сло́во О́тчее, Христа́ Бо́га на́шего, от Тебе́ воплоти́вшагося, позна́хом, Богоро́дице Де́во, / Еди́на Чи́стая, Еди́на Благослове́нная. / Тем непреста́нно Тя, воспева́юще, велича́ем.

Песнь 4.

Припев: Святи́и благове́рнии Пе́тре и Февро́ние, моли́те Бо́га о нас.

Я́ко хода́тай и засту́пник оте́честву твоему́, / я́ко сопроти́вных реши́тель бу́ди, заступа́я лю́ди твоя́, / тебе́, Пе́тре, сла́вящия.

Я́ко в Небе́сных оби́телех с преподо́бными и пра́ведными веселя́ся, / преблаже́нне Пе́тре ку́пно с Февро́ниею, / не преста́й моля́ о лю́дех твои́х.

Слава: Тебе́ мо́лимся, преблаже́нне, сопроти́вных шата́ние низложи́ / и неду́ги челове́ков облегчи́, / я́ко да во гла́сех хвале́ния тебе́ велича́ем.

И ныне: Очище́ние на́шим да́руй прегреше́нием, я́ко Пребла́г, / и умири́ мир Твой, Бо́же, моли́твами Ро́ждшия Тя.

Песнь 5.

Ирмос: Вску́ю мя отри́нул еси́ / от лица́ Твоего́, Све́те незаходи́мый, / и покры́ла мя есть чужда́я тьма, окая́нного? / Но обрати́ мя и к све́ту за́поведей Твои́х / пути́ моя́ напра́ви, молю́ся.

Припев: Святи́и благове́рнии Пе́тре и Февро́ние, моли́те Бо́га о нас.

Земля́ освяти́ся, прие́мши честна́я телеса́ ва́ша, / Богоблаже́ннии Пе́тре и Февро́ние, / челове́цы же, прие́млюще ва́ми исцеле́ние, Христа́ сла́вят, / и́скренно вас просла́вльшаго.

А́ще и преидо́сте от земли́, но к Небе́сным доспе́сте / и та́мо со А́нгелы Тро́ице предста́сте, / Ю́же моли́те спасти́ любо́вию вас почита́ющих, блаже́ннии.

Слава: Я́ко зве́зды пресве́тлыя и я́ко незаходи́мое со́лнце, стяжа́вше вас, / оте́чество ва́ше хва́лится, / почита́юще па́мять ва́шу пречестну́ю, Пе́тре и Февро́ние.

И ныне: Де́ву пое́м Тя по рождестве́, Богоро́дице, / Ты бо пло́тию Бо́га Сло́ва нам родила́ еси́, / Ему́же вси си́це зове́м: / пути́ на́ша напра́ви, мо́лим Ти ся.

Песнь 6.

Припев: Святи́и благове́рнии Пе́тре и Февро́ние, моли́те Бо́га о нас.

О, пречестна́я дво́ице! / О вели́цыи свети́льницы! / Освяти́те и просла́вите любо́вию вас в пе́снех сла́вящих, чудотво́рцы.

Я́ко пресве́тлая дво́ице и я́ко пречестна́я верста́ и благосочета́ние, / яре́м Госпо́день взе́мше, / Тому́ от души́ порабо́тасте.

Слава: Я́ко сове́тницы до́брии своему́ жити́ю, / еди́ну мысль во двою́ те́лу иму́ще, мир чудесы́ просвеща́ете, / те́мже и нас озари́те моли́твами ва́шими.

И ныне: Уясня́ют проро́честии гла́си Бо́жию Тя, Де́во, Роди́тельницу, / пое́м же Тя и мы, ви́дяще сбытие́ честны́х прорица́ний, / де́вству вои́стинну и чистоте́ вмести́лище.

Го́споди, поми́луй, трижды. Сла́ва, и ны́не:

Кондак, глас 8. Подобен: Взбранной:

Ми́ра сего́ княже́ние и сла́ву вре́менну помышля́я, / сего́ ра́ди благоче́стно в ми́ре пожи́л еси́, Пе́тре, / ку́пно и с супру́жницею твое́ю прему́дрою Февро́ниею, / ми́лостынею и моли́твами Бо́гу угоди́вше. / Те́мже, и по сме́рти неразлу́чно во гро́бе лежа́ще, / исцеле́ние неви́димо подава́ете, / и ны́не Христу́ моли́теся, / сохрани́ти град же и лю́ди, и́же вас сла́вящих.

Икос: Уясни́ язы́к мой, Спас́е, и умири́ се́рдце мое́, / разшири́ уста́ моя́ и напо́лни Ду́ха и прему́дрости, / да и́миже возглаго́лю и воспою́ си́це Твоя́ чудотво́рцы: / ра́дуйся, Пе́тре блаже́нне, с прехва́льною Февро́ниею вку́пе. / Ра́дуйтеся, земли́ Росси́йстей засту́пницы и князе́м правосла́вным помо́щницы. / Ра́дуйтеся, оте́честву ва́шему храни́тели и гра́ду на́шему утвержде́ние. / О пречестна́я дво́ице и благо́е сопряже́ние, Христу́ моли́теся / сохрани́ти град и лю́ди, вас сла́вящих.

Песнь 7.

Припев: Святи́и благове́рнии Пе́тре и Февро́ние, моли́те Бо́га о нас.

В боле́зни к тебе́ прибега́ющих избавля́й, преблаже́нне Пе́тре / ку́пно с Февро́ниею, Христу́ вопию́щих: / оте́ц на́ших Бо́же, благослове́н еси́.

Всем приста́нище бу́дите, преблаже́ннии, / и небу́рное оти́шие су́щим во гресе́х, / да и мы с ва́ми Христу́ возопие́м: / оте́ц на́ших Бо́же, благослове́н еси́.

Прибе́жище да ми бу́дите в день гне́ва, Богоблаже́ннии, / я́ко посреде́ хожду́ сете́й мно́гих: / те́мже изба́вите мя от них, да возмогу́ воспе́ти вас.

Слава: Днесь пресла́вная па́мять Петра́ и Февро́нии, я́ко со́лнце, возсия́ в ми́ре, / в ню́же соше́дшеся, вси воспое́м си́це: / оте́ц на́ших Бо́же, благослове́н еси́.

И ныне: Ка́пля Богото́чная, от Тебе́ ро́ждшаяся, мир освяти́, Богоро́дице Де́во: / ка́пли ми ми́лости источи́, / освяща́ющия ду́ши и помышле́ния земны́х.

Песнь 8.

Ирмос: Царя́ Небе́снаго, / Его́же пою́т во́и Áнгельстии, / хвали́те и превозноси́те во вся ве́ки.

Припев: Го́споди Иису́се Христе́, Бо́же мой, поми́луй мя.

Очи́сти и прости́ согреше́ния на́ша, Безгре́шне, / моли́твами Твои́х уго́дник, Петра́ и Февро́нии, / да пое́м Тя, Христе́, во ве́ки.

Припев: Святи́и благове́рнии Пе́тре и Февро́ние, моли́те Бо́га о нас.

И́же от се́рдца руко́ю недосто́йною приноси́мое вам хвале́ние, блаже́ннии, приими́те, / и мольбу́ сотвори́те о нас ко Христу́ Бо́гу.

Слава, Троичен: Певце́м, Тебе́ пою́щим, Тро́ице Пресвята́я, / согреше́ния оста́ви, я́ко Пребла́га, / моли́тв ра́ди Петра́ и Февро́нии, да Тя пое́м во ве́ки.

И ныне: Божества́ сосу́д бы́вши, Чи́стая, / просвети́ мя в повеле́нии Све́та ходи́ти, Пречи́стая, / от чре́ва Твоего́ возсия́вшаго и просвети́вшаго ве́рных сердца́.

Песнь 9.

Припев: Святи́и благове́рнии Пе́тре и Февро́ние, моли́те Бо́га о нас.

От ю́ности ва́шея чи́стую со́весть иму́ще к Бо́гу, / сего́ ра́ди, благоче́стно пожи́вше, к Вы́шним преидо́сте. / Моли́те Христа́ о нас, да вас любо́вию почита́ем.

Я́ко предстоя́ще Святе́й Тро́ице с преподо́бными и пра́ведными, / моли́теся, блаже́ннии, изба́вити нас вся́каго преще́ния и гне́ва, / да вас непреста́нно велича́ем.

Слава: Лю́дие твои́ мо́лят тя, Богоблаже́нне Пе́тре, / ку́пно моли́ Христа́ с прему́дрою Февро́ниею, / с не́юже в ми́ре богоуго́дно пожи́л еси́, / изба́вити нас от вся́ких зол.

И ныне: О, чудесе́ вели́каго! / Ка́ко вмести́ся во утро́бу Твою́ Христо́с Бог, ника́коже вмести́мый? / Его́же за хва́лящия Тя умоли́, Де́во, от бед изба́вити нас / и от беззако́нных челове́к всегда́.

Светилен. Подобен: Посетил ны:

И́же благоче́стно пра́зднующим па́мять ва́шу, Богоблаже́ннии Пе́тре и Февро́ние, / вку́пе ми́рно пожи́вше и благоче́стно, / моли́те Христа́ грехо́в оставле́ние дарова́ти рабо́м ва́шим.

Слава, и ныне, Богородичен: Пресвята́я Богоро́дице, упова́ние на́ше и похвало́, / Тя еди́ну ве́дуще, ве́рою покланя́ющеся, мо́лим: / ра́дуйся, Неискусобра́чная Свята́я Мари́е, покро́ве и огражде́ние на́ше / и Помо́щница су́щим в беда́х. / Моли́ Христа́, Сы́на Твоего́, за рабы́ Твоя́, на Тя бо наде́емся.

Молитва:

О вели́цыи уго́дницы Бо́жии и преди́внии чудотво́рцы благове́рнии кня́же Пе́тре и княги́не Февро́ние, гра́да Му́рома предста́тели и храни́тели, и о всех нас усе́рднии ко Го́споду моли́твенницы! К вам прибега́ем и вам мо́лимся со усе́рдием кре́пким: принеси́те за нас, гре́шных, святы́я моли́твы ва́ша ко Го́споду Бо́гу, и испроси́те нам у бла́гости Его́ вся благопотре́бная душа́м и телесе́м на́шим: ве́ру пра́ву, наде́жду бла́гу, любо́вь нелицеме́рну, благоче́стие непоколеби́мое, в до́брых де́лех преуспе́яние, ми́ра умире́ние, земли́ плодоно́сие, возду́ха благорастворе́ние, душа́м и телесе́м здра́вие и ве́чное спасе́ние. Исхода́тайствуйте у Царя́ Небе́снаго Це́ркви Святе́й и всей стране́ Росси́йстей мир, тишину́ и благоустрое́ние, и всем нам житие́ благополу́чное и до́брую христиа́нскую кончи́ну. Огради́те оте́чество ва́ше, град Му́ром, и вся гра́ды Росси́йския от вся́каго зла и вся правове́рныя лю́ди, к вам приходя́щия и моще́м покланя́ющияся, осени́те благода́тным де́йством благоприя́тных моли́тв ва́ших, и вся проше́ния их во бла́го испо́лните. Ей, чудотво́рцы святи́и! Не пре́зрите моли́тв на́ших, со умиле́нием вам возноси́мых, но бу́дите о нас при́снии предста́тели ко Го́споду и сподо́бите нас по́мощию ва́шею свято́ю спасе́ние ве́чное получи́ти и Ца́рствие Небе́сное унасле́довати; да славосло́вим неизрече́нное человеколю́бие Отца́, и Сы́на, и Свята́го Ду́ха, в Тро́ице покланя́емаго Бо́га, во ве́ки веко́в. Ами́нь.

КАНОН CВЯТЕЙ ПРАВЕДНОЙ АННЕ, МАТЕРИ ПРЕСВЯТЫЯ БОГОРОДИЦЫ

Тропарь, глас 4:

Жизнь ро́ждшую во чре́ве носи́ла еси́, Чи́стую Богома́терь, / Богому́драя А́нно. / Те́мже к прия́тию Небе́сному, иде́же веселя́щихся жили́ще, / в сла́ве ра́дующися ны́не преста́вилася еси́, / чту́щим тя любо́вию / прегреше́ний прося́щи очище́ние, / присноблаже́нная.

Канон святыя, глас 4.

Песнь 1.

Ирмос: Отве́рзу уста́ моя́ / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.

Припев: Свята́я пра́ведная А́нно, моли́ Бо́га о нас.

Согреше́ний проще́ние, и злых избавле́ние, / и жития́ исправле́ние ны́не ми испроси́, / твою́ светоно́сную па́мять почита́ющему днесь, А́нно всехва́льная.

Живо́т ро́ждшую боголе́пно родила́ еси́, / те́мже к присножи́зненней жи́зни преста́вилася еси́, / наслажда́ющися ра́дости неизглаго́ланныя и Све́та невече́рняго, А́нно Богозва́нная.

Благода́ть Боже́ственная к ра́дости преста́ви, / без се́мени ю́же роди́ Дщи сея́ Чи́стая, / и предстои́т со мно́гим дерзнове́нием, / Го́сподеви моля́щися спасти́ся всем.

Слава: Пра́ведно и преподо́бно пожи́вши, всехва́льная, / к Пра́ведному Го́споду ны́не преста́вилася еси́ / ра́доватися с пра́ведными, и́же от ве́ка, / те́мже, соше́дшеся, тя ве́рою почита́ем.

И ныне: Из Тебе́ нам возсия́ Со́лнце пра́ведное, / и всю озари́ Богоразу́мием зе́млю, / и разори́ мглу неразу́мия, Чи́стая, и Всенепоро́чная и Всеблаже́нная.

Песнь 3.

Ирмос: Не му́дростию, и си́лою, и бога́тством хва́лимся, / но Тобо́ю, О́тчею Ипоста́сною Му́дростию, Христе́, / несть бо свят, па́че Тебе́, Человеколю́бче.

Припев: Свята́я пра́ведная А́нно, моли́ Бо́га о нас.

Заче́ншую Содержа́щаго вся зачала́ еси́ / и родила́ еси́ па́че сло́ва Христа́ ро́ждшую, / те́мже твое́ успе́ние, А́нно, почита́ем.

С похвала́ми соверша́ется сла́вная па́мять твоя́, / я́ко родила́ еси́ нам хвале́ний превы́шшую, / Чи́стую Богома́терь, А́нно Богоприя́тная.

Я́коже со́лнце с луно́ю, А́нне совокупля́яся, / сла́вный Иоаки́м, де́вства зарю́ ражда́ет, / Ея́же ра́ди Божества́ луча́ просия́.

Слава: Го́ру Боже́ственную из чресл твои́х родила́ еси́ / и к гора́м мы́сленным и рая́ селе́нием, / А́нно, премину́ла еси́, Богоблаже́нная.

И ныне: Тя Предста́тельницу тве́рдую, Богороди́тельнице, стяжа́хом, / упова́ние на Тя возложи́вше, спаса́емся / и, к Тебе́ бо прибега́юще, огражда́емся.

Го́споди, поми́луй, трижды.

Седален, глас 8. Подобен: Премудрости:

Ма́тере Влады́ки и Творца́ / ма́ти была́ еси́, А́нно всехва́льная, Того́ повеле́ния при́сно храня́щи, / сего́ ра́ди, уме́рши, к жи́зни безсме́ртней преста́вилася еси́ вои́стинну / и к Све́ту невече́рнему. / Те́мже светоно́сную и святу́ю твою́ па́мять соверша́ем, / ду́хом просвеща́еми всегда́, и согла́сно вопие́м ти: / моли́ Христа́ Бо́га грехо́в оставле́ние дарова́ти / чту́щим любо́вию святу́ю па́мять твою́.

Песнь 4.

Ирмос: Седя́й в Сла́ве на Престо́ле Божества́ / во о́блаце ле́гце, / прии́де Иису́с Пребоже́ственный / Нетле́нною Дла́нию и спасе́ зову́щия: / сла́ва, Христе́, си́ле Твое́й.

Припев: Свята́я пра́ведная А́нно, моли́ Бо́га о нас.

Я́же в зако́не пи́саная, поуча́ющися, соверши́ла еси́ / и Законода́вца Ма́тере ма́ти была́ еси́, / те́мже тебе́ вся тварь по до́лгу ны́не сотворя́ет твою́ ра́достно па́мять.

Блаже́нное чре́во твое́ вои́стинну, / носи́вшее Свет ми́ра внутрь во чре́ве носи́вшую, / и сосца́ твоя́ кра́сная, / я́ко дои́вшая дои́вшую, А́нно, Христа́, Пита́теля на́шего.

Слава: Я́ко пожи́вши непоро́чно, Ю́же непоро́чно родила́ еси́ Богоро́дицу Отрокови́цу, / Сло́во О́тчее породи́вшую, / и к Нему́ со сла́вою всели́лася еси́, / обожена́ честны́ми вои́стинну прича́стии.

И ныне: Де́вы чре́во – стог, я́коже на гумне́, вои́стинну яви́ся, / клас неде́ланен иму́щи, и́мже пита́ется вся́кое естество́, зову́щее: / Всеси́льне, сла́ва, Христе́, си́ле Твое́й.

Песнь 5.

Ирмос: Нечести́вии не у́зрят сла́вы Твоея́, Христе́, / но мы Тя, Единоро́дне, / Оте́ческия Сла́вы Сия́ние Божества́, / от но́щи у́тренююще, / воспева́ем Тя, Человеколю́бче.

Припев: Свята́я пра́ведная А́нно, моли́ Бо́га о нас.

Не́бо родила́ еси́ на земли́ вои́стинну, ро́ждшую Небесе́ Творца́, / днесь тя преставля́юща к Небе́сным со сла́вою, / А́нно пресла́вная.

С невеще́ственными чи́нми невеще́ственным умо́м лику́еши ра́достно, / исполня́ема сия́ния Богатода́вца, / но нас помина́й, ве́рою хва́лящих тя.

Слава: От ко́рене Иесе́ева прозя́бшая я́ве, / благоцвету́щий жезл, Чи́стую, израсти́ла еси́, сла́вная, / израсти́вшую цвет неувяда́ющий, Иису́са, Изба́вителя на́шего.

И ныне: К Тебе́ прибега́ю еди́ней держа́вней, ве́рных покро́ву, / на Тя наде́жду возлага́ю спасе́ния моего́, / Пресвята́я Влады́чице Богоро́дице, не пре́зри мене́.

Песнь 6.

Ирмос: Пожру́ Ти со гла́сом хвале́ния, Го́споди, / Це́рковь вопие́т Ти, / от бесо́вския кро́ве очи́щшися / ра́ди ми́лости от ребр Твои́х / исте́кшею Кро́вию.

Припев: Свята́я пра́ведная А́нно, моли́ Бо́га о нас.

Го́спода Иису́са Бо́га пра́отцы, / Иоаки́м же и А́нна, пра́вдою укра́шени, / по достоя́нию в пе́снех да восхва́лятся днесь.

Вся́ческих похва́л А́нна превзы́де, / я́ко вся́кия похвалы́ превозше́дшую родила́ есть, / сего́ ра́ди в ли́це пра́ведных водворя́ется.

Светоно́сия и све́тлости испо́лнена па́мять твоя́, / сия́ния же в ми́ре спаси́тельная испуща́ющи, / целому́дренная А́нно, дарова́ний вся́ческих испо́лни.

Слава: Ру́чку, ма́нну Боже́ственную вмести́вшую, во чре́ве носи́ла еси́, А́нно, / и с Не́ю ны́не на Небесе́х живу́щи, / о всех мо́лишися, прехва́льная.

И ныне: От А́нны ми́рови роди́лася еси́, / Цари́це, всех Царя́ ро́ждшая, / и, де́вствующи по Рождестве́, Херуви́м превы́шши, Пренепоро́чная.

Го́споди, поми́луй, трижды. Сла́ва, и ны́не:

Кондак, глас 2. Подобен: Вышних ища:

Прароди́телей Христо́вых па́мять пра́зднуем, / тех ве́рно прося́ще по́мощи / изба́витися всем от вся́кия ско́рби, зову́щим: / Бог наш с на́ми, сих прославле́й, я́коже благоволи́.

Икос: Проро́чески сни́демся вси досто́йно пе́ти прама́тере Христо́вы блаже́нное преставле́ние: / днесь бо от вре́менныя преста́вися жи́зни, / на Небесе́х с ра́достию ше́ствие творя́щи, ра́дуется, / я́ко су́щи ма́ти и́стинныя су́щия Богоро́дицы, и взыва́ет ве́рно: / вели́чит душа́ моя́ Го́спода, я́ко роди́х Сего́ Ма́терь на земли́, / И́же Сию́ прославле́й, я́коже благоволи́.

Песнь 7.

Ирмос: Спасы́й во огни́ авраа́мския Твоя́ о́троки / и халде́и уби́в, / я́же Пра́вда пра́ведно уловля́ше, / препе́тый Го́споди, / Бо́же оте́ц на́ших, благослове́н еси́.

Припев: Свята́я пра́ведная А́нно, моли́ Бо́га о нас.

Я́ко жи́зни и́стинныя, А́нно, Ма́терь ро́ждши, / к жи́зни и́стинней преста́вилася еси́ ко све́ту, взыва́ющи: / препе́тый Го́споди, Бо́же оте́ц на́ших, благослове́н еси́.

Я́же Ма́тери Изба́вителя ма́ти су́щи, А́нно, / от земли́ к Небеси́, доброде́тельми укра́шена, востече́, во хвале́нии зову́щи: / Бо́же оте́ц на́ших, благослове́н еси́.

К несконча́емей жи́зни, к простра́нней широте́ ра́йския пи́щи, / к невече́рнему све́ту отшла́ еси́, Богоно́сице, зову́щи: / Бо́же оте́ц на́ших, благослове́н еси́.

Слава: Испещре́на доброде́тельми, добро́тою Боже́ственных дарова́ний укра́шена, / к Бо́гу приложи́ся, непреста́нно зову́щи: / препе́тый Го́споди, Бо́же оте́ц на́ших, благослове́н еси́.

И ныне: Укра́шена добро́тами доброде́телей, / кра́снаго па́че сыно́в челове́ческих и родила́ еси́ Сло́во, Пренепоро́чная, / кра́сными ле́потами украша́ющаго Тебе́ песносло́вящих.

Песнь 8.

Ирмос: О́троки благочести́выя в пещи́ / Рождество́ Богоро́дичо спасло́ есть; / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте, дела́, / и превозноси́те Его́ во вся ве́ки.

Припев: Свята́я пра́ведная А́нно, моли́ Бо́га о нас.

Ма́ти еди́ныя Богоро́дицы, я́же непло́ды пре́жде, ны́не же прама́ти Христо́ва, / я́коже непло́дства, си́це и ме́ртвости, совле́кши оде́жду, во стране́ живу́щих вопие́т: / Го́спода по́йте, дела́, и превозноси́те Его́ во вся ве́ки.

Христо́с тебе́ две́ри Вы́шния отве́рзе, ра́достно тя прия́т, / я́ко дверь родила́ еси́, е́юже Сам про́йде и затворе́ну яви́ по исхожде́нии, / Богому́драя, достойнопе́тая А́нно, / те́мже тя почита́ем, ве́рнии, во ве́ки.

Слава: Свя́то житие́ сконча́вши, Святы́я Присноде́вы ма́ти была́ еси́, / Я́же Пресвято́е Сло́во породи́, освяще́ние и избавле́ние нам подаю́ща, / Богому́драя и досточу́дная А́нно, / те́мже тя пое́м при́сно, ве́рнии, во ве́ки.

И ныне: Мно́гими мя содержи́ма беда́ми и бу́рею грехо́вною бе́дствующаго, / ко приста́нищу невла́емому дыха́ний Ду́ха, Богороди́тельнице Влады́чице, ны́не наста́ви: / приста́нище бо еси́ христиа́н. / Те́мже Тя пое́м во вся ве́ки.

Песнь 9.

Ирмос: Е́ва у́бо неду́гом преслуша́ния / кля́тву всели́ла есть; / Ты же, Де́во Богоро́дице, / прозябе́нием чревоноше́ния ми́рови Благослове́ние процвела́ еси́. / Тем Тя вси велича́ем.

Припев: Свята́я пра́ведная А́нно, моли́ Бо́га о нас.

От земли́ чре́ва твоего́ вои́стинну роди́ся земля́ свята́я, / неде́ланен клас прозя́бши безсе́менно, ми́рови Пита́теля и Го́спода, / тебе́ к пи́щи неиждива́емой, А́нно, прему́дро преста́вльшаго.

Па́мять твоя́ днесь нам возсия́, со́лнца светле́йши, / сия́нием бога́тых даро́в нас просвеща́ющи, всечестна́я, и мрак страсте́й изыма́ющи, / ю́же соверша́ющих сохрани́.

Слава: Боже́ственный нас Иоаки́м и А́нна Богому́драя и всесла́вная, / супру́г честны́й и светоно́сный, созыва́ют боже́ственне весели́тися сих пра́здником, / его́же уясни́ Светода́вец всех Госпо́дь.

И ныне: Мари́е Госпоже́ всех, вся́кими мя порабоще́на согреше́нии ны́не свободи́: / Сама́ бо Свободи́теля родила́ еси́ всех, / рабо́ты нас изба́вльшаго грехо́вныя, Боже́ственным манове́нием.

Светилен. Подобен: Со ученики:

Достодо́лжно воспое́м Богозва́нную А́нну: / Богоро́дицу бо та Де́ву Мари́ю ро́ждши па́че наде́жды, / сро́дница по пло́ти Христа́, Изба́вителя на́шего, яви́ся, / сию́ боголе́пно прие́мшаго днесь в Вы́шних, о нас моля́щуюся и о умире́нии ми́ра.

Слава, и ныне. Подобен: Небо звездами:

Не́бо ро́ждши, А́нно, но́вое, Мари́ю, Е́юже возсия́ сла́вы Со́лнце, / днесь от земли́ к Небе́сным прехо́диши, / Христу́ сра́дующися, пресла́вная.

Молитва первая:

О, святи́и пра́ведницы, Богоотцы́ Иоаки́ме и А́нно! Моли́те Милосе́рдаго Го́спода, я́ко да отврати́т от нас гнев Свой, по дело́м на́шим пра́ведно на ны дви́жимый, и да безчи́сленная прегреше́ния на́ша презре́в, обрати́т нас, рабо́в Бо́жиих (имярек), на путь покая́ния, и на стези́ за́поведей Свои́х да утверди́т нас. Та́же моли́твами ва́шими в ми́ре жизнь на́шу сохрани́те, и во всех благи́х благо́е поспеше́ние испроси́те, вся к животу́ и благоче́стию потре́бная нам от Бо́га да́рующе, от вся́ких напа́стей и бед и внеза́пныя сме́рти предста́тельством ва́шим нас избавля́юще, и от всех враг ви́димых и неви́димых защища́юще, и та́ко в ми́ре вре́менное сие́ житие́ преше́дше, в ве́чный дости́гнем поко́й, иде́же ва́шим святы́м умоле́нием да сподо́бимся Небе́снаго Ца́рствия Христа́ Бо́га на́шего, Ему́же со Отце́м и Пресвяты́м Духо́м подоба́ет вся́кая сла́ва, честь и поклоне́ние во ве́ки веко́в.

Молитва иная:

О присносла́внии Христо́вы пра́ведницы, святи́и Богоотцы́ Иоаки́ме и А́нно, предстоя́щии Небе́сному престо́лу Вели́каго Царя́ и ве́лие дерзнове́ние к Нему́ иму́щии, я́ко от Преблагослове́нныя дше́ри ва́шея, Пречи́стыя Богоро́дицы и Присноде́вы Мари́и, воплоти́тися изво́лившему, к вам, я́ко многомо́щным предста́телем и усе́рдным о нас моли́твенником, прибега́ем мы, гре́шнии и недосто́йнии. Моли́те бла́гость Его, я́ко да отврати́т от нас гнев Свой, по дело́м на́шым пра́ведно на ны дви́жимый, и да безчи́сленныя прегреше́ния на́ша презре́в, обрати́т нас на путь покая́ния и на стезе́ за́поведей Свои́х да утверди́т нас. Та́же моли́твами ва́шими в ми́ре живо́т наш сохрани́те и во всех благи́х благо́е поспеше́ние испроси́те, вся я́же к животу́ и благоче́стию потре́бная нам от Бо́га да́рующе, от вся́ких напа́стей и бед, и напра́сныя сме́рти, предста́тельством ва́шим нас избавля́юще, и от всех враг ви́димых и неви́димых защища́юще, я́ко да ти́хое и безмо́лвное житие́ поживе́м во вся́ком благоче́стии и чистоте́, и та́ко в ми́ре вре́менное сие́ житие́ преше́дше, в ве́чный дости́гнем поко́й, иде́же ва́шим святы́м умоле́нием, да сподо́бимся Небе́снаго Ца́рствия Христа́ Бо́га на́шего, ему́же со Отце́м и Пресвяты́м Ду́хом подоба́ет вся́кая сла́ва, честь и поклоне́ние во ве́ки веко́в. Ами́нь.

КАНОН СВЯТЕЙ БЛАЖЕННОЙ КСЕНИИ ПЕТЕРБУРГСКОЙ, ХРИСТА РАДИ ЮРОДИВОЙ

Тропарь, глас 7:

Нищету́ Христо́ву возлюби́вши, / безсме́ртныя трапе́зы ны́не наслажда́ешися, / безу́мием мни́мым безу́мие ми́ра обличи́вши, / смире́нием кре́стным си́лу Бо́жию восприя́ла еси́, / сего́ ра́ди дар чудоде́йственныя по́мощи стяжа́вшая, / Ксе́ние блаже́нная, / моли́ Христа́ Бо́га / изба́витися нам от вся́кого зла покая́нием.

Канон святыя, глас 8.

Песнь 1.

Припев: Свята́я блаже́нная ма́ти на́ша Ксе́ние, моли́ Бо́га о нас.

Водо́ю Креще́ния омы́вшися, / перворо́днаго греха́ изба́вилася еси́, ма́ти Ксе́ние, / и на́ша сердца́ слеза́ми покая́ния очи́сти, / просвеще́ние подаю́щи почита́ющим святу́ю па́мять твою́.

В воде́ Креще́ния зми́я лука́ва потопи́вшая, / житие́м твои́м страда́льческим вра́жию си́лу умертви́ла еси́, блаже́нная, / от нея́же и нам изба́витися Спа́са умоли́.

Слава: Во́ду живу́ю неистощи́мых даро́в / подаде́ тебе́ Христо́с, блаже́нная ма́ти, / Его́же нищету́ во́льно возлюби́ла еси́.

И ныне: Во́ды покая́ния пода́ждь ми, Пречи́стая, / и, очи́стивши мя от нечистоты́ грехо́вныя, / чи́ста предста́ви, Богороди́тельнице, Сы́ну Твоему́ и Бо́гу.

Песнь 3.

Припев: Свята́я блаже́нная ма́ти на́ша Ксе́ние, моли́ Бо́га о нас.

Небе́снаго кру́га Зижди́телю все житие́ твое́ отда́вши, / возлюби́ла еси́ Того́ до конца́, / сподо́би и нас моли́твами твои́ми, блаже́нная, / люби́ти Го́спода до конца́ дний на́ших.

Небе́сныя жи́зни жела́ющи, / в житии́ твое́м вся земна́я пренебрегла́ еси́, / сподо́би и нас, ма́ти Ксе́ние, / моли́твами твои́ми Небе́сныя жи́зни дости́гнути.

Слава: Небе́снаго черто́га жела́ющи, / стра́нническое житие́ прешла́ еси́ / и ны́не со все́ми святы́ми в Небе́сных черто́зех лику́еши.

И ныне: Небе́снаго Творца́, Богоро́дице всепе́тая, ро́ждши, / Небе́с простра́ннейшая яви́лася еси́. / Нас от простра́ннаго пути́ поги́бельна укло́ньши, / на Небе́сный путь наста́ви, молю́ся.

Го́споди, поми́луй, трижды.

Седален, глас 5:

Я́ко стра́нница во гра́де свята́го Петра́ яви́лася еси́, / благоволе́нием Бо́жиим укрепля́ема, ма́ти прему́драя, / Боже́ственных даро́в и чуде́с удосто́ившаяся. / Те́мже, иму́щи дерзнове́ние ко Христу́ Бо́гу, / мир испроси́ душа́м на́шим и ве́лию ми́лость.

Слава, и ныне, Богородичен: Ма́ти Пречи́стая, гра́де Бо́жий, / изба́ви лю́ди Твоя́ от бед / и по́мощь пода́ждь проти́витися враго́м го́рдым, да вопие́м Ти: / ра́дуйся, Благослове́нная.

Песнь 4.

Припев: Свята́я блаже́нная ма́ти на́ша Ксе́ние, моли́ Бо́га о нас.

Услы́шавши, Ксе́ние, я́ко Небеса́ пове́дают сла́ву Бо́жию, / отве́ргла еси́ суету́ мирску́ю / и в по́двизе поста́ и лише́ния на земли́ Бо́га сла́вити возжеле́ла еси́, / Его́же сла́вити и нас сподо́би.

Услы́шавши и уразуме́вши дела́ Госпо́дня, / просла́вила еси́ Его́ Божество́, / наде́ждею и любо́вию к Нему́ украси́вши ду́шу твою́, / по́двиги просвети́лася еси́, блаже́нная, Бо́жиею си́лою укрепля́ема.

Слава: Услы́шавши преще́ния вра́жеская и вся́кие ко́зни от них терпя́щи, / непоколеби́ма пребыла́ еси́, / и нас непоколеби́мых в доброде́телех утверди́.

И ныне: Услы́ши, Пречи́стая Влады́чице, моле́ния на́ша, / и изба́ви нас от наси́лия вра́жия, / и глас Христо́в, призыва́ющий благослове́нныя в Ца́рство, услы́шати сподо́би.

Песнь 5.

Припев: Свята́я блаже́нная ма́ти на́ша Ксе́ние, моли́ Бо́га о нас.

Просвеща́хуся ве́рнии лю́дие, / зря́ще незло́бие и кро́тость твою́, ма́ти Ксе́ние, / помози́ и нам, блаже́нная, подража́ти твоему́ незло́бию.

Просвети́вши стезю́ жи́зни твоея́ све́том богоразу́мия, / Христа́ Го́спода вседу́шне возлюби́ла еси́, / сподо́би и ны, блаже́нная Ксе́ние, в сем бы́ти тебе́ подража́тели.

Слава: Просвети́ нас, о ма́ти Ксе́ние, наде́ждею и любо́вию ко Го́споду, / ны́не бо зря́щи Христа́ лице́м к лицу́, све́та неизрече́ннаго наслажда́ешися, / Тому́ за ны моли́ся.

И ныне: Просвети́ла еси́ омраче́нное естество́, Богоро́дице, / Свет и́стинный ро́ждши, / те́мже и нас све́том просвети́вши, от мра́чных враг свободи́.

Песнь 6.

Припев: Свята́я блаже́нная ма́ти на́ша Ксе́ние, моли́ Бо́га о нас.

Моли́тву, я́ко исто́чник приснотеку́щий, ны́не излива́еши, / неду́жныя исцеля́ющи, кре́пость и си́лу стра́ждущим подаю́щи, / сподо́би и нас моли́твами твои́ми изба́витися от вся́ких лю́тых.

Моли́твою Небе́сною и по кончи́не твое́й от неду́г свобожда́еши, / цели́тельнице безме́здная, досто́йно хва́лима еси́ на земли́, / моли́ся о душа́х на́ших.

Слава: Моли́тву на́шу приими́, ма́ти Ксе́ние, / да в честны́й храм твой прии́дем со тща́нием / и неду́гов душе́вных и страсте́й теле́сных исцеле́ние ско́ро прии́мем.

И ныне: Моли́твою Твое́ю всемо́щною, Пречи́стая, / изба́ви нас враг ви́димых и неви́димых, от грехо́в и вся́кия му́ки, / я́ко ро́ждшая Человеколю́бца Бо́га.

Го́споди, поми́луй, трижды. Сла́ва, и ны́не:

Кондак, глас 3:

Днесь све́тло лику́ет град свята́го Петра́, / я́ко мно́жество скорбя́щих обрета́ют утеше́ние, / на твоя́ моли́твы наде́ющеся, / Ксе́ние всеблаже́нная, / ты бо еси́ гра́ду сему́ похвала́ и утвержде́ние.

Икос: Ка́ко возмогу́, гре́шный аз, скве́рный душе́ю и те́лом, / пове́дати е́же во пло́ти равноа́нгельное житие́ твое́ и пресла́вная чудеса́, / а́ще у́бо мно́зи прему́дрии не дерза́ют испове́дати / мно́гаго твоего́ терпе́ния и смире́ния и те́плыя ко Христу́ любве́? / Но оба́че наде́яся на твое́ заступле́ние, о блаже́нная, вопию́ ти: / ра́дуйся, я́ко везде́ призыва́ющих тя ско́ро предваря́еши, / ра́дуйся, я́ко мно́жество скорбя́щих обрета́ют тобо́ю утеше́ние, / ра́дуйся, свята́я блаже́нная ма́ти Ксе́ние, / гра́ду сему́ похвало́ и утвержде́ние.

Песнь 7.

Припев: Свята́я блаже́нная ма́ти на́ша Ксе́ние, моли́ Бо́га о нас.

О́троки евре́йския А́нгел от огня́ неопа́льны сохрани́ / и тебе́, Ксе́ние, в стра́нничестем житии́ укрепи́, пою́щу: / благослове́н еси́, Го́споди Бо́же, во ве́ки.

Де́тем ева́нгельски подража́ла еси́ в житии́ твое́м, / стезю́ те́сную проше́дши в незло́бии, / те́мже и нас на по́двиг доброде́тели сея́ укрепи́, пою́щих: / благослове́н еси́, Го́споди Бо́же, во ве́ки.

Слава: Отроко́м в пещи́ халде́йстей подража́ющи, Ксе́ние, / воспева́ла еси́ Христа́, да́вшаго ти кре́пость, / те́мже и мы, чту́ще тя, блаже́нная, со дерзнове́нием зове́м: / благослове́н еси́, Го́споди Бо́же, во ве́ки.

И ныне: Отрокови́це Де́во, простри́ на нас ми́лость Сы́на Твоего́, / да кроме́шныя тьмы изба́вимся мольба́ми Твои́ми, пою́ще: / благослове́н еси́, Го́споди Бо́же, во ве́ки.

Песнь 8.

Ирмос: Победи́тели мучи́теля и пла́мене / благода́тию Твое́ю бы́вше, / за́поведем Твои́м зело́ прилежа́ще, / о́троцы вопия́ху: / благослови́те, вся дела́ Госпо́дня, Го́спода.

Припев: Свята́я блаже́нная ма́ти на́ша Ксе́ние, моли́ Бо́га о нас.

Победи́тельница страсте́й яви́лася еси́, Ксе́ние, / лю́тая искуше́ния вра́жия побежда́ющи и непреста́нно пою́щи: / благослови́те, вся дела́ Госпо́дня, Го́спода.

Побежда́ющи вся́кия стра́сти грехо́вныя, / ты, блаже́нная, я́ко све́тла звезда́ яви́лася еси́, / приво́диши бо жены́, па́дшия во грехи́, во е́же целому́дренно жи́ти и в покая́нии воспева́ти: / благослови́те, вся дела́ Госпо́дня, Го́спода.

Слава: Победи́тельница греха́ яви́лася еси́, блаже́нная ма́ти, благода́ть Вы́шняго иму́щи. / Те́мже Небе́сная дости́гла еси́, иде́же ны́не со А́нгелы пое́ши: / благослови́те, вся дела́ Госпо́дня, Го́спода.

И ныне: Побе́де во бране́х духо́вных ве́рным посо́бствуеши, Пресвята́я Де́во, / те́мже и лю́дем гра́да на́шего по́мощь Твою́ низпосли́, да Тя вы́ну пое́м: / благослови́те, вся дела́ Госпо́дня, Го́спода.

Песнь 9.

Ирмос: Вои́стинну Богоро́дицу / Тя испове́дуем, / спасе́ннии Тобо́ю, Де́во Чи́стая, / с безпло́тными ли́ки Тя велича́юще.

Припев: Свята́я блаже́нная ма́ти на́ша Ксе́ние, моли́ Бо́га о нас.

Вои́стинну ра́зум Христо́в име́ла еси́, Ксе́ние, / смире́ние, кро́тость, ве́ру несумне́нну, наде́жду и любо́вь, я́же к Бо́гу, / и нас сего́ сподо́би, да с тобо́ю Христа́ при́сно велича́ем.

Вои́стинну на тебе́, Ксе́ние блаже́нная, испо́лнися Христо́во прорече́ние: / претерпе́вый до конца́, той спасе́н бу́дет, / ны́не бо со все́ми спасе́нными Христа́ при́сно велича́еши.

Слава: Вои́стинну никто́же, притека́яй к тебе́, блаже́нная ма́ти, / тощь благода́ти Бо́жия отхо́дит, / ея́же и нас испо́лни, да тя велича́ем.

И ныне: Вои́стинну Богоро́дицу Тя, Де́во и Ма́ти Сло́ва, / Хода́таицу су́щую нам, Со́лнце пра́вды возсия́вшую, / ве́рнии, единому́дренно пе́сньми велича́ем.

Светилен:

Я́коже со́лнце светоно́сно, возсия́ ны́не, блаже́нная ма́ти, па́мять твоя́, / вся ве́рныя веселя́щи, и́же моли́твенно взыва́ют ти: / моли́ся приле́жно спасти́ся нам.

Слава, и ныне, Богородичен: Держа́вным Твои́м покровом, Пречистая, / нас, рабо́в Твои́х, от наве́тов вра́жиих сохраня́й всегда́ невреди́мых, / Тя бо еди́ну стяжа́хом наде́жду и утвержде́ние.

Молитва:

О свята́я блаже́нная ма́ти Ксе́ние! Под кро́вом Всевы́шняго жи́вшая, ведо́мая и укрепля́емая Богома́терию, глад и жа́жду, хлад и зной, поноше́ния и гоне́ния претерпе́вшая, дар прозорли́вости и чудотворе́ния от Бо́га получи́вшая и под се́нию Всемогу́щаго упоко́ившаяся, днесь же, от сла́внаго тысящеле́тия Креще́ния Руси́, Це́рковь Ру́сская прославля́ет тя, я́ко благоуха́нный цвет. Предстоя́ще на ме́сте твоего́ погребе́ния, пред о́бразом твои́м святы́м, я́ко живе́й ти су́щей с на́ми, мо́лимся ти: приими́ проше́ния на́ша и принеси́ я́ ко Престо́лу милосе́рднаго Отца́ Небе́снаго, я́ко дерзнове́ние к Нему́ иму́щая; испроси́ притека́ющим к тебе́ ве́чное спасе́ние, на блага́я дела́ и начина́ния на́ша ще́дрое благослове́ние, от вся́ких бед и скорбе́й избавле́ние. Предста́ни святы́ми твои́ми моли́твами пред Всеми́лостивым Спаси́телем на́шим о нас, недосто́йных и гре́шных. Помози́, свята́я блаже́нная ма́ти Ксе́ние, младе́нцы све́том свята́го Креще́ния озари́ти и печа́тию да́ра Ду́ха Свята́го запечатле́ти, ю́ныя в ве́ре, че́стности, богобоя́зненности и целому́дрии воспита́ти и успе́хи в уче́нии им стяжа́ти. Боля́щия и неду́гующия исцели́, супру́гом любо́вь и согла́сие ниспосли́, мона́шествующим по́двигом до́брым подвиза́тися помози́ и от поноше́ния огради́, па́стыри в кре́пости ду́ха утверди́, Це́рковь и страну́ на́шу сохрани́ и всех боголюби́вых чад в предсме́ртный час причаще́ния Святы́х Христо́вых Та́ин сподо́би, ты бо еси́ на́ше ско́рое услы́шание и избавле́ние, тебе́ благодаре́ние возсыла́ем и с тобо́ю сла́вим Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Молитва вторая:

О препроста́я о́бразом жития́ своего́, бездо́мная на земли́, насле́днице же оби́телей Отца́ Небе́снаго, блаже́нная стра́ннице Ксе́ние! Я́коже пре́жде к надгро́бию твоему́ неду́жнии и ско́рбнии припа́давшии и а́бие утеше́ниями исполня́емии, си́це ны́не и мы (имя рек), обурева́емии тлетво́рными обстоя́нии, тебе́ прибега́юще, с наде́ждою про́сим: помоли́ся, блага́я небоше́ственнице, да́бы испра́вилися стопы́ на́ша по словеси́ Госпо́дню к де́ланию за́поведей Его́, и да упраздни́тся богобо́рное безбо́жие, плени́вшее град твой и страну́ твою́, поверга́ющее нас, многогре́шных, в сме́ртное братоненави́дение, го́рдое самовозбеше́ние и ху́льное отча́яние. О, блаже́ннейшая Христа́ ра́ди, посрами́вшая суему́дрость ве́ка сего́, испроси́ у Творца́ и Пода́теля вся́ческих благ дарова́ти нам смире́ния, кро́тости и любве́ в сокро́вище се́рдца на́шего, ве́ры в укрепле́ние моли́твы, наде́жды в покая́нии, кре́пости в многотру́дном житии́, милосе́рднаго исцеле́ния души́ и те́ла на́шего, целому́дрия в супру́жестве и благопопече́ния о бли́жних и и́скренних свои́х, всего́ жития́ на́шего обновле́ние в чисти́тельней ба́не покая́ния, я́ко да всехва́льно воспева́юще па́мять твою́, просла́вим в тебе́ чудоде́йствующаго, Отца́ и Сы́на и Свята́го Ду́ха, Тро́ицу Единосу́щную и Неразде́льную во ве́ки веко́в. Ами́нь.

Молитва третия:

О пресла́вная свята́я блаже́нная ма́ти на́ша Ксе́ние, те́плая о нас пред Бо́гом моли́твеннице! Я́коже пре́жде к надгро́бию твоему́ припа́давшии, си́це ны́не и мы по прославле́нии твое́м к моще́м твои́м прибега́юще, про́сим: помоли́ся Го́споду, да освяти́т на́ши ду́ши и телеса́, да просвети́т ум, очи́стит со́весть от вся́кия скве́рны, нечи́стых по́мыслов, лука́вых и ху́льных умышле́ний и от вся́каго превозноше́ния, го́рдости же и киче́ния, высокоу́мия же и де́рзости, от вся́каго фарисе́йскаго лицеме́рия, и от вся́каго сту́днаго и лука́ваго обы́чая на́шего; да да́рует нам и́скреннее покая́ние, сокруше́ние серде́ц на́ших, смиренному́дрие, кро́тость же и ти́хость, благогове́ние, ра́зум же духо́вный со вся́ким благоразу́мием и благодаре́нием. Утаи́вшая себе́ от му́дрых ве́ка сего́, но Бо́гу зна́емая, испроси́ же стране́ на́шей Росси́йстей от бед лю́тых избавле́ние, всего́ на́шего жития́ обновле́ние и исправле́ние, соблюди́ нас во вся́ком благочести́вом правосла́вном испове́дании ве́ры христиа́нския, я́ко да ублажа́юще тя сподо́бимся во вся дни воспева́ти, благодари́ти и сла́вити Отца́ и Сы́на и Свята́го Ду́ха, Тро́ицу Единосу́щную, Животворя́щую и Неразде́льную во ве́ки веко́в. Ами́нь.

Молитва четвертая:

О свята́я уго́дница Бо́жия блаже́нная Ксе́ния! При́зри ми́лостиво твои́м о́ком на нас, раб Бо́жиих (имя рек), честно́й твое́й ико́не уми́льно моля́щихся и прося́щих у тебе́ по́мощи и заступле́ния. Простри́ ко Го́споду Бо́гу на́шему те́плыя твоя́ моли́твы и испроси́ душа́м на́шим оставле́ние прегреше́ний. Се бо мы се́рдцем сокруше́нным, и ду́хом смире́нным тебе́ хода́таицу ми́лостивую ко Влады́це и моли́твенницу за ны, гре́шныя, призыва́ем, я́ко ты прия́ла еси́ от Него́ благода́ть моли́тися за ны и от бед избавля́ти. Тебе́ у́бо про́сим, не пре́зри нас, недосто́йных, моля́щихся тебе́ и твое́й по́мощи тре́бующих, и исхода́тайствуй всем вся ко спасе́нию поле́зная, я́ко да твои́ми ко Го́споду Бо́гу моли́твами получи́вши благода́ть и ми́лость, просла́вим всех благи́х Исто́чника и Даропода́теля и Бо́га Еди́наго, в Тро́ице Святе́й сла́вимаго Отца́ и Сы́на и Свята́го Ду́ха, ны́не и при́сно и во ве́ки веко́в.

КАНОН СВЯТЕЙ ПРАВЕДНОЙ МАТРОНЕ МОСКОВСКОЙ

Тропарь, глас 2:

Бо́гом умудре́нную блаже́нную ста́рицу Матро́ну, / земли́ Ту́льския процвете́ние / и гра́да Москвы́ пресла́вное украше́ние, / восхва́лим днесь, ве́рнии. / Сия́ бо, све́та дневна́го не позна́вши, / све́том Христо́вым просвети́ся / и да́ром прозре́ния и исцеле́ния обогати́ся. / Пресе́льница же и стра́нница на земли́ бы́вши, / ны́не в черто́зех Небе́сных Престо́лу Бо́жию предстои́т / и мо́лится о душа́х на́ших.

Канон святыя, глас 8.

Песнь 1.

Припев: Свята́я блаже́нная Матро́но, моли́ Бо́га о нас.

Бо́же Всеми́лостиве, сподо́би ны, недосто́йныя, / воспе́ти уго́дницу Твою́ Матро́ну, / на́шу изря́дную пред Тобо́ю хода́таицу и моли́твенницу.

Любо́вию ко Христу́ от младе́нческих пеле́н уязви́лася еси́ / и Тому́ неле́ностно в житии́ твое́м служи́ла еси́, ма́ти блаже́нная.

Слава: Избра́нный сосу́д Ду́ха Свята́го яви́лася еси́, / благода́ть бо Бо́жию от святы́я купе́ли до конца́ дний твои́х / при́сно усе́рдно возгрева́ла еси́, ма́ти блаже́нная.

И ныне: Арха́нгельски песнь Тебе́ пое́м, Чи́стая: / ра́дуйся, Обра́дованная, Мари́е, Ма́ти Христа́ Бо́га, / при́сно моля́щаяся за род наш.

Песнь 3.

Ирмос: Небе́снаго кру́га Верхотво́рче, Го́споди, / и Це́ркве Зижди́телю, / Ты мене́ утверди́ в любви́ Твое́й, / жела́ний кра́ю, ве́рных утвержде́ние, / Еди́не Человеколю́бче.

Припев: Свята́я блаже́нная Матро́но, моли́ Бо́га о нас.

Житие́м богоуго́дным и пра́ведным освяти́лася еси́, ма́ти блаже́нная, / те́мже и нам, с ве́рою к тебе́ прибега́ющим, / помози́ благода́ти Бо́жия испо́лнитися.

Христа́ Человеколю́бца, Его́же от ю́ности твоея́ возлюби́ла еси́, ма́ти свята́я, / моли́ утверди́тися нам на ка́мени за́поведей Его́.

Слава: Це́ркве Зижди́тель Госпо́дь / светообра́зное ча́до церко́вное соде́ла тя, пра́ведная ма́ти, / и в любви́ Свое́й утверди́ тя, я́ко Человеколю́бец.

И ныне: Небеси́ и земли́ Цари́це, Богоро́дице Де́во, / и Це́ркве покро́ве всемо́щный, / утверди́ оби́тель сию́ непоколеби́мо во благоче́стии пребыва́ти.

Го́споди, поми́луй, трижды.

Седален, глас 4:

По и́мени твоему́, Матро́но блаже́нная, житие́ твое́ бысть, / скита́ния бо, поноше́ния и ско́рби ни во что же вмени́вши, / госпожа́ яви́лася еси́ не то́кмо и́менем, но и ду́хом. / Те́мже и вся потре́бная Ца́рствия ра́ди Бо́жия стяжа́ла еси́ / и Бо́гом обогати́лася еси́.

Слава, и ныне, Богородичен: Ны́не, ра́дуйся, Тебе́ зове́м, Влады́чице, / гре́шником погиба́ющим исправле́ние / и нам, велича́ющим Тя, спасе́ние.

Песнь 4.

Припев: Свята́я блаже́нная Матро́но, моли́ Бо́га о нас.

Смотре́ние Бо́жие на тебе́ осо́бь явле́но бысть, ма́ти блаже́нная, / я́ко слепа́ и не́мощна те́лом су́щи, / да́ром прозре́ния и чуде́с обогати́лася еси́ / и венце́м нетле́нным от Го́спода украси́лася еси́.

Мудрова́ния плотска́я презре́ла еси́, блаже́нная, / оба́че му́дростию, е́юже Госпо́дь умудря́ет слепцы́, / изря́дно обогати́лася еси́.

Слава: Я́ко алава́стр ми́ра, облагауха́ющ преде́лы Росси́йстии, / ве́мы тя, Матро́но пра́ведная, / стека́ются бо к тебе́ со всех конце́в лю́дие земли́ на́шея, заступле́ния прося́ще.

И ныне: Блажи́м Тя, вси ро́ди, Пресвята́я Де́во, / погиба́ющих взыску́ющую, немощны́х врачу́ющую и си́рых заступа́ющую.

Песнь 5.

Припев: Свята́я блаже́нная Матро́но, моли́ Бо́га о нас.

Христо́с, Свет И́стинный, / ум твой, свята́я ма́ти, просвети́л есть к разуме́нию повеле́ний Его́, / те́мже служи́ти Ему́ в житии́ твое́м усе́рдно потща́лася еси́.

Све́том Христо́вым озаря́ема, / в ми́ре сем, безбо́жнем и грехолюби́вем, / яви́лася еси́ я́ко столп о́гнен, светя́й во тьме, пра́ведная Матро́но.

Слава: Я́ко звезда́ многосве́тлая, возсия́ла еси́ в житии́ твое́м, пра́ведная Матро́но, / указу́ющи и́стинный путь лю́дем заблу́ждшим. / Си́це и ны́не, в Небе́сных оби́телех водвори́вшися, / моли́ просвети́ти и спасти́ ду́ши на́ша.

И ныне: Свет ро́ждшая Боже́ственный и Преве́чный, Богоневе́сто, / разреши́ мглу прегреше́ний на́ших.

Песнь 6.

Припев: Свята́я блаже́нная Матро́но, моли́ Бо́га о нас.

Моли́твы при́сно к Бо́гу вознося́щи, / вся ну́жды и печа́ли Тому́ возвеща́ла еси́, пра́ведная ма́ти, / и, я́ко Ио́на во чре́ве ки́тове, в ско́рби ве́лией вопия́ла еси́: / Бо́же, из глубины́ зол возведи́ мя.

По́мощию Бо́жиею вся ну́жды смире́нне претерпе́вши, пра́ведная Матро́но, / вра́жию си́лу моли́твою твое́ю победи́ла еси́. / Те́мже, ны́не неоску́дно благода́ть Христо́ву прие́мши, / моли́ся, е́же от злоде́йства диа́вольскаго нам изба́витися.

Слава: Мно́гими по́двиги твои́ми, пра́ведная Матро́но, ста́ла еси́ проти́ву ко́зней диа́вольских, / брань веду́щи с миродержи́телем тьмы ве́ка сего́. / Те́мже о нас ны́не моли́ся, да прии́мем вся ору́жия Бо́жия / и возмо́жем проти́витися во дни лю́тыя духово́м зло́бы поднебе́сным.

И ныне: А́да и сме́рти Победи́теля ро́ждшая, Пречи́стая Де́во, / моли́ Го́спода и Сы́на Твоего́ / враго́в злоде́йствия нас изба́вити.

Го́споди, поми́луй, трижды. Сла́ва, и ны́не:

Кондак, глас 7:

К служе́нию Христо́ву / от чре́ва ма́терня предызбра́нная, / пра́ведная Матро́но, / стезе́ю скорбе́й и печа́лей ше́ствующи, / тве́рдую ве́ру и благоче́стие яви́вши, / Бо́гу угоди́ла еси́. / Те́мже, почита́юще па́мять твою́, мо́лим тя: / помози́ и нам в любви́ Бо́жии пребыва́ти, / ста́рице блаже́нная.

Песнь 7.

Припев: Свята́я блаже́нная Матро́но, моли́ Бо́га о нас.

Возгоре́ся нече́стие в земли́ на́шей, / я́ко пла́мень дре́вле в пещи́ вавило́нстей, / ве́ру оте́ческую в лю́дех тща́щееся попали́ти, / ты же, блаже́нная, приходя́щих к тебе́ науча́ла еси́ ве́рою воспева́ти: / отце́в Бо́же, благослове́н eси́.

Богопроти́внии мучи́телие, от зако́на Бо́жия отсту́пльшии, / огнь гоне́ний во стране́ на́шей возжго́ша, / ты же, пра́ведная Матро́но, приходя́щим к тебе́ си́лою Христо́вою ро́су духо́вную подава́ла еси́, / да не попале́ны до конца́ бу́дут, но при́сно воспева́ют: / отце́в Бо́же, благослове́н еси́.

Слава: А́нгелу Бо́жию, / в пещи́ вавило́нстей отроко́м дре́вле пла́мень о́гненный угаси́вшему, / уподо́билася еси́, блаже́нная, / росси́йским бо лю́дем во дни нече́стия моли́твами твои́ми / от злобо́жнаго языковре́дия неврежде́нным бы́ти споспе́шествовала еси́, науча́ющи взыва́ти: / отце́в Бо́же, благослове́н еси́.

И ныне: К покро́ву Твоему́ прибега́ем, Де́во, купино́ неопали́мая, / грехи́ на́ша, я́ко те́рние зловре́дное, попали́ моли́твами Твои́ми, / да чи́стым се́рдцем взыва́ем: / отце́в Бо́же, благослове́н еси́.

Песнь 8.

Ирмос: Царя́ Небе́снаго, / Его́же пою́т во́и а́нгельстии, / хвали́те и превозноси́те во вся ве́ки.

Припев: Свята́я блаже́нная Матро́но, моли́ Бо́га о нас.

Царя́ Небе́снаго измла́да возлюби́ла еси́ / и Тому́ до конца́ дний свои́х со тща́нием служи́ла еси́, блаже́нная. / Ны́не же с ли́ки а́нгельскими при́сно пое́ши: / Го́спода по́йте и превозноси́те Его́ во вся ве́ки.

За́поведи Госпо́дни усе́рдне соблюда́ющи, / столп благоче́стия Росси́и яви́лася еси́, ма́ти блаже́нная, / я́коже о тебе́ предрече́ кроншта́дтский пра́ведник, / с ни́мже превозно́сиши Христа́ во ве́ки.

Слава: Мно́зии лю́дие росси́йстии, плене́ннии безбо́жием, / моли́твами твои́ми, пра́ведная Матро́но, на путь спасе́ния возврати́шася / и, в ве́ре пра́вей укрепи́вшеся, Триеди́ному Бо́гу воспе́ша: / Го́спода по́йте и превозноси́те Его́ во вся ве́ки.

И ныне: Ро́ждшую Царя́ Небе́снаго, / я́вльшагося в мир взыска́ти нас, погиба́ющих, / Тя, Богоро́дице, велича́ем.

Песнь 9.

Припев: Свята́я блаже́нная Матро́но, моли́ Бо́га о нас.

О чу́до ве́лие, ко́сти сухи́я источа́ют исцеле́ния / и тле́нное естество́ дух наш к Нетле́нному Бо́гу возво́дит. / Сего́ ра́ди Матро́ну блаже́нную велича́ем.

Град Москву́ и оби́тель Покро́ва Пресвяты́я Богоро́дицы, / иде́же почива́ют честны́я мо́щи твоя́, пра́ведная Матро́но, / сохрани́ от вся́ких напа́стей и зол / и утверди́ в пра́вей ве́ре и благоче́стии всех, почита́ющих тя.

Слава: Приими́ на́ше недосто́йное моле́ние, Матро́но блаже́нная, / и, я́коже обеща́лася еси́, хода́тайствуй пред Го́сподем поле́зная нам дарова́ти, / да с тобо́ю сподо́бимся в селе́ниих ра́йских сла́вити Святу́ю Тро́ицу.

И ныне: И́стинную избра́нницу Твою́, Богома́ти, ве́мы Матро́ну блаже́нную: / сия́ бо в день почита́ния ико́ны Твоея́ Скоропослу́шницы роди́ся, / в хра́ме Успе́ния Твоего́ крести́ся, / о́браз Твой Взыска́ние поги́бших тща́нием ея́ написа́ся, / та́же и те́лом во оби́тели честна́го Покро́ва Твоего́ почива́ет / и мо́лится о душа́х на́ших.

Светилен:

А́нгели пресве́тлии вознесо́ша святу́ю ду́шу твою́, блаже́нная Матро́но, к Престо́лу Царя́ сла́вы, / иде́же торжеству́еши со все́ми святы́ми и мо́лишися о душа́х на́ших.

Слава, и ныне, Богородичен: Свет и́стинный ро́ждшая, Богоро́дице, / помраче́нных нас тьмо́ю грехо́вною просвети́ / и прича́стники ве́чных благ соде́лай.

Молитва:

О блаже́нная ма́ти Матро́но, душе́ю на Небеси́ пред Престо́лом Бо́жиим предстоя́щи, те́лом же на земли́ почива́ющи и да́нною ти свы́ше благода́тию разли́чныя чудеса́ источа́ющи, при́зри ны́не ми́лостивным твои́м о́ком на ны, гре́шныя, в ско́рбех, боле́знех и грехо́вных искуше́ниих дни своя́ иждива́ющия, уте́ши ны, отча́янныя, исцели́ неду́ги на́ша лю́тыя, от Бо́га нам по грехо́м на́шим попуща́емыя, изба́ви нас от мно́гих бед и обстоя́ний, умоли́ Го́спода на́шего Иису́са Христа́ прости́ти нам вся на́ша согреше́ния, беззако́ния и грехопаде́ния, и́миже мы от ю́ности на́шея да́же до настоя́щаго дне и часа́ согреши́хом, да твои́ми моли́твами получи́вше благода́ть и ве́лию ми́лость, просла́вим в Тро́ице Еди́наго Бо́га, Отца́, и Сы́на, и Свята́го Ду́ха, ны́не и при́сно и во ве́ки веко́в. Ами́нь.

Комментарии для сайта Cackle

Канонник (цсл)

КАНОН СВЯТЕЙ И ЖИВОНАЧАЛЬНЕЙ ТРОИЦЕ

КАНОН ПОКАЯННЫЙ КО ГОСПОДУ НАШЕМУ ИИСУСУ ХРИСТУ

КАНОН ВО СВЯТУЮ И ВЕЛИКУЮ НЕДЕЛЮ ПАСХИ

КАНОН ЕЖЕ ПО ПЛОТИ РОЖДЕСТВУ ГОСПОДА БОГА И СПАСА НАШЕГО ИИСУСА ХРИСТА

КАНОН ЧЕСТНОМУ И ЖИВОТВОРЯЩЕМУ КРЕСТУ ХРИСТОВУ

КАНОН МОЛЕБНЫЙ ПРЕСВЯТЕЙ БОГОРОДИЦЕ

КАНОН РОЖДЕСТВУ ПРЕСВЯТЫЯ ВЛАДЫЧИЦЫ НАШЕЯ БОГОРОДИЦЫ И ПРИСНОДЕВЫ МАРИИ

КАНОН ПОКРОВУ ПРЕСВЯТЫЯ ВЛАДЫЧИЦЫ НАШЕЯ БОГОРОДИЦЫ И ПРИСНОДЕВЫ МАРИИ

КАНОН ПРЕСВЯТЕЙ БОГОРОДИЦЕ ПРЕД ИКОНОЮ ЕЯ, НАРИЦАЕМОЮ ФЕОДОРОВСКАЯ

КАНОН ИНЫЙ ПРЕСВЯТЕЙ БОГОРОДИЦЕ ПРЕД ИКОНОЮ ЕЯ, НАРИЦАЕМОЮ ФЕОДОРОВСКАЯ

КАНОН ПРЕСВЯТЕЙ БОГОРОДИЦЕ ПРЕД ИКОНОЮ ЕЯ, НАРИЦАЕМОЮ УТОЛИ МОЯ ПЕЧАЛИ

КАНОН ПРЕСВЯТЕЙ БОГОРОДИЦЕ ПРЕД ИКОНОЮ ЕЯ, НАРИЦАЕМОЮ СКОРОПОСЛУШНИЦА

КАНОН ПРЕСВЯТЕЙ БОГОРОДИЦЕ ПРЕД ИКОНОЮ ЕЯ, НАРИЦАЕМОЮ ТРОЕРУЧИЦА

КАНОН ПРЕСВЯТЕЙ БОГОРОДИЦЕ ПРЕД ИКОНОЮ ЕЯ, НАРИЦАЕМОЮ УМИЛЕНИЕ ИЛИ РАДОСТЬ ВСЕХ РАДОСТЕЙ

КАНОН ПРЕСВЯТЕЙ БОГОРОДИЦЕ ПРЕД ИКОНОЮ ЕЯ, НАРИЦАЕМОЮ СПОРИТЕЛЬНИЦА ХЛЕБОВ

КАНОН ПРЕСВЯТЕЙ БОГОРОДИЦЕ ПРЕД ИКОНОЮ ЕЯ, НАРИЦАЕМОЮ ВСЕЦАРИЦА

КАНОН СВЯТЫМ НЕБЕСНЫМ СИЛАМ

КАНОН СВЯТОМУ АРХИСТРАТИГУ БОЖИЮ МИХАИЛУ

КАНОН СВЯТОМУ АРХАНГЕЛУ БОЖИЮ ГАВРИИЛУ

КАНОН АНГЕЛУ ХРАНИТЕЛЮ

КАНОН СВЯТОМУ ИОАННУ ПРЕДТЕЧИ

КАНОН СВЯТИТЕЛЮ НИКОЛАЮ, АРХИЕПИСКОПУ МИР ЛИКИЙСКИХ, ЧУДОТВОРЦУ

КАНОН СВЯТИТЕЛЮ СПИРИДОНУ, ЕПИСКОПУ ТРИМИФУНТСКОМУ, ЧУДОТВОРЦУ

КАНОН СВЯЩЕННОМУЧЕНИКУ КИПРИАНУ И СВЯТЕЙ МУЧЕНИЦЕ ИУСТИНЕ

КАНОН ВЕЛИКОМУЧЕНИКУ И ЦЕЛИТЕЛЮ ПАНТЕЛЕИМОНУ

КАНОН СВЯТОМУ МУЧЕНИКУ ТРИФОНУ

КАНОН ПРЕПОДОБНОМУ СЕРГИЮ, ИГУМЕНУ РАДОНЕЖСКОМУ И ВСЕЯ РОССИИ ЧУДОТВОРЦУ

КАНОН ПРЕПОДОБНОМУ АЛЕКСАНДРУ СВИРСКОМУ

КАНОН ПРЕПОДОБНОМУ ОТЦУ НАШЕМУ СЕРАФИМУ, САРОВСКОМУ ЧУДОТВОРЦУ

КАНОН СОБОРУ ПРЕПОДОБНЫХ ОТЦЕВ И СТАРЦЕВ, В ОПТИНОЙ ПУСТЫНИ ПРОСИЯВШИХ

КАНОН СВЯТОМУ ПРАВЕДНОМУ ИОАННУ КРОНШТАДТСКОМУ, ЧУДОТВОРЦУ

КАНОН ПРЕПОДОБНОЙ МАТЕРИ НАШЕЙ МАРИИ ЕГИПТЯНЫНЕ

КАНОН СВЯТЫМ ЧУДОТВОРЦЕМ МУРОМСКИМ КНЯЗЮ ПЕТРУ, ВО ИНОЦЕХ ДАВИДУ, И КНЯГИНЕ ФЕВРОНИИ, ВО ИНОКИНЯХ ЕВФРОСИНИИ

КАНОН CВЯТЕЙ ПРАВЕДНОЙ АННЕ, МАТЕРИ ПРЕСВЯТЫЯ БОГОРОДИЦЫ

КАНОН СВЯТЕЙ БЛАЖЕННОЙ КСЕНИИ ПЕТЕРБУРГСКОЙ, ХРИСТА РАДИ ЮРОДИВОЙ

КАНОН СВЯТЕЙ ПРАВЕДНОЙ МАТРОНЕ МОСКОВСКОЙ

Тематические страницы