Конда́к 1

Избра́нная уго́дница Христо́ва,

свята́я блаже́нная Ксе́ние,

хвале́бное пе́ние ти прино́сим,

чту́ще терпе́ние твое́ и злострада́ние во́льное;

ты же, иму́щи дерзнове́ние ко Го́споду,

во вся́ких беда́х и напа́стех

заступа́й нас, гре́шных, взыва́ющих к тебе́:

Ра́дуйся, Ксе́ние блаже́нная, моли́твеннице о душа́х на́ших.

И́кос 1

Равноа́нгельски на земли́ пожи́ла еси́, блаже́нная ма́ти, по успе́нии му́жа твоего́, без приуготовле́ния христиа́нскаго внеза́пу сконча́вшагося, отве́ргла еси́ жизнь мирску́ю, Бо́га моля́щи супру́га твоего́ ду́шу поми́ловати, по́двиг юро́дства на себе́ прие́мши, стяжа́ла еси́ соверше́нство духо́вное. Того́ ра́ди услы́ши от нас похвалы́ сия́, тебе́ возноси́мыя:

Ра́дуйся, Христо́ва уго́днице, в ми́ре надми́рно пожи́вшая;

ра́дуйся, вся прило́ги ми́ра, пло́ти и диа́вола победи́вшая.

Ра́дуйся, нищету́ во́льную на всю жизнь избра́вшая;

ра́дуйся, сокро́вище безце́нное на Небеси́ улучи́вшая.

Ра́дуйся, печа́ли и ско́рби безро́потно поне́сшая;

ра́дуйся, людьми́ правосла́вными люби́мая и сла́вимая.

Ра́дуйся, о часе́ сме́ртнем по́мнити нас призыва́ющая;

ра́дуйся, бли́жняго ду́шу па́че ми́ра сего́ люби́ти науча́ющая.

Ра́дуйся, Ксе́ние блаже́нная, моли́твеннице о душа́х на́ших.

Кондак 2

Ви́дяще странное твое житие, блаженная, яко ты во цвете мла́дости твоея́ во одежду мужа твоего усопшаго облеклася, именем его нареклася и себе умершу нарицала еси, дом же твой и вся блага земная оставивши, скиталицу себе сотворила еси, сродницы безумну тя мняху, людие же боголюбивии воспеша: Аллилу́ия.

Икос 2

Ра́зум, от Бога дарова́нный, сокрыла еси, блаженная Ксение, во безумии мнимом; в суете града великаго аки пустынница жила еси, молитвы к Богу возносящи непрестанно. Мы же, дивящеся житию твоему, воспеваем сице:

Ра́дуйся, от Бога крест тяжкий юродства на ра́ме твои приемшая;

радуйся, мнимым безумием сияние благодати сокрывшая.

Радуйся, именем мужеским нарекшися, немощи женския отрешившаяся;

радуйся, житием твоим Андрею, Христа ради юродивому, равная.

Радуйся, все имение твое бедным людем раздавшая;

радуйся, жилище Духу Святому в сердце твоем уготовившая.

Радуйся, всех прибегающих к тебе благое утешение;

радуйся, от смерти внезапныя избавление.

Ра́дуйся, Ксе́ние блаже́нная, моли́твеннице о душа́х на́ших.

Кондак 3

Си́лою, свыше ти дарованною, благодатию и мужеством зной и стужу лютую одолевала еси молитвою, всено́щно творимою, и поклонами; темже и прославлена бысть святость твоя, блаженная Ксение, во отечестве нашем многострада́льнем и во всем мире православнем, да зовем с тобою Богу: Аллилу́ия.

Икос 3

Име́ла еси, о мати блаженная, небо — покров, землю же — ложе свое, попечением о теле, во одежду ветхую облеченном, небрегла еси, молитвы же к Богу пламенне возносила еси. Сего ради воспеваем ти сице:

Ра́дуйся, век твой земный без крова проведшая;

радуйся, небеснаго крова взыскавшая и того улучившая.

Радуйся, по вся времены́ года всено́щно в поле молившаяся;

радуйся, поклоны земныя на вся страны́ света тамо творившая.

Радуйся, град Петров всено́щным бдением от бед ограждавшая;

радуйся, гнев Божий от него многажды отвращавшая.

Радуйся, благодатию Духа Святаго чудесно согреваемая;

радуйся, хлад лютый душ наших молитвою твоею растопляющая.

Ра́дуйся, Ксе́ние блаже́нная, моли́твеннице о душа́х на́ших.

Кондак 4

Бу́рю житейскую, на сто́гнах града твоего мяту́щуюся, кротостию и незлобием одолевала еси, мати блаженная, безстрастие же посреде́ мира дольняго стяжала еси. Духом Святым просвещаемая, взывала еси подателю тишины сердечныя Богу: Аллилу́ия.

Икос 4

Слы́шаша людие дар прозрения чудный, тобою явле́нный, святая мати, и дивишася. Се, жене некоей рекла еси: «Приими пятак, зде царь на коне… Угаснет». Сия же, не ведящи, яко ты пожар дома ея прозрела еси, притече во своя си и узре дом свой, во огни горящ. И по молитве твоей пламень огня угасе. Людие же страждущии к помощи твоей прибегаху, юже стяжавше, взываху ти сице:

Ра́дуйся, дар прозрения смирением крайним стяжавшая;

радуйся, дар сей на пользу и спасение страждущих являвшая.

Радуйся, свеще негасимая, к Богу в молитвах горевшая;

радуйся, верою твоею пламенною пожары домов угашавшая.

Радуйся, грядущая страдания людская аки настоящая зревшая;

радуйся, враче́м безмездным и милосердым людем бывшая.

Радуйся, яко и нас, немощных, в вере укрепляеши;

радуйся, яко сиянием святости твоея народ православный озаряеши.

Ра́дуйся, Ксе́ние блаже́нная, моли́твеннице о душа́х на́ших.

Кондак 5

Боготе́чною звездою осветила еси небосклон града Петра апостола святость твоя, угоднице Божия, уже бо людем во безумии греха погибающим, явила еси им путь спасения, к покаянию их призывающи, во еже вопити Богу: Аллилу́ия.

Икос 5

Ви́дяще подвиги твоя молитвенныя, терпение хлада и зноя великое, людие ослабити желаху страдания твоя, ты же одежду и вся ими приносимая нищим раздавала еси, нищету свою аки сокровище хранящи. Сего ради слышиши от нас сицевая:

Ра́дуйся, богатство твое токмо в любви к Богу и ближним полагавшая;

радуйся, ничтоже земное имевшая и всех духовно богатившая.

Рaдуйся, милостивым твоим сердцем страждущим сострадавшая;

радуйся, помощь им чрез людей добрых посылавшая.

Радуйся, миру чуждая, в мире живущим добро творившая;

радуйся, века сего суемудрия отвергатися научившая.

Радуйся, плакати со плачущими нас подвизающая;

радуйся, от сна тяжкаго греховнаго пробуждающая.

Ра́дуйся, Ксе́ние блаже́нная, моли́твеннице о душа́х на́ших.

Кондак 6

Пропове́дана бысть святость жития твоего, богоблаженная, жителем града твоего, егда ты о младенце, еще не рождшемся, попечение явила еси, и жене благой, в доме, тобою дарованном, жившей, прорекла есй: «Бог тебе сына посла, тецы на кладбище Смоленское!» Она же потщася абие, и сироту, рожденнаго у матере, внезапу на пути пострадавшия и скончавшияся, в дом свой прият. И вси, аки семья единая, вся лета жития своего тебе благодаряще, Богу Человеколюбцу взываху: Аллилу́ия.

Икос 6

Возсия́ла есть слава подвиго́в твоих, блаженная мати Ксение, егда ты нощию на верх храма Смоленскаго камни, таящися, носила еси, дому Пречистыя возградитися пособствующи. Ныне же вси молящиися во святем храме сем и во всем мире Божием, на образ твой взирающе, воспевают сице:

Ра́дуйся, к подвиго́м благочестия всех призывающая;

радуйся, тайно творити добро научающая.

Радуйся, храмы Божия зиждущим помогающая;

радуйся, святыню церковную возлюбившая.

Радуйся, в делех благих усердное поспешение;

радуйся, трудов наших на пути спасения облегчение.

Радуйся, под кровом Божия Матере подвиги творившая и тако почившая;

радуйся, с Нею ныне на Небеси о нас Христа молящая.

Ра́дуйся, Ксе́ние блаже́нная, моли́твеннице о душа́х на́ших.

Кондак 7

Хотя́ судьбы людския во благая устроити, повелела еси деве кроткой на Охту тещи́, прорекши: «Муж твой тaмо жену погребает!» Она же в недоумении бысть, обаче не преслуша глагола твоего, и тамо вдовца младаго, над гробом жены рыдавшаго, сретила есть и утешение в молитве ему подаде́. Году же минувшу, тии венчашася; и в любви и согласии многая лета поживше, чад своих наставляху тебе, святая мати, чтити, Богу же воспеваху песнь: Аллилу́ия.

Икос 7

Но́вое чудо показала еси, блаженная, посреде скверны людския юродством сокрытую душу твою в кротости ангельстей соблюдши. Научи и нас, мати Ксение, и малыя доли скорбей твоих не терпящих и в ропоте на Бога и ближняго дни наша иждивающих, вся свыше посылаемая в терпении сносити, да взирающе на подвиги твоя, чистым сердцем зовем ти сице:

Ра́дуйся, миру злохладному благодатную мудрость явившая;

радуйся, нищеты духовныя блаженство вкусившая.

Радуйся, образ терпения и благосердия нам подающая;

радуйся, смирением и покаянием от бед избавитися научающая.

Радуйся, с молитвою и любовию детей благословлявшая;

радуйся, ласкою рук твоих чудесно их исцелявшая.

Радуйся, тоску тяжкую, душу сокрушающую, от нас отводящая;

радуйся, надеждою несумненною на милость Божию окрыляющая.

Ра́дуйся, Ксе́ние блаже́нная, моли́твеннице о душа́х на́ших.

Кондак 8

Стра́нницею бездомною протекла еси путь скорбный жизни твоея в стольнем граде отечества нашего, мати всеблаженная, взыскующи Града Вышняго, Иерусалима Небеснаго; ныне же в нем со ангелы и всеми святыми поеши Богу: Аллилу́ия.

Икос 8

Вся в молитвах ко Творцу пребывающи, мати святая, до успения твоего от страдaний и подвиго́в к жизни блаженней и вечней невозбранно прешла еси. Сего ради, преклоняюще колена сердец наших, благоговейное пение ти приносим:

Ра́дуйся, во обителех горних с лики святых ликующая;

радуйся, и нас, тебе молящихся, тамо не забывающая.

Радуйся, чудеса неизчетная по успении твоем явившая;

радуйся, смертно болящих, врачами оставленных, исцелявшая.

Радуйся, во пиянстве гибнущих устрашение и исправление;

радуйся, места служения лишившимся благое поспешение.

Радуйся, вдовиц и жен, супругом оставленных, покровительнице;

радуйся, странников и безприютных питательнице.

Ра́дуйся, Ксе́ние блаже́нная, моли́твеннице о душа́х на́ших.

Кондак 9

Вся́кия утоли болезни, блаженная мати Ксение, на тя надеющихся и к помощи твоей усердно притекающих, поминающих душу твою для души своея спасения, якоже завещала еси, Богу же, в тебе прославленному, вопиющих непрестанно: Аллилу́ия.

Икос 9

Вети́я суемудренныя разумети не могут, како ты безумием своим безумие мира сего обличила еси и немощию своею сильныя и крепкия посрамила еси, не ведят бо в тебе силы Божия и премудрости. Mы же, тя почитающе, с любовию зовем ти сице:

Ра́дуйся, Божественнаго Духа селение;

радуйся, велие к Богу дерзновение.

Радуйся, на усыпальнице твоей молящимся являющаяся и им помогающая;

радуйся, землею и елеем от нея многия освятившая и от недуг исцелившая.

Радуйся, яко одержимых страстьми́ от гибели спасаеши;

радуйся, яко отвергатися себе нас научаеши.

Радуйся, любве́ и смирения путь во спасение нам открывающая;

радуйся, ду́ши наша к жизни будущаго века готовящая.

Ра́дуйся, Ксе́ние блаже́нная, моли́твеннице о душа́х на́ших.

Кондак 10

Спасти́ люди хотящи, блаженная мати Ксение, присно да́руеши им заступление твое чудное. Се деву благочестивую, со вдовицею материю ея в канун венчания у могилы твоея усердно молившуюся, от брака со злодеем спасла еси, иже ратнаго человека уби, имя же и чйн его себе присво́и: в день той же убийца оный внезапу обличен бысть и, ужасом объят, исповеда всенародно, яко сила Божия сироту от брака с ним избави. Мы же, дивящеся силе молитв твоих спасающих, воспеваем Богу: Аллилу́ия.

Икос 10

Стена́ еси́ нерушимая, преблаженная мати, домово́м православных. Не остави и ныне супруги разделенныя, помози родителем, за грехи своя о чадех слезы проливающим, научи юноши и девы в чистоте себе хранити и всех нас святыню уз семейных почитати, да единеми усты воспеваем ти сице:

Ра́дуйся, дев благочестивых от брака невернаго избавляющая;

радуйся, спутника жизни добраго им обрести помогающая.

Радуйся, сродников враждующих благое примирение;

радуйся, слез детских осушение.

Радуйся, от убиения младенцев во чреве жена́м грозное прещение;

радуйся, на камени любви и веры домов устроение.

Радуйся, супругов, смертию разлученных, ограждение;

радуйся, в жизни бессмертней вечное их соединение.

Ра́дуйся, Ксе́ние блаже́нная, моли́твеннице о душа́х на́ших.

Кондак 11

Пение благодарственное приносят ти, мати блаженная, людие православнии, от бед и болезней молитвами твоими изба́вленнии. И ныне, аще попустит нам праведный Господь скорби грех наших ради, со слезами к тебе припадем, уповающе на милостивое твое о нас к Богу предстательство, да воспоем Ему: Аллилу́ия.

Икос 11

Светоза́рная луча́, во мра́це жизни сея́ путь ко Свету Неприступному освещающая, явися житие твое, богомудрая Ксение, и прославление всенародное, чудес множеством осиянное. И в годину лютую гонений безбожных вернии от часовни твоея не отступиша, но, презревше и страх смертный, с верою и упованием к тебе притекаху, сердцем воспевающе сице:

Ра́дуйся, безнадежных наде́яние;

радуйся, в бездне отчаяния погибающих спасение.

Радуйся, униженных и гонимых покровительнице;

радуйся, от клеветы и суда неправеднаго защитнице.

Радуйся, обидимых и обездоленных утешение;

радуйся, обидящих грозное вразумление.

Радуйся, града святаго Петра Небесная заступнице;

радуйся, чадом земли Российския мати и кормилице.

Ра́дуйся, Ксе́ние блаже́нная, моли́твеннице о душа́х на́ших.

Кондак 12

Благода́ть утешений обильно изливаеши, блаженная Ксение, всем чтущим память твою и к заступлению твоему притекающим. Темже и мы, грешнии, по Бозе на тя надежду возлагаем и молимся тебе усердно: не остави нас во обстояниих скорбных, умоли Господа Сил, да не отпадем от веры нашея православныя, в нейже тобою утверждаеми, зовем Ему верно: Аллилу́ия.

Икос 12

Пою́ще многая твоя чудеса, блаженная мати Ксение, восхваляем тя, яко теплую нашу заступницу и скорую предстательницу. Улучающе же от тебе помощь благодатную, неустанно воспеваем сице:

Ра́дуйся, светом кротости твоея вся концы земли озарившая;

радуйся, житием твоим постническим гордыню диавольскую посрамившая.

Радуйся, мира Божия в сердца́ верных принесение;

рaдуйся, дому цaрскому поможение и благословение.

Радуйся, о спасении отечества нашего присно молящая;

радуйся, во Отечество Небесное нам путь указующая.

Радуйся, по Богородице в скорбех и печалех наше утешение;

радуйся, по Бозе грехов наших прощение и вечное спасение.

Ра́дуйся, Ксе́ние блаже́нная, моли́твеннице о душа́х на́ших.

Кондак 13

Освята́я блаже́нная ма́ти Ксе́ние, в житии́ твое́м крест тя́жкий поне́сшая, приими́ от нас гре́шных моле́ние сие́, тебе́ приноси́мое, огради́ нас моли́твами твои́ми от наве́тов духо́в тьмы́, от бед и напа́стей, умоли́ Всеще́драго Бо́га пода́ти нам си́лу и кре́пость, да взе́мше крест свой, во след Христу́ гряде́м, пою́ще Ему́ с тобо́ю во ве́ки: Аллилу́ия.

Сей конда́к глаго́лется три́жды.

И па́ки чте́тся 1–й и́кос и 1–й конда́к:

И́кос 1

Равноа́нгельски на земли́ пожи́ла еси́, блаже́нная ма́ти, по успе́нии му́жа твоего́, без приуготовле́ния христиа́нскаго внеза́пу сконча́вшагося, отве́ргла еси́ жизнь мирску́ю, Бо́га моля́щи супру́га твоего́ ду́шу поми́ловати, по́двиг юро́дства на себе́ прие́мши, стяжа́ла еси́ соверше́нство духо́вное. Того́ ра́ди услы́ши от нас похвалы́ сия́, тебе́ возноси́мыя:

Ра́дуйся, Христо́ва уго́днице, в ми́ре надми́рно пожи́вшая;

ра́дуйся, вся прило́ги ми́ра, пло́ти и диа́вола победи́вшая.

Ра́дуйся, нищету́ во́льную на всю жизнь избра́вшая;

ра́дуйся, сокро́вище безце́нное на Небеси́ улучи́вшая.

Ра́дуйся, печа́ли и ско́рби безро́потно поне́сшая;

ра́дуйся, людьми́ правосла́вными люби́мая и сла́вимая.

Ра́дуйся, о часе́ сме́ртнем по́мнити нас призыва́ющая;

ра́дуйся, бли́жняго ду́шу па́че ми́ра сего́ люби́ти науча́ющая.

Ра́дуйся, Ксе́ние блаже́нная, моли́твеннице о душа́х на́ших.

Конда́к 1

Избра́нная уго́дница Христо́ва,

свята́я блаже́нная Ксе́ние,

хвале́бное пе́ние ти прино́сим,

чту́ще терпе́ние твое́ и злострада́ние во́льное;

ты же, иму́щи дерзнове́ние ко Го́споду,

во вся́ких беда́х и напа́стех

заступа́й нас, гре́шных, взыва́ющих к тебе́:

Ра́дуйся, Ксе́ние блаже́нная, моли́твеннице о душа́х на́ших.

Молитва

Освята́я блаже́нная ма́ти Ксе́ние! Под кровом Всевышняго жившая, ведо́мая и укрепляемая Богоматерию, глад и жажду, хлад и зной, поношения и гонения претерпевшая, дар прозорливости и чудотворения от Бога получившая и под сению Всемогущаго упокоившаяся, днесь же, от славнаго тысящелетия Крещения Руси, Церковь Русская прославляет тя, яко благоуханный цвет.

Предстоя́ще на месте твоего погребения, под образом твоим святым, яко живей ти сущей с нами, молимся ти: приими прошения наша и принеси я ко престолу Милосерднаго Отца Небеснаго, яко дерзновение к Нему имущая, испроси притекающим к тебе вечное спасение, на благая дела и начинания наша щедрое благословение, от всяких бед и скорбей избавление. Предстани святыми твоими молитвами пред Всемилостивым Спасителем нашим о нас, недостойных и грешных. Помози, святая блаженная мати Ксение, младенцы светом святаго крещения озарити и печатию дара Духа Святаго запечатлети, юныя в вере, честности, богобоязненности и целомудрии воспитати и успехи в учении им стяжати. Болящия и недугующия исцели, супругом любовь и согласие ниспосли, монашествующим по́двигом добрым подвизатися помози и от поношения огради, пастыри в крепости духа утверди, Церковь и страну нашу сохрани и всех боголюбивых чад в предсмертный час причащения Святых Христовых Таин сподоби, ты бо еси наше скорое услышание и избавление, тебе благодарение возсылаем и с тобою славим Отца и Сына и Свята́го Духа ныне и при́сно и во веки веков. Ами́нь.