В лето 6714 (1206.- М. Т.) князь великий Данило Иванович после Рюрика короля римского 14 лето пришед из Великого Новаграда в Суздаль, и в Суздале родися ему сын князь Георгий, и нарече и созда во имя его град Юрьев-Польской. И в том граде церковь велелепную созда во имя святаго Георгия Страстотерпца каменную на рези от подошвы и до верху. И по создании храма того поехал князь великий Данило Иванович изыскивати места, где ему создати град престольный к великому княжению своему. И взя собою некоего греченина именем Василия млада и знающа зело и ведающа чему впредь быти. И въехав с ним во остров темен и непроходим зело, в нем ж бе болото велико и топко, и посреде того болота и острова узре князь великий Данило Иванович зверя превелика и пречюдна троеглава и красна зело. И вопросиша Василия греченина, что есть видение се пречюднаго зверя. И сказа ему Василий греченин: «Великий княже, на сем месте созиждется град превелик и распространится царьствие треугольное, и в нем умножатся разных различных орд люди, то есть прообразуют зверя сего троеглавого.