Времени же наставшу, входит священник во храм и соединився со диаконом, творят вкупе к востоку пред святыми дверьми поклонения три и молитвы. Вшедше же во святилище облачатся и творят проскомидию. По отпусте же проскомидии кадит диакон святое предложение, святилище и храм весь, входит паки во святый олтарь, и покадив святую трапезу паки, и священника, кадильницу убо отлагает на место свое, сам же приходит ко иерею. И ставше вкупе пред святою трапезою, покланяются трижды, в себе молящеся и глаголюще:
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Сла́ва в Вы́шних Бо́гу, и на земли́ мир, в челове́цех благоволе́ние. Дважды.
Го́споди, устне́ мои́ отве́рзеши, и уста́ моя́ возвестя́т хвалу́ Твою́.
Таже целуют, священник убо святое Евангелие, диакон же святую трапезу. И посем подклонив диакон свою главу священнику, держа и орарь треми персты десныя руки, глаголет:
Вре́мя сотвори́ти Го́сподеви, влады́ко, благослови́.
Священник, знаменуя его, глаголет: Благослове́н Бог наш, всегда́, ны́не и при́сно, и во ве́ки веко́в.
Таже диакон: Помоли́ся о мне́, влады́ко святы́й.
Священник: Да испра́вит Госпо́дь стопы́ Твоя́.
И паки диакон: Помяни́ мя, влады́ко святы́й.
Священник: Да помяне́т тя Госпо́дь Бог во Ца́рствии Свое́м, всегда́, ны́не и при́сно, и во ве́ки веко́в.
Диакон же: Ами́нь.
И поклонився исходит северными дверьми, понеже царския двери до входа не отверзаются. И став на обычном месте, прямо святых дверей, покланяется со благоговением, трижды, глаголя в себе:
Го́споди, устне́ мои́ отве́рзеши, и уста́ моя возвестя́т хвалу́ Твою́.
Литургия оглашенных.
Диакон: Благослови́, влады́ко.
Иерей: Благослове́но Ца́рство Отца́ и Сы́на, и Свята́го Ду́ха, ны́не и при́сно, и во ве́ки веко́в.
Лик: Ами́нь.
Великая ектения.
Диакон: Ми́ром Го́споду помо́лимся.
Лик: Го́споди, поми́луй.
О свы́шнем ми́ре и спасе́нии душ на́ших, Го́споду помо́лимся.
Лик: Го́споди, поми́луй.
О ми́ре всего́ мiра, благостоя́нии святы́х Бо́жиих церкве́й и соедине́нии всех, Го́споду помо́лимся.
Лик: Го́споди, поми́луй.
О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.
Лик: Го́споди, поми́луй.
О Вели́ком Господи́не и отце́ на́шем, Святе́йшем Патриа́рхе (имярек), и о господи́не на́шем преосвяще́ннейшем митрополи́те (или архиепи́скопе, или епи́скопе) (имярек), честне́м пресви́терстве, во Христе́ диа́констве и о всем при́чте и лю́дех, Го́споду помо́лимся.
Лик: Го́споди, поми́луй.
О Богохрани́мей стране́ на́шей, власте́х и во́инстве ея́, Го́споду помо́лимся.
Лик: Го́споди, поми́луй.
О гра́де сем, (или о ве́си сей, или о святе́й оби́тели сей), вся́ком гра́де, стране́ и ве́рою живу́щих в ни́х, Го́споду помо́лимся.
Лик: Го́споди, поми́луй.
О бла́горастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.
Лик: Го́споди, поми́луй.
О пла́вающих, путеше́ствующих, неду́гующих, стра́ждущих, плене́нных и о спасе́нии их, Го́споду помо́лимся.
Лик: Го́споди, поми́луй.
О изба́витися нам от вся́кия ско́рби, гне́ва и ну́жды, Го́споду помо́лимся.
Лик: Го́споди, поми́луй.
Заступи́, спаси́, поми́луй и сохрани́ нас, Бо́же, Твое́ю благода́тию.
Лик: Го́споди, поми́луй.
Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Лик: Тебе́, Го́споди.
Молитва перваго антифона.
Иерей: Го́споди Бо́же наш, Его́же держа́ва несказа́нна и сла́ва непостижи́ма, Его́же ми́лость безме́рна и человеколю́бие неизрече́нно. Сам, Влады́ко, по благоутро́бию Твоему́ при́зри на ны и на святы́й храм сей, и сотвори́ с на́ми и моля́щимися с на́ми, богатыя ми́лости Твоя́ и щедро́ты Твоя́.
Возглашение: Я́ко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
И поется первый антифон от певцев.
Антифоны изобразительные.
Первый антифон, псалом 102.
1. Благослови́, душе́ моя́, Го́спода. / Благослове́н еси́, Го́споди. / Благослови́, душе́ моя́, Го́спода, / и вся вну́тренняя моя́ И́мя святое́ Его́.
2. Благослови́, душе́ моя́, Го́спода, / и не забыва́й всех воздая́ний Его́.
1. Очища́ющаго вся беззако́ния твоя́, / исцеля́ющаго вся неду́ги твоя́.
2. Избавля́ющаго от истле́ния живо́т твой, / венча́ющаго тя ми́лостию и щедро́тами.
1. Исполня́ющаго во благи́х жела́ние твое́: / обнови́тся, я́ко о́рля, ю́ность твоя́.
2. Творя́й ми́лостыни Госпо́дь, / и судьбу́ всем оби́димым.
1. Сказа́ пути́ Своя́ Моисе́ови, / сыново́м Изра́илевым хоте́ния Своя́.
2. Щедр и ми́лостив Госпо́дь, / долготерпели́в и многоми́лостив.
1. Не до конца́ прогне́вается, / ниже́ в век вражду́ет.
2. Не по беззако́нием на́шим сотвори́л есть нам, / ниже́ по грехо́м на́шим возда́л есть нам.
1. Я́ко по высоте́ небе́сней от земли́, / утверди́л есть Госпо́дь ми́лость Свою́ на боя́щихся Его́.
2. Ели́ко отстоя́т восто́цы от за́пад, / уда́лил есть от нас беззако́ния на́ша.
1. Я́коже ще́дрит оте́ц сы́ны, / уще́дри Госпо́дь боя́щихся Его́.
2. Я́ко Той позна́ созда́ние на́ше, / помяну́, я́ко персть есмы́.
1. Челове́к, я́ко трава́ дни́е его́, / я́ко цвет се́льный, та́ко оцвете́т.
2. Я́ко дух про́йде в нем, / и не бу́дет, / и не позна́ет ктому́ ме́ста своего́.
1. Ми́лость же Госпо́дня от ве́ка и до ве́ка / на боя́щихся Его́.
2. И пра́вда Его́ на сыне́х сыно́в, / храня́щих заве́т Его́, / и по́мнящих за́поведи Его́ / твори́ти я́.
1. Госпо́дь на небеси́ угото́ва Престо́л Свой, / и Ца́рство Его́ все́ми облада́ет.
2. Благослови́те Го́спода, вси А́нгели Его́, / си́льнии кре́постию, творя́щии сло́во Его́, / услы́шати глас слове́с Его́.
1. Благослови́те Го́спода, вся си́лы Его́, / слуги́ Его́, творя́щии во́лю Его́.
2. Благослови́те Го́спода, вся дела́ Его́, / на вся́ком ме́сте влады́чества Его́.
1. Сла́ва Отцу́ и Сы́ну и Свято́му Ду́ху.
2. И ны́не и при́сно и во ве́ки веко́в. Ами́нь.
1. Благослови́, душе́ моя́, Го́спода, / и вся вну́тренняя моя́ И́мя святое́ Его́. / Благослове́н еси́, Го́споди.
Малая ектения.
Диакон: Па́ки и па́ки, ми́ром Го́споду помо́лимся.
Лик: Го́споди, поми́луй.
Заступи́, спаси́, поми́луй и сохрани́ нас, Бо́же, Твое́ю благода́тию.
Лик: Го́споди, поми́луй.
Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Лик: Тебе́, Го́споди.
Молитва втораго антифона.
Иерей: Го́споди Бо́же наш, спаси́ лю́ди Твоя́ и благослови́ достоя́ние Твое́, исполне́ние Це́ркве Твоея́ сохрани́, освяти́ лю́бящия благоле́пие до́му Твоего́. Ты те́х воспросла́ви Боже́ственною Твое́ю си́лою и не оста́ви нас, упова́ющих на Тя.
Возглашение: Я́ко Твоя́ держа́ва и Твое́ есть Ца́рство и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Лик: Ами́нь.
Вторый антифон, псалом 145.
1. Хвали́, душе́ моя́, Го́спода. / Восхвалю́ Го́спода в животе́ мое́м, / пою́ Бо́гу моему́, до́ндеже есмь.
2. Не наде́йтеся на кня́зи, на сы́ны челове́ческия, / в ни́хже несть спасе́ния.
1. Изы́дет дух его́, / и возврати́тся в зе́млю свою́: / в той день поги́бнут вся помышле́ния его́.
2. Блаже́н, ему́же Бог Иа́ковль помо́щник его́, / упова́ние его́ на Го́спода Бо́га своего́.
1. Сотво́ршаго не́бо и зе́млю, / мо́ре и вся, я́же в них.
2. Храня́щаго и́стину в век, / творя́щаго суд оби́димым, / даю́щаго пи́щу а́лчущим.
1. Госпо́дь реши́т окова́нныя, / Госпо́дь умудря́ет слепцы́.
2. Госпо́дь возво́дит низве́рженныя, / Госпо́дь лю́бит пра́ведники.
1. Госпо́дь храни́т прише́льцы, / си́ра и вдову́ прии́мет, / и путь гре́шных погуби́т.
2. Воцари́тся Госпо́дь во век, / Бог твой, Сио́не, в род и род.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Песнь Господу Иисусу Христу.
Лик: Единоро́дный Сы́не и Сло́ве Бо́жий, Безсме́ртен Сый / и изво́ливый спасе́ния на́шего ра́ди / воплоти́тися от Святы́я Богоро́дицы и Присноде́вы Мари́и, / непрело́жно вочелове́чивыйся, / распны́йся же, Христе́ Бо́же, сме́ртию смерть попра́вый, / Еди́н Сый Святы́я Тро́ицы, / спрославля́емый Отцу́ и Свято́му Ду́ху, спаси́ нас.
Малая ектения.
Таже диакон: Па́ки и па́ки, ми́ром Го́споду помо́лимся.
Лик: Го́споди, поми́луй.
Заступи́, спаси́, поми́луй и сохрани́ нас, Бо́же, Твое́ю благода́тию.
Лик: Го́споди, поми́луй.
Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Лик: Тебе́, Го́споди.
Молитва третияго антифона.
Иерей: И́же о́бщия сия́ и согла́сныя дарова́вый нам моли́твы, и́же и двема́ или́ трем согласу́ющимся о и́мени Твое́м проше́ния пода́ти обеща́вый, Сам и ны́не раб Твои́х проше́ния к поле́зному испо́лни, подая́ нам и в настоя́щем ве́це позна́ние Твоея́ и́стины, и в бу́дущем живо́т ве́чный да́руя.
Возглашение: Я́ко благ и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
Зде отверзаются двери на малый вход.
Третий антифон. Блаженны.
1. Во Ца́рствии Твое́м помяни́ нас, Го́споди, / егда́ прии́деши, во Ца́рствии Твое́м.
на 12:
1. Блаже́ни ни́щии ду́хом, / я́ко тех есть Ца́рство Небе́сное.
2. Блаже́ни пла́чущии, / я́ко ти́и уте́шатся.
на 10:
1. Блаже́ни кро́тции, / я́ко ти́и насле́дят зе́млю.
2. Блаже́ни а́лчущии и жа́ждущии пра́вды, / я́ко ти́и насы́тятся.
на 8:
1. Блаже́ни ми́лостивии, / я́ко ти́и поми́ловани бу́дут.
2. Блаже́ни чи́стии се́рдцем, / я́ко ти́и Бо́га у́зрят.
на 6:
1. Блаже́ни миротво́рцы, / я́ко ти́и сы́нове Бо́жии нареку́тся.
2. Блаже́ни изгна́ни пра́вды ра́ди, / я́ко тех есть Ца́рство Небе́сное.
на 4:
́. Блаже́ни есте́, егда́ поно́сят вам, / и изжену́т, и реку́т всяк зол глаго́л на вы, лжу́ще Мене́ ра́ди.
2. Ра́дуйтеся и весели́теся, / я́ко мзда ва́ша мно́га на Небесе́х.
́. Сла́ва Отцу́ и Сы́ну и Свято́му Ду́ху.
2. И ны́не и при́сно и во ве́ки веко́в. Ами́нь.
Малый вход с Евангелием.
Певаему же третиему антифону от певцев, или Блаженнам, аще есть неделя, егда приидут на Славу, священник и диакон, ставше пред святою трапезою, творят поклоны три. Таже прием священник святое Евангелие, дает диакону, и тако изшедше северною страною, предыдущим им лампадам, творят малый вход, и ставше на обычном месте, приклоняют оба главы.
Диакон: Го́споду помо́лимся.
Лик: Го́споди, поми́луй.
Молитва входа.
Иерей: Влады́ко Го́споди Бо́же наш, уста́вивый на небесе́х чи́ны и во́инства А́нгел и Арха́нгел в служе́ние Твоея́ сла́вы, сотвори́ со вхо́дом нашим вхо́ду святы́х А́нгелов бы́ти, сослужа́щих нам, и сославосло́вящих Твою́ бла́гость. Я́ко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Аминь.
Диакон: Благослови́, влады́ко, святы́й вход.
Священник благословляя, глаголет: Благослове́н вход святы́х Твои́х, всегда́, ны́не и при́сно, и во ве́ки веко́в.
Посем диакон подает Евангелие священнику, и целует священник Евангелие. Исполньшуся же конечному тропарю, входит диакон посреде, и став пред иереем, возвышает мало руце и показуя святое Евангелие, глаголет велегласно:
Прему́дрость, про́сти.
Таже сотворив поклонение, входит во святый олтарь диакон и созади его священник. И диакон убо полагает святое Евангелие на святей трапезе.
Входное.
Аще же неделя, певцы поют: Прииди́те, поклони́мся и припаде́м ко Христу́. / Спаси́ ны, Сы́не Бо́жий, / Воскресы́й из ме́ртвых, пою́щия Ти, / аллилу́иа. Единожды.
Аще убо несть неделя:
Во святы́х ди́вен сый, пою́щия Ти, / аллилу́иа. Единожды.
Таже обычныя тропари. Священник же глаголет молитву сию:
Молитва Трисвятаго пения.
Иерей: Бо́же Святы́й, и́же во святы́х почива́яй, и́же трисвяты́м гла́сом от Серафи́мов воспева́емый и от Херуви́мов славосло́вимый, и от вся́кия Небе́сныя Си́лы покланя́емый, и́же от небытия́ во е́же бы́ти приведы́й вся́ческая, созда́вый челове́ка по о́бразу Твоему́ и по подо́бию, и вся́ким Твои́м дарова́нием украси́вый, дая́й прося́щему прему́дрость и ра́зум, и не презира́яй согреша́ющаго, но полага́яй на спасе́ние покая́ние, сподо́бивый нас, смире́нных и недосто́йных раб Твои́х, и в час сей ста́ти пред сла́вою свята́го Твоего́ же́ртвенника, и до́лжное Тебе́ поклоне́ние и славосло́вие приноси́ти. Сам, Влады́ко, приими́ и от уст нас, гре́шных, Трисвяту́ю песнь, и посети́ ны бла́гостию Твое́ю, прости́ нам вся́кое согреше́ние во́льное же и нево́льное, освяти́ на́ша ду́ши и телеса́, и даждь нам в преподо́бии служи́ти Тебе́ вся дни живота́ на́шего, моли́твами святы́я Богоро́дицы, и всех святы́х, от ве́ка Тебе́ благоугоди́вших.
Егда же певцы приидут в последний тропарь, глаголет диакон ко иерею, приклонь вкупе главу и орарь в руце держа треми персты:
Благослови́, влады́ко, вре́мя Трисвята́го.
Иерей же, зна́менуя его, глаголет:
Я́ко свят еси́, Бо́же наш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно.
Скончавшуся же тропарю, приходит диакон близ святых дверей, и наводя орарем, первее убо ко иконе Христове глаголет: Го́споди, спаси́ благочести́выя.
Лик: Го́споди, спаси́ благочести́выя.
Диакон: И услы́ши ны.
Лик: И услы́ши ны.
Таже наводит, глаголя ко вне стоящим велегласно: И во ве́ки веко́в.
Лик: Ами́нь.
Трисвятое.
Лик: Святы́й Бо́же, / Святы́й Кре́пкий, / Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Святы́й Безсме́ртный, поми́луй нас.
Святы́й Бо́же, / Святы́й Кре́пкий, / Святы́й Безсме́ртный, поми́луй нас.
Певаему же Трисвятому, глаголют и сами, иерей же и диакон, Трисвятое, творяще вкупе и поклоны три пред святою трапезою.
Таже глаголет диакон ко иерею: Повели́, влады́ко.
Священник: Благослове́н гряды́й во и́мя Госпо́дне.
Диакон: Благослови́, влады́ко, Го́рний престо́л.
Иерей же: Благослове́н еси́ на престо́ле сла́вы Ца́рствия Твоего́, Седя́й на Херуви́мех, всегда́, ны́не и при́сно, и во ве́ки веко́в.
По исполнении Трисвятаго, пришед пред святыя двери, диакон глаголет: Во́нмем.
Иере́й же возглашает: Мир всем.
И чтец глаголет: И ду́хови твоему́.
И паки диакон: Прему́дрость.
И чтец: прокимен, псалом Давидов.
Прокимны и аллилуиарии воскресны.
Глас ́:
Прокимен: Бу́ди, Го́споди, ми́лость Твоя́ на нас, / я́коже упова́хом на Тя. Стих: Ра́дуйтеся, пра́веднии, о Го́споде, пра́вым подоба́ет похвала́.
Аллилуиа: Бог дая́й отмще́ние мне, и покори́вый лю́ди под мя. Стих: Велича́яй спасе́ния Царе́ва, и творя́й ми́лость Христу́ своему́ Дави́ду, и се́мени Его́ до ве́ка.
Глас 2:
Прокимен: Кре́пость моя́ и пе́ние мое́ Госпо́дь, / и бысть мне во спасе́ние. Стих: Наказу́я наказа́ мя Госпо́дь, сме́рти же не предаде́ мя.
Аллилуиа: Услы́шит тя Госпо́дь в день печа́ли, защи́тит тя И́мя Бо́га Иа́ковля. Стих: Го́споди, спаси́ царя́, и услы́ши ны, во́ньже а́ще день призове́м Тя.
Глас 3:
Прокимен: По́йте Бо́гу на́шему, по́йте, / по́йте Царе́ви на́шему, по́йте. Стих: Вси язы́цы восплещи́те рука́ми, воскли́кните Бо́гу гла́сом ра́дования.
Аллилуиа: На Тя, Го́споди, упова́х, да не постыжу́ся во век. Стих: Бу́ди ми в Бо́га Защи́тителя, и в дом прибе́жища, е́же спасти́ мя.
Глас 4:
Прокимен: Я́ко возвели́чишася дела́ Твоя́, Го́споди, / вся прему́дростию сотвори́л еси́. Стих: Благослови́ душе́ моя́, Го́спода, Го́споди Бо́же мой, возвели́чился еси́ зело́.
Аллилуиа: Наляцы́, и успева́й, и ца́рствуй и́стины ра́ди, и кро́тости, и пра́вды. Стих: Возлюби́л еси́ пра́вду, и возненави́дел еси́ беззако́ние.
Глас 5:
Прокимен: Ты, Го́споди, сохрани́ши ны, и соблюде́ши ны / от ро́да сего́ и во век. Стих: Спаси́ мя, Го́споди, я́ко оскуде́ преподо́бный.
Аллилуиа: Ми́лости Твоя́, Го́споди, во век воспою́, в род и род возвещу́ и́стину Твою́ усты́ мои́ми. Стих: Зане́ рекл еси́: в век ми́лость сози́ждется, на небесе́х угото́вится и́стина Твоя́.
Глас 6:
Прокимен: Спаси́, Го́споди, лю́ди Твоя́, / и благослови́ достоя́ние Твое́. Стих: К Тебе́, Го́споди, воззову́, Бо́же мой, да не премолчи́ши от мене́.
Аллилуиа: Живы́й в по́мощи Вы́шняго, в кро́ве Бо́га Небе́снаго водвори́тся. Стих: Рече́т Го́сподеви: засту́пник мой еси́, и прибе́жище мое́, Бог мой, и упова́ю на Него́.
Глас 7:
Прокимен: Госпо́дь кре́пость лю́дем Свои́м даст, / Госпо́дь благослови́т лю́ди Своя́ ми́ром. Стих: Принеси́те Го́сподеви, сы́нове Бо́жии, принеси́те Го́сподеви сы́ны о́вни.
Аллилуиа: Бла́го есть испове́датися Го́сподеви, и пе́ти и́мени Твоему́ Вы́шний. Стих: Возвеща́ти зау́тра ми́лость Твою́, и и́стину Твою́ на вся́ку нощь.
Глас 8:
Прокимен: Помоли́теся и воздади́те / Го́сподеви Бо́гу на́шему. Стих: Ве́дом во Иуде́и Бог, во Изра́или ве́лие И́мя Его́.
Аллилуиа: Прииди́те, возра́дуемся Го́сподеви, воскли́кнем Бо́гу Спаси́телю на́шему. Стих: Предвари́м лице́ Его́ во испове́дании, и во псалме́х воскли́кнем Ему́.
Прокимны и аллилуиарии дневные.
В понедельник:
Прокимен, глас 4: Творя́й А́нгелы Своя́ ду́хи / и слуги́ Своя́ пла́мень о́гненный. Стих: Благослови́, душе́ моя́, Го́спода, Го́споди Бо́же мой, возвели́чился еси́ зело́.
Аллилуиа, глас 5: Хвали́те Го́спода, вси А́нгели Его́, хвали́те Его́, вся си́лы Его́. Стих: Я́ко Той рече́, и бы́ша; Той повеле́, и созда́шася.
Во вторник:
Прокимен, глас 7: Возвесели́тся пра́ведник о Го́споде, / и упова́ет на Него́. Стих: Услы́ши Бо́же глас мой, внегда́ моли́ти ми ся к Тебе́.
Аллилуиа, глас 4: Пра́ведник я́ко фи́никс процвете́т, я́ко кедр, и́же в Лива́не, умно́жится. Стих: Насажде́ни в дому́ Госпо́дни, во дво́рех Бо́га на́шего процвету́т.
В среду:
Прокимен, песнь Богородицы, глас 3: Вели́чит душа́ Моя́ Го́спода, / и возра́довася дух Мой о Бо́зе Спа́се Мое́м. Стих: Я́ко призре́ на смире́ние Рабы́ Своея́, се бо, отны́не ублажа́т Мя вси ро́ди.
Аллилуиа, глас 8: Слы́ши, Дщи, и виждь, и приклони́ у́хо Твое́. Стих: Лицу́ Твоему́ помо́лятся бога́тии лю́дстии.
В четверг:
Прокимен, глас 8: Во всю зе́млю изы́де веща́ние их / и в концы́ вселе́нныя глаго́лы их. Стих: Небеса́ пове́дают сла́ву Бо́жию, / творе́ние же руку́ Его́ возвеща́ет твердь.
Аллилуиа, глас 1: Испове́дят небеса́ чудеса́ Твоя́, Го́споди, и́бо и́стину Твою́ в Це́ркви святы́х. Стих: Бог прославля́ем в сове́те святы́х.
В пятницу:
Прокимен, глас 7: Возноси́те Го́спода Бо́га на́шего / и поклоня́йтеся подно́жию но́гу Его́, я́ко свя́то есть. Стих: Госпо́дь воцари́ся, да гне́ваются лю́дие.
Аллилуиа, глас 1: Помяни́ сонм Твой, его́же стяжа́л еси́ испе́рва. Стих: Бог же Царь наш пре́жде ве́ка, соде́ла спасе́ние посреде́ земли́.
В субботу:
Прокимен, глас 8: Весели́теся о Го́споде, / и ра́дуйтеся пра́веднии. Стих: Блаже́ни, и́хже оста́вишася беззако́ния и и́хже прикры́шася греси́.
Аллилуиа, глас 4: Воззва́ша пра́веднии, и Госпо́дь услы́ша их, и от всех скорбе́й их изба́ви их. Стих: Мно́ги ско́рби пра́ведным, и от всех их изба́вит я́ Госпо́дь.
И умершим:
Прокимен, глас 6: Ду́ши их / во благи́х водворя́тся.
Аллилуиа, глас 4: Блаже́ни, я́же избра́л и прия́л еси́, Го́споди. Стих: И па́мять их в род и род.
Посем диакон: Прему́дрость.
И чтец надписание Апостола: Дея́ний святы́х Апо́стол чте́ние. Или: Собо́рнаго посла́ния Иа́ковля, или Петро́ва чте́ние. Или: К Ри́мляном, или к Кори́нфяном, или к Гала́том посла́ния свята́го Апо́стола Па́вла чте́ние.
И паки диакон: Во́нмем.
Апостолу же чтому, диакон, прием кадильницу и фимиам, приходит ко священнику, и прием благословение от него, кадит святую трапезу окрест, и олтарь весь, и священника.
Апостолу же исполньшуся, глаголет священник: Мир ти.
И чтец: И ду́хови твоему́.
Диакон: Прему́дрость.
И чтец: Аллилу́иа.
Молитва прежде Евангелия:
Священник: Возсия́й в сердца́х на́ших, человеколю́бче Влады́ко, Твоего́ Богоразу́мия нетле́нный свет, и мы́сленныя на́ши отве́рзи о́чи, во Ева́нгельских Твои́х пропове́даний разуме́ние. Вложи́ в нас и страх блаже́нных Твои́х за́поведей, да плотски́я по́хоти вся попра́вше, духо́вное жи́тельство про́йдем, вся, я́же ко благоугожде́нию Твоему́, и му́дрствующе и де́юще. Ты бо еси́ просвеще́ние душ и теле́с на́ших, Христе́ Бо́же, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в. Ами́нь.
Диакон: Благослови́, влады́ко, благовести́теля свята́го Апо́стола и Евангели́ста, имярек.
Священник, знаменуя его, глаголет: Бог, моли́твами свята́го, сла́внаго, всехва́льнаго Апо́стола и Евангели́ста, имярек, да да́ст тебе́ глаго́л благовеству́ющему си́лою мно́гою, во исполне́ние Ева́нгелия возлю́бленнаго Сы́на Своего́, Го́спода на́шего Иису́са Христа́.
И подает ему святое Евангелие.
Диакон же рек: Ами́нь.
Иерей: Прему́дрость, про́сти, услы́шим свята́го Ева́нгелия.
Таже: Мир всем.
Людие: И ду́хови твоему́.
Диакон: От имярек свята́го Ева́нгелия чте́ние.
Лик: Сла́ва Тебе́, Го́споди, сла́ва Тебе́.
Священник: Во́нмем.
Чтение Евангелия.
Священник: Мир ти́, благовеству́ющему.
Лик: Сла́ва Тебе́, Го́споди, сла́ва Тебе́.
Ектения сугубая.
Диакон: Рцем вси́ от всея́ души́, и от всего́ помышле́ния на́шего рцем.
Лик: Го́споди, поми́луй.
Го́споди Вседержи́телю, Бо́же оте́ц на́ших, мо́лим Ти ся, услы́ши и поми́луй.
Лик: Го́споди, поми́луй.
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Лик: Го́споди, поми́луй, трижды.
Еще́ мо́лимся о Вели́ком Господи́не и отце́ на́шем, Святе́йшем Патриа́рхе (имярек), и о господи́не на́шем преосвяще́ннейшем митрополи́те (или архиепи́скопе, или епи́скопе) (имя рек), и о всей во Христе́ бра́тии на́шей.
Лик: Го́споди, поми́луй, трижды.
Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Лик: Го́споди, поми́луй, трижды.
Еще́ мо́лимся о бра́тиях на́ших, свяще́нницех, священномона́сех, и всем во Христе́ бра́тстве на́шем.
Лик: Го́споди, поми́луй, трижды.
Еще́ мо́лимся о блаже́нных и приснопа́мятных святе́йших патриа́рсех правосла́вных и созда́телех свята́го хра́ма сего́ (аще во обители: святы́я оби́тели сея́), и о всех пре́жде почи́вших отце́х и бра́тиях, зде лежа́щих и повсю́ду, правосла́вных.
Лик: Го́споди, поми́луй, трижды.
Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих, бра́тии свята́го хра́ма сего́ (аще во обители: святы́я оби́тели сея́).
Лик: Го́споди, поми́луй, трижды.
Еще́ мо́лимся о плодонося́щих и доброде́ющих во святе́м и всечестне́м хра́ме сем, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.
Лик: Го́споди, поми́луй, трижды.
Молитва прилежнаго моления:
Иерей: Го́споди Бо́же наш, приле́жное сие́ моле́ние приими́ от Твои́х раб, и поми́луй нас по мно́жеству ми́лости Твоея́, и щедро́ты Твоя́ низпосли́ на ны и на вся лю́ди Твоя́, ча́ющыя от Тебе́ бога́тыя ми́лости.
Возглашение: Я́ко ми́лостив и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
Аще же будет о усопших приношение, диакон или священник глаголет ектению сию:
Ектения о усопших:
Диакон: Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Лик: Го́споди, поми́луй, трижды.
Еще́ мо́лимся о упокое́нии душ усо́пших рабо́в Бо́жиих имярек, и о е́же прости́тися им вся́кому прегреше́нию, во́льному же и нево́льному.
Лик: Го́споди, поми́луй, трижды.
Я́ко да Госпо́дь Бог учини́т ду́ши их, иде́же пра́веднии упокоя́ются.
Лик: Го́споди, поми́луй, трижды.
Ми́лости Бо́жия, Ца́рства Небе́снаго, и оставле́ния грехо́в их, у Христа́ безсме́ртнаго Царя́ и Бо́га на́шего про́сим.
Лик: Пода́й, Го́споди.
Диакон: Го́споду помо́лимся.
Лик: Го́споди, поми́луй.
Молитва о усопших:
Иерей: Бо́же духо́в, и вся́кия пло́ти, сме́рть попра́вый и диа́вола упраздни́вый, и живо́т мiру Твоему́ дарова́вый: Сам, Го́споди, поко́й ду́ши усо́пших раб Твои́х, имярек, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние, соде́янное и́ми сло́вом, или́ де́лом, или́ помышле́нием, я́ко благи́й человеколю́бец Бог, прости́. Я́ко несть челове́к, и́же жив бу́дет и не согреши́т. Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.
Возглас: Я́ко Ты еси́ воскресе́ние и живо́т и поко́й усо́пших раб Твои́х, имярек, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.
Лик: Ами́нь.
Ектения о оглашенных:
Таже диакон: Помоли́теся, оглаше́ннии, Го́сподеви.
Лик: Го́споди, поми́луй.
Ве́рнии, о оглаше́нных помо́лимся, да Госпо́дь поми́лует их.
Лик: Го́споди, поми́луй.
Огласи́т их сло́вом и́стины.
Лик: Го́споди, поми́луй.
Откры́ет им Ева́нгелие пра́вды.
Лик: Го́споди, поми́луй.
Соедини́т их святе́й Свое́й собо́рней и апо́стольстей Це́ркви.
Лик: Го́споди, поми́луй.
Спаси́, поми́луй, заступи́ и сохрани́ их, Бо́же, Твое́ю благода́тию.
Лик: Го́споди, поми́луй.
Оглаше́ннии, главы ва́ша Го́сподеви приклони́те.
Лик: Тебе́, Го́споди.
Молитва о оглашенных:
Иерей: Го́споди Бо́же наш, и́же на высо́ких живы́й и на смире́нныя призира́яй, и́же спасе́ние ро́ду челове́ческому низпосла́вый, Единоро́днаго Сы́на Твоего́ и Бо́га, Го́спода на́шего Иису́са Христа́, при́зри на рабы Твоя́ оглаше́нныя, подкло́ньшия Тебе́ Своя́ выя, и сподо́би я́ во вре́мя благополу́чное ба́ни пакибытия́, оставле́ния грехо́в и оде́жди нетле́ния, соедини́ их святе́й Твое́й собо́рней и апо́стольстей Це́ркви, и сопричти́ их избра́нному Твоему́ ста́ду.
Возглашение: Да и ти́и с на́ми сла́вят пречестно́е и великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Лик: Ами́нь.
И простирает антиминс священник.
литургия верных.
Диакон: Ели́цы оглаше́ннии, изыди́те, оглаше́ннии изыди́те, ели́цы оглаше́ннии изыди́те. Да никто от оглаше́нных, ели́цы ве́рнии, па́ки и па́ки ми́ром Го́споду помо́лимся.
Лик: Го́споди, поми́луй.
Заступи́, спаси́, поми́луй и сохрани́ нас, Бо́же, Твое́ю благода́тию.
Лик: Го́споди, поми́луй.
Диакон: Прему́дрость.
Молитва верных первая:
Иерей: Благодари́м Тя, Го́споди Бо́же Сил, сподо́бившаго нас предста́ти и ны́не свято́му Твоему́ же́ртвеннику, и припа́сти ко щедро́там Твои́м о на́ших гресе́х и о людски́х неве́дениих. Приими́, Бо́же, моле́ние на́ше, сотвори́ ны досто́йны бы́ти, е́же приноси́ти Тебе́ моле́ния и мольбы́, и же́ртвы безкро́вныя о всех лю́дех Твои́х. И удовли́ нас, и́хже положи́л еси́ в слу́жбу Твою́ сию́, си́лою Ду́ха Твоего́ Свята́го, неосужде́нно и непреткнове́нно в чи́стем свиде́тельстве со́вести на́шея, призыва́ти Тя на вся́кое вре́мя и ме́сто. Да послу́шая нас, ми́лостив нам бу́деши, во мно́жестве Твоея́ бла́гости.
Возглашение: Я́ко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
Диакон: Па́ки и па́ки, ми́ром Го́споду помо́лимся.
Лик: Го́споди, поми́луй.
[Егда священник един служит, сия не глаголет:
О свы́шнем ми́ре и спасе́нии душ на́ших, Го́споду помо́лимся.
О ми́ре всего́ мiра, благостоя́нии святы́х Бо́жиих церкве́й и соедине́нии всех, Го́споду помо́лимся.
О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.
О изба́витися нам от вся́кия ско́рби, гне́ва и ну́жды, Го́споду помо́лимся.]
Заступи́, спаси́, поми́луй и сохрани́ нас, Бо́же, Твое́ю благода́тию.
Лик: Го́споди, поми́луй.
Диакон: Прему́дрость.
Входит диакон в олтарь северными дверьми.
Молитва верных вторая:
Иерей: Па́ки и мно́гажды Тебе́ припа́даем, Тебе́ мо́лимся, Благи́й и Человеколю́бче, я́ко да призре́в на моле́ние на́ше, очи́стиши на́ша ду́ши и телеса́ от вся́кия скве́рны пло́ти и ду́ха, и да́си нам непови́нное и неосужде́нное предстоя́ние свята́го Твоего́ же́ртвенника. Да́руй же Бо́же, и моля́щимся с на́ми преспе́яние жития́ и ве́ры и ра́зума духо́внаго. Да́ждь им всегда́ со стра́хом и любо́вию служа́щим Тебе́, непови́нно и неосужде́нно причасти́тися святы́х Твои́х Та́ин и Небе́снаго Твоего́ Ца́рствия сподо́битися.
Возглашение: Я́ко да под держа́вою Твое́ю всегда́ храни́ми, Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при1сно, и во ве1ки веко1в.
Лик: Ами1нь.
И отверзаются святыя двери.
Херувимская песнь.
Лик: И́же Херуви́мы та́йно образу́юще и животворя́щей Тро́ице Трисвяту́ю песнь припева́юще, вся́кое ны́не жите́йское отложи́м попече́ние.
Таже, Херувимстей песни певаемей, диакон, прием кадильницу и фимиам вложив, приходит ко священнику, и прием благословение от него, кадит святую трапезу окрест, и олтарь весь, и иконостас, таже священника, лики и люди, глаголет же и 50–й псалом, и тропари умилительныя, елико изволит.
Священник же глаголет тайно молитву сию:
Иерей: Никто́же досто́ин от связа́вшихся плотски́ми похотьми́ и сластьми́ приходи́ти, или́ прибли́житися, или́ служи́ти Тебе́, Царю́ Сла́вы: е́же бо служи́ти Тебе́, вели́ко и стра́шно и саме́м Небе́сным Си́лам. Но оба́че неизрече́ннаго ра́ди и безме́рнаго Твоего́ человеколю́бия, непрело́жно и неизме́нно был еси́ Челове́к, и Архиере́й нам был еси́: и служе́бныя сея́ и безкро́вныя же́ртвы священноде́йствие пре́дал еси́ нам, я́ко Влады́ка всех. Ты бо еди́н, Го́споди Бо́же наш, влады́чествуеши небе́сными и земны́ми, и́же на престо́ле Херуви́мсте носи́мый, и́же Серафи́мов Госпо́дь, и Ца́рь Изра́илев, и́же Еди́н свят, и во святы́х почива́яй. Тя у́бо молю́, Еди́наго блага́го и благопослушли́ваго: при́зри на мя, гре́шнаго и непотре́бнаго раба́ Твоего́, и очи́сти мою́ ду́шу и се́рдце от со́вести лука́выя, и удовли́ мя, си́лою свята́го Твоего́ Ду́ха, облече́на благода́тию свяще́нства, предста́ти святе́й Твое́й сей трапе́зе, и священноде́йствовати Свято́е и Пречи́стое Твое́ Те́ло и Честну́ю Кровь. К Тебе́ бо прихожду́ прикло́нь мою́ вы́ю, и молю́ Ти ся, да не отврати́ши лица́ Твоего́ от мене́, ниже́ отри́неши мене́ от о́трок Твои́х, но сподо́би принесе́нным Тебе́ бы́ти, мно́ю гре́шным и недосто́йным рабо́м Твои́м, даро́м сим. Ты бо еси́ принося́й и приноси́мый, и прие́мляй и раздава́емый, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в. Ами́нь.
Исполньшимся же молитве и каждению, священник и диакон, ставше пред святою трапезою, глаголют Херувимскую песнь трижды, по коемждо же скончании, покланяются по единощи.
Таже отходят в предложение, предходящу диакону, и кадит святая.
Диакон глаголет ко священнику: Возми́, влады́ко.
И священник, взем возду́х, возлагает на левое рамо его, глаголя:
Возми́те ру́ки ва́ша во свя́тая и благослови́те Го́спода.
Таже святый дискос прием, поставляет на главу диакона. Сам же святый потир в руце приемлет, и исходят оба северною страною молящеся, предходящим им лампадам.
Великий вход.
Диакон глаголет: Вели́каго господи́на и отца́ на́шего имярек, Святе́йшаго Патриа́рха Моско́вскаго и всея́ Ру́си, и господи́на на́шего преосвяще́ннейшаго имярек, митрополи́та (или архиепи́скопа, или епи́скопа егоже есть область), да помяне́т Госпо́дь Бог во Ца́рствии Свое́м всегда́, ны́не и при́сно, и во ве́ки веко́в.
Таже священник: Преосвяще́нныя митрополи́ты, архиепи́скопы и епи́скопы, и весь свяще́ннический и мона́шеский чин, при́чет свята́го хра́ма сего́, и всех вас правосла́вных христиа́н, да помяне́т Госпо́дь Бог во Ца́рствии Свое́м, всегда́, ны́не и при́сно, и во ве́ки веко́в.
Лик: Аминь.
И конец Херувимския песни: Я́ко да Царя́ всех поды́мем, а́нгельскими неви́димо дориноси́ма чи́нми. Аллилу́иа, аллилу́иа, аллилу́иа.
Вшед же диакон внутрь святых дверий, стоит одесную, и хотящу священнику внити, глаголет к нему диакон: Да помяне́т Госпо́дь Бог свяще́нство твое́ во Ца́рствии Свое́м, всегда́, ны́не и при́сно, и во ве́ки веко́в.
И священник к нему: Да помяне́т Госпо́дь Бог священнодиа́конство твое́ во Ца́рствии Свое́м, всегда́, ны́не и при́сно, и во ве́ки веко́в.
И священник убо поставляет святый потир на святую трапезу, глаголя:
Благообра́зный Ио́сиф, с дре́ва снем Пречи́стое Те́ло Твое́, плащани́цею чи́стою обви́в, и благоуха́ньми во гро́бе но́ве покры́в, положи́.
Во гро́бе пло́тски, во а́де же с душе́ю я́ко Бог, в раи́ же с разбо́йником, и на престо́ле был еси́, Христе́, со Отце́м и Ду́хом, вся исполня́яй неопи́санный.
Я́ко живоно́сец, я́ко рая́ красне́йший, вои́стинну и черто́га вся́каго ца́рскаго показа́ся светле́йший, Христе́, гроб Твой, исто́чник на́шего воскресе́ния.
Таже возду́х от диаконя рама взем, и покадив покрывает им святая, глаголя: Благообра́зный Ио́сиф:
И кадит святая трижды, глаголя: Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая, тогда́ возложа́т на олта́рь Твой тельцы́.
И отдав кадильницу, глаголет диакону: Помяни́ мя, бра́те и сослужи́телю.
И диакон к нему: Да помяне́т Госпо́дь Бог свяще́нство твое́ во Ца́рствии Свое́м. Помоли́ся о мне́, влады́ко святы́й.
И священник: Дух Святы́й на́йдет на тя, и Си́ла Вы́шняго осени́т тя.
И диакон: То́йже Дух соде́йствует нам вся дни живота́ на́шего.
И паки тойжде: Помяни́ мя, влады́ко святы́й.
И священник: Да помяне́т тя Госпо́дь Бог во Ца́рствии Свое́м, всегда́, ны́не и при́сно, и во ве́ки веко́в.
Диакон же, рек: Ами́нь.
И затворяет царская врата.
Ектения просительная.
Диакон: Испо́лним моли́тву на́шу Го́сподеви.
Лик: Го́споди, поми́луй.
О предложе́нных Честны́х Даре́х, Го́споду помо́лимся.
Лик: Го́споди, поми́луй.
О святе́м хра́ме сем, и с ве́рою, благогове́нием и стра́хом Бо́жиим входя́щих в онь, Го́споду помо́лимся.
Лик: Го́споди, поми́луй.
О изба́витися нам от вся́кия ско́рби, гне́ва и ну́жды, Го́споду помо́лимся.
Лик: Го́споди, поми́луй.
Заступи́, спаси́, поми́луй и сохрани́ нас, Бо́же, Твое́ю благода́тию.
Лик: Го́споди, поми́луй.
Дне всего́ соверше́нна, свя́та, ми́рна и безгре́шна, у Го́спода про́сим.
Лик: Пода́й, Го́споди.
А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.
Лик: Пода́й, Го́споди.
Проще́ния и оставле́ния грехо́в и прегреше́ний на́ших, у Го́спода про́сим.
Лик: Пода́й, Го́споди.
До́брых и поле́зных душа́м нашим, и ми́ра мiрови, у Го́спода про́сим.
Лик: Пода́й, Го́споди.
Про́чее вре́мя живота́ на́шего в ми́ре и покая́нии сконча́ти, у Го́спода про́сим.
Лик: Пода́й, Го́споди.
Христиа́нския кончи́ны живота́ на́шего, безболе́зненны, непосты́дны, ми́рны и до́браго отве́та на стра́шнем суди́щи Христо́ве про́сим.
Лик: Пода́й, Го́споди.
Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Лик: Тебе́, Го́споди.
Молитва приношения,
по поставлении Божественных даров на святей трапезе:
Иерей: Го́споди Бо́же Вседержи́телю, Еди́не свя́те, прие́мляй же́ртву хвале́ния от призыва́ющих Тя всем се́рдцем. Приими́ и нас, гре́шных, моле́ния и принеси́ ко свято́му Твоему́ же́ртвеннику, и удовли́ нас приноси́ти Тебе́ да́ры же и же́ртвы духо́вныя о на́ших гресе́х и о людски́х неве́дениих, и сподо́би нас обрести́ благода́ть пред Тобо́ю, е́же бы́ти Тебе́ благоприя́тней же́ртве на́шей, и всели́тися Ду́ху благода́ти Твоея́ благо́му в нас, и на предлежа́щих Даре́х сих, и на всех лю́дех Твои́х.
Возглашение: Щедро́тами Единоро́днаго Сы́на Твоего́, с Ни́мже благослове́н еси́, со Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в.
Лик: Ами́нь.
Иерей: Мир всем.
Лик: И ду́хови твоему́.
Диакон: Возлю́бим друг дру́га, да единомы́слием испове́мы.
Лик: Отца́, и Сы́на, и Свята́го Ду́ха, / Тро́ицу единосу́щную / и неразде́льную.
И священник покланяется трижды, глаголя тайно: Возлюблю́ Тя, Го́споди, кре́посте моя́, Госпо́дь утвержде́ние мое́ и прибе́жище мое́. Трижды.
И глаголет: Христо́с посреде́ нас.
И отвещает целовавый: И есть, и бу́дет.
Диакон: Две́ри, две́ри, прему́дростию во́нмем.
Священник же отверзает завесу царских врат и воздвизает возду́х и держит над Святыми Дарми, потрясающе, и глаголюще к себе, якоже и людие:
Исповедание веры:
Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же всем и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век. Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша. Нас ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася. Распя́таго же за ны при Понти́йстем Пила́те, и страда́вша, и погребе́нна. И воскре́сшаго в тре́тий день по Писа́нием. И возше́дшаго на небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но креще́ние во оставле́ние грехо́в. Ча́ю воскресе́ния ме́ртвых, и жи́зни бу́дущаго ве́ка. Ами́нь.
Святое Возношение:
Диакон: Ста́нем до́бре, ста́нем со стра́хом, во́нмем, свято́е возноше́ние в ми́ре приноси́ти.
Лик: Ми́лость ми́ра, / же́ртву хвале́ния.
И священник возглашение: Благода́ть Го́спода на́шего Иису́са Христа́, и любы́ Бо́га и Отца́, и прича́стие Свята́го Ду́ха, бу́ди со все́ми ва́ми.
Лик: И со ду́хом твои́м.
Священник: Горе́ име́им сердца́.
Лик: И́мамы ко Го́споду.
Священник: Благодари́м Го́спода.
Лик: Досто́йно и пра́ведно есть / покланя́тися Отцу́ и Сы́ну, и Свято́му Ду́ху, / Тро́ице единосу́щней и неразде́льней.
Священник же молится: Досто́йно и пра́ведно Тя пе́ти, Тя благослови́ти, Тя хвали́ти, Тя благодари́ти, Тебе́ покланя́тися на вся́ком ме́сте влады́чествия Твоего́. Ты бо еси́ Бог неизрече́нен, недове́домь, неви́димь, непостижи́мь, при́сно сый, та́кожде сый, Ты и Единоро́дный Твой Сын, и Дух Твой Святы́й. Ты от небытия́ в бытие́ нас приве́л еси́, и отпа́дшия возста́вил еси́ па́ки, и не отступи́л еси́ вся творя́, до́ндеже нас на не́бо возве́л еси́, и Ца́рство Твое́ дарова́л еси́ бу́дущее. О сих всех благодари́м Тя и Единоро́днаго Твоего́ Сы́на, и Ду́ха Твоего́ Свята́го, о всех, и́хже ве́мы, и и́хже не ве́мы, явле́нных и нея́вленных благодея́ниих бы́вших на нас. Благодари́м Тя и о слу́жбе сей, ю́же от рук на́ших прия́ти изво́лил еси́. А́ще и предстоя́т Тебе́ ты́сящи Арха́нгелов и тмы А́нгелов, Херуви́ми и Серафи́ми шестокрила́тии, многоочи́тии, возвыша́щиися перна́тии.
Возглашение: Побе́дную песнь пою́ще, вопию́ще, взыва́юще и глаго́люще.
Лик: Свят, свят, свят Госпо́дь Савао́ф, / испо́лнь не́бо и земля́ сла́вы Твоея́; / оса́нна в вы́шних, / благослове́н Гряды́й во и́мя Госпо́дне, / оса́нна в вы́шних.
Священник молится: С си́ми и мы блаже́нными Си́лами, Влады́ко человеколю́бче, вопие́м и глаго́лем: свят еси́ и пресвя́т, Ты и Единоро́дный Твой Сын, и Дух Твой Святы́й. Свят еси́ и пресвя́т, и великоле́пна сла́ва Твоя́, и́же мiр Твой та́ко возлюби́л еси́, я́коже Сы́на Твоего́ Единоро́днаго да́ти: да вся́к ве́руяй в Него́ не поги́бнет, но и́мать живо́т ве́чный. И́же прише́д, и все е́же о нас смотре́ние испо́лнив, в но́щь в ню́же предая́шеся, па́че же Сам Себе́ предая́ше за мiрски́й живо́т, прие́м хлеб во свя́тыя Своя́ и пречи́стыя и непорочныя ру́ки, благодари́в и благослови́в, освяти́в, преломи́в, даде́ святы́м Свои́м ученико́м и Апо́столом, рек:
Возглашение: Приими́те, яди́те, сие́ есть Те́ло Мое́, е́же за вы ломи́мое во оставле́ние грехо́в.
Лик: Ами́нь.
Священник тайно: Подо́бне и ча́шу по ве́чери, глаго́ля:
Возглашение: Пи́йте от нея́ вси, сия́ есть Кровь Моя́ Но́ваго Заве́та, я́же за вы и за мно́гия излива́емая, во оставле́ние грехо́в.
Лик: Ами́нь.
Священник молится: Помина́юще у́бо спаси́тельную сию́ за́поведь, и вся я́же о нас бы́вшая: Крест, гроб, тридне́вное воскресе́ние, на небеса́ восхожде́ние, одесну́ю седе́ние, второ́е и сла́вное па́ки прише́ствие.
Возглашение: Твоя́ от Твои́х Тебе́ принося́ще, о всех и за вся.
Лик: Тебе́ пое́м, / Тебе́ благослови́м, / Тебе́ благодари́м, Го́споди, / и мо́лим Ти ся, Бо́же наш.
Священник же молится: Еще́ прино́сим Ти слове́сную сию́ и безкро́вную слу́жбу, и про́сим, и мо́лим, и ми́ли ся де́ем, низпосли́ Ду́ха Твоего́ Свята́го на ны́, и на предлежа́щия Да́ры Сия́.
Го́споди, и́же Пресвята́го Твоего́ Ду́ха в тре́тий час Апо́столом Твои́м низпосла́вый, Того́, Благи́й, не отыми́ от нас, но обнови́ нас, моля́щих Ти ся.
Диакон стих: Се́рдце чи́сто сози́жди во мне, Бо́же, и дух прав обнови́ во утро́бе мое́й.
Паки священник: Го́споди, и́же Пресвята́го Твоего́ Ду́ха:
Диакон стих: Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́.
И паки священник: Го́споди, и́же Пресвята́го Твоего́ Ду́ха:
Таже диакон, показуя орарем святый хлеб, глаголет тихим гласом: Благослови́, влады́ко, святы́й хлеб.
Священник же восклонився, знаменует святый хлеб, глаголя: И сотвори́ у́бо хлеб сей Честно́е Те́ло Христа́ Твоего́.
Диакон: Ами́нь. Благослови́, влады́ко, святу́ю ча́шу.
И священник благословляя глаголет: А е́же в ча́ши сей, Честну́ю Кровь Христа́ Твоего́.
Диакон: Ами́нь. Благослови́, влады́ко, обоя́.
Священник же, благословляя обоя́ Святая, глаголет: Преложи́в Ду́хом Твои́м Святы́м.
Диакон: Ами́нь, ами́нь, ами́нь. Помяни́ мя, святы́й влады́ко, гре́шнаго.
Священник же глаголет: Да помяне́т Тя Госпо́дь Бог во Ца́рствии Свое́м всегда́, ны́не и при́сно, и во ве́ки веко́в.
Диакон: Ами́нь.
Священник же молится: Я́коже бы́ти причаща́ющимся во трезве́ние души́, во оставле́ние грехо́в, в приобще́ние Свята́го Твоего́ Ду́ха, во исполне́ние Ца́рствия Небе́снаго, в дерзнове́ние е́же к Тебе́, не в суд, или́ во осужде́ние.
Еще́ прино́сим Ти слове́сную сию́ слу́жбу, о и́же в ве́ре почи́вших, пра́отцех, отце́х, патриа́рсех, проро́цех, Апо́столех, пропове́дницех, евангели́стех, му́ченицех, испове́дницех, возде́ржницех, и о вся́ком ду́се пра́веднем в ве́ре сконча́вшемся.
И прием кадило, священник возглашает: Изря́дно о Пресвяте́й, Пречи́стей, Преблагослове́нней, Сла́вней Влады́чице на́шей Богоро́дице и Присноде́ве Мари́и.
И кадит пред святою трапезою трижды.
Лик поет: Досто́йно есть я́ко вои́стинну блажи́ти Тя, Богоро́дицу, / Присноблаже́нную и Пренепоро́чную и Ма́терь Бо́га на́шего. / Честне́йшую Херуви́м и сла́внейшую без сравне́ния Серафи́м, / без истле́ния Бо́га Сло́ва ро́ждшую, су́щую Богоро́дицу Тя велича́ем.
Священник же молится: О святе́м Иоа́нне Проро́це, Предте́чи и Крести́тели, о святы́х сла́вных и всехва́льных Апо́столех, о святе́м имярек, его́же и па́мять соверша́ем, и о всех святы́х Твои́х, и́хже моли́твами посети́ нас, Бо́же.
И помяни́ всех усо́пших о наде́жди воскре́сения жи́зни ве́чныя. И поминает, ихже хощет, усопших по именом. И упоко́й их, иде́же присеща́ет свет лица́ Твоего́.
Еще́ мо́лим Тя, помяни́, Го́споди, вся́кое епи́скопство правосла́вных, пра́во пра́вящих сло́во Твоея́ и́стины, вся́кое пресви́терство, во Христе́ диа́конство и вся́кий свяще́ннический чин.
Еще́ прино́сим Ти слове́сную сию́ слу́жбу о вселе́нней, о святе́й, собо́рней и апо́стольстей Це́ркви, о и́же в чистоте́ и честне́м жи́тельстве пребыва́ющих, о Богохрани́мей стране́ на́шей, власте́х и во́инстве ея́. Да́ждь им, Го́споди, ми́рное правле́ние, да и мы в тишине́ их ти́хое и безмо́лвное житие́ поживе́м, во вся́ком благоче́стии и чистоте́.
И по пении стиха, священник возглашает:
В пе́рвых помяни́, Го́споди, вели́каго господи́на и отца́ на́шего имярек, Святе́йшаго Патриа́рха Моско́вскаго и всея́ Руси́, и господи́на на́шего преосвяще́ннаго имярек, митрополи́та (или архиепи́скопа, или епи́скопа, егоже есть область), и́хже да́руй святы́м Твои́м це́рквам, в ми́ре, це́лых, честны́х, здра́вых, долгоде́нствующих, пра́во пра́вящих сло́во Твоея́ и́стины.
И певцы поют: И всех, и вся.
Священник молится: Помяни́ Го́споди град сей, в не́мже живе́м, (или весь сию́, в не́йже живе́м, или оби́тель сию́, в не́йже живе́м), и вся́кий град и страну́, и ве́рою живу́щих в них.
Помяни́, Го́споди, пла́вающих, путеше́ствующих, неду́гующих, стра́ждущих, плене́нных, и спасе́ние их.
Помяни́, Го́споди, плодонося́щих и добротворя́щих во святы́х Твои́х це́рквах, и помина́ющих убо́гия, и на вся ны ми́лости Твоя́ низпосли́.
И поминает по именам, ихже хощет, живых.
Возглашение: И даждь нам еди́неми усты́ и еди́нем се́рдцем сла́вити и воспева́ти пречестно́е и великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Лик: Ами́нь.
Священник, обращься ко дверем и благословляя, глаголет:
И да бу́дут ми́лости вели́каго Бо́га и Спа́са на́шего Иису́са Христа́ со все́ми ва́ми.
Лик: И со ду́хом твои́м.
Ектения просительная:
Диакон: Вся святы́я помяну́вше, па́ки и па́ки ми́ром Го́споду помо́лимся.
Лик: Го́споди, поми́луй.
О принесе́нных и освяще́нных Честны́х Даре́х, Го́споду помо́лимся.
Лик: Го́споди, поми́луй.
Я́ко да человеколю́бец Бог наш, прие́м я́ во святы́й и пренебе́сный и мы́сленный Свой же́ртвенник, в воню́ благоуха́ния духо́внаго, возниспо́слет нам Боже́ственную благода́ть и дар Свята́го Ду́ха, помо́лимся.
Лик: Го́споди, поми́луй.
О изба́витися нам от вся́кия ско́рби, гне́ва и ну́жды, Го́споду помо́лимся.
Лик: Го́споди, поми́луй.
Заступи́, спаси́, поми́луй и сохрани́ нас, Бо́же, Твое́ю благода́тию.
Лик: Го́споди, поми́луй.
Дне всего́ соверше́нна, свя́та, ми́рна и безгре́шна, у Го́спода про́сим.
Лик: Пода́й, Го́споди.
А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.
Лик: Пода́й, Го́споди.
Проще́ния и оставле́ния грехо́в и прегреше́ний на́ших, у Го́спода про́сим.
Лик: Пода́й, Го́споди.
До́брых и поле́зных душа́м нашим, и ми́ра мiрови, у Го́спода про́сим.
Лик: Пода́й, Го́споди.
Про́чее вре́мя живота́ на́шего в ми́ре и покая́нии сконча́ти, у Го́спода про́сим.
Лик: Пода́й, Го́споди.
Христиа́нския кончи́ны живота́ на́шего, безболе́знены, непосты́дны, ми́рны, и до́браго отве́та на стра́шнем суди́щи Христо́ве про́сим.
Лик: Пода́й, Го́споди.
Соедине́ние ве́ры и прича́стие Свята́го Ду́ха испроси́вше, са́ми себе́, и друг дру́га, и весь живо́т наш Христу́ Бо́гу предади́м.
Лик: Тебе́, Го́споди.
Священник же молится:
Тебе́ предлага́ем живо́т наш весь и наде́жду, Влады́ко человеколю́бче, и про́сим, и мо́лим, и ми́ли ся де́ем, сподо́би нас причасти́тися Небе́сных Твои́х и стра́шных Та́ин, сея́ Свяще́нныя и Духо́вныя Трапе́зы, с чи́стою со́вестию, во оставле́ние грехо́в, в проще́ние согреше́ний, во обще́ние Ду́ха Свята́го, в насле́дие Ца́рствия Небе́снаго, в дерзнове́ние е́же к Тебе́, не в суд или́ во осужде́ние.
Священник возглашает: И сподо́би нас, Влады́ко, со дерзнове́нием, неосужде́нно сме́ти призыва́ти Тебе́, Небе́снаго Бо́га Отца́, и глаго́лати.
Людие: О́тче наш, И́же еси́ на небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Священник: Я́ко Твое́ есть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Лик: Ами́нь.
Таже: Мир всем.
Лик: И ду́хови твоему́.
Диакон: Главы́ ва́ша Го́сподеви приклони́те.
Лик: Тебе́, Го́споди.
Священник молится:
Благодари́м Тя, Царю́ неви́димый, и́же неисче́тною Твое́ю си́лою вся соде́тельствовал еси́, и мно́жеством ми́лости Твоея́ от небытия́ в бытие́ вся приве́л еси́. Сам, Влады́ко, с небесе́ при́зри на подкло́ньшия Тебе́ главы́ своя́, не бо подклони́ша пло́ти и кро́ви, но Тебе́ стра́шному Бо́гу. Ты у́бо Влады́ко, предлежа́щая всем нам во благо́е изравня́й, по коего́ждо свое́й потре́бе: пла́вающим спла́вай, путеше́ствующим спутеше́ствуй, неду́гующия исцели́, Врачу́ душ и теле́с.
Возглашение: Благода́тию, и щедро́тами, и человеколю́бием Единоро́днаго Сы́на Твоего́, с Ни́мже благослове́н еси́, со Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в.
Лик: Ами́нь.
Священник же молится: Вонми́, Го́споди Иису́се Христе́ Бо́же наш, от свята́го жили́ща Твоего́, и от престо́ла сла́вы Ца́рствия Твоего́, и прииди́ во е́же освяти́ти нас, и́же горе́ со Отце́м седя́й, и зде нам неви́димо спребыва́яй. И сподо́би держа́вною Твое́ю руко́ю препода́ти нам Пречи́стое Те́ло Твое́ и Честну́ю Кровь, и на́ми всем лю́дем.
Сей молитве глаголемей, диакон, стояй пред святыми дверьми, опоясуется орарем крестовидно. Таже покланяется священник, подобне и диакон, на немже стоит месте, глаголюща тайно, трижды: Бо́же, очи́сти мя, гре́шнаго, и поми́луй мя.
Затворяются Царские врата завесою.
Диакон возглашает: Во́нмем.
Священник же, вознося Святый Хлеб, возглашает: Свята́я святы́м.
Лик: Еди́н свят, / еди́н Госпо́дь, / Иису́с Христо́с, / во сла́ву Бо́га Отца́. / Ами́нь.
И поют лицы киноник дне, или святаго.
Причастны.
Воскресный:
Хвали́те Го́спода с небе́с, хвали́те Его́ в вы́шних. Аллилу́иа, аллилу́иа, аллилу́иа.
В понедельник Бесплотным силам:
Творя́й А́нгелы Своя́ ду́хи, и слуги́ Своя́ пла́мень о́гненный. Аллилу́иа, аллилу́иа, аллилу́иа.
Во вторник Предтече:
В па́мять ве́чную бу́дет пра́ведник, от слу́ха зла не убои́тся. Аллилу́иа, аллилу́иа, аллилу́иа.
В среду Пресвятей Богородице:
Ча́шу спасе́ния прииму́ и и́мя Госпо́дне призову́. Аллилу́иа, аллилу́иа, аллилу́иа.
В четверг Апостолам:
Во всю зе́млю изы́де веща́ние их, и в концы́ вселе́нныя глаго́лы их. Аллилу́иа, аллилу́иа, аллилу́иа.
В пятницу Кресту:
Спасе́ние соде́лал еси́ посреде́ земли́, Бо́же. Аллилу́иа, аллилу́иа, аллилу́иа.
В субботу всем святым:
Ра́дуйтеся, пра́веднии, о Го́споде, пра́вым подоба́ет похвала́. Аллилу́иа, аллилу́иа, аллилу́иа.
Заупокойный:
Блаже́ни, я́же избра́л и прия́л еси́, Го́споди, и па́мять их в род и род. Аллилу́иа, аллилу́иа, аллилу́иа.
Диакон глаголет: Раздроби́, влады́ко, Святы́й Хлеб.
Священник же, раздробляя и́ на четыре части, глаголет:
Раздробля́ется и разделя́ется А́гнец Бо́жий, раздробля́емый и неразделя́емый, всегда́ ядо́мый и никогда́же иждива́емый, но причаща́ющияся освяща́яй.
Диакон глаголет: Испо́лни, влады́ко, святы́й поти́р.
Священник же: Исполне́ние Ду́ха Свята́го.
Диакон: Ами́нь.
И приемля теплоту, глаголет ко священнику: Благослови́, влады́ко, теплоту́.
Священник же благословляет, глаголя:
Благослове́нна теплота́ святы́х Твои́х всегда́, ны́не и при́сно, и во ве́ки веко́в. Ами́нь.
И диакон вливает, глаголя: Теплота́ ве́ры испо́лнь Ду́ха Свята́го. Ами́нь.
Причащение в олтаре.
Священник же глаголет: Диа́коне, приступи́.
Диакон: Се прихожду́ к безсме́ртному Царю́ и Бо́гу на́шему.
Священник же, держа Святый Хлеб, дает диакону. Диакон, приемлет Святый Хлеб, глаголя:
Препода́ждь ми, влады́ко, Честно́е и Свято́е Те́ло Го́спода и Бо́га и Спа́са на́шего Иису́са Христа́.
Священник же глаголет: Имярек, священнодиа́кону, преподае́тся честно́е и свято́е и пречи́стое Те́ло Го́спода и Бо́га и Спа́са на́шего Иису́са Христа́, во оставле́ние грехо́в его́ и в жизнь ве́чную.
И отходит, и молится, яко и священник, глаголя: Ве́рую, Го́споди, и испове́дую:
Подобне взем и священник едину частицу Святаго Хлеба, глаголет:
Се прихожду́ к безсме́ртному Царю́ и Бо́гу на́шему.
Честно́е и пресвято́е Те́ло Го́спода и Бо́га и Спа́са на́шего Иису́са Христа́ преподае́тся мне, имярек, свяще́ннику, во оставле́ние грехо́в мои́х и в жизнь ве́чную.
И приклонив главу молится, глаголя: Ве́рую, Го́споди, и испове́дую:
И тако причащаются в руках держимаго со страхом и всяцем утверждением. Таже священник глаголет: Се па́ки прихожду́ к безсме́ртному Царю́ и Бо́гу на́шему.
Таже священник восклонься приемлет обема рукама с покровцем святый потир и причащается трижды из него, глаголя: Честны́я и святы́я Кро́ве Го́спода и Бо́га и Спа́са на́шего Иису́са Христа́, причаща́юся аз, раб Бо́жий, свяще́нник имярек, во оставле́ние грехо́в мои́х и в жизнь ве́чную. Ами́нь.
И тако свои устне и край священнаго потира в руку держимым платом отер, глаголет:
Се прикосну́ся устна́м мои́м, и оти́мет беззако́ния моя́, и грехи́ моя́ очи́стит.
Таже призывает диакона, глаголя: Диа́коне, приступи́.
И диакон приходит и покланяется единою, глаголя:
Се па́ки прихожду́ к безсме́ртному Царю́ и Бо́гу на́шему. И: Препода́ждь ми, влады́ко, честну́ю и святу́ю Кровь Го́спода и Бо́га и Спа́са на́шего Иису́са Христа́.
И священник глаголет: Причаща́ется раб Бо́жий, диа́кон имярек, честны́я и святы́я Кро́ве Го́спода и Бо́га и Спа́са на́шего Иису́са Христа́, во оставле́ние грехо́в свои́х и в жизнь ве́чную.
Причастившуся же диакону, глаголет священник: Се прикосну́ся устна́м твои́м, и оти́мет беззако́ния твоя́, и грехи́ твоя́ очи́стит.
Зри. Подобает ведати, яко аще суть хотящии причащатися святых таин, раздробляет священник две части Святаго Агнца оставшия, еже НИ, и еже КА, на малыя частицы, яко быти всем причастником довольно, и тако влагает их во святую чашу.
И покрывает святый потир покровцем, подобне и на святый дискос возлагает звездицу и покровцы. Таже глаголет молитву: Благодари́м Тя, Влады́ко человеколю́бче:
Причащение в храме.
И тако отверзаются двери святаго олтаря. И диакон, поклонився единою, приемлет потир с благоговением, и приходит во двери, и вознося святый потир, показует и́ людем, глаголя: Со стра́хом Бо́жиим и ве́рою приступи́те.
Лик: Благослове́н Гряды́й во и́мя Госпо́дне, / Бог Госпо́дь и яви́ся нам.
Священник же молится: Ве́рую, Го́споди, и испове́дую, я́ко Ты еси́ вои́стинну Христо́с, Сын Бо́га жива́го, прише́дый в мир гре́шныя спасти́, от ни́хже пе́рвый есмь аз. Еще́ ве́рую, я́ко сие́ есть са́мое пречи́стое Те́ло Твое́, и сия́ есть са́мая честна́я Кровь Твоя́. Молю́ся у́бо Тебе́: поми́луй мя и прости́ ми прегреше́ния моя́, во́льная и нево́льная, я́же сло́вом, я́же де́лом, я́же ве́дением и неве́дением, и сподо́би мя неосужде́нно причастити́ся пречи́стых Твои́х Та́инств, во оставле́ние грехо́в и в жизнь ве́чную. Ами́нь.
Таже: Ве́чери Твоея́ та́йныя днесь, Сы́не Бо́жий, прича́стника мя приими́; не бо враго́м Твои́м та́йну пове́м, ни лобза́ния Ти дам, я́ко Иу́да, но я́ко разбо́йник испове́даю Тя: помяни́ мя, Го́споди, во Ца́рствии Твое́м.
Да не в суд или́ во осужде́ние бу́дет мне причаще́ние Святы́х Твои́х Та́ин, Го́споди, но во исцеле́ние души́ и те́ла.
Таже приступают хотящии причащатися. И идут един по единому, и покланяются со всяцем умилением и страхом, согбенне руце к персем имуще, таже приемлет кийждо Божественныя Тайны. Священник же, причащая его, глаголет:
Причаща́ется раб Бо́жий, имярек, честна́го и свята́го Те́ла и Кро́ве Го́спода и Бо́га и Спа́са на́шего Иису́са Христа́, во оставле́ние грехо́в свои́х и в жизнь ве́чную.
И диакон отирает ему устне платом. И целует причастивыйся святую чашу, и поклонився отходит. И тако причащаются вси.
Лик же поет по обычаю: Те́ло Христо́во приими́те, / Исто́чника безсме́ртнаго вкуси́те. Аллилу́иа. Трижды.
По причащении.
По причащении же, входит иерей во святый олтарь, и поставляет Святая на святем престоле.
Тогда прием диакон святый дискос верху святаго потира и глаголя воскресныя песни сия: Воскресе́ние Христо́во ви́девше: и Свети́ся, свети́ся, но́вый Иерусали́ме: и О Па́сха ве́лия и свяще́ннейшая:
Отирает святою гу́бою зело добре, глаголя словеса сия: Отмы́й, Го́споди, грехи́ помина́вшихся зде́ Кро́вию Твое́ю Честно́ю, моли́твами святы́х Твои́х.
Священник же благословляет люди, возглашая: Спаси́, Бо́же, лю́ди Твоя́, и благослови́ достоя́ние Твое́.
И обращается священник ко святей трапезе и кадит трижды, глаголя в себе:
Вознеси́ся на Небеса́, Бо́же, и по всей земли́ сла́ва Твоя́.
Лик же поет: Ви́дехом свет и́стинный, / прия́хом Ду́ха Небе́снаго, / обрето́хом ве́ру и́стинную, / неразде́льней Тро́ице покланя́емся, / Та бо нас спасла́ есть.
Священник же, зря на люди, глаголет тайно: Благослове́н Бог наш:
И возгласно: Всегда́, ны́не и при́сно, и во ве́ки веко́в.
И отходит ко святому предложению и поставляет тамо Святая.
Лик: Ами́нь.
Да испо́лнятся уста́ на́ша / хвале́ния Твоего́ Го́споди, / я́ко да пое́м сла́ву Твою́, / я́ко сподо́бил еси́ нас причасти́тися / Святы́м Твои́м, Боже́ственным, безсме́ртным и животворя́щим Та́йнам, / соблюди́ нас во Твое́й святы́ни / весь день поуча́тися пра́вде Твое́й. / Аллилу́иа, аллилу́иа, аллилу́иа.
И изшед диакон северною дверию, и став на обычном месте, глаголет:
Про́сти прии́мше Боже́ственных, святы́х, пречи́стых, безсме́ртных, небе́сных и животворя́щих, стра́шных Христо́вых Та́ин, досто́йно благодари́м Го́спода.
Лик: Го́споди, поми́луй.
Заступи́, спаси́, поми́луй и сохрани́ нас, Бо́же, Твое́ю благода́тию.
Лик: Го́споди, поми́луй.
День весь соверше́н, свят, ми́рен и безгре́шен испроси́вше, са́ми себе́ и друг дру́га, и весь живо́т наш Христу́ Бо́гу предади́м.
Лик: Тебе́, Го́споди.
Иерей глаголет молитву:
Благодари́м Тя, Влады́ко человеколю́бче, Благоде́телю душ на́ших, я́ко и в настоя́щий день сподо́бил еси́ нас небе́сных Твои́х и безсме́ртных Та́инств. Испра́ви наш путь, утверди́ ны во стра́се Твое́м вся, соблюди́ наш живо́т, утверди́ на́ша стопы́, моли́твами и моле́ньми сла́вныя Богоро́дицы и Присноде́вы Мари́и, и всех святы́х Твои́х.
Иерей же, согнув антиминс и прямо держа Евангелие, творит над ним крест.
Возглашает: Я́ко Ты еси́ освяще́ние на́ше, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
Иерей: С ми́ром изы́дем.
Лик: О и́мени Госпо́дни.
Диакон: Го́споду помо́лимся.
Лик: Го́споди, поми́луй.
Молитва заамвонная возгласно:
Иерей: Благословля́яй благословя́щия Тя, Го́споди, и освяща́яй на Тя упова́ющия, спаси́ лю́ди Твоя́ и благослови́ достоя́ние Твое́, исполне́ние Це́ркве Твоея́ сохрани́, освяти́ лю́бящия благоле́пие до́му Твоего́: Ты тех возпросла́ви Боже́ственною Твое́ю си́лою, и не оста́ви нас, упова́ющих на Тя. Мир мiрови Твоему́ да́руй, це́рквам Твои́м, свяще́нником, во́инству и всем лю́дем Твои́м. Я́ко вся́кое дая́ние бла́го, и всяк дар соверше́н свы́ше есть, сходя́й от Тебе́ Отца́ све́тов, и Тебе́ сла́ву, и благодаре́ние, и поклоне́ние возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
Священник убо входит святыми дверьми, и отшед в предложение, глаголет настоящую молитву:
Молитва, глаголемая внегда потребити Святая:
Исполне́ние зако́на и проро́ков Сам сый Христе́ Бо́же наш, испо́лнивый все оте́ческое смотре́ние, испо́лни ра́дости и весе́лия сердца́ на́ша, всегда́, ны́не и при́сно, и во ве́ки веко́в.
Лик: Ами́нь. Таже: Бу́ди и́мя Госпо́дне благослове́но от ны́не и до ве́ка. Трижды.
И псалом 33:
Благословлю́ Го́спода на вся́кое вре́мя, / вы́ну хвала́ Его́ во усте́х мои́х. / О Го́споде похва́лится душа́ моя́, / да услы́шат кро́тцыи и возвеселя́тся. / Возвели́чите Го́спода со мно́ю / и вознесе́м и́мя Его́ вку́пе. / Взыска́х Го́спода и услы́ша мя, / и от всех скорбе́й мои́х изба́ви мя. / Приступи́те к Нему́ и просвети́теся, / и ли́ца ва́ша не постыдя́тся. / Сей ни́щий воззва́, и Госпо́дь услы́ша и́, / и от всех скорбе́й eго́ спасе́ и́. / Ополчи́тся А́нгел Госпо́день о́крест боя́щихся Его́, / и изба́вит их. / Вкуси́те и ви́дите, я́ко благ Госпо́дь; / блаже́н муж, и́же упова́ет Нань. / Бо́йтеся Го́спода, вси святи́и Его́, / я́ко несть лише́ния боя́щимся Его́. / Бога́тии обнища́ша и взалка́ша, / взыска́ющии же Го́спода не лиша́тся вся́каго бла́га. / Прииди́те, ча́да, послу́шайте мене́, / стра́ху Госпо́дню научу́ вас. / Кто́ есть челове́к хотя́й живо́т, / любя́й дни ви́дети бла́ги? / Удержи́ язы́к твой от зла, / и устне́ твои́, е́же не глаго́лати льсти. / Уклони́ся от зла, и сотвори́ бла́го. / Взыщи́ ми́ра, и пожени́ и́. / О́чи Госпо́дни на пра́ведныя, / и у́ши Его́ в моли́тву их. / Лице́ же Госпо́дне на творя́щия зла́я, / е́же потреби́ти от земли́ па́мять их. / Воззва́ша пра́веднии, и Госпо́дь услы́ша их, / и от всех скорбе́й их изба́ви их. / Близ Госпо́дь сокруше́нных се́рдцем, / и смире́нныя ду́хом спасе́т. / Мно́ги ско́рби пра́ведным, / и от всех их изба́вит я́ Госпо́дь. / Храни́т Госпо́дь вся ко́сти их, / ни еди́на от них сокруши́тся. / Смерть гре́шников люта́, / и ненави́дящии пра́веднаго прегре́шат. / Изба́вит Госпо́дь ду́шы раб Свои́х, / и не прегреша́т вси, упова́ющии на Него́.
Священник же изшед, дает людем антидор. По скончании же псалма, и раздаянии антидора, глаголет:
Благослове́ние Госпо́дне на ва́с, Того́ благода́тию и человеколю́бием, всегда́, ны́не и при́сно, и во ве́ки веко́в.
Лик: Ами́нь.
Священник: Сла́ва Тебе́, Христе́ Бо́же, упова́ние на́ше, сла́ва Тебе́.
Лик: Сла́ва, и ны́не: Го́споди, поми́луй, трижды. Благослови́.
Священник глаголет отпуст.
Аще убо есть неделя: Воскресы́й из ме́ртвых:
Аще ли же ни: Христо́с, и́стинный Бог наш, моли́твами Пречи́стыя Своея́ Ма́тере, святы́х сла́вных и всехва́льных Апо́стол, (и святаго, егоже есть храм, и святаго, егоже есть день), и́же во святы́х отца́ на́шего Иоа́нна, архиепи́скопа Константи́на гра́да, Златоу́стаго, святы́х пра́ведных Богооте́ц Иоаки́ма и А́нны, и всех святы́х, поми́лует и спасе́т нас, я́ко благ и человеколю́бец.
Многолетие.
Лик: Вели́каго господи́на и отца́ на́шего имярек, / Святе́йшаго Патриа́рха Моско́вскаго и всея́ Ру́си, / и господи́на на́шего преосвяще́ннейшаго имярек, / митрополи́та (или архиепи́скопа, или епи́скопа егоже есть область), / богохрани́мую страну́ на́шу Росси́йскую, / настоя́теля, бра́тию и прихо́жан свята́го хра́ма сего́, / и вся правосла́вныя христиа́ны, / Го́споди, сохрани́ их на мно́гая ле́та.
Таже глаголем Благодарственныя молитвы.
Конец Божественныя Литургии святаго Иоанна Златоустаго.