Триодь постная (цсл)

• НЕДЕЛЯ, В НЮЖЕ ЧТЕТСЯ СВЯЩЕННОЕ И СВЯТОЕ ЕВАНГЕЛИЕ, ПРИТЧИ МЫТАРЯ И ФАРИСЕЯ

• НЕДЕЛЯ, В НЮЖЕ ЧТЕТСЯ СВЯЩЕННОЕ И СВЯТОЕ ЕВАНГЕЛИЕ, ПРИТЧИ БЛУДНАГО СЫНА

• В СУББОТУ МЯСОПУСТНУЮ

• НЕДЕЛЯ МЯСОПУСТНАЯ

• В СУББОТУ СЫРНУЮ

• В НЕДЕЛЮ СЫРОПУСТНУЮ

• КАНОН, ТВОРЕНИЕ СВЯТАГО ОТЦА НАШЕГО АНДРЕЯ КРИТСКАГО, ИЕРУСАЛИМСКАГО.

• НАЧАЛО СВЯТАГО И ВЕЛИКАГО ПОСТА

• НЕДЕЛЯ ПЕРВАЯ СВЯТАГО ПОСТА

• НЕДЕЛЯ ВТОРАЯ СВЯТЫХ ПОСТОВ.

• НЕДЕЛЯ ТРЕТИЯ СВЯТЫХ ПОСТОВ

• НЕДЕЛЯ ЧЕТВЕРТАЯ СВЯТЫХ ПОСТОВ

• В СУББОТУ ПЯТЫЯ СЕДМИЦЫ

• В НЕДЕЛЮ ПЯТУЮ СВЯТЫХ ПОСТОВ

• В СУББОТУ СВЯТАГО И ПРАВЕДНАГО ЛАЗАРЯ

• В НЕДЕЛЮ ЦВЕТОНОСИЯ

• СВЯТАЯ И ВЕЛИКАЯ СЕДМИЦА

НЕДЕЛЯ, В НЮЖЕ ЧТЕТСЯ СВЯЩЕННОЕ И СВЯТОЕ ЕВАНГЕЛИЕ, ПРИТЧИ МЫТАРЯ И ФАРИСЕЯ

В СУББОТУ ВЕЧЕРА

По предначинательном псалме, стихословим Блаже́н муж: 1-ю кафисму всю.

На Го́споди воззва́х, поставим стихов 10: и поем Осмогласника стихиры воскресны 3: и анатолиевы 4: и Триоди самогласны две, повторяюще первую. Глас 1.

Не помо́лимся фарисе́йски, бра́тие: / и́бо вознося́й себе́ смири́тся. / Смири́м себе́ пред Бо́гом, / мыта́рски поще́нием зову́ще: / очи́сти ны Бо́же, гре́шныя.

Фарисе́й тщесла́вием побежда́емь, / и мыта́рь покая́нием приклоня́емь, / приступи́ста к Тебе́ еди́ному Влады́це: / но ов у́бо похвали́вся, лиши́ся благи́х: / ов же ничто́же веща́в, сподо́бися дарова́ний. / В сих воздыха́ниих утверди́ мя Христе́ Бо́же, / я́ко Человеколю́бец.

Слава, глас 8: Вседержи́телю Го́споди, / вем, коли́ко мо́гут сле́зы: / Езеки́ю бо от врат сме́ртных возведо́ша, / гре́шную от многоле́тных согреше́ний изба́виша, / мытаря́ же па́че фарисе́я оправда́ша: / и молю́ся, с ни́ми причта́в, поми́луй мя.

И ныне, Богородичен 1, рядоваго гласа.

На литии стихира святаго обители, по обычаю.

Слава, глас 3: Мытаря́ и фарисе́я разли́чие разуме́вши душе́ моя́, / о́наго у́бо возненави́ждь горды́нный глас, / о́ваго же ревну́й благоумиле́нной моли́тве, и возопи́й: / Бо́же очи́сти мя гре́шнаго, и поми́луй мя.

И ныне, Богородичен воскресен, в тойже глас.

На стиховне стихиры Осмогласника по алфавиту.

Слава, глас 5: Отягче́нныма очи́ма мои́ма от беззако́ний мои́х, / не могу́ воззре́ти и ви́дети высоту́ небе́сную: / но приими́ мя, я́ко мытаря́ ка́ющася, Спа́се, / и поми́луй мя.

И ныне, Богородичен, в тойже глас: Храм и дверь еси́, / пала́та и престо́л Царе́в, / Де́во Всечестна́я, / Е́юже Изба́витель мой Христо́с Госпо́дь, / во тьме спя́щим яви́ся, / со́лнце сый пра́вды, / просвети́ти хотя́, я́же созда́ по о́бразу Своему́ руко́ю Свое́ю: / те́мже, Всепе́тая, / я́ко ма́терне дерзнове́ние к Нему́ стяжа́вши, / непреста́нно моли́ / спасти́ся душа́м на́шим.

Тропарь: Богоро́дице Де́во, глаголется трижды. И бывает благословение хлебов, и раздаяние. И чтение велие в Посланиих апостольских.

Последование прилучившагося святаго в Неделю сию, и в блуднаго, поем в пяток на Повечерии, или егда екклисиарх разсудит: аще токмо не случится коего великаго святаго, или святаго храму: зане храм и не великаго святаго, больши воследуется великаго святаго, на свой ему храмный праздник, еже должно есть бдению бывати, и никакоже оставляти в память его, ниже прелагается на ин день. Но поем службу храму, якоже и Сретению Господню, во вся дни, в няже и Сретение Господне бывает.

НА УТРЕНИ

По шести псалмех, Бог Госпо́дь, на глас Осмогласника. И глаголем тропарь воскресен дважды: Богородичен единожды, и обычная стихословия. Седальны Осмогласника. По Непорочных тропари: А́нгельский собо́р: ипакои. Степенны и прокимен гласа: Вся́кое дыха́ние: Евангелие воскресно ряду. Воскресе́ние Христо́во: псалом 50.

Слава, глас 8: Покая́ния отве́рзи ми две́ри, Жизнода́вче, / у́тренюет бо дух мой ко хра́му свято́му Твоему́, / храм нося́й теле́сный весь оскверне́н: / но я́ко щедр, очи́сти / благоутро́бною Твое́ю ми́лостию.

И ныне, Богородичен: На спасе́ния стези́ наста́ви мя, Богоро́дице, / сту́дными бо окаля́х ду́шу грехми́, / и в ле́ности все житие́ мое́ ижди́х: / но Твои́ми моли́твами / изба́ви мя от вся́кия нечистоты́.

Таже, глас 6: Поми́луй мя, Бо́же, / по вели́цей ми́лости Твое́й, / и по мно́жеству щедро́т Твои́х, / очи́сти беззако́ние мое́.

Мно́жества соде́янных мно́ю лю́тых помышля́я окая́нный, / трепе́щу стра́шнаго дне су́днаго: / но наде́яся на ми́лость благоутро́бия Твоего́, / я́ко Дави́д вопию́ Ти: / поми́луй мя, Бо́же, / по вели́цей Твое́й ми́лости.

Канон воскресен Осмогласника, со ирмосом на 4, и крестовоскресный на два, и Богородицы на два: и в Триоди на 6. Творение Георгия. Егоже краестрочие в Богородичнах: Георгия, глас 6:

Песнь 1

Ирмос: Я́ко по су́ху, пешеше́ствовав Изра́иль / по бе́здне стопа́ми, / гони́теля фарао́на / ви́дя потопля́ема, / Бо́гу побе́дную песнь пои́м, вопия́ше.

При́тчами вводя́й вся Христо́с, / к жития́ исправле́нию, / мытаря́ возвыша́ет от смире́ния, / показа́в фарисе́я возвыше́нием смиря́ема.

От смире́ния честь высокотворя́щую, / от возноше́ния же паде́ние ви́дя лю́тое, / мытаре́вым ревну́й до́брым, / и фарисе́йскую зло́бу возненави́ждь.

От возноше́ния испражня́ется вся́кое благо́е, / от смире́ния же потребля́ется вся́кое зло́е: / е́же облобыза́им ве́рнии, / гнуша́ющеся я́ве о́браза тщесла́внаго.

Смиренному́дрым бы́ти Свои́м ученико́м хотя́ всех Царь, / наказу́я уча́ше ревнова́ти / мытаре́ву воздыха́нию и смире́нию.

Слава: Я́ко мыта́рь стеню́, и рыда́ньми немо́лчными Го́споди, / ны́не прихожду́ Твоему́ благоутро́бию: / уще́дри и мене́, смире́нием жизнь ны́не препровожда́юща.

Богородичен: Ра́зум, сове́т, ча́яние, / те́ло, ду́шу и дух, Влады́чице, возлага́ю к Тебе́: / лю́тых враг и напа́стей, / и бу́дущаго преще́ния изба́ви, и спаси́ мя.

Катавасия: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.

Песнь 3

Ирмос: Несть свят, / я́коже Ты, Го́споди Бо́же мой, / вознесы́й рог ве́рных Твои́х, Бла́же, / и утверди́вый нас на ка́мени / испове́дания Твоего́.

От гно́ища у́бо страсте́й смире́нный возноша́ется, / от высоты́ же доброде́телей низпа́дает лю́те всяк высокосе́рдый: / его́же о́браза зло́бы убежи́м.

Тщесла́вие оттщетева́ет бога́тство пра́вды, / смире́ние же расточа́ет страсте́й мно́жество: / е́же подража́ющия ны, ча́сти покажи́ мытаре́вы Спа́се.

Я́ко мыта́рь и мы бию́щеся в пе́рси, умиле́нием вопие́м: / очи́сти Бо́же нас гре́шных, / я́ко да сего́ прии́мем оставле́ние.

К ре́вности прии́дем ве́рнии, исправля́юще кро́ткое, / смире́нию соживу́ще в стена́нии се́рдца, пла́че же и моли́тве, / я́ко да и́мамы от Бо́га проще́ние.

Слава: Отри́нем ве́рнии высокохва́льную горды́ню, / возноше́ние же лю́тое, и дме́ние ме́рзкое, / и зле́йшее фарисе́ево Бо́гу неле́пое свире́пство.

Богородичен: В Тебе́ еди́ном прибе́жищи наде́явся, / да не отпаду́ до́браго ча́яния: / но да улучу́ Твою́ по́мощь Чи́стая, / вся́каго вре́да лю́тых избавля́емый.

Катавасия: Твоя́ песносло́вцы, Богоро́дице, / Живы́й и Незави́стный Исто́чниче, / лик себе́ совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.

Седальны, глас 4. Подобен: Ско́ро предвари́:

Смире́ние вознесе́ одержи́маго злы́ми, мытаря́ возстена́вша, / и е́же очи́сти, к Зижди́телю воззва́вша: / возноше́ние же низложи́ от пра́вды / окая́ннаго фарисе́я велере́чующа. / Те́мже поревну́им до́брым, злых отступа́юще.

Слава: Смире́ние дре́вле вознесе́ мытаря́, / пла́чем возопи́вша: очи́сти, и оправди́ся. / Того́ подража́им вси, во глубину́ зол впа́дшии, / возопии́м Спа́су из глубины́ се́рдца: / согреши́хом, очи́сти еди́не Человеколю́бче.

И ныне, Богородичен: Ско́ро приими́ Влады́чице, моле́ния на́ша, / и сия́ принеси́ Твоему́ Сы́ну и Бо́гу, Госпоже́ Всенепоро́чная: / разреши́ обстоя́ния к Тебе́ притека́ющих, / сокруши́ ко́зни, и низложи́ де́рзость вооружа́ющихся безбо́жно / на рабы́ Твоя́, Пречи́стая.

Песнь 4

Ирмос: Христо́с моя́ си́ла, / Бог и Госпо́дь, / честна́я Це́рковь / боголе́пно пое́т, взыва́ющи, / от смы́сла чи́ста, о Го́споде пра́зднующи.

Изря́дный показа́ путь возноше́ния, смире́ние, / Сло́во смири́вшееся да́же и до зра́ка ра́бия: / Его́же подража́я вся́кий, возноша́ется смиря́яся.

Вознесе́ся пра́ведник, и низпаде́ фарисе́й: / во мно́жестве же зол отягча́емый смири́ся, / но вознесе́ся мыта́рь, ненаде́жно оправда́емый.

Нищеты́ хода́тай, от бога́тства доброде́телей, безу́мие яви́ся: / и бога́тство а́бие смире́ние оправда́ния от кра́йния нищеты́, / ю́же стя́жим.

Предре́кл еси́ Влады́ко, велему́дрствующим противоста́ти вся́чески, / и смире́нным благода́ть Твою́ подая́ Спа́се, / смири́вшимся ны́не нам Твою́ благода́ть низпосли́.

Слава: К Боже́ственному возноше́нию при́сно возводя́ нас Спас и Влады́ка, / высокотво́рное показа́ смире́ние: / но́ги бо ученико́м Свои́ма рука́ма обмы́.

Богородичен: Я́ко Свет непристу́пный Де́во ро́ждшая, / души́ моея́ тьму свети́тельною заре́ю разжени́, / и к стезя́м спасе́ния житие́ мое́ руково́дствуй.

Катавасия: Седя́й в Сла́ве / на Престо́ле Божества́ / во о́блаце ле́гце, / прии́ди Иису́с Пребоже́ственный, / Нетле́нною Дла́нию / и спасе́ зову́щия: / сла́ва, Христе́, си́ле Твое́й.

Песнь 5

Ирмос: Бо́жиим све́том Твои́м, Бла́же, / у́тренюющих Ти ду́ши любо́вию озари́, молю́ся, / Тя ве́дети, Сло́ве Бо́жий, / и́стиннаго Бо́га, / от мра́ка грехо́внаго взыва́юща.

Фарисе́евы доброде́тели потщи́мся подража́ти, / и поревнова́ти мытаре́ву смире́нию, / во обою́ ненави́дяще безме́стное мне́ние, / и па́губу паде́ний.

Пра́вды тече́ние тще́тное обличи́ся, / сопря́г в нем фарисе́й мне́ние: / а́бие же мыта́рь высокотво́рною доброде́телию / стяжа́ спу́тника, смире́ние.

Колесни́чник в доброде́телех, мня́шеся тещи́ фарисе́й: / но пе́ший, па́че лиди́йския колесни́цы теки́й, мыта́рь до́бре предвари́, / припря́г щедро́те смире́ние.

Мытаре́ву при́тчу вси уразуме́вше умо́м, / прииди́те поревну́им слеза́м, / дух сокруше́нный Бо́гу принося́ще, / грехо́в и́щуще оставле́ния.

Слава: Возносли́вый и зло́бный, гордели́вый же и де́рзый / дале́че отри́нем разу́мнии фарисе́ев нрав, лю́тый велехва́льный, / я́ко да не обнажи́мся Боже́ственныя благода́ти.

Богородичен: Жезл си́лы Блага́я, всем низпосли́ нам к Тебе́ прибега́ющим, / облада́ти посреде́ всех враг подаю́щи, / и вся́каго вре́да изыма́ющи.

Катавасия: Ужасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.

Песнь 6

Ирмос: Жите́йское мо́ре, / воздвиза́емое зря напа́стей бу́рею, / к ти́хому приста́нищу Твоему́ прите́к, вопию́ Ти: / возведи́ от тли живо́т мой, / Многоми́лостиве.

Жития́ по́прище мыта́рь вку́пе и фарисе́й теча́ста: / но ов у́бо высокоу́мием содержи́мь, сра́мне утону́, / ов же смире́нием спасе́ся.

Жития́ бе́дное премину́юще мы тече́ние, / подража́им мытаре́во у́бо мудрова́ние ревни́тельно: / бежи́м же киче́ния ме́рзкаго фарисе́я, и жи́ви бу́дем.

Нра́вом поревну́им Спа́са Иису́са, и Его́ смире́нию, / жела́юще непреста́нное ра́дости селе́ние получи́ти, / во стране́ живу́щих водворя́ющеся.

Показа́л еси́ Влады́ко, Твои́м ученико́м высокотво́рное смире́ние, / ле́нтием препоя́сан по чре́слом, но́зе умы́л еси́, / и сему́ о́бразу подража́ти повеле́л еси́.

Слава: Житие́ проидо́ста фарисе́й доброде́тельми, и мыта́рь прегреше́ньми. / Но ов у́бо от го́рдости умовре́дныя, отступи́ смире́ния: / ов же возноша́ется, смиренному́др я́влься.

Богородичен: На́га простото́ю, нехи́тростною же жи́знию созда́на, / преступле́ния ле́стию оде́я мя враг, и пло́ти дебельство́м: / ны́не же Твои́м хода́тайством Отрокови́це, спаса́юся.

Катавасия: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.

Кондак, глас 4. Подобен: Яви́лся еси́ днесь:

Фарисе́ева убежи́м высокоглаго́лания, / и мытаре́ве научи́мся высоте́ глаго́л смире́нных, / покая́нием взыва́юще: / Спа́се ми́ра, / очи́сти рабы́ Твоя́.

Вторый кондак, глас 3. Подобен: Де́ва днесь:

Воздыха́ния принесе́м мыта́рская Го́сподеви, / и к Нему́ присту́пим гре́шнии я́ко Влады́це: / хо́щет бо спасе́ния всех челове́ков, / оставле́ние подае́т всем ка́ющимся. / Нас бо ра́ди воплоти́ся, / Бог сый Отцу́ собезнача́льный.

Икос: Са́ми себе́ бра́тие вси смири́м воздыха́ньми, / рыда́ньми побие́м со́весть: / да в суде́ тогда́ ве́чном та́мо яви́мся ве́рнии, / непови́нни, получи́вше оставле́ние. / Та́мо бо есть вои́стинну ослабле́ние, / е́же ви́дети нам ны́не умо́лим: / та́мо боле́знь отбеже́, печа́ль и из глубины́ воздыха́ния, / во Еде́ме ди́внем, его́же Христо́с Зижди́тель, / Бог сый Отцу́ собезнача́льный.

Песнь 7

Ирмос: Росода́тельну у́бо пещь / соде́ла А́нгел / преподо́бным отроко́м, / халде́и же опаля́ющее / веле́ние Бо́жие мучи́теля увеща́ вопи́ти: / благослове́н еси́, Бо́же оте́ц на́ших.

Оправда́ния де́лы возвыша́емый, / сетьми́ тщесла́вия лю́те превознесе́ся фарисе́й, безме́рно хваля́ся: / мыта́рь же ле́гким крило́м смире́ния возне́сся, Бо́гу прибли́жися.

Смире́ния а́ки ле́ствицею употреби́вся о́бразом мыта́рь, / к небе́сней высоте́ возвы́сися: / горды́нею же гнило́ю и безу́мием окая́нный возне́сся фарисе́й, / сни́де до а́да преиспо́дняго.

Пра́ведных ловя́ у́бо лука́вый, / образми́ тщесла́вия кра́дет: / гре́шных же сетьми́ отча́яния связу́ет. / Но у́бо от обои́х зол мытаря́ ревни́телие, изба́витися потщи́мся.

Моли́твою Бо́гу на́шему припаде́м, / слеза́ми и те́плыми воздыха́нии, / подража́юще мытаре́во высокотво́рное смире́ние, пою́ще ве́рнии: / благослове́н еси́ Бо́же оте́ц на́ших.

Слава: Наказу́яй ученики́ предглаго́лал еси́ Влады́ко, не му́дрствовати высо́кая, / совводи́тися же смире́нным уча́ Спа́се. / Те́мже зове́м Тебе́ ве́рнии: / благослове́н еси́ Бо́же оте́ц на́ших.

И ныне, Богородичен: Иа́ковлю Тя добро́ту, и Боже́ственную ле́ствицу, / от до́лу ю́же ви́де пе́рвее, просте́ртую к высоте́, / ве́мы Чи́стая, низводя́щую свы́ше Бо́га воплоще́нна, / и земны́я па́ки возводя́щую.

Катавасия: Не послужи́ша тва́ри Богому́дрии / па́че Созда́вшаго, / но, о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог, благослове́н еси́.

Песнь 8

Ирмос: Из пла́мене преподо́бным ро́су источи́л еси́ / и пра́веднаго же́ртву водо́ю попали́л еси́: / вся бо твори́ши, Христе́, то́кмо е́же хоте́ти. / Тя превозно́сим во вся ве́ки.

Смиренному́дренным нра́вом / ми́лостива Го́спода мыта́рь воздохну́в обре́те, и спасе́н бысть: / о́бразом же лю́тым язы́ка велере́чиваго, / пра́вды отпаде́ фарисе́й.

Фарисе́ева киче́ния произволе́ния, / и именова́ния чистоты́, бежи́м ве́рнии: / ревну́юще мытаре́ву до́бре / поми́лованному смире́нию и нра́ву.

Гла́сы мытаре́вы ве́рнии веща́им в це́ркви святе́й: / Бо́же очи́сти, да с ним улучи́м проще́ние, / па́губы велехва́льнаго изба́вльшеся фарисе́я.

Воздыха́нию мытаре́ву вси поревну́им, / и Бо́гу бесе́дующе, те́плыми сле́зами возопии́м Ему́: / Человеколю́бче, согреши́хом, / благоутро́бне Ще́дрый, очи́сти и спаси́.

Благослови́м Отца́, и Сы́на, и Свята́го Ду́ха, Го́спода.

Стена́нием мытаре́вым Бог преклони́ся, оправди́в же сего́, / всем показа́ преклоня́тися при́сно, воздыха́ньми же и слеза́ми, / прегреше́ний прося́ще разреше́ние.

И ныне, Богородичен: Не вем па́че Тебе́ ино́го заступле́ния, / Тя предлага́ю моли́твенницу, Чи́стая Всенепоро́чная. / Тя ко из Тебе́ рожде́нному хода́таицу дви́жу: / всех оскорбля́ющих мя свобо́дна покажи́.

Катавасия: О́троки благочести́выя в пе́щи / Рождество́ Богоро́дичо спасло́ есть; / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте, дела́, / и превозноси́те Его́ во вся ве́ки.

Песнь 9

Ирмос: Бо́га / челове́ком невозмо́жно ви́дети, / на Него́же не сме́ют чи́ни А́нгельстии взира́ти; / Тобо́ю бо, Всечи́стая, яви́ся челове́ком / Сло́во воплоще́нно, / Его́же велича́юще, / с Небе́сными во́и Тя ублажа́ем.

Путь возноше́ния смире́ние, / от Христа́ взе́мше спасе́ния о́браз, / мытаре́ву обы́чаю поревну́им, / киче́ние возноше́ния дале́че отмета́юще, / нра́вом же смиренному́дрия Бо́га умоля́юще.

Душе́вную горды́ню отве́ржим, / нрав пра́вый смиренному́дрия стя́жим, / себе́ оправда́ти не тщи́мся, / тщесла́вия киче́ние возненави́дим, / и с мытаре́м Бо́га умо́лим.

Моли́твы Соде́телю ми́лости принесе́м мыта́рския, / фарисе́йских отвраща́ющеся неблагода́рных моли́тв, и велехва́льных гласо́в, / и́же на бли́жняго суд возво́дят, / да Бо́га ми́лостива и свет привлече́м.

Мно́гим прегреше́ний собра́нием отягче́н, / изоби́лием зло́бы мытаря́ преидо́х, / и фарисе́ево велехва́льное киче́ние притяжа́х, / отвсю́ду пуст всех быв благи́х: / Го́споди, пощади́ мя.

Твоего́ сподо́би блаже́нства, / Тебе́ ра́ди ду́хом ни́щих су́щих: / уче́нием бо Твоего́ повеле́ния, / дух сокруше́нный Тебе́ прино́сим, Спа́се / прие́м, спаси́ Тебе́ служа́щия.

Слава: Бо́гу мыта́рь не́когда помоли́выйся, / в це́рковь ве́рне вшед, оправда́ся: / воздыха́ньми бо и слеза́ми прише́д, сокруше́нием же се́рдца: / все отложи́ грехо́в бре́мя очище́ньми.

И ныне, Богородичен: Пе́ти, сла́вити, и блажи́ти Тя дава́й нам, / досто́йно чту́щим Тя Пречи́стая, / и Рождество́ Твое́ велича́ющим, еди́на благослове́нная: / Ты бо еси́ похвала́ христиа́ном, / и к Бо́гу моли́твенница благоприя́тная.

Катавасия: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная, / Богоро́дице, Чи́стая Присноде́во.

Ексапостиларий воскресный. Таже Триоди, глас 1. Подобен: Со ученики́ взы́дем:

Слава: Высокоре́чия убежи́м фарисе́ева зле́йшаго, / смире́нию же навы́кнем мытаре́ву изря́днейшему, / да вознесе́мся вопию́ще к Бо́гу со о́нем: / очи́сти рабы́ Твоя́, / роди́выйся от Де́вы Христе́ Спа́се во́лею, / и Крест претерпе́вый, / совоздви́гнувый мир Твои́м Боже́ственным могу́тством.

И ныне, Богородичен, подобен: Творе́ц созда́ния, и Бог всех, / плоть челове́ческую прия́т из непоро́чныя утро́бы Твоея́, / Всепе́тая Богоро́дице: / и тле́нное мое́ естество́ все обнови́, / па́ки я́коже пре́жде рождества́ оста́вль по рождестве́. / Отону́дуже Тя ве́рою вси восхваля́юще зове́м: / ра́дуйся ми́ру сла́во.

На хвалитех стихиры воскресны Осмогласника, 4.

И Триоди самогласны 4: Не помо́лимся фарисе́йски бра́тие: Фарисе́й тщесла́вием: Писаны на Вечерни.

Стих: Воскресни́ Го́споди Бо́же мой, да вознесе́тся рука́ Твоя́, / не забу́ди убо́гих Твои́х до конца́.

Глас 3: Мытаря́ и фарисе́я разли́чие разуме́вши душе́ моя́, / о́наго у́бо возненави́ждь горды́нный глас: / о́ваго же ревну́й благоумиле́нной моли́тве, и возопи́й: / Бо́же, очи́сти мя гре́шнаго, и поми́луй мя.

Стих: Испове́мся Тебе́ Го́споди, всем се́рдцем мои́м, / пове́м вся чудеса́ Твоя́.

Фарисе́я велехва́льный глас, ве́рнии возненави́деше, / мытаре́вой же благоумиле́нной моли́тве поревнова́вше, / не высо́кая му́дрствуем, но себе́ смиря́юще со умиле́нием воззове́м: / Бо́же, очи́сти грехи́ на́ша.

Слава, глас 8: От дел похвале́ньми, / фарисе́я оправда́юща себе́ осуди́л еси́ Го́споди, / и мытаря́ смири́вшася, / и воздыха́ньми очище́ния прося́ща оправда́л еси́: / не внима́еши бо велему́дренным помысло́м, / и сокруше́нная сердца́ не уничижа́еши. / Те́мже и мы Тебе́ припа́даем во смире́нии, / пострада́вшему нас ра́ди: / пода́ждь оставле́ние и ве́лию ми́лость.

И ныне: Преблагослове́нна еси́ Богоро́дице Де́во:

Славословие великое и отпуст. И обычно лития в притворе, в нейже поем: Слава, и ныне: стихиру утреннюю евангельскую. И час первый.

Подобает ведати, яко стихиры вся 11 утренния евангельския, от сея настоящия Недели, и даже до Всех святых, на литиях утренних поются в притворе, на Слава, и ныне. Вестно же буди, яко от сея Недели начинаем чести в притворе, по отпусте литии, оглашения святаго отца нашего Феодора Студита. И аще тамо есть игумен, чтутся от него: аще же ни, то от екклисиарха, стоящим, и со вниманием послушающим братиям. По скончании же чтения глаголем тропарь преподобному Феодору, глас 8: Православия наставниче: без Богородична. И совершенный отпуст.

НА ЛИТУРГИИ

Блаженны Осмогласника: и от канона песнь 6. Прокимен прилучившагося гласа.

Апостол к Тимофею, зачало 296.

Ча́до Тимофе́е, ты после́довал еси́ моему́ уче́нию, житию́, приве́ту, ве́ре, долготерпе́нию, любви́, терпе́нию, изгна́нием, страда́нием, якова́ ми бы́ша во Антиохи́и, и во Икони́и, и в Ли́стрех: якова́ изгна́ния прия́х, и от всех мя изба́вил есть Госпо́дь. И вси же хотя́щии благоче́стно жи́ти о Христе́ Иису́се, гони́ми бу́дут. Лука́вии же челове́цы и чароде́и преуспе́ют на го́ршее, прельща́юще и прельща́еми. Ты же пребыва́й в ни́хже науче́н еси́ и я́же вве́рена суть тебе́, ве́дый, от кого́ научи́лся еси́. И я́ко из мла́да свяще́нная писа́ния уме́еши, могу́щая тя умудри́ти во спасе́ние ве́рою, я́же о Христе́ Иису́се.

Аллилуия.

Евангелие от Луки, зачало 89.

Рече́ Госпо́дь при́тчу сию́: челове́ка два внидо́ста в це́рковь помоли́тися: еди́н фарисе́й, а други́й мыта́рь. Фарисе́й же став, си́це в себе́ моля́шеся: Бо́же, хвалу́ Тебе́ воздаю́, я́ко несмь я́коже про́чии челове́цы, хи́щницы, непра́ведницы, прелюбоде́е, или́ я́коже сей мыта́рь. Пощу́ся двакра́ты в суббо́ту, десяти́ну даю́ всего́ ели́ко притяжу́. Мыта́рь же издале́ча стоя́, не хотя́ше ни о́чию возвести́ на не́бо, но бия́ше пе́рси своя́, глаго́ля: Бо́же, ми́лостив бу́ди мне гре́шнику. Глаго́лю вам, я́ко сни́де сей оправда́н в дом свой па́че о́наго: я́ко всяк вознося́йся, смири́тся, смиря́яй же себе́, вознесе́тся.

Причастен: Хвали́те Го́спода с Небе́с, хвали́те Его́ в Вы́шних.

Подобает ведати, яко в сей седмице иномудрствующие содержат пост, глаголемый арцивуриев. Мы же, [монаси] на кийждо день [се же, и в среду и пяток:] вкушаем сыр и яица, [в 9 час.] Миряне же ядят мясо, развращающе онех веление толикия ереси.

Аще случится праздник Сретения Господня в субботу мясопустную, служба умерших поется в гробнице вся, вечер и утро: аще ли несть гробницы, то поется в сию субботу пред Неделею о блуднем: а тамо в субботу мясопустную, точию празднику единому поется.

НЕДЕЛЯ, В НЮЖЕ ЧТЕТСЯ СВЯЩЕННОЕ И СВЯТОЕ ЕВАНГЕЛИЕ, ПРИТЧИ БЛУДНАГО СЫНА

В СУББОТУ ВЕЧЕРА

На бдении, по обычном стихословии, на Господи воззвах, поставим стихов 10, и поем стихиры Осмогласника воскресны 3, и анатолиевы 3, и Триоди 4, повторяюще сия. Глас 1.

В безгре́шную страну́ и живо́тную вве́рихся, / посе́яв грех, серпо́м пожа́в кла́сы ле́ности, / и рукоя́тием связа́в дея́ний мои́х снопы́, / я́же и постла́х не на гумне́ покая́ния: / но молю́ Тя преве́чнаго де́лателя на́шего Бо́га, / ве́тром Твоего́ любоблагоутро́бия разве́й пле́ву дел мои́х, / и пшени́цу даждь души́ мое́й оставле́ние, / в небе́сную Твою́ затворя́я мя жи́тницу, и спаси́ мя.

Позна́им бра́тие, та́инства си́лу, / от греха́ бо ко оте́ческому до́му восте́кшаго блу́днаго сы́на / преблаги́й оте́ц предустре́т лобза́ет, / и па́ки своея́ сла́вы позна́ние да́рует: / и та́инственное вы́шним соверша́ет весе́лие, / закала́я тельца́ упита́ннаго, / да мы досто́йно сожи́тельствуем, / закла́вшему же человеколю́бному Отцу́ и сла́вному заколе́нию, / Спа́су душ на́ших.

Слава, глас 2: О коли́ких благ окая́нный себе́ лиши́х! / О какова́ Ца́рствия отпадо́х стра́стный аз! / Бога́тство изнури́в, е́же прия́х за́поведь преступи́х. / Увы́ мне, стра́стная душе́! / Огню́ ве́чному про́чее осу́дишися. / Те́мже пре́жде конца́ возопи́й Христу́ Бо́гу / я́ко блу́днаго приими́ мя сы́на, Бо́же, и поми́луй мя.

И ныне: Богородичен 1-й, гласа.

Вход. Свете тихий: Прокимен: Госпо́дь воцари́ся:

На литии по обычаю стихира храма.

Слава, глас 4: Я́ко блу́дный сын приидо́х и аз Ще́дре, / житие́ все ижди́вый во отше́ствии. / Расточи́х бога́тство, е́же дал еси́ мне О́тче: / приими́ мя ка́ющася Бо́же, и поми́луй мя.

И ныне: Богородичен тогожде гласа.

На стиховне Осмогласника, по алфавиту.

Слава, самогласен, глас 6: Оте́ческаго да́ра расточи́в бога́тство, / с безслове́сными скоты́ пасо́хся окая́нный, / и тех жела́я пи́щи, гла́дом та́ях не насыща́яся, / но возврати́вся к благоутро́бному Отцу́, / взыва́ю со слеза́ми: / приими́ мя я́ко нае́мника / припа́дающа человеколю́бию Твоему́ и спаси́ мя.

И ныне, Богородичен: Творе́ц и Изба́витель мой Пречи́стая, / Христо́с Госпо́дь из Твои́х ложе́сн проше́д, / в мя оболки́йся, / пе́рвыя кля́твы Ада́ма свободи́. / Те́мже Ти Всечи́стая, / я́ко Бо́жии Ма́тери же и Де́ве, / вои́стинну вопие́м немо́лчно: / ра́дуйся а́нгельски, ра́дуйся Влады́чице, / предста́тельство и покро́ве, / и спасе́ние душ на́ших.

Отпустительный: Богоро́дице Де́во: трижды. И прочее последование бдения, яко обычно.

НА УТРЕНИ

На Бог Господь, тропарь Осмогласника воскресен, и Богородичен, обычное стихословие, и полиелей. Обычныя два псалма: припеваем же к сим и третий псалом со аллилуиею красною:

Псалом 136

На река́х Вавило́нских, та́мо седо́хом и пла́кахом, внегда́ помяну́ти нам Сио́на. Аллилу́иа. На ве́рбиих посреде́ его обе́сихом орга́ны на́ша. Аллилу́иа. Я́ко та́мо вопроси́ша ны пле́ншии нас о словесе́х пе́сней и ве́дшии нас о пе́нии. Аллилу́иа. Воспо́йте нам от пе́сней Сио́нских. Аллилу́иа. Ка́ко воспое́м песнь Госпо́дню на земли́ чужде́й? Аллилу́иа. Аще забу́ду тебе́, Иерусали́ме, забве́на бу́ди десни́ца моя́. Аллилу́иа. Прильпни́ язы́к мой горта́ни моему́, а́ще не помяну́ тебе́, а́ще не предложу́ Иерусали́ма, я́ко в нача́ле весе́лия моего́. Аллилу́иа. Помяни́, Го́споди, сы́ны Едо́мския, в день Иерусали́мль, глаго́лющия: истоща́йте, истоща́йте до основа́ний его́. Аллилу́иа. Дщи Вавило́ня окая́нная. Блаже́н и́же возда́ст тебе́ воздая́ние твое́, е́же воздала́ еси́ нам. Аллилу́иа. Блаже́н и́же и́мет, и разбие́т младе́нцы твоя́ о ка́мень. Аллилу́иа.

Степенны, и прокимен гласа. Вся́кое дыха́ние: Евангелие утреннее. Таже, слава, глас 8: Покая́ния отве́рзи ми две́ри: И ныне, Богородичен. Подобен: На спасе́ния стези́: Таже глас 6: Поми́луй мя Бо́же: Мно́жества соде́янных мно́ю лю́тых:

Канон воскресен, со ирмосом на 4, и крестовоскресный на два, и Богородицы на два, и Триоди на 6. Минеи же последование поем на Повечерии, в пяток вечера.

Канон, творение господина Иосифа. Глас 2: Песнь 1.

Ирмос: Моисе́йскую песнь:

Иису́се Бо́же, ка́ющася приими́ ны́не и мене́, / я́ко блу́днаго сы́на, все житие́ в ле́ности жи́вша, / и Тебе́ прогне́вавша.

Е́же ми дал еси́ пре́жде, / зле расточи́х Боже́ственное бога́тство, / удали́хся от Тебе́, блу́дно жив: / благоутро́бне О́тче, приими́ у́бо и мене́ обраща́ющася.

Слава: Объя́тия ны́не Оте́ческая просте́р, / приими́ Го́споди и мене́, я́коже блу́днаго, Всеще́дре, / я́ко да благода́рно просла́влю Тя.

Богородичен: На мне Бо́же, всю показа́в благосты́ню, / пре́зри мои́х мно́жество согреше́ний, я́ко благоде́тель, / боже́ственными Ма́тере Твоея́ мольба́ми.

Катавасии же поем ирмосы канона. Моисе́йскую песнь восприи́мши возопи́й душе́: / Помо́щник и Покрови́тель бысть мне во спасе́ние, / сей мой Бог, и просла́влю Его́.

Песнь 3.

Ирмос: Непло́дствовавший мой ум:

Весь вне быв себе́, / умовре́дно прилепи́хся страсте́й обрета́телем: / но приими́ мя Христе́, я́коже блу́днаго.

Блу́днаго гла́су поревнова́в, вопию́: / согреши́х, О́тче, я́коже о́наго у́бо, / и мене́ обыми́ ны́не, и не отри́ни мене́.

Слава: Объя́тия Твоя́ просте́р Христе́, / ми́лостивно приими́ мя, / от страны́ да́льныя греха́ и страсте́й обраща́ющася.

Богородичен: До́брая в жена́х, обогати́ и мене́ до́брых ви́ды, / грехи́ мно́гими обнища́вшаго Чи́стая, / я́ко да сла́влю Тя.

Ирмос: Непло́дствоваший мой ум, / плодоно́сен Бо́же покажи́ ми, / де́лателю до́брых, насади́телю благи́х, / благоутро́бием Твои́м.

Седален, глас 1. Подобен: Гроб Твой:

Объя́тия О́тча отве́рсти ми потщи́ся, / блу́дно ижди́х мое́ житие́, / на бога́тство неиждива́емое взира́яй щедро́т Твои́х Спа́се, / ны́не обнища́вшее мое́ се́рдце не пре́зри. / Тебе́ бо Го́споди, во умиле́нии зову́: / согреши́х, О́тче, на не́бо и пред Тобо́ю.

Слава, тойже.

И ныне, Богородичен. Подобен: Безневе́стная Чи́стая Богоро́дице Де́во, / еди́на ве́рных предста́тельнице и покро́ве, / бед и скорбе́й, и лю́тых обстоя́ний, всех свободи́, / на Тя наде́жды Отрокови́це иму́щих, / и ду́ши на́ша спаси́ боже́ственными моли́твами Твои́ми.

Песнь 4.

Ирмос: Е́же от Де́вы Твое́ Рождество́:

Бога́тство благи́х, е́же дал ми еси́ Небе́сный О́тче, / расточи́х зле, стра́нным гра́жданом порабоще́н. / Те́мже вопию́ Ти: согреши́х Ти, / приими́ мя я́ко блу́днаго дре́вле, / просте́р объя́тия мне Твоя́.

Вся́кой зло́бе порабо́тихся, / прини́кнув окая́нно страсте́й де́лателем, / и себе́ вне бых несмотре́нием, / уще́дри мя Спа́се, Пренебе́сный О́тче, / прибега́юща ко мно́гим Твои́м щедро́там.

Слава: Вся́каго студа́ испо́лнихся, / не сме́я воззре́ти на высоту́ небе́сную: / и́бо безслове́сно прини́кнув греху́, / ны́не же обра́щься вопию́ умиле́нием: / согреши́х Ти, приими́ мя Всецарю́.

Богородичен: Челове́ком по́моще, упова́ние тве́рдое всем христиа́ном, / прибе́жище Чи́стая спаса́емым: / спаси́ мя Де́во, ма́терними Твои́ми мольба́ми, / и бу́дущия жи́зни сподо́би.

Ирмос: Е́же от Де́вы Твое́ Рождество́ проро́к предзря́, / возпропове́даше вопия́: / слух Твой услы́шах и убоя́хся: / я́ко от ю́га, и из горы́ святы́я, приосене́нныя / прише́л еси́ Христе́.

Песнь 5.

Ирмос: Но́щи преше́дшей:

Порабо́тихся гра́жданом стра́нным, / и в страну́ тлетво́рную отыдо́х, и испо́лнихся студа́: / ны́не же обраща́яся зову́ Ти Ще́дре, согреши́х.

Оте́ческая Твоя́ благоутро́бия ны́не отве́рзи ми, / от злых обрати́вшуся, Небе́сный О́тче, / и не отри́ни мене́, име́яй премно́гую ми́лость.

Слава: Не сме́ю воззре́ти горе́ на высоту́, / без числа́ Христе́ прогне́вав Тя: / но ве́дый Твоя́ щедро́ты ми́лостивныя, взыва́ю: / согреши́х Ти, очи́сти, и спаси́ мя.

Богородичен: Всесвята́я Де́во благода́тная, / очище́ние всем ро́ждшая, / мои́х согреше́ний тя́жкое бре́мя / Твои́ми моли́твами облегчи́.

Ирмос: Но́щи преше́дшей, прибли́жися день / и свет ми́ру возсия́: / сего́ ра́ди хва́лят Тя а́нгельстии чи́ни, / и славосло́вят Тя вся вся́ческая.

Песнь 6.

Ирмос: Во глубине́ грехо́вней:

Глубина́ согреше́ний содержи́т мя при́сно, / и треволне́ние грехо́в погружа́ет мя: / окорми́ мя ко приста́нищу жи́зни, Христе́ Бо́же, / и спаси́ мя Царю́ сла́вы.

Бога́тство Оте́ческое расточи́х лю́те, / и обнища́в студа́ испо́лнихся, / порабоще́н непло́дными помышле́ньми. / Те́мже Ти вопию́: / Человеколю́бче уще́дри, и спаси́ мя.

Слава: Гла́дом иста́явша вся́ких благ, / и устрани́вшася от Тебе́ Всеблаги́й, / уще́дри обраща́ющася мя ны́не, / и спаси́ Христе́, пою́ща Твое́ человеколю́бие.

Богородичен: Спа́са и Влады́ку ро́ждшая Христа́, / спасе́ния мя Отрокови́це сподо́би, / обнища́вша от вся́ких благ, Де́во Чи́стая, / да пою́ Твоя́ вели́чия.

Ирмос: Во глубине́ грехо́вней содержи́мь е́смь Спа́се, / и в пучи́не жите́йстей обурева́емь, / но я́коже Ио́ну от зве́ря, / и мене́ от страсте́й возведи́, и спаси́ мя.

Кондак, глас 3. Подобен: Де́ва днесь:

Оте́ческия сла́вы Твоея́ удали́хся безу́мно, / в злых расточи́в е́же ми пре́дал еси́ бога́тство. / Те́мже Ти блу́днаго глас приношу́: / согреши́х пред Тобо́ю О́тче ще́дрый, / приими́ мя ка́ющася, / и сотвори́ мя я́ко еди́наго от нае́мник Твои́х.

Икос: Спа́су на́шему на всяк день уча́щу Свои́м гла́сом, / писа́ния услы́шим о блу́дном, и целому́дренном па́ки. / И сего́ ве́рою подража́ем до́брое покая́ние, / Ве́дущему та́йная всех, смире́нием се́рдца воззове́м: / согреши́хом Ти О́тче ще́дрый, / и никогда́же досто́йни есмы́ нарещи́ся ча́да, я́коже пре́жде. / Но я́ко естество́м сый человеколюби́в, Ты приими́, / и сотвори́ мя я́ко еди́наго от нае́мник Твои́х.

И бывает чтение прежде синаксаря в Минеи: также в Триоди по чину.

Песнь 7.

Ирмос: Херуви́мы подража́юще:

Сла́достем теле́сным приклони́хся всеокая́нно, / и порабо́тихся весьма́ стра́стным изобре́тением, / и стра́нен бых от Тебе́ Человеколю́бче. / Ны́не же зову́ блу́днаго гла́сом: / согреши́х Христе́, не пре́зри мене́, я́ко еди́н ми́лостив.

Взыва́ю, согреши́х, ника́коже воззре́ти дерза́я на высоту́ небе́сную, Всецарю́, / я́ко в безу́мии еди́н Тя прогне́вах, / отве́ргся Твои́х повеле́ний. / Те́мже я́ко еди́н Благи́й, / не отве́ржи мене́ от Твоего́ лица́.

Слава: Апо́стол, Го́споди, и проро́к, и преподо́бных, / и честны́х му́ченик, и пра́ведных мольба́ми / прости́ ми вся, я́же согреши́х, / прогне́вав Христе́ бла́гость Твою́, / я́ко да песносло́влю Тя во вся ве́ки.

Богородичен: Херуви́м я́вльшися, и серафи́м Богоро́дице, / и всех светле́йшая небе́сных во́инств, / с си́ми умоли́, Его́же воплоти́ла еси́ Боже́ственное Сло́во Всенепоро́чная, Безнача́льнаго Отца́, / я́ко да благ ве́чнующих вси сподо́бимся.

Ирмос: Херуви́мы подража́юще о́троцы / в пещи́ ликовствова́ху вопию́ще: / благослове́н еси́ Бо́же, / я́ко и́стиною и судо́м наве́л еси́ сия́ вся грех ра́ди на́ших, / препе́тый, и препросла́вленный во вся ве́ки.

Песнь 8.

Ирмос: В купине́ Моисе́ю:

Сше́дый на зе́млю спасти́ мир, / во́льною нището́ю за милосе́рдие мно́гое, / обнища́вшаго мя ны́не от вся́каго благодея́ния, / я́ко ми́лостивый, спаси́.

От Твои́х за́поведей удали́вся, / порабо́тихся всеокая́нно лестцу́: / обраща́ющагося же ны́не, / я́ко блу́днаго дре́вле припа́дающа Тебе́, / приими́ Пренебе́сный О́тче.

Благослови́м Отца́, и Сы́на, и Свята́го Ду́ха, Го́спода.

Тлетво́рными помышле́ньми объе́мся омрачи́хся, / и от Тебе́ удали́хся, весь вне себе́ быв Ще́дре. / Те́мже в покая́нии припа́дающа Тебе́ спаси́.

Богородичен: Богороди́тельнице Чи́стая, / низве́рженных исправле́ние еди́на, испра́ви и мене́ / вся́кими греха́ми сокруше́ннаго всего́ и смире́ннаго.

Ирмос: В купине́ Моисе́ю Де́вы чу́до, / на Сина́йстей горе́, прообрази́вшаго иногда́, / по́йте, благослови́те / и превозноси́те во вся ве́ки.

Песнь 9.

Ирмос:: От земноро́дных кто слы́ша таково́е?

Виждь Христе́ печа́ль се́рдца, виждь мое́ обраще́ние, / виждь сле́зы Спа́се, и не пре́зри мене́, / но обыми́ па́ки благоутро́бия ра́ди, / мно́жеству спаса́емых Пречи́стая, / я́ко да пою́ благода́рно ми́лости Твоя́.

Я́ко разбо́йник вопию́: помяни́ мя, / я́ко мытарь умили́вся, бию́ в пе́рси, и зову́ ны́не: очи́сти, / я́коже блу́днаго приими́ мя Всеще́дрый, от всех зол мои́х, Всецарю́: / я́ко да пою́ Твое́ кра́йнее снизхожде́ние.

Воздохни́ ны́не душе́ моя́ всеокая́нная, и возопи́й Христу́: / мене́ ра́ди во́лею обнища́вый Го́споди, / обнища́вшаго мя от вся́каго благодея́ния, / до́брых бога́тством я́ко Благи́й и Многоми́лостивый еди́н обогати́ мя.

Слава: Е́же иногда́ соде́лал еси́ весе́лие блу́днаго, Бла́же, обраще́нием во́льным, / сие́ ны́не сотвори́ и на мне окая́нном, / простира́я ми честна́я Твоя́ объя́тия. / Да спа́сся песносло́влю кра́йнее Твое́ снизхожде́ние.

Богородичен: Све́тлыми моли́твами Твои́ми Де́во, / мы́сленная моя́ очеса́ омраче́нная зло́бою, просвети́, молю́ся, / и к путе́м покая́ния введи́ мя, / я́ко да до́лжно Тя песносло́влю, / па́че сло́ва Сло́во воплоти́вшую.

Ирмос: От земноро́дных кто слы́ша таково́е? Или кто ви́де когда́, / я́ко Де́ва обре́теся во чре́ве иму́щая, / и безболе́зненно Младе́нца поро́ждшая? / Таково́е Твое́ чу́до, / и Тя Чи́стая Богоро́дице велича́ем.

Ексапостиларий Осмогласника: таже настоящий Триоди. Подобен: Жены́ услы́шите:

Бога́тство, е́же ми дал еси́, благода́ти, окая́нный отше́д, / непотре́бно зле ижди́х, Спа́се, блу́дно пожи́в, / де́моном льсти́вно расточи́х. / Те́мже мя обраща́ющася, / я́коже блу́днаго приими́, О́тче ще́дрый, и спаси́.

Иный, подобен: Расточи́х бога́тство Твое́ ижди́в, Го́споди, / и лука́вым де́моном повину́хся окая́нный, / но Спа́се Всеблагоутро́бне, / блу́днаго уще́дри, и оскве́рншася очи́сти, / пе́рвую отдая́й мне оде́жду Твоего́ Ца́рствия.

Богородичен, подобен: Свята́я Ма́ти Де́во, ве́лие пропове́дание апо́столов, / му́чеников, и проро́ков, и преподо́бных, / Твоего́ Сы́на и Го́спода / уми́лостиви нам рабо́м Твои́м Богороди́тельнице, / егда́ ся́дет суди́ти по достоя́нию коего́ждо.

На хвалитех стихиры Осмогласника воскресны, 4: и анатолиев, 1: и Триоди самогласны, 3. Глас 2.

Блу́днаго глас приноша́ю Ти, Го́споди: / согреши́х пред очи́ма Твои́ма Благи́й, / расточи́х бога́тство Твои́х дарова́ний. / Но приими́ мя ка́ющася Спа́се, и спаси́ мя.

Глас 4. Стих: Воскресни́ Го́споди Бо́же мой, да вознесе́тся рука́ Твоя́, / не забу́ди убо́гих Твои́х до конца́.

Я́ко блу́дный сын приидо́х и аз Ще́дре, / житие́ все ижди́вый во отше́ствии: / расточи́х бога́тство, е́же дал ми еси́ О́тче. / Приими́ мя ка́ющася Бо́же, и поми́луй мя.

Глас 8: Стих: Испове́мся Тебе́ Го́споди, всем се́рдцем мои́м, / пове́м вся чудеса́ Твоя́.

Ижди́х блу́дно / Оте́ческаго име́ния бога́тство, и расточи́в, пуст бых, / в страну́ всели́вся лука́вых гра́ждан, / и ктому́ не терпя́ с ни́ми сожи́тельства, / обра́щься вопию́ Ти ще́дрому Отцу́: / согреши́х на не́бо и пред Тобо́ю, / и несмь досто́ин нарещи́ся сын Твой. / Сотвори́ мя я́ко еди́наго от нае́мник Твои́х Бо́же, / и поми́луй мя.

Слава, глас 6: О́тче Благи́й, удали́хся от Тебе́, не оста́ви мене́, / ниже́ непотре́бна покажи́ Ца́рствия Твоего́: / враг вселука́вый обнажи́ мя и взят мое́ бога́тство, / душе́вная дарова́ния блу́дно расточи́х. / Воста́в у́бо обра́щься к Тебе́ вопию́: / сотвори́ мя я́ко еди́наго от нае́мник Твои́х, / мене́ ра́ди на Кресте́ пречи́стеи Твои́ ру́це простры́й, / да лю́таго зве́ря исхити́ши мя, / и в пе́рвую оде́жду облече́ши мя, / я́ко еди́н Многоми́лостив.

И ныне: Преблагослове́нна еси́ Богоро́дице Де́во:

Славословие великое. ектении, и отпуст. И обычно литиа, на нейже поется Сла́ва, и ны́не: стихира евангельская: и чтутся оглашения. И час первый в притворе. И совершенный отпуст.

НА ЛИТУРГИИ

Блаженна Осмогласника, на 6: и Триоди песнь 6-я, на 4: Прокимен Апостола по гласу.

Апостол к Коринфяном, зачало 135.

Бра́тие, вся ми леть суть, но не вся на по́льзу: вся ми леть суть, но не аз облада́н бу́ду от кого́. Бра́шна чре́ву, и чре́во бра́шном: Бог же и сие́ и сия́ упраздни́т. Те́ло же не блуже́нию, но Го́сподеви, и Госпо́дь те́лу. Бог же и Го́спода воздви́же, и нас воздви́гнет си́лою Свое́ю. Не ве́сте ли, я́ко телеса́ ва́ша у́дове Христо́вы суть? Взем ли у́бо у́ды Христо́вы, сотворю́ у́ды блудни́чи? Да не бу́дет. Или́ не ве́сте, я́ко прилепля́яйся скверноде́йце, еди́но те́ло есть (с блудоде́йцею)? Бу́дета бо, рече́, о́ба в плоть еди́ну. Прилепля́яйся же Го́сподеви, един дух есть с Го́сподем. Бе́гайте блудодея́ния: всяк бо грех, его́же а́ще сотвори́т челове́к, кроме́ те́ла есть, а блудя́й, во свое́ те́ло согреша́ет. Или́ не ве́сте, я́ко телеса́ ва́ша храм живу́щаго в вас Свята́го Ду́ха суть, Его́же и́мате от Бо́га, и не́сте свои́? Ку́плени бо есте́ цено́ю.

Просла́вите у́бо Бо́га в телесе́х ва́ших, и в душа́х ва́ших, я́же суть Бо́жия.

Аллилуиа гласа.

Евангелие от Луки, зачало 79.

Рече́ Госпо́дь при́тчу сию́: челове́к не́кий име́ два сы́на. И рече́ юне́йший ею́ отцу́: о́тче, даждь ми досто́йную часть име́ния. И раздели́ и́ма име́ние. И не по мно́зех днех собра́в все мний сын, оты́де на страну́ дале́че, и ту расточи́ име́ние свое́, живы́й блу́дно. Изжи́вшу же ему́ все, бысть глад кре́пок на стране́ той, и той нача́т лиша́тися. И шед прилепи́ся еди́ному от жи́тель тоя́ страны́: и посла́ его́ на се́ла своя́ пасти́ свиния́. И жела́ше насы́тити чре́во свое́ от роже́ц, я́же ядя́ху свиния́: и никто́же дая́ше ему́. В себе́ же прише́д, рече́: коли́ко нае́мником отца́ моего́ избыва́ют хле́бы, аз же гла́дом ги́блю? Воста́в иду́ ко отцу́ моему́, и реку́ ему́: о́тче, согреши́х на не́бо и пред тобо́ю, и уже́ несмь досто́ин нарещи́ся сын твой: сотвори́ мя я́ко еди́наго от нае́мник твои́х. И воста́в и́де ко отцу́ своему́. Еще́ же ему́ дале́че су́щу, узре́ его́ оте́ц его́, и мил ему́ бысть, и тек нападе́ на вы́ю его́, и облобыза́ его́. Рече́ же ему́ сын: о́тче, согреши́х на не́бо и пред тобо́ю, и уже́ несмь досто́ин нарещи́ся сын твой. Рече́ же оте́ц к рабо́м свои́м: изнеси́те оде́жду пе́рвую и облецы́те его́, и дади́те пе́рстень на ру́ку его́ и сапоги́ на но́зе. И приве́дше теле́ц упита́нный, заколи́те, и я́дше весели́мся. Я́ко сын мой сей мертв бе, и оживе́: и изги́бл бе, и обре́теся. И нача́ша весели́тися. Бе же сын его́ ста́рей на селе́: и я́ко гряды́й прибли́жися к до́му, слы́ша пе́ние и ли́ки. И призва́в еди́наго от о́трок, вопроша́ше: что у́бо сия́ суть? Он же рече́ ему́, я́ко брат твой прии́де, и закла́ оте́ц твой теле́ц упите́нный, я́ко здра́ва его́ прия́т. Разгне́вався же и не хотя́ше вни́ти. Оте́ц же его́ изше́д моля́ше его́. Он же отвеща́в, рече́ отцу́: се толи́ко лет рабо́таю тебе́, и николи́же за́поведи твоя́ преступи́х, и мне николи́же дал еси́ козля́те, да со дру́ги свои́ми возвесели́лся бых. Егда́ же сын твой сей, изъеды́й твое́ име́ние с любоде́йцами, прии́де, закла́ ему́ теле́ц пито́мый. Он же рече́ ему́: ча́до, ты всегда́ со мно́ю еси́, и вся моя́ твоя́ суть. Возвесели́ти же ся и возра́довати подоба́ше, я́ко брат твой сей мертв бе, и оживе́: и изги́бл бе, и обре́теся.

Причастен: Хвали́те Го́спода с Небе́с, хвали́те Его́ в Вы́шних.

Подобает ведати, яко в седмице мясопустной Аллилуиа не поем: оставляем же и едину кафисму Псалтира от Утрени, и глаголем сию на Вечерни. Песней во Псалтири не глаголем. Не поется же и междочасие, и канон молебный Пресвятей Богородице, поемый на Повечерии: Повечерие же поется малое: Такожде творим в седмице сырной, разве среды и пятка: но о сем всем тамо указа ищи. Прочитаем же в сей недели в койлюбо день на Утрени слово святаго Макариа о Четырдесятнице, и Пятьдесятнице, егоже начало: Ча́дца моя́, ра́дуется се́рдце мое́ вас ра́ди:

Ведомо же да есть, яко последование прилучающихся святых в субботу, и в Неделю мясопустную, поется в мимошедших Повечериях. Такожде о субботе и Недели сыропустной творим: или како настоятель изволит, кроме аще где случится великаго святаго память.

В СУББОТУ МЯСОПУСТНУЮ

Память совершаем всех от века усопших православных христиан, отец и братий наших.

В ПЯТОК ВЕЧЕРА

По предначинательном псалме, и обычном стихословии, на Го́споди воззвах, поставим стихов 6: И поем Осмогласника стихиры мученичны три, рядоваго гласа:

И Триоди подобны, три. Глас 8. Подобен: Во Еде́ме рай:

От ве́ка ме́ртвых днесь / всех по и́мени, ве́рою пожи́вших благоче́стно, / па́мять сотворя́юще ве́рнии, / Спа́са и Го́спода воспои́м, прося́ще приле́жно / сим в час суда́ отве́т благи́й да́ти, / Тому́ Самому́ Бо́гу на́шему, / всей судя́щему земли́, / десна́го Его́ предстоя́ния получи́ти в ра́дости, / в ча́сти пра́ведных, и во святы́х жре́бии све́тлем, / и досто́йным бы́ти Небе́снаго Ца́рствия Его́.

Твое́ю кро́вию челове́ки Спа́се искупи́вый, / и сме́ртию Твое́ю от сме́рти го́рькия изба́вивый нас, / и жизнь ве́чную подая́й нам Воскресе́нием Твои́м, / вся упоко́й Го́споди, усо́пшия благоче́стно, / или́ в пусты́нях, или́ во граде́х, или́ в мо́ри, / или́ на земли́, или́ на вся́ком ме́сте: / цари́ же, свяще́нники, архиере́и, / мона́хи, и бельцы́ в во́зрасте вся́ком всеро́дном, / и сподо́би я Небе́снаго Ца́рствия Твоего́.

Из ме́ртвых воста́нием Твои́м Христе́, / не ктому́ смерть облада́ет уме́ршими благоче́стно. / Те́мже мо́лимся приле́жно: / рабы́ Твоя́ упоко́й во дво́рех Твои́х, / и в не́дрех Авраа́ма, от Ада́ма да́же до днесь, / послужи́вшия Тебе́ чи́сто, / отцы́ и бра́тию на́шу, / дру́ги вку́пе и сро́дники, / вся́каго челове́ка, в житии́ послужи́вша ве́рно, / и к Тебе́ преста́вльшася многови́дно и многообра́зно, Бо́же, / и сподо́би я Небе́снаго Ца́рствия Твоего́.

Слава, глас 8: Пла́чу и рыда́ю, / егда́ помышля́ю смерть, / и ви́жду во гробе́х лежа́щую / по о́бразу Бо́жию созда́нную на́шу красоту́, / безобра́зну, и безсла́вну, / не иму́щу ви́да. / О́ле чудесе́! / Что е́же о нас сие́ бысть та́инство? / Ка́ко преда́хомся тле́нию? / Ка́ко припряго́хомся сме́рти? / Вои́стинну Бо́жиим повеле́нием, / я́коже есть пи́сано, / подаю́щаго преста́вльшимся поко́й.

И ныне, Богородичен первый, гласа. Свете тихий: Вместо же прокимена поем Аллилуия, на глас 8: Стих: Блаже́ни, я́же избра́л и прия́л еси́ Го́споди, и па́мять их в род и род. Стих: Ду́ши их во благи́х водворя́тся.

На стиховне мученичен гласа, и два мертвена, Иоанна Дамаскина.

Стихи же припеваем вышереченныя: Блаже́ни, я́же избра́л и прия́л еси́ Го́споди, и па́мять их в род и род, и Ду́ши их во благи́х водворя́тся.

Слава, глас 6: Нача́ток ми и соста́в зижди́тельное Твое́ бысть повеле́ние: / восхоте́в бо от неви́димаго и ви́димаго естества́ жи́ва мя соста́вити, / от земли́ у́бо те́ло созда́в, дал же ми еси́ ду́шу, / Боже́ственным Твои́м и животворя́щим вдохнове́нием. / Те́мже Спа́се, рабы́ Твоя́ во стране́ живы́х, / и в кро́вех пра́ведных упоко́й.

И ныне, Богородичен, глас тойже: Моли́твами Ро́ждшия Тя Христе́, / му́ченик Твои́х и апо́стол, и проро́к, и святи́телей, / преподо́бных, и пра́ведных, и всех святы́х, / усо́пшия рабы́ Твоя́ упоко́й.

Ны́не отпуща́еши:

Тропарь, глас 8:

Глубино́ю му́дрости человеколю́бно вся стро́яй, / и поле́зное всем подава́яй, / еди́не Соде́телю, упоко́й Го́споди, ду́ши раб Твои́х: / на Тя бо упова́ние возложи́ша, / Творца́ и Зижди́теля и Бо́га на́шего.

Слава, и ныне, Богородичен, глас тойже: Тебе́ и сте́ну, и приста́нище и́мамы, / и моли́твенницу благоприя́тну к Бо́гу, / Его́же родила́ еси́ Богоро́дице безневе́стная, ве́рных спасе́ние.

Ектения, и отпуст.

По отпущении же Вечерни, творим в притворе паннихиду за усопших, и поем канон рядоваго гласа мертвым.

НА УТРЕНИ

По шестопсалмии, Аллилуия, на глас 8. Тропарь: Глубино́ю му́дрости: Дважды. Сла́ва, и ны́не, Богородичен: Тебе́ и сте́ну, и приста́нище: И обычное стихословие. Чтутся же и слова о мертвых: к Коринфяном в 1-м послании. Поют же ся и Непорочны на две статии, с припевы: Благослове́н еси́ Го́споди, научи́ мя: на глас 5.

И по них тропари мертвых, глас 5.

Припев: Благослове́н еси́ Го́споди, / научи́ мя оправда́нием Твои́м.

Святы́х лик обре́те исто́чник жи́зни и дверь ра́йскую, / да обря́щу и аз путь покая́нием: / поги́бшее овча́ аз есмь, / воззови́ мя Спа́се, и спаси́ мя.

Благослове́н еси́ Го́споди:

А́гнца Бо́жия пропове́давше, / и закла́ни бы́вше я́коже а́гнцы, / и к жи́зни нестаре́емей святи́и, / и присносу́щней преста́вльшеся. / Того́ приле́жно му́ченицы моли́те, / долго́в разреше́ние нам дарова́ти.

Благослове́н еси́ Го́споди:

В путь у́зкий хо́ждшии приско́рбный, / вси в житии́ крест я́ко яре́м взе́мшии, / и Мне после́довавшии ве́рою, / прииди́те наслади́теся, / и́хже угото́вах вам по́честей, / и венцо́в небе́сных.

Благослове́н еси́ Го́споди:

О́браз есмь неизрече́нныя Твоея́ сла́вы, / а́ще и я́звы ношу́ прегреше́ний: / уще́дри Твое́ созда́ние Влады́ко, / и очи́сти Твои́м благоутро́бием, / и возжеле́нное оте́чество пода́ждь ми, / рая́ па́ки жи́теля мя сотворя́я.

Благослове́н еси́ Го́споди:

Дре́вле у́бо от не су́щих созда́вый мя, / и о́бразом Твои́м Боже́ственным почты́й, / преступле́нием же за́поведи / па́ки мя возврати́вый в зе́млю, от нея́же взят бых, / на е́же по подо́бию возведи́ / дре́внею добро́тою возобрази́тися.

Благослове́н еси́ Го́споди:

Упоко́й Бо́же рабы́ Твоя́, / и учини́ я в раи́, / иде́же ли́цы святы́х Го́споди, / и пра́ведницы сия́ют я́ко свети́ла, / усо́пшия рабы́ Твоя́ упоко́й, / презира́я их вся согреше́ния.

Слава: Трисия́тельное еди́наго Божества́, благоче́стно пое́м вопию́ще: / Свят еси́ О́тче Безнача́льный, / Собезнача́льный Сы́не, и Боже́ственный Ду́ше: / просвети́ нас ве́рою Тебе́ служа́щих, / и ве́чнаго огня́ исхити́.

И ныне: Ра́дуйся Чи́стая, Бо́га пло́тию ро́ждшая во спасе́ние всех, / Е́юже род челове́ческий обре́те спасе́ние: / Тобо́ю да обря́щем рай, / Богоро́дице Чи́стая благослове́нная.

Аллилу́ия, аллилу́ия, аллилу́ия, сла́ва Тебе́ Бо́же. Трижды.

Посем ектения о усопших: Па́ки и па́ки:

Иерей молитву: Бо́же духо́в: Мы же: Го́споди поми́луй, 40.

И по возгласе седален, глас 5:

Поко́й Спа́се наш, / с пра́ведными рабы́ Твоя́, / и сия́ всели́ во дворы́ Твоя́, / я́коже есть пи́сано: / презира́я я́ко благ прегреше́ния их / во́льная и нево́льная, / и вся я́же в ве́дении и не в ве́дении, Человеколю́бче.

Слава, и ныне, Богородичен: От Де́вы возсия́вый ми́ру Христе́ Бо́же, / и сы́ны све́та То́ю показа́вый, поми́луй нас.

Стихословим же: Го́сподеви пое́м:

Канон же поем святаго обители на 6: И Триоди на 8. Поет же ся и вторая песнь без стихословия. И песни Псалтира. Канон Студита творение, в Троичных и Богородичных тропарех краестрочие: Недосто́йнаго Фео́дора. Глас 8.

Песнь 1.

Ирмос: Песнь возсле́м лю́дие:

Вси помо́лимся Христу́, / творя́ще па́мять днесь от ве́ка ме́ртвых, / да ве́чнаго огня́ изба́вит я в ве́ре усо́пшия, / и наде́жде жи́зни ве́чныя.

Глубино́ю суде́б Твои́х Христе́, / Всепрему́дре Ты предопредели́л еси́ / коего́ждо кончи́ну жи́зни, преде́л и о́браз. / Те́мже я́же покры́ гроб во вся́кой стране́, / на суде́ спаси́ Всеще́дрый.

Преде́лы жи́зни на́шея да́вый, / те́мже усо́пшия от жите́йския но́щи, / дне невече́рняго сы́ны покажи́ Го́споди, / свяще́нники правосла́вныя, и вся ве́рныя лю́ди Твоя́.

Я́же покры́ вода́, и брань пожа́т, / трус же я́же объя́т, и уби́йцы уби́ша, / и о́гнь я́же попали́, ве́рныя, / Ми́лостиве в ча́сти учини́ пра́ведных.

Вся презира́яй плотски́я до́лги на́ша Спа́се наш, / во вся́ком во́зрасте всего́ ро́да челове́ча, / пред суди́щем Твои́м поста́ви неосужде́ны, / Тебе́ Созда́телю отвеща́ющия.

Слава, Троичен: Три еди́наго Естества́ пою́, Ли́ца самоипоста́сная, / нерожде́нна Отца́, Сы́на ро́ждшагося, и Ду́ха Свята́го: / безнача́льное Ца́рство, власть, Божество́ еди́но.

Богородичен: Вои́стинну Ты яви́лася еси́ не́бо на земли́, / бо́льшее вы́шняго небесе́, Безневе́стная Де́во: / из Тебе́ бо возсия́ Со́лнце в ми́ре, влады́чествуяй пра́вдою.

Катавасия: Песнь возсле́м лю́дие / чу́дному Бо́гу на́шему, / свободи́вшему Изра́иля от рабо́ты, / песнь побе́дную пою́ще и вопию́ще: / пои́м Тебе́ еди́ному Влады́це.

Песнь 2:

Ирмос: Ви́дите ви́дите, / я́ко Аз есмь Бог ваш, / пре́жде век рожде́нный от Отца́, / и от Де́вы в после́дняя без му́жа заче́ншийся / и разруши́вый грех пра́отца Ада́ма, я́ко Человеколю́бец.

Ви́дите ви́дите, я́ко Аз есмь Бог ваш, / пра́ведным судо́м водрузи́вый преде́лы жи́зни, / в нетле́ние от тли прие́мляй вся усо́пшия / в наде́жди ве́чнаго воскре́сния.

От четы́рех коне́ц Го́споди, прие́мляй ве́рно усо́пшия, / в мо́ри, или́ на земли́, или́ в река́х, исто́чницех, или́ е́зерех, / или́ в рове́нницех снедь звере́м бы́вшия, и пти́цам, и гадо́м, вся упоко́й.

В Твое́й дла́ни вся́ческая Го́споди, / предразсуди́л еси́, разре́шшияся в соста́вы четы́ри: / в прише́ствии Твое́м собра́в воскреси́, / вся я́же в неве́дении, и ра́зуме, проща́я тем прегреше́ния.

О стра́шнаго Твоего́ втора́го, Го́споди, прише́ствия! / Зане́ я́ко в ви́де мо́лнии на зе́млю прише́д, / воздви́гнеши все созда́ние Твое́ суди́тися, / в ве́ре Тебе́ тогда́ пожи́вших, / сре́тших Тя с Тобо́ю бы́ти сподо́би.

Слава, Троичен: Пресоверше́нная Еди́нице, Пребоже́ственная, Триипоста́сная, / нерожде́нне О́тче и Сы́не Единоро́дне, Ду́ше от Отца́ исходя́й, Сы́ном же явля́яйся: / Существо́ еди́но и Естество́, Госпо́дьство, Ца́рство, спаси́ всех нас.

Богородичен: Неизглаго́ланное чу́до Твоего́ Рождества́ Ма́ти Де́во: / ка́ко бо и ражда́еши, и Чиста́ еси́ в то́мже? / Ка́ко Отроча́ ражда́еши, и не ве́си иску́са му́жеска отню́д? / Я́коже весть па́че естества́ от Мене́ новоле́пно Сло́во Бо́жие ро́ждшееся.

Катавасия: Ви́дите ви́дите, я́ко Аз:

Песнь 3.

Ирмос: Утвержде́й руко́ю:

Преше́дшия жития́ тече́ние, / в сла́ве благоче́стной пра́ведным оде́ятися венце́м сподо́би Бо́же, / и ве́чных благ наслади́тися.

Напра́сно восхище́нныя, попаля́емыя от мо́лнии, / и изме́рзшия мра́зом, и вся́кою ра́ною, / упоко́й Бо́же, егда́ огне́м вся иску́сиши.

Присному́тное жития́ мо́ре преплы́вшия, Христе́, / в нетле́нное Твоего́ жития́ сподо́би приста́нище притещи́, / правосла́вным житие́м окормле́ныя.

И́хже вся́кое естество́ морски́х и птиц небе́сных, / прия́т снеде́ние Христе́, Твои́ми судьба́ми, / воскреси́ Бо́же, в после́дний день со сла́вою.

Слава, Троичен: У́мно Боже́ственную Еди́ницу, / в три Ли́ца про́сто ку́пно е́же пресещи́ совокупля́ю несеко́мая: / я́коже бо ско́рость мо́лнии, трисия́ющая ви́дится во еди́нстве.

Богородичен: Недоуме́нное Твое́ чу́до: без му́жа бо ражда́еши, / и де́вство Твое́ Чи́стая, соблюда́еши ро́ждши. / Те́мже а́нгел мно́жество, и челове́ческий род пое́т Тя во ве́ки.

Катавасия: Утвержде́й руко́ю Твое́ю, Сло́ве Бо́жий небеса́, / просвеще́нием Твоего́ и́стиннаго позна́ния, / утверди́ и нас на Тя наде́ющихся сердца́.

Седален, глас 5: Подобен: Собезнача́льное Сло́во:

Нас ра́ди претерпе́вый Крест и смерть, / и умертви́вый ад, и совоскреси́вый ме́ртвыя, / преста́вльшияся от нас Спа́се, упоко́й, я́ко Человеколю́бец Бог, / и в тре́петное и стра́шное прише́ствие Твое́ Жизнода́вче, / я́ко име́яй мно́жество ми́лости, / Ца́рствия Твоего́ сподо́би.

Слава, тойже.

И ныне, Богородичен: Ско́рый Твой покро́в, и по́мощь и ми́лость покажи́ на рабе́х Твои́х, / и во́лны Чи́стая, укроти́ су́етных помышле́ний, / и па́дшую ду́шу мою́ возста́ви Богоро́дице: / вем бо, вем Де́во, я́ко мо́жеши, ели́ка и хо́щеши.

Песнь 4.

Ирмос: Из горы́ приосене́нныя:

Отцы́ и пра́отцы, де́ды и пра́деды, / от пе́рвых и да́же до после́дних, / во благозако́нии уме́ршия и благове́рии, / вся помяни́ Спа́се наш.

В горе́, на пути́, на ме́стех пусты́х житие́ оста́вльшия в ве́ре, / мона́хи же и бельцы́, ю́ноши и ста́рцы, / со святы́ми Христе́ всели́.

От печа́ли и ра́дости преше́дшия ненаде́жно, / ве́рою а́бие премени́вшия житие́, / в благоде́нствии пострада́вшия, или́ злоде́нствии, / вся упоко́й Спа́се наш.

Я́же уби мечь, и конь совосхи́ти, / град, снег и ту́ча умно́женная: / я́же удави́ пли́нфа, или́ персть посы́па, / Христе́ Спа́се наш упоко́й.

Слава, Троичен: Стра́нно я́ко еди́но, и три, / Божество́ все по еди́ному Лицу́ неразде́льно: / Оте́ц бо, Сын, и Дух Святы́й есть покланя́емь, я́ко един Бог.

Богородичен: Напра́ви нас Де́во, моли́твами Твои́ми, / окормля́ющи обурева́емыя волно́ю греха́, / во спаси́тельная приста́нища, Господороди́тельнице, / избавля́ющи от вся́ких лю́тых.

Катавасия: Из горы́ приосене́нныя Сло́ве, проро́к, / еди́ныя Богоро́дицы, / хотя́ще воплоти́тися, богови́дно усмотри́, / и со стра́хом славосло́вяше си́лу Твою́.

Песнь 5.

Ирмос: У́тренюет дух мой:

Коего́ждо па́мять уме́рших благоче́стно / от ве́ка днесь творя́ще Го́споди, / приле́жно Ти вопие́м: / вся упоко́й со святы́ми Твои́ми.

От вся́каго, я́же прия́л еси́, ро́да и ро́да / в царе́х, в князе́х, или́ мона́шествующих правосла́вныя, Ще́дре, / ве́чнаго изба́ви муче́ния.

Всех я́же созда́л еси́ поле́зная ве́дый, / и́мже попусти́л еси́ Го́споди, внеза́пными паде́жьми ненаде́жно умре́ти, / изба́ви му́ки вся́кия Бо́же наш.

Огня́ при́сно паля́щаго, и от тьмы несвети́мыя, / скре́жета зу́бнаго, и че́рвия безконе́чно му́чащаго и вся́каго муче́ния / изба́ви Спа́се наш, вся ве́рно уме́ршия.

Слава, Троичен: Единопресто́льная, безнача́льная, Триипоста́сная Еди́нице, / разделе́нием Еди́нство, и вопроти́в Ли́цы Естество́ иму́щая, / во еди́но нас совокупи́ хоте́ние Твои́х за́поведей.

Богородичен: Па́че огнезра́чных серафи́мов яви́лася еси́ Чи́стая Честне́йшая, / поро́ждши сим непристу́пнаго Иису́са Спа́са, / воплоще́нием обожи́вшаго земноро́дных смеше́ние.

Катавасия: У́тренюет дух мой к Тебе́ Бо́же, / зане́ свет повеле́ния прише́ствия Твоего́: / и́миже у́бо озари́ ум наш Влады́ко, / и наста́ви на стезю́ жи́зни.

Песнь 6.

Ирмос: Содержи́ма мя:

Сме́рти разреши́в боле́зни, пострада́в Нача́льниче жи́зни Бо́же наш, / усо́пшия от ве́ка рабы́ Твоя́ упоко́й.

Неизглаго́ланными Твои́ми судьба́ми, / я́же уби́ша чаро́вная напое́ния, отра́вы, ко́стная удавле́ния, / со святы́ми Го́споди упоко́й.

Егда́ суди́ти бу́деши вся́ческим, / стоя́щим наги́м и открове́ным пред лице́м Твои́м: / тогда́ Ще́дре, пощади́ послужи́вшия Ти ве́рно Бо́же.

После́днею у́бо трубо́ю воструби́вшу Твоему́ Арха́нгелу, / в воскресе́ние жи́зни / всех, тогда́ Христе́, рабы́ Твоя́ упоко́й.

От ве́ка я́же прия́л еси́ ве́рныя Бо́же, / род вся́кий челове́ческий сподо́би, / во ве́ки со служа́щими Тебе́, сла́вити Тя.

Слава, Троичен: Богонача́лие Трисвято́е, единопресто́льное, / О́тче, Сы́не со Святы́м Ду́хом, / Ты еси́ Бог мой, вседержи́тельством Твои́м содержа́й все.

Богородичен: От ко́рене твоего́ возсия́ цвет жи́зни, / Иессе́е пра́отче взыгра́й / спаса́яй мир, от Чи́стыя Отрокови́цы Христо́с Бог.

Катавасия: Содержи́ма мя приими́ Человеколю́бче, грехи́ мно́гими / и припа́дающа щедро́там Твои́м, / я́ко проро́ка Го́споди, и спаси́ мя.

Кондак:

Со святы́ми упоко́й / Христе́, ду́ши раб Твои́х, / иде́же несть боле́знь, ни печа́ль, / ни воздыха́ние, / но жизнь безконе́чная.

Икос: Сам еди́н еси́ безсме́ртный, / сотвори́вый и созда́вый челове́ка: / земни́и у́бо от земли́ созда́хомся, / и в зе́млю ту́южде по́йдем, / я́коже повеле́л еси́, созда́вый мя и реки́й ми: / я́ко земля́ еси́, и в зе́млю оты́деши: / а́може вси челове́цы по́йдем, / надгро́бное рыда́ние, творя́ще песнь: / аллилу́ия.

Синаксарий первее Минеи: таже Триоди.

Песнь 7.

Ирмос: В нача́ле зе́млю основа́вый:

Благоче́стно от ве́ка преста́вльшихся па́мять творя́ще, вопие́м: / благослове́н еси́ во ве́ки, Го́споди Бо́же Оте́ц на́ших.

Внеза́пу благоче́стно уме́ршия, и от стремни́ны вся́ческия па́дшия, / дре́ва, желе́за, вся́каго ка́мене, / упоко́й Бо́же усо́пшия ве́рныя.

В стра́шное Твое́ прише́ствие Ще́дре, одесну́ю ове́ц Твои́х поста́ви, / правосла́вно Ти в жи́зни послужи́вшия Христе́, и преста́вльшияся к Тебе́.

В ли́це Христе́, избра́нных Твои́х вчини́ Твоя́ рабы́, вопи́ти Тебе́: / благослове́н еси́ во ве́ки, Го́споди Бо́же Оте́ц на́ших.

От земли́ персть соде́тельствовавый, / плоть Ду́хом оживотвори́вый, Спа́се Ще́дрый, / я́же прия́л еси́, упоко́й Бо́же, в нестаре́ющем животе́.

Слава, Троичен: Я́коже треми́ со́лнцы Божество́, / еди́ным све́та срастворе́нием да воспое́тся, / Оте́ц, и Сын, и Боже́ственный Дух, / еди́н Естество́м, но три Ипоста́сьми.

Богородичен: Дави́дское согла́сно воспева́ем Ти пе́ние, / го́ру Тя Бо́жию нарица́юще Де́во, / в не́йже всели́вся пло́тию Сло́во, / обоготвори́ нас духо́вно в Себе́.

Катавасия: В нача́ле зе́млю основа́вый, / и небеса́ Сло́вом утверди́вый, / благослове́н еси́ во ве́ки, / Го́споди Бо́же Оте́ц на́ших.

Песнь 8.

Ирмос: На горе́ святе́й просла́вльшася:

Сокруши́вый пе́рвее сень сме́ртную, / возсия́в я́ко со́лнце из гро́ба, / сы́ны Воскресе́ния Твоего́ сотвори́, Го́споди сла́вы, / вся уме́ршия в ве́ре, во ве́ки.

Безве́стных и сокрове́нных Све́детелю, / егда́ и́маши откры́ти дела́ тьмы и сове́ты серде́ц на́ших, / тогда́ не истяжи́ сло́ва со все́ми ве́рою усо́пшими.

Егда́ и́маши се́сти на престо́ле, и повели́ши на суд предста́ти, / со́бранным трубо́ю от коне́ц земли́: / тогда́ пощади́ всех Христе́, я́ко Ми́лостивый.

Уме́ршим напра́сно от слу́чаев, / от кли́ча же зе́льнаго и ско́раго тече́ния, / зауше́ния, удавле́ния же, и ляга́ния, / Го́споди сла́вы, ве́рою усо́пшим осла́би во ве́ки.

Благословим Отца и Сына, и Святаго Духа, Господа.

Я́ко Еди́ницу Существо́м пою́ Тя, / я́ко Тро́ицу Ли́цы Тя чту: / О́тче, и Сы́не, и Ду́ше Пресвяты́й, / безнача́льную держа́ву Твоего́ Ца́рствия сла́влю во ве́ки.

Богородичен: Струи́ живы́я исто́чник запечатле́нный, показа́лася еси́ Богоро́дице Де́во: / без му́жа бо Го́спода ро́ждши, / безсме́ртия ве́рныя напая́еши водо́ю во ве́ки.

Хва́лим, благослови́м:

Ирмос: На горе́ святе́й просла́вльшася, / и в купине́ огне́м Присноде́вы Моисе́ови та́йну я́вльшаго, / Го́спода по́йте и превозноси́те во вся ве́ки.

Песнь 9.

Ирмос: Проявле́нное на горе́ законополо́жнику:

Иде́же есть веселя́щихся жили́ще святы́х Твои́х Го́споди, / вся от ве́ка усо́пшия, в ве́ре же и наде́жди ра́доватися сподо́би.

Уме́ршия Бо́жиим преще́нием, / сме́ртных громо́в вся́ких с небесе́ изнесе́нных, / земли́ разсе́дшейся, мо́рю возшуме́вшуся, / вся ве́рныя Христе́, упоко́й.

Вся́кий во́зраст, ста́рцы и ю́ныя, / младе́нцы и де́ти, и ссу́щия млеко́, / му́жеское естество́ и же́нское, / упоко́й Бо́же, я́же прия́л еси́ ве́рныя.

От ядови́тых угрызе́ний уме́ршия, / от поглоще́ния змие́в, от попра́ния ко́ней, / и от удавле́ния, и обе́шения от и́скренняго, / ве́рою Ти послужи́вшия упоко́й.

Коего́ждо по и́мени в ве́ре уме́ршия, / от ве́ка и от ро́да родо́в, / неосужде́нно предста́ти Тебе́ Сло́ве, / в прише́ствии Твое́м сподо́би.

Слава, Троичен: Еди́ный в Тро́ице Бо́же, сла́ва Тебе́ непреста́нно: / а́ще бо и Бог Ки́йждо, но еди́н Естество́м есть, / Оте́ц, и Сын, и Дух, трисве́тлыми сво́йствы.

Богородичен: Па́че ума́ Рождество́ Твое́: ражда́еши бо пре́жде Су́щаго, / и млеко́м пита́еши несказа́нно, Пищеда́вца ми́ру: / держи́ши же содержа́щаго вся, Христа́ еди́наго / Изба́вителя на́шего, Всенепоро́чная.

Катавасия: Проявле́нное на горе́ законополо́жнику во огни́ и купине́ / Рождество́ Присноде́вы, / в на́ше ве́рных спасе́ние, / пе́сньми немо́лчными велича́ем.

Ексапостиларий. Подобен: Не́бо звезда́ми:

Живы́ми и ме́ртвыми облада́яй я́ко Бог, / упоко́й Твоя́ рабы́ в селе́ниих избра́нных: / а́ще бо и согреши́ша, Спа́се, но не отступи́ша от Тебе́.

Слава: Другий. Подобен: Жены́ услы́шите:

Упоко́й рабы Твоя́ во стране́ живы́х Го́споди, / отону́дуже отбеже́ боле́знь, печа́ль вку́пе и воздыха́ние: / очи́сти я́ко Человеколю́бец, я́же в житии́ согреши́ша: / еди́н бо безгре́шный еси́ и ми́лостивый, / ме́ртвых и живы́х Влады́ка.

Богородичен: Мари́е Богоневе́сто, Христа́ непреста́нно моли́ о нас рабе́х Твои́х, / с богоглаго́ливыми проро́ки, и му́ченик собо́ры, / иера́рхи же и преподо́бными, и все́ми пра́ведными, / снасле́дники бы́ти Небе́снаго Ца́рствия.

На хвалитех стихиры, на 4, глас 8. Подобен: Во Еде́ме рай:

Прииди́те пре́жде конца́ вси бра́тие, / персть на́шу ви́дяще, и естества́ на́шего немощно́е, / и ху́дость на́шу и коне́ц у́зрим, / и орга́ны сосу́да пло́тнаго, / и я́ко прах челове́к, снедь че́рвием и тле́ние, / я́ко сухи́я ко́сти на́ша вся́ко не иму́щия дыха́ния. / Во гро́бы вни́кнем, где сла́ва? / Где добро́та зра́ка? Где благоглаго́ливый язы́к? / Где бро́ви? Или́ где о́ко? / Вся прах и сень: / те́мже пощади́ Спа́се, всех нас.

Что прельща́ется челове́к хваля́ся? / Что всу́е смуща́ется? / Бре́ние и сам вма́ле? / Что не помышля́ет персть, / я́ко прах, смеше́ние, и гно́я и тле́ния отложе́ние? / А́ще у́бо бре́ние есмы́ челове́цы, / что прилепи́хомся земли́? / И а́ще Христу́ есмы́ сро́дни, / что не притека́ем к Нему́? / И вси отве́ргше привре́менную и теку́щую жизнь, / жи́зни нетле́нней после́дующе, я́же есть Христо́с, / просвеще́ние душ на́ших.

Руко́ю Твое́ю созда́вый Ада́ма, / и поста́вивый преде́л нетле́ния и ме́ртвости Спа́се, / и жи́зни во благода́ти, / тле́ния же премени́вый, к пе́рвой преложи́в жи́зни, / Сам рабы́ Твоя́ Влады́ко, я́же прия́л еси́ от нас, / с пра́ведными упоко́й, и в ли́це избра́нных: / и сих имена́ написа́в в кни́зе живо́тней, / и воскреси́в во гла́се арха́нгелове, и трубы́ шу́ме, / сподо́би я Небе́снаго Ца́рствия Твоего́.

Христо́с воскре́се, разреши́в у́зы Ада́ма первозда́ннаго, / и а́дову разруши́в кре́пость. / Дерза́йте вси ме́ртвии: умертви́ся смерть, / плене́н бысть и ад с не́ю, / и Христо́с воцари́ся, распны́йся и воскресы́й. / Той нам дарова́ нетле́ние пло́ти, / Той воздвиза́ет нас, и да́рует воскресе́ние нам, / и сла́вы о́ныя с весе́лием вся сподобля́ет, / в ве́ре непрекло́нней ве́ровавшия те́пле в Него́.

Слава, глас 2, мертвен: Я́ко цвет увяда́ет, и я́ко сень ми́мо гряде́т, / и разруша́ется вся́кий челове́к. / Па́ки же глася́щей трубе́, / ме́ртвии вси я́ко в тру́се воста́нут к Твоему́ сре́тению Христе́ Бо́же: / тогда́ Влады́ко, я́же преста́вил еси́ от нас, / во святы́х Твои́х учини́ селе́ниих ду́хи, Влады́ко, / Твои́х рабо́в при́сно.

И ныне, Богородичен: Ра́дуйся Мари́е Богоро́дице, / хра́ме неразори́мый, па́че же святы́й, / я́коже вопие́т проро́к, / святы́й храм Твой, ди́вный в пра́вду.

На стиховне подобны стихи, Феофана, Осмогласника по гласу.

Слава, глас 6, Дамаскиново: Боле́знь Ада́му бысть дре́ва вкуше́нием дре́вле во Еде́ме, / егда́ змий яд изблева́: / тем бо вни́де смерть всеро́дная, снеда́ющая челове́ка. / Но прише́д Влады́ка низложи́ зми́я, / и упокое́ние нам дарова́, / к Нему́ у́бо возопии́м: / пощади́ Спа́се, и я́же прия́л еси́, / со избра́нными Твои́ми упоко́й.

И ныне, Богородичен, глас тойже: Ты еси́ Бог наш вся в му́дрости содева́яй и соверша́яй, / проро́ки посла́л еси́ Христе́, прорещи́ Твое́ прише́ствие, / и апо́столы, пропове́дати Твоя́ вели́чия. / И о́вии у́бо прореко́ша прише́ствие Твое́, / о́вии же креще́нием просвети́ша язы́ки: / му́ченицы же пострада́вше, прия́ша я́же возжела́ху. / И мо́лит Тя лик обои́х, с Ро́ждшею Тя: / упоко́й Бо́же ду́ши, я́же прия́л еси́, / и нас сподо́би Ца́рствия Твоего́, / Крест претерпе́вый мене́ ра́ди осужде́ннаго, / Изба́вителю мой и Бо́же.

Бла́го есть испове́датися: Трисвятое, тропарь: Глубино́ю му́дрости: Сла́ва, и ны́не: Тебе́ и сте́ну: Присовокупляем же и первый час. И отпуст.

НА ЛИТУРГИИ

Изобразительная: и от канона Триоди, песнь 3, и 6.

Прокимен Апостола, глас 6:

Ду́ши их / во благи́х водворя́тся. Стих: К Тебе Го́споди, воздвиго́х ду́шу мою́.

Апостол к Коринфяном, зачало 146.

Бра́тие, вся ми леть суть, но не вся на по́льзу: вся ми леть суть, но не вся назида́ют. Никто́же своего́ си да и́щет, но е́же бли́жняго ко́йждо. Все, е́же на то́ржищи продае́мое, яди́те, ничто́же сумня́щеся, за со́весть. Госпо́дня бо земля́ и исполне́ние ея́. А́ще ли кто от неве́рных призыва́ет вы, и хо́щете ити́, все предлага́емое вам яди́те, ничто́же сумня́щеся, за со́весть. А́ще ли же кто вам рече́т: сие́ идоложе́ртвенно есть: не яди́те за о́ного пове́давшаго, и со́весть. Госпо́дня бо земля́ и исполне́ние ея́.

Другий за упокой, к Солуняном, зачало 270.

Бра́тие, не хощу́ вас неве́дети о уме́рших, да не скорбите́, я́коже и про́чии не иму́щии упова́ния. А́ще бо ве́руем, я́ко Иису́с у́мре и воскре́се, та́ко и Бог уме́ршия во Иису́се приведе́т с Ним. Сие́ бо вам глаго́лем сло́вом Госпо́дним, я́ко мы живу́щии, оста́вшии в прише́ствие Госпо́дне, не и́мамы предвари́ти уме́рших. Я́ко Сам Госпо́дь в повеле́нии, во гла́се Арха́нгелове и в трубе́ Бо́жии сни́дет с небесе́, и ме́ртвии о Христе́ воскре́снут пе́рвее. Пото́м же мы, живу́щии оста́вшии, ку́пно с ни́ми восхище́ни бу́дем на о́блацех в сре́тение Госпо́дне на возду́се, и та́ко всегда́ с Го́сподем бу́дем.

Аллилуия, глас 6: Блаже́ни, я́же избра́л, и прия́л еси́ Го́споди. Стих: И па́мять их в род и род.

Евангелие от Луки, зачало 105.

Рече́ Госпо́дь: блюди́те, да не прельще́ни бу́дете: мно́зи бо прии́дут во и́мя Мое́, глаго́люще, я́ко Аз есмь, и вре́мя прибли́жися. Не изы́дите у́бо во след их. Егда́ же услы́шите бра́ни и нестрое́ния, не убо́йтеся: подоба́ет бо сим бы́ти пре́жде, но не у а́бие кончи́на. И бу́дут зна́мения в со́лнце, и луне́ и звезда́х: и на земли́ туга́ язы́ком от неча́яния, шу́ма морска́го и возмуще́ния, издыха́ющим челове́ком от стра́ха и ча́яния гряду́щих на вселе́нную: си́лы бо небе́сныя подви́гнутся. И тогда́ у́зрят Сы́на Челове́ческа гряду́ща на о́блацех с си́лою и сла́вою мно́гою. Не́бо и земля́ ми́мо и́дет, а словеса́ Моя́ не и́мут прейти́. Внемли́те же себе́, да не когда́ отягча́ют сердца́ ва́ша объяде́нием и пия́нством и печа́льми жите́йскими, и на́йдет на вы внеза́пу день той. Я́ко сеть бо прии́де на вся живу́щия на лицы́ всея́ земли́. Бди́те у́бо на вся́ко вре́мя моля́щеся, да сподо́битеся убежа́ти всех сих хотя́щих бы́ти, и ста́ти пред Сы́ном Челове́ческим.

Другое усопшим, от Иоанна, зачало 16.

Рече́ Госпо́дь ко прише́дшим к Нему́ иуде́ем: ами́нь, ами́нь глаго́лю вам, я́ко слу́шаяй словесе́ Моего́ и ве́руяй Посла́вшему Мя, и́мать живо́т ве́чный, и на суд не прии́дет, но пре́йдет от сме́рти в живо́т. Ами́нь, ами́нь глаго́лю вам, я́ко гряде́т час, и ны́не есть, егда́ ме́ртвии услы́шат глас Сы́на Бо́жия, и услы́шавше оживу́т. Я́коже бо Оте́ц и́мать живо́т в Себе́, та́ко даст и Сы́нови живо́т име́ти в Себе́. И о́бласть даст Ему́ и суд твори́ти, я́ко Сын Челове́чь есть, не диви́теся сему́. Я́ко гряде́т час, во́ньже вси су́щии во гробе́х услы́шат глас Сы́на Бо́жия, и изы́дут сотво́ршии блага́я в воскреше́ние живота́, а сотво́ршии зла́я в воскреше́ние суда́. Не могу́ Аз о Себе́ твори́ти ничесо́же. Я́коже слы́шу, сужду́, и суд Мой пра́веден есть, я́ко не ищу́ во́ли Моея́, но во́ли посла́вшаго Мя Отца́.

Киноник: Блаже́ни, я́же избра́л, и прия́л еси́ Го́споди, и па́мять их в род и род.

Ведати же подобает, яко сие последование бывает непременно и в субботу святыя Пятьдесятницы.

НЕДЕЛЯ МЯСОПУСТНАЯ

В СУББОТУ ВЕЧЕРА

На вечерни, по предначинательном псалме обычное стихословие.

На Господи воззвах, поставим стихов 10. И поем Осмогласника стихиры воскресны 3, и анатолиевы 3: и Триоди дне подобны 4. Глас 6.

Подобен: Всю отложи́вше:

Егда́ хо́щеши приити́, суд пра́ведный сотвори́ти, / Судие́ пра́веднейший, на престо́ле сла́вы Твоея́ седя́й, / река́ о́гненная пред Твое́ суди́лище ужаса́ющая влече́т всех, / предстоя́щим Тебе́ небе́сным си́лам, / челове́ком же суди́мым стра́хом, я́коже ко́ждо соде́ла: / тогда́ нас пощади́, и ча́сти Христе́ сподо́би спаса́емых, я́ко благоутро́бен, / ве́рою мо́лим Тя.

Кни́ги разгну́тся, явле́на бу́дут дея́ния челове́ков, / пред нестерпи́мым суди́лищем: / возшуми́т же юдо́ль вся стра́шным скрежета́нием пла́ча, / вся ви́дящи согреши́вшия, / ве́чнующим му́кам, судо́м пра́ведным Твои́м отпуща́емыя, / и безде́льно пла́чущия Ще́дре. / Те́мже Тя мо́лим Бла́же: / пощади́ нас пою́щих Тя, / еди́не Многоми́лостиве.

Возглася́т трубы́, и истоща́тся гро́бы, / и воскре́снет челове́ческое все естество́ трепе́щущее, / до́брая соде́явшии, в ра́дости ра́дуются, / ча́юще мзду восприя́ти: / согреши́вшии же трепе́щут, лю́те рыда́юще, / в му́ку посыла́еми, и от избра́нных разлуча́еми. / Го́споди сла́вы, уще́дри нас я́ко Благий, / и ча́сти сподо́би возлюби́вших Тя.

Пла́чу и рыда́ю, / егда́ в чу́вство прииму́ о́гнь ве́чный, / тьму кроме́шную, и та́ртар, лю́тый червь, / скре́жет же па́ки зу́бный и непреста́нный, / боле́знь иму́щу бы́ти без ме́ры согреши́вшим, / и Тебе́ преблага́го нра́вом лука́вым прогне́вавшим, / от ни́хже еди́н и пе́рвый есмь аз окая́нный, / но Судие́, ми́лостию Твое́ю спаси́ мя, / я́ко благоутро́бен.

Слава, глас 8: Егда́ поста́вятся престо́ли и отве́рзутся кни́ги, / и Бог на суде́ ся́дет, / о кий страх тогда́ а́нгелом предстоя́щим в стра́се, / и реце́ о́гненней влеку́щей! / Что сотвори́м тогда́ во мно́гих гресе́х пови́ннии челове́цы? / Егда́ же услы́шим зову́ща Его́, благослове́нныя Отца́ в Ца́рство, / гре́шныя же отсыла́юща в му́ку. / Кто потерпи́т стра́шнаго о́наго изрече́ния? / Но еди́не Человеколю́бче Спа́се, Царю́ веко́в, / пре́жде да́же кончи́на не приспе́ет, / покая́нием обрати́в, поми́луй мя.

И ныне, Богородичен 1-й, гласа. Вход. Свете тихий: Прокимен: Госпо́дь воцари́ся: И прочее.

На литии, Слава, самогласен, глас 7:

Госпо́дни разуме́вше за́поведи, та́ко поживе́м: / а́лчущия напита́им, жа́ждущия напои́м, наги́я облече́м, / стра́нныя введе́м, боля́щия и в темни́це су́щия посети́м. / Да рече́т и к нам хотя́й суди́ти всей земли́: / прииди́те благослове́ннии Отца́ Моего́, / насле́дуйте угото́ванное вам Ца́рствие.

И ныне: Под кров Твой Влады́чице, / вси земноро́днии прибега́юще вопие́м Ти: / Богоро́дице упова́ние на́ше, / изба́ви ны от безме́рных прегреше́ний, / и спаси́ ду́ши на́ша.

На стиховне стихиры Осмогласника по алфавиту.

Слава, глас 8: Увы́ мне мра́чная душе́, / доко́ле от злых не отрева́ешися? / Доко́ле уны́нием слези́ши? / Что не помышля́еши о стра́шном часе́ сме́рти? / Что не трепе́щиши вся стра́шнаго суди́ща Спа́сова? / У́бо что отвеща́еши? / Или́ что отрече́ши? / Дела́ твоя́ предстоя́т на обличе́ние твое́, / дея́ния облича́ют клеве́щуща. / Про́чее о душе́, вре́мя наста́: / тецы́, предвари́, ве́рою возопи́й: / согреши́х Го́споди, согреши́х Ти, / но вем Человеколю́бче благоутро́бие Твое́, Па́стырю до́брый, / да не разлучи́ши мене́ одесну́ю Тебе́ предстоя́ния, / вели́кия ра́ди ми́лости Твоея́.

И ныне, Богородичен: Безневе́стная Де́во, / Я́же Бо́га неизрече́нно заче́нши пло́тию, / Ма́ти Бо́га Вы́шняго, / Твои́х рабо́в мольбы́ приими́, Всенепоро́чная, / всем подаю́щи очище́ние прегреше́ний, / ны́не на́ша моле́ния прие́млющи, / моли́ спасти́ся всем нам.

Отпустительный: Богоро́дице Де́во, ра́дуйся: трижды. И прочее последование бдения. И бывает чтение в Деяниих апостольских.

НА УТРЕНИ

Бог Госпо́дь, на глас тропаря Осмогласника. Тропарь воскресный, и Богородичен, и обычное стихословие.

Чтем же и о нищелюбии слово Богослова, на три деления, егоже начало: Му́жие бра́тие, и соубо́зии: И полиелей. Обычныя два псалма: припеваем же к сим и третий псалом со аллилуиею красною:

Псалом 136

На река́х Вавило́нских, та́мо седо́хом и пла́кахом, внегда́ помяну́ти нам Сио́на. Аллилу́иа. На ве́рбиих посреде́ его обе́сихом орга́ны на́ша. Аллилу́иа. Я́ко та́мо вопроси́ша ны пле́ншии нас о словесе́х пе́сней и ве́дшии нас о пе́нии. Аллилу́иа. Воспо́йте нам от пе́сней Сио́нских. Аллилу́иа. Ка́ко воспое́м песнь Госпо́дню на земли́ чужде́й? Аллилу́иа. Аще забу́ду тебе́, Иерусали́ме, забве́на бу́ди десни́ца моя́. Аллилу́иа. Прильпни́ язы́к мой горта́ни моему́, а́ще не помяну́ тебе́, а́ще не предложу́ Иерусали́ма, я́ко в нача́ле весе́лия моего́. Аллилу́иа. Помяни́, Го́споди, сы́ны Едо́мския, в день Иерусали́мль, глаго́лющия: истоща́йте, истоща́йте до основа́ний его́. Аллилу́иа. Дщи Вавило́ня окая́нная. Блаже́н и́же возда́ст тебе́ воздая́ние твое́, е́же воздала́ еси́ нам. Аллилу́иа. Блаже́н и́же и́мет, и разбие́т младе́нцы твоя́ о ка́мень. Аллилу́иа.

Степенны гласа. Прокимен, и Евангелие утреннее рядовое. псалом 50. Слава, глас 8: Покая́ния отве́рзи ми две́ри: И ныне, Богородичен, Подобен: На спасе́ния стези́: Таже, глас 6: Поми́луй мя Бо́же: Мно́жества соде́янных мно́ю лю́тых:

И канон воскресен, и Богородицы на 6: и Триоди на 8.

Канон, творение господина Феодора Студита, глас 6. Песнь 1.

Ирмос: Помо́щник и покрови́тель бысть мне во спасе́ние, / Сей мой Бог, и просла́влю Его́, / Бог отца́ моего́, и вознесу́ Его́: / сла́вно бо просла́вися.

День стра́шный всенеизглаго́ланнаго Твоего́ прише́ствия страшу́ся помышля́я: / убоя́вся прови́жду, во́ньже предся́деши суди́ти живы́я и ме́ртвыя, / Бо́же мой Всеси́льне.

Егда́ прии́деши Бо́же, / во тьма́х и ты́сящах а́нгельских, небе́сных нача́л, / и мене́ окая́ннаго, сре́сти Тя Христе́ на о́блацех сподо́би.

Гряди́, приими́ душе́ моя́, той час и день, / егда́ Бог я́ве надста́нет, / и рыда́й, пла́чи, обрести́ся чиста́ в час истяза́ния.

Ужаса́ет мя и страши́т о́гнь негаси́мый гее́нский, / червь го́рький, скре́жет зубо́в, / но осла́би ми, оста́ви, / и стоя́нию мя, Христе́, избра́нных Твои́х соучини́.

Возжеле́ннаго Твоего́ гла́са, / святы́я Твоя́ зову́щаго на ра́дость, / да услы́шу и аз окая́нный, / и обря́щу Ца́рствия Небе́снаго неизрече́нное наслажде́ние.

Не вни́ди со мно́ю в суд, / нося́й моя́ дея́ния, словеса́ изыску́яй, и исправля́яй стремле́ния, / но щедро́тами Твои́ми презира́я моя́ лю́тая, / спаси́ мя Всеси́льне.

Слава, Троичен: Триипоста́сная Еди́нице, / нача́льнейшая Госпоже́ всех, совершеннонача́льное пренача́лие, / Сама́ нас спаси́, О́тче и Сы́не и Ду́ше Пресвяты́й.

Богородичен: Кто роди Сы́на, несе́янна О́тчим зако́ном? / Сего́ у́бо ражда́ет Оте́ц без ма́тере. / Пресла́вное чу́до! / Ты бо родила́ еси́ Чи́стая, Бо́га вку́пе и Челове́ка.

Катавасия: Помо́щник и покрови́тель:

Песнь 3.

Ирмос: Утверди́ Го́споди, на ка́мени за́поведей Твои́х / подви́гшееся се́рдце мое́, / я́ко еди́н Свят еси́, и Госпо́дь.

Госпо́дь гряде́т, и кто стерпи́т страх Его́? / Кто яви́тся лицу́ Его́? / Но гото́ва бу́ди, о душе́, ко сре́тению.

Предвари́м, пла́чем, примири́мся Бо́гу пре́жде конца́: / стра́шно бо суди́ще, на не́мже вси обнаже́ни ста́нем.

Поми́луй Го́споди, поми́луй мя, вопию́ Ти, / егда́ прии́деши со а́нгелы Твои́ми / отда́ти всем по достоя́нию дея́ний.

Нестерпи́мый, Го́споди, гнев, ка́ко стерплю́ суда́ Твоего́, / преслу́шав Твое́ повеле́ние? / Но пощади́, пощади́ мя в час суда́.

Обрати́ся, воздохни́ душе́ окая́нная, / пре́жде да́же жития́ торжество́ конца́ не прии́мет, / пре́жде да́же две́ри черто́га не затвори́т Госпо́дь.

Согреши́х, Го́споди, я́коже ины́й никто́же от челове́к, / прегреши́в па́че челове́ка: / пре́жде суда́ ми́лостив бу́ди ми, Человеколю́бче.

Слава, Троичен: Тро́ице про́стая, несозда́нная, / безнача́льное Естество́ в Тро́ице воспева́емое Ипоста́сей, / спаси́ ны, ве́рою покланя́ющияся держа́ве Твое́й.

Богородичен: Прозябла́ еси́ Пречи́стая безсе́менным Рождество́м живо́е Сло́во, / воплоще́нное во утро́бе Твое́й, непрело́жное: / сла́ва Богома́ти, Рождеству́ Твоему́.

Катавасия: Утверди́ Го́споди:

Седален, глас 6:

Помышля́ю день стра́шный, / и пла́чуся дея́ний мои́х лука́вых: / ка́ко отвеща́ю безсме́ртному Царю́? / Ко́им же дерзнове́нием воззрю́ на Судию́ блу́дный аз? / Благоутро́бный О́тче, Сы́не Единоро́дный, Ду́ше Святы́й, поми́луй мя.

Слава: Во юдо́ли пла́ча, / в ме́сте е́же положи́л еси́, егда́ ся́деши Ми́лостиве, / сотвори́ти пра́ведный суд, / не объяви́ моя́ та́йная, / ниже́ посрами́ мене́ пред а́нгелы, / но пощади́ мя Бо́же и поми́луй мя.

И ныне, Богородичен: Упова́ние ми́ра блага́я Богоро́дице Де́во, / Твое́ и еди́ное стра́шное предста́тельство молю́: / умилосе́рдися на удобообстоя́тельныя лю́ди, / умоли́ ми́лостиваго Бо́га, / изба́витися душа́м на́шим от вся́каго преще́ния, / еди́на благослове́нная.

Песнь 4.

Ирмос: Услы́ша проро́к:

Наста́ день, уже́ при две́рех суд, душе́ бо́дрствуй, / иде́же ца́рие вку́пе и кня́зи, бога́тии и убо́зии собира́ются / и восприи́мет по достоя́нию соде́янных от челове́к ки́йждо.

В чину́ свое́м, мона́х и иера́рх, / ста́рый и ю́ный, раб и влады́ка истя́жется, / вдови́ца и де́ва испра́вится: / и всем го́ре тогда́, не име́вшим житие́ непови́нное.

Неумы́тный суд Твой, неутае́нное Твое́ суди́ще хитросло́вия, / не вити́й худо́жество кра́дущее, / не свиде́телей непщева́ние отража́ющее пра́ведное: / в Тебе́ бо Бо́зе всех сокрове́нная предстоя́т.

Да не прииду́ в зе́млю пла́ча, / да не ви́жду ме́сто тьмы Христе́ мой Сло́ве, / ниже́ свя́зан бу́ду рука́ма и нога́ма, / вне черто́га Твоего́ изве́рженный, / оде́жду нетле́ния оскверне́нную име́яй всеокая́нный.

Внегда́ отлучи́ши гре́шныя от пра́ведных, судя́й ми́ру, / еди́наго от ове́ц мя Твои́х сопричти́, / от ко́злищ разлуча́я мя Человеколю́бче, / во е́же услы́шати гла́са о́наго благослове́ннаго Твоего́.

Испыта́нию быва́ему, / и кни́гам отверза́емым соде́янных, / что сотвори́ши, о душе́ окая́нная? / Что отвеща́еши на суди́щи, / не иму́щая пра́вды плоды́ принести́ / Христу́, и Соде́телю твоему́?

Слы́ша бога́таго во пла́мени му́ки рыданосло́вия, / пла́чуся и рыда́ю окая́нный, / того́жде сый осужде́ния, и молю́ся: / поми́луй мя Спа́се ми́ра, во вре́мя суда́.

Слава, Троичен: Сы́на от Отца́, и Ду́ха сла́влю, я́ко от со́лнца свет и лучу́: / О́ваго у́бо рожде́ственне, / зане́ и рожде́ние, О́ваго же происхо́дне, зане́ и происхожде́ние, / собезнача́льную Боже́ственную Тро́ицу, / покланя́емую от вся́кия тва́ри.

Богородичен: Де́вая Младе́нца роди́вшая, / и чистоту́ соблю́дшая, Чи́стая Ты яви́лася еси́ / Бо́га ро́ждши и Челове́ка, / еди́наго Того́ во обою́ зра́ку: / чу́до Твое́ Де́во Ма́ти, / ужаса́ет вся́кий слух и по́мысл.

Катавасия: Услы́ша проро́к прише́ствие Твое́ Го́споди, и убоя́ся, / я́ко хо́щеши от Де́вы роди́тися, / и челове́ком яви́тися, и глаго́лаше: / услы́шах слух Твой, и убоя́хся, / сла́ва си́ле Твое́й Го́споди.

Песнь 5.

Ирмос: От но́щи у́тренююща:

Тре́пет неисповеди́мый, и страх та́мо: / прии́дет бо Госпо́дь, и де́ло с Ним коего́ждо от челове́к, / и кто отсю́ду про́чее себе́ не воспла́чет?

Река́ о́гненная смуща́ет мя, истаява́ет мя, / стру́жет мя скре́жет зубо́в, тьма бе́здны: / и ка́ко, или́ что соде́яв, Бо́га уми́лостивлю?

Пощади́, пощади́ Го́споди, раба́ Твоего́, / да не когда́ преда́си мене́ го́рьким мучи́телем а́ггелом лю́тым: / в ни́хже несть та́мо поко́я обрести́.

Князь и вождь та́мо вку́пе, бога́тый и безсла́вный, / вели́кий ку́пно и ма́лый испра́вится ра́вно: / го́ре кому́ждо про́чее неугото́вленному.

Осла́би, оста́ви Го́споди, и прости́ ели́ка Ти согреши́х, / и не покажи́ мя та́мо пред а́нгелы во осужде́нии огня́, / и студа́ неконча́емаго.

Пощади́, пощади́ Го́споди, созда́ние Твое́: / согреши́х, осла́би ми, / я́ко естество́м чи́стый, Сам еси́ еди́н, / и и́ный ра́зве Тебе́ никто́же есть вне скве́рны.

Слава, Троичен: Еди́ницу естество́м Тя Тро́ице воспева́ю, / безнача́льную, непости́жную, / нача́льственное, ца́рское, пресоверше́нное еди́нство, / Бо́га, и Све́та, и Живота́, и Соде́теля ми́ру.

Богородичен: В Рождестве́ Твое́м па́че естества́ Чи́стая, / зако́ни естества́ Тебе́ разори́шася я́ве, / и́бо без се́мене ражда́еши Преве́чнаго Бо́га, / от Отца́ рожде́ннаго.

Катавасия: От но́щи у́тренююща, Человеколю́бче, / просвети́, молю́ся, / и наста́ви и мене́ на повеле́ния Твоя́, / и научи́ мя Спа́се, твори́ти во́лю Твою́.

Песнь 6.

Ирмос: Возопи́х всем се́рдцем:

Во стра́шнем Христе́ прише́ствии Твое́м, егда́ яви́шися с Небесе́, / и поста́вятся престо́ли, и кни́ги разгну́тся: / пощади́, пощади́ тогда́ Спа́се, созда́ние Твое́.

Та́мо ничто́же помощи́ мо́жет, Бо́гу су́щу Судии́, / ни тща́ние, ни ко́зни, ни сла́ва, ни дру́жба: / ра́зве от дел кре́пость твоя́, о душе́ моя́!

Та́мо вку́пе князь и вождь, ни́щий и бога́тый, душе́, / ни оте́ц возмо́жет ни ма́ти помога́ющи, / ни избавля́яй брат осужде́ния.

Стра́шное душе́, истяза́ние помышля́ющи Судиино́, / ужасни́ся отсю́ду, угото́ви сло́во, / да не осу́дишися у́зами ве́чными.

Возми́ твое́, да не услы́шу Го́споди, отсыла́емь от Тебе́, / ниже́, е́же поиди́ во о́гнь прокля́тых, / но возжеле́ннаго гла́са пра́ведных.

А́дских врат изба́ви мя Го́споди, / про́пасти, и тьмы несвети́мыя от преиспо́дних, и огня́ негаси́маго, / и вся́кия ины́я му́ки ве́чныя.

Слава, Троичен: Тро́ичнаго еди́нства Божество́ пою́, / Отца́, и Сы́на, и Боже́ственнаго Ду́ха, / еди́наго нача́ла держа́ву, / соразделя́емаго треми́ начерта́ньми.

Богородичен: Дверь Ты еси́, Ю́же еди́н про́йде вше́дый и изше́дый, / и ключи́ не разреши́вый де́вства Чи́стая, / Иису́с созда́вый Ада́ма, и Сын Твой.

Катавасия: Возопи́х всем се́рдцем мои́м к ще́дрому Бо́гу, / и услы́ша мя от а́да преиспо́дняго, / и возведе́ от тли живо́т мой.

Кондак, глас 1:

Егда́ прии́деши Бо́же на зе́млю со сла́вою, / и трепе́щут вся́ческая: / река́ же о́гненная пред суди́щем влече́т, / кни́ги разгиба́ются, и та́йная явля́ются: / тогда́ изба́ви мя от огня́ неугаси́маго, / и сподо́би мя одесну́ю Тебе́ ста́ти Судие́ пра́веднейший.

Икос: Стра́шное суди́ще Твое́ помышля́я преблаги́й Го́споди, и день су́дный, / ужаса́юся, и бою́ся, от со́вести моея́ облича́емь, / егда́ и́маши се́сти на престо́ле Твое́м, и твори́ти испыта́ние: / тогда́ отрещи́ся грехо́в никто́же возмо́жет, / и́стине облича́ющей, и боя́зни содержа́щей: / вельми́ у́бо возшуми́т тогда́ о́гнь гее́нский, / гре́шницы же возскреже́щут. / Те́мже мя поми́луй пре́жде конца́, и пощади́ мя Судие́ пра́веднейший.

Синаксарь.

Песнь 7.

Ирмос: Согреши́хом, беззако́нновахом:

Припаде́м и воспла́чемся пре́жде суда́ о́наго ве́рнии, / егда́ небеса́ поги́бнут, зве́зды спаду́т, и вся земля́ поколе́блется, / да ми́лостива обря́щем в коне́ц отце́в Бо́га.

Неумы́тное истяза́ние, стра́шный есть та́мо суд, / иде́же Судия́ неутае́н есть, иде́же лица́ несть в даре́х прия́ти: / тогда́ пощади́ мя Влады́ко, и изба́ви вся́каго гне́ва Твоего́ стра́шнаго.

Госпо́дь гряде́т суди́ти, кто стерпи́т виде́ние Его́? / Вострепещи́ душе́ окая́нная, вострепещи́, / и угото́ви исхо́дищу дела́ твоя́, / да ми́лостива и милосе́рда обря́щеши Его́, / отце́в Бо́га благослове́нна.

Негаси́мый о́гнь смуща́ет мя, / горча́йший черве́й скре́жет, / ад душетле́нный страши́т мя, / благоуми́лен отню́д не быва́ю. / Но Го́споди Го́споди, пре́жде конца́ / утверди́ мя стра́хом Твои́м.

Припа́даю Ти, и приношу́ Тебе́ я́коже сле́зы глаго́лы моя́: / согреши́х, я́коже не согреши́ блудни́ца, / и беззако́нновах, я́ко и́ный никто́же на земли́. / Но уще́дри Влады́ко, творе́ние Твое́, и призови́ мя.

Обрати́ся душе́, пока́йся, откры́й сокрове́нная, / глаго́ли Бо́гу вся ве́дущему: / Ты ве́си моя́ та́йная еди́не Спа́се, / но Сам мя поми́луй, я́коже пое́т Дави́д, по ми́лости Твое́й.

Слава, Троичен: Три, еди́но Существо́м, и еди́но Ли́цами, Три пою́ Сия́: / Оте́ц, Сын, и Святы́й Дух, / еди́на си́ла, хоте́ние и де́йство. / Еди́н Бог Трисвяты́й, / Ца́рство еди́но единонача́льнейшее.

Богородичен: Прохо́дит красне́йший от черто́га чре́ва Твоего́ Бог, / я́коже Царь оде́янный боготка́нною багряни́цею, / обагре́ния та́йнаго пречи́стых крове́й Твои́х, Безневе́стная, / и ца́рствует земле́ю.

Катавасия: Согреши́хом, беззако́нновахом, / непра́вдовахом пред Тобо́ю, / ниже́ соблюдо́хом, ниже́ сотвори́хом, / я́коже запове́дал еси́ нам, / но не преда́ждь нас до конца́, отце́в Бо́же.

Песнь 8.

Ирмос: Его́же во́инства небе́сная:

Стра́шнаго втора́го Твоего́, Го́споди, прише́ствия помышля́я сре́тение, / трепе́щу преще́ния Твоего́, / бою́ся гне́ва Твоего́: / от сего́ мя часа́ зову́, спаси́ во ве́ки.

Тебе́ Бо́гу судя́щу вся́ческая, / кто стерпи́т земноро́ден, сый стра́стен? / Негаси́мый бо о́гнь тогда́, и червь скреже́щущий вельми́, / осужде́нныя прии́мет во ве́ки.

Вся́кое дыха́ние егда́ призове́ши, е́же разсуди́ти Христе́ вку́пе: / вели́кий страх тогда́, ве́лия ну́жда, / то́кмо помога́ющим дея́нием во ве́ки.

Всех Судие́ Бо́же мой и Го́споди, / да услы́шу тогда́ гла́са Твоего́ вожделе́ннаго, / да уви́жду свет Твой вели́кий, / да узрю́ вселе́ния Твоя́, / да узрю́ сла́ву Твою́, / ра́дуяся во ве́ки.

Правосу́де Спа́се поми́луй, / и изба́ви мя огня́ и преще́ния, / его́же мне на суде́ пра́ведно подъя́ти: / осла́би ми пре́жде конца́, доброде́телию и покая́нием.

Егда́ ся́деши Судие́, я́ко благоутро́бен, / и пока́жеши стра́шную сла́ву Твою́ Христе́: / о кий страх тогда́, пе́щи горя́щей, / и всем боя́щимся нестерпи́маго суди́ща Твоего́!

Благослови́м Отца́ и Сы́на, и Свята́го Ду́ха, Го́спода.

Еди́наго Бо́га по Существу́ чту, / Три Ипоста́си пою́ определи́тельне, и́ныя, но не и́наковыя: / поне́же Божество́ еди́но в трие́х Ли́цех, / и́бо Оте́ц, и Сын, и Боже́ственный Дух.

Богородичен: Из светле́йшаго чре́ва Твоего́ проше́д, / я́ко Жени́х из черто́га возсия́ Христо́с, / Свет ве́лий су́щим во тьме, / ибо пра́вды Со́лнце облиста́в, просвети́ Чи́стая мир.

Хва́лим, благослови́м, покланя́емся Го́сподеви, пою́ще, и превознося́ще во вся ве́ки.

Ирмос: Его́же во́инства небе́сная сла́вят, / и трепе́щут херуви́ми и серафи́ми, / вся́ко дыха́ние и тварь, / по́йте, благослови́те и превозноси́те во вся ве́ки.

Песнь 9.

Ирмос: Безсе́меннаго зача́тия:

Госпо́дь гряде́т гре́шныя му́чити, пра́ведныя же спасти́: / воспла́чемся, и возрыда́им, и прии́мем чу́вство о́наго дне, / во́ньже безве́стная и та́йная откры́в, / челове́ком отда́ст по достоя́нию.

Пристра́шен и тре́петен бысть Моисе́й, ви́дя Тя от за́дних: / ка́ко же постою́, лице́ Твое́ ви́дя тогда́ аз окая́нный, егда́ прии́деши с Небесе́? / Но пощади́ мя Ще́дре, ми́лостивным Твои́м призре́ннем.

Дании́л убоя́ся часа́ истяза́ния, / аз же окая́нный что постражду́ от него́, гряды́й Го́споди, стра́шнаго дне, / но даждь ми пре́жде конца́ благоуго́дно Тебе́ послужи́ти, / и улучи́ти Ца́рствие Твое́.

Огнь гото́вится, червь устроя́ется: / весе́лие, сла́ва, ослабле́ние, свет невече́рний, ра́дость пра́ведных: / и кто блаже́нный избе́гнути не восхо́щет муче́ния пе́рвых, насле́дивый втора́я?

Да мя не отврати́т от лица́ Твоего́ Го́споди я́рость Твоего́ гне́ва: / ниже́ да услы́шу гла́са кля́твеннаго, во о́гнь отсыла́ющаго, / но да вни́ду в ра́дость нетле́ннаго Твоего́ черто́га и аз тогда́ со святы́ми Твои́ми.

Ум уязви́ся, те́ло острупи́ся, боле́знует дух, / сло́во изнемо́же, житие́ умертви́ся, коне́ц при две́рех. / Те́мже окая́нная моя́ душе́, что сотвори́ши, / егда́ прии́дет Судия́ испыта́ти твоя́?

Слава, Троичен: Еди́наго Единороди́телю, / единоро́днаго Сы́на О́тче, и еди́не еди́наго Све́те, Све́та сия́ние: / и еди́ный еди́не еди́наго Бо́га, Святы́й Ду́ше, Го́спода Госпо́дь, вои́стинну сый. / О Тро́ице Еди́нице Свята́я! / Спаси́ мя богосло́вяща Тя.

Богородичен: Чу́до Рождества́ Твоего́ удивля́ет мя Всенепоро́чная, / ка́ко зачина́еши безсе́менно необыме́ннаго? / Рцы, ка́ко де́вствуеши ро́ждши я́ко Ма́ти? / Еже па́че естества́ ве́рою прие́м, Рожде́нному поклони́ся: / ели́ка хо́щет бо, и мо́жет.

Катавасия: Безсе́меннаго зача́тия / Рождество́ несказа́нное, / Ма́тере безму́жныя нетле́нен Плод: / Бо́жие бо рожде́ние обновля́ет естества́. / Те́мже Тя вси ро́ди, я́ко богоневе́стную Ма́терь, / правосла́вно велича́ем.

Ексапостиларий: Таже настоящий. Подобен: Со ученики́ взы́дем:

Стра́шный день суда́, и неизрече́нныя Твоея́ сла́вы, помышля́я / трепе́щу Го́споди вся́ко, и трясы́йся стра́хом вопию́: / на зе́млю егда́ прии́деши суди́ти Христе́ Бо́же вся́ческая со сла́вою, / от вся́каго изба́ви мя муче́ния, / одесну́ю Тебе́ Влады́ко сподо́бивый мя ста́ти.

Другий: Подобен: Жены́ услы́шите:

Се день гряде́т Го́спода Вседержи́теля, / и кто стерпи́т страх прише́ствия о́наго? / День бо я́рости есть, и пещь горя́щая, во́ньже Судия́ ся́дет, / и по достоя́нию дея́ний кому́жде отдая́й.

Богородичен: Час испыта́ния, и стра́шнаго прише́ствия Человеколю́бца Влады́ки помышля́я, / весь трепе́щу, и се́туя, вопию́ Ти: / Судие́ мой пра́веднейший, и еди́не Многоми́лостиве, / ка́ющася приими́ мя Богоро́дицы моли́твами.

На хвалитех стихиры воскресны Осмогласника 4: и анатолиев един: и Триоди 4, глас 6. Самогласны.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния: / вся́кое дыха́ние да хва́лит Го́спода.

Помышля́ю день о́ный и час, / егда́ и́мамы вси на́зи и я́ко осужде́ни, / неумы́тному Судии́ предста́ти, / тогда́ труба́ возшуми́т вельми́, / и основа́ния земли́ подви́жатся, / и ме́ртвии от гробо́в воскре́снут, / и во́зрастом еди́нем вси бу́дут, / и всех та́йная явле́нна предста́нут пред Тобо́ю / и возрыда́ют, и воспла́чутся, / и во о́гнь кроме́шный оты́дут, и́же никогда́же пока́яшася: / и в ра́дость и весе́лие, пра́ведных жре́бий / вни́дет в черто́г Небе́сный.

Стих: Испове́мся Тебе́ Го́споди, всем се́рдцем мои́м, / пове́м вся чудеса́ Твоя́.

О каковы́й час тогда́, и день стра́шный, / егда́ ся́дет Судия́ на престо́ле стра́шном! / Кни́ги разгиба́ются, и дея́ния облича́ются, / и та́йная тьмы явле́на быва́ют, / а́нгели обтека́ют, собира́юще вся язы́ки. / Прииди́те, услы́шите ца́рие и кня́зи, раби́ и свобо́дни, / гре́шницы и пра́ведницы, бога́тии и ни́щии, / я́ко гряде́т Судия́, хотя́й суди́ти всей вселе́нней. / И кто претерпи́т пред лице́м Его́, / егда́ а́нгели предста́нут облича́юще / дея́ния, помышле́ния, и мы́сли, я́же в нощи́ и во дни? / О каковы́й час тогда́! / Но пре́жде да́же не приспе́ет кончи́на, / потщи́ся зову́щи душе́: / Бо́же, обрати́в спаси́ мя, / я́ко еди́н благоутро́бен.

Глас 8. Стих: Возвеселю́ся и возра́дуюся о Тебе́, / пою́ и́мени Твоему́, Вы́шний.

Дании́л проро́к, муж жела́ний быв, / власти́тельное Бо́жие ви́дев, си́це вопия́ше: / Судия́ се́де, и кни́ги разгну́шася. / Блюди́ душе́ моя́, пости́ши ли ся? / Бли́жняго твоего́ не пре́зри. / От бра́шен воздержи́ши ли ся? / Бра́та твоего́ не осужда́й: / да не во о́гнь отсыла́ема сгори́ши я́ко воск, / но да без поткнове́ния / введе́т тя Христо́с в Ца́рствие Свое́.

Глас 1. Стих: Воскресни́ Го́споди Бо́же мой, да вознесе́тся рука́ Твоя́, / не забу́ди убо́гих Твои́х до конца́.

Предочи́стим себе́ бра́тие, цари́цею доброде́телей: / се бо прии́де, бога́тство нам благи́х подаю́щи: / страсте́й утоля́ет дме́ния, / и Влады́це примиря́ет прегреши́вшия. / Те́мже с весе́лием сию́ прии́мем, вопию́ще Христу́ Бо́гу: / воскресы́й из ме́ртвых, неосужде́ны нас сохрани́, / славосло́вящия Тя еди́наго Безгре́шнаго.

Слава: паки тойже стих.

И ныне: Преблагослове́нна еси́:

Славословие великое: и отпуст. Таже, обычная литиа в притворе, в нейже поем: Слава, и ныне, стихиру евангельскую. Присовокупляем и час 1-й, в немже чтется оглашение преподобнаго отца нашего Феодора Студита.

НА ЛИТУРГИИ

Изобразительная. И блаженна гласа, на 6: и от канона Триоди песнь 6, на 4.

Прокимен, глас 3: Ве́лий Госпо́дь наш, и ве́лия кре́пость Его́, / и ра́зума Его́ несть числа́. Стих: Хвали́те Го́спода, я́ко благ псало́м: Бо́гови на́шему да услади́тся хвале́ние.

Апостол к Коринфяном, зачало 140.

Бра́тие, бра́шно нас не поста́вит пред Бо́гом: ниже́ бо а́ще я́мы, избы́точествуем, ниже́ а́ще не я́мы, лиша́емся. Блюди́те же, да не ка́ко власть ва́ша сия́ преткнове́ние бу́дет немощны́м. А́ще бо кто ви́дит тя, иму́ща ра́зум, в тре́бищи возлежа́ща, не со́весть ли его́ немощна́ су́щи сози́ждется идоложе́ртвенная я́сти? И поги́бнет немощны́й брат в твое́м ра́зуме, его́же ра́ди Христо́с у́мре. Та́коже согреша́юще в бра́тию, и бию́ще их со́весть не́мощну су́щу, во Христа́ согреша́ете. Те́мже а́ще бра́шно соблазня́ет бра́та моего́, не и́мам я́сти мя́са во ве́ки, да не соблазню́ бра́та моего́. Несмь ли апо́стол? Несмь ли свобо́дь? Не Иису́са Христа́ ли Го́спода на́шего ви́дех? Не де́ло ли мое́ вы есте́ о Го́споде? А́ще у́бо ины́м несмь апо́стол, но у́бо вам есмь. Печа́ть бо моего́ апо́стольства вы есте́ о Го́споде.

Аллилуиа, глас 8: Прииди́те возра́дуемся Го́сподеви, воскли́кнем Бо́гу Спаси́телю на́шему. Стих: Предвари́м лице́ Его́ во испове́дании, и во псалме́х воскли́кнем Ему́.

Евангелие от Матфея, зачало 106.

Рече́ Госпо́дь: егда́ прии́дет Сын Челове́ческий в сла́ве Свое́й и вси святи́и а́нгели с Ним, тогда́ ся́дет на престо́ле сла́вы Своея́. И соберу́тся пред Ним вси язы́цы, и разлучи́т их друг от дру́га, я́коже па́стырь разлуча́ет о́вцы от ко́злищ. И поста́вит о́вцы одесну́ю Себе́, а ко́злища ошу́юю. Тогда́ рече́т Царь су́щим одесну́ю Его́: прииди́те, благослове́ннии Отца́ Моего́, насле́дуйте угото́ванное вам Ца́рствие от сложе́ния ми́ра. Взалка́хся бо, и да́сте Ми я́сти: возжада́хся, и напои́сте Мя: стра́нен бех, и введо́сте Мене́. Наг, и оде́ясте Мя: бо́лен, и посети́сте Мене́: в темни́це бех, и приидо́сте ко Мне. Тогда́ отвеща́ют Ему́ пра́ведницы, глаго́люще: Го́споди, когда́ Тя ви́дехом а́лчуща, и напита́хом; или́ жа́ждуща, и напои́хом? Когда́ же Тя ви́дехом стра́нна, и введо́хом; или́ на́га, и оде́яхом? Когда́ же Тя ви́дехом боля́ща, или́ в темни́це, и приидо́хом к Тебе́? И отвеща́в Царь рече́т им: ами́нь глаго́лю вам, поне́же сотвори́сте еди́ному сих бра́тий Мои́х ме́ньших, Мне сотвори́сте. Тогда́ рече́т и су́щим ошу́юю Его́: иди́те от Мене́, прокля́тии, во о́гнь ве́чный, угото́ванный диа́волу и а́ггелом его́. Взалка́хся бо, и не да́сте Ми я́сти: возжада́хся, и не напои́сте Мене́. Стра́нен бех, и не введо́сте Мене́; наг, и не оде́ясте Мене́; бо́лен и в темни́це, и не посети́сте Мене́. Тогда́ отвеща́ют Ему́ и ти́и, глаго́люще: Го́споди, когда́ Тя ви́дехом а́лчуща, или́ жа́ждуща, или́ стра́нна, или́ на́га, или́ бо́льна, или́ в темни́це, и не послужи́хом Тебе́? Тогда́ отвеща́ет им, глаго́ля: ами́нь глаго́лю вам, поне́же не сотвори́сте еди́ному сих ме́нших, ни Мне сотвори́сте. И и́дут си́и в му́ку ве́чную, пра́ведницы же в живо́т ве́чный.

Причастен: Хвали́те Го́спода с Небе́с, хвали́те Его́ в Вы́шних. Другий: Ра́дуйтеся пра́веднии о Го́споде, пра́вым подоба́ет похвала́.

В СУББОТУ СЫРНУЮ

Память совершаем всех преподобных и богоносных отец, в подвизе просиявших.

В ПЯТОК ВЕЧЕРА

Во светильничное по предначинательном обычное стихословие: Ко Го́споду скорбе́ти ми: На Го́споди воззва́х, поем стихиры подобныя, поставльше стихов 6. Глас 8, повторяюще я:

Прииди́те вси ве́рнии, / преподо́бных оте́ц ли́ки воспои́м, / Анто́ния верхо́внаго, све́тлаго Евфи́мия, / и кого́ждо и вся вку́пе. / И сих, я́коже други́й рай сла́дости, / гражда́нства мы́сленно преходя́ще, красно́ воззове́м: / сия́ древеса́ я́же насади́ Бог наш: / сия́ плоды́ нетле́нныя жи́зни процве́тшая, / принесо́ша Христу́, пита́юще на́ша ду́ши. / К ни́мже возопии́м: богоно́снии блаже́ннии, / моли́те спасти́ся нам.

Подобен:

Ра́дуйся Еги́пте ве́рный. / Ра́дуйся Ливи́е преподо́бная. / Ра́дуйся Фиваи́до избра́нная. / Ра́дуйся вся́кое ме́сто и гра́де и страно́, / гра́жданы воспита́вшая Ца́рства Небе́снаго, / и сих в воздержа́нии и боле́знех возрасти́вшая, / и жела́ний соверше́нныя му́жи Бо́гу показа́вшая. / Си́и свети́ла душ на́ших яви́шася: / са́ми чуде́с заре́ю, и дел зна́меньми, / просия́ша мы́сленно во вся концы́. / К тем возопие́м: отцы́ всеблаже́ннии, / моли́те спасти́ся нам.

Подобен:

Кто изрече́т от земноро́дных / чу́дная ва́ша жития́, отцы́ всеми́рнии? / Кий же язы́к изглаго́лет / свяще́нныя в Ду́се по́двиги и по́ты ва́ша? / Страда́ния доброде́телей, изможде́ния пло́ти, / боре́ния страсте́й, во бде́ниих, в моли́твах и слеза́х? / Вы в ми́ре я́коже а́нгели вои́стинну яви́стеся, / са́ми бесо́вския си́лы соверше́нно низложи́сте, / сотво́рше чу́дная и ди́вная зна́мения. / Те́мже моли́теся с на́ми преблаже́ннии, / улучи́ти нам неконча́емую ра́дость.

Слава, глас 6: Е́же по о́бразу соблю́дше невреди́мо, / ума́ вожда́ на стра́сти па́губныя по́стнически поста́вльше, / во е́же по подо́бию я́ко мо́щно возшли́ есте́: / му́жески бо естество́ пону́дивше, / потща́стеся ху́ждшее покори́ти лу́чшему, / и плоть порабо́тити ду́ху. / Те́мже мона́шествующим яви́стеся верх, / жи́тели пусты́ннии, благотеку́щим подвиза́тели, / пра́вила доброде́тели изве́стнейшая. / И ны́не на небесе́х, / зерца́лом разреши́вшимся всепреподо́бнии, / чи́сто зрите́ Святу́ю Тро́ицу, / моля́щеся непосре́дственно, о ве́рою и любо́вию чту́щих вас.

И ныне, Богородичен 1 гласа, Осмогласника рядоваго.

Све́те ти́хий:

Прокимен, глас 7: Бо́же засту́пник мой еси́ Ты, / и ми́лость Твоя́ предвари́т мя. Стих: Изми́ мя от враг мои́х Бо́же, и от востаю́щих на мя изба́ви мя.

Пророчества Захариина чтение.

Си́це глаго́лет Госпо́дь Вседержи́тель: пост четве́ртый, и пост пя́тый, и пост седмы́й, и пост деся́тый, бу́дут до́му Иу́дову в ра́дость, и в весе́лие, и в пра́здники бла́ги: и возвесели́теся, и и́стину и мир возлю́бите. Си́це глаго́лет Госпо́дь Вседержи́тель: еще́ лю́дие мно́зи прии́дут, и живу́щии во граде́х мно́гих. И сни́дутся живу́щии в пяти́ граде́х во еди́н град, глаго́люще: гряди́м помоли́тися лицу́ Госпо́дню, и взыска́ти лице́ Го́спода Вседержи́теля: иду́ и аз. И прии́дут лю́дие мно́зи, и язы́цы мно́зи взыска́ти лица́ Го́спода Вседержи́теля во Иерусали́ме, и умоли́ти лице́ Госпо́дне. Си́це глаго́лет Госпо́дь Вседержи́тель: во о́ны дни име́тся де́сять муже́й от всех племе́н язы́ческих, и иму́тся за ри́зу му́жа иуде́анина, глаго́люще: по́йдем с тобо́ю, зане́ слы́шахом, я́ко Бог с ва́ми есть.

Прокимен, глас 6: Да упова́ет Изра́иль на Го́спода / от ны́не и до ве́ка. Стих: Го́споди не вознесе́ся се́рдце мое́, ниже́ вознесо́стеся о́чи мои́.

Сподоби Господи в вечер сей:

На стиховне самогласен, глас 2:

Очи́стим себе́ бра́тие от вся́кия скве́рны пло́ти и ду́ха, / свещи́ душ на́ших просвети́м нищелю́бием, / не снеда́юще друг дру́га оклевета́нием: / приспе́ бо вре́мя, егда́ Жени́х прии́дет / всем возда́ти по дело́м их. / Совни́дем Христу́ с му́дрыми де́вами, / глас о́ный разбо́йника к Нему́ взыва́юще: / помяни́ нас Го́споди, егда́ прии́деши во Ца́рствии Твое́м.

И глаголем стих: К Тебе́ возведо́х о́чи мои́, живу́щему на небеси́. Се я́ко о́чи раб в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, / до́ндеже уще́дрит ны.

И паки тойже самогласен.

Таже стих: Поми́луй нас Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, / и уничиже́ния го́рдых.

И мученичен: Святы́м му́чеником моля́щимся о нас, / и Христа́ пою́щим, / вся́кая лесть преста́, / и челове́ческий род ве́рою спаса́ется.

Слава, глас 8: Мона́хов мно́жества, / наста́вники ны́не чтим отцы́ преподо́бнии: / ва́ми бо стезе́ю вои́стинну пра́вою ходи́ти позна́хом. / Блаже́ни есте́ Христу́ рабо́тавшии, / и вра́жию низложи́вшии си́лу, / а́нгелов собесе́дницы, пра́ведных сожи́теле, и святы́х: / с ни́миже моли́теся Го́сподеви, / поми́ловатися душа́м на́шим.

И ныне, Богородичен. Подобен: О преславнаго чудесе!

Ра́дуйся, чистоты́ сокро́вище. / Ра́дуйся, невеще́ственнаго све́та чи́стое жили́ще. / Ра́дуйся, глави́зно спасе́ния на́шего. / Ра́дуйся, апо́столов пропове́дание. / Ра́дуйся, му́чеников похвало́. / Ра́дуйся, проро́ков исполне́ние, Всенепоро́чная. / Ра́дуйся, подви́жников и мона́хов украше́ние, / и спасе́ние ве́рных.

Таже, Ны́не отпуща́еши:

И по Трисвятом глаголем тропарь, глас 4:

Бо́же оте́ц на́ших, / творя́й при́сно с на́ми по Твое́й кро́тости, / не отста́ви ми́лость Твою́ от нас, / но моли́твами их / в ми́ре упра́ви живо́т наш.

Слава, и ныне, Богородичен, глас тойже: Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́емь, / и Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.

Тыяжде и на Бог Госпо́дь, и на конец Утрени глаголем. Посем ектения: Поми́луй нас Бо́же: и 3 поклоны великия. Бу́ди имя Госпо́дне: трижды. Благословлю́ Го́спода: Досто́йно есть: и отпуст. И бывает трапеза по обычаю, якоже и в среду сырную указано есть. На Повечерии же поем рядовый канон мертвен гласа: во усопохранительнице.

В СУББОТУ СЫРНУЮ НА УТРЕНИ

По шестопсалмии, и первом стихословии, седальны, глас 8: Подобен: Повеленное тайно:

Оте́ческими мо́лниями озари́вшеся, / я́ко в рай кра́сный ны́не входя́ще, / сла́дости пото́ка наслади́мся, / и сих до́блести ужа́сно смотря́юще, / поревну́им доброде́телем, Спа́су взыва́юще: / моли́твами их Бо́же, / Ца́рствия Твоего́ прича́стники ны сотвори́.

Слава, подобен: Нача́льника мона́шествующих Па́вла, / согла́сно со Анто́нием му́дрым, и Евфи́мием / воспои́м вси, с про́чими отцы́: / и сих умо́лим, я́ко да Христу́ непреста́нно мо́лятся о нас, / боже́ственную и всесве́тлую соверша́ющих па́мять их, / в пе́снех сла́вяще Спа́са и Го́спода.

И ныне, Богородичен. Подобен: Благодари́м Тя Присноде́во, / и велича́ем Чи́стая, и покланя́емся Ти, / воспева́юще Рождество́ Твое́ благода́тная, / зову́ще непреста́нно: / спаси́ нас Де́во Всеми́лостивая, я́ко Блага́я, / и де́монскаго исхити́ словопре́ния стра́шнаго в час испыта́ния, / да не посрами́мся раби́ Твои́.

По 2-м стихословии седален, глас 4. Подобен: Свире́лей па́стырских:

Анто́ния ку́пно и Евфи́мия, / вси со все́ми про́чими богоно́сными отцы́ / восхва́лим пе́сньми, па́мять их торжеству́юще: / си́и бо Го́сподеви о всем ми́ре мо́лятся, / да изба́вимся дре́вния кля́твы, свобо́ждшеся муче́ния.

Слава: иный седален, глас 8. Подобен: Повеле́нное:

Я́коже в раи́ доброде́телей цвету́щем, / богоно́сных по́стников обходя́ще, / вони́ исполня́емся сладкоуха́ния: / страда́ньми бо наостри́вшеся искуше́ний, / те́ло воздержа́нием раболе́пно покори́ша ду́ху, / а́нгельское на земли́ житие́ пожи́вше. / Те́мже сла́вы сподо́бишася.

И ныне, Богородичен: Безпло́тных Твои́х Христе́, и Предте́чи, / ученико́в, проро́ков и му́чеников, святы́х всех и преподо́бных, / моли́твами Неискусому́жныя и Благи́я Ма́тере Твоея́ умоля́емь, / дава́й нам све́том Твои́м ходи́ти, / и сподо́би нас улучи́ти Ца́рствие Твое́, / ра́ди щедро́т ми́лости Твоея́.

Таже чтем во святом Ефреме словеса о скончавшихся отцех, на даяния три. Псалом 50. Канон святаго обители на 6, и святых на 8. Стихословим же и Го́сподеви пое́м:

Глас 8. Песнь 1.

Ирмос: Песнь возсле́м лю́дие:

Вси в пе́снех духо́вных, в по́двизех просия́вшия, / боже́ственныя отцы́ на́ша воспои́м согла́сно, / я́же изнесе́ Еги́пет, Фиваи́да, и Ливи́я, / вся́кое ме́сто, и град, и страна́.

Ра́дуйся мона́хом первонаста́вниче, Анто́ние пресла́вне, / Амму́не богоно́сне, Нитри́йская сла́во, / Арсе́ние а́нгеле, держа́во безмо́лвия, / и Аммо́не духоно́сне.

Красу́йся вои́стинну сосу́де Бо́жий, Агафо́не священноду́шне: / Ахи́лла и Аммо́н, цве́ты пусты́ннии: / Ану́ве и Ало́ние, Аммонафа́ и Анфи́ме, доброде́телей све́тлии би́сери.

Свети́льницы разсужде́ния нам, пет бу́ди Ари́с днесь, и Аполло́с Вели́кий, / послуша́ния же све́ты Афре́ и Ака́кие, / с си́ми и Авваки́р спросия́ет, я́коже не́кая денни́ца.

Гора́ жи́тельства высо́каго яви́ся Авксе́нтий, / страда́лец же чистоты́ Авра́мий Вели́кий, / с ни́миже Афроди́сий столп воздержа́ния яви́ся, со Афинодо́ром.

Сия́ет я́ко звезда́ на небеси́ в по́стницех Аммо́ний, и боже́ственный Ани́на: / све́тится же с си́ми и вели́кий Антио́х, / и Ага́пит зе́льный, а́ще кто и́ный с си́ми блиста́ет.

Пе́сньми восхва́лим свяще́нными Вели́каго Афана́сия, / в горе́ Афо́нстей све́тло пости́вшагося, / свети́льника вели́каго всея́ вселе́нныя, / его́же моли́твами вси спаса́емся.

Житии́ богодухнове́нными вои́стинну рай яви́стеся Це́ркви прему́дрии, / блаже́ннии отцы́ вси по и́мени, / о нас моли́тву Го́сподеви твори́те непреста́нно.

Прииди́те мучениколю́бцы ве́рнии / почти́м му́ченики честны́ми пе́сньми и пе́нии, / ве́рою Христу́ Бо́гу на́шему, пою́ще и вопию́ще: / воспои́м Тебе́ еди́ному Влады́це.

Слава, Троичен: Вси еди́наго Естества́ пою́, Ли́ца самоипоста́сна: / нерожде́нна Отца́, Сы́на ро́ждшагося, и Ду́ха Свята́го: / безнача́льное Ца́рство, власть, Божество́ еди́но.

Богородичен: Ра́дуйся пресвяты́й хра́ме, руно́ богоро́сное, / запечатле́нный исто́чниче безсме́ртныя струи́, / град Твой Влады́чице сохрани́ от разли́чных сопоста́т невоева́нный.

Ирмос: Песнь возсле́м лю́дие / чу́дному Бо́гу на́шему, / свободи́вшему Изра́иля от рабо́ты, / песнь побе́дную пою́ще и вопию́ще: / пои́м Тебе́ еди́ному Влады́це.

Вторыя же песни во Псалтири не глаголем, но припеваем: Преподо́бнии отцы́ моли́те Бо́га о нас.

Песнь 2.

Ирмос: Ви́дите ви́дите, / я́ко Аз есмь Бог ваш, / пре́жде век рожде́нный от Отца́, / и от Де́вы в после́дняя без му́жа заче́ншийся / и разруши́вый грех пра́отца Ада́ма, я́ко Человеколю́бец.

Благоуха́ния ны́не исполня́емся я́ко в рай други́й теку́ще, / богонасажде́нных доброде́телей по́стнических: / я́же в воздержа́ниих и слеза́х процвето́ша, разли́чно плодонося́ще / жи́тельство Бо́гу преподо́бнейшии.

Вели́кий Висарио́н, пти́чее житие́ пожи́вый я́ко а́нгел, / но́вый И́ов па́ки, тве́рдый Вениами́н, / но и Вита́ллий свети́льник, блудни́цы спаса́яй Бо́гу: / Вити́мий же боже́ственный, и сла́вный Вави́ла с си́ми да воспое́тся.

Высото́ю жи́тельства не́бо был еси́, о Венеди́кте! / Дом же прему́дрости, па́стырь Васиа́н, / но и Васи́лий не́кий вене́ц прия́т послуша́ния: / во гро́бе бо живы́й всели́вся, показу́ет нам послуша́ния све́тлость.

Песнь Гела́сию, сей приснопа́мятный царь страсте́й: / хвала́ Гера́симу, ему́же порабо́та зверь: / прии́де бо к нему за соверше́ние доброде́тели. / Сла́ва и Ге́рману отцу́, с Га́ием му́дрым уго́дником Христо́вым.

Дави́д Фессалони́тская сла́ва и похвала́ / богоприя́тный Дании́л да похва́лится. / В чудесе́х мно́гий, де́лом же и сло́вом, Дании́л ски́тский: / Дий же и Далма́т, нача́льницы мона́хов, утвержде́ние ве́ры.

Звезд зари́ покоре́ние, мно́жае лу́чших, показа́, / я́ко два свети́льника сия́юща нам, / Дометиа́на же и Доме́тия богому́драя: / с си́миже и безымени́тии сла́вно да воспою́тся.

Бога́тство неистощи́мое ве́рных, / ра́ку предприими́ Го́спода ра́ди страда́льчествовавших: / благоче́стно прииди́те ве́рнии, му́ченически сия́ воспои́м, / плодоприе́млюще исцеле́ния душа́м и телесе́м ве́рою.

Слава, Троичен: Пресоверше́ннейшая Еди́нице, Пребоже́ственная, Триипоста́сная, / нерожде́нный О́тче, и Сы́не Единоро́дный, Ду́ше от Отца́ исходя́й, Сы́ном же явля́емый, / Существо́ еди́но, и Естество́: / госпо́дьство, Ца́рство, спаси́ вся ны.

Богородичен: Еди́на ввела́ еси́ челове́честву стра́нное рожде́ние, / еди́на не подъя́ла еси́ от естества́ тле́ния, / безсе́менное нетле́нно Рождество́ поне́сши: / тем Тя я́ко Богоро́дицу по до́лгу ве́рнии Чи́стая прославля́ем.

Катавасия: Ви́дите ви́дите:

Песнь 3.

Ирмос: Несть свят я́ко Госпо́дь:

В други́й рай входя́ще доброде́телей боже́ственных оте́ц, / сего́ вку́сим приснопода́тельнаго одушевле́ннаго наслажде́ния, ве́рно восхваля́юще я.

Да почте́тся Евфи́мий пресве́тлая звезда́, / денни́ца Елла́дий, Ефре́м богодухнове́нный, со Евло́гием зе́льным, / де́лы и чудесы́ облиста́вшии концы́.

Пет бу́ди пе́сньми Зоси́ма чу́дный, / и Заха́рия всечестны́й, и Зино́н, и Зои́л, / Иса́ия Вели́кий, и Илия́ сла́вный с си́ми да почте́тся.

Ферми́скаго Фео́дора всесла́внаго пою́, и Енна́та всепе́таго: / с си́ми же и Феоду́ла, со Фео́ною воспева́ю. / Почита́ю ди́внаго и Вели́каго Феодо́сия.

Хвали́мь бу́ди Феокти́ст всеизря́дный па́стырь и высо́кий Фала́ссий, / Вели́кий Фео́дор нарече́нный Сикео́т, / зна́меньми и чудесы́ явле́йся на земли́ высо́кий.

Зве́зды сия́ют други́я, па́ки пресве́тлый Ко́лов Иоа́нн, / с треми́ светоно́сными в Ле́ствице, / с вя́щшими же ины́ми, сла́вно просия́ющий.

Почти́м пе́ньми и пе́сньми духо́вными, соше́дшеся любопра́зднственнии, / му́ченик всечестну́ю и ле́тнюю па́мять: / при́сно бо мо́лятся Христу́ о ро́де на́шем.

Слава, Троичен: Тро́ице единосу́щная, и Пребоже́ственная Еди́нице, / разделе́нием соедине́ние, и впроти́в Ли́цы Естество́ иму́щая, / во еди́но нас совокупи́ хоте́ние Твои́х за́поведей.

Богородичен: Ски́нию Тя богоде́ланную преднаписа́ Моисе́й, / серафи́мами спокрове́нную, святы́х свята́я, / прообразу́я Твое́ Де́во Рождество́ чи́стое, / Христу́ пло́тию написа́тися.

Ирмос: Несть свят я́ко Госпо́дь, / и несть пра́веден я́ко Бог наш, / Его́же пое́т вся тварь: / несть пра́веден па́че Тебе́ Го́споди.

Седален, глас 4. Подобен: Ско́ро предвари́:

Лучи́ я́коже со́лнце пра́вды вас Христо́с посла́, / просвеща́ющия зе́млю, учи́телие святи́и: / те́мже зло́бою помраче́ную ду́шу мою́, / боже́ственными ва́шими моли́твами, / осия́йте Боже́ственным све́том богоразу́мия богоблаже́ннии.

Иный седален, глас 8. Подобен: Прему́дрости:

Анто́ния кро́ткое и чи́стое, Евфи́мия вели́кое и чу́дное, / Па́вла и Арсе́ния просто́е и безмо́лвное, / Феокти́ста сла́ву, и про́чих преподо́бных всех чи́ны, / ве́рнии просла́вим и совосхва́лим пе́сньми, / с ни́миже Евпракси́ю де́ву, со все́ми воспои́м жена́ми богому́дрыми, / и согла́сно возопии́м: / моли́те Христа́ Бо́га, согреше́ний оставле́ние дарова́ти / пра́зднующим любо́вию святу́ю па́мять ва́шу.

Слава, подобен: У́зы разре́шше страсте́й, прилепи́стеся любви́ благи́х, / и в сла́ву преми́рную во Христе́ облеко́стеся, / от свои́х трудо́в обре́тше упокое́ние, / воздержа́ния труда́ми получи́вше вы́шняго живота́. / Те́мже досто́йно ра́дуетеся ку́пно с го́рними си́лами, / богоно́снии отцы́ на́ши, / прегреше́ний оставле́ние испроси́те / пра́зднующим любо́вию святу́ю па́мять ва́шу.

И ныне, Богородичен. Подобен: В тиме́нии углебо́х грехо́в, и несть постоя́ния во мне, / лю́те потопи́ мя бу́ря прегреше́ний мои́х, / но я́ко ро́ждшая Сло́во, еди́наго Человеколю́бца, / на мя раба́ Твоего́ при́зри, молю́ся, / изба́ви греха́ и страсте́й душетле́нных, / и вся́каго озлобле́ния ме́стника, Влады́чице, да пою́ ра́дуяся: / моли́ Христа́ Бо́га, прегреше́ний оставле́ние дарова́ти ми, / Тя бо име́ю наде́жду раб Твой.

Песнь 4.

Ирмос: Из горы́ приосене́нныя Сло́ве:

Свети́льник мироявле́нный боже́ственный Иларио́н, / гора́ разу́мная вели́кий Иусти́н: / с ни́миже Иера́кс да почти́тся и Ивистио́н, изрядносла́внии, со Ио́сифом.

И Иереми́й облиста́ житие́м: яви́ся же и кре́пость ве́лия Исхирио́н. / С ни́миже све́тит Карио́н, Ко́прий, Ка́стор, Кассиа́н, вку́пе предо́брии.

Дивлю́ся Калли́стовым благослове́сием, хвалю́ Лавре́нтиева добродея́ния, / благотворе́ние же Ло́ггиново восхваля́ю, почита́ю Ло́товы доброде́тели.

Лео́нтия пою́ глубину́ богосло́вия, Макси́ма же воспева́ю пучи́ну уче́ний, / Маркиа́на же удобре́ние, и Ма́рка благопокори́ваго и богопослу́шнаго.

Честь доброде́телей Мака́рий Вели́кий, гра́дский же, благоче́стия име́ние. / Пропове́дается с си́ми Марк зе́льный, с Далмато́ем же Ефио́пс Моисе́й.

Мартиниа́новы и Ма́лховы велича́ю о чистоте́ тече́ния же и по́двиги, / добродея́ния же Марке́лла пастыренача́льника, / почита́ю и Ми́лла мертвецевоскреси́теля.

Му́ченицы Христо́вы, / непреста́нныя моли́твы Соде́телю принеси́те и Созда́телю, / о ми́ре мíра, и о чту́щих па́мять ва́шу в пе́снех.

Слава, Троичен: Стра́нно, я́ко еди́но, и три, Божество́ все, / в трие́х Ли́цах неразде́льно: / Оте́ц бо, Сын, и Дух Святы́й есть, / покланя́емая в Естестве́ еди́ном.

Богородичен: Ра́дуйся простра́нное Бо́жие вмести́лище, / ра́дуйся, ковче́же но́ваго заве́та. / Ра́дуйся ста́мно, из нея́же ма́нна даде́ся всем челове́ком пренебе́сная.

Катавасия: Из горы́ приосене́нныя Сло́ве, проро́к, / еди́ныя Богоро́дицы, / хотя́ще воплоти́тися, богови́дно усмотри́, / и со стра́хом славосло́вяше си́лу Твою́.

Песнь 5.

Ирмос: Страсте́й мя мглы:

Еде́мскаго рая́, прииди́те ви́дим цве́ты присноживо́тныя, / богопрозябле́ная отце́в тща́ния, / и́хже есть еди́н де́латель Госпо́дь.

Ни́ла струя́ми слове́сными напая́ется вся́ка душа́ мы́сленная, / Навкра́тия, Ни́кона жития́ми сия́ет, / с Нафана́илом же и Нисфе́рон кра́сит сию́.

Ксенофо́нт с сыно́ма, доброде́тельми блиста́яся, просвеща́ет нас, / вели́кий же Порси́сий, па́че же Ону́фрий: / Пи́мена же кто достойносло́вит от земны́х?

Па́мво и дея́нием и сло́вом да ублажи́тся досто́йно, я́ко высо́кий: / возбраня́яй же де́моны Пу́плий всесла́вный, / да сла́вится ра́вно све́тлый Пинну́фрий.

Достодо́лжно да почти́тся пресла́вный вои́стинну Пафну́тий: / Пи́ор, Патерму́фий, Павл препро́стый, / Питиру́н вели́кий и отце́в изя́щный.

Све́тло да похва́лится свети́ло свети́л Пахо́мий: / Пала́мон сострада́лец, боже́ственный Петро́ний, / Пасарио́н с ни́ми, боже́ственными да воспое́тся пе́сньми.

Слава, Троичен: Ипоста́сьми три, а́ще и Естество́м еди́но Божество́ есть, / в Ня́же крести́хомся, и И́мже ве́руем, / Оте́ц, Сло́во, и Дух соесте́ственный.

Богородичен: Сло́вом Сло́во па́че сло́ва ро́ждшая Пречи́стая, / Того́ моля́щи не преста́й мо́лимся, / от бед при́сно изба́витися ста́ду Твоему́.

Катавасия: Страсте́й мя мглы, / я́ко от глубо́кия но́щи избавля́яй, / у́треневати сподо́би дух мой, молю́ся, / во све́те дне повеле́ний Твои́х Христе́.

Песнь 6.

Ирмос: Содержи́ма мя приими́:

Ди́внии всечестни́и отцы́ на́ши, / и́хже боже́ственная страда́ния, и́хже боре́ния, и́хже исцеле́ния. / Кто бо па́че сих показа́ чуде́с кре́пость?

Раву́ла ди́вный, и Руф вку́пе, / и Сисо́й ку́пно равноа́нгельный да восхва́лится, / с ни́миже боже́ственный Ери́д, и Силуа́н.

Не́бо четверосвети́льное яви́ся на земли́, / два́жды дво́е сие́ Симео́нское единоиме́ние, / и́же на столпе́х трие́ суть, и еди́н юро́дивый.

Посреде́ звезд я́ко со́лнце, / и́мже бе нача́льник освяще́нный Са́вва облиста́, / с ни́мже озаря́ет и Серапио́н дея́ньми с Силва́ном.

Сарма́т и Тимофе́й, Тифо́й ку́пно со Ипере́хием, / и Фарму́фий, Фо́ка, Харито́н, / Херимо́н, Псой да пое́тся, и Ор прему́дрый.

Свято́е и сла́вное оте́ц мно́жество, / помяну́тое и безымени́тое, изба́ви от бед, / любо́вию па́мяти соверша́ющих ва́ша.

Слава, Троичен: Тя Тро́ице пребезнача́льная, и Боже́ственная Еди́нице, / све́та и све́ты пою́, живота́ и животы́: / Ума́, Сло́ва, Ду́ха же Свята́го, и Свята́я, еди́наго Бо́га.

Богородичен: Из ко́рене прозябе́ твоего́ цвет жи́зни, / Иессе́е пра́деде взыгра́й, / спаса́яй мир, от Чи́стыя Отрокови́цы Христо́с Бог.

Ирмос: Содержи́ма мя приими́ Человеколю́бче, грехи́ мно́гими / и припа́дающа щедро́там Твои́м, / я́ко проро́ка Го́споди, и спаси́ мя.

Кондак, глас 8. Подобен: Яко начатки:

Я́ко благоче́стия пропове́дники, и нече́стия обузда́тели / богоно́сных собо́р уясни́л еси́, подсо́лнечную осиява́ющия. / В ми́ре соверше́нном тех моли́твами, / Тебе́ сла́вящия и велича́ющия сохрани́, пою́щия Ти, Го́споди: / Аллилу́ия.

Икос: На кра́сная жития́ воззре́х помышле́ньми зря быва́емая, / и изме́рив тех боле́зни, жизнь челове́ков ока́ях: / вас же еди́нех ублажи́х до́брую часть избра́вших, / е́же жела́ти Христа́, и пребыва́ти с Ним, / и пе́ти при́сно с проро́ком Дави́дом: Аллилу́ия.

Синаксарь. Стихи: Душа́м пра́ведным, и́хже при́сно па́мять пребыва́ет, же́ртвы покая́ния приношу́ словеса́.

Песнь 7.

Ирмос: О́троки ороси́вый:

Прииди́те, принесе́м пе́сни по до́лгу, / жена́м преподо́бно пожи́вшим и равноа́нгельно, / и́хже моли́твами воззове́м: Бо́же, спаси́ вся ны.

Христоно́сица Врие́на, с боже́ственною Февро́ниею да почти́тся, / и Фомаи́дою и Иери́ею, / и Платони́да же да пое́тся, с ни́миже и Мела́ния ве́рно.

Ангелому́дренным хвала́ Евпракси́ям, / со двема́ Феодо́рами и Анастаси́ями всебога́тыми, / пе́ние и сла́ва непреста́нная, чу́дно послужи́вшим Бо́гу.

Еги́птяныня Мари́я свет в ми́ре, / и Мари́н наре́кшаяся, звезда́ яви́ся вселе́нней, / Евфроси́на со́лнце доброде́тельми облистава́ющая.

Огнеявле́нная Феоду́ла в житии́, / и озаря́ет в поще́нии Феодо́тия и Иули́тта, / и спросия́ет дея́ньми Исидо́ра пребога́тая.

Небому́дренная Мари́на ны́не да почти́тся, с вели́кою Матро́ною, / Синклити́ка же и Са́рра, со Иусти́ною, / пе́сньми я́ко му́дрии да восхва́лятся.

Пелаги́я, а́нгел Госпо́день, / Таи́сия, свети́льник покая́ния, да воспое́тся, / и а́ще ка́я друга́я просия́ от жен в поще́нии.

Слава, Троичен: С Сы́ном Отцу́ покланя́емся, и Ду́ху Свято́му, / единому́дренно славосло́вяще, ве́рно вопие́м: / сла́ва Тебе́ Тро́ице Еди́нице, Бо́же наш.

Богородичен: Богоро́дице Де́во, ро́ждшая ми́ра Спа́са и Влады́ку благослове́нная, / Того́ моли́ всегда́ уще́дрити ду́ши на́ша.

Катавасия: О́троки ороси́вый в пещи́, / и Де́ву сохрани́вый, ро́ждшую Тя по рождестве́, / благослове́н еси́ Бо́же оте́ц на́ших.

Песнь 8.

Ирмос: На горе́ святе́й:

Па́стыри и му́дрыя учи́тели, святи́тели Христо́вы Це́ркве, / с преподо́бными вси воспои́м, / Го́спода пою́ще, и превознося́ще во вся ве́ки.

По до́лгу Васи́лий Вели́кий, / и с ним многострада́льный вои́стинну да пое́тся Афана́сий пе́сньми, / с Григо́рием в богосло́вии нача́льствующим все́ми.

Иоа́нна златоглаго́ливая уста́, / с Кири́ллами богому́дрыми столпа́ми просла́вим: / та́ко же и Иси́хия друга́го богосло́ва, / с боговеща́нным и боже́ственным Меле́тием.

Григо́рию сла́ва Ни́сскому, со двема́ чудотво́рцема отце́ма: / и прему́дрый боже́ственный Епифа́ний, со Амфило́хием све́тлым свети́льником, / да пое́тся во ве́ки.

Митрофа́на свяще́нников сла́ву, / с Некта́рием, Атти́ком, Генна́дием, / с ни́миже и Анато́лия пои́м, живо́тныя свети́льники, / ку́пно со Евсе́вием и Про́клом прему́дрыми.

Никола́я священнопропове́дника, / Софро́ния вои́стинну медоязы́чнаго со Евла́вием пою́, / и Диадо́ха, ку́пно со Евста́фием и Увена́лием отцеверхо́вными.

Благослови́м Отца́, и Сы́на, и Свята́го Ду́ха, Го́спода.

Троичен: Я́ко Еди́ницу Существо́м Тя пою́, я́ко Тро́ицу Ли́цы Тя почита́ю, / О́тче, Сы́не и Ду́ше Пресвяты́й: / безнача́льную держа́ву Твоего́ Ца́рствия сла́влю во ве́ки.

Богородичен: Ты гора́ Бо́жия яви́лася еси́ Богоро́дице, / в Ню́же Христо́с всели́вся, боже́ственны хра́мы соде́ла пою́щия: / Го́спода по́йте, и превозноси́те во вся ве́ки.

Хва́лим, благослови́м, покланя́емся Го́сподеви, пою́ще, и превознося́ще во вся ве́ки.

Катавасия: На горе́ святе́й просла́вльшася, / и в купине́ огне́м Присноде́вы Моисе́ови та́йну я́вльшаго, / Го́спода по́йте и превозноси́те во вся ве́ки.

И стихословится, Честне́йшую.

Песнь 9.

Ирмос: Проявле́нное на горе́ законополо́жнику:

Кто дерзнове́ние изрече́т Амвро́сиево? / Иерофе́еву же ка́ко прему́дрость изглаго́лет, / и Алекса́ндров богому́дрых оте́ц о ве́ре тве́рдость?

Феди́м боже́ственный, Спиридо́н богоно́сный, / со Антипа́тром, Па́мвом, Палла́дием / и Но́ном, Иерони́мом и Ге́рманом всечестны́м, / я́ко богосвети́льницы да воспою́тся.

Мно́гий в боже́ственных Диони́сий да почти́тся, я́ко небе́сных таи́нник, / многострада́льный Клим, Флавиа́н же, и Павл вели́кий, / испове́дания первопропове́дницы.

Михаи́л Сина́дский да пое́тся с Тара́сием, / Ники́фор па́ки с Фео́дором зело́, / и Феофа́н священноиме́нный вои́стинну, защи́тницы ико́н Христо́вых.

Петр и Игна́тий вои́стинну богоно́сцы, / я́ко Христо́вы апо́столи, и священнострада́льцы су́ще, / да воспою́тся ку́пно с Полика́рпом, и Киприа́ном христому́ченикома.

Преподо́бнии отцы́, и священнонача́льницы Госпо́дни, / со священному́ченики и жена́ми святы́ми, / именова́ннии и не именова́ннии вси, / моли́те спасти́ся душа́м на́шим.

Слава, Троичен: Еди́не в Тро́ице Бо́же, сла́ва Тебе́ непреста́нно: / а́ще бо и Бог Ки́йждо, но еди́н Естество́м еси́, / Оте́ц, Сын и Дух, трисве́тлыми сво́йствы.

Богородичен: Купину́ горя́щую огне́м и неопали́мую, / предзря́ше дре́вле Моисе́й на Сина́йстей горе́, / Богоприя́тное Твое́ чре́во, Де́во, подъе́млющее нетле́нный огнь.

Катавасия: Проявле́нное на горе́ законополо́жнику во огни́ и купине́ / Рождество́ Присноде́вы, / в на́ше ве́рных спасе́ние, / пе́сньми немо́лчными велича́ем.

Ексапостиларий. Подобен: Жены́ услы́шите:

Ми́ра отве́ргшиися, и крест взе́мшии, / мно́жество преподо́бных оте́ц, / с ли́ки му́ченик, иера́рх собра́ние, и жен сочине́ние, нас возвесели́те, / е́же воспе́ти досто́йно ва́шу всесве́тлую па́мять.

Слава, и ныне: Подобен: Со ученики́ взы́дем:

В по́стничестве просия́вшия богоно́сныя отцы́, и священнонача́льники, / ку́пно же от жен преподо́бныя, / и священному́ченников ли́ки, в пе́снех све́тло восхва́лим: / я́ко да освяти́мся, и моле́ньми сих, и моли́твами Богоро́дицы, / удо́бно соверши́м тече́ние поста́.

На хвалитех поставим стихи 4, и поем стихиры, глас 8. Подобен: Во Еде́ме рай:

Отце́в вси мно́жество преподо́бно по́стничествовавшее, / в пе́снех возвели́чим ве́рнии, / иера́рхов же Христо́вых восхва́лим пе́сньми, / богому́дренно единоду́шно бра́тие: / в воздержа́нии бо пожи́ша и в посте́ чи́стом, / и Христо́во нам Ева́нгелие изъясни́ша. / С ни́миже воспои́м жены́ богоно́сныя и све́тлыя, / жи́тельству их боголе́пно ревну́юще в души́: / да обря́щем та́мо согреше́ний проще́ние.

В по́стничестве просия́вшия све́тло, / преподо́бно же пожи́вшия, / похва́лим пресла́вно бра́тие, / я́ко жи́тельствовавшия до́бре / и к жи́зни ве́чной благоче́стно пресели́вшияся в ра́дости: / ко упокое́нию же неги́блемому, и блаже́нному, / та́мо доброде́телию и че́стностию пра́во поте́кшия, / се досто́йно почти́м, / я́ко да получи́м ми́лость от Бо́га их моле́нием, / и ве́чныя сла́вы и ра́дости, / и изба́вимся та́мо неумоли́мых муче́ний.

Иера́рхов всех лик, / пра́ведных собра́ние, по́стников же и преподо́бных жен, / пожи́вших благоче́стно, / умоле́ни благода́тию, / моли́те еди́наго Блага́го, и всеще́драго Го́спода, уще́дрити и нас: / да и та́мошняго осужде́ния изба́вимся вы́ну моли́твами ва́шими му́дрии, / и бу́дущаго восприя́тия наслади́мся, / непреста́нно во ве́ки веко́в веселя́щеся и мы, / похва́льную песнь непреста́нно Жизнода́вцу взыва́юще.

Боголе́пное торжество́ ве́рнии, / воспле́щим днесь в па́мяти святы́х оби́льно, / иера́рхов, и по́стников, и священному́чеников, / и преподо́бных жен, и благочести́вых: / тле́нная бо и привре́менная и́стинно презре́ша / и а́ки паучи́ну, и а́ки уме́ты сия́ вмени́ша, / да приобря́щут Христа́, и Ца́рствие Его́, и Боже́ственная о́ная, / я́же о́ко не ви́де, ниже́ у́хо когда́ слы́ша. / И́хже моли́твами Бо́же, / изба́ви тле́ния ду́ши на́ша.

Слава, самогласен, глас 6: Преподо́бнии отцы́, / во всю зе́млю изы́де веща́ние исправле́ний ва́ших. / Те́мже на небесе́х обрето́сте мзду трудо́в ва́ших: / де́монов разруши́вше по́лчища, / а́нгелов постиго́сте чи́ны: / и́хже житию́ непоро́чно поревнова́вше, / дерзнове́ние иму́ще ко Го́споду, / мир испроси́те душа́м на́шим.

И ныне, Богородичен: Богоро́дице, Ты еси́ лоза́ и́стинная:

Славословие великое. И отпуст.

НА ЛИТУРГИИ

Изобразительная. И от канона песнь 3, и 6.

Прокимен, глас 4: Восхва́лятся преподо́бнии во сла́ве, / и возра́дуются на ло́жах свои́х. Стих: Возноше́ния Бо́жия в горта́ни их, и мечи́ обоюдуо́стры в рука́х их.

Апостол дне, к Римляном, зачало 115.

Бра́тие, мир возлю́бим и я́же к созда́нию друг ко дру́гу. Не бра́шна ра́ди разоря́й де́ло Бо́жие. Вся бо чи́ста, но зло челове́ку претыка́нием яду́щему. Добро́ не я́сти мяс, ниже́ пи́ти вина́, ни о не́мже брат твой претыка́ется или́ соблазня́ется, или́ изнемога́ет. Ты ве́ру и́маши? О себе́ сам име́й пред Бо́гом. Блаже́н не осужда́яй себе́, о не́мже искуша́ется. А сомня́яйся, а́ще яст, осужда́ется, зане́ не от ве́ры: вся́ко же, е́же не от ве́ры, грех есть. Могу́щему же вас утверди́ти по благовествова́нию моему́ и пропове́данию Иису́с Христо́ву, по открове́нию та́йны, ле́ты ве́чными умолча́нныя. Я́вльшияся же ны́не, писа́нии проро́ческими, по повеле́нию ве́чнаго Бо́га, в послуша́ние ве́ры во всех язы́цех позна́вшияся, Еди́ному Прему́дрому Бо́гу, Иису́сом Христо́м, Ему́же сла́ва во ве́ки. Ами́нь.

Другий преподобных, к Галатом, зачало 213.

Бра́тие, плод духо́вный есть любы́, ра́дость, мир, долготерпе́ние, бла́гость, милосе́рдие, ве́ра, кро́тость, воздержа́ние: на таковы́х несть зако́на. А и́же Христо́вы суть, плоть распя́ша со страстьми́ и похотьми́. А́ще живе́м ду́хом, ду́хом и да хо́дим. Не быва́им тщесла́вни, друг дру́га раздража́юще, друг дру́гу зави́дяще.

Бра́тие, а́ще и впаде́т челове́к в не́кое прегреше́ние, вы духо́внии исправля́йте такова́го ду́хом кро́тости: блюды́й себе́, да не и ты искуше́н бу́деши. Друг дру́га тяготы́ носи́те, и та́ко испо́лните зако́н Христо́в.

Аллилуия, глас 2. Стих: Насажде́ни в дому́ Госпо́дни, во дворе́х Бо́га на́шего процвету́т. Стих: Весели́теся о Го́споде, и ра́дуйтеся пра́веднии, и хвали́теся, вси пра́вии се́рдцем.

Евангелие от Матфея, зачало 16.

Рече́ Госпо́дь: внемли́те ми́лостыни ва́шея не твори́ти пред челове́ки, да ви́дими бу́дете и́ми: а́ще ли же ни, мзды не и́мате от Отца́ ва́шего, и́же есть на Небесе́х. Егда́ у́бо твори́ши ми́лостыню, не воструби́ пред собо́ю, я́коже лицеме́ри творя́т в со́нмищих и в сто́гнах, я́ко да просла́вятся от челове́к. Ами́нь глаго́лю вам, восприе́млют мзду свою́. Тебе́ же творя́щу ми́лостыню, да не уве́сть шу́йца твоя́, что твори́т десни́ца твоя́. Я́ко да бу́дет ми́лостыня твоя́ вта́йне: и Оте́ц твой, ви́дяй вта́йне, Той возда́ст тебе́ я́ве. И егда́ мо́лишися, не бу́ди я́коже лицеме́ри, я́ко лю́бят в со́нмищих, и в сто́гнах пути́й стоя́ще моли́тися, я́ко да явя́тся челове́ком. Ами́нь глаго́лю вам, я́ко восприе́млют мзду свою́. Ты же, егда́ мо́лишися, вни́ди в клеть твою́, и затвори́в две́ри твоя́, помоли́ся Отцу́ твоему́, И́же вта́йне: и Оте́ц твой, ви́дяй вта́йне, возда́ст тебе́ я́ве. Моля́щеся же, не ли́шше глаго́лите, я́коже язы́чницы: мнят бо, я́ко во многоглаго́лании свое́м услы́шани бу́дут. Не подо́битеся у́бо им: весть бо Оте́ц ваш, и́хже тре́буете, пре́жде проше́ния ва́шего. Си́це у́бо моли́теся вы: О́тче наш, И́же еси́ на небесе́х, да святи́тся и́мя Твое́. Да прии́дет Ца́рствие Твое́. Да бу́дет во́ля Твоя́, я́ко на небеси́, и на земли́. Хлеб наш насу́щный даждь нам днесь. И оста́ви нам до́лги на́ша, я́ко и мы оставля́ем должнико́м на́шим. И не введи́ нас в напа́сть, но изба́ви нас от лука́ваго, я́ко Твое́ есть Ца́рствие и си́ла и сла́ва во ве́ки. Ами́нь.

И преподобных от Матфея, зачало 43.

Рече́ Госпо́дь Свои́м ученико́м: вся Мне предана́ суть Отце́м Мои́м, и никто́же зна́ет Сы́на, то́кмо Оте́ц: ни Отца́ кто зна́ет, то́кмо Сын, и ему́же а́ще во́лит Сын откры́ти. Прииди́те ко Мне вси тружда́ющиися и обремене́ннии, и Аз упоко́ю вы. Возми́те и́го Мое́ на себе́, и научи́теся от Мене́, я́ко кро́ток есмь и смире́н се́рдцем, и обря́щете поко́й душа́м ва́шим. И́го бо Мое́ бла́го, и бре́мя Мое́ легко́ есть.

Киноник: Ра́дуйтеся пра́веднии о Го́споде, пра́вым подоба́ет похвала́. Аллилу́ия, трижды.

В НЕДЕЛЮ СЫРОПУСТНУЮ

Изгнание Адамово. Бдение обычное.

В СУББОТУ ВЕЧЕРА

Во светильничное, по предначинательном псалме, стихословим: Блаже́н муж: кафизму всю. На Го́споди воззва́х, поставим стихов 10. И поем Осмогласника воскресны 3, и анатолиевы 3, и Триоди 4, глас 6.

Подобен: Всю отложи́вше:

Созда́тель мой Госпо́дь, / персть от земли́ прие́м мя, / живоно́сным дунове́нием вдуши́в оживи́, / и почте́ на земли́ нача́льствующа ви́димыми все́ми, / и а́нгелом купножи́теля. / Сатана́ же льсти́вый, / сосу́д зми́я употреби́в, сне́дию прельсти́, / и Бо́жия сла́вы разлучи́, / и преиспо́днейшей сме́рти предаде́ в зе́млю, / но я́ко Влады́ка и Благоутро́бен, / па́ки воззови́.

Оде́жды боготка́нныя совлеко́хся окая́нный, / Твое́ Боже́ственное повеле́ние преслу́шав Го́споди, сове́том врага́, / и смоко́вным ли́ствием, и ко́жными ри́зами ны́не облеко́хся: / по́том бо осужде́н бых хлеб тру́дный сне́сти: / те́рние же и волче́ц мне принести́, / земля́ проклята́ бысть. / Но в после́дняя ле́та воплоти́выйся от Де́вы, / воззва́в мя введи́ па́ки в рай.

Раю́ всечестны́й, красне́йшая добро́то, / богозда́нное селе́ние, / весе́лие неконча́емое и наслажде́ние, / сла́во пра́ведных, проро́ков красото́, / и святы́х жили́ще, / шу́мом ли́ствий твои́х Соде́теля всех моли́, / врата́ отве́рсти ми, я́же преступле́нием затвори́х, / и сподо́битися дре́ва живо́тнаго прия́ти, и ра́дости, / ея́же пре́жде в тебе́ наслади́хся.

Ада́м изгна́н бысть из рая́ преслуша́нием, / и сла́дости изве́ржен, же́нскими глаго́лы прельще́нный, / и наг седи́т, села́, увы́ мне, пря́мо рыда́я. / Те́мже потщи́мся вси вре́мя подъя́ти поста́, / послу́шающе Ева́нгельских преда́ний: / да си́ми благоуго́дни бы́вше Христу́, / рая́ жили́ще па́ки восприи́мем.

Слава, глас 6: Се́де Ада́м пря́мо рая́, / и свою́ наготу́ рыда́я пла́каше: / увы́ мне, пре́лестию лука́вою увеща́нну бы́вшу / и окра́дену и сла́вы удале́ну! / Увы́ мне, простото́ю на́гу, ны́не же недоуме́нну! / Но о раю́, ктому́ твоея́ сла́дости не наслажду́ся: / ктому́ не узрю́ Го́спода и Бо́га моего́ и Созда́теля: / в зе́млю бо пойду́, от нея́же и взят бых. / Ми́лостиве ще́дрый, вопию́ Ти: / поми́луй мя па́дшаго.

И ныне, Богородичен 1-й, гласа.

Све́те ти́хий: Вход. Прокимен: Госпо́дь воцари́ся:

На литии, яко обычно, самогласен святаго обители.

Слава, глас 6: Со́лнце лучи́ скры, / луна́ со звезда́ми в кровь преложи́ся, / го́ры ужасо́шася, хо́лми вострепета́ша, / егда́ рай заключи́ся. / Исходя́ Ада́м рука́ма бия́ в лице́, глаго́лаше: / Ми́лостиве, поми́луй мя па́дшаго.

И ныне, Богородичен. Подобен: Та́инственно воспева́ем Тя Богоро́дице Мари́е, / яви́лася бо еси́ престо́л вели́каго Царя́, / сень всесвята́я, небе́с ши́ршая, / херуви́мская колесни́ца, / вы́шшая же серафи́мов, черто́г сла́вы: / из Тебе́ бо про́йде воплоти́выйся всех Бог. / Того́ моли́ спасти́ся душа́м на́шим.

На стиховне, Осмогласника.

Слава, глас 6: Изгна́н бысть Ада́м из рая́ сне́дию, / те́мже и седя́ пря́мо сего́ рыда́ше, / стеня́ умили́тельным гла́сом, и глаго́лаше: / увы́ мне, что пострада́х окая́нный аз: / еди́ну за́поведь преступи́х Влады́чню, / и благи́х вся́ческих лиши́хся! / Раю́ святе́йший, мене́ ра́ди насажде́нный быв, / и Е́вы ра́ди затворе́нный, / моли́ тебе́ сотво́ршаго, и мене́ созда́вшаго, / я́ко да твои́х цвето́в испо́лнюся! / Те́мже и к нему́ Спас: / Моему́ созда́нию не хощу́ поги́бнути, / но хощу́ сему́ спасти́ся, / и в позна́ние и́стины приити́, / я́ко гряду́щаго ко Мне не изгоня́ю вон.

И ныне, Богородичен. Подобен: Творе́ц и Изба́витель мой Пречи́стая, / Христо́с Госпо́дь из Твои́х ложе́сн проше́д, / в мя оболки́йся, / пе́рвыя кля́твы Ада́ма свободи́. / Те́мже Ти Всечи́стая, / я́ко Бо́жии Ма́тери же и Де́ве, / вои́стинну вопие́м немо́лчно: / ра́дуйся а́нгельски, ра́дуйся Влады́чице, / предста́тельство и покро́ве, / и спасе́ние душ на́ших.

Ны́не отпуща́еши: По Трисвятом отпустительный, Богоро́дице Де́во: трижды. И прочее последование бдения: рядовому же святому поем на Повечерии.

НА УТРЕНИ

На Бог Госпо́дь, тропарь воскресен дважды, и Богородичен: обычное стихословие. И полиелей. Обычныя два псалма: припеваем же к сим и третий псалом со аллилуиею красною:

Псалом 136

На река́х Вавило́нских, та́мо седо́хом и пла́кахом, внегда́ помяну́ти нам Сио́на. Аллилу́иа. На ве́рбиих посреде́ его обе́сихом орга́ны на́ша. Аллилу́иа. Я́ко та́мо вопроси́ша ны пле́ншии нас о словесе́х пе́сней и ве́дшии нас о пе́нии. Аллилу́иа. Воспо́йте нам от пе́сней Сио́нских. Аллилу́иа. Ка́ко воспое́м песнь Госпо́дню на земли́ чужде́й? Аллилу́иа. Аще забу́ду тебе́, Иерусали́ме, забве́на бу́ди десни́ца моя́. Аллилу́иа. Прильпни́ язы́к мой горта́ни моему́, а́ще не помяну́ тебе́, а́ще не предложу́ Иерусали́ма, я́ко в нача́ле весе́лия моего́. Аллилу́иа. Помяни́, Го́споди, сы́ны Едо́мския, в день Иерусали́мль, глаго́лющия: истоща́йте, истоща́йте до основа́ний его́. Аллилу́иа. Дщи Вавило́ня окая́нная. Блаже́н и́же возда́ст тебе́ воздая́ние твое́, е́же воздала́ еси́ нам. Аллилу́иа. Блаже́н и́же и́мет, и разбие́т младе́нцы твоя́ о ка́мень. Аллилу́иа.

И Благослове́н еси́ Го́споди: Начинаем же чести первую книгу Шестодневца Златоустаго, и степенны гласа.

Вся́кое дыха́ние: и утреннее Евангелие. Воскресе́ние Христо́во: и псалом 50. Слава, глас 8: Покая́ния отве́рзи ми две́ри: И ныне, подобен, На спасе́ния стези́: Таже, глас 6: Поми́луй мя Бо́же: Таже, Мно́жества соде́янных мно́ю лю́тых:

Каноны Осмогласника: воскресен, крестовоскресен, и Богородицы, на 8, и Триоди на 6. Творение Христофора Протосигкрита. Глас 6.

Песнь 1.

Ирмос: Я́ко по су́ху:

Гряди́ душе́ моя́ стра́стная, пла́чи твоя́ дея́ния днесь, / помина́ющи пе́рвое обнаже́ние во Еде́ме, / и́мже изгна́на еси́ от сла́дости, и непреста́нныя ра́дости.

От мно́гаго благоутро́бия и щедро́т, / Созда́телю тва́ри, и Тво́рче всех, / от пе́рсти оживи́в мя пре́жде, / запове́дал еси́ пе́ти Тя со а́нгелы Твои́ми.

Ра́ди бога́тства бла́гости, Ты сади́ши Созда́телю и Го́споди, / ра́йскую сла́дость во Еде́ме, / повелева́я ми наслажда́тися кра́сных и сла́дких, / и немимотеку́щих плодо́в.

Слава: Увы́ мне душе́ моя́ окая́нная, / су́щих во Еде́ме наслажда́тися прия́ла еси́ власть от Бо́га, / не я́сти же ве́дения плода́ повеле́на была́ еси́: / вску́ю преступи́ла еси́ зако́н Бо́жий?

И ныне, Богородичен: Богороди́тельнице Де́во, я́ко Ада́мова дщи по ро́ду, / по благода́ти же Христу́ Бо́гу роди́тельница, / мене́ изгна́ннаго от Еде́ма, ны́не воззови́.

Катавасию же поем ирмосы настоящаго канона: Я́ко по су́ху пешеше́ствовав Изра́иль, / по бе́здне стопа́ми, / гони́теля фарао́на / ви́дя потопля́ема, / Бо́гу побе́дную песнь пои́м, вопия́ше.

Песнь 3.

Ирмос: Несть свят, я́коже Ты, Го́споди:

Змий льсти́вый не́когда че́сти мое́й позави́дев, / пошепта́ ле́стию Е́ве во у́ши, / от нея́же аз прельсти́вся изгна́н бых, / увы́ мне, от ли́ка жи́зни.

Ру́ку просте́р де́рзостно, вкуси́х дре́ва разу́мнаго, / его́же повеле́ мне Бог ника́коже причасти́тися, / и Боже́ственныя сла́вы отве́ржен бых го́рце.

Слава: Увы́ мне стра́стная моя́ душе́, ка́ко не позна́ла еси́ пре́лести? / Ка́ко не ощути́ла еси́ льще́ния, и за́висти вра́жия? / Но помрачи́лася еси́ умо́м, и преступи́ла еси́ за́поведь Созда́теля твоего́.

Богородичен: Упова́ние и покро́в мой Чи́стая, / обнаже́ние дре́вле покры́вшая, еди́на, па́дшаго Ада́ма, / Рождество́м Твои́м Чи́стая, в нетле́ние па́ки облецы́ мя.

Катавасия: Несть свят, / я́коже Ты, Го́споди Бо́же мой, / вознесы́й рог ве́рных Твои́х, Бла́же, / и утверди́вый нас на ка́мени / испове́дания Твоего́.

Седален, глас 4. Подобен: Удиви́ся Ио́сиф:

Изгна́н бысть Ада́м от ра́йския сла́дости, / сне́дию го́рькою в невоздержа́нии / за́поведи не сохрани́ Влады́чни, / и осуди́ся де́лати зе́млю, от нея́же взят бысть сам: / по́том же мно́гим я́сти хлеб свой. / Те́мже мы возлю́бим воздержа́ние, / да не вне рая́ возрыда́им, я́коже он, но в него́ вни́дем.

Слава, иный, глас 4. Подобен: Вознесы́йся:

Ны́не вре́мя доброде́телей яви́ся, / и при две́рех Судия́, не скорби́м, / но прииди́те постя́щеся принесе́м сле́зы, / умиле́ние и ми́лостыню, зову́ще: / согреши́хом па́че песка́ морска́го, / но осла́би всем всех Свободи́телю, / да восприи́мем нетле́нный вене́ц.

И ныне, Богородичен. Подобен: Не умолчи́м никогда́ Богоро́дице, / си́лы Твоя́ глаго́лати недосто́йнии: / а́ще бо Ты не бы предстоя́ла моля́щи, / кто бы нас изба́вил от толи́ких бед, / кто же бы сохрани́л до ны́не свобо́дны? / Не отсту́пим Влады́чице, от Тебе́: / Твоя́ бо рабы́ спаса́еши при́сно от вся́ких лю́тых.

Таже чтение Богослова в язву града, егоже начало: Что решите́ чин похваля́емый? И творим даяния два.

Песнь 4.

Ирмос: Христо́с моя́ си́ла:

Че́сти сподо́бихся аз стра́стный, / от Тебе́ Влады́ки во Еде́ме: / увы́ мне, ка́ко прельсти́вся, и диа́волом позави́девся / отве́ржен бых от лица́ Твоего́?

Мене́ рыда́йте а́нгельстии чи́нове, / рая́ добро́ты, и садо́в та́мошнее благоле́пие, / прельсти́вшагося злополу́чно, и Бо́га отве́ргшагося.

Лу́же блаже́нный, са́дове богосажде́ннии, рая́ красото́, / ны́не о мне сле́зы пролива́йте, / от листо́в, я́коже от о́чию, / обнаже́ннем и стра́ннем сла́вы Бо́жия.

Слава: Не ктому́ ви́жу тебе́, / ни наслажда́юся пресла́дкия твоея́ и боже́ственныя све́тлости, всечестны́й раю́: / наг бо поверго́хся в зе́млю, прогне́вая Сотво́ршаго.

Богородичен: Свята́я Влады́чице, отве́рзшая рая́ врата́ всем ве́рным, / я́же Ада́м заключи́ преступле́нием иногда́, / врата́ ми́лости мне отве́рзи.

Катавасия: Христо́с моя́ си́ла, / Бог и Госпо́дь, / честна́я Це́рковь / боголе́пно пое́т, взыва́ющи, / от смы́сла чи́ста, о Го́споде пра́зднующи.

Песнь 5.

Ирмос: Бо́жиим све́том:

Позави́дев дре́вле мне враг, / в раи́ благополу́чна жития́ человеконенави́стник, / в виде́нии зми́я мне запя́т, / и сла́вы присносу́щныя стра́нна мя показа́.

Рыда́ю и пла́чу душе́ю, / и очесе́м ищу́ мно́жества слез прилага́ти, / егда́ воззрю́ и позна́ю мою́ наготу́, / ю́же име́х от преступле́ния.

Слава: От земли́ со́здан бых руко́ю Бо́жиею, / па́ки же возврати́тися в зе́млю аз стра́стный слы́шах: / кто мене́ не воспла́чет, отринове́ннаго от Бо́га, / и Еде́мом ад измени́вшаго?

Богородичен: Черто́г сла́вы Тя та́йный вси возвеща́ем ве́рнии, Богороди́тельнице Всенепоро́чная. / Те́мже молю́ Тя Чи́стая: / испа́дшаго мя черто́га ра́йска, сво́йственна сотвори́.

Катавасия: Бо́жиим све́том Твои́м, Бла́же, / у́тренюющих Ти ду́ши любо́вию озари́, молю́ся, / Тя ве́дети, Сло́ве Бо́жий, / и́стиннаго Бо́га, / от мра́ка грехо́внаго взыва́юща.

Песнь 6.

Ирмос: Жите́йское мо́ре:

Оде́ждею мя обле́кл еси́ боготка́нною Спа́се, во Еде́ме, я́ко благоутро́бен: / аз же Твою́ преступи́х за́поведь, ве́ровав льсти́вому, / и наг ви́дехся окая́нный.

Душе́ всестра́стная моя́, удали́лася еси́ от Бо́га, / невнима́нием твои́м ра́йскаго лиши́лася еси́ наслажде́ния, / от а́нгел разлучи́лася еси́, во тлю ввела́ся еси́: / о паде́ния!

Слава: Поми́луй, уще́дри Вседержи́телю Бо́же, / Твое́ю руку́ творе́ние, / не пре́зри мене́, молю́ся, Бла́же, / отлучи́вшаго себе́ самаго́ от ли́ка а́нгел Твои́х.

Богородичен: Мари́е Богозва́нная, Госпоже́ вся́ческих, / я́ко ро́ждшая Го́спода Царя́ всех и Изба́вителя, / плене́на мя су́ща от ра́йския сла́вы, воззови́.

Катавасия: Жите́йское мо́ре, / воздвиза́емое зря напа́стей бу́рею, / к ти́хому приста́нищу Твоему́ прите́к, вопию́ Ти: / возведи́ от тли живо́т мой, / Многоми́лостиве.

Кондак, глас 6:

Прему́дрости наста́вниче, смы́сла пода́телю, / нему́дрых наказа́телю, и ни́щих защи́тителю, / утверди́, вразуми́ се́рдце мое́ Влады́ко. / Ты даждь ми сло́во, О́тчее Сло́во, / се бо устне́ мои́ не возбраню́, / во е́же зва́ти Тебе́: / Ми́лостиве, поми́луй мя па́дшаго.

Икос: Се́де Ада́м тогда́ и пла́кася, пря́мо сла́дости рая́, / рука́ма бия́ лице́, и глаго́лаше: / Ми́лостиве, поми́луй мя па́дшаго.

Ви́дев Ада́м а́нгела изри́нувша, и затвори́вша боже́ственнаго са́да дверь, / воздохну́в вельми́, и глаго́ла: / Ми́лостиве, поми́луй мя па́дшаго.

Споболи́ раю́ стяжа́телю обнища́вшему, / и шу́мом твои́х ли́ствий умоли́ Соде́теля, да не затвори́т тя: / Ми́лостиве, поми́луй мя па́дшаго.

Раю́ вседоброде́тельный, всесвяты́й, всебога́тый, / Ада́ма ра́ди насажде́нный, и ра́ди Е́вы заключе́нный, / умоли́ Бо́га о па́дшем: / Ми́лостиве, поми́луй мя па́дшаго.

Синаксарь.

Песнь 7.

Ирмос: Росода́тельну у́бо пещь:

Влады́чествуяй все́ми ве́ки Го́споди, / созда́вый мя во́лею Твое́ю, / зави́дена мя льсти́вым зми́ем иногда́, и Тебе́ прогне́вавшаго Спа́се, / не пре́зри Бо́же, но воззови́ мя.

Сту́дными оде́ян оде́ждами, увы́ мне, вме́сто одея́ния светоза́рнаго, / пла́чу моея́ поги́бели, Спа́се, и ве́рою вопию́ Ти Благи́й: / не пре́зри Бо́же, но воззови́ мя.

Слава: Уязви́ змий вселука́вый всю мою́ ду́шу лука́вно, / ра́йския же сла́дости изгна́на сотвори́, / но о благосе́рде Спа́се, не пре́зри я́ко Бог, но воззови́ мя.

Богородичен: Моле́бное мое́ моле́ние Всенепоро́чная приими́ ми́лостию Твое́ю, / и проще́ние прегреше́ний даждь ми Чи́стая, / рыда́ньми вопию́щему приле́жно: / не пре́зри Блага́я, но воззови́ мя.

Катавасия: Росода́тельну у́бо пещь / соде́ла А́нгел / преподо́бным отроко́м, / халде́и же опаля́ющее / веле́ние Бо́жие мучи́теля увеща́ вопи́ти: / благослове́н еси́, Бо́же оте́ц на́ших.

Песнь 8.

Ирмос: Из пла́мене преподо́бным:

Дарми́ многообра́зными дре́вле, / поче́л еси́ руку́ Твое́ю де́ло, еди́не Человеколю́бче: / змий же лю́тый свиста́нием прельсти́, увы́ мне, / настоя́щих благ обнажи́в.

Вску́ю сове́та го́рькаго послу́шала еси́, / и Боже́ственнаго повеле́ния была́ еси́ преслу́шна? / Увы мне смире́нная душе́, Бо́га оскорби́вшая: / Его́же при́сно сла́вити учине́на еси́ со а́нгелы!

Благослови́м Отца́ и Сы́на, и Свята́го Ду́ха, Го́спода.

Гадо́м и звере́м влады́чица бы́вши, / га́ду душетле́нному ка́ко собесе́довала еси́, / сове́тника прии́мши я́ко пра́ваго, льсти́ваго? / О твоего́ прельще́ния, душе́ моя́ всестра́стная!

Богородичен: Светоно́сное селе́ние Тя Бо́жия воплоще́ния, / воспева́ем Мари́е Богоблагода́тная: / те́мже мя лю́те омраче́нна страстьми́, / просвети́ све́том ми́лости, наде́жде ненаде́жных.

Хва́лим, благослови́м, покланя́емся Го́сподеви, пою́ще, и превознося́ще во вся ве́ки.

Катавасия: Из пла́мене преподо́бным ро́су источи́л еси́ / и пра́веднаго же́ртву водо́ю попали́л еси́: / вся бо твори́ши, Христе́, то́кмо е́же хоте́ти. / Тя превозно́сим во вся ве́ки.

Песнь 9.

Ирмос: Бо́га челове́ком:

Сла́док вкус плод ра́зума во Еде́ме яви́ ми ся насы́щшемуся сне́ди, / в желчь же бысть коне́ц его́. / Увы́ мне душе́ стра́стная, / ка́ко невоздержа́ние тя ра́йскаго яде́ния стра́нна сотвори́?

Бо́же всех, ми́лости Го́споди, / на мое́ смире́ние благоутро́бне при́зри, / и не дале́че посли́ мя Боже́ственнаго Еде́ма, / я́ко да зря добро́ты, отону́дуже испадо́х, / потщу́ся па́ки рыда́ньми восприя́ти я́же погуби́х.

Рыда́ю, стеню́ и пла́чу, херуви́мы с пла́менным ору́жием зря, / Еде́ма вход стрещи́ повеле́нныя, / всем престу́пником, увы́! непристу́пный, / а́ще не Ты невозбране́н Спа́се той сотвори́ши ми.

Слава: Дерза́ю мно́жеству ми́лости Твоея́ Христе́ Спа́се, / и Боже́ственных ребр Твои́х кро́ви, / е́юже освяти́л еси́ естество́ челове́ческое, / отве́рзл же еси́ врата́ Тебе́ служа́щим ра́йская Бла́же, / пре́жде заключе́ная Ада́му.

Богородичен: Жи́зни две́ре непроходи́мая, у́мная, / Де́во Богоро́дице Безневе́стная, / ра́йская врата́ заключе́ная ми пре́жде отве́рзи Твои́ми моли́твами, / я́ко да сла́влю Тя по Бо́зе мою́ помо́щницу, / и держа́вное прибе́жище.

Катавасия: Бо́га / челове́ком невозмо́жно ви́дети, / на Него́же не сме́ют чи́ни А́нгельстии взира́ти; / Тобо́ю бо, Всечи́стая, яви́ся челове́ком / Сло́во воплоще́нно, / Его́же велича́юще, / с Небе́сными во́и Тя ублажа́ем.

Ексапостиларий воскресный. Слава, настоящий. Подобен: Жены́ услы́шите:

За́поведь Твою́, Го́споди, преслу́шав окая́нный, / и обнаже́н Твоея́ сла́вы, студа́ испо́лнихся, увы́ мне! / и сла́дости изринове́н есмь ра́йския благоутро́бне. / Ми́лостиве, поми́луй лиши́вшася пра́ведно бла́гости Твоея́.

И ныне, иный. Подобен: Со ученики́ и́дем:

Изгна́на бы́вша Го́споди рая́ пе́рвее сне́дию дре́ва, / ввел еси́ па́ки Кресто́м и стра́стию Твое́ю Спа́се и Бо́же мой, / и́мже нас утверди́ пост соверши́ти чистоле́пно, / и Боже́ственному воста́нию поклони́тися, Па́сце спаси́тельней, / Тя ро́ждшия моли́твами.

На хвалитех стихиры Осмогласника воскресны 4, и анатолиев един, и Триоди сия самогласны.

Глас 5: Увы́ мне, Ада́м рыда́нием возопи́, / я́ко змий и жена́ Боже́ственнаго дерзнове́ния изри́нуша мя, / и ра́йския сла́дости, дре́ва снедь отчужди́. / Увы́ мне, не терплю́ про́чее поноше́ния: / иногда́ царь сый земны́х всех созда́ний Бо́жиих, / ны́не пле́нник яви́хся от еди́наго беззако́ннаго сове́та: / и иногда́ сла́вою безсме́ртия облече́н сый, / умерщвле́ния ко́жу я́ко сме́ртный окая́нно обношу́. / Увы́ мне, кого́ рыда́ний соде́йственника сотворю́? / Но Ты Человеколю́бче, от земли́ созда́вый мя, / во благоутро́бие оболки́йся, / рабо́ты вра́жия свободи́, и спаси́ мя.

Стих: Испове́мся Тебе́ Го́споди, всем се́рдцем мои́м, / пове́м вся чудеса́ Твоя́.

По́прище доброде́телей отве́рзеся, / хотя́щии страда́льчествовати вни́дите, / препоя́савшеся до́брым поста́ по́двигом: / зако́нно бо страда́льчествующии, пра́ведно венча́ются. / И восприи́мше всеору́жие Креста́, врагу́ сопроти́вимся, я́ко сте́ну неруши́мую иму́ще ве́ру, / и я́ко щит моли́тву, и шлем ми́лостыню, / вме́сто меча́ пост, / и́же отсека́ет от се́рдца всю зло́бу. / Творя́й сия́, и́стинный прии́мет вене́ц / от Всецаря́ Христа́ в день су́дный.

Стих: Возвеселю́ся и возра́дуюся о Тебе́, / пою́ и́мени Твоему́, Вы́шний.

Глас 6: Ада́м из рая́ отго́нится, пи́щи причасти́вся, я́ко преслу́шник: / Моисе́й Богови́дец бысть, / посто́м о́чи душе́вныя очи́стив. / Те́мже рая́ жи́телие бы́ти возжеле́вше, / измени́мся от неполе́зныя пи́щи, / и Бо́га зре́ти жела́юще, / Моисе́йскую четвери́цу десяти́ц пости́мся, / моли́твою и моле́нием чи́сто терпя́ще: / утоли́м душе́вныя стра́сти, / отжене́м плотски́я сла́сти, / ле́гцы к го́рнему ше́ствию пре́йдем, / иде́же а́нгельстии ли́цы / немо́лчными гла́сы неразде́льную воспева́ют Тро́ицу, / зре́ти недоуме́нную добро́ту и Влады́чню. / Та́мо сподо́би нас, Сы́не Бо́жий Жизнода́вче, на Тя наде́ющихся, / ликова́ти со а́нгельскими во́инствы, / ро́ждшия Тя Ма́тере Христе́ моли́твами, / и апо́стол, и му́ченик, и преподо́бных.

Стих: Воскресни́ Го́споди Бо́же мой, да вознесе́тся рука́ Твоя́, / не забу́ди убо́гих Твои́х до конца́.

Приспе́ вре́мя, духо́вных подвиго́в нача́ло, / на де́моны побе́да, всеору́жное воздержа́ние, / а́нгельское благоле́пие, к Бо́гу дерзнове́ние: / тем бо Моисе́й бысть Зижди́телю собесе́дник, / и глас неви́димо в слу́хи прия́т. / Го́споди, тем сподо́би и нас поклони́тися / Твои́м страсте́м, и свято́му Воскресе́нию, / я́ко Человеколю́бец.

Сла́ва, тойже. И ны́не: Преблагослове́нна еси́ Богоро́дице Де́во: Славословие великое. И обычная лития в паперти, в нейже поем, Сла́ва, и ны́не: стихиру евангельскую. Совокупляем же и час 1-й. И чтутся оглашения преподобнаго отца нашего Феодора Студита, и отпуст.

НА ЛИТУРГИИ

Изобразительная. Блаженны гласа на 6, и канона Триоди песнь 6-я, на 4.

Прокимен, глас 8: Помоли́теся, и воздади́те / Го́сподеви Бо́гу на́шему. Стих: Ве́дом во Иуде́и Бог, во Изра́или ве́лие и́мя Его́.

Апостол к Римляном, зачало 112.

Бра́тие, ны́не ближа́йшее нам спасе́ние, не́жели егда́ ве́ровахом. Нощь у́бо пре́йде, а день прибли́жися: отложи́м у́бо дела́ те́мная, и облече́мся во ору́жие све́та. Я́ко во дни, благообра́зно да хо́дим, не козлогласова́нии и пия́нствы, не любодея́нии и студодея́нии, не рве́нием и за́вистию. Но облецы́теся Го́сподем на́шим Иису́с Христо́м, и пло́ти уго́дия не твори́те в по́хоти.

Изнемога́ющаго же в ве́ре прие́млите, не в сомне́ние помышле́нии. Ов бо ве́рует я́сти вся, а изнемога́яй зе́лия да яст. Яды́й не яду́щаго да не укоря́ет, и не яды́й яду́щаго да не осужда́ет: Бог бо его́ прия́т. Ты кто еси́ судя́й чужде́му рабу́? Своему́ Го́сподеви стои́т, или́ па́дает. Ста́нет же, си́лен бо есть Бог поста́вити его́.

Аллилуия, глас 6: Бла́го есть испове́датися Го́сподеви, и пе́ти и́мени Твоему́ Вы́шний. Стих: Возвеща́ти зау́тру ми́лость Твою́, и и́стину Твою́ на вся́ку нощь.

Евангелие от Матфея, зачало 17.

Рече́ Госпо́дь: а́ще отпуща́ете челове́ком согреше́ния их, отпу́стит и вам Оте́ц ваш Небе́сный. А́ще ли не отпуща́ете челове́ком согреше́ния их, ни Оте́ц ваш отпу́стит вам согреше́ний ва́ших. Егда́ же постите́ся, не бу́дите я́коже лицеме́ри се́тующе: помрача́ют бо ли́ца своя́, я́ко да явя́тся челове́ком постя́щеся. Ами́нь глаго́лю вам, я́ко восприе́млют мзду свою́. Ты же постя́ся пома́жи главу́ твою́, и лице́ твое́ умы́й. Я́ко да не яви́шися челове́ком постя́ся, но Отцу́ твоему́, И́же вта́йне, и Оте́ц твой, ви́дяй вта́йне, возда́ст тебе́ я́ве. Не скрыва́йте себе́ сокро́вищ на земли́, иде́же червь и тля тлит, и иде́же та́тие подко́пывают и кра́дут. Скрыва́йте же себе́ сокро́вище на небеси́, иде́же ни червь, ни тля тлит, и иде́же та́тие не подко́пывают, ни кра́дут. Иде́же бо есть сокро́вище ва́ше, ту бу́дет и се́рдце ва́ше.

И Божественная Литургия Златоустаго:

Киноник: Хвали́те Го́спода с Небе́с, хвали́те Его́ в Вы́шних.

Подобает ведати, яко от сея Недели даже до Воздвижения Честнаго Креста, упраждняется полиелей: поется же токмо во бдениих Владычних праздников и великих святых.

В ТУЮЖДЕ НЕДЕЛЮ СЫРНУЮ ВЕЧЕРА

По начальном псалме: На Го́споди воззва́х, поставим стихов 10 от Изведи́ из темни́цы: И поем стихиры 4 покаянны, Октоиха на ряду гласа, яже суть писаны две вечер на стиховне, и две утренних стиховных: [Такожде и в прочия Недели, от сея даже до пятыя святаго поста. Го́споди воззва́х: поем на глас иже во Осмогласнике на ряду] И в Триоди 3, и в Минеи 3.

Творение господина Иосифа. Стихиры, глас 2. Подобен: Егда́ от Дре́ва:

Воздержа́нием те́ло смири́ти вси потщи́мся, / боже́ственное преходя́ще по́прище непоро́чнаго поста́ / и моли́твами и слеза́ми Го́спода спаса́ющаго нас взы́щем, / и забве́ние зло́бы всеконе́чное сотвори́м, вопию́ще: / согреши́хом Ти, спаси́, я́коже дре́вле ниневи́тяны Христе́ Царю́, / и о́бщники ны сотвори́ Небе́снаго Ца́рствия Благоутро́бне.

Себе́ отчаява́ю, помышля́я де́ла моя́ Го́споди, / вся́каго муче́ния досто́йная: / се бо презре́в честны́я Твоя́ Спа́се за́поведи, / блу́дно мое́ житие́ ижди́х. / Те́мже молю́ся, ту́чами покая́ния мя очи́стив, / посто́м и моле́нием я́ко еди́н ми́лостивый просвети́, / и не гнуша́йся мене́ Благоде́телю всех, и Преблаги́й.

Ин господина Феодора, глас тойже. Подобен: Па́че ума́ даро́в:

По́стное вре́мя све́тло начне́м, / к подвиго́м духо́вным себе́ подложи́вше, / очи́стим ду́шу, очи́стим плоть, / пости́мся я́коже в сне́дех от вся́кия стра́сти, / доброде́тельми наслажда́ющеся ду́ха: / в ни́хже соверша́ющеся любо́вию, / да сподо́бимся вси ви́дети / всечестну́ю страсть Христа́ Бо́га / и святу́ю Па́сху, духо́вно ра́дующеся.

Таже в Минеи святому, подобны 3. Аще ли имать самогласен: Сла́ва, аще ли несть, Сла́ва, и ны́не, Богородичен, в тойже глас Минеи. Вход с кадильницею: Све́те ти́хий:

Прокимен глас 8: Не отврати́ лица́ Твоего́ от о́трока Твоего́, я́ко скорблю́, ско́ро услы́ши мя: / вонми́ души́ мое́й, и изба́ви ю. Стих: Спасе́ние Твое́ Бо́же да прии́мет мя. Стих: Да у́зрят ни́щии, и возвеселя́тся. Стих: Взыщи́те Бо́га, и жива́ бу́дет душа́ ва́ша. И паки высочайшим гласом: Не отврати́ лица́ Твоего́:

Подобает ведати, яко во всех Неделях святыя Четыредесятницы во светильничное бывает вход, ради великих прокименов.

Сподо́би Го́споди: Поклоны 3: и ектения.

На стиховне самогласен глас 4:

Возсия́ благода́ть Твоя́ Го́споди, / возсия́ просвеще́ние душ на́ших. / Се вре́мя благоприя́тное, се вре́мя покая́ния, / отложи́м дела́ тьмы, и облече́мся во ору́жия све́та: / я́ко да преплы́вше поста́ вели́кую пучи́ну, / в тридне́вное Воскресе́ние дости́гнем, / Го́спода и Спа́са на́шего Иису́са Христа́, / спаса́ющаго ду́ши на́ша.

Стих: К Тебе́ возведо́х о́чи мои́, живу́щему на небеси́. Се я́ко о́чи раб в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, / до́ндеже уще́дрит ны.

И повторяем тойже.

Таже стих: Поми́луй нас Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, / и уничиже́ния го́рдых.

И мученичен: Прославля́емый в па́мятех святы́х Твои́х Христе́ Бо́же, / от них умоля́емь, / низпосли́ нам ве́лию ми́лость.

Сла́ва, самогласен в Минеи, аще имать: И ны́не, Богородичен по гласу Минеи. Аще ли не имать, Сла́ва, и ны́не, Богородичен, глас тойже.

Подобен: Я́ко до́бля:

А́нгельстии чи́ни Тя Богома́ти прославля́ют: / Бо́га бо Всечи́стая родила́ еси́, / Отцу́, и Ду́ха соприсносу́щна, / и а́нгельская во́инства от не су́щаго хоте́нием поста́вивша. / Его́же моли́ от тли спасти́ и просвети́ти ду́ши правосла́вных, / Тя воспева́ющих Всечи́стая.

Ны́не отпуща́еши: Трисвятое: поклоны три. Пресвята́я Тро́ице: О́тче наш: И настоящия тропари, глас 4: Богоро́дице Де́во ра́дуйся: И творим поклон един. Сла́ва: Крести́телю Христо́в: поклон един. И ны́не: Моли́те о нас святи́и апо́столи: поклон един. Таже, Под Твое́ благоутро́бие: без поклона. Го́споди поми́луй, 40 кротким и тихим гласом. Сла́ва, и ны́не: Честне́йшую херуви́м: И́менем Госпо́дним благослови́ о́тче. Священник: Сый благослове́н Христо́с Бог наш всегда́, ны́не и при́сно и во ве́ки веко́в. Мы же: Аминь. И молитву: Небе́сный Царю́:

И творим три поклоны великия, и глаголем молитву преподобнаго Ефрема Сирина: Го́споди и Влады́ко живота́ моего́, дух пра́здности уны́ния, любонача́лия, и праздносло́вия не даждь ми.

Дух же целому́дрия, смиреному́дрия, терпе́ния, и любве́, да́руй ми рабу́ Твоему́.

Ей Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь.

И целуем святыя и честныя иконы. И глаголет предстоятель: Сла́ва Тебе́ Христе́ Бо́же, упова́ние на́ше, сла́ва Тебе́. И бывает молитва от священника, и совершенный отпуст.

По Вечерни же в трапезе бывает утешение братии.

По востании же от трапезы, Повечерие поем малое по обычаю, с метании и поклоны постными. На Сла́ва в вы́шних, метания 3. [Аще было бдение, канон Богородице не глаголется.] Досто́йно есть: Трисвятое. Метания 3, и обычныя тропари. Го́споди поми́луй, 40. И́же на вся́кое вре́мя: иерей: Бо́же уще́дри ны: Поклоны 3 великия, с молитвою святаго Ефрема: Го́споди и Влады́ко: И прочих 12. Таже, Трисвятое. По О́тче наш: Го́споди поми́луй, 12 и молитва, Нескве́рная: И даждь нам: И отпуст.

И имже образом указася служба Вечерни и Повечерия сея Недели, сице да бывает и в прочия, даже до пятыя Недели святыя Четыредесятницы, изменяемым некоим, о нихже на своих им местех будет.

Подобает ведати, яко аще будет брату нашему отыти ко Господу во святых сих днех посреде седмицы: не бывают третины его, даже до пятка вечера, тогда бо совершается паннихида его: подобне и в субботу Литургиа его. Во грядущую же субботу бывают девятины его, аще случится, аще ли ни. Четыредесятины же его бывают, егда число дней его исполнится: приношения же, и памяти его начинаются от Новыя недели, даже до исполнения дней четыредесяти.

КАНОН, ТВОРЕНИЕ СВЯТАГО ОТЦА НАШЕГО АНДРЕЯ КРИТСКАГО, ИЕРУСАЛИМСКАГО.

В ПОНЕДЕЛЬНИК ПЕРВЫЯ СЕДМИЦЫ СВЯТЫХ ПОСТОВ, НА ПОВЕЧЕРИИ.

Начинаем великий канон, творяще и на части четыре со ирмосом, яко исполнитися ему в четверток вечера.

Творение святаго отца нашего Андрея Критскаго, Иерусалимскаго.

Творим же на кийждо тропарь метания 3.

Глас 6. Песнь 1. Ирмос по дважды.

Ирмос: Помо́щник и покрови́тель / бысть мне во спасе́ние, / Сей мой Бог, и просла́влю Его́, / Бог отца́ моего́, и вознесу́ Его́: / сла́вно бо просла́вися.

Стих: Поми́луй мя, Бо́же, поми́луй мя.

Отку́ду начну́ пла́кати / окая́ннаго моего́ жития́ дея́ний? / Ко́е ли положу́ нача́ло, Христе́, ны́нешнему рыда́нию? / Но я́ко благоутро́бен, / даждь ми прегреше́ний оставле́ние.

Гряди́ окая́нная душе́, с пло́тию твое́ю, / Зижди́телю всех испове́ждься, / и оста́нися про́чее пре́ждняго безслове́сия, / и принеси́ Бо́гу в покая́нии сле́зы.

Первозда́ннаго Ада́ма преступле́нию поревнова́в, / позна́х себе́ обнаже́на от Бо́га / и присносу́щнаго Ца́рствия и сла́дости, / грех ра́ди мои́х.

Увы мне окая́нная душе́, / что уподо́билася еси́ пе́рвей Е́ве? / Ви́дела бо еси́ зле, и уязви́лася еси́ го́рце, / и косну́лася еси́ дре́ва и вкуси́ла еси́ де́рзостно / безслове́сныя сне́ди.

Вме́сто Е́вы чу́вственныя / мы́сленная ми бысть Е́ва, / во пло́ти стра́стный по́мысл, / показу́яй сла́дкая / и вкуша́яй при́сно / го́рькаго напое́ния.

Досто́йно из Еде́ма изгна́н бысть, / я́ко не сохрани́в еди́ну Твою́, Спа́се, за́поведь Ада́м: / аз же что постражду́, / отмета́я всегда́ живо́тная Твоя́ словеса́?

Слава, Троичен: Пресу́щная Тро́ице, во Еди́нице покланя́емая, / возми́ бре́мя от мене́ тя́жкое грехо́вное, / и я́ко благоутро́бна, / даждь ми сле́зы умиле́ния.

Богородичен: Богоро́дице, наде́жде и предста́тельство Тебе́ пою́щих, / возми́ бре́мя от мене́ тя́жкое грехо́вное, / и я́ко Влады́чица Чи́стая, / ка́ющася приими́ мя.

Песнь 2.

Ирмос: Вонми́, не́бо, и возглаго́лю, / и воспою́ Христа́, / от Де́вы пло́тию прише́дшаго. (Дважды)

Вонми́ не́бо, и возглаго́лю, / земле́, внуша́й глас, / ка́ющийся к Бо́гу и воспева́ющий Его́.

Вонми́ ми, Бо́же, Спа́се мой / ми́лостивным Твои́м о́ком, / и приими́ мое́ те́плое испове́дание.

Согреши́х па́че всех челове́к, / еди́н согреши́х Тебе́: / но уще́дри я́ко Бог, Спа́се, / творе́ние Твое́.

Вообрази́в мои́х страсте́й безобра́зие, / любосла́стными стремле́ньми / погуби́х ума́ красоту́.

Бу́ря мя злых обдержи́т, / благоутро́бне Го́споди: / но я́ко Петру́, / и мне ру́ку простри́.

Оскверни́х пло́ти моея́ ри́зу / и окаля́х / е́же по о́бразу, Спа́се, / и по подо́бию.

Омрачи́х душе́вную красоту́ / страсте́й сластьми́, / и вся́чески весь ум / персть сотвори́х.

Раздра́х ны́не оде́жду мою́ пе́рвую, / и́же ми изтка́ Зижди́тель из нача́ла, / и отту́ду лежу́ наг.

Облеко́хся в раздра́нную ри́зу, / ю́же изтка́ ми змий сове́том, / и стыжду́ся.

Сле́зы блудни́цы, Ще́дре, / и аз предлага́ю: / очи́сти мя, Спа́се, / благоутро́бием Твои́м.

Воззре́х на садо́вную красоту́ / и прельсти́хся умо́м: / и отту́ду лежу́ наг, и срамля́юся.

Де́лаша на хребте́ мое́м / вси нача́льницы страсте́й, / продолжа́юще на мя / беззако́ние их.

Слава, Троичен: Еди́наго Тя в трие́х Ли́цех, / Бо́га всех пою́, / Отца́ и Сы́на и Ду́ха Свята́го.

Богородичен: Пречи́стая Богоро́дице Де́во, / еди́на Всепе́тая, / моли́ приле́жно во е́же спасти́ся нам.

Песнь 3.

Ирмос: На недви́жимом, Христе́, ка́мени за́поведий Твои́х, / утверди́ мое́ помышле́ние. (Дважды)

Огнь от Го́спода иногда́ / Госпо́дь одожди́в, / зе́млю Содо́мскую / пре́жде попали́.

На горе́ спаса́йся, душе́, / я́коже Лот о́ный, / и в Сиго́р угонза́й.

Бе́гай запале́ния, о душе́, / бе́гай Содо́мскаго горе́ния, / бе́гай тле́ния Боже́ственнаго пла́мене.

Согреши́х Тебе́ еди́н аз, / согреши́х па́че всех, Христе́ Спа́се, / да не пре́зриши мене́.

Ты еси́ Па́стырь до́брый, / взыщи́ мене́ а́гнца, / и заблу́ждшаго да не пре́зриши мене́.

Ты еси́ сла́дкий, Иису́се, / Ты еси́ Созда́телю мой: / в Тебе́, Спа́се, оправда́юся.

Испове́даюся Тебе́, Спа́се: / согреши́х, согреши́х Ти: / но осла́би, оста́ви ми, / я́ко благоутро́бен.

Слава, Троичен: О Тро́ице Еди́нице Бо́же! / Спаси́ нас от пре́лести, / и искуше́ний, и обстоя́ний.

Богородичен: Ра́дуйся, Богоприя́тная утро́бо, / ра́дуйся, престо́ле Госпо́день, / ра́дуйся, Ма́ти Жи́зни на́шея.

Песнь 4.

Ирмос: Услы́ша проро́к / прише́ствие Твое́, Го́споди, и убоя́ся, / я́ко хо́щеши от Де́вы роди́тися / и челове́ком яви́тися, и глаго́лаше: / услы́шах слух Твой и убоя́хся, / сла́ва си́ле Твое́й, Го́споди. (Дважды)

Дел Твои́х да не пре́зриши, / созда́ния Твоего́ да не оста́виши, Правосу́де, / а́ще и еди́н согреши́х, я́ко человек, / па́че вся́каго челове́ка, Человеколю́бче, / но и́маши, я́ко Госпо́дь всех, / власть оставля́ти грехи́.

Приближа́ется, душе́, коне́ц, приближа́ется, / и неради́ши, ни гото́вишися: / вре́мя сокраща́ется, воста́ни, близ при две́рех Судия́ есть: / я́ко со́ние, я́ко цвет, вре́мя жития́ тече́т: / что всу́е мяте́мся?

Воспряни́, о душе́ моя́, / дея́ния твоя́, я́же соде́лала еси́, помышля́й, / и сия́ пред лице́ твое́ принеси́, / и ка́пли испусти́ слез твои́х: / рцы со дерзнове́нием дея́ния и помышле́ния Христу́, / и оправда́йся.

Не бысть в житии́ греха́, ни дея́ния, ни зло́бы, / ея́же аз, Спа́се, не согреши́х / умо́м и сло́вом, и произволе́нием / и предложе́нием, и мы́слию, и дея́нием согреши́в, / я́ко ин никто́же когда́.

Отсю́ду и осужде́н бых, / отсю́ду препре́н бых аз окая́нный от своея́ со́вести, / ея́же ничто́же в ми́ре нужне́йше: / Судие́, Изба́вителю мой, и ве́дче, / пощади́ и изба́ви, и спаси́ мя раба́ Твоего́.

Ле́ствица, ю́же ви́де дре́вле / вели́кий в патриа́рсех, / указа́ние есть душе́ моя́, / де́ятельнаго восхожде́ния, разу́мнаго возше́ствия: / а́ще хо́щеши у́бо, дея́нием, и ра́зумом, / и зре́нием пожи́ти, обнови́ся.

Зной дневны́й претерпе́ / лише́ния ра́ди патриа́рх, / и мраз нощны́й понесе́, / на всяк день снабде́ния творя́, / пасы́й, тружда́яйся, рабо́таяй, / да две жене́ сочета́ет.

Жены́ ми две разуме́й, / дея́ние же и ра́зум в зре́нии, / Ли́ю у́бо дея́ние, я́ко многоча́дную: / Рахи́ль же ра́зум, я́ко многотру́дную: / и́бо кроме́ трудо́в, ни дея́ние, ни зре́ние душе́, испра́вится.

Слава, Троичен: Неразде́льное Существо́м, / несли́тное Ли́цы / богосло́влю Тя, Тро́ическое Еди́но Божество́, / я́ко единоца́рственное и сопресто́льное, / вопию́ Ти песнь вели́кую, / в вы́шних трегу́бо песносло́вимую.

Богородичен: И ражда́еши и де́вствуеши, / и пребыва́еши обою́ду естество́м Де́ва: / Рожде́йся обновля́ет зако́ны естества́, / утро́ба же ражда́ет, не ражда́ющая. / Бог иде́же хо́щет, побежда́ется естества́ чин: / твори́т бо ели́ка хо́щет.

Песнь 5.

Ирмос: От нощи́ у́тренююща, / Человеколю́бче, просвети́, молю́ся, / и наста́ви и мене́ на повеле́ния Твоя́, / и научи́ мя, Спа́се, / твори́ти во́лю Твою́. (Дважды)

В нощи́ житие́ мое́ преидо́х при́сно, / тьма бо бысть и глубока́ мне мгла, нощь греха́, / но я́ко дне сы́на Спа́се покажи́ мя.

Руви́ма подража́я окая́нный аз, / соде́ях беззако́нный и законопресту́пный сове́т на Бо́га Вы́шняго, / оскверни́в ло́же мое́, я́ко о́тчее он.

Испове́даюся Тебе́ Христе́ Царю́, / согреши́х, согреши́х, / я́ко пре́жде Ио́сифа бра́тия прода́вшии, / чистоты́ плод и целому́дрия.

От сро́дников пра́ведная душа́ связа́ся, / прода́ся в рабо́ту сла́дкий, / во о́браз Госпо́день: / ты же вся душе́, продала́ся еси́ / злы́ми твои́ми.

Ио́сифа пра́веднаго и целому́дреннаго ума́ / подража́й окая́нная, и неиску́сная душе́, / и не оскверня́йся безслове́сными стремле́ньми / при́сно беззако́ннующи.

А́ще и в ро́ве поживе́ иногда́ Ио́сиф, / Влады́ко Го́споди, / но во о́браз погребе́ния и воста́ния Твоего́: / аз же что Тебе́ когда́ сицево́е принесу́?

Слава, Троичен: Тя Тро́ице сла́вим, Еди́наго Бо́га: / Свят, Свят, Свят еси́ О́тче, Сы́не и Ду́ше, / про́стое Существо́, / Еди́нице при́сно покланя́емая.

Богородичен: Из Тебе́ облече́ся в мое́ смеше́ние, / нетле́нная, безму́жная Ма́ти Де́во, / Бог созда́вый ве́ки, / и соедини́ Себе́ челове́ческое естество́.

Песнь 6.

Ирмос: Возопи́х всем се́рдцем мои́м / к ще́дрому Бо́гу, / и услы́ша мя от а́да преиспо́дняго, / и возведе́ от тли живо́т мой. (Дважды)

Сле́зы Спа́се о́чию мое́ю, / и из глубины́ воздыха́ния / чи́сте приношу́, вопию́щу се́рдцу: / Бо́же, согреши́х Ти / очи́сти мя.

Уклони́лася еси́ душе́, от Го́спода твоего́, / я́коже Дафа́н и Авиро́н: / но пощади́, воззови́ из а́да преиспо́дняго, / да не про́пасть земна́я тебе́ покры́ет.

Я́ко ю́ница душе́ разсвире́певшая, / уподо́билася еси́ Ефре́му, / я́ко се́рна от тене́т сохрани́ житие́, / впери́вши дея́нием ум, и зре́нием.

Рука́ нас Моисе́ова да уве́рит душе́, / ка́ко мо́жет Бог прокаже́нное житие́ / убели́ти, и очи́стити: / и не отча́йся сама́ себе́, / а́ще и прокаже́нна еси́.

Слава, Троичен: Тро́ица есмь про́ста, неразде́льна, / разде́льна Ли́чне, / и Еди́ница есмь Естество́м соедине́на, / Оте́ц глаго́лет, и Сын, и Боже́ственный Дух.

Богородичен: Утро́ба Твоя́ Бо́га нам роди́, / воображе́на по нам: / Его́же я́ко Созда́теля всех, моли́ Богоро́дице, / да моли́твами Твои́ми оправди́мся.

Таже: Го́споди, поми́луй. (Трижды.) Сла́ва, и ны́не:

Кондак:

Душе́ моя́, душе́ моя́, воста́ни, что спи́ши? / Коне́ц приближа́ется, и и́маши смути́тися. / Воспряни́ у́бо, да пощади́т тя Христо́с Бог, / везде́ сый и вся́ исполня́яй.

Песнь 7.

Ирмос: Согреши́хом, беззако́нновахом, / непра́вдовахом пред Тобо́ю, / ниже́ соблюдо́хом, ниже́ сотвори́хом, / я́коже запове́дал еси́ нам; / но не преда́ждь нас до конца́, / отце́в Бо́же. (Дважды)

Согреши́х, беззако́нновах, / и отверго́х за́поведь Твою́, / я́ко во гресе́х произведо́хся / и приложи́х я́звам стру́пы себе́: / но Сам мя поми́луй, / я́ко Благоутро́бен, отце́в Бо́же.

Та́йная се́рдца моего́ / испове́дах Тебе́ Судии́ моему́, / виждь мое́ смире́ние, / виждь и скорбь мою́, / и вонми́ суду́ моему́ ны́не, / и Сам мя поми́луй, я́ко Благоутро́бен, / отце́в Бо́же.

Сау́л иногда́ я́ко погуби́ отца́ своего́ душе́ осля́та, / внеза́пу ца́рство обре́те к прослу́тию, / но блюди́, не забыва́й себе́, / ско́тския по́хоти твоя́ / произво́ливши па́че Ца́рства Христо́ва.

Дави́д иногда́ Богооте́ц, / а́ще и согреши́ сугу́бо душе́ моя́, / стрело́ю у́бо устреле́н быв прелюбоде́йства, / копие́м же плене́н быв уби́йства томле́нием, / но ты сама́ тяжча́йшими де́лы неду́гуеши, / самохо́тными стремле́ньми.

Совокупи́ у́бо Дави́д иногда́ беззако́нию беззако́ние: / уби́йству же любоде́йство раствори́в, / покая́ние сугу́бое показа́ а́бие: / но сама́ ты лука́внейшая душе́ соде́лала еси́, / не пока́явшися Бо́гу.

Дави́д иногда́ вообрази́, / списа́в я́ко на ико́не песнь, / е́юже дея́ние облича́ет, е́же соде́я, зовы́й: / поми́луй мя. Тебе́ бо Еди́ному согреши́х всех Бо́гу, / Сам очи́сти мя.

Слава, Троичен: Тро́ице про́стая, неразде́льная, / единосу́щная, и Естество́ еди́но, / Све́тове, и Свет, и Свята три, и еди́но Свя́то / пое́тся Бог Тро́ица: / но воспо́й, просла́ви, Живо́т и Животы́, душе́, / всех Бо́га.

Богородичен: Пое́м Тя, благослови́м Тя, / покланя́емся Ти Богороди́тельнице, / я́ко неразде́льныя Тро́ицы породи́ла еси́ еди́наго Христа́ Бо́га / и Сама́ отве́рзла еси́ нам / су́щим на земли́ небе́сная.

Песнь 8.

Ирмос: Его́же во́инства Небе́сная сла́вят, / и трепе́щут Херуви́ми и Серафи́ми, / вся́ко дыха́ние и тварь, / по́йте, благослови́1те / и превозноси́те во вся ве́ки. (Дважды)

Согреши́вша Спа́се поми́луй, / воздви́гни мой ум ко обраще́нию, / приими́ мя ка́ющагося, уще́дри вопию́ща: / согреши́х Ти, спаси́, / беззако́нновах, поми́луй мя.

Колесни́чник Илия́, / колесни́цею доброде́телей вшед, / я́ко на небеса́, ноша́шеся / превы́ше иногда́ от земны́х: / сего́ у́бо душе́ моя́, восхо́д помышля́й.

Елиссе́й иногда́ прие́м ми́лоть Илиину́, / прия́т сугу́бую благода́ть от Бо́га: / ты же о душе́ моя́, сея́ не причасти́лася еси́ благода́ти / за невоздержа́ние.

Иорда́нова струя́ пе́рвее, ми́лотию Илиино́ю / Елиссе́ем, ста сю́ду и сю́ду: / ты же, о душе́ моя́, сея́ не причасти́лася еси́ благода́ти / за невоздержа́ние.

Сомани́тида иногда́ / пра́веднаго учреди́, о душе́, нра́вом благи́м: / ты же не ввела́ еси́ в дом, / ни стра́нна, ни пу́тника. / Те́мже черто́га изри́нешися вон, рыда́ющи.

Гиези́ев подража́ла еси́ окая́нная / ра́зум скве́рный всегда́ душе́, / его́же сребролю́бие отложи́ поне́ на ста́рость: / бе́гай гее́нскаго огня́, / отступи́вши злых твои́х.

Слава, Троичен: Безнача́льне О́тче, Сы́не собезнача́льне, / Уте́шителю Благи́й, Ду́ше Пра́вый: / Сло́ва Бо́жия Роди́телю, / Отца́ безнача́льна Сло́ве, / Ду́ше живы́й и зи́ждай, / Тро́ице Еди́нице поми́луй мя.

Богородичен: Я́ко от оброще́ния червлени́цы Пречи́стая, / у́мная багряни́ца Емману́илева, / внутрь во чре́ве Твое́м плоть истка́ся: / те́мже Богоро́дицу вои́стинну Тя почита́ем.

Песнь 9.

Ирмос: Безсе́меннаго зача́тия Рождество́ несказа́нное, / Ма́тере безму́жныя нетле́нен Плод, / Бо́жие бо рожде́ние обновля́ет естества́. / Те́мже Тя вси ро́ди, / я́ко Богоневе́стную Ма́терь, / правосла́вно велича́ем. (Дважды)

Ум острупи́ся, те́ло оболе́знися, / неду́гует дух, сло́во изнемо́же, / житие́ умертви́ся, коне́ц при две́рех. / Те́мже моя́ окая́нная душе́, что сотвори́ши, / егда́ прии́дет Судия́ испыта́ти твоя́?

Моисе́ово приведо́х ти душе́, миробы́тие, / и от того́ все заве́тное писа́ние, / пове́дающее тебе́ пра́ведныя и непра́ведныя: / от ни́хже вторы́я, о душе́, подража́ла еси́, а не пе́рвыя, / в Бо́га согреши́вши.

Зако́н изнемо́же, пра́зднует Ева́нгелие, / писа́ние же все в тебе́ небреже́но бысть, / проро́цы изнемого́ша, и все пра́ведное сло́во: / стру́пи твои́, о душе́, умно́жишася, / не су́щу врачу́ исцеля́ющему тя.

Но́ваго привожду́ ти писа́ния указа́ния, / вводя́щая тя душе́, ко умиле́нию: / пра́ведным у́бо поревну́й, гре́шных же отвраща́йся, / и уми́лостиви Христа́ моли́твами же и поще́ньми, / и чистото́ю, и гове́нием.

Христо́с вочелове́чися, / призва́в к покая́нию разбо́йники, и блудни́цы: / душе́ пока́йся, дверь отве́рзеся Ца́рствия уже́, / и предвосхища́ют е фарисе́е и мытари́ / и прелюбоде́и ка́ющиися.

Христо́с вочелове́чися, / пло́ти приобщи́вся ми, / и вся, ели́ка суть естества́ хоте́нием / испо́лни греха́ кроме́, / подо́бие тебе́, о душе́, / и о́браз предпоказу́я Своего́ снизхожде́ния.

Христо́с волхвы́ спасе́, / па́стыри созва́, / младе́нец мно́жества показа́ му́ченики, / ста́рцы просла́ви, и ста́рыя вдови́цы, / и́хже не поревнова́ла еси́ душе́, ни дея́нием, ни житию́, / но го́ре тебе́, внегда́ бу́деши суди́тися.

Пости́вся Госпо́дь дний четы́редесять в пусты́ни, / последи́ взалка́, показу́я челове́ческое: / душе́, да не разлени́шися, а́ще тебе́ приложи́тся враг, / моли́твою же и посто́м от ног твои́х да отрази́тся.

Слава, Троичен: Отца́ просла́вим, Сы́на превознесе́м, / Боже́ственному Ду́ху ве́рно поклони́мся, / Тро́ице неразде́льней, Еди́нице по Существу́, / я́ко Све́ту и Све́том, и Животу́ и Живото́м, / животворя́щему и просвеща́ющему концы́.

Богородичен: Град Твой сохраня́й / Богороди́тельнице Пречи́стая, / в Тебе́ бо сей ве́рно ца́рствуяй, / в Тебе́ и утвержда́ется, / и Тобо́ю побежда́яй, / побежда́ет вся́кое искуше́ние, / и пленя́ет ра́тники, / и прохо́дит послуша́ние.

Преподо́бне о́тче Андре́е, моли́ Бо́га о нас.

Андрею: Андре́е честны́й, и о́тче треблаже́ннейший, / па́стырю Кри́тский, / не преста́й моля́ся о воспева́ющих тя: / да изба́вимся вси гне́ва и ско́рби, и тле́ния, / и прегреше́ний безме́рных, / чту́щии твою́ па́мять ве́рно.

Таже поем оба лика ирмос: Безсе́меннаго зача́тия Рождество́ несказа́нное, / Ма́тере безму́жныя нетле́нен Плод, / Бо́жие бо рожде́ние обновля́ет естества́. / Те́мже Тя вси ро́ди, / я́ко Богоневе́стную Ма́терь, / правосла́вно велича́ем.

ВО ВТОРНИК ПЕРВЫЯ СЕДМИЦЫ, НА ПОВЕЧЕРИИ.

Поем настоящий Великий канон преподобнаго отца нашего Андрея Критскаго, Иерусалимскаго. Творим же на коемждо тропаре метания три глаголюще и стих: Поми́луй мя Бо́же, поми́луй мя.

Поем великий канон. Глас 6. Песнь 1.

Ирмос, по дважды: Помо́щник и покрови́тель бысть мне во спасе́ние, / Сей мой Бог, и просла́влю Его́, / Бог отца́ моего́, и вознесу́ Его́: / сла́вно бо просла́вися.

Стих: Поми́луй мя, Бо́же, поми́луй мя.

Ка́иново преше́д уби́йство, / произволе́нием бых уби́йца со́вести душе́вней, / оживи́в плоть, и воева́в на ню / лука́выми мои́ми дея́ньми.

А́велеве Иису́се, не уподо́бихся пра́вде, / да́ра Тебе́ прия́тна не принесо́х когда́, / ни дея́ния боже́ственна, ни же́ртвы чи́стыя, / ни жития́ непоро́чнаго.

Я́ко Ка́ин и мы, душе́ окая́нная, / всех Соде́телю дея́ния скве́рная, / и же́ртву поро́чную, / и непотре́бное житие́ принесо́хом вку́пе: / те́мже и осуди́хомся.

Бре́ние Зда́тель живосозда́в, / вложи́л еси́ мне плоть и ко́сти, / и дыха́ние и жизнь: / но о Тво́рче мой, Изба́вителю мой, и Судие́ / ка́ющася приими́ мя.

Извеща́ю Ти Спа́се, грехи́, я́же соде́ях, / и души́ и те́ла моего́ я́звы, / я́же внутрь уби́йственнии по́мыслы / разбо́йнически на мя возложи́ша.

А́ще и согреши́х, Спа́се, / но вем, я́ко Человеколю́бец еси́, / наказу́еши ми́лостивно, и милосе́рдствуеши те́пле: / слезя́ща зри́ши, / и притека́еши я́ко Оте́ц, призыва́я блу́днаго.

Слава, Троичен: Пресу́щная Тро́ице, во Еди́нице покланя́емая, / возми́ бре́мя от мене́ тя́жкое грехо́вное, / и я́ко благоутро́бна, / даждь ми сле́зы умиле́ния.

Богородичен: Богоро́дице, наде́жде и предста́тельство Тебе́ пою́щих, / возми́ бре́мя от мене́ тя́жкое грехо́вное, / и я́ко Влады́чица Чи́стая, / ка́ющася приими́ мя.

Песнь 2.

Ирмос: Вонми́, не́бо, и возглаго́лю, / и воспою́ Христа́, / от Де́вы пло́тию прише́дшаго. (Дважды)

Сшива́ше ко́жныя ри́зы грех мне, / обнажи́вый мя пе́рвыя / боготка́нныя оде́жды.

Обложе́н есмь одея́нием студа́, / я́коже ли́ствием смоко́вным, / во обличе́ние мои́х самовла́стных страсте́й.

Оде́яхся в сра́мную ри́зу, / и окровавле́нную сту́дно, / тече́нием стра́стнаго и любосла́стнаго живота́.

Впадо́х в стра́стную па́губу / и в веще́ственную тлю, / и отто́ле до ны́не враг мне досажда́ет.

Любове́щное и любоиме́нное житие́, / невоздержа́нием Спа́се предпоче́т ны́не, / тя́жким бре́менем обложе́н есмь.

Украси́х плотски́й о́браз / скве́рных помышле́ний разли́чным обложе́нием, / и осужда́юся.

Вне́шним приле́жно благоукраше́нием / еди́нем попеко́хся, / вну́треннюю презре́в / богообра́зную ски́нию.

Погребо́х пе́рваго о́браза добро́ту Спа́се страстьми́, / ю́же я́ко иногда́ дра́хму, / взыска́в обря́щи.

Согреши́х, я́коже блудни́ца вопию́ Ти: / еди́н согреши́х Тебе́, / я́ко ми́ро приими́ Спа́се / и моя́ сле́зы.

Очи́сти, я́коже мыта́рь вопию́ Ти, / Спа́се, очи́сти мя: / никто́же бо су́щих из Ада́ма, я́коже аз / согреши́х Тебе́.

Слава, Троичен: Еди́наго Тя в трие́х Ли́цах, / Бо́га всех пою́, / Отца́, и Сы́на, и Ду́ха Свята́го.

Богородичен: Пречи́стая Богоро́дице Де́во, / еди́на Всепе́тая, / моли́ приле́жно, во е́же спасти́ся нам.

Песнь 3.

Ирмос: Утверди́, Го́споди, на ка́мени за́поведей Твои́х / подви́гшееся се́рдце мое́, / я́ко Еди́н Свят еси́ и Госпо́дь. (Дважды)

Исто́чник живота́ стяжа́х Тебе́, / сме́рти низложи́теля, / и вопию́ Ти от се́рдца моего́ пре́жде конца́: / согреши́х, очи́сти и спаси́ мя.

Согреши́х, Го́споди, / согреши́х Тебе́, очи́сти мя: / несть бо и́же кто согреши́ в челове́цех, / его́же не превзыдо́х прегреше́ньми.

При Но́и, Спа́се, / блу́дствовавшия подража́х, / о́нех насле́дствовав осужде́ние, / в пото́пе погруже́ния.

Ха́ма о́наго душе́, / отцеуби́йца подража́вши, / сра́ма не покры́ла еси́ и́скренняго, / вспять зря возврати́вшися.

Запале́ния я́коже Лот, / бе́гай душе́ моя́ греха́: / бе́гай Содо́мы и Гомо́рры, / бе́гай пла́мене вся́каго безслове́снаго жела́ния.

Поми́луй Го́споди, поми́луй мя, вопию́ Ти, / егда́ прии́деши со а́нгелы Твои́ми, / возда́ти всем по достоя́нию дея́ний.

Слава, Троичен: Тро́ице про́стая, несозда́нная, / безнача́льное Естество́, / в Тро́ице пева́емая Ипоста́сей, / спаси́ ны ве́рою покланя́ющияся / держа́ве Твое́й.

Богородичен: От Отца́ безле́тна Сы́на, / в ле́то Богороди́тельнице, / неискусому́жно родила́ еси́, / стра́нное чу́до, / пребы́вши Де́ва, доя́щи.

Песнь 4.

Ирмос: Услы́ша проро́к / прише́ствие Твое́, Го́споди, и убоя́ся, / я́ко хо́щеши от Де́вы роди́тися / и челове́ком яви́тися, и глаго́лаше: / услы́шах слух Твой и убоя́хся, / сла́ва си́ле Твое́й, Го́споди. (Дважды)

Бди о душе́ моя́! / Изря́дствуй я́коже дре́вле вели́кий в патриа́рсех, / да стя́жеши дея́ние с ра́зумом, / да бу́деши ум зряй Бо́га / и дости́гнеши незаходя́щий мрак в виде́нии, / и бу́деши вели́кий купе́ц.

Двана́десять патриа́рхов, / вели́кий в патриа́рсех детотвори́в, / та́йно утверди́ тебе́ / ле́ствицу де́ятельнаго душе́ моя́ восхожде́ния: / де́ти, я́ко основа́ния: степе́ни, / я́ко восхожде́ния, прему́дренно подложи́в.

Иса́ва возненави́деннаго подража́ла еси́ душе́, / отдала́ еси́ преле́стнику твоему́ / пе́рвыя добро́ты пе́рвенство, / и оте́ческия моли́твы отпа́ла еси́, / и два́жды поползну́лася еси́ окая́нная, / дея́нием и ра́зумом: / те́мже ны́не пока́йся.

Едо́м Иса́в нарече́ся, / кра́йняго ра́ди женонеи́стовнаго смеше́ния: / невоздержа́нием бо при́сно разжига́емь, / и сластьми́ оскверня́емь, / Едо́м именова́ся, / е́же глаго́лется разжже́ние души́ любогрехо́вныя.

И́ова на гно́ищи слы́шавши, / о душе́ моя́, оправда́вшагося, / того́ му́жеству не поревнова́ла еси́, / тве́рдаго не име́ла еси́ предложе́ния, во всех я́же ве́си, / и и́миже искуси́лася еси́, / но яви́лася еси́ нетерпели́ва.

И́же пе́рвее на престо́ле, / наг ны́не на гно́ищи гно́ен: / мно́гий в ча́дех и сла́вный, / безча́ден и бездо́мок напра́сно: / пала́ту у́бо гно́ище, / и би́серие стру́пы вменя́ше.

Слава, Троичен: Неразде́льное Существо́м, / несли́тное Ли́цы / богосло́влю Тя, Тро́ическое Еди́но Божество́, / я́ко единоца́рственное и сопресто́льное, / вопию́ Ти песнь вели́кую, / в вы́шних трегу́бо песносло́вимую.

Богородичен: И ражда́еши, и де́вствуеши, / и пребыва́еши обою́ду естество́м Де́ва: / Рожде́йся обновля́ет зако́ны естества́, / утро́ба же ражда́ет неражда́ющая. / Бог иде́же хо́щет, побежда́ется естества́ чин: / твори́т бо, ели́ка хо́щет.

Песнь 5.

Ирмос: От нощи́ у́тренююща, / Человеколю́бче, просвети́, молю́ся, / и наста́ви и мене́ на повеле́ния Твоя́, / и научи́ мя, Спа́се, / твори́ти во́лю Твою́. (Дважды)

Моисе́ов слы́шала еси́ ковче́жец душе́, / вода́ми, волна́ми носи́м ре́чными, / я́ко в черто́зе дре́вле бе́гающий де́ла го́рькаго / сове́та фараони́тска.

А́ще ба́бы слы́шала еси́, убива́ющия иногда́ / безвозра́стное му́жеское, душе́ окая́нная, целому́дрия дея́ние, / ны́не я́ко вели́кий Моисе́й, / сси прему́дрость.

Я́ко Моисе́й вели́кий / еги́птянина, ума́ уязви́вши / окая́нная, не уби́ла еси́ душе́: / и ка́ко всели́шися, глаго́ли, / в пусты́ню страсте́й покая́нием?

В пусты́ню всели́ся вели́кий Моисе́й, / гряди́ у́бо подража́й того́ житие́, / да и в купине́ богоявле́ния душе́, / в виде́нии бу́деши.

Моисе́ов жезл вообража́й душе́, / ударя́ющий мо́ре, и огустева́ющий глубину́, / во о́браз Креста́ Боже́ственнаго: / и́мже мо́жеши и ты / вели́кая соверши́ти.

Ааро́н приноша́ше огнь Бо́гу, непоро́чный, неле́стный: / но Офни́ и Финее́с, я́ко ты душе́, / приноша́ху чужде́е Бо́гу оскверне́нное житие́.

Слава, Троичен: Тя Тро́ице сла́вим, Еди́наго Бо́га: / Свят, Свят, Свят еси́ О́тче, Сы́не, и Ду́ше, / про́стое Существо́, / Еди́нице при́сно покланя́емая.

И ныне, Богородичен: Из Тебе́ облече́ся в мое́ смеше́ние, / нетле́нная безму́жная Ма́ти Де́во, / Бог созда́вый ве́ки, / и соедини́ Себе́ челове́ческое естество́.

Песнь 6.

Ирмос: Возопи́х всем се́рдцем мои́м / к ще́дрому Бо́гу, / и услы́ша мя от а́да преиспо́дняго, / и возведе́ от тли живо́т мой. (Дважды)

Во́лны Спа́се прегреше́ний мои́х / я́ко в мо́ри Чермне́м возвраща́ющеся, / покры́ша мя внеза́пу, / я́ко Еги́птяны иногда́, и триста́ты.

Неразу́мное душе́ произволе́ние име́ла еси́, / я́ко пре́жде Изра́иль: / Боже́ственныя бо ма́нны предсуди́ла еси́ безслове́сно, / любосла́стное страсте́й объяде́ние.

Кладенцы́ душе́, предпочла́ еси́ ханане́йских мы́слей, / па́че жи́лы ка́мене, / из него́же прему́дрости река́, я́ко ча́ша / пролива́ет то́ки богосло́вия.

Свина́я мяса́ и котлы́, и Еги́петскую пи́щу, / па́че небе́сныя предсуди́ла еси́ душе́ моя́, / я́коже дре́вле неразу́мнии лю́дие в пусты́ни.

Я́ко уда́ри Моисе́й раб Твой / жезло́м ка́мень, / обра́зно животвори́вая ре́бра Твоя́ прообразова́ше, / из ни́хже вси / питие́ жи́зни Спа́се, почерпа́ем.

Испыта́й душе́ и смотряй, я́коже Иису́с Нави́н / обетова́ния зе́млю, какова́ есть, / и всели́ся в ню благозако́нием.

Слава, Троичен: Тро́ица есмь про́ста, неразде́льна, / разде́льна Ли́чне, / и Еди́ница есмь, Естество́м соедине́на, / Оте́ц глаго́лет, и Сын, и Боже́ственный Дух.

Богородичен: Утро́ба Твоя́ Бо́га нам роди́, / воображе́нна по нам: / Его́же я́ко Созда́теля всех моли́ Богоро́дице, / да моли́твами Твои́ми оправди́мся.

Таже: Го́споди, поми́луй. (Трижды.) Сла́ва, и ны́не:

Кондак:

Душе́ моя́, душе́ моя́, воста́ни, что спи́ши? / Коне́ц приближа́ется, и и́маши смути́тися. / Воспряни́ у́бо, да пощади́т тя Христо́с Бог, / везде́ сый и вся́ исполня́яй.

Песнь 7.

Ирмос: Согреши́хом, беззако́нновахом, / непра́вдовахом пред Тобо́ю, / ниже́ соблюдо́хом, ниже́ сотвори́хом, / я́коже запове́дал еси́ нам; / но не преда́ждь нас до конца́, / отце́в Бо́же. (Дважды)

Киво́т я́ко ноша́шеся на колесни́це, / Зан о́ный, / егда́ превра́щшуся тельцу́, / то́чию косну́ся, Бо́жиим искуси́ся гне́вом: / но того́ дерзнове́ния убежа́вши душе́, / почита́й Боже́ственная че́стне.

Слы́шала еси́ Авессало́ма, / ка́ко на естество́ воста́? / Позна́ла еси́ того́ скве́рная дея́ния, / и́миже оскверни́ ло́же Дави́да отца́, / но ты подража́ла еси́ того́ стра́стная / и любосла́стная стремле́ния.

Покори́ла еси́ нерабо́тное твое́ досто́инство те́лу твоему́: / ино́го бо Ахитофе́ла обре́тши врага́, душе́, / снизшла́ еси́ сего́ сове́том, / но сия́ разсы́па Сам Христо́с, / да ты вся́ко спасе́шися.

Соломо́н чу́дный, / и благода́ти прему́дрости испо́лненный, / сей лука́вое иногда́ пред Бо́гом сотвори́в, / отступи́ от Него́: / ему́же ты прокля́тым твои́м житие́м, душе́ / уподо́билася еси́.

Сластьми́ влеко́мь страсте́й свои́х оскверня́шеся, / увы́ мне, рачи́тель прему́дрости, / рачи́тель блу́дных жен, и стра́нен от Бо́га: / его́же ты подража́ла еси́ умо́м о душе́! / Сладостра́стьми скве́рными.

Ровоа́му поревнова́ла еси́ / не послу́шавшему сове́та о́тча, / ку́пно же и зле́йшему рабу́ Иеровоа́му, пре́жнему отсту́пнику душе́, / но бе́гай подража́ния, и зови́ Бо́гу: / согреши́х, уще́дри мя.

Слава, Троичен: Тро́ице про́стая, неразде́льная, / единосу́щная, и Естество́ еди́но, / Све́тове и Свет, и Свя́та три, и еди́но Свя́то / пое́тся Бог Тро́ица, / но воспо́й, просла́ви Живо́т и Животы́, душе́, / всех Бо́га.

Богородичен: Пое́м Тя, благослови́м Тя, / покланя́емся Ти Богороди́тельнице, / я́ко неразлу́чныя Тро́ицы породила́ еси́ / еди́наго Христа́ Бо́га, / и Сама́ отве́рзла еси́ нам / су́щим на земли́ небе́сная.

Песнь 8.

Ирмос: Его́же во́инства Небе́сная сла́вят, / и трепе́щут Херуви́ми и Серафи́ми, / вся́ко дыха́ние и тварь, / по́йте, благослови́1те / и превозноси́те во вся ве́ки. (Дважды)

Ты Ози́и душе́ поревнова́вши, / сего́ прокаже́ние в себе́ стяжа́ла еси́ сугу́бо: / безме́стная бо мы́слиши, беззако́нная же де́еши: / оста́ви я́же и́маши, / и притецы́ к покая́нию.

Ниневи́тяны душе́ слы́шала еси́ / ка́ющияся Бо́гу, вре́тищем и пе́пелом, / сих не подража́ла еси́, но яви́лася еси́ зле́йшая всех, / пре́жде зако́на, и по зако́не прегреши́вших.

В ро́ве бла́та слы́шала еси́ Иереми́ю душе́, / гра́да Сио́ня рыда́ньми вопию́ща, / и слез и́щуща, / подража́й сего́ плаче́вное житие́ и спасе́шися.

Ио́на в Фарси́с побеже́, / проразуме́в обраще́ние ниневи́тянов, / разуме́ бо я́ко проро́к Бо́жие благоутро́бие: / те́мже ревнова́ше / проро́честву не солга́тися.

Дании́ла в ро́ве слы́шала еси́, / ка́ко загради́ уста́, о душе́ звере́й: / уве́дела еси́, ка́ко о́троцы и́же о Аза́рии, / погаси́ша ве́рою пе́щи пла́мень горя́щий.

Ве́тхаго Заве́та вся / приведо́х ти душе́, к подо́бию, / подража́й пра́ведных боголюби́вая дея́ния, / избе́гни же па́ки лука́вых грехо́в.

Слава, Троичен: Безнача́льне О́тче, Сы́не собезнача́льне, / Уте́шителю Благи́й, Ду́ше Пра́вый: / Сло́ва Бо́жия Роди́телю, / Отца́ безнача́льна Сло́ве, / Ду́ше живы́й, и зи́ждяй, / Тро́ице Еди́нице поми́луй мя.

Богородичен: Я́ко от оброще́ния червлени́цы Пречи́стая, / у́мная багряни́ца Емману́илева, / внутрь во чре́ве Твое́м плоть истка́ся. / Те́мже Богоро́дицу / вои́стинну Тя почита́ем.

Песнь 9.

Ирмос: Безсе́меннаго зача́тия Рождество́ несказа́нное, / Ма́тере безму́жныя нетле́нен Плод, / Бо́жие бо рожде́ние обновля́ет естества́. / Те́мже Тя вси ро́ди, / я́ко Богоневе́стную Ма́терь, / правосла́вно велича́ем. (Дважды)

Христо́с искуша́шеся, / диа́вол искуша́ше, / показу́я ка́мение, / да хле́би бу́дут: / на го́ру возведе́ / ви́дети вся ца́рствия ми́ра во мгнове́нии. / Убо́йся о душе́, ловле́ния, / трезви́ся моли́ся на вся́кий час Бо́гу.

Го́рлица пустынолю́бная, / глас вопию́щаго возгласи́, / Христо́в свети́льник, пропове́дуяй покая́ние, / И́род беззако́ннова со Иродиа́дою. / Зри душе́ моя́, да не увя́знеши в беззако́нныя се́ти, / но облобыза́й покая́ние.

В пусты́ню всели́ся благода́ти Предте́ча, / и Иуде́я вся и Самари́я / слы́шавше теча́ху, / и испове́даху грехи́ своя́, / креща́ющеся усе́рдно: / и́хже ты не подража́ла еси́ душе́.

Брак у́бо честны́й, и ло́же нескве́рно: / обоя́ бо Христо́с пре́жде благослови́, / пло́тию яды́й, / и в Ка́не же на бра́це во́ду в вино́ соверша́я, / и показу́я пе́рвое чу́до: / да ты измени́шися о душе́.

Разсла́бленнаго стя́гну Христо́с, / одр взе́мша, / и ю́ношу уме́рша воздви́же, вдови́че рожде́ние, / и со́тнича о́трока, / и самаряны́не яви́ся, / в Ду́се слу́жбу / Тебе́, душе́ предживописа́.

Кровоточи́вую исцели́ / прикоснове́нием кра́я ри́зна Госпо́дь: / прокаже́нныя очи́сти: / слепы́я и хромы́я просвети́в, испра́ви: / глухи́я же и немы́я, и нича́щия ни́зу исцели́ сло́вом: / да ты спасе́шися окая́нная душе́.

Слава, Троичен: Отца́ просла́вим, Сы́на превознесе́м, / Боже́ственному Ду́ху ве́рно поклони́мся, / Тро́ице неразде́льней, Еди́нице по Существу́, / я́ко Све́ту, и Све́том, и Животу́, и Живото́м: / животворя́щему, и просвеща́ющему концы́.

Богородичен: Град Твой сохраня́й / Богороди́тельнице Пречи́стая: / в Тебе́ бо сей ве́рно ца́рствуяй, / в Тебе́ и утвержда́ется, / и Тобо́ю побежда́яй, / побежда́ет вся́кое искуше́ние, / и пленя́ет ра́тники, / и прохо́дит послуша́ние.

Преподо́бне о́тче Андре́е, моли́ Бо́га о нас.

Андрею: Андре́е честны́й, и о́тче треблаже́ннейший, / па́стырю Кри́тский, / не преста́й моля́ся о воспева́ющих тя, / да изба́вимся вси гне́ва, и ско́рби, и тле́ния, / и прегреше́ний безме́рных, / чту́щии твою́ па́мять ве́рно.

Таже поем оба лика, ирмос: Безсе́меннаго зача́тия Рождество́ несказа́нное, / Ма́тере безму́жныя нетле́нен Плод, / Бо́жие бо рожде́ние обновля́ет естества́. / Те́мже Тя вси ро́ди, / я́ко Богоневе́стную Ма́терь, / правосла́вно велича́ем.

И прочее последование Повечерия.

В СРЕДУ ПЕРВЫЯ СЕДМИЦЫ, НА ПОВЕЧЕРИИ.

Поем настоящий Великий канон преподобнаго отца нашего Андрея Критскаго, Иерусалимскаго. Творим же на коемждо тропаре метания три глаголюще и стих: Поми́луй мя Бо́же, поми́луй мя.

Песнь 1. Глас 6.

Ирмосы по дважды: Помо́щник и покрови́тель бысть мне во спасе́ние, / Сей мой Бог, и просла́влю Его́, / Бог отца́ моего́, и вознесу́ Его́: / сла́вно бо просла́вися.

Стих: Поми́луй мя, Бо́же, поми́луй мя.

От ю́ности Христе́, за́поведи Твоя́ преступи́х, / всестра́стно небреги́й, / уны́нием преидо́х житие́. / Те́мже зову́ Ти Спа́се: / поне́ на коне́ц спаси́ мя.

Пове́ржена мя Спа́се, пред враты́ Твои́ми, / поне́ на ста́рость не отри́ни мене́ во ад тща, / но пре́жде конца́, я́ко Человеколю́бец, / даждь ми прегреше́ний оставле́ние.

Бога́тство мое́ Спа́се, изнури́в в блуде́, / пуст есмь плодо́в благочести́вых, / а́лчен же зову́: / О́тче щедро́т, предвари́в / Ты мя уще́дри.

В разбо́йники впады́й аз есмь, / помышле́ньми мои́ми, / весь от них уязви́хся ны́не, и испо́лнихся ран, / но Сам ми предста́в, / Христе́ Спа́се исцели́.

Свяще́нник мя предви́дев ми́мо и́де, / и леви́т ви́дя в лю́тых на́га презре́, / но из Мари́и возсия́вый Иису́се, / Ты предста́в уще́дри мя.

Преподо́бная ма́ти Мари́е, моли́ Бо́га о нас.

Преподобныя: Ты ми даждь светоза́рную благода́ть / от Боже́ственнаго свы́ше промышле́ния, / избежа́ти страсте́й омраче́ния, / и пе́ти усе́рдно, твоего́ Мари́е жития́, / кра́сная исправле́ния.

Слава, Троичен: Пресу́щная Тро́ице, / во Еди́нице покланя́емая, / возми́ бре́мя от мене́ тя́жкое грехо́вное, / и я́ко благоутро́бна / даждь ми сле́зы умиле́ния.

Богородичен: Богоро́дице, наде́жде и предста́тельство Тебе́ пою́щих, / возми́ бре́мя от мене́ тя́жкое грехо́вное, / и я́ко Влады́чица Чи́стая, / ка́ющася приими́ мя.

Песнь 2.

Ирмос: Вонми́, не́бо, и возглаго́лю, / и воспою́ Христа́, / от Де́вы пло́тию прише́дшаго. (Дважды)

Поползо́хся я́ко Дави́д блу́дно, и оскверни́хся, / но омы́й и мене́ Спа́се, слеза́ми.

Ни слез, ниже́ покая́ния и́мам, ниже́ умиле́ния: / Сам ми сия́ Спа́се, / я́ко Бог да́руй.

Погуби́х первозда́нную добро́ту / и благоле́пие мое́, / и ны́не лежу́ наг, и стыжду́ся.

Дверь Твою́ не затвори́ мне тогда́, / Го́споди, Го́споди, / но отве́рзи ми сию́ / ка́ющемуся Тебе́.

Внуши́ воздыха́ния души́ моея́, / и о́чию мое́ю приими́ ка́пли Спа́се, / и спаси́ мя.

Человеколю́бче хотя́й всем спасти́ся, / Ты воззови́ мя, / и приими́ я́ко Благ ка́ющагося.

Пресвята́я Богоро́дице, спаси́ нас.

Богородичен: Пречи́стая Богоро́дице Де́во, / еди́на Всепе́тая, / моли́ приле́жно, во е́же спасти́ся нам.

Ирмос: Ви́дите, ви́дите, я́ко Аз есмь Бог, / ма́нну одожди́вый / и во́ду из ка́мене источи́вый / дре́вле в пусты́ни лю́дем Мои́м, / десни́цею еди́ною и кре́постию Мое́ю.

Ви́дите ви́дите, я́ко Аз есмь Бог: / внуша́й душе́ моя́ Го́спода вопию́ща, / и удали́ся пре́жняго греха́, / и бо́йся я́ко неумы́тнаго, / и я́ко Судии́ и Бо́га.

Кому́ уподо́билася еси́ многогре́шная душе́, / то́кмо пе́рвому Ка́ину, и Ламе́ху о́ному, / каменова́вшая те́ло злоде́йствы, / и уби́вшая ум безслове́сными стремле́ньми.

Вся пре́жде зако́на прете́кши, о душе́! / Си́фу не уподо́билася еси́, / ни Ено́са подража́ла еси́, / ни Ено́ха преложе́нием, ни Но́я, / но яви́лася еси́ убо́га пра́ведных жи́зни.

Еди́на отве́рзла еси́ хля́би гне́ва, / Бо́га твоего́, душе́ моя́, / и потопи́ла еси́ всю, я́коже зе́млю плоть, и дея́ния и житие́, / и пребыла́ еси́ вне спаси́тельнаго ковче́га.

Преподо́бная ма́ти Мари́е, моли́ Бо́га о нас.

Преподобныя: Всем усе́рдием и любо́вию / притекла́ еси́ Христу́, / пе́рвый греха́ путь отвра́щши, / и в пусты́нях непроходи́мых пита́ющися, / и Того́ чи́сте соверша́ющи Боже́ственныя за́поведи.

Слава, Троичен: Безнача́льная, несозда́нная Тро́ице, / неразде́льная Еди́нице, / ка́ющася мя приими́, / согреши́вша спаси́, / Твое́ есмь созда́ние, не пре́зри, / но пощади́ и изба́ви / о́гненнаго мя осужде́ния.

Богородичен: Пречи́стая Влады́чице, Богороди́тельнице, / наде́ждо к Тебе́ притека́ющих, / и приста́нище су́щих в бу́ри, / Ми́лостиваго и Созда́теля и Сы́на Твоего́ / уми́лостиви и мне / моли́твами Твои́ми.

Песнь 3.

Ирмос: Утверди́, Го́споди, на ка́мени за́поведей Твои́х / подви́гшееся се́рдце мое́, / я́ко Еди́н Свят еси́ и Госпо́дь. (Дважды)

Благослове́ния Си́мова не насле́довала еси́ душе́ окая́нная, / ни простра́нное одержа́ние, / я́коже Иа́фет име́ла еси́ на земли́ оставле́ния.

От земли́ Харра́н, / изы́ди от греха́ душе́ моя́, / гряди́ в зе́млю точа́щую присноживо́тное нетле́ние, / е́же Авраа́м насле́дствова.

Авраа́ма слы́шала еси́ душе́ моя́, / дре́вле оста́вльша зе́млю оте́чества, / и бы́вша прише́льца, / сего́ произволе́нию подража́й.

У ду́ба Мамври́йскаго / учреди́в патриа́рх а́нгелы, / насле́дствова по ста́рости / обетова́ния лови́тву.

Исаа́ка окая́нная душе́ моя́, / разуме́вши но́вую же́ртву, / та́йно всесожже́нную Го́сподеви, / подража́й его́ произволе́нию.

Исма́ила слы́шала еси́, трезви́ся душе́ моя́, / изгна́на я́ко рабы́нино отрожде́ние, / виждь, да не ка́ко подо́бно что / постра́ждеши ласкосе́рдствующи.

Преподо́бная ма́ти Мари́е, моли́ Бо́га о нас.

Марии: Содержи́мь есмь бу́рею, и треволне́нием согреше́ний, / но сама́ мя ма́ти ны́не спаси́, / и к приста́нищу Боже́ственнаго покая́ния возведи́.

Преподо́бная ма́ти Мари́е, моли́ Бо́га о нас.

Марии: Ра́бское моле́ние и ны́не преподо́бная / прине́сши ко благоутро́бней моли́твами твои́ми Богоро́дице, / отве́рзи ми Боже́ственныя вхо́ды.

Слава, Троичен: Тро́ице про́стая, несозда́нная, / безнача́льное Естество́, / в Тро́ице пева́емая Ипоста́сей, / спаси́ ны ве́рою покланя́ющияся / держа́ве Твое́й.

Богородичен: От Отца́ безле́тна Сы́на, / в ле́то Богороди́тельнице / неискусому́жно родила́ еси́, / стра́нное чу́до, / пребы́вши Де́ва доя́щи.

Песнь 4.

Ирмос: Услы́ша проро́к / прише́ствие Твое́, Го́споди, и убоя́ся, / я́ко хо́щеши от Де́вы роди́тися / и челове́ком яви́тися, и глаго́лаше: / услы́шах слух Твой и убоя́хся, / сла́ва си́ле Твое́й, Го́споди. (Дважды)

Те́ло оскверни́ся, дух окаля́ся, / весь острупи́хся, / но я́ко врач Христе́, / обоя́ покая́нием мои́м уврачу́й, / омы́й, очи́сти, / покажи́ Спа́се мой, / па́че сне́га чисте́йша.

Те́ло Твое́ и кровь распина́емый о всех / положи́л еси́ Сло́ве: / те́ло у́бо, да мя обнови́ши: / кровь, да омы́еши мя: / дух же пре́дал еси́, / да мя приведе́ши Христе́, / Твоему́ Роди́телю.

Соде́лал еси́ спасе́ние / посреде́ земли́ Ще́дре, / да спасе́мся. / Во́лею на Дре́ве распя́лся еси́. / Еде́м затворе́нный отве́рзеся, / го́рняя и до́льняя тварь, / язы́цы вси спасе́ни / покланя́ются Тебе́.

Да бу́дет ми купе́ль, / кровь из ребр Твои́х, / вку́пе и питие́, / источи́вшее во́ду оставле́ния, / да обою́ду очища́юся, / помазу́яся и пия́: / я́ко пома́зание и питие́ Сло́ве, / живото́чная Твоя́ словеса́.

Ча́шу Це́рковь стяжа́, / ре́бра Твоя́ живоно́сная, / из ни́хже сугу́быя нам источи́ то́ки, / оставле́ния и ра́зума, / во о́браз дре́вняго и но́ваго / двои́х вку́пе заве́тов, Спа́се наш.

Наг есмь черто́га, / наг есмь и бра́ка, ку́пно и ве́чери: / свети́льник угасе́, я́ко безъеле́йный, / черто́г заключи́ся мне спя́щу, / ве́черя снеде́ся: / аз же по руку́ и но́гу свя́зан, / вон низве́ржен есмь.

Слава, Троичен: Неразде́льное Существо́м, / несли́тное Ли́цы, / богосло́влю Тя, Тро́ическое Еди́но Божество́, / я́ко единоца́рственное и сопресто́льное, / вопию́ Ти песнь вели́кую, / в вы́шних трегу́бо песносло́вимую.

Богородичен: И ражда́еши, и де́вствуеши, / и пребыва́еши обою́ду естество́м Де́ва, / Рожде́йся обновля́ет зако́ны естества́, / утро́ба же ражда́ет неражда́ющая. / Бог иде́же хо́щет, побежда́ется естества́ чин, / твори́т бо, ели́ка хо́щет.

Песнь 5.

Ирмос: От нощи́ у́тренююща, / Человеколю́бче, просвети́, молю́ся, / и наста́ви и мене́ на повеле́ния Твоя́, / и научи́ мя, Спа́се, / твори́ти во́лю Твою́. (Дважды)

Я́ко тя́жкий нра́вом, / фарао́ну го́рькому бых Влады́ко, / Ианни́, и Иамври́, душе́ю и те́лом, / и погруже́н умо́м, но помози́ ми.

Ка́лом смеси́хся окая́нный умо́м, / омы́й мя Влады́ко, ба́нею мои́х слез, / молю́ Тя, пло́ти моея́ оде́жду / убели́в я́ко снег.

А́ще испыта́ю моя́ дела́ Спа́се, / вся́каго челове́ка превозше́дша греха́ми себе́ зрю, / я́ко ра́зумом му́дрствуяй согреши́х, / не неве́дением.

Пощади́ пощади́ Го́споди, созда́ние Твое́, / согреши́х, осла́би ми, / я́ко естество́м чи́стый Сам сый еди́н, / и ин ра́зве Тебе́ / никто́же есть кроме́ скве́рны.

Мене́ ра́ди Бог сый, / вообрази́лся еси́ в мя, / показа́л еси́ чудеса́, исцели́в прокаже́нныя, / и разсла́бленнаго стягну́в, / кровоточи́выя ток уста́вил еси́ Спа́се, / прикоснове́нием риз.

Преподо́бная ма́ти Мари́е, моли́ Бо́га о нас.

Преподобныя: Струи́ Иорда́нския преше́дши, / обрела́ еси́ поко́й безболе́зненный, / пло́ти сла́сти избежа́вши, / ея́же и нас изми́ / твои́ми моли́твами преподо́бная.

Слава, Троичен: Тя Тро́ице сла́вим, Еди́наго Бо́га, / Свят, Свят, Свят еси́ / О́тче, Сы́не, и Ду́ше, / про́стое Существо́, / Еди́нице при́сно покланя́емая.

Богородичен: Из Тебе́ облече́ся в мое́ смеше́ние, / нетле́нная безму́жная Ма́ти Де́во, / Бог созда́вый ве́ки, / и соедини́ Себе́ челове́ческое естество́.

Песнь 6.

Ирмос: Возопи́х всем се́рдцем мои́м / к ще́дрому Бо́гу, / и услы́ша мя от а́да преиспо́дняго, / и возведе́ от тли живо́т мой. (Дважды)

Воста́ни и побори́, / я́ко Иису́с Амали́ка, плотски́я стра́сти, / и гаваони́ты, ле́стныя по́мыслы / при́сно побежда́ющи.

Преиди́ вре́мене теку́щее естество́, / я́ко пре́жде ковче́г, / и земли́ о́ныя бу́ди во одержа́нии обетова́ния душе́, / Бог повелева́ет.

Я́ко спасл еси́ Петра́, возопи́вша / спаси́, предвари́в мя Спа́се / от зве́ря изба́ви, просте́р Твою́ ру́ку, / и возведи́ из глубины́ грехо́вныя.

Приста́нище Тя вем ути́шное, / Влады́ко, Влады́ко Христе́, / но от незаходи́мых глуби́н греха́, и отча́яния / мя предвари́в изба́ви.

Слава, Троичен: Тро́ице есмь про́ста, неразде́льна, / разде́льна Ли́чне, / и Еди́ница есмь Естество́м соедине́на, / Оте́ц глаго́лет, и Сын, и Боже́ственный Дух.

Богородичен: Утро́ба Твоя́ Бо́га нам роди́, / воображе́на по нам: / Его́же, я́ко Созда́теля всех, моли́ Богоро́дице, / да моли́твами Твои́ми оправди́мся.

Таже: Го́споди, поми́луй. (Трижды.) Сла́ва, и ны́не:

Кондак:

Душе́ моя́, душе́ моя́, воста́ни, что спи́ши? / Коне́ц приближа́ется, и и́маши смути́тися. / Воспряни́ у́бо, да пощади́т тя Христо́с Бог, / везде́ сый и вся́ исполня́яй.

Песнь 7.

Ирмос: Согреши́хом, беззако́нновахом, / непра́вдовахом пред Тобо́ю, / ниже́ соблюдо́хом, ниже́ сотвори́хом, / я́коже запове́дал еси́ нам; / но не преда́ждь нас до конца́, / отце́в Бо́же. (Дважды)

Манасси́ева собрала́ еси́ согреше́ния изволе́нием, / поста́вльши я́ко ме́рзости стра́сти, / и умно́живши душе́ негодова́ние, / но того́ покая́нию ревну́ющи те́пле, / стяжи́ умиле́ние.

Ахаа́вовым поревнова́ла еси́ / скве́рнам, душе́ моя́, увы мне, / была́ еси́ плотски́х скверн пребыва́лище, / и сосу́д сра́млен страсте́й, / но из глубины́ твоея́ воздохни́, / и глаго́ли Бо́гу грехи́ твоя́.

Заключи́ся тебе́ не́бо душе́, / и глад Бо́жий пости́же тя: / егда́ Илии́ Фесви́тянина я́коже Ахаа́в, / не покори́ся словесе́м иногда́, / но Сара́ффии уподо́бився, / напита́й проро́чу ду́шу.

Попали́ Илия́ иногда́ два́щи / пятьдеся́т Иезаве́линых, / егда́ сту́дныя проро́ки погуби́, / во обличе́ние Ахаа́вово, / но бе́гай подража́ния двою́ душе́, / и укрепля́йся.

Слава, Троичен: Тро́ице про́стая, неразде́льная, / единосу́щная, и Естество́ еди́но, / Све́тове и Свет, и Свя́та три: и еди́но Свя́то / пое́тся Бог Тро́ица. / Но воспо́й, просла́ви Живо́т и Животы́, душе́ / всех Бо́га.

Богородичен: Пое́м Тя, благослови́м Тя, / покланя́емся Ти Богороди́тельнице, / я́ко неразде́льныя Тро́ицы, / породила́ еси́ еди́наго Христа́ Бо́га, / и Сама́ отве́рзла еси́ нам / су́щим на земли́ небе́сная.

Песнь 8.

Ирмос: Его́же во́инства Небе́сная сла́вят, / и трепе́щут Херуви́ми и Серафи́ми, / вся́ко дыха́ние и тварь, / по́йте, благослови́1те / и превозноси́те во вся ве́ки. (Дважды)

Правосу́де Спа́се поми́луй, / и изба́ви мя огня́, и преще́ния, / е́же и́мам на суде́ пра́ведно претерпе́ти: / осла́би ми пре́жде конца́, / доброде́телию и покая́нием.

Я́ко разбо́йник вопию́ Ти: помяни́ мя. / Я́ко Петр пла́чу го́рце: / осла́би ми Спа́се. Зову́ я́ко мыта́рь: / слезю́ я́ко блудни́ца. / Приими́ мое́ рыда́ние, / я́коже иногда́ ханане́ино.

Гное́ние, Спа́се, исцели́ / смире́нныя моея́ души́: еди́не Врачу́, / пла́стырь мне наложи́, и еле́й и вино́, дела́ покая́ния, / умиле́ние со слеза́ми.

Ханане́ю и аз подража́я, / поми́луй мя, вопию́, Сы́не Дави́дов: / каса́юся кра́я ри́зы, я́ко кровоточи́вая: / пла́чу, я́ко Ма́рфа и Мари́я над Ла́зарем.

Слава, Троичен: Безнача́льне О́тче, Сы́не собезнача́льне, / Уте́шителю Благи́й, Ду́ше Пра́вый: / Сло́ва Бо́жия Роди́телю, / Отца́ безнача́льна Сло́ве, / Ду́ше живы́й и зи́ждяй, / Тро́ице Еди́нице поми́луй мя.

Богородичен: Я́ко от оброще́ния червлени́цы Пречи́стая, / у́мная багряни́ца Емману́илева, / внутрь во чре́ве Твое́м плоть истка́ся, / те́мже Богоро́дицу / вои́стинну Тя почита́ем.

Песнь 9.

Ирмос: Безсе́меннаго зача́тия Рождество́ несказа́нное, / Ма́тере безму́жныя нетле́нен Плод, / Бо́жие бо рожде́ние обновля́ет естества́. / Те́мже Тя вси ро́ди, / я́ко Богоневе́стную Ма́терь, / правосла́вно велича́ем. (Дважды)

Неду́ги исцеля́я, / ни́щим благовествова́ше, Христо́с Сло́во, / вре́дныя уврачева́, с мытари́ ядя́ше, / со гре́шники бесе́доваше, / Иаи́ровы дще́ре ду́шу предуме́ршую / возврати́ осяза́нием руки́.

Мыта́рь спаса́шеся, и блудни́ца целому́дрствоваше, / и фарисе́й хваля́ся осужда́шеся: / ов у́бо, очи́сти мя: / о́ва же, поми́луй мя. / Сей же велича́шеся вопия́: Бо́же, благодарю́ Тя: / и про́чия безу́мныя глаго́лы.

Закхе́й мыта́рь бе, но оба́че спаса́шеся, / и фарисе́й Си́мон соблажня́шеся, / и блудни́ца приима́ше оста́вительная разреше́ния, / от Иму́щаго кре́пость оставля́ти грехи́: / ю́же душе́ потщи́ся подража́ти.

Блудни́це, о окая́нная душе́ моя́, / не поревнова́ла еси́, / я́же прии́мши ми́ра алава́стр, / со слеза́ми ма́заше но́зе Спа́сове, / отре́ же власы́ / дре́вних согреше́ний рукописа́ние раздира́ющаго ея́.

Гра́ды, и́мже даде́ Христо́с благове́стие, / душе́ моя́, уве́дала еси́, ка́ко про́кляти бы́ша. / Убо́йся указа́ния, да не бу́деши я́коже о́ны, / и́хже Содо́мляном Влады́ко уподо́бив, / да́же до а́да осуди́.

Да не го́ршая о душе́ моя́, / яви́шися отча́янием, ханане́и / ве́ру слы́шавшая, / ея́же дщи сло́вом Бо́жиим исцели́ся. / Сы́не Дави́дов, спаси́ и мене́, / воззови́ из глубины́ се́рдца, / я́коже она́ Христу́.

Слава, Троичен: Отца́ просла́вим, Сы́на превознесе́м, / Боже́ственному Ду́ху ве́рно поклони́мся, / Тро́ице неразде́льней Еди́нице по Существу́, / я́ко Све́ту и Све́том, и Животу́ и Живото́м, / животворя́щему, и просвеща́ющему концы́.

Богородичен: Град Твой сохраня́й / Богороди́тельнице Пречи́стая, / в Тебе́ бо сей ве́рно ца́рствуяй, / в Тебе́ и утвержда́ется, / и Тобо́ю побежда́яй, / побежда́ет вся́кое искуше́ние, / и пленя́ет ра́тники, / и прохо́дит послуша́ние.

Преподо́бне о́тче Андре́е, моли́ Бо́га о нас.

Андрею: Андре́е честны́й, и о́тче треблаже́ннейший, / па́стырю Кри́тский, / не преста́й моля́ся, о воспева́ющих тя, / да изба́вимся вси гне́ва, и ско́рби, и тле́ния, / и прегреше́ний безме́рных, / чту́щии твою́ па́мять ве́рно.

Таже поем оба лика: Безсе́меннаго зача́тия Рождество́ несказа́нное, / Ма́тере безму́жныя нетле́нен Плод, / Бо́жие бо рожде́ние обновля́ет естества́. / Те́мже Тя вси ро́ди, / я́ко Богоневе́стную Ма́терь, / правосла́вно велича́ем.

Подобне и прочее последование Повечерия.

В ЧЕТВЕРТОК ПЕРВЫЯ СЕДМИЦЫ, НА ПОВЕЧЕРИИ.

Поем настоящий Великий канон преподобнаго отца нашего Андрея Критскаго и Иерусалимскаго. Творим же на кийждо тропарь поклоны 3, глаголюще и стих: Поми́луй мя Бо́же, поми́луй мя.

Песнь 1. Глас 6.

Ирмос по дважды. Помо́щник и покрови́тель бысть мне во спасе́ние, / Сей мой Бог, и просла́влю Его́, / Бог отца́ моего́, и вознесу́ Его́: / сла́вно бо просла́вися.

Стих: Поми́луй мя, Бо́же, поми́луй мя.

А́гнче Бо́жий, взе́мляй грехи́ всех, / возми́ бре́мя от мене́ тя́жкое грехо́вное, / и я́ко благоутро́бен, / даждь ми сле́зы умиле́ния.

Тебе́ припа́даю Иису́се, / согреши́х Ти, очи́сти мя, / возми́ бре́мя от мене́ тя́жкое грехо́вное, / и я́ко благоутро́бен, / даждь ми сле́зы умиле́ния.

Не вни́ди со мно́ю в суд / нося́ моя́ дея́ния, / словеса́ изыску́я, и исправля́я стремле́ния, / но в щедро́тах Твои́х презира́я моя́ лю́тая, / спаси́ мя Всеси́льне.

Покая́ния вре́мя, / прихожду́ Ти Созда́телю моему́, / возми́ бре́мя от мене́ тя́жкое грехо́вное, / и я́ко благоутро́бен, / даждь ми сле́зы умиле́ния.

Бога́тство душе́вное ижди́в грехо́м, / пуст есмь доброде́телей благочести́вых, / гла́дствуя же зову́: / ми́лости пода́телю Го́споди, спаси́ мя.

Преподо́бная ма́ти Мари́е, моли́ Бо́га о нас.

Марии: Прикло́ньшися Христо́вым Боже́ственным зако́ном, / к Сему́ приступи́ла еси́, / сла́достей неудержи́мая стремле́ния оста́вивши, / и вся́кую доброде́тель всеблагогове́йно, / я́ко еди́ну испра́вила еси́.

Слава, Троичен: Пресу́щественная Тро́ице, / во Еди́нице покланя́емая, / возми́ бре́мя от мене́ тя́жкое грехо́вное, / и я́ко благоутро́бна, / даждь ми сле́зы умиле́ния.

Богородичен: Богоро́дице, наде́жде и предста́тельство Тебе́ пою́щих, / возми́ бре́мя от мене́ тя́жкое грехо́вное, / и я́ко Влады́чица Чи́стая, / ка́ющася приими́ мя.

Песнь 2.

Ирмос: Ви́дите, ви́дите, я́ко Аз есмь Бог, / ма́нну одожди́вый / и во́ду из ка́мене источи́вый / дре́вле в пусты́ни лю́дем Мои́м, / десни́цею еди́ною и кре́постию Мое́ю. (Дважды)

Му́жа уби́х, глаго́лет, / в я́зву мне, и ю́ношу в струп, / Ламе́х рыда́я вопия́ше, / ты же не трепе́щеши о душе́ моя́, / окаля́вши плоть, и ум оскверни́вши.

Столп умудри́ла еси́ созда́ти о душе́, / и утвержде́ние водрузи́ти твои́ми похотьми́, / а́ще не бы Зижди́тель удержа́л сове́ты твоя́, / и низве́ргл на зе́млю ухищре́ния твоя́.

О ка́ко поревнова́х Ламе́ху, пе́рвому уби́йце, / ду́шу я́ко му́жа, ум я́ко ю́ношу, / я́ко бра́та же моего́ те́ло уби́в, / я́ко Ка́ин уби́йца, любосла́стными стремле́ньми.

Одожди́ Госпо́дь / от Го́спода огнь иногда́, / на беззако́ние гне́вающее соже́г Содо́мляны: / ты же огнь вжегла́ еси́ гее́нский, / в не́мже и́маши, о душе́, сожещи́ся.

Уязви́хся, ура́нихся, / се стре́лы вра́жия уязви́вшия мою́ ду́шу и те́ло: / се стру́пи, гное́ния, омраче́ния, / вопию́т ра́ны самово́льных мои́х страсте́й.

Преподо́бная ма́ти Мари́е, моли́ Бо́га о нас.

Марии: Просте́рла еси́ ру́це твои́ / к ще́дрому Бо́гу, Мари́е, / в бе́здне зол погружа́емая: / и я́коже Петру́ человеколю́бно, / ру́ку Боже́ственную простре́, / твое́ обраще́ние вся́чески иски́й.

Слава, Троичен: Безнача́льная, несозда́нная Тро́ице, / неразде́льная Еди́нице, / ка́ющася мя приими́, / согреши́вша спаси́: / Твое́ есмь созда́ние, не пре́зри, / но пощади́, и изба́ви мя / о́гненнаго осужде́ния.

Богородичен: Пречи́стая Влады́чице Богороди́тельнице, / наде́ждо к Тебе́ притека́ющих, / и приста́нище су́щих в бу́ри, / Ми́лостиваго и Созда́теля, и Сы́на Твоего́, / уми́лостиви и мне / моли́твами Твои́ми.

Песнь 3.

Ирмос: Утверди́, Го́споди, на ка́мени за́поведей Твои́х / подви́гшееся се́рдце мое́, / я́ко Еди́н Свят еси́ и Госпо́дь. (Дважды)

Ага́ре дре́вле душе́, еги́птяныне уподо́билася еси́, / порабо́тившися произволе́нием, и ро́ждши / но́ваго Исма́ила, презо́рство.

Иа́ковлю ле́ствицу / разуме́ла еси́ душе́ моя́, / явля́емую от земли́ к небесе́м, / почто́ не име́ла еси́ / восхо́да тве́рда, благоче́стия?

Свяще́нника Бо́жия, и царя́ уедине́на, / Христо́во подо́бие, / в ми́ре жития́, в челове́цех подража́й.

Обрати́ся, постени́ душе́ окая́нная, / пре́жде да́же не прии́мет коне́ц жития́ торжество́: / пре́жде да́же дверь не заключи́т черто́га Госпо́дь.

Не бу́ди столп сла́ный душе́, / возврати́вшися вспять: / о́браз да устраши́т тя Содо́мский, / горе́ в Сиго́р спаса́йся.

Моле́ния Влады́ко, / Тебе́ пою́щих не отве́ржи, / но уще́дри Человеколю́бче, / и пода́ждь ве́рою прося́щим оставле́ние.

Слава, Троичен: Тро́ице про́стая, несозда́нная, / безнача́льное Естество́ / в Тро́ице пева́емая Ипоста́сей, / спаси́ ны ве́рою покланя́ющияся / держа́ве Твое́й.

Богородичен: От Отца́ безле́тно Сы́на, / в ле́то Богороди́тельнице, / неискусому́жно родила́ еси́: / стра́нное чу́до, / пребы́вши Де́ва доя́щи.

Песнь 4.

Ирмос: Услы́ша проро́к / прише́ствие Твое́, Го́споди, и убоя́ся, / я́ко хо́щеши от Де́вы роди́тися / и челове́ком яви́тися, и глаго́лаше: / услы́шах слух Твой и убоя́хся, / сла́ва си́ле Твое́й, Го́споди. (Дважды)

Вре́мя живота́ моего́ ма́ло, / и испо́лнено боле́зней и лука́вства, / но в покая́нии мя приими́, / и в ра́зум призови́, / да не бу́ду стяжа́ние, ни бра́шно чужде́му, / Спа́се, Сам мя уще́дри.

Ца́рским досто́инством, венце́м и багряни́цею оде́ян, / многоиме́нный челове́к и пра́ведный / бога́тством кипя́ и ста́ды, / внеза́пу бога́тства, сла́вы ца́рства / обнища́в лиши́ся.

А́ще пра́веден бя́ше он, и непоро́чен па́че всех, / и не убеже́ ловле́ния льсти́ваго и се́ти: / ты же грехолюби́ва су́щи окая́нная душе́, что сотвори́ши, / а́ще чесо́му о недове́домых / случи́тся наити́ тебе́?

Высокоглаго́лив ны́не есмь, / жесто́к же и се́рдцем, / вотще́ и всу́е, / да не с фарисе́ем осу́диши мя, / па́че же мытаре́во смире́ние пода́ждь ми / еди́не Ще́дре, Правосу́де, / и сему́ мя сочисли́.

Согреши́х, досади́в сосу́ду пло́ти моея́, / вем Ще́дре, / но в покая́нии мя приими́, / и в ра́зум призови́, / да не бу́ду стяжа́ние, ни бра́шно чужде́му, / Спа́се, Сам мя уще́дри.

Самоистука́н бых страстьми́, / ду́шу мою́ вредя́ Ще́дре, / но в покая́нии мя приими́, / и в ра́зум призови, / да не бу́ду стяжа́ние, ни бра́шно чужде́му, / Спа́се, Сам мя уще́дри.

Не послу́шах гла́са Твоего́, / преслу́шах писа́ние Твое́ законополо́жника, / но в покая́нии мя приими́, / и в ра́зум призови́, / да не бу́ду стяжа́ние, ни бра́шно чужде́му, / Спа́се, Сам мя уще́дри.

Преподо́бная ма́ти Мари́е, моли́ Бо́га о нас.

Марии: Вели́ких безме́стий во глубину́ низве́дшися, / неодержи́ма была́ еси́, / но востекла́ еси́ по́мыслом лу́чшим, / к кра́йней дея́ньми я́ве доброде́тели пресла́вно, / а́нгельское естество́ Мари́е, удиви́вши.

Слава, Троичен: Неразде́льное Существо́м, / несли́тное Ли́цы, / богосло́влю Тя Тро́ическое Еди́но Божество́, / я́ко единоца́рственное и сопресто́льное, / вопию́ Ти песнь вели́кую, / в вы́шних трегу́бо песносло́вимую.

Богородичен: И ражда́еши, и де́вствуеши, / и пребыва́еши обою́ду естество́м Де́ва: / Рожде́йся обновля́ет зако́ны естества́, / утро́ба же ражда́ет неражда́ющая. / Бог иде́же хо́щет, побежда́ется естества́ чин: / твори́т бо ели́ка хо́щет.

Песнь 5.

Ирмос: От нощи́ у́тренююща, / Человеколю́бче, просвети́, молю́ся, / и наста́ви и мене́ на повеле́ния Твоя́, / и научи́ мя, Спа́се, / твори́ти во́лю Твою́. (Дважды)

Ни́зу снича́щую подража́й о душе́, / прииди́, припади́ к нога́ма Иису́совыма, / да тя испра́вит, / и да хо́диши пра́во / стези́ Госпо́дни.

А́ще и кла́дязь еси́ глубо́кий Влады́ко, / источи́ ми во́ду из пречи́стых Твои́х жил, / да я́ко самаряны́ня, не ктому́ пия́й жа́жду: / жи́зни бо струи́ источа́еши.

Силоа́м да бу́дут ми / сле́зы моя́, Влады́ко Го́споди, / да умы́ю и аз зе́ницы се́рдца, / и ви́жду Тя у́мно, Све́та преве́чна.

Преподо́бная ма́ти Мари́е, моли́ Бо́га о нас.

Марии: Несравне́нным жела́нием всебога́тая, / Дре́ву возжеле́вши поклони́тися живо́тному, / сподо́билася еси́ жела́ния, / сподо́би у́бо и мене́ / улучи́ти вы́шния сла́вы.

Слава, Троичен: Тя Тро́ице сла́вим, Еди́наго Бо́га, / Свят, Свят, Свят еси́ / О́тче, Сы́не и Ду́ше, / про́стое Существо́, / Еди́нице при́сно покланя́емая.

Богородичен: Из Тебе́ облече́ся в мое́ смеше́ние, / нетле́нная безму́жная Ма́ти Де́во, / Бог созда́вый ве́ки, / и соедини́ Себе́ челове́ческое естество́.

Песнь 6.

Ирмос: Возопи́х всем се́рдцем мои́м / к ще́дрому Бо́гу, / и услы́ша мя от а́да преиспо́дняго, / и возведе́ от тли живо́т мой. (Дважды)

Аз есмь, Спа́се, / ю́же погуби́л еси́ дре́вле ца́рскую дра́хму, / но вжег свети́льник Предте́чу Твоего́ Сло́ве, / взыщи́ и обря́щи Твой о́браз.

Воста́ни и побори́, / я́ко Иису́с Амали́ка, плотски́я стра́сти, / и Гаваони́ты, ле́стныя по́мыслы, / при́сно побежда́ющи.

Преподо́бная ма́ти Мари́е, моли́ Бо́га о нас.

Марии: Да страсте́й пла́мень угаси́ши, / слез ка́пли источи́ла еси́ при́сно Мари́е, / душе́ю распаля́ема, / и́хже благода́ть пода́ждь и мне, / твоему́ рабу́.

Преподо́бная ма́ти Мари́е, моли́ Бо́га о нас.

Марии: Безстра́стие небе́сное стяжа́ла еси́, / кра́йним на земли́ житие́м ма́ти. / Те́мже тебе́ пою́щим, / страсте́й изба́витися / моли́твами твои́ми, моли́ся.

Слава, Троичен: Тро́ица есмь про́ста, неразде́льна, / разде́льна Ли́чне, / и Еди́ница есмь Естество́м соедине́на, / Оте́ц глаго́лет, и Сын, и Боже́ственный Дух.

Богородичен: Утро́ба Твоя́ Бо́га нам роди́, / воображе́нна по нам: / Его́же, я́ко Созда́теля всех, моли́ Богоро́дице, / да Твои́ми моли́твами оправди́мся.

Кондак, глас 6:

Душе́ моя́, душе́ моя́, воста́ни, что спи́ши? / Коне́ц приближа́ется, и и́маши смути́тися. / Воспряни́ у́бо, да пощади́т тя Христо́с Бог, / везде́ сый и вся́ исполня́яй.

Песнь 7.

Ирмос: Согреши́хом, беззако́нновахом, / непра́вдовахом пред Тобо́ю, / ниже́ соблюдо́хом, ниже́ сотвори́хом, / я́коже запове́дал еси́ нам; / но не преда́ждь нас до конца́, / отце́в Бо́же. (Дважды)

Исчезо́ша дни́и мои́, я́ко со́ние востаю́щаго: / те́мже я́ко Езеки́я слезю́ на ло́жи мое́м, / приложи́тися мне ле́том живота́. / Но кий Иса́ия предста́нет тебе́ душе́, / а́ще не всех Бог?

Припа́даю Ти, / и приношу́ Тебе́, я́коже сле́зы глаго́лы моя́: / согреши́х, я́ко не согреши́ блудни́ца, / и безако́нновах, я́ко и́ный никто́же на земли́, / но уще́дри Влады́ко, творе́ние Твое́, / и воззови́ мя.

Погребо́х о́браз Твой, / и растли́х за́поведь Твою́, / вся помрачи́ся добро́та, / и страстьми́ угаси́ся, Спа́се, свеща́, / но уще́дрив возда́ждь ми / я́коже пое́т Дави́д, ра́дование.

Обрати́ся, пока́йся, откры́й сокрове́нная, / глаго́ли Бо́гу вся ве́дущему: / Ты ве́си моя́ та́йная, еди́не Спа́се, / но Сам мя поми́луй, я́коже пое́т Дави́д / по ми́лости Твое́й.

Преподо́бная ма́ти Мари́е, моли́ Бо́га о нас.

Марии: Возопи́вши к Пречи́стей Богома́тери, / пе́рвее отри́нула еси́ неи́стовство страсте́й, / ну́жно стужа́ющих, / и посрами́ла еси́ врага́ запе́ншаго, / но даждь ны́не по́мощь от ско́рби, / и мне, рабу́ твоему́.

Преподо́бная ма́ти Мари́е, моли́ Бо́га о нас.

Марии: Его́же возлюби́ла еси́, Его́же возжеле́ла еси́, / Его́же ра́ди плоть изнури́ла еси́ преподо́бная, / моли́ ны́не Христа́ о рабе́х: / я́ко да ми́лостив быв всем нам, / ми́рное состоя́ние да́рует / почита́ющим Его́.

Слава, Троичен: Тро́ице про́стая, неразде́льная, / единосу́щная, и Естество́ еди́но, / Све́тове и Свет, и Свя́та три, и Еди́но Свя́то / пое́тся Бог Тро́ица, / но воспо́й, просла́ви, Живо́т и Животы́, душе́, / всех Бо́га.

Богородичен: Пое́м Тя, благослови́м Тя, / покланя́емся Ти Богороди́тельнице, / я́ко неразлу́чныя Тро́ицы породила́ еси́ еди́наго Христа́ Бо́га, / и Сама́ отве́рзла еси́ нам / су́щим на земли́ небе́сная.

Песнь 8.

Ирмос: Его́же во́инства Небе́сная сла́вят, / и трепе́щут Херуви́ми и Серафи́ми, / вся́ко дыха́ние и тварь, / по́йте, благослови́1те / и превозноси́те во вся ве́ки. (Дважды)

Сле́зную Спа́се сткля́ницу, / я́ко ми́ро истощава́я на главу́, / зову́ Ти я́коже блудни́ца, ми́лости и́щущая, / мольбу́ приношу́, / и оставле́ние прошу́ прия́ти.

А́ще и никто́же, я́коже аз согреши́ Тебе́, / но оба́че приими́ и мене́, Благоутро́бне Спа́се, / стра́хом ка́ющася, и любо́вию зову́ща: / согреши́х Тебе́ еди́ному, / поми́луй мя Ми́лостиве.

Пощади́ Спа́се Твое́ созда́ние, / и взыщи́ я́ко Па́стырь поги́бшее, / предвари́ заблу́ждшаго, восхи́ти от во́лка, / сотвори́ мя овча́ / на па́стве Твои́х ове́ц.

Егда́ Судие́ ся́деши я́ко Благоутро́бен, / и пока́жеши стра́шную сла́ву Твою́ Спа́се: / о каковы́й страх тогда́! Пе́щи горя́щей, / всем боя́щимся нестерпи́маго суди́ща Твоего́.

Преподо́бная ма́ти Мари́е, моли́ Бо́га о нас.

Марии: Све́та незаходи́маго Ма́ти, тя просвети́вши, / от омраче́ния страсте́й разреши́. / Те́мже вше́дши в духо́вную благода́ть, / просвети́ Мари́е, / тя ве́рно восхваля́ющия.

Преподо́бная ма́ти Мари́е, моли́ Бо́га о нас.

Марии: Чу́до но́во ви́дев, ужаса́шеся боже́ственный в тебе́ вои́стинну ма́ти Зоси́ма: / а́нгела бо зря́ше во пло́ти, / и у́жасом весь исполня́шеся, / Христа́ поя́ во ве́ки.

Слава, Троичен: Безнача́льне О́тче, Сы́не собезнача́льне, / Уте́шителю Благи́й, Ду́ше Пра́вый: / Сло́ва Бо́жия Роди́телю, / Отца́ безнача́льна Сло́ве, / Ду́ше живы́й и зи́ждяй, / Тро́ице Еди́нице, поми́луй мя.

Богородичен: Я́ко от оброще́ния червлени́цы Пречи́стая, / у́мная багряни́ца Емману́илева, / внутрь во чре́ве Твое́м плоть истка́ся. / Те́мже Богоро́дицу / вои́стинну Тя почита́ем.

Песнь 9.

Ирмос: Безсе́меннаго зача́тия Рождество́ несказа́нное, / Ма́тере безму́жныя нетле́нен Плод, / Бо́жие бо рожде́ние обновля́ет естества́. / Те́мже Тя вси ро́ди, / я́ко Богоневе́стную Ма́терь, / правосла́вно велича́ем. (Дважды)

Умилосе́рдися спаси́ мя, / Сы́не Дави́дов поми́луй, / бесну́ющияся сло́вом исцели́вый, / глас же благоутро́бный я́ко разбо́йнику мне рцы: / ами́нь глаго́лю тебе́, со Мно́ю бу́деши в раи́, / егда́ прииду́ во сла́ве Мое́й.

Разбо́йник оглаго́ловаше Тя, / разбо́йник Богосло́вяше Тя, / о́ба бо на кресте́ сви́сяста, / но о Благоутро́бне, я́ко ве́рному разбо́йнику Твоему́, / позна́вшему Тя Бо́га, / и мне отве́рзи дверь / сла́внаго Ца́рствия Твоего́.

Тварь содрога́шеся распина́ема Тя ви́дящи, / го́ры и ка́мения стра́хом распада́хуся, / и земля́ сотряса́шеся, и ад обнажа́шеся, / и соомрача́шеся свет во дни, / зря Тебе́ Иису́се / пригвожде́на ко Кресту́.

Досто́йных покая́ния плодо́в не истяжи́ от мене́, / и́бо кре́пость моя́ во мне оскуде́, / се́рдце мне да́руй при́сно сокруше́нное, / нищету́ же духо́вную, / да сия́ Тебе́ принесу́, / я́ко прия́тную же́ртву, еди́не Спа́се.

Судие́ мой, и ве́дче мой, / хотя́й па́ки приити́ со а́нгелы, / суди́ти ми́ру всему́, / ми́лостивным Твои́м о́ком тогда́ ви́дев мя, / пощади́ и уще́дри мя Иису́се, / па́че вся́каго естества́ челове́ча согреши́вша.

Преподо́бная ма́ти Мари́е, моли́ Бо́га о нас.

Марии: Удиви́ла еси́ всех / стра́нным житие́м твои́м, / а́нгелов чи́ны, и челове́ков собо́ры, / невеще́ственно пожи́вши, и естество́ преше́дши: / и́мже, я́ко невеще́ственныма нога́ма вше́дши Мари́е, / Иорда́н прешла́ еси́.

Преподо́бная ма́ти Мари́е, моли́ Бо́га о нас.

Марии: Уми́лостиви Созда́теля / о хва́лящих тя, преподо́бная ма́ти, / изба́витися озлобле́ний и скорбе́й / о́крест напа́дающих: / да изба́вившеся от напа́стей, возвели́чим непреста́нно / просла́вльшаго тя Го́спода.

Преподо́бне о́тче Андре́е, моли́ Бо́га о нас.

Андрею: Андре́е честны́й, и о́тче треблаже́ннейший, / па́стырю Кри́тский, / не преста́й моля́ся о воспева́ющих тя: / да изба́вимся вси гне́ва и ско́рби, и тле́ния, / и прегреше́ний безме́рных, / чту́щии твою́ па́мять ве́рно.

Слава, Троичен: Отца́ просла́вим, Сы́на превознесе́м, / Боже́ственному Ду́ху ве́рно поклони́мся, / Тро́ице неразде́льней, Еди́нице по Существу́, / я́ко Све́ту и Све́том, и Животу́ и Живото́м, / животворя́щему и просвеща́ющему концы́.

Богородичен: Град Твой сохраня́й / Богороди́тельнице Пречи́стая: / в Тебе́ бо сей ве́рно ца́рствуяй, / в Тебе́ и утвержда́ется: / и Тобо́ю побежда́яй, / побежда́ет вся́кое искуше́ние, / и пленя́ет ра́тники, / и прохо́дит послуша́ние.

Таже поем оба лика: Безсе́меннаго зача́тия Рождество́ несказа́нное, / Ма́тере безму́жныя нетле́нен Плод, / Бо́жие бо рожде́ние обновля́ет естества́. / Те́мже Тя вси ро́ди, / я́ко Богоневе́стную Ма́терь, / правосла́вно велича́ем.

И прочее последование Повечерия.

В ЧЕТВЕРТОК ПЯТЫЯ НЕДЕЛИ СВЯТЫХ ПОСТОВ, НА УТРЕНИ.

Клепает в 4-й час нощи. И собравшимся нам в церковь бывает начало от иерея, по обычаю. И глаголем: Царю́ Небе́сный: Трисвятое, и О́тче наш: Го́споди поми́луй, 12. Сла́ва, и ны́не: Прииди́те поклони́мся: И прочия два псалма, 19 и 20: и обычныя тропари, и ектения. И посем глаголем шестопсалмие, и по псалмех поем Аллилуия, и Троичны гласа, якоже обычай. И стихословим кафисму едину 8-ю. Таже глаголем седальны Осмогласника. Чтем житие преподобныя Марии, на две статии. Таже псалом 50. Песней не стихословим. И абие начинаем Великий канон косно, и с сокрушенным сердцем и гласом, творяще на кийждо тропарь метания три. Канон Великий, творение святаго Андрея Критскаго Иерусалимскаго. Глас 6.

Песнь 1.

Ирмос: Помо́щник и покрови́тель / бысть мне во спасе́ние, / Сей мой Бог, и просла́влю Его́, / Бог отца́ моего́, и вознесу́ Его́: / сла́вно бо просла́вися.

Стих: Поми́луй мя, Бо́же, поми́луй мя.

Отку́ду начну́ пла́кати / окая́ннаго моего́ жития́ дея́ний? / Ко́е ли положу́ нача́ло, Христе́, ны́нешнему рыда́нию? / Но я́ко благоутро́бен, / даждь ми прегреше́ний оставле́ние.

Гряди́ окая́нная душе́, с пло́тию твое́ю, / Зижди́телю всех испове́ждься, / и оста́нися про́чее пре́ждняго безслове́сия, / и принеси́ Бо́гу в покая́нии сле́зы.

Первозда́ннаго Ада́ма преступле́нию поревнова́в, / позна́х себе́ обнаже́на от Бо́га / и присносу́щнаго Ца́рствия и сла́дости, / грех ра́ди мои́х.

Увы мне окая́нная душе́, / что уподо́билася еси́ пе́рвей Е́ве? / Ви́дела бо еси́ зле, и уязви́лася еси́ го́рце, / и косну́лася еси́ дре́ва и вкуси́ла еси́ де́рзостно / безслове́сныя сне́ди.

Вме́сто Е́вы чу́вственныя / мы́сленная ми бысть Е́ва, / во пло́ти стра́стный по́мысл, / показу́яй сла́дкая / и вкуша́яй при́сно / го́рькаго напое́ния.

Досто́йно из Еде́ма изгна́н бысть, / я́ко не сохрани́в еди́ну Твою́, Спа́се, за́поведь Ада́м: / аз же что постражду́, / отмета́я всегда́ живо́тная Твоя́ словеса́?

Ка́иново преше́д уби́йство, / произволе́нием бых уби́йца со́вести душе́вней, / оживи́в плоть, и воева́в на ню / лука́выми мои́ми дея́ньми.

А́велеве Иису́се, не уподо́бихся пра́вде, / да́ра Тебе́ прия́тна не принесо́х когда́, / ни дея́ния боже́ственна, ни же́ртвы чи́стыя, / ни жития́ непоро́чнаго.

Я́ко Ка́ин и мы, душе́ окая́нная, / всех Соде́телю дея́ния скве́рная, / и же́ртву поро́чную, / и непотре́бное житие́ принесо́хом вку́пе: / те́мже и осуди́хомся.

Бре́ние Зда́тель живосозда́в, / вложи́л еси́ мне плоть и ко́сти, / и дыха́ние и жизнь: / но о Тво́рче мой, Изба́вителю мой, и Судие́ / ка́ющася приими́ мя.

Извеща́ю Ти Спа́се, грехи́, я́же соде́ях, / и души́ и те́ла моего́ я́звы, / я́же внутрь уби́йственнии по́мыслы / разбо́йнически на мя возложи́ша.

А́ще и согреши́х, Спа́се, / но вем, я́ко Человеколю́бец еси́, / наказу́еши ми́лостивно, и милосе́рдствуеши те́пле: / слезя́ща зри́ши, / и притека́еши я́ко Оте́ц, призыва́я блу́днаго.

Пове́ржена мя Спа́се, пред враты́ Твои́ми, / поне́ на ста́рость не отри́ни мене́ во ад тща, / но пре́жде конца́, я́ко Человеколю́бец, / даждь ми прегреше́ний оставле́ние.

В разбо́йники впады́й аз есмь, / помышле́ньми мои́ми, / весь от них уязви́хся ны́не, и испо́лнихся ран, / но Сам ми предста́в, / Христе́ Спа́се исцели́.

Свяще́нник мя предви́дев ми́мо и́де, / и леви́т ви́дя в лю́тых на́га презре́, / но из Мари́и возсия́вый Иису́се, / Ты предста́в уще́дри мя.

А́гнче Бо́жий, взе́мляй грехи́ всех, / возми́ бре́мя от мене́ тя́жкое грехо́вное, / и я́ко благоутро́бен, / даждь ми сле́зы умиле́ния.

Покая́ния вре́мя, / прихожду́ Ти Созда́телю моему́, / возми́ бре́мя от мене́ тя́жкое грехо́вное, / и я́ко благоутро́бен, / даждь ми сле́зы умиле́ния.

Не возгнуша́йся мене́ Спа́се, не отри́ни от Твоего́ лица́, / возми́ бре́мя от мене́ тя́жкое грехо́вное, / и я́ко благоутро́бен, / даждь мне грехопаде́ний оставле́ние.

Во́льная, Спа́се, и нево́льная прегреше́ния моя́, / явле́нная и сокрове́нная / и ве́домая и неве́домая, / вся прости́в, я́ко Бог, / очи́сти и спаси́ мя.

От ю́ности Христе́, за́поведи Твоя́ преступи́х, / всестра́стно небреги́й, / уны́нием преидо́х житие́. / Те́мже зову́ Ти Спа́се: / поне́ на коне́ц спаси́ мя.

Бога́тство мое́ Спа́се, изнури́в в блуде́, / пуст есмь плодо́в благочести́вых, / а́лчен же зову́: / О́тче щедро́т, предвари́в / Ты мя уще́дри.

Тебе́ припа́даю Иису́се, / согреши́х Ти, очи́сти мя, / возми́ бре́мя от мене́ тя́жкое грехо́вное, / и я́ко благоутро́бен, / даждь ми сле́зы умиле́ния.

Не вни́ди со мно́ю в суд / нося́ моя́ дея́ния, / словеса́ изыску́я, и исправля́я стремле́ния, / но в щедро́тах Твои́х презира́я моя́ лю́тая, / спаси́ мя Всеси́льне.

Иный канон преподобныя матере нашея Марии Египетския, в тойже глас, и ирмос. Егоже краестрочие: Ты преподо́бная Мари́е помога́й.

Запев: Преподо́бная ма́ти Мари́е, моли́ Бо́га о нас.

Ты ми даждь светоза́рную благода́ть / от Боже́ственнаго свы́ше промышле́ния, / избежа́ти страсте́й омраче́ния, / и пе́ти усе́рдно, твоего́ Мари́е жития́, / кра́сная исправле́ния.

Прикло́ньшися Христо́вым Боже́ственным зако́ном, / к Сему́ приступи́ла еси́, / сла́достей неудержи́мая стремле́ния оста́вивши, / и вся́кую доброде́тель всеблагогове́йно, / я́ко еди́ну испра́вила еси́.

Андрею: Преподо́бне о́тче Андре́е, моли́ Бо́га о нас.

Моли́твами твои́ми нас, Андре́е, / изба́ви страсте́й безче́стных / и Ца́рствия ны́не Христо́ва о́бщники / ве́рою и любо́вию воспева́ющия тя, сла́вне, покажи́, мо́лимся.

Слава, Троичен: Пресу́щная Тро́ице, во Еди́нице покланя́емая, / возми́ бре́мя от мене́ тя́жкое грехо́вное, / и я́ко благоутро́бна, / даждь ми сле́зы умиле́ния.

Богородичен: Богоро́дице, наде́жде и предста́тельство Тебе́ пою́щих, / возми́ бре́мя от мене́ тя́жкое грехо́вное, / и я́ко Влады́чица Чи́стая, / ка́ющася приими́ мя.

Песнь 2.

Ирмос: Вонми́, не́бо, и возглаго́лю, / и воспою́ Христа́, / от Де́вы пло́тию прише́дшаго.

Вонми́ не́бо, и возглаго́лю, / земле́, внуша́й глас, / ка́ющийся к Бо́гу и воспева́ющий Его́.

Вонми́ ми, Бо́же, Спа́се мой / ми́лостивным Твои́м о́ком, / и приими́ мое́ те́плое испове́дание.

Согреши́х па́че всех челове́к, / еди́н согреши́х Тебе́: / но уще́дри я́ко Бог, Спа́се, / творе́ние Твое́.

Бу́ря мя злых обдержи́т, / благоутро́бне Го́споди: / но я́ко Петру́, / и мне ру́ку простри́.

Сле́зы блудни́цы, Ще́дре, / и аз предлага́ю: / очи́сти мя, Спа́се, / благоутро́бием Твои́м.

Омрачи́х душе́вную красоту́ / страсте́й сластьми́, / и вся́чески весь ум / персть сотвори́х.

Раздра́х ны́не оде́жду мою́ пе́рвую, / и́же ми изтка́ Зижди́тель из нача́ла, / и отту́ду лежу́ наг.

Облеко́хся в раздра́нную ри́зу, / ю́же изтка́ ми змий сове́том, / и стыжду́ся.

Воззре́х на садо́вную красоту́ / и прельсти́хся умо́м: / и отту́ду лежу́ наг, и срамля́юся.

Де́лаша на хребте́ мое́м / вси нача́льницы страсте́й, / продолжа́юще на мя / беззако́ние их.

Погуби́х первозда́нную добро́ту / и благоле́пие мое́, / и ны́не лежу́ наг, и стыжду́ся.

Сшива́ше ко́жныя ри́зы грех мне, / обнажи́вый мя пе́рвыя / боготка́нныя оде́жды.

Обложе́н есмь одея́нием студа́, / я́коже ли́ствием смоко́вным, / во обличе́ние мои́х самовла́стных страсте́й.

Оде́яхся в сра́мную ри́зу, / и окровавле́нную сту́дно, / тече́нием стра́стнаго и любосла́стнаго живота́.

Оскверни́х пло́ти моея́ ри́зу / и окаля́х / е́же по о́бразу, Спа́се, / и по подо́бию.

Впадо́х в стра́стную па́губу / и в веще́ственную тлю, / и отто́ле до ны́не враг мне досажда́ет.

Любове́щное и любоиме́нное житие́, / невоздержа́нием Спа́се предпоче́т ны́не, / тя́жким бре́менем обложе́н есмь.

Украси́х плотски́й о́браз / скве́рных помышле́ний разли́чным обложе́нием, / и осужда́юся.

Вне́шним приле́жно благоукраше́нием / еди́нем попеко́хся, / вну́треннюю презре́в / богообра́зную ски́нию.

Вообрази́в мои́х страсте́й безобра́зие, / любосла́стными стремле́ньми / погуби́х ума́ красоту́.

Погребо́х пе́рваго о́браза добро́ту Спа́се страстьми́, / ю́же я́ко иногда́ дра́хму, / взыска́в обря́щи.

Согреши́х, я́коже блудни́ца вопию́ Ти: / еди́н согреши́х Тебе́, / я́ко ми́ро приими́ Спа́се / и моя́ сле́зы.

Поползо́хся я́ко Дави́д блу́дно, и оскверни́хся, / но омы́й и мене́ Спа́се, слеза́ми.

Очи́сти, я́коже мыта́рь вопию́ Ти, / Спа́се, очи́сти мя: / никто́же бо су́щих из Ада́ма, я́коже аз / согреши́х Тебе́.

Ни слез, ниже́ покая́ния и́мам, ниже́ умиле́ния: / Сам ми сия́ Спа́се, / я́ко Бог да́руй.

Дверь Твою́ не затвори́ мне тогда́, / Го́споди, Го́споди, / но отве́рзи ми сию́ / ка́ющемуся Тебе́.

Человеколю́бче хотя́й всем спасти́ся, / Ты воззови́ мя, / и приими́ я́ко Благ ка́ющагося.

Внуши́ воздыха́ния души́ моея́, / и о́чию мое́ю приими́ ка́пли Спа́се, / и спаси́ мя.

Пресвята́я Богоро́дице, спаси́ нас.

Богородичен: Пречи́стая Богоро́дице Де́во, / еди́на Всепе́тая, / моли́ приле́жно, во е́же спасти́ся нам.

Ирмос: Ви́дите, ви́дите, я́ко Аз есмь Бог, / ма́нну одожди́вый / и во́ду из ка́мене источи́вый / дре́вле в пусты́ни лю́дем Мои́м, / десни́цею еди́ною и кре́постию Мое́ю.

Ви́дите ви́дите, я́ко Аз есмь Бог: / внуша́й душе́ моя́ Го́спода вопию́ща, / и удали́ся пре́жняго греха́, / и бо́йся я́ко неумы́тнаго, / и я́ко Судии́ и Бо́га.

Кому́ уподо́билася еси́ многогре́шная душе́, / то́кмо пе́рвому Ка́ину, и Ламе́ху о́ному, / каменова́вшая те́ло злоде́йствы, / и уби́вшая ум безслове́сными стремле́ньми.

Вся пре́жде зако́на прете́кши, о душе́! / Си́фу не уподо́билася еси́, / ни Ено́са подража́ла еси́, / ни Ено́ха преложе́нием, ни Но́я, / но яви́лася еси́ убо́га пра́ведных жи́зни.

Еди́на отве́рзла еси́ хля́би гне́ва, / Бо́га твоего́, душе́ моя́, / и потопи́ла еси́ всю, я́коже зе́млю плоть, и дея́ния и житие́, / и пребыла́ еси́ вне спаси́тельнаго ковче́га.

Му́жа уби́х, глаго́лет, / в я́зву мне, и ю́ношу в струп, / Ламе́х рыда́я вопия́ше, / ты же не трепе́щеши о душе́ моя́, / окаля́вши плоть, и ум оскверни́вши.

О ка́ко поревнова́х Ламе́ху, пе́рвому уби́йце, / ду́шу я́ко му́жа, ум я́ко ю́ношу, / я́ко бра́та же моего́ те́ло уби́в, / я́ко Ка́ин уби́йца, любосла́стными стремле́ньми.

Столп умудри́ла еси́ созда́ти о душе́, / и утвержде́ние водрузи́ти твои́ми похотьми́, / а́ще не бы Зижди́тель удержа́л сове́ты твоя́, / и низве́ргл на зе́млю ухищре́ния твоя́.

Уязви́хся, ура́нихся, / се стре́лы вра́жия уязви́вшия мою́ ду́шу и те́ло: / се стру́пи, гное́ния, омраче́ния, / вопию́т ра́ны самово́льных мои́х страсте́й.

Одожди́ Госпо́дь / от Го́спода огнь иногда́, / на беззако́ние гне́вающее соже́г Содо́мляны: / ты же огнь вжегла́ еси́ гее́нский, / в не́мже и́маши, о душе́, сожещи́ся.

Разуме́йте и ви́дите, я́ко Аз есмь Бог, / испыта́яй сердца́, и уму́чаяй мы́сли, / облича́яй дея́ния, и попаля́яй грехи́, / и судя́й си́ру, и смире́ну, и ни́щу.

Преподо́бная ма́ти Мари́е, моли́ Бо́га о нас.

Преподобней: Просте́рла еси́ ру́це твои́ / к ще́дрому Бо́гу, Мари́е, / в бе́здне зол погружа́емая: / и я́коже Петру́ человеколю́бно, / ру́ку Боже́ственную простре́, / твое́ обраще́ние вся́чески иски́й.

Марии: Всем усе́рдием и любо́вию / притекла́ еси́ Христу́, / пе́рвый греха́ путь отвра́щши, / и в пусты́нях непроходи́мых пита́ющися, / и Того́ чи́сте соверша́ющи Боже́ственныя за́поведи.

Запев: Преподо́бне о́тче Андре́е, моли́ Бо́га о нас.

Ви́дим, ви́дим человеколю́бие, о душе́, / Бо́га и Влады́ки: / сего́ ра́ди пре́жде конца́, Тому́ со слеза́ми припаде́м вопию́ще: / Андре́я моли́твами, Спа́се, поми́луй нас.

Слава, Троичен: Безнача́льная, несозда́нная Тро́ице, / неразде́льная Еди́нице, / ка́ющася мя приими́, / согреши́вша спаси́: / Твое́ есмь созда́ние, не пре́зри, / но пощади́, и изба́ви мя / о́гненнаго осужде́ния.

Богородичен: Пречи́стая Влады́чице Богороди́тельнице, / наде́ждо к Тебе́ притека́ющих, / и приста́нище су́щих в бу́ри, / Ми́лостиваго и Созда́теля, и Сы́на Твоего́, / уми́лостиви и мне / моли́твами Твои́ми.

Песнь 3.

Ирмос: На недви́жимом, Христе́, ка́мени за́поведий Твои́х, / утверди́ мое́ помышле́ние.

Огнь от Го́спода иногда́ / Госпо́дь одожди́в, / зе́млю Содо́мскую / пре́жде попали́.

На горе́ спаса́йся, душе́, / я́коже Лот о́ный, / и в Сиго́р угонза́й.

Бе́гай запале́ния, о душе́, / бе́гай Содо́мскаго горе́ния, / бе́гай тле́ния Боже́ственнаго пла́мене.

Испове́даюся Тебе́, Спа́се: / согреши́х, согреши́х Ти: / но осла́би, оста́ви ми, / я́ко благоутро́бен.

Согреши́х Тебе́ еди́н аз, / согреши́х па́че всех, Христе́ Спа́се, / да не пре́зриши мене́.

Ты еси́ Па́стырь до́брый, / взыщи́ мене́ а́гнца, / и заблу́ждшаго да не пре́зриши мене́.

Ты еси́ сла́дкий, Иису́се, / Ты еси́ Созда́телю мой: / в Тебе́, Спа́се, оправда́юся.

Пресвята́я Тро́ице Бо́же наш, сла́ва Тебе́.

Троичен: О Тро́ице Еди́нице Бо́же! / Спаси́ нас от пре́лести, / и искуше́ний, и обстоя́ний.

Пресвята́я Богоро́дице, спаси́ нас.

Богородичен: Ра́дуйся, Богоприя́тная утро́бо, / ра́дуйся, престо́ле Госпо́день, / ра́дуйся, Ма́ти Жи́зни на́шея.

Ирмос: Утверди́, Го́споди, на ка́мени за́поведей Твои́х / подви́гшееся се́рдце мое́, / я́ко Еди́н Свят еси́ и Госпо́дь.

Исто́чник живота́ стяжа́х Тебе́, / сме́рти низложи́теля, / и вопию́ Ти от се́рдца моего́ пре́жде конца́: / согреши́х, очи́сти и спаси́ мя.

При Но́и, Спа́се, / блу́дствовавшия подража́х, / о́нех насле́дствовав осужде́ние, / в пото́пе погруже́ния.

Согреши́х, Го́споди, / согреши́х Тебе́, очи́сти мя: / несть бо и́же кто согреши́ в челове́цех, / его́же не превзыдо́х прегреше́ньми.

Ха́ма о́наго душе́, / отцеуби́йца подража́вши, / сра́ма не покры́ла еси́ и́скренняго, / вспять зря возврати́вшися.

Благослове́ния Си́мова не насле́довала еси́ душе́ окая́нная, / ни простра́нное одержа́ние, / я́коже Иа́фет име́ла еси́ на земли́ оставле́ния.

От земли́ Харра́н, / изы́ди от греха́ душе́ моя́, / гряди́ в зе́млю точа́щую присноживо́тное нетле́ние, / е́же Авраа́м насле́дствова.

Авраа́ма слы́шала еси́ душе́ моя́, / дре́вле оста́вльша зе́млю оте́чества, / и бы́вша прише́льца, / сего́ произволе́нию подража́й.

У ду́ба Мамври́йскаго / учреди́в патриа́рх а́нгелы, / насле́дствова по ста́рости / обетова́ния лови́тву.

Исаа́ка окая́нная душе́ моя́, / разуме́вши но́вую же́ртву, / та́йно всесожже́нную Го́сподеви, / подража́й его́ произволе́нию.

Исма́ила слы́шала еси́, трезви́ся душе́ моя́, / изгна́на я́ко рабы́нино отрожде́ние, / виждь, да не ка́ко подо́бно что / постра́ждеши ласкосе́рдствующи.

Ага́ре дре́вле душе́, еги́птяныне уподо́билася еси́, / порабо́тившися произволе́нием, и ро́ждши / но́ваго Исма́ила, презо́рство.

Иа́ковлю ле́ствицу / разуме́ла еси́ душе́ моя́, / явля́емую от земли́ к небесе́м, / почто́ не име́ла еси́ / восхо́да тве́рда, благоче́стия?

Свяще́нника Бо́жия, и царя́ уедине́на, / Христо́во подо́бие, / в ми́ре жития́, в челове́цех подража́й.

Не бу́ди столп сла́ный душе́, / возврати́вшися вспять: / о́браз да устраши́т тя Содо́мский, / горе́ в Сиго́р спаса́йся.

Запале́ния я́коже Лот, / бе́гай душе́ моя́ греха́: / бе́гай Содо́мы и Гомо́рры, / бе́гай пла́мене вся́каго безслове́снаго жела́ния.

Поми́луй Го́споди, поми́луй мя, вопию́ Ти, / егда́ прии́деши со а́нгелы Твои́ми, / возда́ти всем по достоя́нию дея́ний.

Моле́ния Влады́ко, / Тебе́ пою́щих не отве́ржи, / но уще́дри Человеколю́бче, / и пода́ждь ве́рою прося́щим оставле́ние.

Преподо́бная ма́ти Мари́е, моли́ Бо́га о нас.

Марии: Содержи́мь есмь бу́рею, и треволне́нием согреше́ний, / но сама́ мя ма́ти ны́не спаси́, / и к приста́нищу Боже́ственнаго покая́ния возведи́.

Преподо́бная ма́ти Мари́е, моли́ Бо́га о нас.

Марии: Ра́бское моле́ние и ны́не преподо́бная / прине́сши ко благоутро́бней моли́твами твои́ми Богоро́дице, / отве́рзи ми Боже́ственныя вхо́ды.

Преподо́бне о́тче Андре́е, моли́ Бо́га о нас.

Андрею: Твои́ми моли́твами да́руй / и мне оставле́ние долго́в, / о Андре́е, Кри́тский председа́телю! / покая́ния бо ты таи́нник преизря́дный.

Слава, Троичен: Тро́ице про́стая, несозда́нная, / безнача́льное Естество́, / в Тро́ице пева́емая Ипоста́сей, / спаси́ ны ве́рою покланя́ющияся / держа́ве Твое́й.

Богородичен: От Отца́ безле́тна Сы́на, / в ле́то Богороди́тельнице / неискусому́жно родила́ еси́, / стра́нное чу́до, / пребы́вши Де́ва доя́щи.

Ирмос: Утверди́, Го́споди, на ка́мени:

Седален, господина Иосифа, глас 8: Подобен: Воскре́сл еси́ от гро́ба:

Свети́ла богозра́чная, Спа́совы апо́столи, / просвети́те нас во тьме жития́, / я́ко да во дни ны́не благообра́зно хо́дим, / све́том воздержа́ния нощны́х страсте́й отбега́юще, / и све́тлыя стра́сти Христо́вы у́зрим, ра́дующеся.

Слава, другий седален, глас 8 Подобен: Повеле́нное та́йно:

Апо́стольская двоенадеся́тице богоизбра́нная, / мольбу́ Христу́ ны́не принеси́, / по́стное по́прище всем прейти́, / соверша́ющим во умиле́нии моли́твы, / творя́щим усе́рдно доброде́тели, / я́ко да си́це предвари́м ви́дети / Христа́ Бо́га сла́вное Воскресе́ние, / сла́ву и хвалу́ принося́ще.

И ныне, Богородичен. Подобен: Непостижи́маго Бо́га, Сы́на и Сло́во, / несказа́нно па́че ума́ из Тебе́ ро́ждшееся, / моли́ Богоро́дице со апо́столы, / мир вселе́нней чи́стый пода́ти, / и согреше́ний да́ти нам пре́жде конца́ проще́ние, / и Ца́рствия Небе́снаго кра́йния ра́ди бла́гости, / сподо́бити рабы́ Твоя́.

И чтем оста́вшее жития́ преподо́бныя Мари́и.

Таже трипеснец, без поклонов, глас 8. Песнь 4.

Ирмос: Услы́шах, Го́споди, / смотре́ния Твоего́ та́инство, / разуме́х дела́ Твоя́ / и просла́вих Твое́ Божество́.

Святи́и Апо́столи, моли́те Бо́га о нас.

Воздержа́нием пожи́вше / просвеще́ннии Христо́вы апо́столи, / воздержа́ния вре́мя нам / хода́тайствы Боже́ственными утиша́ют.

Двоенадесятостру́нный орга́н, / песнь воспе́ спаси́тельную, / ученико́в лик боже́ственный, / лука́вая возмуща́я гласова́ния.

Одожде́нием духо́вным / всю подсо́лнечную напои́сте, / су́шу отгна́вше многобо́жия всеблаже́ннии.

Пресвята́я Богоро́дице, спаси́ нас.

Богородичен: Смири́вшася спаси́ мя, / высокому́дренно пожи́вшаго, / ро́ждшая Возне́сшаго смире́нное естество́, / Де́во Всечи́стая.

Иный. Глас тойже.

Ирмос: Услы́шах, Го́споди:

Святи́и Апо́столи, моли́те Бо́га о нас.

Апо́стольское всечестно́е ликостоя́ние, / Зижди́теля всех моля́щее, / проси́ поми́ловати ны восхваля́ющия тя.

Я́ко де́лателе су́ще Христо́вы апо́столи, / во всем ми́ре Боже́ственным Сло́вом возде́лавшии, / прино́сите плоды́ Ему́ всегда́.

Виногра́д бы́сте Христо́в / вои́стинну возлю́бленный, / вино́ бо духо́вное источи́сте ми́ру апо́столи.

Пресвята́я Тро́ице Бо́же наш, сла́ва Тебе́.

Троичен: Пренача́льная, сообра́зная, / всеси́льнейшая Тро́ице Свята́я, / О́тче, Сло́ве и Ду́ше Святы́й, / Бо́же, Све́те и Животе́, / сохрани́ ста́до Твое́.

Пресвята́я Богоро́дице, спаси́ нас.

Богородичен: Ра́дуйся, престо́ле огнезра́чный, / ра́дуйся, свети́льниче свещено́сный, / ра́дуйся, горо́ освяще́ния, ковче́же жи́зни, / святы́х свята́я се́не.

Ирмос: Услы́ша проро́к / прише́ствие Твое́, Го́споди, и убоя́ся, / я́ко хо́щеши от Де́вы роди́тися / и челове́ком яви́тися, и глаго́лаше: / услы́шах слух Твой и убоя́хся, / сла́ва си́ле Твое́й, Го́споди.

Дел Твои́х да не пре́зриши, / созда́ния Твоего́ да не оста́виши, Правосу́де, / а́ще и еди́н согреши́х, я́ко человек, / па́че вся́каго челове́ка, Человеколю́бче, / но и́маши, я́ко Госпо́дь всех, / власть оставля́ти грехи́.

Приближа́ется, душе́, коне́ц, приближа́ется, / и неради́ши, ни гото́вишися: / вре́мя сокраща́ется, воста́ни, близ при две́рех Судия́ есть: / я́ко со́ние, я́ко цвет, вре́мя жития́ тече́т: / что всу́е мяте́мся?

Воспряни́, о душе́ моя́, / дея́ния твоя́, я́же соде́лала еси́, помышля́й, / и сия́ пред лице́ твое́ принеси́, / и ка́пли испусти́ слез твои́х: / рцы со дерзнове́нием дея́ния и помышле́ния Христу́, / и оправда́йся.

Не бысть в житии́ греха́, ни дея́ния, ни зло́бы, / ея́же аз, Спа́се, не согреши́х / умо́м и сло́вом, и произволе́нием / и предложе́нием, и мы́слию, и дея́нием согреши́в, / я́ко ин никто́же когда́.

Отсю́ду и осужде́н бых, / отсю́ду препре́н бых аз окая́нный от своея́ со́вести, / ея́же ничто́же в ми́ре нужне́йше: / Судие́, Изба́вителю мой, и ве́дче, / пощади́ и изба́ви, и спаси́ мя раба́ Твоего́.

Ле́ствица, ю́же ви́де дре́вле / вели́кий в патриа́рсех, / указа́ние есть душе́ моя́, / де́ятельнаго восхожде́ния, разу́мнаго возше́ствия: / а́ще хо́щеши у́бо, дея́нием, и ра́зумом, / и зре́нием пожи́ти, обнови́ся.

Зной дневны́й претерпе́ / лише́ния ра́ди патриа́рх, / и мраз нощны́й понесе́, / на всяк день снабде́ния творя́, / пасы́й, тружда́яйся, рабо́таяй, / да две жене́ сочета́ет.

Жены́ ми две разуме́й, / дея́ние же и ра́зум в зре́нии, / Ли́ю у́бо дея́ние, я́ко многоча́дную: / Рахи́ль же ра́зум, я́ко многотру́дную: / и́бо кроме́ трудо́в, ни дея́ние, ни зре́ние душе́, испра́вится.

Бди о душе́ моя́! / Изря́дствуй я́коже дре́вле вели́кий в патриа́рсех, / да стя́жеши дея́ние с ра́зумом, / да бу́деши ум зряй Бо́га / и дости́гнеши незаходя́щий мрак в виде́нии, / и бу́деши вели́кий купе́ц.

Двана́десять патриа́рхов, / вели́кий в патриа́рсех детотвори́в, / та́йно утверди́ тебе́ / ле́ствицу де́ятельнаго душе́ моя́ восхожде́ния: / де́ти, я́ко основа́ния: степе́ни, / я́ко восхожде́ния, прему́дренно подложи́в.

Иса́ва возненави́деннаго подража́ла еси́ душе́, / отдала́ еси́ преле́стнику твоему́ / пе́рвыя добро́ты пе́рвенство, / и оте́ческия моли́твы отпа́ла еси́, / и два́жды поползну́лася еси́ окая́нная, / дея́нием и ра́зумом: / те́мже ны́не пока́йся.

Едо́м Иса́в нарече́ся, / кра́йняго ра́ди женонеи́стовнаго смеше́ния: / невоздержа́нием бо при́сно разжига́емь, / и сластьми́ оскверня́емь, / Едо́м именова́ся, / е́же глаго́лется разжже́ние души́ любогрехо́вныя.

И́ова на гно́ищи слы́шавши, / о душе́ моя́, оправда́вшагося, / того́ му́жеству не поревнова́ла еси́, / тве́рдаго не име́ла еси́ предложе́ния, во всех я́же ве́си, / и и́миже искуси́лася еси́, / но яви́лася еси́ нетерпели́ва.

И́же пе́рвее на престо́ле, / наг ны́не на гно́ищи гно́ен: / мно́гий в ча́дех и сла́вный, / безча́ден и бездо́мок напра́сно: / пала́ту у́бо гно́ище, / и би́серие стру́пы вменя́ше.

Ца́рским досто́инством, венце́м и багряни́цею оде́ян, / многоиме́нный челове́к и пра́ведный / бога́тством кипя́ и ста́ды, / внеза́пу бога́тства, сла́вы ца́рства / обнища́в лиши́ся.

А́ще пра́веден бя́ше он, и непоро́чен па́че всех, / и не убеже́ ловле́ния льсти́ваго и се́ти: / ты же грехолюби́ва су́щи окая́нная душе́, что сотвори́ши, / а́ще чесо́му о недове́домых / случи́тся наити́ тебе́?

Те́ло оскверни́ся, дух окаля́ся, / весь острупи́хся, / но я́ко врач Христе́, / обоя́ покая́нием мои́м уврачу́й, / омы́й, очи́сти, / покажи́ Спа́се мой, / па́че сне́га чисте́йша.

Те́ло Твое́ и кровь распина́емый о всех / положи́л еси́ Сло́ве: / те́ло у́бо, да мя обнови́ши: / кровь, да омы́еши мя: / дух же пре́дал еси́, / да мя приведе́ши Христе́, / Твоему́ Роди́телю.

Соде́лал еси́ спасе́ние / посреде́ земли́ Ще́дре, / да спасе́мся. / Во́лею на Дре́ве распя́лся еси́. / Еде́м затворе́нный отве́рзеся, / го́рняя и до́льняя тварь, / язы́цы вси спасе́ни / покланя́ются Тебе́.

Да бу́дет ми купе́ль, / кровь из ребр Твои́х, / вку́пе и питие́, / источи́вшее во́ду оставле́ния, / да обою́ду очища́юся, / помазу́яся и пия́: / я́ко пома́зание и питие́ Сло́ве, / живото́чная Твоя́ словеса́.

Наг есмь черто́га, / наг есмь и бра́ка, ку́пно и ве́чери: / свети́льник угасе́, я́ко безъеле́йный, / черто́г заключи́ся мне спя́щу, / ве́черя снеде́ся: / аз же по руку́ и но́гу свя́зан, / вон низве́ржен есмь.

Ча́шу Це́рковь стяжа́, / ре́бра Твоя́ живоно́сная, / из ни́хже сугу́быя нам источи́ то́ки, / оставле́ния и ра́зума, / во о́браз дре́вняго и но́ваго / двои́х вку́пе заве́тов, Спа́се наш.

Вре́мя живота́ моего́ ма́ло, / и испо́лнено боле́зней и лука́вства, / но в покая́нии мя приими́, / и в ра́зум призови́, / да не бу́ду стяжа́ние, ни бра́шно чужде́му, / Спа́се, Сам мя уще́дри.

Высокоглаго́лив ны́не есмь, / жесто́к же и се́рдцем, / вотще́ и всу́е, / да не с фарисе́ем осу́диши мя, / па́че же мытаре́во смире́ние пода́ждь ми / еди́не Ще́дре, Правосу́де, / и сему́ мя сочисли́.

Согреши́х, досади́в сосу́ду пло́ти моея́, / вем Ще́дре, / но в покая́нии мя приими́, / и в ра́зум призови́, / да не бу́ду стяжа́ние, ни бра́шно чужде́му, / Спа́се, Сам мя уще́дри.

Самоистука́н бых страстьми́, / ду́шу мою́ вредя́ Ще́дре, / но в покая́нии мя приими́, / и в ра́зум призови, / да не бу́ду стяжа́ние, ни бра́шно чужде́му, / Спа́се, Сам мя уще́дри.

Не послу́шах гла́са Твоего́, / преслу́шах писа́ние Твое́ законополо́жника, / но в покая́нии мя приими́, / и в ра́зум призови́, / да не бу́ду стяжа́ние, ни бра́шно чужде́му, / Спа́се, Сам мя уще́дри.

Преподо́бная ма́ти Мари́е, моли́ Бо́га о нас.

Марии: Безпло́тных жи́тельство в пло́ти преходя́щи, / благода́ть преподо́бная к Бо́гу / ве́лию вои́стинну прия́ла еси́, / ве́рно о чту́щих тя предста́тельствуй. / Те́мже мо́лим тя, / от вся́ких напа́стей и нас моли́твами твои́ми изба́ви.

Преподо́бная ма́ти Мари́е, моли́ Бо́га о нас.

Марии: Вели́ких безме́стий во глубину́ низве́дшися, / неодержи́ма была́ еси́, / но востекла́ еси́ по́мыслом лу́чшим, / к кра́йней дея́ньми я́ве доброде́тели пресла́вно, / а́нгельское естество́ Мари́е, удиви́вши.

Преподо́бне о́тче Андре́е, моли́ Бо́га о нас.

Андрею: Андре́е, оте́ческая похвало́, / моли́твами твои́ми не преста́й моля́ся, / предстоя́ Тро́ице Пребоже́ственней, / я́ко да изба́вимся муче́ния, / любо́вию предста́теля тя боже́ственнаго всеблаже́нне призыва́ющии, / Кри́ту удобре́ние.

Слава, Троичен: Неразде́льное Существо́м, / несли́тное Ли́цы, / богосло́влю Тя Тро́ическое Еди́но Божество́, / я́ко единоца́рственное и сопресто́льное, / вопию́ Ти песнь вели́кую, / в вы́шних трегу́бо песносло́вимую.

Богородичен: И ражда́еши, и де́вствуеши, / и пребыва́еши обою́ду естество́м Де́ва: / Рожде́йся обновля́ет зако́ны естества́, / утро́ба же ражда́ет неражда́ющая. / Бог иде́же хо́щет, побежда́ется естества́ чин: / твори́т бо ели́ка хо́щет.

Песнь 5.

Ирмос: От нощи́ у́тренююща, / Человеколю́бче, просвети́, молю́ся, / и наста́ви и мене́ на повеле́ния Твоя́, / и научи́ мя, Спа́се, / твори́ти во́лю Твою́.

В нощи́ житие́ мое́ преидо́х при́сно, / тьма бо бысть и глубока́ мне мгла, нощь греха́, / но я́ко дне сы́на Спа́се покажи́ мя.

Руви́ма подража́я окая́нный аз, / соде́ях беззако́нный и законопресту́пный сове́т на Бо́га Вы́шняго, / оскверни́в ло́же мое́, я́ко о́тчее он.

Испове́даюся Тебе́ Христе́ Царю́, / согреши́х, согреши́х, / я́ко пре́жде Ио́сифа бра́тия прода́вшии, / чистоты́ плод и целому́дрия.

От сро́дников пра́ведная душа́ связа́ся, / прода́ся в рабо́ту сла́дкий, / во о́браз Госпо́день: / ты же вся душе́, продала́ся еси́ / злы́ми твои́ми.

Ио́сифа пра́веднаго и целому́дреннаго ума́ / подража́й окая́нная, и неиску́сная душе́, / и не оскверня́йся безслове́сными стремле́ньми / при́сно беззако́ннующи.

А́ще и в ро́ве поживе́ иногда́ Ио́сиф, / Влады́ко Го́споди, / но во о́браз погребе́ния и воста́ния Твоего́: / аз же что Тебе́ когда́ сицево́е принесу́?

Моисе́ов слы́шала еси́ ковче́жец душе́, / вода́ми, волна́ми носи́м ре́чными, / я́ко в черто́зе дре́вле бе́гающий де́ла го́рькаго / сове́та фараони́тска.

А́ще ба́бы слы́шала еси́, убива́ющия иногда́ / безвозра́стное му́жеское, душе́ окая́нная, целому́дрия дея́ние, / ны́не я́ко вели́кий Моисе́й, / сси прему́дрость.

Я́ко Моисе́й вели́кий / еги́птянина, ума́ уязви́вши / окая́нная, не уби́ла еси́ душе́: / и ка́ко всели́шися, глаго́ли, / в пусты́ню страсте́й покая́нием?

В пусты́ню всели́ся вели́кий Моисе́й, / гряди́ у́бо подража́й того́ житие́, / да и в купине́ богоявле́ния душе́, / в виде́нии бу́деши.

Моисе́ов жезл вообража́й душе́, / ударя́ющий мо́ре, и огустева́ющий глубину́, / во о́браз Креста́ Боже́ственнаго: / и́мже мо́жеши и ты / вели́кая соверши́ти.

Ааро́н приноша́ше огнь Бо́гу, непоро́чный, неле́стный: / но Офни́ и Финее́с, я́ко ты душе́, / приноша́ху чужде́е Бо́гу оскверне́нное житие́.

Я́ко тя́жкий нра́вом, / фарао́ну го́рькому бых Влады́ко, / Ианни́, и Иамври́, душе́ю и те́лом, / и погруже́н умо́м, но помози́ ми.

Ка́лом смеси́хся окая́нный умо́м, / омы́й мя Влады́ко, ба́нею мои́х слез, / молю́ Тя, пло́ти моея́ оде́жду / убели́в я́ко снег.

А́ще испыта́ю моя́ дела́ Спа́се, / вся́каго челове́ка превозше́дша греха́ми себе́ зрю, / я́ко ра́зумом му́дрствуяй согреши́х, / не неве́дением.

Пощади́ пощади́ Го́споди, созда́ние Твое́, / согреши́х, осла́би ми, / я́ко естество́м чи́стый Сам сый еди́н, / и ин ра́зве Тебе́ / никто́же есть кроме́ скве́рны.

Мене́ ра́ди Бог сый, / вообрази́лся еси́ в мя, / показа́л еси́ чудеса́, исцели́в прокаже́нныя, / и разсла́бленнаго стягну́в, / кровоточи́выя ток уста́вил еси́ Спа́се, / прикоснове́нием риз.

Кровоточи́вую подража́й окая́нная душе́, / притецы́, удержи́ оме́ты Христо́вы, / да изба́вишися ран, / и услы́шиши от Него́: / ве́ра твоя́ спасе́ тя.

Ни́зу снича́щую подража́й о душе́, / прииди́, припади́ к нога́ма Иису́совыма, / да тя испра́вит, / и да хо́диши пра́во / стези́ Госпо́дни.

А́ще и кла́дязь еси́ глубо́кий Влады́ко, / источи́ ми во́ду из пречи́стых Твои́х жил, / да я́ко самаряны́ня, не ктому́ пия́й жа́жду: / жи́зни бо струи́ источа́еши.

Силоа́м да бу́дут ми / сле́зы моя́, Влады́ко Го́споди, / да умы́ю и аз зе́ницы се́рдца, / и ви́жду Тя у́мно, Све́та преве́чна.

Преподо́бная ма́ти Мари́е, моли́ Бо́га о нас.

Марии: Несравне́нным жела́нием всебога́тая, / Дре́ву возжеле́вши поклони́тися живо́тному, / сподо́билася еси́ жела́ния, / сподо́би у́бо и мене́ / улучи́ти вы́шния сла́вы.

Преподо́бная ма́ти Мари́е, моли́ Бо́га о нас.

Марии: Струи́ Иорда́нския преше́дши, / обрела́ еси́ поко́й безболе́зненный, / пло́ти сла́сти избежа́вши, / ея́же и нас изми́ / твои́ми моли́твами преподо́бная.

Преподо́бне о́тче Андре́е, моли́ Бо́га о нас.

Андрею: Я́ко па́стырей изря́днейша, / Андре́е прему́дре, / избра́нна су́ща тя, / любо́вию ве́лию и стра́хом молю́, / твои́ми моли́твами спасе́ние улучи́ти, / и жизнь ве́чную.

Слава, Троичен: Тя Тро́ице сла́вим, Еди́наго Бо́га, / Свят, Свят, Свят еси́ / О́тче, Сы́не и Ду́ше, / про́стое Существо́, / Еди́нице при́сно покланя́емая.

Богородичен: Из Тебе́ облече́ся в мое́ смеше́ние, / нетле́нная безму́жная Ма́ти Де́во, / Бог созда́вый ве́ки, / и соедини́ Себе́ челове́ческое естество́.

Песнь 6.

Ирмос: Возопи́х всем се́рдцем мои́м / к ще́дрому Бо́гу, / и услы́ша мя от а́да преиспо́дняго, / и возведе́ от тли живо́т мой.

Сле́зы Спа́се о́чию мое́ю, / и из глубины́ воздыха́ния / чи́сте приношу́, вопию́щу се́рдцу: / Бо́же, согреши́х Ти / очи́сти мя.

Уклони́лася еси́ душе́, от Го́спода твоего́, / я́коже Дафа́н и Авиро́н: / но пощади́, воззови́ из а́да преиспо́дняго, / да не про́пасть земна́я тебе́ покры́ет.

Я́ко ю́ница душе́ разсвире́певшая, / уподо́билася еси́ Ефре́му, / я́ко се́рна от тене́т сохрани́ житие́, / впери́вши дея́нием ум, и зре́нием.

Рука́ нас Моисе́ова да уве́рит душе́, / ка́ко мо́жет Бог прокаже́нное житие́ / убели́ти, и очи́стити: / и не отча́йся сама́ себе́, / а́ще и прокаже́нна еси́.

Во́лны Спа́се прегреше́ний мои́х / я́ко в мо́ри Чермне́м возвраща́ющеся, / покры́ша мя внеза́пу, / я́ко Еги́птяны иногда́, и триста́ты.

Неразу́мное душе́ произволе́ние име́ла еси́, / я́ко пре́жде Изра́иль: / Боже́ственныя бо ма́нны предсуди́ла еси́ безслове́сно, / любосла́стное страсте́й объяде́ние.

Кладенцы́ душе́, предпочла́ еси́ ханане́йских мы́слей, / па́че жи́лы ка́мене, / из него́же прему́дрости река́, я́ко ча́ша / пролива́ет то́ки богосло́вия.

Свина́я мяса́ и котлы́, и Еги́петскую пи́щу, / па́че небе́сныя предсуди́ла еси́ душе́ моя́, / я́коже дре́вле неразу́мнии лю́дие в пусты́ни.

Я́ко уда́ри Моисе́й раб Твой / жезло́м ка́мень, / обра́зно животвори́вая ре́бра Твоя́ прообразова́ше, / из ни́хже вси / питие́ жи́зни Спа́се, почерпа́ем.

Испыта́й душе́ и смотряй, я́коже Иису́с Нави́н / обетова́ния зе́млю, какова́ есть, / и всели́ся в ню благозако́нием.

Воста́ни и побори́, / я́ко Иису́с Амали́ка, плотски́я стра́сти, / и гаваони́ты, ле́стныя по́мыслы / при́сно побежда́ющи.

Преиди́ вре́мене теку́щее естество́, / я́ко пре́жде ковче́г, / и земли́ о́ныя бу́ди во одержа́нии обетова́ния душе́, / Бог повелева́ет.

Я́ко спасл еси́ Петра́, возопи́вша / спаси́, предвари́в мя Спа́се / от зве́ря изба́ви, просте́р Твою́ ру́ку, / и возведи́ из глубины́ грехо́вныя.

Приста́нище Тя вем ути́шное, / Влады́ко, Влады́ко Христе́, / но от незаходи́мых глуби́н греха́, и отча́яния / мя предвари́в изба́ви.

Аз есмь, Спа́се, / ю́же погуби́л еси́ дре́вле ца́рскую дра́хму, / но вжег свети́льник Предте́чу Твоего́ Сло́ве, / взыщи́ и обря́щи Твой о́браз.

Преподо́бная ма́ти Мари́е, моли́ Бо́га о нас.

Марии: Да страсте́й пла́мень угаси́ши, / слез ка́пли источи́ла еси́ при́сно Мари́е, / душе́ю распаля́ема, / и́хже благода́ть пода́ждь и мне, / твоему́ рабу́.

Преподо́бная ма́ти Мари́е, моли́ Бо́га о нас.

Марии: Безстра́стие небе́сное стяжа́ла еси́, / кра́йним на земли́ житие́м ма́ти. / Те́мже тебе́ пою́щим, / страсте́й изба́витися / моли́твами твои́ми, моли́ся.

Преподо́бне о́тче Андре́е, моли́ Бо́га о нас.

Андрею: Кри́тскаго тя па́стыря, и председа́теля, / и вселе́нныя моли́твенника ве́дый, / притека́ю Андре́е, и вопию́ ти: / изми́ мя о́тче, из глубины́ греха́.

Слава, Троичен: Тро́ица есмь про́ста, неразде́льна, / разде́льна Ли́чне, / и Еди́ница есмь Естество́м соедине́на, / Оте́ц глаго́лет, и Сын, и Боже́ственный Дух.

Богородичен: Утро́ба Твоя́ Бо́га нам роди́, / воображе́нна по нам: / Его́же, я́ко Созда́теля всех, моли́ Богоро́дице, / да Твои́ми моли́твами оправди́мся.

И поем ирмос Великаго канона.

Кондак, глас 6:

Душе́ моя́, душе́ моя́, воста́ни, что спи́ши? / Коне́ц приближа́ется, и и́маши смути́тися. / Воспряни́ у́бо, да пощади́т тя Христо́с Бог, / везде́ сый и вся́ исполня́яй.

Икос: Христо́во врачевство́ ви́дя отве́рсто, / и от Сего́ Ада́му истека́ющее здра́вие, / пострада́, уязви́ся диа́вол, / и я́ко бе́дствуя рыда́ше, / и свои́м друго́м возопи́: / что сотворю́ Сы́ну Мари́ину, / убива́ет мя Вифлее́млянин, / И́же везде́ сый, и вся исполня́яй.

Синаксарий первее Минеи, таже Триоди.

Таже блаженны с поклоны. Глас 6:

Во Ца́рствии Твое́м, помяни́ нас Го́споди, егда́ прии́деши во ца́рствии Твое́м.

Разбо́йника Христе́ рая́ жи́теля сотвори́л еси́, / на Кресте́ Тебе́ возопи́вша: помяни́ мя, / того́ покая́нию / сподо́би и мене́ недосто́йнаго.

Стих: Блаже́ни ни́щии ду́хом, я́ко тех есть Ца́рство Небе́сное.

Мано́я слы́шавши дре́вле душе́ моя́, / Бо́га в явле́нии бы́вша, / и из непло́дове тогда́ прие́мша плод обетова́ния, / того́ благоче́стие подража́й.

Стих: Блаже́ни пла́чущии, я́ко ти́и уте́шатся.

Сампсо́новой поревнова́вши ле́ности, / главу́ остри́гла еси́ душе́ дел твои́х, / преда́вши иноплеме́нником, любосла́стием / целому́дренную жизнь и блаже́нную.

Стих: Блаже́ни кро́тцыи, я́ко ти́и насле́дят зе́млю.

Пре́жде че́люстию о́слею / победи́вый иноплеме́нники, / ны́не плене́ние ласкосе́рдству стра́стному обре́теся, / но избе́гни душе́ моя́ подража́ния, / дея́ния и сла́бости.

Стих: Блаже́ни а́лчущии и жа́ждущии пра́вды, я́ко ти́и насы́тятся.

Вара́к и Иеффа́й военача́льницы, / судии́ Изра́илевы предпочте́ни бы́ша, / с ни́миже Дево́рра мужеу́мная: / тех до́блестьми душе́ / вмужи́вшися укрепи́ся.

Стих: Блаже́ни ми́лостивии, я́ко ти́и поми́ловани бу́дут.

Иаи́лино хра́брство позна́ла еси́ душе́ моя́, / Сиса́ра дре́вле пробо́дшую, / и спасе́ние соде́лавшую, дре́вом о́стрым, слы́шиши, / и́мже тебе́ Крест образу́ется.

Стих: Блаже́ни чи́стии се́рдцем, я́ко ти́и Бо́га у́зрят.

Пожри́ душе́ же́ртву похва́льную, / дея́ние я́ко дщерь принеси́, / от Иеффа́евы чисте́йшую, / и заколи́ я́ко же́ртву, стра́сти плотски́я / Го́сподеви твоему́.

Стих: Блаже́ни миротво́рцы, я́ко ти́и сы́нове Бо́жии нареку́тся.

Гедео́ново руно́ помышля́й душе́ моя́, / с небесе́ ро́су подыми́, / и прини́кни я́коже пес, и пий во́ду, / от зако́на теку́щую, / изгнете́нием пи́сменным.

Стих: Блаже́ни изгна́ни пра́вды ра́ди, я́ко тех есть Ца́рство Небе́сное.

Или́и свяще́нника осужде́ние душе́ моя́ / восприя́ла еси́, лише́нием ума́ / приобре́тши стра́сти себе́, / я́коже он ча́да, де́лати беззако́нная.

Стих: Блаже́ни есте́, егда́ поно́сят вам, и изжену́т, и реку́т всяк зол глаго́л на вы лжу́ще Мене́ ра́ди.

В судия́х Леви́т, небреже́нием / свою́ жену́, двана́десятим коле́ном раздели́, душе́ моя́, / да скве́рну обличи́т / от Вениами́на беззако́нную.

Стих: Ра́дуйтеся и весели́теся, я́ко мзда ва́ша мно́га на небесе́х.

Любому́дренная А́нна моля́щися, / устне́ у́бо двиза́ше ко хвале́нию, / глас же ея́ не слы́шашеся, / но оба́че непло́дна су́щи, / сы́на моли́твы ражда́ет досто́йна.

Стих: Помяни́ нас Го́споди, егда́ прии́деши во Ца́рствии Твое́м.

В судия́х спричте́ся / А́ннино порожде́ние, вели́кий Саму́ил, / его́же воспита́ла Армафе́ма в дому́ Госпо́дни, / тому́ поревну́й душе́ моя́, и суди́ / пре́жде ине́х дела́ твоя́.

Стих: Помяни́ нас Влады́ко, егда́ прии́деши во Ца́рствии Твое́м.

Дави́д на ца́рство избра́н, / ца́рски пома́зася ро́гом Боже́ственнаго ми́ра: / ты у́бо душе́ моя́, а́ще хо́щеши вы́шняго Ца́рствия, / ми́ром пома́жися слеза́ми.

Стих: Помяни́ нас Святы́й, егда́ прии́деши во Ца́рствии Твое́м.

Поми́луй созда́ние Твое́ Ми́лостиве, / уще́дри руку́ Твое́ю творе́ние, / и пощади́ вся согреши́вшия, / и мене́ па́че всех, / Твои́х презре́вшаго повеле́ний.

Слава, Троичен: Безнача́льну, и рожде́нию же и происхожде́нию,/ Отцу́ покланя́юся ро́ждшему, / Сы́на сла́влю рожде́ннаго, / пою́ сопросия́вшаго Отцу́ же и Сы́ну, / Ду́ха Свята́го.

Богородичен: Преесте́ственному Рождеству́ Твоему́ покланя́емся, / по естеству́ сла́вы Младе́нца Твоего́ / не разделя́юще Богороди́тельнице: / И́же бо еди́н лице́м, / сугу́быми испове́дуется естествы́.

Песнь 7.

Ирмос: Согреши́хом, беззако́нновахом, / непра́вдовахом пред Тобо́ю, / ниже́ соблюдо́хом, ниже́ сотвори́хом, / я́коже запове́дал еси́ нам; / но не преда́ждь нас до конца́, / отце́в Бо́же.

Согреши́х, беззако́нновах, / и отверго́х за́поведь Твою́, / я́ко во гресе́х произведо́хся / и приложи́х я́звам стру́пы себе́: / но Сам мя поми́луй, / я́ко Благоутро́бен, отце́в Бо́же.

Та́йная се́рдца моего́ / испове́дах Тебе́ Судии́ моему́, / виждь мое́ смире́ние, / виждь и скорбь мою́, / и вонми́ суду́ моему́ ны́не, / и Сам мя поми́луй, я́ко Благоутро́бен, / отце́в Бо́же.

Сау́л иногда́ я́ко погуби́ отца́ своего́ душе́ осля́та, / внеза́пу ца́рство обре́те к прослу́тию, / но блюди́, не забыва́й себе́, / ско́тския по́хоти твоя́ / произво́ливши па́че Ца́рства Христо́ва.

Дави́д иногда́ Богооте́ц, / а́ще и согреши́ сугу́бо душе́ моя́, / стрело́ю у́бо устреле́н быв прелюбоде́йства, / копие́м же плене́н быв уби́йства томле́нием, / но ты сама́ тяжча́йшими де́лы неду́гуеши, / самохо́тными стремле́ньми.

Совокупи́ у́бо Дави́д иногда́ беззако́нию беззако́ние: / уби́йству же любоде́йство раствори́в, / покая́ние сугу́бое показа́ а́бие: / но сама́ ты лука́внейшая душе́ соде́лала еси́, / не пока́явшися Бо́гу.

Дави́д иногда́ вообрази́, / списа́в я́ко на ико́не песнь, / е́юже дея́ние облича́ет, е́же соде́я, зовы́й: / поми́луй мя. Тебе́ бо Еди́ному согреши́х всех Бо́гу, / Сам очи́сти мя.

Киво́т я́ко ноша́шеся на колесни́це, / Зан о́ный, / егда́ превра́щшуся тельцу́, / то́чию косну́ся, Бо́жиим искуси́ся гне́вом: / но того́ дерзнове́ния убежа́вши душе́, / почита́й Боже́ственная че́стне.

Слы́шала еси́ Авессало́ма, / ка́ко на естество́ воста́? / Позна́ла еси́ того́ скве́рная дея́ния, / и́миже оскверни́ ло́же Дави́да отца́, / но ты подража́ла еси́ того́ стра́стная / и любосла́стная стремле́ния.

Покори́ла еси́ нерабо́тное твое́ досто́инство те́лу твоему́: / ино́го бо Ахитофе́ла обре́тши врага́, душе́, / снизшла́ еси́ сего́ сове́том, / но сия́ разсы́па Сам Христо́с, / да ты вся́ко спасе́шися.

Соломо́н чу́дный, / и благода́ти прему́дрости испо́лненный, / сей лука́вое иногда́ пред Бо́гом сотвори́в, / отступи́ от Него́: / ему́же ты прокля́тым твои́м житие́м, душе́ / уподо́билася еси́.

Сластьми́ влеко́мь страсте́й свои́х оскверня́шеся, / увы́ мне, рачи́тель прему́дрости, / рачи́тель блу́дных жен, и стра́нен от Бо́га: / его́же ты подража́ла еси́ умо́м о душе́! / Сладостра́стьми скве́рными.

Ровоа́му поревнова́ла еси́ / не послу́шавшему сове́та о́тча, / ку́пно же и зле́йшему рабу́ Иеровоа́му, пре́жнему отсту́пнику душе́, / но бе́гай подража́ния, и зови́ Бо́гу: / согреши́х, уще́дри мя.

Ахаа́вовым поревнова́ла еси́ / скве́рнам, душе́ моя́, увы мне, / была́ еси́ плотски́х скверн пребыва́лище, / и сосу́д сра́млен страсте́й, / но из глубины́ твоея́ воздохни́, / и глаго́ли Бо́гу грехи́ твоя́.

Попали́ Илия́ иногда́ два́щи / пятьдеся́т Иезаве́линых, / егда́ сту́дныя проро́ки погуби́, / во обличе́ние Ахаа́вово, / но бе́гай подража́ния двою́ душе́, / и укрепля́йся.

Заключи́ся тебе́ не́бо душе́, / и глад Бо́жий пости́же тя: / егда́ Илии́ Фесви́тянина я́коже Ахаа́в, / не покори́ся словесе́м иногда́, / но Сара́ффии уподо́бився, / напита́й проро́чу ду́шу.

Манасси́ева собрала́ еси́ согреше́ния изволе́нием, / поста́вльши я́ко ме́рзости стра́сти, / и умно́живши душе́ негодова́ние, / но того́ покая́нию ревну́ющи те́пле, / стяжи́ умиле́ние.

Припа́даю Ти, / и приношу́ Тебе́, я́коже сле́зы глаго́лы моя́: / согреши́х, я́ко не согреши́ блудни́ца, / и безако́нновах, я́ко и́ный никто́же на земли́, / но уще́дри Влады́ко, творе́ние Твое́, / и воззови́ мя.

Погребо́х о́браз Твой, / и растли́х за́поведь Твою́, / вся помрачи́ся добро́та, / и страстьми́ угаси́ся, Спа́се, свеща́, / но уще́дрив возда́ждь ми / я́коже пое́т Дави́д, ра́дование.

Обрати́ся, пока́йся, откры́й сокрове́нная, / глаго́ли Бо́гу вся ве́дущему: / Ты ве́си моя́ та́йная, еди́не Спа́се, / но Сам мя поми́луй, я́коже пое́т Дави́д / по ми́лости Твое́й.

Исчезо́ша дни́и мои́, я́ко со́ние востаю́щаго: / те́мже я́ко Езеки́я слезю́ на ло́жи мое́м, / приложи́тися мне ле́том живота́. / Но кий Иса́ия предста́нет тебе́ душе́, / а́ще не всех Бог?

Преподо́бная ма́ти Мари́е, моли́ Бо́га о нас.

Марии: Возопи́вши к Пречи́стей Богома́тери, / пе́рвее отри́нула еси́ неи́стовство страсте́й, / ну́жно стужа́ющих, / и посрами́ла еси́ врага́ запе́ншаго, / но даждь ны́не по́мощь от ско́рби, / и мне, рабу́ твоему́.

Преподо́бная ма́ти Мари́е, моли́ Бо́га о нас.

Марии: Его́же возлюби́ла еси́, Его́же возжеле́ла еси́, / Его́же ра́ди плоть изнури́ла еси́ преподо́бная, / моли́ ны́не Христа́ о рабе́х: / я́ко да ми́лостив быв всем нам, / ми́рное состоя́ние да́рует / почита́ющим Его́.

Преподо́бне о́тче Андре́е, моли́ Бо́га о нас.

Андрею: На ка́мени мя ве́ры / моли́твами твои́ми утверди́ о́тче, / стра́хом мя Боже́ственным огражда́я, / и покая́ние Андре́е, пода́ждь ми, молю́ся ти, / и изба́ви мя от се́ти враго́в / и́щущих мя.

Слава, Троичен: Тро́ице про́стая, неразде́льная, / единосу́щная, и Естество́ еди́но, / Све́тове, и Свет, и Свята три, и еди́но Свя́то / пое́тся Бог Тро́ица: / но воспо́й, просла́ви, Живо́т и Животы́, душе́, / всех Бо́га.

Богородичен: Пое́м Тя, благослови́м Тя, / покланя́емся Ти Богороди́тельнице, / я́ко неразде́льныя Тро́ицы породи́ла еси́ еди́наго Христа́ Бо́га / и Сама́ отве́рзла еси́ нам / су́щим на земли́ небе́сная.

Трипеснец. Глас 8. Песнь 8.

Ирмос: Безнача́льнаго Царя́ сла́вы, / Его́же трепе́щут небе́сныя си́лы, / по́йте свяще́нницы, / лю́дие превозноси́те во вся ве́ки.

Святи́и Апо́столи, моли́те Бо́га о нас.

Я́ко у́глие невеще́ственнаго огня́, / попали́те веще́ственныя стра́сти моя́, / возжиза́юще ны́не во мне жела́ние / Боже́ственныя любве́, апо́столи.

Трубы́ благогла́сныя Сло́ва почти́м, / и́миже падо́ша сте́ны неутвержде́ны вра́жия, / и богоразу́мия утверди́шася забра́ла.

Куми́ры стра́стныя души́ моея́ сокруши́те, / и́же хра́мы и столпы́ сокруши́сте врага́, / апо́столи Госпо́дни, / хра́мове освяще́ннии.

Пресвята́я Богоро́дице, спаси́ нас.

Богородичен: Вмести́ла еси́ невмести́маго естество́м: / носи́ла еси́ нося́щаго вся: / дои́ла еси́ Чи́стая, пита́ющаго тварь, / Христа́ Жизнода́вца.

Иный трипеснец. Ирмос тойже.

Святи́и Апо́столи, моли́те Бо́га о нас.

Ду́ха началохи́тростием созда́вше всю Це́рковь / апо́столи Христо́вы, / в ней благослови́те Христа́ во ве́ки.

Воструби́вше трубо́ю уче́ний, / низверго́ша апо́столи всю лесть и́дольскую, / Христа́ превознося́ще во вся ве́ки.

Апо́столи, до́брое преселе́ние, / назира́телие ми́ра, и небе́снии жи́телие, / вас при́сно восхваля́ющия, / изба́вите от бед.

Пресвята́я Тро́ице Бо́же наш, сла́ва Тебе́.

Троичен: Трисо́лнечное всесве́тлое Богонача́лие, / единосла́вное и единопресто́льное Естество́, / О́тче вседе́телю, / Сы́не, и Боже́ственный Ду́ше, / пою́ Тя во ве́ки.

Пресвята́я Богоро́дице, спаси́ нас.

Богородичен: Я́ко честны́й и превы́шший престо́л, / воспои́м Бо́жию Ма́терь непреста́нно, лю́дие, / еди́ну по рождестве́ / Ма́терь и Де́ву.

Иный.

Ирмос: Его́же во́инства Небе́сная сла́вят, / и трепе́щут Херуви́ми и Серафи́ми, / вся́ко дыха́ние и тварь, / по́йте, благослови́1те / и превозноси́те во вся ве́ки.

Согреши́вша Спа́се поми́луй, / воздви́гни мой ум ко обраще́нию, / приими́ мя ка́ющагося, уще́дри вопию́ща: / согреши́х Ти, спаси́, / беззако́нновах, поми́луй мя.

Колесни́чник Илия́, / колесни́цею доброде́телей вшед, / я́ко на небеса́, ноша́шеся / превы́ше иногда́ от земны́х: / сего́ у́бо душе́ моя́, восхо́д помышля́й.

Иорда́нова струя́ пе́рвее, ми́лотию Илиино́ю / Елиссе́ем, ста сю́ду и сю́ду: / ты же, о душе́ моя́, сея́ не причасти́лася еси́ благода́ти / за невоздержа́ние.

Елиссе́й иногда́ прие́м ми́лоть Илиину́, / прия́т сугу́бую благода́ть от Бо́га: / ты же о душе́ моя́, сея́ не причасти́лася еси́ благода́ти / за невоздержа́ние.

Сомани́тида иногда́ / пра́веднаго учреди́, о душе́, нра́вом благи́м: / ты же не ввела́ еси́ в дом, / ни стра́нна, ни пу́тника. / Те́мже черто́га изри́нешися вон, рыда́ющи.

Гиези́ев подража́ла еси́ окая́нная / ра́зум скве́рный всегда́ душе́, / его́же сребролю́бие отложи́ поне́ на ста́рость: / бе́гай гее́нскаго огня́, / отступи́вши злых твои́х.

Ты Ози́и душе́ поревнова́вши, / сего́ прокаже́ние в себе́ стяжа́ла еси́ сугу́бо: / безме́стная бо мы́слиши, беззако́нная же де́еши: / оста́ви я́же и́маши, / и притецы́ к покая́нию.

Ниневи́тяны душе́ слы́шала еси́ / ка́ющияся Бо́гу, вре́тищем и пе́пелом, / сих не подража́ла еси́, но яви́лася еси́ зле́йшая всех, / пре́жде зако́на, и по зако́не прегреши́вших.

В ро́ве бла́та слы́шала еси́ Иереми́ю душе́, / гра́да Сио́ня рыда́ньми вопию́ща, / и слез и́щуща, / подража́й сего́ плаче́вное житие́ и спасе́шися.

Ио́на в Фарси́с побеже́, / проразуме́в обраще́ние ниневи́тянов, / разуме́ бо я́ко проро́к Бо́жие благоутро́бие: / те́мже ревнова́ше / проро́честву не солга́тися.

Дании́ла в ро́ве слы́шала еси́, / ка́ко загради́ уста́, о душе́ звере́й: / уве́дела еси́, ка́ко о́троцы и́же о Аза́рии, / погаси́ша ве́рою пе́щи пла́мень горя́щий.

Ве́тхаго Заве́та вся / приведо́х ти душе́, к подо́бию, / подража́й пра́ведных боголюби́вая дея́ния, / избе́гни же па́ки лука́вых грехо́в.

Правосу́де Спа́се поми́луй, / и изба́ви мя огня́, и преще́ния, / е́же и́мам на суде́ пра́ведно претерпе́ти: / осла́би ми пре́жде конца́, / доброде́телию и покая́нием.

Я́ко разбо́йник вопию́ Ти: помяни́ мя. / Я́ко Петр пла́чу го́рце: / осла́би ми Спа́се. Зову́ я́ко мыта́рь: / слезю́ я́ко блудни́ца. / Приими́ мое́ рыда́ние, / я́коже иногда́ ханане́ино.

Гное́ние, Спа́се, исцели́ / смире́нныя моея́ души́: еди́не Врачу́, / пла́стырь мне наложи́, и еле́й и вино́, дела́ покая́ния, / умиле́ние со слеза́ми.

Ханане́ю и аз подража́я, / поми́луй мя, вопию́, Сы́не Дави́дов: / каса́юся кра́я ри́зы, я́ко кровоточи́вая: / пла́чу, я́ко Ма́рфа и Мари́я над Ла́зарем.

Сле́зную Спа́се сткля́ницу, / я́ко ми́ро истощава́я на главу́, / зову́ Ти я́коже блудни́ца, ми́лости и́щущая, / мольбу́ приношу́, / и оставле́ние прошу́ прия́ти.

А́ще и никто́же, я́коже аз согреши́ Тебе́, / но оба́че приими́ и мене́, Благоутро́бне Спа́се, / стра́хом ка́ющася, и любо́вию зову́ща: / согреши́х Тебе́ еди́ному, / поми́луй мя Ми́лостиве.

Пощади́ Спа́се Твое́ созда́ние, / и взыщи́ я́ко Па́стырь поги́бшее, / предвари́ заблу́ждшаго, восхи́ти от во́лка, / сотвори́ мя овча́ / на па́стве Твои́х ове́ц.

Егда́ Судие́ ся́деши я́ко Благоутро́бен, / и пока́жеши стра́шную сла́ву Твою́ Спа́се: / о каковы́й страх тогда́! Пе́щи горя́щей, / всем боя́щимся нестерпи́маго суди́ща Твоего́.

Преподо́бная ма́ти Мари́е, моли́ Бо́га о нас.

Марии: Све́та незаходи́маго Ма́ти, тя просвети́вши, / от омраче́ния страсте́й разреши́. / Те́мже вше́дши в духо́вную благода́ть, / просвети́ Мари́е, / тя ве́рно восхваля́ющия.

Преподо́бная ма́ти Мари́е, моли́ Бо́га о нас.

Марии: Чу́до но́во ви́дев, ужаса́шеся боже́ственный в тебе́ вои́стинну ма́ти Зоси́ма: / а́нгела бо зря́ше во пло́ти, / и у́жасом весь исполня́шеся, / Христа́ поя́ во ве́ки.

Преподо́бне о́тче Андре́е, моли́ Бо́га о нас.

Андрею: Я́ко дерзнове́ние имы́й ко Го́споду, / Андре́е Кри́тский честна́я похвало́, / молю́, моли́ся разреше́ние от уз беззако́ния / ны́не обрести́ мне моли́твами твои́ми, / я́ко покая́ния учи́тель, / и преподо́бных сла́ва.

Благослови́м Отца́, и Сы́на, и Свята́го Ду́ха, Го́спода.

Троичен: Безнача́льне О́тче, Сы́не собезнача́льне, / Уте́шителю Благи́й, Ду́ше Пра́вый: / Сло́ва Бо́жия Роди́телю, / Отца́ безнача́льна Сло́ве, / Ду́ше живы́й и зи́ждяй, / Тро́ице Еди́нице, поми́луй мя.

Богородичен: Я́ко от оброще́ния червлени́цы Пречи́стая, / у́мная багряни́ца Емману́илева, / внутрь во чре́ве Твое́м плоть истка́ся. / Те́мже Богоро́дицу / вои́стинну Тя почита́ем.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

И паки ирмос.

Трипеснец. Глас 8. Песнь 9.

Ирмос: Вои́стинну Богоро́дицу Тя испове́дуем, / спасе́ннии Тобо́ю Де́во Чи́стая, / с безпло́тными ли́ки Тя велича́юще.

Святи́и Апо́столи, моли́те Бо́га о нас.

Исто́чницы спаси́тельныя воды́ / я́вльшеся апо́столи, / иста́явшую ду́шу мою́ грехо́вною жа́ждою, ороси́те.

Пла́вающаго в пучи́не поги́бели, / и в погруже́нии уже́ бы́вша, / Твое́ю десни́цею, я́коже Петра́, / Го́споди спаси́ мя.

Я́ко со́ли, вку́сных су́ще уче́ний, / гни́льство ума́ моего́ изсуши́те, / и неве́дения тьму отжени́те.

Пресвята́я Богоро́дице, спаси́ нас.

Богородичен: Ра́дость я́ко роди́вшая, / плачь мне пода́ждь, / и́мже Боже́ственное утеше́ние Влады́чице, / в бу́дущем дни обрести́ возмогу́.

Иный.

Ирмос: Тя небесе́ и земли́ хода́таицу:

Святи́и Апо́столи, моли́те Бо́га о нас.

Тя благосла́вное апо́стольское собра́ние, / пе́сньми велича́ем: / вселе́нней бо свети́ла све́тлая яви́стеся, / пре́лесть отгоня́ще.

Благове́стною мре́жею ва́шею, / слове́сныя ры́бы улови́вше, / сия́ приноси́те всегда́ снедь Христу́, / апо́столи блаже́ннии.

К Бо́гу ва́шим проше́нием / помяни́те нас апо́столи, / от вся́каго изба́витися искуше́ния, мо́лимся, / любо́вию воспева́ющия вас.

Пресвята́я Тро́ице Бо́же наш, сла́ва Тебе́.

Троичен: Тя триипоста́сную Еди́ницу, / О́тче, Сы́не, со Ду́хом, / Еди́наго Бо́га единосу́щна пою́, / Тро́ицу единоси́льную и безнача́льную.

Пресвята́я Богоро́дице, спаси́ нас.

Богородичен: Тя Детороди́тельницу и Де́ву, / вси ро́ди ублажа́ем, / я́ко Тобо́ю изба́вльшеся от кля́твы: / ра́дость бо нам родила́ е́си Го́спода.

Великаго канона ирмос: Безсе́меннаго зача́тия Рождество́ несказа́нное, / Ма́тере безму́жныя нетле́нен Плод, / Бо́жие бо рожде́ние обновля́ет естества́. / Те́мже Тя вси ро́ди, / я́ко Богоневе́стную Ма́терь, / правосла́вно велича́ем.

Ум острупи́ся, те́ло оболе́знися, / неду́гует дух, сло́во изнемо́же, / житие́ умертви́ся, коне́ц при две́рех. / Те́мже моя́ окая́нная душе́, что сотвори́ши, / егда́ прии́дет Судия́ испыта́ти твоя́?

Моисе́ово приведо́х ти душе́, миробы́тие, / и от того́ все заве́тное писа́ние, / пове́дающее тебе́ пра́ведныя и непра́ведныя: / от ни́хже вторы́я, о душе́, подража́ла еси́, а не пе́рвыя, / в Бо́га согреши́вши.

Зако́н изнемо́же, пра́зднует Ева́нгелие, / писа́ние же все в тебе́ небреже́но бысть, / проро́цы изнемого́ша, и все пра́ведное сло́во: / стру́пи твои́, о душе́, умно́жишася, / не су́щу врачу́ исцеля́ющему тя.

Но́ваго привожду́ ти писа́ния указа́ния, / вводя́щая тя душе́, ко умиле́нию: / пра́ведным у́бо поревну́й, гре́шных же отвраща́йся, / и уми́лостиви Христа́ моли́твами же и поще́ньми, / и чистото́ю, и гове́нием.

Христо́с вочелове́чися, / призва́в к покая́нию разбо́йники, и блудни́цы: / душе́ пока́йся, дверь отве́рзеся Ца́рствия уже́, / и предвосхища́ют е фарисе́е и мытари́ / и прелюбоде́и ка́ющиися.

Христо́с вочелове́чися, / пло́ти приобщи́вся ми, / и вся, ели́ка суть естества́ хоте́нием / испо́лни греха́ кроме́, / подо́бие тебе́, о душе́, / и о́браз предпоказу́я Своего́ снизхожде́ния.

Христо́с волхвы́ спасе́, / па́стыри созва́, / младе́нец мно́жества показа́ му́ченики, / ста́рцы просла́ви, и ста́рыя вдови́цы, / и́хже не поревнова́ла еси́ душе́, ни дея́нием, ни житию́, / но го́ре тебе́, внегда́ бу́деши суди́тися.

Пости́вся Госпо́дь дний четы́редесять в пусты́ни, / последи́ взалка́, показу́я челове́ческое: / душе́, да не разлени́шися, а́ще тебе́ приложи́тся враг, / моли́твою же и посто́м от ног твои́х да отрази́тся.

Христо́с искуша́шеся, / диа́вол искуша́ше, / показу́я ка́мение, / да хле́би бу́дут: / на го́ру возведе́ / ви́дети вся ца́рствия ми́ра во мгнове́нии. / Убо́йся о душе́, ловле́ния, / трезви́ся моли́ся на вся́кий час Бо́гу.

Го́рлица пустынолю́бная, / глас вопию́щаго возгласи́, / Христо́в свети́льник, пропове́дуяй покая́ние, / И́род беззако́ннова со Иродиа́дою. / Зри душе́ моя́, да не увя́знеши в беззако́нныя се́ти, / но облобыза́й покая́ние.

В пусты́ню всели́ся благода́ти Предте́ча, / и Иуде́я вся и Самари́я / слы́шавше теча́ху, / и испове́даху грехи́ своя́, / креща́ющеся усе́рдно: / и́хже ты не подража́ла еси́ душе́.

Брак у́бо честны́й, и ло́же нескве́рно: / обоя́ бо Христо́с пре́жде благослови́, / пло́тию яды́й, / и в Ка́не же на бра́це во́ду в вино́ соверша́я, / и показу́я пе́рвое чу́до: / да ты измени́шися о душе́.

Разсла́бленнаго стя́гну Христо́с, / одр взе́мша, / и ю́ношу уме́рша воздви́же, вдови́че рожде́ние, / и со́тнича о́трока, / и самаряны́не яви́ся, / в Ду́се слу́жбу / Тебе́, душе́ предживописа́.

Кровоточи́вую исцели́ / прикоснове́нием кра́я ри́зна Госпо́дь: / прокаже́нныя очи́сти: / слепы́я и хромы́я просвети́в, испра́ви: / глухи́я же и немы́я, и нича́щия ни́зу исцели́ сло́вом: / да ты спасе́шися окая́нная душе́.

Неду́ги исцеля́я, / ни́щим благовествова́ше, Христо́с Сло́во, / вре́дныя уврачева́, с мытари́ ядя́ше, / со гре́шники бесе́доваше, / Иаи́ровы дще́ре ду́шу предуме́ршую / возврати́ осяза́нием руки́.

Мыта́рь спаса́шеся, и блудни́ца целому́дрствоваше, / и фарисе́й хваля́ся осужда́шеся: / ов у́бо, очи́сти мя: / о́ва же, поми́луй мя. / Сей же велича́шеся вопия́: Бо́же, благодарю́ Тя: / и про́чия безу́мныя глаго́лы.

Закхе́й мыта́рь бе, но оба́че спаса́шеся, / и фарисе́й Си́мон соблажня́шеся, / и блудни́ца приима́ше оста́вительная разреше́ния, / от Иму́щаго кре́пость оставля́ти грехи́: / ю́же душе́ потщи́ся подража́ти.

Блудни́це, о окая́нная душе́ моя́, / не поревнова́ла еси́, / я́же прии́мши ми́ра алава́стр, / со слеза́ми ма́заше но́зе Спа́сове, / отре́ же власы́ / дре́вних согреше́ний рукописа́ние раздира́ющаго ея́.

Гра́ды, и́мже даде́ Христо́с благове́стие, / душе́ моя́, уве́дала еси́, ка́ко про́кляти бы́ша. / Убо́йся указа́ния, да не бу́деши я́коже о́ны, / и́хже Содо́мляном Влады́ко уподо́бив, / да́же до а́да осуди́.

Да не го́ршая о душе́ моя́, / яви́шися отча́янием, ханане́и / ве́ру слы́шавшая, / ея́же дщи сло́вом Бо́жиим исцели́ся. / Сы́не Дави́дов, спаси́ и мене́, / воззови́ из глубины́ се́рдца, / я́коже она́ Христу́.

Умилосе́рдися спаси́ мя, / Сы́не Дави́дов поми́луй, / бесну́ющияся сло́вом исцели́вый, / глас же благоутро́бный я́ко разбо́йнику мне рцы: / ами́нь глаго́лю тебе́, со Мно́ю бу́деши в раи́, / егда́ прииду́ во сла́ве Мое́й.

Разбо́йник оглаго́ловаше Тя, / разбо́йник Богосло́вяше Тя, / о́ба бо на кресте́ сви́сяста, / но о Благоутро́бне, я́ко ве́рному разбо́йнику Твоему́, / позна́вшему Тя Бо́га, / и мне отве́рзи дверь / сла́внаго Ца́рствия Твоего́.

Тварь содрога́шеся распина́ема Тя ви́дящи, / го́ры и ка́мения стра́хом распада́хуся, / и земля́ сотряса́шеся, и ад обнажа́шеся, / и соомрача́шеся свет во дни, / зря Тебе́ Иису́се / пригвожде́на ко Кресту́.

Досто́йных покая́ния плодо́в не истяжи́ от мене́, / и́бо кре́пость моя́ во мне оскуде́, / се́рдце мне да́руй при́сно сокруше́нное, / нищету́ же духо́вную, / да сия́ Тебе́ принесу́, / я́ко прия́тную же́ртву, еди́не Спа́се.

Судие́ мой, и ве́дче мой, / хотя́й па́ки приити́ со а́нгелы, / суди́ти ми́ру всему́, / ми́лостивным Твои́м о́ком тогда́ ви́дев мя, / пощади́ и уще́дри мя Иису́се, / па́че вся́каго естества́ челове́ча согреши́вша.

Преподо́бная ма́ти Мари́е, моли́ Бо́га о нас.

Марии: Удиви́ла еси́ всех / стра́нным житие́м твои́м, / а́нгелов чи́ны, и челове́ков собо́ры, / невеще́ственно пожи́вши, и естество́ преше́дши: / и́мже, я́ко невеще́ственныма нога́ма вше́дши Мари́е, / Иорда́н прешла́ еси́.

Преподо́бная ма́ти Мари́е, моли́ Бо́га о нас.

Марии: Уми́лостиви Созда́теля / о хва́лящих тя, преподо́бная ма́ти, / изба́витися озлобле́ний и скорбе́й / о́крест напа́дающих: / да изба́вившеся от напа́стей, возвели́чим непреста́нно / просла́вльшаго тя Го́спода.

Преподо́бне о́тче Андре́е, моли́ Бо́га о нас.

Андрею: Андре́е честны́й, и о́тче треблаже́ннейший, / па́стырю Кри́тский, / не преста́й моля́ся о воспева́ющих тя: / да изба́вимся вси гне́ва и ско́рби, и тле́ния, / и прегреше́ний безме́рных, / чту́щии твою́ па́мять ве́рно.

Слава, Троичен: Отца́ просла́вим, Сы́на превознесе́м, / Боже́ственному Ду́ху ве́рно поклони́мся, / Тро́ице неразде́льней, Еди́нице по Существу́, / я́ко Све́ту и Све́том, и Животу́ и Живото́м, / животворя́щему и просвеща́ющему концы́.

Богородичен: Град Твой сохраня́й / Богороди́тельнице Пречи́стая: / в Тебе́ бо сей ве́рно ца́рствуяй, / в Тебе́ и утвержда́ется: / и Тобо́ю побежда́яй, / побежда́ет вся́кое искуше́ние, / и пленя́ет ра́тники, / и прохо́дит послуша́ние.

И абие ирмос. Светилен, яко обычно.

На стиховне самогласен, дважды. Глас 8:

В разбо́йническия пути́ впа́дши душе́ моя́, / лю́те уя́звлена еси́ от свои́х согреше́ний, / преда́вшися неразу́мным враго́м. / Но я́ко иму́щая вре́мя, во умиле́нии возопи́й: / упова́ние ненаде́жных, животе́ отча́явшихся, / Спа́се, возста́ви и спаси́ мя.

Мученичен: Во броня́ ве́ры обо́лкшеся до́бре, / и о́бразом Кре́стным вооружи́вше себе́, / во́ини благомо́щнии показа́стеся, / мучи́телем му́жески проти́вистеся, / и диа́волю пре́лесть потреби́сте, / победи́теле бы́вше, венце́в сподо́бистеся: / моли́теся Христу́ о нас, / во е́же спасти́ся душа́м на́шим.

Слава, и ныне, Богородичен: Приими́ гла́сы раб Твои́х, / Всечи́стая Богоро́дице Де́во, / и моли́ непреста́нно, / грехо́в разреше́ние, / и мир дарова́ти нам.

Совокупляем же и 1-й час, без стихословия. По Трисвятом, на всех часех кондак: Душе́ моя́, душе́ моя́:

НАЧАЛО СВЯТАГО И ВЕЛИКАГО ПОСТА

В ПОНЕДЕЛЬНИК ПЕРВЫЯ СЕДМИЦЫ.

Знаменает параекклисиарх к свету, коснее ради вечерняго утешения, и собираемся вси по обычаю в церковь. Поем полунощницу без поклонов, токмо в конец три поклоны великия, с молитвою, Го́споди и Влады́ко: Сие же бывает в 1-й день токмо. В прочия же дни святаго и великаго поста, поем полунощницу всю с поклоны 16, по обычаю. Таже востав иерей творит обычное метание настоятелю, и входит во святый олтарь, и прием кадильницу, станет пред святою трапезою, и кадя крестообразно, возгласит: Благослове́н Бог наш: И нам отвещавшим: Ами́нь, исходит иерей и кадит. А уставленный псалмопевец глаголет: Трисвятое, всегда кроме метаний. По О́тче наш, возглашает иерей: Я́ко Твое́ есть Ца́рство: и по амине, Го́споди поми́луй, 12. Прииди́те поклони́мся: трижды, без метаний. И псалом 19 и 20, по конце их, Трисвятое, без метаний. По О́тче наш: Тропари обычныя. Сим глаголемым, кадит иерей святый олтарь, и всю церковь. Таже, ектения: Поми́луй нас Бо́же: Таже, О вели́ком господи́не и отце́ на́шем святе́йшем патриа́рхе: Возглас: Я́ко ми́лостив и человеколю́бец: Чтец: Ами́нь. И глаголет: И́менем Госпо́дним благослови́ о́тче. И абие иерей: Сла́ва Святе́й, и Единосу́щней: И прочая. Брат же, егоже есть день, став на уреченном месте, глаголет шестопсалмие со всяким вниманием, не борзяся, но со страхом Божиим, яко к Самому Богу беседующи невидимо.

И не имать кто власти шепты творити, ниже плюнути, или хракнути: но паче внимати от псаломника глаголемым, руце имуще согбены к персем, главы же преклонены, и очи имуще долу, сердечныма очима зряще к востоком, да молимся о гресех наших, поминающе смерть, и будущую муку, и жизнь вечную.

В начало же 102-го псалма, глаголет иерей утренния молитвы. По скончании же псалмов, Сла́ва, и ны́не, Аллилу́ия, трижды. Таже, ектения великая, и возглас. Поет же учиненный монах Аллилу́ия, во глас прилучившагося в Октоихе гласа. Стих 1: От но́щи у́тренюет дух мой к Тебе́ Бо́же, зане́ свет повеле́ния Твоя́. Стих 2: Пра́вде научи́теся живу́щии на земли́. Стих 3: За́висть прии́мет лю́ди ненака́занныя. Стих 4: Приложи́ им зла Го́споди, приложи́ зла сла́вным земли́. И по коемждо стихе, Аллилу́ия, трижды. Таже Троичны гласа. Поем же со умилением велегласно и косно с пением. На 2-м стихе, Сла́ва: а на третием, И ны́не:

Таже стихословим едину кафисму Псалтира. По антифоне же, на Аллилу́ия творим поклоны три, вси равно, последующе игумену, или екклисиарху. По первой кафисме седальны умилительныя Осмогласника.

Таже чтение во святом Ефреме, зане от того дне начинается святый Ефрем, и чтется до пятка Цветоносныя недели.

По 2-м стихословии седален Триоди господина Иосифа. Глас 2. Подобен: Милосе́рдия су́щи:

Поста́ Боже́ственным нача́тком / умиле́ние стя́жим, от души́ вопию́ще: / Влады́ко Христе́, моли́тву на́шу приими́, я́ко избра́нное кади́ло, / и изба́ви нас, мо́лимся, / злосмра́дныя тли, и му́ки стра́шныя, / я́ко еди́н сый благоуве́тливый.

Слава, тойже.

И ныне, Богородичен. Подобен: Милосе́рдия су́щи исто́чник, / ми́лости сподо́би нас Богоро́дице, / при́зри на лю́ди согреши́вшия, / яви́ я́ко при́сно си́лу Твою: / на Тя бо упова́юще, ра́дуйся вопие́м Ти, / я́коже иногда́ Гаврии́л безпло́тных Архистрати́г.

И паки чтение во святем Ефреме.

По 3-м стихословии седален господина Феодора. Глас 2. Подобен: Пречи́стому Твоему́ о́бразу:

Всечестно́е воздержа́ние начне́м све́тло, / луча́ми сия́юще святы́х за́поведей Христа́ Бо́га на́шего, / любве́ све́тлостию, моли́твы блиста́нием, / чистоты́ очище́нием, благому́жества кре́постию: / я́ко да светоно́сни предвари́м во свято́е и тридне́вное Воскресе́ние, / осиява́ющее нетле́ние ми́ру.

Слава, тойже.

И ныне, Богородичен. Подобен: Необори́мую моли́тву Твою́ стяжа́в в лю́тых, / свобожда́юся от оскорбля́ющих мя па́че надежди чу́дно. / О Ма́ти Бо́жия, предваря́еши всегда́ прося́щим Тя ве́рно. / Отону́дуже благода́рно вопие́м Ти: / приими́ Влады́чице, кра́ткая благода́рственная, / вме́сто сих бу́ди ми во всех по́мощь.

Таже чтение в Лавсаице. Псалом 50. И обычная молитва: Спаси́ Бо́же лю́ди Твоя́: Таже возглас: Посем начинаем: Го́сподеви пое́м: на глас канона Минеи, дне святаго. И глаголют стихи песней скоро, кийждо лик свой стих: дондеже достигнут до, Огусте́ша: и от того начинают стих держати на 14. И поем Минеи со ирмосом на 6, поем же сице: Первый лик глаголет стих: Огусте́ша: и поет ирмос. Вторый же лик глаголет 2 стих: Рече́ враг: И по нем тропарь канона. И поряду стихи по ликом до, Тогда́ потща́шася: от стиха же Тогда́ потща́шася, начинаем трипеснец господина Иосифа, на 4. На Госпо́дь же ца́рствуяй: поем другий трипеснец господина Феодора Студита: и поет 1-й лик тропарь. 2-й же лик 2 стих, и тропарь. Посем соединившимся двум ликом, поют, Сла́ва, Троичен, вышшим гласом: И ны́не, Богородичен. Таже глаголем высочайшим гласом: Сла́ва Тебе́ Бо́же наш, сла́ва Тебе́. И поем иный тропарь господина Феодора. Понеже бо по пяти тропарей имать песнь. Последи же глаголем катавасию, ирмос втораго канона.

Сице поется осмая и девятая песни.

Третию же песнь поем сице:

Глаголет первый лик стих: Госпо́дь взы́де на небеса́: и тропарь канона Минеи. Вторый лик стих: И даст кре́пость царю́: И вторый тропарь канона Минеи. Таже, Сла́ва, и ны́не, с тропари канона. И поет первый лик ирмос Минеи третия песни, последи канона.

Сим образом поем и 6-ю песнь.

Четвертую же, и пятую, и седмую песни сице поем:

Глаголи первее ирмос канона Минеи, таже конечныя два стиха песни поем к тропарем канона: и Сла́ва, и ны́не, ирмосом же не покрываем песни: зане ирмос глаголется прежде песни. Поются же ирмосы Минеи по каноне, токмо по третией и шестой песнех: занеже у тех песней первее ирмос не поется. В прочия же дни седмицы кроме понедельника, тако поется и 1-я песнь, якоже указася о 4-й, и 5-й, песнех. А в нихже песнех будет трипеснец, поется последи канона катавасия, ирмос трипеснца, якоже вышше изъявися.

Ведомо же буди: яко Осмогласник не поется во всю святую 40-цу, кроме Недель. Поется же точию Минеа, и трипеснец. А в нихже песнех несть трипеснца, поется токмо Минеа. По 3-й песни глаголет иерей ектению малую. Таже седален святаго единожды. Слава, и ныне, Богородичен: И чтение в Лавсаице. По 6-й песни ектения малая. Таже седален мученичен: аще же имать святый кондак, глаголем его зде: мученичен же глаголем по 1-й кафисме с седальнами, с припевом: Ди́вен Бог во святы́х свои́х: И чтение в Синаксаре.

Канон и трипеснец господина Иосифа. Глас 2: Песнь 1.

Ирмос: Гряди́те, лю́дие:

Зде стихословится первая песнь.

Ка́ко ны́не моего́ воспла́чу отпаде́ния? / ко́е нача́ло сотворю́ спасе́ния моего́, блу́дно пожи́вый, Ще́дре? / И́миже судьба́ми ве́си, спаси́ мя.

Се вре́мя покая́ния, се день спаси́тельный, поще́ния вход: / душе́ бо́дрствуй, и страсте́й вхо́ды затвори́, / ко Го́споду взира́ющи.

Грехо́в треволне́ние буря́щееся, / во глубину́ низвлачи́т мя отча́яния: / но к Твое́й прибега́ю пучи́не ми́лости, спаси́ мя Го́споди.

Еди́н аз греху́ порабо́тихся, / еди́н аз страсте́м две́ри отверзо́х, благоуве́тливе Сло́ве, / обрати́ мя Спа́се благоутро́бием Твои́м.

Богородичен: Исто́чник безстра́стия ро́ждшая, / уя́звлена страстьми́ Отрокови́це исцели́, / и огня́ ве́чнаго исхити́ мя, еди́на Богоблагода́тная.

Иный трипеснец господина Феодора, глас и ирмос тойже:

Гряди́те, лю́дие, / днесь восприи́мем поще́ний дарова́ние, / я́ко Богодарова́нное вре́мя покая́ния, / в сем Спа́са уми́лостивим.

Приспе́ ны́не, введе́ся по́двигов вре́мя, поста́ по́прище / усе́рдно вси начне́м сей, / доброде́тели Го́сподеви я́ко да́ры нося́ще.

Слава, Троичен: Еди́нице про́стая, трисве́тлая, нача́льственнейшая Еди́на, / всемо́щнейшая, всежи́зненная, Бо́же и Го́споди, / О́тче Вседержи́телю, Сы́не и Ду́ше, спаса́й чту́щия Тя.

Богородичен: Бо́жию святу́ю го́ру воспои́м, Мари́ю нескве́рную, / из Нея́же возсия́ пра́вды Со́лнце, / су́щим во тьме Христо́с, всех Жизнь.

Сла́ва Тебе́ Бо́же наш, сла́ва Тебе́.

Колесни́ца о́гненная прия́т Илию́ чу́днаго, посто́м вооруже́ннаго, / Моисе́я показа́ зри́теля неизрече́нных: / и мы сей прии́мше, у́зрим Христа́.

Сла́ва Тебе́ Бо́же наш, сла́ва Тебе́.

Бра́шно Ада́м яде́, и от рая́ того́ невоздержа́ние изри́ну: / нас же, Го́споди пост прие́мый, / досто́йны покая́ния покажи́ Человеколю́бче.

Ирмос: Гряди́те, лю́дие, / пои́м песнь Христу́ Бо́гу, / разде́льшему мо́ре и наста́вльшему лю́ди, / я́же изведе́ из рабо́ты еги́петския, / я́ко просла́вися.

По 6-й песни мученичен гласа.

Песнь 8.

Ирмос: В пещь о́гненную ко отроко́м евре́йским снизше́дшаго, / и пла́мень в ро́су прело́жшаго Бо́га, / по́йте дела́, я́ко Го́спода, / и превозноси́те во вся ве́ки.

Огнесожже́на сластьми́, и души́ зри́тельным помраче́на, / огне́м Твоего́ стра́ха обнови́в Христе́, / све́том мя спасе́ния озари́, да Тя сла́влю во вся ве́ки.

Сы́тость возненави́девши страсте́й, / напита́йся до́брых сла́достною пи́щею, / и услади́ся па́че от поста́ сла́достию, / го́рести сласте́й уклоня́ющися, смире́нная душе́ моя́, / и поживи́ во ве́ки.

Ослепле́н душе́ю, и пия́нством страсте́й отемне́н, / ника́коже взира́ю к Тебе́ Еди́ному Бо́гу. / Те́мже мя уще́дри и просвети́, / и покая́ния отве́рзи ми врата́.

Богородичен: Онебеси́вшая на́ше земно́е и тле́нное Чи́стая, существо́, / те́плою Твое́ю моли́твою, упра́витися на́шим мольба́м и моле́ниям сотвори́, / к Твоему́ и всех Бо́гу, и Царю́.

Иный.

Ирмос: Дре́вле ороси́вшаго:

Све́тло усря́щим поста́ вход ве́рнии, и да не се́туим: / но омы́им ли́ца на́ша безстра́стия водо́ю, / благословя́ще и превознося́ще Христа́ во ве́ки.

Еле́ем пома́завше ми́лости души́ главу́, / не многосло́вим Отцу́ на́шему, Су́щему на Небесе́х, / моли́твы возсыла́юще, / благословя́ще и превознося́ще Его́ во вся ве́ки.

Благослови́м Отца́ и Сы́на, и Свята́го Ду́ха, Го́спода.

Присносу́щна, безнача́льна Отца́, воспои́м ве́рнии, / Сы́на же собезнача́льна, и Ду́ха сопросия́вша из Отца́, / единосу́щна Ли́ца, / Еди́наго су́ща всеси́льнаго нача́ла и вла́сти.

И ны́не и при́сно, и во ве́ки веко́в, ами́нь.

Богородичен: Мари́е Богозва́нная, очисти́лище вои́стинну ве́рных, / из Тебе́ бо оставле́ние подава́ется всем бога́тно: / Сы́на Твоего́ и Го́спода не преста́й моля́щи о пою́щих Тя.

Сла́ва Тебе́ Бо́же наш, сла́ва Тебе́.

Пости́вся Госпо́дь четыредеся́тную ме́ру дней, / сия́ ны́не освяти́ и очи́сти дни, бра́тие, в ня́же дости́гше, зове́м: / благослови́те, и превозноси́те Христа́ во ве́ки.

Хва́лим, благослови́м, покланя́емся Го́сподеви, пою́ще, и превознося́ще во вся ве́ки.

Ирмос: Дре́вле ороси́вшаго евре́йския о́троки в пла́мени, / и опали́вшаго Го́спода халде́и пресла́вно в нем, / воспое́м, глаго́люще: / благослови́те, и превозноси́те Его́ во ве́ки.

И стихословится Честнейшую:

Песнь 9.

Ирмос: От Бо́га Бо́га Сло́ва, / неизрече́нною му́дростию прише́дшего обнови́те Ада́ма, / я́дию в тле́ние па́дшаго лю́те, / от Святы́я Де́вы неизрече́нно воплоти́вшагося нас ра́ди, / ве́рнии, единому́дренно пе́сньми велича́ем.

Поста́ день, отложе́ние греха́ да бу́дет ти душе́, / и к Бо́гу ма́ние вку́пе, и присвое́ние: / я́ко да убежи́ши зло́бныя про́пасти, / и са́мыя то́кмо пути́ возлю́биши, веду́щия ко о́ному поко́ю.

И помышле́ньми поползну́вся, / и пло́тию прегреши́в рыда́ю, и стеню́, и вопию́: / спаси́ мя Го́споди, спаси́ мя незло́биве еди́не, / и не осуди́ мене́ во огнь гее́нны о́ныя, осужде́ния досто́йнаго.

Во све́тлую поста́ обле́кшеся ри́зу, / пия́нства те́мныя и злотя́жкия совлеце́мся оде́жды, / и све́тли бы́вше Боже́ственными доброде́тельми, / светоза́рная Спа́сова ве́рою у́зрим страда́ния.

Богородичен: Изнемо́гшую все́ми прило́ги зло́бных бесо́в, / стра́стную мою́ ду́шу исцели́ Пречи́стая Влады́чице, / Цели́теля ро́ждшая Христа́, избавле́ние нас, / ве́дущих Тя Отрокови́цу, Де́ву нетле́нну.

Иный.

Ирмос: Преесте́ственно:

Ны́не наста́ вре́мя святы́х посто́в, / начне́м сего́ в до́брых пребыва́ниих: / в суда́х бо и крамола́х не пости́теся глаго́лет.

В горе́ Хори́в посто́м очи́щься, ви́де Бо́га Илия́: / очи́стим и мы посто́м се́рдце, и у́зрим Христа́.

Слава, Троичен: Еди́ному Естеству́ покланя́юся, три Ли́ца пою́, / Еди́наго Бо́га всех, / Отца́, и Сы́на, и Свята́го Ду́ха, присносу́щное нача́ло.

Богородичен: Чи́стая Отроча́ ражда́еши, Де́ва мле́ком дои́ши: / ка́ко в сию́ двою́ де́вствуеши ро́ждши? / Бог есть соде́явый, не взыску́й от Мене́, е́же ка́ко?

Сла́ва Тебе́ Бо́же наш, сла́ва Тебе́.

День еди́н у́бо, рече́, житие́ вся́ко земны́х: / тружда́ющимся от любве́ четы́редесять суть дней поста́, / я́же соверши́м све́тло.

Ирмос: Преесте́ственно пло́тию заче́ншую во чре́ве, / от Отца́ безле́тно предвозсия́вшее Сло́во, / в пе́снех немо́лчных / велича́ем, ве́рнии.

Таже, Досто́йно есть: Поклон един. ектения: Па́ки, и па́ки: И светилен Троичен гласа. На Вся́кое дыха́ние стихов не поем, но стихологисуем: Хвали́те Го́спода с Небе́с: обычныя псалмы, 3. И аще прилучится в Минеи на ряду два святых: Поем единому вечер стихиры, а другому на Хвалитех стихиры на 4, аще будут. Аще же ни, глаголет учиненный брат: Тебе́ сла́ва подоба́ет Го́споди Бо́же наш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь. Сла́ва Тебе́, показа́вшему нам свет. Сла́ва в вы́шних Бо́гу: И прочая. И творим метания 3, равно на местех наших стояще. Посем иерей: Испо́лним у́треннюю: И возглас.

И совокупльшеся оба лика вкупе, поем:

На стиховне самогласен, глас 5:

Прии́де пост, ма́ти целому́дрия, / обличи́тель грехо́в, пропове́дник покая́ния, / жи́тельство а́нгелов, и спасе́ние челове́ков, / ве́рнии возопии́м: Бо́же, поми́луй нас.

Стих: Испо́лнихомся зау́тра ми́лости Твоея́, Го́споди, возра́довахомся, и возвесели́хомся: во вся дни на́ша возвесели́хомся. За дни, в ня́же смири́л ны еси́, ле́та в ня́же ви́дехом зла́я. И при́зри на рабы́ Твоя́, и на дела́ Твоя́, / и наста́ви сы́ны их.

И повторяем тойже.

Таже стих: И бу́ди све́тлость Го́спода Бо́га на́шего на нас, и дела́ рук на́ших испра́ви на нас, / и де́ло рук на́ших испра́ви.

И мученичен: Благослове́но во́инство Царя́ Небе́снаго, / а́ще бо и земноро́днии бы́ша страстоте́рпцы, / но а́нгельский сан потща́шася дости́гнути, о телесе́х небре́гше, / и страстьми́ свои́ми безпло́тных че́сти сподо́бишася: / моли́твами их, Го́споди спаси́ ду́ши на́ша.

Слава, и ныне, Богородичен: Тя Бо́жию Ма́терь, Де́ву Чи́стую и херуви́м святе́йшую, / во гла́сех пе́сней велича́ем: / зане́ душе́ю и те́лом Богоро́дицу испове́дуем, / я́ко вои́стинну ро́ждшую Бо́га воплоще́нна: / моли́ся Пречи́стая о душа́х на́ших.

Таже, Бла́го есть: дважды. Трисвятое, и метания 3. Пресвята́я Тро́ице: О́тче наш: По внегда же рещи иерею: Я́ко Твое́ есть Ца́рство: глаголем тропарь: В хра́ме стоя́ще сла́вы Твоея́: И глаголем, Го́споди поми́луй, 40. Таже отходит священник, и глаголет: Сый благослове́н Христо́с Бог наш: Небе́сный Царю́: Посем же стоим, и молимся в себе, во своем помышлении глаголюще молитву преподобнаго отца нашего Ефрема: Го́споди и Влады́ко живота́ моего́: И поклоны великия 3: и малых 12, глаголюще в себе на едином коемждо: Бо́же, очи́сти мя гре́шнаго. Таже паки ин поклон великий един, глаголюще и в нем предписанную молитву всю святаго Ефрема. И по еже востати нам, начинает предстоятель: Прииди́те поклони́мся: трижды, и метания три. И совокупляем первый час. И скончану третиему псалму, глаголем Аллилу́ия, и метания три.

Подобает ведати: яко во вся понедельники святыя Четыредесятницы на 1-м часе кафисмы не стихословим. В прочия же дни, стихословим кафисму, и творим на коемждо антифоне метания три.

Такожде и в пяток, первый час и девятый, без кафисмы. Поет же учиненный чтец, или иерей, среди церкве тропарь, на глас 6: Зау́тра услы́ши глас мой: И мы поем велегласно тожде, и творим коленоприклонение на землю. Такожде и на прочия два стиха. Стих 1: Глаго́лы моя́ внуши́ Го́споди, разуме́й зва́ние мое́. Стих 2: Я́ко к Тебе́ помолю́ся Го́споди. И паки: Зау́тра услы́ши глас мой: Слава, и ныне: Что Тя нарече́м, о Благода́тная, И метания 3. Таже: Стопы́ моя́ напра́ви по словеси́ Твоему́, и да не облада́ет мно́ю вся́кое беззако́ние. И повторяем тойжде. Таже: Изба́ви мя от клеветы́ челове́ческия, и сохраню́ за́поведи Твоя́. Паки тойжде: Лице́ Твое́ просвети́ на раба́ Твоего́, и научи́ мя оправда́нием Твои́м. Паки тойжде. Сие же глаголем трижды, велегласно и косно. Да испо́лнятся уста́ моя́ хвале́ния Твоего́ Го́споди: Трисвятое. И метания три. Пресвята́я Тро́ице: О́тче наш: Возглашает священник: Я́ко Твое́ есть Ца́рство: И по амине глаголем тропарь. В понедельник убо, и во вторник, и четверток, глаголи Богородичен: Пресла́вную Бо́жию Ма́терь: В среду же и пяток глаголи: Ско́ро предвари́, пре́жде да́же не порабо́тимся: Го́споди поми́луй, И глаголем молитву: И́же на вся́кое вре́мя: Го́споди поми́луй, трижды. Слава, и ныне, Честне́йшую херуви́м: И поклон един. И́менем Госпо́дним благослови́ о́тче. Священник: Бо́же, уще́дри ны, и благослови́ ны, просвети́ лице́ Твое́ на ны, и поми́луй ны. И творим поклоны, якоже предписася: и потом глаголет предстоятель, или чтец: Трисвятое, и метания три. О́тче наш: Го́споди поми́луй, 40. И молитва, Христе́ Све́те и́стинный:

Иерей: Сла́ва Тебе́ Христе́ Бо́же, упова́ние на́ше сла́ва Тебе́. Мы же, Сла́ва, и ны́не: Го́споди поми́луй, трижды. Благослови́. И отпуст. Таже, Многолетное. И целуем святыя иконы.

Таже исходим, литию творяще в притворе.

И тамо глаголются обычныя молитвы: и чтутся оглашения преподобнаго отца нашего Феодора Студита от предстоятеля, или от екклисиарха, яко преписася, сиречь, в среду и пяток.

И бывает конец, и отпуст.

Сей образ бывает во святую Четыредесятницу на Утрени, и на первом часе. По отпущении же исходяще из церкве, идем со всяким безмолвием в келлии своя, или на службу: и не подобает нам беседы творити друг со другом на монастыре в пути, удержано бо бысть сие от святых отец.

ОБ ТРЕТИЕМ ЖЕ ЧАСЕ:

Ударяет кандиловжигатель в било довольно: И собираемся в церковь, творяще прежде начала пения кийждо нас пред святыми дверьми поклоны 3 и целуем святыя иконы. И на оба лика по единому малу поклону. Благословившу же священнику, И начинающим нам: Царю́ Небе́сный: Трисвятое. И метания 3. По О́тче наш: иерей: Я́ко Твое́ есть Ца́рство: И по амине, Го́споди поми́луй, 12. Прииди́те поклони́мся: трижды и метания 3. И стихословится третий час, якоже обычай.

В конце же третияго псалма, на Аллилу́ия метания три. И стихословим кафисму рядовую: на коемждо же антифоне творим метания три. И по кафисме чтец, или иерей, став среди церкве, глаголет тропарь, глас 6: Го́споди, и́же Пресвята́го Твоего́ Ду́ха: И нам противоглашающим, творим коленоприклонение до земли. Такожде и на прочия два стиха. Стих: Се́рдце чи́сто сози́жди во мне Бо́же, и дух прав обнови́ во утро́бе мое́й. Стих: Не отве́ржи мене́ от ли́ца Твоего́, и Ду́ха Твоего́ Свята́го не отыми́ от мене́. Сла́ва, и ны́не, Богородичен: и метания три, Богоро́дице, Ты еси́ лоза́ и́стинная: И абие чтем в Лествичнике. Начинает же от ныне учиненный монах возбуждати братию, во всю святую 40-цу: обходит же тихо, и призирает на спящия, и возставляет к слышанию, по последовавшему образу. По чтении же, Госпо́дь Бог благослове́н: Трисвятое. и метания три. И по О́тче наш: Возглашает священник: Я́ко Твое́ есть Ца́рство: И по амине поем тропари на глас 8: Благослове́н еси́ Христе́ Бо́же наш: Сла́ва: Ско́рое и изве́стное даждь утеше́ние: И ны́не: Наде́жда и предста́тельство: Го́споди поми́луй, 40. И молитва, И́же на вся́кое вре́мя: Го́споди поми́луй, трижды. Сла́ва, и ны́не: Честне́йшую херуви́м: И́менем Госпо́дним благослови́ о́тче: И священник: Бо́же уще́дри ны: Творим поклоны, якоже предписася, глаголет предстоятель молитву: Влады́ко Бо́же О́тче Вседержи́телю:

НА 6-М ЧАСЕ

Кандиловжигатель же сотворив обычный поклон предстоятелю, отходит и ударяет в било шесть крат. И по исполнении молитвы, Прииди́те поклони́мся: трижды. И метания три. И стихословим шестый час. И по конце, Сла́ва, и ны́не, Аллилу́ия, трижды. и метания три. И стихословим кафисму, и по коемждо антифоне, Аллилу́ия трижды: и метания 3. По стихословии же тропарь, глас 2: И́же в шесты́й день же и час: Стих 1: Внуши́ Бо́же моли́тву мою́, и не пре́зри моле́ния моего́. Стих 2: Аз к Бо́гу воззва́х, и Госпо́дь услы́ша мя. Творяще и поклоны 3, яко предписася. Сла́ва, и ны́не, Я́ко не и́мамы дерзнове́ния: и метания три.

Таже поем тропарь пророчества, глас 5:

Го́споди Го́споди, / Его́же вся ужаса́ются и трепе́щут от ли́ца си́лы Твоея́, / Тебе́ припа́даем безсме́ртне, Тебе́ мо́лимся Святы́й: / спаси́ ду́ши на́ша, моли́твами святы́х Твои́х.

Сла́ва, и ны́не: и повторяем тойжде.

Прокимен, глас 4, псалом 1: Весть Госпо́дь путь пра́ведных, / и путь нечести́вых поги́бнет. Стих: Блаже́н муж, и́же не и́де на сове́т нечести́вых, и на пути́ гре́шных не ста.

Пророчества Исаиина чтение. [Глава 1, ст. 1 – 20.]

Виде́ние, е́же ви́де Иса́ия сын Амо́сов, е́же ви́де на Иуде́ю, и на Иерусали́м, в ца́рство Ози́и и Иофа́ма, и Аха́за и Езеки́и, и́же ца́рствоваша во Иуде́и. Слы́ши не́бо, и внуши́ земле́, я́ко Госпо́дь возглаго́ла: сы́ны роди́х и возвы́сих, ти́и же отверго́шася Мене́. Позна́ вол стяжа́вшаго и, и осе́л я́сли господи́на своего́. Изра́иль же Мене́ не позна́, и лю́дие Мои́ не разуме́ша. Увы́ язы́к гре́шный, лю́дие испо́лнени грехо́в, се́мя лука́вое сы́нове беззако́ннии, оста́висте Го́спода, и разгне́васте Свята́го Изра́илева: отврати́стеся вспять. Что еще́ уязвля́етеся, прилага́юще беззако́ние? Вся́кая глава́ в боле́знь, и вся́кое се́рдце в печа́ль. От ног да́же до главы́ несть в нем це́лости: ни струп, ни я́зва, ни ра́на паля́щаяся: несть пла́стыря приложи́ти, ниже́ еле́я, ниже́ обяза́ния. Земля́ ва́ша пуста́, гра́ди ва́ши огне́м пожже́ни, страну́ ва́шу пред ва́ми чужди́и пояда́ют, и опусте́ низвраще́нна от люде́й чужди́х. Оста́вится дщерь Сио́ня, я́ко ку́ща в виногра́де, и я́ко ово́щное храни́лище в вертогра́де, я́ко град вою́емый: а́ще не бы Госпо́дь Савао́ф оста́вил нам се́мене, я́ко Содо́ма у́бо бы́ли бы́хом, и я́ко Гомо́рру уподо́билися бы́хом. Услы́шите сло́во Госпо́дне, кня́зи Содо́мстии: внемли́те зако́ну Бо́жию, лю́дие Гомо́ррстии. Что ми мно́жество жертв ва́ших? – глаго́лет Госпо́дь. Испо́лнен есмь всесожже́ний о́вних и ту́ка а́гнцов, и кро́ве юнцо́в и козло́в не хощу́. Ниже́ приходи́те яви́тися Ми: кто бо изыска́ сия́ из рук ва́ших? Ходи́ти по двору́ Моему́ не приложите́. И а́ще принесе́те Ми семида́л, всу́е: кади́ло, ме́рзость Ми есть. Новоме́сячий ва́ших, и суббо́т, и дне вели́каго не потерплю́: поста́, и пра́здности, и новоме́сячий ва́ших, и пра́здников ва́ших ненави́дит душа́ Моя́: бы́сте ми в сы́тость, ктому́ не стерплю́ грехо́в ва́ших. Егда́ простре́те ру́ки [ва́ша] ко Мне, отвращу́ о́чи Мои́ от вас: и а́ще умно́жите моле́ние, не услышу вас: ру́ки бо ва́ша испо́лнены кро́ве. Измы́йтеся, [и] чи́сти бу́дите, отыми́те лука́вства от душ ва́ших пред очи́ма Мои́ма, преста́ните от лука́вств ва́ших. Научи́теся добро́ твори́ти, взыщи́те суда́, изба́вите оби́димаго, суди́те си́ру, и оправди́те вдови́цу. И прииди́те, и истя́жимся, глаго́лет Госпо́дь. И а́ще бу́дут греси́ ва́ши я́ко багря́ное, я́ко снег убелю; а́ще же бу́дут я́ко червле́ное, я́ко во́лну убелю́. И а́ще хо́щете, и послу́шаете Мене́, блага́я земли́ сне́сте. А́ще же не хо́щете, ниже́ послу́шаете Мене́, меч вы поя́ст: уста́ бо Госпо́дня глаго́лаша сия́.

Прокимен, глас 7. псалом 2: Рабо́тайте Го́сподеви со стра́хом, / и ра́дуйтеся Ему́ с тре́петом. Стих: Вску́ю шата́шася язы́цы, и лю́дие поучи́шася тще́тным?

И бывает чтение в Лествичнике. Таже тропарь: Ско́ро да предваря́т ны: Трисвятое. И метания 3. По О́тче наш: иерей, возглас: Я́ко Твое́ есть Ца́рство: И тропари на глас 2: Спасе́ние соде́лал еси́: Сла́ва: Пречи́стому о́бразу Твоему́: И ны́не: Милосе́рдия су́щи: В среду же и пяток глаголем Крестобогородичен: Препросла́влена еси́ Богоро́дице Де́во: Го́споди поми́луй, 40. И́же на вся́кое вре́мя: Го́споди поми́луй, трижды. Сла́ва, и ны́не: Честне́йшую херуви́м: И́менем Госпо́дним благослови́ о́тче. Иерей: Бо́же, уще́дри ны и благослови́ ны: И творим поклоны, якоже обычай. И по исполнении поклонов начинает предстоятель конечное Трисвятое, и метания три. По О́тче наш: Го́споди поми́луй, 12. Таже иерей: Сла́ва Тебе́ Христе́ Бо́же, упование на́ше, сла́ва Тебе́. И бывает отпуст.

Сей образ и чин должен быти во всю святую Четыредесятницу, на 3-м и на 6-м часе. А идеже расхода не бывает, по молитве: Бо́же и Го́споди сил: абие глаголем: Прииди́те поклони́мся: трижды, и 9-й час. А идеже бывает расход, о часе 9-м биет кандиловжигатель девятищи, и собираемся в церковь. И благословившу иерею, начинаем Трисвятое, и метания три. По О́тче наш: Возглашает священник: Я́ко твое́ есть Ца́рство: И по амине, Го́споди поми́луй, 12. Прииди́те поклони́мся: трижды, и метания три, и поем час девятый трипсалмный. В конец же третияго псалма, на Аллилу́ия, метания три. И начинаем стихословие кафисмы: На всякий же антифон метания три. По исполнении же стихословия тропарь, глас 8: И́же в девя́тый час: Стих 1: Да прибли́жится моли́тва моя́ пред Тя Го́споди: Стих 2: Да вни́дет проше́ние мое́: И творяще поклоны в сих. Сла́ва, и ны́не: И́же нас ра́ди рожде́йся от Де́вы: метания три. И бывает чтение паки в Лествичнике. И по чтении глаголем стих: Не преда́ждь нас до конца́: Трисвятое, и метания три. Пресвята́я Тро́ице: О́тче наш: И возглашает священник: Я́ко Твое́ есть Ца́рство: И по амине глаголем тропари, глас 8: Ви́дя разбо́йник Нача́льника жи́зни: Сла́ва: Посреде́ двою́ разбо́йнику: И ны́не: А́гнца и Па́стыря, и Спа́са ми́ра: Го́споди поми́луй, 40. И́же на вся́кое вре́мя: Го́споди поми́луй, трижды. Сла́ва, и ны́не: Честне́йшую херуви́м: И́менем Госпо́дним благослови́ о́тче. Священник: Бо́же уще́дри ны: И творим поклоны великия три, глаголюще в себе и предъявленную молитву преподобнаго Ефрема: прочих же 12 не творим. И глаголем молитву: Влады́ко Го́споди Иису́се Христе́ Бо́же наш: И абие начинает лик, емуже прилучится начинати, на глас 8: Во Ца́рствии Твое́м помяни́ нас Го́споди: И поем блаженны со сладкопением и велегласно и косно, в тойже глас: Блаже́ни ни́щии ду́хом, я́ко тех есть Ца́рство Небе́сное. Помяни́ нас Го́споди, егда́ прии́деши во Ца́рствии Твое́м. И прочия стихи. Сла́ва Отцу́, и Сы́ну, и Свято́му Ду́ху. Помяни́ нас Го́споди: И ны́не и при́сно, и во ве́ки веко́в, ами́нь. Помяни́ нас Го́споди: Таже сошедшеся оба лика, и поем вышшим гласом откровенными главами: Помяни́ нас Го́споди, егда́ прии́деши во Ца́рствии Твое́м. Поклон един. Помяни́ нас Влады́ко, егда́ прии́деши во Ца́рствии Твое́м. Поклон един. Помяни́ нас Святы́й, егда́ прии́деши во Ца́рствии Твое́м. Поклон един. И глаголем: Лик небе́сный пое́т Тя и глаго́лет: Стих: Приступи́те к Нему́ и просвети́теся: И паки: Лик небе́сный: Сла́ва: Лик святы́х а́нгел и арха́нгел: И ны́не: Ве́рую во Еди́наго Бо́га: Осла́би, оста́ви: О́тче наш: Таже кондак дне и храма. Аще ли храм Христов глаголем прежде храма, таже дне и святаго рядоваго, егоже есть день, иже имать. Сла́ва: Со святы́ми упоко́й Христе́: И ны́не, храма Богородицы, или: Предста́тельство христиа́н непосты́дное: Го́споди поми́луй, 40. Сла́ва, и ны́не: Честне́йшую херуви́м: И́менем Госпо́дним благослови́ о́тче. И глаголет священник: Бо́же уще́дри ны: И творим изображенныя поклоны 16 с молитвою святаго Ефрема, якоже предписася. Параекклисиарх же поклон сотворив настоятелю, и благословение взем, идет и звонит. Таже начинает предстоятель: Прииди́те поклони́мся: трижды, и метания 3. И чтец глаголет псалом: Благослови́ душе́ моя́ Го́спода: тихим и кротким гласом. Иерей же глаголет обычныя молитвы вечерния пред святыми враты. По псалме, Сла́ва, и ны́не, Аллилу́ия, трижды, и поклоны 3. И ектения великая. И стихословим кафисму: Ко Го́споду внегда́ скорбе́ти ми: и по коемждо антифоне, Сла́ва, и ны́не, Аллилу́ия, трижды. и метания три.

В ПОНЕДЕЛЬНИК ПЕРВЫЯ СЕДМИЦЫ, ВЕЧЕР.

На Господи воззвах, стихиры, поставим стихов 6.

Творение господина Иосифа. Глас 2. Подобен: Вся прейду́:

Вся́кий грех соде́ях, всех преидо́х блудо́м: / а́ще восхощу́ пока́ятися, не и́мам слез то́ки! / А́ще ле́ностно и ны́не поживу́, му́це пови́нен есмь. / Но даждь ми исправле́ние, / еди́не благи́й Бо́же, и поми́луй мя.

Подобен:

Ту́чи ми пода́ждь Христе́ слез, в поста́ кра́сный день, / я́ко да воспла́чу, и отмы́ю скве́рну я́же от сласте́й, / и явлю́ся Тебе́ очище́н, / егда́ Судие́ с Небеси́ и́маши приити́ Го́споди, / суди́ти челове́ком, / я́ко Судия́, и Пра́ведный еди́н.

Другий, глас 5. Господина Феодора Студита. Подобен: Преподо́бне о́тче:

Прииди́те усе́рдно, / тве́рдое ору́жие поста́ иму́ще я́ко щит, / вся́кую кознь пре́лести вра́жия отврати́м ве́рнии. / Не опали́мся сладостьми́ страсте́й, / ни огня́ искуше́ний убои́мся, / и́миже Христо́с Человеколю́бец / почестьми́ терпе́ния венча́ет нас. / Те́мже со дерзнове́нием моля́щеся, / припа́даем зову́ще, / прося́ще ми́ра, и душа́м на́шим ве́лия ми́лости.

И в Минеи, 3. Сла́ва, и ны́не, Богородичен. Све́те ти́хий:

Таже прокимен, псалом 3, глас 6: Госпо́дне есть спасе́ние, / и на лю́дех Твои́х благослове́ние Твое́. Стих: Го́споди, что ся умно́жиша стужа́ющии ми?

Бытия чтение. [Глава 1, ст. 1 – 13.]

В нача́ле сотвори́ Бог не́бо и зе́млю. Земля́ же бе неви́дима и неустро́ена, и тьма верху́ бе́здны, и Дух Бо́жий ноша́шеся верху́ воды́. И рече́ Бог: да бу́дет свет. И бысть свет. И ви́де Бог свет, я́ко добро́, и разлучи́ Бог между́ све́том и между́ тьмо́ю. И нарече́ Бог свет день, а тму нарече́ нощь. И бысть ве́чер, и бысть у́тро, день еди́н. И рече́ Бог: да бу́дет твердь посреде́ воды́, и да бу́дет разлуча́ющи посреде́ воды́, и воды́. И бысть та́ко. И сотвори́ Бог твердь, и разлучи́ Бог между́ водо́ю, я́же бе под тве́рдию, и между́ водо́ю, я́же бе над тве́рдию. И нарече́ Бог твердь, не́бо. И ви́де Бог, я́ко добро́. И бысть вече́р, и бысть у́тро, день вторы́й. И рече́ Бог: да собере́тся вода́, я́же под небесе́м, в собра́ние еди́но, и да яви́тся су́ша. И бысть та́ко. И собра́ся вода́, я́же под небесе́м в собра́ния своя́, и яви́ся су́ша. И нарече́ Бог су́шу, зе́млю, и собра́ния вод нарече́ моря́. И ви́де Бог, я́ко добро́. И рече́ Бог: да прорасти́т земля́ бы́лие травно́е, се́ющее се́мя по ро́ду и по подо́бию, и дре́во плодови́тое творя́щее плод, ему́же се́мя его́ в нем, по ро́ду на земли́, и бысть та́ко. И изнесе́ земля́ бы́лие травно́е, се́ющее се́мя по ро́ду и по подо́бию, и дре́во плодови́тое творя́щее плод, ему́же се́мя его́ в нем, по ро́ду на земли́. И ви́де Бог, я́ко добро́. И бысть ве́чер, и бысть у́тро, день тре́тий.

Прокимен 2, псалом 4, глас 5: Госпо́дь услы́шит мя, внегда́ воззва́ти ми к Нему́. Стих: Внегда́ призва́ти ми, услы́ша мя Бог пра́вды моея́.

Притчей чтение. [Глава 1, ст. 1 – 20.]

При́тчи Соломо́на сы́на Дави́дова, и́же ца́рствова во Изра́или. Позна́ти прему́дрость и наказа́ние, и уразуме́ти словеса́ му́дрости. Прия́ти же изви́тия слове́с и разреше́ния гада́ний, уразуме́ти же пра́вду и́стинную и суд исправля́ти. Да даст незло́бивым кова́рство, отроча́ти же ю́ну чу́вство же и смысл. Сих бо послу́шав, му́дрый прему́дрее бу́дет, а разу́мный строи́тельство стя́жет. Уразуме́ет же при́тчу, и те́мное сло́во, рече́ния же прему́дрых, и гада́ния. Нача́ло прему́дрости страх Госпо́день, ра́зум же благ всем творя́щим его́: благоче́стие же в Бо́га нача́ло чу́вства, прему́дрость же и наказа́ние нечести́вии уничижа́т. Слы́ши, сы́не, наказа́ние отца́ твоего́, и не отри́ни заве́тов ма́тере твоея́. Вене́ц бо благода́тей прии́меши на твое́м версе́, и гри́вну зла́ту о твое́й вы́и. Сы́не, да не прельстя́т тебе́ му́жи нечести́вии, ниже́ да восхо́щеши, А́ще помо́лят тя, глаго́люще: иди́ с на́ми, приобщи́ся кро́ве, скры́ем же в зе́млю му́жа пра́ведна непра́ведно. Пожре́м же его́ я́коже ад жи́ва, и во́змем па́мять его́ от земли́. Стяжа́ние его́ многоце́нное прии́мем, испо́лним же до́мы на́ша коры́стей. Жре́бий же твой положи́ с на́ми: о́бще же влага́лище стя́жем вси, и меше́ц еди́н да бу́дет всем нам. Не иди́ в путь с ни́ми: уклони́ же но́гу твою́ от стезь их: Но́зе бо их на зло теку́т, и ско́ри суть излия́ти кровь. Не без пра́вды бо простира́ются мре́жи перна́тым. Ти́и бо уби́йству приобща́ющеся, сокро́вищствуют себе́ зла́я: разруше́ние же муже́й законопресту́пных зло. Си́и путие́ суть всех творя́щих беззако́нная: нече́стием бо свою́ ду́шу отъе́млют. Прему́дрость во исхо́дех пое́тся, в сто́гнах же дерзнове́ние во́дит.

Сподо́би Го́споди в ве́чер:

И метания 3. Иерей: Испо́лним вече́рнюю моли́тву:

По возгласе поем оба лика вкупе:

На стиховне самогласен дне, глас 3:

Пости́мся посто́м прия́тным, благоуго́дным Го́сподеви: / и́стинный пост есть, злых отчужде́ние, / воздержа́ние язы́ка, я́рости отложе́ние, / похоте́й отлуче́ние, оглаго́лания, лжи и клятвопреступле́ния. / Сих оскуде́ние, / пост и́стинный есть, и благоприя́тный.

Стих: К Тебе́ возведо́х о́чи мои́, живу́щему на небеси́. Се я́ко о́чи раб в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, / до́ндеже уще́дрит ны.

И повторяем тойже.

Таже мученичен. Стих: Поми́луй нас Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, / и уничиже́ния го́рдых.

Ве́лия му́ченик Твои́х Христе́ си́ла: / во гробе́х бо лежа́т, и ду́хи прогоня́ют, / и упраздни́ша вра́жию власть, / ве́рою Тро́ическою подви́гшеся о благоче́стии.

Слава, и ныне, Богородичен: Богоро́дице, предста́тельство всех моля́щихся, / дерза́ем, Тобо́ю хва́лимся, / в Тебе́ все упова́ние на́ше есть: / моли́ Ро́ждшагося из Тебе́ / о непотре́бных рабе́х Твои́х.

Таже творит канонарх обычный поклон в лики, такожде и оба лика. Ны́не отпуща́еши: Трисвятое: И метания 3. Священник: Я́ко Твое́ есть Ца́рство: И по амине: Богоро́дице Де́во ра́дуйся: Поклон един. Сла́ва: Крести́телю Христо́в: Поклон един. И ны́не: Моли́те за ны: Поклон един. Таже, Под Твое́ благоутро́бие: без поклона. Го́споди поми́луй, 40: кротким гласом. Сла́ва, и ны́не: Честне́йшую херуви́м: И́менем Госпо́дним благослови́ о́тче. Священник: Сый благослове́н Христо́с Бог наш: Небе́сный Царю́: И глаголем молитву тайно преподобнаго Ефрема: Го́споди, и Влады́ко живота́ моего́: И творим 3 великия поклоны, и малых 12. И паки предписанную молитву, и поклон един. Трисвятое. Го́споди поми́луй, 12. И молитва: Всесвята́я Тро́ице, единосу́щная держа́во: Таже, Бу́ди и́мя Госпо́дне благослове́нно от ны́не и до века. Трижды. И метания 3. Сла́ва, и ны́не: Благословлю́ Го́спода на вся́кое вре́мя: Посем, Досто́йно есть: и поклон. Посем другий лик: Слава, и ныне: Го́споди поми́луй, трижды. Благослови́. И отпуст по обычаю. Егда же поставляем трапезу, глаголем и псалом 144: Вознесу́ Тя Бо́же мой: И бывает отпуст. Исходяще же в паперть, поем якоже обычай стихиру храма святаго. Глаголются же и от священника обычныя молитвы, и поминает усопшия.

И бывает совершенный отпуст.

Сие последование бывает светильничнаго, во всей святей Четыредесятнице, не сущей преждеосвященней: не прияхом бо творити преждеосвященную, даже до среды, за еже поститися по преданию всему братству, могущии же да пребудут постящеся до пятка. Святыя же горы устав в первый убо день отнюд не повелевает ясти.

Во вторник же, в среду, и в четверток ясти подобает по единой литре хлеба, и воду, и ино ничтоже, разве соли требуя с хлебом.

Подобает ведати: Яко в лавре преподобнаго отца нашего Саввы, не поем Повечерий в церкви, но в келлиях поем кийждо: тако бо прияхом.

Во общежитиях же Палестины поются Повечерия сице:

О ЧАСЕ ДЕВЯТОМ,

Входит свещевжигатель, и сотворив поклон предстоятелю отыдет, и биет в било дванадесять. И собираемся вси в церковь, и сотворивше кийждо вчиненыя поклоны, и мало седше, во еже всем, или множайшым собратися: Востав священник от седалища своего и сотворив обычный поклон игумену, творит благословение. И мы начинаем: Сла́ва Тебе́ Бо́же наш, сла́ва Тебе́: Царю́ Небе́сный: Трисвятое, и метания 3. Подобне и на Прииди́те поклони́мся, метания 3. И абие глаголем псалом 69: Бо́же, в по́мощь мою́ вонми́:

Таже начинаем великий канон, творяще и на части четыре со ирмосом, яко исполнитися ему в четверток вечера.

Творение святаго отца нашего Андрея Критскаго, Иерусалимскаго.

Творим же на кийждо тропарь метания 3.

Глас 6. Песнь 1. Ирмос по дважды.

Ирмос: Помо́щник и покрови́тель / бысть мне во спасе́ние, / Сей мой Бог, и просла́влю Его́, / Бог отца́ моего́, и вознесу́ Его́: / сла́вно бо просла́вися.

Стих: Поми́луй мя, Бо́же, поми́луй мя.

Отку́ду начну́ пла́кати / окая́ннаго моего́ жития́ дея́ний? / Ко́е ли положу́ нача́ло, Христе́, ны́нешнему рыда́нию? / Но я́ко благоутро́бен, / даждь ми прегреше́ний оставле́ние.

Гряди́ окая́нная душе́, с пло́тию твое́ю, / Зижди́телю всех испове́ждься, / и оста́нися про́чее пре́ждняго безслове́сия, / и принеси́ Бо́гу в покая́нии сле́зы.

Первозда́ннаго Ада́ма преступле́нию поревнова́в, / позна́х себе́ обнаже́на от Бо́га / и присносу́щнаго Ца́рствия и сла́дости, / грех ра́ди мои́х.

Увы мне окая́нная душе́, / что уподо́билася еси́ пе́рвей Е́ве? / Ви́дела бо еси́ зле, и уязви́лася еси́ го́рце, / и косну́лася еси́ дре́ва и вкуси́ла еси́ де́рзостно / безслове́сныя сне́ди.

Вме́сто Е́вы чу́вственныя / мы́сленная ми бысть Е́ва, / во пло́ти стра́стный по́мысл, / показу́яй сла́дкая / и вкуша́яй при́сно / го́рькаго напое́ния.

Досто́йно из Еде́ма изгна́н бысть, / я́ко не сохрани́в еди́ну Твою́, Спа́се, за́поведь Ада́м: / аз же что постражду́, / отмета́я всегда́ живо́тная Твоя́ словеса́?

Слава, Троичен: Пресу́щная Тро́ице, во Еди́нице покланя́емая, / возми́ бре́мя от мене́ тя́жкое грехо́вное, / и я́ко благоутро́бна, / даждь ми сле́зы умиле́ния.

Богородичен: Богоро́дице, наде́жде и предста́тельство Тебе́ пою́щих, / возми́ бре́мя от мене́ тя́жкое грехо́вное, / и я́ко Влады́чица Чи́стая, / ка́ющася приими́ мя.

Песнь 2.

Ирмос: Вонми́, не́бо, и возглаго́лю, / и воспою́ Христа́, / от Де́вы пло́тию прише́дшаго. (Дважды)

Вонми́ не́бо, и возглаго́лю, / земле́, внуша́й глас, / ка́ющийся к Бо́гу и воспева́ющий Его́.

Вонми́ ми, Бо́же, Спа́се мой / ми́лостивным Твои́м о́ком, / и приими́ мое́ те́плое испове́дание.

Согреши́х па́че всех челове́к, / еди́н согреши́х Тебе́: / но уще́дри я́ко Бог, Спа́се, / творе́ние Твое́.

Вообрази́в мои́х страсте́й безобра́зие, / любосла́стными стремле́ньми / погуби́х ума́ красоту́.

Бу́ря мя злых обдержи́т, / благоутро́бне Го́споди: / но я́ко Петру́, / и мне ру́ку простри́.

Оскверни́х пло́ти моея́ ри́зу / и окаля́х / е́же по о́бразу, Спа́се, / и по подо́бию.

Омрачи́х душе́вную красоту́ / страсте́й сластьми́, / и вся́чески весь ум / персть сотвори́х.

Раздра́х ны́не оде́жду мою́ пе́рвую, / и́же ми изтка́ Зижди́тель из нача́ла, / и отту́ду лежу́ наг.

Облеко́хся в раздра́нную ри́зу, / ю́же изтка́ ми змий сове́том, / и стыжду́ся.

Сле́зы блудни́цы, Ще́дре, / и аз предлага́ю: / очи́сти мя, Спа́се, / благоутро́бием Твои́м.

Воззре́х на садо́вную красоту́ / и прельсти́хся умо́м: / и отту́ду лежу́ наг, и срамля́юся.

Де́лаша на хребте́ мое́м / вси нача́льницы страсте́й, / продолжа́юще на мя / беззако́ние их.

Слава, Троичен: Еди́наго Тя в трие́х Ли́цех, / Бо́га всех пою́, / Отца́ и Сы́на и Ду́ха Свята́го.

Богородичен: Пречи́стая Богоро́дице Де́во, / еди́на Всепе́тая, / моли́ приле́жно во е́же спасти́ся нам.

Песнь 3.

Ирмос: На недви́жимом, Христе́, ка́мени за́поведий Твои́х, / утверди́ мое́ помышле́ние. (Дважды)

Огнь от Го́спода иногда́ / Госпо́дь одожди́в, / зе́млю Содо́мскую / пре́жде попали́.

На горе́ спаса́йся, душе́, / я́коже Лот о́ный, / и в Сиго́р угонза́й.

Бе́гай запале́ния, о душе́, / бе́гай Содо́мскаго горе́ния, / бе́гай тле́ния Боже́ственнаго пла́мене.

Согреши́х Тебе́ еди́н аз, / согреши́х па́че всех, Христе́ Спа́се, / да не пре́зриши мене́.

Ты еси́ Па́стырь до́брый, / взыщи́ мене́ а́гнца, / и заблу́ждшаго да не пре́зриши мене́.

Ты еси́ сла́дкий, Иису́се, / Ты еси́ Созда́телю мой: / в Тебе́, Спа́се, оправда́юся.

Испове́даюся Тебе́, Спа́се: / согреши́х, согреши́х Ти: / но осла́би, оста́ви ми, / я́ко благоутро́бен.

Слава, Троичен: О Тро́ице Еди́нице Бо́же! / Спаси́ нас от пре́лести, / и искуше́ний, и обстоя́ний.

Богородичен: Ра́дуйся, Богоприя́тная утро́бо, / ра́дуйся, престо́ле Госпо́день, / ра́дуйся, Ма́ти Жи́зни на́шея.

Песнь 4.

Ирмос: Услы́ша проро́к / прише́ствие Твое́, Го́споди, и убоя́ся, / я́ко хо́щеши от Де́вы роди́тися / и челове́ком яви́тися, и глаго́лаше: / услы́шах слух Твой и убоя́хся, / сла́ва си́ле Твое́й, Го́споди. (Дважды)

Дел Твои́х да не пре́зриши, / созда́ния Твоего́ да не оста́виши, Правосу́де, / а́ще и еди́н согреши́х, я́ко человек, / па́че вся́каго челове́ка, Человеколю́бче, / но и́маши, я́ко Госпо́дь всех, / власть оставля́ти грехи́.

Приближа́ется, душе́, коне́ц, приближа́ется, / и неради́ши, ни гото́вишися: / вре́мя сокраща́ется, воста́ни, близ при две́рех Судия́ есть: / я́ко со́ние, я́ко цвет, вре́мя жития́ тече́т: / что всу́е мяте́мся?

Воспряни́, о душе́ моя́, / дея́ния твоя́, я́же соде́лала еси́, помышля́й, / и сия́ пред лице́ твое́ принеси́, / и ка́пли испусти́ слез твои́х: / рцы со дерзнове́нием дея́ния и помышле́ния Христу́, / и оправда́йся.

Не бысть в житии́ греха́, ни дея́ния, ни зло́бы, / ея́же аз, Спа́се, не согреши́х / умо́м и сло́вом, и произволе́нием / и предложе́нием, и мы́слию, и дея́нием согреши́в, / я́ко ин никто́же когда́.

Отсю́ду и осужде́н бых, / отсю́ду препре́н бых аз окая́нный от своея́ со́вести, / ея́же ничто́же в ми́ре нужне́йше: / Судие́, Изба́вителю мой, и ве́дче, / пощади́ и изба́ви, и спаси́ мя раба́ Твоего́.

Ле́ствица, ю́же ви́де дре́вле / вели́кий в патриа́рсех, / указа́ние есть душе́ моя́, / де́ятельнаго восхожде́ния, разу́мнаго возше́ствия: / а́ще хо́щеши у́бо, дея́нием, и ра́зумом, / и зре́нием пожи́ти, обнови́ся.

Зной дневны́й претерпе́ / лише́ния ра́ди патриа́рх, / и мраз нощны́й понесе́, / на всяк день снабде́ния творя́, / пасы́й, тружда́яйся, рабо́таяй, / да две жене́ сочета́ет.

Жены́ ми две разуме́й, / дея́ние же и ра́зум в зре́нии, / Ли́ю у́бо дея́ние, я́ко многоча́дную: / Рахи́ль же ра́зум, я́ко многотру́дную: / и́бо кроме́ трудо́в, ни дея́ние, ни зре́ние душе́, испра́вится.

Слава, Троичен: Неразде́льное Существо́м, / несли́тное Ли́цы / богосло́влю Тя, Тро́ическое Еди́но Божество́, / я́ко единоца́рственное и сопресто́льное, / вопию́ Ти песнь вели́кую, / в вы́шних трегу́бо песносло́вимую.

Богородичен: И ражда́еши и де́вствуеши, / и пребыва́еши обою́ду естество́м Де́ва: / Рожде́йся обновля́ет зако́ны естества́, / утро́ба же ражда́ет, не ражда́ющая. / Бог иде́же хо́щет, побежда́ется естества́ чин: / твори́т бо ели́ка хо́щет.

Песнь 5.

Ирмос: От нощи́ у́тренююща, / Человеколю́бче, просвети́, молю́ся, / и наста́ви и мене́ на повеле́ния Твоя́, / и научи́ мя, Спа́се, / твори́ти во́лю Твою́. (Дважды)

В нощи́ житие́ мое́ преидо́х при́сно, / тьма бо бысть и глубока́ мне мгла, нощь греха́, / но я́ко дне сы́на Спа́се покажи́ мя.

Руви́ма подража́я окая́нный аз, / соде́ях беззако́нный и законопресту́пный сове́т на Бо́га Вы́шняго, / оскверни́в ло́же мое́, я́ко о́тчее он.

Испове́даюся Тебе́ Христе́ Царю́, / согреши́х, согреши́х, / я́ко пре́жде Ио́сифа бра́тия прода́вшии, / чистоты́ плод и целому́дрия.

От сро́дников пра́ведная душа́ связа́ся, / прода́ся в рабо́ту сла́дкий, / во о́браз Госпо́день: / ты же вся душе́, продала́ся еси́ / злы́ми твои́ми.

Ио́сифа пра́веднаго и целому́дреннаго ума́ / подража́й окая́нная, и неиску́сная душе́, / и не оскверня́йся безслове́сными стремле́ньми / при́сно беззако́ннующи.

А́ще и в ро́ве поживе́ иногда́ Ио́сиф, / Влады́ко Го́споди, / но во о́браз погребе́ния и воста́ния Твоего́: / аз же что Тебе́ когда́ сицево́е принесу́?

Слава, Троичен: Тя Тро́ице сла́вим, Еди́наго Бо́га: / Свят, Свят, Свят еси́ О́тче, Сы́не и Ду́ше, / про́стое Существо́, / Еди́нице при́сно покланя́емая.

Богородичен: Из Тебе́ облече́ся в мое́ смеше́ние, / нетле́нная, безму́жная Ма́ти Де́во, / Бог созда́вый ве́ки, / и соедини́ Себе́ челове́ческое естество́.

Песнь 6.

Ирмос: Возопи́х всем се́рдцем мои́м / к ще́дрому Бо́гу, / и услы́ша мя от а́да преиспо́дняго, / и возведе́ от тли живо́т мой. (Дважды)

Сле́зы Спа́се о́чию мое́ю, / и из глубины́ воздыха́ния / чи́сте приношу́, вопию́щу се́рдцу: / Бо́же, согреши́х Ти / очи́сти мя.

Уклони́лася еси́ душе́, от Го́спода твоего́, / я́коже Дафа́н и Авиро́н: / но пощади́, воззови́ из а́да преиспо́дняго, / да не про́пасть земна́я тебе́ покры́ет.

Я́ко ю́ница душе́ разсвире́певшая, / уподо́билася еси́ Ефре́му, / я́ко се́рна от тене́т сохрани́ житие́, / впери́вши дея́нием ум, и зре́нием.

Рука́ нас Моисе́ова да уве́рит душе́, / ка́ко мо́жет Бог прокаже́нное житие́ / убели́ти, и очи́стити: / и не отча́йся сама́ себе́, / а́ще и прокаже́нна еси́.

Слава, Троичен: Тро́ица есмь про́ста, неразде́льна, / разде́льна Ли́чне, / и Еди́ница есмь Естество́м соедине́на, / Оте́ц глаго́лет, и Сын, и Боже́ственный Дух.

Богородичен: Утро́ба Твоя́ Бо́га нам роди́, / воображе́на по нам: / Его́же я́ко Созда́теля всех, моли́ Богоро́дице, / да моли́твами Твои́ми оправди́мся.

Таже: Го́споди, поми́луй. (Трижды.) Сла́ва, и ны́не:

Кондак:

Душе́ моя́, душе́ моя́, воста́ни, что спи́ши? / Коне́ц приближа́ется, и и́маши смути́тися. / Воспряни́ у́бо, да пощади́т тя Христо́с Бог, / везде́ сый и вся́ исполня́яй.

Песнь 7.

Ирмос: Согреши́хом, беззако́нновахом, / непра́вдовахом пред Тобо́ю, / ниже́ соблюдо́хом, ниже́ сотвори́хом, / я́коже запове́дал еси́ нам; / но не преда́ждь нас до конца́, / отце́в Бо́же. (Дважды)

Согреши́х, беззако́нновах, / и отверго́х за́поведь Твою́, / я́ко во гресе́х произведо́хся / и приложи́х я́звам стру́пы себе́: / но Сам мя поми́луй, / я́ко Благоутро́бен, отце́в Бо́же.

Та́йная се́рдца моего́ / испове́дах Тебе́ Судии́ моему́, / виждь мое́ смире́ние, / виждь и скорбь мою́, / и вонми́ суду́ моему́ ны́не, / и Сам мя поми́луй, я́ко Благоутро́бен, / отце́в Бо́же.

Сау́л иногда́ я́ко погуби́ отца́ своего́ душе́ осля́та, / внеза́пу ца́рство обре́те к прослу́тию, / но блюди́, не забыва́й себе́, / ско́тския по́хоти твоя́ / произво́ливши па́че Ца́рства Христо́ва.

Дави́д иногда́ Богооте́ц, / а́ще и согреши́ сугу́бо душе́ моя́, / стрело́ю у́бо устреле́н быв прелюбоде́йства, / копие́м же плене́н быв уби́йства томле́нием, / но ты сама́ тяжча́йшими де́лы неду́гуеши, / самохо́тными стремле́ньми.

Совокупи́ у́бо Дави́д иногда́ беззако́нию беззако́ние: / уби́йству же любоде́йство раствори́в, / покая́ние сугу́бое показа́ а́бие: / но сама́ ты лука́внейшая душе́ соде́лала еси́, / не пока́явшися Бо́гу.

Дави́д иногда́ вообрази́, / списа́в я́ко на ико́не песнь, / е́юже дея́ние облича́ет, е́же соде́я, зовы́й: / поми́луй мя. Тебе́ бо Еди́ному согреши́х всех Бо́гу, / Сам очи́сти мя.

Слава, Троичен: Тро́ице про́стая, неразде́льная, / единосу́щная, и Естество́ еди́но, / Све́тове, и Свет, и Свята три, и еди́но Свя́то / пое́тся Бог Тро́ица: / но воспо́й, просла́ви, Живо́т и Животы́, душе́, / всех Бо́га.

Богородичен: Пое́м Тя, благослови́м Тя, / покланя́емся Ти Богороди́тельнице, / я́ко неразде́льныя Тро́ицы породи́ла еси́ еди́наго Христа́ Бо́га / и Сама́ отве́рзла еси́ нам / су́щим на земли́ небе́сная.

Песнь 8.

Ирмос: Его́же во́инства Небе́сная сла́вят, / и трепе́щут Херуви́ми и Серафи́ми, / вся́ко дыха́ние и тварь, / по́йте, благослови́те / и превозноси́те во вся ве́ки. (Дважды)

Согреши́вша Спа́се поми́луй, / воздви́гни мой ум ко обраще́нию, / приими́ мя ка́ющагося, уще́дри вопию́ща: / согреши́х Ти, спаси́, / беззако́нновах, поми́луй мя.

Колесни́чник Илия́, / колесни́цею доброде́телей вшед, / я́ко на небеса́, ноша́шеся / превы́ше иногда́ от земны́х: / сего́ у́бо душе́ моя́, восхо́д помышля́й.

Елиссе́й иногда́ прие́м ми́лоть Илиину́, / прия́т сугу́бую благода́ть от Бо́га: / ты же о душе́ моя́, сея́ не причасти́лася еси́ благода́ти / за невоздержа́ние.

Иорда́нова струя́ пе́рвее, ми́лотию Илиино́ю / Елиссе́ем, ста сю́ду и сю́ду: / ты же, о душе́ моя́, сея́ не причасти́лася еси́ благода́ти / за невоздержа́ние.

Сомани́тида иногда́ / пра́веднаго учреди́, о душе́, нра́вом благи́м: / ты же не ввела́ еси́ в дом, / ни стра́нна, ни пу́тника. / Те́мже черто́га изри́нешися вон, рыда́ющи.

Гиези́ев подража́ла еси́ окая́нная / ра́зум скве́рный всегда́ душе́, / его́же сребролю́бие отложи́ поне́ на ста́рость: / бе́гай гее́нскаго огня́, / отступи́вши злых твои́х.

Слава, Троичен: Безнача́льне О́тче, Сы́не собезнача́льне, / Уте́шителю Благи́й, Ду́ше Пра́вый: / Сло́ва Бо́жия Роди́телю, / Отца́ безнача́льна Сло́ве, / Ду́ше живы́й и зи́ждай, / Тро́ице Еди́нице поми́луй мя.

Богородичен: Я́ко от оброще́ния червлени́цы Пречи́стая, / у́мная багряни́ца Емману́илева, / внутрь во чре́ве Твое́м плоть истка́ся: / те́мже Богоро́дицу вои́стинну Тя почита́ем.

Песнь 9.

Ирмос: Безсе́меннаго зача́тия Рождество́ несказа́нное, / Ма́тере безму́жныя нетле́нен Плод, / Бо́жие бо рожде́ние обновля́ет естества́. / Те́мже Тя вси ро́ди, / я́ко Богоневе́стную Ма́терь, / правосла́вно велича́ем. (Дважды)

Ум острупи́ся, те́ло оболе́знися, / неду́гует дух, сло́во изнемо́же, / житие́ умертви́ся, коне́ц при две́рех. / Те́мже моя́ окая́нная душе́, что сотвори́ши, / егда́ прии́дет Судия́ испыта́ти твоя́?

Моисе́ово приведо́х ти душе́, миробы́тие, / и от того́ все заве́тное писа́ние, / пове́дающее тебе́ пра́ведныя и непра́ведныя: / от ни́хже вторы́я, о душе́, подража́ла еси́, а не пе́рвыя, / в Бо́га согреши́вши.

Зако́н изнемо́же, пра́зднует Ева́нгелие, / писа́ние же все в тебе́ небреже́но бысть, / проро́цы изнемого́ша, и все пра́ведное сло́во: / стру́пи твои́, о душе́, умно́жишася, / не су́щу врачу́ исцеля́ющему тя.

Но́ваго привожду́ ти писа́ния указа́ния, / вводя́щая тя душе́, ко умиле́нию: / пра́ведным у́бо поревну́й, гре́шных же отвраща́йся, / и уми́лостиви Христа́ моли́твами же и поще́ньми, / и чистото́ю, и гове́нием.

Христо́с вочелове́чися, / призва́в к покая́нию разбо́йники, и блудни́цы: / душе́ пока́йся, дверь отве́рзеся Ца́рствия уже́, / и предвосхища́ют е фарисе́е и мытари́ / и прелюбоде́и ка́ющиися.

Христо́с вочелове́чися, / пло́ти приобщи́вся ми, / и вся, ели́ка суть естества́ хоте́нием / испо́лни греха́ кроме́, / подо́бие тебе́, о душе́, / и о́браз предпоказу́я Своего́ снизхожде́ния.

Христо́с волхвы́ спасе́, / па́стыри созва́, / младе́нец мно́жества показа́ му́ченики, / ста́рцы просла́ви, и ста́рыя вдови́цы, / и́хже не поревнова́ла еси́ душе́, ни дея́нием, ни житию́, / но го́ре тебе́, внегда́ бу́деши суди́тися.

Пости́вся Госпо́дь дний четы́редесять в пусты́ни, / последи́ взалка́, показу́я челове́ческое: / душе́, да не разлени́шися, а́ще тебе́ приложи́тся враг, / моли́твою же и посто́м от ног твои́х да отрази́тся.

Слава, Троичен: Отца́ просла́вим, Сы́на превознесе́м, / Боже́ственному Ду́ху ве́рно поклони́мся, / Тро́ице неразде́льней, Еди́нице по Существу́, / я́ко Све́ту и Све́том, и Животу́ и Живото́м, / животворя́щему и просвеща́ющему концы́.

Богородичен: Град Твой сохраня́й / Богороди́тельнице Пречи́стая, / в Тебе́ бо сей ве́рно ца́рствуяй, / в Тебе́ и утвержда́ется, / и Тобо́ю побежда́яй, / побежда́ет вся́кое искуше́ние, / и пленя́ет ра́тники, / и прохо́дит послуша́ние.

Преподо́бне о́тче Андре́е, моли́ Бо́га о нас.

Андрею: Андре́е честны́й, и о́тче треблаже́ннейший, / па́стырю Кри́тский, / не преста́й моля́ся о воспева́ющих тя: / да изба́вимся вси гне́ва и ско́рби, и тле́ния, / и прегреше́ний безме́рных, / чту́щии твою́ па́мять ве́рно.

Таже поем оба лика ирмос: Безсе́меннаго зача́тия Рождество́ несказа́нное, / Ма́тере безму́жныя нетле́нен Плод, / Бо́жие бо рожде́ние обновля́ет естества́. / Те́мже Тя вси ро́ди, / я́ко Богоневе́стную Ма́терь, / правосла́вно велича́ем.

По скончании же канона глаголем псалом 4: Внегда́ призва́ти ми, услы́ша мя: Такожде и прочыя псалмы Повечерия. На Аллилу́ия метания, 3. И абие начинаем вторую статию: К Тебе́ Го́споди, воздвиго́х ду́шу мою́: И прочия два псалма, глаголюще в конец сих: Аллилу́ия. И творим метания 3. Таже начинает лик, приемый от Вечерни начало: С на́ми Бог: И глаголем сицевыя стихи велегласно, и со сладкопением, глаголющу единому лику, и отвещающу другому. Подобне, и, Безпло́тное естество́: Ве́рую же во Еди́наго Бо́га: низким гласом: Таже наченший лик: Пресвята́я Влады́чице Богоро́дице, моли́ о нас: И творит другий лик поклон. И востающу другому лику и отвещавающу, творит первый лик поклон. Такожде и на прочия молительныя стихи вся. Егда же речем: Бо́же, очи́сти нас гре́шных, поем оба лика равно, и поклоны 3. Таже, Трисвятое без поклонов, и глаголем настоящия тропари, на глас 2, яже и поем велегласно и со сладкопением: Просвети́ о́чи мои́ Христе́ Бо́же: Сла́ва: Заступник ду́ши моея́: И ны́не: Я́ко не и́мамы дерзнове́ния: суть же и ины тропари, иже и поются чрез день, на глас 8, сиречь во вторник, и четверток вечера. Суть же сии: Неви́димых враг мои́х неусыпа́ние: Стих: При́зри и услы́ши мя Го́споди Бо́же мой: Я́ко стра́шен суд Твой Го́споди: Сла́ва: Сле́зы ми даждь Бо́же: И ны́не: Непосты́дную Богоро́дице, наде́жду Твою́: Го́споди поми́луй, 40. Стих, от священника. И молитва: Го́споди Го́споди, избавле́й нас: таже, Прииди́те поклони́мся: трижды. И глаголем 50 и 101 псалом: Го́споди услы́ши моли́тву мою́: и Го́споди, Вседержи́телю Бо́же оте́ц на́ших: Трисвятое, и метания три. Священник: Я́ко Твое́ есть Ца́рство: И по амине, глаголем сия тропари скоро, на глас 6: Поми́луй нас Го́споди: Сла́ва: Го́споди, поми́луй нас: И ны́не: Милосе́рдия две́ри отве́рзи нам: Го́споди поми́луй, 40. Сла́ва, и ны́не: Честне́йшую херуви́м: И́менем Госпо́дним благослови́ о́тче. Священник: Моли́твами святы́х оте́ц на́ших, И молитва: Влады́ко Бо́же О́тче Вседержи́телю: Прииди́те поклони́мся, трижды. И метания 3. Бо́же в по́мощь мою́ вонми́, и Го́споди, услы́ши моли́тву мою́, и, Сла́ва в вы́шних Бо́гу: Го́споди прибе́жище был еси́ нам: Сподо́би Го́споди в нощь сию́: Таже, Трисвятое. Пресвята́я Тро́ице, поми́луй нас: О́тче наш: Священник: Я́ко Твое́ есть Ца́рство: Таже поем велегласно и косно, на глас 6: Го́споди сил с на́ми бу́ди: И отвещает тожде другий лик. И глаголет наченший лик, Стих: Хвали́те Бо́га во святы́х Его́, хвали́те Его́ во утверже́нии си́лы Его́. И паки тропарь. Таже тойжде тропарь другий лик на коемждо стихе. По исполнении же пяти стихов, глаголют оба лика вкупе, первый стих и тропарь. Таже начинает наченший лик: Сла́ва: Го́споди а́ще не бы́хом: И ны́не: Мно́гая мно́жества мои́х Богоро́дице, прегреше́ний: Всесвята́я Богоро́дице: Все упова́ние мое́: Го́споди поми́луй, 40. И молитва: И́же на вся́кое вре́мя: Го́споди поми́луй, трижды. Сла́ва, и ны́не: Честне́йшую херуви́м: И́менем Госпо́дним благослови́ о́тче. Священник, Бо́же уще́дри ны: И творим 16 поклонов, яко обычно, с молитвою святаго Ефрема: и творим косныя за еже уравнятися всем. Таже начинает предстоятель: Трисвятое, и метания 3. По О́тче наш: Го́споди поми́луй, 12. И глаголем молитву: Нескве́рная, небла́зная: и, И даждь нам Влады́ко:

Подобает ведати: яко вящшии уставы и обычаи повелевают, после, И даждь нам Влады́ко: пасти всем на землю, и глаголати священнику велегласно молитву, яже в Велицей вечерни: Влады́ко Многоми́лостиве Го́споди Иису́се Христе́ Бо́же наш: И тако сотворив поклон предстоятель на землю, глаголет братиям: Благослови́те отцы́ святи́и, прости́те ми гре́шному, ели́ка согреши́х сло́вом, де́лом, помышле́нием, и все́ми мои́ми чу́вствы. И мы отвещаем: Бог да прости́т ти о́тче святы́й: И начинает от леваго лика по чину един и един, творити подобне и просити, и прияти прощение, дондеже скончаются вси. И тако начинает священник глаголати: Помо́лимся о вели́ком господи́не и отце́ на́шем святе́йшем патриа́рхе Моско́вском и всея́ Руси́ [имярек]: и прочая, яко в ветхом учинении уставися. И по сих яко обычно, стих от предстоятеля, и к нему от всех подобне поклон, и тако отходим во своя келлии. Сей чин бывает во всю святую Четыредесятницу в Повечериях.

Ведомо буди, предстоятелю стих глаголющу, мы: Благослови́, отвещаваем, приемше прощение. Подобает же екклисиарху и сие смотрити прилежно, да егда Повечерия отпущают быти знамению дне, сиречь прежде сомрака. Се убо яко предписася, един день святых постов прилежно испытавше, предложихом любви вашей, количество пения, и в нем воображенныя от святых отцев поклоны, яже несть лепо презирати, ниже великому законоположителю. Количество же дненощных бываемых в церкви поклонов, суть 300, кроме Полунощницы. Прияхом же в Палестине и в своих келлиях коемуждо пети Псалтирь: и могущии убо совершают ю дненощно: ови же трижды в седмице: ови же дважды. Поклоны же творити, елики коемуждо по своей силе предстоятель вообразит.

ВО ВТОРНИК ПЕРВЫЯ СЕДМИЦЫ НА УТРЕНИ,

По 2-м стихословии седальны, глас 2. Подобен: Преблагослове́нна:

Преблагослове́нна благода́ть всечестна́го поста́: / Моисей бо тем просла́вися, / и зако́н в пи́смени на скрижа́лех прия́т. / Огня́ си́льнейшии о́троцы ю́нии яви́шася: / в том у́бо погаси́м плотски́я стра́сти пламене́ющия, / Христу́ Спа́су вопию́ще: / обраще́ние нам всем да́руй, и изба́ви гее́нны.

Слава иный, глас тойже. Подобен: Милосе́рдия су́щи:

Покая́ния наста́ вре́мя, / воздержа́ния покажи́ плоды́, о душе́ моя́! / Воззри́ к преждепока́явшимся, воззови́ Христу́: / согреши́х, спаси́ мя, / я́коже спасл еси́ Влады́ко мытаря́, воздохну́вша от се́рдца, Благи́й, / еди́н сый Многоми́лостивый.

И ныне, Богородичен: Предста́тельство те́плое христиа́н, / Сы́на Твоего́ моли́ при́сно, Богоро́дице, / вся́каго злоде́йства и лю́тости изба́вити нас бори́теля, / и да́ти нам проще́ние, и́хже согреши́хом, / благоутро́бия ра́ди щедро́т, / Твои́ми моли́твами Ма́ти Де́во.

По 3-м стихословии седален, глас 5. Подобен: Го́споди, ча́шу му́ки:

Го́споди, спаси́тельное воздержа́ние двоеде́нствующе вопие́м Ти: / умили́ сердца́ нас, рабо́в Твои́х, / и приими́ су́щия со стра́хом моли́твы на́ша, / подая́ нам благотече́нное поста́ по́прище, / очище́ние и ве́лию ми́лость.

Слава, тойже.

И ныне, Богородичен. Подобен: Собезнача́льное Сло́во:

Цвет боже́ственный, ко́реню прозя́бший, / киво́те и све́щниче, и ста́мно всезлата́я, / свята́я трапе́зо, хлеб живота́ нося́щая, / я́ко Сы́на Твоего́ и Бо́га умоли́ Его́, со святы́м Предте́чею, / е́же уще́дрити и спасти́, Богоро́дицу испове́дающия Тя.

Канон Минеи и Триоди. Песнь 2. Глас 2.

И стихословится вторая песнь Псалтиря.

Ирмос: Ви́дите ви́дите, я́ко Аз есмь в мо́ри спасы́й, / и в пусты́ни насы́тивый изра́ильтеския лю́ди, / и во́ду из ка́мене источи́вый челове́ком, / да дре́вле па́дшаго, поне́с, / привлеку́ ко Мне за неизрече́нную ми́лость.

Трезви́ся, бо́дрствуй, / воздохни́, прослези́ся, / посто́м все бре́мя греха́ душе́ отве́ргни, / те́плым покая́нием отбе́гни огня́, / и пла́чем страсте́й плаче́вную ри́зу раздери́, / оде́жду боже́ственную прие́млющи.

К горе́ присту́пим, изря́дных дея́ний поще́нием вси, / долуре́вностныя оста́вльше сласте́й прило́ги: / и в сомра́к вше́дше честны́х виде́ний, / еди́ну у́зрим Христо́ву рачи́тельную добро́ту, / обожа́еми та́йно боже́ственными восхожде́нии.

Увы́ мне, кто бу́ду? / что соде́ю, грех соде́ловая, / и Влады́ки не устраша́яся безсо́вестный? / Сего́ ра́ди пре́жде суда́ осужде́н есмь: / правосу́де Благи́й, обрати́в мя спаси́, / па́че всех челове́к Тебе́ преогорчи́вшаго.

Богородичен: Неора́нная земле́, прорасти́вшая всех Пита́теля, / отверза́ющаго ру́ку, и благоволе́нием Свои́м насыща́юща / вся́кое живо́тное кре́постию Боже́ственною: / утверди́ хле́бом жи́зненным, ослабе́вшая сердца́ / сы́тостию лю́тых на́ших прегреше́ний.

Иный. Глас 5.

Ирмос: Ви́дите ви́дите:

Прииди́те сни́дем в клеть душе́вную, / Го́сподеви моли́твы воздаю́ще и вопию́ще: / О́тче наш, И́же на Небесе́х, / до́лги на́ша осла́би и оста́ви, / я́ко еди́н Благоутро́бен.

Души́ на́шея в посте́ ти́хое показу́юще, / не се́туим вожделе́нных дней измене́ния, / я́ко просия́ша нам благоче́стия исправле́ния.

Слава, Троичен: Безнача́льная, несозда́нная Триипоста́сная Еди́нице, / Госпоже́, Ца́рство веко́в: / Тебе́ сла́вит, Отца́, и Сы́на, и Свята́го Ду́ха, / мно́жество а́нгел, / и все естество́ челове́ческое.

Богородичен: Тебе́ вседоброде́тельную сла́ву ро́да на́шего пое́м, / Тобо́ю бо обожи́хомся Де́во: / и́бо родила́ еси́ нам Спа́са и Бо́га Христа́, / разреши́вшаго нас от кля́твы.

Сла́ва Тебе́ Бо́же наш, сла́ва Тебе́.

Кто огнь угаси́? Кто затче́ уста́ звере́й? / Пост, о́троки из пе́щи избавле́й, / и проро́ка Дании́ла от льво́в сне́ди: / его́же лобыза́им и мы бра́тие.

Ирмос: Ви́дите ви́дите, я́ко Аз есмь Бог, / в плоть облеки́йся во́лею Свое́ю, / да спасу́ Ада́ма, / от ле́сти па́дшаго в преступле́ние зми́ем.

Песнь 8.

Ирмос: В купине́ Моисе́ю Де́вы чу́до, / на Сина́йстей горе́ Прообрази́вшаго иногда́, / по́йте, благослови́те, / и превозноси́те во вся ве́ки.

Сон отложи́ душе́, лю́тыя ле́ности, / и усе́рдно бо́дрствуй к Боже́ственным за́поведем: / приближа́ется Жени́х свещено́сец, потщи́ся Того́ предусре́сти.

Уя́звлена лю́те сласте́й ору́жием, / лечбо́ю щедро́т благоутро́бнаго Твоего́ манове́ния / исцели́ мя Сло́ве, / я́ко да Тя благода́рно сла́влю во ве́ки.

От страсте́й вре́дных, от за́висти и не́нависти, / от вся́кия зло́бы воздержи́ся душе́, пи́щами пита́ющися, / пи́щу го́рнюю невеще́ственно хода́тайствующими.

Богородичен: Богороди́тельнице Чи́стая, / ду́ши моея́ гное́ния, и се́рдца стра́сти, и ума́ премене́ние исцели́, / я́ко еди́на гре́шных помо́щница, и разоря́емых стена́.

Иный.

Ирмос: Творца́ тва́ри:

Воздержа́нием вси ду́ши впери́вше, / на небеса́ моли́твы благоприя́тныя / принесе́м Го́сподеви.

Дух умиле́ния прие́мше, / прослези́м ко избавле́нию душ, / песносло́вяще Христа́ во ве́ки.

Благослови́м Отца́ и Сы́на, и Свята́го Ду́ха, Го́спода.

Троичен: Тро́ице единосу́щная, и Еди́нице несозда́нная, и всех Бо́же, / Тебе́ превозно́сим во вся ве́ки.

И ны́не и при́сно, и во ве́ки веко́в, ами́нь.

Богородичен: Моли́тву сотвори́ о пою́щих Тя Пречи́стая, / изба́витися вся́ческих искуше́ний и бед.

Сла́ва Тебе́ Бо́же наш, сла́ва Тебе́.

Пи́щу бога́таго оплева́вше, / прииди́те с Ла́зарем пости́мся, / да и нас огре́ет Авраа́мово не́дро.

Хва́лим, благослови́м, покланя́емся Го́сподеви, пою́ще, и превознося́ще во вся ве́ки.

Ирмос: Творца́ тва́ри, / Его́же ужаса́ются А́нгели, / по́йте, лю́дие, / и превозноси́те во вся ве́ки.

Песнь 9.

Ирмос: От земноро́дных кто слы́ша таково́е? Или кто ви́де когда́, / я́ко Де́ва обре́теся во чре́ве иму́щая, / и безболе́зненно Младе́нца поро́ждшая? / Таково́е Твое́ чу́до, / и Тя Чи́стая Богоро́дице велича́ем.

Земноро́дных кто та́ко поползну́вся, Бо́га прогне́ва когда́? / Кто стремле́ньми зло́бы после́дова, / и пребыва́лище яви́ся я́коже аз окая́нный, / но Бо́же воли́телю ми́лости, / Ты мя уще́дри.

Богови́дных а́нгел си́лы, / благоуве́тливаго Бо́га умоли́те, / спасти́ ду́шу, в пучи́не жите́йских сласте́й, / и треволне́ниих страсте́й обурева́емую, / и в прило́зех сопроти́вных духо́в бе́дствующую.

Гряди́ душе́ кри́лы облегча́ема, / посто́м доброде́телей от долувлеку́щия зло́бы воста́ни, / и виде́ньми наслади́ся светле́йшими, / пи́щу хода́тайствующими доброде́телей, / богови́дна быва́ющи ве́рою.

Богородичен: Кто слы́шаны сотвори́т хвалы́, / Тебе́ ро́ждшия па́че ума́, хвали́маго Влады́ку, Чи́стая, и Го́спода, / Его́же хва́лят а́нгельская чинонача́лия? / Того́ у́бо моли́ о лю́дех согреши́вших, / Де́во Неискусобра́чная.

Иный.

Ирмос: Иса́ие, лику́й:

Вре́мя благоприя́тное, день спасе́ния, / принесе́м Бо́гу да́ры доброде́телей, в / не́мже отложи́вше дела́ тьмы, бра́тие, / облеце́мся во ору́жие све́та, / я́коже Па́вел вопие́т.

Прииди́те, я́коже Госпо́дь посто́м уби́ врага́, / сим и мы сокруши́м его́ стре́лы, и ловле́ния: / за мя иди́ сатано́, ки́йждо глаго́люще, / внегда́ хо́щет искуша́ти нас.

Слава, Троичен: Единосу́щием воспева́ю Тя, безнача́льная Тро́ице честна́я, / живонача́льная, несеко́мая Еди́нице, / О́тче нерожде́нне, и рожде́нне Сло́ве и Сы́не, и Ду́ше Святы́й, / спаси́ ны пою́щия Тя.

Богородичен: Па́че ума рождество́ Твое́ Богома́ти, / без му́жа бо зача́тие в Тебе́, / и деви́чески рожде́ние бысть: / и́бо Бог есть роди́выйся: / Его́же велича́юще, Тя Де́во ублажа́ем.

Сла́ва Тебе́ Бо́же наш, сла́ва Тебе́.

Посто́м приложи́вшеся к моли́тв горе́, / и мы се́рдцем чи́стым ви́дим Бо́га, / скрижа́ли прие́млюще за́поведей внутрь, я́коже Моисе́й, / сла́вою облиста́ющеся, лице́м любве́ Его́.

Ирмос: Иса́ие, лику́й, / Де́ва име́ во чре́ве, и роди́ Сы́на Емману́ила, / Бо́га же и Челове́ка, Восто́к и́мя Ему́, / Его́же велича́юще, Де́ву ублажа́ем.

Светилен.

На стиховне самогласен дне, глас 3:

Начне́м лю́дие непоро́чный пост, / и́же есть душа́м спасе́ние, / порабо́таим Го́сподеви со стра́хом, / еле́ем благотворе́ния главы́ пома́жем, / и водо́ю чистоты́ ли́ца умы́ем, / не многоглаго́лем в моли́твах, / но я́ко научи́хомся, та́ко возопии́м: / О́тче наш, И́же на Небесе́х, / оста́ви нам прегреше́ния на́ша, / я́ко Человеколю́бец.

Стих: Испо́лнихомся зау́тра ми́лости Твоея́, Го́споди, возра́довахомся, и возвесели́хомся: во вся дни на́ша возвесели́хомся. За дни, в ня́же смири́л ны еси́, ле́та в ня́же ви́дехом зла́я. И при́зри на рабы́ Твоя́, и на дела́ Твоя́, / и наста́ви сы́ны их.

Паки тойже самогласен.

Стих 2: И бу́ди све́тлость Го́спода Бо́га на́шего на нас, и дела́ рук на́ших испра́ви на нас, / и де́ло рук на́ших испра́ви.

Таже мученичен: Царе́й и мучи́телей страх / отри́нуша Христо́вы во́ини, / и благодерзнове́нно и му́жественно Того́ испове́даша, / всех Го́спода Бо́га, и Царя́ на́шего, / и мо́лятся о душа́х на́ших.

Слава, и ныне, Богородичен: Богоро́дице, предста́тельство всех моля́щихся Тебе́, / Тобо́ю дерза́ем, и Тобо́ю хва́лимся, / и к Тебе́ все упова́ние на́ше есть, / моли́ Ро́ждшагося из Тебе́ / за непотре́бныя рабы́ Твоя́.

НА 6-М ЧАСЕ

Тропарь пророчества, глас 1:

Я́ко прише́льцы есмы́ на земли́, я́коже вси отцы́ на́ши, / кра́ткое живота́ на́шего безгре́шно сохрани́ Спа́се наш, / и поми́луй нас я́ко Человеколю́бец.

Сла́ва, и ны́не: и повторяем тойжде.

Прокимен, псалом 5, глас 4: Вонми́ гла́су моле́ния моего́, / Царю́ мой и Бо́же мой. Стих: Глаго́лы моя́ внуши́ Го́споди, разуме́й зва́ние мое́.

Пророчества Исаиина чтение. [Глава 1, ст. 19 – 31. Глава 2, ст. 1 – 3.]

Та́ко глаго́лет Госпо́дь: а́ще хо́щете, и послу́шаете Мене́, блага́я земли́ сне́сте. А́ще же не хо́щете, ниже́ послу́шаете Мене́, меч вы поя́ст: уста́ бо Госпо́дня глаго́лаша сия́. Ка́ко бысть блудни́ца, град ве́рный Сио́н, полн суда́, в не́мже пра́вда почива́ше, ны́не же [в нем] уби́йцы? Сребро́ ва́ше неискуше́но, корче́мницы твои́ меша́ют вино́ с водо́ю. Кня́зи твои́ не покаря́ются, о́бщницы тате́м, лю́бяще да́ры, гоня́ще воздая́ние, си́рым не судя́щии, и суду́ вдови́ц не внима́ющии. Сего́ ра́ди та́ко глаго́лет Влады́ка Госпо́дь Савао́ф: го́ре кре́пким во Изра́или: не преста́нет бо я́рость Моя́ на проти́вныя, и суд враго́м Мои́м сотворю́: И наведу́ ру́ку Мою́ на тя, и разжегу́ в чистоту́, непокаря́ющихся же погублю́, и отыму́ всех беззако́нных от тебе́, и всех го́рдых смирю́. И приста́влю судии́ твои́ я́коже пре́жде, и сове́тники твоя́ я́ко от нача́ла: и по сих нарече́шися град пра́вды, ма́ти градово́м, ве́рный Сио́н. С судо́м бо спасе́тся плене́ние его́ и с ми́лостынею. И сокруша́тся беззако́ннии и гре́шницы вку́пе: и оста́вившии Го́спода сконча́ются. Зане́же постыдя́тся о и́долех свои́х, и́хже са́ми восхоте́ша, и посра́мятся о саде́х свои́х, и́хже возжеле́ша: Бу́дут бо я́ко тереви́нф отме́тнувший ли́ствия [своя́,] и я́ко вертогра́д не имы́й воды́. И бу́дет кре́пость их я́ко стебль изгре́бия, и де́лания их я́ко и́скры о́гненныя, и сожгу́тся беззако́нницы и гре́шницы вку́пе, и не бу́дет угаша́яй. Сло́во бы́вшее от Го́спода ко Иса́ии сы́ну Амо́сову о Иуде́и, и о Иерусали́ме. Я́ко бу́дет в после́дняя дни явле́на гора́ Госпо́дня, и дом Бо́жий на версе́ гор, и возвы́сится превы́ше холмо́в: и прии́дут к ней вси язы́цы. И по́йдут язы́цы мно́зи, и реку́т: прииди́те, и взы́дем на го́ру Госпо́дню, и в дом Бо́га Иа́ковля, и возвести́т нам путь Свой, и по́йдем по нему́.

Прокимен, псалом 6, глас 4: Го́споди, да не я́ростию Твое́ю / обличи́ши мене́. Стих: Поми́луй мя Го́споди, я́ко не́мощен есмь.

ВО ВТОРНИК ВЕЧЕРА

На Го́споди воззва́х стихиры, глас 2. Подобен, Триоди: Я́ко яви́ся:

Сне́дию дре́вле го́рькою, изри́нувшеся из рая́, / воздержа́нием страсте́й потщи́мся вни́ти, / взыва́юще Бо́гу на́шему: / на Кресте́ простры́й дла́ни Твоя́, / о́цет пи́вый и желчь вкуси́вый, / и боле́зни претерпе́вый от гвозде́й, / горча́йшия сла́сти вся от душ на́ших изгвозди́вый, / ра́ди благоутро́бия щедро́т, спаси́ рабы́ Твоя́.

Дре́ва сне́дию иногда́ изгна́ни бы́вше из рая́, / Кресто́м Твои́м в онь всели́хомся, / его́же в моли́тву Тебе́ приводя́ще Многоми́лостиве, / и ве́рно Ти вси мо́лимся: / исто́чники слез ны́не нам низпосли́, во вре́мя воздержа́ния, / скве́рну всю очища́ющия страсте́й, и прегреше́ний на́ших, / да вси Ти вопие́м приле́жно: / Го́споди, сла́ва Тебе́.

Ина стихира, глас 2. Подобен: Соде́янных ми:

Воздержа́ния наслажде́ние и мне Сло́ве да́руй, / я́коже Ада́му рай иногда́, / от вся́кия Твоея́ вкуша́ти за́поведи Бо́же наш, / и оша́ятися при́сно плода́, / его́же отре́кл еси́ греха́, / да живоно́сную страсть Твою́ Кре́стную в ра́дости предварю́.

И в Минеи, 3. Слава, и ныне, Крестобогородичен.

Прокимен, псалом 7, глас 6: Го́споди Бо́же мой, / на Тя упова́х, спаси́ мя. Стих: От всех гоня́щих мя изба́ви мя.

Бытия чтение. [Глава 1, ст. 14 – 23.]

Рече́ Бог, да бу́дут свети́ла на тве́рди небе́сней, освеща́ти зе́млю, и разлуча́ти между́ днем, и между́ но́щию: и да бу́дут в зна́мения, и во времена́, и во дни, и в ле́та. И да бу́дут в просвеще́ние на тве́рди небе́сней, я́ко свети́ти по земли́: и бысть та́ко. И сотвори́ Бог два свети́ла вели́кая: свети́ло вели́кое в нача́ла дне, и свети́ло ме́ньшее в нача́ла но́щи, и зве́зды. И положи́ я Бог на тве́рди небе́сней, я́ко свети́ти на зе́млю. И владе́ти днем и но́щию, и разлуча́ти между́ све́том, и между́ тьмо́ю: и ви́де Бог, я́ко добро́. И бысть ве́чер, и бысть у́тро, день четве́ртый. И рече́ Бог: да изведу́т во́ды га́ды душ живы́х, и пти́цы лета́ющия по земли́, по тве́рди небе́сней: и бысть та́ко. И сотвори́ Бог ки́ты вели́кия, и вся́ку ду́шу живо́тных гадо́в, я́же изведо́ша во́ды по родо́м их, и вся́ку пти́цу перна́ту по ро́ду: и ви́де Бог я́ко добра́. И благослови́ я Бог, глаго́ля: расти́теся, и мно́житеся, и напо́лните во́ды я́же в моря́х: и пти́цы да умно́жатся на земли́. И бысть ве́чер, и бысть у́тро, день пя́тый.

Прокимен, псалом 8, глас 5: Го́споди Госпо́дь наш, / я́ко чу́дно и́мя Твое́ по всей земли́. Стих: Я́ко взя́тся великоле́пие Твое́ превы́ше небе́с.

Притчей чтение. [Глава 1, ст. 20 – 33.]

Прему́дрость во исхо́дех пое́тся, в сто́гнах же дерзнове́ние во́дит. На кра́ех же стен пропове́дуется, у врат же си́льных приседи́т, во врате́х же гра́да дерза́ющи глаго́лет. Ели́ко у́бо вре́мя незло́бивии держа́тся пра́вды, не постыдя́тся: безу́мнии же доса́ды су́ще жела́телие, нечести́вии бы́вше, возненави́деша чу́вство. И пови́нни бы́ша обличе́нием. Се предложу́ вам Моего́ дыха́ния рече́ние: научу́ же вас Моему́ словеси́. Поне́же звах, и не послу́шасте, и простира́х словеса́, и не внима́сте, но отмета́сте Моя́ сове́ты, и Мои́м обличе́нием не внима́сте: у́бо и Аз ва́шей поги́бели посмею́ся, пора́дуюся же, егда́ прии́дет вам па́губа. И егда́ прии́дет на вы внеза́пу мяте́ж, низвраще́ние же подо́бно бу́ри прии́дет, или́ егда́ прии́дет вам печа́ль и градоразоре́ние, или́ егда́ на́йдет на вы па́губа. Бу́дет бо, егда́ призове́те Мя, Аз же не послу́шаю вас: взы́щут Мене́ зли́и, и не обря́щут. Возненави́деша бо прему́дрость, словесе́ же Госпо́дня не прия́ша: Ниже́ хоте́ша внима́ти Мои́м сове́том, руга́хуся же Мои́м обличе́нием. Те́мже снедя́т свои́х путе́й плоды́, и своего́ нече́стия насы́тятся. И́бо, зане́ оби́деша младе́нцев, убие́ни бу́дут, и истяза́ние нечести́выя погуби́т. Мене́ же слу́шаяй всели́тся на упова́нии, и почи́ет без стра́ха от вся́каго зла.

Таже, Сподо́би Го́споди:

На стиховне стихира самогласна дне, глас 8:

Пост не оша́яние бра́шен то́чию соверши́м, / но вся́кия веще́ственныя стра́сти отчужде́ние: / да на нас мучи́тельствующую плоть порабо́тивше, / досто́йни бу́дем прича́стия, А́гнца / за мир закла́ннаго во́лею Сы́на Бо́жия, / и духо́вно пра́зднуем из ме́ртвых Спа́сово Воскресе́ние: / на высоту́ взе́мшеся доброде́телей, / во све́тлости, и наслажде́нии изря́дных дел, / веселя́ще Человеколю́бца.

Стих: К Тебе́ возведо́х о́чи мои́, живу́щему на небеси́. Се я́ко о́чи раб в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, / до́ндеже уще́дрит ны.

Паки туже стихиру.

Стих 2: Поми́луй нас Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, / и уничиже́ния го́рдых.

Мученичен: Му́ченицы Твои́ Го́споди, / забы́вше су́щая в житии́, / неради́вше и о му́ках, бу́дущия ра́ди жи́зни, / сея́ насле́дницы яви́шася: / те́мже и со а́нгелы ра́дуются. / Тех моли́твами, / да́руй лю́дем Твои́м ве́лию ми́лость.

Слава, и ныне, Крестобогородичен: О пресла́внаго чудесе́! / О та́инства но́ваго! / О ужа́снаго начина́ния! / Де́ва глаго́лаше, на Кресте́ Тя я́ко ви́де, / посреде́ двою́ разбо́йнику обе́шена. / Его́же неболе́зненно ужа́сно породи́, / пла́каше глаго́лющи: / увы́ мне Ча́до любе́знейшее, / ка́ко Тя лю́тый наро́д и неблагода́рный, ко Кресту́ пригвозди́?

И прочее последование, якоже изъявися.

ВО ВТОРНИК ПЕРВЫЯ СЕДМИЦЫ, НА ПОВЕЧЕРИИ

По еже рещи псалом: Бо́же в по́мощь мою́:

Поем великий канон. Глас 6. Песнь 1.

Ирмос, по дважды: Помо́щник и покрови́тель бысть мне во спасе́ние, / Сей мой Бог, и просла́влю Его́, / Бог отца́ моего́, и вознесу́ Его́: / сла́вно бо просла́вися.

Стих: Поми́луй мя, Бо́же, поми́луй мя.

Ка́иново преше́д уби́йство, / произволе́нием бых уби́йца со́вести душе́вней, / оживи́в плоть, и воева́в на ню / лука́выми мои́ми дея́ньми.

А́велеве Иису́се, не уподо́бихся пра́вде, / да́ра Тебе́ прия́тна не принесо́х когда́, / ни дея́ния боже́ственна, ни же́ртвы чи́стыя, / ни жития́ непоро́чнаго.

Я́ко Ка́ин и мы, душе́ окая́нная, / всех Соде́телю дея́ния скве́рная, / и же́ртву поро́чную, / и непотре́бное житие́ принесо́хом вку́пе: / те́мже и осуди́хомся.

Бре́ние Зда́тель живосозда́в, / вложи́л еси́ мне плоть и ко́сти, / и дыха́ние и жизнь: / но о Тво́рче мой, Изба́вителю мой, и Судие́ / ка́ющася приими́ мя.

Извеща́ю Ти Спа́се, грехи́, я́же соде́ях, / и души́ и те́ла моего́ я́звы, / я́же внутрь уби́йственнии по́мыслы / разбо́йнически на мя возложи́ша.

А́ще и согреши́х, Спа́се, / но вем, я́ко Человеколю́бец еси́, / наказу́еши ми́лостивно, и милосе́рдствуеши те́пле: / слезя́ща зри́ши, / и притека́еши я́ко Оте́ц, призыва́я блу́днаго.

Слава, Троичен: Пресу́щная Тро́ице, во Еди́нице покланя́емая, / возми́ бре́мя от мене́ тя́жкое грехо́вное, / и я́ко благоутро́бна, / даждь ми сле́зы умиле́ния.

Богородичен: Богоро́дице, наде́жде и предста́тельство Тебе́ пою́щих, / возми́ бре́мя от мене́ тя́жкое грехо́вное, / и я́ко Влады́чица Чи́стая, / ка́ющася приими́ мя.

Песнь 2.

Ирмос: Вонми́, не́бо, и возглаго́лю, / и воспою́ Христа́, / от Де́вы пло́тию прише́дшаго. (Дважды)

Сшива́ше ко́жныя ри́зы грех мне, / обнажи́вый мя пе́рвыя / боготка́нныя оде́жды.

Обложе́н есмь одея́нием студа́, / я́коже ли́ствием смоко́вным, / во обличе́ние мои́х самовла́стных страсте́й.

Оде́яхся в сра́мную ри́зу, / и окровавле́нную сту́дно, / тече́нием стра́стнаго и любосла́стнаго живота́.

Впадо́х в стра́стную па́губу / и в веще́ственную тлю, / и отто́ле до ны́не враг мне досажда́ет.

Любове́щное и любоиме́нное житие́, / невоздержа́нием Спа́се предпоче́т ны́не, / тя́жким бре́менем обложе́н есмь.

Украси́х плотски́й о́браз / скве́рных помышле́ний разли́чным обложе́нием, / и осужда́юся.

Вне́шним приле́жно благоукраше́нием / еди́нем попеко́хся, / вну́треннюю презре́в / богообра́зную ски́нию.

Погребо́х пе́рваго о́браза добро́ту Спа́се страстьми́, / ю́же я́ко иногда́ дра́хму, / взыска́в обря́щи.

Согреши́х, я́коже блудни́ца вопию́ Ти: / еди́н согреши́х Тебе́, / я́ко ми́ро приими́ Спа́се / и моя́ сле́зы.

Очи́сти, я́коже мыта́рь вопию́ Ти, / Спа́се, очи́сти мя: / никто́же бо су́щих из Ада́ма, я́коже аз / согреши́х Тебе́.

Слава, Троичен: Еди́наго Тя в трие́х Ли́цах, / Бо́га всех пою́, / Отца́, и Сы́на, и Ду́ха Свята́го.

Богородичен: Пречи́стая Богоро́дице Де́во, / еди́на Всепе́тая, / моли́ приле́жно, во е́же спасти́ся нам.

Песнь 3.

Ирмос: Утверди́, Го́споди, на ка́мени за́поведей Твои́х / подви́гшееся се́рдце мое́, / я́ко Еди́н Свят еси́ и Госпо́дь. (Дважды)

Исто́чник живота́ стяжа́х Тебе́, / сме́рти низложи́теля, / и вопию́ Ти от се́рдца моего́ пре́жде конца́: / согреши́х, очи́сти и спаси́ мя.

Согреши́х, Го́споди, / согреши́х Тебе́, очи́сти мя: / несть бо и́же кто согреши́ в челове́цех, / его́же не превзыдо́х прегреше́ньми.

При Но́и, Спа́се, / блу́дствовавшия подража́х, / о́нех насле́дствовав осужде́ние, / в пото́пе погруже́ния.

Ха́ма о́наго душе́, / отцеуби́йца подража́вши, / сра́ма не покры́ла еси́ и́скренняго, / вспять зря возврати́вшися.

Запале́ния я́коже Лот, / бе́гай душе́ моя́ греха́: / бе́гай Содо́мы и Гомо́рры, / бе́гай пла́мене вся́каго безслове́снаго жела́ния.

Поми́луй Го́споди, поми́луй мя, вопию́ Ти, / егда́ прии́деши со а́нгелы Твои́ми, / возда́ти всем по достоя́нию дея́ний.

Слава, Троичен: Тро́ице про́стая, несозда́нная, / безнача́льное Естество́, / в Тро́ице пева́емая Ипоста́сей, / спаси́ ны ве́рою покланя́ющияся / держа́ве Твое́й.

Богородичен: От Отца́ безле́тна Сы́на, / в ле́то Богороди́тельнице, / неискусому́жно родила́ еси́, / стра́нное чу́до, / пребы́вши Де́ва, доя́щи.

Песнь 4.

Ирмос: Услы́ша проро́к / прише́ствие Твое́, Го́споди, и убоя́ся, / я́ко хо́щеши от Де́вы роди́тися / и челове́ком яви́тися, и глаго́лаше: / услы́шах слух Твой и убоя́хся, / сла́ва си́ле Твое́й, Го́споди. (Дважды)

Бди о душе́ моя́! / Изря́дствуй я́коже дре́вле вели́кий в патриа́рсех, / да стя́жеши дея́ние с ра́зумом, / да бу́деши ум зряй Бо́га / и дости́гнеши незаходя́щий мрак в виде́нии, / и бу́деши вели́кий купе́ц.

Двана́десять патриа́рхов, / вели́кий в патриа́рсех детотвори́в, / та́йно утверди́ тебе́ / ле́ствицу де́ятельнаго душе́ моя́ восхожде́ния: / де́ти, я́ко основа́ния: степе́ни, / я́ко восхожде́ния, прему́дренно подложи́в.

Иса́ва возненави́деннаго подража́ла еси́ душе́, / отдала́ еси́ преле́стнику твоему́ / пе́рвыя добро́ты пе́рвенство, / и оте́ческия моли́твы отпа́ла еси́, / и два́жды поползну́лася еси́ окая́нная, / дея́нием и ра́зумом: / те́мже ны́не пока́йся.

Едо́м Иса́в нарече́ся, / кра́йняго ра́ди женонеи́стовнаго смеше́ния: / невоздержа́нием бо при́сно разжига́емь, / и сластьми́ оскверня́емь, / Едо́м именова́ся, / е́же глаго́лется разжже́ние души́ любогрехо́вныя.

И́ова на гно́ищи слы́шавши, / о душе́ моя́, оправда́вшагося, / того́ му́жеству не поревнова́ла еси́, / тве́рдаго не име́ла еси́ предложе́ния, во всех я́же ве́си, / и и́миже искуси́лася еси́, / но яви́лася еси́ нетерпели́ва.

И́же пе́рвее на престо́ле, / наг ны́не на гно́ищи гно́ен: / мно́гий в ча́дех и сла́вный, / безча́ден и бездо́мок напра́сно: / пала́ту у́бо гно́ище, / и би́серие стру́пы вменя́ше.

Слава, Троичен: Неразде́льное Существо́м, / несли́тное Ли́цы / богосло́влю Тя, Тро́ическое Еди́но Божество́, / я́ко единоца́рственное и сопресто́льное, / вопию́ Ти песнь вели́кую, / в вы́шних трегу́бо песносло́вимую.

Богородичен: И ражда́еши, и де́вствуеши, / и пребыва́еши обою́ду естество́м Де́ва: / Рожде́йся обновля́ет зако́ны естества́, / утро́ба же ражда́ет неражда́ющая. / Бог иде́же хо́щет, побежда́ется естества́ чин: / твори́т бо, ели́ка хо́щет.

Песнь 5.

Ирмос: От нощи́ у́тренююща, / Человеколю́бче, просвети́, молю́ся, / и наста́ви и мене́ на повеле́ния Твоя́, / и научи́ мя, Спа́се, / твори́ти во́лю Твою́. (Дважды)

Моисе́ов слы́шала еси́ ковче́жец душе́, / вода́ми, волна́ми носи́м ре́чными, / я́ко в черто́зе дре́вле бе́гающий де́ла го́рькаго / сове́та фараони́тска.

А́ще ба́бы слы́шала еси́, убива́ющия иногда́ / безвозра́стное му́жеское, душе́ окая́нная, целому́дрия дея́ние, / ны́не я́ко вели́кий Моисе́й, / сси прему́дрость.

Я́ко Моисе́й вели́кий / еги́птянина, ума́ уязви́вши / окая́нная, не уби́ла еси́ душе́: / и ка́ко всели́шися, глаго́ли, / в пусты́ню страсте́й покая́нием?

В пусты́ню всели́ся вели́кий Моисе́й, / гряди́ у́бо подража́й того́ житие́, / да и в купине́ богоявле́ния душе́, / в виде́нии бу́деши.

Моисе́ов жезл вообража́й душе́, / ударя́ющий мо́ре, и огустева́ющий глубину́, / во о́браз Креста́ Боже́ственнаго: / и́мже мо́жеши и ты / вели́кая соверши́ти.

Ааро́н приноша́ше огнь Бо́гу, непоро́чный, неле́стный: / но Офни́ и Финее́с, я́ко ты душе́, / приноша́ху чужде́е Бо́гу оскверне́нное житие́.

Слава, Троичен: Тя Тро́ице сла́вим, Еди́наго Бо́га: / Свят, Свят, Свят еси́ О́тче, Сы́не, и Ду́ше, / про́стое Существо́, / Еди́нице при́сно покланя́емая.

И ныне, Богородичен: Из Тебе́ облече́ся в мое́ смеше́ние, / нетле́нная безму́жная Ма́ти Де́во, / Бог созда́вый ве́ки, / и соедини́ Себе́ челове́ческое естество́.

Песнь 6.

Ирмос: Возопи́х всем се́рдцем мои́м / к ще́дрому Бо́гу, / и услы́ша мя от а́да преиспо́дняго, / и возведе́ от тли живо́т мой. (Дважды)

Во́лны Спа́се прегреше́ний мои́х / я́ко в мо́ри Чермне́м возвраща́ющеся, / покры́ша мя внеза́пу, / я́ко Еги́птяны иногда́, и триста́ты.

Неразу́мное душе́ произволе́ние име́ла еси́, / я́ко пре́жде Изра́иль: / Боже́ственныя бо ма́нны предсуди́ла еси́ безслове́сно, / любосла́стное страсте́й объяде́ние.

Кладенцы́ душе́, предпочла́ еси́ ханане́йских мы́слей, / па́че жи́лы ка́мене, / из него́же прему́дрости река́, я́ко ча́ша / пролива́ет то́ки богосло́вия.

Свина́я мяса́ и котлы́, и Еги́петскую пи́щу, / па́че небе́сныя предсуди́ла еси́ душе́ моя́, / я́коже дре́вле неразу́мнии лю́дие в пусты́ни.

Я́ко уда́ри Моисе́й раб Твой / жезло́м ка́мень, / обра́зно животвори́вая ре́бра Твоя́ прообразова́ше, / из ни́хже вси / питие́ жи́зни Спа́се, почерпа́ем.

Испыта́й душе́ и смотряй, я́коже Иису́с Нави́н / обетова́ния зе́млю, какова́ есть, / и всели́ся в ню благозако́нием.

Слава, Троичен: Тро́ица есмь про́ста, неразде́льна, / разде́льна Ли́чне, / и Еди́ница есмь, Естество́м соедине́на, / Оте́ц глаго́лет, и Сын, и Боже́ственный Дух.

Богородичен: Утро́ба Твоя́ Бо́га нам роди́, / воображе́нна по нам: / Его́же я́ко Созда́теля всех моли́ Богоро́дице, / да моли́твами Твои́ми оправди́мся.

Таже: Го́споди, поми́луй. (Трижды.) Сла́ва, и ны́не:

Кондак:

Душе́ моя́, душе́ моя́, воста́ни, что спи́ши? / Коне́ц приближа́ется, и и́маши смути́тися. / Воспряни́ у́бо, да пощади́т тя Христо́с Бог, / везде́ сый и вся́ исполня́яй.

Песнь 7.

Ирмос: Согреши́хом, беззако́нновахом, / непра́вдовахом пред Тобо́ю, / ниже́ соблюдо́хом, ниже́ сотвори́хом, / я́коже запове́дал еси́ нам; / но не преда́ждь нас до конца́, / отце́в Бо́же. (Дважды)

Киво́т я́ко ноша́шеся на колесни́це, / Зан о́ный, / егда́ превра́щшуся тельцу́, / то́чию косну́ся, Бо́жиим искуси́ся гне́вом: / но того́ дерзнове́ния убежа́вши душе́, / почита́й Боже́ственная че́стне.

Слы́шала еси́ Авессало́ма, / ка́ко на естество́ воста́? / Позна́ла еси́ того́ скве́рная дея́ния, / и́миже оскверни́ ло́же Дави́да отца́, / но ты подража́ла еси́ того́ стра́стная / и любосла́стная стремле́ния.

Покори́ла еси́ нерабо́тное твое́ досто́инство те́лу твоему́: / ино́го бо Ахитофе́ла обре́тши врага́, душе́, / снизшла́ еси́ сего́ сове́том, / но сия́ разсы́па Сам Христо́с, / да ты вся́ко спасе́шися.

Соломо́н чу́дный, / и благода́ти прему́дрости испо́лненный, / сей лука́вое иногда́ пред Бо́гом сотвори́в, / отступи́ от Него́: / ему́же ты прокля́тым твои́м житие́м, душе́ / уподо́билася еси́.

Сластьми́ влеко́мь страсте́й свои́х оскверня́шеся, / увы́ мне, рачи́тель прему́дрости, / рачи́тель блу́дных жен, и стра́нен от Бо́га: / его́же ты подража́ла еси́ умо́м о душе́! / Сладостра́стьми скве́рными.

Ровоа́му поревнова́ла еси́ / не послу́шавшему сове́та о́тча, / ку́пно же и зле́йшему рабу́ Иеровоа́му, пре́жнему отсту́пнику душе́, / но бе́гай подража́ния, и зови́ Бо́гу: / согреши́х, уще́дри мя.

Слава, Троичен: Тро́ице про́стая, неразде́льная, / единосу́щная, и Естество́ еди́но, / Све́тове и Свет, и Свя́та три, и еди́но Свя́то / пое́тся Бог Тро́ица, / но воспо́й, просла́ви Живо́т и Животы́, душе́, / всех Бо́га.

Богородичен: Пое́м Тя, благослови́м Тя, / покланя́емся Ти Богороди́тельнице, / я́ко неразлу́чныя Тро́ицы породила́ еси́ / еди́наго Христа́ Бо́га, / и Сама́ отве́рзла еси́ нам / су́щим на земли́ небе́сная.

Песнь 8.

Ирмос: Его́же во́инства Небе́сная сла́вят, / и трепе́щут Херуви́ми и Серафи́ми, / вся́ко дыха́ние и тварь, / по́йте, благослови́те / и превозноси́те во вся ве́ки. (Дважды)

Ты Ози́и душе́ поревнова́вши, / сего́ прокаже́ние в себе́ стяжа́ла еси́ сугу́бо: / безме́стная бо мы́слиши, беззако́нная же де́еши: / оста́ви я́же и́маши, / и притецы́ к покая́нию.

Ниневи́тяны душе́ слы́шала еси́ / ка́ющияся Бо́гу, вре́тищем и пе́пелом, / сих не подража́ла еси́, но яви́лася еси́ зле́йшая всех, / пре́жде зако́на, и по зако́не прегреши́вших.

В ро́ве бла́та слы́шала еси́ Иереми́ю душе́, / гра́да Сио́ня рыда́ньми вопию́ща, / и слез и́щуща, / подража́й сего́ плаче́вное житие́ и спасе́шися.

Ио́на в Фарси́с побеже́, / проразуме́в обраще́ние ниневи́тянов, / разуме́ бо я́ко проро́к Бо́жие благоутро́бие: / те́мже ревнова́ше / проро́честву не солга́тися.

Дании́ла в ро́ве слы́шала еси́, / ка́ко загради́ уста́, о душе́ звере́й: / уве́дела еси́, ка́ко о́троцы и́же о Аза́рии, / погаси́ша ве́рою пе́щи пла́мень горя́щий.

Ве́тхаго Заве́та вся / приведо́х ти душе́, к подо́бию, / подража́й пра́ведных боголюби́вая дея́ния, / избе́гни же па́ки лука́вых грехо́в.

Слава, Троичен: Безнача́льне О́тче, Сы́не собезнача́льне, / Уте́шителю Благи́й, Ду́ше Пра́вый: / Сло́ва Бо́жия Роди́телю, / Отца́ безнача́льна Сло́ве, / Ду́ше живы́й, и зи́ждяй, / Тро́ице Еди́нице поми́луй мя.

Богородичен: Я́ко от оброще́ния червлени́цы Пречи́стая, / у́мная багряни́ца Емману́илева, / внутрь во чре́ве Твое́м плоть истка́ся. / Те́мже Богоро́дицу / вои́стинну Тя почита́ем.

Песнь 9.

Ирмос: Безсе́меннаго зача́тия Рождество́ несказа́нное, / Ма́тере безму́жныя нетле́нен Плод, / Бо́жие бо рожде́ние обновля́ет естества́. / Те́мже Тя вси ро́ди, / я́ко Богоневе́стную Ма́терь, / правосла́вно велича́ем. (Дважды)

Христо́с искуша́шеся, / диа́вол искуша́ше, / показу́я ка́мение, / да хле́би бу́дут: / на го́ру возведе́ / ви́дети вся ца́рствия ми́ра во мгнове́нии. / Убо́йся о душе́, ловле́ния, / трезви́ся моли́ся на вся́кий час Бо́гу.

Го́рлица пустынолю́бная, / глас вопию́щаго возгласи́, / Христо́в свети́льник, пропове́дуяй покая́ние, / И́род беззако́ннова со Иродиа́дою. / Зри душе́ моя́, да не увя́знеши в беззако́нныя се́ти, / но облобыза́й покая́ние.

В пусты́ню всели́ся благода́ти Предте́ча, / и Иуде́я вся и Самари́я / слы́шавше теча́ху, / и испове́даху грехи́ своя́, / креща́ющеся усе́рдно: / и́хже ты не подража́ла еси́ душе́.

Брак у́бо честны́й, и ло́же нескве́рно: / обоя́ бо Христо́с пре́жде благослови́, / пло́тию яды́й, / и в Ка́не же на бра́це во́ду в вино́ соверша́я, / и показу́я пе́рвое чу́до: / да ты измени́шися о душе́.

Разсла́бленнаго стя́гну Христо́с, / одр взе́мша, / и ю́ношу уме́рша воздви́же, вдови́че рожде́ние, / и со́тнича о́трока, / и самаряны́не яви́ся, / в Ду́се слу́жбу / Тебе́, душе́ предживописа́.

Кровоточи́вую исцели́ / прикоснове́нием кра́я ри́зна Госпо́дь: / прокаже́нныя очи́сти: / слепы́я и хромы́я просвети́в, испра́ви: / глухи́я же и немы́я, и нича́щия ни́зу исцели́ сло́вом: / да ты спасе́шися окая́нная душе́.

Слава, Троичен: Отца́ просла́вим, Сы́на превознесе́м, / Боже́ственному Ду́ху ве́рно поклони́мся, / Тро́ице неразде́льней, Еди́нице по Существу́, / я́ко Све́ту, и Све́том, и Животу́, и Живото́м: / животворя́щему, и просвеща́ющему концы́.

Богородичен: Град Твой сохраня́й / Богороди́тельнице Пречи́стая: / в Тебе́ бо сей ве́рно ца́рствуяй, / в Тебе́ и утвержда́ется, / и Тобо́ю побежда́яй, / побежда́ет вся́кое искуше́ние, / и пленя́ет ра́тники, / и прохо́дит послуша́ние.

Преподо́бне о́тче Андре́е, моли́ Бо́га о нас.

Андрею: Андре́е честны́й, и о́тче треблаже́ннейший, / па́стырю Кри́тский, / не преста́й моля́ся о воспева́ющих тя, / да изба́вимся вси гне́ва, и ско́рби, и тле́ния, / и прегреше́ний безме́рных, / чту́щии твою́ па́мять ве́рно.

Таже поем оба лика, ирмос: Безсе́меннаго зача́тия Рождество́ несказа́нное, / Ма́тере безму́жныя нетле́нен Плод, / Бо́жие бо рожде́ние обновля́ет естества́. / Те́мже Тя вси ро́ди, / я́ко Богоневе́стную Ма́терь, / правосла́вно велича́ем.

И прочее последование Повечерия.

В СРЕДУ ПЕРВЫЯ СЕДМИЦЫ НА УТРЕНИ.

По 1-м стихословии седален Осмогласника.

По 2-м же стихословии седален, глас 2: Подобен: Благообра́зный Ио́сиф:

Страстьми́ Твои́ми всем безстра́стие да́вый Человеколю́бче, / стра́сти пло́ти моея́ умертви́в Твои́м Кресто́м, / Боже́ственную сподо́би страсть ви́дети, / посто́м благоугожда́юща сла́ве Твое́й, / да прииму́ бога́тно ве́лию ми́лость.

Слава, тойже:

И ныне, Крестобогородичен, глас тойже. Подобен: Милосе́рдия су́щи:

Де́ва и Ма́ти Твоя́ Христе́, / на дре́ве зря́щи Тя ме́ртва просте́рта, / пла́чущи го́рько, Сы́не Мой, глаго́лаше, / что стра́шное сие́ та́инство, / всем да́руяй живо́т ве́чный, / во́лею на Кресте́ ка́ко умира́еши, / сме́ртию поно́сною?

По 3-м стихословии седален, глас 2: Подобен: Животворя́щий:

Светотво́рное вре́мя, его́же ны́не освяти́л еси́ / и дарова́л еси́ нам воздержа́ния Го́споди, / Ты сподо́би нас во умиле́нии / всех чи́сте прейти́ ми́рствующих, Креста́ кре́постию, / еди́не Человеколю́бче.

Слава, тойже:

И ныне, Крестобогородичен, глас тойже. Подобен: Милосе́рдия две́ри:

Честны́м Кресто́м Сы́на Твоего́ сохраня́еми / Влады́чице Чи́стая Богоро́дице, / вся́кий прило́г бори́теля вси удо́бно низлага́ем. / Те́мже Тя по до́лгу ублажа́ем, я́ко Ма́терь Све́та, / еди́ну наде́жду душ на́ших.

Таже чтение в Лавсаице. Псалом 50.

Канон в Минеи. И трипеснец, глас 2. Песнь 3.

Ирмос: Процвела́ есть пусты́ня, я́ко крин, Го́споди, / язы́ческая неплодя́щая це́рковь, / прише́ствием Твои́м, / в ней же утверди́ся мое́ се́рдце.

Распне́м у́ды воздержа́нием, / трезви́мся в моли́твах, я́коже пи́сано есть, / и по сле́ду жи́тельствуим Пострада́вшаго, и стра́сти умертви́вшаго.

Изблева́вше го́рький грех, / потщи́мся во́лею желчь вкуси́вшему угоди́ти Христу́, / Кресто́м низложи́вшу злонача́льника.

Обы́чай взем грех, / влече́т мя во всеконе́чную па́губу, / но Ты мя от сея́ изба́ви Кресто́м Твои́м, / Ще́дре многоми́лостиве.

Богородичен: Влады́чествующая все́ми тва́рьми Влады́чице, / я́ко Влады́ку ро́ждши, / рабо́ты мя свободи́ льсти́ваго, и еди́наго борца́.

Иный, глас тойже.

Ирмос: Утверди́ нас:

Дре́во Кре́стное воздержа́ние ми́ру процвете́, / е́же любо́вию облобыза́вше, / наслади́мся всепло́дия Боже́ственных за́поведей Христо́вых.

Воздержа́ние страсте́й и ны́не нося́ще, / плоть распне́м Го́сподеви, / и ме́ртвенно тоя́ мудрова́ние / пока́жем вси боже́ственней жи́зни.

Слава, Троичен: Три Ли́ца еди́наго зра́ка сла́влю, / Отца́, Сы́на, и Ду́ха, / еди́ну держа́ву Божества́, / Ца́рство всех, и све́тлость.

Богородичен: Рождество́ Твое́, Чи́стая, стра́шно бысть: / Бог бо есть вочелове́чивыйся, / безнача́льно из Отца́ роди́выйся, / и из Тебе́ напосле́док кроме́ му́жа ро́ждься.

Сла́ва Тебе́ Бо́же наш, сла́ва Тебе́.

Распя́тие пою́ и прободе́ние Боже́ственных ребр Твои́х, / из ни́хже питие́ безсме́ртное че́рплю всегда́ Христе́, и освяща́юся.

Ирмос: Утверди́ нас в Тебе́, Го́споди, / Дре́вом умерщвле́й грех, / и страх Твой всади́ / в сердца́ нас, пою́щих Тя.

Песнь 8.

Ирмос: Пещь иногда́ о́гненная в Вавило́не де́йства разделя́ше, / Бо́жиим веле́нием халде́и опаля́ющая, / ве́рныя же ороша́ющая, пою́щия: / благослови́те, вся дела́ Госпо́дня, Го́спода.

Пещь страсте́й распаля́ет ду́шу мою́, / но росо́ю ми́лости Твоея́ сию́ увяди́, / источи́вый безстра́стия то́ки из нетле́нных Твои́х ребр, / распина́емь Благоде́телю мно́гаго ра́ди снизхожде́ния.

Возне́сл еси́ ны па́дшия в зло́бу / на Кресте́ Твои́м вознесе́нием Христе́: / те́мже попо́лзшася в про́пасть греха́, возведи́, / и утверди́ мя на ка́мени спасе́ния, / я́ко да сла́влю держа́ву Твою́.

Копие́м Твои́м Христе́, / страсте́й гное́ние очи́стив от се́рдца моего́, / всего́ мя исцели́, / его́же змий уязви́ зубы́ ядови́тыми, / и даждь ми непоколеби́мо / к Боже́ственным стезя́м ходи́ти.

Богородичен: Тебе́ све́тлую свещу́, и све́щник, / в не́йже огнь Божества́ все́лься, / просвети́ нощно́ю одержи́мых тле́ю, Нескве́рная: / чтим вси благословя́ще, благослове́нная / Рождество́ Твое́.

Иный.

Ирмос: В купине́ Моисе́ю:

Посреде́ разбо́йник Распя́таго на Дре́ве, / и копие́м прободе́наго в живото́чная ре́бра, / по́йте, благослови́те, и превозноси́те во вся ве́ки.

Судя́й всей земли́, суди́щу предста́л еси́, / зауше́н был еси́, и пору́ган, / на Кресте́ пове́шен был еси́, / от тли мя пременя́я дре́вняго греха́ во вся ве́ки.

Благослови́м Отца́ и Сы́на, и Свята́го Ду́ха, Го́спода.

Троичен: Божество́ еди́но Тро́ица, / неразде́льное Естество́, разде́льное же Ли́цы, / непоколеби́мая держа́во, О́тче, Сы́не, и Ду́ше, / Тебе́ песносло́вим во вся ве́ки.

И ны́не и при́сно, и во ве́ки веко́в, ами́нь.

Богородичен: Богороди́тельнице Чи́стая, небе́сная врата́, / спаси́тельная две́ре всех христиа́н / моле́ния приими́, блажа́щих Тя во вся ве́ки.

Сла́ва Тебе́ Бо́же наш, сла́ва Тебе́.

Кре́сте Христо́в, разбо́йника наста́вивый к ве́ре, / и мене́ к тече́нию благоси́льно посто́м сподо́би / предвари́ти на поклоне́ние Твое́, и оживотвори́тися.

Хва́лим, благослови́м, покланя́емся Го́сподеви, пою́ще, и превознося́ще во вся ве́ки.

Ирмос: В купине́ Моисе́ю Де́вы чу́до, / на Сина́йстей горе́, Прообрази́вшаго иногда́, / по́йте, благослови́те, и превозноси́те во вся ве́ки.

Песнь 9.

Ирмос: Безнача́льна Роди́теля Сын, Бог и Госпо́дь, / вопло́щься от Де́вы нам яви́ся, / омраче́нныя просвети́ти, собра́ти расточе́нныя. / Тем Всепе́тую Богоро́дицу велича́ем.

Со́лнца светле́е пост возсия́вый многосве́тлая благода́ть, / благовеству́ет всем Кре́стныя лучи́, и зари́ честны́я стра́сти, / и Воскресе́ния день спаси́тельный.

Чистоту́ возлю́бим, блуда́ отбежи́м, / чре́сла целому́дрием препоя́шим: / я́ко да чи́сти яви́мся Чи́стому, и / Еди́ному от всех и́щущему чистоты́, / Спа́су душ на́ших.

Христе́, стра́ху Твоему́ пригвозди́ пло́ти моя́, / Кресту́ пригвозди́вый грех Ада́мов, / разреши́ зол мои́х соу́зы, / лука́ваго сокруши́ стре́лы, копие́м Твои́м Влады́ко, / и сего́ вре́да изба́ви мя.

Богородичен: Судию́ пра́веднейшаго и еди́наго благоуве́тливаго / ро́ждшая Де́во Христа́ Го́спода, / изба́ви мя суда́ Отрокови́це, и огня́ и муче́ния, / я́же ми исхода́таи греха́ наслажде́ние.

Иный.

Ирмос: Чи́стую и Пречи́стую:

О благоутро́бия Твоего́! / Я́ко Крест претерпе́л еси́, гво́здие и копие́ Го́споди, / мене́ ра́ди осужде́ннаго тле́ю: / те́мже пою́ Тя Христе́.

Кресту́, тро́сти, гво́здием и копию́, / жи́зненным Твои́м страсте́м, вси лю́дие покланя́ющеся, / пе́сньми Христе́ пое́м Тя.

Слава, Троичен: Еди́нице триипоста́сная / Тро́ице еди́нственная, господонача́льная! / Естество́ равносла́вное, / О́тче, Сы́не, и Боже́ственный Ду́ше, спаси́ всех нас.

Богородичен: Ра́дуйся очисти́лище ми́ру, Богоро́дице, / в не́же прибе́гше вси гре́шнии, / к Бо́гу примире́ния при́сно обрета́ем.

Сла́ва Тебе́ Бо́же наш, сла́ва Тебе́.

Кресто́м Твои́м, Го́споди, и мене́ укрепи́в, / посто́в мне да́руй, Благи́й, / благомо́щно сконча́ти обхожде́ние.

Ирмос: Чи́стую и Пречи́стую / Ма́терь и Де́ву, / пе́сньми пе́сней, вси ве́рнии, / благоче́стно я́ко Богоро́дицу велича́ем.

Светилен.

На стиховне самогласен дважды. Глас 8:

Посто́м, помышле́ний стра́сти, / прииди́те порабо́тим, / духо́вными себе́ кри́лы покры́вше: / да вра́жию дви́жимую бу́рю ле́гце преше́дше, / досто́йни бу́дем кре́стнаго поклоне́ния, / о ми́ре закла́ннаго во́лею Сы́на Бо́жия: / и духо́вно пра́зднуим из ме́ртвых Спа́сово Воскресе́ние, / на го́ру взе́мшеся, со ученики́ просла́вим, / власть прии́мшаго всю, / Сы́на от Отца́, Человеколю́бца.

Мученичен: Му́ченицы Христо́вы непобеди́мии, / победи́вше пре́лесть си́лою Кре́стною, / восприя́сте благода́ть ве́чныя жи́зни, / мучи́телей преще́ния не убоя́стеся, / му́ками ураня́еми веселите́ся: / и ны́не кро́ви ва́ша, / бы́ша исцеле́ния душ на́ших: / моли́те спасти́ся душа́м на́шим.

Слава, и ныне, Крестобогородичен, глас тойже: Что зри́мое виде́ние, / е́же мои́ми очесы́ зри́тся, о Влады́ко? / Содержа́й всю тварь, на Дре́во вознесе́н еси́, / и умерщвле́н всем да́руяй живо́т: / Богоро́дица пла́чущи глаго́лаше, / егда́ зря́ше на Кресте́ Всечи́стая, / из Нея́ неизрече́нно / возсия́вшаго Бо́га и Челове́ка.

И час 1-й, со стихословием и обычными поклоны: и отпуст.

НА 6-М ЧАСЕ

Тропарь пророчества, глас 4:

Ве́си созда́ние на́ше, ве́си немощь на́шу Человеколю́бче: / согреши́хом, но не отступи́хом от Тебе́ Бо́же, / ниже́ возде́хом ру́ки на́ша к бо́гу чужде́му, / пощади́ нас Твое́ю бла́гостию Благоутро́бне.

Сла́ва, и ны́не: и повторяем тойжде.

Таже прокимен, псалом 9, глас 4: Испове́мся Тебе́ Го́споди, / всем се́рдцем мои́м. Стих: Возвеселю́ся и возра́дуюся о Тебе́.

Пророчества Исаиина чтение. [Глава 2, ст. 3 – 11.]

Та́ко глаго́лет Госпо́дь: от Сио́на изы́дет зако́н, и сло́во Госпо́дне из Иерусали́ма. И суди́ти бу́дет посреде́ язы́к, и изобличи́т лю́ди мно́ги: и раскую́т мечи́ своя́ на ора́ла, и ко́пия своя́ на серпы́, и не во́змет язы́к на язы́к меча́, и не навы́кнут ктому́ ра́товатися. И ны́не до́ме Иа́ковль, прииди́те, по́йдем све́том Госпо́дним. Оста́ви бо лю́ди своя́ дом Иа́ковль: зане́ я́коже из нача́ла напо́лнися страна́ их волхвова́ний, я́коже иноплеме́нников, и ча́да мно́га иноплеме́ннича роди́шася им. Напо́лнися бо страна́ их сребра́ и зла́та, и не бя́ше числа́ сокро́вищ их: и напо́лнися земля́ их ко́ней, и не бя́ше числа́ колесни́ц их. И напо́лнися земля́ ме́рзостей дел рук их, и поклони́шася тем, я́же сотвори́ша пе́рсты их: И преклони́ся челове́к, и смири́ся муж, и не претерплю́ им. И ны́не вни́дите в ка́мения, и скры́йтеся в зе́млю от лица́ стра́ха Госпо́дня, и от сла́вы кре́пости Его́, егда́ воста́нет сокруши́ти зе́млю. О́чи бо Госпо́дни высо́цы, челове́к же смире́н: и смири́тся высота́ челове́ческая, и вознесе́тся Госпо́дь еди́н в день о́ный.

Прокимен, псалом 10. Глас 6: Пра́веден Госпо́дь, и пра́вды возлюби́, / правоты́ ви́де лице́ Его́. Стих: На Го́спода упова́х, ка́ко рече́те души́ мое́й?

И прочее последование часов, яко предучинися, и отпуст.

В СРЕДУ ПЕРВЫЯ СЕДМИЦЫ ВЕЧЕРА,

Егда бывает преждеосвященная, творит священник на едином коемждо антифоне стихословия малую ектению. На Го́споди воззва́х, поставим стихов 10. От Изведи́ из темни́цы ду́шу мою́: На глас самогласна дне, повторяюще тойжде. Таже мученичен в тойже глас: таже 3 подобны Триоди: и 3 Минеи, повторяюще един. Самогласен дне.

Глас 8: Постя́щеся бра́тие теле́сне, / пости́мся и духо́вне: / разреши́м вся́кий сою́з непра́вды: / расто́ргнем стропо́тная ну́ждных измене́ний. / Вся́кое списа́ние непра́ведное раздере́м, / дади́м а́лчущим хлеб, / и ни́щия безкро́вныя введе́м в до́мы: / да прии́мем от Христа́ Бо́га / ве́лию ми́лость. [Дважды.]

Таже мученичен: А́ще ка́я доброде́тель; / и а́ще ка́я похвала́ подоба́ет святы́м? / Мече́м бо преклони́ша вы́и, / Тебе́ ра́ди прекло́ншаго Небеса́ и соше́дшаго: / излия́ша кро́ви Своя́, Тебе́ ра́ди / истощи́вшаго Себе́, и зрак ра́бий прии́мша: / смири́шася да́же до сме́рти, / нищету́ Твою́ подража́юще. / И́хже моли́твами, по мно́жеству щедро́т Твои́х, / Бо́же поми́луй нас.

Таже господина Иосифа, глас 2. Подобен: Я́ко яви́ся:

Светолу́чныя вас я́ко мо́лнии, в весь мир Иису́с, / мы́сленное вои́стинну со́лнце посла́в, / отгна́л есть светлостьми́ ва́шея Боже́ственныя про́поведи / пре́лести тьму, Богови́дцы апо́столи, / и просвети́ во мра́це неве́дения держи́мыя лю́те. / Его́же у́бо моли́те, низпосла́ти и нам / просвеще́ние и ве́лию ми́лость.

Другий тогоже. Подобен:

Доброде́тельми Илия́ возше́д на колесни́цу боже́ственную, / посто́м просвети́вся, / возноша́шеся на высоту́ небе́сную: / сему́ поревну́й смире́нная душе́ моя́, / и пости́ся от вся́кия зло́бы, и за́висти, и сва́ра / и сла́дости теку́щия и сла́стныя: / я́ко да боле́зни лю́тыя избе́гнеши, / ве́чнующия гее́нны, вопию́щи Христу́: / Го́споди, сла́ва Тебе́.

Другий господина Феодора, глас 5: Подобен: Преподо́бне о́тче:

Апо́столи Боже́ственнии, / ми́ру тепле́йшии моли́твенницы, / и правосла́вным защити́телие, / иму́ще дерзнове́ния держа́ву ко Христу́ Бо́гу на́шему, / о нас моли́теся, мо́лим вы всечестни́и, / да посто́в благо́е вре́мя све́тло сотвори́м, / и Единосу́щныя Тро́ицы благода́ть прии́мем: / великопропове́дницы сла́внии, / моли́теся о душа́х на́ших.

И Минеи 4. Сла́ва, и ны́не, Богородичен. И бывает вход с кадильницею, без Евангелия. [Егда же имать честися Евангелие, тогда и со Евангелием.] Све́те ти́хий:

Прокимен, псалом 11, глас 5: Ты Го́споди сохрани́ши ны, и соблюде́ши ны / от ро́да сего́ и во век. Стих: Спаси́ мя Го́споди, я́ко оскуде́ преподо́бный.

Бытия чтение. [Глава 1, 24 – 31. Глава 2, 1 – 3.]

Рече́ Бог: да изведе́т земля́ ду́шу жи́ву по ро́ду, четвероно́гая и га́ды, и зве́ри земли́ по ро́ду: и бысть та́ко. И сотвори́ Бог зве́ри земли́ по ро́ду, и скоты́ по ро́ду их: и вся га́ды земли́ по ро́ду их: и ви́де Бог, я́ко добра́. И рече́ Бог: сотвори́м челове́ка по о́бразу На́шему и по подо́бию: и да облада́ет ры́бами морски́ми, и пти́цами небе́сными, [и зверьми́,] и скота́ми, и все́ю земле́ю, и все́ми га́ды пресмыка́ющимися по земли́. И сотвори́ Бог челове́ка, по о́бразу Бо́жию сотвори́ его́: му́жа и жену́ сотвори́ их. И благослови́ их Бог глаго́ля: расти́теся и мно́житеся, и напо́лните зе́млю, и госпо́дствуйте е́ю, и облада́йте ры́бами морски́ми, [и зверьми́,] и пти́цами небе́сными, и все́ми скота́ми, и все́ю земле́ю, и все́ми га́дами пресмыка́ющимися по земли́. И рече́ Бог: се дах вам вся́кую траву́ се́менную, се́ющую се́мя, е́же есть верху́ земли́ всея́: и вся́кое дре́во, е́же и́мать в себе́ плод се́мене се́меннаго, вам бу́дет в снедь: И всем звере́м земны́м, и всем пти́цам небе́сным, и вся́кому га́ду пресмыка́ющемуся по земли́, и́же и́мать в себе́ ду́шу живота́, и вся́ку траву́ зеле́ную в снедь: и бысть та́ко. И ви́де Бог вся ели́ка сотвори́: и се добра́ зело. И бысть ве́чер, и бысть у́тро, день шесты́й. И соверши́шася не́бо и земля́, и все украше́ние их. И соверши́ Бог в день шесты́й дела́ Своя́, я́же сотвори́: и почи́ в день седьмы́й от всех дел Свои́х, я́же сотвори́. И благослови́ Бог день седьмы́й, и освяти́ его́, я́ко в той почи́ от всех дел Свои́х, я́же нача́т Бог твори́ти.

Прокимен, псалом 12, глас 6: При́зри и услы́ши мя / Го́споди Бо́же мой. Стих: Доко́ле Го́споди забу́деши мя до конца́, доко́ле отвраща́еши лице́ Твое́ от мене́?

И посем возглашает диакон: Повели́те. Священник же взем обема рукама кадильницу, и свещник со свещею, стоит пред святою трапезою зря к востоком, и назнаменуя Крест, глаголет: Прему́дрость про́сти. Таже обратяся на запад к народу, глаголет: Свет Христо́в просвеща́ет всех.

Чтец: При́тчей чте́ние. Диакон: Во́нмем.

Притчей чтение. [Глава 2, ст. 1 – 22.]

Сы́не, а́ще прии́м глаго́л моея́ за́поведи, скры́еши в себе́. Послу́шает прему́дрости твое́ у́хо, и приложи́ши се́рдце твое́ к ра́зуму: приложи́ши же е в наказа́ние сы́ну твоему́. А́ще бо прему́дрость призове́ши, и ра́зуму да́си глас твой, чу́вство же взы́щеши вели́ким гла́сом. И а́ще взы́щеши ея я́ко сребра́, и я́коже сокро́вища испыта́еши ю: Тогда́ уразуме́еши страх Госпо́день, и позна́ние Бо́жие обря́щеши. Я́ко Госпо́дь дае́т прему́дрость, и от лица́ Его́ позна́ние и ра́зум. И сокро́виществует исправля́ющим спасе́ние, защища́ет же ше́ствие их, е́же сохрани́ти пути́ оправда́ний: и путь благогове́инствующих Его́ сохрани́т. Тогда́ уразуме́еши пра́вду и суд, и испра́виши вся стези́ благи́я. А́ще бо прии́дет прему́дрость в твою́ мысль, чу́вство же твое́й ду́ши добро́ бы́ти возмни́тся: Сове́т добр сохрани́т тя, помышле́ние же преподо́бное соблюде́т тя: Да изба́вит тя от пути́ зла́го, и от му́жа глаго́люща ничто́же ве́рно. О оста́вившии пути́ пра́выя, е́же ходи́ти в путе́х тьмы! О веселя́щиися о злых, и ра́дующиися о развраще́нии злем! И́хже стези́ стро́потни, и кри́ва тече́ния их: е́же дале́че тя сотвори́ти от пути́ пра́ваго, И чу́жда от пра́веднаго ра́зума. Сы́не, да тя не пости́гнет сове́т злый, оставля́ющий уче́ние ю́ности, и заве́та Боже́ственнаго забы́вший. Поста́ви бо при сме́рти дом свой, и при а́де с земны́ми дея́ния своя́. Вси ходя́щии по нему́ не возвратя́тся, ниже́ пости́гнут стезь пра́вых: ни бо дости́гнут лет жи́зни. А́ще бо бы́ша ходи́ли в стези́ благи́я, обрели́ у́бо бы́ша стези́ пра́вы гла́дки: бла́зи бу́дут жи́тели на земли́, незло́бивии же оста́нут на ней. Я́ко пра́вии вселя́тся на земли́, и преподо́бнии оста́нут на ней. Путие́ нечести́вых от земли́ поги́бнут, пребеззако́ннии же изри́нутся от нея́.

И по исполнении паремий, глаголет священник: Мир ти: И диакон: Прему́дрость. Чтец: Да испра́вится моли́тва моя́: Тогда праваго и леваго клиросов, и предстоящий народ, обе страны во всей церкви стоят на коленах молящеся. И по пении чтеца, первый лик поет тожде: Да испра́вится моли́тва моя́: И чтец, и другая страна лика, и предстоящий народ, стоят на коленах, дондеже пропоют. Таже чтец поет 1 стих: Го́споди воззва́х к Тебе́, услы́ши мя: И по пропетии стиха, поет вторый лик: Да испра́вится моли́тва моя́: Тогда чтец, и первый лик, и тоя страны предстоящий народ, припадают на колена. Таже чтец поет вторый стих: Положи Го́споди хранение: И первый лик паки поет: Да испра́вится моли́тва моя́: И чтец, и вторый лик, и предстоящий народ паки приклоняют колена. И паки чтец поет третий стих: Не уклони́ се́рдце мое́: И вторый лик поет: Да испра́вится моли́тва моя́: И приклоняет колена чтец, и первый лик, и народ. И паки чтец поет: Да испра́вится моли́тва моя́, я́ко кади́ло пред Тобо́ю: И тогда оба лика, и в церкви предстоящий весь народ, припадают на колена, и стоят, дондеже чтец поет, и воставше допевают на клиросе: Воздея́ние руку́ мое́ю же́ртва вече́рняя. И по исполнении творим поклоны 3.

Аще праздник Обретения честныя главы, или святых 40 мучеников, тогда по скончании, Да испра́вится моли́тва моя́: абие святым вратом отверзстым, поем прокимен, Апостол, Аллилуия, Ева́нгелие, и прочее по обычаю: Кроме же праздника, по Да испра́вится: диакон ектению, и священник молитвы прилежныя. Мы же творим поклоны 3. И прочее бывает последование преждеосвященных, по чину якоже в служебниках изъявися.

Ведати подобает: яко по происхождении Святых Даров исполняему, Ны́не си́лы небе́сныя: творим поклоны 3, непокровени суще.

Вестно же буди: яко егда Божественныя преносятся Тайны, вси людие поклонение богоподобное, и певцы ниц падше, Христу Богу в тайнах Сущему, творят: понеже совершенно предосвященны суть.

Киноник: Вкуси́те и ви́дите, я́ко благ Госпо́дь. Аллилу́ия, трижды. По отверзении же врат, речет диакон: Со стра́хом Бо́жиим, и ве́рою приступи́те. Мы же поклон един: И поем, Благословлю́ Го́спода на вся́кое вре́мя, хвала́ Его́ во усте́х мои́х: Аллилу́ия, трижды. По возглашении же от иерея, Всегда́, ны́не и при́сно: Лик: Да испо́лнятся уста́ на́ша: Аллилу́ия, трижды. По заамвонной же молитве: Бу́ди и́мя Госпо́дне: И метания три. Благословлю́ Го́спода на вся́кое вре́мя: И подается нам антидор. И совершенный отпуст.

Сие последование бывает во всю Четыредесятницу, преждесвященней сущей. А идеже несть преждесвященныя, поются на Вечерни стихиры на 6: подобен в Триоди, и в Минеи. Сла́ва, и ны́не, Богородичен, по гласу Минеи. На стиховне, в Триоди самогласен дне дважды: и мученичен, иже есть на Го́споди воззва́х: Сла́ва, и ны́не, Богородичен, тогоже гласа. И обычное кончание. Входяще же в трапезу, ядим сухоядение, пием и сок с медом. В четверток же тоя седмицы трапезы не представляем, но бываем постящеся даже до пятка: тогда бо ядим входяще в трапезу.

В СРЕДУ 1-Я СЕДМИЦЫ, НА ПОВЕЧЕРИИ.

Начало якоже в мимошедших днех, и поем настоящий Великий канон преподобнаго отца нашего Андрея Критскаго, Иерусалимскаго. Творим же на коемждо тропаре метания три глаголюще и стих: Поми́луй мя Бо́же, поми́луй мя.

Песнь 1. Глас 6.

Ирмосы по дважды: Помо́щник и покрови́тель бысть мне во спасе́ние, / Сей мой Бог, и просла́влю Его́, / Бог отца́ моего́, и вознесу́ Его́: / сла́вно бо просла́вися.

Стих: Поми́луй мя, Бо́же, поми́луй мя.

От ю́ности Христе́, за́поведи Твоя́ преступи́х, / всестра́стно небреги́й, / уны́нием преидо́х житие́. / Те́мже зову́ Ти Спа́се: / поне́ на коне́ц спаси́ мя.

Пове́ржена мя Спа́се, пред враты́ Твои́ми, / поне́ на ста́рость не отри́ни мене́ во ад тща, / но пре́жде конца́, я́ко Человеколю́бец, / даждь ми прегреше́ний оставле́ние.

Бога́тство мое́ Спа́се, изнури́в в блуде́, / пуст есмь плодо́в благочести́вых, / а́лчен же зову́: / О́тче щедро́т, предвари́в / Ты мя уще́дри.

В разбо́йники впады́й аз есмь, / помышле́ньми мои́ми, / весь от них уязви́хся ны́не, и испо́лнихся ран, / но Сам ми предста́в, / Христе́ Спа́се исцели́.

Свяще́нник мя предви́дев ми́мо и́де, / и леви́т ви́дя в лю́тых на́га презре́, / но из Мари́и возсия́вый Иису́се, / Ты предста́в уще́дри мя.

Преподо́бная ма́ти Мари́е, моли́ Бо́га о нас.

Преподобныя: Ты ми даждь светоза́рную благода́ть / от Боже́ственнаго свы́ше промышле́ния, / избежа́ти страсте́й омраче́ния, / и пе́ти усе́рдно, твоего́ Мари́е жития́, / кра́сная исправле́ния.

Слава, Троичен: Пресу́щная Тро́ице, / во Еди́нице покланя́емая, / возми́ бре́мя от мене́ тя́жкое грехо́вное, / и я́ко благоутро́бна / даждь ми сле́зы умиле́ния.

Богородичен: Богоро́дице, наде́жде и предста́тельство Тебе́ пою́щих, / возми́ бре́мя от мене́ тя́жкое грехо́вное, / и я́ко Влады́чица Чи́стая, / ка́ющася приими́ мя.

Песнь 2.

Ирмос: Вонми́, не́бо, и возглаго́лю, / и воспою́ Христа́, / от Де́вы пло́тию прише́дшаго. (Дважды)

Поползо́хся я́ко Дави́д блу́дно, и оскверни́хся, / но омы́й и мене́ Спа́се, слеза́ми.

Ни слез, ниже́ покая́ния и́мам, ниже́ умиле́ния: / Сам ми сия́ Спа́се, / я́ко Бог да́руй.

Погуби́х первозда́нную добро́ту / и благоле́пие мое́, / и ны́не лежу́ наг, и стыжду́ся.

Дверь Твою́ не затвори́ мне тогда́, / Го́споди, Го́споди, / но отве́рзи ми сию́ / ка́ющемуся Тебе́.

Внуши́ воздыха́ния души́ моея́, / и о́чию мое́ю приими́ ка́пли Спа́се, / и спаси́ мя.

Человеколю́бче хотя́й всем спасти́ся, / Ты воззови́ мя, / и приими́ я́ко Благ ка́ющагося.

Пресвята́я Богоро́дице, спаси́ нас.

Богородичен: Пречи́стая Богоро́дице Де́во, / еди́на Всепе́тая, / моли́ приле́жно, во е́же спасти́ся нам.

Ирмос: Ви́дите, ви́дите, я́ко Аз есмь Бог, / ма́нну одожди́вый / и во́ду из ка́мене источи́вый / дре́вле в пусты́ни лю́дем Мои́м, / десни́цею еди́ною и кре́постию Мое́ю.

Ви́дите ви́дите, я́ко Аз есмь Бог: / внуша́й душе́ моя́ Го́спода вопию́ща, / и удали́ся пре́жняго греха́, / и бо́йся я́ко неумы́тнаго, / и я́ко Судии́ и Бо́га.

Кому́ уподо́билася еси́ многогре́шная душе́, / то́кмо пе́рвому Ка́ину, и Ламе́ху о́ному, / каменова́вшая те́ло злоде́йствы, / и уби́вшая ум безслове́сными стремле́ньми.

Вся пре́жде зако́на прете́кши, о душе́! / Си́фу не уподо́билася еси́, / ни Ено́са подража́ла еси́, / ни Ено́ха преложе́нием, ни Но́я, / но яви́лася еси́ убо́га пра́ведных жи́зни.

Еди́на отве́рзла еси́ хля́би гне́ва, / Бо́га твоего́, душе́ моя́, / и потопи́ла еси́ всю, я́коже зе́млю плоть, и дея́ния и житие́, / и пребыла́ еси́ вне спаси́тельнаго ковче́га.

Преподо́бная ма́ти Мари́е, моли́ Бо́га о нас.

Преподобныя: Всем усе́рдием и любо́вию / притекла́ еси́ Христу́, / пе́рвый греха́ путь отвра́щши, / и в пусты́нях непроходи́мых пита́ющися, / и Того́ чи́сте соверша́ющи Боже́ственныя за́поведи.

Слава, Троичен: Безнача́льная, несозда́нная Тро́ице, / неразде́льная Еди́нице, / ка́ющася мя приими́, / согреши́вша спаси́, / Твое́ есмь созда́ние, не пре́зри, / но пощади́ и изба́ви / о́гненнаго мя осужде́ния.

Богородичен: Пречи́стая Влады́чице, Богороди́тельнице, / наде́ждо к Тебе́ притека́ющих, / и приста́нище су́щих в бу́ри, / Ми́лостиваго и Созда́теля и Сы́на Твоего́ / уми́лостиви и мне / моли́твами Твои́ми.

Песнь 3.

Ирмос: Утверди́, Го́споди, на ка́мени за́поведей Твои́х / подви́гшееся се́рдце мое́, / я́ко Еди́н Свят еси́ и Госпо́дь. (Дважды)

Благослове́ния Си́мова не насле́довала еси́ душе́ окая́нная, / ни простра́нное одержа́ние, / я́коже Иа́фет име́ла еси́ на земли́ оставле́ния.

От земли́ Харра́н, / изы́ди от греха́ душе́ моя́, / гряди́ в зе́млю точа́щую присноживо́тное нетле́ние, / е́же Авраа́м насле́дствова.

Авраа́ма слы́шала еси́ душе́ моя́, / дре́вле оста́вльша зе́млю оте́чества, / и бы́вша прише́льца, / сего́ произволе́нию подража́й.

У ду́ба Мамври́йскаго / учреди́в патриа́рх а́нгелы, / насле́дствова по ста́рости / обетова́ния лови́тву.

Исаа́ка окая́нная душе́ моя́, / разуме́вши но́вую же́ртву, / та́йно всесожже́нную Го́сподеви, / подража́й его́ произволе́нию.

Исма́ила слы́шала еси́, трезви́ся душе́ моя́, / изгна́на я́ко рабы́нино отрожде́ние, / виждь, да не ка́ко подо́бно что / постра́ждеши ласкосе́рдствующи.

Преподо́бная ма́ти Мари́е, моли́ Бо́га о нас.

Марии: Содержи́мь есмь бу́рею, и треволне́нием согреше́ний, / но сама́ мя ма́ти ны́не спаси́, / и к приста́нищу Боже́ственнаго покая́ния возведи́.

Преподо́бная ма́ти Мари́е, моли́ Бо́га о нас.

Марии: Ра́бское моле́ние и ны́не преподо́бная / прине́сши ко благоутро́бней моли́твами твои́ми Богоро́дице, / отве́рзи ми Боже́ственныя вхо́ды.

Слава, Троичен: Тро́ице про́стая, несозда́нная, / безнача́льное Естество́, / в Тро́ице пева́емая Ипоста́сей, / спаси́ ны ве́рою покланя́ющияся / держа́ве Твое́й.

Богородичен: От Отца́ безле́тна Сы́на, / в ле́то Богороди́тельнице / неискусому́жно родила́ еси́, / стра́нное чу́до, / пребы́вши Де́ва доя́щи.

Песнь 4.

Ирмос: Услы́ша проро́к / прише́ствие Твое́, Го́споди, и убоя́ся, / я́ко хо́щеши от Де́вы роди́тися / и челове́ком яви́тися, и глаго́лаше: / услы́шах слух Твой и убоя́хся, / сла́ва си́ле Твое́й, Го́споди. (Дважды)

Те́ло оскверни́ся, дух окаля́ся, / весь острупи́хся, / но я́ко врач Христе́, / обоя́ покая́нием мои́м уврачу́й, / омы́й, очи́сти, / покажи́ Спа́се мой, / па́че сне́га чисте́йша.

Те́ло Твое́ и кровь распина́емый о всех / положи́л еси́ Сло́ве: / те́ло у́бо, да мя обнови́ши: / кровь, да омы́еши мя: / дух же пре́дал еси́, / да мя приведе́ши Христе́, / Твоему́ Роди́телю.

Соде́лал еси́ спасе́ние / посреде́ земли́ Ще́дре, / да спасе́мся. / Во́лею на Дре́ве распя́лся еси́. / Еде́м затворе́нный отве́рзеся, / го́рняя и до́льняя тварь, / язы́цы вси спасе́ни / покланя́ются Тебе́.

Да бу́дет ми купе́ль, / кровь из ребр Твои́х, / вку́пе и питие́, / источи́вшее во́ду оставле́ния, / да обою́ду очища́юся, / помазу́яся и пия́: / я́ко пома́зание и питие́ Сло́ве, / живото́чная Твоя́ словеса́.

Ча́шу Це́рковь стяжа́, / ре́бра Твоя́ живоно́сная, / из ни́хже сугу́быя нам источи́ то́ки, / оставле́ния и ра́зума, / во о́браз дре́вняго и но́ваго / двои́х вку́пе заве́тов, Спа́се наш.

Наг есмь черто́га, / наг есмь и бра́ка, ку́пно и ве́чери: / свети́льник угасе́, я́ко безъеле́йный, / черто́г заключи́ся мне спя́щу, / ве́черя снеде́ся: / аз же по руку́ и но́гу свя́зан, / вон низве́ржен есмь.

Слава, Троичен: Неразде́льное Существо́м, / несли́тное Ли́цы, / богосло́влю Тя, Тро́ическое Еди́но Божество́, / я́ко единоца́рственное и сопресто́льное, / вопию́ Ти песнь вели́кую, / в вы́шних трегу́бо песносло́вимую.

Богородичен: И ражда́еши, и де́вствуеши, / и пребыва́еши обою́ду естество́м Де́ва, / Рожде́йся обновля́ет зако́ны естества́, / утро́ба же ражда́ет неражда́ющая. / Бог иде́же хо́щет, побежда́ется естества́ чин, / твори́т бо, ели́ка хо́щет.

Песнь 5.

Ирмос: От нощи́ у́тренююща, / Человеколю́бче, просвети́, молю́ся, / и наста́ви и мене́ на повеле́ния Твоя́, / и научи́ мя, Спа́се, / твори́ти во́лю Твою́. (Дважды)

Я́ко тя́жкий нра́вом, / фарао́ну го́рькому бых Влады́ко, / Ианни́, и Иамври́, душе́ю и те́лом, / и погруже́н умо́м, но помози́ ми.

Ка́лом смеси́хся окая́нный умо́м, / омы́й мя Влады́ко, ба́нею мои́х слез, / молю́ Тя, пло́ти моея́ оде́жду / убели́в я́ко снег.

А́ще испыта́ю моя́ дела́ Спа́се, / вся́каго челове́ка превозше́дша греха́ми себе́ зрю, / я́ко ра́зумом му́дрствуяй согреши́х, / не неве́дением.

Пощади́ пощади́ Го́споди, созда́ние Твое́, / согреши́х, осла́би ми, / я́ко естество́м чи́стый Сам сый еди́н, / и ин ра́зве Тебе́ / никто́же есть кроме́ скве́рны.

Мене́ ра́ди Бог сый, / вообрази́лся еси́ в мя, / показа́л еси́ чудеса́, исцели́в прокаже́нныя, / и разсла́бленнаго стягну́в, / кровоточи́выя ток уста́вил еси́ Спа́се, / прикоснове́нием риз.

Преподо́бная ма́ти Мари́е, моли́ Бо́га о нас.

Преподобныя: Струи́ Иорда́нския преше́дши, / обрела́ еси́ поко́й безболе́зненный, / пло́ти сла́сти избежа́вши, / ея́же и нас изми́ / твои́ми моли́твами преподо́бная.

Слава, Троичен: Тя Тро́ице сла́вим, Еди́наго Бо́га, / Свят, Свят, Свят еси́ / О́тче, Сы́не, и Ду́ше, / про́стое Существо́, / Еди́нице при́сно покланя́емая.

Богородичен: Из Тебе́ облече́ся в мое́ смеше́ние, / нетле́нная безму́жная Ма́ти Де́во, / Бог созда́вый ве́ки, / и соедини́ Себе́ челове́ческое естество́.

Песнь 6.

Ирмос: Возопи́х всем се́рдцем мои́м / к ще́дрому Бо́гу, / и услы́ша мя от а́да преиспо́дняго, / и возведе́ от тли живо́т мой. (Дважды)

Воста́ни и побори́, / я́ко Иису́с Амали́ка, плотски́я стра́сти, / и гаваони́ты, ле́стныя по́мыслы / при́сно побежда́ющи.

Преиди́ вре́мене теку́щее естество́, / я́ко пре́жде ковче́г, / и земли́ о́ныя бу́ди во одержа́нии обетова́ния душе́, / Бог повелева́ет.

Я́ко спасл еси́ Петра́, возопи́вша / спаси́, предвари́в мя Спа́се / от зве́ря изба́ви, просте́р Твою́ ру́ку, / и возведи́ из глубины́ грехо́вныя.

Приста́нище Тя вем ути́шное, / Влады́ко, Влады́ко Христе́, / но от незаходи́мых глуби́н греха́, и отча́яния / мя предвари́в изба́ви.

Слава, Троичен: Тро́ице есмь про́ста, неразде́льна, / разде́льна Ли́чне, / и Еди́ница есмь Естество́м соедине́на, / Оте́ц глаго́лет, и Сын, и Боже́ственный Дух.

Богородичен: Утро́ба Твоя́ Бо́га нам роди́, / воображе́на по нам: / Его́же, я́ко Созда́теля всех, моли́ Богоро́дице, / да моли́твами Твои́ми оправди́мся.

Таже: Го́споди, поми́луй. (Трижды.) Сла́ва, и ны́не:

Кондак:

Душе́ моя́, душе́ моя́, воста́ни, что спи́ши? / Коне́ц приближа́ется, и и́маши смути́тися. / Воспряни́ у́бо, да пощади́т тя Христо́с Бог, / везде́ сый и вся́ исполня́яй.

Песнь 7.

Ирмос: Согреши́хом, беззако́нновахом, / непра́вдовахом пред Тобо́ю, / ниже́ соблюдо́хом, ниже́ сотвори́хом, / я́коже запове́дал еси́ нам; / но не преда́ждь нас до конца́, / отце́в Бо́же. (Дважды)

Манасси́ева собрала́ еси́ согреше́ния изволе́нием, / поста́вльши я́ко ме́рзости стра́сти, / и умно́живши душе́ негодова́ние, / но того́ покая́нию ревну́ющи те́пле, / стяжи́ умиле́ние.

Ахаа́вовым поревнова́ла еси́ / скве́рнам, душе́ моя́, увы мне, / была́ еси́ плотски́х скверн пребыва́лище, / и сосу́д сра́млен страсте́й, / но из глубины́ твоея́ воздохни́, / и глаго́ли Бо́гу грехи́ твоя́.

Заключи́ся тебе́ не́бо душе́, / и глад Бо́жий пости́же тя: / егда́ Илии́ Фесви́тянина я́коже Ахаа́в, / не покори́ся словесе́м иногда́, / но Сара́ффии уподо́бився, / напита́й проро́чу ду́шу.

Попали́ Илия́ иногда́ два́щи / пятьдеся́т Иезаве́линых, / егда́ сту́дныя проро́ки погуби́, / во обличе́ние Ахаа́вово, / но бе́гай подража́ния двою́ душе́, / и укрепля́йся.

Слава, Троичен: Тро́ице про́стая, неразде́льная, / единосу́щная, и Естество́ еди́но, / Све́тове и Свет, и Свя́та три: и еди́но Свя́то / пое́тся Бог Тро́ица. / Но воспо́й, просла́ви Живо́т и Животы́, душе́ / всех Бо́га.

Богородичен: Пое́м Тя, благослови́м Тя, / покланя́емся Ти Богороди́тельнице, / я́ко неразде́льныя Тро́ицы, / породила́ еси́ еди́наго Христа́ Бо́га, / и Сама́ отве́рзла еси́ нам / су́щим на земли́ небе́сная.

Песнь 8.

Ирмос: Его́же во́инства Небе́сная сла́вят, / и трепе́щут Херуви́ми и Серафи́ми, / вся́ко дыха́ние и тварь, / по́йте, благослови́те / и превозноси́те во вся ве́ки. (Дважды)

Правосу́де Спа́се поми́луй, / и изба́ви мя огня́, и преще́ния, / е́же и́мам на суде́ пра́ведно претерпе́ти: / осла́би ми пре́жде конца́, / доброде́телию и покая́нием.

Я́ко разбо́йник вопию́ Ти: помяни́ мя. / Я́ко Петр пла́чу го́рце: / осла́би ми Спа́се. Зову́ я́ко мыта́рь: / слезю́ я́ко блудни́ца. / Приими́ мое́ рыда́ние, / я́коже иногда́ ханане́ино.

Гное́ние, Спа́се, исцели́ / смире́нныя моея́ души́: еди́не Врачу́, / пла́стырь мне наложи́, и еле́й и вино́, дела́ покая́ния, / умиле́ние со слеза́ми.

Ханане́ю и аз подража́я, / поми́луй мя, вопию́, Сы́не Дави́дов: / каса́юся кра́я ри́зы, я́ко кровоточи́вая: / пла́чу, я́ко Ма́рфа и Мари́я над Ла́зарем.

Слава, Троичен: Безнача́льне О́тче, Сы́не собезнача́льне, / Уте́шителю Благи́й, Ду́ше Пра́вый: / Сло́ва Бо́жия Роди́телю, / Отца́ безнача́льна Сло́ве, / Ду́ше живы́й и зи́ждяй, / Тро́ице Еди́нице поми́луй мя.

Богородичен: Я́ко от оброще́ния червлени́цы Пречи́стая, / у́мная багряни́ца Емману́илева, / внутрь во чре́ве Твое́м плоть истка́ся, / те́мже Богоро́дицу / вои́стинну Тя почита́ем.

Песнь 9.

Ирмос: Безсе́меннаго зача́тия Рождество́ несказа́нное, / Ма́тере безму́жныя нетле́нен Плод, / Бо́жие бо рожде́ние обновля́ет естества́. / Те́мже Тя вси ро́ди, / я́ко Богоневе́стную Ма́терь, / правосла́вно велича́ем. (Дважды)

Неду́ги исцеля́я, / ни́щим благовествова́ше, Христо́с Сло́во, / вре́дныя уврачева́, с мытари́ ядя́ше, / со гре́шники бесе́доваше, / Иаи́ровы дще́ре ду́шу предуме́ршую / возврати́ осяза́нием руки́.

Мыта́рь спаса́шеся, и блудни́ца целому́дрствоваше, / и фарисе́й хваля́ся осужда́шеся: / ов у́бо, очи́сти мя: / о́ва же, поми́луй мя. / Сей же велича́шеся вопия́: Бо́же, благодарю́ Тя: / и про́чия безу́мныя глаго́лы.

Закхе́й мыта́рь бе, но оба́че спаса́шеся, / и фарисе́й Си́мон соблажня́шеся, / и блудни́ца приима́ше оста́вительная разреше́ния, / от Иму́щаго кре́пость оставля́ти грехи́: / ю́же душе́ потщи́ся подража́ти.

Блудни́це, о окая́нная душе́ моя́, / не поревнова́ла еси́, / я́же прии́мши ми́ра алава́стр, / со слеза́ми ма́заше но́зе Спа́сове, / отре́ же власы́ / дре́вних согреше́ний рукописа́ние раздира́ющаго ея́.

Гра́ды, и́мже даде́ Христо́с благове́стие, / душе́ моя́, уве́дала еси́, ка́ко про́кляти бы́ша. / Убо́йся указа́ния, да не бу́деши я́коже о́ны, / и́хже Содо́мляном Влады́ко уподо́бив, / да́же до а́да осуди́.

Да не го́ршая о душе́ моя́, / яви́шися отча́янием, ханане́и / ве́ру слы́шавшая, / ея́же дщи сло́вом Бо́жиим исцели́ся. / Сы́не Дави́дов, спаси́ и мене́, / воззови́ из глубины́ се́рдца, / я́коже она́ Христу́.

Слава, Троичен: Отца́ просла́вим, Сы́на превознесе́м, / Боже́ственному Ду́ху ве́рно поклони́мся, / Тро́ице неразде́льней Еди́нице по Существу́, / я́ко Све́ту и Све́том, и Животу́ и Живото́м, / животворя́щему, и просвеща́ющему концы́.

Богородичен: Град Твой сохраня́й / Богороди́тельнице Пречи́стая, / в Тебе́ бо сей ве́рно ца́рствуяй, / в Тебе́ и утвержда́ется, / и Тобо́ю побежда́яй, / побежда́ет вся́кое искуше́ние, / и пленя́ет ра́тники, / и прохо́дит послуша́ние.

Преподо́бне о́тче Андре́е, моли́ Бо́га о нас.

Андрею: Андре́е честны́й, и о́тче треблаже́ннейший, / па́стырю Кри́тский, / не преста́й моля́ся, о воспева́ющих тя, / да изба́вимся вси гне́ва, и ско́рби, и тле́ния, / и прегреше́ний безме́рных, / чту́щии твою́ па́мять ве́рно.

Таже поем оба лика: Безсе́меннаго зача́тия Рождество́ несказа́нное, / Ма́тере безму́жныя нетле́нен Плод, / Бо́жие бо рожде́ние обновля́ет естества́. / Те́мже Тя вси ро́ди, / я́ко Богоневе́стную Ма́терь, / правосла́вно велича́ем.

Подобне и прочее последование Повечерия.

В ЧЕТВЕРТОК ПЕРВЫЯ СЕДМИЦЫ, НА УТРЕНИ

По 1-м стихословии седальны апостольския, Осмогласника два, и Богородичен. Таже чтение.

По 2-м стихословии седален, глас 2. Подобен: Умудри́вый па́че:

Свети́ла в конце́х ученики́ / показа́вый пропове́данием, Сло́ве Бо́жий, / сердца́ на́ша просвети́ све́том доброде́телей, / и посто́м очи́сти, / дая́ покая́ние обраще́ния рабо́м Твои́м, / во е́же сла́вити Тя Спа́се, / еди́не сый Преблаги́й.

Слава, тойже.

И ныне, Богородичен, глас тойже: Богоро́дице не пре́зри мя / тре́бующаго заступле́ния Твоего́: / на Тя бо упова́ душа́ моя́, поми́луй мя.

По 3-м стихословии седален, глас 5. Подобен: Святе́йшая херуви́м:

Светле́йшее доброде́телей, / сожи́тельницу небе́сную / воздержа́ние, мо́лим тя, апо́стольская двоенадеся́тице, / моли́ся ми́рно нам соверши́ти, / и прия́ти плоды́ спасе́ния: / вы бо вои́стинну земны́м есте́ держа́ва, / и прибе́жище душа́м на́шим.

Слава, тойже.

И ныне, Богородичен, глас тойже: Святе́йшая херуви́м, / вы́шшая небе́с Всепе́тая Богоро́дице, / Тя вои́стинну испове́дающе / и́мамы гре́шнии спасе́ние, / и обрета́ем во искуше́ниих предста́тельство. / Те́мже не преста́й о нас моля́щи, / держа́во и прибе́жище душ на́ших.

Канон в Минеи. И трипеснец господина Иосифа. И стихословится песнь Псалтири. Глас 2.

Песнь 4.

Ирмос: Прише́л еси́ от Де́вы, не хода́тай, ни А́нгел, / но Сам, Го́споди, вопло́щься, / и спасл еси́ всего́ мя, челове́ка. / Тем зову́ Ти: / сла́ва си́ле Твое́й, Го́споди.

Воздержа́ния зари́ прие́млющи, облиста́йся душе́, / и отбе́гни грехо́внаго омраче́ния: / я́ко да возсия́ет ти оставле́ния свет, Боже́ственным Ду́хом.

У́дицею мя сла́сти прельсти́в льсти́вый, пле́нника восхи́ти, но / мир апо́столи сло́вом улови́вшии, / от того́ мя зло́бы изба́вите.

Яви́стеся со́лнца сла́вы заре́ния апо́столи сла́внии, / пре́лести тьму отгоня́ще: / и мене́ у́бо просвети́те, / вся́кою зло́бою омраче́ннаго.

Богородичен: Воззову́ в нощи́ и во дни оскорбля́емь к Тебе́, и спасу́ся, / и сла́сти прейду́, стено́ и по́моще, / Твое́ю Де́во си́лою огражда́емый.

Иный, господина Феодора. Глас 5.

Ирмос: Дела́ смотре́ния Твоего́, Го́споди:

Со́лнца пра́вды су́ще апо́столи, свети́ла всесве́тлая, / просвеща́ете земны́й мир, / мрак пре́лести отгоня́ще.

Ли́ра су́ще Спа́сова духодви́жимая апо́столи, позна́вшеся на земли́, / доброгла́сную поете́ нам песнь, / и мир к Бо́гу обраща́ете.

Слава, Троичен: Тро́ицу во еди́нственном Существе́ сла́вяще, / Еди́наго Го́спода Бо́га воспои́м, / нерожде́нна Отца́, Сы́на рожде́ннаго, и Ду́ха живу́щаго.

Богородичен: Де́ва зача́т во чре́ве Го́споди, / и роди́ Тебе́ Емману́ила: / изше́л бо еси́ во спасе́ние люде́й Твои́х, / спасти́ благи́я Твоя́ Человеколю́бче.

Сла́ва Тебе́ Бо́же наш, сла́ва Тебе́.

Апо́стольская двоенадеся́тице, боже́ственная и всечестна́я, / моли́ Христа́ о нас, мо́лимся, / прейти́ нам благомо́щно четыредесятодне́вное по́прище.

Ирмос: Дела́ смотре́ния Твоего́, Го́споди, / ужаси́ша проро́ка Авваку́ма, / изше́л бо еси́ на спасе́ние люде́й Твои́х, / спасти́ пома́занныя Твоя́ прише́л еси́.

Песнь 8.

Ирмос: Веле́нию мучи́телеву / преподо́бнии трие́ о́троцы не повину́вшеся, / в пещь вве́ржени, Бо́га испове́даху, пою́ще: / благослови́те, дела́ Госпо́дня, Го́спода.

Пости́мся от вся́кия сла́сти, / утучня́юще чу́вства посто́м, / и умиле́ния питие́ те́пле пие́м, пою́ще: / благослови́те дела́ Госпо́дня Го́спода.

Стоя́ния одесну́ю о́бщника мя бы́ти моли́теся, / егда́ ся́дете суди́ти челове́ком со Христо́м апо́столи, / мно́гим грехо́м и суду́ пови́ннаго.

На колесни́цу боже́ственных доброде́телей, / посто́м очи́стившеся взы́дем, / и на возду́шную высоту́ ум впери́м, пою́ще: / благослови́те дела́ Госпо́дня Го́спода.

Богородичен: Пребыла́ еси́ неопали́ма, / о́гнь ро́ждши Божества́ Де́во, / но попали́ стра́сти душ / ве́рою пою́щих Ти глас а́нгелов, / ра́дости еди́на хода́таице.

Иный.

Ирмос: Преподо́бнии Твои́ о́троцы:

Ду́ха трубы́ Христо́вы ученики́, / воспева́юще вопие́м: / благослови́те дела́ Госпо́дня Го́спода.

Я́ко моли́твенники ми́ра, / и пре́лести прогони́тели, / ученики́ пои́м Христо́вы, / благослови́те, вопию́ще, дела́ Госпо́дня Го́спода.

Благослови́м Отца́ и Сы́на, и Свята́го Ду́ха, Го́спода.

Троичен: Тро́ицу Всесвяту́ю, / во Отце́, и Сы́не, и Ду́се, / воспева́юще пое́м: / благослови́те дела́ Госпо́дня Го́спода.

И ны́не и при́сно, и во ве́ки веко́в, ами́нь.

Богородичен: Неизглаго́ланное Твое́ Рождество́ вси пое́м челове́цы, / благоче́стно взыва́юще Чи́стая: / благослови́те дела́ Госпо́дня Го́спода.

Сла́ва Тебе́ Бо́же наш, сла́ва Тебе́.

Апо́столи моли́теся, / в ми́ре нам очисти́тельныя дни сконча́ти, / благослови́те, вопию́щим, дела́ Госпо́дня Го́спода.

Хва́лим, благослови́м, покланя́емся Го́сподеви, пою́ще, и превознося́ще во вся ве́ки.

Ирмос: Преподо́бнии Твои́ о́троцы / в пещи́, Христе́, / воспева́юще, глаго́лаху: / благослови́те, вся дела́ Госпо́дня Го́спода.

Песнь 9.

Ирмос: Невмести́маго Бо́га / во чре́ве вмести́вшая, / и Ра́дость ми́ру роди́вшая, / Тя пое́м, Богоро́дице Де́во.

Отве́ржен в глубо́кую пучи́ну сласте́й, / Твоего́ благоутро́бия бе́здну призыва́ю, / Ко́рмчий, спаси́ мя.

Благоутро́бия исто́чниче, / даждь ми ны́не умиле́ние, воздыха́ние, / я́ко да воспла́чу злых мои́х безме́рная моря́.

Ученико́в Твои́х Иису́се честны́ми моле́нии / честно́му даждь ми Воскресе́нию поклони́тися, / и Боже́ственным Твои́м страсте́м.

Богородичен: Онебеси́вшая на́ше земно́е смеше́ние, / в Тебе́ Всенепоро́чная, Бо́жиим вселе́нием, / изба́ви вся от бед.

Иный.

Ирмос: Велича́ем, Христе́:

Из исто́чников проро́чески Спа́совых, / поче́рпше апо́столи во́ду безсме́ртия, / жа́ждущия преда́ниями жи́зни напая́ют всегда́.

Царя́ Небе́снаго я́вльшеся кня́зи апо́столи, / повину́сте вселе́нную всю, / Сего́ еди́наго чести́, / покланя́тися и славосло́вити я́ко Бо́га.

Слава, Троичен: Тро́ице неразде́льная, Еди́нице вседе́тельная и всеси́льная, / О́тче, Сы́не и Святы́й Ду́ше: / Ты Бог мой Госпо́дь, и Свет, / и Тебе́ воспева́я покланя́юся.

Богородичен: Тя Ма́ти и Де́во Чи́стая, ублажа́ем ро́ди родо́в, / я́ко была́ еси́ очисти́лище ми́ра, / Спа́са и Соде́теля неизглаго́ланно ро́ждши.

Сла́ва Тебе́ Бо́же наш, сла́ва Тебе́.

Апо́стольский ли́че, воспева́ющия тя спаса́й, / и сподо́би во умиле́нии се́рдца, / дни вся прейти́ светотво́рных посто́в.

Ирмос: Велича́ем, Христе́, / Твою́ Всенепоро́чную Ма́терь Чи́стую, / я́ко роди́ Тя преесте́ственно пло́тию, / от вся́кия льсти и тли нас избавля́юща.

Светилен гласа.

На стиховне самогласен дне, дважды, глас 3:

Го́споди, мне гре́шному положи́л еси́ покая́ние, / мене́ недосто́йнаго спасти́ хотя́ безме́рною ми́лостию Твое́ю. / К Тебе́ припа́даю моля́ся: / посто́м ду́шу мою́ приклони́, / я́ко к Тебе́ прибего́х / еди́ному Многоми́лостивому.

Мученичен: Я́ко свети́ла в ми́ре сия́ете, / и по сме́рти святи́и му́ченицы, / по́двигом до́брым подви́гшеся, / иму́ще дерзнове́ние, Христа́ моли́те, / поми́ловатися душа́м на́шим.

Слава, и ныне, Богородичен, глас тойже: Богоро́дице, предста́тельнице всех моля́щихся Тебе́, / Тобо́ю дерза́ем, и Тобо́ю хва́лимся, / и к Тебе́ все упова́ние на́ше есть: / моли́ Ро́ждшагося из Тебе́ / за непотре́бныя рабы́ Твоя́.

НА 6-М ЧАСЕ

Тропарь пророчества, глас 1:

Ви́димых и неви́димых враг изба́ви нас Го́споди, / да не когда́ реку́т язы́цы: / где есть Бог их? / Да разуме́ют Влады́ко, / я́ко презира́еши / грехи́ люде́й Твои́х ка́ющихся.

Сла́ва, и ны́не: и повторяем тойжде.

Прокимен, псалом 13, глас 1: Внегда́ возврати́т Госпо́дь / плене́ние люде́й Свои́х. Стих: Рече́ безу́мен в се́рдце свое́м: несть Бог.

Пророчества Исаиина чтение. [Глава 2, ст. 11 – 21.]

Вознесе́тся Госпо́дь еди́н в день о́ный. День бо Го́спода Савао́фа на вся́каго досади́теля, и гордели́ваго, и на вся́каго высо́каго и велича́ваго, и смиря́тся. И на всяк кедр Лива́нский высо́ких и превознесе́нных, и на вся́ко дре́во же́лудя Васа́нска; и на вся́кую го́ру высо́кую, и на вся́кий холм высо́кий; и на вся́кий столп высо́к, и на вся́кую сте́ну высо́кую; и на вся́кий кора́бль морски́й, и на вся́ко виде́ние добро́ты корабле́й. И смири́тся вся́кий челове́к, и паде́тся высота́ челове́ча, и вознесе́тся Госпо́дь еди́н в день оный. И рукотворе́нная вся скры́ют, Вне́сше в пеще́ры, и в разсе́лины ка́мений, и в верте́пы земны́я, от лица́ стра́ха Госпо́дня, и от сла́вы кре́пости Его́, егда́ воста́нет сокруши́ти зе́млю. В день бо о́ный изри́нет челове́к ме́рзости своя́ златы́я и сре́бряныя, я́же сотвори́ша, да покланя́ются су́етным и нетопыре́м. Е́же вни́ти в верте́пы тве́рдаго ка́мене, и в разсе́лины ка́мений от лица́ стра́ха Госпо́дня, и от сла́вы кре́пости Его́, егда́ воста́нет сокруши́ти зе́млю.

Прокимен, псалом 14, глас 4: Го́споди, кто обита́ет / в жили́щи Твое́м? Стих: Ходя́й без поро́ка, и де́лаяй пра́вду.

В ЧЕТВЕРТОК ВЕЧЕРА

Во светильничном обычное стихословие. На Го́споди воззва́х, стихиры подобны Триоди. Иосифа. Глас 2: Подобен: Просвети́теля на́шего:

Омраче́на мя пре́лестьми борца́, / Христе́ мой просвети́, / омрачи́вый на Кресте́ ви́сяй со́лнце иногда́, / и просвети́вый ве́рным свет и́стинный, оставле́ния я́ве, / я́ко да ходя́й во све́те Твои́х повеле́ний, дости́гну чи́сте / Воскресе́ния Твоего́ зарю́ спаси́тельную.

Подобен: Я́коже виногра́д на Дре́ве Спа́се ви́ся, / вино́м напои́л еси́ нетле́ния Христе́ концы́. / Те́мже вопию́: / пия́нством мя грехо́вным лю́те омрача́ема при́сно, / сла́достию умиле́ния и́стиннаго напои́в, / пости́тися мя ны́не от сласте́й укрепи́ Спа́се, / я́ко Благ и Человеколю́бец.

Ин подобен кир Феодора, глас тойже. Подобен: О вели́каго та́инства:

О Креста́ Твоего́ си́лы! / Сей процвете́ Це́ркви воздержа́ние, / во Еде́ме иногда́ Ада́мово невоздержа́ние из ко́рене исто́рг: / смерть у́бо о́ное принесе́ челове́ком, / но сей нетле́нно источа́ет безсме́ртие ми́ру, / я́коже из исто́чника ина́го ра́йскаго, / излия́нием Твоея́ живото́чныя кро́ве, вку́пе же и воды́: / отону́дуже вся оживотвори́шася. / И́мже нам по́стную пи́щу услади́ Бо́же Изра́илев, / име́яй ве́лию ми́лость.

И в Минеи 3. Слава и ныне, Крестобогородичен.

Прокимен, псалом 15, глас 4: Благословлю́ Го́спода / вразуми́вшаго мя. Стих: Сохрани́ мя Го́споди, я́ко на Тя упова́х.

Бытия чтение. [Глава 2, ст. 4 – 19.]

Сия́ кни́га бытия́ небесе́ и земли́, егда́ бысть, во́ньже день сотвори́ Госпо́дь Бог не́бо и зе́млю. И вся́кий злак се́льный, пре́жде да́же бы́ти на земли́, и вся́кую траву́ се́льную, пре́жде да́же прозя́бнути: не бо одожди́ Госпо́дь Бог на зе́млю, и челове́к не бя́ше де́лати ю. Исто́чник же исхожда́ше из земли́, и напая́ше все лице́ земли́. И созда́ Бог челове́ка, персть [взем] от земли́, и вду́ну в лице́ его́ дыха́ние жи́зни: и бысть челове́к в ду́шу жи́ву. И насади́ Госпо́дь Бог рай во Еде́ме на восто́цех, и введе́ та́мо челове́ка, его́же созда́. И прозябе́ Бог еще́ от земли́ вся́кое дре́во кра́сное в виде́ние, и до́брое в снедь: и дре́во жи́зни посреде́ рая́, и дре́во е́же ве́дети разуме́тельное до́браго и лука́ваго. Река́ же исхо́дит из Еде́ма, напая́ти рай: отту́ду разлуча́ется в четы́ри нача́ла. И́мя еди́ной Фисо́н: сия́ окружа́ющая всю зе́млю Евила́тскую: та́мо у́бо есть зла́то. Зла́то же о́ныя земли́ до́брое: и та́мо есть а́нфракс, и ка́мень зеле́ный. И и́мя реце́ второ́й Гео́н: сия́ окружа́ющая всю зе́млю Ефио́пскую. И река́ тре́тия, Тигр: сия́ проходя́щая пря́мо Ассири́ом. Река́ же четве́ртая Евфра́т. И взя Госпо́дь Бог челове́ка, его́же созда́, и введе́ его́ в рай сла́дости, де́лати его́ и храни́ти. И запове́да Госпо́дь Бог Ада́му, глаго́ля: от вся́каго дре́ва, е́же в раи́, сне́дию сне́си: от дре́ва же, е́же разуме́ти до́брое и лука́вое, не сне́сте от него́, а во́ньже а́ще день сне́сте от него́, сме́ртию у́мрете. И рече́ Госпо́дь Бог: не добро́ бы́ти челове́ку еди́ному: сотвори́м ему́ помо́щника по нему́. И созда́ Бог еще́ от земли́ вся зве́ри се́льныя, и вся пти́цы небе́сныя, и приведе́ я ко Ада́му, ви́дети, что нарече́т я: и вся́ко е́же а́ще нарече́ Ада́м ду́шу жи́ву, сие́ и́мя ему́.

Прокимен 2, псалом 16, глас 4: Сохрани́ мя Го́споди, / я́ко зе́ницу о́ка. Стих: Услы́ши Го́споди пра́вду мою́.

Притчей чтение. [Глава 3, ст. 1 – 18.]

Сы́не, мои́х зако́нов не забыва́й, глаго́лы же моя́ да соблюда́ет твое́ се́рдце. Долготу́ бо жития́, и ле́та жи́зни, и мир приложа́т тебе́. Ми́лостыни и ве́ра да не оскудева́ют тебе́: обложи́ же я на твое́й вы́и, и напиши́ я на скрижа́ли се́рдца твоего́: и обря́щеши благода́ть. И промышля́й до́брая пред Го́сподем [Бо́гом] и челове́ки. Бу́ди упова́я всем се́рдцем на Бо́га, о твое́й же прему́дрости не возноси́ся: Во всех путе́х твои́х познава́й ю, да исправля́ет пути́ твоя́. Не бу́ди мудр о себе́: бо́йся же Бо́га, и уклоня́йся от вся́каго зла. Тогда́ исцеле́ние бу́дет те́лу твоему́, и уврачева́ние косте́м твои́м. Чти Го́спода от пра́ведных твои́х трудо́в, и нача́тки дава́й Ему́ от твои́х плодо́в пра́вды. Да испо́лнятся жи́тницы твоя́ мно́жеством пшени́цы, вино́ же точи́ла твоя́ да источа́ют. Сы́не, не пренебрега́й наказа́ния Госпо́дня, ниже́ ослабева́й от Него́ облича́емый: его́же бо лю́бит Госпо́дь, наказу́ет, бие́т же вся́каго сы́на, его́же прие́млет. Блаже́н челове́к, и́же обре́те прему́дрость, и сме́ртен, и́же уве́де ра́зум. Лу́чше бо сию́ купова́ти, не́жели зла́та и сребра́ сокро́вища. Честне́йша же есть ка́мений многоце́нных: не сопротивля́ется ей ничто́же лука́во. Благозна́тна есть всем приближа́ющимся ей, вся́ко же честно́е недосто́йно ея́ есть. Долгота́ бо жития́ и ле́та жи́зни в десни́це ея́, в шу́йце же ея́ бога́тство и сла́ва: от уст ея́ исхо́дит пра́вда, зако́н же и ми́лость на язы́це но́сит. Путие́ ея́ путие́ добри́, и вся стези́ ея́ ми́рны. Дре́во живота́ есть всем держа́щимся ея́, и воскланя́ющимся на ню, я́ко на Го́спода, тверда́.

На стиховне самогласен дне, дважды, глас 4:

Жела́юще Боже́ственныя Па́схи причасти́тися, / не от Еги́пта, но из Сио́на гряду́щия, / грехо́вный квас оты́мем покая́нием: / препоя́шим чре́сла на́ша умерщвле́нием сласте́й: / украси́м но́ги сапогми́, / возбрани́тельными от вся́каго де́ла лука́ваго, / и утверди́мся па́лицею ве́ры: / не ревну́им враго́м Влады́чняго Креста́ боготворя́ще чре́во, / но после́дуим посто́м, / на диа́вола побе́ду нам показа́вшему, / Спа́су душ на́ших.

Мученичен: Прославля́емый в па́мятех святы́х Твои́х Христе́ Бо́же, / от них умоля́емь, / низпосли́ нам ве́лию ми́лость.

Слава, и ныне, Крестобогородичен, глас тойже. Подобен: Я́ко до́бля:

На Кресте́ Тя я́ко узре́ пригвожде́на Го́споди, / А́гница и Ма́ти Твоя́ дивля́шеся. / И что виде́ние, глаго́лаше, Сы́не возжеле́нне? / Сия́ Ти неве́рный собо́р воздае́т беззако́нный, / мно́гих Твои́х чуде́с наслади́выйся, / но сла́ва неизрече́нному / схожде́нию Твоему́ Влады́ко.

И прочее последование по обычаю.

В ЧЕТВЕРТОК ПЕРВЫЯ СЕДМИЦЫ НА ПОВЕЧЕРИИ

Поем настоящий Великий канон преподобнаго отца нашего Андрея Критскаго и Иерусалимскаго. Творим же на кийждо тропарь поклоны 3, глаголюще и стих: Поми́луй мя Бо́же, поми́луй мя.

Песнь 1. Глас 6.

Ирмос по дважды. Помо́щник и покрови́тель бысть мне во спасе́ние, / Сей мой Бог, и просла́влю Его́, / Бог отца́ моего́, и вознесу́ Его́: / сла́вно бо просла́вися.

Стих: Поми́луй мя, Бо́же, поми́луй мя.

А́гнче Бо́жий, взе́мляй грехи́ всех, / возми́ бре́мя от мене́ тя́жкое грехо́вное, / и я́ко благоутро́бен, / даждь ми сле́зы умиле́ния.

Тебе́ припа́даю Иису́се, / согреши́х Ти, очи́сти мя, / возми́ бре́мя от мене́ тя́жкое грехо́вное, / и я́ко благоутро́бен, / даждь ми сле́зы умиле́ния.

Не вни́ди со мно́ю в суд / нося́ моя́ дея́ния, / словеса́ изыску́я, и исправля́я стремле́ния, / но в щедро́тах Твои́х презира́я моя́ лю́тая, / спаси́ мя Всеси́льне.

Покая́ния вре́мя, / прихожду́ Ти Созда́телю моему́, / возми́ бре́мя от мене́ тя́жкое грехо́вное, / и я́ко благоутро́бен, / даждь ми сле́зы умиле́ния.

Бога́тство душе́вное ижди́в грехо́м, / пуст есмь доброде́телей благочести́вых, / гла́дствуя же зову́: / ми́лости пода́телю Го́споди, спаси́ мя.

Преподо́бная ма́ти Мари́е, моли́ Бо́га о нас.

Марии: Прикло́ньшися Христо́вым Боже́ственным зако́ном, / к Сему́ приступи́ла еси́, / сла́достей неудержи́мая стремле́ния оста́вивши, / и вся́кую доброде́тель всеблагогове́йно, / я́ко еди́ну испра́вила еси́.

Слава, Троичен: Пресу́щественная Тро́ице, / во Еди́нице покланя́емая, / возми́ бре́мя от мене́ тя́жкое грехо́вное, / и я́ко благоутро́бна, / даждь ми сле́зы умиле́ния.

Богородичен: Богоро́дице, наде́жде и предста́тельство Тебе́ пою́щих, / возми́ бре́мя от мене́ тя́жкое грехо́вное, / и я́ко Влады́чица Чи́стая, / ка́ющася приими́ мя.

Песнь 2.

Ирмос: Ви́дите, ви́дите, я́ко Аз есмь Бог, / ма́нну одожди́вый / и во́ду из ка́мене источи́вый / дре́вле в пусты́ни лю́дем Мои́м, / десни́цею еди́ною и кре́постию Мое́ю. (Дважды)

Му́жа уби́х, глаго́лет, / в я́зву мне, и ю́ношу в струп, / Ламе́х рыда́я вопия́ше, / ты же не трепе́щеши о душе́ моя́, / окаля́вши плоть, и ум оскверни́вши.

Столп умудри́ла еси́ созда́ти о душе́, / и утвержде́ние водрузи́ти твои́ми похотьми́, / а́ще не бы Зижди́тель удержа́л сове́ты твоя́, / и низве́ргл на зе́млю ухищре́ния твоя́.

О ка́ко поревнова́х Ламе́ху, пе́рвому уби́йце, / ду́шу я́ко му́жа, ум я́ко ю́ношу, / я́ко бра́та же моего́ те́ло уби́в, / я́ко Ка́ин уби́йца, любосла́стными стремле́ньми.

Одожди́ Госпо́дь / от Го́спода огнь иногда́, / на беззако́ние гне́вающее соже́г Содо́мляны: / ты же огнь вжегла́ еси́ гее́нский, / в не́мже и́маши, о душе́, сожещи́ся.

Уязви́хся, ура́нихся, / се стре́лы вра́жия уязви́вшия мою́ ду́шу и те́ло: / се стру́пи, гное́ния, омраче́ния, / вопию́т ра́ны самово́льных мои́х страсте́й.

Преподо́бная ма́ти Мари́е, моли́ Бо́га о нас.

Марии: Просте́рла еси́ ру́це твои́ / к ще́дрому Бо́гу, Мари́е, / в бе́здне зол погружа́емая: / и я́коже Петру́ человеколю́бно, / ру́ку Боже́ственную простре́, / твое́ обраще́ние вся́чески иски́й.

Слава, Троичен: Безнача́льная, несозда́нная Тро́ице, / неразде́льная Еди́нице, / ка́ющася мя приими́, / согреши́вша спаси́: / Твое́ есмь созда́ние, не пре́зри, / но пощади́, и изба́ви мя / о́гненнаго осужде́ния.

Богородичен: Пречи́стая Влады́чице Богороди́тельнице, / наде́ждо к Тебе́ притека́ющих, / и приста́нище су́щих в бу́ри, / Ми́лостиваго и Созда́теля, и Сы́на Твоего́, / уми́лостиви и мне / моли́твами Твои́ми.

Песнь 3.

Ирмос: Утверди́, Го́споди, на ка́мени за́поведей Твои́х / подви́гшееся се́рдце мое́, / я́ко Еди́н Свят еси́ и Госпо́дь. (Дважды)

Ага́ре дре́вле душе́, еги́птяныне уподо́билася еси́, / порабо́тившися произволе́нием, и ро́ждши / но́ваго Исма́ила, презо́рство.

Иа́ковлю ле́ствицу / разуме́ла еси́ душе́ моя́, / явля́емую от земли́ к небесе́м, / почто́ не име́ла еси́ / восхо́да тве́рда, благоче́стия?

Свяще́нника Бо́жия, и царя́ уедине́на, / Христо́во подо́бие, / в ми́ре жития́, в челове́цех подража́й.

Обрати́ся, постени́ душе́ окая́нная, / пре́жде да́же не прии́мет коне́ц жития́ торжество́: / пре́жде да́же дверь не заключи́т черто́га Госпо́дь.

Не бу́ди столп сла́ный душе́, / возврати́вшися вспять: / о́браз да устраши́т тя Содо́мский, / горе́ в Сиго́р спаса́йся.

Моле́ния Влады́ко, / Тебе́ пою́щих не отве́ржи, / но уще́дри Человеколю́бче, / и пода́ждь ве́рою прося́щим оставле́ние.

Слава, Троичен: Тро́ице про́стая, несозда́нная, / безнача́льное Естество́ / в Тро́ице пева́емая Ипоста́сей, / спаси́ ны ве́рою покланя́ющияся / держа́ве Твое́й.

Богородичен: От Отца́ безле́тно Сы́на, / в ле́то Богороди́тельнице, / неискусому́жно родила́ еси́: / стра́нное чу́до, / пребы́вши Де́ва доя́щи.

Песнь 4.

Ирмос: Услы́ша проро́к / прише́ствие Твое́, Го́споди, и убоя́ся, / я́ко хо́щеши от Де́вы роди́тися / и челове́ком яви́тися, и глаго́лаше: / услы́шах слух Твой и убоя́хся, / сла́ва си́ле Твое́й, Го́споди. (Дважды)

Вре́мя живота́ моего́ ма́ло, / и испо́лнено боле́зней и лука́вства, / но в покая́нии мя приими́, / и в ра́зум призови́, / да не бу́ду стяжа́ние, ни бра́шно чужде́му, / Спа́се, Сам мя уще́дри.

Ца́рским досто́инством, венце́м и багряни́цею оде́ян, / многоиме́нный челове́к и пра́ведный / бога́тством кипя́ и ста́ды, / внеза́пу бога́тства, сла́вы ца́рства / обнища́в лиши́ся.

А́ще пра́веден бя́ше он, и непоро́чен па́че всех, / и не убеже́ ловле́ния льсти́ваго и се́ти: / ты же грехолюби́ва су́щи окая́нная душе́, что сотвори́ши, / а́ще чесо́му о недове́домых / случи́тся наити́ тебе́?

Высокоглаго́лив ны́не есмь, / жесто́к же и се́рдцем, / вотще́ и всу́е, / да не с фарисе́ем осу́диши мя, / па́че же мытаре́во смире́ние пода́ждь ми / еди́не Ще́дре, Правосу́де, / и сему́ мя сочисли́.

Согреши́х, досади́в сосу́ду пло́ти моея́, / вем Ще́дре, / но в покая́нии мя приими́, / и в ра́зум призови́, / да не бу́ду стяжа́ние, ни бра́шно чужде́му, / Спа́се, Сам мя уще́дри.

Самоистука́н бых страстьми́, / ду́шу мою́ вредя́ Ще́дре, / но в покая́нии мя приими́, / и в ра́зум призови, / да не бу́ду стяжа́ние, ни бра́шно чужде́му, / Спа́се, Сам мя уще́дри.

Не послу́шах гла́са Твоего́, / преслу́шах писа́ние Твое́ законополо́жника, / но в покая́нии мя приими́, / и в ра́зум призови́, / да не бу́ду стяжа́ние, ни бра́шно чужде́му, / Спа́се, Сам мя уще́дри.

Преподо́бная ма́ти Мари́е, моли́ Бо́га о нас.

Марии: Вели́ких безме́стий во глубину́ низве́дшися, / неодержи́ма была́ еси́, / но востекла́ еси́ по́мыслом лу́чшим, / к кра́йней дея́ньми я́ве доброде́тели пресла́вно, / а́нгельское естество́ Мари́е, удиви́вши.

Слава, Троичен: Неразде́льное Существо́м, / несли́тное Ли́цы, / богосло́влю Тя Тро́ическое Еди́но Божество́, / я́ко единоца́рственное и сопресто́льное, / вопию́ Ти песнь вели́кую, / в вы́шних трегу́бо песносло́вимую.

Богородичен: И ражда́еши, и де́вствуеши, / и пребыва́еши обою́ду естество́м Де́ва: / Рожде́йся обновля́ет зако́ны естества́, / утро́ба же ражда́ет неражда́ющая. / Бог иде́же хо́щет, побежда́ется естества́ чин: / твори́т бо ели́ка хо́щет.

Песнь 5.

Ирмос: От нощи́ у́тренююща, / Человеколю́бче, просвети́, молю́ся, / и наста́ви и мене́ на повеле́ния Твоя́, / и научи́ мя, Спа́се, / твори́ти во́лю Твою́. (Дважды)

Ни́зу снича́щую подража́й о душе́, / прииди́, припади́ к нога́ма Иису́совыма, / да тя испра́вит, / и да хо́диши пра́во / стези́ Госпо́дни.

А́ще и кла́дязь еси́ глубо́кий Влады́ко, / источи́ ми во́ду из пречи́стых Твои́х жил, / да я́ко самаряны́ня, не ктому́ пия́й жа́жду: / жи́зни бо струи́ источа́еши.

Силоа́м да бу́дут ми / сле́зы моя́, Влады́ко Го́споди, / да умы́ю и аз зе́ницы се́рдца, / и ви́жду Тя у́мно, Све́та преве́чна.

Преподо́бная ма́ти Мари́е, моли́ Бо́га о нас.

Марии: Несравне́нным жела́нием всебога́тая, / Дре́ву возжеле́вши поклони́тися живо́тному, / сподо́билася еси́ жела́ния, / сподо́би у́бо и мене́ / улучи́ти вы́шния сла́вы.

Слава, Троичен: Тя Тро́ице сла́вим, Еди́наго Бо́га, / Свят, Свят, Свят еси́ / О́тче, Сы́не и Ду́ше, / про́стое Существо́, / Еди́нице при́сно покланя́емая.

Богородичен: Из Тебе́ облече́ся в мое́ смеше́ние, / нетле́нная безму́жная Ма́ти Де́во, / Бог созда́вый ве́ки, / и соедини́ Себе́ челове́ческое естество́.

Песнь 6.

Ирмос: Возопи́х всем се́рдцем мои́м / к ще́дрому Бо́гу, / и услы́ша мя от а́да преиспо́дняго, / и возведе́ от тли живо́т мой. (Дважды)

Аз есмь, Спа́се, / ю́же погуби́л еси́ дре́вле ца́рскую дра́хму, / но вжег свети́льник Предте́чу Твоего́ Сло́ве, / взыщи́ и обря́щи Твой о́браз.

Воста́ни и побори́, / я́ко Иису́с Амали́ка, плотски́я стра́сти, / и Гаваони́ты, ле́стныя по́мыслы, / при́сно побежда́ющи.

Преподо́бная ма́ти Мари́е, моли́ Бо́га о нас.

Марии: Да страсте́й пла́мень угаси́ши, / слез ка́пли источи́ла еси́ при́сно Мари́е, / душе́ю распаля́ема, / и́хже благода́ть пода́ждь и мне, / твоему́ рабу́.

Преподо́бная ма́ти Мари́е, моли́ Бо́га о нас.

Марии: Безстра́стие небе́сное стяжа́ла еси́, / кра́йним на земли́ житие́м ма́ти. / Те́мже тебе́ пою́щим, / страсте́й изба́витися / моли́твами твои́ми, моли́ся.

Слава, Троичен: Тро́ица есмь про́ста, неразде́льна, / разде́льна Ли́чне, / и Еди́ница есмь Естество́м соедине́на, / Оте́ц глаго́лет, и Сын, и Боже́ственный Дух.

Богородичен: Утро́ба Твоя́ Бо́га нам роди́, / воображе́нна по нам: / Его́же, я́ко Созда́теля всех, моли́ Богоро́дице, / да Твои́ми моли́твами оправди́мся.

Кондак, глас 6:

Душе́ моя́, душе́ моя́, воста́ни, что спи́ши? / Коне́ц приближа́ется, и и́маши смути́тися. / Воспряни́ у́бо, да пощади́т тя Христо́с Бог, / везде́ сый и вся́ исполня́яй.

Песнь 7.

Ирмос: Согреши́хом, беззако́нновахом, / непра́вдовахом пред Тобо́ю, / ниже́ соблюдо́хом, ниже́ сотвори́хом, / я́коже запове́дал еси́ нам; / но не преда́ждь нас до конца́, / отце́в Бо́же. (Дважды)

Исчезо́ша дни́и мои́, я́ко со́ние востаю́щаго: / те́мже я́ко Езеки́я слезю́ на ло́жи мое́м, / приложи́тися мне ле́том живота́. / Но кий Иса́ия предста́нет тебе́ душе́, / а́ще не всех Бог?

Припа́даю Ти, / и приношу́ Тебе́, я́коже сле́зы глаго́лы моя́: / согреши́х, я́ко не согреши́ блудни́ца, / и безако́нновах, я́ко и́ный никто́же на земли́, / но уще́дри Влады́ко, творе́ние Твое́, / и воззови́ мя.

Погребо́х о́браз Твой, / и растли́х за́поведь Твою́, / вся помрачи́ся добро́та, / и страстьми́ угаси́ся, Спа́се, свеща́, / но уще́дрив возда́ждь ми / я́коже пое́т Дави́д, ра́дование.

Обрати́ся, пока́йся, откры́й сокрове́нная, / глаго́ли Бо́гу вся ве́дущему: / Ты ве́си моя́ та́йная, еди́не Спа́се, / но Сам мя поми́луй, я́коже пое́т Дави́д / по ми́лости Твое́й.

Преподо́бная ма́ти Мари́е, моли́ Бо́га о нас.

Марии: Возопи́вши к Пречи́стей Богома́тери, / пе́рвее отри́нула еси́ неи́стовство страсте́й, / ну́жно стужа́ющих, / и посрами́ла еси́ врага́ запе́ншаго, / но даждь ны́не по́мощь от ско́рби, / и мне, рабу́ твоему́.

Преподо́бная ма́ти Мари́е, моли́ Бо́га о нас.

Марии: Его́же возлюби́ла еси́, Его́же возжеле́ла еси́, / Его́же ра́ди плоть изнури́ла еси́ преподо́бная, / моли́ ны́не Христа́ о рабе́х: / я́ко да ми́лостив быв всем нам, / ми́рное состоя́ние да́рует / почита́ющим Его́.

Слава, Троичен: Тро́ице про́стая, неразде́льная, / единосу́щная, и Естество́ еди́но, / Све́тове и Свет, и Свя́та три, и Еди́но Свя́то / пое́тся Бог Тро́ица, / но воспо́й, просла́ви, Живо́т и Животы́, душе́, / всех Бо́га.

Богородичен: Пое́м Тя, благослови́м Тя, / покланя́емся Ти Богороди́тельнице, / я́ко неразлу́чныя Тро́ицы породила́ еси́ еди́наго Христа́ Бо́га, / и Сама́ отве́рзла еси́ нам / су́щим на земли́ небе́сная.

Песнь 8.

Ирмос: Его́же во́инства Небе́сная сла́вят, / и трепе́щут Херуви́ми и Серафи́ми, / вся́ко дыха́ние и тварь, / по́йте, благослови́те / и превозноси́те во вся ве́ки. (Дважды)

Сле́зную Спа́се сткля́ницу, / я́ко ми́ро истощава́я на главу́, / зову́ Ти я́коже блудни́ца, ми́лости и́щущая, / мольбу́ приношу́, / и оставле́ние прошу́ прия́ти.

А́ще и никто́же, я́коже аз согреши́ Тебе́, / но оба́че приими́ и мене́, Благоутро́бне Спа́се, / стра́хом ка́ющася, и любо́вию зову́ща: / согреши́х Тебе́ еди́ному, / поми́луй мя Ми́лостиве.

Пощади́ Спа́се Твое́ созда́ние, / и взыщи́ я́ко Па́стырь поги́бшее, / предвари́ заблу́ждшаго, восхи́ти от во́лка, / сотвори́ мя овча́ / на па́стве Твои́х ове́ц.

Егда́ Судие́ ся́деши я́ко Благоутро́бен, / и пока́жеши стра́шную сла́ву Твою́ Спа́се: / о каковы́й страх тогда́! Пе́щи горя́щей, / всем боя́щимся нестерпи́маго суди́ща Твоего́.

Преподо́бная ма́ти Мари́е, моли́ Бо́га о нас.

Марии: Све́та незаходи́маго Ма́ти, тя просвети́вши, / от омраче́ния страсте́й разреши́. / Те́мже вше́дши в духо́вную благода́ть, / просвети́ Мари́е, / тя ве́рно восхваля́ющия.

Преподо́бная ма́ти Мари́е, моли́ Бо́га о нас.

Марии: Чу́до но́во ви́дев, ужаса́шеся боже́ственный в тебе́ вои́стинну ма́ти Зоси́ма: / а́нгела бо зря́ше во пло́ти, / и у́жасом весь исполня́шеся, / Христа́ поя́ во ве́ки.

Слава, Троичен: Безнача́льне О́тче, Сы́не собезнача́льне, / Уте́шителю Благи́й, Ду́ше Пра́вый: / Сло́ва Бо́жия Роди́телю, / Отца́ безнача́льна Сло́ве, / Ду́ше живы́й и зи́ждяй, / Тро́ице Еди́нице, поми́луй мя.

Богородичен: Я́ко от оброще́ния червлени́цы Пречи́стая, / у́мная багряни́ца Емману́илева, / внутрь во чре́ве Твое́м плоть истка́ся. / Те́мже Богоро́дицу / вои́стинну Тя почита́ем.

Песнь 9.

Ирмос: Безсе́меннаго зача́тия Рождество́ несказа́нное, / Ма́тере безму́жныя нетле́нен Плод, / Бо́жие бо рожде́ние обновля́ет естества́. / Те́мже Тя вси ро́ди, / я́ко Богоневе́стную Ма́терь, / правосла́вно велича́ем. (Дважды)

Умилосе́рдися спаси́ мя, / Сы́не Дави́дов поми́луй, / бесну́ющияся сло́вом исцели́вый, / глас же благоутро́бный я́ко разбо́йнику мне рцы: / ами́нь глаго́лю тебе́, со Мно́ю бу́деши в раи́, / егда́ прииду́ во сла́ве Мое́й.

Разбо́йник оглаго́ловаше Тя, / разбо́йник Богосло́вяше Тя, / о́ба бо на кресте́ сви́сяста, / но о Благоутро́бне, я́ко ве́рному разбо́йнику Твоему́, / позна́вшему Тя Бо́га, / и мне отве́рзи дверь / сла́внаго Ца́рствия Твоего́.

Тварь содрога́шеся распина́ема Тя ви́дящи, / го́ры и ка́мения стра́хом распада́хуся, / и земля́ сотряса́шеся, и ад обнажа́шеся, / и соомрача́шеся свет во дни, / зря Тебе́ Иису́се / пригвожде́на ко Кресту́.

Досто́йных покая́ния плодо́в не истяжи́ от мене́, / и́бо кре́пость моя́ во мне оскуде́, / се́рдце мне да́руй при́сно сокруше́нное, / нищету́ же духо́вную, / да сия́ Тебе́ принесу́, / я́ко прия́тную же́ртву, еди́не Спа́се.

Судие́ мой, и ве́дче мой, / хотя́й па́ки приити́ со а́нгелы, / суди́ти ми́ру всему́, / ми́лостивным Твои́м о́ком тогда́ ви́дев мя, / пощади́ и уще́дри мя Иису́се, / па́че вся́каго естества́ челове́ча согреши́вша.

Преподо́бная ма́ти Мари́е, моли́ Бо́га о нас.

Марии: Удиви́ла еси́ всех / стра́нным житие́м твои́м, / а́нгелов чи́ны, и челове́ков собо́ры, / невеще́ственно пожи́вши, и естество́ преше́дши: / и́мже, я́ко невеще́ственныма нога́ма вше́дши Мари́е, / Иорда́н прешла́ еси́.

Преподо́бная ма́ти Мари́е, моли́ Бо́га о нас.

Марии: Уми́лостиви Созда́теля / о хва́лящих тя, преподо́бная ма́ти, / изба́витися озлобле́ний и скорбе́й / о́крест напа́дающих: / да изба́вившеся от напа́стей, возвели́чим непреста́нно / просла́вльшаго тя Го́спода.

Преподо́бне о́тче Андре́е, моли́ Бо́га о нас.

Андрею: Андре́е честны́й, и о́тче треблаже́ннейший, / па́стырю Кри́тский, / не преста́й моля́ся о воспева́ющих тя: / да изба́вимся вси гне́ва и ско́рби, и тле́ния, / и прегреше́ний безме́рных, / чту́щии твою́ па́мять ве́рно.

Слава, Троичен: Отца́ просла́вим, Сы́на превознесе́м, / Боже́ственному Ду́ху ве́рно поклони́мся, / Тро́ице неразде́льней, Еди́нице по Существу́, / я́ко Све́ту и Све́том, и Животу́ и Живото́м, / животворя́щему и просвеща́ющему концы́.

Богородичен: Град Твой сохраня́й / Богороди́тельнице Пречи́стая: / в Тебе́ бо сей ве́рно ца́рствуяй, / в Тебе́ и утвержда́ется: / и Тобо́ю побежда́яй, / побежда́ет вся́кое искуше́ние, / и пленя́ет ра́тники, / и прохо́дит послуша́ние.

Таже поем оба лика: Безсе́меннаго зача́тия Рождество́ несказа́нное, / Ма́тере безму́жныя нетле́нен Плод, / Бо́жие бо рожде́ние обновля́ет естества́. / Те́мже Тя вси ро́ди, / я́ко Богоневе́стную Ма́терь, / правосла́вно велича́ем.

И прочее последование Повечерия.

В ПЯТОК ПЕРВЫЯ СЕДМИЦЫ НА УТРЕНИ

Троичны. По первом стихословии глаголем седальны Крестныя Осмогласника, и Богородичен.

По 2-м же стихословии седален господина Иосифа. Глас 2. Подобен: Благообра́зный Ио́сиф:

Страстьми́ Твои́ми безстра́стие всем дая́й Человеколю́бче, / стра́сти пло́ти моея́ умертви́в Кресто́м Боже́ственным, / сподо́би ви́дети и свято́е Воскресе́ние Твое́ Го́споди.

Слава, тойже:

И ныне, Крестобогородичен: Честны́м Кресто́м Сы́на Твоего́ сохраня́еми, / Влады́чице Чи́стая Богоро́дице, / вся́кий прило́г борца́, вси удо́бь побежда́ем: / те́мже Тя по до́лгу при́сно ублажа́ем, / я́ко Ма́терь Бо́жию, / и еди́ну наде́жду душ на́ших.

По 3-м же стихословии седален господина Феодора. Глас 2. Подобен: Милосе́рдия су́щи:

Чистоты́ сый исто́чник, / посто́м соблюди́ нас Ми́лостиве, / при́зри на ны Тебе́ припа́дающия, / вонми́ воздея́нию рук на́ших, / простры́й дла́ни Твои́ на Дре́ве / распина́емь о всех земноро́дных, / безпло́тных еди́не Го́споди.

Слава, тойже.

И ныне, Крестобогородичен. Подобен: Де́ва и Ма́ти Твоя́ Христе́, / на Дре́ве зря́ще Тя ме́ртва просте́рта, / пла́чущи го́рце, Сы́не Мой, глаго́лаше, / что стра́шное сие́ та́инство? / Всем да́руяй жизнь ве́чную, / во́лею на Кресте́ ка́ко умира́еши / сме́ртию поно́сною?

Канон в Минеи на 6. И трипеснцы по чину их. Стихословим и пятую песнь обычно. Глас 2.

Песнь 5.

Ирмос: Просвеще́ние во тьме лежа́щих, / спасе́ние отча́янных, Христе́, Спа́се мой, / к Тебе́ у́тренюю, Царю́ ми́ра, / просвети́ мя сия́нием Твои́м, / ино́го бо, ра́зве Тебе́, бо́га не зна́ю.

Во мне зря грех, льстивому́дрый, / спеши́тся и соде́йствует греху́: / ра́дуется бо вои́стинну о мое́й поги́бели, / но Ты ми даждь исправле́ние Спа́се, / во о́наго убие́ние, молю́ся.

Нача́ла победи́вый тьмы, на Кресте́ Твое́м, / сих изми́ мя злодея́ния, па́дшаго во глубину́ греха́, / и в я́му безме́стных дея́ний, / Твое́ю же ми́лостию спасти́ся упова́юща.

Умертви́выйся на Кресте́ просте́рт, / умерщвле́нную грехо́м оживи́ ду́шу мою́, / и честно́е Твое́ Воскресе́ние дости́гнути, / в ми́ре Христе́ сподо́би, / де́лающа усе́рдно Твоя́ оправда́ния.

Богородичен: Просвеще́ние моея́ не́мощи, / спасе́ние омраче́нныя души́ моея́ Чи́стая, / спаси́ мя, спаси́ погиба́юща Отрокови́це, / и в ри́зу нетле́ния мя облецы́, / истле́вшаго лю́тыми прегреше́ньми.

Иный, глас тойже.

Ирмос: Нощи́ преше́дшей:

Ты на ме́сте ло́бнем / пло́тию распя́тися изво́лил еси́, еди́не Безсме́ртне, / челове́ческий род обезсме́ртствуя, и возобража́я Го́споди.

Стра́сти Твоея́ доса́ду, тварь зря́щи / вся пременя́шеся, Го́споди, / иуде́йскаго рыда́ющи уби́йства, / но претерпе́л еси́ спасти́ вся́ческая.

Слава, Троичен: О Тро́ице Всесвята́я! / Ты на́ше служе́ние, / Ты и прибе́жище и держа́ва, / в Естестве́ еди́ном Тя воспева́ющим, / очище́ние прегреше́ний низпосли́.

Богородичен: Многоимени́тая Отрокови́це, ра́дуйся Богоро́дице, / ковче́же, и ста́мно и трапе́зо, / светоно́сный све́щниче, огнезра́чная купино́, / горо́ Бо́жия присе́нная.

Сла́ва Тебе́ Бо́же наш, сла́ва Тебе́.

Ми́ру и су́щим в ми́ре ра́доватися прире́кшии, / ны́не я́ко Христу́ сраспина́еми, / претерпи́м доса́ду, руга́ние, / и друга́я, да с Ним просла́вимся.

Ирмос: Нощи́ преше́дшей, прибли́жися день, / и Свет ми́ру возсия́, / сего́ ра́ди хва́лят Тя А́нгельстии чи́ни, / и славосло́вят Тя вся́ческая.

Песнь 8.

Ирмос: В пещь о́гненную ко отроко́м евре́йским снизше́дшаго, / и пла́мень в ро́су прело́жшаго Бо́га, / по́йте, дела́, я́ко Го́спода, / и превозноси́те во вся ве́ки.

Смири́вый Себе́, возне́слся еси́ за благоутро́бие на Крест, / возвыша́яй па́дшаго сне́дию дре́ва иногда́: / те́мже Тя еди́не Преблаги́й, / просла́вленнаго пое́м во ве́ки.

Невнима́ния дрема́нием греха́ тя́жкий подъя́х сон, / но Ты усну́вый на Кресте́ мене́ ра́ди Христе́ мой, / воздви́гни мя па́дшаго, / да мя не прии́мет нощь сме́ртная.

Ослепи́вся сластьми́, обношу́ ду́шу омраче́нную, / и смее́тся зря мя льстивому́дрый враг: / те́мже мя просвети́, и изба́ви сего́ зло́бы, Христе́ во ве́ки.

Богородичен: В ле́ности жизнь ижди́в, / дрема́нием греха́ ду́шу отягчи́х: / неусы́пной же Твое́й моли́тве притека́ю, / не даждь мне в сме́рти Де́во Пречи́стая, усну́ти.

Иный.

Ирмос: В купине́ Моисе́ю:

Те́рнием венча́вся, и во оде́жду от порфи́ры обо́лкся, / яви́лся еси́ красне́йший Христе́, добро́тою / па́че всех сыно́в челове́ческих, сла́вою облистава́я.

Желчь и о́цет пия́, / две струи́ пролива́еши, живота́ и нетле́ния, / из Боже́ственных Твои́х ребр, ве́рою Тя пою́щим, / и славосло́вящим Христе́ во вся ве́ки.

Благослови́м Отца́ и Сы́на, и Свята́го Ду́ха, Го́спода.

Троичен: Божество́ еди́но Тро́ице, / нераздели́мое Естество́, разде́льная же Ли́цы, / неги́блющая держа́во, О́тче, Сы́не и Ду́ше, / Тя песносло́вим во вся ве́ки.

И ны́не и при́сно, и во ве́ки веко́в, ами́нь.

Богородичен: Богороди́тельнице Чи́стая, / небе́сная две́ре, спаси́тельная врата́, / всех христиа́н моле́ние приими́, / Тебе́ блажа́щих во вся ве́ки.

Сла́ва Тебе́ Бо́же наш, сла́ва Тебе́.

Кре́сте ски́птре Христо́в, Це́ркве ро́ге, / царе́й побе́до, храни́телю христиа́н, / ты еси́ просвеще́ние мое́, / ты и похвала́ моя́ во вся ве́ки.

Хва́лим, благослови́м, покланя́емся Го́сподеви, пою́ще, и превознося́ще во вся ве́ки.

Ирмос: В купине́ Моисе́ю, Де́вы чу́до, / на Сина́йстей горе́ Прообрази́вшаго иногда́, / по́йте, благослови́те / и превозноси́те во вся ве́ки.

Песнь 9.

Ирмос: Я́же пре́жде Со́лнца Свети́льника Бо́га возсия́вшаго, / пло́тски к нам прише́дшаго, / из боку́ Деви́чу неизрече́нно воплоти́вшая, / Благослове́нная Всечи́стая, / Тя, Богоро́дице, велича́ем.

Прокаже́нную ду́шу мою́ безме́стными помышле́нии, / окропле́нием кро́ве Твоея́ очи́сти Бо́жий Сло́ве, / и о́бщника мя сла́вы Твоея́ сотвори́, / мене́ ра́ди безсла́вное претерпе́вый Христе́ распя́тие.

Весь сляко́хся тягото́ю безме́стных, Христе́, дея́ний, / и се́туя зову́ Ти, Человеколю́бче: / души́ моея́ неисце́льныя я́звы / исцели́ Твое́ю честно́ю кро́вию, / да пою́ Твое́ Божество́.

Снедь зло́бу, и питие́ небреже́ние творя́, / по всему́ пребыва́ю неиспра́влен, / сне́дей оша́янием безвре́менно ра́дуюся: / не сицево́му бо посту́ рече́ Госпо́дь бы́ти.

Богородичен: Лю́таго дре́вняго отрече́ния губи́тельницу, / и прама́тере исправле́ние, / ро́да к Бо́гу вину́ присвое́ния, / к Зижди́телю мост, / Тя Богоро́дице велича́ем.

Иный.

Ирмос: Чи́стую и Пречи́стую:

На Дре́ве распе́ншуся Ти тварь колеба́шеся, / Бог сый пострада́л еси́ пло́тски, / за благоутро́бие щедро́т, да спасе́ши нас.

Креста́ Твоего́ Го́споди, си́ла вели́кая, / и́бо образу́юще сего́ в себе́, / а́бие де́монов кре́пость отража́ем.

Слава, Троичен: Еди́нице Триипоста́сная, Тро́ице еди́нственная, / господонача́лие, Естество́ равносла́вное, / О́тче, Сы́не, и Боже́ственный Ду́ше, / спаси́ всех нас.

Богородичен: Ра́дуйся очисти́лище ми́ру Богоро́дице, / в не́же притека́юще вси гре́шнии, / к Бо́гу примире́ние при́сно обрета́ем.

Сла́ва Тебе́ Бо́же наш, сла́ва Тебе́.

Креста́ Твоего́ Го́споди, / Боже́ственным могу́тством укрепи́ мя, / непоро́чное и чи́стое вре́мя поста́, Тебе́ приноси́ти.

Ирмос: Чи́стую и Пречи́стую / Ма́терь и Де́ву / пе́сньми пе́сней, вси ве́рнии, / благоче́стно я́ко Богоро́дицу велича́ем.

Светилен гласа.

На стиховне самогласен дне, дважды, глас 8:

По́стное завеща́ние ра́достно восприи́мем: / а́ще бо бы сие́ пра́отец сохрани́л, / Еде́мскаго отпаде́ния не прия́ли бы́хом. / Кра́сный бе в виде́ние, и до́брый в снедь, / умори́вый мене́ плод: / да не восхи́тимся ве́ждами, / ни да услади́тся на́ша горта́нь почита́емыми бра́шны, / по прия́тии же безче́ствуемыми. / Бежи́м невоздержа́ния, / и по насыще́нии страсте́м не покори́мся. / Назна́менаимся кро́вию, / о нас веде́наго на смерть во́лею, / и не ко́снется нас губи́тель: / и сне́мы Па́сху Христо́ву свяще́ннейшую, / во спасе́ние душ на́ших.

Мученичен: Что вы нарече́м святи́и? / Херуви́мы ли, я́ко на вас почи́л есть Христо́с. / Серафи́мы ли, я́ко непреста́нно просла́висте Его́. / А́нгелы ли, те́ла бо отврати́стеся. / Си́лы ли, де́йствуете бо чудесы́. / Мно́гая ва́ша имена́, и бо́льшая дарова́ния, / моли́те спасти́ся душа́м на́шим.

Слава, и ныне, Крестобогородичен, глас тойже. Подобен: О пресла́внаго чудесе́!

Я́ко ви́де Тя распина́ема на ло́бнем Спа́се, / изменя́шеся вся тварь, / и содрога́шеся дви́жущеся не терпя́щи. / Де́ва же Чи́стая и Ма́ти Твоя́, / рыда́ющи Тебе́ вопия́ше: / увы́ мне, о Ча́до Мое́, Спа́се Мой сладча́йший, / что но́вое сие́ и пресла́вное и стра́нное виде́ние?

Бла́го есть: и прочее последование. Час 1-й без стихословия: такожде и в прочия пятки святыя великия 40-цы.

НА 6-М ЧАСЕ

Тропарь, глас 5:

Многогрехо́вное на́ше житие́, и непокая́нный нрав щедро́тами предвари́ Го́споди: ра́зве бо Тебе́ ино́го не ве́мы, живото́м и сме́ртию влады́чествующа, спаси́ я́ко Человеколю́бец.

Сла́ва, и ны́не: и повторяем тойжде.

Прокимен, псалом 17, глас 7: Возлюблю́ Тя Го́споди кре́посте моя́, / Госпо́дь утвержде́ние мое́. Стих: Бог мой, помо́щник мой.

Пророчества Исаиина чтение. [Глава 3, ст. 1 – 14.]

Се Влады́ка Госпо́дь Савао́ф оты́мет от Иерусали́ма и от Иуде́и кре́пкаго, и кре́пкую, кре́пость хле́ба, и кре́пость воды́. Исполи́на, и кре́пкаго, и челове́ка ра́тника, и судию́, и проро́ка, и смотрели́ваго, и ста́рца. И пятьдесятонача́льннка, и ди́внаго сове́тника, и прему́драго архите́ктона, и разу́мнаго послу́шателя. И поста́влю ю́ноши кня́зи их, и руга́тели госпо́дствовати бу́дут и́ми. И напада́ти и́мут лю́дие, челове́к на челове́ка, и челове́к на бли́жняго своего́: прирази́тся отроча́ к ста́рцу, и безче́стный к честно́му. Я́ко и́мется челове́к бра́та своего́, или́ дома́шняго отца́ своего́, глаго́ля: ри́зу и́маши, началово́ждь нам бу́ди, и бра́шно мое́ под тобо́ю да бу́дет. И отвеща́в в день о́ный рече́т: не бу́ду твой началово́ждь, несть бо в дому́ мое́м ни хле́ба, ни ри́зы: не бу́ду началово́ждь лю́дем сим. Я́ко оста́влен бысть Иерусали́м и Иуде́я паде́, и язы́к их со беззако́нием, не покаря́ются Го́сподеви. Сего ра́ди ны́не смири́ся сла́ва их, и студ лица́ их проти́ву ста им: грех же свой я́ко Содо́мский возвести́ша, и яви́ша. Го́ре души́ их, зане́ умы́слиша сове́т лука́вый на себе́ сами́х. Ре́кше: свя́жем пра́веднаго, я́ко непотре́бен нам есть: у́бо плоды́ дел свои́х снедя́т. Го́ре беззако́нному, лука́вая бо приключа́тся ему́ по дело́м рук его́. Лю́дие мои́, приста́вницы ва́ши пожина́ют вас, и истяза́ющии облада́ют ва́ми: лю́дие мои́, блажа́щии вас льстят вы, и стези́ ног ва́ших возмуща́ют. Но ны́не устро́ится Госпо́дь на суд, и поста́вит на суд лю́ди Своя́. Сам Госпо́дь на суд прии́дет со старе́йшины люде́й, и с кня́зи их.

Прокимен, псалом 18, глас 6: Го́споди, Помо́щниче мой, / и Изба́вителю мой. Стих: Небеса́ пове́дают сла́ву Бо́жию:

Ведомо да есть, яко последование Минеи прилучившагося святаго в субботу и в Неделю поется на Повечерии, или егда хощет екклисиарх.

В ПЯТОК ВЕЧЕРА ВО СВЕТИЛЬНИЧНОЕ,

По обычном стихословии, на Го́споди воззва́х, поставим стихов 10, и поем стихиры, самогласен дне, дважды. Глас 5:

Прииди́те ве́рнии, / де́лаим во све́те дела́ Бо́жия, / я́ко во дни благообра́зно хо́дим, / вся́кое непра́ведное списа́ние от себе́ бли́жняго оты́мем, / не полага́юще претыка́ния сему́ в собла́зн. / Оста́вим пло́ти сладостра́стие, / возрасти́м ду́ши дарова́ния, / дади́м тре́бующим хлеб, / и присту́пим Христу́ в покая́нии вопию́ще: / Бо́же наш, поми́луй нас.

Таже поем и четыре мученичны Октоиха, прилучившагося гласа.

Таже самогласны 4, святаго Феодора. Глас 2:

Прииди́те мучениколю́бцы вси, / духо́вно возвесели́мся, и торжеству́им: / днесь бо предлага́ет трапе́зу та́йную му́ченик Фео́дор, / веселя́щую празднолю́бцев нас, е́же вопи́ти к нему́: / ра́дуйся страстоте́рпче непобеди́мый, / преще́ния мучи́телей на земли́ разори́вый. / Ра́дуйся, бре́нное твое́ те́ло за Христа́ Бо́га отда́вый му́кам. / Ра́дуйся, в разли́чных беда́х, иску́сный во́ин яви́выйся небе́снаго во́инства. / Те́мже мо́лим тя му́чеников украше́ние, / моли́ся о душа́х на́ших.

Богодарова́нную благода́ть чуде́с твои́х, му́чениче Фео́доре, / всем простира́еши, ве́рою к тебе́ притека́ющим, / е́юже хва́лим тя, глаго́люще: / плене́нныя избавля́еши, исцеля́еши боля́щия, / ни́щия обогаща́еши: и спаса́еши пла́вающия, / су́етное тече́ние удержава́еши рабо́в, / и тщеты́ явле́ние твори́ши украда́ющим страда́льче, / и во́ины наказу́еши восхище́ния огреба́тися, / младе́нцем да́руеши ми́лостивно проше́ния, / те́плый обрета́ешися предста́тель творя́щим твою́ свяще́нную па́мять. / С ни́миже и нас страда́льче свяще́ннейший, / воспева́ющим твое́ мучение, / проси́ у Христа́ ве́лию ми́лость.

Дар Бо́жий превы́шший показа́лся еси́ му́чениче Фео́доре: / зане́ и по кончи́не я́ко жив / притека́ющим дае́ши проше́ния. / Те́мже сы́ну восхище́нну жены́ иногда́, / плене́нну инове́рными во́ины, / предста́вши вдови́ца слеза́ми храм твой моча́ше:/ ты же я́ко ми́лостив на коне́ бе́лом наше́д, / сея́ о́трока предста́вил еси́ неви́димо:/ и по сем и с сим де́йствуяй чудесы́, не преста́л еси́. / Но моли́ Христа́ Бо́га, спасти́ся душа́м на́шим.

Боже́ственных даро́в тезоимени́та тя чту, треблаже́нне Фео́доре: / све́та бо Боже́ственнаго незаходи́мое свети́ло явле́йся, / уясни́л еси́ страда́ньми твои́ми всю тварь: / и огня́ си́льнейший яви́вся, пла́мень угаси́л еси́, / и льсти́ваго зми́я главу́ сокруши́л еси́. / Те́мже во страда́ниих твои́х Христо́с приклони́вся, / венча́ боже́ственную главу́ твою́ великому́чениче страда́льче, / я́ко име́яй дерзнове́ние к Бо́гу, / приле́жно моли́ся о душа́х на́ших.

Слава, глас 6: Сосу́да употреби́в враг соотсту́пника мучи́теля, / умышле́нием лю́тым, / посто́м очища́ющияся лю́ди благочести́выя, / от скве́рных жертв, оскверне́нными бра́шны окуша́шеся оскверни́ти, / но ты о́наго ухищре́ние мудре́йшим разруши́л еси́ умышле́нием, / во сне предста́л еси́ тогда́шнему архиере́ю, / и глубо́кое ра́зума открыва́я, / и безме́стное начина́ние явля́я, / и тебе́ у́бо благода́рственная принося́ще, Спа́са напису́ем, / ле́тное воспомина́ние бы́вшаго чудесе́ творя́ще: / и про́чее моля́щеся, / от умышле́ний лука́ваго невреди́мым спасти́ся, / к Бо́гу твои́ми моли́твами му́чениче Фео́доре.

И ныне, Богородичен гласа. Вход без Евангелия. Свете тихий:

Прокимен, псалом 19. Глас 5: Услы́шит тя Госпо́дь / в день печа́ли. Стих: Защи́тит тя и́мя Бо́га Иа́ковля.

Бытия чтение. [Глава 2, ст. 20 – 25. Глава 3, ст. 1 – 20.]

Нарече́ Ада́м имена́ всем ското́м, и всем пти́цам небе́сным, и всем звере́м земны́м, Ада́му же не обре́теся помо́щник подо́бный ему́. И наложи́ Бог изступле́ние на Ада́ма, и у́спе: и взя еди́но от ребр его́, и испо́лни пло́тию вме́сто его́. И созда́ Госпо́дь Бог ребро́, е́же взя от Ада́ма, в жену́, и приведе́ ю ко Ада́му. И рече́ Ада́м: се ны́не кость от косте́й мои́х, и плоть от пло́ти моея́: сия́ нарече́тся жена́, я́ко от му́жа своего́ взята́ бысть сия́. Сего́ ра́ди оста́вит челове́к отца́ своего́ и ма́терь, и прилепи́тся к жене́ свое́й, и бу́дета два в плоть еди́ну. И бе́ста о́ба на́га, Ада́м же и жена́ его́, и не стыдя́стася. Змий же бе мудре́йший всех звере́й су́щих на земли́, и́хже сотвори́ Госпо́дь Бог. И рече́ змий жене́: что я́ко рече́ Бог: да не я́сте от вся́каго дре́ва ра́йскаго? И рече́ жена́ зми́ю: от вся́каго дре́ва ра́йскаго я́сти бу́дем. От плода́ же дре́ва, е́же есть посреде́ рая́, рече́ Бог, да не я́сте от него́, ниже́ прикосне́теся ему́, да не у́мрете. И рече́ змий жене́: не сме́ртию у́мрете. Ве́дяше бо Бог, я́ко во́ньже а́ще день сне́сте от него́, отве́рзутся о́чи ва́ши, и бу́дете я́ко бо́зи, ве́дяще до́брое и лука́вое. И ви́де жена́, я́ко добро́ дре́во в снедь, и я́ко уго́дно очи́ма ви́дети, и красно́ есть, е́же разуме́ти: и взе́мши от плода́ его́, яде́: и даде́ му́жу своему́ с собо́ю, и ядо́ста. И отверзо́шася о́чи обе́ма, и разуме́ша, я́ко на́зи бе́ша, и сши́ста ли́ствие смоко́вное, и сотвори́ста себе́ препоя́сания. И услы́шаста глас Го́спода Бо́га, ходя́ща в раи́ по полу́дни: и скры́стася Ада́м же и жена́ его́ от лица́ Го́спода Бо́га посреде́ дре́ва ра́йскаго. И призва́ Госпо́дь Бог Ада́ма, и рече́ ему́: Ада́ме, где еси́? И рече́ Ему́: глас слы́шах Тебе́ ходя́ща в раи́, и убоя́хся, я́ко наг есмь, и скры́хся. И рече́ ему́ Бог: кто возвести́ тебе́, я́ко наг еси́, а́ще не бы от дре́ва, его́же запове́дах тебе́, сего́ еди́наго не я́сти, от него́ ял еси́? И рече́ Ада́м: жена́, ю́же дал еси́ со мно́ю, та ми даде́ от дре́ва, и ядо́х. И рече́ Госпо́дь Бог жене́: что сие́ сотвори́ла еси́? И рече́ жена́: змий прельсти́ мя, и ядо́х. И рече́ Госпо́дь Бог зми́ю: я́ко сотвори́л еси́ сие́, про́клят ты от всех ското́в, и от всех звере́й земны́х: на пе́рсех твои́х и чре́ве ходи́ти бу́деши, и зе́млю сне́си вся дни живота́ твоего́. И вражду́ положу́ между́ тобо́ю, и между́ жено́ю, и между́ се́менем твои́м, и между́ се́менем тоя́: той твою́ блюсти́ бу́дет главу́, и ты блюсти́ бу́деши его́ пя́ту. И жене́ рече́: умножа́я умно́жу печа́ли твоя́, и воздыха́ния твоя́, в боле́знех роди́ши ча́да, и к му́жу твоему́ обраще́ние твое́, и той тобо́ю облада́ти бу́дет. И Ада́му рече́: я́ко послу́шал еси́ гла́са жены́ твоея́, и ял еси́ от дре́ва, его́же запове́дах тебе́ сего́ еди́наго не я́сти, от него́ ял еси́: проклята́ земля́ в де́лех твои́х, в печа́лех сне́си ту́ю вся дни живота́ твоего́. Те́рния и волчцы́ возрасти́т тебе́, и сне́си траву́ се́льную. В по́те ли́ца твоего́ сне́си хлеб твой, до́ндеже возврати́шися в зе́млю, от нея́же взят еси́: я́ко земля́ еси́, и в зе́млю оты́деши. И нарече́ Ада́м и́мя жене́ свое́й Жизнь, я́ко та ма́ти всех живу́щих.

Прокимен, псалом 20, глас 6: Вознеси́ся Го́споди, си́лою Твое́ю, / воспое́м и пое́м си́лы Твоя́. Стих: Го́споди, си́лою Твое́ю возвесели́тся царь.

Притчей чтение. [Глава 3, ст. 19 – 34.]

Бог прему́дростию основа́ зе́млю, угото́ва же небеса́ ра́зумом. В чу́встве Его́ бе́здны разверзо́шася, о́блацы же источи́ша ро́су. Сы́не да не премине́ши, соблюди́ же мой сове́т, и мысль. Да жива́ бу́дет душа́ твоя́, и благода́ть бу́дет на твое́й вы́и: [бу́дет же исцеле́ние пло́тем твои́м, и уврачева́ние косте́м твои́м:] Да хо́диши наде́яся в ми́ре во всех путе́х твои́х, нога́ же твоя́ не по́ткнется. А́ще бо ся́деши, безбоя́знен бу́деши, а́ще же поспи́ши сла́достно поспи́ши. И не убои́шися стра́ха наше́дшаго, ниже́ устремле́ния нечести́вых находя́щаго. Госпо́дь бо бу́дет на всех путе́х твои́х, и утверди́т но́гу твою́, да не поползне́шися. Не отрецы́ся благотвори́ти тре́бующему, егда́ и́мать рука́ твоя́ помога́ти. Не рцы: отше́д возврати́ся, и зау́тра дам, си́льну ти су́щу благотвори́ти: не ве́си бо что породи́т находя́щий день. Не соплета́й на дру́га твоего́ зла, прише́льца су́ща и упова́юща на тя. Не вражду́й на челове́ка ту́не, да не что на тя соде́ет зло́е. Не стяжи́ злых муже́й поноше́ния, не возревну́й путе́м их. Нечи́ст бо пред Го́сподем всяк законопресту́пник и с пра́ведными не сочетава́ется. Кля́тва Госпо́дня в доме́х нечести́вых: дворы́ же пра́ведных благословля́ются. Госпо́дь го́рдым проти́вится: смире́нным же дае́т благода́ть.

Таже, Да испра́вится моли́тва моя́:

И прочее последование преждесвященных.

По заамвонной молитве

Поем настоящий молебный канон святаго Феодора. Предложши же коливо, глаголем псалом 142: Го́споди, услы́ши моли́тву мою́: Таже, Бог Госпо́дь, и яви́ся нам: И абие тропарь, глас 2:

Ве́лия ве́ры исправле́ния, / во исто́чнице пла́мене, я́ко на воде́ упокое́ния, / святы́й му́ченик Фео́дор ра́довашеся: / огне́м бо всесожже́гся, / я́ко хлеб сла́дкий Тро́ице принесе́ся. / Того́ моли́твами Христе́ Бо́же / спаси́ ду́ши на́ша.

Слава, тойже.

И ныне, Богородичен: Вся па́че смы́сла, / вся пресла́вная Твоя́ Богоро́дице та́инства, / чистоте́ запеча́танной, и де́вству храни́му,/ Ма́ти позна́лася еси́ нело́жна / Бо́га ро́ждши и́стиннаго: / Того́ моли́ спасти́ся душа́м на́шим.

И абие псалом 50.

Таже настоящий канон, глас 8: Творение Иоанна Дамаскина, егоже краестрочие: Бо́жиих тя пою́ даро́в тезоимени́те.

Песнь 1.

Ирмос: Во́ду проше́д я́ко су́шу, / и еги́петскаго зла избежа́в, / изра́ильтянин вопия́ше: / Изба́вителю и Бо́гу на́шему пои́м.

Бо́жия тя рачи́теля Фео́доре ве́дый / и любо́вию неизбе́жною твое́ю запе́нся, / ду́шу же и те́ло, и словеса́ похва́л возлага́ю.

Писа́шеся повеле́ние богоме́рзкое, / же́ртву и́долом, а не Живо́му Бо́гу приноси́ти, / но приведе́н был еси́, не пожря́й страстоте́рпче, / Бо́гу же имы́й приведе́н бы́ти.

Слава: Раче́нием Боже́ственным пригвожде́н, Бо́га Вы́шняго / Сы́ну Единоро́дному, Фео́доре му́чениче вво́инился еси́, / и по́честей не погреши́л еси́.

Богородичен: Чи́ни Тя а́нгелов и челове́ков Безневе́стная Ма́ти / восхваля́ют непреста́нно: / Соде́теля бо сих, я́ко Младе́нца / во объя́тиих Твои́х носи́ла еси́.

Песнь 3.

Ирмос: Ты еси́ утвержде́ние притека́ющих к Тебе́, Го́споди, / Ты еси́ свет омраче́нных, / и пое́т Тя дух мой.

Пе́ние из усте́н мои́х, / и из боле́зненныя души́ мольбу́ приношу́, / ю́же уще́дри страстоте́рпче Фео́доре.

Плоть покори́л еси́ Самоде́ржцу, сла́вне му́чениче, уму́, / и обои́ми угожда́еши Созда́вшему.

Слава: Стал еси́ на суди́щи мучи́тельском, / Христа́ Царя́ богосло́вя: / жре́ти бо скве́рным отре́клся еси́ Фео́доре.

Богородичен: Тя вси стяжа́хом прибе́жище и сте́ну при́сно христиа́не: / Тя славосло́вим немо́лчно Безневе́стная.

Песнь 4.

Ирмос: Услы́шах, Го́споди, / смотре́ния Твоего́ та́инство, / разуме́х дела́ Твоя́ / и просла́вих Твое́ Божество́.

Та́ин Боже́ственных вкуси́в, в ра́зуме му́чениче Фео́доре, / непосты́дную про́поведь Бо́жия рожде́ния испове́дал еси́.

Стра́стное божество́ непщева́ху, страсте́м служа́щии, / и́хже ду́хом изобличи́л еси́, / страда́льче Фео́доре просвеща́емь.

Слава: Изба́вителя моли́твою, тебе́ воспева́ющим блаже́нне Фео́доре, / от разли́чных обстоя́ний и страсте́й бы́ти мо́лим.

Богородичен: Клас возрасти́вшая животворя́щий, неора́нная ни́во, / подаю́щий ми́рови жизнь, Богоро́дице, / спаси́ пою́щия Тя.

Песнь 5.

Ирмос: Утренююще вопием Ти, / Господи, спаси ны: / Ты бо еси Бог наш,/ разве Тебе иного не вемы.

Люби́те возлюби́вшаго Го́спода, / возглаша́л еси́ страда́льче Фео́доре, / стра́ждущим с тобо́ю му́чеником.

Я́ко ре́вностию страстоте́рпче разжиза́яся се́рдцем, / боги́ню лжеимени́тую с тре́бищем попали́л еси́.

Слава: Си́лою непобеди́мою Фео́доре страстоте́рпче, / ва́рварскую де́рзость, / и моя́ стра́сти погуби́.

Богородичен: Де́ву по рождестве́ пое́м Тя Богоро́дице: / Ты бо Бо́га Сло́ва пло́тию ми́рови родила́ еси́.

Песнь 6.

Ирмос: Очи́сти мя, Спа́се, мно́га бо беззако́ния моя́, и из глубины́ зол возведи́, молю́ся: к Тебе́ бо возопи́х и услы́ши мя, Бо́же спасе́ния моего́.

Коль сла́бое, коль немощно́е, бого́в су́етных шата́ние! / На отмще́ние свое́, челове́ком моля́шеся в стоя́нии побежда́емое, / нело́жных му́чеников пропове́дающих и́стину. [Дважды.]

Слава: Укрепи́вся си́лою Бо́жиею, му́чеников сла́во Фео́доре, / му́ки злочести́вых, младе́нец стреля́ния зрел еси́ блаже́нне, / ве́чнующее бу́дущих предзря́.

Богородичен: Да изба́вимся от лю́тых прегреше́ний / моли́твами Твои́ми Богороди́тельнице Чи́стая, / и да улучи́м Всечи́стая Боже́ственнаго осия́ния, / из Тебе́ неизрече́нно воплоти́вшагося Сы́на Бо́жия.

Кондак, глас 8:

Ве́ру Христо́ву я́ко щит внутрь прии́м в се́рдцы твое́м, / проти́вныя си́лы попра́л еси́ многострада́льче, / и венце́м небе́сным венча́лся еси́ ве́чно Фео́доре, я́ко непобеди́мый.

Песнь 7.

Ирмос: От Иуде́и доше́дше, о́троцы / в Вавило́не иногда́ / ве́рою Тро́ическою пла́мень пе́щный попра́ша, пою́ще: / отце́в Бо́же, благослове́н еси́.

Ура́нен был еси́ те́лом, / за ура́неннаго Сло́ва пло́тию нас ра́ди, / и Сему́ благода́рственно веселя́ся возопи́л еси́, страстоте́рпче Фео́доре: / оте́ц на́ших Бо́же благослове́н еси́.

Я́ко во гро́бе положи́ся, и во́лею запечатле́ся Изба́вителю всех, в темни́це запечатле́нной / всели́лся еси́, вопия́ страстоте́рпче Фео́доре: / оте́ц на́ших Бо́же благослове́н еси́.

Умерщвле́н быв, и стра́сти плотски́я произволе́нием оттря́с, / не сне́дию страстоте́рпче, но любо́вию Боже́ственною пита́яся пел еси́: / оте́ц на́ших Бо́же благослове́н еси́.

Слава: В темни́це страстоте́рпче, я́коже в пещи́ ю́ноши иногда́, / Еди́н нетле́нныя Тро́ицы тебе́ укрепля́ет, ви́ден быв, / вопию́ща: оте́ц на́ших Бо́же благослове́н еси́.

Богородичен: На́ше спасе́ние, я́коже восхоте́л еси́ Спа́се устро́ити, / во утро́бу Де́вы всели́лся еси́, / Ю́же ми́ру предста́тельницу показа́л еси́: / оте́ц на́ших Бо́же благослове́н еси́.

Песнь 8.

Ирмос: Седмери́цею пещь халде́йский мучи́тель / Богочести́вым неи́стовно ражже́, / си́лою же лу́чшею спасе́ны сия́ ви́дев, / Творцу́ и Изба́вителю вопия́ше: / о́троцы, благослови́те, / свяще́нницы, воспо́йте, / лю́дие, превозноси́те во вся ве́ки.

Ослепле́н умо́м, беззако́нных нача́льник, / богочести́ву тебе́ нечести́вно претя́ше: / что всу́е на челове́ка ну́ждею уме́рша, безу́мне, возложи́л еси́ наде́жду? / Но ты возопи́л еси́: / о́троцы благослови́те, свяще́нницы воспо́йте, / лю́дие превозноси́те во вся ве́ки.

Я́ко смы́сленный и прему́дрый строи́тель благода́ти, / да́нною тебе́ от Бо́га благода́тию, / возопи́л еси́ Фео́доре, повелева́ющему нечести́вно: / сей студ мне и пою́щим бу́ди: / о́троцы благослови́те, свяще́нницы воспо́йте, / лю́дие превозноси́те во вся ве́ки.

Слава: Ю́ношески подвиза́лся еси́, де́рзостно изобличи́л еси́: / что безу́мствуеши, мучи́телю взыва́л еси́, / повелева́я тва́рем служи́ти ло́жно, оста́вльшим Созда́вшаго? / Но аз воспева́ю: о́троцы благослови́те, свяще́нницы воспо́йте, / лю́дие превозноси́те во вся ве́ки.

Богородичен: Плотски́ми изображе́ньми, и разли́чными гана́нии, / и знамена́тельными и образи́тельными изрече́ньми, / Твое́ предвеща́ху богоглаго́ливии Рождество́, / преесте́ственное и чу́дное Де́во: / те́мже Тя веселя́щеся благоче́стно восхва́ляем, / Христа́ превознося́ще во вся ве́ки.

Песнь 9.

Ирмос: Тя Неискусобра́чную Ма́терь Бо́га Вы́шняго:

Вещество́ муче́ния твоего́, Бо́жие Фео́доре жела́ние. / Те́мже ти и вещество́ бысть веще́ственному те́ло огню́: / и́мже к Боже́ственному ра́дуяся огню́ изше́л еси́, / страстоте́рпче уго́дниче Бо́жий Фео́доре.

Му́чениче всече́стне, попали́в, не попали́лся еси́: ты / бо пре́лесть попали́л еси́, / Бо́гу же предстои́ши живы́й, / и в Нем му́ченически веселя́ся / страстоте́рпче, и уго́дниче Фео́доре.

Слава: Еди́наго Тя зна́ем Христа́, еди́наго от Тро́ицы, / во двою́ соверше́нну естеству́, / лю́ди Твоя́ спаси́ сия́, / я́же стяжа́л еси́ честно́ю Твое́ю кро́вию, / Фео́дора страстоте́рпца моли́твами.

Богородичен: Тя неви́димаго Бо́га носи́вшую объя́тии, / на небесе́х воспева́емаго от всея́ си́лы: / и Тобо́ю нам да́руемое вы́ну спасе́ние / во обстоя́нии велича́ем.

Ирмос: Тя Неискусобра́чную Ма́терь Бо́га Вы́шняго: / Тя па́че ума́ ро́ждшую сло́вом вои́стинну Бо́га, / вы́шшую пречи́стых сил, / немо́лчными славословле́нии велича́ем.

И абие, Трисвятое. И тропарь святаго: Ве́лия ве́ры: Слава, кондак: Ве́ру Христо́ву я́ко щит:

И ныне, Богородичен, глас тойже: Я́коже предста́тельство вси, и держа́вное заступле́ние, / прегре́шшии стяжа́хом Всечи́стая, Твою́ те́плую по́мощь / Де́во Ма́ти Мари́е, христиа́н спасе́ние. / Тем не преста́й о нас моля́щи Спа́са, дарова́тися проще́нию.

И бывает благословение колива. Таже, Буди и́мя Госпо́дне: и Благословлю́ Го́спода: И дается преломление от иерея. И отпуст.

А идеже не быти преждесвященной, кончаем часы сице. По Осла́би, оста́ви: И по конечнех поклонех глаголем Трисвятое. По О́тче наш: Го́споди поми́луй, 12. Таже молитва, Всесвята́я Тро́ице: И начинаем Вечерню: Прииди́те поклони́мся: трижды. Псалом 103. Кафисма. И поем на Го́споди воззва́х, стихиры на 6. Мученичны 3, во Октоихе гласа, иже на ряду: И святому Феодору, 3, Слава, Феодору: Сосу́да употреби́в: И ныне, Богородичен, гласа рядоваго. Све́те ти́хий: без входа. Чтение. На стиховне Триоди самогласен дне дважды, и мученичен, глас 5: Благослове́но во́инство: Сла́ва, Феодору, глас 2: Боже́ственных даро́в: Писан в стихирах. И ны́не, Богородичен: Все упова́ние: Ны́не отпуща́еши: Трисвятое. По О́тче наш: Тропарь: Ве́лия ве́ры: Сла́ва, и ны́не, Богородичен: Вся па́че смысла: Таже ектения, Поми́луй нас Бо́же: И поклоны, 3. И облачится священник в багряный фелонь, и начинает: Благослове́н Бог наш: И мы глаголем псалом 142: Го́споди услы́ши моли́тву: И прочее якоже указано прежде. Канон на 4. И по совершении канона, Вместо: Досто́йно есть: Поем ирмос 9 песни: Тя Неискусобра́чную: Таже Трисвятое. По О́тче наш: Тропарь: Ве́лия ве́ры: Сла́ва, кондак: Ве́ру Христо́ву: И ны́не, Богородичен: Я́коже предста́тельство: Таже молитву над коливом, благословение колива. Посем, Бу́ди и́мя Госпо́дне: и Благословлю́ Го́спода: И отпуст. И входим в трапезу, и вкушаем вина и елеа, ради святаго. Сие прияхом в лавре преподобнаго отца нашего Саввы, и киновии преподобнаго Великаго Евфимия: но не творим сего ныне за честность дне. Обаче ядим варение с сливами, без масла и армеа: произволяющии же ядят сухоядение, якоже и в среду.

Подобает ведати, яко во всех пятках святыя и великия Четыредесятницы, на Вечернях и Повечериях поклонов не творим, токмо воображенныя в преждеосвященной, еже есть по Да испра́вится: поклоны 3. По входе Святых Даров, поклоны 3. И на Бу́ди и́мя Госпо́дне, поклоны 3.

Повечерия же поем великая, на нихже поем покойныя каноны настоящаго гласа, в гробнице.

Каноны же в Минеи настоящия субботы и Недели поем, егда изволит екклисиарх: един убо поем в Повечерии пятка, другий же канон поем в Повечерии Недели.

Тако творим во всех пятках, в вечер святыя и великия Четыредесятницы.

В СУББОТУ ПЕРВУЮ СВЯТЫХ ПОСТОВ, НА УТРЕНИ

По шестопсалмии, поем Бог Госпо́дь, на глас 2, и глаголем тропарь святаго Феодора, дважды: Ве́лия ве́ры: Сла́ва, и ны́не, Богородичен единожды: Вся па́че смы́сла: И обычное стихословие. По 1-м же стихословии поем седальны мученичны, Осмогласника, случившагося гласа, с Богородичным. По 2-м же стихословии поем настоящия седальны святаго Феодора.

Глас 3. Подобен: Бо́жия ве́ры:

Кипя́ ве́ры правосла́вием, / пре́лесть угаси́л еси́ злосла́вия, / упраздни́в и́дольское безбо́жие: / и всесожже́ние боже́ственное быв, / чудоде́йствии ороша́еши концы́ му́чениче пресла́вне, / Христа́ Бо́га моли́, / дарова́ти нам ве́лию ми́лость.

Другий седален святаго, подобен:

Боже́ственный дар, тя ко спасе́нию всей даде́ вселе́нней, / в страда́льчествах укрепи́вый тя Госпо́дь, / душе́вныя на́ша боле́зни исцеля́я, / и теле́сныя стра́сти побежда́я, / му́чениче Фео́доре, Христа́ Бо́га моли́, / дарова́ти нам ве́лию ми́лость.

Богородичен, подобен: Невмести́маго Бо́га, во утро́бе Твое́й Де́во Пречи́стая носи́вшая, / пре́жде век от Отца́ нетле́нно возсия́вшаго, / Сло́ва Ипоста́снаго, и Сы́на единосу́щнаго, / Сего́ моли́ с проро́ки и му́ченики, / преподо́бными, по́стники и пра́ведными,/ дарова́ти нам разреше́ние прегреше́ний.

Таже чтем мучение святаго. Таже псалом 50. И канон святаго обители со ирмосы на 6. И святаго Феодора на 8: Стихословим же и Го́сподеви пое́м.

Канон, егоже краестрочие: Тирон преславный, слава первей субботе. В первых же тропарех канона, иное краегранесие. Канон, творение Иоанна, митрополита Евхаитскаго, глас 4.

Песнь 1.

Ирмос: Отве́рзу уста́ моя́:

Всех превы́шший, / Тя неизрече́нно Роди́вшую, / всех предположи́ вы́шшую Свои́х избра́нных. / Те́мже днесь сего́ вене́чника пою́ще Всепе́тая, / Тебе́ предначина́ем.

Вели́каго в му́ченицех, страда́льца пресве́тлаго, / имени́таго, и пресла́внаго в чудесе́х, / от коне́ц земли́ и до коне́ц знамени́таго, / пе́сньми воспою́ Фео́дора.

День весе́лый в ско́рбех возсия́, / и се́тование сих уясни́, / предпра́зднственная предпу́тия издале́ча, / просия́вша благода́тию боже́ственнаго му́ченика.

Кропи́т очище́ния Це́рковь, кровьми́ свято́е заколе́ние, / е́же прия́т пожре́нный и в же́ртву прия́тый, / страда́льчествовавшаго Боже́ственныя ра́ди сла́вы его́.

Богородичен: Красно́ а́ще и незре́ло, е́же пра́здновати узако́нися: / украси́вшая бо вся Влады́чица, / и ны́не показа́ сея́ па́мяти приобща́ющияся предбе́дствующему кро́вию.

Иный канон, тогоже Евхаитскаго, глас 6. Песнь 1.

Ирмос: Я́ко по су́ху, пешеше́ствовав Изра́иль / по без́дне стопа́ми, / гони́теля фарао́на / ви́дя потопля́ема, / Бо́гу / побе́дную песнь / пои́м, вопия́ше.

Чу́дный во святы́х вои́стинну Бо́же, / во мне удиви́ ми́лости Твоя́ Христе́, / сло́во ми да́руя, / я́ко да чу́дная восхвалю́ Твоего́ му́ченика.

Тве́рдое в страда́льчестве, / и терпели́вое в боле́знех показа́л еси́ страстоте́рпче Христо́в: / ско́рое же па́ки на нас по́мощи явля́я твоея́, Фео́доре.

Слава: Благочести́вую оте́ц ве́ру, от ду́ши его́ мучи́тель отрева́я зле, / нечести́вый сове́т Бо́гу прирази́в, / восхоте́ при́сно ити́.

Богородичен: Богоре́чивых прорече́ния дре́вле муже́й, / на Тебе́ испо́лнишася Ма́ти Де́во я́ве, / я́ко Бо́га ро́ждшая и́стиннаго, и Челове́ка и́стиннаго, / па́че естества́ и ужа́сно.

Катавасия: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.

Песнь 3.

Ирмос: Твоя́ песносло́вцы:

Ви́дети день Сы́на Твоего́, / жела́юще христоимени́тии лю́дие, / во о́браз Сего́ Влады́чице, / Тому́ ны́не предпра́зднствуют, / Тебе́ нося́ще показа́ние, / и сла́внаго страстоте́рпца Твоего́.

Побежда́ют вся́кими о́бразы лу́чшая: / вели́кий бо во страда́льцех / в весе́лие измени́ вре́менную скорбь, / свята́го зе́льное поста́ обрати́в во ослабле́ние.

Сво́йственный и подо́бный тебе́ дар, / и́бо от свои́х страда́льче: / и́хже бо сам всели́л еси́ в сей ча́стице твое́й, / обра́дованно да́ры тебе́ похва́л прино́сим.

Добре́йшее основа́ние положи́л еси́, твои́ми изря́дствы изря́дне, / зве́ря всегуби́тельна, огне́м и уби́йством ды́шуща, / низложи́в я́ко безде́льна преесте́ственною до́блестию.

Неи́стовствовав но́вый отсту́пник, по ра́вному лю́те дре́внему, / же́ртвы бра́шном я́коже я́дом смеси́, / но ло́жный окая́нник премудри́ся му́чеником.

Богородичен: Испо́лнися у́бо вся Де́во, зна́ти Го́спода земля́, / из Тебе́ ми́ру я́вльшася, / но боже́ственным му́чеником благода́ть мно́гая, / утверди́вшим саме́ми собо́ю и́стину.

Иный.

Ирмос: Несть свят, / я́коже Ты, Го́споди Бо́же мой, / вознесы́й рог ве́рных Твои́х, Бла́же, / и утверди́вый нас на ка́мени / испове́дания Твоего́.

Пе́рвее в Е́вины у́ши пошепта́вый ле́стно, / и Ада́ма то́юже прельсти́вый ле́стно, / той и ны́не яд зло́бы к ле́сти излия́.

Лестца́ имя́ше на него́, / пита́ше неи́стовство проти́ву правоживу́щим, / вре́мя взыска́ше пра́вое, / во́ньже ме́рзость сотвори́ти поуча́шеся пребеззако́ннейший.

Слава: Дней нача́ток святы́х наста́ посто́в: / в ни́хже вся́кий христиа́нин самаго́ себе́ / воздержа́нием мно́гим очи́стив, всех оша́яся.

Богородичен: Наде́ждо ми́ру держа́вная, / покро́ве и предста́тельство Всесвята́я Де́во, / не пре́зри Блага́я моле́ния рабо́в, / от любве́ Тя при́сно ублажа́ющих.

Катавасия: Твоя́ песносло́вцы, Богоро́дице, / Живы́й и Незави́стный Исто́чниче, / лик себе́ совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.

Седален, глас 8: Подобен: Прему́дрости сло́во:

Боже́ственное всеору́жие восприи́м, и и́долов лесть низложи́в, / а́нгелы воздви́гл еси́ восхваля́ти по́двиги твоя́: / боже́ственным бо жела́нием ум распали́в, / смерть во огни́ до́блественно презре́л еси́. / Те́мже именоно́сно прося́щим тя да́руй боже́ственныя да́ры, / исцеле́ний подая́ния страстоте́рпче Фео́доре: / моли́ся Христу́ Бо́гу, согреше́ний оставле́ние дарова́ти, / пра́зднующим любо́вию святу́ю па́мять твою́.

Слава, подобен: Максимиа́новыми ласка́ньми не уклони́вся, / Христо́выми же словесы́ му́жествовав, / и́дольское ка́пище во огни́ испепели́л еси́, / страда́льчески победи́в до́бре сопроти́вника, / проро́чески преше́л еси́ огнь, я́коже в воде́. / Те́мже досто́йно воздая́ние подвиго́в, / источа́еши исцеле́ния, страстоте́рпче Фео́доре: / моли́ся Христу́ Бо́гу, прегреше́ний оставле́нию дарова́тися, / пра́зднующим любо́вию святу́ю па́мять твою́.

И ныне, Богородичен, Подобен: Я́ко всенепоро́чная Неве́ста Творца́, я́ко неискусому́жная Ма́ти Изба́вителя, / я́ко прия́телище су́щи Вы́шняго Всепе́тая, / беззако́ния мя су́ща скве́рное жили́ще, / и в ра́зуме бы́вша бесо́в игра́лище: / потщи́ся и сих злоде́йствия мя изба́вити, / све́тлое жили́ще доброде́телию стяжа́вшая, светоприе́мнице нетле́нная: / разжени́ о́блак страсте́й, и го́рния све́тлости сподо́би, / и све́та невече́рняго моли́твами Твои́ми.

Песнь 4.

Ирмос: Седя́й в Сла́ве:

О но́ваго и пресла́внаго смеше́ния же и растворе́ния! / Де́вству рождество́ соедини́ роди́выйся Богочелове́к: / се́тованным же днем весе́лие, / Своего́ почита́я страда́льца вмеси́.

Виждь, ка́ко Христа́ любя́ше, Христо́ви во́инствуяй, / враги́ бо Сего́ ре́вностию и огне́м погуби́, / и себе́ коне́чне до́брую и прия́тную Ему́ же́ртву усе́рдно отдаде́.

Победоно́сный от страда́льчеств до́блий разреши́, дерзнове́нно глаго́ля, / и презре́нием муче́ний зри́тели удиви́в, / и быв всей тва́ри но́вое и пресла́вное позо́рище.

Кость у́бо не сокруши́ся Бо́га и Влады́ки моего́, / о долготерпе́ния, и по умерщвле́нии стра́ждуща! / Во́ина же его́ огнь прие́м, и ко́ло устыде́ся, уме́ршу прикосну́тися.

Богородичен: Соуме́ршии Влады́це, живота́ служи́тели, / и совоста́вшии живу́т у Него́ ны́не ве́чно: / и Сы́ну Ма́терь спрославля́ют / благословя́ще Отца́, Сы́на и Ду́ха Свята́го.

Иный.

Ирмос: Христо́с моя́ си́ла, / Бог и Госпо́дь, / честна́я Це́рковь / Боголе́пно пое́т, взыва́ющи, / от смы́сла чи́ста о Го́споде пра́зднующи.

Сове́т совещава́ет нечести́вейший, / зри́те, я́ко вои́стинну есть стра́шно: / разуме́ бо окая́нный ме́рзкими бра́шны, / лю́ди Христо́вы оскверни́ти.

В де́ло приведе́ сове́т беззако́нный: / возбрани́ти бо повеле́в чи́стых яде́ний бра́шно, / и предложи́ти, я́же он оскверни́ кровьми́.

Слава: Бысть я́вственно и оглаше́нно беззако́ние всем христиа́ном: / те́мже я́коже уве́деша, / стеко́шася вси ку́пно в храм Госпо́день святы́й.

Богородичен: Тя ро́ждшую предве́чнаго от Отца́ Рожде́ннаго, / ны́не ве́рнии моли́твенницу предлага́ем: / Тоя́ моли́твами Христе́ преклоне́н, / благоуве́тлив бу́ди рабо́м Твои́м.

Катавасия: Седя́й в Сла́ве / на Престо́ле Божества́ / во о́блаце ле́гце, / прии́ди Иису́с Пребоже́ственный, / Нетле́нною Дла́нию / и спасе́ зову́щия: / сла́ва, Христе́, си́ле Твое́й.

Песнь 5.

Ирмос: Ужасо́шася вся́ческая:

Отверза́ются днесь преддве́рия благода́ти, / и упокое́ние ны́не са́мое прообража́ет Воскресе́ние: / си́це светоно́сне све́тлую Влады́чицу почита́юще, / и сла́внаго му́ченика.

Да́рует тезоимени́тый дар, Бог, Фео́дора, / возлюби́вшим я́вльшаго возлю́бленнаго явле́ние, / пресла́вных дел Творца́, / и Боже́ственных сил Самоде́теля содева́емаго.

Ничто́же к му́ченику лу́цы и стре́лы твоя́ / вра́же челове́ческаго спасе́ния: / и уме́рый бо живе́т, и возбну́, / и злоде́йством твои́м противля́яйся, / спаса́ет вся́каго правосла́внаго.

Богородичен: Стра́нное бя́ше пре́жде чу́до Богоотрокови́це, / страда́льческими же свиде́тельствы прия́т ве́ру несумне́нну, / и ве́руемое при́сно пребыва́ет чуди́мое, / и ве́рне покланя́емое.

Иный.

Ирмос: Бо́жиим / све́том Твои́м, Бла́же, / у́треннюющих Ти ду́ши / любо́вию озари́, молю́ся, / Тя ве́дети, Сло́ве Бо́жий, / и́стиннаго Бо́га, / от мра́ка грехо́внаго взыва́юща.

Тогда́шний у́бо архиере́й весь ужасну́вся, / нечести́ваго я́коже уве́де сове́т, / пе́сньми всено́щными Бо́га моля́ше, / не презре́ти в коне́ц люде́й жре́бия Его́.

Но ско́рый вои́стинну помо́щник, / во и́стине и теплоте́ призыва́ющих, / моле́ния их не презре́ вся́каго, / но скоре́йшее им соде́ловает разреше́ние начина́ния.

Слава: От вы́шних помо́щник посыла́ется я́ко скоре́е на зе́млю, / страстоте́рпец Фео́дор, / и пастыренача́льник явля́ется, / разреше́ние науча́я беззако́ннаго сове́та.

Богородичен: Никто́же притека́я к Твоему́ Влады́чице, заступле́нию те́пле, посрами́тся когда́, / но про́сит благода́ти, и дар прие́млет к поле́зному скоре́йший проше́ния.

Катавасия: Ужасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.

Песнь 6.

Ирмос: Боже́ственное сие́ и всечестно́е:

Пости́тися, Спа́се, не мо́гут дру́зи и сы́нове черто́га Твоего́: / Тебе́ бо Жениха́ с Ма́терию и с дру́гом Твои́м, / учрежда́ют предстоя́ща и слу́жат.

Отступи́ Бо́га спаса́ющаго, / отступи́ и от ра́зума злоимени́тый, / и киче́нием воста́ на ве́ру, / но вме́сто сего́ обре́те великоимени́таго.

Пострада́в предста́ му́дрший, и сотво́рь до́блий те́пльший, / к мучи́телем бо бра́нию, и побе́дою до́бре обучи́вся, / ниже́ у́мер отступи́ исправле́ния.

Богородичен: Изба́вльшеся днесь, Влады́чице, беды́ душетле́нныя, / чудесе́м страстоте́рпца Твоего́, / по Твоему́ Боже́ственному промышле́нию, / благода́ть обои́м возлага́ем.

Иный.

Ирмос: Жите́йское мо́ре, / воздвиза́емое зря напа́стей бу́рею, / к ти́хому приста́нищу Твоему́ прите́к, вопию́ Ти: / возведи́ от тли живо́т мой, / Многоми́лостиве.

Стра́нному ужаса́яся виде́ния твоего́, / архиере́й проти́во рече́: / ты кто еси́ го́споди, глаго́ляй мне? / Вразуми́ и научи́, ка́ко обря́щем скоре́йшую по́мощь?

Фео́дор рече́: аз есмь я́вственно страстоте́рпец, и слы́ши: / пшени́цу свари́в раздели́ лю́дем, / и та́ко спасу́тся от скве́рных бра́шен преле́стника.

Слава: Коль ве́лие чу́до твое́, / и пресла́вное твое́ заступле́ние Фео́доре! / Те́мже дерза́юще вси чи́сто к тебе́ прибега́ем, / и мо́лимся, спаси́ рабы́ твоя́.

Богородичен: Све́та жили́ще, и прия́телище чи́стое Сло́ва была́ еси́, / Отца́ благоволе́нием, и к Тебе́ посеще́нием Ду́ха Свята́го: / те́мже мя просвети́.

Катавасия: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.

Кондак, глас 8:

Ве́ру Христо́ву я́ко щит внутрь прие́м в се́рдце твое́м, / проти́вныя си́лы попра́л еси́ многострада́льче: / и венце́м небе́сным венча́лся еси́ ве́чно Фео́доре, я́ко непобеди́мый.

Икос: На престо́ле све́та носи́маго, / благода́рственно ве́рою воспева́ем Тя, / я́ко дарова́ние Боже́ственное дарова́л еси́, / до́бляго страда́ньми Фео́дора, / в житии́ треблаже́ннаго, я́ко побо́рника су́ща и́стины: / и́же благочести́вым помышле́нием стяжа́в Христа́, держа́вный, / бысть победи́тель на ле́стнаго, я́ко непобеди́мый.

Синаксарий.

Песнь 7.

Ирмос: Не послужи́ша тва́ри Богому́дрии:

Зако́ну рекл еси́ не лежа́ти пра́ведником Твои́м, Пра́ведный Влады́ко: / те́мже Ма́ти Твоя́, и многочу́дный сей раб Твой, / све́тлостию па́мяти сих днесь зако́ны разоря́ют поще́ния.

Коль сла́дкое, и вели́кое, и ра́достное ны́нешнее торжество́! / Е́же му́чеников нам до́блейший и преве́лий ны́не вообрази́, / еди́нем чудесе́м от нечи́стых чи́стыя лю́ди Христо́вы соверши́в.

К змие́м лю́тым сопроти́вльшагося, / и возмо́гшаго на душетле́ннаго же и оскверня́ющаго одушевле́нная телеса́, / венча́им побе́дными пе́сньми, и венце́в похвала́ми.

Богородичен: Родонача́льник у́бо проуве́дев душетле́нное бра́шно не убеже́: / Твои́ же ве́рнии лю́дие от Твоего́ му́ченика преднаучи́вшеся, и избе́гше всепа́губныя пи́щи, / с сим Влады́чице, спаси́тельная Тебе́ жрут.

Иный.

Ирмос: Росода́тельну у́бо пещь / соде́ла А́нгел / преподо́бным отроко́м, / халде́и же опаля́ющее / веле́ние Бо́жие / мучи́теля увеща́ вопи́ти: / благослове́н еси́, Бо́же оте́ц на́ших.

Росода́вец печа́ли, и распале́ния о́блак яви́лся еси́ пресла́вне, / и спасл еси́ от пе́щи мучи́тельския, зову́щия вся ве́рныя: / благослове́н еси́ Бо́же оте́ц на́ших.

Царю́ пребеззако́ннейший посрами́ся, / и да заградя́тся уста́ твоя́, поуча́ющаяся на нас беззако́нному сове́ту: / разруши́ бо твою́ кре́пость ца́рствуяй Царь и всех Госпо́дь.

Слава: Иулиа́не безу́мне, се́рдце твое́ все зло́бы испо́лнися, / обава́ется же от прему́драго Бо́га на́шего, / излия́вшееся ле́стно на нас, вопию́щих к Нему́: / благода́ть подава́еши нам.

Богородичен: Па́че сло́ва Твое́ бысть зача́тие, / и па́че ума́ Рождество́ Твое́ Всенепоро́чная: / Бо́га бо родила́ еси́ пло́тию, / спа́сшаго вся от тле́ния, Благослове́нная. / Те́мже ны́не Богоро́дице Тя сла́вим.

Катавасия: Не послужи́ша тва́ри Богому́дрии / па́че Созда́вшаго, / но, о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог, благослове́н еси́.

Песнь 8.

Ирмос: Изба́вителю всех, Всеси́льне, / посреде́ пла́мене благоче́ствовавшия, / снизше́д, ороси́л еси́ / – и научи́л еси́ пе́ти: / вся дела́, благослови́те, по́йте Го́спода.

Ра́дости Рождество́м испо́лнившая небе́сная и земна́я, / вре́менным се́тованием благода́ть благовре́менную подае́т вене́чнику, / спле́щущи све́тло пра́зднственная.

Суббо́тствуим челове́цы днесь, / от трудов вчера́шних почи́вше, / за Благослови́вшаго настоя́щий день упокое́нием, / и ны́не торжество́м му́ченика.

Вои́стинну сия́ пе́рвая в суббо́тах, / и суббо́т бы глаго́лалася суббо́та: / му́ченическия же благода́ти и си́лы Боже́ственныя испо́лнена, / спасе́ния вели́каго воспомина́ние.

Царя́ Бо́га чи́стыми бра́шны, / ца́рствия беззако́ннаго скверне́ния, чи́стый упраздни́, / и пресла́вным о́бразом чудоде́йства святу́ю седми́цу освяти́.

Богородичен: Извеща́ет Твое́ Отрокови́це та́инство, / му́чеников усе́рдная смерть: / я́ко бо Бо́гу ве́ровавше ро́ждшемуся, / а́ще и страсть во́лею претерпе́, / саме́х себе́ до́блии пожро́ша.

Иный.

Ирмос: Из пла́мене преподо́бным ро́су источи́л еси́, / и пра́веднаго же́ртву водо́ю попали́л еси́: / вся бо твори́ши, Христе́, то́кмо е́же хоте́ти. / Тя превозно́сим во вся ве́ки.

Из пла́мене я́ко изба́вился еси́ му́чениче Фео́доре, Боже́ственною си́лою: / си́це и ны́не нас спасл еси́ сам предста́тельством боже́ственным твои́м, / беззако́ннаго сове́та злоко́зненнаго.

Ве́чер водвори́ся плач рабо́м твои́м, / от лука́ваго лови́тельства супоста́та на́шего, / но во у́трие ра́дость возсия́, му́чениче терпеливоно́сче, / те́плою твое́ю по́мощию.

Слава: Изба́вителя тя обре́тше, в беды́ мы впа́дше, / и изба́вителя ко́зни вра́жия, / му́чениче Христо́в страстоте́рпче Фео́доре, / тя славосло́вим во вся ве́ки.

Богородичен: Недоумева́ет ум челове́ческий / Твоего́ Рождества́ Чи́стая, та́инство изрещи́: / и сего́ ра́ди Тя ве́рою благоче́стно, я́ко Богоро́дицу почита́ем, / и славосло́вим во вся ве́ки.

Катавасия: О́троки благочести́выя в пе́щи / Рождество́ Богоро́дичо спасло́ есть; / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте, дела́, / и превозноси́те Его́ во вся ве́ки.

Песнь 9.

Ирмос: Рождество́ Твое́ нетле́нно яви́ся: / Бог из боку́ Твое́ю про́йде, / я́ко Плотоно́сец яви́ся на земли́ / и с челове́ки поживе́. / Тя, Богоро́дице, тем вси велича́ем.

Стека́ется мно́жество отвсю́ду, в сень сведе́ния, и живу́щую благода́ть, / предпросия́вшаго в сла́ве всех му́чеников, / со Влады́чицею всех велича́ем.

Мужа́йся Христо́ва Це́рковь, / и держа́вствуй всу́е борю́щими: / Христо́вы бо дру́зи и предстоя́щии о тебе́ пеку́тся / и отстоя́щии я́коже до́блии, / Ему́же соверша́еши благода́рственная.

Возмне́вшася дре́вле умре́ти, / ве́щи показу́ют жит́и и по кончи́не, / и ве́ры па́ки предста́тельствовати с ра́вною ре́вностию. / Е́юже богатя́щеся Благоде́теля велича́ем.

Богородичен: Я́ко Боже́ственную Тя печа́ть пе́сньми, / запеча́танную Бо́жию кни́гу налага́ю нося́, / и собира́ю похвалы́ в Тебе́ Де́во: / си́це прославля́я наипа́че Твоего́ му́ченика.

Иный.

Ирмос: Бо́га / челове́ком не возмо́жно ви́дети, / на Него́ же не сме́ют чи́ни А́нгельстии взира́ти; / Тобо́ю бо, Всечи́стая, яви́ся челове́ком / Сло́во воплоще́нно, / Его́ же велича́юще, / с Небе́сными во́и / Тя ублажа́ем.

До́бре яви́лся еси́ побо́рник пресла́вне, и держа́вное заступле́ние нам / чту́щим твою́ честну́ю и ве́чную па́мять ны́не, / и твои́х страда́льчеств исправле́ния, / и бы́вшее в нас Боже́ственное заступле́ние.

Твое́ всеблаже́нне чу́до Фео́доре соверше́нное, / святы́ми ту́чами пое́тся, на весь мир блаже́нне: / те́мже и ле́тно собира́ющеся, / сла́ву возсыла́ем Христу́, тебе́ просла́вльшему.

Слава: Зря любо́вь восхваля́ющих тя му́чениче Христо́в, / благода́ть возда́рствуй вя́щшую: / и ве́ру ве́дый ели́ка есть пресла́вне, / не преста́й моли́твенниче тепле́йший му́чениче, / и хода́тай к Бо́гу на́шему явля́яся.

Богородичен: Пе́ти Де́во, Тя не престае́м, / помо́щницу, покро́в, ско́рое заступле́ние, / и предста́тельницу на́шу непосты́дную: / соблюди́ Твоя́ рабы́, вся́каго озлобле́ния, / вся́кия ко́зни лука́ваго свобожда́ющи при́сно.

Катавасия: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная, / Богоро́дице, Чи́стая Присноде́во.

Ексапостиларий: Подобен: Со ученики́:

Венчено́сче свя́те, предстоя́й со а́нгелы Христо́ву ны́не престо́лу, / и све́та отту́ду исполня́яйся страстоно́сче, / мир ми́рови непреста́нно исхода́тайствуй, и нам спасе́ние, / благоче́стно светоно́сную па́мять твою́ соверша́ющим, / Фео́доре всебога́те, му́чениче преукраше́нне.

Богородичен: Во чре́ве Твое́м Госпо́дь, / погиба́ющий мир от тле́ния призва́ти восхоте́в, / я́коже ве́дяше, всели́ся Богоро́дице. / Спасе́ние у́бо вси обретше, / возопии́м Тебе́ а́нгелово, е́же ра́дуйся Всепе́тая, / во всех жена́х благослове́нная: / и́бо ра́дость породила́ еси́ всей вселе́нней.

На хвалитех поставим стихи 4, глас 1. Подобен: Небе́сных чино́в:

Му́жа изря́дна вы́шняго воинствосло́вия ве́рнии, / я́ко терпели́ваго ору́жника на́шего благоче́стия, согла́сно соше́дшеся, / пе́сньми та́инственными восхва́лим, глаго́люще: / досточу́дне му́чениче Иису́сов, / моли́ся о чту́щих тя.

Тезоимени́тым твои́м зва́нием, да́ре Бо́жий вои́стинну, / скорбя́щим всем утеше́ние пода́лся еси́ Фео́доре треблаже́нне, / вся́кий бо к твоему́ приближа́яся хра́му вои́стинну, / с весе́лием прие́мля воздая́ния чуде́с твои́х, / почита́ет Христа́.

Благоче́стия бога́тство, и све́тлость, / страда́льческими по́двиги, себе́ сокро́виществовав, / всю кре́пость твою́ дар прия́тный Бо́гу прине́сл еси́, / исполня́я в по́двизех со тща́нием / богодарова́нное твое́ призыва́ние.

Всесве́тлым торжество́м Боже́ственнаго му́ченика, напита́имся вси, / и ве́рно возвесели́мся празднолю́бцы, / почита́юще све́тлое празднество́ его́ сконча́ния, / пе́сненно воспева́юще Иису́са, / просла́вившаго па́мять его́.

Слава, глас 6: Свяще́ния дар, и бога́тство Боже́ственныя жи́зни, / показа́лся еси́ ми́ру Фео́доре: / Христо́с бо му́дре твою́ па́мять просла́ви, / в ню́же согла́сно ве́рнии ра́дующеся, / пое́м по́двиги боле́зней твои́х.

И ныне: Богородичен, глас тойже: Богоро́дице, Ты еси́ лоза́ и́стинная, / возрасти́вшая нам Плод живота́, / Тебе́ мо́лимся, моли́ся Влады́чице, / со страстоте́рпцем, и все́ми святы́ми, / поми́ловатися душа́м на́шим.

На стиховне стихиры святаго, глас 4. Самогласны:

Лику́ют собо́ры му́чеников ра́достно, / ны́не в хра́ме твое́м, страстоте́рпче Фео́доре, / и а́нгельстии чи́нове, / страда́льчества пле́щут терпе́ния твоего́: / и сам венцеда́вец Христо́с предстои́т, / богатотво́рная дарова́ния твои́м певце́м десни́цею подая́, / Его́же возжеле́в взыска́л еси́, / и обре́т бесе́довал еси́, / Его́же жела́л еси́: / Его́же моли́, спасти́ и просвети́ти ду́ши на́ша.

Стих: Пра́ведник я́ко фи́никс процвете́т, я́ко кедр, и́же в Лива́не, умно́жится.

Чи́стый и непоро́чный пост прише́дый ны́не к нам, / му́ченических чуде́с соверше́нство совведе́: / посто́м бо душе́вныя скве́рны очи́стим, / и му́ченическими зна́меньми, и страда́льчествы, / до́блественно на стра́сти вмужи́мся: / отону́дуже и свяще́ннаго воздержа́ния благода́тию просвеща́ющеся, / и чудоде́йствы Фео́дора му́ченика, / ко Христу́ утвержда́емся ве́рою, / прося́ще Его́, / спасе́ние пода́ти душа́м на́шим.

Стих: Насажде́ни в дому́ Госпо́дни, во дво́рех дому Бо́га на́шего процвету́т.

Му́ченическим твои́м дерзнове́нием к Бо́гу Фео́доре, / отсту́пническую на ве́ру Христо́ву кознь / су́етну сотвори́л еси́, / побо́рник благоче́ствующим был еси́ лю́дем, / предста́нием ужа́сным, / скве́рных бра́шен же́ртвы и́дольскими их изба́вль. / Те́мже тя я́ко и́долов потребителя, / и я́ко стада Христо́ва спасителя и хранителя, / и предстателя на́шего благопослушли́ваго, / чту́ще в пе́снех мо́лим, / очище́нию и просвеще́нию / тобо́ю дарова́тися душа́м на́шим.

Слава, глас 8: Страда́льческим му́жеством / благоче́стно вооружи́вся страстоте́рпче Христо́в, / и слове́сное служе́ние та́йно / побора́я си́лою Его́, / и́долов нече́стие и мучи́телей преще́ние не́мощно показа́л еси́, / презира́я муче́ния и вре́менный огнь. / Но, о Боже́ственных даро́в и вещь, и и́мя! / От вся́каго обстоя́ния моли́твою твое́ю спаса́й / соверша́ющия па́мять твою́.

И ныне, Богородичен: Влады́чице, приими́ моли́твы рабо́в твои́х, / и изба́ви нас / от вся́кия ну́жды и печа́ли.

И прочее последование Утрени. Совокупляем и час 1.

НА ЛИТУРГИИ

Изобразительная, и от канона святаго песнь 3 и 6.

Прокимен глас 7: Возвесели́тся пра́ведник о Го́споде, / и упова́ет на Него́. Стих: Услы́ши Бо́же глас мой, внегда́ моли́ти ми ся к Тебе́.

Апостол дне, ко Евреем, зачало 303.

Многоча́стне и многообра́зне дре́вле Бог глаго́лавый отце́м во проро́цех, в после́док дний сих глаго́ла нам в Сы́не, Его́же положи́ насле́дника всем, И́мже и ве́ки сотвори́. И́же сый сия́ние сла́вы и о́браз Ипостаси Его́, нося́ же вся́ческая глаго́лом си́лы Своея́, Собо́ю очище́ние сотвори́в грехо́в на́ших, се́де одесну́ю престо́ла вели́чествия на высо́ких. Толи́ко лу́чший быв а́нгелов, ели́ко пресла́внее па́че их насле́дствова и́мя. Кому́ бо рече́ когда́ от а́нгел: Сын Мой еси́ Ты, Аз днесь роди́х Тя? И па́ки: Аз бу́ду Ему́ во Отца́, и Той бу́дет мне в Сы́на? Егда́ же па́ки вво́дит Перворо́днаго во вселе́нную, глаго́лет: и да покло́нятся Ему́ вси а́нгели Бо́жии. И ко а́нгелом у́бо глаго́лет: творя́й а́нгелы Своя́ ду́хи и слуги́ Своя́ огнь паля́щь. К Сы́ну же: престо́л Твой, Бо́же, в век ве́ка: жезл пра́вости жезл ца́рствия Твоего́: возлюби́л еси́ пра́вду и возненави́дел еси́ беззако́ние: сего́ ра́ди пома́за Тя, Бо́же, Бог Твой еле́ем ра́дости, па́че прича́стник Твои́х. И па́ки: в нача́ле Ты, Го́споди, зе́млю основа́л еси́, и дела́ руку́ Твое́ю суть небеса́. Та поги́бнут, Ты же пребыва́еши, и вся, я́коже ри́за, обетша́ют, и я́ко оде́жду свие́ши их, и изменя́тся: Ты же то́йжде еси́, и ле́та Твоя́ не оскуде́ют.

Святому Апостол, к Тимофею, зачало 292.

Ча́до Тимофе́е, возмога́й во благода́ти, я́же о Христе́ Иису́се, и я́же слы́шал еси́ от мене́ мно́гими свиде́тели, сия́ преда́ждь ве́рным челове́ком, и́же дово́льни бу́дут и ины́х научи́ти. Ты у́бо злопостражди́ я́ко добр во́ин Иису́с Христо́в. Никто́же бо во́ин быва́я обязу́ется ку́плями жите́йскими, да воево́де уго́ден бу́дет. А́ще же и постра́ждет кто, не венча́ется, а́ще не зако́нно му́чен бу́дет. Тружда́ющемуся де́лателю пре́жде подоба́ет от плода́ вкуси́ти. Разуме́й, я́же глаго́лю: да даст у́бо тебе́ Госпо́дь ра́зум о всем. Помина́й Го́спода Иису́са Христа́ воста́вшаго от ме́ртвых, от се́мене Дави́дова, по благовествова́нию моему́, в не́мже злостражду́ да́же до уз, я́ко злоде́й, но сло́во Бо́жие не вя́жется. Сего́ ра́ди вся терплю́ избра́нных ра́ди, да и ти́и спасе́ние улуча́т е́же о Христе́ Иису́се, со сла́вою ве́чною.

Аллилуия, глас 4: Пра́ведник я́ко фи́никс процвете́т, я́ко кедр, и́же в Лива́не, умно́жится. Стих: Насажде́ни в дому́ Госпо́дни, во дво́рех дому Бо́га на́шего процвету́т.

Ева́нгелие от Марка, зачало 10.

Во вре́мя о́но, идя́ше Иису́с в суббо́ты сквозе́ се́яния, и нача́ша ученицы́ Его́ путь твори́ти, востерза́юще кла́сы. И фарисе́е глаго́лаху Ему́: виждь, что творя́т в суббо́ты, его́же не досто́ит? И Той глаго́лаше им: не́сте ли николи́же чли, что сотвори́ Дави́д, егда́ тре́бование име́ и взалка́ сам и и́же с ним? Ка́ко вни́де в дом Бо́жий при Авиафа́ре архиере́и, и хле́бы предложе́ния снеде́, и́хже не досто́яше я́сти то́кмо иере́ем, и даде́ и су́щим с ним? И глаго́лаше им: суббо́та челове́ка ра́ди бысть, а не челове́к суббо́ты ра́ди. Те́мже госпо́дь есть Сын Челове́ческий и суббо́те.

И вни́де па́ки в со́нмище: и бе та́мо челове́к, су́ху имы́й ру́ку. И назира́ху Его́, а́ще в суббо́ты исцели́т его́, да Нань возглаго́лют. И глаго́ла челове́ку су́ху иму́щему ру́ку: ста́ни посреде́. И глаго́ла им: досто́ит ли в суббо́ты добро́ твори́ти, или́ зло твори́ти? Ду́шу спасти́, или́ погуби́ти? Они́ же молча́ху. И воззре́в на них со гне́вом, скорбя́ о окамене́нии серде́ц их, глаго́ла челове́ку: простри́ ру́ку твою́. И простре́: и утверди́ся рука́ его́ цела́, я́ко друга́я.

И святаго, от Иоанна, зачало 52.

Рече́ Госпо́дь Свои́м ученико́м: сия́ запове́даю вам, да лю́бите друг дру́га. А́ще мир вас ненави́дит, ве́дите, я́ко Мене́ пре́жде вас возненави́де. А́ще от ми́ра бы́сте бы́ли, мир у́бо свое́ люби́л бы: я́коже от ми́ра не́сте, но Аз избра́х вы от ми́ра, сего́ ра́ди ненави́дит вас мир. Помина́йте сло́во, е́же Аз рех вам: несть раб бо́лий го́спода своего́. А́ще Мене́ изгна́ша, и вас изжену́т: а́ще сло́во Мое́ соблюдо́ша, и ва́ше соблюду́т. Но сия́ вся творя́т вам за и́мя Мое́, я́ко не ве́дят Посла́вшаго Мя. А́ще не бых прише́л и глаго́лал им, греха́ не бы́ша име́ли: ны́не же вины́ не и́мут о гресе́ свое́м. Ненави́дяй Мене́, и Отца́ Моего́ ненави́дит. А́ще дел не бых сотвори́л в них, и́хже ин никто́же сотвори́, греха́ не бы́ша име́ли: ны́не же и ви́деша, и возненавидеша Мене́ и Отца́ Моего́. Но да сбу́дется сло́во, пи́санное в зако́не их, я́ко возненави́деша Мя ту́не. Егда́ же прии́дет Уте́шитель, Его́же Аз послю́ вам от Отца́, Дух и́стины, И́же от Отца́ исхо́дит, Той свиде́тельствует о Мне. И вы же свиде́тельствуете, я́ко искони́ со Мно́ю есте́.

Сия́ глаго́лах вам, да не соблазните́ся. От со́нмищ иждену́т вы, но прии́дет час, да всяк, и́же убие́т вы, мни́тся слу́жбу приноси́ти Бо́гу.

Причастен: В па́мять ве́чную бу́дет пра́ведник, / от слу́ха зла не убои́тся.

На трапезе чтем слово похвальное о святем Феодоре, святаго Григория Нисскаго. И ядим боб обваренный, с маслинами белыми и черными. Причащаемся же и варения с маслом прилучившагося, и колива: вина же испиваем по красоволю, ради святаго. Сие же прияхом от лавры преподобнаго отца нашего Саввы, и от богоноснаго отца нашего Евфимия.

Ведати подобает, яко дважды прияхом ясти рыбы в сей Великий пост, в праздник Благовещения, и Цветоносия.

НЕДЕЛЯ ПЕРВАЯ СВЯТАГО ПОСТА

В нюже православие воспоминается. Бдение обычное.

В СУББОТУ ВЕЧЕРА, НА МАЛЕЙ ВЕЧЕРНИ

Поставим стихи 4, и поем стихи подобныя. Творение Николаа, глас 1. Подобен: Небе́сных чино́в:

Ны́не благоче́стия све́тлость всем распростре́ся, / разгоня́ющи лесть нече́стия я́ко о́блак, / просвеща́ющи же сердца́ благочести́вых: / прииди́те вси припаде́м, / благочестивому́дренно честны́м ико́нам Христо́вым / покланя́ющеся правосла́внии.

Священнообра́зными ико́нами ны́не украша́ется, / я́ко неве́ста укра́шена Христо́ва Це́рковь, / и всех созыва́ет духо́вно пра́здновати: / сни́демся во единомы́слии и ве́ре, / ра́достно велича́юще Го́спода.

Ми́ре весь весели́ся: / се бо Госпо́дь низложи́ / с высоты́ нече́стия держа́ву неизрече́нным промышле́нием. / И смире́ннии вознесо́хомся днесь / к ве́ре правосла́вия, / благочести́вою цари́цею наставля́еми.

К первообра́зному но́сится, / глаго́лет Васи́лий, честь ико́ны: / сего́ ра́ди в любви́ почита́ем / ико́ны Спа́са Христа́, и святы́х всех: / да сих собра́вше, / никогда́же ны́не злоче́стием отведе́мся.

Слава, и ныне: Богородичен. Подобен: Безнача́льным, и Боже́ственным естество́м неви́димый, / Челове́к ви́ден бысть Отрокови́це, / от чи́стых Твои́х крове́й, / за кра́йнее благоутро́бие: / Его́же пло́ти написа́вше подо́бие, / че́стно покланя́емся вси ве́рнии, / и благоче́стно велича́ем.

На стиховне, глас 2. Подобен: До́ме Евфра́фов:

Губи́тельства тлетво́рнаго / избе́гше злосла́вных, / правосла́вия сия́нием, / сердца́ми просвети́мся ве́рнии / Бо́га сла́вяще.

Стих: Принеси́те Го́сподеви честь и сла́ву.

А́риева нечи́стая / упраздни́ся пре́лесть, / Македо́ния, Петра́, / Севи́ра же и Пи́рра: / и све́тит Свет трисо́лнечный.

Стих: Поклони́теся Ему́ во дворе́ святе́м Его́.

Не ктому́ злочести́вых / похваля́ется мра́чное уче́ние: / Бог бо правосла́вным, / изволе́нием Феодо́ры, / жезл кре́пости дае́т.

Слава, и ныне, Богородичен. Подобен:

Вознесла́ еси́ / смире́нных рог Богоро́дице, / ро́ждшая Бо́га Сло́ва: / те́мже ве́рно Тя / вси чту́ще велича́ем.

Тропарь, Пречисто́му о́бразу Твоему́: И бывает отпуст.

НА ВЕЛИЦЕЙ ВЕЧЕРНИ

По обычном стихословии, Го́споди воззва́х, на глас Осмогласника, поставим стихов 10: и поем стихиры воскресны 3, и анатолиевы 3, и Триоди подобны 4. Глас 6: Всю отложи́вше:

Тя непостижи́маго, пре́жде денни́цы / безнача́льно из Невеще́ственнаго возсия́вшаго, / безпло́тнаго же чре́ва Роди́телева, / проро́цы Го́споди, Твои́м Ду́хом вдохнове́ни, / прореко́ша Отроча́ бы́ти, / из Неискусобра́чныя воплоща́ема, / челове́ком совокупля́ема, / и су́щими на земли́ зри́ма: / и́миже я́ко ще́дрый / просвеще́ния сподо́би Твоего́, / воспева́ющих неизрече́нное, / и честно́е Твое́ Воскресе́ние.

Подобен: Сло́вом Тя пропове́давшии / богоглаго́ливии проро́цы, / и де́лы поче́тшии, / безконе́чную жизнь приплоди́ша: / тва́ри бо Влады́ко, па́че Тебе́ Соде́теля, / служи́ти не претерпе́вше, / ми́ра всего́ ева́нгельски отврати́шася, / и сообра́зни бы́ша стра́сти Твое́й, / ю́же провозвести́ша: / и́хже моли́твами, / сподо́би непоро́чно прейти́ / воздержа́ния по́прище, / еди́не Многоми́лостиве.

Естество́м неопи́санный Боже́ственным Твои́м сый, / на после́дняя Влады́ко вопло́щься, / изво́лил еси́ описова́тися: / пло́ти бо прия́тием, и сво́йства вся сея́ взял еси́. / Те́мже вид Твой образова́ния опису́ющии / любе́зно целу́ем, / к Твое́й любви́ возвыша́еми, / и исцеле́ний благода́ть почерпа́ем из него́, / апо́стольским после́дующе / Боже́ственным преда́нием.

Пречестно́е украше́ние Христо́ва Це́рковь, / честны́х прия́т и святы́х ико́н, / Спа́са Христа́ и Богома́тере, / и всех святы́х светле́йшее возставле́ние, / и́мже просвеща́ется, и красу́ется благода́тию, / и со́нмище отлага́ет ерети́ческое изгоня́щи: / и ра́дующися сла́вит человеколю́бца Бо́га, / ея́ ра́ди претерпе́вша стра́сти во́льныя.

Слава, глас 2: Благода́ть возсия́ и́стины, / прообразу́емая дре́вле сено́вно, / ны́не явле́нно сконча́ся: / се бо Це́рковь воплоще́нным о́бразом Христо́вым, / я́ко прекра́сною у́тварию облачи́тся, / ски́нии свиде́ния о́браз пронапису́ющи, / и правосла́вную ве́ру содержа́щи: / да его́же почита́ем, / сего́ и о́браз держа́ще, не прельща́емся, / да облеку́тся в студ си́це неве́рующии: / нам бо сла́ва зрак Воплоти́вшагося / благоче́стно покланя́емый, не боготвори́мый. / Той облобыза́юще ве́рнии возопии́м: / Бо́же, спаси́ лю́ди Твоя́, и благослови́ достоя́ние Твое́.

И ныне, Богородичен 1-й гласа.

На литии же, яко обычно, стихира храма.

Слава, глас 2: Ра́дуйтеся проро́цы честни́и, / зако́н Госпо́день до́бре учини́вшии, / и ве́рою я́вльшиися необори́мии столпи́ неукло́ннии: / вы бо и хода́таи яви́стеся Но́ваго Заве́та Христо́ва, / и преста́вившеся на небеса́. Того́ моли́те, / умири́ти мир, и спасти́ ду́ши на́ша.

И ныне, Богородичен, глас тойже: Все упова́ние мое́ / на Тя возлага́ю, Ма́ти Бо́жия, / сохрани́ мя под покро́вом Твои́м.

На стиховне Осмогласника.

Слава, глас 2: Из нече́стия во благоче́стие преше́дше, / и све́том ра́зума просвети́вшеся, / псало́мски рука́ми воспле́щим, / благода́рственно хвалу́ Бо́гу принося́ще: / и на стена́х, и дсках, и на свяще́нных сосу́дех, / начерта́нным свяще́нным образо́м Христо́вым, / и Пречи́стыя, и всех святы́х, / че́стно поклони́мся, отлага́юще злоче́стную злосла́вных ве́ру: / [честь бо о́браза, я́коже глаго́лет Васи́лий, на первообра́зное прехо́дит,] / прося́ще моли́твами Пречи́стыя Твоея́ Ма́тере, Христе́ Бо́же наш, и всех святы́х, / дарова́ти нам ве́лию ми́лость.

И ныне, Богородичен: О чудесе́ но́ваго всех дре́вних чуде́с! / Кто бо позна́ ма́терь без му́жа ро́ждшую, / и на руку́ нося́щую, / всю тварь Содержа́щаго? / Бо́жие есть изволе́ние, Ро́ждшееся. / Его́же я́ко Младе́нца, Пречи́стая, / Твои́ма рука́ма носи́вшая, / и Ма́терне дерзнове́ние к Нему́ иму́щая, / не преста́й моля́щи о чту́щих Тя, / уще́дрити и спасти́ ду́ши на́ша.

Тропарь: Богоро́дице Де́во ра́дуйся: дважды,

И праздника, глас 2:

Пречи́стому о́бразу Твоему́ покланя́емся Благи́й, / прося́ще проще́ния прегреше́ний на́ших Христе́ Бо́же: / во́лею бо благоволи́л еси́ пло́тию взы́ти на Крест, / да изба́виши, я́же созда́л еси, от рабо́ты вра́жия. / Тем благода́рственно вопие́м Ти: / ра́дости испо́лнил еси́ вся Спа́се наш, / прише́дый спасти́ мир. единожды. И прочее последование бдения.

НА УТРЕНИ

На Бог Господь, тропарь воскресен, дважды.

Слава, настоящий, глас 2:

Пречи́стому о́бразу Твоему́ покланя́емся Благи́й, / прося́ще проще́ния прегреше́ний на́ших Христе́ Бо́же: / во́лею бо благоволи́л еси́ пло́тию взы́ти на Крест, / да изба́виши, я́же созда́л еси, от рабо́ты вра́жия. / Тем благода́рственно вопие́м Ти: / ра́дости испо́лнил еси́ вся Спа́се наш, / прише́дый спасти́ мир.

И ныне: Вся па́че смы́сла, / вся пресла́вная Твоя́ Богоро́дице та́инства, / чистоте́ запеча́танной, и де́вству храни́му, / Ма́ти позна́лася еси́ нело́жна, / Бо́га ро́ждши и́стиннаго: / Того́ моли́ спасти́ся душа́м на́шим.

И обычное стихословие: и прочее последование.

Каноны: воскресный, и Богородицы, и Триоди на 6. Творение господина Феофана, егоже краестрочие: Днесь благоче́стия Богосве́тлая прии́де заря́. Глас 4.

Песнь 1.

Ирмос: Мо́ря чермну́ю:

Пле́щуще с весе́лием днесь ве́рнии возопии́м: / коль чу́дна дела́ Твоя́ Христе́, и вели́ка си́ла, / на́ше единомы́слие и согла́сие соде́лавый!

День ра́достный богому́дреннии / прииди́те соверши́м, / ны́не не́бо и земля́ весели́тся, и а́нгелов чи́ни, / и челове́ков собра́ния изря́дно пра́зднующе.

Преве́лие благодея́ние ви́дяще, рука́ми воспле́щим: / разстоя́щияся у́ды Христо́вы, совоку́плены во еди́нство, / и Бо́га похва́лим мир пода́вшаго.

Да́шася Це́ркви днесь победи́тельная, / Богодви́жным манове́нием и сове́том, / Михаи́ла же и Феодо́ры, / благоче́стно ве́ру содержа́щих царе́й на́ших.

Богородичен: Ору́жия злочести́вых исчезо́ша я́ве ересе́й: / храм бо Твой Пречи́стая Чи́стая, / во образе́х украша́емый всеблаголе́пно зря́ще, / ны́не всесвяще́нно ра́дуемся.

Катавасия: Мо́ря чермну́ю пучи́ну, / невла́жными стопа́ми / дре́вний пешеше́ствовав Изра́иль, / крестообра́зныма Моисе́овыма рука́ма, / Амали́кову си́лу в пусты́ни победи́л есть.

Песнь 3.

Ирмос: Весели́тся о Тебе́:

Не ктому́ нечести́вых еретико́в ны́не бровь взе́млется: / Бо́жия бо си́ла правосла́вие удержа́ла есть.

О́блацы проро́честии, / животворя́щую с небесе́ днесь ро́су нам да кропя́т, / на воста́ние ве́ры.

Благогла́сно та́йныя апо́столов Христо́вых трубы́, / па́че естества́ да вопию́т, / честны́х образо́в исправле́ние.

Воспои́м Христа́, показа́вшаго нам / цари́цу благочести́вую, христолюби́вую, / с Боговенча́нною о́траслию.

Богородичен: Селе́ние Твое́ свяще́нное / дости́гше ве́рнии, Пречи́стая, / светови́дною благода́тию ны́не озари́тися, мо́лимся.

Катавасия: Весели́тся о Тебе́ Це́рковь Твоя́ Христе́, зову́щи: / Ты моя́ кре́пость Го́споди, / и прибе́жище, и утвержде́ние.

Седален, глас 1. Подобен: Лик а́нгельский:

Боже́ственный Твой зрак, во о́бразе образу́юще Христе́, / я́сно вопие́м Рождество́, / чудеса́ неизглаго́ланная, во́льное распя́тие. / Отону́дуже бе́сове отго́нятся стра́хом, / и злосла́внии в посупле́нии рыда́ют, / я́ко сих соприча́стницы.

Слава: Зра́ками проро́ков, апо́столов ви́дами, / му́чеников свяще́нных, и святы́х всех ико́нами, / и изображе́ньми свяще́нно красу́ется: / Жениха́ же мы́сленнаго и Неве́сты украша́ется у́мными красова́ньми, / ма́ти вы́шний Сио́н.

И ныне, Богородичен: Любо́вию Чи́стая, Твою́ святу́ю ико́ну почита́ющим, / и Бо́жию Тя и́стинную Ма́терь согла́сно возвеща́ющим, / и ве́рно покланя́ющимся Ти, / храни́тельница яви́лася еси́, и держа́вное предста́тельство, / отвраща́ющи вся́кое лю́тое дале́че сих, / я́ко вся могу́щая.

Песнь 4.

Ирмос: Вознесе́на Тя:

Наи́тием Боже́ственным Уте́шителя, Твой храм освяти́, / и прише́ствием Сего́ ерети́ческую пре́лесть отжени́, / Сло́ве Бо́жий многоми́лостиве.

Ну́жднейшаго изба́вивый злоче́стия Твоя́ лю́ди, / покажи́ благоче́стия ре́вностию разжже́ны, / и ве́рою взыва́ющия: / сла́ва си́ле Твое́й Го́споди.

Священнообра́зными изображе́ньми, / образо́в Христо́вых зря́ще и Богоро́дицы, / сия́ющая Боже́ственная селе́ния, / священноле́пно ра́дуемся.

Цари́ца по обоему́ укра́шена, / и́стиннаго возжеле́вши Христо́ва Ца́рства, / Сего́ написа́ о́браз пречи́стый, / и святы́х изображе́ния.

Богородичен: Воплоще́нна роди́вши Боже́ственнаго Сло́ва, / Боголе́пное освяще́ние Благода́тная, Сего́ показа́ла еси́: / те́мже Твой храм светови́дный обновля́ем.

Катавасия: Вознесе́на Тя ви́девши Це́рковь на Кресте́, / со́лнце пра́ведное, / ста в чи́не свое́м, / досто́йно взыва́ющи: / сла́ва си́ле Твое́й Го́споди.

Песнь 5.

Ирмос: Ты Го́споди мой:

Положи́ Го́споди Твое́й Це́ркви утвержде́ние, / непрекло́нней пребы́ти в век ве́ка / от смяте́ний ересе́й.

Во всю зе́млю све́тлость возсия́ свы́ше, / да́ннаго ве́рным весе́лия, / и Боже́ственнаго заступле́ния.

Еди́не Благи́й, и исто́чниче бла́гости, / Ты возвы́си правосла́вных рог, / чту́щих о́браз Твой.

Свет незаходи́мый нам благоче́стия возсия́, / веле́нием Богодухнове́нным ве́рных па́стырей, / и ма́нием Богому́дрым.

Богородичен: Обнови́ нам дре́внее благоле́пие, / Пречи́стая Богома́ти, / и дом Твой сей освяти́ / Твое́ю благода́тию.

Катавасия: Ты Го́споди мой, Свет в мир прише́л еси́. / Свет Святы́й, обраща́яй из мра́чна неве́дения, / ве́рою воспева́ющих Тя.

Песнь 6.

Ирмос: Пожру́ Ти:

Пи́шется и почита́ется ве́рно / покланя́емый о́браз Влады́ки, / и прие́млет па́ки Це́рковь дерзнове́ние, / благоче́стно Спа́са прославля́ющи.

Обнажа́ется се́тования, и тьмы ересе́й Христо́ва Це́рковь, / и но́сит ри́зу весе́лия, / и Боже́ственною и светоно́сною покрыва́ется благода́тию.

Благосла́вия дре́вняго осия́ния получи́ правосла́вных собо́р, / Феодо́ры манове́нием цари́цы, / и ея́ сы́на благочести́ваго Михаи́ла самоде́ржца.

Богородичен: Дре́вле свиде́ния повеле́вый бы́ти ски́нии: / я́ко в ски́нии слове́сней, в Тебе́ живе́т Еди́н Препросла́вленный, / прославля́яй храм Твой Де́во чудесы́.

Катавасия: Пожру́ Ти со гла́сом хвале́ния Го́споди, / Це́рковь вопие́т Ти, / от бесо́вския кро́ве очи́щшися, / ра́ди ми́лости от ребр Твои́х / исте́кшею кро́вию.

Кондак, глас 2. Самогласен:

Неопи́санное Сло́во О́тчее, / из Тебе́ Богоро́дице описа́ся воплоща́емь: / и оскве́рншийся о́браз в дре́внее вообрази́в, / Боже́ственною добро́тою смеси́. / Но испове́дающе спасе́ние, де́лом и сло́вом, / сие́ вообража́ем.

Икос: Сие́ смотре́ния та́инство, / дре́вле проро́цы Богови́дно вдохнове́ни бы́вше, / нас ра́ди в концы́ веко́в дости́гших предвозвести́ша, / получи́вше сего́ сия́ния. / Ра́зум у́бо Боже́ственный от него́ взе́мше, / Еди́наго Го́спода Бо́га зна́ем, / в трие́х Ипоста́сех покланя́емаго: / и Тому́ еди́ному служа́ще, / еди́ну ве́ру, и еди́но креще́ние иму́ще, / во Христа́ облеко́хомся, / но испове́дающе спасе́ние, де́лом и сло́вом, / сие́ вообража́ем.

Синаксарь.

Песнь 7.

Ирмос: В пещи́ Авраа́мстии:

Да сликовству́ет церко́вней све́тлости / любо́вию Боже́ственною а́нгельское во́инство, / Богому́дренно воспева́ющее: / благослове́н еси́ в хра́ме сла́вы Твоея́ Го́споди.

Це́рковь перворожде́нных, и торжество́ ра́дуется, / зря́ще ны́не боже́ственныя лю́ди, единому́дренно воспева́ющия: / благослове́н еси́ в хра́ме сла́вы Твоея́ Го́споди.

Изба́влени пре́жде мра́чныя е́реси, / ма́нием Феодо́ры достоле́пныя цари́цы, воспева́ем: / благослове́н еси́ в хра́ме сла́вы Твоея́ Го́споди.

Богородичен: Па́че вы́шних ликостоя́ний, вознесла́ся еси́ Всечи́стая, / еди́на бы́вши Ма́ти Вседе́теля. / Ра́дующеся у́бо взыва́ем: / благослове́нна Ты еси́ в жена́х, всенепоро́чная Влады́чице.

Катавасия: В пещи́ Авраа́мстии о́троцы перси́дстей, / любо́вию благоче́стия па́че, / не́жели пла́менем опаля́еми взыва́ху: / благослове́н еси́ в хра́ме сла́вы Твоея́ Го́споди.

Песнь 8.

Ирмос: Ру́це распросте́р:

Зако́ны Це́ркве оте́ческия сохраня́юще, о́бразы пи́шем, / и лобза́им усты́, и се́рдцем, и хоте́нием / Христо́вы, и Его́ святы́х, зову́ще: / благослови́те вся дела́ Госпо́дня Го́спода.

На первообра́зное я́ве о́браза, / по́честь и поклоне́ние вознося́ще, / чтим, Богоглаго́ливых уче́нием после́дующе, / и Христу́ ве́рою зове́м: / благослови́те вся дела́ Госпо́дня Го́спода.

Ум озари́вши просвеще́нием Боже́ственнаго Ду́ха, / честна́я цари́ца, плоды́ Богому́дренныя иму́щи, / благоле́пие возлюби́ Це́ркве Христо́вы, и красоту́, / благословя́щи ку́пно с ве́рными Иису́са Богочелове́ка.

Богородичен: Луча́ми све́та у́мнаго, освеща́емый Боже́ственный дом Твой, / осеня́ет ны́не всех о́блаком Ду́ха, / и освяща́ет ве́рныя согла́сно пою́щия: / благослови́те вся дела́ Госпо́дня Го́спода.

Катавасия: Ру́це распросте́р Дании́л, / львов зия́ния в ро́ве затче́: / о́гненную же си́лу угаси́ша, / доброде́телию препоя́савшеся, / благоче́стия рачи́тели о́троцы, взыва́юще: / благослови́те вся дела́ Госпо́дня Го́спода.

Песнь 9.

Ирмос: Ка́мень нерукосе́чный:

Священнописа́ньми образо́в укра́шеную, / зря́ще па́ки честну́ю Це́рковь, / со благогове́нием вси притеце́м и Бо́гу возопии́м: / Тебе́ велича́ем Трисвяты́й.

Честь и сла́ву стяжа́вши Це́рковь, / Крест Твой и честны́я ико́ны, и святы́х изображе́ния, / с весе́лием Влады́ко и ра́достию велича́ет Тя.

Освети́ Боже́ственною Твое́ю сла́вою лю́ди на́ши Ще́дрый, / и ополче́ньми а́нгельскими, и всеору́жествы сия́ огради́, / язы́ков свире́пство покаря́я им Влады́ко.

Богородичен: Взя́тся прама́тере Е́вы осужде́ние Богоро́дице, / я́ко Ты всех Влады́ку несказа́нно Чи́стая родила́ еси́: / Его́же и ны́не подо́бие на ико́нах целу́ем.

Катавасия: Ка́мень нерукосе́чный / от несеко́мыя горы́ Тебе́ Де́во, / краеуго́льный отсече́ся, / Христо́с, совокупи́вый разстоя́щаяся естества́. / Тем веселя́щеся, Тя Богоро́дице велича́ем.

Ексапостиларий утренний воскресный, единожды. И настоящий. Подобен: Со ученики́ взы́дем:

Взыгра́йте, восплещи́те, с весе́лием воспо́йте: / коль чу́дная и стра́нная Твоя́ Христе́, вопию́ще, дела́! / И кто возмо́жет изрещи́ Спа́се могу́тства, Тебе́, / на́ше единомы́слие и согла́сие / во еди́ну соедини́вшаго це́рковь?

Богородичен: Ору́жия ны́не оскуде́ша вражде́бныя е́реси, / и па́мять ея́ исчезе́ с шу́мом: / храм бо Твой Всечи́стая всеблаголе́пно зря́ще, / укра́шенный благода́тьми честны́х ико́н, / ра́дости исполня́емся вси.

На хвалитех стихиры воскресны, 4: и анатолиев 1: и Триоди подобны три, глас 4. Подобен: Дал еси́ зна́мение:

В Тебе́ ны́не ра́дуется Це́рковь Человеколю́бче / Женисе́ и Созда́теле свое́м, / сию́ во́лею Боголе́пною / от и́дольския ле́сти изба́вльшем, / и Себе́ обручи́вшем честно́ю кро́вию, / све́тло прие́млющи свяще́нное возставле́ние ико́н, / и ра́дующися Тя пое́т, и сла́вит ве́рно.

Стих: Испове́мся Тебе́ Го́споди, всем се́рдцем мои́м, пове́м вся чудеса́ Твоя́.

Пло́ти изображе́ние Твое́ возставля́юще, Го́споди, / любе́зно лобыза́ем, / вели́кое та́инство смотре́ния Твоего́ изъясня́юще: / не мне́нием бо, я́коже глаго́лют богобо́рнии де́ти Ма́нентовы, / нам яви́лся еси́ Человеколю́бче, / но и́стиною и естество́м пло́ти, / Тобо́ю возводи́ми к Твое́й любви́, и жела́нию.

Стих: Возвеселю́ся и возра́дуюся о Тебе́, пою́ и́мени твоему́, Вы́шний.

День ра́достный, и весе́лия испо́лненный яви́ся днесь: / све́тлость бо догма́т и́стиннейших блиста́ет, / и сия́ет Це́рковь Христо́ва / укра́шена возставле́ньми ико́н святы́х ны́не, / и изображе́ний сия́ньми, / и единомы́слие быва́ет ве́рных Богопочте́нное.

Таже глаголем стих, глас 6: Воскресни́ Го́споди Бо́же мой, да вознесе́тся рука́ Твоя́, не забу́ди убо́гих Твои́х до конца́.

И поем самогласен дне, глас 6:

Моисе́й во вре́мя воздержа́ния / зако́н прия́т, и лю́ди привлече́; / Илия́ пости́вся небеса́ заключи́; / трие́ же о́троцы Авраа́мстии, / мучи́теля беззако́ннующа поще́нием победи́ша. / И́мже и нас Спа́се сподо́би / Воскресе́ние улучи́ти, си́це вопию́щих: / Святы́й Бо́же, Святы́й Кре́пкий, Святы́й Безсме́ртный, поми́луй нас.

Сла́ва, паки тойже. И ны́не: Преблагослове́нна еси́ Богоро́дице:

Славословие великое. И отпуст. Сла́ва, и ны́не, стихира евангельская, и час 1-й.

НА ЛИТУРГИИ

Блаженны гласа, на 6: и от канона дне, песнь 6, на 4.

Прокимен, глас 4. Песнь отцев: Благослове́н еси́ Го́споди Бо́же оте́ц на́ших, / и хва́льно и просла́влено и́мя Твое́ во ве́ки. Стих: Я́ко пра́веден еси́ о всех, я́же сотвори́л еси́ нам.

Апостол к Евреем, зачало 329 от полу.

Бра́тие, ве́рою Моисе́й, вели́к быв, отве́ржеся нарица́тися сын дще́ре фарао́новы. Па́че же изво́ли страда́ти с людьми́ Бо́жиими, не́жели име́ти вре́менную греха́ сла́дость. Бо́льшее бога́тство вмени́в Eги́петских сокро́вищ поноше́ние Христо́во, взира́ше бо на мздовоздая́ние. И что eще́ глаго́лю? Не доста́нет бо ми повеству́ющу ле́та, о Гедео́не, Вара́це же и Сампсо́не и Иеффа́и, о Дави́де же и Самуи́ле, и о (других) проро́цех, и́же ве́рою победи́ша ца́рствия, соде́яша пра́вду, получи́ша обетова́ния, загради́ша уста́ льво́в, угаси́ша си́лу óгненную, избего́ша óстрея меча́, возмого́ша от не́мощи, бы́ша кре́пцы во бране́х, обрати́ша в бе́гство полки́ чужи́х. Прия́ша жeны́ от воскресе́ния ме́ртвыя своя́; ини́и же избие́ни бы́ша, не прие́мше избавле́ния, да лу́чшее воскресе́ние улуча́т. Друзи́и же руга́нием и ра́нами искуше́ние прия́ша, eще́ же и уз и темни́ц. Ка́мением побие́ни бы́ша, претре́ни бы́ша, искуше́ни бы́ша, уби́йством меча́ умро́ша, проидо́ша в ми́лотех, и в ко́зиях ко́жах, лише́ни, скорбя́ще, озло́блени. И́хже не бе досто́ин весь мир, в пусты́нях скита́ющеся, и в гора́х, и в верте́пах, и в про́пастех земны́х. И си́и вси послу́шествовани бы́вше ве́рою, не прия́ша обетова́ния, Бо́гу лу́чшее что о нас предзре́вшу, да не без нас соверше́нство прии́мут.

Те́мже у́бо и мы, толи́к иму́ще облежа́щь нас о́блак свиде́телей, го́рдость вся́ку отло́жше, и удо́бь обстоя́тельный грех, терпе́нием да тече́м на предлежа́щий нам по́двиг, взира́юще на нача́льника ве́ры и соверши́теля Иису́са.

Аллилуия, глас 8: Моисе́й и Ааро́н во иере́ех Его́, и Саму́ил в призыва́ющих и́мя Его́. Стих: Призыва́ху Го́спода, и Той послу́шаше их.

Евангелие от Иоанна, зачало 5.

Во вре́мя о́но, восхоте́ Иису́с изы́ти в Галиле́ю, и обре́те Фили́ппа и глаго́ла eму́: гряди́ по Мне. Бе же Фили́пп от Вифсаи́ды, от гра́да Андре́ова и Петро́ва. Обре́те Фили́пп Нафана́ила, и глаго́ла eму́: Eго́же писа́ Моисе́й в зако́не и проро́цы, обрето́хом Иису́са сы́на Ио́сифова, и́же от Назаре́та. И глаго́ла eму́ Нафана́ил: от Назаре́та мо́жет ли что добро́ бы́ти? Глаго́ла eму́ Фили́пп: прииди́ и виждь. Ви́де же Иису́с Нафана́ила гряду́ща к Себе́, и глаго́ла о нем: се, вои́стинну Израильтя́нин, в не́мже льсти несть. Глаго́ла Eму́ Нафана́ил: ка́ко мя зна́еши? Отвеща́ Иису́с, и рече́ eму́: пре́жде да́же не возгласи́ тебе́ Фили́пп, су́ща под смоко́вницею ви́дех тя. Отвеща́ Нафана́ил и глаго́ла Eму́: Равви́, Ты eси́ Сын Бо́жий, Ты eси́ Царь Изра́илев. Отвеща́ Иису́с, и рече́ eму́: зане́ рех ти, я́ко ви́дех тя под смоко́вницею, ве́руеши: бо́льша сих у́зриши. И глаго́ла eму́: ами́нь, ами́нь глаго́лю вам, отсе́ле у́зрите не́бо отве́рсто и А́нгелы Бо́жия восходя́щя, и нисходя́щя над Сы́на Челове́ческаго.

Причастен: Хвали́те Го́спода с небе́с, / хвали́те Его́ в вы́шних. Другий: Ра́дуйтеся пра́веднии о Го́споде, / пра́вым подоба́ет похвала́.

На трапезе же ядим варение со елеем, а не рыбы. Аще же прилучится, пием вино, уставленное в славу Божию, по две чаши: Такожде и в вечер по две.

ПОСЛЕДОВАНИЕ НЕДЕЛИ ПРАВОСЛАВИЯ

По Литургии весь собор духовенства из алтаря исходит на середину храма. Иконы Спасителя и Богоматери полагают на аналое посреди церкви.

Диакон: Благослови́, влады́ко.

Иерей: Благослове́н Бог наш...

Певцы: Ами́нь. И поют: Царю́ Небе́сный: Чтец: Трисвятое по О́тче наш. Иерей: Я́ко Твое́ есть Ца́рство: Чтец: Ами́нь. Го́споди, поми́луй (12). Сла́ва, и ны́не. Прииди́те, поклони́мся: (трижды).

Псалом 74-й:

Испове́мыся Тебе́, Бо́же, испове́мыся Тебе́, и призове́м и́мя Твое́; пове́м вся чудеса́ Твоя́. Егда́ прииму́ вре́мя, Аз правоты́ возсужду́. Раста́яся земля́ и вси живу́щии на ней, Аз утверди́х столпы́ ея́. Рех беззако́ннующым, не беззако́ннуйте: и согреша́ющым, не возноси́те ро́га, не воздвиза́йте на высоту́ ро́га ва́шего, и не глаго́лите на Бо́га непра́вду: я́ко ниже́ от исхо́д, ниже́ от за́пад, ниже́ от пусты́х гор. Яко Бог судия́ есть: сего́ смиря́ет, и сего́ возно́сит. Яко ча́ша в руце́ Госпо́дни, вина́ нерастворе́на, испо́лнь растворе́ния, и уклони́ от сея́ в сию́: оба́че дро́ждие Его́ не истощи́ся, испию́т вси гре́шнии земли́. Аз же возра́дуюся в век, воспою́ Бо́гу Иа́ковлю: и вся ро́ги гре́шных сломлю́, и вознесе́тся рог пра́веднаго.

Диакон произносит великую ектению и по прошении: О плавающих... прилагает следующие прошения:

О е́же ми́лостивым о́ком призре́ти на Святу́ю Свою́ Це́рковь, и соблюсти́ ю́ невреди́му и непреобори́му от ересе́й и суеве́рий, и ми́ром Свои́м огради́ти, Го́споду помо́лимся.

О е́же утиши́ти раздира́ния ея́ и си́лою Свята́го Ду́ха обрати́ти всех отступи́вших к позна́нию и́стины и сопричести́ ко избра́нному Своему́ ста́ду, Го́споду помо́лимся.

О е́же просвети́ти вся све́том Своего́ богоразу́мия, ве́рных же Свои́х укрепи́ти и непоколеби́мых в правове́рии соблюсти́, Го́споду помо́лимся.

О изба́витися нам... и прочее.

По возгласе певцы:

Бог Госпо́дь, и яви́ся нам, / благослове́н Гряды́й во И́мя Госпо́дне.

Стих 1: Испове́дайтеся Го́сподеви, я́ко благ, я́ко в век ми́лость Его́.

Стих 2: Обыше́дше обыдо́ша мя и и́менем Госпо́дним противля́хся им.

Стих 3: Не умру́, но жив бу́ду и пове́м дела́ Госпо́дня.

Стих 4: Ка́мень, Его́же небрего́ша зи́ждущии, Сей бысть во главу́ у́гла, от Го́спода бысть Сей и есть ди́вен во очесе́х на́ших.

Тропарь, глас 4-й:

Благода́рни су́ще недосто́йнии раби́ Твои́, Го́споди, / о Твоих вели́ких благодея́ниих, на нас бы́вших, / сла́вяще Тя, хва́лим, благослови́м, благодари́м, пое́м и велича́ем Твое́ благоутро́бие, / и ра́бски любо́вию вопие́м Ти: / Благоде́телю, Спа́се наш, сла́ва Тебе́.

Слава, глас 3-й: Твои́х благодея́ний и даро́в ту́не, / я́ко раби́ непотре́бнии, сподо́бльшеся, Влады́ко, / к Тебе́ усе́рдно притека́юще, / благодаре́ние по си́ле прино́сим / и Тебе́ я́ко Благоде́теля и Творца́ сла́вяще, вопие́м: / сла́ва Тебе́, Бо́же Преще́дрый.

И ныне, глас 4-й: Я́коже вы́шния тве́рди благоле́пие, / и ни́жнюю споказа́л еси́ красоту́ свята́го селе́ния сла́вы Твоея́, Го́споди, / утверди́ сие́ во век ве́ка / и приими́ на́ша в нем непреста́нно приноси́мая Тебе́ моле́ния, Богоро́дицею, / всех Животе́ и Воскресе́ние.

Диакон: Во́нмем. Иерей: Мир всем. Чтец: И ду́хови твоему́. Диакон: Прему́дрость. Во́нмем.

Чтец: Прокимен, глас 4-й: Насажде́ни в дому́ Госпо́дни, / во дво́рех Бо́га на́шего процвету́т. Стих: Весели́теся, пра́веднии, о Го́споде, пра́вым подоба́ет похвала́.

Апостол к Римлянам, зачало 121 от полу.

Бра́тие, молю́ вы, блюди́теся от творя́щих ра́спри и раздо́ры, кроме́ уче́ния, ему́же вы научи́стеся, и уклони́теся от них. Такови́и бо Го́сподеви на́шему Иису́су Христу́ не рабо́тают, но своему́ чре́ву: и́же благи́ми словесы́ и благослове́нием прельща́ют сердца́ незло́бивых. Ва́ше бо послуша́ние ко всем дости́же. Ра́дуюся же е́же о вас. Хощу́ же вас му́дрым у́бо бы́ти во благо́е, просты́м же в зло́е. Бог же ми́ра да сокруши́т сатану́ под но́ги ва́ша вско́ре. Благода́ть Го́спода на́шего Иису́са Христа́ с ва́ми. Ами́нь.

Евангелие от Матфея, зачало 75.

Рече́ Госпо́дь: блюди́те, да не пре́зрите еди́наго (от) ма́лых сих: глаго́лю бо вам, я́ко а́нгели их на небесе́х вы́ну ви́дят лице́ Отца́ Моего́ Небе́снаго. Прии́де бо Сын Челове́ческий взыска́ти и, спасти́ поги́бшаго. Что вам мни́тся? А́ще бу́дет не́коему челове́ку сто ове́ц, и заблу́дит еди́на от них: не оста́вит ли де́вятьдесят и де́вять в гора́х, и шед и́щет заблу́ждшия? И а́ще бу́дет обрести́ ю, ами́нь глаго́лю вам, я́ко ра́дуется о ней па́че, не́же о девяти́десятих и девяти́ не заблу́ждших. Та́ко несть во́ля пред Отце́м ва́шим Небе́сным, да поги́бнет еди́н от ма́лых сих. А́ще же согреши́т к тебе́ брат твой, иди́ и обличи́ его́ между́ тобо́ю и тем еди́нем. А́ще тебе́ послу́шает, приобре́л еси́ бра́та твоего́. А́ще ли тебе́ не послу́шает, пойми́ с собо́ю па́ки еди́наго или́ два, да при усте́х двою́ или́ трие́х свиде́телей ста́нет всяк глаго́л. А́ще же не послу́шает их, пове́ждь це́ркви; а́ще же и це́рковь преслу́шает, бу́ди тебе́ я́коже язы́чник и мыта́рь. Ами́нь бо глаго́лю вам: ели́ка а́ще свя́жете на земли́, бу́дут свя́зана на Небеси́, и ели́ка а́ще разрешите́ на земли́, бу́дут разреше́на на Небесе́х.

На сугубой ектении, прибавляются прошения:

Не хотя́й сме́рти гре́шных, но ожида́яй обраще́ния и покая́ния, соедини́ всех во Святе́й Твое́й Це́ркви, мо́лим Ти ся, Милосе́рдый Го́споди, услы́ши и поми́луй.

Устро́ивый мир сей в сла́ву Твою́, сотвори́, я́ко да и́стинною ве́рою и благоче́стием Тебе́, Бо́га на́шего, просла́вят, мо́лим Ти ся, Всеси́льный Тво́рче, услы́ши и поми́луй.

Да́вый за́поведь Твою́ нам, е́же люби́ти Тебе́, Бо́га на́шего, и бли́жняго своего́, сотвори́, да не́нависти, вражды́, оби́ды и про́чия беззако́ния прекратя́тся, и́стинная же любо́вь да ца́рствует в сердца́х на́ших, мо́лим Ти ся, Спаси́телю наш, услы́ши и ми́лостивно поми́луй.

Иерей – возглас: Услы́ши ны, Бо́же, Спаси́телю наш... Певцы: Ами́нь. Диакон: Го́споду помо́лимся. Певцы: Го́споди, поми́луй.

Иерей читает молитву:

Всевы́шний Бо́же, Влады́ко и Соде́телю всея́ тва́ри, наполня́яй вся вели́чеством Твои́м и содержа́й си́лою Твое́ю! Тебе́, Вседарови́тому Го́споду на́шему, мы, недосто́йнии, благодаре́ние прино́сим, я́ко не отвраща́ешися нас беззако́ний ра́ди на́ших, но па́че предваря́еши ны щедро́тами Твои́ми. Ты ко избавле́нию на́шему посла́л еси́ Единоро́днаго Твоего́ Сы́на, и благовести́л безме́рное Твое́ к ро́ду челове́ческому снизхожде́ние, я́ко хоте́нием хо́щеши и ожида́еши, е́же обрати́тися нам к Тебе́ и спасе́ным бы́ти. Ты, снизходя́ к не́мощи на́шего естества́, укрепля́еши нас всеси́льною Свята́го Твоего́ Ду́ха благода́тию, утеша́еши спаси́тельною ве́рою и соверше́нною наде́ждою ве́чных благ и, руково́дствуя избра́нных Твои́х в го́рний Сио́н, соблюда́еши, я́ко зе́ницу о́ка. Испове́дуем, Го́споди, вели́кое Твое́ и безприкла́дное человеколю́бие и милосе́рдие. Но ви́дяще мно́гих поползнове́ния, приле́жно Тя, Всеблаги́й Го́споди, мо́лим: при́зри на Це́рковь Твою́ и виждь, я́ко Твое́ спаси́тельное благове́стие, а́ще и ра́достно прия́хом, но те́рние суеты́ и страсте́й твори́т о́ное в не́киих малопло́дно, в не́киих же и безпло́дно, и по умноже́нию беззако́ний о́вии ересьми́, о́вии раско́лом проти́вящеся ева́нгельской Твое́й и́стине, отступа́ют от достоя́ния Твоего́, отрева́ют Твою́ благода́ть и поверга́ют себе́ суду́ Твоего́ Пресвята́го Сло́ва. Премилосе́рдый и Всеси́льный, не до конца́ гне́ваяйся, Го́споди! Бу́ди ми́лостив, мо́лит Тя Твоя́ Це́рковь, представля́ющи Тебе́ Нача́льника и Соверши́теля спасе́ния на́шего, Иису́са Христа́, бу́ди ми́лостив нам, укрепи́ нас в правове́рии си́лою Твое́ю, заблужда́ющим же просвети́ разу́мныя о́чи све́том Твои́м Боже́ственным, да уразуме́ют Твою́ и́стину; умягчи́ их ожесточе́ние и отве́рзи слух, да позна́ют глас Твой и обратя́тся к Тебе́, Спаси́телю на́шему. Испра́ви, Го́споди, ины́х развраще́ние и жизнь, несогла́сную христиа́нскому благоче́стию; сотвори́, да вси свя́то и непоро́чно поживе́м, и та́ко спаси́тельная ве́ра укорени́тся и плодоно́сна в сердца́х на́ших пребу́дет. Не отврати́ Лица́ Твоего́ от нас, Го́споди, возда́ждь нам ра́дость спасе́ния Твоего́; пода́ждь, Го́споди, и па́стырем Це́ркве Твоея́ святу́ю ре́вность, и о спасе́нии и обраще́нии заблужда́ющих попече́ние их, ду́хом ева́нгельским раствори́, да Тобо́ю вси руководи́ми, дости́гнем, иде́же соверше́ние ве́ры, исполне́ние наде́жды и и́стинная любо́вь, и та́мо с ли́ки чисте́йших Небе́сных Сил просла́вим Тебе́, Го́спода на́шего, Отца́ и Сы́на и Свята́го Ду́ха, во ве́ки веко́в.

Певцы: Ами́нь.

Затем диакон, став на уготованном месте, возглашает:

Кто Бог ве́лий, я́ко Бог наш? / Ты еси́ Бог, творя́й чудеса́ Еди́н.

Потом высшим гласом: Кто Бог ве́лий, я́ко Бог наш...

И паки высочайшим гласом: Кто Бог ве́лий, я́ко Бог наш...

И продолжает диакон:

Правосла́вия день пра́зднующе, правосла́внии лю́дие, наипа́че просла́вим Вино́вника всех благ Бо́га, И́же Сый благослове́н во ве́ки. Сей Бог наш, промышля́я и утвержда́я возлю́бленное Свое́ достоя́ние – Святу́ю Це́рковь, пра́отцев, преступле́нием отпа́дших, утеша́я нело́жным Свои́м сло́вом, еще́ в раи́ основа́ние ей положи́. Сей Бог наш, руково́дствуя ко о́ному спаси́тельному обетова́нию, не прикрове́нна Себе́ оста́ви, но хотя́щее бы́ти спасе́ние провозвести́ пе́рвее чрез отце́в и проро́ков, живописа́ разли́чными о́бразы. Сей Бог наш, многоча́стне и многообра́зне дре́вле глаго́лавый отце́м во проро́цех, в после́док дний сих глаго́ла нам в Сы́не, И́мже и ве́ки сотвори́, И́же возвести́ О́тчее о нас благоволе́ние, откры́ та́инства Небе́сная, уве́ри си́лою Свята́го Ду́ха о и́стине благове́стия, посла́ апо́столы во весь мир пропове́дати Ева́нгелие Ца́рствия, утверди́ о́ное разли́чными си́лами и чудесы́. Сему́ спаси́тельному открове́нию после́дующе, сего́ благове́стия держа́щеся.

Ве́руем во еди́наго Бо́га Отца́ Вседержи́теля, Творца́ не́бу и земли́, ви́димым же всем и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век. Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша. Нас ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася. Распя́таго же за ны при Понти́йстем Пила́те, и страда́вша, и погребе́нна. И воскре́сшаго в тре́тий день по Писа́нием. И возше́дшаго на Небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода, Животворя́щаго, И́же от Отца́ исходя́щего, И́же со Отце́м и Сы́ном спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дуем еди́но креще́ние во оставле́ние грехо́в. Ча́ем воскресе́ния ме́ртвых, и жи́зни бу́дущаго ве́ка. Ами́нь.

Сия́ ве́ра апо́стольская, сия́ ве́ра оте́ческая, сия́ ве́ра правосла́вная, сия́ ве́ра вселе́нную утверди́.

Еще́ же Собо́ры святы́х оте́ц и их преда́ния и писа́ния, Боже́ственному Открове́нию согла́сная, прие́млем и утвержда́ем.

Всем же о Правосла́вии подвиза́вшимся словесы́, писа́нии, уче́нии, страда́нии и богоуго́дным житие́м, я́ко защи́тникам и посо́бникам о́наго, Христо́ва Це́рковь, ны́нешнее воспомина́ние творя́щи, восклица́ет:

Святе́йшим правосла́вным Патриа́рхом Константинопо́льским, Александри́йским, Антиохи́йским, Иерусали́мским и Всеросси́йским и про́чим Преосвяще́нным митрополи́том, архиепи́скопом и епи́скопом правосла́вным, ве́чная па́мять.

Певцы зде и далее поют: Ве́чная па́мять. трижды.

Святы́м равноапо́стольным царю́ Константи́ну и ма́тери его́ Еле́не, ве́чная па́мять.

Благове́рному равноапо́стольному вели́кому кня́зю Влади́миру и благове́рной вели́кой княги́не О́льге, ве́чная па́мять.

Пострада́вшим и убие́нным в разли́чных похо́дех за правосла́вную ве́ру и Оте́чество, вожде́м и во́ином, и всем правосла́вным христиа́ном, в и́стинней ве́ре и благоче́стии и в наде́жди воскресе́ния сконча́вшимся, ве́чная па́мять.

Правосла́вная Христо́ва Це́рковь, торже́ственно воспомина́ющи подвиза́вшихся во благоче́стии и сие́ всем свои́м христоимени́тым ча́дом к подража́нию представля́ющи, восхваля́ет по́двиги сих, и́же и ны́не, спаси́тельною ве́рою и доброде́телию приуготовля́юще себе́ к ве́чному блаже́нству, утвержда́ют Правосла́вие.

Затем диакон возглашает:

Вели́кому господи́ну и отцу́ на́шему (имярек) Святе́йшему Патриа́рху Моско́вскому и все́я Руси́, мно́гая ле́та.

Певцы здесь и далее поют: Мно́гая ле́та (трижды).

Святе́йшим правосла́вным Патриа́рхом Константинопо́льскому, Александри́йскому, Антиохи́йскому, Иерусали́мскому и про́чим Святе́йшим правосла́вным Предстоя́телем, мно́гая ле́та.

Господи́ну на́шему преосвяще́ннейшему (имярек), митрополи́ту (или: архиепи́скопу, или: епи́скопу, егоже есть область), мно́гая ле́та.

Преосвяще́нным правосла́вным митрополи́том, архиепи́скопом и епи́скопом и всему́ освяще́нному при́чту, мно́гая ле́та.

Богохрани́мей стране́ на́шей, власте́м и во́инству ея́, мно́гая ле́та.

Всем правосла́вным христиа́ном, пра́во содержа́щим спаси́тельную ве́ру и повину́ющимся Христо́вей Це́ркви, пода́ждь, Го́споди, мир, благоде́нствие, изоби́лие плодо́в земны́х и мно́гая ле́та.

Иерей читает молитву:

Свята́я Тро́ице, сих просла́ви и утверди́ да́же до конца́ в правове́рии, отвраща́ющия же ся святы́я и спаси́тельныя правосла́вныя ве́ры и Христо́вы Це́ркве обрати́ и сотвори́, да вси прии́дут в позна́ние ве́чныя Твоея́ и́стины, моли́твами Пресвяты́я Влады́чицы на́шея Богоро́дицы и Присноде́вы Мари́и и всех святы́х.

Певцы: Ами́нь.

Затем иерей произносит: Сла́ва Тебе́, Бо́гу, Благода́телю на́шему, во ве́ки веко́в.

Певцы: Ами́нь.

И поют песнь святого Амвросия Медиоланского:

Тебе́, Бо́га, хва́лим, / Тебе́ Го́спода испове́дуем, / Тебе́ Преве́чнаго Отца́ вся земля́ велича́ет; / Тебе́ вси А́нгели, / Тебе́ Небеса́ и вся Си́лы, / Тебе́ Херуви́ми и Серафи́ми непреста́нными гла́сы взыва́ют: / Свят, Свят, Свят Госпо́дь Бог Савао́ф, / по́лны суть Небеса́ и земля́ вели́чества сла́вы Твоея́. / Тебе́ пресла́вный апо́стольский лик, / Тебе́ проро́ческое хвале́бное число́, / Тебе́ хва́лит пресве́тлое му́ченическое во́инство. / Тебе́ по всей вселе́нней испове́дует Свята́я Це́рковь, / Отца́ непостижи́маго вели́чества, / покланя́емаго Твоего́ и́стиннаго и Единоро́днаго Сы́на, / и Свята́го Уте́шителя Ду́ха. / Ты, Царю́ сла́вы, Христе́, / Ты Отца́ Присносу́щный Сын еси́. / Ты, ко избавле́нию прие́мля челове́ка, / не возгнуша́лся еси́ Деви́ческаго чре́ва. / Ты, одоле́в сме́рти жа́ло, / отве́рзл еси́ ве́рующим Ца́рство Небе́сное. / Ты одесну́ю Бо́га седи́ши во сла́ве О́тчей, / Судия́ приити́ ве́ришися. / Тебе́ у́бо про́сим: / помози́ рабо́м Твои́м, / и́хже честно́ю Кро́вию искупи́л еси́. / Сподо́би со святы́ми Твои́ми в ве́чной сла́ве Твое́й ца́рствовати. / Спаси́ лю́ди Твоя́, Го́споди, / и благослови́ достоя́ние Твое́, / испра́ви я́, и вознеси́ их во ве́ки: / во вся дни благослови́м Тебе́, / и восхва́лим и́мя Твое́ во век, и во век ве́ка. / Сподо́би, Го́споди, в день сей без греха́ сохрани́тися нам. / Поми́луй нас, Го́споди, поми́луй нас, / бу́ди ми́лость Твоя́, Го́споди, на нас, / я́коже упова́хом на Тя. / На Тя, Го́споди, упова́хом, / да не постыди́мся во ве́ки. Ами́нь.

Во время пения весь освященный собор целует святые иконы на аналоях, и бывает отпуст.

НЕДЕЛЯ ВТОРАЯ СВЯТЫХ ПОСТОВ.

Поется настоящее последование, во святых отца нашего Григория архиепископа, Фессалонитскаго чудотворца, Паламы. Сложенное от всесвятейшаго патриарха Филофеа.

В СУББОТУ ВЕЧЕРА

Поставим стихов 10. И поем стихиры воскресны 3, и анатолиевы 3: и настоящия святаго на 4, глас 2.

Подобен: Ки́ими похва́льными пе́сньми:

Ки́ими благопохвале́ний пе́сньми воспои́м иера́рха, / богосло́вия трубу́, огнедохнове́нная уста́ благода́ти, / честно́е Ду́ха прия́телище, / столпа́ Це́ркве непоколеби́маго, / вели́кое вселе́нныя украше́ние, / реку́ прему́дрости, Све́та свети́льника, / звезду́ я́сную, тварь просвеща́ющую?

Ки́ими песнопе́ний цвета́ми венча́им иера́рха, / благоче́стия побо́рника, и нече́стия проти́вника, / те́плаго ве́ры предста́теля, / вели́каго наста́вника и учи́теля, / цевни́цу всекра́сную Ду́ха, / златосия́ющий язы́к, / исто́чник кипя́щий то́ки исцеле́ний ве́рным, / вели́каго и досточу́днаго Григо́рия?

Ки́ими земноро́днии устна́ми / восхва́лим иера́рха, Це́ркве учи́теля, / све́та Боже́ственнаго пропове́дника, / небеснотаи́нника Тро́ицы, / ве́лие мона́шествующих украше́ние, / дея́нием и виде́нием просия́вшаго, / Фессалони́тскую похвалу́, / сограждани́на иму́щаго, мирото́чнаго на Небесе́х / боже́ственнаго и пречу́днаго Дими́трия?

Слава, глас 6: Преподо́бне, треблаже́нне, святе́йший о́тче, / па́стырю до́брый, и Архипа́стыря Христа́ учениче́, / положи́вый ду́шу о овца́х: / сам и ны́не о́тче наш Богоно́се Григо́рие, / испроси́ моли́твами твои́ми, / дарова́ти нам ве́лию ми́лость.

И ныне, Богородичен первый гласа.

На литии стихира храма. Сла́ва, и ны́не, Богородичен.

На стиховне по алфавиту.

Слава, глас 8: Бо́дрый язы́к твой ко учи́тельству, / во ушесе́х серде́чных возглаша́я, лени́вых ду́ши возставля́ет, / и боговеща́нными словесы́ твои́ми ле́ствица обрета́ется, / от земли́ к Бо́гу вознося́щая. / Те́мже Григо́рие, Фесса́лии чу́до, / не преста́й моля́ся Христу́, / просвети́ти Боже́ственным све́том чту́щия тя.

И ныне, Богородичен: Безневе́стная Де́во, / Я́же Бо́га неизрече́нно заче́нши пло́тию, / Ма́ти Бо́га Вы́шняго, / Твои́х рабо́в мольбы́ приими́, Всенепоро́чная, / всем подаю́щи очище́ние прегреше́ний, / ны́не на́ша моле́ния прие́млющи, / моли́ спасти́ся всем нам.

Ны́не отпуща́ещи: Трисвятое. Тропарь, Богоро́дице Де́во: трижды. И прочее последование бдения.

НА УТРЕНИ

По шестопсалмии, Бог Госпо́дь:

Тропарь воскресен дважды. Сла́ва, святаго глас 8:

Правосла́вия свети́льниче, / Це́ркве утвержде́ние и учи́телю, / мона́хов добро́то, богосло́вов побо́рниче непребори́мый, / Григо́рие чудотво́рче, Фессалони́тская похвало́, пропове́дниче благода́ти, / моли́ся вы́ну спасти́ся душа́м на́шим.

И ны́не, Богородичен в тойже глас: И́же нас ра́ди рожде́йся от Де́вы, / и распя́тие претерпе́в, Благи́й, / испрове́ргий сме́ртию смерть, / и воскресе́ние явле́й, я́ко Бог, / не пре́зри, я́же созда́л еси́ руко́ю Твое́ю, / яви́ человеколю́бие Твое́, Ми́лостиве, / приими́ ро́ждшую Тя Богоро́дицу, моля́щуюся за ны, / и спаси́, Спа́се наш, лю́ди отча́янныя.

И обычное стихословие. И чтение в Шестодневце. Степенна гласа. Вся́кое дыха́ние: Евангелие утреннее. Воскресе́ние Христо́во: псалом 50. Сла́ва: Покая́ния отве́рзи ми две́ри: И ны́не, подобен: На спасе́ния стези́: Таже, на глас 6: Поми́луй мя Бо́же: Таже, Мно́жества соде́янных мно́ю лю́тых:

Канон Осмогласника воскресен, со ирмосом на 4, и Триоди на 4, и святаго на 6. Глас 8.

Песнь 1.

Ирмос: Колесницегони́теля фарао́ня погрузи́, / чудотворя́й иногда́ / Моисе́йский жезл, крестообра́зно порази́в, / и раздели́в мо́ре: / Изра́иля же беглеца́, пешехо́дца спасе́, / песнь Бо́гови воспева́юща.

Восприе́мше те́плыми слеза́ми, блу́днаго глас, / Тебе́ Отцу́ всех и Бо́гу припа́даем, вопию́ще: / я́ко согреши́хом от Тебе́ удали́вшеся, и блуду́ рабо́тавше, / приими́ на́ше покая́ние.

Ца́рское преоби́дев благоро́дие, / е́же дарова́л еси́ мне, мене́ ра́ди Сло́ве, Челове́к бы́вый: / лю́те осуди́хся угоди́ти свиния́м, грехо́вным вку́сом, / но пощади́ мя Спа́се, милосе́рдием Твои́м.

На коле́ну па́дающа мя, / я́коже пе́рвее блу́днаго Влады́ко Го́споди, / Ты прите́к приими́, и рука́ма объе́м, / пода́ждь ми о́бразы Твоего́ спасе́ния, / вме́сто нае́мника Человеколю́бче, / па́ки Твоего́ сы́на сотворя́я.

Богородичен: Богоявле́ния Тобо́ю сподо́бися Богора́дованная, челове́ческое естество́: / еди́на бо хода́таица Де́во, была́ еси́ Бо́гу и челове́ком. / Тем я́ко Бо́жию Тя Роди́тельницу вси досто́йно сла́вим.

Иный канон святаго, глас 4.

Ирмос: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.

Ри́торов боже́ственнии, и богосло́вов изря́днии, и язы́цы боговеща́ннии, / прииди́те сни́дитеся в соедине́ние, / воспе́ти по достоя́нию духори́тора, боже́ственнаго Григо́рия.

Столп ве́ры, Це́ркве побо́рник, / вели́кий Григо́рий да восхва́лится мно́ю, / всеизря́дный па́стырь Фессалони́тский, / красота́ чи́на иера́ршескаго вои́стинну.

От младе́нства возжела́л еси́ лу́чшее житие́, / и соверше́нное о́тче от ю́ности возлюби́л еси́ мудрова́ние, / и купнонра́вен, и единому́дрен показа́лся еси́ / тезоиме́нствующаго тебе́ о́тче Григо́рие.

Богородичен: Бу́ди ми Всенепоро́чная живота́ путь, / наставля́ющий мя к Боже́ственным селе́нием: / прельсти́хся бо, и к про́пастем зло́бы поползну́хся, / от ни́хже мя возведи́ хода́тайством Твои́м.

Песнь 3.

Ирмос: Небе́снаго кру́га Верхотво́рче, Го́споди, / и Це́ркве Зижди́телю, / Ты мене́ утверди́ в любви́ Твое́й, / желáний крáю, ве́рных утвержде́ние, / Еди́не Человеколю́бче.

Убоя́вся мои́х дел, и дале́чнаго отше́ствия, / и расточе́ннаго Твоего́ бога́тства, / его́же ижди́х в блу́дных стремле́ниих, / в покая́нии к Тебе́ зову́, Отцу́ и Бо́гу моему́: / согреши́х, спаси́ мя.

На земли́ согреша́я, небесе́ убоя́хся: / си́це бо ми бу́дет суд тогда́ препира́яй, / егда́ вся́ческая предста́нут Сло́ве, / пра́ведным судо́м Твои́м суди́мая.

Мра́чная и скве́рная мя помышле́ния пита́ху, / егда́ от Тебе́ Спа́се, дале́че бых блу́дный, / ны́не же зову́ Ти: согреши́х, согреши́х, спаси́ / те́пле прибега́ющаго милосе́рдию Твоему́.

Богородичен: Обожи́ся Де́во Ада́мово смеше́ние: / из чре́ва бо Твоего́ Бог плотоно́сец яви́ся, / И́мже воззва́ни бы́хом от дре́вняго осужде́ния, / солга́ни наде́ждею дре́вле обоже́ния.

Иный.

Ирмос: Твоя́ песносло́вцы, Богоро́дице, / живы́й и незави́стный Исто́чниче, / лик себе́ совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.

Струи́ Боже́ственных уче́ний твои́х сохраня́ющии, / вся́кия ко́зни злосла́вных избега́ем, / и вся избива́ем твои́ми свяще́нными списа́ньми / полки́ сих Григо́рие.

Прему́дрости бу́ия злосла́вных разруши́л еси́ блаже́нне, / прему́дрость Бо́жию ипоста́сную име́я в се́рдце твое́м, / е́юже с шу́мом порази́л еси́ гнила́я сих шата́ния.

Умертви́в пло́ти тле́емыя вся́кое сладостра́стие прему́дре, / по́стнически оживи́л еси́ души́ твоея́ движе́ния, / и сию́ Боже́ственный орга́н Богосло́вия показа́л еси́.

Богородичен: В ра́зуме ума́ и произволе́нии, / сту́дное же и блу́дное житие́ приле́жно возлюби́х, / но любо́вию Боже́ственною мя свяжи́, / моли́твами Твои́ми, Де́во Богоневе́стная.

Кондак, глас 4:

Ны́не вре́мя де́лательное яви́ся, при две́рех суд, / воста́нем у́бо постя́щеся, / принесе́м сле́зы умиле́ния, / ми́лостынями, зову́ще: / согреши́хом па́че песка́ морска́го. / Но осла́би Соде́телю всех, / я́ко да прии́мем нетле́нныя венцы́.

Седален, глас 4: Подобен: Ско́ро предвари́:

Пре́лесть попали́л еси́ злосла́вных прему́дре, / ве́ру изъясни́л еси́ правосла́вных до́бре, / и мир просвети́л еси́. / Отону́дуже победоно́сный победи́тель показа́лся еси́, / столп Це́ркве, и́стинный иера́рх, / моля́ся не преста́й Христу́, / спасти́ся всем нам.

Слава, тойже.

И ныне, Богородичен: Ско́ро приими́ Влады́чице моле́ния на́ша, / и сия́ принеси́ Сы́ну Твоему́ и Бо́гу, / Госпоже́ Всенепоро́чная: / погаси́ обстоя́ния злосла́вных языковре́дных, / укроти́ ко́зни, и низложи́ де́рзость / вооружа́ющихся безбо́жных / Пречи́стая, на рабы́ Твоя́.

Песнь 4.

Ирмос: Ты моя́ кре́пость, Го́споди, / Ты моя́ и си́ла, / Ты мой Бог, Ты мое́ ра́дование, / не оста́вль не́дра О́тча / и на́шу нищету́ посети́в. / Тем с проро́ком Авваку́мом зову́ Ти: / си́ле Твое́й сла́ва, Человеколю́бче.

Отмета́тельное оте́ческих ми повеле́ний бога́тство, / е́же ми дарова́л еси́, в сладостра́стии ижди́в, / бых Боже́ственных дарова́ний нищ окая́нный. / Те́мже ка́ющася со испове́данием / не омерзи́ мене́ Влады́ко Го́споди.

Боголе́пно восприи́м нищету́ мене́, / дале́че Тебе́ дре́вле бы́вшаго, / Собо́ю к Себе́ присвоя́еши, / и освяща́еши мя к весе́лию Человеколю́бче: / те́ло Твое́ Боже́ственное Сло́ве, / воззва́ние мое́, весе́лия творя́.

Да дале́че слеза́ми непреста́нными, / ве́чныя му́ки изба́вимся, / ю́же угото́ва Бог лука́вым духово́м, / я́ко блу́дный, вопие́м: согреши́хом Ти О́тче, / но приими́ вся прибега́ющия ны к Твое́й ми́лости.

Богородичен: Собезнача́льное Отцу́ Сло́во сый и Ду́ху, / от Неискусому́жныя Де́вы ражда́ется кроме́ зако́на: / пребы́в у́бо е́же бе, пребы́в же па́ки е́же от нас прия́т. / Во двою́ бо естеству́ еди́н Сын есть, / во обою́ храня́ есте́ственное.

Иный.

Ирмос: Неизсле́дный Бо́жий сове́т, / е́же от Де́вы воплоще́ния / Тебе́, Вы́шняго, / проро́к Авваку́м усмотря́я, зовя́ше: / сла́ва си́ле Твое́й, Го́споди.

Отве́рз уста́ твоя́ о́тче прему́дре, / Боже́ственную прему́дрость пропове́дал еси́, / е́йже поуча́лся еси́ в се́рдце твое́м при́сно, / и Варлаа́ма су́етнаго несмы́сленна и безу́мна показа́л еси́.

Заше́л еси́ сладча́йший в зе́млю, со́лнце зако́ном естества́, / возсия́еши же у́тро со Христо́м со́лнце невече́рнее, / вся назира́я моли́твами твои́ми.

Яви́ благода́ть тебе́ блаже́нне Бо́жий, / похвалу́ и утвержде́ние преве́лие правосла́вных, / и па́стыря блага́го, и богосло́ва втора́го, / и ста́да бо́драго храни́теля.

Богородичен: Ушеса́ мне отве́рзи душе́вныя Ма́ти Бо́жия, / роди́вшая пре́жде ушеса́ Отве́рзшаго глухо́му, / и Боже́ственным внима́ти словесе́м, и исполня́ти сподо́би.

Песнь 5.

Ирмос: Вску́ю мя отри́нул еси́ / от лица́ Твоего́, Све́те Незаходи́мый, / и покры́ла мя есть чужда́я тьма, окая́нного, / но обрати́ и к све́ту за́поведей Твои́х / пути́ моя́ напра́ви, молю́ся.

Бога́тства и дарова́ний Боже́ственных лиши́хся, / и в страну́ приидо́х благи́х живо́тных гла́дом та́я, / но Ты мя О́тче я́ко Благи́й, / дре́вния сла́вы и сла́дости, / благосе́рдия ра́ди Твоего́, испо́лни.

По́мысл блу́днаго, в блуде́ житие́ ижди́вша прии́мше, / Отцу́ ми́лостивому притеце́м, / несумне́нною ве́рою, и сокруше́нием се́рдца, / я́ко да согреше́ний оставле́ние прии́мем.

Не косни́ душе́ моя́, в да́льней стране́ пребыва́ющи, / но тецы́ вско́ре, Бо́гу и Отцу́ испове́дающися, / да прии́меши разреше́ние, / и́хже зле соде́лала еси́ житие́ изнури́вши.

Богородичен: Све́тлый Тя о́блак, нося́й Со́лнце пра́вды, / в Тебе́ носи́мое, Пречи́стая Де́во ве́мы, / неразу́мия тьму и́дольскую отгоня́ющее, / и ра́зумом и́стинным просвеща́ющее.

Иный.

Ирмос: Ужасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ безле́тнаго Сы́на, / всем воспева́ющим Тя / мир подава́ющая.

Серпо́м слове́с твои́х, и свяще́нными списа́ньми / посе́кл еси́ е́реси тернови́дныя, / и пле́вел ло́жная прозябе́ния, / правосла́вия же благочести́вая положи́л еси́ се́мена, / священнонача́льне Григо́рие.

Словеса́ твоя́ всему́дре, и честна́я списа́ния / суть роса́ Небе́сная, / мед ка́менный, хлеб а́нгельский притека́ющим, / питие́, бра́шно, сла́дость, / наслажде́ние, Григо́рие, и исто́чник живы́я воды́.

О́бщаго тя учи́теля познава́ет земля́ и мо́ре, / столп свяще́нный правосла́вия, / и оружеполо́жницу Боже́ственных догма́т честну́ю, / прему́драго богосло́ва свяще́ннаго, / сожи́теля, соприча́стника, апо́столом единонра́внаго.

Богородичен: Струя́ми умиле́ния, / скве́рны се́рдца моего́ Непоро́чная отмы́й Де́во, / и покая́ния о́бразы мне да́руй, / Твои́ми к ще́дрому Бо́гу свяще́нными моле́нии, / Его́же неизрече́нно родила́ еси́.

Песнь 6.

Ирмос: Моли́тву пролию́ ко Го́споду / и Тому́ возвещу́ печа́ли моя́, / я́ко зол душа́ моя́ испо́лнися / и живо́т мой а́ду прибли́жися, / и молю́ся, я́ко Ио́на: / от тли, Бо́же, возведи́ мя.

Юне́йший бых сын Твой, / и бога́тство Твое́ зле ижди́х, / удале́нием зла́го жития́, / и благи́х Твои́х лиша́яся Человеколю́бче, / прихожду́ Тебе́ Отцу́ и Бо́гу моему́, / и прошу́ проще́ния.

Стра́нничество безчелове́чное получи́х, / и пасти́ свинии́ осужде́н бых, / я́ко мое́ расточи́х бога́тство, / е́же ми́лостивно вско́ре пода́л еси́, / и бых от всех наг, / но Ты я́ко Бог мой уще́дри.

Не и́мам дерзнове́ния Человеколю́бче, воззре́ти и ви́дети, / согреши́в на Не́бо, безме́рную высоту́, / ни нарещи́ся сын Твой, блу́дный, / но уще́дри мя туне, име́яй безме́рную ми́лость.

Богородичен: Несказа́нное Твое́ Рождество́, / и неизрече́нный рождества́ Твоего́ о́браз Деви́це, / я́ко Бо́га вы́ше ума́ ражда́еши, / де́вство нескве́рное иму́щи: / тем Тя вси и́стинную Богоро́дицу досто́йно сла́вим.

Иный.

Ирмос: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.

Растерза́ся су́етное шата́ние, / и язы́к Варлаа́ма безу́мнаго, / словесы́ и веле́нии, и ра́зума острото́ю / прему́драго царя́, и твое́ю, Григо́рие.

Боже́ственную цевни́цу Ду́ха, / трубу́ я́ве пропове́дающую Боже́ственныя та́йны, / Фессалони́тскаго председа́теля, Богосло́вский язы́к, пе́сньми почти́м.

Лю́дем иногда́ предводи́тель, / я́ко столп о́гненный, ве́ры враги́ попали́л еси́, / ве́рных же состоя́ния просвети́л еси́, / богому́дре о́тче Григо́рие.

Богородичен: Бу́ди ми Всечи́стая Влады́чице, / тишина́ и приста́нище утеше́ния, / преводя́щее к Боже́ственному приста́нищу невла́емому, / бу́рю страсте́й мои́х укроти́вши.

Кондак святому, глас 8. Подобен: Взбра́нной:

Прему́дрости свяще́нный и Боже́ственный орга́н, / богосло́вия све́тлую согла́сно трубу́, / воспева́ем тя Григо́рие богоглаго́льниче, / но я́ко ум Уму́ пе́рвому предстоя́й, / к Нему́ ум наш о́тче наста́ви, да зове́м: / ра́дуйся пропове́дниче благода́ти.

Икос. Подобен: А́нгел предста́тель:

А́нгел яви́лся еси́ на земли́, неизрече́нная Бо́жия челове́ком возвеща́я. / Безпло́тных бо гла́сы, от челове́ческих сый, и пло́тию употребля́яся, удиви́л еси́ нас, / и вопи́ти тебе́ богоглаго́ливе увеща́л еси́ сия́: / ра́дуйся, и́мже тьма сокры́ся; ра́дуйся, и́мже свет взы́де. / Ра́дуйся, несозда́ннаго Божества́ а́нгеле; / ра́дуйся, созда́ннаго и бу́яго вои́стинну обличи́телю. / Ра́дуйся, высоту́ невосходи́мую, Боже́ственное естество́ реки́й; / ра́дуйся, глубину́ неудо́бь ви́димую, де́йство реки́й; / ра́дуйся, я́ко сла́ву Бо́жию до́бре рекл еси́; / ра́дуйся, я́ко мне́ния злоде́ев отре́кл еси́. / Ра́дуйся свети́льниче, показа́вый Со́лнце; / ра́дуйся ча́ше, пития́ Боже́ственнаго пода́тельнице. / Ра́дуйся, и́мже и́стина просиява́ет; / ра́дуйся, и́мже помрачи́ся лжа. / Ра́дуйся, пропове́дниче благода́ти.

Синаксарий.

Песнь 7.

Ирмос: От Иуде́и доше́дше, о́троцы / в Вавило́не иногда́ / ве́рою Тро́ическою пла́мень пе́щный попра́ша, пою́ще: / отце́в Бо́же, благослове́н еси́.

Дерзнове́ния не и́мам, / е́же нарещи́ся сын Твой, О́тче Человеколю́бче, / я́ко еди́наго от нае́мник Твои́х бы́ти молю́ся, / не гнуша́йся мене́ зову́ща: / оте́ц на́ших Бо́же благослове́н еси́.

Оскверни́вше пе́рвым житие́м жизнь, / и погуби́вше благоро́дие пе́рвое, / притеце́м Еди́ному Отцу́ и Бо́гу на́шему, / покая́нием те́плым прия́ти спасе́ние.

Же́сток граждани́н, ему́же рабо́тати окая́нный осуди́хся: / глад же, его́же подъя́х, свиния́м угожда́я, кре́пок и нестерпи́мь, / но обра́щься прошу́, Спа́се, поми́луй мя.

Богородичен: Умерщвле́нное естество́ оживи́ла еси́, / еди́на Живо́т ро́ждшая Де́во Богоро́дице: / те́мже Тя спасе́ние ве́рнии све́мы, / оте́ц на́ших Бо́га пло́тию ро́ждшую.

Иный.

Ирмос: Не послужи́ша тва́ри Богому́дрии, / па́че Созда́вшаго, / но, о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог, благослове́н еси́.

Словесе́м бесе́дующии, и списа́нием твои́м Григо́рие, / ра́зуму поуча́ются Бо́жию, / и по́лны явля́ются прему́дрости Бо́жия духо́вныя, / и несозда́нную благода́ть, и де́йство Бо́жие богосло́вствуют.

Меч и стре́лы злосла́вных сокруши́л еси́, / и го́рдость Варлаа́мову, и вся́кую си́лу ерети́ческую, / я́ко тка́ние паучи́ны расточи́л еси́, / а́ки ка́мень превели́кий иера́рше.

Запечатле́ся твои́ми словесы́ и догма́ты ве́ра благочести́вых, / и де́рзость е́реси ста Григо́рие, / и низложе́ние правосла́вия преста́, и кре́пость злосла́вных.

Богородичен: Струи́ Тя исто́чника, усо́хшии страсте́й боле́зньми, ве́дуще вои́стинну, / почерпа́ем спасе́ние, и Боже́ственныя струи́, и взыва́ем: / благослове́н Всечи́стая, плод Твоего́ чре́ва.

Песнь 8.

Ирмос: Седмери́цею пещь / халде́йский мучи́тель / Богочести́вым неи́стовно разжже́, / си́лою же лу́чшею спасе́ны, сия́ ви́дев, / Творцу́ и Изба́вителю вопия́ше: / о́троцы, благослови́те, / свяще́нницы, воспо́йте, / лю́дие, превозноси́те во вся ве́ки.

Безме́рнаго Влады́ко, и мно́гаго милосе́рдия Твоего́, / ве́мы бога́тство в Тя ве́ровавшии. / Те́мже Ти припа́даем с блу́дным вси те́пле: / приими́ согреши́вшия, и к Тебе́ прибе́гшия: / несть бо, несть грех Ще́дре, / Твое́ человеколю́бие победи́ти моги́й.

Милосе́рдия ра́ди Влады́ко Себе́ смири́в, / па́дшим Твои́м сыно́м прибли́жился еси́: / Сам бо Человеколю́бче срел еси́ па́дших, / и облобыза́еши, и спасе́ние да́руеши: / а́ще кто и до́лу па́днет, / ми́лостив сый не гне́ваешися, я́ко Человеколю́бец.

Стра́шнейший суд мене́ усря́щет о Влады́ко, / я́ко Тя человеколю́бца и незло́бива зря, / не притека́ю к Тебе́, блу́днаго зовы́й гла́сом, / но в ле́ности житие́ препровожда́ю: / Ты у́бо ми́лостив бу́ди ми, / и осужде́ния о́наго исхити́ Ще́дре, покая́ния ра́ди.

Троичен: Не три бо́ги сла́вим, но Еди́но Божество́, / три же вои́стинну Ипоста́си чтим, / Отца́ нерожде́нна, и рожде́нна Сы́на от Отца́, и исхо́дна от Отца́ Свята́го Ду́ха, / Бо́га Еди́наго три, а́ще и зва́ние ко́еждо, / я́коже Бог есть ве́рно сла́вимая.

Богородичен: От мно́гих мя Всенепоро́чная напа́стей преклоне́на, / и печа́лей бу́рею потопля́ема / приста́нище спасе́ния, Твое́ю моли́твою Пречи́стая изба́ви, / и от всех исхити́вши спаси́: / да Тя досто́йно я́ко те́плую предста́тельницу, / сла́влю Богоро́дицу во вся ве́ки.

Иный.

Ирмос: О́троки благочести́выя в пе́щи / Рождество́ Богоро́дичо спасло́ есть; / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте, дела́, / и превозноси́те Его́ во вся ве́ки.

Предстои́ши ны́не престо́лу Всеще́драго, / я́ко богосло́вов подо́бный, / и сим единонра́вный всему́дре Григо́рие, / Фессалони́тский председа́телю, иера́рхов добро́то, / све́тло украси́вся сла́вою священнонача́лия, / Бо́гу и ны́не служа́.

Ве́дый чи́стое твоего́ помышле́ния Бог, / и пре́жде чре́ва, и пре́жде зача́тия, / ве́рному возглаго́ла боже́ственному царю́ я́ве, / Це́ркве необори́маго бы́ти тя побо́рника: / те́мже пра́вильным изве́ством, / ми́ром запечатле́н еси́ священнонача́льства.

Побежда́ется я́ве и бе́дствует / собра́ние Поликинди́на дла́нию твое́ю, / и му́дрыми твои́ми глаго́лы, / пресла́вне Григо́рие, Фессалони́тский председа́телю: / и я́ко исчеза́ет дым, исчезе́ гнило́е безу́мие, / твои́м громогла́сным и Богосло́вным язы́ком.

Богородичен: Сло́во Бо́жие в Тебе́ Де́во, / челове́ческое естество́ погружа́емое страстьми́, / возобрази́ кра́йнею благосты́нею: / и все обнови́ и посвяти́: / те́мже Тобо́ю спасе́ни, / Тя славосло́вим во вся веки.

Песнь 9.

Ирмос: Ужасе́ся о сем Не́бо, / и земли́ удиви́шася концы́, / я́ко Бог яви́ся челове́ком пло́тски / и чре́во Твое́ бысть простра́ннейшее Небе́с, / тем Тя, Богоро́дицу, / А́нгелов и челове́к чинонача́лия велича́ют.

Ра́дости и весе́лия ны́не, / мене́ ра́ди закла́вшемуся Твоему́ тельцу́, / испо́лни сего́ от Тебе́ / ча́ющую мою́ ду́шу Бо́же: / заблужде́на приими́ мя, / и умерщвле́на к жи́зни возведи́, / и в Боже́ственную оде́жду спасе́ния, / в нетле́ние мя облецы́.

Ду́ши удале́ныя от Бо́га, / и Боже́ственных дарова́ний лише́ныя, / прииди́те те́пле, / и блу́днаго обраще́ние восприи́мше зове́м: / О́тче Благи́й, И́же на Небесе́х, / согреши́хом Ти вси, очи́сти и спаси́ / прибега́ющия к ми́лости Твое́й.

Я́ко имы́й милосе́рдия мно́жество мно́гое, / не гнуша́йся мене́ Го́споди Го́споди, / во мно́гих сласте́х бога́тство ижди́вша, / и прибега́юща ны́не, и зову́ща блу́днаго гла́сом: / согреши́х Ти, спаси́ / прибега́ющаго к ми́лости Твое́й.

Богородичен: Спасе́ния приста́нище и наставле́ние, / и предста́тельницу Тя и́мам раб Твой, / лю́тых всех препя́тий, / я́ко блага́я к Бо́гу мольба́ми Твои́ми Влады́чице да изба́влюся, / я́ко на Тя всю мою́ наде́жду возложи́х любо́вию, / да ве́рою велича́ю Тя.

Иный.

Ирмос: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная, / Богоро́дице, Чи́стая Присноде́во.

Зерца́ло Бо́жие был еси Григо́рие: / е́же бо по о́бразу нескве́рное соблю́л еси́, / ум же влады́ку на стра́сти плотски́я му́жески поста́вив, / е́же по подо́бию восприя́л еси́. / Отону́дуже дом был еси́ Святы́я Тро́ицы светле́йший.

Царь благочести́вый крила́таго тя воздухохо́дна показу́ет, сему́ спобо́рствующа, / я́ко всего́ испо́лнена Боже́ственнаго Ду́ха, / на суему́дреннаго неи́стовствующаго Варлаа́ма, / глаго́лющаго на высоту́ непра́ведная Бо́гу, / его́же пра́ведно победи́л еси́.

Весь быв прему́дрости лу́чшия испо́лнен пресла́вне, / свет ми́рови просвети́л еси́, / правосла́вия источи́в догма́ты: / дру́жеством бо изря́днаго любому́дрия прему́дре, / Боже́ственный страх во чре́ве зача́л еси́, / и словеса́ Ду́ха породи́л еси́.

Богородичен: Песнь Тебе́ ве́рнии согла́сно прино́сим благодаре́ния: / Ты бо дре́внюю разруши́ла еси́ на́шу кля́тву Богороди́тельнице, / и благослове́ние вси Боже́ственное прие́млем, / спасе́ние, просвеще́ние, и ми́лость Тобо́ю, / и ра́дость ве́чную.

Ексапостиларий воскресен. Слава, святаго. Подобен: Со ученики́:

Ра́дуйся отце́в похвало́, богосло́вов уста́, / безмо́лвия селе́ние, прему́дрости до́ме, / учи́телей кра́йность, пучи́но сло́ва. / Ра́дуйся дея́ния орга́не, виде́ния кра́йность, / и исцели́телю неду́гов челове́ческих. / Ра́дуйся Ду́ха хра́ме, и уме́рый и живы́й о́тче.

И ныне, Богородичен: Влады́чице, всех Влады́чице, и всех вы́шшая, / всех же превосходя́щая го́рних во́инств, / простри́ руку́ держа́вну, и сохрани́ мир, / свяще́нники благослови́ Тебе́ священноде́йствующия, / мона́хи же прости́, моля́щия Тебе́. / Лю́ди вся умири́, и су́щия в пала́те: / во́инство же укрепи́ во вре́мя бра́ни: / сей град соблюди́, свята́я Богоро́дице. / И ны́не нас сподо́би ви́дети Небе́сное Ца́рство, и ра́йскую дверь, / егда́ ся́дет Судия́ суди́ти вселе́нней, / во второ́м и стра́шном суди́лищи, Влады́чице а́нгелов.

На хвалитех поставим стихов 8, и поем стихиры воскресны 5: и настоящия 3. Глас 1. Подобен: Небе́сных чино́в:

Блаже́нную в ми́ре жизнь соверши́в, / и ны́не блаже́нных сра́дуешися собо́ром, / и на земли́ кро́тких, я́ко кро́ткий живе́ши иера́рше Григо́рие: / благода́тию же чуде́с богате́еши от Бо́га, / ю́же подае́ши чту́щим тя.

Стих: Испове́мся Тебе́ Го́споди, всем се́рдцем мои́м, пове́м вся чудеса́ Твоя́.

Правосла́вия догма́ты насади́л еси́, / злосла́вия блаже́нне отсека́я те́рние, / и ве́ры се́мя умножа́я до́бре, / одожде́нием слове́с твои́х, / стокра́тный клас, я́ко де́ятельный земледе́латель / Бо́гу прине́сл еси́.

Стих: Возвеселю́ся и возра́дуюся о Тебе́, пою́ и́мени твоему́, Вы́шний.

Непоро́чнаго твоего́ жития́ блаже́нне све́тлости / удиви́шася а́нгел и челове́к собо́ри, / и́бо произволе́нием тве́рдый страда́лец и по́стник яви́лся еси́, / и иера́рх, и досто́йный служи́тель Бо́жий, / и друг и́скренний.

И глаголем стих: Воскресни́ Го́споди Бо́же мой, да вознесе́тся рука́ Твоя́, не забу́ди убо́гих Твои́х до конца́.

И поем самогласен, глас 6:

Во тьме согреше́ний ходя́щим, / свет возсия́л еси́ Христе́ вре́менем воздержа́ния, / и благоуха́нный день стра́сти Твоея́ / покажи́ нам, да вопие́м Тебе́: / воста́ни Бо́же, поми́луй нас.

Сла́ва, тойже. И ны́не: Преблагослове́нна еси́: Славословие великое: И отпуст.

НА ЛИТУРГИИ

Блаженны гласа, на 6. И святаго песнь 3, на 4.

Прокимен, глас 5: Ты Го́споди сохрани́ши ны, и соблюде́ши ны / от ро́да сего́ и во век. Стих: Спаси́ мя Го́споди, я́ко оскуде́ преподо́бный. И святаго, глас 1: Уста́ моя́ возглаго́лют прему́дрость, и поуче́ние се́рдца моего́ ра́зум.

Апостол ко Евреем, зачало 304.

В нача́ле Ты, Го́споди, зе́млю основа́л eси́, и дела́ руку́ Твоéю суть небеса́. Та поги́бнут, Ты же пребыва́еши, и вся, я́коже ри́за, обетша́ют. И я́ко oде́жду свие́ши их, и изменя́тся: Ты же то́йжде eси, и ле́та Твоя́ не оскуде́ют. Кому́ же от А́нгел рече́ когда́: седи́ одесну́ю Менé, до́ндеже положу́ враги́ Твоя́ подно́жие ног Твои́х? Не вси ли суть служе́бнии ду́си, в служе́ние посыла́еми за хотя́щих насле́довати спасе́ние?

Сего́ ра́ди подоба́ет нам ли́шше внима́ти слы́шанным, да не когда́ отпа́дем. А́ще бо глаго́ланное А́нгелы сло́во бысть изве́стно, и вся́ко преступле́ние и ослуша́ние пра́ведное прия́т мздовоздая́ние. Ка́ко мы убежи́м, о толи́цем неради́вше спасе́нии, éже зача́ло прие́мше глаго́латися от Го́спода, слы́шавшими в нас извести́ся?

И святителю, ко Евреем, зачало 318:

Бра́тие, тако́в нам подоба́ше архиере́й, преподо́бен, незло́бив, безскве́рнен, отлуче́н от гре́шник и вы́шше Небе́с быв. И́же не и́мать по вся дни ну́жды, я́коже первосвяще́нницы, пре́жде о свои́х гресе́х же́ртвы приноси́ти, пото́м же о людски́х: сие́ бо сотвори́ еди́ною, Себе́ принес. Зако́н бо челове́ки поставля́ет первосвяще́нники, иму́щыя не́мощь: сло́во же кля́твенное, е́же по зако́не, Сы́на во ве́ки соверше́нна. Глава́ же о глаго́лемых: такова́ и́мамы первосвяще́нника, и́же се́де одесну́ю Престо́ла Вели́чествия на Небесе́х, святы́м служи́тель и ски́нии и́стинней, ю́же водрузи́ Госпо́дь, а не челове́к.

Аллилуиа гласа. И святителю глас 2: Уста́ пра́веднаго поуча́тся прему́дрости, и язы́к его́ возглаго́лет суд.

Евангелие от Марка, зачало 7.

Во вре́мя о́но, вни́де Иису́с в Капернау́м по днех, и слы́шано бысть, я́ко в дому́ eсть. И а́бие собра́шася мно́зи, я́коже ктому́ не вмеща́тися ни при две́рех: и глаго́лаше им сло́во. И приидо́ша к Нему́, нося́ще разсла́бленна (жи́лами), носи́ма четы́рьми. И не могу́щим прибли́житися к Нему́ наро́да ра́ди, откры́ша покро́в, иде́же бе, и прокопа́вше све́сиша oдр, на не́мже разсла́бленный лежа́ше. Ви́дев же Иису́с ве́ру их, глаго́ла разсла́бленному: ча́до, отпуща́ются тебе́ греси́ твои́. Бя́ху же не́цыи от кни́жник ту седя́ще, и помышля́юще в сердца́х свои́х: Что Сей та́ко глаго́лет хулы́? Кто мо́жет оставля́ти грехи́, то́кмо eди́н Бог? И а́бие разуме́в Иису́с ду́хом Свои́м, я́ко та́ко ти́и помышля́ют в себе́, рече́ им: что сия́ помышля́ете в сердца́х ва́ших? Что eсть удо́бее рещи́ разсла́бленному: отпуща́ются тебе́ греси́; или́ рещи́: воста́ни, и возми́ oдр твой, и ходи́? Но да уве́сте, я́ко власть и́мать Сын Челове́ческий на земли́ отпуща́ти грехи́, (глаго́ла разсла́бленному:) Тебе́ глаго́лю: воста́ни, и возми́ oдр твой, и иди́ в дом твой. И воста́ а́бие, и взем oдр, изы́де пред все́ми: я́ко диви́тися всем, и сла́вити Бо́га, глаго́лющим, я́ко николи́же та́ко ви́дехом.

И святителю Евангелие от Иоанна, зачало 36.

Рече́ Госпо́дь ко прише́дшим к Нему́ Иуде́ем: Аз eсмь дверь. Мно́ю а́ще кто вни́дет, спасе́тся; и вни́дет, и изы́дет, и па́жить обря́щет. Тать не прихо́дит, ра́зве да укра́дет и убие́т и погуби́т: Аз приидо́х, да живо́т и́мут, и ли́шше и́мут. Аз eсмь па́стырь до́брый: па́стырь до́брый ду́шу свою́ полага́ет за óвцы: А нае́мник, и́же несть па́стырь, eму́же не суть óвцы своя́, ви́дит во́лка гряду́ща, и оставля́ет óвцы, и бе́гает. И волк расхи́тит их, и распу́дит óвцы. А нае́мник бежи́т, я́ко нае́мник eсть, и неради́т о oвца́х. Аз eсмь па́стырь до́брый, и зна́ю Моя́, и зна́ют Мя Моя́. Я́коже зна́ет Мя Oте́ц, и Аз зна́ю Oтца́, и ду́шу Мою́ полага́ю за óвцы. И и́ны óвцы и́мам, я́же не суть от двора́ сего́, и ты́я Ми подоба́ет привести́, и глас Мой услы́шат, и бу́дет eди́но ста́до, и eди́н Па́стырь.

И святому вся служба святительская.

Причастен: Хвали́те Го́спода с Небе́с, хвали́те Его́ в Вы́шних. Другий: В па́мять ве́чную бу́дет пра́ведник, от слу́ха зла не убои́тся.

НЕДЕЛЯ ТРЕТИЯ СВЯТЫХ ПОСТОВ

НА МАЛЕЙ ВЕЧЕРНИ

Поклонение празднуем Честнаго и Животворящаго Креста.

В субботу вечера, стихиры на 4. Глас 6. Подобен: А́нгельския:

Ны́не а́нгельская во́инства / копиено́сят Дре́во честно́е, благогове́йно окружа́юща, / и вся созыва́юща ве́рныя на поклоне́ние. / Прииди́те у́бо посто́м просвети́вшиися, / припаде́м ему́ ра́достию и стра́хом, / ве́рно зову́ще: / ра́дуйся честны́й Кре́сте, ми́ра утвержде́ние. [Дважды.]

Да Ада́мову потреби́ши кля́тву, / плоть на́шу прие́млеши кроме́ скве́рны, / распина́ешися же и умира́еши, Иису́се преблаги́й: / те́мже Крест Твой, и копие́, гу́бу же и трость, / гво́здие ве́рно почита́ем, / и Воскресе́ние Твое́ ви́дети про́сим.

Заключа́ет Еде́м дре́вом дре́вле змий, / дре́во же Креста́ отверза́ет сей / всем хотя́щим посто́м и слеза́ми очи́ститися. / Прииди́те у́бо предлежа́щее ви́дяще, / тому́ припаде́м со стра́хом ве́рнии зову́ще: / отве́рзи врата́ небе́сная Кре́сте, лю́бящим тя.

Слава, и ныне. Подобен:

Егда́ Кресту́ пригвожде́на ви́де Сло́ве Бо́жий, / безсе́менно Тебе́ Ро́ждшая, / взыва́ше вопию́щи: / увы́ Мне Ча́до сладча́йшее, / ко́е Твое́ смире́ние Бо́же Мой? / Ка́ко безстра́стный страсть терпи́ши, непра́ведным судо́м? / Песносло́влю Твое́ стра́шное кра́йнее снизхожде́ние.

На стиховне стихиры подобны. Глас 2: Подобен: До́ме Евфра́фов:

Разреши́вшеся уз / дре́вняго осужде́ния, ве́рнии / дре́вом Креста́, / на нем пригвожде́ннаго / Христа́ славосло́вим.

Стих: Возноси́те Го́спода Бо́га на́шего, и покланя́йтеся подно́жию но́гу Его́, / я́ко свя́то есть.

Прииди́ ны́не с на́ми Дави́де, / цевни́цу дви́жи, / Христа́ возноси́те поя́, / ве́рнии поклони́теся / Его́ подно́жию.

Стих: Бог же Царь наш пре́жде ве́ка, / соде́ла спасе́ние посреде́ земли́.

Вознесе́м лю́дие / предлежа́щее Дре́во, / и́мже спасе́ние нам / Христо́с подае́т, / и ве́рою целу́ем.

Слава, и ныне, глас и подобен тойже:

Крестобогородичен: Вознесе́на на Кресте́, / за челове́ки, / ви́дящи Твоего́ Сы́на Де́во, / вопия́ше рыда́ющи: / сла́ва благоутро́бию Твоему́.

Таже, Ны́не отпуща́еши: Трисвятое. По О́тче наш:

Тропарь, глас 1: Спаси́ Го́споди лю́ди Твоя́, / и благослови́ достоя́ние Твое́, / побе́ды на сопроти́вныя да́руя, / и Твое́ сохраня́я Кресто́м Твои́м жи́тельство.

И бывает отпуст. По отпусте же входит священник со екклисиархом в сосудохранильницу, и вземлют честное Древо, предыдущу свещнику и кадилу, поющим тропарь: Спаси́ Го́споди лю́ди Твоя́: И приносят на святую трапезу, и вжигают свещу на всю нощь.

НА ВЕЛИЦЕЙ ВЕЧЕРНИ

Благословляет священник, и поем яко обычно предначинательный псалом. Таже стихословие, первая кафисма.

На Го́споди воззва́х, поставим стихов 10, и поем стихиры воскресны осмогласника 3, и анатолиевы 3, и честнаго Креста 4, глас 5:

Подобен: Ра́дуйся по́стников:

Возсия́й Господе́нь Кре́сте, / светолу́чныя мо́лния твоея́ благода́ти, / в сердца́ чтущих тя, / и Богоприя́тною любо́вию прие́млющих, мировожделе́нне, / и́мже сле́зное потреби́ся се́тование, / и сме́ртных се́тей изба́вихомся, / и к при́сному весе́лию приидо́хом. / Покажи́ красоты́ твоея́ благоле́пие, / воздая́ние пода́ждь воздержа́ния рабо́м твои́м, / ве́рно прося́щим твое́ бога́тное заступле́ние, / и ве́лию ми́лость.

Ра́дуйся живоно́сный Кре́сте, / Це́ркве кра́сный раю́, / дре́во нетле́ния, прозя́бшее нам / ве́чныя сла́вы наслажде́ние: / и́мже бесо́встии отгоня́ются полцы́, / и а́нгельстии свеселя́тся чи́нове, / и совокупле́ния ве́рных пра́зднуют. / Ору́жие непобеди́мое, / утвержде́ние неруши́мое, ве́рных побе́до, / свяще́нников похвало́, / Христо́вы ны́не стра́сти и нам пода́ждь дости́гнути, / и ве́лию ми́лость.

Ра́дуйся живоно́сный Кре́сте, / благоче́стия непобеди́мая побе́да, / дверь ра́йская, ве́рных утвержде́ние, / Це́ркве огражде́ние: / и́мже тля разори́ся и упраздни́ся, / и попра́ся сме́ртная держа́ва, / и вознесо́хомся от земли́ к небе́сным: / ору́жие непобеди́мое, бесо́в сопротивобо́рче, / сла́во му́чеников, / преподо́бных я́ко вои́стинну удобре́ние, / приста́нище спасе́ния, / да́руяй ми́ру ве́лию ми́лость.

Гряди́ первозда́нная дво́ице, / ли́ка отпа́дшая го́рних, за́вистию человекоуби́йцы, / го́рькою сла́стию дре́ва, дре́вле вкуше́нием. / Се всечестно́е вои́стинну Дре́во предгряде́т, / к нему́же прите́кше ра́достию облобыза́йте, / и возопи́йте к нему́ с ве́рою: / ты на́ше воззва́ние, Кре́сте всечестны́й, / дре́во Богоблаже́нное, са́де небе́сный: / его́же плода́ причасти́вшеся, нетле́ние улучи́хом, / Еде́ма пе́рваго прие́мше изве́стно, / и ве́лию ми́лость.

Сла́ва, глас 3: Христе́ Бо́же наш, / во́льное распя́тие во о́бщее воскресе́ние ро́да челове́ческаго восприе́мый, / и тро́стию Креста́, обагре́нием червле́ным Своя́ пе́рсты окровави́вый, / оста́вительная нам ца́рски подписа́ти человеколю́бствовавый, / не пре́зри нас бе́дствующих, и па́ки от Тебе́ разстоя́ние: / но уще́дри еди́не долготерпели́ве, во обстоя́нии лю́ди Твоя́, / и воста́ни, побори́ борю́щия ны, я́ко всеси́лен.

И ны́не, Богородичен гласа. Вход. Све́те ти́хий:

Прокимен: Госпо́дь воцари́ся: Ектения, и прочее яко обычно.

На литии стихира храма.

Сла́ва, и ны́не, глас 5: Зря́щи Тя тварь вся на Кресте́ на́га ви́сяща, / Соде́теля и Зижди́теля всех, / изменя́шеся стра́хом, и рыда́ше: / со́лнце же свет омрачи́, / и земля́ колеба́шеся, ка́мение же разседа́шеся, / и хра́ма све́тлость раздира́шеся. / Ме́ртвии воста́ша от гробо́в, / и а́нгельския си́лы ужасо́шася, глаго́люще: / о чудесе́! Судия́ су́дится, / и стра́ждет хотя́ за спасе́ние ми́ра, и обновле́ние.

На стиховне стихиры осмогласника, яже по алфавиту.

Сла́ва, и ны́не, глас 4: Пособи́вый Го́споди кро́ткому Дави́ду / победи́ти иноплеме́нника, / ве́рным лю́дем на́шим спобо́рствуй, / и ору́жием Креста́ низложи́ враги́ на́ша: / покажи́ благоутро́бне на нас дре́вния ми́лости Твоя́, / и да разуме́ют вои́стинну, я́ко Ты еси́ Бог: / и на Тя наде́ющиися побежда́ем, / моля́щиися обы́чно Пречи́стей Твое́й Ма́тери, / дарова́тися нам вели́цей ми́лости.

Тропарь, Богоро́дице Де́во: дважды: и крестный единожды, глас 1: Спаси́ Го́споди лю́ди Твоя́.

И прочее последование бдения: яко обычно.

НА УТРЕНИ

По шестопсалмии, Бог Госпо́дь, во глас осмогласника, и глаголем тропарь воскресный, дважды.

Сла́ва, тропарь, глас 1:

Спаси́ Го́споди лю́ди Твоя́, / и благослови́ достоя́ние Твое́, / побе́ды на сопроти́вныя да́руя, / и Твое́ сохраня́я Кресто́м Твои́м жи́тельство.

И ны́не, Богородичен:

Гаврии́лу веща́вшу Тебе́ Де́во, ра́дуйся, / со гла́сом воплоща́шеся всех Влады́ка, / в Тебе́ святе́м киво́те, / я́коже рече́ пра́ведный Дави́д: / яви́лася еси́ ши́ршая небе́с, / поноси́вши Зижди́теля Твоего́. / Сла́ва все́льшемуся в Тя; / сла́ва Проше́дшему из Тебе́; / сла́ва Свободи́вшему нас рождество́м Твои́м.

И обычное стихословие. Седальны глаголем воскресны.

По полиелеи, [аще где храм честнаго Креста] седален Креста, глас 8. Подобен: Повеле́нное та́йно:

В раи́ у́бо пре́жде дре́вом / обнажи́ о вкуше́нии враг, нанося́ умерщвле́ние: / Креста́ же дре́во, живота́ одея́ние челове́ком нося́, наведе́ на земли́, / и мир весь испо́лнися вся́кия ра́дости. / Его́же ви́дяще покланя́ема, / Бо́гу в ве́ре лю́дие согла́сно воззове́м: / испо́лнь храм сла́вы Его́. [Дважды.]

Степенна гласа. Евангелие утреннее. Воскресе́ние Христо́во: псалом 50.

Сла́ва, глас 8: Покая́ния отве́рзи ми: И ны́не: На спасе́ния стези́: Таже, глас 6: Поми́луй мя Бо́же: Мно́жества соде́янных мно́ю лю́тых:

Канон воскресен, и Богородицы, на 6: таже Триоди на 8, творение господина Феодора Студита. Глас 1.

Песнь 1.

Ирмос: Воскресе́ния день, / просвети́мся, лю́дие. / Па́сха, Госпо́дня Па́сха: / от сме́рти бо к жи́зни, / и от земли́ к небеси́, / Христо́с Бог нас преведе́, / побе́дную пою́щия.

Торжества́ день, воста́нием Христо́вым, / смерть безве́стна показа́ся, / жи́зни возсия́ заря́, / Ада́м воста́в лику́ет ра́достию: / те́мже воскли́кнем, побе́дную пою́ще.

Поклоне́ния день честна́го Креста́, / прииди́те к сему́ вси: / воста́ния бо Христо́ва зари́, / светосия́яй предлага́ет ны́не, / того́ облобыза́им душе́вно ра́дующеся.

Яви́ся вели́кий Госпо́день Кре́сте, / покажи́ ми зрак Боже́ственный красоты́ твоея́ ны́не, / досто́йно покло́нника хвалы́ твоея́: / и́бо я́ко одушевле́нну тебе́, / и возглаша́ю, и облобыза́ю тя.

Да восхва́лят согла́сно не́бо и земля́, / я́ко предлежи́т всем всеблаже́ннейший Крест, / на не́мже пригвожде́н теле́сне пожре́ся Христо́с: / того́ лобыза́им душе́вно ра́дующеся.

Слава, Троичен: О Тро́ице начерта́ньми! О Еди́нице зра́ком! / О́тче, Сы́не, и Ду́ше, / единоси́льная Еди́нице, / в сове́те и хоте́нии, и держа́вы нача́ле, мир Твой сохрани́, / мир подаю́щи.

Богородичен: Иску́са ника́коже ве́дущи му́жеска Де́во, / безсе́менно ражда́еши Младе́нца, / чи́сто но́сиши рожде́ние, / ми́ра Творца́ Христа́ Бо́га: / Того́ моли́ умири́ти вся́ческая.

Катавасия: Боже́ственнейший прообрази́ дре́вле Моисе́й, / в Чермне́м мо́ри / прове́д Изра́иля Кресто́м Твои́м, / во́ду жезло́м пресе́к, / песнь Тебе́ исхо́дную / воспева́я Христе́ Бо́же.

Песнь 3.

Ирмос: Прииди́те, пи́во пие́м но́вое, / не от ка́мене непло́дна чудоде́емое, / но нетле́ния исто́чник / из гро́ба одожди́вша Христа́, / в Не́мже утвержда́емся.

Прииди́те, песнь пои́м но́ву, / разруше́ние а́дово торжеству́юще: / из гро́ба бо Христо́с воскре́се, / смерть плени́в, и спасе́ вся́ческая.

Прииди́те, почерпе́м ве́рнии, / не от исто́чника источа́ющаго во́ду тле́нную, / но от исто́чника просвеще́ния, / Креста́ Христо́ва поклоне́нием, / о не́мже и хва́лимся.

Дре́вле его́же прообразова́ше Моисе́й дла́ньма, / Крест Твой ны́не облобыза́юще, / у́мнаго Амали́ка побежда́ем, Влады́ко Христе́, / и́мже и спаса́емся.

Очи́ма и устна́ма чи́стыма / пою́ще песнь ра́дования, / Госпо́дню Кресту́ ра́достию / поклони́мся ве́рнии, пле́щуще пе́сньми.

Слава, Троичен: Еди́наго в трех Ипоста́сех Бо́га безнача́льнаго чту: / неразде́льнаго Существа́ зра́ком, / Отца́, Сы́на, и Ду́ха Жива́го, / в ни́хже крести́хомся.

Богородичен: В купине́ Моисе́й Твое́ обра́зно та́инство дре́вле Чи́стая ви́де: / я́коже бо о́ныя пла́мень, / огнь Божества́ Твою́ утро́бу не опали́.

Катавасия: Утверди́ Влады́ко Христе́ / Кресто́м на ка́мени мя ве́ры, / не поколеба́тися уму́ прило́ги врага́ зла́го: / еди́н бо еси́ Свят.

Седален, глас 6:

Крест Твой, Го́споди, освяти́ся: / в нем бо быва́ют исцеле́ния боля́щим во гресе́х: / и́мже Тебе́ припа́даем, поми́луй нас.

Стих: Возноси́те Го́спода Бо́га на́шего, и покланя́йтеся подно́жию но́гу Его́, / я́ко свя́то есть.

Днесь проро́ческое испо́лнися сло́во: / се бо покланя́емся, на ме́сто, / иде́же стоя́сте но́зе Твои́ Го́споди: / и дре́ва спасе́ния вкуси́вше, / грехо́вных страсте́й свобо́ду улучи́хом, / моли́твами Богоро́дицы, еди́не Человеколю́бче.

Слава: То́кмо водрузи́ся дре́во Христе́ Креста́ Твоего́, / основа́ния поколеба́шася сме́рти Го́споди: / его́же бо поглоти́ жела́нием ад, отпусти́ тре́петом. / Яви́л еси́ нам спасе́ние Твое́ Святы́й, / и славосло́вим Тя Сы́не Бо́жий, поми́луй нас.

И ныне, Богородичен: Богоро́дице Де́во, моли́ Сы́на Твоего́ / пригво́ждшагося во́лею на Кресте́, / и воскре́сша из ме́ртвых, Христа́ Бо́га на́шего, / спасти́ся душа́м на́шим.

Песнь 4.

Ирмос: На Боже́ственней стра́жи / богоглаго́ливый Авваку́м / да ста́нет с на́ми, и пока́жет / светоно́сна А́нгела, / я́сно глаго́люща: / днесь спасе́ние ми́ру, / я́ко воскре́се Христо́с, / я́ко всеси́лен.

Се воскре́се Христо́с, / мироно́сицам жена́м а́нгел реч́е: / не рыда́йте, ше́дше рцы́те апо́столом: / ра́дуйтеся, днесь спасе́ние ми́ру, / мучи́тельство врага́ сме́ртию разруши́ся.

Живоно́снаго Твоего́ Креста́, / покло́нную ра́дость днесь Христе́ срета́юще, / предсре́тение твори́м всесвяты́я стра́сти Твоея́, / ю́же во спасе́ние ми́ра / соде́лал еси́ Спа́се, я́ко всеси́лен.

Днесь быва́ет ра́дость на небеси́ и на земли́, / я́ко Христо́во зна́мение ми́ру явля́ется Крест треблаже́нный: / сей бо предложе́н быв, / источа́ет кла́няющимся ему́ ра́дость приснотеку́щую.

Что Ти принесе́м Христе́, / я́ко честно́му Кресту́ дал еси́ нам поклони́тися? / На не́мже всесвята́я кровь Твоя́ излия́ся, / иде́же и плоть Твоя́ гвоздьми́ водрузи́ся, / его́же облобыза́юще ны́не благодари́м Тя.

Троичен: Еди́наго Божества́ пою́ три Ипоста́си, / неразде́льно, есте́ственне про́сто пропове́дая, / Отца́ безнача́льна, Сы́на, и Ду́ха Свята́го сопресто́льна, / госпо́дство еди́но, и еди́но ца́рство, / еди́ну держа́ву присносу́щную.

Богородичен: Еди́на в жена́х яви́лася еси́ / вещь пречу́дна Чи́стая, слы́шание стра́шное: / естество́ бо Ты обнови́ла еси́, без се́мене ро́ждши, / пребыва́ющи па́ки я́коже пре́жде Де́ва: / роди́выйся бо из Тебе́, Бог есть и́стинный.

Катавасия: На Кресте́ Тя Си́льне, / свети́ло вели́кое ви́дев, / тре́петом взя́тся, / лучи́ сопря́тав скры, / вся же тварь воспе́ со стра́хом Твое́ долготерпе́ние: / и́бо испо́лнися земля́ / Твоего́ хвале́ния.

Песнь 5.

Ирмос: У́тренюем у́треннюю глубоку́, / и вме́сто ми́ра песнь принесе́м Влады́це, / и Христа́ у́зрим / пра́вды Со́лнце, / всем жизнь возсия́юща.

Возсия́л еси́ от гро́ба незаходи́мый Све́те, / ми́ру облиста́я нетле́ние, / потреби́л еси́ Го́споди сме́ртный плач от коне́ц, / я́ко благоутро́бен.

Присту́пим очище́ннии воздержа́нием, / те́пле облобыза́юще во хвале́нии Дре́во всесвято́е, / на не́мже Христо́с распина́емь, / спасе́ мир, я́ко благоутро́бен.

Лику́ют в весе́лии а́нгельстии чи́ни, / днесь Креста́ Твоего́ поклоне́нием: / тем бо низложи́л еси́ бесо́вския полки́, / спасы́й Христе́ челове́чество.

Рай други́й позна́ся Це́рковь, / я́коже пре́жде дре́во иму́щая живоно́сное, / Крест Твой Го́споди, / из него́же прикоснове́нием безсме́ртию причасти́хомся.

Слава, Троичен: Собезнача́льны три сла́влю, еди́наго Существа́: / Бо́га Отца́, Сы́на, и Ду́ха, / Свет еди́н трисия́тельный, / ку́пно держа́вное ца́рство, в неслия́нном то́ждестве.

Богородичен: Родила́ еси́ естества́ зако́ном, но па́че зако́на: / Тебе́ бо еди́ныя безсе́менно Рождество́, / стра́шный и помышля́емый нрав, / и глаго́лемый рожде́ния Твоего́, Всенепоро́чная.

Катавасия: У́тренююще Тя воспева́ем Спа́се ще́дре, / мир обре́тше Кресто́м Твои́м, / и́мже обнови́л еси́ род челове́ческий / ко све́ту невече́рнему вводя́ нас.

Песнь 6.

Ирмос: Снизше́л еси́ в преиспо́дняя земли́, / и сокруши́л еси́ вереи́ ве́чныя, / содержа́щия свя́занныя, Христе́, / и тридне́вен, я́ко от ки́та Ио́на, / воскре́сл еси́ от гро́ба.

Воскре́сл еси́ смерть упраздни́в Христе́, / я́коже вели́кий Царь, / от а́довых сокро́вищ воззва́л еси́ нас / в наслажде́ние Ца́рства Небе́снаго, в зе́млю безсме́ртия.

Пле́щуще пе́сньми Боже́ственными ве́рнии, воскли́кнем Бо́гу, / Крест Госпо́день целу́юще: / освяще́ния бо источа́ет исто́чник, всем су́щим в ми́ре.

Исполня́ется песнописа́тельный глас: / се бо покланя́емся пречи́стых ног Твои́х подно́жию Всеси́льне, / Кресту́ Твоему́ честно́му, тривожделе́нному дре́ву.

Е́же ви́де дре́во в Твой хлеб вложе́ное, во проро́цех рыда́тель, / Крест Твой Ще́дре облобыза́юще, / воспева́ем Твоя́ у́зы, и погребе́ние, копие́ же и гво́здия.

На ра́мех его́же изво́лил еси́ Христе́ носи́ти святы́й Крест, / и на сем вознести́ся, и распя́тися пло́тию, / облобыза́юще собира́ем кре́пость на враги́ неви́димыя.

Троичен: Еди́ницу в трех начерта́ниих пою́, / и Тро́ицу во еди́ном естестве́ покланя́емую, / Бо́га тро́е ку́пно, Свет трисо́лнечный, / Отца́, и Сы́на, и Свята́го Ду́ха.

Богородичен: Чуде́с вели́кое чу́до в Тебе́ яви́ся нескве́рная А́гнице, / взе́млющаго бо ми́ра грех, А́гнца родила́ еси́: / Его́же моли́ приле́жно о пою́щих Тя.

Катавасия: О́браз Боже́ственнаго Креста́, / Ио́на во чре́ве ки́тове / просте́ртыма дла́ньма проначерта́, / и взира́ше спасе́н от зве́ря / си́лою Твое́ю Сло́ве.

Кондак, глас 7. Самогласен:

Не ктому́ пла́менное ору́жие / храни́т врат Еде́мских: / на ты́я бо на́йде пресла́вный соу́з Дре́во кре́стное, / сме́ртное жа́ло, и а́дова побе́да прогна́ся. / Предста́л бо еси́ Спа́се мой, / вопия́ су́щим во а́де: / вни́дите па́ки в рай.

Икос: Три кресты́ водрузи́ на Голго́фе Пила́т, / два разбо́йников, и еди́н Жизнода́вца. / Его́же ви́де ад, и рече́ су́щим до́ле: / о слуги́ мои́, и си́лы моя́! / Кто водрузи́в гво́здие в се́рдце мое́, / древяны́м мя копие́м внеза́пу прободе́? / И растерза́юся, вну́тренними мои́ми болю́, утро́бою уязвля́юся, / чу́вства моя́ смуща́ют дух мой, / и понужда́ются изрыга́ти Ада́ма, и су́щия от Ада́ма, дре́вом да́нныя ми: / Дре́во бо сия́ вво́дит па́ки в рай.

Синаксарий.

Песнь 7.

Ирмос: О́троки от пе́щи изба́вивый, / быв Челове́к, / стра́ждет я́ко сме́ртен, / и стра́стию сме́ртное, / в нетле́ния облачи́т благоле́пие, / Еди́н благослове́н / отце́в Бог, и препросла́влен.

Воскре́сл еси́ из гро́ба тридне́вно, я́ко спяй Го́споди, / а́довы вра́тари порази́в Боже́ственною си́лою, / и дре́вния воздви́г пра́отцы / еди́не благослове́нный / отце́в Бо́же, и препросла́вленный.

Цевни́цею пе́сней лику́юще / возра́дуемся днесь лю́дие Кре́стным поклоне́нием / на сем пригвозди́вшагося Христа́ сла́вяще, / еди́наго благослове́ннаго / отце́в Бо́га, и препросла́вленнаго.

Показа́вый умерщвле́ния орга́н, жи́зни де́лателище, / ми́ру облобыза́тельное, Твой Крест Всеще́дре, / тому́ покланя́ющияся освяти́, / еди́не благослове́нный / отце́в Бо́же и препросла́вленный.

Еди́не ми́лостиве и благоутро́бне, просвети́, / освяти́ еди́не Иису́се, / покланя́ющияся ве́рно Твоему́ Кресту́, / и Боже́ственным страда́нием, / еди́не благослове́нный / отце́в Бо́же, и препросла́вленный.

Слава, Троичен: Еди́ницу в трех Ипоста́сех, пою́ Божество́: / Свет бо Оте́ц, Свет Сын, Свет Дух, / Све́ту неразде́льну пребыва́ющу, / еди́нством есте́ственным, / и треми́ луча́ми Лиц сия́ющу.

Богородичен: Всех проро́к многоимени́тое Ты еси́ пропове́дание, / врата́ бо Бо́жия, ру́чка злата́я, земля́ свята́я, / яви́лася еси́ Де́во Богоневе́стная, / ро́ждшая пло́тию Иису́са Христа́, / отце́в Бо́га, и препросла́вленна.

Катавасия: Из пла́мене о́троки избавле́й, / плоть прии́м прише́л еси́ на зе́млю, / и на Кресте́ пригвожде́н, / спасе́ние нам дарова́л еси́ Христе́, / еди́н благослове́н отце́в Бо́же, / и препросла́влен.

Песнь 8.

Ирмос: Сей нарече́нный и святы́й день, / Еди́н суббо́т Царь и Госпо́дь, / пра́здников пра́здник / и торжество́ есть торже́ств, / во́ньже благослови́м Христа́ во ве́ки.

Ми́ро в рука́х что держите́ вся́ко? / Кого́ же взыску́ете? / Ны́не явле́йся ю́ноша во гро́бе, вопия́: / воскре́се Христо́с и Бог наш, / возста́вивый естество́ челове́ков от а́довых сокро́вищ.

Ра́дуйся требога́тое дре́во и Боже́ственное, Кре́сте, / све́те су́щим во тьме, / четвероконе́чный мир сия́нием твои́м, / воста́ния Христо́ва проявле́й зари́, / сподо́би вся ве́рныя дости́гнути Па́сху.

В сий день благоуха́ют ми́ра боже́ственныя мирополо́жницы, / живоми́рственное дре́во Крест Христо́в: / обоня́им его́ Богодухнове́нныя вони́, / тому́ покланя́ющеся ве́рно во ве́ки.

Гряди́ Елиссе́е проро́че, / рцы я́ве, что дре́во о́ное, / е́же в во́ду вложи́л еси́? / Крест Христо́в, и́мже от глубины́ тли извлеко́хомся, / тому́ покланя́ющеся ве́рно во ве́ки.

Дре́вле Иа́ков прообразу́я Крест Твой Христе́, / Ио́сиф покланя́шеся Боже́ственнаго жезла́ кра́еви, / скиптр сей стра́шный Ца́рствия Твоего́ предви́дев: / ему́же ны́не покланя́емся ве́рно во ве́ки.

Благослови́м Отца́, и Сы́на, и Свята́го Ду́ха, Го́спода.

Троичен: Еди́но в трех начерта́ниих Существо́ сла́вя, / не слива́ю единоли́чно трех, ниже́ пресеца́ю зра́ка, / Отца́, и Сы́на, со Ду́хом: / Еди́н бо над все́ми Бог в Тро́ице.

Богородичен: Еди́на в ма́терех яви́лася еси́ / Де́ва Богоневе́сто Мари́е, / без му́жа роди́вши Христа́ Спа́са, / чистоты́ зна́мение сохрани́вши: / Тебе́ ублажа́ем ве́рнии во ве́ки.

Катавасия: Ру́це в ров ве́рженый львов, / иногда́ вели́кий во проро́цех, / крестообра́зно просте́р Дании́л, / неврежде́н от сих сне́ди спасе́ся, / благословя́ Христа́ Бо́га во ве́ки.

Песнь 9.

Ирмос: Свети́ся, свети́ся, / но́вый Иерусали́ме: / сла́ва бо Госпо́дня / на тебе́ возсия́, / лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.

Во гроб соше́л еси́ жизнода́вче и Бо́же, / и сокруши́л еси́ вся закле́пы же и вереи́, / и ме́ртвыя воскреси́л еси́, / сла́ва воста́нию Твоему́, вопию́щия, / Христе́ Спа́се всеси́льне.

Гроб Твой жизнь мне Христе́ источи́, содержа́й бо жизнь, / предста́в возопи́л еси́ живу́щим во гробе́х: / су́щии во у́зах разреши́теся, / Аз бо ми́ра избавле́ние приидо́х.

Пе́сньми да взыгра́ют вся древа́ дубра́вная, / тезоимени́тое дре́во Креста́ зря́ще облобыза́емое днесь: / на не́мже Христо́с вознесе́ главу́, / я́коже проро́чествует боже́ственный Дави́д.

Дре́вом уме́рый, дре́во тя обрето́х жи́зни Христоно́сне Кресте мой, / храни́телю мой неруши́мый, / на де́моны кре́пкая держа́во, / тебе́ покланя́яйся днесь зову́: / освяти́ мя сла́вою твое́ю.

Весели́ся, ра́дуйся Це́рковь Бо́жия, / дре́ву требога́тному покланя́ющися днесь, / всесвята́го Креста́ Христо́ва: / Ему́же слу́жат чи́нове а́нгельстии, / и со стра́хом предстоя́т.

Троичен: Тро́ице Ли́цы, еди́нице Естество́м покланя́юся, / Тебе́ Божество́ Свято́е, / Отцу́, и Сы́ну, со Святы́м же Ду́хом, / еди́ному нача́лу, еди́ному Ца́рству, / все́ми влады́чествующему.

Богородичен: Гора́ вели́кая в ню́же всели́ся Христо́с, / Ты яви́лася еси́ Де́во, / я́коже боже́ственный Дави́д вопие́т: / Е́юже мы вознесо́хомся к небеси́, / всыни́вшеся Ду́хом Всеблаже́нная.

Катавасия: О Ма́ти Де́во, / и Богоро́дице нело́жная, / ро́ждшая безсе́менно Христа́ Бо́га на́шего, / на Крест возне́сшагося пло́тию, / Тя ве́рнии вси досто́йно с Ним ны́не велича́ем.

Ексапостиларий воскресен. И Креста. Подобен: Со ученики́:

Слава: Крест Христо́в честны́й / днесь предложе́нный ви́девше поклони́мся, / и ве́рно возвесели́мся, облобыза́юще любо́вию, / на сем во́лею распе́ншагося прося́ще Го́спода, сподо́бити всех нас, / и Кресту́ честно́му поклони́тися, / и дости́гнути Воскресе́ние неосужде́нно.

И ныне, Богородичен: Дре́ву, на не́мже Всечи́стая, / пречи́стеи дла́ни о нас простре́, / пригвозди́выйся Сын Твой, / ны́не благоче́стно покланя́ющимся, / даждь нам мир, и мироспаси́тельныя всечестны́я стра́сти предвари́ти, / и све́тлой мирора́достной господоимени́той Па́сце поклони́тися, и светоно́сному дню.

На хвалитех поставим стихов 8: и поем стихиры воскресны, осмогласника 4: и трипеснца подобны 3, повторяюще 1, глас 4.

Подобен: Я́ко до́бля:

Во гла́сех воскли́кнем, / в пе́снех возвели́чим, / Крест честны́й облобыза́юще, / и к нему́ возопии́м: / Кре́сте всече́стне, / освяти́ на́ша ду́ши и телеса́ си́лою твое́ю, / и от вся́каго вре́да сопроти́вных соблюди́ неврежде́ны, / благоче́стно покланя́ющияся тебе́.

Приступи́вше почерпи́те неистоща́емых вод, / Креста́ благода́тию пролива́емых: / се предлежа́щее ви́дяще Дре́во свято́е, / дарова́ний исто́чник, / напое́ное кро́вию и водо́ю Влады́ки всех, / на том во́лею возне́сшагося, / и земны́я воздви́гшаго.

Стих: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то есть.

Це́ркве утвержде́ние, / мона́шествующих похвала́ и спасе́ние, / ты еси́ Кре́сте всече́стне: / те́мже покланя́ющеся тебе́, / и се́рдцем и душе́ю просвеща́емся днесь, / Боже́ственною благода́тию на тебе́ Пригвозди́вшагося, / и держа́ву льсти́ваго разори́вшаго, / и кля́тву потре́бльшаго.

Стих: Бог же Царь наш пре́жде ве́ка, соде́ла спасе́ние посреде́ земли́.

И повторяюще первую стихиру, таже глаголем стих:

Воскресни́ Го́споди Бо́же мой, да вознесе́тся рука́ Твоя́, не забу́ди убо́гих Твои́х до конца́.

И поем самогласен, глас 8:

Высокому́драго ра́зума злых фарисе́ев, / всех Госпо́дь при́тчею убежа́ти сего́ научи́: / и не высокому́дрствовати па́че, / е́же подоба́ет му́дрствовати, / всех наказа́, прописа́ние и о́браз Сам быв, / да́же до распя́тия и сме́рти, / Сам Себе́ излия́в. / Благодаря́ще у́бо с мытаре́м рцем: / пострада́вый за ны, и безстра́стен пребы́вый Бо́же, / от страсте́й нас изба́ви, / и спаси́ ду́ши на́ша.

Сла́ва, паки тойже. И ны́не: Преблагослове́нна еси́: Славословие великое.

Егда же начинаем пети: Сла́ва в вы́шних: Тогда приидет иерей оболчен во вся священническия одежды, [или аще где будет старей, то от первейшаго в своих им местех должно есть сему быти]. И взем кадильницу, кадит святую трапезу, и честный Крест, таже подъемлет его на дискосе со хранильницею на главу свою, и исходит от левыя страны престола северными дверьми, предыдущим ему свещам двум, и кадильнице, и отходит до царских врат. Скончану же бывшу славословию, и Трисвятому, глаголет священник: Прему́дрость, про́сти. И начинаем тропарь: Спаси́ Го́споди лю́ди Твоя́: трижды. И приходит иерей нося честный Крест пред святыя двери: и тамо уготовану четвероножнику, и полагается верху его честный Крест, и отверз хранильницу, кадит крестообразно от четырех стран.

И абие поем тропарь, глас 6:

Кресту́ Твоему́ покланя́емся Влады́ко, / и свято́е Воскресе́ние Твое́ сла́вим. [Трижды.]

И начинают покланятися, аще где во обители, игумен, или ин первенствуяй во священных, такожде и прочии священницы покланяющеся пред честным Крестом дважды: целуют же прежде старейшии, и по целовании, паки покланяются единожды: такожде творят и прочии священницы, десная страна и левая. Такожде приходит и братия два два покланяющеся по чину их.

Кланяющимся же братиям поем самогласны сия, глас 2:

Прииди́те ве́рнии, / животворя́щему Дре́ву поклони́мся, / на не́мже Христо́с Царь сла́вы во́лею ру́це распросте́р, / вознесе́ нас на пе́рвое блаже́нство, / и́хже пре́жде сла́стию укра́д враг, / изгна́ны от Бо́га сотвори́. / Прииди́те ве́рнии, Дре́ву поклони́мся, / и́мже сподо́бихомся неви́димых враг сокруши́ти главы́. / Прииди́те вся оте́чествия язы́к, / Крест Госпо́день пе́сньми почти́м: / ра́дуйся Кре́сте, па́дшаго Ада́ма соверше́нное избавле́ние! / О тебе́ ве́рнии хва́лятся, / я́ко твое́ю си́лою исма́ильтеския лю́ди держа́вно покаря́ющии. / Тебе́ ны́не со стра́хом христиа́не целу́ем: / на тебе́ пригвозди́вшагося Бо́га сла́вим, глаго́люще: / Го́споди на том пригвозди́выйся поми́луй нас, / я́ко Благ и Человеколю́бец.

Глас 8: Днесь Влады́ка тва́ри, и Госпо́дь сла́вы, / на Кресте́ пригвожда́ется и в ре́бра пробода́ется, / же́лчи и о́цта вкуша́ет, сла́дость церко́вная: / венце́м от те́рния облага́ется: / покрыва́яй не́бо о́блаки, / оде́ждею облачи́тся поруга́ния: / и зауша́ется бре́нною руко́ю, / руко́ю созда́вый челове́ка. / По плеще́ма бие́н быва́ет, / одева́яй не́бо о́блаки. / Заплева́ния и ра́ны прие́млет, / поноше́ния и зауше́ния: / и вся терпи́т мене́ ра́ди осужде́ннаго, / Изба́витель мой и Бог, / да спасе́т мир от пре́лести, я́ко благоутро́бен.

Слава, глас 8: Днесь неприкоснове́нный существо́м, / прикоснове́н мне быва́ет, / и стра́ждет стра́сти, / свобожда́яй мя от страсте́й. / Свет подава́яй слепы́м, / от беззако́нных усте́н оплева́ется, / и дае́т плещи́ за плене́нныя на ра́ны. / Сего́ Чи́стая Де́ва и Ма́ти на Кресте́ зря́щи, / боле́зненно веща́ше: / увы́ мне Ча́до Мое́, / что сие́ сотвори́л еси́? / Кра́сный добро́тою па́че всех челове́к, / бездыха́нный, беззра́чный явля́ешися, / не име́я ви́да, ниже́ добро́ты. / Увы́ Мне Мой Све́те! / Не могу́ спя́ща зре́ти Тя, / утро́бою уязвля́юся, / и лю́тое ору́жие се́рдце Мое́ прохо́дит. / Воспева́ю Твоя́ стра́сти, / покланя́юся благоутро́бию Твоему́, / долготерпели́ве сла́ва Тебе́.

И ныне, глас тойже: Днесь проро́ческое испо́лнися сло́во: / се бо покланя́емся на ме́сто, / иде́же стоя́сте но́зе Твои́ Го́споди: / и Дре́ва спасе́ния вкуси́вше, / грехо́вных страсте́й свобо́ду улучи́хом, / моли́твами Богоро́дицы, еди́не Человеколю́бче.

Таже ектении, и отпуст. Сла́ва, и ны́не, стихира евангельская, в притворе: и чтется оглашение Студитово, и час первый, и совершенный отпуст.

НА ЛИТУРГИИ

Изобразительная. Блаженна гласа, на 6: и от канона креста песнь 3-я на 4.

Вместо же Трисвятаго поем: Кресту́ Твоему́ покланя́емся Влады́ко, / и свято́е Воскресе́ние Твое́ сла́вим.

Прокимен Апостола, глас 6: Спаси́ Го́споди лю́ди Твоя́, / и благослови́ достоя́ние Твое́. Стих: К Тебе́ Го́споди воззову́, Бо́же мой, да не премолчи́ши от мене́.

Апостол ко Евреем, зачало 311.

Бра́тие, иму́ще у́бо Архиере́а вели́ка, проше́дшаго небеса́, Иису́са Сы́на Бо́жия, да держи́мся испове́дания. Не и́мамы бо архиере́а не могу́ща спострада́ти не́мощем на́шим, но искуше́на по вся́чeским по подо́бию, ра́зве греха́. Да приступа́ем у́бо с дерзнове́нием к престо́лу благода́ти, я́ко да прии́мем ми́лость и благода́ть обря́щем во благовре́менну по́мощь.

Всяк бо первосвяще́нник, от челове́к прие́млемь, за челове́ки поставля́ется на слу́жбы я́же к Бо́гу, да прино́сит да́ры же и жéртвы о гресе́х. Спострада́ти моги́й неве́жствующим и заблужда́ющим: поне́же и той не́мощию обложе́н eсть. И сего́ ра́ди до́лжен eсть я́коже о лю́дех, та́коже и о себе́ приноси́ти за гре́хи. И никто́же сам о себе́ прие́млет честь, но зва́нный от Бо́га, я́коже и Ааро́н. Та́ко и Христо́с, не Себе́ просла́ви бы́ти первосвяще́нника, но Глаго́лавый к Нему́: Сын Мой eси́ Ты, Аз днесь роди́х Тя. Я́коже и и́нде глаго́лет: Ты eси́ свяще́нник во век по чи́ну Мелхиседе́кову.

Аллилуиа, глас 1. Стих: Помяни́ сонм Твой, его́же стяжа́л еси́ испе́рва. Стих: Бог же Царь наш пре́жде ве́ка, соде́ла спасе́ние посреде́ земли́.

Евангелие от Марка, зачало 37.

Рече́ Госпо́дь: и́же хо́щет по Мне ити́, да отве́ржется себé, и во́змет крест свой, и по Мне гряде́т. И́же бо а́ще хо́щет ду́шу свою́ спасти́, погуби́т ю, а и́же погуби́т ду́шу свою́ Менé ра́ди и Eва́нгелия, той спасе́т ю. Ка́я бо по́льза челове́ку, а́ще приобря́щет мир весь, и отщети́т ду́шу свою́? Или́ что даст челове́к изме́ну на души́ свое́й? И́же бо а́ще постыди́тся Менé и Мои́х слове́с в ро́де сем прелюбоде́йнем и гре́шнем, и Сын Челове́ческий постыди́тся eго́, eгда́ прии́дет во сла́ве Oтца́ Своего́ со а́нгелы святы́ми. И глаго́лаше им: ами́нь глаго́лю вам, я́ко суть не́цыи от зде стоя́щих, и́же не и́мут вкуси́ти сме́рти, до́ндеже ви́дят Ца́рствие Бо́жие прише́дшее в си́ле.

Причастный: Зна́менася на нас свет лица́ Твоего́ Го́споди.

НЕДЕЛЯ ЧЕТВЕРТАЯ СВЯТЫХ ПОСТОВ

В СУББОТУ ВЕЧЕРА

Стихиры воскресны 3, и анатолиевы 4, и Минеи 3. Инии же последнейшии определиша петися последованию святаго Иоанна Лествичника. Стихиры, глас 8.

Подобен: О пресла́внаго чудесе́!

О́тче Иоа́нне преподо́бне, / вы́ну вои́стинну Бо́жия в горта́ни возноше́ния носи́л еси́ / поуча́яся де́тельнейшим, Богодухнове́нным словесе́м всему́дре, / и отту́ду истека́емою благода́тию обогати́лся еси́, быв блаже́н, / нечести́вых всех сове́тования низвраща́я.

Подобен: О́тче Иоа́нне пресла́вне, / слез исто́чники ду́шу очи́стив, / и всено́щными стоя́нии Бо́га уми́лостивив, / воспери́лся еси́ к любле́нию Сего́ блаже́нне и красоте́: / ея́же досто́йно ны́не наслажда́ешися, непреста́нно ра́дуяся, / со страда́льцы твои́ми богому́дре преподо́бне.

Подобен: О́тче Иоа́нне преподо́бне, / воспери́в ум к Бо́гу ве́рою, / мирска́го смеше́ния омерзи́л еси́ непостоя́нное: / и крест твой восприи́м, Всеви́дцу после́довал еси́: / те́ло необузда́нное, по́двигами обуче́ния, по́мыслу порабо́тив, / кре́постию Боже́ственнаго Ду́ха.

Слава, глас 5: Преподо́бне о́тче, / гла́са Ева́нгелия Госпо́дня послу́шав, / мир оста́вил еси́, / бога́тство и сла́ву нивочто́же вмени́в. / Отону́дуже всем возопи́л еси́: / возлюби́те Бо́га, и обря́щете благода́ть ве́чную. / Ничто́же предпочти́те па́че любве́ Его́, / да егда́ прии́дет во сла́ве Свое́й, / обря́щете упокое́ние со все́ми святы́ми, / и́хже моли́твами Христе́ сохрани́, / и спаси́ ду́ши на́ша.

И ныне, Богородичен 1-й гласа.

На стиховне стихиры Осмогласника. Слава, преподобнаго, глас 2. Самогласен:

На земли́ а́нгела, / и на небесе́х челове́ка Бо́жия, / ми́ра благоукраше́ние, / наслажде́ние благи́х, / доброде́телей по́стнических похвалу́, Иоа́нна почти́м: / насажде́н бо в дому́ Бо́жии, процвете́ пра́ведно, / и я́ко кедр в пусты́ни умно́жи стада́ Христо́ва слове́сных ове́ц, / в преподо́бии и пра́вде.

И ныне, Богородичен, глас тойже: О чудесе́ но́ваго всех дре́вних чуде́с! / Кто бо позна́ ма́терь без му́жа ро́ждшую, / и на руку́ нося́щую, / всю тварь Содержа́щаго? / Бо́жие есть изволе́ние, Ро́ждшееся. / Его́же я́ко Младе́нца, Пречи́стая, / Твои́ма рука́ма носи́вшая, / и Ма́терне дерзнове́ние к Нему́ иму́щая, / не преста́й моля́щи о чту́щих Тя, / уще́дрити и спасти́ ду́ши на́ша.

Ныне отпущаеши:

Тропарь, глас 1:

Пусты́нный жи́тель и в телеси́ а́нгел, / и чудотво́рец яви́лся еси́ Богоно́се о́тче наш Иоа́нне: / посто́м, бде́нием, моли́твою небе́сная дарова́ния прии́м, / исцеля́еши неду́жныя, и ду́ши ве́рою притека́ющих ти. / Сла́ва Да́вшему ти кре́пость: / сла́ва Венча́вшему тя: / сла́ва Де́йствующему тобо́ю всем исцеле́ния.

НА УТРЕНИ

По обычном последовании каноны: воскресный с Богородичным, на 6: и настоящий Триоди, на 4: и святаго на 4. Канон трипеснца, глас 5.

Песнь 1.

Ирмос: Спаси́телю Бо́гу, / в мо́ри лю́ди немо́крыми нога́ми наста́вльшему / и фарао́на со всево́инством пото́пльшему, / Тому́ Еди́ному пои́м, / я́ко просла́вися.

Уподо́бихся Христе́ в ру́це разбо́йников впа́дшему, / и бие́ньми е́ле жи́ву от сих оста́вленному Спа́се: / и аз си́це уя́звлен есмь грехи́ мои́ми.

Не пре́зри мене́ неду́гующа лю́то, / вопия́ше Спа́се рыда́я, / на разбо́йники бога́тство изнури́вый Твое́. / И аз си́це молю́ся: / уще́дри и спаси́ мя.

Уврачева́вый мя убие́н иму́ща ум грехи́ в я́звах, / от разбо́йников непра́ведных и лука́вых помышле́ний, Христе́ Спа́се, / спаси́ мя я́ко многоми́лостивый.

Богородичен: Пречи́стая Ма́ти Христо́ва, / вопло́щшагося из Тебе́, и от недр Роди́теля не отлу́чшася Бо́га, непреста́нно моли́, / от вся́каго обстоя́ния спасти́, я́же созда́.

Иный канон преподобнаго, глас 8.

Ирмос: Во́ду проше́д я́ко су́шу, / и еги́петскаго зла избежа́в, / изра́ильтянин вопия́ше: / Изба́вителю и Бо́гу на́шему пои́м.

Во свет невеще́ственный и у́мный, / от печа́ли веще́ственных восте́к Иоа́нне преподо́бне, / моли́твами твои́ми ко Го́споду просвети́ мя.

Я́ко воздержа́ния сла́дость ссав, / отри́нул еси́ го́ресть сласте́й: / те́мже па́че ме́да и со́та услажда́еши о́тче, чу́вства на́ша.

Возше́д на высоту́ доброде́телей, / до́ле пле́жущия поплева́в сла́сти, / сла́дость яви́лся еси́ спасе́ния, преподо́бне о́тче, ста́ду твоему́.

Богородичен: Прему́дрость и Сло́во О́тчее несказа́нно ро́ждшая, / души́ моея́ лю́тую уврачу́й я́зву, / и се́рдца боле́знь укроти́.

Катавасия: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.

Песнь 3.

Ирмос: Утверди́ ны, Бо́же, / Твое́ю си́лою, / и низложи́ ерети́ческая шата́ния, / и вознеси́ рог наш.

Путе́м жития́ Христе́, лю́те путеше́ствуя, / уя́звлен есмь от разбо́йник в страсте́х, / но возста́ви мя молю́ся.

Разби́ша ум мой разбо́йницы, / и оста́виша мя в я́звах е́ле жи́ва прегреше́ний мои́х, / но исцели́ мя Го́споди.

Обнажи́ша мя Спа́се Христе́, за́поведей Твои́х стра́сти, / и сластьми́ уязви́хся, / но изле́й на мя ми́лость.

Богородичен: Моли́ непреста́нно Чи́стая, Проше́дшаго из чресл Твои́х, / изба́витися ле́сти диа́воли, / пою́щим Тя Ма́терь Бо́жию.

Иный.

Ирмос: Ты еси́ утвержде́ние притека́ющих к Тебе́, Го́споди, / Ты еси́ свет омраче́нных, / и пое́т Тя дух мой.

Попали́л еси́ у́глем обуче́ния пресла́вно страсте́й те́рние, / и согрева́еши мона́шествующих состоя́ния.

Ми́ро освяще́ния от по́стнических преподо́бне арома́т, / весь сложи́лся еси́ в воню́ благоуха́ния Бо́жия.

В зако́нех обуче́ния поуча́яся, стра́сти потопи́л еси́, / я́коже ины́я ны́не фараони́ты, тече́нием слез твои́х.

Богородичен: Уста́ви мое́ непостоя́нное / помышле́ний, Чистая, смущение, / Ма́ти Бо́жия, / к Сы́ну Твоему́ направля́ющи движе́ние.

Седален, глас 5. Подобен: Стра́нное:

Пречи́стый Крест Твой, Спа́се наш, / я́ко ору́жие спасе́ния содержа́ще, / тем Тебе́ вопие́м: / спаси́ ны пострада́вый во́лею о нас, всех Бо́же, / я́ко многоми́лостивый.

Слава, преподобнаго, глас 4. Подобен: Вознесы́йся:

Доброде́тельми к небеси́ возсия́вый, водруже́н я́ве, / возше́л еси́ к Боговиде́ния неизме́римой глубине́ благоче́стно: / вся у́бо победи́в де́монския ко́зни, / покрыва́еши же челове́ки от вре́да сих, / Иоа́нне, ле́ствице доброде́телей: / и ны́не мо́лишися спасти́ся рабо́м твои́м.

И ныне, Богородичен. Подобен: На престо́ле херуви́мском седя́й, / и в не́дрех О́тчих водворя́яйся, / я́ко на престо́ле седи́т святе́м Свое́м Влады́чице, / в не́дрех Твои́х пло́тски: / Бог бо воцари́выйся та́ко над все́ми язы́ки, / и разу́мно ны́не пое́м Ему́: / Его́же и Ты Чи́стая моли́, / спасти́ся рабо́м Твои́м.

Песнь 4.

Ирмос: Услы́шах, Го́споди, / слух Твой и убоя́хся; / разуме́х смотре́ние Твое́ / и просла́вих Тя, Еди́не Человеколю́бче.

Разбо́йницы окрадо́ша мое́ дея́ние Боже́ственное, / и оста́виша мя я́звами му́чима.

Извлеко́ша мя Спа́се за́поведей Твои́х, / непостоя́нная помышле́ния моя́, / отону́дуже уя́звлен есмь прегреше́ньми.

Леви́т ра́нами уя́звленна, я́ко ви́де мя, / ми́мо и́де, Спа́се мой, / но Ты мя спаси́.

Богородичен: Госпо́дственно прославля́ем Тя / Богоро́дице Безневе́стная, / и к Твоему́ приста́нищу ве́рнии прибега́ем.

Иный.

Ирмос: Услы́шах, Го́споди, / смотре́ния Твоего́ та́инство, / разуме́х дела́ Твоя́ / и просла́вих Твое́ Божество́.

Я́ко цве́тник благово́ннейший, / и доброде́телей рай одушевле́нный, / воздержа́ние процве́л еси́, / и́мже вся напита́л еси́ чту́щия тя.

Законоположи́теля обуче́ния, / и мона́хов пра́вило кротча́йшее, / я́ко Моисе́а тя и Дави́да вои́стинну, / стяжа́вше о́тче, ублажа́ем.

Насажде́н на вода́х воздержа́ния, / яви́лся еси́ блаже́нне, розга́ о́тче благоцвету́щая, / благоче́стия гро́зды произнося́щая.

Богородичен: Под ле́том быва́ема, / от Отца́ безле́тно возсия́вша, / Богома́ти нам родила́ еси́: / Его́же моли́ спасти́ пою́щия Тя.

Песнь 5.

Ирмос: У́треннююще, вопие́м Ти: / Го́споди, спаси́ ны, / Ты бо еси́ Бог наш, / ра́зве Тебе́ ино́го не зна́ем.

Иису́се, посети́ ра́ны души́ моея́, / я́коже дре́вле в ру́це впа́дшаго разбо́йничи, / и уврачу́й боле́знь мою́ Христе́, молю́ся.

Боле́зненно я́звами изнемого́х, Христе́ мой, прегреше́ний, / и отту́ду наг лежу́ доброде́телей Боже́ственных: / молю́, спаси́ мя.

Иере́й я́коже ви́де мя, и леви́т не возмо́же я́ве, / мимоидо́ша бо мя, / но Сам я́ко благоутро́бен, / ны́не спасе́ние по́дал, и спасл еси́.

Богородичен: Не пре́зри Влады́ко окая́ннаго мене́, молю́ся, / уя́звленнаго умо́м боле́зненно от разбо́йник, / но уще́дри моли́твами Спа́се, Ро́ждшия тя.

Иный.

Ирмос: Вску́ю мя отри́нул еси́ / от лица́ Твоего́, Све́те Незаходи́мый, / и покры́ла мя есть чужда́я тьма, окая́нного, / но обрати́ мя и к све́ту за́поведей Твои́х / пути́ моя́ напра́ви, молю́ся.

Погаси́в вся стра́сти, / росо́ю подвиго́в твои́х о́тче блаже́нне, / оби́льно возже́г огне́м любве́ и ве́ры, / воздержа́ния свети́льник, и просвеще́ние безстра́стия, / и дне сын был еси́.

Ве́ры грозд, Боже́ственным земледе́лием твои́м о́тче воспита́л еси́, / и в точи́ла вложи́л еси́, / и возде́лал еси́ труды́ обуче́ния, / и ча́шу испо́лнь духо́вную воздержа́ния: / весели́ши сердца́ ста́да твоего́.

Претерпе́в до́бре прило́ги и я́звы проти́вных враго́в, / яви́лся еси́ столп терпе́ния, / утвержда́я ста́до твое́ па́лицею Боже́ственною, / на па́жити воздержа́ния, / и на воде́ воспитова́я блаже́нне.

Богородичен: Ре́чем Твои́х усте́н Всечи́стая после́дующе, Тя ублажа́ем: / с Тобо́ю бо вои́стинну / вели́чия сотвори́вый Госпо́дь возвели́чи Тя, / и и́стинную Бо́жию Ма́терь, / рожде́йся из чре́ва Твоего́ показа́.

Песнь 6.

Ирмос: Обы́де мя бе́здна, / гроб мне кит бысть, / аз же возопи́х к Тебе́, Человеколю́бцу, / и спасе́ мя десни́ца Твоя́, Го́споди.

Страстьми́ ижди́х житие́ Боже́ственное Влады́ко, / и вся́ко прегреше́ньми лю́те уя́звен, прибего́х к Тебе́: / уще́дри мя, молю́ся.

Расхи́тиша бога́тство мое́, / и я́коже ме́ртва мя оста́виша разбо́йницы, / страстьми́ ум мой уязви́вше, / но уще́дрив спаси́ мя Го́споди.

Я́ко ви́де леви́т мою́ ран боле́знь, / язв не терпя́, мимои́де мя: / Сам же Человеколю́бче, / излия́л ми еси́ бога́тую Твою́ ми́лость.

Богородичен: Купину́ Тя неопали́мую, и го́ру, / и ле́ствицу одушевле́нную, / и дверь небе́сную, досто́йно сла́вим, / Мари́е пресла́вная, правосла́вных похвало́.

Иный.

Ирмос: Очи́сти мя, Спа́се, / мно́га бо беззако́ния моя́, / и из глубины́ зол возведи́, молю́ся, / к Тебе́ бо возопи́х, / и услы́ши мя, / Бо́же спасе́ния моего́.

Прия́л еси́ в души́ Боже́ственное бога́тство Ду́ха, / непоро́чную моли́тву, чистоту́, / че́стность, бде́ние всегда́шнее, воздержа́ния труды́, / и́миже дом позна́лся еси́ Бо́жий.

Вещества́ е́же до́ле, прему́дре, прете́кл еси́ ху́дость, / невеще́ственною же моли́твою ум воспери́в, / и вы́шняго упокое́ния яви́лся еси́ насле́дник, / соверше́нства ра́ди жития́.

По́тами по́стническими / у́глие стрел вра́жиих угаси́л еси́ вои́стинну, / и огнь ве́ры возсия́в, / попали́л еси́ неве́рия, ересе́й шата́ния.

Богородичен: Возсия́ от Сио́на вы́шняго благоле́пие, / предложе́нием пло́ти по соедине́нию неизрече́нному, / из Тебе́ Неискусобра́чная обложе́нное, и мир просвети́.

Кондак, глас 4. Подобен: Яви́лся еси́ днесь:

На высоте́ Госпо́дь воздержа́ния и́стинна тя положи́, / я́коже звезду́ неле́стную, световодя́щую концы́, / наста́вниче Иоа́нне о́тче наш.

Икос: Дом Бо́жий я́ко вои́стинну, / самаго́ себе́ соде́лал еси́ о́тче, / Боже́ственными твои́ми доброде́тельми: / я́ве украси́в я́ко зла́то све́тлое, / ве́ру, наде́жду, и любо́вь и́стинную: / Боже́ственныя зако́ны излага́я, / воздержа́нием обучи́вся я́ко безпло́тный: / ра́зум, му́жество, целому́дрие стяжа́в, / смире́ние, и́мже возне́слся еси́. / Те́мже и просвети́лся еси́ / моли́твами непреста́нными, / и небе́сная прия́л еси́ селе́ния, / наста́вниче Иоа́нне о́тче наш.

Таже чтется синаксарий дневный.

Посем житие преподобнаго отца нашего Иоанна Лествичника, в мире скончавшагося.

Песнь 7.

Ирмос: Превозноси́мый отце́в Госпо́дь / пла́мень угаси́, о́троки ороси́, согла́сно пою́щия: / Бо́же, благослове́н еси́.

Разбо́йницы обпадо́ша на мя окая́ннаго, / и я́звами оста́виша ме́ртва, я́коже бездыха́нна мя. / Те́мже молю́ся Ти: Бо́же, посети́ мя.

Ум мой плени́ша помышле́ния непостоя́нная, и уязви́вше страстьми́, / ме́ртва мя оста́виша, мно́жеством прегреше́ний, / но Спа́се, исцели́ мя.

Я́ко ви́де леви́т мя ра́нами боля́ща, / не терпя́ язв неисце́льнаго ра́ди, / мимои́де мя, Спа́се мой, / но Сам уврачу́й мя.

Богородичен: Ты от Де́вы воплоти́выйся, спасл мя еси́, / я́звам мои́м возлива́я бога́тую ми́лость, Христе́ щедро́т Твои́х: / сего́ ра́ди Тя сла́влю.

Иный.

Ирмос: От Иуде́и доше́дше, о́троцы / в Вавило́не иногда́ / ве́рою Тро́ическою пла́мень пе́щный попра́ша, пою́ще: / отце́в Бо́же, благослове́н еси́.

На зла́це вы́шняго ца́рствия, / ста́до о́тче воспита́л еси́ / и жезло́м догма́т зве́ри отгна́в ересе́й, воспе́л еси́: / оте́ц на́ших Бо́же благослове́н еси́.

В го́рний вшел еси́ и неве́стнический черто́г Ца́рства Христо́ва, / оде́ждею облече́н досто́йною зва́вшаго, / в не́мже и возле́гл еси́, вопия́: / оте́ц на́ших Бо́же благослове́н еси́.

Невла́жная грехми́, река́ яви́лся еси́ воздержа́ния о́тче, / по́мыслы потопля́я, и скве́рну очища́я, вопию́щих ве́рою: / оте́ц на́ших Бо́же благослове́н еси́.

Богородичен: Из чре́ва Твоего́ про́йде воплоти́выйся Де́во, всех Госпо́дь: / те́мже Тя Богоро́дицу му́дрствующе правосла́вно, Сы́ну Твоему́ зове́м: / оте́ц на́ших Бо́же благослове́н еси́.

Песнь 8.

Ирмос: Тебе́, Вседе́телю, / в пещи́ о́троцы, всеми́рный лик спле́тше, поя́ху: / дела́ вся́кая, Го́спода по́йте / и превозноси́те во вся ве́ки.

От разбо́йник по́мыслов мои́х Спа́се, / растли́х житие́ мое́ согреше́ний я́звами. / Те́мже Боже́ственнаго обнажи́хся о́браза, / Тебе́ человеколюби́ваго Бо́га, но уще́дри мя.

Прише́л еси́ на зе́млю от вы́шних Спа́се, / уще́дрив бие́ньми ура́неннаго мя всего́ прегреше́ний я́звами Ще́дре, / и излия́л еси́ на мя Христе́, ми́лость Твою́.

Те́ло и ду́шу Ты Влады́ко Спа́се, / изба́ву дал еси́ за мя, и спасл мя еси́, / мече́м грехо́в уязвле́наго, / в неисце́льных я́звах, я́ко ми́лостивый.

Богородичен: Тя па́че ума́ Богому́жным сло́вом / ро́ждшую Го́спода и де́вствующую, / вся дела́ Де́во благослови́м / и превозно́сим во вся ве́ки.

Иный.

Ирмос: Царя́ Небе́снаго, / Его́же пою́т во́и Áнгельстии, / хвали́те и превозноси́те во вся ве́ки.

Столп тя одушевле́нный я́ко вои́стинну, / и о́браз воздержа́ния о́тче стяжа́вше, / вси твою́ па́мять почита́ем Иоа́нне.

Мно́жество ра́дуется мона́хов, / и лику́ет преподо́бных собо́р и пра́ведных: / вене́ц бо досто́йно с ни́ми прия́л еси́.

Укра́шен доброде́тельми, / в неве́стник неизрече́нныя сла́вы соше́л еси́, / песнь воспева́я Христу́ во ве́ки.

Богородичен: По́мощи я́же от Тебе́ тре́бующия не пре́зри Де́во, / пою́щия и превознося́щия Тя во ве́ки.

Песнь 9.

Ирмос: Иса́ие, лику́й, / Де́ва име́ во чре́ве, и роди́ Сы́на Емману́ила, / Бо́га же и Челове́ка, Восто́к и́мя Ему́, / Его́же велича́юще, Де́ву ублажа́ем.

За́поведи Твоя́ Влады́ко, не сохрани́в ра́зумом мои́м, / в стра́сти вшед сласте́й, обнажи́хся благода́ти, / и я́звами изве́ржен наг. / Те́мже молю́ Тя Спа́се, спаси́ мя.

Ниже́ леви́т возмо́же отмы́ти стру́пы моя́: / но прише́л еси́ ко мне Бла́же сострада́тельно, / и излия́л еси́ ми́лость Твои́х щедро́т Спа́се на мя, / я́ко всеизря́дный врач исцеля́я мя.

Я́ко сый благоутро́бен, уще́дрив спасл еси́ Христе́, / я́звами лю́те от разбо́йник Спа́се убие́на мя: / ду́шу же и те́ло Свое́, / я́ко динаря́ два дал еси́ избавле́ние.

Богородичен: Па́че ума́ рождество́ Твое́ Богома́ти, / без му́жа бо зача́тие в Тебе́, / и де́вственно рожде́ние бысть: / и́бо Бог есть рожде́йся, / Его́же велича́юще, Тя Де́во ублажа́ем.

Иный.

Ирмос: Чи́стую сла́вно почти́м, / лю́дие, Богоро́дицу, / огнь Божества́ прии́мшую во чре́ве неопа́льно, / пе́сньми велича́ем.

Врач боля́щих в прегреше́ниих, от Бо́га блаже́нне, / губи́тель же яви́лся еси́ и прогони́тель лука́вых духо́в: / те́мже тя ублажа́ем.

Зе́млю, я́коже тли жили́ще, оста́вил еси́ о́тче, / и в земли́ всели́лся еси́ кро́тких, и с ни́ми весели́шися, / Боже́ственныя наслажда́яся сла́дости.

Днесь день пра́зднственный, / вся бо созыва́ет мона́шествующих стада́, в лик духо́вный, / на трапе́зу и снедь нетле́нныя жи́зни.

Богородичен: В Тебе́ всели́вся Всенепоро́чная, / пре́жде родонача́льники злонра́вно прельсти́вшаго человекоуби́йцу Низложи́вый, / роди́ся, и вся ны спасе́.

Ексапостиларий воскресен, и преподобнаго. Подобен: Жены́ услы́шите:

Ми́ра благостра́стия, я́коже вре́днаго уклони́лся еси́, / и безбра́шием плоть увяди́в, / обнови́л еси́ души́ кре́пость преподо́бне, / и сла́вою обогати́лся еси́ небе́сною пресла́вне. / Те́мже не преста́й моля́ся о нас Иоа́нне.

Богородичен: Госпо́дственно Богоро́дицу Тя испове́дуем Влады́чице, Тобо́ю спасе́ни: / и́бо Бо́га родила́ еси́ неизрече́нно, разо́ршаго Кресто́м смерть, / к Себе́ же привле́кшаго преподо́бных собо́ры: / с ни́миже Тя восхваля́ем Де́во.

На хвалитех воскресны Осмогласника, и анатолиевы.

Таже глаголем стих: Воскресни́ Го́споди Бо́же мой, да вознесе́тся рука́ Твоя́, не забу́ди убо́гих Твои́х до конца́.

И поем самогласен, глас 1: Прииди́те де́лаим в та́йном виногра́де, / плоды́ покая́ния в нем творя́ще, / не в бра́шнех и питии́х тружда́ющеся, / но в моли́твах и посте́х доброде́тели исправля́юще: / си́ми угожда́емый Госпо́дь / де́ла, дина́рь подае́т, / и́мже ду́ши избавля́ет до́лга грехо́внаго, / еди́н Многоми́лостивый.

Сла́ва, паки тойже. И ны́не: Преблагослове́нна еси́: Славословие великое, и отпуст. Слава, и ныне: стихира евангельская: и оглашение, и час 1-й, и прочее последование яко обычно.

НА ЛИТУРГИИ

Изобразительныя, и блаженны гласа.

Прокимен Апостола, рядоваго гласа, и преподобнаго, глас 7:

Восхва́лятся преподо́бнии во сла́ве, / и возра́дуются на ло́жах свои́х.

Апостол дне, ко Евреем, зачало 314.

Бра́тие, Авраа́му обетова́я Бог, поне́же ни eди́нем имя́ше бо́льшим кля́тися, кля́тся Собо́ю, глаго́ля: вои́стинну благосло́вствуя благословлю́ тя, и мно́жя умно́жу тя. И та́ко долготерпе́в, получи́ обетова́ние. Челове́цы у́бо бо́льшим клену́тся, и вся́кому их прекосло́вию кончи́на во извеще́ние, кля́тва eсть. В не́мже ли́шше хотя́ Бог показа́ти насле́дником обетова́ния непрело́жное сове́та Своего́, хода́тайствова кля́твою. Я́ко да двема́ ве́щма непрело́жныма, в не́юже не возмо́жно солга́ти Бо́гу, кре́пкое утеше́ние и́мамы прибе́гшии, я́тися за предлежа́щее упова́ние. Éже а́ки ко́тву и́мамы души́, тве́рду же и изве́стну, и входя́щую во вну́треннее заве́сы. Иде́же предте́ча о нас вни́де Иису́с, по чи́ну Мелхиседе́кову, Первосвяще́нник быв во ве́ки.

И другий преподобнаго ко Ефесеем, зачало 229.

Бра́тие, я́ко ча́да све́та ходи́те: [Плод бо Духо́вный eсть во вся́кой благосты́ни и пра́вде и и́стине:] Искуша́юще, что eсть благоуго́дно Бо́гови. И не приoбща́йтеся к дело́м непло́дным тмы, па́че же и облича́йте. Быва́eмая бо отай от них, сра́мно eсть и глаго́лати. Вся же облича́eмая, от све́та явля́ются: все бо явля́емое свет eсть. Сего́ ра́ди глаго́лет: воста́ни, спяй, и воскресни́ от ме́ртвых, и освети́т тя Христо́с. Блюди́те у́бо, ка́ко опа́сно хо́дите, не я́коже нему́дри, но я́коже прему́дри, искупу́юще вре́мя, я́ко дни́е лука́ви суть. Сего́ ра́ди не быва́йте несмы́сленни, но разумева́юще, что eсть во́ля Бо́жия. И не упива́йтеся вино́м, в не́мже eсть блуд, но па́че исполня́йтеся Ду́хом, глаго́люще себе́ во псалме́х и пе́ниих, и пе́снех духо́вных, воспева́юще и пою́ще в сердца́х ва́ших Го́сподеви.

Аллилуиа, гласа, и преподобнаго. Стих: Насажде́ни в дому́ Госпо́дни, во дво́рех дому Бо́га на́шего процвету́т.

Евангелие от Марка, зачало 40.

Во вре́мя о́но, челове́к не́кий прии́де ко Иису́сови, кла́няяся Ему́, и глаго́ля: Учи́телю, приведо́х сы́на моего́ к Тебе́, иму́ща ду́ха не́ма. И иде́же коли́ждо и́мет eго́, разбива́ет eго́, и пе́ны тещи́т, и скреже́щет зубы́ свои́ми, и оцепенева́ет, и рех ученико́м Твои́м, да изжену́т eго́, и не возмого́ша. Oн же отвеща́в eму́, глаго́ла: о, ро́де неве́рен, доко́ле в вас бу́ду; доко́ле терплю́ вы? Приведи́те eго́ ко Мне. И приведо́ша eго́ к Нему́. И ви́дев Eго́, а́бие дух стрясе́ eго́: и пад на земли́, валя́шеся, пе́ны тещя́. И вопроси́ oтца́ eго́: коли́ко лет eсть, отне́леже сие́ бысть eму́? Oн же рече́: изде́тска. И мно́гажды во oгнь вве́рже eго́, и в во́ды, да погуби́т eго́, но а́ще что мо́жеши, помози́ нам, милосе́рдовав о нас. Иису́с же рече́ eму́: éже а́ще что мо́жеши ве́ровати, вся возмо́жна ве́рующему. И а́бие возопи́в oте́ц oтроча́те со слезами, глаго́лаше: ве́рую, Го́споди, помози́ моему́ неве́рию. Ви́дев же Иису́с, я́ко сри́щется наро́д, запрети́ ду́ху нечи́стому, глаго́ля eму́: ду́ше немы́й и глухи́й, Аз ти повелева́ю, изы́ди из него́, и ктому́ не вни́де в него́. И возопи́в, и мно́го пружа́вся, изы́де: и бысть я́ко мертв, я́коже мно́зем глаго́лати, я́ко у́мре. Иису́с же eмь eго́ за ру́ку, воздви́же eго́: и воста́. И вше́дшу Eму́ в дом, ученицы́ Eго́ вопроша́ху Eго́ eди́наго: я́ко мы не возмого́хом изгна́ти eго́? И рече́ им: сей род ничи́мже мо́жет изы́ти, то́кмо моли́твою и посто́м. И отту́ду изше́дше, идя́ху сквозе́ Галиле́ю: и не хотя́ше, да кто уве́сть. Уча́ше бо ученики́ Своя́, и глаго́лаше им, я́ко Сын Челове́ческий пре́дан бу́дет в ру́це челове́чeсте, и убию́т Eго́: и убие́н быв, в тре́тий день воскре́снет.

И преподобнаго, от Матфеа, зачало 10.

Во вре́мя о́но, по Иису́се идо́ша наро́ди мно́зи от Галиле́и и десяти́ град, и от Иерусали́ма и Иуде́и, и со óнаго по́лу Иoрда́на.

Узре́в же наро́ды, взы́де на гору́: и се́дшу Eму́, приступи́ша к Нему́ ученицы́ Eго́. И отверз уста́ Своя́, уча́ше их, глаго́ля: блаже́ни ни́щии ду́хом, я́ко тех eсть Ца́рствие Небе́сное. Блаже́ни пла́чущии, я́ко ти́и уте́шатся. Блаже́ни кро́тцыи, я́ко ти́и насле́дят зе́млю. Блаже́ни а́лчущии и жа́ждущии пра́вды, я́ко ти́и насы́тятся. Блаже́ни ми́лостивии, я́ко ти́и поми́ловани бу́дут. Блаже́ни чи́стии се́рдцем, я́ко ти́и Бо́га у́зрят. Блаже́ни миротво́рцы, я́ко ти́и сы́нове Бо́жии нареку́тся. Блаже́ни изгна́ни пра́вды ра́ди, я́ко тех eсть Ца́рствие Небе́сное. Блаже́ни eсте́, eгда́ поно́сят вам, и иждену́т, и реку́т всяк зол глаго́л на вы лжу́ще, Менé ра́ди. Ра́дуйтеся и весели́теся, я́ко мзда ва́ша мно́га на небесе́х.

Киноник: Хвали́те Го́спода с Небе́с, / хвали́те Его́ в Вы́шних. Другий: В па́мять ве́чную бу́дет пра́ведник, / от слу́ха зла не убои́тся.

В СУББОТУ ПЯТЫЯ СЕДМИЦЫ

НА УТРЕНИ

Знаменает в час четвертый нощи, молебнаго ради последования акафиста. И собравшеся в церковь, благословившу иерею, начинаем утреню, якоже предписася начало утрени в четверток Великаго канона. По шестопсалмии, Бог Госпо́дь: во глас 8, и поем трижды тропарь косно.

Глас 8:

Повеле́нное та́йно прие́м в ра́зуме, / в кро́ве Ио́сифове тща́нием предста́ Безпло́тный, глаго́ля Неискусобра́чней: / приклони́вый схожде́нием Небеса́ вмеща́ется неизме́нно весь в Тя, / Его́же и ви́дя в ложесна́х Твои́х прие́мша ра́бий зрак, / ужаса́юся зва́ти Тебе́: / ра́дуйся, Неве́сто Неневе́стная.

Таже стихословим кафисму псалтира 16: Рече́ Госпо́дь Го́сподеви моему́: И по исполнении сея, ектениа малая, и поем кондак на среде, со сладкопением, косно. Глас 8:

Взбра́нной Воево́де победи́тельная, / я́ко изба́вльшеся от злых, / благода́рственная воспису́ем Ти, раби́ Твои́, Богоро́дице, / но, я́ко иму́щая держа́ву непобеди́мую, / от вся́ких нас бед свободи́, да зове́м Ти: / ра́дуйся, Неве́сто Неневе́стная.

На немже кадит диакон святыя иконы и братию по чину. На прочих же точию настоятеля и лики. И чтем икосов и кондаков 6. Стоим на чтении. Тии же икосы суть по алфавиту: сиесть 24, и глаголются от иерея во святом олтаре.

{Α} Икос 1: А́нгел предста́тель с небесе́ по́слан бысть рещи́ Богоро́дице: ра́дуйся, / и со безпло́тным гла́сом воплоща́ема Тя зря, Го́споди, ужаса́шеся / и стоя́ше, зовы́й к Ней такова́я: / Ра́дуйся, Е́юже рáдocть возсия́ет; / ра́дуйся, Е́юже кля́тва изче́знет. / Ра́дуйся, па́дшаго Ада́ма воззва́ние; / ра́дуйся, слез Е́виных избавле́ние. / Ра́дуйся, высото́ неудобовосходи́мая челове́ческими по́мыслы; / ра́дуйся, глубино́ неудобозри́мая и а́нгельскима очи́ма. / Ра́дуйся, я́ко еси́ Царе́во седа́лище; / ра́дуйся, я́ко но́сиши Нося́щаго вся. / Ра́дуйся, звездо́, явля́ющая Со́лнце; / ра́дуйся, утро́бо Боже́ственнаго воплоще́ния. / Ра́дуйся, Е́юже обновля́ется тварь; / ра́дуйся, Е́юже покланя́емся Творцу́. / Ра́дуйся, Неве́сто Неневе́стная.

{Β} Кондак 2: Ви́дящи Свята́я Себе́ в чистоте́, / глаго́лет Гаврии́лу де́рзостно: / пресла́вное твоего́ гла́са неудобоприя́тельно души́ Мое́й явля́ется: / безсе́меннаго бо зача́тия рождество́ ка́ко глаго́леши, зовы́й: / Аллилу́ия.

{Γ} Икос 2: Ра́зум недоразумева́емый разуме́ти Де́ва и́щущи, / возопи́ к служа́щему: / из боку́ чи́сту, Сы́ну ка́ко есть роди́тися мо́щно, рцы Ми? / К Не́йже он рече́ со стра́хом, оба́че зовы́й си́це: / Ра́дуйся, сове́та неизрече́ннаго таи́ннице; / ра́дуйся, молча́ния прося́щих ве́ро. / Ра́дуйся, чуде́с Христо́вых нача́ло; / ра́дуйся, веле́ний Его́ глави́зно. / Ра́дуйся, ле́ствице небе́сная, Е́юже сни́де Бог; / ра́дуйся, мо́сте, преводя́й су́щих от земли́ на не́бо. / Ра́дуйся, А́нгелов многослову́щее чу́до; / ра́дуйся, бесо́в многоплаче́вное пораже́ние. / Ра́дуйся, Свет неизрече́нно роди́вшая; / ра́дуйся, е́же ка́ко, ни еди́наго же научи́вшая. / Ра́дуйся, прему́дрых превосходя́щая ра́зум; / ра́дуйся, ве́рных озаря́ющая смы́слы. / Ра́дуйся, Неве́сто Неневе́стная.

{Δ} Кондак 3: Си́ла Вы́шняго осени́ тогда́ к зача́тию Браконеиску́сную, / и благопло́дная Тоя́ ложесна́, я́ко село́ показа́ сла́дкое, / всем хотя́щим жа́ти спасе́ние, всегда́ пе́ти си́це: / Аллилу́ия.

{Ε} Икос 3: Иму́щи Богоприя́тную Де́ва утро́бу, востече́ ко Елисаве́ти; / младе́нец же о́ноя а́бие позна́в Сея́ целова́ние, ра́довашеся, / и игра́ньми я́ко пе́сньми вопия́ше к Богоро́дице: / Ра́дуйся, о́трасли неувяда́емыя розго́; / ра́дуйся, Плода́ безсме́ртнаго стяжа́ние. / Ра́дуйся, Де́лателя де́лающая человеколю́бца; / ра́дуйся, Сади́теля жи́зни на́шея ро́ждшая. / Ра́дуйся, ни́во, растя́щая гобзова́ние щедро́т; / ра́дуйся, трапе́зо, нося́щая оби́лие очище́ний. / Ра́дуйся, я́ко рай пи́щный процвета́еши; / ра́дуйся, я́ко приста́нище душа́м гото́виши. / Ра́дуйся, прия́тное моли́твы кади́ло; / ра́дуйся, всего́ ми́ра очище́ние. / Ра́дуйся, Бо́жие к сме́ртным благоволе́ние; / ра́дуйся, сме́ртных к Бо́гу дерзнове́ние. / Ра́дуйся, Неве́сто Неневе́стная.

{Ζ} Кондак 4: Бу́рю внутрь име́я помышле́ний сумни́тельных, / целому́дренный Ио́сиф смяте́ся, к Тебе́ зря небра́чней, / и бракоокра́дованную помышля́я, Непоро́чная; / уве́дев же Твое́ зача́тие от Ду́ха Свя́та, рече́: / Аллилу́ия.

И паки кондак:

Взбра́нной Воево́де победи́тельная, / я́ко изба́вльшеся от злых, / благода́рственная воспису́ем Ти, раби́ Твои́, Богоро́дице, / но, я́ко иму́щая держа́ву непобеди́мую, / от вся́ких нас бед свободи́, да зове́м Ти: / ра́дуйся, Неве́сто Неневе́стная.

Чтем от слова акафиста, на даяния два. Таже стихословим Непорочны и ектения.

И паки глаголем кондак:

Взбра́нной Воево́де победи́тельная, / я́ко изба́вльшеся от злых, / благода́рственная воспису́ем Ти, раби́ Твои́, Богоро́дице, / но, я́ко иму́щая держа́ву непобеди́мую, / от вся́ких нас бед свободи́, да зове́м Ти: / ра́дуйся, Неве́сто Неневе́стная.

И другия икосы и кондаки, 6:

{Η} Икос 4: Слы́шаша па́стырие А́нгелов пою́щих плотско́е Христо́во прише́ствие, / и те́кше я́ко к Па́стырю ви́дят Сего́ я́ко а́гнца непоро́чна, / во чре́ве Мари́ине упа́сшася, Ю́же пою́ще ре́ша: / Ра́дуйся, А́гнца и Па́стыря Ма́ти; / ра́дуйся, дво́ре слове́сных ове́ц. / Ра́дуйся, неви́димых враго́в муче́ние; / ра́дуйся, ра́йских двере́й отверзе́ние. / Ра́дуйся, я́ко небе́сная сра́дуются земны́м; / ра́дуйся, я́ко земна́я сликовству́ют небе́сным. / Ра́дуйся, апо́столов немо́лчная уста́; / ра́дуйся, страстоте́рпцев непобеди́мая де́рзосте. / Ра́дуйся, тве́рдое ве́ры утвержде́ние; / ра́дуйся, све́тлое благода́ти позна́ние. / Ра́дуйся, Е́юже обнажи́ся ад; / ра́дуйся, Е́юже облеко́хомся сла́вою. / Ра́дуйся, Неве́сто Неневе́стная.

{Θ} Кондак 5: Боготе́чную звезду́ узре́вше волсви́, тоя́ после́доваша зари́, / и я́ко свети́льник держа́ще ю́, то́ю испыта́ху кре́пкаго Царя́, / и дости́гше Непостижи́маго, возра́довашася, Ему́ вопию́ще: / Аллилу́ия.

{Ι} Икос 5: Ви́деша о́троцы халде́йстии на руку́ Деви́чу Созда́вшаго рука́ми челове́ки, / и Влады́ку разумева́юще Его́, а́ще и ра́бий прия́т зрак, / потща́шася дарми́ послужи́ти Ему́, и возопи́ти Благослове́нней: / Ра́дуйся, звезды́ незаходи́мыя Ма́ти; / ра́дуйся, заре́ та́инственнаго дне. / Ра́дуйся, пре́лести пещь угаси́вшая; / ра́дуйся, Тро́ицы таи́нники просвеща́ющая. / Ра́дуйся, мучи́теля безчелове́чнаго измета́ющая от нача́льства; / ра́дуйся, Го́спода человеколю́бца показа́вшая Христа́. / Ра́дуйся, ва́рварскаго избавля́ющая служе́ния; / ра́дуйся, тиме́ния изыма́ющая дел. / Ра́дуйся, огня́ поклоне́ние угаси́вшая; / ра́дуйся, пла́мене страсте́й изменя́ющая. / Ра́дуйся, ве́рных наста́внице целому́дрия; / ра́дуйся, всех родо́в весе́лие. / Ра́дуйся, Неве́сто Неневе́стная.

{Κ} Кондак 6: Пропове́дницы богоно́снии, бы́вше волсви́, / возврати́шася в Вавило́н, сконча́вше Твое́ проро́чество, / и пропове́давше Тя Христа́ всем, / оста́виша И́рода я́ко буесло́вяща, не ве́дуща пе́ти: / Аллилу́ия.

{Λ} Икос 6: Возсия́вый во Еги́пте просвеще́ние и́стины, отгна́л еси́ лжи тьму: / и́доли бо его́, Спа́се, не терпя́ще Твоея́ кре́пости, падо́ша, / сих же изба́вльшиися вопия́ху к Богоро́дице: / Ра́дуйся, исправле́ние челове́ков; / ра́дуйся, низпаде́ние бесо́в. / Ра́дуйся, пре́лести держа́ву попра́вшая; / ра́дуйся, и́дольскую лесть обличи́вшая. / Ра́дуйся, мо́ре, потопи́вшее фарао́на мы́сленнаго; / ра́дуйся, ка́меню, напои́вший жа́ждущия жи́зни. / Ра́дуйся, о́гненный сто́лпе, наставля́яй су́щия во тьме; / ра́дуйся, покро́ве ми́ру, ши́рший о́блака. / Ра́дуйся, пи́ще, ма́нны прие́мнице; / ра́дуйся, сла́дости святы́я служи́тельнице. / Ра́дуйся, земле́ обетова́ния; / ра́дуйся, из нея́же тече́т мед и млеко́. / Ра́дуйся, Неве́сто Неневе́стная.

{Μ} Кондак 7: Хотя́щу Симео́ну от ны́нешняго ве́ка преста́витися преле́стнаго, / вда́лся еси́ я́ко младе́нец тому́, / но позна́лся еси́ ему́ и Бог соверше́нный. / Те́мже удиви́ся Твое́й неизрече́нней прему́дрости, зовы́й: / Аллилу́ия.

И паки кондак:

Взбра́нной Воево́де победи́тельная, / я́ко изба́вльшеся от злых, / благода́рственная воспису́ем Ти, раби́ Твои́, Богоро́дице, / но, я́ко иму́щая держа́ву непобеди́мую, / от вся́ких нас бед свободи́, да зове́м Ти: / ра́дуйся, Неве́сто Неневе́стная.

Таже чтем прочее слова акафиста. Псалом 50. И каноны: святаго обители со ирмосом на 6, и Пресвятыя Богородицы на 6.

Творение господина Иосифа, егоже краестрочие: Ра́дости прия́телище, Тебе́ подоба́ет ра́доватися еди́ней. [Аще ли храм Богородицы, поем канон праздника Богородицы со ирмосом на 12. Ирмосы по дважды: тропари на 10.] Глас 4.

Песнь 1.

Ирмос: Отве́рзу уста́ моя́:

{Χ} Христо́ву кни́гу одушевле́нную, запечатле́нную Тя Ду́хом, / вели́кий Арха́нгел, Чи́стая, зря возглаша́ше Ти: / ра́дуйся, ра́дости прия́телище, / Е́юже прама́терняя кля́тва разреши́тся.

{Α} Ада́мово исправле́ние, ра́дуйся / Де́во Богоневе́сто, а́дово умерщвле́ние. / Ра́дуйся Всенепоро́чная, пала́то всех Царя́: / ра́дуйся, престо́ле о́гненный Вседержи́теля.

{Ρ} Цве́те неувяда́емый, ра́дуйся / еди́на прозя́бшая я́блоко благово́нное. / Ра́дуйся ро́ждшая благоуха́ние еди́наго Царя́. / Ра́дуйся Неискуобра́чная, ми́рови спасе́ние.

{Α} Чистоты́ сокро́вище, ра́дуйся, / Е́юже от паде́ния на́шего воста́хом. / Ра́дуйся, сладкоуха́нный кри́не Влады́чице, / ве́рных благоуха́яй, кади́ло благово́нное, / и ми́ро многоце́нное.

Катавасия: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.

Песнь 3.

Ирмос: Твоя́ песносло́вцы, Богоро́дице:

{Σ} Клас прозя́бшая Боже́ственный, я́ко ни́ва неора́нная яве, / ра́дуйся одушевле́нная трапе́зо, хлеб живо́тный вме́щшая. / Ра́дуйся, живо́тныя воды́ исто́чниче неистоща́емый, Влады́чице.

{Δ} Ю́нице Юнца́ ро́ждшая непоро́чнаго, ра́дуйся ве́рным. / Ра́дуйся А́гнице, ро́ждшая Бо́жияго А́гнца, / взе́млющаго ми́ра всего́ прегреше́ния. / Ра́дуйся те́плое очисти́лище.

{Ο} У́тро светле́йшее, ра́дуйся / еди́на Со́лнца нося́щая Христа́, све́та жили́ще. / Ра́дуйся, тьму разруши́вшая, / и мра́чныя бе́сы отню́д отгна́вшая.

{Χ} Ра́дуйся, две́ре еди́на, / Е́юже Сло́во про́йде еди́но, / вереи́ и врата́ а́дова, Влады́чице, Рождество́м Твои́м сокруши́вшая. / Ра́дуйся, Боже́ственный вхо́де спаса́емых, Богоневе́сто.

Катавасия: Твоя́ песносло́вцы, Богоро́дице, / Живы́й и Незави́стный Исто́чниче, / лик себе́ совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.

Ектениа малая.

И по возгласе, кондак:

Взбра́нной Воево́де победи́тельная, / я́ко изба́вльшеся от злых, / благода́рственная воспису́ем Ти, раби́ Твои́, Богоро́дице, / но, я́ко иму́щая держа́ву непобеди́мую, / от вся́ких нас бед свободи́, да зове́м Ти: / ра́дуйся, Неве́сто Неневе́стная.

И чтем другия шесть икосов и кондаков.

{Ν} Икос 7: Но́вую показа́ тварь, / я́влься Зижди́тель нам от Него́ бы́вшим, / из безсе́менныя прозя́б утро́бы, / и сохрани́в Ю, я́коже бе, нетле́нну, / да чу́до ви́дяще, воспое́м Ю, вопию́ще: / Ра́дуйся, цве́те нетле́ния; / ра́дуйся, ве́нче воздержа́ния. / Ра́дуйся, воскресе́ния о́браз облиста́ющая; / ра́дуйся, а́нгельское житие́ явля́ющая. / Ра́дуйся, дре́во светлоплодови́тое, от него́же пита́ются ве́рнии; / ра́дуйся, дре́во благосенноли́ственное, и́мже покрыва́ются мно́зи. / Ра́дуйся, во чре́ве нося́щая Изба́вителя плене́нным; / ра́дуйся, ро́ждшая Наста́вника заблу́ждшим. / Ра́дуйся, Судии́ пра́веднаго умоле́ние; / ра́дуйся, мно́гих согреше́ний проще́ние. / Ра́дуйся, оде́ждо наги́х дерзнове́ния; / ра́дуйся, любы́, вся́кое жела́ние побежда́ющая. / Ра́дуйся, Неве́сто Неневе́стная.

{Ξ} Кондак 8: Стра́нное рождество́ ви́девше, / устрани́мся ми́ра, ум на небеса́ прело́жше: / сего́ бо ра́ди высо́кий Бог на земли́ яви́ся смире́нный челове́к, / хотя́й привлещи́ к высоте́ Тому́ вопию́щия: / Аллилу́ия.

{Ο} Икос 8: Весь бе в ни́жних / и вы́шних ника́коже отступи́ неопи́санное Сло́во: / снизхожде́ние бо Боже́ственное, / не прехожде́ние же ме́стное бысть, / и рождество́ от Де́вы Богоприя́тныя, слы́шащия сия́: / Ра́дуйся, Бо́га невмести́маго вмести́лище; / ра́дуйся, честна́го та́инства две́ри. / Ра́дуйся, неве́рных сумни́тельное слы́шание; / ра́дуйся, ве́рных изве́стная похвало́. / Ра́дуйся, колесни́це пресвята́я Су́щаго на Херуви́мех; / ра́дуйся, селе́ние пресла́вное Су́щаго на Серафи́мех. / Ра́дуйся, проти́вная в то́жде собра́вшая; / ра́дуйся, де́вство и рождество́ сочета́вшая. / Ра́дуйся, Е́юже разреши́ся преступле́ние; / ра́дуйся, Е́юже отве́рзеся рай. / Ра́дуйся, ключу́ Ца́рствия Христо́ва; / ра́дуйся, наде́ждо благ ве́чных. / Ра́дуйся, Неве́сто Неневе́стная.

{Π} Кондак 9: Вся́кое естество́ а́нгельское удиви́ся вели́кому Твоего́ вочелове́чения де́лу; / непристу́пнаго бо я́ко Бо́га, зря́ще всем присту́пнаго Челове́ка, / нам у́бо спребыва́юща, слы́шаща же от всех: / Аллилу́ия.

{Ρ} Икос 9: Вети́я многовеща́нныя, я́ко ры́бы безгла́сныя ви́дим о Тебе́, Богоро́дице, / недоумева́ют бо глаго́лати, / е́же ка́ко и Де́ва пребыва́еши, и роди́ти возмогла́ еси́. / Мы же, та́инству дивя́щеся, ве́рно вопие́м: / Ра́дуйся, прему́дрости Бо́жия прия́телище; / ра́дуйся, промышле́ния Его́ сокро́вище. / Ра́дуйся, любому́дрыя нему́дрыя явля́ющая; / ра́дуйся, хитрослове́сныя безслове́сныя облича́ющая. / Ра́дуйся, я́ко обуя́ша лю́тии взыска́теле; / ра́дуйся, я́ко увядо́ша баснотво́рцы. / Ра́дуйся, афине́йская плете́ния растерза́ющая; / ра́дуйся, ры́барския мре́жи исполня́ющая. / Ра́дуйся, из глубины́ неве́дения извлача́ющая; / ра́дуйся, мно́ги в ра́зуме просвеща́ющая. / Ра́дуйся, кораблю́ хотя́щих спасти́ся; / ра́дуйся, приста́нище жите́йских пла́ваний. / Ра́дуйся, Неве́сто Неневе́стная.

{Σ} Кондак 10: Спасти́ хотя́ мир, И́же всех Украси́тель, / к сему́ самообетова́н прии́де, и Па́стырь сый, я́ко Бог, / нас ра́ди яви́ся по нам челове́к: / подо́бным бо подо́бное призва́в, я́ко Бог слы́шит: / Аллилу́ия.

И паки кондак:

Взбра́нной Воево́де победи́тельная, / я́ко изба́вльшеся от злых, / благода́рственная воспису́ем Ти, раби́ Твои́, Богоро́дице, / но, я́ко иму́щая держа́ву непобеди́мую, / от вся́ких нас бед свободи́, да зове́м Ти: / ра́дуйся, Неве́сто Неневе́стная.

Седален, глас 1. Подобен: Гроб Твой:

Вели́кий во́ин невеще́ственных А́нгелов, во град Назаре́т предста́в, Царя́ возвеща́ет Твоего́, Чи́стая, и веко́в Го́спода: ра́дуйся, глаго́ля Тебе́, благослове́нная Мари́е, непостижи́мая и несказа́нная глубино́, челове́ков воззва́ние.

Сла́ва, и ны́не, тойже. И паки чтение.

Песнь 4.

Ирмос: Седя́й в Сла́ве на Престо́ле Божества́:

{Ε} Во гла́сех пе́ний, Де́во, / Тебе́ вопие́м, Всепе́тая: / ра́дуйся, ту́чная горо́ и усыре́нная Ду́хом. / Ра́дуйся све́щниче, и ста́мно ма́нну нося́щая, / услажда́ющая всех благочести́вых чу́вства.

{Ι} Очисти́лище ми́ру, ра́дуйся, Пречи́стая Влады́чице. / Ра́дуйся ле́ствице, от земли́ всех возвы́сившая благода́тию. / Ра́дуйся мо́сте, вои́стинну преводя́й всех / от сме́рти к животу́ пою́щих Тя.

{Ο} Небе́с превы́шшая, ра́дуйся, земли́ основа́ние / в Твои́х ложесна́х Пречи́стая, нетру́дно носи́вшая. / Ра́дуйся червлени́це, багряни́цу Боже́ственную омочи́вшая, / от крове́й Твои́х, Царе́ви си́лам.

{Ν} Законода́вца ро́ждшая и́стиннаго, ра́дуйся, Влады́чице, / беззако́ния всех ту́не очища́ющаго. / Недове́домая глубино́, высото́ неизрече́нная, браконеиску́сная, / Е́юже мы обожи́хомся.

{Σ} Тя испле́тшую ми́рови нерукоплете́нный вене́ц песносло́вим, / ра́дуйся, Тебе́ Де́во зову́ще: / храни́лище всех и огражде́ние, и утвержде́ние, / и свяще́нное прибе́жище.

Катавасия: Седя́й в Сла́ве / на Престо́ле Божества́ / во о́блаце ле́гце, / прии́де Иису́с Пребоже́ственный, / Нетле́нною Дла́нию / и спасе́ зову́щия: / сла́ва, Христе́, си́ле Твое́й.

Песнь 5.

Ирмос: Ужасо́шася вся́ческая:

{Ο} Путь ро́ждшая жи́зни, ра́дуйся Пренепоро́чная, / от пото́па грехо́внаго мир спа́сшая: / ра́дуйся Богоневе́сто, слы́шание и глаго́лание стра́шное: / ра́дуйся пребыва́ние Влады́ки тва́ри.

{Ι} Кре́пость и утвержде́ние челове́ков, ра́дуйся Пречи́стая, / ме́сто освяще́ния сла́вы, умерщвле́ние а́дово, черто́же всесве́тлый. / Ра́дуйся а́нгелов ра́досте: / ра́дуйся по́моще ве́рно моля́щихся Тебе́.

{Π} Огнеобра́зная колесни́це Сло́ва, ра́дуйся Влады́чице, / одушевле́нный раю́, дре́во посреде́ иму́щи жи́зни Го́спода, / Его́же сла́дость оживотворя́ет ве́рою причаща́ющихся, и тли подклони́вшихся.

{Ρ} Укрепля́еми си́лою Твое́ю, ве́рно вопие́м Ти: / ра́дуйся, гра́де всех Царя́, / пресла́вная и достослы́шанная о Не́йже глаго́лана бы́ша я́ве, горо́ несеко́мая: / ра́дуйся глубино́ неизме́римая.

{Ε} Простра́нное селе́ние Сло́ва, ра́дуйся Пречи́стая, / сосу́де, Боже́ственный би́сер произве́дшая. / Ра́дуйся, всечу́дное всех к Бо́гу примире́ние, / блажа́щих Тя, Богоро́дице, всегда́.

Катавасия: Ужасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.

Зде престает канон святаго обители.

Песнь 6.

Ирмос: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.

{Π} Черто́же Сло́ва нескве́рный, вина́ всех обоже́ния, / ра́дуйся Пречи́стая, проро́ков оглаше́ние: / ра́дуйся, апо́столов удобре́ние.

{Ε} От Тебе́ роса́ ука́ну, пла́мень многобо́жия угаси́вшая. / Тем вопие́м Ти: / ра́дуйся, руно́ одушевле́нное, е́же Гедео́н, Де́во, предви́де.

{Ι} Се Тебе́ [Де́во] ра́дуйся, зове́м: / приста́нище нам бу́ди вла́ющимся, / и оти́шие в пучи́не скорбе́й, / и собла́знов всех бори́теля.

{Χ} Ра́дости вина́, облагодати́ наш по́мысл, е́же зва́ти Тебе́: / ра́дуйся неопали́мая купино́, о́блаче всесве́тлый, / ве́рныя непреста́нно осеня́ющий.

Таже четверопеснец, егоже краестрочие: Сия песнь Ио́сифова. Глас 6. Песнь 6.

Ирмос: Жите́йское мо́ре воздвиза́емое:

Пострада́вше му́ченицы / и, я́ко ка́мение избра́нное, по земли́ валя́ющеся, / зижди́тельство вся́кое врага́ соверше́нно преврати́ша / и хра́ми Бо́га Жива́го яви́шася.

Вас мо́лим, тече́ние до́брое соверши́вших, му́ченицы, / поста́ тече́ние тещи́ нас до́бре укрепи́те, / доброде́телей соверше́нием просия́вших.

Рабы́ Твоя́, Влады́ко, / преста́вльшияся от земли́ к Тебе́, Преблаго́му, / Твоего́ Ца́рствия сотвори́ о́бщники, / Боже́ственных му́ченик Твои́х свяще́нными хода́тайствы, Многоми́лостиве.

Богородичен: Еди́на Всепе́тая, / пою́щим Тя ве́рно, грехо́в оставле́ние / и дарова́ний Боже́ственных часть да́тися, / Всесвято́му Сло́ву моли́ся, Ма́ти Де́во.

Иный, глас 5.

Ирмос: От ки́та проро́ка:

Па́мять соверша́юще му́ченик, / Го́сподеви возсле́м пе́сни, / днесь Боже́ственно веселя́щеся.

Мече́в и огня́ не убоя́вшеся, / дерза́юще в ве́ре страстоте́рпцы, / мучи́тели в сем уязви́сте.

Троичен: Тро́ицу Ли́цы воспева́ю Тя, / Еди́нице по существу́ покланя́юся, / Тебе́, О́тче, Сы́не и Ду́ше Святы́й.

Богородичен: А́нгел и челове́к благохвале́ние еси́, / я́ко родила́ е́си, Де́во, Христа́, Спа́са душа́м на́шим.

Стих: Ди́вен Бог во святы́х Свои́х, / Бог Изра́илев.

Сме́ртию живо́т премени́вше, / ра́дуетеся, на Небесе́х живу́ще, / страстоте́рпцы пресла́внии Христа́ Бо́га.

Стих: Ду́ши их во благи́х водворя́тся

Сме́ртию и живото́м облада́яй, / ве́рою преста́вльшияся от жития́, Христе́, / со святы́ми Твои́ми упоко́й.

Ирмос: От ки́та проро́ка изба́вил еси́, / мене́ же из глубины́ грехо́в возведи́, / Го́споди, и спаси́ мя.

Ектения малая.

И паки поем кондак:

Взбра́нной Воево́де победи́тельная, / я́ко изба́вльшеся от злых, / благода́рственная воспису́ем Ти, раби́ Твои́, Богоро́дице, / но, я́ко иму́щая держа́ву непобеди́мую, / от вся́ких нас бед свободи́, да зове́м Ти: / ра́дуйся, Неве́сто Неневе́стная.

И чтем оставльшияся шесть икосов и кондаков.

{Τ} Икос 10: Стена́ еси́ де́вам, Богоро́дице Де́во, и всем к Тебе́ прибега́ющим: / и́бо небесе́ и земли́ Творе́ц устро́и Тя, Пречи́стая, все́лься во утро́бе Твое́й, / и вся приглаша́ти Тебе́ научи́: / Ра́дуйся, сто́лпе де́вства; / ра́дуйся, дверь спасе́ния. / Ра́дуйся, нача́льнице мы́сленнаго назда́ния; / ра́дуйся, пода́тельнице Боже́ственныя бла́гости. / Ра́дуйся, Ты бо обнови́ла еси́ зача́тыя сту́дно; / ра́дуйся, Ты бо наказа́ла еси́ окра́денныя умо́м. / Ра́дуйся, тли́теля смы́слов упраждня́ющая; / ра́дуйся, Се́ятеля чистоты́ ро́ждшая. / Ра́дуйся, черто́же безсе́меннаго уневе́щения; / ра́дуйся, ве́рных Го́сподеви сочета́вшая. / Ра́дуйся, до́брая младопита́тельнице де́вам; / ра́дуйся, невестокраси́тельнице душ святы́х. / Ра́дуйся, Неве́сто Неневе́стная.

{Υ} Кондак 11: Пе́ние вся́кое побежда́ется, / спростре́тися тща́щееся ко мно́жеству мно́гих щедро́т Твои́х: / равночи́сленныя бо песка́ пе́сни а́ще прино́сим Ти, Царю́ святы́й, / ничто́же соверша́ем досто́йно, / я́же дал еси́ нам, Тебе́ вопию́щим: / Аллилу́ия.

{Φ} Икос 11: Светоприе́мную свещу́, су́щим во тьме я́вльшуюся, зрим святу́ю Де́ву, / невеще́ственный бо вжига́ющи огнь, / наставля́ет к ра́зуму Боже́ственному вся, / заре́ю ум просвеща́ющая, зва́нием же почита́емая, си́ми: / Ра́дуйся, луче́ у́мнаго Со́лнца; / ра́дуйся, свети́ло незаходи́маго Све́та. / Ра́дуйся, мо́лние, ду́ши просвеща́ющая; / ра́дуйся, яко́ гром, враги́ устраша́ющая. / Ра́дуйся, я́ко многосве́тлое возсиява́еши просвеще́ние; / ра́дуйся, я́ко многотеку́щую источа́еши реку́. / Ра́дуйся, купе́ли живопису́ющая о́браз; / ра́дуйся, грехо́вную отъе́млющая скве́рну. / Ра́дуйся, ба́не, омыва́ющая со́весть; / ра́дуйся, ча́ше, че́рплющая рáдocть. / Ра́дуйся, обоня́ние Христо́ва благоуха́ния; / ра́дуйся, животе́ та́йнаго весе́лия. / Ра́дуйся, Неве́сто Неневе́стная.

{Χ} Кондак 12: Благода́ть да́ти восхоте́в, долго́в дре́вних, / всех долго́в Реши́тель челове́ком, / прии́де Собо́ю ко отше́дшим Того́ благода́ти, и раздра́в рукописа́ние, / слы́шит от всех си́це: / Аллилу́ия.

{Ψ} Икос 12: Пою́ще Твое́ Рождество́, хва́лим Тя вси, / я́ко одушевле́нный храм, Богоро́дице: / во Твое́й бо всели́вся утро́бе содержа́й вся руко́ю Госпо́дь, / освяти́, просла́ви и научи́ вопи́ти Тебе́ всех: / Ра́дуйся, селе́ние Бо́га и Сло́ва; / ра́дуйся, свята́я святы́х бо́льшая. / Ра́дуйся, ковче́же, позлаще́нный Ду́хом; / ра́дуйся, сокро́вище живота́ неистощи́мое. / Ра́дуйся, че́стный ве́нче царе́й благочести́вых; / ра́дуйся, честна́я похвало́ иере́ев благогове́йных. / Ра́дуйся, Це́ркве непоколеби́мый сто́лпе; / ра́дуйся, Ца́рствия неруши́мая стено́. / Ра́дуйся, Е́юже воздви́жутся побе́ды; / ра́дуйся, Е́юже низпа́дают врази́. / Ра́дуйся, те́ла моего́ врачева́ние; / ра́дуйся, души́ моея́ спасе́ние. / Ра́дуйся, Неве́сто Неневе́стная.

{Ω} Кондак 13: О, Всепе́тая Ма́ти, ро́ждшая всех святы́х Святе́йшее Сло́во! / Ны́нешнее прие́мши приноше́ние, от вся́кия изба́ви напа́сти всех, / и бу́дущия изми́ му́ки, о Тебе́ вопию́щих: / Аллилу́ия.

Сей кондак глаголи трижды.

И паки чтется 1-й икос:

А́нгел предста́тель с небесе́ по́слан бысть рещи́ Богоро́дице: ра́дуйся, / и со безпло́тным гла́сом воплоща́ема Тя зря, Го́споди, ужаса́шеся / и стоя́ше, зовы́й к Ней такова́я: / Ра́дуйся, Е́юже рáдocть возсия́ет; / ра́дуйся, Е́юже кля́тва изче́знет. / Ра́дуйся, па́дшаго Ада́ма воззва́ние; / ра́дуйся, слез Е́виных избавле́ние. / Ра́дуйся, высото́ неудобовосходи́мая челове́ческими по́мыслы; / ра́дуйся, глубино́ неудобозри́мая и а́нгельскима очи́ма. / Ра́дуйся, я́ко еси́ Царе́во седа́лище; / ра́дуйся, я́ко но́сиши Нося́щаго вся. / Ра́дуйся, звездо́, явля́ющая Со́лнце; / ра́дуйся, утро́бо Боже́ственнаго воплоще́ния. / Ра́дуйся, Е́юже обновля́ется тварь; / ра́дуйся, Е́юже покланя́емся Творцу́. / Ра́дуйся, Неве́сто Неневе́стная.

И паки кондак:

Взбра́нной Воево́де победи́тельная, / я́ко изба́вльшеся от злых, / благода́рственная воспису́ем Ти, раби́ Твои́, Богоро́дице, / но, я́ко иму́щая держа́ву непобеди́мую, / от вся́ких нас бед свободи́, да зове́м Ти: / ра́дуйся, Неве́сто Неневе́стная.

Таже чтутся синаксарий: первее Минеи, таже Триоди.

Песнь 7.

Ирмос: Не послужи́ша тва́ри Богому́дрии / па́че Созда́вшаго, / но, о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог, благослове́н еси́.

{Α} Воспева́ем Тя вопию́ще: / ра́дуйся, колесни́це со́лнца у́мнаго, / лозо́ и́стинная, грозд зре́лый возде́лавшая, вино́ источа́ющий, / ду́ши веселя́щее ве́рою Тя сла́вящих.

{Ι} Врача́ всех челове́к ро́ждшая, ра́дуйся Богоневе́сто, / же́зле та́йный, цвет неувяда́емый процве́тший, / ра́дуйся Влады́чице, Е́юже ра́дости наполня́емся, и жизнь насле́дствуем.

{Ρ} Вети́йствующий не мо́жет язы́к, Влады́чице, песносло́вити Тя, / па́че бо серафи́мов возвы́силася еси́, ро́ждши Царя́ Христа́. / Его́же моли́ гра́ду сему́ изба́витися от мно́гих искуше́ний.

{Ε} Хва́лят Тя блажа́ще концы́, и любо́вию зову́т Тебе́: / ра́дуйся сви́тче, в не́мже пе́рстом О́тчим написа́ся Сло́во, Чи́стая. / Его́же моли́, в кни́зе живо́тней / рабо́м Твои́м написа́тися, Богоро́дице.

{Ι} Мо́лим, раби́ Твои́, и приклоня́ем коле́но се́рдца на́шего: / приклони́ у́хо Твое́, Чи́стая, / и спаси́ скорбьми́ погружа́емыя при́сно, / и соблюди́ от вся́каго вра́жия плене́ния Твой град, Богоро́дице.

Иный, глас 6.

Ирмос: Росода́тельну:

Пресве́тлое собра́ние Боже́ственных Твои́х му́чеников, Многоми́лостиве, / во све́те Твое́м незаходи́мем ны́не жи́тельствует. / Тех моли́твами просвеще́ние и грехо́в очище́ние пода́ждь всем, Христе́.

Коль кра́сное вре́мя, е́же нам дал е́си воздержа́ния, Го́споди, / в не́мже уще́дри ду́ши на́ша я́ко Благ, / моли́твами святы́х страда́лец, / кра́сныя и честны́я возлюби́вших стра́сти Твоя́.

Преше́дшия многоболе́зненную бу́рю жития́ рабы́ Твоя́, / устреми́ в приста́нище, Влады́ко, жи́зни, / вопи́ти со все́ми избра́нными: / благослове́н еси́, Го́споди Бо́же оте́ц на́ших.

Богородичен: Зако́на Да́теля, Присноде́во, ро́ждшая моли́, / беззако́ния отъя́ти вся, во вре́мя ны́не настоя́щее, / до́бре произво́лившим обуча́тися Боже́ственнаго поста́ тща́нием.

Иный, глас 5.

Ирмос: Благослове́н еси́, Бо́же:

Благослове́н еси́, Бо́же, / показа́вый до́блия о Тебе́ стра́ждущия му́ченики, / препе́тый и препросла́вленный.

Благослове́н еси́, Бо́же, / страстоте́рпцы моли́твенники нам к Тебе́ подава́яй, / препе́тый и препросла́вленный.

Троичен: Благослове́н еси́, Бо́же, / еди́н у́бо Естество́м, Ли́цы же треми́ познава́емый, / препе́тый и препросла́вленный.

Богородичен: Благослове́н еси́, Бо́же, / рожде́йся безсе́менно, и Ро́ждшую показа́вый чисто́тствующую, / препе́тый и препросла́вленный.

Стих: Святы́м, и́же суть на земли́ Его́, / удиви́ Госпо́дь вся хоте́ния Своя́ в них.

Благослове́н еси́, Бо́же, / зве́ри укроти́вый и погаси́вый огнь, / в сла́ву святы́х Твои́х, препе́тый и препросла́вленный.

Стих: Блаже́ни, я́же избра́л, / и прия́л еси́ Го́споди.

Благослове́н еси́, Бо́же, / от сме́рти в безконе́чный живо́т преложи́вый, / ве́рою в житии́ послужи́вшия Тебе́.

Ирмос: Благослове́н еси́, Бо́же, / ви́дяй бе́здны / и на Престо́ле Сла́вы седя́й, / препе́тый и пресла́вный.

Песнь 8.

Ирмос: О́троки благочести́выя в пе́щи / Рождество́ Богоро́дичо спасло́ есть; / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте, дела́, / и превозноси́те Его́ во вся ве́ки.

{Ν} Ложесны́ Сло́во прия́ла еси́, / вся нося́щаго носи́ла еси́, / млеко́м пита́ла еси́, / ма́нием пита́ющаго вселе́нную всю, Чи́стая, Ему́же пое́м: / Го́спода по́йте дела́, и превозноси́те во вся ве́ки.

{Μ} Моисе́й уразуме́ в купине́ вели́кое та́инство Рождества́ Твоего́: / о́троцы же прообрази́ша сие́ я́вственнее / посреде́ огня́ стоя́ще, и не опаля́еми, нетле́нная свята́я Де́во. / Тем Тя почита́ем во вся ве́ки.

{Ο} Пре́жде пре́лестию обнажи́вшиися / в ри́зу нетле́ния облеко́хомся Рождество́м Твои́м: / и седя́щии во тьме прегреше́ний, свет ви́дехом, / све́та жили́ще, Отрокови́це. / Тем Тя пое́м во вся ве́ки.

{Ν} Ме́ртвии Тобо́ю оживля́ются, / Жизнь бо ипоста́сную родила́ еси́, / неми́и пре́жде, благоглаго́ливи быва́ют, / прокаже́ннии очища́ются, неду́зи отгоня́ются, / духо́в возду́шных мно́жества побежда́ются, / Де́во, челове́ков спасе́ние.

{Η} Ми́ру ро́ждшая спасе́ние, / и́мже от земли́ на высоту́ взя́ти бы́хом, / ра́дуйся всеблагослове́нная, покро́ве и держа́во, / стено́ и утвержде́ние пою́щим, Чи́стая: / Го́спода по́йте дела́, и превозноси́те во вся ве́ки.

Иный.

Ирмос: Из пла́мене преподо́бным ро́су:

Святы́х му́ченик исправле́нием, / небе́снии у́мове преудиви́шася, / тех моли́твами, ми́лости Твоя́, Влады́ко, в нас бога́тно удиви́, Ще́дре.

Огнь Боже́ственною росо́ю попра́вшии, / страда́льцы Госпо́дни досточу́днии, / изба́вите нас огня́ му́чащаго, / ко Влады́це те́плыми ва́шими моли́твами.

Преблаги́й Сло́ве, / отше́дшия от нас правосла́вно, / жи́зни сподо́би, я́же на небесе́х, / и святы́я све́тлости, / добропобе́дных му́ченик моли́твами.

Богородичен: Моли́твами, Ще́дре, Ро́ждшия Тя, / и святы́х му́ченик и апо́стол Твои́х, / просвети́ на́ша ду́ши, е́же сла́вити Тя, / в весе́лии душе́внем во ве́ки.

Иный.

Ирмос: Творца́ тва́ри, Его́же ужаса́ются А́нгели:

Ли́цы му́ченик святи́и, / помяни́те любо́вию воспева́ющия вы / и превознося́щия Христа́ во ве́ки.

Мече́м усека́еми, ра́довахуся му́ченицы, пою́ще Христа́ / и превознося́ще во вся ве́ки.

Благослови́м Отца́, и Сы́на, и Свята́го Ду́ха, Го́спода.

Троичен: Странноле́пно разделя́ется Тро́ица / и пребыва́ет неразде́льна, я́ко Бог, / Ю́же превозно́сим во вся ве́ки.

Богородичен: Де́ва Младе́нца роди́, / Бог бо из Нея́ вочелове́чися, / вся тварь да пое́т Его́ во ве́ки.

Стих: Ди́вен Бог во святы́х Свои́х, / Бог Изра́илев.

Столпи́ му́жества яви́шася, / паде́нием диа́волим ра́дующеся му́ченицы, / пою́ще Христа́ и превознося́ще во ве́ки.

Стих: Ду́ши их во благи́х водворя́тся.

У Авраа́ма вне́дритися сподо́би, Го́споди, рабы́ Твоя́, / ве́рою преста́вльшияся к Тебе́, и наде́ждею.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Ирмос: Творца́ тва́ри, / Его́же ужаса́ются А́нгели, / по́йте, лю́дие, / и превозноси́те во вся ве́ки.

Песнь 9.

Ирмос: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная, / Богоро́дице, Чи́стая Присноде́во.

{Ι} Да Тебе́, ве́рнии, ра́дуйся зове́м, / Тобо́ю ра́дости прича́стницы бы́вше присносу́щныя, / изба́ви нас напа́стей, ва́рварскаго плене́ния, и вся́кия ины́я ра́ны, / за мно́жество, Отрокови́це, прегреше́ний, / находя́щия челове́ком согреша́ющим.

{Ω} Яви́лася еси́ просвеще́ние на́ше и утвержде́ние. / Те́мже вопие́м Ти: / ра́дуйся, звездо́ незаходи́мая, вводя́щая в мир вели́кое Со́лнце. / Ра́дуйся, Еде́м отве́рзшая заключе́нный, Чи́стая. / Ра́дуйся, сосу́де, ми́ро неистощи́мое на Тя излия́нное прие́мший.

{Σ} Ста́нем благогове́йно в дому́ Бо́га на́шего, и возопии́м: / ра́дуйся, ми́ру Влады́чице. / Ра́дуйся Мари́е, Госпоже́ всех нас. / Ра́дуйся, еди́на непоро́чная в жена́х и до́брая. / Ра́дуйся, сто́лпе о́гненный, вводя́щий в вы́шнюю жизнь челове́чество.

{Η} Голуби́це Ми́лостиваго ро́ждшая, ра́дуйся Присноде́во: / преподо́бных всех, ра́дуйся, похвало́, страда́льцев венча́ние. / Ра́дуйся, всех пра́ведных Боже́ственное удобре́ние, / и нам ве́рным спасе́ние.

{Φ} Пощади́, Бо́же, насле́дие Твое́, / грехи́ на́ша вся презре́в ны́не, / на сие́ име́я моля́щую Тя, / на земли́ безсе́менно Тебе́ Ро́ждшую, / вели́кия ра́ди ми́лости восхоте́вшаго / вообрази́тися, Христе́, в челове́чество.

Иный.

Ирмос: Бо́га челове́ком невозмо́жно:

Я́ко свет, я́ко со́лнце возсия́вше, / всю зе́млю луча́ми благоче́стия, му́ченицы, / и свети́лами чуде́с просвети́ша / и многобо́жия тьму разгна́ша, / и́хже моли́твами, Бо́же, поми́луй нас.

Во́инство му́чеников непобеди́мое, / всех нас укрепи́ до́бре подвиза́тися / и соверши́ти поста́ по́прище, / я́ко да Боже́ственнаго жития́ де́ло соверши́вше, / прича́стницы бу́дем жи́зни, веселя́щеся.

Твоя́ да предвари́т бла́гость, Го́споди, / от нас стра́шным преста́вльшихся повеле́нием Твои́м, / да окружи́т их Твоя́ ми́лость, / и да наста́вит к селе́нием, просвеще́нным све́том лица́ Твоего́.

Богородичен: Гла́сом а́нгеловым сове́та О́тча А́нгела, / неизрече́нно Богоро́дице родила́ еси́, / гла́сы у́бо рабо́в Твои́х приими́, / я́же во вре́мя поста́ прино́сим, / и сия́ принеси́ Бо́гу, я́коже кади́ло.

Иный.

Ирмос: Иса́ие, лику́й:

Соверша́юще торжество́ му́ченическое, / днесь лю́дие воскли́кнем пе́сньми, / пою́ще Христу́ подвигополо́жнику / и побе́ды на враги́ им пода́вшему, / Его́же в пе́снех велича́ем.

Ноготьми́ растерза́еми и усеца́еми мече́м на у́ды, / совокупи́стеся Христу́ любе́зно, всехва́льнии му́ченицы. / Тем и ны́не на небесе́х веселя́щеся, о всех моли́теся.

Троичен: Еди́но Существо́м воспева́ю Тя, Безнача́льная Тро́ице, / честна́я, живонача́льная, несеко́мая Еди́нице, / О́тче нерожде́нный и рожде́нный Сло́ве и Сы́не, Ду́ше Святы́й, / нас спаси́, пою́щих Тя.

Богородичен: Па́че ума́ рождество́ Твое́, Богома́ти, / без му́жа бо зача́тие в Тебе́ и де́вственно рожде́ние бысть, / и́бо Бог есть роди́выйся, / Его́же велича́юще, Тя, Де́во, ублажа́ем.

Стих: Святы́м, и́же суть на земли́ Его́, / удиви́ Госпо́дь вся хоте́ния Своя́ в них.

До́блее во́инство Царя́ всех и Бо́га, / му́чеников пе́сньми венча́им, лю́дие, / ти́и бо победи́ша бесо́вския полки́ я́ве, / я́же воспева́юще, Влады́ку велича́ем.

Стих: Блаже́ни, я́же избра́л, и прия́л еси́ Го́споди.

Егда́ все созда́ние Твое́ возста́виши суди́тися, Христе, я́же прия́л еси́, / и ны́не рабы́ Твоя́ ве́рныя поми́луй, / прости́, я́же в житии́ прегреше́ния их, / и со святы́ми Твои́ми упоко́й я́ во ве́ки.

Ирмос: Иса́ие, лику́й, / Де́ва име́ во чре́ве / и роди́ Сы́на Емману́ила, / Бо́га же и Челове́ка, / Восто́к и́мя Ему́, / Его́ же велича́юще, / Де́ву ублажа́ем.

Ексапостиларий. Подобен: Жены́ услы́шите:

Е́же от ве́ка днесь познава́ется та́инство: / Бо́жие Бог Сло́во, Сын Де́вы Мари́и за милосе́рдие быва́ет. / И ра́дость Благове́щения Гаврии́л провещава́ет, с ни́мже возопии́м вси: / ра́дуйся, Ма́ти Госпо́дня.

На хвалитех: Вся́кое дыха́ние: Поставим стихов 4: и поем стихиры, глас 4. Подобен: Я́ко до́бля:

Сокрове́нное та́инство / и А́нгелом неве́домое, / Гаврии́л уверя́ет Арха́нгел, / и к Тебе́ ны́не прии́дет / еди́ней нетле́нней и до́брей голуби́це, / и ро́да на́шего воззва́нию, / и возопие́т Тебе́ Пресвята́я, е́же ра́дуйся: / угото́вися сло́вом, Бо́га Сло́ва, / Твои́ми ложесна́ми прия́ти.

Светоно́сная пала́та / угото́вася Тебе́, Влады́ко, / утро́ба чи́стая Богоотрокови́цы, / гряди́ к Сей и сни́ди, уще́дри созда́ние Твое́, / зави́стно брань прии́мшее и рабо́тою удержа́нное льсти́ваго, / и добро́ту пе́рвую погуби́вшее, / и Твоего́ спаси́тельнаго ча́ющее соше́ствия.

Гаврии́л Арха́нгел, / к Тебе́, Всенепоро́чная, / явле́нно прии́дет и возопие́т Тебе́: / ра́дуйся, кля́твы разреше́ние, / па́дших воста́ние. / Ра́дуйся, еди́на избра́нная Бо́гу бы́вшая. / Ра́дуйся, колесни́це со́лнца сла́вы. / Приими́ Безпло́тнаго, / во утро́бе Твое́й всели́тися хотя́щаго.

Слава, и ныне, самогласен, глас 4:

Язы́ка, его́же не ве́дяше, / услы́ша Богоро́дица, / глаго́лаше бо к Ней Арха́нгел Благове́щения глаго́лы: / отню́дуже ве́рно прии́мши целова́ние, / зача́т Тя, Преве́чнаго Бо́га. / Те́мже и мы ра́дующеся вопие́м Ти: / из Нея́ воплоти́выйся непрело́жно, Бо́же, / мир мiрови да́руй / и душа́м на́шим ве́лию ми́лость.

Славословие великое и отпуст.

НА ЛИТУРГИИ

Изобразительная. И от канона акафиста, песнь 3-я и 6-я.

Тропарь, глас 8:

Повеле́нное та́йно прие́м в ра́зуме, / в кро́ве Ио́сифове тща́нием предста́ Безпло́тный, / глаго́ля Неискусобра́чней: / приклони́вый схожде́нием Небеса́ вмеща́ется неизме́нно весь в Тя, / Его́же и ви́дя в ложесна́х Твои́х / прие́мша ра́бий зрак, / ужаса́юся зва́ти Тебе́: / ра́дуйся, Неве́сто Неневе́стная.

Кондак, глас 8:

Взбра́нной Воево́де победи́тельная, / я́ко изба́вльшеся от злых, / благода́рственная воспису́ем Ти, раби́ Твои́, Богоро́дице, / но, я́ко иму́щая держа́ву непобеди́мую, / от вся́ких нас бед свободи́, да зове́м Ти: / ра́дуйся, Неве́сто Неневе́стная.

Прокимен, глас 3. Песнь Богородицы: Вели́чит душа́ Моя́ Го́спода, / и возра́довася дух Мой о Бо́зе Спа́се Мое́м. Стих: Я́ко призре́ на смире́ние Рабы́ Своея́, се бо, отны́не ублажа́т Мя вси ро́ди.

Апостол дне ко Евреем, зачало 322:

Бра́тие, не в рукотворе́нная свята́я вни́де Христо́с, противообра́зная и́стинных, но в са́мое Не́бо, ны́не да яви́тся лицу́ Бо́жию о нас. Ни да мно́гажды прино́сит Себе́, я́коже первосвяще́нник вхо́дит во свята́я [святы́х] по вся ле́та с кро́вию чужде́ю. Поне́же подоба́ше бы Ему́ мно́жицею страда́ти от сложе́ния мiра, ны́не же еди́ною в кончи́ну веко́в, во отмета́ние греха́, же́ртвою Свое́ю яви́ся. И я́коже лежи́т челове́ком еди́ною умре́ти, пото́м же суд. Та́ко и Христо́с еди́ною принесе́ся, во е́же вознести́ мно́гих грехи́, второ́е без греха́ яви́тся, жду́щим Его́ во спасе́ние.

И Богородицы, от тогоже послания, зачало 320:

Бра́тие, име́яше пе́рвая ски́ния оправда́ния слу́жбы, свято́е же людско́е. Ски́ния бо сооружена́ бысть пе́рвая, в не́йже свети́льник, и трапе́за, и предложе́ние хле́бов, я́же глаго́лется Свята́я. По вторе́й же заве́се ски́ния, глаго́лемая Свята́я святы́х. Зла́ту иму́щи кади́льницу, и ковче́г заве́та окова́н всю́ду зла́том, в не́мже ста́мна злата́ иму́щая ма́нну, и жезл Ааро́нов прозя́бший, и скрижа́ли заве́та. Превы́шше же eго́ херуви́ми сла́вы, осеня́ющии oлта́рь: о ни́хже несть ны́не глаго́лати подро́бну. Сим же та́ко устро́eным, в пе́рвую у́бо ски́нию вы́ну вхожда́ху свяще́нницы, слу́жбы соверша́юще. Во втору́ю же eди́ною в ле́то eди́н архиере́й, не без кро́ве, ю́же прино́сит за себе́, и о людски́х неве́жествиих.

Аллилуиа, глас 8: Воскресни́, Го́споди, в поко́й Твой, Ты и Киво́т святы́ни Твоея́. Стих: Помяни́, Го́споди, Дави́да и всю кро́тость его́.

Евангелие дне, от Марка, зачало 35:

Во вре́мя о́но, изы́де Иису́с и ученицы́ Его́ в ве́си Кесари́и Фили́пповы, и на пути́ вопроша́ше ученики́ Своя́, глаго́ля им: кого́ Мя глаго́лют челове́цы бы́ти? Они́ же отвеща́ша: Иоа́нна Крести́теля, и ини́и Илию́, друзи́и же еди́наго от проро́к. И Той глаго́ла им: вы же кого́ Мя глаго́лете бы́ти? Отвеща́в же Петр глаго́ла Ему́: Ты еси Христо́с. И запрети́ им, да ни кому́же глаго́лют о Нем. И нача́т учи́ти их, я́ко подоба́ет Сы́ну Челове́ческому мно́го пострада́ти и искуше́ну бы́ти от ста́рец и архиере́й, и кни́жник, и убие́ну бы́ти, и в тре́тий день воскре́снути.

И Богородицы, от Луки, зачало 54:

Во вре́мя о́но, вни́де Иису́с в весь не́кую: жена́ же не́кая и́менем Ма́рфа прия́т Его́ в дом свой. И сестра́ ей бе нарица́емая Мари́я, я́же и се́дши при ногу́ Иису́сову, слы́шаше сло́во Его́. Ма́рфа же мо́лвяше о мно́зе слу́жбе, ста́вши же рече́: Го́споди, не бреже́ши ли, я́ко сестра́ моя́ еди́ну мя оста́ви служи́ти; рцы убо ей, да ми помо́жет. Отвеща́в же Иису́с, рече́ ей: Ма́рфо, Ма́рфо, пече́шися и мо́лвиши о мно́зе. Еди́но же есть на потре́бу. Мари́я же благу́ю часть избра́, я́же не оты́мется от нея́. Бысть же егда́ глаго́лаше сия́, воздви́гши не́кая жена́ глас от наро́да, рече́ Ему́: блаже́но чре́во носи́вшее Тя, и сосца́, яже еси́ ссал. Он же рече́: те́мже у́бо блаже́ни слы́шащии сло́во Бо́жие, и храня́щии е́.

Причастен: Ча́шу спасе́ния прииму́, / и и́мя Госпо́дне призову́.

На трапезе ядим два варения с елеем и пием вино, благодаряще Всесвятую Владычицу нашу Богородицу о бывшем от Нея чудеси.

В НЕДЕЛЮ ПЯТУЮ СВЯТЫХ ПОСТОВ

В СУББОТУ ВЕЧЕРА

Последование подобне, якоже и в прочих Неделях: в нейже поем и Минеи последование случившагося святаго. Инии же последнейшии предаша пети в сию Неделю последование преподобныя матере нашея Марии Египетския.

Во светильничном по предначинательном псалме и обычном стихословии, на Го́споди воззва́х: поставим стихов 10. И поем Осмогласника стихиры воскресны 3, и анатолиевы 3, и преподобныя стихиры, подобны 3, творяще я на 4. Глас 6.

Подобен: Всю отложи́вше:

Тебе́ у́бо возбраня́ше честны́х взира́ния, / скверн пре́жде привлече́нное скверне́ние: / твое́ же чу́вство, и твоя́ богому́драя соде́янных со́весть, / к лу́чшим тебе́ обраще́ние соде́яша. / На ико́ну бо воззре́вши благослове́нныя Богоотрокови́цы, / всех пока́явшися прегреше́ний свои́х всехва́льная пре́жних, / в дерзнове́нии честно́му Дре́ву поклони́лася еси́.

Ме́стом поклони́вшися ра́достно святы́м, / доброде́тели напу́тное спаси́тельнейшее, / отту́ду прия́ла еси́, и зело́ потекла́ еси́ до́брое ше́ствие: / и струю́ преше́дши Иорда́нскую, / в жили́ще Предте́чево усе́рдно всели́лася еси́, / и страсте́й свире́пство жи́тельством омрачи́ла еси́, / истончава́ющи в дерзнове́нии, приснопа́мятная ма́ти, / плотска́я сво́йства.

В пусты́ню всели́вшися твои́х страсте́й / о́бразы от души́ отъя́ла еси́, / богови́днейшее изображе́ние в души́ написа́вши, / доброде́телей ви́ды: / и толи́ко просия́ла еси́, / я́ко и вода́ми легко́ преходи́ти блаже́нная, / и от земли́ взима́тися в твои́х к Бо́гу моле́ниих: / и ны́не в дерзнове́нии всесла́вная Мари́е / Христу́ предстоя́щи, / моли́ся о душа́х на́ших.

Слава, глас 4: Очудотвори́ Христе́ Креста́ Твоего́ си́ла, / я́ко и я́же пре́жде блудни́ца, / по́стническим по́двигом подвиза́ся: / отню́дуже и немощно́е отве́ргши, / до́блественно сопротивоста́ на диа́вола. / Те́мже и по́честь побе́ды нося́щи, / мо́лится о душа́х на́ших.

И ныне, Богородичен 1-й гласа.

На стиховне стихиры Осмогласника.

Слава преподобныя, глас 2: Душе́вная ловле́ния, / и стра́сти плотски́я мече́м воздержа́ния посе́кла еси́: / по́мысла прегреше́ния / молча́нием обуче́ния подави́ла еси́, / и струя́ми слез твои́х пусты́ню всю напои́ла еси́, / и прозябла́ еси́ нам покая́ния плоды́. / Те́мже твою́ па́мять / преподо́бная пра́зднуем.

И ныне, Богородичен, в тойже глас: О чудесе́ но́ваго всех дре́вних чуде́с! / Кто бо позна́ ма́терь без му́жа ро́ждшую, / и на руку́ нося́щую, / всю тварь Содержа́щаго? / Бо́жие есть изволе́ние, Ро́ждшееся. / Его́же я́ко Младе́нца, Пречи́стая, / Твои́ма рука́ма носи́вшая, / и Ма́терне дерзнове́ние к Нему́ иму́щая, / не преста́й моля́щи о чту́щих Тя, / уще́дрити и спасти́ ду́ши на́ша.

Отпустительный воскресен.

И преподобныя, глас 8: В тебе́ ма́ти изве́стно спасе́ся е́же по о́бразу: / прии́мши бо крест, после́довала еси́ Христу́ / и де́ющи учи́ла еси́: презира́ти у́бо плоть, прехо́дит бо, / прилежа́ти же о души́ ве́щи безсме́ртней. / Те́мже и со а́нгелы сра́дуется, преподо́бная Мари́е, дух твой.

И Богородичен: И́же нас ра́ди рожде́йся от Де́вы, / и, распя́тие претерпе́в, Благи́й, / испрове́ргий сме́ртию смерть и воскресе́ние явле́й я́ко Бог, / не пре́зри, я́же созда́л еси́ руко́ю Твое́ю. / Яви́ человеколю́бие Твое́, Ми́лостиве, / приими́ ро́ждшую Тя Богоро́дицу, моля́щуюся за ны, / и спаси́, Спа́се наш, лю́ди отча́янныя.

Тыяжде и на Бог Господь:

И прочее последование яко обычно.

НА УТРЕНИ

По всем обычнем последовании, каноны 3: воскресный с Богородичным на 6: настоящий Триоди на 4: и преподобныя на 4. Канон на богатаго, и на Лазаря. Глас 8.

Песнь 1.

Ирмос: Во́ду проше́д я́ко су́шу, / и еги́петскаго зла избежа́в, / изра́ильтянин вопия́ше: / Изба́вителю и Бо́гу на́шему пои́м.

Оста́вил мя еси́ бога́тству сласте́й, / веселя́щемуся на всяк день в сла́дости бога́тому. / Те́мже Тя молю́ Спа́се, / огня́ мя я́коже Ла́заря изба́ви.

Оде́яхся Спа́се сластьми́, / я́коже обложи́вый себе́ ви́ссон и зла́то, и злату́ю оде́жду, / но мя во огнь я́коже о́наго, да не по́слеши.

Веселя́шеся бога́тством и сла́достию бога́тый, / дре́вле в житии́ тле́ннем: / те́мже на му́ки осуди́ся, / ни́щий ороша́шеся Ла́зарь.

Богородичен: Чи́ни Тя а́нгел и челове́к, безневе́стная Ма́ти, / хва́лят непреста́нно: / Творца́ бо сих я́коже Младе́нца / во объя́тиих Твои́х носи́ла еси́.

Другий канон преподобныя, на 4. Глас 6.

Ирмос: Волно́ю морско́ю / Скры́вшаго дре́вле / гони́теля мучи́теля – под земле́ю скры́ша / спасе́нных о́троцы; / но мы, я́ко отрокови́цы, / Го́сподеви пои́м, / сла́вно бо просла́вися.

Любо́вию светоно́сную и боже́ственную твою́ па́мять пра́зднующему, / свет низпосли́ ми, / предстоя́щая преподо́бная све́ту непристу́пному Христу́, / искуше́ний вся́ческих мя жития́ избавля́ющи.

К еги́птяном пло́тию отше́дый, Неопи́санный и Преве́чный, / из Еги́пта показу́ет всесве́тлую тя звезду́, / ве́дый Госпо́дь вся пре́жде бытия́.

Боже́ственных за́поведей честна́я не ве́дущи, / боже́ственный о́браз Бо́жий окаля́ла еси́: / Боже́ственным же про́мыслом па́ки очи́стила еси́ всехва́льная, / обожи́вшися дея́ньми боже́ственными преподо́бная твои́ми.

Богородичен: О Твоего́ Бо́же мой мно́гаго благоутро́бия, / и неизрече́ннаго Твоего́ снизхожде́ния! / Ка́ко пе́рвее блудни́цу, Ма́тере Твоея́ мольба́ми, / я́ко чи́стую и непоро́чную, а́нгелом уподо́бил еси́.

Песнь 3.

Ирмос: Ты еси́ утвержде́ние притека́ющих к Тебе́, Го́споди, / Ты еси́ свет омраче́нных, / и пое́т Тя дух мой.

Ла́заря я́коже спасл еси́ от пла́мене Христе́, / та́ко мене́ от огня́ изба́ви гее́нскаго, / недосто́йнаго раба́ Твоего́.

Бога́тый страстьми́, и сластьми́ есмь, Го́споди, / Ла́зарь же убо́гий лише́нием доброде́телей, / но спаси́ мя.

В червлени́цу и ви́ссон облача́шеся бога́тый, сластьми́ и греха́ми, / сего́ ра́ди пла́менствуется.

Богородичен: Даждь нам по́мощь, моли́твами Твои́ми Всечи́стая, / прило́ги отража́ющи лю́тых обстоя́ний.

Иный.

Ирмос: Тебе́, на вода́х / пове́сившаго / всю зе́млю неодержи́мо, / тварь, ви́девши / на ло́бнем ви́сима, / у́жасом мно́гим содрога́шеся, / несть свят, / ра́зве Тебе́, Го́споди, взыва́ющи.

Ко врато́м поги́бели прибли́жшуюся дея́ньми безме́стными, / врата́ пре́жде а́дова сокруши́вый си́лою Божества́, / врата́ покая́ния тебе́ отверза́ет всечестна́я, / дверь сый Сам живота́.

Ору́жие греха́ Долготерпели́ве пре́жде бы́вшую, / ору́жию Креста́ Боже́ственнаго поклоне́нием показа́л еси́, / ору́жия бесо́в вся, и ко́зни вся́ко побежда́ющую, Благоутро́бне.

Це́ну за всех, Свою́ пре́жде излия́вый кровь, / ба́нею слез чи́стую тя соде́ловает, / прока́зою лю́тою боле́вшую зле́йшаго дея́ния, / вся́ко е́же бы́ти всем да́вый.

Богородичен: Сло́ва вся́каго есть вы́шшее, е́же на Тебе́ Де́во: / Сло́во бо О́тчее в Тебе́ боголе́пно всели́ся, / разреше́ние согреше́ний всем согреша́ющим, / сло́вом еди́нем подава́яй.

Седален, глас 8. Подобен: Прему́дрость и сло́во:

Взыгра́ния вся плотска́я обузда́вши труды́ по́стническими, / му́жественное яви́ла еси́ души́ твоея́ мудрова́ние. / Крест бо Госпо́день ви́дети возжела́вши, / саму́ю себе́ всечестна́я ми́рови распя́ла еси́: / отню́дуже и к жела́нию а́нгельскаго жи́тельства / любе́зно упра́вила еси́ себе́ всеблаже́нная. / Моли́ Христа́ Бо́га, оставле́ние согреше́ний дарова́ти, / чту́щим любо́вию святу́ю па́мять твою́.

Слава, и ныне, Богородичен: Небе́сная врата́ и ковче́г, всесвяту́ю го́ру, / светоза́рный о́блак воспои́м, неопали́мую купину́, / слове́сный рай, Е́вино воззва́ние, / вселе́нныя всея́ вели́кое сокро́вище: / я́ко спасе́ние в Ней соде́яся ми́рови, / и оставле́ние дре́вних согреше́ний. / Тем и вопие́м Ей: / моли́ся Сы́ну Твоему́ и Бо́гу, / согреше́ний оставле́ние дарова́ти, / благоче́стно покланя́ющимся всесвято́му Рождеству́ Твоему́.

Песнь 4.

Ирмос: Услы́шах, Го́споди, / смотре́ния Твоего́ та́инство, / разуме́х дела́ Твоя́ / и просла́вих Твое́ Божество́.

Наслажда́шеся бога́тый бра́шном, и одея́ньми веселя́ся: / Ла́зарь же насы́титися жела́ше сего́ трапе́зы крупи́ц.

Пси у́бо облизова́ху язы́ком ни́щаго Ла́заря стру́пы, / сострада́тельнейшее быва́юще, / бога́таго ра́зума ко убо́гому.

Пред враты́ валя́шеся дре́вле бога́таго, Спа́се, / Ла́зарь му́чимь я́звами убо́жества, / отону́дуже ны́не прославля́ется.

Богородичен: Его́же родила́ еси́ Пречи́стая, / моли́ спасти́ся воспева́ющим Тя, от рабо́ты льсти́ваго, / я́ко еди́на еси́ нам Предста́тельница.

Ин.

Ирмос: На Кресте́ Твое́ / Боже́ственное истоща́ние / прови́дя, Авваку́м, / ужа́сся, вопия́ше: / Ты си́льных пресе́кл еси́ / держа́ву, Бла́же, / приобща́яся су́щим во а́де, я́ко Всеси́лен.

Я́ко Соде́тель челове́ческаго естества́, / я́ко ми́лости исто́чник, и благоутро́бия бога́тство, / уще́дрил еси́ Человеколю́бче прибе́гницу Твою́, / и исхи́тил еси́ сию́ губи́тельнаго зве́ря.

Крест ви́дети потща́вшися, / кре́стным просвеще́нием Мари́е озари́лася еси́, / Кресто́м бесе́довавшаго, / ма́нием Боже́ственным распе́ншися ми́рови досточу́дная.

Злых вина́ пе́рвее, сласть лука́вая, мно́гим бы́вши, / а́ки со́лнце просия́вши, / всем наста́вница преподо́бная яви́ся согреша́ющим.

Богородичен: Ум превозшла́ еси́ и небе́сный, / мы́сленное не́бо всех Царя́: / зако́нов бо естества́ вне Чи́стая / Законода́теля и Созда́теля всех родила́ еси́.

Песнь 5.

Ирмос: Вску́ю мя отри́нул еси́ / от лица́ Твоего́, Све́те Незаходи́мый, / и покры́ла мя есть чужда́я тьма, окая́нного, / но обрати́ мя и к све́ту за́поведей Твои́х / пути́ моя́ напра́ви, молю́ся.

На Авраа́млих не́дрех, Ла́заря бога́тый егда́ узре́, / во све́те и сла́ве веселя́щася, / о́тче, взыва́ше, Авраа́ме, поми́луй мя / во огни́ осужде́ннаго, и язы́ком лю́те пла́менуема.

Наслади́лся еси́ бога́тством жития́ веселя́ся, / Авраа́м глаго́лаше бога́тому, / отню́дуже му́чишися зде ве́чно во огни сый, / ни́щий же в весе́лии несконча́емом ра́дуется Ла́зарь.

Жития́ пре́лестию бога́тый бых, / я́коже бога́тый житие́ все сластьми́ ижди́вый, Человеколю́бче, / но молю́ Твои́х щедро́т, / е́же свободи́ти ми ся огня́, я́коже спасе́ся Ла́зарь.

Богородичен: Ма́тернее дерзнове́ние к Сы́ну стяжа́вши Всечи́стая, / сро́днаго промышле́ния о нас не пре́зри, мо́лимся: / я́ко Тя и еди́ну, христиа́не ко Влады́це, / умилостивле́ние благоприя́тное предлага́ем.

Иный.

Ирмос: Богоявле́ния Твоего́, Христе́, / к нам ми́лостивно бы́вшаго, / Исаия, Свет ви́дев Невече́рний, / из но́щи у́треневав, взыва́ше: / воскре́снут ме́ртвии, / и воста́нут су́щии во гробе́х, / и вси земноро́днии возра́дуются.

Моисе́й просла́вися иногда́ на Сина́и, / Бо́жия за́дняя та́инственно ви́дев пресла́вный, / подпису́я стра́нное та́инство: / манноприе́млющия же ста́мны ны́не, / о́бразу пречи́стому те́пле припа́дши, / Мари́я а́нгельское житие́ но́сит.

Храм благоле́пия Твоего́ вожделе́вши псало́мски ви́дети, / у́мное же селе́ние сла́вы Твоея́, Твой храм оскверни́вшая: / у́мными моли́твами Христе́, Твоего́ хра́ма неискусому́жныя бы́вшия, / храм мя вседе́тельнаго сотвори́ Ду́ха.

У́дою пло́ти, очесы́ мно́гих улови́вшая, сла́стию кра́ткою, / снедь же диа́волу сих сотво́ршая, / уловлена́ бысть всеи́стинно / Боже́ственною благода́тию Креста́ честна́го / сладча́йшая Христо́ви снедь бы́вши.

Богородичен: Науче́н лик проро́ческий та́инству е́же в Тебе́, / та́инственными богоглаго́ланьми Пречи́стая, / Тебе́ многообра́зно предглаго́ла: / манноприе́млющия же ста́мны ны́не, / о́бразу пречи́стому сия́ припа́дши, / Мари́я спору́чница гре́шных к Бо́гу.

Песнь 6.

Ирмос: Очи́сти мя, Спа́се, / мно́га бо беззако́ния моя́, / и из глубины́ зол возведи́, молю́ся: / к Тебе́ бо возопи́х и услы́ши мя, / Бо́же спасе́ния моего́.

Бога́тый себе́ пла́меню о́гненному осуди́ сла́стным житие́м: / убо́гий же Ла́зарь нищету́ избра́в в сем житии́, / сподо́бися несконча́емыя ра́дости.

В не́дрех Авраа́млих Ла́зарь сподо́бися, / ве́чнаго живота́ наслажда́яся: / огню́ же бога́тый душе́ю и те́лом осуди́ся му́чася.

Осужде́н есть во огнь бога́тый Ла́заря ра́ди: / не осуди́ мене́ окая́ннаго, молю́ся человеколю́бче Го́споди, / но я́ко Ла́заря, све́та мя Твоего́ сподо́би.

Богородичен: Да изба́вимся лю́тых прегреше́ний / моли́твами Твои́ми Богома́ти Чи́стая, / и да получи́м Боже́ственное просвеще́ние, / из Тебе́ несказа́нно вопло́щшагося Сы́на Бо́жия.

Иный.

Ирмос: Бе́здна после́дняя грехо́в обы́де мя, / и, волне́ния не ктому́ терпя́, /я́ко Ио́на, Влады́це, вопию́ Ти: /от тли мя возведи́.

Ра́дуются, Мари́е, а́нгельская во́инства, / ра́вное преподо́бная житие́ сим в тебе́ зря́ще, / и сла́ву Го́сподеви зову́т.

Ужаса́ются бесо́в мра́чных состоя́ния, / терпели́ваго твоея́ кре́пости, / я́ко жена́ пресла́вно, и нага́я, / и еди́ная сим возмогла́ еси́.

Просия́ла еси́ а́ки со́лнце Мари́е всехва́льная, / и пусты́ню чудесы́ всю просвети́ла еси́. / Те́мже и мене́ све́том уясни́.

Богородичен: А́нгели, просвети́вшеся сла́вою Рождества́ Твоего́, / на земли́ мир всем нам, / и благоволе́ние челове́ком, Де́во, возопи́ша.

Кондак, глас 3: Подобен: Де́ва днесь:

Блуда́ми пе́рвее преиспо́лнена вся́ческими, / Христо́ва неве́ста днесь покая́нием яви́ся, / а́нгельское жи́тельство подража́ющи, / де́моны Креста́ ору́жием погубля́ет. / Сего́ ра́ди Ца́рствия неве́ста яви́лася еси́ Мари́е пресла́вная.

Икос: А́гницу Христо́ву и дщерь пе́сньми восхва́лим ны́не, / Мари́ю приснопа́мятную, я́вльшуюся Еги́петское овча́: / и пре́лести сих всея́ избеже́, / и еди́на принесе́ся Це́ркви соверше́нное возраще́ние, / воздержа́нием и моли́твою подвиза́ющися па́че ме́ры челове́ческаго естества́. / Те́мже и возвы́си ея́ и житие́ и дея́ние, еди́н Вседержи́тель, / Мари́и пресла́вныя.

Песнь 7.

Ирмос: От Иуде́и доше́дше, о́троцы / в Вавило́не иногда́ / ве́рою Тро́ическою пла́мень пе́щный попра́ша, пою́ще: / отце́в Бо́же, благослове́н еси́.

И́ов я́коже дре́вле во гно́ищи черве́й и ка́ле лежа́ше, / та́коже и пред враты́ бога́таго Ла́зарь седя́ше, вопия́: / оте́ц Бо́же благослове́н еси́.

Валя́яся пред враты́ немилосе́рдаго бога́таго дре́вле Ла́зарь, / крупи́ц жела́ше его́ трапе́зы, но никто́же дая́ше ему́: / и вме́сто сих обре́те Авраа́мля не́дра.

Немилосе́рдаго бога́таго ча́сти, Христе́ мой изба́ви мя, молю́ся, / и убо́гому Ла́зарю счини́в мя, вопи́ти Тебе́ благода́рно сподо́би: / оте́ц на́ших Бо́же благослове́н еси́.

Богородичен: Из утро́бы де́вственныя Воплоти́выйся, яви́лся еси́ на спасе́ние на́ше. / Те́мже Твою́ Ма́терь ве́дуще Богоро́дицу, благода́рно зове́м: / оте́ц на́ших Бо́же благослове́н еси́.

Иный.

Ирмос: О́троцы в Вавило́не / пе́щнаго пла́мене не убоя́шася, / но, посреде́ пла́мене вве́ржени, / ороша́емы поя́ху: / благослове́н еси́ Го́споди / Бо́же оте́ц на́ших.

Превели́кий во отце́х, обхожда́ пусты́ню, Зоси́ма му́дрый, / преподо́бную ви́дети сподо́бися: / благослове́н еси́, зове́т же, Бо́же оте́ц на́ших.

Что о́тче, стра́нное вся́кия доброде́тели де́тельныя, / ви́дети прише́л еси́ жени́ще? / преподо́бная вопия́ше ста́рцу: / благослове́н еси́, зове́т же, Бо́же оте́ц на́ших.

Умертви́вши блаже́нная страсте́й твои́х взыгра́ния, / к безстра́стия ны́не устреми́лася еси́ приста́нищу, зову́щи: / благослове́н еси́ Го́споди Бо́же оте́ц на́ших.

Богородичен: Зачала́ еси́ неизрече́нно, Де́ва пребы́вши Пречи́стая, / и родила́ еси́ ми́рови спасе́ние, Христа́ Бо́га на́шего: / те́мже Тя вси пе́сньми ве́рнии велича́ем.

Песнь 8.

Ирмос: Седмери́цею пещь / халде́йский мучи́тель / Богочести́вым неи́стовно разжже́, / си́лою же лу́чшею спасе́ны, сия́ ви́дев, / Творцу́ и Изба́вителю вопия́ше: / о́троцы, благослови́те, / свяще́нницы, воспо́йте, / лю́дие, превозноси́те во вся ве́ки.

Во оде́жду багря́ную и ви́ссон, и порфи́ру / бога́тый дре́вле облача́шеся све́тло окая́нный: / убо́гий же Ла́зарь во врате́х сего́ лю́те лежа́ше, / крупи́ц па́дающих трапе́зы хотя́ насы́титися, / и никто́же подая́ше ему́: / те́мже в сла́ве Христу́ сца́рствует.

Во врате́х лежа́ше бога́таго Ла́зарь, согни́в те́лом ра́нами, / и хотя́ше насыща́тися сне́ди, и никто́же дая́ше ему́, / но и пси сострада́тельно язы́ком облизова́ху гной и стру́пы его́. / Те́мже в раи́ сла́дости сподо́бися.

В сласте́х обогате́х, я́коже дре́вле бога́тый, / облача́яся на всяк день в багряни́цу: и аз Многоми́лостиве, / в сла́дости жития́ сего́ себе́ осужда́ю, сластьми́ и пре́лестьми. / Те́мже молю́ся Тебе́, / от огня́ изба́витися Христе́ ве́чнаго, во вся ве́ки.

Троичен: Трисве́тлое Божество́, еди́нственную сия́ющую зарю́, / от еди́наго триипоста́снаго Естества́, / Роди́теля безнача́льна, / единоесте́ственна же Сло́ва Отцу́, / и сца́рствующа единосу́щна Ду́ха, / де́ти благослови́те, свяще́нницы воспо́йте, / лю́дие превозноси́те во вся ве́ки.

Иный.

Ирмос: Ужасни́ся, боя́йся, Не́бо, / и да подви́жатся / основа́ния земли́: / се бо в мертвеце́х вменя́ется / в Вы́шних Живы́й / и во Гроб мал / странноприе́млется. / Его́же, о́троцы, благослови́те, / свяще́нницы, воспо́йте, / лю́дие, превозноси́те во вся ве́ки.

Глубины́ се́рдца испыту́яй, / пре́жде бытия́ предве́дый вся на́ша, / ну́жнаго жития́ исхити́л еси́ прибе́гшую к Тебе́ Спа́се, / ну́ждно Твоему́ человеколю́бию вопию́щую немо́лчно: / свяще́нницы благослови́те, / лю́дие превозноси́те во вся ве́ки.

О измене́ния честна́го, к лу́чшему преложе́ния твоего́ честна́я! / О любве́ Боже́ственныя, возненави́девшия плотски́я сла́сти! / О ве́ры горя́щия и Боже́ственныя, всехва́льная Мари́е! / Ю́же ве́рно хва́лим, и превозно́сим во ве́ки.

Обрела́ еси́ боле́зней возме́здие, / и трудо́в твои́х воздая́ние честна́я Мари́е, / и́миже низложи́ла еси́ уби́йцу врага́: / и ны́не со а́нгелы зове́ши, песнь немо́лчно вопию́щи, / и превознося́щи Христа́ во ве́ки.

Богородичен: Всего́ обнови́ мя бла́гости ра́ди, во утро́бе Твое́й Чи́стая, / не растли́в обоего́ естества́ свойств, / я́ко всех веко́в Влады́ка: / отню́дуже Тя, я́ко вину́ на́шего спасе́ния, / пе́сньми пое́м во вся ве́ки.

Песнь 9.

Ирмос: Тя Неискусобра́чную Ма́терь Бо́га Вы́шняго: / Тя па́че ума́ ро́ждшую сло́вом вои́стинну Бо́га, / вы́шшую пречи́стых сил, / немо́лчными славословле́нии велича́ем.

Убо́гаго мя Ла́заря Христе́, молю́ся, соде́лай, / сласте́й возжеле́ния моя́ потребля́я, я́ко естество́м Бог: / доброде́тельми же мя бога́та сотвори́, / да ве́рою в песнопе́ниих велича́ю Тя.

Бога́тый и немилосе́рдый, ум мой презре́х, / ве́рою Твои́х за́поведей Человеколю́бче, / пред враты́ пове́ржен лю́те, / но я́ко сострада́телен и любоще́др возста́ви, / я́коже дре́вле четверодне́внаго дру́га Ла́заря.

Вси извыко́хом при́тче Влады́чней, / вси у́бо ве́рнии возненави́дим бога́таго немилосе́рдное, да му́ки избе́гнем, / и в не́дрех Авраа́млих при́сно лику́им.

Богородичен: Тя неви́димаго Бо́га носи́вшую объя́тии, / на небесе́х пева́емаго от вся́кия тва́ри, / и Тобо́ю нам да́рующаго всегда́ спасе́ние, / в ве́ре велича́ем.

Иный.

Ирмос: Не рыда́й Мене́, Ма́ти, / зря́щи во Гро́бе, / Его́же во чре́ве без се́мене зачала́ еси́, Сы́на: / воста́ну бо, / и просла́влюся, / и вознесу́ со сла́вою / непреста́нно я́ко Бог / ве́рою и любо́вию Тя велича́ющия.

Удо́бь претерпе́ла еси́, ма́ти, пусты́нный труд, / укрепля́ема держа́вною си́лою Христо́вою: / скве́рная бо помышле́ния находя́щая, / струя́ми боже́ственных слез угаси́ла еси́ чи́стая, / по́стников высото́, преподо́бных похвало́.

Пресветле́йшими луча́ми, / просвеща́ет тя еди́на свет ро́ждшая Христа́, Де́ва и Чи́стая: / стра́шную враго́м тя поставля́ет честна́я: / я́вственную же всем Мари́е явля́ет тя, / страда́лец красото́, преподо́бных утвержде́ние.

Оста́вивши му́дренно земна́я вся, / жили́ще честно́е Ду́ха яви́лася еси́: / мирски́х у́бо лю́тых свободи́тися, / моли́ еди́наго Христа́ свободи́теля, / ве́рно соверша́ющим Боже́ственную па́мять твою́.

Богородичен: Зако́нов естества́ Де́во, па́че естества́ утаи́вшися, / но́вое Отроча́ на земли́ родила́ еси́ Чи́стая, / Законода́вца су́ща и Ве́тха де́ньми, / мы́сленное не́бо всех Творца́: / тем ве́рою и любо́вию Тя ублажа́ем.

Светилен воскресный. Таже преподобныя. Подобен: Не́бо звезда́ми:

О́браз покая́ния тебе́ иму́ще всепреподо́бная Мари́е, Христа́ моли́, / во вре́мени Поста́, сему́ нам дарова́тися, / я́ко да в ве́ре и любви́, тя пе́сньми восхва́лим.

Богородичен: Сла́досте а́нгелов, скорбя́щих ра́досте, христиа́н предста́тельнице, / Де́во Ма́ти Госпо́дня, / заступи́ нас, и изба́ви ве́чных мук.

На хвалитех стихиры воскресны, Осмогласника 4, и анатолиевы 4.

Таже глаголем стих: Воскресни́ Го́споди Бо́же мой, да вознесе́тся рука́ Твоя́, / не забу́ди убо́гих Твои́х до конца́.

И поем самогласен, глас 1.

Несть Ца́рство Бо́жие пи́ща и питие́, / но пра́вда и воздержа́ние со свя́тостию. / Те́мже не бога́тии вни́дут в не, / но ели́цы сокро́вища своя́ в ру́ки ни́щих влага́ют. / Сия́ и Дави́д проро́к учи́т глаго́ля: / пра́веден муж ми́луяй весь день, / наслажда́яйся Го́сподеви, / и во све́те ходя́й не по́ткнется. / Сия́ же вся к наказа́нию на́шему писа́шася, / я́ко да постя́щеся благосты́ню твори́м, / и даст нам Госпо́дь вме́сто земны́х небе́сная.

Сла́ва, паки тойже. И ны́не: Преблагослове́нна еси́: Славословие великое. И отпуст. Сла́ва, и ны́не, стихира евангельская, и час 1-й.

НА ЛИТУРГИИ

Блаженна гласа. Прокимен по гласу Апостола.

И преподобныя, прокимен, глас 4

Ди́вен Бог во святы́х Свои́х, Бог Изра́илев.

Апостол ко Евреем, зачало 321 от полу.

Бра́тие, Христо́с прише́д Архиере́й гряду́щих благ, бо́льшею и соверше́ннейшею ски́ниею, нерукотворе́нною, си́речь, не сея́ тва́ри, ни кро́вию ко́злею, ни те́льчею, но Свое́ю Кро́вию, вни́де eди́ною во свята́я, ве́чное искупле́ние обреты́й. А́ще бо кровь ко́злия и те́льчая, и пе́пел ю́нчий кропя́щий осквернéныя, освяща́ет к пло́тней чистоте́, кольми́ па́че Кровь Христо́ва, И́же Ду́хом Святы́м Себе́ принесе́ непоро́чна Бо́гу, очи́стит со́весть на́шу от ме́ртвых дел, во éже служи́ти нам Бо́гу жи́ву и и́стинну.

И преподобныя, к Галатом, зачало 208.

Бра́тие, пре́жде прише́ствия ве́ры, под зако́ном стрего́ми бе́хом, затворе́ни в хотя́щую ве́ру откры́тися. Те́мже зако́н пе́стун нам бысть во Христа́, да от ве́ры оправди́мся. Прише́дши же ве́ре, уже́ не под пе́стуном eсмы́. Вси бо вы сы́нове Бо́жии eсте́ ве́рою о Христе́ Иису́се: eли́цы бо во Христа́ крести́стеся, во Христа́ облеко́стеся. Несть Иуде́й, ни éллин; несть раб, ни свобо́дь; несть му́жеский пол, ни же́нский; вси бо вы eди́но eсте́ о Христе́ Иису́се. А́ще ли вы Христо́вы, у́бо Авраа́мле се́мя eсте́, и по обетова́нию насле́дницы.

Аллилуиа гласа.

Евангелие от Марка, зачало 47.

Во вре́мя о́но, поя́т Иису́с oбана́десять, нача́т им глаго́лати, я́же хотя́ху Eму́ бы́ти, я́ко, се, восхо́дим во Иерусали́м, и Сын Челове́ческий пре́дан бу́дет архиере́ом и кни́жником, и осу́дят Eго́ на смерть, и предадя́т Eго́ язы́ком. И поруга́ются Eму́, и уя́звят Eго́, и оплю́ют Eго́, и убию́т Eго́, и в тре́тий день воскре́снет. И пред Ним приидо́ста Иа́ков и Иоа́нн, сы́на Зеведе́eва, глаго́люща: Учи́телю, хо́щева, да éже а́ще про́сива, сотвори́ши на́ма. Oн же рече́ и́ма: что хо́щета, да сотворю́ ва́ма? О́на же ре́ста Eму́: даждь нам, да eди́н одесну́ю Тебé, и eди́н ошу́юю Тебé ся́дева во сла́ве Твое́й. Иису́с же рече́ и́ма: не ве́стася, чесо́ про́сита. Мо́жета ли пи́ти ча́шу, ю́же Аз пию́, и креще́нием, и́мже Аз креща́юся, крести́тися? О́на же ре́ста Eму́: мо́жева. Иису́с же рече́ и́ма: ча́шу у́бо, ю́же Аз пию́, испие́та, и креще́нием, и́мже Аз креща́юся, крести́тася. А éже се́сти одесну́ю Менé и ошу́юю, несть Мне да́ти, но и́мже угото́вано eсть. И слы́шавше де́сять, нача́ша негодова́ти о Иа́кове и Иоа́нне. Иису́с же призва́в их, глаго́ла им: ве́сте, я́ко мня́щиися владе́ти язы́ки, соодолева́ют им, и вели́цыи их облада́ют и́ми. Не та́ко же бу́дет в вас, но и́же а́ще хо́щет в вас вя́щший бы́ти, да бу́дет вам слуга́. И и́же а́ще хо́щет в вас бы́ти ста́рей, да бу́дет всем раб. И́бо Сын Челове́чь не прии́де, да послу́жат Eму́, но да послу́жит, и да́ти ду́шу Свою́ избавле́ние за мно́ги.

И преподобныя, от Луки, зачало 33.

Во вре́мя о́но, моля́ше Иису́са не́кий от фарисéй, да бы ял с ним: и вшед в дом фарисе́ов, возлеже́. И се жена́ во гра́де, я́же бе гре́шница, и уве́девши, я́ко возлежи́т во хра́мине фарисе́ове, прине́сши алава́стр ми́ра. И ста́вши при ногу́ Eго́ созади́, пла́чущися, нача́т умыва́ти но́зе Eго́ слеза́ми, и власы́ главы́ своея́ отира́ше, и облобыза́ше но́зе Eго́, и ма́заше ми́ром. Ви́дев же фарисе́й возва́вый Eго́, рече́ в себе́, глаго́ля: Сей а́ще бы был проро́к, ве́дел бы кто и какова́ жена́ прикаса́ется Eму́, я́ко гре́шница eсть. И отвеща́в Иису́с рече́ к нему́: Си́моне, и́мам ти не́что рещи́. Oн же рече́: Учи́телю, рцы. Иису́с же рече́: два должника́ бе́ста заимода́вцу не́коему, eди́н бе до́лжен пятию́сот дина́рий, други́й же пятию́десят. Не иму́щема же и́ма возда́ти, oбе́ма отда́. Кото́рый у́бо eю́, рцы, па́че возлю́бит eго́? Отвеща́в же Си́мон рече́: мню, я́ко eму́же вя́щше отда́. Oн же рече́ eму́: пра́во суди́л eси́. И обра́щься к жене́, Си́монови рече́: ви́диши ли сию́ жену́? Внидо́х в дом твой, воды́ на но́зе Мои́ не даде́, сия́ же слеза́ми облия́ Ми но́зе, и власы́ главы́ своея́ отре́. Лобза́ния Ми не даде́, сия́ же, отне́лиже внидо́х, не преста́ облобыза́ющи Ми но́зе. Ма́слом главы́ Моея́ не пома́за: сия́ же ми́ром пома́за Ми но́зе. Его́же ра́ди, глаго́лю ти: отпуща́ются греси́ eя́ мно́зи, я́ко возлюби́ мно́го, а eму́же ма́ло оставля́ется, ме́ньше лю́бит. Рече́ же eй: отпуща́ются тебе́ греси́. И нача́ша возлежа́щии с Ним глаго́лати в себе́: кто Сей eсть, и́же и грехи́ отпуща́ет? Рече́ же к жене́: ве́ра твоя́ спасе́ тя, иди́ в ми́ре.

Причастен:

Хвали́те Го́спода с Небе́с, / хвали́те Его́ в Вы́шних. Другий: В па́мять ве́чную бу́дет пра́ведник, / от слу́ха зла не убои́тся.

На трапезе учреждаемся, якоже и в прежних Неделях.

В СУББОТУ СВЯТАГО И ПРАВЕДНАГО ЛАЗАРЯ

В ПЯТОК ВАИЙ НА 6-М ЧАСЕ

Тропарь пророчества. Глас 3:

Нестерпи́мый есть Го́споди, гнев на гре́шники преще́ния Твоего́, / и не́смы досто́йни воззре́ти, и проси́ти от Тебе́ ми́лости: / да не я́ростию Твое́ю, ни гне́вом Твои́м погуби́ши нас, / и́хже от земли́ руко́ю Твое́ю созда́л еси́.

Прокимен, псалом 121. Глас 4:

До́му ра́ди Го́спода Бо́га на́шего / взыска́х блага́я тебе́. Стих: Возвесели́хся о ре́кших мне: в дом Госпо́день по́йдем.

Пророчества Исаиина чтение. [Глава 66, ст. 10 – 24.]

Весели́ся Иерусали́ме, и торжеству́йте в нем вси лю́бящии его́, и живу́щии в нем ра́дуйтеся вку́пе с ним ра́достию, вси ели́цы пла́касте о нем. Да ссе́те и насы́титеся от сосца́ утеше́ния его́, да сса́вше насладите́ся от вхо́да сла́вы его́. Я́ко сия́ глаго́лет Госпо́дь: се Аз уклоня́ю на ня, а́ки реку́ ми́ра, и а́ки пото́к наводня́емый, сла́ву язы́ков: де́ти их на ра́мена взя́ты бу́дут, и на коле́ну уте́шатся. Я́коже а́ще кого́ ма́ти утеша́ет, та́ко и Аз уте́шу вы, и во Иерусали́ме уте́шитеся. И у́зрите, и возра́дуется се́рдце ва́ше, и ко́сти ва́ша я́ко трава́ прозя́бнут: и позна́ется рука́ Госпо́дня боя́щимся Его́, и запрети́т непокаря́ющимся. Се бо Госпо́дь, я́ко огнь прии́дет, и я́ко бу́ря колесни́цы Его́, возда́ти я́ростию отмще́ние Свое́, и преще́ние во пла́мени о́гненне. Огне́м бо Госпо́дним суди́тися бу́дет вся земля́, и мече́м Его́ вся́ка плоть: мно́зи я́звени бу́дут от Го́спода. Очища́ющиися и освяща́ющиися в вертогра́дех, и в преддве́риих яду́щии мя́со свино́е, и ме́рзости, и мы́ши, вку́пе поги́бнут, рече́ Госпо́дь. И Аз дела́ их и помышле́ния их вем, и гряду́ собра́ти вся наро́ды и язы́ки, и прии́дут, и у́зрят сла́ву Мою́. И оста́влю на них зна́мение, и послю́ от них спасе́ных во язы́ки, в Фарси́с, и в Фуд, и в Луд, и в Мосо́х, и в Фове́ль, и во Елла́ду, и во о́стровы да́льныя, и́же не слы́шаша и́мене Моего́, ниже́ ви́деша сла́ву Мою́, и возвестя́т сла́ву Мою́ во язы́цех. И приведу́т бра́тию ва́шу от всех язы́к дар Го́сподеви, с ко́ньми и колесни́цами и с носи́лами мсков, под се́ньми во святы́й град Иерусали́м, рече́ Госпо́дь: а́ки бы принесли́ сы́нове Изра́илевы же́ртвы своя́ Мне со псалмы́ в дом Госпо́день. И от тех пойму́ Себе́ жерцы́ и леви́ты, рече́ Госпо́дь. Я́коже бо не́бо но́во, и земля́ нова́, я́же Аз творю́, пребыва́ют пре́до Мно́ю, глаго́лет Госпо́дь: та́ко ста́нет се́мя ва́ше, и и́мя ва́ше. И бу́дет ме́сяц от ме́сяца, и суббо́та от суббо́ты, прии́дет вся́ка плоть поклони́тися пре́до Мно́ю во Иерусали́м, рече́ Госпо́дь. И изы́дут, и у́зрят тру́пы челове́ков преступи́вших Мне, червь бо их не сконча́ется, и огнь их не уга́снет, и бу́дут в позо́р вся́кой пло́ти.

Прокимен, псалом 122, глас 6:

Поми́луй нас Го́споди, / поми́луй нас. Стих: К Тебе́ возведо́х о́чи мои́ живу́щему на небеси́.

В ПЯТОК ВЕЧЕРА

Во светильничное обычное стихословие. На Го́споди воззва́х, поставим стихов, 10. И поем самогласен дне дважды, и мученичен: и праведнаго Лазаря самогласных 5, творяще я седмь.

Самогласен, глас 8, дважды.

Душеполе́зную соверши́вше Четыредеся́тницу, / и святу́ю седми́цу стра́сти Твоея́, / про́сим ви́дети Человеколю́бче, / е́же просла́вити в ней вели́чия Твоя́, / и неизрече́нное нас ра́ди смотре́ние Твое́, / единому́дренно воспева́юще: / Го́споди сла́ва Тебе́.

Мученичен: Му́ченицы Госпо́дни моли́те Бо́га на́шего, / и испроси́те душа́м на́шим мно́жество щедро́т, / и очище́ние мно́гих прегреше́ний, мо́лимся.

Таже поем святаго Лазаря, самогласны 5. Творение благочестиваго царя, господина Льва Премудраго. Глас 6.

Го́споди, Ла́зарев хотя́ гроб ви́дети, / во́лею хотя́й во гроб всели́тися вопроша́л еси́: / где положи́сте его́? / Уве́дев же, е́же не неве́дал еси́, / и возглаша́л, его́же люби́л еси́: / Ла́заре гряди́ вон. / И послу́ша бездыха́нный, / дыха́ние даю́щаго ему́, / Тебе́ Спа́са душа́м на́шим. [Дважды.]

Го́споди, на гроб четвероднев́наго прише́л еси́ Ла́заря, / и над гро́бом сле́зы пролия́в, / мертвеца́ четверодне́вна возста́вил еси́, кла́се живота́. / Те́мже смерть свя́зана бысть гла́сом: / пелены́ разреши́шася рука́ми. / Тогда́ ра́дости испо́лнися мно́жество учени́к, / и еди́но от всех служа́шеся согла́сие: / благослове́н еси́ Спа́се, поми́луй нас. [Дважды.]

Го́споди, глас Твой разруши́ а́дово ца́рствие, / и сло́во вла́сти Твоея́ возста́ви из гро́ба четверодне́внаго, / и бысть Ла́зарь пакибытия́ проображе́ние спаси́тельное. / Вся возмо́жна Тебе́ Влады́ко всех Царю́, / да́руй рабо́м Твои́м очище́ние, и ве́лию ми́лость. [Единожды.]

Го́споди, уве́рити хотя́ / ученико́м Твои́м из ме́ртвых Твое́ Воскресе́ние, / на гроб Ла́зарев прише́л еси́, / и возгласи́вшу Ти сего́, ад плени́ся, / и отпусти́ четверодне́вна, вопию́ща Тебе́: / благослове́нный Го́споди сла́ва Тебе́. [Единожды.]

Го́споди, пое́мь ученики́ Твоя́, / в Вифа́нию прише́л еси́, / да возста́виши Ла́заря: / и прослези́вся над ним зако́ном естества́ челове́ча, / я́ко Бог того́ четверодне́вна воздви́гл еси́, / и вопия́ше Ти Спа́се: / благослове́нный Го́споди сла́ва Тебе́. [Единожды.]

Слава, глас 8:

Предста́в гро́бу Ла́зареву Спа́се наш, / и возгласи́в ме́ртваго, я́ко от сна воскреси́л еси́: / оттрясе́ тле́ние нетле́ния ма́нием, / и изы́де сло́вом, свя́занный укро́йми. / Вся мо́жеши, вся Тебе́ рабо́тают Человеколю́бче, / вся повину́ются Ти, Спа́се наш сла́ва Тебе́.

И ныне, глас тойже:

Душеполе́зную соверши́вше Четыредеся́тницу, возопии́м: / ра́дуйся гра́де Вифа́ние, оте́чество Ла́зарево. / Ра́дуйтеся Ма́рфа и Мари́а, того́ сестры́, / зау́тра бо Христо́с прихо́дит, / оживи́ти глаго́лом уме́ршаго бра́та. / Его́же глас услы́шав, го́рький и несы́тый ад, / стра́хом вострепета́в, и вельми́ возстена́в, / отпу́стит Ла́заря укро́йми обя́зана. / Его́же чудеси́ собо́р евре́йский удиви́вся, / с ва́ием и ве́твьми Того́ сря́щут, / и явя́тся похваля́ющии де́ти, / Ему́же зави́дят отцы́. / Благослове́н гряды́й во и́мя Госпо́дне Царь Изра́илев.

Вход. Све́те ти́хий:

Прокимен, псалом 123, глас 6:

По́мощь на́ша во и́мя Го́спода, / сотво́ршаго не́бо и зе́млю. Стих: Я́ко а́ще не Госпо́дь бы был в нас, да рече́т у́бо Изра́иль.

Бытия чтение. [Глава 49, ст. 33, глава 50, ст. 1 – 26.]

Преста́ Иа́ков завеща́я сыно́м свои́м: и возложи́в Иа́ков но́зе свои́ на одр, у́мре, и приложи́ся к лю́дем свои́м. И припа́д Ио́сиф на лице́ отца́ своего́, пла́кася [го́рько] о нем, и облобыза́ его́. И повеле́ Ио́сиф рабо́м свои́м погреба́телем погребсти́ отца́ своего́: и погребо́ша погреба́тели Изра́иля. И испо́лнишася ему́ четы́редесять дней, та́ко бо исчисля́ются дни́е погребе́ния: и пла́кася его́ Еги́пет се́дмьдесят дней. Егда́ же преидо́ша дни́е пла́ча, глаго́ла Ио́сиф к вельмо́жам фарао́новым, глаголя: а́ще обрето́х благода́ть пред ва́ми, рцы́те о мне во у́ши фарао́ну, глаго́люще: оте́ц мой закля́ мя пре́жде сконча́ния [своего́], глаго́ля: во гро́бе, его́же ископа́х себе́ в земли́ Ханаа́ни, та́мо мя погреби́ ны́не у́бо возше́д погребу́ отца́ моего́, и возвращу́ся. И реко́ша фарао́ну по словеси́ Ио́сифову. И рече́ фарао́н к Ио́сифу: взы́ди, погреби́ отца́ твоего́, я́коже закля́ тя. И взы́де Ио́сиф погребсти́ отца́ своего́: и совзыдо́ша с ним вси раби́ фарао́ни, и старе́йшины до́му его́, и вси старе́йшины земли́ Еги́петския. И весь дом Ио́сифов, и бра́тия его́, и весь дом отца́ его́, и сро́дницы его́: о́вцы же и волы́ оста́виша в земли́ Гесе́м. И совзыдо́ша с ним и колесни́цы и ко́нницы, и бысть полк вели́к зело́. И приидо́ша на гумно́ Ата́дово, е́же есть об он пол Иорда́на, и рыда́ша его́ рыда́нием ве́лиим и кре́пким зело́: и сотвори́ плачь отцу́ своему́ седмь дней. И ви́деша жи́тели земли́ Ханаа́нския плач на гумне́ Ата́дове, и ре́ша: плач вели́к сей есть еги́птяном: сего́ ра́ди нарече́ся и́мя ме́сту тому́, Плачь Еги́петск, е́же есть об он пол Иорда́на. И сотвори́ша ему́ та́ко сы́нове его́, я́коже запове́да им. И взя́ша его́ сы́нове его́, в зе́млю Ханаа́ню: и погребо́ша его́ в пеще́ре сугу́бей, ю́же стяжа́ Авраа́м, пеще́ру в стяжа́ние гро́ба от Ефро́на Хетте́анина, пря́мо Мамври́и. И возврати́ся Ио́сиф во Еги́пет, сам и бра́тия его́, и вси совозше́дшии погребсти́ отца́ его́. Ви́девше же бра́тия Ио́сифовы, я́ко у́мре оте́ц их, ре́ша: да не когда́ воспомяне́т зло́бу на́шу Ио́сиф, и воздая́нием возда́ст нам за вся зла́я, я́же показа́хом ему́. И прише́дше ко Ио́сифу, реко́ша: оте́ц твой закля́ пре́жде кончи́ны своея́, глаго́ля: Та́ко рцы́те Ио́сифу: оста́ви им непра́вду и грех их, я́ко лука́вая тебе́ показа́ша, и ны́не приими́ непра́вду рабо́в Бо́га отца́ твоего́. И пла́кася Ио́сиф, глаго́лющим им к нему́. И прише́дше к нему́ реко́ша: се мы тебе́ раби́. И рече́ к ним Ио́сиф: не бо́йтеся, Бо́жий бо есмь аз. Вы совеща́сте на мя зла́я, Бог же совеща́ о мне во блага́я, дабы́ бы́ло я́коже днесь, и препита́лися бы лю́дие мно́зи. И рече́ им: не бо́йтеся, аз препита́ю вас, и до́мы ва́ши. И уте́ши их, и глаго́ла им по се́рдцу их. И всели́ся Ио́сиф во Еги́пте сам и бра́тия его́, и весь дом отца́ его́: и поживе́ Ио́сиф лет сто де́сять. И ви́де Ио́сиф Ефре́мли де́ти до тре́тияго ро́да: и сы́нове Махи́ра сы́на Манасси́ина роди́шася при бе́дрех Ио́сифовых. И рече́ Ио́сиф бра́тии свое́й, глаго́ля: аз умира́ю, посеще́нием же посети́т вас Бог, и изведе́т вас от земли́ сея́ в зе́млю, о не́йже кля́тся Бог отце́м на́шим, Авраа́му, Исаа́ку, и Иа́кову. И закля́ Ио́сиф сы́ны Изра́илевы, глаго́ля: в посеще́нии, и́мже посети́т вас Бог, совознеси́те и ко́сти моя́ отсю́ду с ва́ми. И сконча́ся Ио́сиф сый лет ста десяти́, и погребо́ша его́, и положи́ша в ра́це во Еги́пте.

Прокимен, псалом 124, глас 4:

Наде́ющиися на Го́спода, я́ко гора́ Сио́н / не подви́жится во век. Стих: Я́ко не оста́вит Госпо́дь жезла́ гре́шных на жре́бий пра́ведных.

Притчей чтение. [Глава 31, ст. 8 – 32.]

Сы́не, отверза́й уста́ твоя́ сло́ву Бо́жию, и суди́ вся здра́во. Отверза́й уста́ твоя́, и суди́ пра́ведно, разсужда́й же убо́га и не́мощна. Жену́ до́блю кто обря́щет, дража́йши есть ка́мения многоце́ннаго такова́я. Дерза́ет на ню се́рдце му́жа ея́: такова́я до́брых коры́стей не лиши́тся. Де́лает бо му́жу своему́ блага́я во все житие́. Обре́тши во́лну и лен, сотвори́ благопотре́бное рука́ма свои́ма. Бысть я́ко кора́бль ку́плю де́ющий, издале́ча собира́ет себе́ бога́тство. И востае́т из но́щи, и даде́ бра́шна до́му, и дела́ рабы́ням. Узре́вши село́ купи́: от плодо́в же рук свои́х насади́ стяжа́ние. Препоя́савши кре́пко чре́сла своя́, утверди́т мы́шцы своя́ на де́ло. И вкуси́, я́ко добро́ есть де́лати, и не угаса́ет свети́льник ея́ всю нощь. Ла́кти своя́ простира́ет на поле́зная, ру́це же свои́ утвержда́ет на вретено́. И ру́це свои́ отверза́ет убо́гому, длань же простре́ ни́щу. Не пече́тся о су́щих в дому́ муж ея́, егда́ где заме́длит: вси бо у нея́ оде́яни суть. Сугу́ба одея́ния сотвори́ му́жу своему́, от виссо́на же и порфи́ры себе́ одея́ния. Сла́вен быва́ет во врате́х муж ея́, внегда́ а́ще ся́дет в со́нмищи со старе́йшины жи́тельми земли́. Плащани́цы сотвори́, и продаде́ финики́аном, опоя́сания же ханане́ом. Уста́ своя́ отве́рзе внима́тельно и зако́нно, и чин запове́да язы́ку своему́. Кре́постию и ле́потою облече́ся, и возвесели́ся во дни после́дния. Те́сны стези́ до́му ея́: бра́шна же ле́ностнаго не яде́. Уста́ своя́ отве́рзе му́дро и зако́нно. Ми́лостыня же ея́ возста́ви ча́да ея́, и обогати́шася: и муж ея́ похвали́ ю. Мно́ги дще́ри стяжа́ша бога́тство, мно́ги сотвори́ша си́лу: ты же предуспе́ла и превознесла́ся еси́ над все́ми. Ло́жнаго угожде́ния, и су́етныя добро́ты же́нския несть в тебе́: жена́ бо разу́мная благослове́на есть. Страх же Госпо́день сия́ да хвали́т. Дади́те ей от плодо́в усте́н ея́, и да хвали́мь бу́дет во врате́х муж ея́.

И прочее последование Преждеосвященных яко обычно.

Ведомо буди, яко от днесь ниже мученичен, ниже Богородичен, ниже Осмогласник поется, даже до субботы святаго Фомы.

В ТОЙЖЕ ПЯТОК ПОВЕЧЕРИЕ ГЛАГОЛЕМ ВЕЛИКОЕ

На Повечерии поем настоящий канон, творение святаго отца господина Андреа Критскаго, Иерусалимиты. Глас 1.

Песнь 1.

Ирмос: Песнь побе́дную пои́м вси Бо́гу, / сотво́ршему ди́вная чудеса́, мы́шцею высо́кою, / и спа́сшему Изра́иля, / я́ко просла́вися.

Припев: Сла́ва Тебе́ Бо́же наш, сла́ва Тебе́.

Ме́ртва четверодне́вна воскреси́в Спа́се мой Ла́заря, / тли измени́л еси́ мы́шцею высо́кою, / и показа́л еси́ я́ко си́льный власть Твою́.

Возгласи́в Ла́заря из гро́ба, а́бие воскреси́л еси́, / но ад до́ле го́рце рыда́ше, / и стеня́ трепета́ше, Спа́се, вла́сти Твоея́.

Прослези́лся еси́ Го́споди, над Ла́зарем, / показу́я воплоще́ние смотре́ния Твоего́, / и я́ко естество́м Бог сый, / естество́м по нам был еси́ Челове́к.

Ма́рфины сле́зы и Мари́ины утоли́л еси́ Го́споди, / из ме́ртвых Ла́заря воскреси́в Спа́се, / и показа́в одухновле́нна ме́ртваго вла́стию Твое́ю.

Зако́ном естества́ челове́ча вопроси́л еси́ Влады́ко: / где положе́н бысть Ла́зарь? / Показу́я всем Спа́се, и́стинное е́же к нам смотре́ние Твое́.

Закле́пы сокруши́л еси́ тогда́ а́довы, возгласи́в Ла́заря, / и держа́ву стрясл еси́ борца́, / и покори́л еси́ пре́жде Креста́, / трепета́ти Тебе́ еди́не Спа́се.

Свя́зня Ла́заря, от а́да держи́маго Влады́ко, / я́ко Бог предвари́л еси́, и разреши́л еси́ от уз: / к Твоему́ бо вся Си́льне, и́дут повеле́нию.

Слава: Отца́ просла́вим, Сы́на, и Ду́ха, / Тро́ицу неразде́льную, во Еди́нице Естества́, / и со а́нгелы Ю́, я́ко еди́наго несозда́ннаго Бо́га славосло́вим.

И ныне, Богородичен: Непрело́жно родила́ еси́ Де́во Ма́ти Созда́теля естества́, / от Свята́го Ду́ха по благоволе́нию О́тчу бы́вша е́же есмы́, / кроме́ измене́ния и смеше́ния.

Песнь 2.

Ирмос: Вонми́ Не́бо, и возглаго́лю, / и воспою́ Христа́, / еди́наго Человеколю́бца.

Сла́ва Тебе́ возгласи́вшему то́кмо, / и из гро́ба ме́ртва четверодне́вна дру́га воздви́гшему Ла́заря.

Услы́ша гла́са Твоего́ безду́шный, / и одушевле́н от ме́ртвых воста́ а́бие, / сла́вя Тя Го́споди.

Повеле́ние живоно́снаго гла́са Твоего́ прии́м, / смердя́щий воста́ от гро́ба, Спа́се мой, Ла́зарь.

Прослези́лся еси́ над дру́гом Спа́се мой, / уверя́я на́ше, я́коже носи́л еси́, естество́, / и сего́ воскреси́л еси́.

Вострепета́ я́коже ви́де ад, / па́ки теку́ща а́бие свя́зана укро́йми, / гла́сом к зде́шнему животу́.

Ужасо́шася евре́йстии наро́ди / егда́ возгласи́в Спа́се, / воскреси́л еси́ сло́вом смердя́щаго Ла́заря.

Сотрясо́шася сокро́вища а́дова, / я́ко одушевле́н бысть а́бие ни́зу Ла́зарь, / тогда́ гла́сом Оживи́вшаго.

Песнь 3.

Ирмос: Ка́мень, его́же небрего́ша зи́ждущии, / сей бысть во главу́ угла́. / Той есть Ка́мень, / на не́мже утверди́ Це́рковь Христо́с, / ю́же от язы́к искупи́.

Чу́до стра́нное и пресла́вное, / ка́ко Созда́тель всех, е́же не неве́дяше, / я́ко не ве́дый вопроша́ше: / где лежи́т, его́же рыда́ете; / где погребе́ся Ла́зарь, / его́же пома́ле из ме́ртвых жи́ва / вам воскрешу́ Аз?

Ка́мень, его́же тебе́ привали́ша погре́бшии тя, / сего́ взя́ти Иису́с повеле́в, / а́бие воскреси́ тя, возгласи́в тебе́: / Ла́заре воста́ни, гряди́ ко Мне, / да твоего́ ад устраши́тся гла́са.

Ма́рфа и Мари́а Го́споди, рыда́ньми вопия́сте: / се его́же люби́л еси́ четверодне́вен смерди́т: / а́ще бы еси́ был зде, тогда́ не бы у́мерл Ла́зарь. / Но я́ко неразлу́чен везде́, / сего́ а́бие возгласи́в воздви́гл еси́.

Пролия́в над дру́гом сле́зы смотре́ния ра́ди, / показа́л еси́ плоть от нас взе́млемую, / существо́м не мне́нием Спа́се, соедини́вшуюся Тебе́, / и я́ко Человеколю́бец Бог, / сего́ а́бие возгласи́в воздви́гл еси́.

Увы́ мне вои́стинну, ны́не погибо́х, вопия́ше ад, / си́це возглаша́ше сме́рти глаго́ля: / се Назоряни́н до́льняя подвиза́, / и утро́бу мою́ посека́я, / бездыха́нна ме́ртва возгласи́в воздви́же.

Где евре́йское безу́мие; где неве́рие? / Доко́ле чужди́и, доко́ле лестцы́, / зрите́ уме́ршаго гла́сом исходя́ща, и не ве́руете Христу́, / вои́стинну сы́нове тьмы вси вы.

Слава: Еди́наго от Тро́ицы вем Тя, а́ще и воплоти́лся еси́, / еди́наго и сла́влю, Сы́на воплоще́нна, / от Богоро́дицы безсе́менно прозя́бшаго, / и со Отце́м и Ду́хом еди́наго Сы́на славосло́вима.

И ныне, Богородичен: Стра́нное и стра́шное виде́ние смотре́ния, / е́же предзре́ша нело́жнии проро́цы Де́ву Богоро́дицу: / безсе́менно у́бо заче́ншую, и нетле́нно ро́ждшую Бо́га, / пребыва́ющую же по рождестве́ Чи́стую.

Песнь 4.

Ирмос: Взя́тся со́лнце, и луна́ ста в чи́не свое́м, / возне́слся еси́, Долготерпели́ве, на Дре́во, / и водрузи́л еси́ на нем Це́рковь Твою́.

Прослези́лся еси́ Го́споди над Ла́зарем, / показа́в я́ко Человек еси́, / и воздви́гл еси́ Влады́ко уме́ршаго, / и показа́л еси́ лю́дем, я́ко Сын еси́ Бо́жий.

Бездыха́нный услы́ша повеле́ние Твое́, / гряди́ вон Ла́заре, / теки́й воста́ше с пелена́ми, и скака́ше, Бла́же, / показу́я держа́ву Твою́.

Ма́рфины сле́зы и Мари́ины утоли́л еси́ Христе́ Бо́же, / возгласи́в Ла́заря самовла́стно, / воздви́гл еси́ гла́сом, и поклони́ся Тебе́.

Прослези́вся я́ко Человек над Ла́зарем, / воздви́гл еси́ его́ я́ко Бог. / Вопроси́л еси́: где погребе́ся четверодне́вный? / Уверя́я Бла́же, вочелове́чение Твое́.

Стра́сти зна́мения и Креста́ Твоего́, уверя́ти хотя́ Бла́же, / а́дово несы́тное чре́во растерза́в, / возста́вил еси́ я́ко Бог четверодне́внаго.

Кто ви́де, кто слы́ша, я́ко воста́ челове́к ме́ртвый смердя́щий? / Илиа́ у́бо воздви́же и Елиссе́й, / но не от гро́ба, но ниже́ четверодне́вна.

Пое́м Твое́ Го́споди, могу́тство, / пое́м и стра́сти Христе́: / о́нем бо я́ко благоутро́бен чудоде́йствовал еси́, / си́ми же смотри́тельно ят еси́ я́ко Челове́к.

Бог еси́ и Челове́к, и́стинствуяй вещьми́ и имены́, / предста́л еси́ гро́бу пло́тию Сло́ве, / и воздви́гл еси́ я́ко Бог четверодне́внаго.

Ужасо́шася Влады́ко, евре́йстии наро́ди, / я́ко ви́деша воста́вша ме́ртва из гро́ба Ла́заря со гла́сом Твои́м, / и пребы́ша непокорли́ви чудесе́м Твои́м.

Слава: Безнача́льно возсия́л еси́ от Отца́ Твоего́, / я́ко еди́н сый от Тро́ицы Спа́се, / в ле́то в Ду́се из де́вственных Ты проше́л еси́ крове́й, / плоть взем Пресу́щественный.

И ныне, Богородичен: Зача́тие безсе́менное Богоро́дицы, / рождество́ кроме́ стра́сти тле́ния: / Бог бо обоя́ чудоде́йствовавый истощи́ Себе́, / да нам соедини́тся.

Песнь 5.

Ирмос: Твой мир даждь нам, / Сы́не Бо́жий, / ино́го бо ра́зве Тебе́ бо́га не зна́ем, / И́мя Твое́ имену́ем, / я́ко Бог живы́х и ме́ртвых еси́.

Жизнь сый Го́споди, и свет и́стинный, / Ла́заря возгласи́в воскреси́л еси́: / я́ко си́лен бо всем показа́л еси́, / я́ко Бог живы́х и ме́ртвых еси́.

Нестерпи́мое Твое́ повеле́ние Иису́се, / не терпя́ ад мно́гих прие́мый убоя́ся, / и четверодне́вна су́ща Ла́заря, со гла́сом жи́ва, а не ме́ртва дая́ше.

Персть совоку́пль ду́ху, дре́вле бре́ние Ду́хом жи́зни, / одуши́вый Сло́ве сло́вом Твои́м: / и ны́не же сло́вом воскреси́л еси́ от тли дру́га из преиспо́дних.

Ма́нию Твоему́ Го́споди, сопроти́вися никто́же: / егда бо ме́ртваго гласи́л еси́ Ла́заря, / а́бие бездыха́нный востава́ше, / и у́зы нося́, нога́ма хожда́ше.

О иуде́йское безу́мие! О омраче́ние враго́в! / Кто ви́де мертвеца́ из гро́ба востаю́ща? / Илия́ дре́вле воскреси́, / но не от гро́ба, но ниже́ четверодне́вна.

Непобеди́ме, долготерпели́ве, / вся нас ра́ди творя́й я́ко Бог, и терпя́й я́ко Челове́к, / прича́стники вся ны сотвори́ Ца́рствия Твоего́, / моли́твами Ла́заревыми.

Слава: Пребезнача́льная, собезнача́льная, единочестна́я Тро́ице, / О́тче Вседержи́телю, и Сы́не, и Ду́ше Святы́й, / Еди́нице Свята́я триипоста́сная, / су́щия от Ада́ма спаса́й, ве́рно Тя воспева́ющия.

И ныне, Богородичен: Пречи́стое чре́во Твое́ освяти́ Чи́стая, / плоть из него́ прие́мый / Пребоже́ственный, в Тро́ице покланя́емый, / из Отца́ Сло́во, и с Ду́хом Бог.

Песнь 6.

Ирмос: Отве́ргл мя еси́ во глубины́ се́рдца морска́го, / и спасл еси́ мя Спа́се от рабо́ты сме́ртныя, / и разреши́л еси́ у́зы беззако́ний мои́х.

Вопроси́л еси́: где есть? вся ве́дый, / прослези́лся же еси́ Спа́се, я́ко Челове́к естество́м, / воздви́гл мя еси́ ме́ртва повеле́нием Твои́м.

Возгласи́л мя еси́ Спа́се, из а́да преиспо́дняго, / вопие́т Ла́зарь к Тебе́ разруши́телю а́да, / и воздви́гл мя еси́ ме́ртва повеле́нием Твои́м.

Оде́ял мя еси́ Спа́се, в бре́нное те́ло, / и вдохну́л ми еси́ жизнь, / и ви́дех свет Твой, / и воздви́гл мя еси́ ме́ртва повеле́нием Твои́м.

Одуши́л еси́ Ты, бездыха́нный о́браз пло́ти моея́ Спа́се, / стягну́л мя еси́ костьми́ и жи́лами, / и воздви́гл мя еси́ ме́ртва повеле́нием Твои́м.

Всесне́дное растерза́в чре́во а́дово, / исто́ргнул мя еси́ Спа́се, Твое́ю вла́стию, / и воздви́гл мя еси́ ме́ртва повеле́нием Твои́м.

Носи́л еси́ Спа́се, смеше́ние мое́ всеце́ло, / сохрани́л же еси́ чи́сту пречи́стую утро́бу, / из нея́же проше́л еси́ воплоти́вся, еди́н сый Тро́ицы.

Слава, Троичен: Тро́ице Свята́я, прославля́ю Твое́ благоутро́бие, / и со а́нгелы пою́ трисвяту́ю песнь: / поми́луй ду́ши нас воспева́ющих Тя.

И ныне, Богородичен: В пречи́стую Твою́ утро́бу вни́де Сло́во, / соблюде́ же па́ки по рождестве́ сию́ чи́стую, Богороди́тельнице, / чу́до вои́стинну пресла́вное.

Песнь 7.

Ирмос: Су́щим в пещи́ отроко́м Твои́м, Спа́се, / не прикосну́ся, ниже́ стужи́ огнь. / Тогда́ трие́, я́ко еди́неми усты́ поя́ху, / и благословля́ху, глаго́люще: / благослове́н Бог оте́ц на́ших.

Над мертвеце́м прослези́лся еси́ Спа́се Человеколю́бче: / да пока́жеши всем лю́дем, / я́ко Бог сый, нас ра́ди Челове́к яви́лся еси́, / и во́лею прослези́лся еси́, / о́бразы нам предлага́я серде́чныя любве́.

Четверодне́вный Ла́зарь Спа́се, / я́ко услы́ша ни́зу глас Твой, воста́в воспе́ Тя, / и ра́дуяся си́це вопия́ше: / Ты Бог и Созда́тель мой, / Тебе́ покланя́юся, и пою́ воскреси́вшаго мя.

А́ще и у́зами обложе́н есмь, / Ла́зарь ни́зу вопия́ше Свободи́телю, / но ника́коже во чре́ве пребу́ду а́дове, / а́ще то́кмо воззове́ши мя, Ла́заре, гряди́ вон. / Ты бо свет мой и живо́т.

Молю́ тя Ла́заре, ад рече́, воста́ни, / изы́ди от закле́пов мои́х ско́ро, отыди́ у́бо: / добро́ бо мне еди́наго рыда́ти го́рце отъе́млема, / не́жели всех, и́хже пре́жде а́лча поглоти́х.

О что косни́ши Ла́заре, глаго́лет, / гряди́ вон, зове́т стоя́ Друг твой: / изы́ди у́бо, да и аз осла́бу прииму́, / отне́леже бо тя снедо́х, на блева́ние пи́ща устро́ися ми.

Что не воста́неши Ла́заре ско́ро, воззва́ из до́лу ад рыда́я? / Что не а́бие воскре́с тече́ши отсю́ду? / Да не и други́х ми плени́т Христо́с, воскреси́в тя.

Удивля́емь был еси́ Влады́ко Христе́, чу́дная тогда́ соде́лав мно́гая, / свет бо слепы́м, глухи́м же у́ши отве́рзл еси́ сло́вом, / и дру́га Ла́заря из ме́ртвых, я́ко Бог возгласи́в воздви́гл еси́.

Слава, Троичен: Тро́ическую воспои́м песнь, / сла́вяще безнача́льнаго Отца́, и Сы́на, и Ду́ха Пра́ваго, / еди́нственное еди́но Существо́, / е́же Тро́ически воспои́м: / Свят, Свят, Свят еси́ Тро́ице.

И ныне, Богородичен: Я́ко еди́наго от Тро́ицы Тя Христе́ сла́вим, / я́ко от Де́вы вопло́щься, / кроме́ преложе́ния челове́чески вся претерпе́л еси́, / не отсту́пль естества́ оте́ческа Иису́се, а́ще и соедини́лся еси́ нам.

Песнь 8.

Ирмос: Небеса́ небе́с и вода́, я́же превы́ше небе́с, / благослови́те, по́йте Го́спода, / и превозноси́те Его́ во ве́ки.

Творе́ц и Содержи́тель всех, / за милосе́рдие во Вифа́нию прии́де, воздви́гнути Ла́заря.

Четверодне́вный смердя́, и пово́йми обя́зан, / измени́ся дыха́нием бездыха́нный, / возгласи́вшу Ти Го́споди.

Иуде́йстии лю́дие, я́ко ви́деша уме́ршаго, / Твои́м гла́сом воста́вша Христе́, распыха́хуся.

Омраче́ннии о све́те иуде́е, / что не ве́руете Ла́зареву воста́нию, Христо́ву начина́нию?

Да ра́дуется Сио́н, и да пое́т Жизнода́вца, / воскреси́вшаго сло́вом от гро́ба Ла́заря.

Во́и небе́снии, и род земны́х воспе́ша Тя, / егда́ Спа́се мой Ла́заря воздви́гл еси́.

Слава: Со Отце́м и Сы́ном Ду́ха славосло́влю / и поя́ немо́лчно взыва́ю: / Трисвяты́й, сла́ва Тебе́.

И ныне, Богородичен: Тебе́ благословлю́ и покланя́юся Ро́ждшемуся из Де́вы, / не разлу́чшуся престо́ла святы́я сла́вы Твоея́.

Песнь 9.

Ирмос: Сотвори́ держа́ву мы́шцею Свое́ю, / низложи́ бо си́льныя со престо́л, / и вознесе́ смире́нныя Бог Изра́илев. / В ни́хже посети́ нас Восто́к с высоты́, / и напра́вил ны есть на путь ми́ра.

Да пое́т чу́до Вифа́ния с на́ми: / в ней бо прослези́ся Созда́тель, зако́ном естества́ пло́ти, / Ла́заря воскреша́я, / и Ма́рфины сле́зы про́чее, и плач Мари́ин в ра́дость прелага́я, / мертвеца́ воздви́гл есть.

Уверя́я Сло́ве, Воскресе́ние Твое́, / призва́л еси́ Ла́заря из гро́ба, и воздви́гл еси́ я́ко Бог, / да пока́жеши лю́дем Бо́га же и Челове́ка вку́пе вои́стинне су́ща, / и воздви́гша храм телесе́ Твоего́.

Стрясл еси́ врата́ и вереи́ желе́зныя, / устраши́л еси́ ад гла́сом Твои́м, / ужасе́ся же с ним и смерть а́бие, / я́ко ви́деша Ла́заря Спа́се, су́ща в них у́зника, / одушевле́нна гла́сом и воскре́сша.

Ужасо́шася вси, / я́ко ви́деша Тя Спа́се слезя́ща, Ла́заря уме́рша, / и глаго́лаху наро́ди: / виждь, ка́ко его́ любля́ше. / А́бие у́бо возгласи́л еси́ его́, и воста́в бездыха́нный, / отложи́ тле́ние повеле́нием Твои́м.

Потрясо́шася врата́, сокруши́шася вереи́, / разреши́шася у́зы ме́ртваго гла́сом си́лы Христо́вы, / и ад го́рько воздыха́ше рыда́я, и свои́м вопия́ше: / увы мне, кий и отку́ду глас оживля́яй ме́ртвыя?

Воста́ни отсю́ду послу́шав гла́са, / Друг бо твой вон приглаша́ет тя: / Сей есть пре́жде воскреси́вый ме́ртвыя. / Илия́ у́бо воздви́же ме́ртва, и Елиссе́й ку́пно, / но Сей бе о́неми и глаго́ляй и де́йствуяй.

Пое́м Твою́ Сло́ве непобеди́мую кре́пость: / костьми́ бо и жи́лами уме́рша / воздви́гл еси́ сло́вом Твои́м, я́ко всех Созда́тель, / и сего́ воскреси́л еси́ Спа́се, от преиспо́дних, / я́коже вдо́выя сы́на су́ща на одре́.

Слава: Тро́ице Всесвята́я, / О́тче безнача́льный Бо́же, / собезнача́льный Сы́не и Боже́ственный Сло́ве, / Уте́шителю Благи́й, Ду́ше Святы́й Бо́жий: / еди́ный и трисо́лнечный Све́те, соесте́ственное Существо́, / еди́не Бо́же и Го́споди, уще́дри мир.

И ныне, Богородичен: Вся сотвори́вый в прему́дрости Иису́се, / и во всего́ мя оболки́йся из Де́вы, / и весь пребыва́яй при́сно в не́дрех Отца́: / Святы́й Дух Твой Христе́, на ста́до Твое́ низпосла́в / я́ко Бог, осени́ нас.

Вместо Досто́йно, ирмос: Сотвори́ держа́ву:

В СУББОТУ СВЯТАГО И ПРАВЕДНАГО ЛАЗАРЯ

На Полунощнице, на первом Трисвятом, по О́тче наш: Тропарь: О́бщее воскресе́ние: На последнем Трисвятом, по О́тче наш: Кондак: Всех ра́дость Христо́с: Го́споди поми́луй, 12. И отпуст. Молитвы же: Помяни́ Го́споди, не глаголем.

НА УТРЕНИ

На Бог Госпо́дь, тропарь, глас 1:

О́бщее воскресе́ние / пре́жде Твоея́ Стра́сти уверя́я, / из ме́ртвых воздви́гл еси́ Ла́заря, Христе́ Бо́же. / Те́мже и мы, я́ко о́троцы побе́ды зна́мения нося́ще, / Тебе́ победи́телю сме́рти вопие́м: / оса́нна в вы́шних, / благослове́н Гряды́й во и́мя Госпо́дне. [Трижды.]

Таже, стихословие: Рече́ Госпо́дь Го́сподеви моему́:

По 1-м стихословии седален, глас 1: Подобен: Ка́мени запеча́тану:

Уще́дрив Ма́рфины и Мари́ины сле́зы, / отвали́ти ка́мень от гро́ба повеле́л еси́ Христе́ Бо́же, / воскреси́л еси́ возгласи́в ме́ртваго, ми́ра Жизнода́вче, / Собо́ю уверя́я воскресе́ние. / Сла́ва си́ле Твое́й Спа́се: / сла́ва вла́сти Твое́й: / сла́ва сло́вом вся Соста́вившему.

Сла́ва, и ны́не, тойже.

Таже стихословим Непорочны.

И поем тропари воскресны: Благослове́н еси́ Го́споди: А́нгельский собо́р: И прочая, яко обычай есть в Неделю, потом седален, глас 5.

Подобен: Собезнача́льное Сло́во:

Исто́чник прему́дрости и предве́дения, во Вифа́нию прише́д, / с Ма́рфою су́щих вопроша́л еси́: / где положи́сте, рек, дру́га, Ла́заря? / Его́же ра́ди прослези́в Благоутро́бне, / четверодне́вна ме́ртва воскреси́л еси́ гла́сом Твои́м / Человеколю́бче и Ще́дрый, / я́ко Жизнода́вец и Госпо́дь.

Сла́ва, и ны́не, тойже.

Таже глаголем: Воскресе́ние Христово: и псалом 50. Евангелие же не чтем, токмо во храме святаго Лазаря. Чтение же творим, толкование еже от Иоанна Евангелиа того дне, слово 63, и 64.

Канона два, до шестыя песни, творение господина Феофана: отонудуже начинаем четверопеснец. Первый канон со ирмосом на 8: другий на 6. Глас 8.

Песнь 1.

Ирмос: Пои́м Го́сподеви, / прове́дшему лю́ди Своя́ сквозе́ Чермно́е мо́ре, / я́ко еди́н сла́вно просла́вися.

Ла́заря уме́ршаго, / ма́нием Боже́ственным воскреси́л еси́, / я́ко Созда́тель сый, / и живота́ сокро́вище Человеколю́бче.

Сло́вом четверодне́внаго Ла́заря / возгласи́л еси́ безсме́ртне, / темнообра́зное а́дово разруши́в кре́постию ца́рство.

Всем Пребоже́ственнаго позна́ние Божества́ показа́л еси́, / из ме́ртвых возста́вив / четверодне́внаго Ла́заря Влады́ко.

Днесь Вифа́ния предвозвеща́ет / Воскресе́ние Христа́ Жизнода́вца, / воста́нием Ла́заревым ликовству́ющи.

Другий канон, творение Иоанна монаха. Глас 8.

Ирмос: Во́ду проше́д:

Пре́жде от не су́щих приве́д вся́ческую тварь, / и ве́дый серде́чная сокро́вища / предглаго́леши я́ко Влады́ка ученико́м Ла́зарево успе́ние.

Челове́ка естество́м осуществова́выйся Христе́ от Де́вы, / Ла́зарево Ты погребе́ние навы́кнути вопроша́л еси́ я́ко Челове́к, / не неве́дый я́ко Бог, иде́же лежа́ше.

Слава: Уверя́я Сло́ве Твое́ Воскресе́ние, / вои́стинну я́ко от сна, люби́маго воскреси́л еси́ уже́ смердя́ща, / четверодне́вна мертвеца́ от гро́ба.

И ныне, Богородичен: Чи́ни Тя а́нгел и челове́к, безневе́стная Ма́ти, хва́лят непреста́нно, / Созда́теля бо сих я́коже Младе́нца, / во объя́тиих Твои́х носи́ла еси́.

Катавасия: Во́ду проше́д я́ко су́шу, / и еги́петскаго зла избежа́в, / изра́ильтянин вопия́ше: / Изба́вителю и Бо́гу на́шему пои́м.

Песнь 3.

Ирмос: Ты еси́ утвержде́ние / притека́ющих к Тебе́ Го́споди, / Ты еси́ свет омраче́нных, / и пое́т Тя дух мой.

Два предлага́я де́йства Твоя́, / показа́л еси́ суще́ств Спа́се сугу́бство: / Бог бо еси́ и Челове́к.

Бе́здна сый ра́зума, Ты вопроша́еши: / где положи́ся ме́ртвый; / хотя́ воскреси́ти Животода́вче лежа́щаго.

Ме́ста преходя́й я́ко быв Челове́к, / яви́лся еси́ опи́сан, / исполня́я вся́ческая, я́ко Бог неопи́санный.

Ла́заря воздви́гл еси́ / Боже́ственным Христе́ глаго́лом, / и мене́ мно́гими прегреше́ньми уме́рша / возста́ви, молю́ся.

Иный.

Ирмос: Небе́снаго кру́га:

Предста́в Ты гро́бу чудотво́рче Го́споди, / в Вифа́нии над Ла́зарем прослези́лся еси́, зако́ном естества́, / плоть Твою́ уверя́я, Иису́се Бо́же мой, / ю́же восприя́л еси́.

Мари́ин плач Ты а́бие утоли́л еси́ Спа́се, / и Ма́рфе показу́я самовла́стное. / Ты бо воскресе́ние, Ты и живо́т, я́коже рекл еси́: / и́стина бо еси́, и всех Госпо́дь.

Слава: Обви́таго укро́йми люби́маго Ла́заря Го́споди, / от а́да те́мнаго исхи́тил еси́ Ты, / сло́вом Твои́м всемо́щным / сме́рти разве́рг закле́пы же и ца́рствия.

И ныне: Всели́лся еси́ в Де́ву пло́тски Го́споди, / яви́лся еси́ челове́ком, я́коже леть бе ви́дену Тебе́ бы́ти, / Ю́же и показа́л еси́ я́ко и́стинную Богоро́дицу, и ве́рных помо́щницу, / еди́не Человеколю́бче.

Катавасия: Небе́снаго кру́га Верхотво́рче, Го́споди, / и Це́ркве Зижди́телю, / Ты мене́ утверди́ в любви́ Твое́й, / желáний крáю, ве́рных утвержде́ние, / Еди́не Человеколю́бче.

Седален, глас 4. Подобен: Удиви́ся Ио́сиф:

Вку́пе предста́сте Христу́ Ла́зареве сестре́, / и слезя́ще го́рце, и пла́чуще его́, ре́ша Ему́: / Го́споди, у́мре Ла́зарь. / Он же я́ко Бог не неве́дый погреба́ния, / вопроша́ше я́ко Челове́к: / где положи́сте его́? / И приступи́в ко гро́бу, возглаша́ше четверодне́внаго Ла́заря. / Он же а́бие воста́, / и покланя́шеся Воскреси́вшему.

Слава, и ныне, глас 8. Подобен: Прему́дрости:

Прове́дый вся́ческая я́ко Творе́ц / в Вифа́нии проре́кл еси́ ученико́м Твои́м: друг наш Ла́зарь у́спе днесь. / И ве́дый вопроси́л еси́, рекл: где положи́сте его́? / И Отцу́ помоли́лся еси́, прослези́вся я́ко Челове́к: / те́мже и возгласи́в, его́же люби́л еси́, / от а́да возста́вил еси́ Го́споди четверодне́внаго Ла́заря. / Сего́ ра́ди вопие́м Тебе́: / приими́ Христе́ Бо́же, дерза́ющих приноси́ти хвале́ние Тебе́, / и сподо́би всех сла́вы Твоея́.

Песнь 4.

Ирмос: Услы́шах, Го́споди, / смотре́ния Твоего́ та́инство, / разуме́х дела́ Твоя́, / и просла́вих Твое́ Божество́.

Не посо́бника тре́буяй, / но смотре́ния соверша́яй неизрече́нное, / моля́ся возста́вил еси́ ме́ртва, / четверодне́внаго Всеси́льне.

Отцу́ соприсносу́щное Сло́во, / и Бог пре́жде зри́мый, / ны́не я́ко Челове́к мо́лится, / моли́твы всех Прие́мляй.

Глас Твой разруши́ Спа́се сме́ртную всю си́лу, / основа́ния же а́дова / Боже́ственною Твое́ю си́лою поколеба́шася.

Богородичен: Де́ву воспои́м, я́ко по рождестве́ Де́ву пребы́вшую, / и ро́ждшую Христа́ Бо́га, / от пре́лести мир изба́вльшаго.

Иный.

Ирмос: Ты моя́ кре́пость Го́споди:

Ты я́ко па́стырь исхи́тил еси́ Христе́ челове́ка, / растле́вша уже́ четверодне́вна, Зижди́телю, / от во́лка лю́таго вои́стинну и всея́дца, / я́ко всеси́лен же и Госпо́дь, / сим проявля́я всеми́рную сла́ву, / Твоего́ ны́не тридне́внаго воста́ния.

Тя жизнь ви́дяще су́щии с Ма́рфою Христе́, вопия́ху: / а́ще бы был еси́ зде Го́споди, просвеще́ние всех и жизнь, / отню́д не бы у́мерл, мертв не яви́лся бы Ла́зарь. / Жизнь же уме́рших, Ты Человеколю́бче сый, / в ра́дость плач их прелага́еши.

Слава: Тя исто́чника боя́тся Го́споди бе́здны, / Тебе́ рабо́тают во́ды вся́ческия: / Тебе́ трепе́щут Христе́ вереи́ а́довы, / и закле́пы держа́вою Твое́ю разруша́ются, / Ла́зарю воскре́сшу из ме́ртвых гла́сом Твои́м, / всеси́льне Спа́се Человеколю́бче.

И ныне, Богородичен: Ты ве́рным похвала́ еси́ Безневе́стная, Ты предста́тельство, / Ты и прибе́жище христиа́ном, стена́ и приста́нище, / к Сы́ну бо Твоему́ моле́ния прино́сиши Всенепоро́чная, и спаса́еши от бед, / ве́рою и любо́вию Богоро́дицу Чи́стую Тя ве́дущия.

Катавасия: Ты моя́ кре́пость, Го́споди, / Ты моя́ и си́ла, / Ты мой Бог, Ты мое́ ра́дование, / не оста́вль не́дра О́тча / и на́шу нищету́ посети́в. / Тем с проро́ком Авваку́мом зову́ Ти: / си́ле Твое́й сла́ва, Человеколю́бче.

Песнь 5.

Ирмос: Вску́ю мя отри́нул еси́:

Предста́в Ла́зареву гро́бу Человеколю́бче, / сего́ призва́л еси́, и жизнь по́дал еси́: / я́ко жизнь сый безсме́ртная челове́ком всем, / я́ко Бог бу́дущее прообразу́я я́ве воскресе́ние.

Свя́зан нога́ма Ла́зарь хожда́ше, чу́до в чудесе́х, / ибо бо́лий яви́ся возбраня́ющаго укрепля́яй и Христо́с, / Его́же сло́ву вся раболе́пно слу́жат, / я́ко Бо́гу и Влады́це рабо́тающа.

Ме́ртва смердя́ща Ла́заря воздви́гнувый Христе́ четверодне́вна, / возста́ви мя уме́рша ны́не грехи́ мои́ми, / и положе́на в ро́ве, и те́мней се́ни сме́ртней, / и я́ко благоутро́бен изба́ви и спаси́ мя.

Иный, ирмос тойже.

Отцу́ сла́ву подая́, / я́ко не богопроти́вный был еси́ моля́ся, / предстоя́щий уверя́я наро́д Долготерпели́ве, / и благодаре́ние Твоему́ Отцу́ принося́, / повеле́нием воздвиза́еши Ла́заря.

О гла́са Боговеща́ннаго, и Боже́ственныя си́лы, Спа́се держа́вы Твоея́! / Е́юже а́дова врата́ всея́дныя сме́рти сокруши́л еси́, / но исхити́ мя от страсте́й мои́х, / я́коже пре́жде четверодне́вна Твоего́ дру́га Ла́заря.

Слава: Моли́твами Ла́заря, Ма́рфы же и Мари́и, / нас сподо́би зри́телей бы́ти Креста́ и страсте́й Твои́х Го́споди, / и светоно́сицы дней и цари́цы Воскресе́ния Твоего́ Человеколю́бче.

И ныне, Богородичен: Ма́тернее дерзнове́ние к Сы́ну Твоему́ иму́щи Пречи́стая, / сро́днаго промышле́ния о нас не пре́зри, мо́лимся, / я́ко Тя еди́ну христиа́не ко Влады́це / умилостивле́ние благоприя́тное предлага́ем.

Катавасия: Вску́ю мя отри́нул еси́ / от лица́ Твоего́, Све́те Незаходи́мый, / и покры́ла мя есть чужда́я тьма, окая́нного, / но обрати́ мя и к све́ту за́поведей Твои́х / пути́ моя́ напра́ви, молю́ся.

Отселе начинается четверопеснец господина Космы. Ирмосы по дважды, тропари на 12.

Песнь 6.

Ирмос: Ио́ну в ки́те, Го́споди, / еди́наго всели́л еси́, / мене́ же, свя́заннаго мре́жами вра́жиями, / я́ко от тли о́наго, спаси́.

Любо́вь Тебе́ в Вифа́нию Го́споди отведе́ к Ла́зарю, / и сего́ уже́ смердя́ща воскреси́л еси́ я́ко Бог, / и от уз а́довых спасл еси́.

Ма́рфа у́бо отча́яшеся Ла́заря, я́ко ви́де четверодне́вна, / Христо́с же истле́вшаго воскреси́ я́ко Бог, / и к жи́зни преста́ви глаго́лом.

Иный, Иоанна монаха. Глас тойже.

Ирмос: Очи́сти мя, Спа́се:

Бог сый и́стинный, Ла́зарево ве́дал еси́ успе́ние, / и сие́ ученико́м Твои́м провозвести́л еси́, / уверя́я Влады́ко Божества́ Своего́ неопреде́льное де́йство.

Пло́тию опи́сан сый Неопи́санный, в Вифа́нию прише́д, / я́ко Челове́к Влады́ко слези́ши над Ла́зарем, / я́ко Бог же хотя́ воскреша́еши четверодне́внаго.

Катавасия: Очи́сти мя, Спа́се, / мно́га бо беззако́ния моя́, / и из глубины́ зол возведи́, молю́ся, / к Тебе́ бо возопи́х, / и услы́ши мя, / Бо́же спасе́ния моего́.

Кондак, глас 2. Подобен: Вы́шних ища́:

Всех ра́дость Христо́с, / И́стина, Свет, Живо́т и ми́ра Воскресе́ние, / су́щим на земли́ яви́ся Свое́ю бла́гостию, / и бысть о́браз Воскресе́ния, / всем подая́ Боже́ственное оставле́ние.

Икос: Ученико́м Созда́тель всех предвеща́, глаго́ля: / бра́тия и зна́емии, наш друг у́спе, / си́ми предглаго́ля и уча́, я́ко вся ве́си, я́ко Созда́тель всех. / И́дем у́бо, и уви́дим стра́нное погребе́ние, / и рыда́ние Мари́ино, и Ла́зарев гроб у́зрим, / та́мо бо хощу́ чудоде́йствовати, / соверша́я Креста́ предначина́ние, / и всем подая́ Боже́ственное оставле́ние.

Синаксарий.

Песнь 7.

Ирмос: О́троцы евре́йстии в пещи́ / попра́ша пла́мень дерзнове́нно, / и на ро́су огнь преложи́ша, вопию́ще: / благослове́н еси́ Го́споди Бо́же во ве́ки.

Прослези́вся я́ко челове́к Ще́дре, / воскреси́л еси́ я́ко Бог су́щаго во гро́бе, / и разре́шся от а́да Ла́зарь взыва́ше: / благослове́н еси́ Го́споди Бо́же во ве́ки.

Изы́де пово́йми обвя́зан, / про́пасти а́да же и тьмы убе́г Влады́чним сло́вом, Ла́зарь взыва́я: / благослове́н еси́ Го́споди Бо́же во ве́ки.

Иный.

Ирмос: От Иуде́и доше́дше:

Над дру́гом прослези́вся, Ма́рфины Ще́дре сле́зы утоли́л еси́, / и стра́стию во́льною отъя́л еси́ от лица́ люде́й Твои́х вся́кую сле́зу: / оте́ц на́ших Бо́же благослове́н еси́.

Живота́ сокро́вище, ме́ртваго я́ко от сна Спа́се воздви́гл еси́, / и сло́вом а́дову утро́бу расто́ргнув, воскреси́л еси́ пою́ща: / оте́ц на́ших Бо́же благослове́н еси́.

Мертвеца́ смердя́ща, свя́зана пово́йми, Влады́ко, воздви́гнул еси́, / и мене́ свя́занаго плени́цами прегреше́ний, возста́ви пою́ща: / оте́ц на́ших Бо́же благослове́н еси́.

Катавасия: От Иуде́и доше́дше, о́троцы / в Вавило́не иногда́ / ве́рою Тро́ическою пла́мень пе́щный попра́ша, пою́ще: / отце́в Бо́же, благослове́н еси́.

Песнь 8.

Ирмос: Мусики́йским орга́ном согласу́ющим, / и лю́дем безчи́сленным, покланя́ющимся о́бразу в Деи́ре, / три о́троцы не повину́вшеся, / Го́спода воспева́ху, / и славосло́вляху во вся ве́ки.

Я́ко Па́стырь а́гнца взыска́л еси́, / от во́лка лю́таго губи́теля восхи́тив, / растле́вша обнови́л еси́, пою́ща Тебе́: / по́йте и превозноси́те во вся ве́ки.

Я́ко Челове́к гро́ба взыска́л еси́, / ме́ртваго я́ко Соде́тель воскреси́л еси́, / повеле́нием Твои́м Влады́чним, Его́же ад ужасе́ся, / вопию́ща Тебе́: по́йте и превозноси́те во вся ве́ки.

Иный.

Ирмос: Царя́ Небе́снаго:

Вопроша́еши у́бо я́ко Челове́к, / яко Бог же воскреша́еши сло́вом четверодне́внаго. / Те́мже Тя пое́м и превозно́сим во вся ве́ки.

Тебе́ благоразу́мно Влады́ко, я́коже до́лжное / Мари́я приноша́ет ми́ро, / воспева́ющи во вся ве́ки.

Призыва́еши у́бо я́ко Челове́к Отца́, / я́ко Бог же Ла́заря воздвиза́еши. / Те́мже Тя пое́м Христе́ во ве́ки.

Хва́лим, благослови́м, покланя́емся Го́сподеви, пою́ще, и превознося́ще во вся ве́ки.

Катавасия: Царя́ Небе́снаго, / Его́же пою́т во́и Áнгельстии, / хвали́те и превозноси́те во вся ве́ки.

Честнейшая не стихословится.

Песнь 9.

Ирмос: Чи́стую сла́вно почти́м, лю́дие, Богоро́дицу, / огнь Божества́ прии́мшую во чре́ве неопа́льно, / пе́сньми велича́ем.

Лю́дие ви́девше ходя́ща мертвеца́ четверодне́вна, / удиви́вшеся чудеси́, вопия́ху Изба́вителю, / Бо́га Тя в пе́снех велича́юще.

Предуверя́я сла́вное воста́ние Твое́, о Спа́се мой, / ме́ртва четверодне́вна, из а́да свобожда́еши Ла́заря, / пе́сньми Тя велича́юща.

Иный.

Ирмос: Вои́стинну Богоро́дицу:

Почита́я Твоего́ Отца́, и показу́я, я́ко не богопроти́вен еси́, / моли́тву де́еши Христе́, / самовла́стно воздви́г четверодне́внаго.

Из гро́ба четверодне́внаго Ла́заря воздвиза́еши, / тридне́внаго Христе́ Твоего́ воста́ния, / всеи́стиннаго всем показу́я сведе́теля.

Хо́диши, и слези́ши, веща́еши же Спа́се мой, / челове́ческое показу́я Твое́ де́йство, / Боже́ственное же явля́я, воздвиза́еши Ла́заря.

Соде́ял еси́ неизрече́нно, Влады́ко Спа́се мой, / по обою́ двою́ Твое́ю естеству́, / самовла́стною во́лею спасе́ние мое́.

Катавасия: Вои́стинну Богоро́дицу, / Тя испове́дуем, / спасе́ннии Тобо́ю, Де́во Чи́стая, / с Безпло́тными ли́ки Тя велича́юще.

Таже на глас 1: Свят Госпо́дь Бог наш. Трижды.

Ексапостиларий самогласен, дважды.

Сло́вом Твои́м, Сло́ве Бо́жий, / Ла́зарь ны́не возска́чет к житию́ па́ки поте́к, / и с ве́твьми лю́дие Тя держа́вне почита́ют, / я́ко в коне́ц погуби́ши ад сме́ртию Твое́ю.

Слава, и ныне, ин. Подобен, единожды:

Ла́зарем тя Христо́с уже́ разруша́ет сме́рте, / и где твоя́ а́де побе́да? / Вифа́нии плач ны́не на тебе́ преставля́ется, / вси ве́тви побе́ды Тому́ принесе́м.

На хвалитех поставим стихов 8, и поем стихииры самогласны, глас 1.

Стих: Сотвори́ти в них суд напи́сан: / сла́ва сия́ бу́дет всем преподо́бным Его́.

Воскресе́ние и жизнь челове́ком сый Христе́, / гро́бу Ла́зареву предста́л еси́, / уверя́я нам два существа́ Твоя́ Долготерпели́ве, / я́ко Бог и Челове́к / от Чи́стыя Де́вы прише́л еси́. / Я́коже бо Челове́к вопроша́л еси́: где погребе́ся? / И я́коже Бог воскреси́л еси́ / живоно́сным манове́нием четверодне́внаго.

Ла́заря уме́рша четверодне́внаго / воскреси́л еси́ из а́да Христе́, пре́жде Твоея́ сме́рти, / потря́с сме́ртную держа́ву, / и еди́нем люби́мым, всех челове́к провозвеща́яй из тли свобожде́ние. / Те́мже покланя́ющеся Твое́й всеси́льней вла́сти вопие́м: / благослове́н еси́ Спа́се, поми́луй нас.

Ма́рфа и Мари́я Спа́су глаго́ласте: / а́ще бы зде был еси́ Го́споди, / не бы у́мерл Ла́зарь: / Христо́с же воскресе́ние усо́пших, / сего́ уже́ четверодне́внаго из ме́ртвых воскреси́. / Прииди́те вси ве́рнии, / Сему́ поклони́мся гряду́щему во сла́ве, / спасти́ ду́ши на́ша.

Божества́ Твоего́ Христе́, подава́я ученико́м Твои́м о́браз, / в наро́дех смиря́л еси́ Себе́, утаи́тися хотя́. / Те́мже апо́столом я́ко прове́дец Бог, / Ла́зареву смерть предре́кл еси́. / В Вифа́нии же прису́тствуяй лю́дем, / дру́га Твоего́ гро́ба не неве́дый, / уве́дети вопроша́л еси́ я́ко Челове́к. / Но Тобо́ю четверодне́вен воскресы́й, / Боже́ственную Твою́ держа́ву яви́, / всеси́льне Го́споди сла́ва Тебе́.

Глас 4: Четверодне́вна воздви́гл еси́ дру́га Твоего́ Христе́, / и Ма́рфино и Мари́ино рыда́ние утоли́л еси́: / показу́я всем, я́ко Ты еси́ вся соверша́яй Боже́ственною си́лою, / самовла́стным хоте́нием. / Ему́же херуви́ми вопию́т непреста́нно: / оса́нна в вы́шних, / благослове́н еси́ над все́ми Бо́же, сла́ва Тебе́.

Ма́рфа Мари́и вопия́ше: / Учи́тель предстои́т, и глаша́ет тя, приступи́. / Она́ же ско́ро прише́дши, иде́же бе стоя́ Госпо́дь, / и ви́девши возопи́, па́дши поклони́ся, / пречи́стеи но́зе Твои́ облобыза́ющи, глаго́лаше: / Го́споди, а́ще бы еси́ зде был, / не бы у́бо у́мерл брат наш.

Глас 8: Стих: Воскресни́ Го́споди Бо́же мой, да вознесе́тся рука́ Твоя́, не забу́ди убо́гих Твои́х до конца́.

Ла́заря уме́рша в Вифа́нии, / воздви́гл еси́ четверодне́вна: / то́кмо бо преста́л еси́ гро́бу, / глас живо́т уме́ршему бысть, / и воздохну́в ад отреши́ стра́хом. / Ве́лие чу́до, многоми́лостиве / Го́споди сла́ва Тебе́.

Стих: Испове́мся Тебе́ Го́споди, всем се́рдцем мои́м, пове́м вся чудеса́ Твоя́.

Я́коже рекл еси́ Го́споди Ма́рфе: / Аз есмь Воскресе́ние, / де́лом сло́во испо́лнил еси́, / из а́да воззва́в Ла́заря. / И мене́ Человеколю́бче ме́ртва страстьми́, / я́ко сострада́телен воскреси́, молю́ся.

Слава, глас 2:

Ве́лие и пресла́вное чу́до соверши́ся днесь, / я́ко мертвеца́ четверодне́внаго, / из гро́ба Христо́с возгласи́в воздви́же, и дру́га призва́: / славосло́вим Его́ я́ко пресла́вна, / да моли́твами пра́веднаго Ла́заря / спасе́т ду́ши на́ша.

И ны́не: Преблагослове́нна еси́, Богоро́дице Де́во:

Таже, Славословие великое, и отпуст.

НА ЛИТУРГИИ

Блаженна, песнь 3-я и 6, на 8. По входе тропарь празднику. Сла́ва, и ны́не, кондак.

Вместо Трисвятаго поем: Ели́цы во Христа́ крести́стеся, / во Христа́ облеко́стеся, аллилу́ия. (3)

Прокимен, глас 3:

Госпо́дь просвеще́ние мое́, и Спаси́тель мой, / кого́ убою́ся? Стих: Госпо́дь защи́титель живота́ моего́, от кого́ устрашу́ся?

Апостол ко Евреом, зачало 333, от полу.

Бра́тие, ца́рство непоколеби́мо прие́млюще, да и́мамы благода́ть, éюже слу́жим благоуго́дно Бо́гу с благогове́нием и стра́хом, и́бо Бог наш oгнь пояда́яй eсть.

Братолю́бие да пребыва́ет. Страннолю́бия не забыва́йте, тем бо не ве́дяще не́цыи странноприя́ша а́нгелы. Помина́йте ю́зники, а́ки с ни́ми свя́зани: озлобля́eмыя, а́ки и са́ми су́ще в те́ле. Честна́ жени́тва во всех, и ло́же нескве́рно: блуднико́м же и прелюбоде́eм су́дит Бог. Не сребролю́бцы нра́вом, дово́льни су́щими. Той бо рече́: не и́мам тебе́ оста́вити, ниже́ и́мам от тебé отступи́ти. Я́ко дерза́ющим нам глаго́лати: Госпо́дь мне помо́щник, и не убою́ся, что сотвори́т мне челове́к?

Помина́йте наста́вники ва́ша, и́же глаго́лаша вам сло́во Бо́жие, и́хже взира́юще на сконча́ние жи́телства, подража́йте ве́ре их. Иису́с Христо́с вчера́ и днесь, То́йже и во ве́ки.

Аллилуиа, глас 5:

Стих: Госпо́дь воцари́ся, в ле́поту облече́ся. Стих: И́бо утверди́ вселе́нную, я́же не подви́жится.

Евангелие от Иоанна, зачало 39.

Во вре́мя о́но, бе не́кто боля́ Ла́зарь от Вифа́нии, от ве́си Мари́ины и Ма́рфы сестры́ eя́. Бе же Мари́я пома́завшая Го́спода ми́ром и оте́рши но́зе Eго́ власы́ свои́ми, eя́же брат Ла́зарь боля́ше. Посла́сте у́бо сeстре́ к Нему́, глаго́люще: Го́споди, се, eго́же лю́биши, боли́т. Слы́шав же Иису́с рече́: сия́ боле́знь несть к сме́рти, но о сла́ве Бо́жии, да просла́вится Сын Бо́жий eя́ ра́ди. Любля́ше же Иису́с Ма́рфу, и сестру́ eя́, и Ла́заря. Егда́ же услы́ша, я́ко боли́т, тогда́ пребы́сть на не́мже бе ме́сте два дни. Пото́м же глаго́ла ученико́м: и́дем во Иуде́ю па́ки. Глаго́лаша Eму́ ученицы́: Равви́, ны́не иска́ху Тебе́ ка́мением поби́ти Иудеe, и па́ки ли и́деши та́мо? Отвеща́ Иису́с: не два ли на́десяте часа́ eста́ во дне? А́ще кто хо́дит во дне, не по́ткнется, я́ко свет ми́ра сего́ ви́дитъ: А́ще кто хо́дит в нощи́, по́ткнется, я́ко несть све́та в нем. Сия́ рече́, и посе́м глаго́ла им: Ла́зарь друг наш у́спе, но иду́, да возбужу́ eго́. Ре́ша же ученицы́ Eго́: Го́споди, а́ще у́спе, спасе́н бу́дет. Рече́ же Иису́с о сме́рти eго́, oни́ же мне́ша, я́ко о успе́нии сна глаго́лет. Тогда́ рече́ им Иису́с не обину́яся: Ла́зарь у́мре: И ра́дуюся вас ра́ди, да ве́руете, я́ко не бех та́мо, но и́дем к нему́. Рече́ же Фома́, глаго́лемый Близне́ц, ученико́м: и́дем и мы, да у́мрем с Ним. Прише́д же Иису́с, обре́те eго́ четы́ре дни уже́ иму́ща во гро́бе. Бе же Вифа́ния близ Иерусали́ма я́ко ста́дий пятьна́десять, И мно́зи от Иудéй бя́ху пришли́ к Ма́рфе и Мари́и, да уте́шат их о бра́те eю́. Ма́рфа же eгда́ услы́ша, я́ко Иису́с гряде́т, сре́те Eго́, Мари́я же до́ма седя́ше. Рече́ же Ма́рфа ко Иису́су: Го́споди, а́ще бы зде был, не бы брат мой у́мерл. Но и ны́не вем, я́ко eли́ка а́ще про́сиши от Бо́га, даст Тебе́ Бог. Глаго́ла eй Иису́с: воскре́снет брат твой. Глаго́ла Eму́ Ма́рфа: вем, я́ко воскре́снет в воскреше́ние, в после́дний день. Рече́ же eй Иису́с: Аз eсмь воскреше́ние и живо́т, ве́руяй в Мя, а́ще и у́мрет, оживе́т. И всяк живы́й, и ве́руяй в Мя, не у́мрет во ве́ки. Е́млеши ли ве́ру сему́? Глаго́ла Eму́: eй, Го́споди, аз ве́ровах, я́ко Ты eси́ Христо́с Сын Бо́жий, и́же в мир гряды́й. И сия́ ре́кши, и́де и пригласи́ Мари́ю сестру́ свою́, тай, рекши: Учи́тель прише́л eсть, и глаша́ет тя. Oна́ же я́ко услы́ша, воста́ ско́ро, и и́де к Нему́. Не уже́ бо бе прише́л Иису́с в весь, но бе на месте, идеже срете Eго Ма́рфа. Иуде́e же у́бо су́щии с не́ю в дому́, и утеша́юще ю́, ви́девше Мари́ю, я́ко ско́ро воста́ и изы́де, по ней идо́ша, глаго́люще, я́ко и́дет на гроб, да пла́чет та́мо. Мари́я же я́ко прии́де, иде́же бе Иису́с, ви́девши Eго́, паде́ Eму́ на но́гу, глаго́лющи Eму́: Го́споди, а́ще бы eси́ был зде, не бы у́мерл мой брат. Иису́с же, я́ко ви́де ю́ пла́чущуся, и прише́дшия с не́ю Иудéи пла́чуща, запрети́ ду́ху, и возмути́ся Сам. И рече́: где положи́сте eго́? Глаго́лаша Eму́: Го́споди, прииди́ и виждь. Прослези́ся Иису́с. Глаго́лаху у́бо жи́дове: виждь, ка́ко любля́ше eго́. Не́цыи же от них ре́ша: не можа́ше ли Сей, отве́рзый óчи слепо́му, сотвори́ти, да и сей не у́мрет? Иису́с же па́ки претя́ в Себе́, прии́де ко гро́бу. Бе же пеще́ра, и ка́мень лежа́ше на ней. Глаго́ла Иису́с: возьми́те ка́мень. Глаго́ла Eму́ сестра́ уме́ршаго Ма́рфа: Го́споди, уже́ смерди́т, четверодне́вен бо eсть. Глаго́ла eй Иису́с: не рех ли ти, я́ко а́ще ве́руеши, у́зриши сла́ву Бо́жию? Взя́ша у́бо ка́мень, иде́же бе уме́рый лежа́. Иису́с же возве́д óчи горе́, и рече́: Óтче, хвалу́ Тебе́ воздаю́, я́ко услы́шал eси́ Мя. Аз же ве́дех, я́ко всегда́ Мя послу́шаеши, но наро́да ра́ди стоя́щаго о́крест рех, да ве́ру и́мут, я́ко Ты Мя посла́л eси́. И сия́ рек, гла́сом вели́ким воззва́: Ла́заре, гряди́ вон. И изы́де уме́рый, обя́зан рука́ма и нога́ма укро́ем, и лице́ eго́ убру́сом обя́зано. Глаго́ла им Иису́с: разреши́те eго́, и оста́вите ити́. Мно́зи у́бо от Иудéй прише́дшии к Мари́и и ви́девше, я́же сотвори́ Иису́с, ве́роваша в Него́.

Причастен:

Из уст младе́нец, и ссу́щих соверши́л еси́ хвалу́. Аллилу́иа, трижды.

На трапезе учреждаемся варением со елеем, аще же и икру имамы, да дастся коемуждо брату по три онгии, и вино пием.

Подобает ведати: Аще храм праведнаго Лазаря: по обычной кафисме полиелей: Величание святительское, и псалом: Услы́шите сия́ вси язы́цы: Таже седален иже по 3-й песни. И житие святаго Лазаря, от Никифора Ксанфопула написанно. Степенна, антифон 1-й, 4-го гласа. Прокимен: Честна́ пред Го́сподем: Стих: Что возда́м Го́сподеви: Вся́кое дыха́ние: Евангелие от Иоанна, зачало 36: Аз есмь дверь: псалом 50. Стихира, глас 6: Го́споди, глас Твой разруши́: Каноны два, на 14: и катавасия 2-го канона. По 3-й песни седален праздника. По 6-й песни кондак: Всех ра́дость: И икос. И прочее последование якоже указася.

В НЕДЕЛЮ ЦВЕТОНОСИЯ

В СУББОТУ ВАИЙ НА МАЛЕЙ ВЕЧЕРНИ

Поставим стихи 4, и поем настоящия стихиры. Глас 6: Подобен: Тридне́вно:

От незло́бивых младе́нец Христе́, / на жребя́ти седя́ прия́л еси́ побе́дную песнь, гряды́й ко стра́сти: / трисвяты́м пе́нием от А́нгел воспева́емый.

Се Царь твой Сио́не, / кро́ток и спаса́яй гряде́т на жребя́ти, / враги́ взыску́яй порази́ти в кре́пости: / ра́дуйся и красу́йся с ва́ием пра́зднующи.

Воспле́щим согла́сно ве́рнии, / ве́тви доброде́телей и мы, я́ко о́троцы / ны́не принося́ще Христу́, / и сему́ Боже́ственных дел распростре́м одея́ния, / и та́инственно Сего́ прии́мем.

Ва́иа доброде́телей бра́тие, / принесе́м Христу́ Бо́гу гряду́щему, / нас ра́ди челове́чески пострада́ти во́лею, / Божества́ кре́постию всем безстра́стие дарова́ти.

Слава, и ныне, подобен тойже: На плеща́х херуви́мских я́ко Бог носи́мый, / седа́ет на жребя́, / нас ра́ди на снедь гряды́й хоте́нием: / прииди́те усе́рдно Сего́ с ва́ием воспои́м.

На стиховне, глас 2: Подобен: До́ме Евфра́фов:

Светли́ся Сио́не / но́вый ва́ием, / воспева́й со о́троки, / се Царь твой спаса́яй / к стра́сти гряде́т.

Стих: Из уст младе́нец и ссу́щих соверши́л еси́ хвалу́.

Весели́теся / Ада́ме и Е́во, / с проро́ки, / се призва́ти вас стра́стию, / Госпо́дь прихо́дит.

Стих: Го́споди Госпо́дь наш, я́ко чудно и́мя Твое́ по всей земли́.

Горе́ со Отце́м, и Ду́хом, / а́нгельскую Прие́мый песнь, / обнищава́ет стра́нно до́ле, / и о́троческую песнь / прие́млет.

Слава, и ныне, подобен тойже: Пою́ Твое́ стра́шное / смотре́ние стра́хом, / е́же оса́нна взыва́ю Тебе́: / мене́ бо гряде́ши спасти́, / благослове́нный Го́споди.

Ны́не отпуща́еши: Трисвятое. И прочее якоже обычай.

И тропари, глас 1:

О́бщее воскресе́ние / пре́жде Твоея́ Стра́сти уверя́я, / из ме́ртвых воздви́гл еси́ Ла́заря, Христе́ Бо́же. / Те́мже и мы, я́ко о́троцы побе́ды зна́мения нося́ще, / Тебе́ победи́телю сме́рти вопие́м: / оса́нна в вы́шних, / благослове́н Гряды́й во и́мя Госпо́дне.

И другий, глас 4:

Спогре́бшеся Тебе́ креще́нием, Христе́ Бо́же наш, / безсме́ртныя жи́зни сподо́бихомся Воскресе́нием Твои́м, / и воспева́юще зове́м: / оса́нна в вы́шних, / благослове́н Гряды́й во и́мя Госпо́дне.

И бывает отпуст. И входим в трапезу.

В СУББОТУ ВАИЙ ВЕЧЕРА

На Велицей вечерни, по предначинательном псалме, обычное стихословие. Блаже́н муж: кафисма вся. На Го́споди воззва́х, поставим стихов 10. И поем стихиры самогласны 5, повторяюще я.

Глас 6:

Днесь благода́ть Свята́го Ду́ха нас собра́, / и вси взе́мше крест Твой глаго́лем, / благослове́н Гряды́й во и́мя Госпо́дне, / оса́нна в вы́шних. [Дважды.]

Име́яй престо́л не́бо, и подно́жие зе́млю, / Бо́га Отца́ Сло́во и Сын соприсносу́щный, / на жребя́ти безслове́снем смири́ся днесь, в Вифа́нию прише́д. / Те́мже де́ти евре́йския, / ве́тви рука́ми держа́ще, хва́ляху гла́сом: / оса́нна в вы́шних, / благослове́н гряды́й Царь Изра́илев. [Дважды.]

Прииди́те и мы днесь весь но́вый Изра́иль, / я́же от язы́к Це́рковь, / со проро́ком Заха́риею возопии́м: / ра́дуйся зело́ дщи Сио́нова, / пропове́дуй дщи Иерусали́мова: / я́ко се Царь твой гряде́т тебе́ кро́ток и спаса́яй, / и все́дый на жребя́ о́сле, сы́на подъяре́мнича: / пра́зднуй я́же дете́й, ве́тви рука́ми держа́щи похвали́: / оса́нна в вы́шних, / благослове́н гряды́й Царь Изра́илев. [Дважды.]

Честно́е воскресе́ние Твое́ прообразу́я нам, / воздви́гл еси́ уме́ршаго повеле́нием Твои́м, / бездыха́ннаго Ла́заря дру́га Бла́же, / из гро́ба четверодне́вна смердя́ща. / Те́мже и на жребя́ возше́д обра́зно, / я́коже на колесни́це носи́мь, / язы́ки укротева́я Спа́се. / Сего́ ра́ди и хвале́ние прино́сит возлю́бленный Изра́иль / из уст ссу́щих, и младе́нец незло́бивых, / зря́щих Тя Христе́, входя́ща во святы́й град, / пре́жде шести́ дней Па́схи. [Дважды.]

Пре́жде шести́ дней Па́схи прии́де Иису́с во Вифа́нию, / и приступи́ша к нему́ ученицы́ Его́, глаго́люще Ему́: / Го́споди, где хо́щеши, угото́ваем Ти я́сти Па́сху. / Он же посла́ их: / иди́те в пре́днюю весь, / и обря́щете челове́ка, скуде́ль воды́ нося́ща: / после́дуйте ему́, и до́му влады́це рцы́те: / Учи́тель глаго́лет, / у тебе́ сотворю́ Па́сху со ученики́ Мои́ми. [Дважды.]

Слава, 1-ю стихиру: Днесь благода́ть Свята́го Ду́ха:

И ныне, паки тойже.

Вход. Свете тихий. Прокимен: Госпо́дь воцари́ся, в ле́поту облече́ся.

Бытия чтение. [Глава 49, ст. 1 – 12.]

Призва́ Иа́ков сы́ны своя́, и рече́ им: собери́теся, да возвещу́ вам, что сря́щет вас в после́дния дни. Собери́теся, и послу́шайте мене́ сы́нове Иа́ковли: послу́шайте Изра́иля, послу́шайте отца́ ва́шего. Иу́до, тебе́ похва́лят бра́тия твоя́: ру́це твои́ на плещу́ враг твои́х: покло́нятся тебе́ сы́нове отца́ твоего́. Ски́мен львов Иу́да, от ле́торасли сы́не мой возше́л еси́: возле́г усну́л еси́ я́ко лев, и я́ко ски́мен, кто возбу́дит его́? Не оскуде́ет князь от Иу́ды, и вождь от чресл его́, до́ндеже прии́дут отложе́ная ему́: и той ча́яние язы́ков. Привязу́яй к лозе́ жребя́ свое́, и к ви́нничию жребца́ осля́те своего́: испере́т вино́м оде́жду свою́, и кро́вию гро́здия одея́ние свое́. Радостотво́рны о́чи его́ па́че вина́, и белы́ зу́бы его́ па́че млека́.

Пророчества Софониева чтение. [Глава 3, ст. 14 – 19.]

Та́ко глаго́лет Госпо́дь: ра́дуйся дщи Сио́нова зело́, пропове́дуй дщи Иерусали́мова, весели́ся и преукраша́йся от всего́ се́рдца твоего́, дщи Иерусали́мля. Отъя́т Госпо́дь непра́вды твоя́, и изба́вил тя есть из руки́ враг твои́х: воцари́тся Госпо́дь посреде́ тебе́, и не у́зриши зла ктому́. Во вре́мя о́но рече́т Госпо́дь Иерусали́му: дерза́й Сио́не, да не ослабе́ют ру́це твои́. Госпо́дь Бог твой в тебе́, Си́льный спасе́т тя: наведе́т на тя весе́лие, и обнови́т тя в любви́ Свое́й, и возвесели́тся о тебе́ во украше́нии, я́ко в день пра́здника. И соберу́ сотре́ныя твоя́: го́ре, кто прии́мет нань поноше́ние? Се Аз сотворю́ в тебе́, тебе́ ра́ди, глаго́лет Госпо́дь, во вре́мя о́но, и спасу́ утисне́нную, и отринове́нную прииму́, и положу́ я в похвале́ние, и имени́ты по всей земли́.

Пророчества Захариина чтение. [Глава 9, ст. 9 – 15.]

Та́ко глаго́лет Госпо́дь: ра́дуйся зело́ дщи Сио́ня, пропове́дуй дщи Иерусали́мля, се Царь твой гряде́т тебе́ пра́веден и спаса́яй, Той кро́ток, и всед на подъяре́мника и жребца́ ю́на. И потреби́т колесни́цы от Ефре́ма, и ко́ни от Иерусали́ма, и потреби́т лук бра́нный, и мно́жество, и мир от язы́ков: и облада́ет вода́ми от мо́ря до мо́ря, и от рек до исхо́дищ земли́. И ты в кро́ви заве́та твоего́, испусти́л еси́ у́зники твоя́ от ро́ва не иму́ща воды́. Ся́дите в тверде́лех свя́зани со́нмища, и за еди́н день прише́льствия твоего́ сугу́бо возда́м ти. Зане́же напряго́х тя Себе́ Иу́до я́ко лук, испо́лних Ефре́ма, и воздви́гну ча́да твоя́ Сио́не на ча́да е́ллинска, и осяжу́ тя я́ко меч ра́тника. И Госпо́дь на них яви́тся, и изы́дет я́ко мо́лния стрела́ его́: и Госпо́дь Бог Вседержи́тель в трубу́ востру́бит, и по́йдет в шу́ме преще́ния Своего́. Госпо́дь Вседержи́тель защити́т их.

На литии стихиры самогласны, глас 1:

Всесвяты́й Дух, / апо́столы научи́вый глаго́лати ины́ми стра́нными язы́ки, / Той де́тем евре́йским неискусозло́бным повелева́ет зва́ти: / оса́нна в вы́шних, / благослове́н гряды́й Царь Изра́илев.

Собезнача́льный и соприсносу́щный, / Сын и Сло́во О́тчее, / на жребя́ти безслове́сном седя́, / прии́де днесь во град Иерусали́м, / Его́же херуви́ми со стра́хом зре́ти не мо́гут, / де́ти восхвали́ша, с ва́ием и ве́твьми, / хвалу́ та́инственно воспева́юще: / оса́нна в вы́шних, оса́нна Сы́ну Дави́дову, / прише́дшему спасти́ от пре́лести весь род наш.

Пре́жде шести́ дней Па́схи, / глас Твой услы́шася Го́споди, во глубина́х а́довых: / те́мже и Ла́заря четверодне́вна воздви́гл еси́. / Де́ти же евре́йския взыва́ху: / оса́нна Бо́же наш, сла́ва Тебе́.

Глас 2: Входя́щу Ти Го́споди / во святы́й град, на жребя́ти седя́, / потща́лся еси́ приити́ на страсть, / да соверши́ши зако́н и проро́ки. / Де́ти же евре́йския воскресе́ния побе́ду предвозвеща́юще, / срета́ху Тя с ве́твьми и ва́ием, глаго́люще: / благослове́н еси́ Спа́се, поми́луй нас.

Сла́ва Тебе́ Христе́, / в вы́шних седя́щему на престо́ле, / и ны́не ча́емому с честны́м Твои́м Кресто́м. / Те́мже весели́тся дщи Сио́нова, / ра́дуются язы́цы земни́и, / ве́тви держа́т де́ти, ри́зы же ученицы́, / и вся вселе́нная научи́ся вопи́ти Тебе́: / благослове́н еси́ Спа́се, поми́луй нас.

Слава и ныне, глас 3:

Пре́жде шести́ дней бытия́ Па́схи, / прии́де Иису́с во Вифа́нию, / воззва́ти уме́рша четверодне́вна Ла́заря, / и пропове́дати воскресе́ние. / Срето́ша же его́ и жены́, / Ма́рфа и Мари́я сестры́ Ла́заревы, вопию́ще к Нему́: / Го́споди, а́ще бы еси́ был зде, не бы у́мерл брат наш. / Тогда́ глаго́ла к ним: / не предреко́х ли вам: ве́руяй в Мя, а́ще и у́мрет, жив бу́дет: / покажи́те ми, где положи́сте его́? / И вопия́ше к нему́ Зижди́тель всех: / Ла́заре, гряди́ вон.

И обычныя литии молитвы в паперти.

На стиховне стихиры самогласны, глас 8:

Ра́дуйся и весели́ся гра́де Сио́не, / красу́йся и ра́дуйся Це́ркве Бо́жия: / се бо Царь твой прии́де в пра́вде, / на жребя́ти седя́, от дете́й воспева́емый: / оса́нна в вы́шних, благослове́н еси́, / Име́яй мно́жество щедро́т, поми́луй нас.

Стих: Из уст младе́нец и ссу́щих соверши́л еси́ хвалу́.

Прии́де Спас днесь во град Иерусали́м, / испо́лнити Писа́ние, / и вси прия́ша в ру́ки ва́иа: / ри́зы же подстила́ху Ему́, / ве́дуще, я́ко Той есть Бог наш, / Ему́же херуви́ми вопию́т непреста́нно: / оса́нна в вы́шних, благослове́н еси́, / Име́яй мно́жество щедро́т поми́луй нас.

Стих: Го́споди Госпо́дь наш, я́ко чудно и́мя Твое́ по всей земли́.

На херуви́мех носи́мый, и пева́емый от серафи́м, / возсе́л еси́ на жребя́ Дави́дски Бла́же: / и де́ти Тя воспева́ху Боголе́пно, / иуде́е же ху́ляху беззако́нно: / стро́потное язы́ков, седа́лище жребца́ прообразова́ше, / из неве́рия в ве́ру претворя́емое. / Сла́ва Тебе́ Христе́, / еди́не Ми́лостиве и Человеколю́бче.

Слава, глас 6: Днесь благода́ть Свята́го Ду́ха нас собра́:

И ныне, паки тойже.

Ны́не отпуща́еши: Трисвятое, и прочее по обычаю. И глаголем тропарь отпустительный, глас 1: О́бщее воскресе́ние: Дважды. Ин тропарь, глас 4: Спогре́бшеся Тебе́: единожды. и Бу́ди и́мя Госпо́дне: 3. И псалом: Благословлю́ Го́спода: И предложится чтение. Слово торжественное праздника.

В НЕДЕЛЮ ЦВЕТОНОСИЯ. НА УТРЕНИ

На Бог Господь, тропаря оба: О́бщее воскресе́ние: дважды. Сла́ва, и ны́не: Спогре́бшеся Тебе́ креще́нием:

По 1-м стихословии седален, глас 4. Подобен: Удиви́ся Ио́сиф:

С ве́твьми у́мно очище́ни душа́ми, / я́коже де́ти Христа́ восхва́лим ве́рно, / велегла́сно зову́ще Влады́це: / благослове́н еси́ Спа́се в мир прише́дый, / спасти́ Ада́ма от дре́вния кля́твы, / духо́вно быв Человеколю́бче Но́вый Ада́м, я́коже благоволи́л еси́:/ вся Сло́ве к поле́зному устро́ивый, сла́ва Тебе́.

Слава, и ныне, иный седален, глас 4. Подобен: Яви́лся еси́:

Четверодне́вна Ла́заря от гро́ба возста́вивый Го́споди, / вся научи́л еси́ вопи́ти с ва́ием и ве́твьми Тебе́: / благослове́н еси́ Гряды́й.

И чтение во Евангелии толковом Иоанна Златоустаго.

По 2-м стихословии седален, глас 4. Подобен: Удиви́ся:

Над дру́гом Твои́м Христе́ сле́зы то́чиши та́йно, / и воздвиза́еши из ме́ртвых Ла́заря лежа́ща ме́ртва, / в не́мже сострада́ние показа́л еси́ человеколю́бно: / уве́девше же Твое́ прише́ствие Иису́се, / мно́жество младе́нец изыдо́ша днесь, в рука́х ва́иа держа́ще, / оса́нна Тебе́ взыва́юще: / благослове́н еси́, во е́же мир спасти́ Прише́дый.

Слава, и ныне, иный седален, глас 1. Подобен: Ка́мени запеча́тану:

Восхвали́те согла́сно лю́дие и язы́цы: / Царь бо а́нгельский взы́де ны́не на жребя́, / и гряде́т хотя́й на Кресте́ порази́ти враги́, я́ко си́лен. / Сего́ ра́ди и де́ти с ва́ием взыва́ют песнь: / сла́ва Тебе́ прише́дшему Победи́телю: / сла́ва Тебе́ Спа́су Христу́: / сла́ва Тебе́ благослове́нному, / еди́ному Бо́гу на́шему.

И чтение тогоже слова. Таже полиелей.

Величание:

Велича́ем Тя, / Живода́вче Христе́, / оса́нна в вы́шних, / и мы Тебе́ вопие́м: / благослове́н Гряды́й во и́мя Госпо́дне.

Псалом избранный:

Го́споди, Госпо́дь наш, я́ко чу́дно и́мя Твое́ по всей земли. / Я́ко взя́тся великоле́пие Твое́ превы́ше небес. / Из уст младе́нец и ссу́щих соверши́л еси́ хвалу́. / Враго́в Твои́х ра́ди, разруши́ши врага́ и ме́стника. / Запрети́л eси́ язы́ком, и поги́бе нечести́вый. / Ка́мень, его́же небрего́ша зи́ждущии, сей бысть во главу́ у́гла. / От Го́спода бысть сей, и есть ди́вен во очесе́х на́ших. / Госпо́дь в Сио́не вели́к, и высо́к есть над все́ми людьми́. / Та́мо сокруши́ кре́пости луко́в. / Слы́ша и возвесели́ся Сио́н, и возра́довашася дще́ри Иуде́йския. / Возвести́ти в Сио́не и́мя Госпо́дне, и хвалу́ Его́ во Иерусали́ме. / Я́ко Бог спасе́т Сио́на, и сози́ждутся гра́ди Иуде́йстии. / Тебе́ подоба́ет песнь, Бо́же, в Сио́не, и Тебе́ возда́стся моли́тва во Иерусали́ме. / Благослове́н гряды́й во и́мя Госпо́дне, Бог Госпо́дь, и яви́ся нам. / Соста́вите пра́здник во учаща́ющих до рог олтаре́вых. / Во дво́рех до́му Госпо́дня, посреде́ тебе́, Иерусали́ме. / Воцари́тся Госпо́дь во век, Бог твой, Сио́не, в род и род. / Хвала́ Его пребыва́ет в век ве́ка.

Сла́ва, и ны́не: Аллилу́ия (3).

И по полиелеи седален, глас 8. Подобен: Повеле́нное:

На престо́ле херуви́мсте, / и на жребя́ти возсе́д нас ра́ди, / и к стра́сти во́льней дости́г, днесь слы́шит дете́й возглаша́ющих, / оса́нна, наро́дов вопию́щих: / Сы́не Дави́дов, ускори́ спасти́, / и́хже созда́л еси́, благослове́нне Иису́се: / на сие́ бо прише́л еси́, / да разуме́ем сла́ву Твою́.

Сла́ва, и ны́не, паки тойже. И чтение творим о празднице, Слово кир Андреа Критскаго.

Таже, степенна, первый антифон 4-го гласа.

Прокимен, глас 4:

Из уст младе́нец и ссу́щих / соверши́л еси́ хвалу́. Стих: Го́споди Госпо́дь наш, я́ко чу́дно и́мя Твое́ по всей земли́. Вся́кое дыха́ние:

Евангелие от Матфеа, зачало 83.

Во вре́мя о́но, егда́ прибли́жися Иису́с во Иерусали́м, и приидо́ша в Виффаги́ю к горе́ Елео́нстей, тогда́ Иису́с посла́ два ученика́, глаго́ля и́ма: иди́та в весь, я́же пря́мо ва́ма, и а́бие обря́щета oсля́ привя́зано, и жребя́ с ним, отреши́вша приведи́та Ми. И а́ще ва́ма кто рече́т что, рече́та, я́ко Госпо́дь ею́ тре́бует: а́бие же по́слет я. Сие́ же все бысть, да сбу́дется рече́нное проро́ком, глаго́лющим: Рцы́те дще́ри Сио́нове, се Царь твой гряде́т тебе́ кро́ток, и всед на oсля́ и жребя́, сы́на подъяре́мнича. Ше́дша же ученика́ и сотво́рша, я́коже повеле́ и́ма Иису́с. Приведо́ста oсля́ и жребя́, и возложи́ша верху́ ею́ ри́зы своя́, и все́де верху́ их. Множа́йшии же наро́ди постила́ху ри́зы своя́ по пути́, друзи́и же ре́заху ве́тви от древ, и постила́ху по пути́. Наро́ди же предходя́щии (Ему́) и всле́дствующии зва́ху, глаго́люще: оса́нна Сы́ну Дави́дову, благослове́н Гряды́й во и́мя Госпо́дне, оса́нна в вы́шних. И вше́дшу Ему́ во Иерусали́м, потрясе́ся весь град, глаго́ля: кто есть Сей? Наро́ди же глаго́лаху: Сей есть Иису́с Проро́к, и́же от Назаре́та Галиле́йска.

Ви́девше же архиере́е и кни́жницы чудеса́, я́же сотвори́, и óтроки зову́ща в це́ркви, и глаго́люща: оса́нна Сы́ну Дави́дову, негодова́ша. И ре́ша Ему́: слы́шиши ли, что си́и глаго́лют? Иису́с же рече́ им: ей. Не́сте ли чли николи́же, я́ко изоу́ст младе́нец и ссу́щих соверши́л еси́ хвалу́? И оста́вль их, изы́де вон из гра́да в Вифа́нию, и водвори́ся ту.

Воскресе́ние Христо́во: не глаголем. Но абие псалом 50.

Таже иерей взем кадило, кадит крестообразно, глаголя молитву на благословение ваиа.

Диакон: Го́споду помо́лимся.

Мы же: Го́споди поми́луй.

Го́споди Бо́же наш, седя́й на херуви́мех, возста́вивый си́лу Твоего́ Сы́на, Го́спода на́шего Иису́са Христа́, да спасе́т мир Кресто́м, и погребе́нием, и воскресе́нием Свои́м. Его́же и ны́не прише́дша во Иерусали́м на во́льную страсть, лю́дие седя́щии во тьме, и се́ни сме́ртней, прие́мше воскресе́ния зна́мения, ве́тви древе́с, и ва́иа фи́ник, воскресе́ние зна́менующе срето́ша. Сам Влады́ко и нас по подража́нию о́нех, в предпра́зднственный сей день, ва́иа и ве́тви древе́с в рука́х нося́щих соблюди́ и сохрани́. Да я́коже о́нии наро́ди и де́ти оса́нна Тебе́ приноша́ху, и мы та́кожде в пе́снех и пе́ниих духо́вных, животворя́щаго и тридне́внаго Воскресе́ния дости́гнем, в то́мже Христе́ Иису́се Го́споде на́шем: с Ни́мже благослове́н еси́, с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.

Егда же целуют братия Евангелие, раздавает игумен ваиа.

Слава, глас 2: Днесь Христо́с вхо́дит / во град Вифа́нию, на жребя́ти седя́й, / безслове́сие разреша́я язы́к зле́йшее, / дре́вле свире́пеющее.

И ныне, паки тойже.

Таже, Поми́луй мя Бо́же: Стихира, глас 6: Днесь благода́ть Свята́го Ду́ха нас собра́: Посем молитва: Спаси́ Бо́же лю́ди: Го́споди поми́луй, 12.

И по возгласе, канон: ирмосы по дважды, тропари на 12. катавасия, ирмос, оба лика: Творение господина Космы, егоже краегранесие: Оса́нна Христо́с евлогиме́нос Фео́с. Глас 4.

Песнь 1.

{Ω} Ирмос: Яви́шася исто́чницы бе́здны, / вла́ги неприча́стны, / и откры́шася мо́ря волну́ющася основа́ния бу́рею, / ма́нием бо запрети́л еси́ ему́, / изря́дныя же лю́ди спасл еси́, / пою́щия побе́дную песнь Тебе́, Го́споди.

{Σ} Из уст младе́нец незло́бивых, и ссу́щих, / хвалу́ Твои́х раб соверши́л еси́, / разруши́ти супоста́та, / и отмсти́ти стра́стию Креста́, паде́ние дре́вняго Ада́ма, / дре́вом же воскреси́ти сего́, / пою́ща побе́дную песнь Тебе́ Го́споди.

{Α} Хвале́ние Це́рковь преподо́бных, / живу́щему в Сио́не, Тебе́ Христе́ прино́сит: / о Тебе́ же Изра́иль, Творце́ свое́м ра́дуется, / и го́ры язы́цы противообра́знии каменосерде́чнии, от лица́ Твоего́ возвесели́шася, / пою́ще побе́дную песнь Тебе́ Го́споди.

Катавасия: Яви́шася исто́чницы:

Песнь 3.

{Ν} Ирмос: Точа́щий, краесеко́мый повеле́нием Твои́м, / тве́рдый сса́ша Ка́мень изра́ильтестии лю́дие. / Ка́мень же Ты еси́ Христе́, и Жизнь, / на Не́мже утверди́ся Це́рковь, зову́щая: / оса́нна, благослове́н еси́, Гряды́й.

{Ν} Мертвеца́ четверодне́вна повеле́нием Твои́м, / из ме́ртвых с тре́петом ад испусти́ Ла́заря. / Воскресе́ние бо Ты Христе́ и жизнь, / в Не́мже утверди́ся Це́рковь зову́щи: / оса́нна, благослове́н еси́ Гряды́й.

{Α} Воспойте лю́дие боголе́пно в Сио́не, / и моли́тву воздади́те Христу́ во Иерусали́ме, / Сам гряде́т во сла́ве со о́бластию: / в Не́мже утверди́ся Це́рковь зову́щи: / оса́нна благослове́н еси́ Гряды́й.

Ипакои, глас 6:

С ве́твьми воспе́вше пре́жде, / с древесы́ последи́ я́ша Христа́ Бо́га, неблагода́рнии иуде́е. / Мы же ве́рою непрело́жною при́сно почита́юще / я́ко благоде́теля, вы́ну вопие́м Ему́: / благослове́н еси́, гряды́й Адама воззвати.

И чтение праздника.

Песнь 4.

{Χ} Ирмос: Христо́с гряды́й – я́вственно Бог наш, / прии́дет и не закосни́т, / от горы́ приосене́нныя ча́щи, / Отрокови́цы ражда́ющия Неискусому́жныя, / проро́к дре́вле глаго́лет. / Тем вси вопие́м: / сла́ва си́ле Твое́й, Го́споди.

{Ρ} Да то́чат весе́лие кре́пкое масти́тельное, го́ры, и вси хо́лми, / и древа́ дубра́вная да взыгра́ют: / Христа́ хвали́те язы́цы, / и Тому́ вси лю́дие ра́дующеся возопи́йте: / сла́ва си́ле Твое́й Го́споди.

{Ι} Кре́постию ца́рствуяй ве́ки Госпо́дь, облече́н прии́дет, / Сего́ красоты́ же и сла́вы, несравне́нно есть благоле́пие в Сио́не. / Те́мже вси вопие́м: / сла́ва си́ле Твое́й Го́споди.

{Σ} Пя́дию изме́ривый небо, дла́нию же зе́млю, / Госпо́дь прии́де, Сио́н бо избра́, / в не́мже жи́ти и ца́рствовати изво́ли, / и возлюби́ лю́ди ве́рно вопию́щия: / сла́ва си́ле Твое́й Го́споди.

Песнь 5.

{Τ} Ирмос: На го́ру Сио́н взы́ди, благовеству́яй, / и Иерусали́му пропове́дуяй, / в кре́пости вознести́ глас: / пресла́вная глаго́лашася о Тебе́, Гра́де Бо́жий. / Мир на Изра́иля, и спасе́ние язы́ком.

{Ο} В вы́шних седя́й на херуви́мех Бог, / и призира́яй на смире́нныя, / Той гряде́т во сла́ве со о́бластию, / и испо́лнятся вся́ческая Боже́ственныя хвалы́ Его́. / Мир на Изра́иля, и спасе́ние язы́ком.

{Σ} Сио́не Бо́жий, горо́ свята́я, и Иерусали́ме, / о́крест о́чи твои́ возведи́, и виждь / со́бранная ча́да твоя́ в тебе́: / се бо приидо́ша издале́ча, поклони́тися Царю́ твоему́. / Мир на Изра́иля, и спасе́ние язы́ком.

Песнь 6.

{Ε} Ирмос: Возопи́ша с весе́лием пра́ведных ду́си: / ны́не ми́ру Заве́т Но́вый завеща́ется, / и кропле́нием да обновя́тся лю́дие, Бо́жия кро́ве.

{Υ} Приими́ Изра́илю Бо́жие ца́рство, / и пребыва́яй во тьме, свет да у́зрит вели́кий, / и кропле́нием да обновя́тся лю́дие, / Боже́ственныя кро́ве.

{Λ} Разреше́ны своя́ ю́зники Сио́не испусти́, / и от ро́ва неве́дения безво́дна изведи́, / и кропле́нием да обновя́тся лю́дие, / Боже́ственныя кро́ве.

Кондак, самогласен, глас 6:

На престо́ле на Небеси́, / на жребя́ти на земли́ носи́мый, Христе́ Бо́же, / А́нгелов хвале́ние / и дете́й воспева́ние прия́л еси́, зову́щих Ти: / благослове́н еси́, Гряды́й Ада́ма воззва́ти.

Икос: Поне́же а́да связа́л еси́ Безсме́ртне, / и смерть умертви́л еси́, / и мир воскреси́л еси́, / с ва́иами младе́нцы восхваля́ху Тя Христе́, я́ко победи́теля, / зову́ще Ти днесь: оса́нна Сы́ну Дави́дову. / Не ктому́ бо, рече́, закла́ни бу́дут младе́нцы, за Младе́нца Мари́ина, / но за вся младе́нцы и ста́рцы, Еди́н распина́ешися. / Не ктому́ на нас вмести́тся меч: / Твоя́ бо ре́бра прободу́тся копие́м. / Те́мже ра́дующеся глаго́лем: / благослове́н гряды́й Ада́ма воззва́ти.

Синаксарий.

Песнь 7.

{Ο} Ирмос: Спасы́й во огни́ Авраа́мския Твоя́ о́троки, / и халде́и уби́в, / я́же Пра́вда пра́ведно уловля́ше, / препе́тый Го́споди, / Бо́же оте́ц на́ших, благослове́н еси́.

{Γ} Покланя́ющеся лю́дие, / и со ученики́ ра́дующеся, с ва́ием, / оса́нна Сы́ну Дави́дову зовя́ху: / препе́тый Го́споди Бо́же оте́ц, благослове́н еси́.

{Η} Неискусозло́бное мно́жество, еще́ младе́нствующее естество́, / Боголе́пно Тя Царю́ Изра́ильтеский и А́нгельский воспе́т: / препе́тый Го́споди Бо́же оте́ц, благослове́н еси́.

{Μ} С ва́ием Тя Христе́, ве́твьми похваля́ху мно́жества, / благослове́н прише́дый Царь веко́в. / Вопия́ху же: препе́тый Го́споди Бо́же оте́ц, благослове́н еси́.

Песнь 8.

{Ε} Ирмос: Весели́ся, Иерусали́ме, торжеству́йте лю́бящии Сио́на: / Ца́рствуяй бо во ве́ки Госпо́дь Сил прии́де. / Да благогове́ет вся земля́ от лица́ Его́, / и да вопие́т: / благослови́те вся дела́ Госпо́дня, Го́спода.

{Ν} На жребя́ мла́до всед Царь твой Сио́не, / предста́ Христо́с: безслове́сную бо и́дольскую пре́лесть разруши́ти, / и неудержа́нное стремле́ние уста́вити всех язы́к прии́де, во е́же пе́ти: / вся дела́ по́йте Го́спода.

{Ο} Бог твой, ра́дуйся Сио́не зело́, / воцари́ся во ве́ки Христо́с. / Сей, я́коже пи́сано есть, кро́ткий и спаса́яй, / пра́ведный Изба́витель наш, прии́де на жребя́ти, / ко́нское свире́пство уби́ти враго́в, не вопию́щих: / благослови́те вся дела́ Госпо́дня Го́спода.

{Σ} Оскудева́ет Боже́ственных огражде́ний, / законопресту́пное со́нмище непокори́вых, / поне́же дом моли́твы Бо́жия, верте́п сотвори́ша разбо́йническ, / от се́рдца Изба́вителя отри́нувше, Ему́же вопие́м: / благослови́те вся дела́ Госпо́дня Го́спода.

Честне́йшую не поем.

Песнь 9.

{Θ} Ирмос: Бог Госпо́дь, и яви́ся нам. / Соста́вите пра́здник, / и веселя́щеся прииди́те, возвели́чим Христа́, / с ва́иями и ве́твьми, пе́сньми зову́ще: / благослове́н Гряды́й во и́мя Го́спода Спа́са на́шего.

{Ε} Язы́цы вску́ю шата́етеся? / Пи́сменницы, и свяще́нницы, почто́ тще́тным поучи́стеся? / Кто Сей, ре́кше, / Ему́же де́ти с ва́ием и ве́твьми, пе́сньми зову́т: / благослове́н гряды́й во И́мя Го́спода Спа́са на́шего.

{Ο} Сей Бог наш, Ему́же никто́же подо́бен, / пра́ведный всяк путь изобре́т, даде́ возлю́бленному Изра́илю. / По сих же с челове́ки поживе́ я́влься: / благослове́н гряды́й во И́мя Го́спода Спа́са на́шего.

{Σ} Собла́зны стези́, что близ вас положи́сте непокори́вии?/ Но́ги ва́ша ско́ры кровь излия́ти Влады́чню, / но воскре́снет вся́ко спасти́ зову́щия: / благослове́н гряды́й во И́мя Го́спода Спа́са на́шего.

Светильна же не глаголем, но абие: Свят Госпо́дь Бог наш. Трижды, на глас 4.

На хвалитех поставим стихов 6, и поем стихиры самогласны 4, повторяюще два. Глас 4:

Мно́жество наро́да Го́споди, / постила́ху по пути́ ри́зы своя́: / друзи́и же ре́заху ве́тви от древе́с, и ноша́ху. / Предыду́щии же и после́дующии, зовя́ху глаго́люще: / оса́нна Сы́ну Дави́дову, / благослове́н еси́ прише́дый, / и па́ки гряды́й во и́мя Госпо́дне. [Дважды.]

Хотя́щу Тебе́ вни́ти во святы́й град Го́споди, / ве́тви садо́в лю́дие ноша́ху, / Тебе́ пою́ще всех Влады́ку: / и зря́ще Тя на жребя́ти седя́ща, / я́коже на херуви́мех зря́ху. / Сего́ ра́ди си́це вопия́ху: / оса́нна в вы́шних, / благослове́н еси́ прише́дый, / и па́ки гряды́й во и́мя Госпо́дне. [Дважды.]

Изыди́те язы́цы, изыди́те и лю́дие, / и ви́дите днесь Царя́ Небе́снаго, / я́ко на престо́ле высо́це, / на жребя́ти ху́де во Иерусали́м входя́ща. / Ро́де иуде́йский неве́рный и прелюбоде́йный, прииди́ и виждь, / Его́же ви́де Иса́иа во пло́ти нас ра́ди приити́ иму́ща, / ка́ко уневеща́ет Себе́, я́ко целому́дренный но́вый Сио́н, / и отлага́ет осужде́нную со́нмицу: / я́ко в нетле́нном же бра́це и нескве́рном, / нескве́рнии стеко́шася благохва́ляще, неискусозло́бнии де́ти. / С ни́миже и мы пою́ще возопие́м песнь а́нгельскую: / оса́нна в вы́шних, / Иму́щему ве́лию ми́лость.

О́бщее воскресе́ние, / пре́жде во́льныя стра́сти Твоея́, / во увере́ние всех предпоказа́вый Христе́ Бо́же, / Ла́заря у́бо в Вифа́нии, держа́вною си́лою Твое́ю, / четверодне́вна ме́ртва воскреси́л еси́: / слепце́м же е́же ви́дети я́ко Светода́вец дарова́л еси́ Спа́се, / и во святы́й град со ученики́ Твои́ми вшел еси́, / седя́ на жребя́ти о́сли, / проро́ческая исполня́яй пропове́дания, / я́коже на херуви́мех носи́мый, / и де́ти евре́йстии с ве́твьми и ва́иами предсрета́ху Тя. / Те́мже и мы ве́тви ма́сличныя нося́ще и ва́иа, / благода́рственно Тебе́ вопие́м: / оса́нна в вы́шних, / благослове́н гряды́й во И́мя Госпо́дне.

Слава, и ныне, глас 6:

Пре́жде шести́ дней Па́схи, прии́де Иису́с в Вифа́нию, / и приступи́ша к Нему́ ученицы́ Его́, глаго́люще Ему́: / Го́споди, где хо́щеши угото́ваем Ти я́сти Па́сху? / Он же посла́ их, / иди́те в пре́днюю весь, / и обря́щете челове́ка скуде́ль воды́ нося́ща, / сле́дуйте ему́, и до́му влады́це рцы́те: / Учи́тель глаго́лет, / у тебе́ сотворю́ Па́сху со ученики́ Мои́ми.

Славословие великое. И тропарь: О́бщее воскресе́ние: Таже ектении, и час первый, и оглашение, и обычный отпуст, и лития вне монастыря.

Отпуст:

И́же на жребя́ти о́сли се́сти изво́ливый, на́шего ра́ди спасе́ния, Христо́с, и́стинный Бог наш, моли́твами Пречи́стыя Своея́ Ма́тере, святы́х сла́вных и всехва́льных Апо́стол, и всех святы́х, поми́лует и спасе́т нас, я́ко Благ и Человеколю́бец.

НА ЛИТУРГИИ

Антифон 1, глас 2, псалом 114.

Возлюби́х, я́ко услы́шит Госпо́дь / глас моле́ния моего́. Припев: Моли́твами Богоро́дицы, Спа́се спаси́ нас.

Стих: 2: Я́ко приклони́ у́хо Свое́ мне, / и во дни моя́ призову́. / Моли́твами Богоро́дицы, Спа́се спаси́ нас.

Стих 3: Объя́ша мя боле́зни сме́ртныя, / беды́ а́довы обрето́ша мя. / Моли́твами Богоро́дицы, Спа́се спаси́ нас.

Стих 4: Скорбь и боле́знь обрето́х, / и и́мя Госпо́дне призва́х. / Моли́твами Богоро́дицы, Спа́се спаси́ нас.

Слава, и ныне: Моли́твами Богоро́дицы, Спа́се спаси́ нас.

Антифон 2, псалом 115.

Ве́ровах, те́мже возглаго́лах, / аз же смири́хся зело́. / Спаси́ ны Сы́не Бо́жий, / возсе́дый на жребя́, пою́щия Ти: / аллилу́иа.

Стих 2: Что возда́м Го́сподеви о всех, / я́же воздаде́ ми? / Спаси́ ны Сы́не Бо́жий:

Стих 3: Ча́шу спасе́ния прииму́, / и и́мя Госпо́дне призову́. / Спаси́ ны Сы́не Бо́жий:

Стих 4: Моли́твы моя́ Го́сподеви возда́м, / пред все́ми людьми́ Его́. / Спаси́ ны Сы́не Бо́жий:

Слава, и ныне: Единоро́дный Сы́не:

Антифон 3, глас 1, псалом 117:

Испове́дайтеся Го́сподеви я́ко благ, я́ко в век ми́лость Его́.

Тропарь, глас 1:

О́бщее воскресе́ние / пре́жде Твоея́ Стра́сти уверя́я, / из ме́ртвых воздви́гл еси́ Ла́заря, Христе́ Бо́же. / Те́мже и мы, я́ко о́троцы побе́ды зна́мения нося́ще, / Тебе́ победи́телю сме́рти вопие́м: / оса́нна в вы́шних, / благослове́н Гряды́й во и́мя Госпо́дне.

Стих 2: Да рече́т у́бо дом Изра́илев: я́ко благ, я́ко в век ми́лость Его́. / О́бщее воскресе́ние:

Стих 3: Да рече́т у́бо дом Ааро́нь: я́ко благ, я́ко в век ми́лость Его́. / О́бщее воскресе́ние:

Стих 4: Да реку́т у́бо вси боя́щиися Го́спода: я́ко благ, я́ко в век ми́лость Его́. / О́бщее воскресе́ние:

Вход:

Благослове́н Гряды́й во и́мя Госпо́дне, благослови́хом вы из до́му Госпо́дня, Бог Госпо́дь, и яви́ся нам.

Тропарь: О́бщее воскресе́ние:

Слава: тропарь, глас 4:

Спогре́бшеся Тебе́ креще́нием, Христе́ Бо́же наш, / безсме́ртныя жи́зни сподо́бихомся Воскресе́нием Твои́м, / и воспева́юще зове́м: / оса́нна в вы́шних, / благослове́н Гряды́й во и́мя Госпо́дне.

И ныне: кондак, самогласен, глас 6:

На престо́ле на Небеси́, / на жребя́ти на земли́ носи́мый, Христе́ Бо́же, / А́нгелов хвале́ние / и дете́й воспева́ние прия́л еси́, зову́щих Ти: / благослове́н еси́, Гряды́й Ада́ма воззва́ти.

Таже Трисвятое.

Прокимен Апостола, глас 4:

Благослове́н гряды́й во И́мя Госпо́дне, / Бог Госпо́дь, и яви́ся нам. Стих: Испове́дайтеся Го́сподеви я́ко благ, я́ко в век ми́лость Его́.

Апостол к Филипписием, зачало 247.

Бра́тие, ра́дуйтеся всегда́ о Го́споде: и па́ки реку́, ра́дуйтеся. Кро́тость ва́ша разу́мна да бу́дет всем челове́ком. Госпо́дь близ. Ни о че́мже пецы́теся, но во всем моли́твою и моле́нием со благодаре́нием проше́ния ва́ша да сказу́ются к Бо́гу. И мир Бо́жий, превосходя́й всяк ум, да соблюде́т сердца́ ва́ша и разуме́ния ва́ша о Христе́ Иису́се. Про́чее же, бра́тие моя́, ели́ка суть и́стинна, ели́ка че́стна, ели́ка пра́ведна, ели́ка пречи́ста, ели́ка прелюбе́зна, ели́ка доброхва́льна, а́ще ка́я доброде́тель, и а́ще ка́я похвала́, сия́ помышля́йте. И́мже и научи́стеся, и прия́сте, и слы́шасте, и ви́десте во мне, сия́ твори́те, и Бог ми́ра бу́дет с ва́ми.

Аллилуиа, глас 1:

Стих: Воспо́йте Го́сподеви песнь но́ву, я́ко ди́вна сотвори́ Госпо́дь. Стих: Ви́деша вси концы́ земли́ спасе́ние Бо́га на́шего.

Евангелие от Иоанна, зачало 41.

Пре́жде шести́ дний Па́схи, прии́де Иису́с в Вифа́нию, иде́же бе Ла́зарь уме́рый, его́же воскреси́ от ме́ртвых. Сотвори́ша же Ему́ ве́черю ту, и Ма́рфа служа́ше: Ла́зарь же еди́н бе от возлежа́щих с Ним. Мари́я же прие́мши ли́тру ми́ра на́рда писти́ка многоце́нна, пома́за но́зе Иису́сове, и отре́ власы́ свои́ми но́зе Его́. Хра́мина же испо́лнися от вони́ ма́сти благово́нныя. Глаго́ла же еди́н от учени́к Его́, Иу́да Си́монов Искарио́тский, и́же хотя́ше Его́ преда́ти: Чесо́ ра́ди ми́ро сие́ не про́дано бысть на трех стех пе́нязь, и дано́ ни́щим? Сие́ же рече́, не я́ко о ни́щих печа́шеся, но я́ко тать бе, и ковче́жец име́яше, и вмета́емая ноша́ше. Рече́ же Иису́с: не де́йте ея́, да в день погребе́ния Моего́ соблюде́т е́. Ни́щия бо всегда́ и́мате с собо́ю, Мене́ же не всегда́ и́мате. Разуме́ же наро́д мног от Иуде́й, я́ко ту есть: и приидо́ша не Иису́са ра́ди то́кмо, но да и Ла́заря ви́дят, его́же воскреси́ от ме́ртвых. Совеща́ша же архиере́е, да и Ла́заря убию́т, я́ко мно́зи его́ ра́ди идя́ху от Иуде́й и ве́роваху во Иису́са. Во у́трий же день наро́д мног прише́дый в пра́здник, слы́шавше, я́ко Иису́с гряде́т во Иерусали́м, прия́ша ва́иа от фи́ник, и изыдо́ша в сре́тение Ему́, и зва́ху глаго́люще: оса́нна, благослове́н Гряды́й во И́мя Госпо́дне, Царь Изра́илев. Обре́т же Иису́с oсля́, все́де на не, я́коже есть пи́сано: Не бо́йся, дщи Сио́ня, се Царь твой гряде́т, седя́ на жребя́ти óсли. Сих же не разуме́ша ученицы́ Его́ пре́жде, но егда́ просла́вися Иису́с, тогда́ помяну́ша, я́ко сия́ бы́ша о Нем пи́сана, и сия́ сотвори́ша Ему́. Свиде́тельствоваше же наро́д, и́же бе пре́жде с Ним, егда́ Ла́заря возгласи́ от гро́ба, и воскреси́ его́ от ме́ртвых. Сего́ ра́ди и сре́те Его́ наро́д, я́ко слы́шаша Его́ сие́ сотво́рша зна́мение.

И бывает Литургия Златоустова.

Вместо Достойно: поем:

Глас 4: Бог Госпо́дь, и яви́ся нам. / Соста́вите пра́здник, / и веселя́щеся прииди́те, возвели́чим Христа́, / с ва́иями и ве́твьми, пе́сньми зову́ще: / благослове́н Гряды́й во и́мя Го́спода Спа́са на́шего.

Причастен:

Благослове́н Гряды́й во И́мя Госпо́дне, / Бог Госпо́дь, и яви́ся нам. / Аллилу́иа, трижды.

На трапезе утешение: ядим рыбы, и вино пием, благодаряще Бога.

СВЯТАЯ И ВЕЛИКАЯ СЕДМИЦА

В НЕДЕЛЮ ВАИЙ ВЕЧЕРА

На Го́споди воззва́х, поставим стихов 6, и поем самогласны три, повторяюще сия, глас 8:

Ра́дуйся и весели́ся гра́де Сио́не: / красу́йся и ра́дуйся Це́ркве Бо́жия: / се бо Царь твой прии́де в пра́вде, / на жребя́ти седя́, от детей воспева́емый: / оса́нна в вы́шних, благослове́н еси́ / Име́яй мно́жество щедро́т, поми́луй нас.

Прии́де Спас днесь во град Иерусали́м, / испо́лнити писа́ние / и вси прия́ша в ру́ки ва́иа: / ри́зы же подстила́ху Ему́, / ве́дуще, я́ко Той есть Бог наш, / Ему́же херуви́ми вопию́т непреста́нно: / оса́нна в вы́шних, благослове́н еси́ / Име́яй мно́жество щедро́т, поми́луй нас.

На херуви́мех носи́мый, и пева́емый от серафи́м, / возсе́л еси́ на жребя́ Дави́дски Бла́же, / и де́ти Тя воспева́ху Боголе́пно, / иуде́е же ху́ляху беззако́нно: / стро́потное язы́ков, седа́лище жребца́ прообразова́ше, / из неве́рия в ве́ру претворя́емое: / сла́ва Тебе́ Христе́, / еди́не Ми́лостиве и Человеколю́бче.

Слава: Ра́дуйся и весели́ся:

И ны́не: На херуви́мех носи́мый:

Вход. Прокимен обычный: Се ны́не благослови́те:

На стиховне стихиры самогласны, глас 2:

От ве́твий и ва́ий, я́ко от Боже́ственна пра́здника, / в Боже́ственный преше́дше пра́здник, / к честно́му Христо́вых страсте́й, / ве́рнии, стеце́мся та́инству спаси́тельному: / и Сего́ ви́дим за нас страсть терпя́ща во́льную, / Тому́ же пе́ние подо́бное / благодаря́ще воспои́м, уми́льно зову́ще: / благоутро́бия исто́чниче, и спасе́ния приста́нище, / Го́споди сла́ва Тебе́.

Стих: Воспо́йте Го́сподеви песнь но́ву.

Глас 3: Стра́шно е́же впа́сти в ру́це Бо́га жи́ва: / Сей судия́ есть помышле́ний и мы́слей серде́чных. / Никто́же да вни́дет искуша́яй ве́ру непоро́чную, / но в кро́тости и стра́се Христу́ присту́пим, / да прии́мем ми́лость, и благода́ть обря́щем, / во благовре́менную по́мощь.

Стих: Ви́деша вси концы́ земли́ спасе́ние Бо́га нашего.

Глас 7: Со́нмице лука́вая и прелюбоде́йная, / своему́ му́жу не сохра́ншая ве́ру, / что держи́ши заве́т, его́же не была́ еси́ насле́дница? / Что хва́лишися о Отце́, Сы́на отве́ргшаяся? / Проро́ки не прия́ла еси́, Сы́на возвести́вшия. / Поне́ свои́х чад усрами́ся, си́це вопию́щих: / оса́нна Сы́ну Дави́дову, / благослове́н Гряды́й во и́мя Госпо́дне.

Слава, глас 2: От ве́твий и ва́ий:

И ны́не, глас 3: Стра́шно е́же впа́сти в ру́це Бо́га жи́ва:

Ны́не отпуща́еши: И по О́тче наш, тропарь: Богоро́дице Де́во ра́дуйся: И прочая яко обычно. И обычныя поклоны.

Вестно буди, яко Богоро́дице Де́во: и прочая, со сладкопением поются, во святыя Четыредесятницы Недели, такожде и в настоящую. В прочия же дни Великия седмицы поскору глаголются.

Отпуст:

Гряды́й Госпо́дь на во́льную страсть на́шего ра́ди спасе́ния, Христо́с, и́стинный Бог наш, моли́твами пречи́стыя Своея́ Ма́тере, святы́х сла́вных и всехва́льных Апо́стол, святы́х пра́ведных Богооте́ц Иоаки́ма и А́нны, и всех святы́х, поми́лует и спасе́т нас, я́ко Благ и Человеколю́бец.

В НЕДЕЛЮ ВЕЧЕРА

Повечерие глаголем малое, на немже поем трипеснец господина Андреа Критскаго. Ирмос по дважды. Тропари колико их есть. И последи ирмос оба лика вкупе. Такожде творим и в прочия Великия седмицы вечеры, на Повечерии. Глас 8.

Песнь 1.

Ирмос: Сокруши́вшему бра́ни мы́шцею Свое́ю / и прове́дшему Изра́иля сквозе́ Чермно́е мо́ре / пои́м Ему́, я́ко Изба́вителю на́шему Бо́гу, / я́ко просла́вися.

Ио́сифово целому́дрие подража́им ве́рнии, / разуме́им Поче́тшаго челове́ческое слове́сное существо́, / вся́цем хране́нием пожи́вше доброде́телию действи́тельною.

До́брых неде́лание уподо́бися смоко́внице: / сего́ у́бо уклони́мся, да не и́зсхнем я́коже она́ тогда́, / собо́рище ли́ствием покрыва́ющееся преднапису́ющая.

О́браз Влады́чень подпису́я Ио́сиф, в ров вве́ржен быва́ет, / продае́тся от сро́дник, вся терпи́т приснопа́мятный, / во о́браз пои́стинне Христо́в.

Смоко́вницы безпло́дствия убежа́вше бра́тие, разуме́им о́браз, / да не и́зсхнем я́коже она́ тогда́, / егда́ возвраща́яся Человеколю́бец прии́де к ней а́лча.

Иису́с за мир тща́ся пострада́ти во́лею, / и́дет со ученики́ Свои́ми во град Иерусали́м к во́льней стра́сти, / ю́же прии́де пострада́ти.

Прилепи́вшеся Го́сподеви вся тща́щемуся пострада́ти, / гото́ви бу́дем на оплева́ние, на поруга́ния, и на уничиже́ния, / я́ко да пречи́стыми Его́ страстьми́ спросла́вимся ве́рнии.

Страстьми́ стра́сти исцеля́ет, Пострада́вый о нас: / хотя́ бо произво́дит, на на́ше существо́ челове́ческое, / животво́рная Своя́ страда́ния, да мы спасе́мся.

Слава: Три безнача́льна прославля́ю, три Свя́та пою́, / три соприсносу́щна во еди́ном Существе́ пропове́даю: / Еди́н бо во Отце́, Сы́не и Ду́се славосло́вится Бог.

И ны́не, Богородичен: Жезл у́бо Моисе́ов, и жезл Ааро́нов, стра́нное претворе́ние, / и па́че ума́ смотре́ние име́ша: / Твое́ же чре́во Богороди́тельнице, / рождество́ обновля́ет но́вое.

Седален, глас 4. Подобен: Яви́лся еси́:

Смоко́вницы осужде́ние да не предвари́т тя, / но благи́я плоды́ потщи́ся / се́рдца брозда́ми душе́ творцу́ Твоему́ Христу́ возвести́, / в покая́нии Ему́ принося́щи.

Песнь 8.

Ирмос: На горе́ святе́й просла́вльшася, / и в купине́ огне́м Присноде́вы Моисе́ови та́йну я́вльшаго, / Го́спода по́йте / и превозноси́те во вся ве́ки.

Целому́дрием украси́вше житие́, / и му́дростию сохрани́вше ве́ру, / пра́вды нра́вы взы́щем, / да в му́жестве спосле́дующе, / Христо́ви сраспне́мся.

Другу́ю Е́ву обре́т еги́птяныню, / не победи́ся к неподо́бному дея́нию патриа́рх Ио́сиф, / но ста я́коже не́кий адама́нт, / от страсте́й не ят грехо́вных.

Преходя́ жите́йская ше́ствия Спа́се мой, / взалка́л еси́ во́лею, спасе́ния всех жела́я: / сего́ бо взалка́л еси́, обраще́ния от Тебе́ удале́нных.

Пра́отец вкуш от дре́ва, я́ко позна́ся наг и посра́млен, / ли́ствие смоко́вное взем препоя́сася: / собо́рище бо обнаже́нное Христа́ прообража́шеся.

Гото́вися душе́ пре́жде исхо́да, / устро́й себе́ ко о́ному житию́: / и Христу́ тебе́ ра́ди пострада́ти тща́щемуся, да тя просла́вит, / потщи́ся спострада́ти, и сраспя́тися, и умре́ти.

Ка́ко не ужа́снется смерть, Спа́се мой? / Ка́ко не убои́тся ад среты́й Тя, / по благоизволе́нию к стра́сти тща́щагося, / и о непра́ведных пра́ведна Тя зря пострада́ти прише́дша?

Ла́зарево воста́ние ви́девше иуде́и, свяще́нницы и леви́ти / кля́твенное согла́сие за́вистию угото́вльше, ле́стию преда́тельства, / Христа́ преда́ша на смерть Пила́ту.

А́гница Твоя́ и Раба́ и Де́ва, / к стра́сти Тя устремля́ющася ви́дящи, / и ду́шу о нас полага́юща, до́браго Па́стыря, / утро́бою Ма́тернею по Тебе́ рыда́ше.

Благослови́м Отца́ и Сы́на, и Свята́го Ду́ха, Го́спода.

Троичен: Я́ко Еди́ницу Существо́м пою́ Тя, / я́ко Тро́ицу Ли́цы Тя чту, / О́тче, и Сы́не, и Ду́ше Пресвяты́й: / безнача́льную держа́ву Твоего́ Ца́рствия сла́влю во ве́ки.

И ны́не, Богородичен: Мо́лит Тя Христе́ Богоро́дица, / мо́лит учени́к Твои́х собо́р: / Твой мир да́руй ми́рови Твоему́, / и щедро́ты Твоя́ пода́ждь нам бога́тно во ве́ки.

Хва́лим, благослови́м, покланя́емся Го́сподеви, пою́ще, и превознося́ще во вся ве́ки.

Ирмос: На горе́ святе́й просла́вльшася:

Песнь 9.

Ирмос: Чу́жде ма́терем де́вство, / и стра́нно де́вам деторожде́ние; / на Тебе́, Богоро́дице, / обоя́ устро́ишася. / Тем Тя, вся племена́ земна́я, / непреста́нно велича́ем.

Чу́жде есть нечести́вым целому́дрие, / и стра́нно пра́ведником законопреступле́ние, / Ио́сиф же вели́кий уклони́ся греха́, / и целому́дрия бысть о́браз, / и подо́бие вои́стинну Христо́во.

Чу́жде есть беззако́нником благозако́ние, / и стра́нно неве́рным Богоразу́мие: / иуде́е же сия́ отри́нуша за беззако́ние. / Те́мже и еди́ни са́ми насле́доваша, я́коже смоко́вница, кля́тву.

Взалка́ челове́ческаго спасе́ния, / хлеб сый жи́зни, Христо́с и Бог мой. / Те́мже смоко́вницу предвари́в, безпло́дное собо́рище, / ли́ствием обра́стшую зако́нно, я́ко ви́де, прокля́т.

Зако́нное непло́дие прокля́л еси́, / я́ко ли́ствие процвета́ющее писменосе́нный ра́зум, / плодо́в же дел не иму́щее за беззако́ние: / нас же всех благода́ти сыно́в, Спа́се благослови́.

Жезл у́бо Моисе́ов дре́вле в змию́, / Ааро́нов же жезл в зе́лено преложи́ся, и процвете́ ли́ствие: / непло́дное же изсо́хшее собо́рище законопресту́пное, / в непло́дную преложи́ся смоко́вницу.

Гото́ви Иуде́е свяще́нники твоя́, и устро́й ру́це к богоуби́йству: / се бо прии́де кро́ткий и молчали́вый на страсть, / А́гнец сый и Па́стырь наш, Христо́с Царь Изра́илев.

Приими́ Иуде́е Царя́, / се бо на страсть прихо́дит во́лею, да постра́ждет, / и спасе́т зову́щия непреста́нно: / благослове́н Гряды́й спасти́ Кресто́м вся́ческая.

Обрати́л есть Иуде́е, пра́здники твоя́ в плачь Влады́ка, по проро́честву: / богоуби́йца бо показа́лася еси́ обра́щшаго дре́вле ка́мень, / и несеко́мый во исто́чники водны́я и езе́ра, я́коже пое́т Дави́д.

Слава: Чу́жде есть беззако́нным, / е́же Тя сла́вити безнача́льное Существо́, / Отца́, и Сы́на, и Свята́го Ду́ха, несозда́нное вседержи́тельство, / И́мже весь мир соде́лася, ма́нием Боже́ственныя держа́вы Твоея́.

И ны́не: Приво́дим в моли́тву Богоро́дицу: / Тоя́ моли́твами и апо́стол Твои́х, / о́бщники ны сотвори́ Влады́ко благи́х Твои́х, / и све́тлости сподо́би Спа́се Воскресе́ния Твоего́.

И паки ирмос тойже: Чу́жде ма́терем: Таже и прочее обычно. И отпуст.

Ведомо буди, яко в сию святую Великую седмицу единою совершаем Псалтирь, и глаголем на Утрени кафисмы три, и на часех, 3-м и 6-м, две. И совершаются в среду. В Великую же Субботу стихословятся Непорочны, в Вечернях же глаголем обычно: Ко Го́споду внегда́ скорбе́ти ми:

ВО СВЯТЫЙ И ВЕЛИКИЙ ПОНЕДЕЛЬНИК НА УТРЕНИ

По шестопсалмии поем Аллилу́иа, на глас 8, велегласно, и со сладкопением, и поем тропарь косно и велегласно, и со сладкопением равно. Глас 8:

Се, Жени́х гряде́т в полу́нощи, / и блаже́н раб, его́же обря́щет бдя́ща: / недосто́ин же па́ки, его́же обря́щет уныва́юща. / Блюди́ у́бо, душе́ моя́, / не сном отяготи́ся, / да не сме́рти предана́ бу́деши, / и Ца́рствия вне затвори́шися, / но воспряни́ зову́щи: / Свят, Свят, Свят еси́, Бо́же, Богоро́дицею поми́луй нас. (3)

Таже обычное стихословие с поклоны.

По 1-м стихословии седален, глас 1. Подобен: Гроб Твой:

Страда́ния честна́я настоя́щий день, / я́коже свети́ла соверше́нная, возсиява́ют ми́ру: / Христо́с бо гряде́т страда́ти бла́гостию, / вся содержа́й дла́нию, изволя́ет простре́тися на Дре́ве, / е́же спасти́ челове́ка.

Слава, и ны́не, тойже.

По 2-м стихословии седален, глас 1. Подобен:

Неви́димый Судие́, в пло́ти ка́ко ви́ден был еси́, / и и́деши от муже́й беззако́нных убие́н бы́ти, / на́ше осужде́ние осужда́яй стра́стию Твое́ю? / Те́мже хвалу́, вели́чие и сла́ву возсыла́юще вла́сти Твое́й Сло́ве, согла́сно прино́сим.

Слава, и ны́не, тойже.

По 3-м стихословии седален, глас 8. Подобен: Прему́дрости:

Страсте́й Госпо́дних нача́тки, / настоя́щий день светлоно́сит. / Прииди́те у́бо празднолю́бцы, усря́щим пе́сньми: / Созда́тель бо гряде́т Крест прия́ти, испыта́ния и ра́ны, Пила́том суди́мь. / Те́мже и от раба́ уда́рен быв по главе́, / вся терпи́т, да спасе́т челове́ка. / Сего́ ра́ди возопии́м Ему́: / Человеколю́бче Христе́ Бо́же, / прегреше́ний да́руй оставле́ние, / покланя́ющимся ве́рою пречи́стым страсте́м Твои́м.

Слава, и ны́не, тойже.

И абие посем чтение в толковании Евангелия еже от Матфеа. И Слово Иоанна Златоустаго о изсохшей смоковнице, емуже начало: Якоже у́бо видя: И слово Дамаскиново о изсохшей смоковнице, и о притчи винограда. Таже, И о сподо́битися нам:

Евангелие от Матфеа, зачало 84. [Мф. 21, 18 – 43.]

Во вре́мя о́но, возвра́щься Иису́с во град, взалка́. И узре́в смоко́вницу еди́ну при пути́, прии́де к ней, и ничто́же обре́те на ней, то́кмо ли́ствие еди́но, и глаго́ла ей: да николи́же от тебе́ плода́ бу́дет во ве́ки. И а́бие и́зсше смоко́вница. И ви́девше ученицы́ диви́шася, глаго́люще: ка́ко а́бие и́зсше смоко́вница? Отвеща́в же Иису́с рече́ им: ами́нь глаго́лю вам, а́ще и́мате ве́ру, и не усумните́ся, не то́кмо смоко́вничное сотворите́, но а́ще и горе́ сей рече́те: дви́гнися, и ве́рзися в мо́ре, бу́дет. И вся, ели́ка а́ще воспро́сите в моли́тве ве́рующе, прии́мете. И прише́дшу Ему́ в це́рковь, приступи́ша к Нему́ уча́щу архиере́е и ста́рцы людсти́и, глаго́люще: ко́ею вла́стию сия́ твори́ши? И кто Ти даде́ власть сию́? Отвеща́в же Иису́с, рече́ им: вопрошу́ вы и Аз сло́во еди́но: е́же а́ще рече́те Мне, и Аз вам реку́, ко́ею вла́стию сия́ творю́. Креще́ние Иоа́нново отку́ду бе; с небесе́ ли, или́ от челове́к? Они́ же помышля́ху в себе́, глаго́люще: а́ще рече́м, с небесе́: рече́т нам, почто́ у́бо не ве́ровасте ему́? А́ще ли рече́м, от челове́к: бои́мся наро́да: вси бо и́мут Иоа́нна я́ко проро́ка. И отвеща́вше Иису́сови ре́ша: не ве́мы. Рече́ им и Той: ни Аз вам глаго́лю, ко́ею вла́стию сия́ творю́. Что же ся вам мнит? Челове́к не́кий имя́ше два сы́на, и прише́д к пе́рвому, рече́: ча́до, иди́ днесь, де́лай в виногра́де мое́м. Он же отвеща́в, рече́: не хощу́. Последи́ же раска́явся, и́де. И присту́пль к друго́му, рече́ та́коже. Он же отвеща́в рече́: аз, го́споди, иду́. И не и́де. Кий от обою́ сотвори́ во́лю о́тчу? Глаго́лаша Ему́: пе́рвый. Глаго́ла им Иису́с: ами́нь глаго́лю вам, я́ко мытари́ и любоде́йцы варя́ют вы в Ца́рствии Бо́жии. Прии́де бо к вам Иоа́нн Крести́тель путе́м пра́ведным, и не ве́ровасте ему́, мытари́ же и любоде́йцы ве́роваша ему́: вы же ви́девше, не раска́ястеся последи́, ве́ровати ему́. И́ну при́тчу слы́шите: челове́к не́кий бе домови́т, и́же насади́ виногра́д, и опло́том огради́ его́, и ископа́ в нем точи́ло, и созда́ столп, и вдаст и де́лателем, и оты́де. Егда́ же прибли́жися вре́мя плодо́в, посла́ рабы́ своя́ к де́лателем прия́ти плоды́ его́. И е́мше де́лателе рабы́ его́, о́ваго у́бо би́ша, о́ваго же уби́ша, о́ваго же ка́мением поби́ша. Па́ки посла́ и́ны рабы́ мно́жайша пе́рвых: и сотвори́ша им та́коже. Последи́ же посла́ к ним сы́на своего́, глаго́ля: усрамя́тся сы́на моего́. Де́лателе же ви́девше сы́на, ре́ша в себе́: сей есть насле́дник, прииди́те, убие́м его́, и удержи́м достоя́ние его́. И е́мше его́, изведо́ша вон из виногра́да, и уби́ша. Егда́ у́бо прии́дет господи́н виногра́да, что сотвори́т де́лателем тем? Глаго́лаша Ему́: злых зле погуби́т их, и виногра́д преда́ст ины́м де́лателем, и́же воздадя́т ему́ плоды́ во времена́ своя́. Глаго́ла им Иису́с: не́сте ли чли николи́же в Писа́ниих: ка́мень, его́же не в ряду́ сотвори́ша зи́ждущии, сей бысть во главу́ у́гла? От Го́спода бысть сей, и есть ди́вна во о́чию ва́шею. Сего́ ра́ди глаго́лю вам, я́ко оты́мется от вас Ца́рствие Бо́жие, и да́стся язы́ку творя́щему плоды́ его́.

Посем псалом 50. Таже, Спаси Бо́же лю́ди Твоя́: Го́споди поми́луй, 12.

Трипеснец, творение господина Космы, егоже краестрочие: Ти девте́ра, си есть: во вторый день, еже есть понедельник. Ирмос по дважды, тропари на 12.

Припев: Сла́ва Тебе́ Бо́же наш, сла́ва Тебе́.

[Сей во всю седмицу]. Последи ирмос, оба лика вкупе. Глас 2.

Песнь 1.

{Τ} Ирмос: Непроходи́мое волня́щееся мо́ре, / Бо́жиим Свои́м веле́нием изсуши́вшему, / и пешеше́ствовати сквозе́ е́ Изра́ильтеския лю́ди наста́вльшему, / Го́сподеви пои́м, сла́вно бо просла́вися.

{Η} Неизрече́нное Сло́ва Бо́жия схожде́ние, / е́же Христо́с То́йжде есть Бог и Челове́к, / е́же Бог невосхище́нием бы́ти непщева́в, / внегда́ вообража́тися рабо́м, показу́ет ученико́м, / сла́вно бо просла́вися.

{Δ} Послужи́ти Сам приидо́х, / Его́же зра́ком Созда́тель во́лею обложе́н есмь, / обнища́вшему Ада́му, бога́тствуяй Божество́м, / положи́ти хотя́й Мою́ ду́шу избавле́ние зань, / и́же безстра́стный Божество́м.

Кондак, глас 8. Подобен: Я́ко нача́тки.

Иа́ков рыда́ше Ио́сифова лише́ния, / и до́блий седя́ше на колесни́це, я́ко царь почита́емь: / еги́птяныни бо тогда́ сласте́м не порабо́тав, / воспрославля́шеся от Ве́дущаго челове́ческая сердца́, / и Посыла́ющаго вене́ц нетле́нный.

Икос: На рыда́ние ны́не приложи́м рыда́ние, / и излие́м сле́зы со Иа́ковом, / пла́чущеся Ио́сифа приснопа́мятнаго и целому́дреннаго, / порабоще́ннаго у́бо те́лом, ду́шу же непорабоще́ну соблю́дшаго, / и Еги́птом всем ца́рствовавшаго: / Бог бо подае́т рабо́м Свои́м вене́ц нетле́нный.

Синаксарий.

Песнь 8.

{Ε} Ирмос: Устраши́ся отроко́в благочести́вых, / сообра́знаго души́ нескве́рнаго те́ла, / и устрани́ся воспита́нный в безме́рном веществе́, / неутружде́н огнь, / присноживу́щу же изувя́дшу пла́меню, / ве́чнующая песнь воспева́шеся: / Го́спода, вся дела́, по́йте, / и превозноси́те во вся ве́ки.

{Υ} Вас тогда́ Мои́х ученико́в позна́ют вси, а́ще Моя́ за́поведи соблюдете́, / глаго́лет Спас друго́м, ко стра́сти иды́й: / мир име́йте в себе́, и во всех, и смире́нная му́дрствующе возвы́ситеся: / и Го́спода зна́юще Мя по́йте, и превозноси́те во вся ве́ки.

{Τ} Чи́на сопроти́вна вам язы́ческа, да есть держа́ва купноро́дных: / не жре́бий бо Мой, мучи́тельство же ра́зум самоизбра́нный. / И́же у́бо предызя́щный в вас бы́ти хотя́й други́х, / да есть всех после́днейший: / и Го́спода зна́юще Мя по́йте, и превозноси́те во вся ве́ки.

Хва́лим, благослови́м, покланя́емся Го́сподеви, пою́ще, и превознося́ще во вся ве́ки.

И паки ирмос. Честне́йшую не поем.

Песнь 9.

{Ε} Ирмос: Возвели́чил еси́ Христе́, ро́ждшую Тя Богоро́дицу, / от Нея́же Созда́телю наш, / в подобостра́стное нам обле́клся еси́ те́ло, / на́ших прегреше́ний реши́тельное: / Сию́ ублажа́юще, вси ро́ди, / Тебе́ велича́ем.

{Ρ} Скве́рну всю страстну́ю отри́нувше, / досто́йный Боже́ственнаго Ца́рствия ра́зум восприи́мем благому́дрственный, / Твои́м апо́столом предре́кл еси́, всех Прему́дросте: / в не́мже просла́витеся, светя́щеся со́лнца светоза́рнее.

{Α} Взира́юще на Мя, рекл еси́ Го́споди Твои́м ученико́м, / не му́дрствуйте высо́кая, но соотведи́теся смире́нными: / Мою́, ю́же пию́, пи́йте ча́шу, / я́ко да во Ца́рствии Отца́ со Мно́ю просла́витеся.

Таже ирмос: Возвели́чил еси́ Христе́: И поклон до земли.

Ексапостиларий глаголем трижды, косно и со сладкопением. Сей же глаголется до Великаго Четвертка, поется же посреде церкве от певца, и противу глашается от нас:

Черто́г Твой ви́жду Спа́се мой, украше́нный, / и оде́жды не и́мам, да вни́ду в онь: / просвети́ одея́ние души́ моея́ / Светода́вче, и спаси́ мя.

На хвалитех стихиры самогласны на 4, глас 1:

Гряды́й Госпо́дь к во́льной стра́сти, / апо́столом глаго́лаше на пути́: / се восхо́дим во Иерусали́м, / и преда́стся Сын Челове́ческий, / я́коже есть пи́сано о Нем. / Прииди́те у́бо и мы, очище́нными смы́слы, / сше́ствуим Ему́, и сраспне́мся, и умертви́мся Его́ ра́ди жите́йским сласте́м, / да и оживе́м с Ним, и услы́шим вопию́ща Его́: / не ктому́ в земны́й Иерусали́м, за е́же страда́ти, / но восхожду́ ко Отцу́ Моему́, и Отцу́ ва́шему, / и Бо́гу Моему́, и Бо́гу ва́шему, / и совозвы́шу вас в го́рний Иерусали́м, / в Ца́рство Небе́сное. (2)

Глас 5: Дости́гше ве́рнии спаси́тельную страсть Христа́ Бо́га, / неизрече́нное Его́ долготерпе́ние просла́вим: / я́ко да благоутро́бием Свои́м совоздви́гнет и нас умерщвле́нных грехо́м, / я́ко Благ и Человеколю́бец. (2)

Слава, и ныне, глас то́йже: Го́споди, гряды́й к страда́нию, / Твоя́ утвержда́я ученики́, глаго́лал еси́ осо́бь прие́м их: / ка́ко глаго́л Мои́х не по́мните, я́же пре́жде реко́х вам? / Я́ко вся́кому проро́ку несть пи́сано, то́кмо во Иерусали́ме убие́ну бы́ти. / Ны́не у́бо вре́мя настои́т, е́же реко́х вам: / се бо предаю́ся рука́ма гре́шных пору́ган бы́ти, / и́же и Кресту́ Мя пригвозди́вше, и погребе́нию преда́вше, / оме́рзена вменя́т я́ко ме́ртва. / Оба́че дерза́йте: тридне́вен бо воста́ну / в ра́дость ве́рных, и жизнь ве́чную.

На стиховне самогласен. Глас 5:

Го́споди, к та́инству неизглаго́ланному Твоего́ смотре́ния, / не довле́ющи сыно́в Зеведе́овых ма́ти, проша́ше Тя, / вре́меннаго ца́рства по́чести дарова́тися ча́дом ея́, / но вме́сто тоя́, ча́шу сме́рти обеща́л еси́ пи́ти друго́м Твои́м, / ю́же ча́шу пре́жде сих пи́ти Сам глаго́лал еси́, / грехо́в очище́ние. / Те́мже Тебе́ вопие́м: / спасе́ние душ на́ших, сла́ва Тебе́.

Стих: Испо́лнихомся зау́тра ми́лости Твоея́, Го́споди, возра́довахомся, и возвесели́хомся: во вся дни на́ша возвесели́хомся. За дни, в ня́же смири́л ны еси́, ле́та в ня́же ви́дехом зла́я. И при́зри на рабы́ Твоя́, и на дела́ Твоя́, / и наста́ви сы́ны их.

Го́споди, соверше́ннейшая му́дрствовати, Твоя́ наказу́я ученики́, / не уподо́битися язы́ком глаго́лал еси́, / во е́же облада́ти ме́ньшими: / не та́ко бо бу́дет вам Мои́м ученико́м, / я́ко ни́щий хотя́ есмь. / Пе́рвый у́бо вас, да бу́дет всем слуга́: / нача́льствуяй же я́ко нача́льствуемый, / предызя́щный же я́ко после́днейший. / И́бо приидо́х Сам обнища́вшему Ада́му послужи́ти, / и избавле́ние да́ти за мно́гих ду́шу Мою́, / вопию́щих Ми: сла́ва Тебе́.

Стих: И бу́ди све́тлость Го́спода Бо́га на́шего на нас, и дела́ рук на́ших испра́ви на нас, / и де́ло рук на́ших испра́ви.

Глас 8: Изсо́хшия смоко́вницы за непло́дие, / преще́ния убоя́вшеся бра́тие, / плоды́ досто́йны покая́ния принесе́м Христу́, / подаю́щему нам ве́лию ми́лость.

Слава, и ныне, глас то́йже: Втору́ю Е́ву еги́птяныню обре́т змий глаго́лы, / тща́шеся ласка́ньми запя́ти Ио́сифа, / но той оста́вив ри́зу, бежа́ греха́: / и наг не стыдя́шеся, я́коже первозда́нный пре́жде преслуша́ния. / Того́ моли́твами Христе́ поми́луй нас.

Таже: Бла́го есть: И прочая по обычаю с поклоны. Таже отпуст: Гряды́й Госпо́дь на во́льную страсть, на́шего ра́ди спасе́ния, Христо́с и́стинный: Сей же отпуст глаголется во вторник и в среду.

Ведомо же буди, яко на 1-м часе и 9-м Псалтирь не глаголем в Великую седмицу: но точию глаголются трипсалмны, но обычаю. Третий же час и шестый поем со Псалтирем. Чтется же и Четвероевангелие, в Понедельник, во Вторник и в Среду совершается. При часе 3-м дне (9-й час утра – А.Р.) ударяет параекклисиарх в било, яко же есть обычай. И собравшеся в церковь, поем 3-й час, с кафисмою: и творяще обычныя поклоны. Таже тропарь: Го́споди, И́же Пресвята́го Твоего́ Ду́ха: и Богоро́дице Ты еси́ лоза́: поклоны 3. И абие украшену аналогию, положат на нем верху святое Четвероевангелие, и двема лампадома возжженнома. Всем же стоящим откровенными главами. Священник же кадит храм весь, и братию. А на 6-м часе кадит токмо Евангелие. На 9-м же часе Евангелие кадит, и храм весь, и братию: И тако чтет Евангелие. По скончании же чтения Евангелия глаголем: Госпо́дь Бог благослове́н: И прочее последование. Глаголется и кондак дне: Иа́ков рыда́ше: И обычныя поклоны. И абие начинаем шестый час. Прииди́те поклони́мся: трижды, и псалмы обычныя: Кафисму рядовую. Таже тропарь: И́же в шесты́й день же и час: и Богородичен: Я́ко не и́мамы дерзнове́ния: и поклоны 3.

Таже тропарь пророчества, глас 6:

Душе́ю сокруше́нною припа́даем Тебе́, / и мо́лим Тя Спа́се ми́ра: / Ты бо еси́ Бог ка́ющихся.

Слава, и ныне, тойже.

Прокимен, псалом 125, глас 4: Внегда́ возврати́ти Го́споду / плен Сионь. Стих: Тогда́ испо́лнишася ра́дости уста́ на́ша.

Пророчества Иезекиилева чтение. [Глава 1, ст. 1 – 20]

Бысть в тридеся́тое ле́то, в четве́ртый ме́сяц, в пя́тый день ме́сяца, и аз бых посреде́ плене́ния при реце́ Хова́р: и отверзо́шася небеса́, и ви́дех виде́ния Бо́жия. В пя́тый день ме́сяца, сие́ ле́то пя́тое плене́ния царя́ Иоаки́ма. И бысть сло́во Госпо́дне ко Иезеки́илю сы́ну Вузи́еву, свяще́ннику в земли́ халде́йстей при реце́ Хова́р. И бысть на мне рука́ Госпо́дня. И ви́дех, и се дух воздвиза́яйся, грядя́ше от се́вера, и о́блак вели́кий в нем, и свет о́крест его́ и огнь блиста́яйся. И посреде́ его́ я́ко виде́ние иле́ктра посреде́ огня́, и свет в нем: посреде́ я́ко подо́бие четы́рех живо́тных: и сие́ виде́ние их, я́ко подо́бие челове́ка в них. И четы́ре ли́ца еди́ному, и четы́ре кри́ла еди́ному. И го́лени их пра́вы, и перна́ты но́ги их, и и́скры я́ко блиста́ющаяся медь, и ле́гка кри́ла их. И рука́ челове́ча под кри́лами их на четы́рех страна́х их. И ли́ца их и кри́ла их четы́рех держа́щаяся друг дру́га, ли́ца же их четы́рех не обраща́хуся, внегда́ ходи́ти им: ко́еждо пря́мо лица́ своего́ хожда́ху. И подо́бие лиц их, лице́ челове́чее, и лице́ льво́во одесну́ю четы́рем, и лице́ те́льчее ошу́юю четы́рем, и лице́ о́рлее четы́рем. [И ли́ца их] и кри́ла их просте́рты свы́ше четы́рем, коему́ждо два сопряже́на друг ко дру́гу, и два покрыва́ху верху́ телесе́ их, и ко́еждо пря́мо лицу́ своему́ идя́ше. Иде́же а́ще бя́ше дух ше́ствуяй, идя́ху, и не обраща́хуся. И посреде́ живо́тных виде́ние я́ко у́глия огня́ горя́щаго, я́ко виде́ние свещ сообраща́ющихся посреде́ живо́тных, и свет огня́, и от огня́ исхожда́ше я́ко мо́лния. И живо́тная теча́ху, и обраща́хуся, я́ко виде́ние везе́ково. И ви́дех, и се ко́ло еди́но на земли́ держа́щееся живо́тных четы́рех. И виде́ние коле́с, и сотворе́ние их, я́ко виде́ние фарси́са, и подо́бие еди́но четы́рем: и де́ло их бя́ше, я́коже а́ще бы бы́ло ко́ло в колеси́. На четы́ри страны́ их ше́ствоваху: не обраща́хуся, внегда́ ше́ствовати им. Ниже́ хребты́ их, и высота́ бя́ше им: и ви́дех та, и плещи́ их испо́лнены оче́с о́крест четы́рем. И внегда́ ше́ствовати живо́тным, ше́ствоваху и коле́са держа́щеся их: и внегда́ воздвиза́тися живо́тным от земли́, воздвиза́хуся и коле́са. Иде́же а́ще бя́ше о́блак, та́мо бя́ше и дух, е́же ше́ствовати: ше́ствоваху и живо́тная, и коле́са воздвиза́хуся с ни́ми, зане́ дух жи́зни бя́ше в колесе́х.

Прокимен, псалом 126, глас 4: А́ще не Госпо́дь сози́ждет дом, / всу́е труди́шася зи́ждущии. Стих: А́ще не Госпо́дь сохрани́т град, всу́е бде стреги́й.

И чтется Евангелие по предписанному чину. По чтении же, Ско́ро да предваря́т ны щедро́ты Твоя́ Го́споди: Трисвятое, с поклоны. По О́тче наш: Кондак дне. Го́споди поми́луй, 40. И прочее по обычаю, и отпуст.

Ведомо же буди: яко Евангелие от Матфеа все чтется, подобне и от Марка, и от Луки: от Иоанна же чтется до начала святых страстей, яве яко до Ны́не просла́вися Сын Челове́ческий: Чтется же тако в трех днех, сиречь, в Понедельник, во Вторник, в Среду: И совершается в Среду на 9-м часе. Бывают же от Луки чтения три. Прочая же по два. Вкупе всех чтений девять, и вящше ничтоже. Девятый же час трех дней стихословия не имать, якоже речеся. Но по трипсалмии поется от учиненнаго монаха: И́же в девя́тый час: Сла́ва, и ны́не: И́же нас ра́ди рожде́йся от Де́вы: И бывает чтение в Четвероевангелии: По немже глаголем: Не преда́ждь нас до конца́: Трисвятое с поклоны. По О́тче наш: Кондак дне. Во Ца́рствии Твое́м: И прочее последование, яко обычно. Глаголем же и кондак дне. Присовокупляем же и Вечерню.

ВО СВЯТЫЙ И ВЕЛИКИЙ ПОНЕДЕЛЬНИК ВЕЧЕРА

По предначинательном псалме обычное стихословие: Ко Го́споду внегда́ скорбе́ти ми, воззвах: На Го́споди воззва́х, поставим стихов 10, и поем стихиры самогласны дне 4 по дважды, а два по единожды, глас 1:

Гряды́й Госпо́дь к во́льней стра́сти, / апо́столом глаго́лаше на пути́: / се восхо́дим во Иерусали́м, / и преда́стся Сын Челове́ческий, / я́коже есть пи́сано о Нем. / Прииди́те у́бо и мы, очище́нными смы́слы, сше́ствуим Ему́, / и сраспне́мся, и умертви́мся Его́ ра́ди жите́йским сласте́м, / да и оживе́м с Ним, и услы́шим вопию́ща Его́: / не ктому́ в земны́й Иерусали́м за е́же страда́ти, / но восхожду́ ко Отцу́ Моему́ и Отцу́ ва́шему, / и Бо́гу Моему́ и Бо́гу ва́шему, / и совозвы́шу вас в го́рний Иерусали́м, / в Ца́рство Небе́сное. (2)

Глас 5: Дости́гше ве́рнии спаси́тельную страсть Христа́ Бо́га, / неизрече́нное Его́ долготерпе́ние просла́вим: / я́ко да благоутро́бием Свои́м / совоздви́гнет и нас умерщвле́нных грехо́м, / я́ко Благ и Человеколю́бец. (2)

Го́споди гряды́й к страда́нию, / Твоя́ утвержда́я ученики́, / глаго́лал еси́ осо́бь прие́м их: / ка́ко глаго́л Мои́х не по́мните, / я́же пре́жде реко́х вам? / Я́ко вся́кому проро́ку несть пи́сано, / то́кмо во Иерусали́ме убие́ну бы́ти. / Ны́не у́бо вре́мя настои́т, е́же реко́х вам: / се бо предаю́ся рука́ма гре́шных пору́ган бы́ти, / и́же и Кресту́ Мя пригвозди́вше, и погребе́нию преда́вше, / оме́рзена вменя́т я́ко ме́ртва. / Оба́че дерза́йте, тридне́вен бо воста́ну, / в ра́дость ве́рных, и жизнь ве́чную. (2)

Го́споди, к та́инству неизглаго́ланному Твоего́ смотре́ния, / не довле́ющи сыно́в Зеведе́овых ма́ти, проша́ше Тя, / вре́меннаго ца́рства по́чести дарова́тися ча́дом ея́, / но вме́сто тоя́, ча́шу сме́рти обеща́л еси́ пи́ти друго́м Твои́м, / ю́же ча́шу пре́жде сих пи́ти Сам глаго́лал еси́, / грехо́в очище́ние. / Те́мже Тебе́ вопие́м: / спасе́ние душ на́ших, сла́ва Тебе́. (2)

Го́споди, соверше́ннейшая му́дрствовати, / Твоя́ наказу́я ученики́, / не уподо́битися язы́ком глаго́лал еси́, / во е́же облада́ти ме́ньшими: / не та́ко бо бу́дет вам Мои́м ученико́м, / я́ко ни́щий хотя́ есмь. / Пе́рвый у́бо вас, да бу́дет всем слуга́: / нача́льствуяй же, я́ко нача́льствуемый: / предызя́щный же, я́ко после́днейший. / И́бо приидо́х Сам обнища́вшему Ада́му послужи́ти, / и избавле́ние да́ти за мно́гих ду́шу Мою́, / вопию́щих Ми: сла́ва Тебе́.

Глас 8: Изсо́хшия смоко́вницы за непло́дие, / преще́ния убоя́вшеся бра́тие, / плоды́ досто́йны покая́ния принесе́м Христу́, / подаю́щему нам ве́лию ми́лость.

Слава, и ныне, глас то́йже: Втору́ю Е́ву еги́птяныню обре́т змий глаго́лы, / тща́шеся ласка́ньми запя́ти Ио́сифа, / но той оста́вив ри́зу, бежа́ греха́, / и наг не стыдя́шеся, я́коже первозда́нный пре́жде преслуша́ния. / Того́ моли́твами, Христе́, поми́луй нас.

Таже вход со Евангелием. Све́те ти́хий:

Прокимен, псалом 127. Глас 6: Благослови́т тя Госпо́дь от Сио́на, / и у́зриши блага́я Иерусали́ма. Стих: Блаже́ни вси боя́щиися Го́спода, ходя́щии в путе́х Его́.

Исхода чтение. [Глава 1, ст. 1 – 20.]

Сия́ имена́ сыно́в Изра́илевых, входя́щих во Еги́пет вку́пе со Иа́ковом отце́м их, ки́йждо со всем до́мом свои́м внидо́ша: Руви́м, Симео́н, Леви́й, Иу́да, Иссаха́р, Завуло́н и Вениами́н, Дан и Неффали́м, Гад и Аси́р. Ио́сиф же бя́ше во Еги́пте. Бя́ше же всех душ изше́дших из Иа́кова, се́дмьдесят пять. У́мре же Ио́сиф, и вся бра́тия его́, и весь род о́ный. Сы́нове же Изра́илевы возрасто́ша, и умно́жишася, и мно́зи бы́ша, и укрепи́шася зело́ зело́: умно́жи же их земля́. Воста́ же царь ин во Еги́пте, и́же не зна́ше Ио́сифа. Рече́ же язы́ку своему́: се род сыно́в Изра́илевых вели́кое мно́жество, и укрепля́ется па́че нас. Прииди́те у́бо прехи́трим их, да не когда́ умно́жатся; и егда́ а́ще приключи́тся нам брань, приложа́тся и си́и к супоста́том, и одоле́вше нам, изы́дут из земли́ [на́шея]. И приста́ви над ни́ми приста́вники дел, да озло́бят их в де́лех: и созда́ша гра́ды тве́рды фарао́ну, Пифо́, и Рамесси́, и Он, и́же есть Илиопо́ль. Поели́ку же их смиря́ху, толи́ко мно́жайшии быва́ху, и укрепля́хуся зело́ зело́. И гнуша́хуся еги́птяне сынми́ Изра́илевыми. И наси́лие творя́ху еги́птяне сыно́м Изра́илевым ну́ждею. И боле́зненну тем жизнь творя́ху в де́лех жесто́ких, бре́нием, и плинфоде́ланием, и все́ми де́лы, я́же в поля́х, во всех де́лех, и́миже порабоща́ху их с ну́ждею. И рече́ царь еги́петский ба́бам евре́йским: еди́ной их и́мя, Сепфо́ра, и и́мя второ́й, Фу́а. И рече́ [им]: егда́ ба́бите евре́аныням, и суть к рожде́нию, а́ще у́бо му́жеский пол бу́дет, убива́йте его́, а́ще же же́нский, снабдева́йте его́. Убоя́шася же ба́бы Бо́га, и не сотвори́ша, я́коже повеле́ им царь еги́петский, и живля́ху му́жеский пол. Призва́ же царь еги́петский ба́бы, и рече́ им: что я́ко сотвори́сте вещь сию́, и оживля́ете му́жеский пол? Реко́ша же ба́бы фарао́ну: не я́ко жены́ еги́птяныни, та́ко и жены́ евре́аныни: ражда́ют бо пре́жде не́же вни́ти к ним ба́бам, и ражда́ху. Бла́го же творя́ше Бог ба́бам, и мно́жахуся лю́дие, и укрепля́хуся зело́.

Прокимен, псалом 128, глас 6: Благослови́хом вы / во и́мя Госпо́дне. Стих: Мно́жицею бра́шася со мно́ю от ю́ности моея́.

Иова чтение. [Глава 1, ст. 1 – 12.]

Челове́к не́кий бя́ше во стране́ Авситиди́йстей, ему́же и́мя И́ов: и бе челове́к он и́стинен, непоро́чен, пра́веден, Богочести́в, удаля́яйся от вся́кия лука́выя ве́щи. Бы́ша же ему́ сы́нове седмь, и дще́ри три. И бя́ху ско́ти его́, ове́ц седмь ты́сящ, вельблю́дов три ты́сящи: супру́г воло́в пять сот, и осли́ц пасо́мых пять сот, и слуг мно́го зело́, и дела́ ве́лия бя́ху ему́ на земли́: и бе челове́к о́ный благоро́днейший су́щих от восто́к со́лнца. Сходя́щеся же сы́нове его́ друг ко дру́гу, творя́ху пир на ки́йждо день, спое́млюще вку́пе и три сестры́ своя́, я́сти и пи́ти с ни́ми. И егда́ скончава́шася дни́е пи́ра, посыла́ше И́ов и очища́ше их, востая́ зау́тра: и приноша́ше о них же́ртвы по числу́ их, и тельца́ еди́наго о гресе́, о душа́х их. Глаго́лаше бо И́ов: не́гли когда́ сы́нове мои́ согреши́ша, и в мы́сли свое́й зла́я помы́слиша проти́ву Бо́га? Та́ко у́бо творя́ше И́ов вся дни. И бысть я́ко день сей, и се приидо́ша а́нгели Бо́жии предста́ти пред Го́сподем, и диа́вол прии́де с ни́ми. И рече́ Госпо́дь диа́волу: отку́ду прише́л еси́? И отвеща́в диа́вол Го́сподеви, рече́: обше́д зе́млю, и проше́д поднебе́сную се есмь. И рече́ ему́ Госпо́дь: внял ли еси́ мы́слию твое́ю на раба́ Моего́ И́ова? Зане́ несть я́ко он, на земли́ челове́к непоро́чен, и́стинен, богочести́в, удаля́яйся от вся́кия лука́выя ве́щи. Отвеща́ же диа́вол, и рече́ пред Го́сподем: еда́ ту́не И́ов чтит Го́спода? Не Ты ли огради́л еси́ вне́шняя его́, и вну́тренняя до́му его́, и я́же вне всех су́щих его́ о́крест? Дела́ же руку́ его́ благослови́л еси́, и скоты́ его́ мно́ги сотвори́л еси́ на земли́. Но посли́ ру́ку Твою́, и косни́ся всех, я́же и́мать: а́ще не в лице́ Тя благослови́т. Тогда́ рече́ Госпо́дь диа́волу: се вся ели́ка суть ему́, даю́ в ру́ку твою́, но самого́ да не косне́шися. И изы́де диа́вол от Го́спода.

Таже, Да испра́вится моли́тва моя́:

И посем Евангелие от Матфеа, зачало 98. [Мф. 24, 3 – 35.]

Во вре́мя о́но, седя́щу Иису́су на горе́ Елео́нстей, приступи́ша к Нему́ ученицы́ на едине́, глаго́люще: рцы нам, когда́ сия́ бу́дут; и что есть зна́мение Твоего́ прише́ствия и кончи́на ве́ка? И отвеща́в Иису́с рече́ им: блюди́те, да никто́же вас прельсти́т. Мно́зи бо прии́дут во и́мя Мое́, глаго́люще: аз есмь Христо́с, и мно́ги прельстя́т. Услы́шати же и́мате бра́ни, и слы́шания бра́нем. Зри́те, не ужаса́йтеся, подоба́ет бо всем сим бы́ти, но не тогда́ есть кончи́на. Воста́нет бо язы́к на язы́к, и ца́рство на ца́рство: и бу́дут гла́ди и па́губы, и тру́си по ме́стом. Вся же сия́ нача́ло боле́знем. Тогда́ предадя́т вы в ско́рби, и убию́т вы, и бу́дете ненави́дими все́ми язы́ки и́мене Моего́ ра́ди. И тогда́ соблазня́тся мно́зи, и друг дру́га предадя́т, и возненави́дят друг дру́га. И мно́зи лжепроро́цы воста́нут и прельстя́т мно́гия. И за умноже́ние беззако́ния, изся́кнет любы́ мно́гих. Претерпе́вый же до конца́, той спасе́тся. И пропове́стся сие́ Ева́нгелие Ца́рствия по всей вселе́нней, во свиде́телство всем язы́ком: и тогда́ прии́дет кончи́на. Егда́ у́бо у́зрите ме́рзость запусте́ния, рече́нную Дании́лом проро́ком, стоя́щу на ме́сте свя́те, и́же чтет, да разуме́ет, тогда́ су́щии во Иуде́и да бежа́т на го́ры. И и́же на кро́ве, да не схо́дит взя́ти я́же в дому́ его́. И и́же на селе́, да не возврати́тся вспять взя́ти риз свои́х. Го́ре же непра́здным и доя́щим в ты́я дни. Моли́теся же, да не бу́дет бе́гство ва́ше в зиме́, ни в суббо́ту. Бу́дет бо тогда́ скорбь ве́лия, якова́ же несть была́ от нача́ла ми́ра досе́ле, ниже́ и́мать бы́ти. И а́ще не бы́ша прекрати́лися дни́е о́ны, не бы у́бо спасла́ся вся́ка плоть: избра́нных же ра́ди прекратя́тся дни́е о́ны. Тогда́ а́ще кто рече́т вам: се, зде Христо́с, или́ о́нде, не ими́те ве́ры. Воста́нут бо лжехри́сти и лжепроро́цы, и дадя́т зна́мения ве́лия и чудеса́, я́коже прельсти́ти, а́ще возмо́жно, и избра́нныя. Се, пре́жде рех вам. А́ще у́бо реку́т вам: се, в пусты́ни есть, не изыди́те: се, в сокро́вищах, не ими́те ве́ры. Я́коже бо мо́лния исхо́дит от восто́к и явля́ется до за́пад, та́ко бу́дет прише́ствие Сы́на Челове́ческаго. Иде́же бо а́ще бу́дет труп, та́мо соберу́тся орли́. А́бие же, по ско́рби дний тех, со́лнце поме́ркнет, и луна́ не даст све́та своего́, и зве́зды спа́днут с небесе́, и си́лы небе́сныя подви́гнутся. И тогда́ яви́тся зна́мение Сы́на Челове́ческаго на небеси́, и тогда́ воспла́чутся вся коле́на земна́я, и у́зрят Сы́на Челове́ческаго, гряду́ща на о́блацех небе́сных с си́лою и сла́вою мно́гою. И по́слет а́нгелы Своя́ с тру́бным гла́сом ве́лиим, и соберу́т избра́нныя Его́ от четы́рех ветр, от коне́ц небе́с до коне́ц их. От смоко́вницы же научи́теся при́тчи: егда́ уже́ ва́ия ея́ бу́дут мла́да, и ли́ствие прозя́бнет, ве́дите, я́ко близ есть жа́тва. Та́ко и вы, егда́ ви́дите сия́ вся, ве́дите, я́ко близ есть, при две́рех. Ами́нь глаго́лю вам, не мимои́дет род сей, до́ндеже вся сия́ бу́дут. Не́бо и земля́ мимои́дет, словеса́ же Моя́ не мимои́дут.

И прочее последование Преждеосвященных, по обычаю. Тако долженствует быти и в Великий Вторник, и в Великую Среду.

Аще же несть Преждеосвященныя: Поем на Го́споди воззва́х, половину от стихир, на 6. Стихира, глас 1: Гряды́й Госпо́дь к во́льной стра́сти: дважды. Дости́гше ве́рнии: дважды. Го́споди, к та́инству неизглаго́ланному: дважды. Сла́ва, и ны́не: Го́споди гряды́й к страда́нию: По сих вход с Евангелием: и Све́те ти́хий: Таже прокимен, и паремии, и Евангелие. Таже, Сподо́би Го́споди: И ектения: Испо́лним вече́рнюю: На стиховне, от техже стихир, стихира, глас 5: Го́споди соверше́ннейшая му́дрствовати: Стих: К Тебе́ возведо́х о́чи мои́: И паки туюжде стихиру. Стих: Поми́луй нас Го́споди: Глас 8: Изсо́хшая смоко́вницы: Сла́ва, и ны́не, глас тойже: Втору́ю Е́ву: Таже, Ны́не отпуща́еши: И прочая обычная с поклоны. И по конечном Трисвятом, и по О́тче наш: Го́споди поми́луй, 12. Таже, молитва, Всесвята́я Тро́ице: и Бу́ди и́мя Госпо́дне: И отпуст.

Сице убо творим во Вторник и в Среду.

На трапезе же ядим сухоядение, и сим удовляемся. И якоже в первую неделю святаго сего Поста: сице и в сия дни, в Великий Понедельник, во Вторник и в Среду поститися подобает.

Ведати бо подобает, яко и Шестый великий Собор повеле, спасительныя страсти дни в посте, и молитве, и умилении сердца сотворяти верным: в полунощи же Великия Субботы, оставляти пост, Божественным евангелистом Матфею и Луце: овому убо позде в субботу глаголанием, овому же утром глубоким, медлемое нам нощи написующим.

ВО СВЯТЫЙ И ВЕЛИКИЙ ПОНЕДЕЛЬНИК ВЕЧЕРА

Повечерие глаголем великое, на Повечерии трипеснец господина Андреа Критскаго. Глас 8.

Песнь 2.

Ирмос: Вонми́, не́бо, и возглаго́лю, / и воспою́ Христа́, / от Де́вы ро́ждшагося во спасе́ние на́ше.

По́йдем со Христо́м к горе́ Елео́нстей, / та́йно со апо́столы соводвори́мся Ему́.

Разуме́й смире́нное мое́ се́рдце, / что есть жерно́вная при́тча? / О не́йже пре́жде рече́ Христо́с, / и истрезви́ся про́чее.

Гото́ви сама́ себе́ о душе́ моя́, ко исхо́ду: / прише́ствие приближа́ется неумоли́маго Судии́.

Богородичен: Пречи́стая Богоро́дице Де́во, еди́на всепе́тая, / Сы́на Твоего́ моли́ о рабе́х Твои́х.

Ин, глас тойже.

Ирмос: Ви́дите, ви́дите, / я́ко Аз есмь Бог, / дре́вле Изра́иля сквозе́ Чермно́е мо́ре проведы́й, / и пита́вый, и спасы́й, / и от го́рькия рабо́ты свободи́вый фарао́новы.

Ви́дите, ви́дите, я́ко Аз есмь Бог, / И́же пре́жде бытия́ всех, / и пре́жде сотворе́ния земли́ и не́ба, вем вся: / и весь сый во Отце́, и всего́ ношу́ в Себе́.

Сло́вом соста́вих не́бо вку́пе и зе́млю: / со Отце́м бо бех, и сло́вом ношу́ вся, я́ко Сло́во, / му́дрость, и си́ла, и о́браз, и содействи́телен, и равноде́телен.

Кто времена́ положи́? / Кто ве́ки соблюда́яй? / Кто вся определя́яй и совоздвиза́яй? / Ра́зве Безнача́льный при́сно сый со Отце́м, / я́коже заря́ во све́те.

О безме́рнаго Твоего́ человеколю́бия Иису́се! / Сказа́л бо еси́ нам сконча́ния свы́ше вре́мя, / скрыв час, уясни́в же све́тло о́бразы его́.

Вся ве́си, вся зна́еши Иису́се / я́ко име́яй все в Себе́ Оте́ческое достоя́ние Боже́ственне, / и всего́ Ду́ха всажде́на нося́й в себе́, соприсносу́щнаго Отцу́.

Влады́ко Го́споди, веко́в тво́рче, / сподо́би и нас свяще́нный о́ный тогда́ глас услы́шати, / зову́щий избра́нныя Отца́ в Ца́рство Небе́сное.

Слава: Безнача́льная, несозда́нная Тро́ице, / неразде́льная Еди́нице, тро́е су́щая и еди́но, / О́тче, Сы́не и Ду́ше, еди́ный Бо́же, / приими́ пе́ние от бре́нных язы́к, / я́коже от уст пла́менных.

Богородичен: Селе́ние свято́е яви́лася еси́ Де́во Бо́жие: / в Тя бо Небе́сный Царь всели́вся пло́тию, про́йде кра́сный, / челове́ка в Себе́ вообрази́в Боже́ственне.

Седален, глас 2. Подобен: Милосе́рдия су́щи:

Милосе́рдием дви́жимь Христе́, / во́лею преды́деши страда́ти благоде́телю, / хотя́й страсте́й нас изба́вити, и е́же во а́де осужде́ния. / Те́мже честна́я Твоя́ воспева́ем страда́ния, / и сла́вим Спа́се, кра́йнее Твое́ вси схожде́ние.

Песнь 8.

Ирмос: А́нгели и небеса́, / на престо́ле сла́вы седя́щаго / и я́ко Бо́га непреста́нно сла́вимаго, / благослови́те, по́йте / и превозноси́те Его́ во ве́ки.

Вся́ко слы́шала еси́ душе́, / ка́ко Христо́с Боже́ственным ученико́м Свои́м провозглаша́ше, глаго́ля сконча́ние: / разуме́вши же Твой коне́ц, угото́вися про́чее: / вре́мя исхо́да прии́де.

Позна́ла еси́ непло́дная душе́, лука́ваго раба́ при́тчу, / бо́йся и не небрези́ о дарова́нии, его́же прия́ла еси́, / да не сокры́еши в зе́млю, но да ку́плю де́еши.

Да уясни́тся свеща́, да преизлие́тся сея́ и еле́й, / я́коже де́вам тогда́ сострада́ние, / да обря́щеши душе́ моя́ черто́г Христо́в тогда́ отве́рстый.

В суббо́ту бе́гство и в зиме́ глаго́ля Учи́тель, / седма́го бу́рю предгада́тельствует настоя́щаго ве́ка, / в не́мже на́йдет я́ко зима́ кончи́на.

Я́ко ско́рость мо́лнии преходя́щая, / та́ко тогда́ бу́дет стра́шное о́ное Влады́ки твоего́ прише́ствие, душе́ моя́: / слы́шала еси́, гото́ва про́чее бы́ти потщи́ся.

Егда́ прии́дет Судия́ / с ты́сящами, и тьма́ми а́нгельских чино́в и сил, / тогда́ кий страх душе́ моя́, / кий тре́пет, увы мне! / Наги́м стоя́щим всем.

Благослови́м Отца́ и Сы́на, и Свята́го Ду́ха, Го́спода.

Един Бог у́бо Тро́ица, / ни Отцу́ изступи́вшу в сыновство́, / ниже́ Сы́ну премени́вшуся во исхожде́ние, / но сво́йственная, и обое́ Свет, Бо́га, Три сла́влю во ве́ки.

И ныне, Богородичен: Моли́твами Бо́же, Богоро́дицы, приими́ моли́тву на́шу, / возниспосли́ же ми́лости Твоя́ на вся бога́тно, / и мир Твой пода́ждь лю́дем Твои́м.

Хва́лим, благослови́м, покланя́емся Го́сподеви, пою́ще, и превознося́ще во вся ве́ки.

Таже ирмос: А́нгели и небеса́, на престо́ле:

Песнь 9.

Ирмос: Проявле́нное на горе́ законополо́жнику во огни́ и купине́, / Рождество́ Присноде́вы, / в на́ше ве́рных спасе́ние, / пе́сньми немо́лчными велича́ем.

Слы́шала еси́ душе́ моя́, / Судии́ предвозглаша́ющу, и уча́щу тя вре́мене кончи́ны: / гото́ви я́же на исхо́д дела́, / да не я́ко неиску́сна, Бо́га отве́ржена бу́деши.

От смоко́вницы о душе́ моя́, научи́ся кончи́ны! / Егда́ мла́до бу́дет ли́ствие, и прозя́бнет ве́твие, жа́твы час про́чее, / и ты егда́ сия́ уви́диши, разуме́й, я́ко при две́рех есть.

Кто ра́зве Тебе́ ины́й Твоего́ зна́ет Отца́? / Или кто кроме́ Тебе́ весть час, или́ день? / У Тебе́ бо сокро́вища прему́дрости вся внутрь суть, Христе́ Бо́же.

Кни́ги у́бо разгну́тся тогда́, престо́лом поста́вленным, / дея́ния же облича́тся, наги́м стоя́щим всем: / ни свиде́телем, ни клеветнико́м прису́тствующим: / обнаже́на бо вся Бо́гу.

Гряде́т всех Судия́, изведе́н бы́ти на суд, / на престо́ле херуви́мсте седя́й, я́ко пови́нный предста́ти Пила́ту, / и вся пострада́ти, да спасе́тся Ада́м.

Прибли́жися Па́сха нам вели́кая и Боже́ственная: / по двою́ бо дни́ю преднауча́ет Христо́с, / страда́ния пропису́я день, / во́ньже Отцу́ же́ртва приведе́тся.

При Кресте́ Твое́м Спа́се предстоя́щи Ма́ти, / и Твое́ непра́ведное зря́щи заколе́ние, вопия́ше: / увы́ Мне Ча́до Мое́! Увы́ Мне незаходи́мый све́те! / Просия́й всем Со́лнце сла́вы свет.

Слава: О еди́нице Свята́я, / Тро́ице еди́но Божество́, и Тро́ица Еди́нице Бо́же, / триипоста́сное Естество́, единоче́стная, и неразде́льная сла́во, / изба́ви от бед ду́ши на́ша!

И ныне, Богородичен: Приими́ Ма́терь Твою́ Христе́ в моли́тву, / да моли́твами Ея́ умири́ши мир, / и утверди́ши ца́рствия ски́птры, / и Це́ркви Твоя́ совокупи́ши во еди́но.

Ирмос 9-я песни: Проявле́нное на горе́: за Досто́йно: И поклон до земли.

Трисвятое. И по О́тче наш: Кондак дне. Таже, Го́споди сил с на́ми бу́ди: И прочее обычное. И отпуст.

ВО СВЯТЫЙ И ВЕЛИКИЙ ВТОРНИК НА УТРЕНИ

Аллилу́иа, на глас 8. Тропарь трижды: Се, Жени́х гряде́т: писан в Понедельник Великий. И обычное стихословие.

По 1-м стихословии седален, глас 4. Подобен: Вознесы́йся на Крест:

Жениха́ бра́тие возлю́бим, / свещи́ своя́ украси́м, / в доброде́телех сия́юще и ве́ре пра́вой: / да я́ко му́дрыя Госпо́дни де́вы / гото́ви вни́дем с Ним на бра́ки: / Жени́х бо да́ры, я́ко Бог / всем подае́т нетле́нный вене́ц.

Слава, и ныне, тойже.

По 2-м стихословии седален, глас 4. Подобен: Удиви́ся Ио́сиф:

Сове́т Спа́се беззако́нный на Тя, / свяще́нницы и кни́жницы за́вистию собра́вше лю́те, / в преда́тельство подвиго́ша Иу́ду: / те́мже безсту́дно исхожда́ше, глаго́лаше на Тя беззако́нным лю́дем: / что ми, глаго́лет, дади́те, / и аз вам Его́ преда́м в ру́ки ва́ша? / Осужде́ния сего́ изба́ви Го́споди, ду́ши на́ша.

Слава, и ныне, тойже.

По 3-м стихословии седален, глас 8. Подобен: Прему́дрости:

Иу́да ра́зумом сребролю́бствует, / на Учи́теля вражде́бне подвиза́ется, / сове́тует, поуча́ется преда́нию, / све́та отпа́дает, тьму прии́м, / соглаша́ет це́ну, продае́т Безце́ннаго: / те́мже и удавле́ние, возме́здие е́же соде́я, / обрета́ет окая́нный, и лю́тую смерть, / преда́в Тебе́ Го́спода. / Того́ нас ча́сти изба́ви Христе́ Бо́же, / прегреше́ний оставле́ние да́руя, / пра́зднующим ве́рою пречи́стую страсть Твою́.

Слава, и ныне, тойже.

Таже, И о сподо́битися нам:

Евангелие от Матфеа, зачало 90. [Мф. 22, 15 – 23, 39.]

Во вре́мя о́но, сове́т прие́мше вси фарисе́е на Иису́са, я́ко да обольстя́т Его́ сло́вом. И посыла́ют к Нему́ ученики́ своя́ со иродиа́ны, глаго́люще: Учи́телю, ве́мы, я́ко и́стинен еси́, и пути́ Бо́жию вои́стинну учи́ши, и неради́ши ни о ко́мже: не зри́ши бо на лице́ челове́ком: рцы у́бо нам, что Ти ся мнит? Досто́йно ли есть да́ти кинсо́н ке́сареви, или́ ни? Разуме́в же Иису́с лука́вство их, рече́: что Мя искуша́ете, лицеме́ри? Покажи́те Ми злати́цу кинсо́нную. Они́ же принесо́ша Ему́ пе́нязь. И глаго́ла им: чий о́браз сей и написа́ние? И глаго́лаша Ему́: ке́сарев. Тогда́ глаго́ла им: воздади́те у́бо ке́сарева ке́сареви, и Бо́жия Бо́гови. И слы́шавше диви́шася: и оста́вльше Его́ отыдо́ша. В той день приступи́ша к Нему́ саддуке́е, и́же глаго́лют не бы́ти воскресе́нию, и вопроси́ша Его́, глаго́люще: Учи́телю, Моисе́й рече́: а́ще кто у́мрет не имы́й чад, да по́ймет брат его́ жену́ его́ и воскреси́т се́мя бра́та своего́. Бе́ша же в нас седмь бра́тия, и пе́рвый оже́нься у́мре, и не имы́й се́мене, оста́ви жену́ свою́ бра́ту своему́. Та́кожде же и вторы́й, и тре́тий, да́же до седма́го. Последи́ же всех у́мре и жена́. В воскреше́ние у́бо, кото́раго от седми́х бу́дет жена́? Вси бо име́ша ю́. Отвеща́в же Иису́с рече́ им: прельща́етеся, не ве́дуще Писа́ния, ни си́лы Бо́жия. В воскресе́ние бо ни же́нятся, ни посяга́ют, но я́ко а́нгели Бо́жии на небеси́ суть. О воскресе́нии же ме́ртвых не́сте ли чли рече́ннаго вам Бо́гом, глаго́лющим: Аз есмь Бог Авраа́мов, и Бог Исаа́ков, и Бог Иа́ковль? Несть Бог, Бог ме́ртвых, но Бог живы́х. И слы́шавше наро́ди, дивля́хуся о уче́нии Его́. Фарисе́е же слы́шавше, я́ко посрами́ саддуке́и, собра́шася вку́пе. И вопроси́ еди́н от них законоучи́тель, искуша́я Его́, и глаго́ля: Учи́телю, ка́я за́поведь бо́льши есть в зако́не? Иису́с же рече́ ему́: возлю́биши Го́спода Бо́га твоего́ всем се́рдцем твои́м, и все́ю душе́ю твое́ю, и все́ю мы́слию твое́ю. Сия́ есть пе́рвая и бо́льшая за́поведь. Втора́я же подо́бна ей: возлю́биши и́скренняго твоего́, я́ко сам себе́. В сию́ обою́ за́поведию весь зако́н и проро́цы ви́сят. Со́браном же фарисе́ом, вопроси́ их Иису́с, глаго́ля: что ся вам мнит о Христе́; чий есть Сын? Глаго́лаша Ему́: Дави́дов. Глаго́ла им: ка́ко у́бо Дави́д ду́хом Го́спода Его́ нарица́ет, глаго́ля: рече́ Госпо́дь Го́сподеви моему́, седи́ одесну́ю Мене́, до́ндеже положу́ враги́ Твоя́ подно́жие нога́ма Твои́ма? А́ще у́бо Дави́д нарица́ет Его́ Го́спода, ка́ко сын ему́ есть? И никто́же можа́ше отвеща́ти Ему́ словесе́: ниже́ сме́я кто от того́ дне вопроси́ти Его́ ктому́.

Тогда́ Иису́с глаго́ла к наро́дом и ученико́м Свои́м, глаго́ля: на Моисе́ове седа́лищи седо́ша кни́жницы и фарисе́е. Вся у́бо, е́лика а́ще реку́т вам блюсти́, соблюда́йте и твори́те, по дело́м же их не твори́те: глаго́лют бо, и не творя́т. Связу́ют бо бремена́ тя́жка и бе́дне носи́ма, и возлага́ют на плеща́ челове́ческа, пе́рстом же свои́м не хотя́т дви́гнути их. Вся же дела́ своя́ творя́т, да ви́дими бу́дут челове́ки: разширя́ют же храни́лища своя́, и велича́ют воскри́лия риз свои́х. Лю́бят же преждевозлега́ния на ве́черях, и преждеседа́ния на со́нмищих, и целова́ния на то́ржищах, и зва́тися от челове́к: учи́телю, учи́телю. Вы же не нарица́йтеся учи́тели: еди́н бо есть ваш Учи́тель, Христо́с: вси же вы бра́тия есте́. И отца́ не зови́те себе́ на земли́: еди́н бо есть Оте́ц ваш, И́же на небесе́х. Ниже́ нарица́йтеся наста́вницы: еди́н бо есть Наста́вник ваш, Христо́с. Бо́лий же в вас, да бу́дет вам слуга́. И́же бо вознесе́тся, смири́тся: и смиря́яйся, вознесе́тся. Го́ре вам, кни́жницы и фарисе́е, лицеме́ри, я́ко затворя́ете Ца́рствие Небе́сное пред челове́ки: вы бо не вхо́дите, ни входя́щих оставля́ете вни́ти. Го́ре вам, кни́жницы и фарисе́е, лицеме́ри, я́ко прехо́дите мо́ре и су́шу, сотвори́ти еди́наго прише́льца: и егда́ бу́дет, творите́ его́ сы́на гее́нны сугу́бейша вас. Го́ре вам, вожди́ слепи́и, глаго́лющии: и́же а́ще клене́тся це́рковию, ничесо́же есть, а и́же клене́тся зла́том церко́вным, до́лжен есть. Бу́и и слепи́и, ко́е бо бо́ле есть, зла́то ли, или́ це́рковь, святя́щая зла́то? И и́же а́ще клене́тся олтаре́м, ничесо́же есть, а и́же клене́тся да́ром, и́же верху́ его́, до́лжен есть. Бу́и и слепи́и, что бо бо́ле, дар ли, или́ олта́рь, святя́й дар? И́же у́бо клене́тся олтаре́м, клене́тся им и су́щим верху́ его́. И и́же клене́тся це́рковию, клене́тся е́ю, и Живу́щим в ней. И клены́йся небесе́м, клене́тся Престо́лом Бо́жиим и Седя́щим на нем. Го́ре вам, кни́жницы и фарисе́е лицеме́ри, я́ко одеся́тствуете мя́тву, и копр, и ки́мин, и оста́висте вя́щшая зако́ну, суд и ми́лость, и ве́ру. Сия́ же подоба́ше твори́ти, и о́нех не оставля́ти. Вожди́ слепи́и, оцежда́ющии комары́, вельблу́ды же пожира́юще. Го́ре вам, кни́жницы и фарисе́е лицеме́ри, я́ко очища́ете вне́шнее сткля́ницы и блю́да, внутрью́ду же суть по́лни хище́ния и непра́вды. Фарисе́е слепы́й, очи́сти пре́жде вну́треннее сткля́ницы и блю́да, да бу́дет и вне́шнее и́ма чи́сто. Го́ре вам, кни́жницы и фарисе́е лицеме́ри, я́ко подо́битеся гробо́м пова́пленым, и́же внею́ду у́бо явля́ются красны́, внутрью́ду же по́лни суть косте́й ме́ртвых, и вся́кия нечистоты́. Та́ко и вы, внею́ду у́бо явля́етеся челове́ком пра́ведни, внутрью́ду же есте́ по́лни лицеме́рия и беззако́ния. Го́ре вам, кни́жницы и фарисе́е, лицеме́ри, я́ко зи́ждете гро́бы проро́ческия, и кра́сите ра́ки пра́ведных, и глаго́лете: а́ще бы́хом бы́ли во дни оте́ц на́ших, не бы́хом у́бо о́бщницы им бы́ли в кро́ви проро́к. Те́мже са́ми свиде́тельствуете себе́, я́ко сы́нове есте́ изби́вших проро́ки. И вы испо́лните ме́ру оте́ц ва́ших. Змия́, порожде́ния ехи́днова, ка́ко убежите́ от суда́ огня́ гее́нскаго? Сего́ ра́ди, се Аз послю́ к вам проро́ки и прему́дры, и кни́жники: и от них убие́те и ра́спнете, и от них бие́те на со́нмищих ва́ших, и изжене́те от гра́да во град. Я́ко да прии́дет на вы вся́ка кровь пра́ведна, пролива́емая на земли́, от кро́ве А́веля пра́веднаго до кро́ве Заха́рии, сы́на Варахи́ина, его́же уби́сте между́ це́рковию и олтаре́м. Ами́нь, глаго́лю вам, я́ко прии́дут вся сия́ на род сей. Иерусали́ме, Иерусали́ме, изби́вый проро́ки, и ка́мением побива́яй по́сланныя к нему́: колькра́ты восхоте́х собра́ти ча́да твоя́, я́коже собира́ет ко́кош птенцы́ своя́ под криле́, и не восхоте́сте? Се, оставля́ется вам дом ваш пуст. Глаго́лю бо вам, я́ко не и́мате Мене́ ви́дети отсе́ле, до́ндеже рече́те: благослове́н Гряды́й во и́мя Госпо́дне.

Посем псалом 50. Таже, Спаси, Бо́же, лю́ди Твоя́: Го́споди поми́луй, 12. Посем ектения малая.

Таже кондак, глас 2. Подобен: Вы́шних ища́:

Час душе́ конца́ помы́сливши, / и посече́ния смоко́вницы убоя́вшися, / да́нный тебе́ тала́нт / трудолю́бно де́лай окая́нная / бо́дрствующи и зову́щи: / да не пребу́дем вне черто́га Христо́ва.

Икос: Что уныва́еши душе́ моя́ окая́нная? / Что мечта́еши безвре́менно попече́ния неполе́зная? / Что упражня́ешися к мимотеку́щим? / После́днейший час есть отсе́ле, / и разлучи́тися и́мамы от су́щих зде. / До́ндеже вре́мя и́маши, возни́кни зову́щи: / согреши́х Ти, Спа́се мой, / не посецы́ мене́ я́коже непло́дную смоко́вницу, / но я́ко благоутро́бен Го́споди, / уще́дри со стра́хом зову́щую: / да не пребу́дем вне черто́га Христо́ва.

Синаксарь.

Таже двоепеснец, егоже краестрочие: Трити те, сиесть, во вторник же. Творение господина Космы, ирмос по дважды, стихи же на 12. Последи же ирмос, оба лика вкупе. Глас 2.

Песнь 8.

{Τ} Ирмос: Веле́нию мучи́телеву / преподо́бнии трие́ о́троцы не повину́вшеся, / в пещь вве́ржени, Бо́га испове́даху, пою́ще: / благослови́те, дела́ Госпо́дня, Го́спода.

{Ρ} Ле́ность дале́че нас отве́ржим, / и све́тлыми свеща́ми безсме́ртнаго Жениха́ Христа́ пе́нием усря́щим, / благослови́те, вопию́ще, дела́ Госпо́дня Го́спода.

{Ι} Да удовле́ет общи́тельный души́ на́шея еле́й в сосу́дех, / я́ко да не на ку́плю поло́жше вре́мя по́честей, пое́м: / благослови́те дела́ Госпо́дня Го́спода.

{Τ} Тала́нт ели́цы от Бо́га прия́сте, равноси́льную благода́ть, / по́мощию да́вшаго Христа́ возрасти́те, пою́ще: / благослови́те дела́ Госпо́дня Го́спода.

Хва́лим, благослови́м, покланя́емся Го́сподеви, пою́ще, и превознося́ще во вся ве́ки.

И паки ирмос: Веле́нию мучи́телеву:

Честне́йшую не поем.

Песнь 9.

{Η} Ирмос: Невмести́маго Бо́га / во чре́ве вмести́вшая, / и Ра́дость ми́ру роди́вшая, / Тя пое́м, Богоро́дице Де́во.

{Τ} Ученико́м Благи́й, бди́те, рекл еси́, / во́ньже час прии́дет Госпо́дь, не разуме́ете, / отда́ти кому́ждо.

{Ε} Во второ́м Твое́м и стра́шном прише́ствии Влады́ко, / десны́м овца́м мя сопричти́, / прегреше́ний презре́в мои́х мно́жества.

И паки вместо, Досто́йно, Ирмос: Невмести́маго Бо́га:

Ексапостиларий, трижды:

Черто́г Твой ви́жду, Спа́се мой, украше́нный, / и оде́жды не и́мам, да вни́ду в онь: / просвети́ одея́ние души́ моея́ / Светода́вче, и спаси́ мя.

На хвалитех поставим стихов 4, и поем стихиры самогласны повторяюще, глас 1:

Во све́тлостех святы́х Твои́х, / ка́ко вни́ду недосто́йный? / А́ще бо дерзну́ совни́ти в черто́г, / оде́жда мя облича́ет, я́ко несть бра́чна, / и свя́зан изве́ржен бу́ду от а́нгелов. / Очи́сти Го́споди, скве́рну души́ моея́, / и спаси́ мя я́ко Человеколю́бец.

Глас 2: Душе́вною ле́ностию воздрема́вся, / не стяжа́х Женише́ Христе́, / горя́ща свети́льника и́же от доброде́телей, / и де́вам уподо́бихся бу́им, / во вре́мя де́лания глумля́ся. / Утро́бы щедро́т Твои́х не затвори́ мне Влады́ко, / но оттря́с мой омраче́нный сон, возста́ви, / и с му́дрыми введи́ де́вами в черто́г Твой, / иде́же глас чи́стый пра́зднующих, / и вопию́щих непреста́нно: / Го́споди, сла́ва Тебе́.

Сла́ва, и ны́не, глас 4: Скры́вшаго тала́нт осужде́ние слы́шавши, о душе́ / не скрыва́й словесе́ Бо́жия, / возвеща́й чудеса́ Его́, / да умножа́ющи дарова́ние, / вни́деши в ра́дость Го́спода твоего́.

На стиховне стихиры самогласны, глас 6:

Прииди́те ве́рнии, / де́лаим усе́рдно Влады́це: / подава́ет бо рабо́м бога́тство, / и по ра́венству ки́йждо да многоусугу́бим благода́ти тала́нт: / ов у́бо му́дрость да прино́сит де́лы благи́ми, / ов же слу́жбу све́тлости да соверша́ет. / Да приобща́ется же сло́вом ве́рный та́йны ненауче́нному, / и да расточа́ет бога́тство убо́гим други́й: / си́це бо заимова́нное многоусугу́бим, / и я́ко строи́телие ве́рнии благода́ти, / Влады́чния ра́дости сподо́бимся. / Тоя́ нас сподо́би, Христе́ Бо́же, / я́ко Человеколю́бец.

Стих: Испо́лнихомся зау́тра ми́лости Твоея́, Го́споди, возра́довахомся, и возвесели́хомся: во вся дни на́ша возвесели́хомся. За дни, в ня́же смири́л ны еси́, ле́та в ня́же ви́дехом зла́я. И при́зри на рабы́ Твоя́, и на дела́ Твоя́, / и наста́ви сы́ны их.

Егда́ прии́деши во сла́ве со а́нгельскими си́лами, / и ся́деши на престо́ле, Иису́се, разсужде́ния, / да мя Па́стырю Благи́й не разлучи́ши: / пути́ бо десны́я ве́си, / развраще́ни же суть шу́ии. / Да не у́бо с ко́злищи гру́баго мя грехо́м погуби́ши, / но десны́м мя сочета́в овца́м, / спаси́ я́ко Человеколю́бец.

Стих: И бу́ди све́тлость Го́спода Бо́га на́шего на нас, и дела́ рук на́ших испра́ви на нас, / и де́ло рук на́ших испра́ви.

Женише́, добро́тою кра́сный па́че всех челове́к, / призва́вый нас к трапе́зе духо́вней черто́га Твоего́, / неле́пый мой зрак прегреше́ний / совлецы́ прича́стием страда́ний Твои́х, / и оде́ждею сла́вы украси́в Твоея́ красоты́ / сообе́дника све́тла мя покажи́ Твоего́ Ца́рствия, / я́ко Милосе́рд.

Слава, и ныне глас 7: Се тебе́ тала́нт Влады́ка вверя́ет душе́ моя́, / стра́хом приими́ дар, заи́мствуй да́вшему, / раздава́й ни́щим, и стяжи́ дру́га Го́спода, / да ста́неши одесну́ю Его́, егда́ прии́дет во сла́ве, / и услы́шиши блаже́нный глас: / вни́ди ра́бе в ра́дость Го́спода твоего́. / Тоя́ досто́йна мя сотвори́ Спа́се, заблуди́вшаго, / вели́кия ра́ди Твоея́ ми́лости.

И прочее последование яко обычно.

Часы со обычным стихословием, и чтение Евангелия.

На 6-м часе тропарь пророчества, глас 1:

Безме́рно согреша́ющим, / бога́тно прости́ Спа́се, / и сподо́би нас неосужде́нно поклони́тися / Твоему́ свято́му Воскресе́нию, / моли́твами Пречи́стыя Твоея́ Ма́тере, / еди́не Многоми́лостиве.

Прокимен, псалом 129. Глас 6: Я́ко у Го́спода ми́лость, / и мно́гое у Него́ избавле́ние. Стих: Из глубины́ воззва́х к Тебе́ Го́споди, Го́споди услы́ши глас мой.

Пророчества Иезекиилева чтение. [Глава 1, ст. 21 – 28. гл. 2, ст. 1]

Внегда́ идя́ху [живо́тная], идя́ху [и коле́са], и внегда́ стоя́ти им, стоя́ху [и коле́са с ни́ми]: и егда́ воздвиза́хуся от земли́, воздвиза́хуся с ни́ми [и коле́са], я́ко дух жи́зни бя́ше в колесе́х. И подо́бие над главо́ю живо́тных я́ко твердь, я́ко виде́ние криста́лла, просте́ртое над кри́лами их свы́ше. И под тве́рдию кри́ла их просте́рта, паря́ще друг ко дру́гу, кому́ждо два спряже́на, прикрыва́юще телеса́ их. И слы́шах глас крил их, внегда́ паря́ху, я́ко глас вод мно́гих, я́ко глас Бо́га Саддаи́: и внегда́ ходи́ти им, глас сло́ва я́ко глас полка́: и внегда́ стоя́ти им, почива́ху кри́ла их. И се глас превы́ше тве́рди су́щия над главо́ю их, внегда́ стоя́ти им, низпуска́хуся кри́ла их. И над тве́рдию, я́же над главо́ю их, я́ко виде́ние ка́мене сапфи́ра, подо́бие престо́ла на нем, и на подо́бии престо́ла подо́бие я́коже вид челове́чь сверху́. И ви́дех я́ко виде́ние иле́ктра, я́ко виде́ние огня́ внутрь его́ о́крест от виде́ния чресл и вы́ше, и от виде́ния чресл да́же до до́лу ви́дех виде́ние огня́, и свет его́ о́крест. Я́ко виде́ние дуги́, егда́ есть на о́блацех в день дождя́, та́ко стоя́ние све́та о́крест. Сие́ виде́ние подо́бие сла́вы Госпо́дни.

Прокимен, псалом 130, глас 4: Да упова́ет Изра́иль на Го́спода / от ны́не и до ве́ка. Стих: Го́споди, не вознесе́ся се́рдце мое́, ниже́ вознесо́стеся о́чи мои́.

И прочее. Вкупе же поем и 9-й час, без кафисмы, и чтем Евангелие. И блаженны поем, и Помяни́ нас Го́споди, с поклоны. И прочее все, якоже и в Понедельник указася.

В ТОЙЖЕ СВЯТЫЙ И ВЕЛИКИЙ ВТОРНИК ВЕЧЕРА

Во светильничное, обычное стихословие, на Го́споди воззва́х, поставим стихов 10, и поем стихиры самогласны.

Глас 1: Во све́тлостех святы́х Твои́х, ка́ко вни́ду недосто́йный? / А́ще бо дерзну́ совни́ти в черто́г, / оде́жда мя облича́ет, я́ко несть бра́чна, / и свя́зан изве́ржен бу́ду от а́нгелов: / очи́сти Го́споди скве́рну души́ моея́, / и спаси́ мя я́ко Человеколю́бец.

Глас 2: Душе́вною ле́ностию воздрема́вся, / не стяжа́х Женише́ Христе́, / горя́ща свети́льника и́же от доброде́телей, / и де́вам уподо́бихся бу́им, / во вре́мя де́лания глумля́ся: / утро́бы щедро́т Твои́х не затвори́ мне Влады́ко, / но оттря́с мой омраче́нный сон, возста́ви Ми́лостиве, / и с му́дрыми введи́ де́вами в черто́г Твой, / иде́же глас чи́стый пра́зднующих, / и вопию́щих непреста́нно: / Го́споди сла́ва Тебе́.

Глас 4: Скры́вшаго тала́нт осужде́ние слы́шавши, о душе́, / не скрыва́й словесе́ Бо́жия, / возвеща́й чудеса́ его́, / да умножа́ющи дарова́ние, / вни́деши в ра́дость Го́спода твоего́.

Глас 6: Прииди́те ве́рнии, де́лаим усе́рдно Влады́це: / подава́ет бо рабо́м бога́тство, / и по ра́венству ки́йждо многоусугу́бим благода́ти тала́нт: / ов у́бо му́дрость да прино́сит де́лы благи́ми, / ов же слу́жбу све́тлости да соверша́ет: / да приобща́ется же сло́вом ве́рный, та́йны ненауче́нному, / и да расточа́ет бога́тство убо́гим други́й. / Си́це бо заимова́нное многоусугу́бим, / и я́ко строи́телие ве́рнии благода́ти, / Влады́чния ра́дости сподо́бимся: / тоя́ нас сподо́би Христе́ Бо́же, / я́ко Человеколю́бец.

Егда́ прии́деши во сла́ве со а́нгельскими си́лами, / и ся́деши на престо́ле Иису́се разсужде́ния, / да мя Па́стырю Благи́й не разлучи́ши, / пути́ бо десны́я ве́си, / развраще́ни же суть шу́ии. / Да не у́бо с ко́злищи гру́баго мя грехо́м погуби́ши, / но десны́м мя сочета́в овца́м, / спаси́ я́ко Человеколю́бец.

Женише́ добро́тою кра́сный па́че всех челове́к, / призва́вый нас к трапе́зе духо́вней черто́га Твоего́, / неле́пый мой зрак прегреше́ний совлецы́, / прича́стием страда́ний Твои́х, / и оде́ждею сла́вы украси́в Твоея́ красоты́, / сообе́дника све́тла мя покажи́ Твоего́ Ца́рствия, / я́ко Милосе́рд.

Слава, и ныне, глас 7: Се тебе́ тала́нт Влады́ка вверя́ет душе́ моя́: / стра́хом приими́ дар, заи́мствуй да́вшему ти, / раздава́й ни́щим, и стяжи́ дру́га Го́спода, / да ста́неши одесну́ю Его́, егда́ прии́дет во сла́ве, / и услы́шиши блаже́нный глас: / вни́ди ра́бе в ра́дость Го́спода твоего́. / Тоя́ досто́йна мя сотвори́ Спа́се заблуди́вшаго, / вели́кия ра́ди Твоея́ ми́лости.

Вход со Евангелием. Све́те ти́хий:

Прокимен, псалом 131, глас 6: Воскресни́ Го́споди в поко́й Твой, / Ты и киво́т Святы́ни Твоея́. Стих: Помяни́ Го́споди Дави́да, и всю кро́тость его́.

Исхода чтение. [Глава 2, ст. 5 – 10.]

Сни́де дщерь фарао́нова измы́тися на реку́, и рабы́ни ея́ прохожда́ху при реце́: и ви́девши ковче́жец в лучи́це, посла́вши рабы́ню, взя и́. Отве́рзши же, ви́дит отроча́ пла́чущееся в ковче́жце, и пощаде́ е́ дщерь фарао́ня, и рече́: от дете́й евре́йских сие́. И рече́ сестра́ его́ дще́ри фарао́нове: хо́щеши ли призову́ ти жену́ корми́лицу от евре́й, и воздои́т ти отроча́? И рече́ ей дщерь фарао́нова: иди́. Ше́дши же отрокови́ца, призва́ ма́терь отроча́те. Рече́ же к ней дщерь фарао́нова: соблюди́ ми отроча́ сие́, и воздо́й ми е́: аз же дам ти мзду. Взя же отроча́ жена́, и доя́ше е́. Возмужа́вшу же отроча́ти, введе́ е́ ко дще́ри фарао́нове, и бысть ей в сы́на: и нарече́ и́мя ему́ Моисе́й, глаго́лющи: от воды́ взях его́.

Прокимен, псалом 132, глас 4: Се что добро́, или́ что красно́, / но е́же жи́ти бра́тии вку́пе. Стих: Я́ко ми́ро на главе́, сходя́щее на браду́, браду́ Ааро́ню.

Иова чтение. [Глава 1, ст. 13 – 22]

Бысть я́ко день сей, сы́нове И́овлевы и дще́ри его́ пия́ху вино́ в дому́ бра́та своего́ старе́йшаго. И се ве́стник прии́де ко И́ову, и рече́ ему́: супру́ги воло́в оря́ху, и осли́цы пася́хуся близ их. И прише́дше плени́тели плени́ша их, и о́троки изби́ша мече́м, и спасо́хся аз еди́н, и приидо́х возвести́ти тебе́. Еще́ сему́ глаго́лющу, прии́де ин ве́стник, и рече́ ко И́ову: огнь спаде́ с небесе́, и пожже́ о́вцы, и па́стыри пояде́ подо́бне: спасо́хся же аз еди́н, и приидо́х возвести́ти тебе́. Еще́ сему́ глаго́лющу, прии́де ин ве́стник, и рече́ ко И́ову: ко́нницы сотвори́ша нача́льства три, и окружи́ша вельблю́ды, и плени́ша их, и о́троки изби́ша мечми́: спасо́хся же аз еди́н, и приидо́х возвести́ти тебе́. Еще́ сему́ глаго́лющу, ин ве́стник прии́де, глаго́ля И́ову: сыно́м твои́м, и дще́рем твои́м яду́щим и пию́щим у бра́та своего́ старе́йшаго. Внеза́пу ветр вели́к на́йде от пусты́ни, и косне́ся четы́рем угло́м хра́мины, и паде́ хра́мина на де́ти твоя́, и сконча́шася: спасо́хся же аз еди́н, и приидо́х возвести́ти тебе́. Та́ко [услы́шав] И́ов, воста́в растерза́ ри́зы своя́, и остриже́ власы́ главы́ своея́, [и посы́па пе́рстию главу́ свою́,] и пад на зе́млю, поклони́ся [Го́сподеви]. И рече́: сам наг изыдо́х от чре́ва ма́тере моея́, наг и отыду́ та́мо: Госпо́дь даде́, Госпо́дь отъя́т: я́ко Го́сподеви изво́лися, та́ко бысть: бу́ди и́мя Госпо́дне благослове́нно [во ве́ки]. Во всех сих приключи́вшихся ему́ ничто́же согреши́ И́ов пред Го́сподем [ниже́ устна́ма свои́ма], и не даде́ безу́мия Бо́гу.

И абие, Да испра́вится моли́тва моя́:

Евангелие от Матфеа, зачало 102. [Мф. 24, 36 – 26, 2.]

Рече́ Госпо́дь Свои́м ученико́м: о дни и часе́ прише́ствия Сы́на Челове́ческаго никто́же весть, ни а́нгели небе́снии, то́кмо Оте́ц Мой еди́н. Я́коже бо бысть во дни Но́евы, та́ко бу́дет и прише́ствие Сы́на Челове́ческаго. Я́коже бо бе́ху во дни пре́жде пото́па, яду́ще и пию́ще, женя́щеся и посяга́юще, до него́же дне вни́де Но́е в ковче́г, и не уве́деша, до́ндеже прии́де вода́, и взят вся: та́ко бу́дет и прише́ствие Сы́на Челове́ческаго. Тогда́ два бу́дета на селе́: еди́н пое́млется, а други́й оставля́ется. Две ме́люще в же́рновах: еди́на пое́млется, и еди́на оставля́ется. Бди́те у́бо, я́ко не ве́сте, в кий час Госпо́дь ваш прии́дет. Сие́ же ве́дите, я́ко а́ще бы ве́дал до́му влады́ка, в ку́ю стра́жу тать прии́дет, бдел у́бо бы, и не бы дал подкопа́ти хра́ма своего́. Сего́ ра́ди и вы бу́дите гото́ви, я́ко, во́ньже час не мните́, Сын Челове́ческий приидет. Кто у́бо есть ве́рный раб и му́дрый, его́же поста́вит господи́н его́ над до́мом свои́м, е́же дая́ти им пи́щу во вре́мя их? Блаже́н раб той, его́же, прише́д господи́н его́, обря́щет та́ко творя́ща. Ами́нь, глаго́лю вам, я́ко над всем име́нием свои́м поста́вит его́. А́ще ли же рече́т злый раб той в се́рдцы свое́м: косни́т господи́н мой приити́. И на́чнет би́ти клевре́ты своя́, я́сти же и пи́ти с пия́ницами. Прии́дет господи́н раба́ того́ в день, во́ньже не ча́ет, и в час, во́ньже не весть. И проте́шет его́ полма́, и часть его́ с неве́рными положи́т: ту бу́дет плачь и скре́жет зубо́м. Тогда́ уподо́бися Ца́рствие Небе́сное десяти́м де́вам, я́же прия́ша свети́льники своя́, и изыдо́ша в сре́тение жениху́. Пять же бе от них мудры́, и пять юро́дивы. Юро́дивыя же прие́мша свети́льники своя́, не взя́ша с собо́ю еле́а. Му́дрыя же прия́ша еле́й в сосу́дех со свети́льники свои́ми. Косня́щу же жениху́, воздрема́шася вся, и спа́ху. Полу́нощи же вопль бысть: се, жени́х гряде́т, исходи́те в сре́тение его́. Тогда́ воста́вше вся де́вы ты́я, и украси́ша свети́льники своя́. Юро́дивыя же му́дрым ре́ша: дади́те нам от еле́а ва́шего, я́ко свети́льницы на́ши угаса́ют. Отвеща́ша же му́дрыя, глаго́люще: еда́ ка́ко не доста́нет нам и вам: иди́те же па́че к продаю́щим и купи́те себе́. Иду́щим же им купи́ти, прии́де жени́х, и гото́выя внидо́ша с ним на бра́ки, и затворе́ны бы́ша две́ри. Последи́ же приидо́ша и про́чия де́вы, глаго́люще: Го́споди, Го́споди, отве́рзи нам. Он же отвеща́в рече́ им: ами́нь глаго́лю вам, не вем вас. Бди́те у́бо, я́ко не ве́сте дне, ни часа́, во́ньже Сын Челове́ческий прии́дет. Я́коже бо челове́к не́кий отходя́ призва́ своя́ рабы́, и предаде́ им име́ние свое́. И о́вому у́бо даде́ пять тала́нт, о́вому же два, о́вому же еди́н, кому́ждо проти́ву си́лы его́: и оты́де а́бие. Шед же прие́мый пять тала́нт, де́ла в них и сотвори́ други́я пять тала́нт. Та́кожде и и́же два, приобре́те и той друга́я два. Прие́мый же еди́н, шед вкопа́ его́ в зе́млю, и скры сребро́ господи́на своего́. По мно́зе же вре́мени прии́де господи́н раб тех, и стяза́ся с ни́ми о словеси́. И присту́пль пять тала́нт прие́мый, принесе́ други́я пять тала́нт, глаго́ля: го́споди, пять тала́нт ми еси́ пре́дал, се, други́я пять тала́нт приобрето́х и́ми. Рече́ же ему́ госпо́дь его́: до́брый ра́бе, благи́й и ве́рный, о ма́ле был еси́ ве́рен, над мно́гими тя поста́влю: вни́ди в ра́дость го́спода твоего́. Присту́пль же и и́же два тала́нта прие́мый, рече́: го́споди, два тала́нта ми еси́ пре́дал: се, друга́я два тала́нта приобрето́х и́ма. Рече́ же ему́ госпо́дь его́: до́брый ра́бе, благи́й и ве́рный, о ма́ле ми был еси́ ве́рен, над мно́гими тя поста́влю: вни́ди в ра́дость го́спода твоего́. Присту́пль же и прие́мый еди́н тала́нт, рече́: го́споди, ве́дях тя, я́ко же́сток еси́ челове́к: жне́ши, иде́же не се́ял еси́, и собира́еши, ю́дуже не расточи́л еси́. И убоя́вся, шед скрых тала́нт твой в земли́, и се и́маши твое́. Отвеща́в же госпо́дь его́, рече́ ему́: лука́вый ра́бе и лени́вый, ве́дяше, я́ко жну, иде́же не се́ях, и собира́ю, ю́дуже не расточи́х. Подоба́ше у́бо тебе́ вда́ти сребро́ мое́ торжнико́м, и прише́д аз взял бых свое́ с ли́хвою. Возми́те у́бо от него́ тала́нт, и дади́те иму́щему де́сять тала́нт. Иму́щему бо везде́ дано́ бу́дет, и преизбу́дет: от неиму́щаго же, и е́же мни́тся име́я, взя́то бу́дет от него́. И неключи́маго раба́ вве́рзите во тьму кроме́шнюю: ту бу́дет плач и скре́жет зубо́м. Сия́ глаго́ля возгласи́: име́яй у́ши слы́шати, да слы́шит. Егда́ же прии́дет Сын Челове́ческий в сла́ве Свое́й, и вси святи́и а́нгели с Ним, тогда́ ся́дет на престо́ле сла́вы Своея́. И соберу́тся пред Ним вси язы́цы, и разлучи́т их друг от дру́га, я́коже па́стырь разлуча́ет о́вцы от ко́злищ. И поста́вит о́вцы одесну́ю Себе́, а ко́злища ошу́юю. Тогда́ рече́т Царь су́щим одесну́ю Его́: прииди́те, благослове́ннии Отца́ Моего́, насле́дуйте угото́ванное вам Ца́рствие от сложе́ния ми́ра. Взалка́хся бо, и да́сте Ми я́сти; возжада́хся, и напои́сте Мя; стра́нен бех, и введо́сте Мене; наг, и оде́ясте Мя; бо́лен, и посети́сте Мене́; в темни́це бех, и приидо́сте ко Мне. Тогда́ отвеща́ют Ему́ пра́ведницы, глаго́люще: Го́споди, когда́ Тя ви́дехом а́лчуща, и напита́хом; или́ жа́ждуща, и напои́хом? Когда́ же Тя ви́дехом стра́нна, и введо́хом; или́ на́га, и оде́яхом? Когда́ же Тя ви́дехом боля́ща, или́ в темни́це, и приидо́хом к Тебе́? И отвеща́в Царь рече́т им: ами́нь глаго́лю вам, поне́же сотвори́сте еди́ному сих бра́тий Мои́х ме́ньших, Мне сотвори́сте. Тогда́ рече́т и су́щим ошу́юю Его́: иди́те от Мене́, прокля́тии, во огнь ве́чный, угото́ванный диа́волу и а́нгелом его́. Взалка́хся бо, и не да́сте Ми я́сти; возжада́хся, и не напои́сте Мене́. Стра́нен бех, и не введо́сте Мене́; наг, и не оде́ясте Мене́; бо́лен, и в темни́це, и не посети́сте Мене́. Тогда́ отвеща́ют Ему́ и ти́и, глаго́люще: Го́споди, когда́ Тя ви́дехом а́лчуща, или́ жа́ждуща, или́ странна, или́ на́га, или́ бо́льна, или́ в темни́це, и не послужи́хом Тебе́? Тогда́ отвеща́ет им, глаго́ля: ами́нь, глаго́лю вам, поне́же не сотвори́сте еди́ному сих ме́ньших, ни Мне сотвори́сте. И и́дут си́и в му́ку ве́чную, пра́ведницы же в живо́т ве́чный.

И бысть, егда́ сконча́ Иису́с вся словеса́ сия́, рече́ ученико́м Свои́м: ве́сте, я́ко по двою́ дню Па́сха бу́дет, и Сын Челове́ческий пре́дан бу́дет на пропя́тие.

И прочая Преждеосвященных.

ВО СВЯТЫЙ И ВЕЛИКИЙ ВТОРНИК ПОВЕЧЕРИЕ ВЕЛИКОЕ

На немже поем трипеснец, творение господина Андреа Критскаго.

Глас 2. Песнь 3.

Ирмос: Непло́дствовавший мой ум, / плодоно́сен, Бо́же, покажи́ ми, / де́лателю до́брых, насади́телю благи́х, / благоутро́бием Твои́м.

Кончи́ны вре́мя, обрати́мся про́чее, Христо́с учи́т: / прии́дет бо во мгнове́нии, прии́дет и не уме́длит, / суди́ти ми́ру всему́.

Внеза́пное Своего́ прише́ствия Христо́с явля́я, рече́, / Но́ево дре́вле ненаде́жное тле́ние, / навести́ся хотя́щее земли́.

Отве́рзеся черто́г, / украси́ся с ним Боже́ственный брак, / Жени́х близ призыва́яй нас, угото́вимся про́чее.

Си́монов дом, невмести́маго везде́, / вмести́ Тя Иису́се Царю́, / и жена́ гре́шная ми́ром Тя пома́за.

Благово́ния та́инственнаго испо́лнена жена́, / пе́рваго изба́вися злово́ния Спа́се, мно́гих грехо́в. / Ми́ро бо источа́еши жи́зни.

Небе́сная пи́ще а́лчущим, животе́ сам сый, / ял еси́ Христе́ с челове́ки, проявля́я снисхожде́ние Твое́.

Неблагода́рный учени́к, отве́ргся Тебе́ Христе́, / собо́рище всебеззако́нных люде́й сподвиза́ше на Тя, / на преда́ние обра́щься.

Слава: Со Отце́м Тебе́ Сы́ну, и Ду́ху пра́вому, / еди́ному Естеству́ покланя́юся и воспева́ю, / Ли́цы разделя́я, и Существо́м соединя́я.

И ныне, Богородичен: Ро́ждшая Тя А́гница, Па́стыря и А́гнца, / при́сно мо́лит Иису́се Бо́же, / о всех лю́дех ве́рующих в Тя.

Седален, глас 1. Подобен: Лик а́нгельский:

Се лука́вый сове́т вои́стинну собра́ся неи́стовно, / я́ко осу́жденника осуди́ти, горе́ седя́щаго, / я́ко Судию́ всех Го́спода: / ны́не собира́ется с Пила́том И́род, А́нна, вку́пе же и Каиа́фа, / испыта́ти еди́наго долготерпели́ваго.

Песнь 8.

Ирмос: В купине́ Моисе́ю, Де́вы чу́до, / на Сина́йстей горе́ Прообрази́вшаго иногда́, / по́йте, благослови́те / и превозноси́те во вся ве́ки.

Не неве́дый вре́мя на́шего сконча́ния, держа́й ве́ки, / день о́ный не ве́дети предрече́, / но преде́лы всем положи́ к смиреному́дрию.

Егда́ ся́деши Судие́, разлуча́яй, я́коже рекл еси́, / па́стырь от ове́ц ко́злища Спа́се, / стоя́ния о́наго изба́ви нас, / не лиши́ же нас Боже́ственныя десни́цы Твоея́.

Ты еси́ Па́сха на́ша, / пожре́ный за всех, я́ко А́гнец и Же́ртва, / и прегреше́ний очище́ние, / и Твоя́ Боже́ственныя стра́сти превозно́сим Христе́, во вся ве́ки.

Дре́ву уподо́бися, и селу́, и хра́мине, все житие́ душе́ моя́: / те́мже стяжи́ к Бо́гу гото́во се́рдце, / да не что тле́нием пло́ти оста́виши.

Не к фарисе́ом Спа́се, / ни к Си́мону то́кмо изво́лил еси́ во храм на снедь вни́ти, / но уже́ и мытари́ вку́пе и блудни́цы, / Твое́ почерпа́ют милосе́рдие.

Сребролю́бие рачи́тельствуяй преда́тель Иу́да, / о истощи́вшемся ми́ре печа́шеся: / про́чее же о прода́нии Влады́ки, / к беззако́нным прише́д о цене́ согласова́ше.

О блаже́нных рук! / О власо́в и усте́н целому́дренныя блудни́цы! / И́миже возлия́, Спа́се, ми́ро на но́зе Твои́, / отира́ющи я́, и ча́сто облобыза́ющи.

Возлежа́щу Тебе́ Сло́ве, жена́ предста́вши, и у ног рыда́ющи, / сткля́ницу Спа́се истощи́ ми́ра / на главу́ Тебе́ безсме́ртнаго ми́ра.

Благослови́м Отца́ и Сы́на, и Свята́го Ду́ха, Го́спода.

Со Отце́м Сы́на и Свята́го Ду́ха, / Святу́ю Тро́ицу в Божестве́ еди́ном сла́вим, вопию́ще: / Свят, Свят, Свят еси́ во ве́ки.

И ныне, Богородичен: Моли́твами Спа́се, Пречи́стыя Твоея́ Ма́тере, и Твои́х апо́стол, / ми́лости Твоя́ нам низпосли́ бога́тно, / и мир Твой пода́ждь лю́дем Твои́м.

Таже: Хва́лим, благослови́м, покланя́емся Го́сподеви, пою́ще, и превознося́ще во вся ве́ки.

Ирмос: В купине́ Моисе́ю, Де́вы чу́до:

Песнь 9.

Ирмос: Преесте́ственно пло́тию заче́ншую во чре́ве, / от Отца́ безле́тно предвозсия́вшее Сло́во, / в пе́снех немо́лчных / велича́ем, ве́рнии.

Де́лания вре́мя, спасе́ния наме́рение: / тала́нт взе́мши, дре́вний о́браз, душе́ моя́, / купи́ ве́чную жизнь.

Я́ко свещи́ све́тлыя украси́вше ду́ши, / Жениху́ приходя́щу к нетле́нному бра́ку, / пре́жде заключе́ния двере́й, вни́дем с Ним.

Показа́ти хотя́ Иису́се, / преесте́ственное Твоего́ смире́ния всем, / ял еси́ в дому́ Си́монове вечеря́в, а́лчущих пи́ще.

Хлеб сый животворя́щий, / снел еси́ Иису́се с Си́моном фарисе́ем, / да блудни́ца приобря́щет некупи́мую благода́ть Твою́, истоща́нием ми́ра.

Ру́це мои́ скверна́ве, устне́ блудни́чи во мне, / нечи́сто мое́ житие́, растле́нны у́ды, / но осла́би ми, и оста́ви, вопие́т блудни́ца Христу́.

Присту́пльши жена́ к нога́ма Твои́ма Спа́се, / возлива́ше ми́ро, благоуха́ния исполня́ющи, / и ми́ра исполня́ема дел очище́ния.

Арома́ты богате́ю, доброде́тельми же нище́тствую, / я́же и́мам, Тебе́ приношу́: / даждь Сам, я́же и́маши, и осла́би ми, и оста́ви, / вопие́т блудни́ца Христу́.

Ми́ро у мене́ тле́нное, / ми́ро у Тебе́ жи́зни, / ми́ро бо Тебе́ и́мя излия́нное на досто́йныя, / но осла́би ми, и оста́ви, / вопие́т блудни́ца Христу́.

Слава: Безнача́лен еси́ О́тче, / несозда́нен еси́ Сы́не, / сопресто́лен и Ду́ше, / еди́но три Естество́м, и три Ли́цами, / еди́н Бог и́стинный.

И ныне, Богородичен: Богоро́дице, упова́ние чту́щих Тя при́сно, / не преста́й моля́щи из Тебе́ Роди́вшагося, / изба́вити мя бед, и вся́ких искуше́ний.

ВО СВЯТУЮ И ВЕЛИКУЮ СРЕДУ, НА УТРЕНИ

По шестопсалмии Аллилу́иа, на глас 8, и тропарь трижды Се, Жени́х: Зри в Понедельник Великий.

И стихословие.

По 1 стихословии седален, глас 3. Подобен: Красоте́ де́вства:

Блудни́ца приступи́ к Тебе́, / ми́ро со слеза́ми излива́ющи на но́зе Твои́ Человеколю́бче, / и смра́да зол избавля́ется повеле́нием твои́м! / Ды́ша же благода́ть Твою́ учени́к неблагода́рный, / сию́ отлага́ет, и смра́дом одева́ется, / сребролю́бием продая́ Тебе́. / Сла́ва Христе́ благоутро́бию Твоему́.

Слава, и ныне, тойже.

По 2-м стихословии седален, глас 4. Подобен: Удиви́ся Ио́сиф:

Иу́да льстец, сребролю́бия рачи́тельствуяй, / преда́ти Тя Го́споди, сокро́вище живота́, ле́стно поуча́шеся, / отону́дуже и упи́вся, тече́т ко иуде́ом, / глаго́лет беззако́нным: / что ми хо́щете да́ти, и аз вам преда́м, / во е́же распя́ти Его́?

Слава, и ныне, тойже.

По 3-м стихословии седален, глас 1. Подобен: Гроб Твой:

Блудни́ца в пла́че вопия́ше Ще́дре, / отира́ющи те́пле пречи́стеи Твои́ но́зе власы́ главы́ своея́, / и из глубины́ стеня́щи: / не отри́ни мя, ниже́ омерзи́ Бо́же мой, / но приими́ мя ка́ющуюся, / и спаси́ я́ко еди́н Человеколю́бец.

Слава, и ныне, тойже.

Чтения же вся от сказания, еже от Матфеа святаго Евангелия дне. Таже:

Евангелие от Иоанна, зачало 41. [Ин. 12, 17 – 50.]

Во вре́мя о́но, свиде́тельствоваше наро́д сый со Иису́сом, егда́ Ла́заря возгласи́ от гро́ба и воскреси́ его́ от ме́ртвых. Сего́ ра́ди и сре́те Его́ наро́д, я́ко слы́шаша Его́ сие́ сотво́рша зна́мение. Фарисе́е у́бо ре́ша к себе́: ви́дите, я́ко ника́яже по́льза есть, се мир по Нем и́дет. Бя́ху же не́цыи Е́ллини от вше́дших, да покло́нятся в пра́здник. Си́и у́бо приступи́ша к Фили́ппу, и́же бе от Вифсаи́ды Галиле́йския, и моля́ху его́, глаго́люще: го́споди, хо́щем Иису́са ви́дети. Прии́де Фили́пп, и глаго́ла Андре́ови: и па́ки Андре́й и Фили́пп глаго́ласта Иису́сови. Иису́с же отвеща́ и́ма, глаго́ля: прии́де час, да просла́вится Сын Челове́ческий. Ами́нь, ами́нь глаго́лю вам: а́ще зе́рно пшени́чно пад на земли́ не у́мрет, то еди́но пребыва́ет: а́ще ли у́мрет, мног плод сотвори́т. Любя́й ду́шу свою́, погуби́т ю́: и ненави́дяй ду́шу свою́ в ми́ре сем, в животе́ ве́чнем сохрани́т ю́. А́ще кто Мне слу́жит, Мне да после́дствует: и иде́же есмь Аз, ту и слуга́ Мой бу́дет. И а́ще кто Мне слу́жит, почти́т его́ Оте́ц Мой. Ны́не душа́ Моя́ возмути́ся, и что реку́? О́тче, спаси́ Мя от часа́ сего́, но сего́ ра́ди приидо́х на час сей. О́тче, просла́ви и́мя Твое́. Прии́де же глас с небесе́: и просла́вих, и па́ки просла́влю. Наро́д же стоя́й слы́шав, глаго́лаху: гром бысть. Ини́и глаго́лаху: а́нгел глаго́ла Ему́. Отвеща́ Иису́с, и рече́: не Мене́ ра́ди глас сей бысть, но наро́да ра́ди. Ны́не суд есть ми́ру сему́: ны́не князь ми́ра сего́ изгна́н бу́дет вон. И а́ще Аз вознесе́н бу́ду от земли́, вся привлеку́ к Себе́. Сие́ же глаго́лаше, назна́менуя, ко́ею сме́ртию хотя́ше умре́ти. Отвеща́ Ему́ наро́д: мы слы́шахом от зако́на, я́ко Христо́с пребыва́ет во ве́ки: ка́ко Ты глаго́леши, вознести́ся подоба́ет Сы́ну Челове́ческому? Кто есть Сей Сын Челове́ческий? Рече́ же им Иису́с: еще́ ма́ло вре́мя свет в вас есть. Ходи́те, до́ндеже свет и́мате, да тьма вас не и́мет: и ходя́й во тме, не весть, ка́мо и́дет. До́ндеже свет и́мате, ве́руйте во свет, да сы́нове све́та бу́дете. Сия́ глаго́ла Иису́с, и отше́д скры́ся от них. Толи́ка зна́мения сотво́ршу Ему́ пред ни́ми, не ве́роваху в Него́. Да сбу́дется сло́во Иса́ии проро́ка, е́же рече́: Го́споди, кто ве́рова слу́ху на́шему; и мы́шца Госпо́дня кому́ откры́ся? Сего́ ра́ди не можа́ху ве́ровати, я́ко па́ки рече́ Иса́иа: ослепи́ о́чи их, и ока́менил есть сердца́ их, да не ви́дят очи́ма, ни разуме́ют се́рдцем, и обратя́тся, и исцелю́ их. Сия́ рече́ Иса́иа, егда́ ви́де сла́ву Его́, и глаго́ла о Нем. Оба́че у́бо и от князь мно́зи ве́роваша в Него́, но фарисе́й ра́ди не испове́доваху, да не из со́нмищ изгна́ни бу́дут. Возлюби́ша бо па́че сла́ву челове́ческую, не́же сла́ву Бо́жию. Иису́с же воззва́, и рече́: ве́руяй в Мя, не ве́рует в Мя, но в Посла́вшаго Мя. И ви́дяй Мя, ви́дит Посла́вшаго Мя. Аз свет в мир приидо́х, да всяк ве́руяй в Мя, во тме не пребу́дет. И а́ще кто услы́шит глаго́лы Моя́, и не ве́рует, Аз не сужду́ ему́: не приидо́х бо, да сужду́ ми́рови, но да спасу́ мир. Отмета́яйся Мене́ и не прие́мляй глаго́л Мои́х, и́мать судя́щаго ему́: сло́во, е́же глаго́лах, то су́дит ему́ в после́дний день. Я́ко Аз от Себе́ не глаго́лах, но посла́вый Мя Отец, Той Мне за́поведь даде́, что реку́, и что возглаго́лю. И вем, я́ко за́поведь Его́ живо́т ве́чный есть: я́же у́бо Аз глаго́лю, я́коже рече́ Мне Оте́ц, та́ко глаго́лю.

Псалом 50, и трипеснец, творение господина Космы, егоже краестрочие: Тетра́ди псало́. Сиесть В Сре́ду воспою́. Ирмосы по дважды. Тропари на 12. Последи же ирмос оба лика вкупе. Глас 2.

Песнь 3.

{Τ} Ирмос: На ка́мени мя ве́ры утверди́в, / разшири́л еси́ уста́ моя́ на враги́ моя́, / возвесели́ бо ся дух мой внегда́ пе́ти: / несть свят, я́коже Бог наш, / и несть пра́веден, па́че Тебе́, Го́споди.

{Ε} Во тще́тных собо́рище беззако́нных, / и мы́слию собира́ется злонра́вною, / осужде́на Изба́вителя изрещи́ Тя Христе́. / Ему́же пое́м: Ты еси́ Бог наш, / и несть свят па́че Тебе́ Го́споди.

{Τ} Лю́тый сове́т беззако́нных, / притворя́ется богобо́рныя души́ су́щий, / я́ко злопотре́бна пра́веднаго уби́ти Христа́. / Ему́же пое́м: Ты еси́ Бог наш, / и несть свят па́че Тебе́ Го́споди.

Кондак, глас 4. Подобен: Вознесы́йся:

Па́че блудни́цы Бла́же, беззако́нновав, / слез ту́чи ника́коже Тебе́ принесо́х, / но молча́нием моля́ся припа́даю Ти, / любо́вию облобыза́я пречи́стеи Твои́ но́зе, / я́ко да оставле́ние мне я́ко Влады́ка / пода́си долго́в, зову́щу Ти Спа́се: / от скве́рных дел мои́х изба́ви мя.

Икос: Я́же пе́рвее блудни́ца жена́, / внеза́пу целому́дренна яви́ся, / возненави́девши дела́ сту́днаго греха́, и сла́дости теле́сныя, / помина́ющи студ мно́гий и суд муче́ния, / его́же претерпя́т блудни́цы и скве́рнии, / от ни́хже пе́рвый есмь аз, и бою́ся, / но пребыва́ю в злом обы́чаи безу́мный. / Блу́дная же жена́ убоя́вшися, и потща́вшися ско́ро прии́де, / вопию́щи ко Изба́вителю: / Человеколю́бче и Ще́дре, / от скве́рных дел мои́х изба́ви мя.

Синаксарий.

Песнь 8.

{Ρ} Ирмос: Глаго́л мучи́телев поне́же превозмо́же, / седмери́цею пещь разжже́нна бысть иногда́, / в не́йже о́троцы не опали́шася, / царе́во попра́вше веле́ние, / но вопия́ху: вся дела́ Госпо́дня Го́спода по́йте, / и превозноси́те во вся ве́ки.

{Α} Излива́ющи жена́ ми́ро честно́е, / Влады́чню и Боже́ственному стра́шному верху́ Христе́, / следо́в Твои́х пречи́стых прикосну́ся, оскверне́ныма дла́ньма, и вопия́ше: / вся дела́ Госпо́дня Го́спода по́йте, / и превозноси́те во вся ве́ки.

{Δ} Слеза́ми омыва́ет но́зе, пови́нная грехо́м, Созда́вшаго, / и отира́ет власы́ свои́ми. / Те́мже в житии́ соде́янных / не погреши́ избавле́ния, но вопия́ше: / вся дела Госпо́дня Го́спода по́йте, / и превозноси́те во вся ве́ки.

{Ι} Священноде́йствуется избавле́ние благонра́вней, / от спаси́тельных утро́б же и слез исто́чника, / в не́мже испове́данием измы́вшися, / не стыдя́шеся, но вопия́ше: / вся дела́ Госпо́дня Го́спода по́йте, / и превозноси́те во вся ве́ки.

Таже, Хва́лим, благослови́м, покланя́емся Го́сподеви, пою́ще, и превознося́ще во вся ве́ки.

И паки ирмос: Глаго́л мучи́телев:

Честне́йшую, не поем.

Песнь 9.

{Ψ} Ирмос: Душа́ми чи́стыми, и нескве́рными устна́ми, / прииди́те, возвели́чим Нескве́рную и Пречи́стую Ма́терь Емману́илеву, / Е́юже, из Нея́ к Рожде́нному принося́ще моли́тву: / пощади́ ду́ши на́ша, Христе́ Бо́же, и спаси́ нас.

{Α} Неразу́мен я́влься, и лука́в ревнообра́зник, / дар достойнобоже́ствен сло́вом продае́т. / И́мже долг разреши́ся грехо́в, / кра́дый лю́тый Иу́да любобоже́ственную благода́ть: / пощади́ ду́ши на́ша Христе́ Бо́же, и спаси́ нас.

{Λ} Глаго́лет шед беззако́нным князе́м: / что ми хо́щете да́ти, и аз Христа́ вам иско́маго хотя́щим преда́м? / Присвое́ние Христо́во Иу́да отри́нувый зла́том: / пощади́ ду́ши на́ша Христе́ Бо́же, и спаси́ нас.

{Ω} О слепо́тнаго сребролю́бия нечести́ве, / отону́дуже забве́ние получи́л еси́, / я́ко души́ ника́коже равностоя́телен мир, я́коже научи́лся еси́: / отча́янием бо сам себе́ удави́л еси́ вже́гся преда́телю: / пощади́ ду́ши на́ша Христе́ Бо́же, и спаси́ нас.

Таже ирмос: Душа́ми чи́стыми, и нескве́рными устна́ми:

Ексапостиларий, трижды, яко обычно:

Черто́г Твой ви́жду Спа́се мой украше́нный, / и оде́жды не и́мам, да вни́ду в онь, / просвети́ одея́ние души́ моея́ / Светода́вче, и спаси́ мя.

На хвалитех поставим стихи 4, и поем сия самогласны, глас 1:

Тебе́ Де́выя Сы́на, / блудни́ца позна́вши Бо́га, / глаго́лаше, в пла́чи моля́щися, / я́ко слез досто́йная соде́лавшая: / разреши́ долг, я́коже и аз власы́: / возлюби́ лю́бящую, пра́ведно ненави́димую, / и близ мытаре́й Тебе́ пропове́м, / Благоде́телю Человеколю́бче.

Многоце́нное ми́ро, / блудни́ца смеси́ со слеза́ми, / и излия́ на пречи́стеи но́зе Твои́, облобыза́ющи: / о́ную а́бие оправда́л еси́, / нам же проще́ние да́руй / Пострада́вый о нас, и спаси́ нас.

Егда́ гре́шная приноша́ше ми́ро, / тогда́ учени́к соглаша́шеся пребеззако́нным. / О́вая у́бо ра́довашеся, / истоща́ющи ми́ро многоце́нное: / сей же тща́шеся прода́ти Безце́ннаго. / Сия́ Влады́ку познава́ше, / а сей от Влады́ки разлуча́шеся. / Сия́ свобожда́шеся, / а Иу́да раб быва́ше врагу́. / Лю́то есть ле́ность, ве́лие покая́ние: / е́же мне да́руй Спа́се, / пострада́вый о нас, и спаси́ нас.

О Иу́дина окая́нства! / Зря́ше блудни́цу целу́ющую стопы́, / и умышля́ше ле́стию преда́ния целова́ние. / О́ная власы́ разреши́, / а сей я́ростию вяза́шеся, / нося́ вме́сто ми́ра злосмра́дную зло́бу: / за́висть бо не весть предпочита́ти поле́зное. / О Иу́дина окая́нства! / От него́же изба́ви Бо́же, ду́ши на́ша.

Слава, глас 2: Гре́шная тече́ к ми́ру, / купи́ти многоце́нное ми́ро, / е́же пома́зати Благоде́теля, / и миропрода́телю вопия́ше: / Даждь ми ми́ро, да пома́жу и аз / Очи́стившаго вся моя́ грехи́.

И ныне, глас 6: Погруже́нная грехо́м, / обре́те Тя приста́нище спасе́ния, / виждь и ми́ра со слеза́ми растворя́ющую, Тебе́ вопия́ше: / виждь согреша́ющих покая́ния ожида́яй. / Но Влады́ко спаси́ мя от волны́ грехо́вныя, / вели́кия ра́ди Твоея́ ми́лости.

На стиховне стихиры самогласны, глас: 6.

Днесь Христо́с прихо́дит в дом фарисе́ов, / и жена́ гре́шница приступи́вши к нога́м, валя́шеся вопию́щи: / виждь погруже́нную грехо́м, / отча́янную дея́ний ра́ди, / негнуша́емую от Твоея́ бла́гости: / и даждь ми Го́споди оставле́ние злых, и спаси́ мя.

Стих: Испо́лнихомся зау́тра ми́лости Твоея́, Го́споди, возра́довахомся, и возвесели́хомся: во вся дни на́ша возвесели́хомся. За дни, в ня́же смири́л ны еси́, ле́та в ня́же ви́дехом зла́я. И при́зри на рабы́ Твоя́, и на дела́ Твоя́, / и наста́ви сы́ны их.

Простре́ блудни́ца власы́ Тебе́ Влады́це, / простре́ Иу́да ру́це беззако́нным: / о́ва у́бо прия́ти оставле́ние, / ов же взя́ти сре́бреники. / Те́мже Тебе́ вопие́м про́даному и свобо́ждшему нас: / Го́споди сла́ва Тебе́.

Стих: И бу́ди све́тлость Го́спода Бо́га на́шего на нас, и дела́ рук на́ших испра́ви на нас, / и де́ло рук на́ших испра́ви.

Приступи́ жена́ злосмра́дная и оскверне́ная, сле́зы пролива́ющи, / лю́бящи Спа́се, страсть испове́дающи: / ка́ко воззрю́ к Тебе́ Влады́це? / Сам бо прише́л еси́ спасти́ блудни́цу: / из глубины́ уме́ршую мя воскреси́, / и́же Ла́заря воздви́гнувый из гро́ба четверодне́вна: / приими́ мя окая́нную Го́споди, и спаси́ мя.

Стих: Испове́мся Тебе́ Го́споди, всем се́рдцем мои́м, пове́м вся чудеса́ Твоя́.

Отча́янная жития́ ра́ди, / и уве́домая нра́ва ра́ди, / ми́ра нося́щая приступи́ Тебе́ вопию́щи: / да не отве́ржеши мене́ блу́дную, Роди́выйся от Де́вы: / да не пре́зриши моя́ сле́зы ра́досте а́нгелов. / Но приими́ мя ка́ющуюся, / ю́же не отри́нул еси́ согреша́ющую Го́споди, / вели́кия ра́ди Твоея́ ми́лости.

Слава, и ныне, самогласен, глас 8: Творение Кассианы инокини.

Го́споди, я́же во мно́гия грехи́ впа́дшая жена́, / Твое́ ощути́вшая Божество́, / мироно́сицы взе́мши чин, / рыда́ющи ми́ро Тебе́ пре́жде погребе́ния прино́сит: / увы́ мне, глаго́лющи, / я́ко нощь мне есть разжже́ние блуда́ невоздержа́нна, / мра́чное же и безлу́нное раче́ние греха́. / Приими́ моя́ исто́чники слез, / и́же облака́ми производя́й мо́ря во́ду. / Приклони́ся к мои́м воздыха́нием серде́чным, / приклони́вый небеса́ неизрече́нным Твои́м истоща́нием: / да облобыжу́ пречи́стеи Твои́ но́зе, / и отру́ сия́ па́ки главы́ моея́ власы́, / и́хже в раи́ Е́ва, по полу́дни, шу́мом у́ши огласи́вши, стра́хом скры́ся. / Грехо́в мои́х мно́жества, / и суде́б Твои́х бе́здны кто изсле́дит? / Душеспа́сче Спа́се мой, / да мя Твою́ рабу́ не пре́зриши, / и́же безме́рную име́яй ми́лость.

И абие, Бла́го есть: Трисвятое с поклоны, и час 1-й без стихословия: Бывают же и поклоны по чину их. И лития. И отпуст. И прочее якоже прежде указася в Понедельник Великий.

На 6-м часе тропарь пророчества, глас 8:

Днесь лука́вое собра́ся со́нмище, / и на Тя тще́тная поучи́шася. / Днесь от согла́сия удавле́ние Иу́да обруча́ет, / Каиа́фа же нево́лею испове́дует: / я́ко еди́н за всех восприе́млеши смерть во́лею, / Изба́вителю наш Христе́ Бо́же, сла́ва Тебе́.

Прокимен, псалом 133, глас 4: Благослови́т Тя Госпо́дь от Сио́на, / сотвори́вый не́бо и зе́млю. Стих: Се ны́не благослови́те Го́спода вси раби́ Госпо́дни.

Пророчества Иезекиилева чтение. [Глава 2, ст. 3 – 10, глава 3, ст. 1 – 3]

Рече́ Госпо́дь ко мне: сы́не челове́чь, послю́ тя Аз к до́му Изра́илеву, огорчева́ющим Мя, и́же огорчи́ша Мя, са́ми и отцы́ их отверго́шася Мене́ до дне́шняго дне. И сы́нове жестоколи́чнии, и твердосерде́чнии: Аз послю́ тя к тем, и рече́ши к ним: та́ко глаго́лет Адонаи Госпо́дь. А́ще у́бо услы́шат или́ убоя́тся: зане́ дом огорчева́яй есть, и позна́ют, я́ко проро́к еси́ ты посреде́ их. И ты сы́не челове́чь, да не убои́шися их, ни ужаса́йся от лица́ их: зане́ разсвире́пеют и обы́дут тя о́крест, посреди́ бо скорпи́ев ты живе́ши: слове́с их не убо́йся, и от лица́ их не ужаса́йся, зане́ дом огорчева́яй есть. И возглаго́леши словеса́ Моя́ к ним: а́ще у́бо услы́шат, или́ убоя́тся, зане́ дом прогне́ваяй есть. И ты сы́не челове́чь послу́шай Глаго́лющаго к тебе́, не бу́ди огорчева́яй, я́коже дом преогорчева́яй: отве́рзи уста́ твоя́, и снеждь, я́же Аз даю́ тебе́. И ви́дех, и се рука́ просте́рта ко мне, и в ней сви́ток кни́жный. И разви́ его́ пре́до мно́ю, и в том пи́сана бы́ша пре́дняя и за́дняя: и впи́сано бя́ше в нем рыда́ние, и жа́лость, и го́ре. И рече́ ко мне: сы́не челове́чь, снеждь сви́ток сей, и иди́, и рцы сыно́м Изра́илевым. И отверзо́х уста́ моя́, и напита́ мя сви́тком сим. И рече́ ко мне: сы́не челове́чь, уста́ твоя́ снедя́т, и чре́во твое́ насы́тится сви́тка сего́ да́ннаго тебе́: и снедо́х его́, и бысть во усте́х мои́х я́ко мед сла́док.

Прокимен, псалом 134, глас 6: Боя́щиися Го́спода, / благослови́те Го́спода. Стих: Хвали́те и́мя Госпо́дне, хвали́те раби́ Го́спода.

Чтение Евангелия. И по чину Трисвятое с поклоны и отдаем стихословие часов. Девятый же час начинаем от Трисвятаго: в немже и последнее бывает чтение от Евангелия. Таже глаголем: Не преда́ждь нас: Трисвятое с поклоны. Такожде и блаженны. Творяще и обычныя поклоны. Глаголем же и кондак Великия Среды, и храма святаго, или святыя. Сла́ва, Со святы́ми упоко́й: И ны́не, храма, Богородицы. Аще же ни, глаголем: Предста́тельство христиа́н: Го́споди поми́луй, 40, и 3 великия поклоны, и 12 малыя. Трисвятое: и поклоны 3. Го́споди поми́луй, 12, и молитва: Всесвята́я Тро́ице: Таже, Досто́йно есть: Сла́ва, и ны́не: и вместо отпуста глаголет настоятель молитву: Влады́ко многоми́лостиве: всю до конца. Сей же глаголемей мы ниц падше на землю, молимся. И по исполнении тоя, нам воставшим, преклоняется и той сам к братии, и просит прощения, глаголя: Благослови́те отцы́ святи́и, и прости́те ми гре́шному, я́же согреши́х во всей жи́зни мое́й, и во всей святе́й Четыредеся́тнице, сло́вом, де́лом, помышле́нием, и все́ми мои́ми чу́вствы. Братиям же отвещавшим: Бог да прости́т ти честны́й о́тче. Таже приходят и братия два два, просят подобне и тии прощения, глаголюще: Прости́ мя о́тче святы́й: и прочее, якоже выше писася. И приемше прощение, идем в келлии наша, и молчим до часа вечерняго. В соборных же храмех и приходских росход не бывает, но по прощении трезвон в двои.

ВО СВЯТУЮ И ВЕЛИКУЮ СРЕДУ ВЕЧЕРА

Во светильничное, обычное стихословие от Трисвятаго без поклонов. Стихословим же, и Ко Го́споду внегда́ скорбе́ти ми: без поклонов. На Го́споди воззва́х, поставим стихов 10 и поем самогласны, глас 1:

Тебе́ Де́выя Сы́на, / блудни́ца позна́вши Бо́га, / глаго́лаше, в пла́чи моля́щися, / я́ко слез досто́йная соде́лавшая: / разреши́ долг, я́коже и аз власы́: / возлюби́ лю́бящую, пра́ведно ненави́димую, / и близ мытаре́й Тебе́ пропове́м, / Благоде́телю Человеколю́бче.

Многоце́нное ми́ро, / блудни́ца смеси́ со слеза́ми, / и излия́ на пречи́стеи но́зе Твои́, облобыза́ющи: / о́ную а́бие оправда́л еси́, / нам же проще́ние да́руй / Пострада́вый о нас, и спаси́ нас.

Егда́ гре́шная приноша́ше ми́ро, / тогда́ учени́к соглаша́шеся пребеззако́нным. / О́вая у́бо ра́довашеся, / истоща́ющи ми́ро многоце́нное: / сей же тща́шеся прода́ти Безце́ннаго. / Сия́ Влады́ку познава́ше, / а сей от Влады́ки разлуча́шеся. / Сия́ свобожда́шеся, / а Иу́да раб быва́ше врагу́. / Лю́то есть ле́ность, ве́лие покая́ние: / е́же мне да́руй Спа́се, / пострада́вый о нас, и спаси́ нас.

О Иу́дина окая́нства! / Зря́ше блудни́цу целу́ющую стопы́, / и умышля́ше ле́стию преда́ния целова́ние. / О́ная власы́ разреши́, / а сей я́ростию вяза́шеся, / нося́ вме́сто ми́ра злосмра́дную зло́бу: / за́висть бо не весть предпочита́ти поле́зное. / О Иу́дина окая́нства! / От него́же изба́ви Бо́же, ду́ши на́ша.

Глас 2: Гре́шная тече́ к ми́ру, / купи́ти многоце́нное ми́ро, / е́же пома́зати Благоде́теля, / и миропрода́телю вопия́ше: / Даждь ми ми́ро, да пома́жу и аз / Очи́стившаго вся моя́ грехи́.

Глас 6: Погруже́ная грехо́м, / обре́те Тя, приста́нище спасе́ния, / виждь и ми́ра со слеза́ми растворя́ющую, Тебе́ вопия́ше: / виждь согреша́ющих покая́ния ожида́яй. / Но Влады́ко спаси́ мя от волны́ грехо́вныя, / вели́кия ра́ди Твоея́ ми́лости.

Днесь Христо́с прихо́дит в дом фарисе́ов, / и жена́ гре́шница приступи́вши к нога́м, валя́шеся вопию́щи: / виждь погруже́нную грехо́м, / отча́янную дея́ний ра́ди, / негнуша́емую от Твоея́ бла́гости: / и даждь ми, Го́споди, оставле́ние злых, и спаси́ мя.

Простре́ блудни́ца власы́ Тебе́ Влады́це, / простре́ Иу́да ру́це беззако́нным: / о́ва у́бо прия́ти оставле́ние, / ов же взя́ти сре́бреники. / Те́мже Тебе́ вопие́м про́даному и свобо́ждшему нас: / Го́споди сла́ва Тебе́.

Приступи́ жена́ злосмра́дная и оскверне́ная, сле́зы пролива́ющи, / лю́бящи Спа́се, страсть испове́дающи: / ка́ко воззрю́ к Тебе́ Влады́це? / Сам бо прише́л еси́ спасти́ блудни́цу: / из глубины́ уме́ршую мя воскреси́, / и́же Ла́заря воздви́гнувый из гро́ба четверодне́вна: / приими́ мя окая́нную Го́споди, и спаси́ мя.

Отча́янная жития́ ра́ди, / и уве́домая нра́ва ра́ди, / ми́ра нося́щая приступи́ Тебе́ вопию́щи: / да не отве́ржеши мене́ блу́дную, Роди́выйся от Де́вы, / да не пре́зриши моя́ сле́зы ра́досте а́нгелов, / но приими́ мя ка́ющуюся, / ю́же не отри́нул еси́ согреша́ющую Го́споди, / вели́кия ра́ди Твоея́ ми́лости.

Слава, и ныне, глас 8: Творение Кассианы инокини.

Го́споди, я́же во мно́гия грехи́ впа́дшая жена́, / Твое́ ощути́вшая Божество́, / мироно́сицы взе́мши чин, / рыда́ющи ми́ро Тебе́ пре́жде погребе́ния прино́сит: / увы́ мне, глаго́лющи, / я́ко нощь мне есть разжже́ние блуда́ невоздержа́нна, / мра́чное же и безлу́нное раче́ние греха́. / Приими́ моя́ исто́чники слез, / и́же облака́ми производя́й мо́ря во́ду. / Приклони́ся к мои́м воздыха́нием серде́чным, / приклони́вый небеса́, неизрече́нным Твои́м истоща́нием, / да облобыжу́ пречи́стеи Твои́ но́зе, / и отру́ сия́ па́ки главы́ моея́ власы́, / и́хже в раи́ Е́ва, по полу́дни, шу́мом у́ши огласи́вши, стра́хом скры́ся. / Грехо́в мои́х мно́жества, / и суде́б Твои́х бе́здны кто изсле́дит? / Душеспа́сче Спа́се мой, / да мя Твою́ рабу́ не пре́зриши, / и́же безме́рную име́яй ми́лость.

Вход со Евангелием. Све́те ти́хий:

Прокимен, псалом 135, глас 4: Испове́дайтеся Бо́гу Небе́сному, / я́ко благ, я́ко в век ми́лость Его́. Стих: Испове́дайтеся Бо́гу бого́в, я́ко в век ми́лость Его́.

Исхода чтение. [Глава 2, ст. 18 – 22.]

Бысть во дни мно́гия о́ны, вели́к быв Моисе́й, изы́де к бра́тиям свои́м сыно́м Изра́илевым: разуме́в же боле́знь их, ви́де челове́ка еги́птянина бию́ща не́коего евре́анина от бра́тии его́ сыно́в Изра́илевых. Обозре́вся же се́мо и ова́мо, никого́же ви́де: и порази́в еги́птянина, скры его́ в песце́. Изше́д же во вторы́й день, ви́де два му́жа евре́анина бию́щияся, и глаго́ла оби́дящему: чесо́ ра́ди ты бие́ши и́скренняго? Он же рече́: кто тя поста́ви кня́зя и судию́ над на́ми? Еда́ уби́ти мя ты хо́щеши, и́мже о́бразом уби́л еси́ вчера́ еги́птянина? Убоя́ся же Моисе́й, и рече́: а́ще си́це явле́н бысть глаго́л сей? Услы́ша же фарао́н глаго́л сей, и иска́ше уби́ти Моисе́а. Оты́де же Моисе́й от лица́ фарао́нова, и всели́ся в земли́ Мадиа́мстей: прише́д же в зе́млю Мадиа́мскую, се́де при кла́дязе. Свяще́ннику же Мадиа́мскому бе́ша седмь дще́рей пасу́щих о́вцы отца́ своего́ Иофо́ра: прише́дше же че́рпаху, до́ндеже напо́лниша коры́та, напои́ти о́вцы отца́ своего́ Иофо́ра. Прише́дше же па́стырие изгна́ша я́: воста́в же Моисе́й изба́ви их, и налия́ им, и напои́ о́вцы их. Приидо́ша же к Рагуи́лу отцу своему́, он же рече́ им: что я́ко ускори́сте приити́ днесь? О́ныя же реко́ша: челове́к еги́птянин изба́ви нас от па́стырей, и наче́рпа нам, и напои́ о́вцы на́ша. Он же рече́ дще́рем свои́м: и где есть? И вску́ю си́це оста́висте челове́ка? Призови́те у́бо его́, да яст хлеб. Всели́ся же Моисе́й у челове́ка: и даде́ Сепфо́ру дщерь свою́ Моисе́ю в жену́. Во чре́ве же заче́нши жена́, роди́ сы́на, и нарече́ Моисе́й и́мя ему́, Гирса́м, глаго́ля: я́ко пришле́ц есмь в земли́ чужде́й. Еще́ же заче́нши роди́ сы́на втора́го, и нарече́ и́мя ему́ Елиезе́р, глаго́ля: Бог бо отца́ моего́ Помо́щник мой, и изба́ви мя из руки́ фарао́новы.

Прокимен, псалом 137, глас 4: Го́споди, ми́лость Твоя́ во век, / дел руку́ Твое́ю не пре́зри. Стих: Испове́мся Тебе́ Го́споди всем се́рдцем мои́м, и пред а́нгелы воспою́ Тебе́.

Иова чтение. [Глава 2, ст. 1 – 10]

Бысть я́ко день сей, и приидо́ша а́нгели Бо́жии предста́ти пред Го́сподем: и диа́вол прии́де посреде́ их предста́ти пред Го́сподем. И рече́ Госпо́дь диа́волу: отку́ду ты гряде́ши? Тогда́ рече́ диа́вол пред Го́сподем: проше́д поднебе́сную, и обше́д всю зе́млю, приидо́х. И рече́ Госпо́дь к диа́волу: внял ли еси́ у́бо [мы́слию твое́ю] рабу́ моему́ И́ову; я́ко несть такова́ от су́щих на земли́: челове́к незло́бив, и́стинен, непоро́чен, Богочести́в, удаля́яйся от вся́каго зла, еще́ же придержи́тся незло́бия: ты же рекл еси́ име́ния его́ погуби́ти вотще́. Отвеща́в же диа́вол Го́сподеви, рече́: ко́жу за ко́жу, и вся ели́ка и́мать челове́к, даст за ду́шу свою́. Оба́че посли́ ру́ку Твою́, и косни́ся косте́м его́, и пло́ти его́, а́ще не в лице́ Тя благослови́т. Рече́ же Госпо́дь диа́волу: се предаю́ ти его́, то́кмо ду́шу его́ соблюди́. Изы́де же диа́вол от лица́ Госпо́дня, и порази́ И́ова гно́ем лю́тым от ног да́же до главы́. И взя [И́ов] чреп, да острога́ет гной свой, и той седя́ше на гно́ищи вне гра́да. Вре́мени же мно́гу мину́вшу, рече́ к нему́ жена́ его́ глаго́лющи: доко́ле терпи́ши, се пожду́ вре́мя еще́ ма́ло, ча́ющи наде́жди спасе́ния моего́. Се бо потреби́ся от земли́ па́мять твоя́, сы́нове твои́ и дще́ри, моего́ чре́ва боле́зни и труды́, и́миже вотще́ труди́хся с боле́зньми: ты же сам в гнои́ черве́й седи́ши, обнощева́я вне без покро́ва, и аз скита́ющися и служа́щи, ме́сто от ме́ста преходя́щи, и дом от до́му, ожида́ющи со́лнца, когда́ за́йдет, да почи́ю от трудо́в мои́х, и от боле́зней, я́же мя ны́не обдержа́т. Но рцы глаго́л не́кий ко Го́споду, и умри́. Он же воззре́в рече́ к ней: вску́ю я́ко еди́на от безу́мных жен возглаго́лала еси́? А́ще блага́я прия́хом от руки́ Госпо́дни, злых ли не стерпи́м? Во всех сих приключи́вшихся ему́, ничи́мже согреши́ И́ов устна́ма пред Бо́гом, [и не даде́ безу́мия Бо́гу].

Таже, Да испра́вится моли́тва моя́:

Евангелие от Матфеа, зачало 108. [Мф. 26, 6 – 16.]

Во вре́мя о́но, Иису́су бы́вшу в Вифа́нии, в дому́ Си́мона прокаже́ннаго. Приступи́ к Нему́ жена́, сткля́ницу ми́ра иму́щи многоце́ннаго, и возлива́ше на главу́ Его́ возлежа́ща. Ви́девше же ученицы́ Его́, негодова́ша, глаго́люще: чесо́ ра́ди ги́бель сия́ (бысть)? Можа́ше бо сие́ ми́ро продано́ бы́ти на мно́зе, и да́тися ни́щим. Разуме́в же Иису́с рече́ им: что тружда́ете жену́? Де́ло бо добро́ соде́ла о Мне. Всегда́ бо ни́щия и́мате с собо́ю, Мене́ же не всегда́ и́мате. Возлия́вши бо сия́ ми́ро сие́ на те́ло Мое́, на погребе́ние Мя сотвори́. Ами́нь глаго́лю вам: иде́же а́ще пропове́дано бу́дет Ева́нгелие сие́ во всем ми́ре, рече́тся, и е́же сотвори́ сия́, в па́мять ея́. Тогда́ шед еди́н от обоюна́десяте, глаго́лемый Иу́да Искарио́тский, ко архиере́ом, рече́: что ми хо́щете да́ти, и аз вам преда́м Его́? Они́ же поста́виша ему́ три́десять сре́бреник. И отто́ле иска́ше подо́бна вре́мене, да Его́ преда́ст.

И прочее последование Преждеосвященных. И по пренесении честных Даров поклоны 3. И абие упраждняются совершенно в церкви бываемыя поклоны. В келлиах же даже и до Великаго Пятка совершаются.

ВО СВЯТУЮ И ВЕЛИКУЮ СРЕДУ ВЕЧЕРА ПОВЕЧЕРИЕ ГЛАГОЛЕМ МАЛОЕ

На немже поем трипеснец господина Андреа Великаго Четвертка. Глас 6.

Песнь 4.

Ирмос: Услы́ша проро́к / прише́ствие Твое́, Го́споди, и убоя́ся, / я́ко хо́щеши от Де́вы роди́тися / и челове́ком яви́тися, и глаго́лаше: / услы́шах слух Твой и убоя́хся, / сла́ва си́ле Твое́й, Го́споди.

Го́рница по́стланая, прия́т Тя Созда́теля и стаи́нники, / и та́мо Па́сху сконча́л еси́, / и та́мо соде́лал еси́ та́инства: / та́мо бо двема́ по́сланома ны́не ученико́ма Твои́ма, / Па́сха угото́вася Тебе́.

Иди́те ко о́нсице, / вся ве́дый предглаго́лет апо́столом, / и блаже́н есть, и́же мо́жет ве́рно прия́ти Го́спода: / го́рницу у́бо се́рдце предугото́вав, / и ве́черю благоче́стие.

Нрав сребролю́бия, и о́браз твой безу́мия испо́лнь несмы́сленный Иу́до: / вве́рен бо быв еди́н то́кмо ковче́жцу, / вся́ко не преклони́лся еси́ к милосе́рдию, / но заключи́л еси́ жесто́каго твоего́ се́рдца утро́бу, / преда́в еди́наго Благоутро́бнаго.

Нрав богоуби́йц прода́нию сребролю́бца смеси́выйся: / ов у́бо ко убие́нию вооружи́вся, / ов же к сре́бреннком устремля́шеся: / удавле́нием бо тогда́ предразсуди́в покая́ние зле, / е́же жи́ти лиши́ся.

Лобыза́ние испо́лнено льсти, / е́же ра́дуйся, со ору́жием, льсти́вый Иу́до: / язы́ком у́бо провещава́еши я́же к соедине́нию, / нра́вом же помава́еши к разстоя́нию: / преда́ти бо беззако́нником Благоде́теля ле́стне поучи́лся еси́.

Лобыза́еши и продае́ши Иу́до, / целу́еши и не стыди́шися, ле́стию притеки́й. / Кто ненави́дя лобыза́ет треокая́нне? / Кто любя́ продае́т на цене́? / Лобыза́ние твоего́ безсту́днаго злосове́тия облича́ет произволе́ние.

Слава: Неразде́льное Существо́м, несли́тное Ли́цы, / богосло́влю Тя, Тро́ическое еди́но Божество́, / я́ко единоца́рственное и сопресто́льное, / вопию́ Тебе́ песнь вели́кую, / в вы́шних трегу́бо песносло́вимую.

И ныне, Богородичен: Зача́тие па́че сло́ва, / рождество́ Твое́ па́че естества́ Богороди́тельнице: / о́во у́бо от Ду́ха без се́мене, / о́во же зако́нов естества́ тая́щееся, я́ко нетле́нно, / и па́че естества́ вся́каго рожде́ния: / Бог бо ражда́емое.

Седален, глас 4. Подобен: Яви́лся еси́ днесь:

Яды́й Влады́ко со ученики́ Твои́ми, / та́инственно яви́л еси́ / всесвято́е Твое́ заколе́ние, / и́мже тли изба́вихомся, / честна́я Твоя́ почита́ющии страда́ния.

Песнь 8.

Ирмос: Его́же во́инства Небе́сная сла́вят, / и трепе́щут Херуви́ми и Серафи́ми, / вся́ко дыха́ние и тварь, / по́йте, благослови́те / и превозноси́те во вся ве́ки.

Зако́нное сконча́в повеле́ние, / скрижа́ли зако́нныя Написа́вый в Сина́и, / снеде́ у́бо Па́сху дре́внюю и сено́вную: / бысть же Па́сха та́йная и живоже́ртвенная.

От ве́ка сокрове́нную Христе́ прему́дрость тайноводя́, / показа́л еси́ ку́пно всем апо́столом Спа́се на ве́чери, / ю́же Це́рквам преда́ша богоно́снии.

Еди́н от вас ле́стию преда́ст Мя, / евре́ем прода́в в нощь сию́, / сие́ Христо́с возопи́в смуща́ше дру́ги: / тогда́ еди́н ко еди́ному, недоумева́яся колеба́шеся.

Смири́вся нас ра́ди бога́тый, от ве́чери воста́в, / ле́нтий прие́м, сим препоя́сался еси́, / и прекло́нь вы́ю, омы́л еси́ но́ги ученико́в и преда́теля.

Па́че ума́, и неизрече́нна ра́зума высоте́ Твое́й Иису́се, кто не удиви́тся! / Я́ко бре́нию предста́л еси́, Соде́телю вся́ческих, / омыва́я у́бо но́ги, отира́я же и ле́нтием.

Учени́к, его́же любля́ше Госпо́дь, / на пе́рси возле́г, рече́ к Нему́: / кто есть предая́й Тя? / Христо́с же ко о́ному: / сей вложи́вый в соли́ло ны́не ру́ку.

Учени́к хлеб прие́мый, / по хле́бе отлуча́ется, прода́нию поуча́яйся, / тече́т ко иуде́ем, глаго́лет беззако́нным: / что мне хо́щете да́ти, и аз Его́ вам преда́м.

Благослови́м Отца́ и Сы́на, и Свята́го Ду́ха, Го́спода.

Единаго Бо́га по Существу́ чту, / три Ипоста́си пою́ определи́тельне, / и́ныя, но не и́наковыя: / поне́же Божество́ еди́но, в трие́х Ли́цех, / и́бо Оте́ц, и Сын, и Боже́ственный Дух.

И ныне, Богородичен: Изба́ви нас Иису́се Спа́се наш / от ле́сти лука́ваго, и напа́сти. / Приими́ Богоро́дицу моля́щуюся непреста́нно: / Ма́ти бо есть, и мо́жет Тя умоли́ти.

Хва́лим, благослови́м, покланя́емся Го́сподеви, пою́ще, и превознося́ще во вся ве́ки.

И паки ирмос: Его́же во́инства небе́сная: И поклон.

Песнь 9.

Ирмос: Безсе́меннаго зача́тия Рождество́ несказа́нное, / Ма́тере безму́жныя нетле́нен Плод, / Бо́жие бо рожде́ние обновля́ет естества́. / Те́мже Тя вси ро́ди, / я́ко Богоневе́стную Ма́терь, / правосла́вно велича́ем.

Вели́кое та́инство Твоего́ вочелове́чения, / на ве́чери совозлежа́щу Тебе́ ученико́м Твои́м Человеколю́бче, / откры́в рекл еси́: / яди́те Хлеб живо́тный ве́рою, / пи́йте и Кровь излия́нную от Богоре́бреннаго заколе́ния.

Сень небе́сная яви́ся го́рница, / иде́же Па́сху Христо́с соверши́. / Ве́черя безкро́вная, и слове́сная слу́жба, / трапе́за же та́мо соверше́нных Таин, мы́сленный же́ртвенник.

Па́сха Христо́с есть вели́кая и всечестна́я, / снеде́н быв я́ко хлеб, закла́н же я́ко овча́: / Той бо вознесе́ся о нас Же́ртва. / Того́ Те́ла благоче́стно, и Того́ Кро́ве / вси та́йно причаща́емся.

Хлеб благослови́в, Хлеб сый небе́сный, / благодари́в Отцу́ Роди́телю, / прие́мый, и ча́шу ученико́м дава́л еси́: / приими́те, яди́те, вопия́, / сие́ есть Те́ло Мое́, и Кровь нетле́нныя жи́зни.

Ами́нь глаго́ля, рече́ ро́ждиям Лоза́, / апо́столом Христо́с и́стина: / отсе́ле не и́мам пи́ти от лозы́ питие́, / до́ндеже пию́ е́ но́вое, во сла́ве Отца́ Моего́, / с ва́ми насле́дники Мои́ми.

Продае́ши на три́десятих сре́бреницех Го́спода, / и не помышля́еши Иу́до беззако́нный / Ве́чери та́инство, или́ честно́е умове́ние. / О ка́ко попо́лзся паде́нием / в коне́ц све́та прише́л еси́, удавле́ние облобыза́в!

Ру́це просте́рл еси́, / и́миже хлеб прия́л еси́ нетле́ния, / прия́ти сре́бреники, / уста́ к целова́нию принося́ льсти́вно, / и́миже Те́ло Христо́во и Кровь прия́л еси́, / но го́ре тебе́, я́коже рече́ Христо́с.

Христо́с учреди́ мир, / небе́сный и Боже́ственный хлеб: / прииди́те у́бо христолю́бцы, / бре́нными устна́ми, чи́стыми же сердцы́, / прии́мем ве́рно жре́мую Па́сху, / в нас священноде́йствуемую.

Слава: Отца́ просла́вим, Сы́на превознесе́м, Боже́ственному Ду́ху ве́рно поклони́мся, / Тро́ице неразде́льней, еди́нице по Существу́: / я́ко Све́ту и Све́том, Животу́ и Живото́м, / животворя́щему и просвеща́ющему концы́.

И ныне, Богородичен: Черто́г небе́сный, и Неве́ста Присноде́ва, / еди́на яви́лася еси́, Бо́га носи́вши, / ро́ждши же непрело́жно, из Тебе́ воплоще́нна. / Те́мже Тя вси ро́ди я́ко Богоневе́стную Ма́терь, / правосла́вно велича́ем.

И паки ирмос: Безсе́меннаго зача́тия:

И прочее Повечерия малаго по обычаю, и отпуст, и творим поклоны 3, вси равно косно. И бывшей молитве, от предстоятеля, отходим в келлии своя.

Ведомо же буди, яко от сего святаго дне, Полунощница не поется в церкви, до седмицы Фомины.

ВО СВЯТЫЙ И ВЕЛИКИЙ ЧЕТВЕРТОК НА УТРЕНИ

Клеплет параекклисиарх в седмый час нощи, и собравшимся нам в церковь, и сотворшу священнику начало: Благослове́н Бог наш: Начинаем абие по обычаю: таже шестопсалмие, по исполнении шестопсалмиа, Аллилу́иа, на глас 8.

И тропарь глас 8, трижды:

Егда́ сла́внии ученицы́ / на умове́нии Ве́чери просвеща́хуся, / тогда́ Иу́да злочести́вый / сребролю́бием неду́говав омрача́шеся, / и беззако́нным судия́м Тебе́ пра́веднаго Судию́ предае́т. / Виждь име́ний рачи́телю, / сих ра́ди удавле́ние употреби́вша! / Бежи́ несы́тыя души́, / Учи́телю такова́я дерзну́вшия: / И́же о всех благи́й, Го́споди сла́ва Тебе́.

Таже,

Евангелие от Луки зачало 108. [Лк. 22, 1 – 39.]

Во вре́мя о́но, приближа́шеся пра́здник опресно́к, глаго́лемый Па́сха. И иска́ху архиере́е и кни́жницы, ка́ко бы́ша убили Его́: боя́хуся бо люде́й. Вни́де же сатана́ во Иу́ду нарица́емаго Искарио́т, су́ща от числа́ обоюна́десяте. И шед глаго́ла архиере́ом и воево́дам, ка́ко Его́ преда́ст им. И возра́довашася, и совеща́ша ему́ сре́бреники да́ти. И испове́да, и иска́ше подо́бна вре́мене, да преда́ст Его́ им без наро́да. Прии́де же день опресноко́в, во́ньже подо́бно бе [вре́мя] жре́ти па́сху. И посла́ Петра́ и Иоа́нна, рек: ше́дша угото́вайта нам па́сху, да я́мы. О́на же реко́ста Ему́: где хо́щеши угото́ваем? Он же рече́ има: се восходя́щема ва́ма во град, сря́щет вы челове́к в скуде́льнице во́ду нося́: по нем иде́та в дом, во́ньже вхо́дит. И рце́та до́му влады́це: глаго́лет тебе́ Учи́тель, где есть оби́тель, иде́же па́сху со ученики́ Мои́ми снем? И той ва́ма пока́жет го́рницу ве́лию по́стлану: ту угото́вайта. Ше́дша же обрето́ста, я́коже рече́ и́ма: и угото́васта па́сху. И егда́ бысть час, возлеже́, и обана́десяте апо́стола с Ним. И рече́ к ним: жела́нием возжеле́х сию́ па́сху я́сти с ва́ми, пре́жде да́же не прииму́ мук. Глаго́лю бо вам, я́ко отсе́ле не и́мам я́сти от него́, до́ндеже сконча́ются во Ца́рствии Бо́жии. И прии́м ча́шу, хвалу́ возда́в, рече́: приими́те сию́, и раздели́те себе́. Глаго́лю бо вам, я́ко не и́мам пи́ти от плода́ ло́знаго, до́ндеже Ца́рствие Бо́жие прии́дет. И прии́м хлеб, хвалу́ возда́в преломи́, и даде́ им, глаго́ля: сие́ есть те́ло Мое́, е́же за вы дае́мо: сие́ твори́те в мое́ воспомина́ние. Та́кожде же и ча́шу по ве́чери, глаго́ля: сия́ ча́ша, Но́вый Заве́т Мое́ю кро́вию, я́же за вы пролива́ется. Оба́че се рука́ предаю́щаго Мя со мно́ю есть на трапе́зе. И Сын у́бо Челове́ческий и́дет по рече́нному: оба́че го́ре челове́ку тому́, и́мже предае́тся. И ти́и нача́ша иска́ти в себе́, кото́рый у́бо от них хотя́й сие́ сотвори́ти. Бысть же и пря в них, кий мни́тся их бы́ти бо́лий. Он же рече́ им: ца́рие язы́к госпо́дствуют и́ми, и облада́ющии и́ми, благода́теле нарица́ются. Вы же не та́ко: но бо́лий в вас, да бу́дет я́ко мний. и ста́рей, я́ко служа́й. Кто бо бо́лий, возлежа́й ли, или́ служа́й; не возлежа́й ли? Аз же посреде́ вас есмь я́ко служа́й. Вы же есте́ пребы́вше со Мно́ю в напа́стех Мои́х. И Аз завещава́ю вам, я́коже завеща́ Мне Оте́ц Мой, Ца́рство, да я́сте и пие́те на трапе́зе Мое́й во Ца́рствии Мое́м, и ся́дете на престо́лех, судя́ще обемана́десяте коле́нома Изра́илевома. Рече́ же Госпо́дь: Си́моне, Си́моне, се сатана́ про́сит вас, да бы се́ял, я́ко пшени́цу. Аз же моли́хся о тебе́, да не оскуде́ет ве́ра твоя́: и ты не́когда обра́щься, утверди́ бра́тию твою́. Он же рече́ Ему́: Го́споди, с Тобо́ю гото́в есмь, и в темни́цу, и на смерть ити́. Он же рече́: глаго́лю ти, Пе́тре, не возгласи́т пе́тель днесь, до́ндеже трикра́ты отве́ржешися Мене́ не ве́дети. И рече́ им: егда́ посла́х вы без влага́лища, и без ме́ха, и без сапо́г, еда́ чго лише́ни бы́сте? Они́ же ре́ша: ничесо́же. Рече́ же им: но ны́не и́же и́мать влага́лище, да во́змет, та́кожде и мех, а и́же не и́мать, да прода́ст ри́зу свою́, и ку́пит нож. Глаго́лю бо вам, я́ко еще́ пи́саное се, подоба́ет, да сконча́ется о Мне, е́же: и со беззако́нными вмени́ся. И́бо е́же о Мне, кончи́ну и́мать. Они́ же ре́ша: Го́споди, се ножа́ зде два. Он же рече́ им: дово́льно есть. И изше́д, и́де по обы́чаю в го́ру Елео́нскую: по Нем же идо́ша ученицы́ Его́.

И псалом 50. Молитвы же, Спаси́ Бо́же лю́ди Твоя́: не глаголем.

И начинаем канон, творение господина Космы, глас 6: ирмосы по дважды, тропари же на 6. Канон, егоже краестрочие: Ти макра́ пе́мпти макро́н и́мнон екса́до. Еже есть, В Вели́кий Четверто́к до́лгую песнь пою́.

Песнь 1.

{Τ} Ирмос: Се́ченое, сече́тся / мо́ре Чермно́е, / волнопита́емая же изсуша́ется глубина́, / та́яжде ку́пно безору́жным бы́вши проходи́ма / и всеору́жным гроб. / Песнь же Богокра́сная воспева́шеся: / сла́вно просла́вися Христо́с, Бог наш.

{Η} Всевино́вная и пода́тельная жи́зни, / безме́рная му́дрость Бо́жия, / созда́ храм Себе́ от Чи́стыя Неискусому́жныя Ма́тере: / в храм бо теле́сно оболки́йся, / сла́вно просла́вися Христо́с Бог наш.

{Μ} Тайноводя́щи дру́ги Своя́, / душепита́тельную уготовля́ет Трапе́зу, / безсме́ртия же вои́стинну му́дрость Бо́жия растворя́ет Ча́шу ве́рным. / Присту́пим благоче́стно, и возопии́м: / сла́вно просла́вися Христо́с Бог наш.

{Α} Услы́шим вси ве́рнии, / созыва́ющую высо́ким пропове́данием, / несозда́нную и есте́ственную прему́дрость Бо́жию, / вопие́т бо: вкуси́те и разуме́вше, я́ко Христо́с Аз, возопи́йте: / сла́вно просла́вися Христо́с Бог наш.

Последи же паки ирмос оба лика вкупе.

Песнь 3.

{Κ} Ирмос: Госпо́дь Сый всех, и Зижди́тель Бог, / созда́нное безстра́стный обнища́в Себе́ соедини́, / и Па́сха, за я́же хотя́ше умре́ти, / Сам, Сый, Себе́ предпожре́: / яди́те, вопия́, Те́ло Мое́, / и ве́рою утверди́теся.

{Ρ} Изба́вительною всего́ ро́да челове́ча, / Твое́ю Бла́же Твоя́ ученики́ напои́л еси́ весе́лия Ча́шею, напо́лнив ю́, / Сам бо Себе́ священноде́йствуеши, / пи́йте, вопия́, Кровь Мою́, / и ве́рою утверди́теся.

{Α} Безу́мный муж и́же в вас преда́тель, / ученико́м Твои́м предре́кл еси́ незло́биве, / не уразуме́ет сих, / и той несмы́слен сый не и́мать разуме́ти. / Оба́че во Мне пребу́дите, / и ве́рою утверди́теся.

Седален, глас 1. Подобен: Гроб Твой:

Езе́ра и исто́чники и моря́ сотвори́вый, / смире́нию нас наказу́я изря́дному, / ле́нтием опоя́сався, ученико́в но́ги умы́, / смиря́яся премно́жеством благоутро́бия, / и возвыша́я нас от про́пастей зло́бы, / еди́н Человеколю́бец.

Слава, глас 3. Подобен: Боже́ственныя ве́ры:

Смиря́яся за благоутро́бие, / но́ги умы́л еси́ ученико́в Твои́х, / к тече́нию Боже́ственному сия́ напра́вил еси́: / не повину́яся же Петр умы́тися, / а́бие Боже́ственному повину́ется повеле́нию, / омыва́емь, и Тебе́ приле́жно моля́ся, / дарова́ти нам ве́лию ми́лость.

И ныне, глас 4. Подобен: Яви́лся еси́ днесь:

Яды́й Влады́ко со ученики́ Твои́ми, / та́инственно яви́л еси́ всесвято́е Твое́ заколе́ние, / и́мже тли изба́вихомся, / честна́я Твоя́ почита́ющии страда́ния.

Песнь 4.

{Π} Ирмос: Прови́дев проро́к / та́йну Твою́ неизрече́нную, Христе́, провозгласи́: / положи́л еси́ тве́рдую любо́вь кре́пости, О́тче Щедрый, / Единоро́днаго бо Сы́на, Благи́й, / очище́ние в мир посла́л еси́.

{Ε} На страсть всем су́щим из Ада́ма источи́вшую безстра́стие, / Христе́ гряды́й, друго́м Твои́м рекл еси́: / с ва́ми Па́схи сея́ причасти́тися возжела́х: / единоро́днаго бо Мя очище́ние Оте́ц в мир посла́л есть.

{Μ} Причаща́яся Ча́ши, / ученико́м вопия́л еси́ Безсме́ртне: / плода́ ло́знаго ктому́ не пию́ про́чее, с ва́ми живя́: / единоро́днаго бо Мя очище́ние Оте́ц в мир посла́л есть.

{Π} Питие́ но́вое па́че сло́ва, / Аз глаго́лю, во Ца́рствии Мое́м, Христо́с друго́м, пию́, / я́коже бо Бог с ва́ми бо́ги бу́ду, рекл еси́: / единоро́днаго бо Мя очище́ние Оте́ц в мир посла́л есть.

Песнь 5.

{Τ} Ирмос: Сою́зом любве́ / связу́еми апо́столи, / влады́чествущему все́ми себе́ Христу́ возло́жше, / кра́сны но́ги очища́ху, / благовеству́юще всем мир.

{Η} Неодержи́мую держа́щая, / и превы́спреннюю на возду́се во́ду, / бе́здны обуздова́ющая, / и моря́ востязу́ющая Бо́жия прему́дрость, / во́ду во умыва́льницу влива́ет, / но́ги же омыва́ет рабо́в Влады́ка.

{Μ} Ученико́м показу́ет смире́ния о́браз Влады́ка, / о́блаки облага́яй не́бо, препоясу́ется ле́нтием, / и преклоня́ет коле́на, рабо́м омы́ти но́ги, / в Его́же руце́ дыха́ние всех су́щих.

Песнь 6.

{Α} Ирмос: Бе́здна после́дняя грехо́в обы́де мя, / и волне́ния не ктому́ терпя́, / я́ко Ио́на Влады́це вопию́ Ти: / от тли мя возведи́.

{Κ} Го́спода глаша́ете Мя, о ученицы́, и Учи́теля: / есмь бо, Спа́се вопия́л еси́. / Те́мже подража́йте о́браз, его́же во Мне ви́десте.

{Ρ} Скве́рны кто не име́я, омы́ти не тре́бует ног: / чи́сти же, о ученицы́ вы, но не вси: / мгнове́нием бо безчи́нно еди́н от вас неи́стовствует.

Кондак, глас 2. Подобен: Вы́шних ища́:

Хлеб прие́м в ру́це преда́тель, / сокрове́нно ты́я простира́ет, / и прие́млет це́ну Созда́вшаго Свои́ма рука́ма челове́ка, / и неиспра́влен пребы́сть Иу́да раб и льстец.

Икос: Та́йной трапе́зе, в стра́се прибли́жившеся вси, / чи́стыми душа́ми хлеб прии́мем, спребыва́юще Влады́це: / да ви́дим, ка́ко умыва́ет но́ги ученико́в, / и сотвори́м, я́коже ви́дим, / друг дру́гу покаря́ющеся, и друг дру́гу но́зе умыва́юще, / Христо́с бо та́ко повеле́ Свои́м ученико́м, / предре́к та́ко твори́ти, / но не услы́ша Иу́да раб и льстец.

Синаксарь.

Песнь 7.

{Ο} Ирмос: О́троцы в Вавило́не / пе́щнаго пла́мене не убоя́шася, / но посреде́ пла́мене вве́ржени, ороша́еми поя́ху: / благослове́н еси́ Го́споди, Бо́же оте́ц на́ших.

{Ν} Помава́я главо́ю Иу́да зла́я предзре́в подви́же, / благовре́мение иски́й преда́ти Судию́ на осужде́ние, / И́же всех есть Госпо́дь и Бог оте́ц на́ших.

{Υ} Вам Христо́с друго́м вопия́ше: / еди́н преда́ст Мя, / весе́лия забы́вше, ско́рбию и стра́хом одержи́ми бя́ху: / кто сей, скажи́, глаго́люще, Бо́же оте́ц на́ших?

{Μ} И́же со Мно́ю ру́ку свою́ в соли́ло вложи́т де́рзостию, / тому́ оба́че добро́ бы врата́ жития́ пройти́ никогда́же: / сего́, и́же бе преда́тель, явля́ше Бог оте́ц на́ших.

Песнь 8.

{Ν} Ирмос: За зако́ны оте́ческия / блаже́ннии в Вавило́не ю́ноши, предбе́дствующе, / царю́ющаго оплева́ша повеле́ние безу́мное, / и совоку́плени, и́мже не свари́шася огне́м, / Держа́вствующему досто́йную воспева́ху песнь: / Го́спода по́йте, дела́, / и превозноси́те во вся ве́ки.

{Ο} Сообе́дницы блаже́ннии, / в Сио́не сло́вом претерпе́вше апо́столи после́доваху Па́стырю, / я́ко а́гнцы, и совоку́плени, Его́же не разлучи́шася Христа́, / Боже́ственным сло́вом пита́еми, благода́рственно вопия́ху: / Го́спода по́йте дела, и превозноси́те во вся ве́ки.

{Ν} Зако́нныя дру́жбы злоимени́тый Искарио́т во́лею забы́в, / я́же но́зе умы́, угото́ви на преда́ние: / и Твой яды́й Хлеб, Те́ло Боже́ственное, / воздви́же ков на Тя Христе́, и вопи́ти не разуме́: / Го́спода по́йте дела́, и превозноси́те во вся ве́ки.

{Ε} Приима́ше реши́тельное греха́ Те́ло безсо́вестный, / и Кровь излива́емую за мир Боже́ственную, / но не стыдя́шеся пия́, ю́же продая́ше на цене́, / о зло́бе же не негодова́, и вопи́ти не разуме́: / Го́спода по́йте дела́, и превозноси́те во вся ве́ки.

Песнь 9.

{Ξ} Ирмос: Стра́нствия Влады́чня, / и безсме́ртныя Трапе́зы / на го́рнем ме́сте высо́кими умы́, / ве́рнии, прииди́те, наслади́мся, / возше́дша Сло́ва, / от Сло́ва научи́вшеся, Его́же велича́ем.

{Α} Иди́те, ученико́м сло́во рече́, / Па́сху на го́рничном ме́сте, е́юже ум утвержда́ется, / и сию́ тайноводи́тельно угото́вите, / безква́сным и́стинным сло́вом, / тве́рдое же благода́ти велича́йте.

{Δ} Соде́тельницу Оте́ц пре́жде век прему́дрость ражда́ет Мя, нача́ток путе́й, / в дела́ созда́ ны́не та́йно соверша́емая: / Сло́во бо несозда́нное сый естество́м, / гла́сы присвоя́юся, его́же ны́не прия́х.

{Ω} Я́ко челове́к сый существо́м, не мечта́нием, / си́це Бог нра́вом воздая́ния, естество́ соедини́вшееся мне. / Христа́ еди́наго тем Мя зна́йте, / от ни́хже, в ни́хже, я́же есмь, спаса́юща.

Ексапостиларий, трижды.

Черто́г Твой ви́жду Спа́се мой, украше́нный, / и оде́жды не и́мам да вни́ду в онь: / просвети́ одея́ние души́ моея́ / Светода́вче, и спаси́ мя.

На хвалитех поставим стихи 4, и поем стихиры самогласны, глас 2:

Стека́ется про́чее собо́рище иуде́йское, / да Соде́теля и Зижди́теля вся́ческих Пила́ту преда́ст: / о беззако́нных, о неве́рных! / Я́ко гряду́щаго суди́ти живы́м и ме́ртвым, на суд гото́вят: / исцеля́ющаго стра́сти, ко страсте́м уготовля́ют. / Го́споди долготерпели́ве, / ве́лия Твоя́ ми́лость, сла́ва Тебе́.

Иу́да беззако́нный, Го́споди, / омочи́вый на Ве́чери ру́ку в соли́ле с Тобо́ю, / простре́ к беззако́нным ру́це прия́ти сре́бреники, / и ми́ра умы́сливый це́ну, / Тебе́ Безце́ннаго не убоя́ся прода́ти: / но́зе простры́й во е́же умы́ти, / Влады́ку облобыза́ льсти́вно, во е́же преда́ти беззако́нным: / ли́ка же апо́стольскаго отве́ргся, / и три́десять пове́рг сре́бреники, / Твоего́ тридне́внаго воскресе́ния не ве́де, / и́мже поми́луй нас.

Иу́да преда́тель льстив сый, / льсти́вным лобза́нием предаде́ Спа́са Го́спода, и Влады́ку всех, / я́ко раба́ продаде́ иуде́ом: я́ко овча́ на заколе́ние, / та́ко после́доваше А́гнец Бо́жий, Сын О́тчий, / еди́н Многоми́лостивый.

Иу́да раб и льстец, учени́к и наве́тник, / друг и диа́вол от дел яви́ся: / после́доваше бо Учи́телю, и на Него́ поуча́шеся преда́нию, / глаго́лаше в себе́: преда́м Того́, и приобря́щу собра́нная име́ния, / иска́ше же и ми́ру про́дану бы́ти, / и Иису́са ле́стию я́ти. / Отдаде́ целова́ние, предаде́ Христа́: / и я́ко овча́ на заколе́ние, си́це после́доваше / еди́н Благоутро́бный и Человеколю́бец.

Слава, и ныне, глас тойже: Его́же пропове́да А́гнца Иса́иа, / гряде́т на заколе́ние во́льное, / и плещи́ дае́т на ра́ны, лани́ты на зауше́ния, / лица́ же не отврати́ от срамоты́ заплева́ний, / сме́ртию же безобра́зною осужда́ется. / Вся Безгре́шный во́лею прие́млет, / да всем да́рует из ме́ртвых воскресе́ние.

На стиховне стихиры самогласны, глас 8:

Днесь е́же на Христа́ лука́вое собра́ся собо́рище, / и на Него́ тще́тная сове́товаше, / преда́ти Пила́ту на смерть непови́ннаго. / Днесь име́нием удавле́ние Иу́да себе́ облага́ет, / и лиша́ется обою́ду жи́зни привре́менныя и Боже́ственныя. / Днесь Каиа́фа нево́лею проро́чествует: / у́не, глаго́ля, еди́ному умре́ти за лю́ди. / Прии́де бо за грехи́ на́ша пострада́ти, / да нас свободи́т от рабо́ты вра́жия, / я́ко Благ и Человеколю́бец.

Стих: Яды́й хле́бы Моя́, возвели́чи на Мя запина́ние.

Днесь Иу́да нищелю́бия сокрыва́ет лице́, / и лихои́мства открыва́ет зрак: / не ктому́ о ни́щих пече́тся, / не ктому́ ми́ро продае́т гре́шныя, / но небе́сное ми́ро, и от него́ усвоя́ет сре́бренники. / Тече́т ко иуде́ом, глаго́лет беззако́нным: / что ми хо́щете да́ти, и аз вам преда́м Его́? / О сребролю́бия преда́теля! / Удобопрода́тельную твори́т ку́плю, к во́ле купу́ющих, / непродае́маго ку́плю твори́т, / не скуп явля́ется к цене́, / но я́ко раба́ бежа́щаго продае́т: / обы́чай бо кра́дущим мета́ти честна́я. / Ны́не же пове́рже Свята́я псом учени́к, / бесова́ние бо сребролю́бия, / на своего́ Влады́ку неи́стовитися сотвори́ его́. / Его́же искуше́ния бежи́м, зову́ще: / долготерпели́ве Го́споди, сла́ва Тебе́.

Стих: Исхожда́ше вон, и глаго́лаше вку́пе.

Нрав твой льсти исполня́ется, беззако́нный Иу́до: / неду́гуя бо сребролю́бием, приобре́л еси́ человеконенавиде́ние. / А́ще бо бога́тство люби́л еси́, / почто́ ко уча́щему о нищете́ прише́л еси́? / А́ще же и люби́л еси́, / вску́ю про́дал еси́ безце́ннаго, / преда́в на убие́ние? / Ужасни́ся со́лнце, возстени́ земле́, / и дви́жащися возопи́й: / незло́биве Го́споди, сла́ва Тебе́.

Стих: Слово законопреступное возложиша на Мя.

Да никто́же, о ве́рнии, / Влады́чния Ве́чери тайноненауче́н, / никто́же отню́д я́ко Иу́да / льсти́вно да присту́пит к Трапе́зе: / он бо укру́х прие́м, на хле́ба уклони́ся. / О́бразом у́бо сый учени́к, ве́щию же сый уби́йца. / Со иуде́и у́бо веселя́ся, / со апо́столы же водворя́яся: / ненави́дя лобыза́ше, / лобыза́я же продава́ше искупи́вшаго нас кля́твы, / Бо́га и Спа́са душ на́ших.

Слава, глас тойже: Нрав твой льсти:

И ныне, глас 5: Тайново́дствуя Твоя́ Го́споди ученики́, / учи́л еси́ глаго́ля: / о дру́зи, зри́те, да ники́йже страх вас разлучи́т от Мене́: / а́ще бо и стражду́, но за мир. / Не блазни́теся у́бо о Мне: / не приидо́х бо, да послу́жат Ми, / но послужи́ти, и положи́ти ду́шу Мою́ избавле́ние за мир. / А́ще у́бо вы дру́зи Мои́ есте́, Мене́ подража́йте: / хотя́й пе́рвый бы́ти, да бу́дет после́дний, / влады́ка я́ко служи́тель. / Пребу́дите во Мне, да грозд принесете́: / Аз бо есмь лоза́ живо́тная.

Бла́го есть испове́датися Го́сподеви: Совокупляем и час первый, в немже глаголем и тропарь пророчества, глас 3:

Зауше́нный за род челове́ческий, и не прогне́вавыйся / свободи́ от истле́ния живо́т наш Го́споди, и спаси́ нас.

Слава, и ныне, тойже.

Прокимен, глас 1: Да разуме́ют язы́цы, / я́ко и́мя Тебе́ Госпо́дь. Стих: Бо́же, кто уподо́бится Тебе́?

Пророчества Иеремиина чтение. [Глава 11, ст. 18 – 23: глава 12, ст. 1 – 15]

Го́споди, скажи́ ми, и уразуме́ю: тогда́ ви́дех начина́ния их. Аз же я́ко а́гня незло́бивое ведо́мое на заколе́ние не разуме́х, я́ко на мя помы́слиша по́мысл лука́вый, глаго́люще: прииди́те и вложи́м дре́во в хлеб его́, и истреби́м его́ от земли́ живу́щих, и и́мя его́ да не помяне́тся ктому́. Госпо́дь Савао́ф, судя́й пра́ведно, испыту́яй сердца́ и утро́бы, да ви́жду мще́ние Твое́ на них, я́ко к Тебе́ откры́х оправда́ние мое́. Сего́ ра́ди сия́ глаго́лет Госпо́дь на му́жы Анафо́фски и́щущия души́ моея́, глаго́лющия: да не проро́чествуеши о и́мени Госпо́дни: а́ще ли же ни, у́мреши в рука́х на́ших. Сего́ ра́ди сия́ глаго́лет Госпо́дь сил: се Аз посещу́ на них: ю́ноши их мече́м у́мрут, и сы́нове их и дще́ри их сконча́ются гла́дом. И оста́нка не бу́дет от них, наведу́ бо зла́я на живу́щия во Анафо́фе, в ле́то посеще́ния их. Пра́веден еси́ Го́споди, я́ко отвеща́ю к Тебе́, оба́че судьбы́ возглаго́лю к Тебе́: что я́ко путь нечести́вых спе́ется? Угобзи́шася вси творя́щии беззако́ния? Насади́л еси́ их, и укорени́шася: ча́да сотвори́ша, и сотвори́ша плод: близ еси́ Ты уст их, дале́че же от утро́б их. И Ты, Го́споди, разуме́еши мя, ви́дел мя еси́, и искуси́л еси́ се́рдце мое́ пред Тобо́ю, собери́ их я́ко о́вцы на заколе́ние, и очи́сти их в день заколе́ния их. Доко́ле пла́кати и́мать земля́, и трава́ вся се́льная и́зсхнет от зло́бы живу́щих на ней? Погибо́ша ско́ти и пти́цы, я́ко реко́ша: не у́зрит Бог путе́й на́ших. Но́зи твои́ теку́т, и разслабля́ют тя. Иди́те, собери́те вся зве́ри се́льныя, и да прии́дут сне́сти е́. Па́стырие мно́зи растли́ша виногра́д Мой, оскверни́ша часть Мою́, да́ша часть жела́емую Мою́ в пусты́ню непрохо́дную. Положи́ша в потребле́ние па́губы. Я́ко сия́ глаго́лет Госпо́дь о всех сосе́дех лука́вых, прикаса́ющихся насле́дию Моему́, е́же раздели́х лю́дем Мои́м Изра́илю: се Аз исто́ргну их от земли́ их, и дом Иу́дин изве́ргну от среды́ их. И бу́дет егда́ исто́ргну их, обращу́ся и поми́лую их, и вселю́ их, кого́ждо в достоя́ние свое́, и кого́ждо в зе́млю свою́.

Прокимен, глас 8: Помоли́теся и воздади́те / Го́сподеви Бо́гу на́шему. Стих: Ве́дом во Иуде́и Бог, во Изра́или ве́лие и́мя Его́.

Подобает ведати, яко литии за упокой в притворе не бывает до Недели Фомины.

Прочия же часы поются трипсалмны, просто.

ВО СВЯТЫЙ И ВЕЛИКИЙ ЧЕТВЕРТОК ВЕЧЕРА

Во светильничное, клеплет во 8 час, и благословившу архиерею, или священнику, начинаем Вечерню: Прииди́те поклони́мся: и предначинательный псалом. Бывает ектения от священника. Таже, Го́споди воззва́х, на глас 2, поставляем стихов 10. Священник же изменяяй священническую одежду, исходит, и кадит, и по еже возвратитися, творит проскомидию. Мы же поем стихиры самогласны дне, глас 2, повторяюще я.

Стека́ется про́чее собо́рище иуде́йское, / да Соде́теля и Зижди́теля вся́ческих Пила́ту преда́ст. / О беззако́нных, о неве́рных! / Я́ко гряду́щаго суди́ти живы́м и ме́ртвым, на суд гото́вят: / исцеля́ющаго стра́сти, ко страсте́м уготовля́ют. / Го́споди долготерпели́ве, / ве́лия Твоя́ ми́лость, сла́ва Тебе́.

Иу́да беззако́нный, Го́споди, / омочи́вый на Ве́чери ру́ку в соли́ле с Тобо́ю, / простре́ к беззако́нным ру́це прия́ти сре́бреники, / и ми́ра умы́сливый це́ну, / Тебе́ Безце́ннаго не убоя́ся прода́ти: / но́зе простры́й во е́же умы́ти, / Влады́ку облобыза́ льсти́вно, во е́же преда́ти беззако́нным: / ли́ка же апо́стольскаго отве́ргся, / и три́десять пове́рг сре́бреники, / Твоего́ тридне́внаго воскресе́ния не ве́де, / и́мже поми́луй нас.

Иу́да преда́тель льстив сый, / льсти́вным лобза́нием предаде́ Спа́са Го́спода, и Влады́ку всех, / я́ко раба́ продаде́ иуде́ом: / я́ко овча́ на заколе́ние, / та́ко после́доваше, А́гнец Бо́жий, Сын О́тчий, / еди́н Многоми́лостивый.

Иу́да раб и льстец, учени́к и наве́тник, / друг и диа́вол, от дел яви́ся: / после́доваше бо Учи́телю, / и на Него́ поуча́шеся преда́нию, / глаго́лаше в себе́: преда́м Того́, и приобря́щу со́бранная име́ния, / иска́ше же и ми́ру про́дану бы́ти, / и Иису́са ле́стию я́ти, / отдаде́ целова́ние, предаде́ Христа́. / И я́ко овча́ на заколе́ние, / си́це после́доваше А́гнец Бо́жий, / еди́н Благоутро́бный и Человеколю́бец.

Его́же пропове́да А́гнца Иса́иа, / гряде́т на заколе́ние во́льное, / и плещи́ дае́т на ра́ны, лани́ты на зауше́ния, / лица́ же не отврати́ от срамоты́ заплева́ний, / сме́ртию же безобра́зною осужда́ется. / Вся Безгре́шный во́лею прие́млет, / да всем да́рует из ме́ртвых воскресе́ние.

Слава, и ныне, глас 6:

Рожде́ние ехи́днов вои́стинну Иу́да, / я́дших ма́нну в пусты́ни, и ро́пщущих на Пита́теля: / еще́ бо бра́шну су́щу во усте́х их, / клевета́ху на Бо́га неблагода́рнии: / и сей злочести́вый / Небе́сный Хлеб во усте́х нося́й, / на Спа́са преда́тельство соде́ла. / О нра́ва несы́тнаго, и де́рзости безчелове́чныя! / Пита́ющаго продае́т, / и Его́же любля́ше Влады́ку, предая́ше на смерть: / вои́стинну о́нех сын беззако́нный, / и с ни́ми па́губу насле́дова. / Но пощади́ Го́споди, ду́ши на́ша от такова́го безчелове́чества, / Еди́не в долготерпе́нии неизрече́нный.

Вход со Евангелием. Све́те ти́хий:

Прокимен, глас 1: Изми́ мя Го́споди, от челове́ка лука́ва, / от му́жа непра́ведна изба́ви мя. Стих: И́же помы́слиша непра́вду в се́рдце весь день.

Исхода чтение. [Глава 19, ст. 10 – 19]

Рече́ Госпо́дь Моисе́ю: соше́д засвиде́тельствуй лю́дем, и очи́сти я́ днесь и у́тре: и да исперу́т ри́зы. И да бу́дут гото́вы в день тре́тий: в тре́тий бо день сни́дет Госпо́дь на го́ру Сина́йскую, пред все́ми людьми́. И устро́иши лю́ди о́крест, глаго́ля: внемли́те себе́ не восходи́ти на го́ру, и ничи́мже косну́тися ея́: всяк прикосну́выйся горе́, сме́ртию у́мрет. Не ко́снется ей рука́, ка́мением бо побие́тся, или́ стрело́ю устрели́тся, а́ще скот, а́ще челове́к, не бу́дет жив: егда́ же гла́си и трубы́ и о́блак оты́дет от горы́, си́и взы́дут на го́ру. Сни́де же Моисе́й с горы́ к лю́дем, и освяти́ я́: и испра́ша ри́зы своя́. И рече́ лю́дем: бу́дите гото́ви, три дни не входи́те к жена́м. Бысть же в тре́тий день бы́вшу ко у́тру, и бы́ша гла́си и мо́лния, и о́блак мра́чен на горе́ Сина́йстей, глас тру́бный глаша́ше зело́: и убоя́шася вси лю́дие и́же в полце́. Изведе́ же Моисе́й лю́ди во сре́тение Бо́гу из полка́, и ста́ша под горо́ю. Гора́ же Сина́йская дымя́шеся вся, схожде́ния ра́ди Бо́жия на ню во огни́: и восхожда́ше дым, я́ко дым пе́щный: и ужасо́шася вси лю́дие зело́. Бы́ша же гла́си тру́бнии происходя́ще кре́пцы зело́. Моисе́й глаго́лаше, Бог же отвещава́ше ему́ гла́сом.

Прокимен, глас 7: Изми́ мя от враг мои́х Бо́же, / и от востаю́щих на мя изба́ви мя. Стих: Изба́ви мя от де́лающих беззако́ние.

Иова чтение. [Глава 38, ст. 1 – 23: гл. 42, ст. 1 – 5]

Рече́ Госпо́дь И́ову сквозе́ бу́рю и о́блаки: Кто сей скрыва́яй от Мене́ сове́т, содержа́й же глаго́лы в се́рдце, Мене́ же ли мни́тся утаи́ти? Препоя́ши я́ко муж чре́сла твоя́: вопрошу́ же тя, ты же Ми отвеща́й. Где был еси́ егда́ основа́х зе́млю? Возвести́ Ми, а́ще ве́си ра́зум? Кто положи́ ме́ры ея́, а́ще ве́си; или кто наведы́й вервь на ню? На че́мже столпи́ ея́ утвержде́ни суть? Кто же есть положи́вый ка́мень краеуго́льный на ней? Егда́ [сотворе́ны] бы́ша зве́зды, восхвали́ша Мя гла́сом ве́лиим вси а́нгели Мои́. Загради́х же мо́ре враты́, егда́ излива́шеся из чре́ва ма́тере своея́ исходя́щее. Положи́х же ему́ о́блак во одея́ние, мгло́ю же пови́х е́. И положи́х ему́ преде́лы, обложи́в затво́ры и врата́. Рех же ему́: до сего́ до́йдеши и не пре́йдеши, но в тебе́ сокруша́тся во́лны твоя́. Или́ при тебе́ соста́вих свет у́тренний? Денни́ца же весть чин свой, Я́тися крил земли́, оттрясти́ нечести́выя от нея́. Или́ ты бре́ние взем от земли́, созда́л еси́ живо́тно, и глаго́ливаго сего́ посади́л еси́ на земли́? Отъя́л же ли еси́ от нечести́вых свет? Мы́шцу же го́рдых сокруши́л ли еси́? Прише́л же ли еси́ на исто́чники мо́ря? В следа́х же бе́здны ходи́л ли еси́? Отверза́ются же ли тебе́ стра́хом врата́ сме́ртная? Вра́тницы же а́довы ви́девше тя убоя́шася ли? Навы́кл же ли еси́ широты́ поднебе́сныя; пове́ждь у́бо Ми, коли́ка есть. В ко́ей же земли́ вселя́ется свет? Тьме же ко́е есть ме́сто? А́ще у́бо введе́ши Мя в преде́лы их, а́ще же ли и ве́си стези́ их? Вем у́бо я́ко тогда́ рожде́н еси́, число́ же лет твои́х мно́го. Прише́л же ли еси́ в сокро́вища сне́жная, и сокро́вища гра́дная ви́дел ли еси́? Подлежа́т же ли тебе́ в час враго́в в день бра́ней и ра́ти? Отвеща́в же И́ов, рече́ ко Го́споду: Вем я́ко вся мо́жеши, невозмо́жно же Тебе́ ничто́же. Кто есть тая́й от Тебе́ сове́т? Щадя́й же словеса́, и от Тебе́ мни́тся утаи́ти? Кто же возвести́т ми, и́хже не ве́дех, ве́лия и ди́вная, и́хже не знах? Послу́шай же мене́ Го́споди, да и аз возглаго́лю: вопрошу́ же Тя, Ты же мя научи́. Слу́хом у́бо у́ха слы́шах Тя пе́рвее, ны́не же о́ко мое́ ви́де Тя.

Пророчества Исаиина чтение. [Глава 8, ст. 4 – 11]

Госпо́дь дае́т мне язы́к науче́ния, е́же разуме́ти, егда́ подоба́ет рещи́ сло́во: положи́ мя у́тро у́тро, приложи́ ми у́хо, е́же слы́шати. И наказа́ние Госпо́дне отверза́ет у́ши мои́, аз же не проти́влюся, ни противоглаго́лю. Плещи́ мои́ вдах на ра́ны, и лани́те мои́ на зауше́ния, лица́ же моего́ не отврати́х от студа́ заплева́ний. И Госпо́дь Госпо́дь помо́щник ми бысть: сего́ ра́ди не усрами́хся, но положи́х лице́ свое́ а́ки тве́рдый ка́мень, и разуме́х, я́ко не постыжду́ся. Зане́ приближа́ется оправда́вый мя: кто пря́йся со мно́ю; да сопротивоста́нет мне ку́пно: и кто судя́йся со мно́ю: да прибли́жится ко мне. Се Госпо́дь Госпо́дь помо́жет ми: кто озло́бит мя; се вси вы, я́ко ри́за обетша́ете, и я́ко мо́лие изъя́ст вы. Кто в вас боя́йся Го́спода; да послу́шает гла́са о́трока Его́: ходя́щии во тьме, и несть им све́та, наде́йтеся на и́мя Госпо́дне, и утверди́теся о Бо́зе. Се вси вы огнь раждиза́ете, и укрепля́ете пла́мень: ходи́те све́том огня́ ва́шего, и пла́менем, его́же разжего́сте: мене́ ра́ди бы́ша сия́ вам, в печа́ли у́спнете.

Таже, ектения малая. Трисвятое.

Прокимен Апостола, глас 7: Кня́зи лю́дстии собра́шася вку́пе / на Го́спода и на Христа́ Его́. Стих: Вску́ю шата́шася язы́цы, и лю́дие поучи́шася тще́тным.

Апостол к Коринфяном, зачало 149. [1 Кор. 11, 23 – 32.]

Бра́тие, аз прия́х от Го́спода, е́же и преда́х вам, я́ко Госпо́дь Иису́с в нощь, в ню́же пре́дан быва́ше, прие́мь хлеб, И благодари́в преломи́, и рече́: приими́те, яди́те, сие́ есть Те́ло Мое́, е́же за вы ломи́мое: сие́ твори́те в Мое́ воспомина́ние. Та́кожде и ча́шу по ве́чери, глаго́ля: сия́ ча́ша Но́вый Заве́т есть в Мое́й Кро́ви: сие́ твори́те, ели́жды а́ще пие́те, в Мое́ воспомина́ние. Ели́жды бо а́ще я́сте хлеб сей и ча́шу сию́ пие́те, смерть Госпо́дню возвеща́ете, до́ндеже прии́дет. Те́мже и́же а́ще яст хлеб сей или́ пие́т ча́шу Госпо́дню недосто́йне, пови́нен бу́дет Те́лу и Кро́ви Госпо́дни. Да искуша́ет же челове́к себе́, и та́ко от хле́ба да яст и от ча́ши да пие́т. Яды́й бо и пия́й недосто́йне, суд себе́ яст и пие́т, не разсужда́я те́ла Госпо́дня. Сего́ ра́ди в вас мно́зи не́мощни и неду́жливи, и спят дово́льни. А́ще бо бы́хом себе́ разсужда́ли, не бы́хом осужде́ни бы́ли. Суди́ми же, от Го́спода наказу́емся, да не с ми́ром осу́димся.

Аллилуиа, глас 6: Блаже́н разумева́яй на ни́ща и убо́га, в день лют изба́вит его́ Госпо́дь. Стих: Врази́ мои́ ре́ша мне зла́я: когда́ у́мрет и поги́бнет и́мя его́? Стих: Яды́й хле́бы Моя́, возвели́чи на Мя запина́ние.

Евангелие от Матфеа, зачало 107 [Мф. 26, 1 – 20]; от Иоанна, зачало 44 [Ин. 13, 3 – 17]; от Матфеа, зачало 108 от полу [Мф. 26, 21 – 39]; от Луки, зачало 109 [Лк. 22, 43 – 45]; от Матфеа, зачало 108 [Мф. 26, 40 – 27, 2].

Рече́ Госпо́дь Свои́м ученико́м: Ве́сте, я́ко по двою́ дню Па́сха бу́дет, и Сын Челове́ческий пре́дан бу́дет на пропя́тие. Тогда́ собра́шася архиере́е, и кни́жницы и ста́рцы людсти́и во двор архиере́ов, глаго́лемаго Каиа́фы. И совеща́ша, да Иису́са ле́стию и́мут, и убию́т. Глаго́лаху же: но не в пра́здник, да не молва́ бу́дет в лю́дех. Иису́су же бы́вшу в Вифа́нии, в дому́ Си́мона прокаже́ннаго. Приступи́ к Нему́ жена́, сткля́ницу ми́ра иму́щи многоце́ннаго, и возлива́ше на главу́ Его́, возлежа́щу. Ви́девше же ученицы́ Его́, негодова́ша, глаго́люще: чесо́ ра́ди ги́бель сия́ бысть? Можа́ше бо сие́ ми́ро продано́ бы́ти на мно́зе, и да́тися ни́щим. Разуме́в же Иису́с рече́ им: что тружда́ете жену́? Де́ло бо добро́ соде́ла о Мне. Всегда́ бо ни́щия и́мате с собо́ю, Мене́ же не всегда́ и́мате. Возлия́вши бо сия́ ми́ро сие́ на те́ло Мое́, на погребе́ние Мя сотвори́. Ами́нь глаго́лю вам: иде́же а́ще пропове́дано бу́дет Ева́нгелие сие́ во всем ми́ре, рече́тся, и е́же сотвори́ сия́, в па́мять ея́. Тогда́ шед еди́н от oбоюна́десяте, глаго́лемый Иу́да Искарио́тский, ко архиере́ом. Рече́: что ми хо́щете да́ти, и аз вам преда́м Его́? Oни́ же поста́виша ему́ три́десять сре́бреник. И отто́ле иска́ше подо́бна вре́мене, да Его́ преда́ст. В пе́рвый же день опресно́чный приступи́ша ученицы́ Иису́сови, глаго́люще Ему́: где хо́щеши, угото́ваем Ти я́сти па́сху? Oн же рече́: иди́те во град ко óнсице, и рцы́те ему́: Учи́тель глаго́лет, вре́мя Мое́ близ есть, у тебе́ сотворю́ па́сху со ученики́ Мои́ми. И сотвори́ша ученицы́, я́коже повеле́ им Иису́с, и угото́ваша па́сху. Ве́черу же бы́вшу возлежа́ше со oбемана́десяте ученико́ма.

Ве́дый Иису́с, я́ко вся даде́ Ему́ Oте́ц в ру́це, и я́ко от Бо́га изы́де, и к Бо́гу гряде́т. Воста́в с ве́чери, и положи́ ри́зы, и прие́м ле́нтион, препоя́сася. Пото́м же влия́ во́ду во умыва́льницу, и нача́т умыва́ти но́ги ученико́м, и отира́ти ле́нтием, и́мже бе препоя́сан. Прии́де же к Си́мону Петру́, и глаго́ла Ему́ той: Го́споди, Ты ли мои́ умы́еши но́зе? Отвеща́ Иису́с, и рече́ ему́: е́же Аз творю́, ты не ве́си ны́не, разуме́еши же по сих. Глаго́ла Ему́ Петр: не умы́еши но́гу мое́ю во ве́ки. Отвеща́ ему́ Иису́с: а́ще не умы́ю тебе́, не и́маши ча́сти со Мно́ю. Глаго́ла Ему́ Си́мон Петр: Го́споди, не но́зе мои́ то́кмо, но и ру́це и главу́. Глаго́ла ему́ Иису́с: измове́нный не тре́бует, то́кмо но́зе умы́ти, есть бо весь чист: и вы чи́сти есте́, но не вси. Ве́дяше бо предаю́щаго Его́, сего́ ра́ди рече́: я́ко не вси чи́сти есте́. Егда́ же умы́ но́ги их, прия́т ри́зы Своя́, возле́г па́ки, рече́ им: ве́сте ли что сотвори́х вам? Вы глаша́ете Мя Учи́теля и Го́спода: и до́бре глаго́лете, есмь бо. А́ще у́бо Аз умы́х ва́ши но́зе, Госпо́дь и Учи́тель, и вы до́лжни есте́ друг дру́гу умыва́ти но́зе. О́браз бо дах вам, да я́коже Аз сотвори́х вам, и вы твори́те. Ами́нь ами́нь глаго́лю вам: несть раб бо́лий го́спода своего́, ни посла́нник бо́лий посла́вшаго его́. А́ще сия́ ве́сте, блаже́ни есте́, а́ще творите́ я́.

И яду́щим им, рече́: ами́нь глаго́лю вам, я́ко еди́н от вас преда́ст Мя. И скорбя́ще зело́, нача́ша глаго́лати Ему́ еди́н ки́йждо их: еда́ аз есмь, Го́споди? Oн же отвеща́в рече́: омочи́вый со Мно́ю в соли́ло ру́ку, той Мя преда́ст. Сын же Челове́ческий и́дет, я́коже есть пи́сано о Нем. Горе́ же челове́ку тому́, и́мже Сын Челове́ческий преда́стся: добро́ бы бы́ло ему́, а́ще не бы роди́лся челове́к той. Отвеща́в же Иу́да предая́й Его́, рече́: еда́ аз есмь, Равви́? Глаго́ла ему́: ты рече́. Яду́щим же им, прие́м Иису́с хлеб, и благослови́в преломи́, и дая́ше ученико́м, и рече́: приими́те, яди́те, сие́ есть Те́ло Мое́. И прие́м ча́шу, хвалу́ возда́в, даде́ им, глаго́ля: пи́йте от нея́ вси. Сия́ бо есть Кровь Моя́, Но́ваго Заве́та, я́же за мно́гия излива́ема, во оставле́ние грехо́в. Глаго́лю же вам: я́ко не и́мам пи́ти от ны́не от сего́ плода́ ло́знаго, до дне того́, егда́ и́ пию́ с ва́ми но́во во Ца́рствии Oтца́ Моего́. И воспе́вше, изыдо́ша в го́ру Елео́нску. Тогда́ глаго́ла им Иису́с: вси вы соблазните́ся о Мне в нощь сию́. Пи́сано бо есть: поражу́ па́стыря, и разы́дутся óвцы ста́да. По воскресе́нии же Мое́м, варя́ю вы в Галиле́и. Отвеща́в же Петр рече́ Ему́: а́ще и вси соблазня́тся о Тебе́, аз никогда́же соблажню́ся. Рече́ ему́ Иису́с: ами́нь глаго́лю тебе́, я́ко в сию́ нощь, пре́жде да́же але́ктор не возгласи́т, трикра́ты отве́ржешися Мене́. Глаго́ла Ему́ Петр: а́ще ми есть и умре́ти с Тобо́ю, не отве́ргуся Тебе́. Та́кожде и вси ученицы́ ре́ша. Тогда́ прии́де с ни́ми Иису́с в весь, нарица́емую Гефсима́ниа, и глаго́ла ученико́м: седи́те ту, до́ндеже шед помолю́ся та́мо. И пое́м Петра́ и óба сы́на Зеведе́ова, нача́т скорбе́ти и тужи́ти. Тогда́ глаго́ла им Иису́с: приско́рбна есть душа́ Моя́ до сме́рти: пожди́те зде, и бди́те со Мно́ю. И преше́д ма́ло, паде́ на лице́ Свое́м, моля́ся и глаго́ля: Óтче Мой, а́ще возмо́жно есть, да мимои́дет от Мене́ ча́ша сия́: oба́че не я́коже Аз хощу́, но я́коже Ты.

Яви́ся же Ему́ А́нгел с небесе́, укрепля́я Его́. И быв в по́двизе, приле́жнее моля́шеся: бысть же пот Его́, я́ко ка́пля кро́ве ка́плющи на зе́млю. И воста́в от моли́твы, прии́де ко ученико́м, и обре́те их спя́ща, и глаго́ла Петро́ви: та́ко ли не возмого́сте еди́наго часа́ побде́ти со Мно́ю? Бди́те и моли́теся, да не вни́дете в напа́сть: дух бо бодр, плоть же немощна́. Па́ки втори́цею шед помоли́ся, глаго́ля: Óтче мой, а́ще не мо́жет сия́ ча́ша мимоити́ от Мене́, а́ще не пию́ ея́, бу́ди во́ля Твоя́. И прише́д обре́те их па́ки спя́ща, бе́ста бо им óчи отяготе́не. И оста́вль их, шед па́ки помоли́ся трети́цею, то́жде сло́во рек. Тогда́ прии́де ко ученико́м Свои́м и глаго́ла им: спи́те про́чее, и почива́йте: се прибли́жися час, и Сын Челове́ческий предае́тся в ру́ки гре́шников. Воста́ните, и́дем: се прибли́жися предая́й Мя. И еще́ Ему́ глаго́лющу, се, Иу́да, еди́н от обоюна́десяте прии́де, и с ним наро́д мног, со oру́жием и дреко́льми, от архиере́й и ста́рец людски́х. Предая́й же Его́, даде́ им зна́мение, глаго́ля: Его́же а́ще лобжу́, Той есть, ими́те Его́. И а́бие присту́пль ко Иису́сови, рече́: ра́дуйся, Равви́, и облобыза́ Его́. Иису́с же рече́ ему́: дру́же, твори́ на не́же еси́ прише́л. Тогда́ присту́пльше возложи́ша ру́це на Иису́са, и я́ша Его́. И се, еди́н от су́щих со Иису́сом, просте́р ру́ку, извлече́ нож свой, и уда́ри раба́ архиере́ова, и уре́за ему́ у́хо. Тогда́ глаго́ла ему́ Иису́с: возврати́ нож твой в ме́сто его́: вси бо прие́мшии нож ноже́м поги́бнут. Или́ мни́тся ти, я́ко не могу́ ны́не умоли́ти Oтца́ Моего́, и предста́вит Ми вя́щше или́ двана́десяте легео́на А́нгел? Ка́ко у́бо сбу́дутся писа́ния, я́ко та́ко подоба́ет бы́ти? В той час рече́ Иису́с наро́дом: я́ко на разбо́йника ли изыдо́сте со ору́жием и дреко́льми, я́ти Мя; по вся дни при вас седе́х уча́ в це́ркви, и не я́сте Мене́. Се же все бысть, да сбу́дутся писа́ния проро́ческая. Тогда́ ученицы́ вси оста́вльше Его́, бежа́ша. Во́ини же е́мше Иису́са ведо́ша к Каиа́фе архиере́ови, иде́же кни́жницы и ста́рцы собра́шася. Петр же идя́ше по Нем издале́ча, до двора́ архиере́ова: и вшед внутрь, седя́ше со слуга́ми, ви́дети кончи́ну. Архиере́е же и ста́рцы, и сонм весь иска́ху лжесвиде́тельства на Иису́са, я́ко да убию́т Его́. И не обрета́ху: и мно́гим лжесвиде́телем присту́пльшим, не обрето́ша. По́слежде же приступи́ша два лжесвиде́теля. Ре́ста: Сей рече́, могу́ разори́ти це́рковь Бо́жию и треми́ де́ньми созда́ти ю́. И воста́в архиере́й, рече́ Ему́: ничесо́же ли отвещава́еши, что си́и на Тя свиде́тельствуют? Иису́с же молча́ше. И отвеща́в архиере́й, рече́ Ему́: заклина́ю Тя Бо́гом живы́м, да рече́ши нам, а́ще Ты еси́ Христо́с, Сын Бо́жий? Глаго́ла ему́ Иису́с: ты рече́. Oба́че глаго́лю вам: отсе́ле у́зрите Сы́на Челове́ческаго седя́ща одесну́ю си́лы, и гряду́ща на о́блацех небе́сных. Тогда́ архиере́й растерза́ ри́зы своя́, глаго́ля, я́ко хулу́ глаго́ла, что еще́ тре́буем свиде́телей? Се ны́не слы́шасте хулу́ Его́. Что ся вам мнит? Oни́ же отвеща́вше, ре́ша: пови́нен есть сме́рти. Тогда́ заплева́ша лице́ Его́, и па́кости Ему́ де́яху, óвии же за лани́ту уда́риша, Глаго́люще: прорцы́ нам, Христе́, кто есть ударе́й Тя? Петр же вне седя́ше во дворе́, и приступи́ к нему́ еди́на рабы́ня, глаго́лющи: и ты бе со Иису́сом Галиле́йским. Oн же отве́ржеся пред все́ми, глаго́ля: не вем, что глаго́леши. Изше́дшу же ему́ ко врато́м, узре́ его́ друга́я, и глаго́ла им ту: и сей бе со Иису́сом Назоре́ом. И па́ки отве́ржеся с кля́твою: я́ко не зна́ю Челове́ка. По ма́ле же приступи́вше стоя́щии, ре́ша Петро́ви: вои́стинну и ты от них еси́, и́бо бесе́да твоя́ я́ве тя твори́т. Тогда́ нача́т роти́тися и кля́тися, я́ко не зна́ю Челове́ка. И а́бие пе́тель возгласи́. И помяну́ Петр глаго́л Иису́сов, рече́нный ему́: я́ко пре́жде да́же пе́тель не возгласи́т, трикра́ты отве́ржешися Мене́. И изше́д вон пла́кася го́рько. У́тру же бы́вшу, сове́т сотвори́ша вси архиере́е и ста́рцы людсти́и на Иису́са, я́ко уби́ти Его́. И связа́вше Его́ ведо́ша, и преда́ша Его́ Понти́йскому Пила́ту иге́мону.

И по чину Божественная Литургиа Великаго Василиа. Вместо же херувимския песни поем тропарь сей, на глас 6, трижды.

Ве́чери Твоея́ Та́йныя днесь, Сы́не Бо́жий, / прича́стника мя приими́: / не бо враго́м Твои́м та́йну пове́м, / ни лобза́ния Ти дам я́ко Иу́да, / но я́ко разбо́йник испове́даю Тя: / помяни́ мя Го́споди во Ца́рствии Твое́м.

Тойже и причастен, и вместо, Да испо́лнятся уста́ на́ша: тойже поем множицею, дондеже причастятся братия Божественных Таин. По заамвонной же молитве бывает умовение, и его последование, якоже являет Устав. Таже дается антидор, и отпуст. На трапезе же причащаемся вина и елеа.

Отпуст:

И́же за превосходя́щую бла́гость путь добре́йший смире́ния показа́вый, внегда́ умы́ти но́ги ученико́в, да́же и до Креста́ и погребе́ния снизше́дый нам, Христо́с, и́стинный Бог наш, моли́твами пречи́стыя Своея́ Ма́тере, святы́х сла́вных и всехва́льных Апо́стол, и́же во святы́х отца́ на́шего Васи́лия Вели́каго, архиепи́скопа Кесари́и Каппадоки́йския, и всех святы́х, поми́лует и спасе́т нас, я́ко Благ и Человеколю́бец.

В ТОЙЖЕ ВЕЛИКИЙ ЧЕТВЕРТОК

Повечерие глаголем малое, на немже поем трипеснец. Творение господина Андреа Критскаго. Глас 8.

Песнь 5.

Ирмос: Мрак души́ моея́ разжени́, светода́вче Христе́ Бо́же, / началоро́дную тьму изгна́в бе́здны, / и да́руй ми свет повеле́ний Твои́х, Сло́ве, / да у́тренюя, сла́влю Тя.

Украси́ся ве́черя, и угото́вася Тебе́ па́сха, / я́коже рекл еси́ Христе́, / но Иу́да на преда́ние Твое́ поуча́шеся, / сый с Тобо́ю вне Твоея́ цены́, / соглаша́шеся сребролю́бием.

Востае́т с ве́чери, и ле́нтием препоясу́ется по чре́слом Христо́с во́лею, / и преклоня́ет вы́ю, Петру́ вопию́щу: / никогда́же мои́ но́зе умы́еши Тво́рче мой, но оба́че омы́й.

Прия́т хлеб в ру́це, на преда́ние Иу́да, льсти́вый учени́к, / и́мже и преда́ние соде́ла Тебе́, / простира́ше но́зе, и́хже сам еси́ омы́л и ле́нтием оте́рл.

Лобза́нием льсти́вным Иу́да тогда́ уста́ распира́ше Тебе́, / и́миже те́ло Твое́ Сло́ве недосто́йно омака́ше, / вопия́ Тебе́: ра́дуйся Учи́телю, / лобза́тель и преда́тель, раб и льстец.

Петр я́коже зря́ше содева́емая тогда́, / у́жасом одержи́мь быв / рабы́ни обличи́ся худы́м вопроше́нием: / и́бо отве́ржеся Тебе́ Го́спода, / не то́кмо я́коже рекл еси́, / но и я́ко ве́дал еси́, вся ве́дый.

Зауша́ется Зижди́тель, и ударя́ется тварь поноше́нием Его́: / тро́стию бие́тся хотя́, и вы́шняя преклоня́ются: / оплева́ется Судия́, и основа́ния вся земна́я подвиза́ются.

Слава: Те́рнием венчава́ется Бог, зе́млю всю украше́й цве́ты, / и ра́ны прие́млет, и терпи́т поноше́ние долготерпели́вно, / и багряни́цу поруга́ния но́сит, / и терпи́т вся Бог сый, и стра́ждет Свое́ю пло́тию.

И ныне: Да вопие́т Иоа́нн, сказу́я уче́нии Боже́ственными воплоще́ние Твое́: / Сло́во плоть быв из Де́вы непрело́жно, / и пребы́сть естество́м Бог я́коже бе, / не отступи́в Оте́ческих Его́ недр.

Песнь 8.

Ирмос: Покрыва́яй вода́ми превы́спренняя Своя́, / полага́яй мо́рю преде́л песо́к и содержа́й вся, / Тя пое́т со́лнце, Тя сла́вит луна́, / Тебе́ прино́сит песнь вся тварь, / я́ко Соде́телю всех во ве́ки.

Одева́яй о́блаки не́бо Иису́се, / на престо́ле сла́вы ца́рствуя с нетле́нным Отце́м, / Ты прие́мь ле́нтий, сим препояс́ался еси́ омы́ти но́ги бре́ннии, / весь огнь сый Сло́ве, а́ще и воплоти́лся еси́.

Я́коже вся омы́в, возле́г Иису́с, к Свои́м ученико́м глаго́лет: / ве́сте вси, что сотвори́х ны́не: / о́браз бо дах вам смире́ния всем: / да и́же хо́щет пе́рвый бы́ти, / да бу́дет всех после́дний произволе́нием.

Чи́сти у́бо есте́, но не вси вы, / Христо́с друго́м возлежа́щим на ве́чери рече́: / еди́н у́бо к друго́му не дове́дяще, рече́, сло́ва: / те́мже по сих глаго́лет я́ве и́мя преда́теля.

Я́коже сия́ глаго́ля, / на горе́ Елео́нстей прише́д, Судия́ всех со ученики́, / тогда́ у́бо глаго́лаше: / прииди́те и по́йдем отсю́ду, / приспе́ бо уже́ преда́тель: / никто́же отве́ржися Мене́, во́лею бо стражду́.

О ле́стнаго лобза́ния! / Ра́дуйся Учи́телю, Христу́ Иу́да глаго́лет, / вку́пе с сло́вом преда́ст на заколе́ние: / се бо даде́ зна́мение беззако́нным: / Его́же аз лобжу́, Той есть, / Его́же преда́ти вам обеща́хся.

Ят быв Бо́же наш от беззако́нных люде́й, / и не пререку́я отню́д, ни вопия́ А́гнче Бо́жий, / претерпе́л еси́ вся, испыта́тися, и суди́тися, и бие́н бы́ти, / свя́зан и ведо́м бы́ти со ору́жии и дреко́льми к Каиа́фе.

Да ра́спнется, вопия́ху евре́йстии лю́дие со свяще́нники и кни́жники, Иису́с Христо́с. / О лю́дие неве́рнии! / Что бо сотвори́ яви́выйся, воздви́гнувый Ла́заря от гро́ба, / и путь сотвори́вый челове́ком на спасе́ние?

Пила́тову суди́щу беззако́ннии лю́дие, крича́ще вопия́ху: / распни́ Сего́, отпусти́ же нам свя́зана су́ща Вара́вву, уби́йцу: / Христа́ же пе́рвее бив, возми́ возми́, распни́ со злоде́и.

Благослови́м Отца́ и Сы́на, и Свята́го Ду́ха, Го́спода.

О несказа́ннаго истоща́ния! О неизглаго́ланнаго сове́та! / Я́ко огнь сый, омы́л еси́ но́зе преда́телю Спа́се: / омы́в же не опали́л еси́, / и подава́я хлеб на ве́чери, и та́йной слу́жбе науча́л еси́.

И ныне, Богородичен: О но́ваго слы́шания! / Бог Сын Жены́, и безсе́менна рождества́, безму́жная Ма́ти, и рожде́нное Бог: / о ужа́снаго слы́шания! О зача́тия стра́шнаго! / О Де́вы нетле́ннаго рождества́! / Вои́стинну па́че ума́ вся, и вы́ше ве́дения.

Песнь 9.

Ирмос: Благослове́н Госпо́дь, Бог Изра́илев, / воздви́гнувый рог спасе́ния нам, / в дому́ Дави́дове, о́трока Своего́, / в ни́хже посети́ нас Восто́к с высоты́, / и напра́вил ны есть на путь ми́ра.

Па́ки вы спите́, Христо́с ученико́м рече́: / бди́те, прибли́жися час про́чее, воста́ните, / и́дем дру́зи Мои́, / се преда́тель учени́к всю спи́ру име́я, / гряде́т преда́ти Мя человекоуби́йцам.

Лобза́ние твое́ льсти́вное, и целова́ние го́рькое, / кому́ зове́ши ле́стче; глаго́ля бо, ра́дуйся Равви́, / Христо́с ко Иу́де веща́ше: / дру́же, на не́же прише́л еси́, рече́: / а́ще бо целова́ти прише́л еси́, / что предлага́еши нож ме́дом пома́занный?

Пила́тову суди́щу непови́нный Судия́, / во́лею прише́л еси́ предста́ти Христе́, / и изба́вити нас от долго́в на́ших. / Те́мже претерпе́л еси́ Благи́й пло́тию ура́нен бы́ти, / да вси прии́мем свобожде́ние.

Милосе́рдия пучи́на, ка́ко предстои́т огнь Пила́ту, / се́ну и тро́сти и земли́ су́щей, / его́же не опали́ огнь Божества́ Христо́с, но пожида́ше терпели́вно, / и́же естество́м свобо́дь я́ко Человеколю́бец.

Возми́ возми́, распни́ глаго́лемаго Христа́, / иуде́е взыва́ху Пила́ту иногда́: / сей же ру́це омыва́ше, / и тро́стию им писа́ше на Него́ вину́, / всем да́рующую безсме́ртие.

Вопию́ще беззако́ннии Пила́ту изли́ше: / возми́ возми́, распни́ Христа́, / прося́ху уби́ти я́ко осужде́на: / не Сей ли воскреси́ ме́ртвыя, прокаже́нныя очи́сти, / кровоточи́вую исцели́, разсла́бленныя стягну́в?

Что бо зло сотвори́, я́ко взыва́ете вельми́: / возми́ возми́, распни́ Его́? / Пила́т иногда́ вопия́ше лю́дем неразу́мным: / вины́ не обрета́ю в Нем. / Они́ же го́рько вопия́ху: / возми́ возми́, распни́ Спа́са всех.

О иуде́е беззако́ннии! О неразу́мнии лю́дие! / Не помяну́сте ли что от чуде́с Христо́вых, мно́жество исцеле́ний? / Но и всея́ Его́ не разуме́сте ли Боже́ственныя си́лы, / я́коже пе́рвии отцы́ ва́ши, ны́не же и вы не разуме́сте?

Слава: Бие́н быв Зижди́телю мой, и преда́лся еси́ мене́ ра́ди распя́тися, / да спасе́ние мое́ посреде́ земли́ соде́лав, источи́ши ми́рови жизнь: / и обезсме́ртиши честно́ю Твое́ю кро́вию покланя́ющияся Тебе́.

И ныне, Богородичен: А́гница Твоя́ Влады́ко, предстоя́щи у Креста́, / и рыда́ющи Тебе́ Творца́ вся́ческих, / зря́ше Твое́ долготерпе́ние: / во́лею бо роди́лся еси́ пло́тию, / и стра́сти вся в ней претерпе́л еси́, да спасе́ши мир.

ВО СВЯТЫЙ И ВЕЛИКИЙ ЧЕТВЕРТОК ВЕЧЕРА

во 2-й час нощи знаменует. И собравшимся нам во храм, благословившу священнику поем начало по обычаю, якоже в четверток 5-й седмицы. Таже шестопсалмие. Посем ектения великая, и по возгласе поем, Аллилу́иа, на глас 8. И тропарь: Егда́ сла́внии ученицы́: трижды, косно и со сладкопением. Писан в Великий Четверток на Утрени. Таже ектения малая. И даются свещи братии от екклисиарха. И глаголет священник: И о сподо́битися нам:

И чтет первое Евангелие от Иоанна, завета Святых Страстей, зачало 46:

Рече́ Госпо́дь Свои́м ученико́м: ны́не просла́вися Сын Челове́ческий, и Бог просла́вися о Нем. А́ще Бог просла́вися о Нем, и Бог просла́вит Его́ в Себе, и а́бие прославит Его́. Ча́дца, еще́ с ва́ми ма́ло есмь: взы́щете Мене́, и я́коже рех иуде́ом, я́ко а́може Аз иду, вы не мо́жете приити́, и вам глаго́лю ны́не. За́поведь но́вую даю́ вам, да лю́бите друг дру́га: я́коже возлюби́х вы, да и вы лю́бите себе́. О сем разуме́ют вси, я́ко Мои́ ученицы́ есте́, а́ще любо́вь и́мате между́ собо́ю. Глаго́ла Ему́ Си́мон Петр: Го́споди, ка́мо и́деши? Отвеща́ ему́ Иису́с: а́може Аз иду́, не мо́жеши ны́не по Мне ити́, последи́ же по Мне и́деши. Глаго́ла Ему́ Петр: Го́споди, почто́ не могу́ ны́не по Тебе́ ити́? Ны́не ду́шу мою́ за Тя положу́. Отвеща́ ему́ Иису́с: ду́шу ли твою́ за Мя положи́ши? Ами́нь, ами́нь глаго́лю тебе́: не возгласи́т але́ктор, до́ндеже отве́ржешися Мене́ три́щи.

Да не смуща́ется се́рдце ва́ше: ве́руйте в Бо́га, и в Мя ве́руйте: В дому́ Отца́ Моего́ оби́тели мно́ги суть: а́ще ли же ни, рекл бых вам: иду́ угото́вати ме́сто вам. И а́ще угото́влю ме́сто вам, па́ки прииду́, и поиму́ вы к Себе́: да иде́же есмь Аз и вы бу́дете. И а́може Аз иду́, ве́сте, и путь ве́сте. Глаго́ла Ему́ Фома́: Го́споди, не ве́мы, ка́мо и́деши; и ка́ко мо́жем путь ве́дети? Глаго́ла ему́ Иису́с: Аз есмь путь, и и́стина, и живо́т: никто́же прии́дет ко Отцу́, то́кмо Мно́ю. А́ще Мя бы́сте зна́ли, и Отца́ Моего́ зна́ли бы́сте у́бо: и отсе́ле позна́сте Его́, и ви́десте Его́. Глаго́ла Ему́ Фили́пп: Го́споди, покажи́ нам Отца́, и довле́ет нам. Глаго́ла ему́ Иису́с: толи́ко вре́мя с ва́ми есмь, и не позна́л еси́ Мене́, Фили́ппе? Ви́девый Мене́, ви́де Отца́: и ка́ко ты глаго́леши, покажи́ нам Отца́? Не ве́руеши ли, я́ко Аз во Отце́, и Оте́ц во Мне есть? Глаго́лы, я́же Аз глаго́лю вам, о Себе́ не глаго́лю: Оте́ц же во Мне пребыва́яй, Той твори́т дела́. Ве́руйте Мне, я́ко Аз во Отце́, и Оте́ц во Мне: а́ще ли же ни, за та дела́ ве́ру ими́те Ми. Ами́нь, ами́нь глаго́лю вам: ве́руяй в Мя, дела́, я́же Аз творю́, и той сотвори́т, и бо́льша сих сотвори́т, я́ко Аз ко Отцу́ Моему́ гряду́. И е́же а́ще что про́сите от Отца́ о и́мени Мое́м, то сотворю́, да просла́вится Оте́ц в Сы́не. И а́ще чесо́ про́сите во и́мя Мое́, Аз сотворю́. А́ще лю́бите Мя, за́поведи Моя́ соблюди́те. И Аз умолю́ Отца́, и ино́го Уте́шителя даст вам, да бу́дет с ва́ми в век, Дух и́стины, Его́же мир не мо́жет прия́ти, я́ко не ви́дит Его́, ниже́ зна́ет Его́: вы же зна́ете Его́, я́ко в вас пребыва́ет, и в вас бу́дет. Не оста́влю вас си́ры: прииду́ к вам. Еще́ ма́ло, и мир ктому́ не ви́дит Мене́, вы же ви́дите Мя, я́ко Аз живу́, и вы жи́ви бу́дете. В той день разуме́ете вы, я́ко Аз во Отце́ Мое́м, и вы во Мне, и Аз в вас. Име́яй за́поведи Моя́ и соблюда́яй их, той есть любя́й Мя, а любя́й Мя возлю́блен бу́дет Отце́м Мои́м, и Аз возлюблю́ его́, и явлю́ся ему́ Сам. Глаго́ла Ему́ Иу́да, не Искарио́тский: Го́споди, и что бысть, я́ко нам хо́щеши яви́тися, а не ми́рови? Отвеща́ Иису́с, и рече́ ему́: а́ще кто лю́бит Мя, сло́во Мое́ соблюде́т: и Оте́ц Мой возлю́бит его́, и к нему́ прии́дема, и оби́тель у него́ сотвори́ма. Не любя́й Мя, слове́с Мои́х не соблюда́ет: и сло́во, е́же слы́шасте, несть Мое́, но посла́вшаго Мя Отца́. Сия́ глаго́лах вам в вас сый: Уте́шитель же, Дух Святы́й, Его́же по́слет Оте́ц во и́мя Мое́, Той вы научи́т всему́, и воспомяне́т вам вся, я́же рех вам. Мир оставля́ю вам, мир Мой даю вам: не я́коже мир дае́т, Аз даю́ вам. Да не смуща́ется се́рдце ва́ше, ни устраша́ет. Слы́шасте, я́ко Аз рех вам: иду́ и прииду́ к вам. А́ще бы́сте люби́ли Мя, возра́довалися бы́сте у́бо, я́ко рех: иду ко Отцу́: я́ко Оте́ц Мой бо́лий Мене́ есть. И ны́не рех вам, пре́жде да́же не бу́дет, да, егда́ бу́дет, ве́ру и́мете. Ктому́ не мно́го глаго́лю с ва́ми: гряде́т бо сего́ ми́ра князь, и во Мне не и́мать ничесо́же. Но да разуме́ет мир, я́ко люблю́ Отца́, и я́коже запове́да Мне Оте́ц, та́ко творю́: воста́ните, и́дем отсю́ду.

Аз есмь лоза́ и́стинная, и Оте́ц Мой де́латель есть: Вся́ку розгу́ о Мне не творя́щую плода́, и́змет ю́, и вся́ку творя́щую плод, отреби́т ю́, да мно́жайший плод принесе́т. Уже́ вы чи́сти есте́ за сло́во, е́же глаго́лах вам. Бу́дите во Мне, и Аз в вас. Я́коже розга́ не мо́жет плода́ сотвори́ти о себе́, а́ще не бу́дет на лозе́, та́ко и вы, а́ще во Мне не пребу́дете. Аз есмь лоза́, вы же ро́ждие; и и́же бу́дет во Мне, и Аз в нем, той сотвори́т плод мног, я́ко без Мене́ не мо́жете твори́ти ничесо́же. А́ще кто во Мне не пребу́дет, изве́ржется вон, я́коже розга́, и изсы́шет: и собира́ет ю́, и во огнь влага́ют, и сгара́ет. А́ще пребу́дете во Мне, и глаго́лы Мои́ в вас пребу́дут: ему́же а́ще хо́щете, проси́те, и бу́дет вам. О сем просла́вися Оте́ц Мой, да плод мног сотворите́, и бу́дете Мои́ ученицы́. Я́коже возлюби́ Мя Оте́ц, и Аз возлюби́х вас: бу́дите в любви́ Мое́й. А́ще за́поведи Моя́ соблюде́те, пребу́дете в любви́ Мое́й, я́коже Аз за́поведи Отца́ Моего́ соблюдо́х, и пребыва́ю в Его́ любви́. Сия́ глаго́лах вам, да ра́дость Моя́ в вас бу́дет, и ра́дость ва́ша испо́лнится. Сия́ есть за́поведь Моя́, да лю́бите друг дру́га, я́коже возлюби́х вы. Бо́льши сея́ любве́ никто́же и́мать, да кто ду́шу свою́ положи́т за дру́ги своя́. Вы дру́зи Мои́ есте́, а́ще творите́, ели́ка Аз запове́даю вам. Не ктому́ вас глаго́лю рабы́, я́ко раб не весть, что твори́т госпо́дь его́: вас же реко́х дру́ги, я́ко вся, я́же слы́шах от Отца́ Моего́, сказа́х вам. Не вы Мене́ избрасте, но Аз избрах вас, и положих вас, да вы идете и плод принесете, и плод ваш пребудет, да, его́же а́ще просите от Отца́ во и́мя Мое́, даст вам. Сия́ запове́даю вам, да лю́бите друг дру́га. А́ще мир вас ненави́дит, ве́дите, я́ко Мене́ пре́жде вас возненави́де. А́ще от ми́ра бы́сте бы́ли, мир у́бо свое́ люби́л бы: я́коже от ми́ра не́сте, но Аз избра́х вы от ми́ра, сего́ ра́ди ненави́дит вас мир. Помина́йте сло́во, е́же Аз рех вам: несть раб бо́лий го́спода своего́. А́ще Мене́ изгна́ша, и вас изжену́т: а́ще сло́во Мое́ соблюдо́ша, и ва́ше соблюду́т. Но сия́ вся творя́т вам за и́мя Мое́, я́ко не ве́дят Посла́вшаго Мя. А́ще не бых прише́л и глаго́лал им, греха́ не бы́ша име́ли: ны́не же вины́ не и́мут о гресе́ свое́м. Ненави́дяй Мене́, и Отца́ Моего́ ненави́дит. А́ще дел не бых сотвори́л в них, и́хже ин никто́же сотвори́, греха́ не бы́ша име́ли: ны́не же и ви́деша, и возненавидеша Мене́ и Отца́ Моего́. Но да сбу́дется сло́во, пи́санное в зако́не их, я́ко возненави́деша Мя ту́не. Егда́ же прии́дет Уте́шитель, Его́же Аз послю́ вам от Отца́, Дух и́стины, И́же от Отца́ исхо́дит, Той свиде́тельствует о Мне. И вы же свиде́тельствуете, я́ко искони́ со Мно́ю есте́.

Сия́ глаго́лах вам, да не соблазните́ся. От со́нмищ иждену́т вы, но прии́дет час, да всяк, и́же убие́т вы, мни́тся слу́жбу приноси́ти Бо́гу. И сия́ сотворя́т, я́ко не позна́ша Отца́, ни Мене́. Но сия́ глаго́лах вам, да егда́ прии́дет час, помина́йте сия́, я́ко Аз рех вам. Сих же вам испе́рва не рех, я́ко с ва́ми бех. Ны́не же иду́ к Посла́вшему Мя, и никто́же от вас вопроша́ет Мене́, ка́мо и́деши? Но я́ко сия́ глаго́лах вам, ско́рби испо́лних сердца́ ва́ша. Но Аз и́стину вам глаго́лю, у́не есть вам, да Аз иду́: а́ще бо не иду́ Аз, Уте́шитель не прии́дет к вам. А́ще ли же иду́, послю́ Его́ к вам. И прише́д Он, обличи́т мир о гресе́, и о пра́вде, и о суде́. О гресе́ у́бо, я́ко не ве́руют в Мя. О пра́вде же, я́ко ко Отцу́ Моему́ иду́, и ктому́ не ви́дите Мене́. О суде́ же, я́ко князь ми́ра сего́ осужде́н бысть. Еще́ мно́го и́мам глаго́лати вам, но не мо́жете носи́ти ны́не. Егда́ же прии́дет Он, Дух и́стины, наста́вит вы на вся́ку и́стину: не от Себе́ бо глаго́лати и́мать, но ели́ка а́ще услы́шит, глаго́лати и́мать, и гряду́щая возвести́т вам. Он Мя просла́вит, я́ко от Моего́ прии́мет, и возвести́т вам. Вся, ели́ка и́мать Оте́ц, Моя́ суть: сего́ ра́ди рех, я́ко от Моего́ прии́мет, и возвести́т вам. Вма́ле, и ктому́ не ви́дите Мене́: и па́ки вма́ле, и у́зрите Мя, я́ко иду́ ко Отцу́. Ре́ша же от учени́к Его́ к себе́: что есть сие́, е́же глаго́лет нам, вма́ле, и не ви́дите Мене́; и па́ки, вма́ле и у́зрите Мя; и я́ко Аз иду́ ко Отцу́? Глаго́лаху у́бо, что сие́ есть, е́же глаго́лет, вма́ле; не ве́мы, что глаго́лет. Разуме́ же Иису́с, я́ко хотя́ху Его́ вопроша́ти, и рече́ им: о сем ли стяза́етеся между́ собо́ю, я́ко рех: вма́ле, и не ви́дите Мене́: и па́ки, вма́ле, и у́зрите Мя? Ами́нь, ами́нь глаго́лю вам, я́ко воспла́четеся и возрыда́ете вы, а мир возра́дуется; вы же печа́льни бу́дете, но печа́ль ва́ша в ра́дость бу́дет. Жена́, егда́ ражда́ет, скорбь и́мать, я́ко прии́де год ея́: егда́ же роди́т отроча́, ктому́ не по́мнит ско́рби за ра́дость, я́ко роди́ся челове́к в мир. И вы же печа́ль и́мате у́бо ны́не: па́ки же узрю́ вы, и возра́дуется се́рдце ва́ше, и ра́дости ва́шея никто́же во́змет от вас. И в той день Мене́ не вопро́сите ничесо́же. Ами́нь, ами́нь глаго́лю вам, я́ко ели́ка а́ще чесо́ про́сите от Отца́ во и́мя Мое́, даст вам. Досе́ле не проси́сте ничесо́же во и́мя Мое́: проси́те, и прии́мете, да ра́дость ва́ша испо́лнена бу́дет. Сия́ в при́тчах глаго́лах вам, но прии́дет час, егда́ ктому́ в при́тчах не глаго́лю вам, но я́ве о Отце́ возвещу́ вам. В той день во и́мя Мое́ вопро́сите, и не глаго́лю вам, я́ко Аз умолю Отца́ о вас. Сам бо Оте́ц лю́бит вы, я́ко вы Мене́ возлюби́сте, и ве́ровасте, я́ко Аз от Бо́га изыдо́х. Изыдо́х от Отца́, и приидо́х в мир: и па́ки оставля́ю мир, и иду́ ко Отцу́. Глаго́лаша Ему́ ученицы́ Его́: се ны́не не обину́яся глаго́леши, а при́тчи никоея́же не глаго́леши. Ны́не ве́мы, я́ко ве́си вся, и не тре́буеши, да кто Тя вопроша́ет: о сем ве́руем, я́ко от Бо́га изше́л еси́. Отвеща́ им Иису́с: ны́не ли ве́руете? Се гряде́т час, и ны́не прии́де, да разы́детеся ко́ждо во своя́, и Мене́ еди́наго оста́вите: и несмь еди́н, я́ко Оте́ц со Мно́ю есть. Сия́ глаго́лах вам, да во Мне мир и́мате. В ми́ре ско́рбни бу́дете, но дерза́йте, я́ко Аз победи́х мир.

Сия́ глаго́ла Иису́с, и возведе́ о́чи Свои́ на не́бо, и рече́: О́тче, прии́де час, просла́ви Сы́на Твоего́, да и Сын Твой просла́вит Тя. Я́коже дал еси́ Ему́ власть вся́кия пло́ти, да вся́ко е́же дал еси́ Ему́, даст им живо́т ве́чный. Се же есть живо́т ве́чный, да зна́ют Тебе́ еди́наго и́стиннаго Бо́га, и Его́же посла́л еси́ Иису́с Христа́. Аз просла́вих Тя на земли́, де́ло соверши́х, е́же дал еси́ Мне да сотворю́. И ны́не просла́ви Мя Ты, О́тче, у Тебе́ Самаго́ сла́вою, ю́же име́х у Тебе́ пре́жде мир не бысть. Яви́х и́мя Твое́ челове́ком, и́хже дал еси́ Мне от ми́ра: Твои́ бе́ша, и Мне их дал еси́, и сло́во Твое́ сохрани́ша. Ны́не разуме́ша, я́ко вся, ели́ка дал еси́ Мне, от Тебе́ суть. Я́ко глаго́лы, и́хже дал еси́ Мне, дах им, и ти́и прия́ша, и разуме́ша вои́стинну, я́ко от Тебе́ изыдо́х, и ве́роваша, я́ко Ты Мя посла́. Аз о сих молю́: не о всем ми́ре молю́, но о тех, и́хже дал еси́ Мне, я́ко Твои́ суть. И Моя́ вся, Твоя́ суть, и Твоя́ Моя́: и просла́вихся в них. И ктому́ несмь в ми́ре, и си́и в ми́ре суть, и Аз к Тебе́ гряду́. О́тче Святы́й, соблюди́ их во и́мя Твое́, и́хже дал еси́ Мне, да бу́дут еди́но, я́коже и Мы. Егда́ бех с ни́ми в ми́ре, Аз соблюда́х их во и́мя Твое́: и́хже дал еси́ Мне, сохрани́х, и никто́же от них поги́бе, то́кмо сын поги́бельный, да сбу́дется Писа́ние. Ны́не же к Тебе́ гряду́, и сия́ глаго́лю в ми́ре, да и́мут ра́дость Мою́ испо́лнену в себе́. Аз дах им сло́во Твое́, и мир возненави́де их, я́ко не суть от ми́ра, я́коже и Аз от ми́ра несмь. Не молю́, да во́змеши их от ми́ра, но да соблюде́ши их от неприя́зни. От ми́ра не суть, я́коже и Аз от ми́ра несмь. Святи́ их во и́стину Твою́: сло́во Твое́ и́стина есть. Я́коже Мене́ посла́л еси́ в мир, и Аз посла́х их в мир. И за них Аз свящу́ Себе́, да и ти́и бу́дут свяще́ни во и́стину. Не о сих же молю́ то́кмо, но и о ве́рующих словесе́ их ра́ди в Мя. Да вси еди́но су́ть, я́коже Ты, О́тче, во Мне, и Аз в Тебе́, да и ти́и в Нас еди́но бу́дут: да и мир ве́ру и́мет, я́ко Ты Мя посла́л еси́. И Аз сла́ву, ю́же дал еси́ Мне, дах им: да бу́дут еди́но, я́коже Мы еди́но есма́. Аз в них, и Ты во Мне, да бу́дут сверше́ни во еди́но, и да разуме́ет мир, я́ко Ты Мя посла́, и возлюби́л еси́ их, я́коже Мене́ возлюби́л еси́. О́тче, и́хже дал еси́ Мне, хощу́, да иде́же есмь Аз, и ти́и бу́дут со Мно́ю, да ви́дят сла́ву Мою́, ю́же дал еси́ Мне, я́ко возлюби́л Мя еси́ пре́жде сложе́ния ми́ра. О́тче пра́ведный, и мир Тебе́ не позна́, Аз же Тя позна́х, и си́и позна́ша, я́ко Ты Мя посла́. И сказа́х им и́мя Твое́, и скажу́, да любы́, е́юже Мя еси́ возлюби́л, в них бу́дет, и Аз в них. И сия́ рек Иису́с, изы́де со ученики́ Свои́ми на он пол пото́ка Ке́дрска, иде́же бе вертогра́д, во́ньже вни́де Сам и ученицы́ Его́.

И скончавшуся Евангелию, поем: Сла́ва долготерпе́нию Твоему́, Го́споди. И абие поем антифоны, повторяюще вся тропари.

Антифон 1.

Глас 8: Кня́зи лю́дстии собра́шася на Го́спода, / и на Христа́ Его́.

Тойже: Сло́во законопресту́пное возложи́ша на Мя, / Го́споди, Го́споди, не оста́ви Мене́.

Чу́вствия на́ша чи́ста Христо́ви предста́вим, / и я́ко дру́зи Его́, ду́ши на́ша пожре́м Его́ ра́ди, / и не попече́ньми жите́йскими соугнета́емся, я́ко Иу́да, / но в кле́тех на́ших возопии́м: / О́тче наш, И́же на небесе́х, / от лука́ваго изба́ви нас.

Слава, Богородичен: Де́ва родила́ еси́ Неискусобра́чная, / и Де́ва пребыла́ еси́ Ма́ти Безневе́стная, / Богоро́дице Мари́е: / Христа́ Бо́га на́шего моли́ спасти́ся нам.

И ныне, тойже.

Антифон 2.

Глас 6: Тече́ глаго́ля Иу́да беззако́нным кни́жником: / что мне хо́щете да́ти, и аз вам преда́м Его́? / Среди́ же совещава́ющих Сам стоя́л еси́ неви́димо Совещава́емый: / Сердцеве́дче, пощади́ ду́ши на́ша.

Ми́лостию Бо́гови послу́жим, я́коже Мари́я на ве́чери, / и не стя́жим сребролю́бия, я́ко Иу́да: / да всегда́ со Христо́м Бо́гом бу́дем.

Слава, Богородичен: Его́же родила́ еси́, Де́во, неизрече́нно, / вы́ну я́ко Человеколю́бца не преста́й моля́щи, / да от бед спасе́т вся к Тебе́ прибега́ющия.

И ныне, тойже.

Антифон 3.

Глас 2: Ла́зарева ра́ди воста́ния, Го́споди, / оса́нна Тебе́ зва́ху де́ти евре́йския, Человеколю́бче. / Беззако́нный же Иу́да не восхоте́ разуме́ти.

На ве́чери Твое́й, Христе́ Бо́же, / ученико́м Твои́м предглаго́лал еси́: / еди́н от вас преда́ст Мя. / Беззако́нный же Иу́да не восхоте́ разуме́ти.

Иоа́нну вопроси́вшу: / Го́споди, предая́й Тя кто есть? / Того́ хле́бом показа́л еси́. / Беззако́нный же Иу́да не восхоте́ разуме́ти.

На три́десятих сре́бреницех, Го́споди, / и на лобза́нии льсти́вном, / иска́ху иуде́е уби́ти Тя. / Беззако́нный же Иу́да не восхоте́ разуме́ти.

На умове́нии Твое́м, Христе́ Бо́же, / ученико́м Твои́м повеле́л еси́: / си́це твори́те, я́коже ви́дите. / Беззако́нный же Иу́да не восхоте́ разуме́ти.

Бди́те и моли́теся, да не вни́дете в напа́сть, / ученико́м Твои́м, Христе́ Бо́же наш, глаго́лал еси́. / Беззако́нный же Иу́да не восхоте́ разуме́ти.

Слава, Богородичен: Спаси́ от бед рабы́ Твоя́, Богоро́дице, / я́ко все по Бо́зе к Тебе́ прибега́ем, / я́ко неруши́мей стене́ и предста́тельству.

И ныне, тойже.

Седален. [Не седим же на сицевых седальнах, за еже священнику кадити святый олтарь, но, стояще, поем я.] Глас 7:

На ве́чери ученики́ пита́я, / притворе́ние преда́ния ве́дый, / на ней Иу́ду обличи́л еси́, / неиспра́вленна у́бо сего́ ве́дый: / позна́ти же всем хотя́, я́ко во́лею преда́лся еси́, / да мир исхити́ши от чужда́го: / Долготерпели́ве, сла́ва Тебе́.

Слава, конец. И ныне, весь. Таже И о сподо́битися нам:

И чтет священник второе Евангелие, от Иоанна, зачало 58:

Во вре́мя о́но, изы́де Иису́с со ученики́ Свои́ми на он пол пото́ка Ке́дрска, иде́же бе вертогра́д, во́ньже вни́де Сам и ученицы́ Его́. Ве́дяше же Иу́да предая́й Его́ ме́сто, я́ко мно́жицею собира́шеся Иису́с ту со ученики́ Свои́ми. Иу́да у́бо прие́мь спи́ру, и от архиере́й и фарисе́й слуги́, прии́де та́мо со свети́лы и свеща́ми и ору́жии. Иису́с же ве́дый вся гряду́щая Нань, изше́д рече́ им: кого́ и́щете? Отвеща́ша Ему́: Иису́са Назоре́а. Глаго́ла им Иису́с: Аз есмь. Стоя́ше же и Иу́да, и́же предая́ше Его́, с ни́ми. Да я́коже рече́ им, Аз есмь. Идо́ша вспять, и падо́ша на земли́. Па́ки у́бо вопроси́ их Иису́с: кого́ и́щете? Они́ же ре́ша: Иису́са Назоре́а. Отвеща́ Иису́с: рех вам, я́ко Аз есмь. А́ще у́бо Мене́ и́щете, оста́вите сих ити́. Да сбу́дется сло́во, е́же рече́, я́ко и́хже дал еси́ Мне, не погуби́х от них никого́же. Си́мон же Петр, имы́й нож, извлече́ его́, и уда́ри архиере́ова раба́, и уре́за ему́ у́хо десно́е. Бе же и́мя рабу́ Малх. Рече́ же Иису́с Петро́ви: вонзи́ нож в но́жницу. Ча́шу, ю́же даст Мне Оте́ц, не и́мам ли пи́ти ея́? Спи́ра же и ты́сящник, и слуги́ иуде́йския я́ша Иису́са, и связа́ша Его́. И ведо́ша Его́ ко А́нне пе́рвее: бе бо тесть Каиа́фе, и́же бе архиере́й ле́ту тому́. Бе же Каиа́фа да́вый сове́т иуде́ом, я́ко у́не есть еди́ному челове́ку умре́ти за лю́ди. По Иису́се же идя́ше Си́мон Петр, и други́й учени́к: учени́к же той бе зна́емь архиере́ови, и вни́де со Иису́сом во двор архиере́ов. Петр же стоя́ше при две́рех вне. Изы́де у́бо учени́к той, и́же бе зна́емь архиере́ови, и рече́ две́рнице, и введе́ Петра́. Глаго́ла же раба́ две́рница Петро́ви: еда́ и ты учени́к еси́ Челове́ка Сего́? Глаго́ла он: несмь. Стоя́ху же раби́ и слуги́ огнь сотво́рше, я́ко зима́ бе, и гре́яхуся. Бе же с ни́ми Петр стоя́, и гре́яся. Архиере́й же вопроси́ Иису́са о ученице́х Его́, и о уче́нии Его́. Отвеща́ ему́ Иису́с: Аз не обину́яся глаго́лах ми́ру. Аз всегда́ уча́х на со́нмищах, и в це́ркви, иде́же всегда́ иуде́е сне́млются, и тай не глаго́лах ничесо́же. Что Мя вопроша́еши? Вопроси́ слы́шавших, что глаго́лах им: се си́и ве́дят, я́же рех Аз. Сия́ же ре́кшу Ему́, еди́н от предстоя́щих слуг уда́ри в лани́ту Иису́са, рек: та́ко ли отвещава́еши архиере́ови? Отвеща́ ему́ Иису́с: а́ще зле глаго́лах, свиде́тельствуй о зле; а́ще ли до́бре, что Мя бие́ши? Посла́ же Его́ А́нна свя́зана к Каиа́фе архиере́ови. Бе же Си́мон Петр стоя́ и гре́яся. Ре́ша же ему́: еда́ и ты от учени́к Его́ еси́? Он же отве́ржеся, и рече́: несмь. Глаго́ла еди́н от раб архиере́овых, ю́жика сый, ему́же Петр уре́за у́хо: не аз ли тя ви́дех в вертогра́де с Ним? Па́ки у́бо Петр отве́ржеся, и а́бие пе́тел возгласи́. Ведо́ша же Иису́са от Каиа́фы в прето́р. Бе же у́тро: и ти́и не внидо́ша в прето́р, да не оскверня́тся, но да ядя́т фа́ску.

По Евангелии же поем антифон 4.

Глас 5: Днесь Иу́да оставля́ет Учи́теля, / и прие́млет диа́вола, / ослепля́ется стра́стию сребролю́бия, / отпа́дает Све́та омраче́нный: / ка́ко бо можа́ше зре́ти, / Свети́ло прода́вый на три́десятих сре́бреницех? / Но нам возсия́ Страда́вый за мир. / К Нему́же возопии́м: / пострада́вый и сострада́вый челове́ком, / Го́споди, сла́ва Тебе́.

Днесь Иу́да притворя́ет богоче́стие, / и отчужда́ется дарова́ния, / сый учени́к быва́ет преда́тель: / во обы́чном лобза́нии лесть покрыва́ет, / и предпочита́ет Влады́чния любве́, / несмы́сленно рабо́тати сребролю́бию, / наста́вник быв собо́рища беззако́ннаго: / мы же иму́ще спасе́ние Христа́, / Того́ просла́вим.

Глас 1: Братолю́бие стя́жим я́ко во Христе́ бра́тия, / а не неми́лостивное е́же к бли́жним на́шим: / да не я́ко раб осу́димся неми́лостивый, пе́нязей ра́ди, / и я́ко Иу́да раска́явшеся, ничто́же по́льзуемся.

Слава, Богородичен: Пресла́вная о Тебе́ глаго́лашася везде́, / я́ко родила́ еси́ пло́тию всех Творца́, / Богоро́дице Мари́е, / Всепе́тая и Неискусобра́чная.

И ныне, тойже.

Антифон 5.

Глас 6: Учени́к Учи́теля соглаша́ше це́ну, / и на три́десятих сре́бреницех продаде́ Го́спода, / лобза́нием льсти́вным предая́ Его́ / беззако́нником на смерть.

Днесь глаго́лаше Зижди́тель небесе́ и земли́ Свои́м ученико́м: / прибли́жися час, и приспе́ Иу́да предая́й Мене́, / да никто́же отве́ржется Мене́, / ви́дя Мя на Кресте́ посреде́ двою́ разбо́йнику: / стражду́ бо я́ко челове́к, / и спасу́ я́ко Человеколю́бец, в Мя ве́рующия.

Слава, Богородичен: Неизрече́нно в после́дняя заче́ншая, / и ро́ждшая Созда́теля Твоего́, / Того́ моли́ спасти́ся душа́м на́шим.

И ныне, тойже.

Антифон 6.

Глас 7: Днесь бдит Иу́да преда́ти Го́спода, / Преве́чнаго Спа́са ми́ра, / И́же от пяти́ хлеб насы́тившаго мно́жества. / Днесь беззако́нный отмета́ется Учи́теля, / учени́к быв, Влады́ку предаде́: / сребро́м продаде́, ма́нною насы́тившаго челове́ка.

Днесь Кресту́ пригвозди́ша иуде́е Го́спода, / пресе́кшаго мо́ре жезло́м, / и прове́дшаго их в пусты́ню. / Днесь копие́м ре́бра Его́ прободо́ша, / я́звами ра́нившаго их ра́ди Еги́пта: / и же́лчию напои́ша, / ма́нну пи́щу им одожди́вшаго.

Го́споди, на страсть во́льную прише́д, / вопия́л еси́ ученико́м Твои́м: / а́ще и еди́наго часа́ не возмого́сте бде́ти со Мно́ю, / ка́ко обеща́стеся умре́ти Мене́ ра́ди? / Поне́ Иу́ду зри́те, ка́ко не спит, / но тщи́тся преда́ти Мя беззако́нным. / Воста́ните, моли́теся, / да не кто Мене́ отве́ржется, зря Мене́ на Кресте́. / Долготерпели́ве, сла́ва Тебе́.

Слава, Богородичен: Ра́дуйся, Богоро́дице, / Невмести́маго в небесе́х вмести́вшая во утро́бе Твое́й: / ра́дуйся, Де́во, проро́ков пропове́дание, / Е́юже нам возсия́ Емману́ил: / ра́дуйся, Ма́ти Христа́ Бо́га.

И ныне, тойже.

Седален, глас 7:

Кий тя о́браз, Иу́до, преда́теля Спа́су соде́ла? / Еда́ от ли́ка тя апо́стольска разлучи́? / Еда́ дарова́ния исцеле́ний лиши́? / Еда́ со о́неми вечеря́в, тебе́ от трапе́зы отри́ну? / Еда́ ины́х но́ги умы́в, твои́ же презре́? / О коли́ких благ непа́мятлив был еси́! / И твой у́бо неблагода́рный облича́ется нрав. / Того́ же безме́рное пропове́дуется долготерпе́ние, / и ве́лия ми́лость.

Слава, и ныне, тойже.

Евангелие 3-е от Матфеа, зачало 109:

Во вре́мя о́но, во́ини е́мше Иису́са ведо́ша к Каиа́фе архиере́ови, иде́же кни́жницы и ста́рцы собра́шася. Петр же идя́ше по Нем издале́ча, до двора́ архиере́ова: и вшед внутрь, седя́ше со слуга́ми, ви́дети кончи́ну. Архиере́е же и ста́рцы, и сонм весь, иска́ху лжесвиде́тельства на Иису́са, я́ко да убию́т Его́, и не обрета́ху: и мно́гим лжесвиде́телем присту́пльшим, не обрето́ша. По́слежде же приступи́ша два лжесвиде́теля, реста: Сей рече́, могу́ разори́ти це́рковь Бо́жию, и треми́ де́ньми созда́ти ю́. И воста́в архиере́й, рече́ Ему́: ничесо́же ли отвещава́еши, что си́и на Тя свиде́тельствуют? Иису́с же молча́ше. И отвеща́в архиере́й, рече́ Ему́: заклина́ю Тя Бо́гом живы́м, да рече́ши нам, а́ще Ты еси́ Христо́с, Сын Бо́жий? Глаго́ла ему́ Иису́с: ты рече́. Оба́че глаго́лю вам: отсе́ле у́зрите Сы́на Челове́ческаго седя́ща одесну́ю си́лы, и гряду́ща на о́блацех небе́сных. Тогда́ архиере́й растерза́ ри́зы своя́, глаго́ля, я́ко хулу́ глаго́ла, что еще́ тре́буем свиде́телей; се ны́не слы́шасте хулу́ Его́. Что ся вам мнит? Они́ же отвеща́вше, ре́ша: пови́нен есть сме́рти. Тогда́ заплева́ша лице́ Его́, и па́кости Ему́ де́яху, о́вии же за лани́ту уда́риша, глаго́люще: прорцы́ нам, Христе́, кто есть ударе́й Тя? Петр же вне седя́ше во дворе́, и приступи́ к нему́ еди́на рабы́ня, глаго́лющи: и ты бе со Иису́сом Галиле́йским. Он же отве́ржеся пред все́ми, глаго́ля: не вем, что глаго́леши. Изше́дшу же ему́ ко врато́м, узре́ его́ друга́я, и глаго́ла им ту: и сей бе со Иису́сом Назоре́ом. И па́ки отве́ржеся с кля́твою, я́ко не зна́ю Челове́ка. По ма́ле же приступи́вше стоя́щии, ре́ша Петро́ви: вои́стинну и ты от них еси́, и́бо бесе́да твоя́ я́ве тя твори́т. Тогда́ нача́т роти́тися и кля́тися, я́ко не зна́ю Челове́ка. И а́бие пе́тел возгласи́. И помяну́ Петр глаго́л Иису́сов, рече́нный ему́, я́ко пре́жде да́же пе́тел не возгласи́т, трикра́ты отве́ржешися Мене́. И изше́д вон пла́кася го́рько.

Антифон 7.

Глас 8: Е́мшим Тя беззако́нным, / претерпева́я, си́це вопия́л еси́, Го́споди: / а́ще и порази́сте Па́стыря, / и расточи́сте двана́десять ове́ц ученики́ Моя́, / можа́х вя́щше, не́жели двана́десять легео́нов предста́вити А́нгелов. / Но долготерплю́, да испо́лнятся, / я́же яви́х вам проро́ки Мои́ми, / безве́стная и та́йная: / Го́споди, сла́ва Тебе́.

Три́щи отве́ргся Петр, / а́бие рече́нное ему́ разуме́, / но принесе́ к Тебе́ сле́зы покая́ния: / Бо́же, очи́сти мя, и спаси́ мя.

Слава, Богородичен: Я́ко врата́ спаси́тельная, / и рай кра́сный, и Све́та присносу́щнаго о́блак, / су́щую Святу́ю Де́ву, воспои́м вси / глаго́люще Ей, е́же ра́дуйся.

И ныне, тойже.

Антифон 8.

Глас 2: Рцы́те, беззако́ннии, / что слы́шасте от Спа́са на́шего? / Не зако́н ли положи́, и проро́ческая уче́ния? / Ка́ко у́бо помы́слисте Пила́ту преда́ти, / И́же от Бо́га, Бо́га Сло́ва, / и Изба́вителя душ на́ших?

Да ра́спнется, вопия́ху / Твои́х дарова́ний при́сно наслажда́ющиися, / и злоде́я вме́сто Благоде́теля / проша́ху прия́ти, пра́ведников уби́йцы: / молча́л же еси́ Христе́, терпя́ их суровство́, / пострада́ти хотя́ и спасти́ нас, / я́ко Человеколю́бец.

Слава, Богородичен: Я́ко не и́мамы дерзнове́ния за премно́гия грехи́ на́ша, / Ты, И́же от Тебе́ Ро́ждшагося, моли́, Богоро́дице Де́во: / мно́го бо мо́жет моле́ние Ма́тернее ко благосе́рдию Влады́ки. / Не пре́зри гре́шных мольбы́, Всечи́стая, / я́ко Ми́лостив есть, и спасти́ моги́й, / И́же и страда́ти о нас изво́ливый.

И ныне, тойже.

Антифон 9.

Глас 3: Поста́виша три́десять сре́бреников, це́ну цене́ннаго, / Его́же оцени́ша от сыно́в Изра́илевых. / Бди́те и моли́теся, да не вни́дете во искуше́ние, / дух у́бо бодр, плоть же немощна́: / сего́ ра́ди бди́те.

Да́ша в снедь Мою́ желчь, / и в жа́жду Мою́ напои́ша Мя о́цта: / Ты же, Го́споди, / возста́ви мя, и возда́м им.

Слава, Богородичен: И́же от язы́к, пое́м Тя, Богоро́дице Чи́стая, / я́ко Христа́ Бо́га на́шего родила́ еси́, / от кля́твы челове́ки Тобо́ю свобо́ждшаго.

И ныне, тойже.

Седален, глас 8:

О ка́ко Иу́да иногда́ Твой учени́к, / преда́тельству поуча́шеся на Тя, / свечеря́ льсти́вно, наве́тник и непра́ведник, / шед, рече́ свяще́нником: / что ми подае́те, и преда́м вам О́наго, / зако́н разори́вшаго, и оскверни́вшаго суббо́ту? / Долготерпели́ве Го́споди, сла́ва Тебе́.

Слава, и ныне, тойже.

Евангелие 4-е, от Иоанна, зачало 59.

Во вре́мя о́но, ведо́ша Иису́са от Каиа́фы в прето́р. Бе же у́тро: и ти́и не внидо́ша в прето́р, да не оскверня́тся, но да ядя́т фа́ску. Изы́де же Пила́т к ним вон, и рече́: ку́ю речь прино́сите на Челове́ка Сего́? Отвеща́ша и ре́ша ему́: а́ще не бы был Сей злоде́й, не бы́хом пре́дали Его́ тебе́. Рече́ же им Пила́т: поими́те Его́ вы, и по зако́ну ва́шему суди́те Ему́. Ре́ша же ему́ иуде́е: нам не досто́ит уби́ти никого́же. Да сло́во Иису́сово сбу́дется, е́же рече́, назна́менуя, ко́ею сме́ртию хотя́ше умре́ти. Вни́де у́бо па́ки Пила́т в прето́р, и гласи́ Иису́са, и рече́ Ему́: Ты ли еси́ Царь Иуде́йск? Отвеща́ ему́ Иису́с: о себе́ ли ты сие́ глаго́леши, или́ ини́и тебе́ реко́ша о Мне? Отвеща́ Пила́т: еда́ аз жидови́н есмь? Род Твой и архиере́е преда́ша Тя мне, что еси́ сотвори́л? Отвеща́ Иису́с: Ца́рство Мое́ несть от ми́ра сего́; а́ще от ми́ра сего́ бы́ло бы Ца́рство Мое́, слуги́ Мои́ у́бо подвиза́лися бы́ша, да не пре́дан бых был иуде́ом. Ны́не же Ца́рство Мое́ несть отсю́ду. Рече́ же Ему́ Пила́т: у́бо Царь ли еси́ Ты? Отвеща́ Иису́с: ты глаго́леши, я́ко Царь есмь Аз. Аз на сие́ роди́хся, и на сие́ приидо́х в мир, да свиде́тельствую и́стину: и всяк, и́же есть от и́стины, послу́шает гла́са Моего́. Глаго́ла Ему́ Пила́т: что есть и́стина? И сие́ рек, па́ки изы́де ко иуде́ом, и глаго́ла им: аз ни еди́ныя вины́ обрета́ю в Нем. Есть же обы́чай вам, да еди́наго вам отпущу́ на Па́сху: хо́щете ли у́бо, да отпущу́ вам Царя́ Иуде́йска? Возопи́ша же па́ки вси, глаго́люще: не Сего́, но Вара́вву. Бе же Вара́вва разбо́йник.

Тогда́ у́бо Пила́т поя́т Иису́са, и би Его́. И во́ини спле́тше вене́ц от те́рния, возложи́ша Ему́ на главу́, и в ри́зу багря́ну облеко́ша Его́. И глаго́лаху: ра́дуйся, Царю́ Иуде́йский. И бия́ху Его́ по лани́тома. Изы́де у́бо па́ки вон Пила́т, и глаго́ла им: се извожду́ Его́ вам вон, да разуме́ете, я́ко в Нем ни еди́ныя вины́ обрета́ю. Изы́де же вон Иису́с, нося́ тернове́н вене́ц, и багря́ну ри́зу. И глаго́ла им: се Челове́к. Егда́ же ви́деша Его́ архиере́е и слуги́, возопи́ша глаго́люще: распни́, распни́ Его́. Глаго́ла им Пила́т: поими́те Его́ вы, и распни́те. Аз бо не обрета́ю в Нем вины́. Отвеща́ша ему́ иуде́е: мы зако́н и́мамы, и по зако́ну на́шему до́лжен есть умре́ти, я́ко Себе́ Сы́на Бо́жия сотвори́. Егда́ же слы́ша Пила́т сие́ сло́во, па́че убоя́ся. И вни́де в прето́р па́ки, и глаго́ла Иису́сови: отку́ду еси́ Ты? Иису́с же ответа́ не даде́ ему́. Глаго́ла же Ему́ Пила́т: мне ли не глаго́леши? Не ве́си ли, я́ко власть и́мам распя́ти Тя, и власть и́мам пусти́ти Тя? Отвеща́ Иису́с: не и́маши вла́сти ни еди́ныя на Мне, аще не бы ти дано́ свы́ше: сего́ ра́ди предавый Мя тебе́, бо́лий грех и́мать. От сего́ иска́ше Пила́т пусти́ти Его́. Иуде́е же вопия́ху, глаго́люще: а́ще Сего́ пу́стиши, не́си друг ке́сарев. Всяк, и́же царя́ себе́ творя́й, проти́вится ке́сарю. Пила́т же слы́шав сие́ сло́во, изведе́ вон Иису́са, и се́де на суди́щи, на ме́сте глаго́лемем Лифострото́н, евре́йски же Гавва́фа. Бе же пято́к Па́сце, час же я́ко шесты́й. И глаго́ла Иуде́ом: се Царь ваш. Они́ же вопия́ху: возми́, возми́, распни́ Его́. Глаго́ла им Пила́т: Царя́ ли ва́шего распну́? Отвеща́ша архиере́е: не и́мамы царя́, то́кмо ке́саря. Тогда́ же предаде́ Его́ им, да ра́спнется.

Антифон 10.

Глас 6: Одея́йся све́том, я́ко ри́зою, / наг на суде́ стоя́ше, / и в лани́ту ударе́ние прия́т от рук, и́хже созда́: / беззако́ннии же лю́дие на Кресте́ пригвозди́ша Го́спода Сла́вы: / тогда́ заве́са церко́вная раздра́ся, / со́лнце поме́рче, не терпя́ зре́ти Бо́га досажда́ема, / Его́же трепе́щут вся́ческая. Тому́ поклони́мся.

Учени́к отве́ржеся, / разбо́йник возопи́: / помяни́ мя, Го́споди, / во Ца́рствии Твое́м.

Слава, Богородичен: Умири́ мир, от Де́вы изво́ливый, Го́споди, / плоть носи́ти за рабы́, / да согла́сно Тебе́ славосло́вим, Человеколю́бче.

И ныне, тойже.

Антифон 11.

Глас 6: За блага́я, я́же сотвори́л еси́, Христе́, ро́ду евре́йскому, / распя́ти Тя осуди́ша, / о́цта и же́лчи напои́вше Тя. / Но даждь им, Го́споди, по дело́м их, / я́ко не разуме́ша Твоего́ снизхожде́ния.

О преда́тельстве не дово́льни бы́ша, Христе́, ро́ди евре́йстии, / но покива́ху глава́ми свои́ми, / хулу́ и руга́ние принося́ще. / Но даждь им, Го́споди, по дело́м их, / я́ко не разуме́ша Твоего́ смотре́ния.

Ниже́ земля́ я́ко потрясе́ся, / ниже́ ка́мение я́ко разсе́деся, евре́ов увеща́ша, / ниже́ церко́вная заве́са, ниже́ ме́ртвых воскресе́ние. / Но даждь им, Го́споди, по дело́м их, / я́ко тще́тным на Тя поучи́шася.

Слава, Богородичен: Бо́га от Тебе́ воплоще́ннаго / позна́хом, Богоро́дице Де́во, / Еди́на Чи́стая, Еди́на Благослове́нная: / тем непреста́нно Тя, воспева́юще, велича́ем.

И ныне, тойже.

Антифон 12.

Глас 8: Сия́ глаго́лет Госпо́дь иуде́ом: / лю́дие Мои́, что сотвори́х вам? / Или́ чим вам стужи́х? / Слепцы́ ва́ша просвети́х, / прокаже́нныя очи́стих, / му́жа, су́ща на одре́, возста́вих. / Лю́дие Мои́, что сотвори́х вам? / И что Ми возда́сте? / За ма́нну желчь: за во́ду о́цет: / за е́же люби́ти Мя, ко Кресту́ Мя пригвозди́сте. / Ктому́ не терплю́ про́чее, / призову́ Моя́ язы́ки, / и ти́и Мя просла́вят со Отце́м и Ду́хом, / и Аз им да́рую живо́т ве́чный.

Днесь церко́вная заве́са / на обличе́ние беззако́нных раздира́ется, / и со́лнце лучи́ своя́ скрыва́ет, / Влады́ку зря распина́ема.

Законополо́жницы Изра́илевы, иуде́е и фарисе́е, / лик апо́стольский вопие́т к вам: / се Храм, Его́же вы разори́сте, / се А́гнец, Его́же вы распя́сте, и гро́бу преда́сте, / но вла́стию Свое́ю воскре́се. / Не льсти́теся, иуде́е: / Той бо есть, И́же в мо́ри спасы́й, / и в пусты́ни пита́вый. / Той есть Живо́т, и Свет, и Мир ми́рови.

Слава, Богородичен: Ра́дуйся, врата́ Царя́ Сла́вы, / я́же Вы́шний Еди́н про́йде, / и па́ки запечатле́нна оста́ви, / во спасе́ние душ на́ших.

И ныне, тойже.

Седален, глас 8:

Егда́ предста́л еси́ Каиа́фе, Бо́же, / и преда́лся еси́ Пила́ту, Судие́, / небе́сныя си́лы от стра́ха поколеба́шася. / Егда́ же возне́слся еси́ на дре́во, / посреде́ двою́ разбо́йнику, / вмени́лся еси́ с беззако́нными, Безгре́шне, / за е́же спасти́ челове́ка. / Незло́биве Го́споди, сла́ва Тебе́.

Слава, и ныне, тойже.

Евангелие 5-е, от Матфеа, зачало 111:

Во вре́мя о́но, ви́дев Иу́да преда́вый Иису́са, я́ко осуди́ша Его́, раска́явся возврати́ три́десять сре́бреники архиере́ем и ста́рцем, глаго́ля: согреши́х, преда́в кровь непови́нную. Они́ же ре́ша: что есть нам? Ты у́зриши. И пове́рг сре́бреники в це́ркви, оты́де, и шед удави́ся. Архиере́е же прие́мше сре́бреники, ре́ша: недосто́йно есть вложи́ти их в корва́ну, поне́же цена́ кро́ве есть. Сове́т же сотво́рше, купи́ша и́ми село́ скуде́льниче, в погреба́ние стра́нным. Те́мже нарече́ся село́ то, село́ кро́ве, до сего́ дне. Тогда́ сбы́стся рече́нное Иереми́ем проро́ком, глаго́лющим: и прия́ша три́десять сре́бреник, це́ну Цене́ннаго, Его́же цени́ша от сыно́в Изра́илев. И да́ша я́ на селе́ скуде́льничи, я́коже сказа́ мне Госпо́дь. Иису́с же ста пред иге́моном. И вопроси́ Его́ иге́мон, глаго́ля: Ты ли еси́ Царь Иуде́йский? Иису́с же рече́ ему́: ты глаго́леши. И егда́ Нань глаго́лаху архиере́е и ста́рцы, ничесо́же отвещава́ше. Тогда́ глаго́ла Ему́ Пила́т: не слы́шиши ли, коли́ко на Тя свиде́тельствуют? И не отвеща́ ему́ ни к еди́ному глаго́лу, я́ко диви́тися иге́мону зело́. На всяк же пра́здник обы́чай бе иге́мону отпуща́ти еди́наго наро́ду свя́зня, его́же хотя́ху. Имя́ху же тогда́ свя́зана наро́чита, глаго́лемаго Вара́вву. Со́бранным же им, рече́ им Пила́т: кого́ хо́щете от обою́ отпущу́ вам; Вара́вву ли, или́ Иису́са глаго́лемаго Христа́? Ве́дяше бо, я́ко за́висти ра́ди преда́ша Его́. Седя́щу же ему́ на суди́щи, посла́ к нему́ жена́ его́, глаго́лющи: ничто́же тебе́, и Пра́веднику Тому́, мно́го бо пострада́х днесь во сне Его́ ра́ди. Архиере́е же и ста́рцы наусти́ша наро́ды, да испро́сят Вара́вву, Иису́са же погубя́т. Отвеща́в же иге́мон рече́ им: кого́ хо́щете от обою́ отпущу́ вам? Они́ же ре́ша: Вара́вву. Глаго́ла им Пила́т: что у́бо сотворю́ Иису́су, глаго́лемому Христу́? Глаго́лаша ему́ вси: да ра́спят бу́дет. Иге́мон же рече́: ко́е у́бо зло сотвори́? Они́ же и́злиха вопия́ху, глаго́люще: да про́пят бу́дет. Ви́дев же Пила́т, я́ко ничто́же успева́ет, но па́че молва́ быва́ет, прие́мь во́ду, умы́ ру́це пред наро́дом, глаго́ля: непови́нен есмь от кро́ве Пра́веднаго Сего́, вы у́зрите. И отвеща́вше вси лю́дие, ре́ша: кровь Его́ на нас, и на ча́дех на́ших. Тогда́ отпусти́ им Вара́вву: Иису́са же бив, предаде́ им, да Его́ про́пнут. Тогда́ во́ини иге́моновы, прие́мше Иису́са на суди́ще, собра́ша Нань все мно́жество во́ин. И совле́кше Его́, оде́яша Его́ хлами́дою червле́ною. И спле́тше вене́ц от те́рния, возложи́ша на главу́ Его́, и трость в десни́цу Его́. И покло́ньшеся на коле́ну пред Ним, руга́хуся Ему́, глаго́люще: ра́дуйся, Царю́ Иуде́йский. И плю́нувше Нань, прия́ша трость, и бия́ху по главе́ Его́. И егда́ поруга́шася Ему́, совлеко́ша с Него́ багряни́цу, и облеко́ша Его́ в ри́зы Его́, и ведо́ша Его́ на пропя́тие. Исходя́ще же обрето́ша челове́ка Кирине́йска, и́менем Си́мона: и сему́ заде́ша понести́ крест Его́.

Антифон 13.

Глас 6: Собра́ние иудейское у Пила́та / испроси́ша распя́ти Тя, Го́споди: / вины́ бо в Тебе́ не обре́тше, / пови́ннаго Вара́вву свободи́ша, / и Тебе́, Пра́веднаго, осуди́ша, / скве́рнаго уби́йства грех насле́довавше. / Но даждь им, Го́споди, воздая́ние их, / я́ко тще́тным на Тя поучи́шася.

Его́же вся ужаса́ются и трепе́щут, / и всяк язы́к пое́т, Христа́, / Бо́жию Си́лу и Бо́жию Прему́дрость, / свяще́нницы за лани́ту уда́риша, / и да́ша Ему́ желчь: / и вся пострада́ти изво́ли, / спасти́ ны хотя́ от беззако́ний на́ших Свое́ю Кро́вию, / я́ко Человеколю́бец.

Слава, Богородичен: Богоро́дице, ро́ждшая сло́вом па́че сло́ва, / Созда́теля Своего́, / Того́ моли́ спасти́ ду́ши на́ша.

И ныне, тойже.

Антифон 14.

Глас 8: Го́споди, И́же разбо́йника спу́тника прие́мый, / в кро́ви ру́це оскверни́вшаго, / и нас с ним причти́, / я́ко Благ и Человеколю́бец.

Мал глас испусти́ разбо́йник на кресте́, / ве́лию ве́ру обре́те / во еди́ном мгнове́нии спасе́ся / и пе́рвый, ра́йская врата́ отве́рз, вни́де. / И́же того́ покая́ние восприе́мый, / Го́споди, сла́ва Тебе́.

Слава, Богородичен: Ра́дуйся, А́нгелом ра́дость ми́ра прие́мшая. / Ра́дуйся, ро́ждшая Творца́ Твоего́ и Го́спода. / Ра́дуйся, сподо́бльшаяся бы́ти Ма́ти Бо́жия.

И ныне, тойже.

Антифон 15.

Глас 6: Днесь ви́сит на дре́ве, / И́же на вода́х зе́млю пове́сивый: / венце́м от те́рния облага́ется, / И́же А́нгелов Царь; / в ло́жную багряни́цу облача́ется, / одева́яй не́бо о́блаки; / зауше́ние прия́т, И́же во Иорда́не свободи́вый Ада́ма; / гвоздьми́ пригвозди́ся Жени́х Церко́вный; / копие́м прободе́ся Сын Де́вы. / Покланя́емся страсте́м Твои́м, Христе́. / Покланя́емся страсте́м Твои́м, Христе́. / Покланя́емся страсте́м Твои́м, Христе́, / покажи́ нам и сла́вное Твое́ Воскресе́ние.

Не я́ко иуде́е пра́зднуем, / и́бо Па́сха на́ша за ны пожре́ся Христо́с, / но очи́стим са́ми себе́ от вся́кия скве́рны, / и чи́сте помо́лимся Ему́: / воскресни́, Го́споди, спаси́ нас, / я́ко Человеколю́бец.

Крест Твой, Го́споди, / жизнь и заступле́ние лю́дем Твои́м есть, / и нань наде́ющеся, / Тебе́ распя́таго Бо́га на́шего пое́м, поми́луй нас.

Слава, Богородичен: Ви́дящи Тя ви́сима, Христе́, / Тебе́ Ро́ждшая вопия́ше: / что стра́нное е́же ви́жду та́инство, Сы́не Мой? / Ка́ко на дре́ве умира́еши пло́тию водруже́н, / Жи́зни Пода́телю?

И ныне, тойже.

Седален, глас 4:

Искупи́л ны еси́ от кля́твы зако́нныя, / честно́ю Твое́ю Кро́вию, / на Кресте́ пригвозди́вся, и копие́м пробо́дся, / безсме́ртие источи́л еси́ челове́ком, / Спа́се наш, сла́ва Тебе́.

Слава, и ныне, тойже.

Евангелие 6-е, от Марка, зачало 67:

Во вре́мя о́но, во́ини ведо́ша Иису́са внутрь двора́, е́же есть прето́р, и созва́ша всю спи́ру. И облеко́ша Его́ в препря́ду, и возложи́ша на Него́ спле́тше терно́в вене́ц, и нача́ша целова́ти Его́, и глаго́лати: ра́дуйся, Царю́ Иуде́йский. И бия́ху Его́ по главе́ тро́стию, и плюва́ху на Него́, и прегиба́юще коле́на покланя́хуся Ему́. И егда́ поруга́шася Ему́, совлеко́ша с Него́ препря́ду, и облеко́ша Его́ в ри́зы Своя́; и изведо́ша Его́, да про́пнут Его́. И заде́ша мимоходя́щу не́коему Си́мону Кирине́ю, [гряду́щу с села́, отцу́ Алекса́ндрову и Ру́фову,] да во́змет крест Его́. И приведо́ша Его́ на Голго́фу ме́сто, е́же есть сказа́емо, Ло́бное ме́сто. И дая́ху Ему́ пи́ти есмирнисме́но вино́. Он же не прия́т. И распе́ншии Его́ раздели́ша ри́зы Его́, мета́юще жре́бий о них, кто что во́змет. Бе же час тре́тий, и распя́ша Его́. И бе написа́ние вины́ Его́ напи́сано: Царь Иуде́йск. И с Ним распя́ша два разбо́йника, еди́наго одесну́ю, и еди́наго ошу́юю Его́. И сбы́стся Писа́ние, е́же глаго́лет: и со беззако́нными вмени́ся. И мимоходя́щии ху́ляху Его́, покива́юще глава́ми свои́ми, и глаго́люще: уа́, разоря́яй це́рковь, и треми́ де́ньми созида́яй, спаси́ся Сам, и сни́ди со креста́. Та́коже и архиере́е руга́ющеся, друг ко дру́гу с кни́жники, глаго́лаху: и́ны спасе́, Себе́ ли не мо́жет спасти́? Христо́с, Царь Изра́илев, да сни́дет ны́не с креста́, да ви́дим и ве́ру име́м Ему́.

Таже блаженны, поставим стихов 8, глас 4.

Во Ца́рствии Твое́м помяни́ нас, Го́споди, егда́ прии́деши, во Ца́рствии Твое́м.

Блаже́ни ни́щии ду́хом, я́ко тех есть Ца́рство Небе́сное.

Блаже́ни пла́чущии, я́ко ти́и уте́шатся.

Блаже́ни кро́тции, я́ко ти́и насле́дят зе́млю.

Блаже́ни а́лчущии и жа́ждущии пра́вды, я́ко ти́и насы́тятся.

Дре́вом Ада́м рая́ бысть изселе́н, / дре́вом же кре́стным разбо́йник в рай всели́ся. / Ов у́бо вкушь, за́поведь отве́рже Сотво́ршаго, / ов же сраспина́емь, Бо́га Тя испове́да тая́щагося: / помяни́ и нас, Спа́се, во Ца́рствии Твое́м.

Блаже́ни ми́лостивии, я́ко ти́и поми́ловани бу́дут.

Зако́ну Творца́ от ученика́ купи́ша беззако́ннии и, / я́ко законопресту́пника, Того́ Пила́тову суди́щу предста́виша, зову́ще: / распни́, в пусты́ни сим Маннода́вшаго. / Мы же, пра́веднаго разбо́йника подража́вше, ве́рою зове́м: / помяни́ и нас, Спа́се, во Ца́рствии Твое́м.

Блаже́ни чи́стии се́рдцем, я́ко ти́и Бо́га у́зрят.

Богоуби́йц собо́р, иуде́йский язы́к беззако́нный, / к Пила́ту неи́стовне зовы́й, и глаго́лаше: / распни́ Христа́ непови́ннаго, / Вара́вву же па́че нам отпусти́. / Мы же веща́им к Нему́ разбо́йника благоразу́мнаго глас: / помяни́ и нас, Спа́се, во Ца́рствии Твое́м.

Блаже́ни миротво́рцы, я́ко ти́и сы́нове Бо́жии нареку́тся.

Живоно́сная Твоя́ ре́бра, / я́ко из Еде́ма исто́чник источа́ющая, / Це́рковь Твою́, Христе́, я́ко слове́сный напая́ет рай, / отсю́ду разделя́яся я́ко в нача́ла, в четы́ри Ева́нгелия, / мир напая́я, тварь веселя́, и язы́ки ве́рно науча́я / покланя́тися Ца́рствию Твоему́.

Блаже́ни изгна́ни пра́вды ра́ди, я́ко тех есть Ца́рство Небе́сное.

Распя́лся еси́ мене́ ра́ди, / да мне источи́ши оставле́ние: / прободе́н был еси́ в ре́бра, да ка́пли жи́зни источи́ши ми: / гвоздьми́ пригвозди́лся еси́, / да аз глубино́ю Страсте́й Твои́х / к высоте́ держа́вы Твоея́ уверя́емь, зову́ Ти: / Живода́вче Христе́, сла́ва Кресту́, Спа́се, и стра́сти Твое́й.

Блаже́ни есте́, егда́ поно́сят вам, и изжену́т, и реку́т всяк зол глаго́л на вы, лжу́ще Мене́ ра́ди.

Распина́ему Тебе́, Христе́, / вся тварь, ви́дящи, трепета́ше, / основа́ния земли́ колеба́хуся стра́хом держа́вы Твоея́, / свети́ла скрыва́хуся, и церко́вная раздра́ся заве́са, / го́ры вострепета́ша, и ка́мение разсе́деся, / и разбо́йник ве́рный зове́т с на́ми, Спа́се: / е́же помяни́ во Ца́рствии Твое́м.

Ра́дуйтеся и весели́теся, я́ко мзда ва́ша мно́га на Небесе́х.

Рукописа́ние на́ше на Кресте́ растерза́л еси́, Го́споди, / и, вмени́вся в ме́ртвых, та́мошняго мучи́теля связа́л еси́, / изба́вль всех от уз сме́ртных Воскресе́нием Твои́м, / и́мже просвети́хомся, Человеколю́бче Го́споди, и вопие́м Тебе́: / помяни́ и нас, Спа́се, во Ца́рствии Твое́м.

Слава: Отца́, и Сы́на, и Ду́ха Свята́го / вси единому́дренно, ве́рнии, славосло́вити досто́йно помо́лимся, / Еди́ницу Божества́, в Трие́х су́щую Ипоста́сех, / неслия́нну пребыва́ющу, про́сту, неразде́льну и непристу́пну, / Е́юже избавля́емся о́гненнаго муче́ния.

И ныне, Богородичен: Ма́терь Твою́, Христе́, / пло́тию безсе́менно ро́ждшую Тя, и Де́ву вои́стинну, / и по рождестве́ пребы́вшую нетле́нну, / Сию́ Тебе́ приво́дим в моли́тву, Влады́ко Многоми́лостиве, / прегреше́ний проще́нию дарова́тися всегда́ зову́щим: / помяни́ нас, Спа́се, во Ца́рствии Твое́м.

Прокимен, глас 4: Раздели́ша ри́зы Моя́ себе́, / и о оде́жди Мое́й мета́ша жре́бий. Стих: Бо́же, Бо́же Мой, вонми́ Ми, вску́ю оста́вил Мя еси́?

Евангелие 7-е, от Матфеа, зачало 113:

Во вре́мя о́но, прише́дше во́ини на ме́сто нарица́емое Голго́фа, е́же есть Кра́ниево ме́сто, да́ша Иису́су пи́ти о́цет с же́лчию сме́шен, и вкушь не хотя́ше пи́ти. Распе́ншии же Его́ раздели́ша ри́зы Его́, ве́ргше жре́бия. И седя́ще стрежа́ху Его́ ту. И возложи́ша верху́ главы́ Его́ вину́ Его́ напи́сану: Сей есть Иису́с, Царь Иуде́йский. Тогда́ распя́ша с Ним два разбо́йника: еди́наго одесну́ю, и еди́наго ошу́юю. Мимоходя́щии же ху́ляху Его́, покива́юще глава́ми свои́ми, и глаго́люще: разоря́яй це́рковь и треми́ де́ньми созида́яй, спаси́ся Сам: а́ще Сын еси́ Бо́жий, сни́ди со креста́. Та́кожде же и архиере́е руга́ющеся с кни́жники, и ста́рцы, и фарисе́и, глаго́лаху: ины́я спасе́, Себе́ ли не мо́жет спасти́? Аще Царь Изра́илев есть, да сни́дет ны́не со креста́, и ве́руем в Него́. Упова́ на Бо́га: да изба́вит ны́не Его́, а́ще хо́щет Ему́: рече́ бо, я́ко Бо́жий есмь Сын. То́жде же и разбо́йника распя́тая с Ним поноша́ста Ему́. От шеста́го же часа́ тьма бысть по всей земли́, до часа́ девя́таго. О девя́тем же часе́ возопи́ Иису́с гла́сом ве́лиим, глаго́ля: Или́, Или́, лима́ савахфани́? Е́же есть, Бо́же Мой, Бо́же Мой, вску́ю Мя еси́ оста́вил? Не́цыи же от ту стоя́щих слы́шавше, глаго́лаху, я́ко Илию́ глаша́ет Сей. И а́бие тек еди́н от них, и прие́м гу́бу, испо́лнив же о́цта, и вонзе́ на трость, напая́ше Его́. Про́чии же глаго́лаху: оста́ви, да ви́дим, а́ще прии́дет Илиа́ спасти́ Его́. Иису́с же, па́ки возопи́в гла́сом ве́лиим, испусти́ дух. И се, заве́са церко́вная раздра́ся на дво́е, с вы́шняго кра́я до ни́жняго; и земля́ потрясе́ся, и ка́мение распаде́ся. И гро́би отверзо́шася, и мно́га телеса́ усо́пших святы́х воста́ша. И изше́дше из гроб по воскресе́нии Его́, внидо́ша во святы́й град, и яви́шася мно́зем. Со́тник же и и́же с ним стрегу́щии Иису́са, ви́девше трус и бы́вшая, убоя́шася зело́, глаго́люще: вои́стинну Бо́жий Сын бе Сей.

И полагается чтение. Таже псалом 50.

И посем Евангелие 8-е, от Луки, зачало 111:

Во вре́мя о́но, ведя́ху со Иису́сом и и́на два злоде́я с Ним уби́ти. И егда́ приидо́ша на ме́сто, нарица́емое Ло́бное, ту распя́ша Его́ и злоде́я, о́ваго у́бо одесну́ю, а друга́го ошу́юю. Иису́с же глаго́лаше: О́тче, отпусти́ им: не ве́дят бо что творя́т. Разделя́юще же ри́зы Его́, мета́ху жре́бия. И стоя́ху лю́дие зря́ще. Руга́хуся же и кня́зи с ни́ми, глаго́люще: ины́я спасе́, да спасе́т и Себе́, а́ще Той есть Христо́с Бо́жий избра́нный. Руга́хуся же Ему́ и во́ини, приступа́юще, и о́цет приде́юще Ему́. И глаго́лаху: а́ще Ты еси́ Царь Иуде́йск, спаси́ся Сам. Бе же и написа́ние напи́сано над Ним писмены́ е́ллинскими, и ри́мскими, и евре́йскими: Сей есть Царь Иуде́йск. Еди́н же от обе́шеною злоде́ю ху́ляше Его́, глаго́ля: а́ще Ты еси́ Христо́с, спаси́ Себе́ и на́ю. Отвеща́в же други́й, преща́ше ему́, глаго́ля: ни ли ты бои́шися Бо́га, я́ко в то́мже осужде́н еси́? И мы у́бо в пра́вду: досто́йная бо по дело́м на́ю восприе́млева: Сей же ни еди́наго зла сотвори́. И глаго́лаше Иису́сови: помяни́ мя, Го́споди, егда́ прии́деши во Ца́рствии Си. И рече́ ему́ Иису́с: ами́нь глаго́лю тебе́, днесь со Мно́ю бу́деши в раи́. Бе же час я́ко шесты́й, и тьма бысть по всей земли́ до часа́ девя́таго. И поме́рче со́лнце, и заве́са церко́вная раздра́ся посреде́. И возгла́шь гла́сом ве́лиим Иису́с, рече́: О́тче, в ру́це Твои́ предаю́ дух Мой. И сия́ рек и́здше. Ви́дев же со́тник бы́вшее, просла́ви Бо́га, глаго́ля: вои́стинну Челове́к Сей пра́веден бе. И вси прише́дшии наро́ди на позо́р сей, ви́дяще быва́ющая, бию́ще пе́рси своя́, возвраща́хуся. Стоя́ху же вси зна́емии Его́ издале́ча, и жены́ спосле́дствовавшия Ему́ от Галиле́и, зря́ще сих.

И абие поем трипеснец, творение господина Космы: ирмосы по дважды, тропари на 12. Последи же ирмос оба лика вкупе. Акростихис, или краегранесие трипеснца есть: Просаввато́н те: еже есть, Предсуббо́тие же. Глас 6.

Песнь 5

{Π} Ирмос: К Тебе́ у́тренюю, / милосе́рдия ра́ди Себе́ истощи́вшему непрело́жно / и до страсте́й безстра́стно прекло́ншемуся, / Сло́ве Бо́жий, / мир пода́ждь ми па́дшему, Человеколю́бче.

{Ρ} Умы́вше но́ги, и предочи́стившеся / та́инства причаще́нием Боже́ственнаго ны́не, Христе́, Твоего́, / служи́телие от Сио́на на Елео́нскую го́ру вели́кую с Тобо́ю взыдо́ша, / пою́ще Тя, Человеколю́бче.

{Ο} Зри́те, рекл еси́, дру́зи, не бо́йтеся: / ны́не бо прибли́жися час, я́ту Ми бы́ти, и убие́ну рука́ма беззако́нных: / вси же расточите́ся, Мене́ оста́вивше, / и́хже соберу́ пропове́дати Мя, Человеколю́бца.

Кондак, глас 8:

Нас ра́ди Распя́таго, / прииди́те, вси воспои́м, / Того́ бо ви́де Мари́я на дре́ве, и глаго́лаше: / а́ще и распя́тие терпи́ши, / Ты еси́ Сын и Бог Мой.

Икос: Своего́ А́гнца А́гница зря́щи к заколе́нию влеко́ма, / после́доваше Мари́я просте́ртыми власы́ со ине́ми жена́ми, сия́ вопию́щи: / ка́мо и́деши, Ча́до? / Чесо́ ра́ди ско́рое тече́ние соверша́еши? / Еда́ други́й брак па́ки есть в Ка́не Галиле́йстей, / и та́мо ны́не тщи́шися, да от воды́ им вино́ сотвори́ши ? / Иду́ ли с Тобо́ю, Ча́до, или́ па́че пожду́ Тебе́? / Даждь Ми сло́во, Сло́ве, / не молча́ мимоиди́ Мене́, Чи́сту соблюды́й Мя: / Ты бо еси́ Сын и Бог Мой.

Синаксарий.

Песнь 8

{Σ} Ирмос: Столп зло́бы богопроти́вныя, / боже́ственнии о́троцы обличи́ша, / на Христа́ же шата́ющееся беззако́нных собо́рище, / сове́тует тще́тная, / уби́ти поуча́ется / живо́т держа́щаго дла́нию. / Его́же вся тварь благослови́т, / сла́вящи во ве́ки.

{Α} От ве́ждей ученико́м ны́не сон, рекл еси́, Христе́, отряси́те, / в моли́тве же бди́те, да не в напа́сть вни́дете, и наипа́че Си́моне: / крепча́йшему бо бо́лий иску́с. / Разуме́й Мя, Пе́тре: / Его́же вся тварь благослови́т, сла́вящи во ве́ки.

{Β} Скве́рна сло́ва усте́н, никогда́же изреку́ Тебе́, Влады́ко, / с Тобо́ю умру́ я́ко благоразу́мен, / а́ще и вси отве́ргутся, возопи́ Петр. / Ни плоть, ниже́ кровь, но Оте́ц Твой откры́ ми Тя: / Его́же вся тварь благослови́т, сла́вящи во ве́ки.

{Β} Глубину́ прему́дрости Боже́ственныя и ра́зума, не всю испыта́л еси́, / бе́здну же Мои́х суде́б не пости́гл еси́, челове́че, Госпо́дь рече́. / Плоть у́бо сый, не хвали́ся, / три́жды бо отве́ржешися Мене́: / Его́же вся тварь благослови́т, сла́вящи во ве́ки.

{Α} Отрица́ешися, Си́моне Пе́тре, е́же сотвори́ши ско́ро, я́коже рече́ся, / и к тебе́ отрокови́ца, еди́на прише́дши устраши́т тя, Госпо́дь рече́. / Го́рце прослези́в, обря́щеши Мя оба́че Ми́лостива: / Его́же вся тварь благослови́т, сла́вящи во ве́ки.

Песнь 9

{Τ} Ирмос: Честне́йшую Херуви́м, / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

{Ο} Па́губное собо́рище богоме́рзских, / лука́внующих богоуби́йц со́нмище, / предста́, Христе́, Тебе́, / и я́ко непра́ведника влеча́ше Зижди́теля всех, Его́же велича́ем.

{Ν} Зако́на не разуме́юще нечести́вии, / гласо́м проро́ческим поуча́ющеся вотще́, / я́ко овча́ влеча́ху Тя, всех Влады́ку, непра́ведно закла́ти, Его́же велича́ем.

{Τ} Язы́ком изда́нную жизнь, / с кни́жники уби́ти свяще́нницы преда́ху, / уя́звлени самозави́стною зло́бою, / естество́м Животода́вца, Его́же велича́ем.

{Ε} Обыдо́ша я́ко пси мно́зи, / и уда́риша, Царю́, лани́ту Твою́ зауше́нием, вопроша́ху Тя, / Тебе́ же ло́жна свиде́тельствоваху: / и, вся претерпе́в, всех спасл еси́.

Таже ексапостиларий, трижды:

Разбо́йника благоразу́мнаго / во еди́ном часе́ ра́еви сподо́бил еси́, Го́споди, / и мене́ дре́вом кре́стным / просвети́, и спаси́ мя.

Таже Евангелие 9-е, от Иоанна, зачало 61:

Во вре́мя о́но, стоя́ху при Кресте́ Иису́сове Ма́ти Его́, и сестра́ Ма́тере Его́, Мари́я Клео́пова, и Мари́я Магдали́на. Иису́с же ви́дев Ма́терь, и ученика́ стоя́ща, его́же любля́ше, глаго́ла Ма́тери Свое́й: Же́но, се, сын Твой. Пото́м глаго́ла ученику́: се, Ма́ти твоя́. И от того́ часа́ поя́т Ю́ учени́к во своя́ си. Посе́м ве́дый Иису́с, я́ко вся уже́ соверши́шася, да сбу́дется Писа́ние, глаго́ла: жа́жду. Сосу́д же стоя́ше полн о́цта. Они́ же испо́лнивше гу́бу о́цта, и на трость во́нзше, приде́ша ко усто́м Его́. Егда́ же прия́т о́цет Иису́с, рече́: соверши́шася. И прекло́нь главу́, предаде́ дух. Иуде́е же, поне́же пято́к бе, да не оста́нут на кресте́ телеса́ в суббо́ту, бе бо вели́к день тоя́ суббо́ты, моли́ша Пила́та, да пребию́т го́лени их, и во́змут. Приидо́ша же во́ини, и пе́рвому у́бо преби́ша го́лени, и друго́му распя́тому с Ним. На Иису́са же прише́дше, я́ко ви́деша Его́ уже́ уме́рша, не преби́ша Ему́ го́лений. Но еди́н от во́ин копие́м ре́бра Ему́ прободе́, и а́бие изы́де кровь и вода́. И ви́девый свиде́тельствова, и и́стинно есть свиде́тельство его́, и той весть, я́ко и́стину глаго́лет, да вы ве́ру и́мете. Бы́ша бо сия́, да сбу́дется Писа́ние: кость не сокруши́тся от Него́. И па́ки друго́е Писа́ние глаго́лет: воззря́т Нань, Его́же прободо́ша.

И абие: Вся́кое дыха́ние: На глас 3, поставим стихи 4. И поем стихиры самогласны три, повторяюще первый:

Два и лука́вная сотвори́, перворожде́нный сын Мой Изра́иль: / Мене́ оста́ви Исто́чника воды́ живо́тныя, / и ископа́ себе́ кладене́ц сокруше́нный: / Мене́ на дре́ве распя́т, / Вара́вву же испроси́, и отпусти́. / Ужасе́ся не́бо о сем, и со́лнце лучи́ скры: / ты же, Изра́илю, не усрами́лся еси́, / но сме́рти Мя пре́дал еси́. / Оста́ви им, О́тче Святы́й, / не ве́дят бо, что сотвори́ша.

Ки́йждо уд святы́я Твоея́ пло́ти, безче́стие нас ра́ди претерпе́: / те́рние, глава́; лице́, оплева́ния; че́люсти, зауше́ния; / уста́, во о́цте растворе́нную желчь вку́сом; / ушеса́, хуле́ния злочести́вая; / плещи́, бие́ния; и рука́, трость; / всего́ телесе́ протяже́ния на Кресте́; / чле́нове, гво́здия; и ре́бра, копие́. / Пострада́вый за ны, и от страсте́й свободи́вый нас, / снизше́дый к нам человеколю́бием, и вознесы́й нас, / Всеси́льне Спа́се, поми́луй нас.

Распе́ншуся Ти, Христе́, вся тварь, ви́дящи, трепета́ше, / основа́ния земли́ позыба́шася стра́хом держа́вы Твоея́: / Тебе́ бо возне́сшуся днесь, род евре́йский поги́бе, / церко́вная заве́са раздра́ся на дво́е, / и ме́ртвии от гробо́в воскресо́ша: / со́тник, ви́дев чу́до, ужасе́ся. / Предстоя́щи же Ма́ти Твоя́ вопия́ше, рыда́ющи ма́терски: / ка́ко не возрыда́ю, и утро́бы Моея́ не бию́, / зря́щи Тя на́га, я́ко осужде́на, на дре́ве ви́сяща? / Распны́йся и погребы́йся, и воскресы́й из ме́ртвых, / Го́споди, сла́ва Тебе́.

Слава, глас 6: Совлеко́ша с Мене́ ри́зы Моя́, / и облеко́ша Мя в ри́зу червле́ну, / возложи́ша на главу́ Мою́ вене́ц от те́рний, / и в десну́ю Мою́ ру́ку вда́ша трость, / да сокрушу́ их, я́ко сосу́ды скуде́льничи.

И ныне, глас тойже: Плещи́ Моя́ дах на ра́ны, / лица́ же Моего́ не отврати́х от заплева́ний, / суди́щу Пила́тову предста́х, и Крест претерпе́х / за спасе́ние ми́ра.

Таже Евангелие 10-е, от Марка, зачало 69:

Во вре́мя о́но, прии́де Ио́сиф, и́же от Аримафе́я, благообра́зен сове́тник, и́же и той бе ча́я Ца́рствия Бо́жия, дерзну́в вни́де к Пила́ту, и проси́ те́ло Иису́сова. Пила́т же диви́ся, а́ще уже́ у́мре: и призва́в со́тника, вопроси́ его́: а́ще уже́ у́мре? И уве́дев от со́тника, даде́ те́ло Ио́сифови. И купи́в плащани́цу, и снем Его́, обви́т плащани́цею, и положи́ Его́ во гроб, и́же бе изсе́чен от ка́мене: и привали́ ка́мень над две́ри гро́ба. Мари́я же Магдали́на, и Мари́я Иоси́ева зря́сте, где Его́ полага́ху.

Таже Сла́ва в вы́шних Бо́гу: Священник же ектению: Испо́лним у́треннюю моли́тву: И прочее по обычаю, и по возгласе: Я́ко Бог ми́лости:

Абие Евангелие 11-е, от Иоанна, зачало 62:

Во вре́мя о́но, моли́ Пила́та Ио́сиф, и́же от Аримафе́я, сый учени́к Иису́сов, потае́н же стра́ха ра́ди иуде́йска, да во́змет те́ло Иису́сово: и повеле́ Пила́т. Прии́де же и взят те́ло Иису́сово. Прии́де же и Никоди́м, прише́дый ко Иису́сови но́щию пре́жде, нося́ смеше́ние сми́рнено и ало́йно, я́ко литр сто. Прия́ста же те́ло Иису́сово, и обви́ста е́ ри́зами со арома́ты, я́коже обы́чай есть иуде́ом погреба́ти. Бе же на ме́сте, иде́же распя́тся, верт, и в ве́рте гроб нов, в не́мже николи́же никто́же положе́н бе. Ту у́бо пятка́ ра́ди иуде́йска, я́ко близ бя́ше гроб, положи́ста Иису́са.

И поем стихиры самогласны, оба лика вкупе. Глас 1:

Вся тварь изменя́шеся стра́хом, / зря́щи Тя на Кресте́ ви́сима, Христе́: / со́лнце омрача́шеся, / и земли́ основа́ния сотряса́хуся, / вся сострада́ху Созда́вшему вся. / Во́лею нас ра́ди претерпе́вый, / Го́споди, сла́ва Тебе́.

Глас 2. Стих: Раздели́ша ри́зы Моя́ себе́, / и о оде́жди Мое́й мета́ша жре́бий.

Лю́дие злочести́вии и беззако́ннии, / вску́ю поуча́ются тще́тным? / Вску́ю Живота́ всех на смерть осуди́ша? / Ве́лие чу́до, я́ко Созда́тель ми́ра / в ру́ки беззако́нных предае́тся, / и на дре́во возвыша́ется Человеколю́бец, / да я́же во а́де у́зники свободи́т зову́щия: / долготерпели́ве Го́споди, сла́ва Тебе́.

Стих: Да́ша в снедь Мою́ желчь, / и в жа́жду Мою́ напои́ша Мя о́цта.

Днесь зря́щи Тя, Непоро́чная Де́ва, / на Кресте́ Сло́ве возвыша́ема, / рыда́ющи ма́тернею утро́бою, / уязвля́шеся се́рдцем го́рце, / и стеня́щи боле́зненно из глубины́ души́, / лице́ со власы́ терза́ющи. / Те́мже и пе́рси бию́щи, взыва́ше жа́лостно: / увы́ Мне, Боже́ственное Ча́до, / увы́ Мне, Све́те ми́ра, / что заше́л еси́ от о́чию Мое́ю, А́гнче Бо́жий? / Те́мже во́инства безпло́тных, / тре́петом содержи́ми бя́ху, глаго́люще: / Непостижи́ме Го́споди, сла́ва Тебе́.

Стих: Бог же, Царь наш пре́жде ве́ка, / соде́ла спасе́ние посреде́ земли́.

На дре́ве ви́дящи ви́сима, Христе́, / Тебе́, всех Зижди́теля и Бо́га, / безсе́менно Ро́ждшая Тя вопия́ше го́рько: / Сы́не Мой, где добро́та за́йде зра́ка Твоего́? / Не терплю́ зре́ти Тя непра́ведно распина́ема: / потщи́ся у́бо, воста́ни, я́ко да ви́жу и Аз / Твое́ из ме́ртвых тридне́вное Воскресе́ние.

Слава, глас 8: Го́споди, восходя́щу Ти на Крест, / страх и тре́пет нападе́ на тварь, / и земли́ у́бо возбраня́л еси́ поглоти́ти распина́ющих Тя, / а́ду же повелева́л еси́ испусти́ти у́зники, / на обновле́ние челове́ков. / Судие́ живы́х и ме́ртвых, / жизнь прише́л еси́ пода́ти, а не смерть. / Человеколю́бче, сла́ва Тебе́.

И ныне, глас 6: Уже́ омака́ется трость изрече́ния, от суде́й непра́ведных, / Иису́с суди́мь быва́ет, и осужда́ется на крест, / и стра́ждет тварь, на Кресте́ ви́дящи Го́спода. / Но естество́м телесе́, мене́ ра́ди стражда́й, / Благи́й Го́споди, сла́ва Тебе́.

Таже Евангелие 12-е, от Матфеа, зачало 114:

Во у́трий день, и́же есть по пятце́, собра́шася архиере́е и фарисе́е к Пила́ту, глаго́люще: го́споди, помяну́хом, я́ко льстец он рече́, еще́ сый жив: по трие́х днех воста́ну. Повели́ у́бо утверди́ти гроб до тре́тияго дне, да не ка́ко прише́дше ученицы́ Его́ но́щию, укра́дут Его́, и реку́т лю́дем: воста́ от ме́ртвых, и бу́дет после́дняя лесть го́рша пе́рвыя. Рече́ же им Пила́т: и́мате кустоди́ю, иди́те, утверди́те, я́коже ве́сте. Они́ же ше́дше утверди́ша гроб, зна́менавше ка́мень с кустоди́ею.

Таже Бла́го есть испове́датися Го́сподеви: Трисвятое. По О́тче наш:

Тропарь, глас 4:

Искупи́л ны еси́ от кля́твы зако́нныя / честно́ю Твое́ю Кро́вию, / на Кресте́ пригвозди́вся, и копие́м пробо́дся, / безсме́ртие источи́л еси́ челове́ком, / Спа́се наш, сла́ва Тебе́.

Таже ектения обычная. И отпуст:

И́же оплева́ния и бие́ния, и зауше́ния, и Крест, и смерть претерпе́вый за спасе́ние ми́ра, Христо́с, и́стинный Бог наш, моли́твами пречи́стыя Своея́ Ма́тере, святы́х сла́вных и всехва́льных Апо́стол, святы́х пра́ведных Богооте́ц Иоаки́ма и А́нны, и всех святы́х, поми́лует и спасе́т нас, я́ко Благ и Человеколю́бец.

Первый же час не совокупляем ныне, но о втором часе дне.

СКАЗАНИЕ ЧАСОВ СВЯТАГО И ВЕЛИКАГО ПЯТКА, ТВОРЕНИЕ КИРИЛЛА, АРХИЕПИСКОПА АЛЕКСАНДРИЙСКАГО. Первый час.

О втором часе дне клеплет, и облачится священник, и, благословившу ему, начинаем: Царю́ Небе́сный: Трисвято́е. Пресвята́я Тро́ице: О́тче наш: Возглашение: Я́ко Твое́ есть Ца́рство: Го́споди, поми́луй, 12. Сла́ва, и ны́не: Прииди́те, поклони́мся: трижды. И глаголем псалмы сия, яже зде изъявляются.

Псалом 5:

Глаго́лы моя́ внуши́, Го́споди, разуме́й зва́ние мое́. Вонми́ гла́су моле́ния моего́, Царю́ мой и Бо́же мой, я́ко к Тебе́ помолю́ся, Го́споди. Зау́тра услы́ши глас мой, зау́тра предста́ну Ти, и у́зриши мя. Я́ко Бог, не хотя́й беззако́ния, Ты еси́, не присели́тся к Тебе́ лука́внуяй, ниже́ пребу́дут беззако́нницы пред очи́ма Твои́ма. Возненави́дел еси́ вся, де́лающия беззако́ние. Погуби́ши вся, глаго́лющия лжу, му́жа крове́й и льсти́ва гнуша́ется Госпо́дь. Аз же мно́жеством ми́лости Твоея́, вни́ду в дом Твой, поклоню́ся ко хра́му свято́му Твоему́, в стра́се Твое́м. Го́споди, наста́ви мя пра́вдою Твое́ю, враг мои́х ра́ди испра́ви пред Тобо́ю путь мой. Я́ко несть во усте́х их и́стины, се́рдце их су́етно, гроб отве́рст горта́нь их, язы́ки свои́ми льща́ху. Суди́ им, Бо́же, да отпаду́т от мы́слей свои́х, по мно́жеству нече́стия их изри́ни я́, я́ко преогорчи́ша Тя, Го́споди. И да возвеселя́тся вси, упова́ющии на Тя, во век возра́дуются, и всели́шися в них. И похва́лятся о Тебе́ лю́бящии И́мя Твое́. Я́ко Ты благослови́ши пра́ведника, Го́споди, я́ко ору́жием благоволе́ния венча́л еси́ нас.

Псалом 2:

Вску́ю шата́шася язы́цы, и лю́дие поучи́шася тще́тным? Предста́ша ца́рие зе́мстии, и кня́зи собра́шася вку́пе на Го́спода и на Христа́ Его́. Расто́ргнем у́зы их, и отве́ржем от нас и́го их. Живы́й на Небесе́х посмее́тся им, и Госпо́дь поруга́ется им. Тогда́ возглаго́лет к ним гне́вом Свои́м и я́ростию Свое́ю смяте́т я́. Аз же поста́влен есмь Царь от Него́ над Сио́ном, горо́ю свято́ю его́, возвеща́яй повеле́ние Госпо́дне. Госпо́дь рече́ ко Мне: Сын Мой еси́ Ты, Аз днесь роди́х Тя. Проси́ от Мене́, и дам Ти язы́ки достоя́ние Твое́, и одержа́ние Твое́ концы́ земли́. Упасе́ши я́ жезло́м желе́зным, я́ко сосу́ды скуде́льничи сокруши́ши я́. И ны́не, ца́рие, разуме́йте, накажи́теся вси судя́щии земли́. Рабо́тайте Го́сподеви со стра́хом, и ра́дуйтеся Ему́ с тре́петом. Приими́те наказа́ние, да не когда́ прогне́вается Госпо́дь, и поги́бнете от пути́ пра́ведного, егда́ возгори́тся вско́ре я́рость Его́. Блаже́ни вси наде́ющиеся Нань.

Псалом 21:

Бо́же, Бо́же мой, вонми́ ми, вску́ю оста́вил мя еси́? Дале́че от спасе́ния моего́ словеса́ грехопаде́ний мои́х. Бо́же мой, воззову́ во дни, и не услы́шиши, и в нощи́, и не в безу́мие мне. Ты же во Святе́м живе́ши, хвало́ Изра́илева. На Тя упова́ша отцы́ на́ши, упова́ша, и изба́вил еси́ я́. К Тебе́ воззва́ша, и спасо́шася, на Тя упова́ша, и не постыде́шася. Аз же есмь червь, а не челове́к, поноше́ние челове́ков и уничиже́ние люде́й. Вси ви́дящии мя поруга́ша ми ся, глаго́лаша устна́ми, покива́ша главо́ю. Упова́ на Го́спода, да изба́вит его́, да спасе́т его́, я́ко хо́щет его́. Я́ко Ты еси́ исто́ргий мя из чре́ва, упова́ние мое́ от сосцу́ ма́тере моея́. К Тебе́ приве́ржен есмь от ложе́сн, от чре́ва ма́тере моея́, Бог мой еси́ Ты. Да не отсту́пиши от мене́, я́ко скорбь близ, я́ко несть помога́яй ми. Обыдо́ша мя тельцы́ мно́зи, юнцы́ ту́чнии одержа́ша мя. Отверзо́ша на мя уста́ своя́, я́ко лев восхища́яй и рыка́яй. Я́ко вода́ излия́хся, и разсы́пашася вся ко́сти моя́, бысть се́рдце мое́ я́ко воск, та́яй посреде́ чре́ва моего́. И́зсше я́ко скуде́ль кре́пость моя́, и язы́к мой прильпе́ горта́ни моему́, и в персть сме́рти свел мя еси́. Я́ко обыдо́ша мя пси мно́зи, сонм лука́вых одержа́ша мя, ископа́ша ру́це мои́ и но́зе мои́. Исчето́ша вся ко́сти моя́, ти́и же смотри́ша, и презре́ша мя. Раздели́ша ри́зы моя́ себе́, и о оде́жди мое́й мета́ша жре́бий. Ты же, Го́споди, не удали́ по́мощь Твою́ от мене́, на заступле́ние мое́ вонми́. Изба́ви от ору́жия ду́шу мою́, и из руки́ пе́сии единоро́дную мою́. Спаси́ мя от уст льво́вых и от рог единоро́жь смире́ние мое́. Пове́м и́мя Твое́ бра́тии мое́й, посреде́ це́ркве воспою́ Тя. Боя́щиися Го́спода, восхвали́те Его́, все се́мя Иа́ковле, просла́вите Его́, да убои́тся же от Него́ все се́мя Изра́илево. Я́ко не уничижи́, ниже́ негодова́ моли́твы ни́щаго, ниже́ отврати́ лице́ Свое́ от мене́, и егда́ воззва́х к Нему, услы́ша мя. От Тебе́ похвала́ моя́, в це́ркви вели́цей испове́мся Тебе́, моли́твы моя́ возда́м пред боя́щимися Его́. Ядя́т убо́зии, и насы́тятся, и восхва́лят Го́спода взыска́ющии Его́, жива́ бу́дут сердца́ их в век ве́ка. Помяну́тся и обратя́тся ко Го́споду вси концы́ земли́, и покло́нятся пред Ним вся оте́чествия язы́к. Я́ко Госпо́дне есть ца́рствие, и Той облада́ет язы́ки. Ядо́ша и поклони́шася вси ту́чнии земли́, пред Ним припаду́т вси низходя́щии в зе́млю, и душа́ моя́ тому́ живе́т. И се́мя мое́ порабо́тает Ему́, возвести́т Го́сподеви род гряду́щий. И возвестя́т пра́вду Его́ лю́дем ро́ждшымся, я́же сотвори́ Госпо́дь.

Слава, и ныне, аллилу́иа, трижды. Го́споди, поми́луй, трижды.

Слава, тропарь, глас 1:

Распе́ншуся Тебе́, Христе́, поги́бе мучи́тельство, / попра́на бысть си́ла вра́жия: / ниже́ бо А́нгел, ниже́ челове́к, / но Сам Го́споди спасл еси́ нас, сла́ва Тебе́.

И ныне, Богородичен: Что Тя нарече́м, о Благода́тная? / Не́бо, я́ко возсия́ла еси́ Со́лнце Пра́вды. / Рай, я́ко прозябла́ еси́ цвет нетле́ния. / Де́ву, я́ко пребыла́ еси́ нетле́нна. / Чи́стую Ма́терь, я́ко име́ла еси́ на святы́х Твои́х объя́тиях Сы́на, всех Бо́га. / Того́ моли́ спасти́ся душа́м на́шим.

Таже поем тропари три от двунадесяти, повторяюще я. Глаголем же первый без стиха, тако бо творим и в прочих часех в первый тропарь. Во вторый же, глаголет наченший лик стих, и поет и. Таже паки другий лик стих, и поет и той и. Третий же глаголем на Сла́ву, и на И ны́не.

Стихира самогласна перваго часа, глас 8:

Днесь церковная завеса / на обличение беззаконных раздирается, / и солнце лучи своя́ скрывает, / Влады́ку зря распинаема.

И паки туюже другий лик.

Таже глаголет стих первый лик: Вску́ю шата́шася язы́цы, и лю́дие поучи́шася тще́тным?

И поем настоящий тропарь:

Я́ко овча́ на заколе́ние / веде́н был еси́, Христе́ Царю, / и я́ко а́гнец незло́бивый / пригвозди́лся еси́ Кресту́, от беззако́нных муже́й, / грех ра́ди на́ших, Человеколю́бче.

Стих: Предста́ша ца́рие зе́мстии, и кня́зи собра́шася вку́пе на Го́спода и на Христа́ Его́.

И поет паки и другий лик тойже стих. Таже первый лик.

Слава: Е́мшим Тя беззако́нным, / претерпева́я, си́це вопия́л еси́, Го́споди: / а́ще и порази́сте Па́стыря, / и расточи́сте двана́десять ове́ц, ученики́ Моя́, / можа́х вя́щши, не́жели двана́десяте легео́нов предста́вити А́нгелов. / Но долготерплю́, да испо́лнятся, / я́же яви́х вам проро́ки Мои́ми, / безве́стная и та́йная: / Го́споди, сла́ва Тебе́.

И ныне: паки тойже.

Прокимен пророчества, глас 4: Се́рдце его́ / собра́ беззако́ние себе́. Стих: Блаже́н разумева́яй на ни́ща и убо́га.

Пророчества Захариина чтение [Глава 11, ст. 10 – 13].

Та́ко глаго́лет Госпо́дь: прииму́ жезл Мой до́брый, и отве́ргу его́, е́же разори́ти заве́т Мой, его́же завеща́х ко всем лю́дем. И разори́тся в день о́ный, и уразуме́ют ханане́и о́вцы храни́мыя Мне, зане́ сло́во Госпо́дне есть. И реку́ к ним: а́ще добро́ пред вами есть, дади́те мзду Мою́, или́ отрецы́теся: и поста́виша мзду Мою́ три́десять сре́бреник. И рече́ Госпо́дь ко мне: вложи́ я́ в горни́ло, и смотри́ а́ще искуше́но есть, и́мже о́бразом искуше́н бых о них. И прия́х три́десять сре́бреник, и вложи́х их в храм Госпо́день в горни́ло.

Таже Апостол к Галатом, зачало 215, от полу.

Бра́тие, мне да не бу́дет хвали́тися, то́кмо о Кресте́ Го́спода на́шего Иису́са Христа́, И́мже мне мир распя́ся, и аз ми́ру. О Христе́ бо Иису́се ни обре́зание что мо́жет, ни необре́зание, но нова́ тварь. И ели́цы пра́вилом сим жи́тельствуют, мир на них и ми́лость, и на Изра́или Бо́жии. Про́чее труды́ да никто́же ми дае́т: аз бо я́звы Го́спода Иису́са на те́ле мое́м ношу́. Благода́ть Го́спода на́шего Иису́са Христа́, со ду́хом ва́шим, бра́тие, ами́нь.

Таже Евангелие от Матфеа, зачало 110:

Во вре́мя о́но, у́тру бы́вшу, сове́т сотвори́ша вси архиере́е и ста́рцы людсти́и на Иису́са, я́ко уби́ти Его́. И связа́вше Его́ ведо́ша, и преда́ша Его́ Понти́йскому Пила́ту иге́мону. Тогда́ ви́дев Иу́да преда́вый Иису́са, я́ко осуди́ша Его́, раска́явся возврати́ три́десять сре́бреники архиере́ем и ста́рцем, глаго́ля: согреши́х, преда́в кровь непови́нную. Они́ же ре́ша: что есть нам? Ты у́зриши. И пове́рг сре́бреники в це́ркви, оты́де, и шед удави́ся. Архиере́е же прие́мше сре́бреники, ре́ша: недосто́йно есть вложи́ти их в корва́ну, поне́же цена́ кро́ве есть. Сове́т же сотво́рше, купи́ша и́ми село́ скуде́льниче, в погреба́ние стра́нным. Те́мже нарече́ся село́ то, село́ кро́ве, до сего́ дне. Тогда́ сбы́стся рече́нное Иереми́ем проро́ком, глаго́лющим: и прия́ша три́десять сре́бреник, це́ну Цене́ннаго, Его́же цени́ша от сыно́в Изра́илев. И да́ша я́ на селе́ скуде́льничи, я́коже сказа́ мне Госпо́дь. Иису́с же ста пред иге́моном. И вопроси́ Его́ иге́мон, глаго́ля: Ты ли еси́ Царь Иуде́йский? Иису́с же рече́ ему́: ты глаго́леши. И егда́ Нань глаго́лаху архиере́е и ста́рцы, ничесо́же отвещава́ше. Тогда́ глаго́ла Ему́ Пила́т: не слы́шиши ли, коли́ко на Тя свиде́тельствуют? И не отвеща́ ему́ ни к еди́ному глаго́лу, я́ко диви́тися иге́мону зело́. На всяк же пра́здник обы́чай бе иге́мону отпуща́ти еди́наго наро́ду свя́зня, его́же хотя́ху. Имя́ху же тогда́ свя́зана наро́чита, глаго́лемаго Вара́вву. Со́бранным же им, рече́ им Пила́т: кого́ хо́щете от обою́ отпущу́ вам; Вара́вву ли, или́ Иису́са глаго́лемаго Христа́? Ве́дяше бо, я́ко за́висти ра́ди преда́ша Его́. Седя́щу же ему́ на суди́щи, посла́ к нему́ жена́ его́, глаго́лющи: ничто́же тебе́, и Пра́веднику Тому́, мно́го бо пострада́х днесь во сне Его́ ра́ди. Архиере́е же и ста́рцы наусти́ша наро́ды, да испро́сят Вара́вву, Иису́са же погубя́т. Отвеща́в же иге́мон рече́ им: кого́ хо́щете от обою́ отпущу́ вам? Они́ же ре́ша: Вара́вву. Глаго́ла им Пила́т: что у́бо сотворю́ Иису́су, глаго́лемому Христу́? Глаго́лаша ему́ вси: да ра́спят бу́дет. Иге́мон же рече́: ко́е у́бо зло сотвори́? Они́ же и́злиха вопия́ху, глаго́люще: да про́пят бу́дет. Ви́дев же Пила́т, я́ко ничто́же успева́ет, но па́че молва́ быва́ет, прие́мь во́ду, умы́ ру́це пред наро́дом, глаго́ля: непови́нен есмь от кро́ве Пра́веднаго Сего́, вы у́зрите. И отвеща́вше вси лю́дие, ре́ша: кровь Его́ на нас, и на ча́дех на́ших. Тогда́ отпусти́ им Вара́вву: Иису́са же бив, предаде́ им, да Его́ про́пнут. Тогда́ во́ини иге́моновы, прие́мше Иису́са на суди́ще, собра́ша Нань все мно́жество во́ин. И совле́кше Его́, оде́яша Его́ хлами́дою червле́ною. И спле́тше вене́ц от те́рния, возложи́ша на главу́ Его́, и трость в десни́цу Его́. И покло́ньшеся на коле́ну пред Ним, руга́хуся Ему́, глаго́люще: ра́дуйся, Царю́ Иуде́йский. И плю́нувше Нань, прия́ша трость, и бия́ху по главе́ Его́. И егда́ поруга́шася Ему́, совлеко́ша с Него́ багряни́цу, и облеко́ша Его́ в ри́зы Его́, и ведо́ша Его́ на пропя́тие. Исходя́ще же обрето́ша челове́ка Кирине́йска, и́менем Си́мона: и сему́ заде́ша понести́ крест Его́. И прише́дше на ме́сто нарица́емое Голго́фа, е́же есть Кра́ниево ме́сто, да́ша Ему́ пи́ти о́цет с же́лчию сме́шен, и вкушь не хотя́ше пи́ти. Распе́ншии же Его́ раздели́ша ри́зы Его́, ве́ргше жре́бия. И седя́ще стрежа́ху Его́ ту. И возложи́ша верху́ главы́ Его́ вину́ Его́ напи́сану: Сей есть Иису́с, Царь Иуде́йский. Тогда́ распя́ша с Ним два разбо́йника: еди́наго одесну́ю, и еди́наго ошу́юю. Мимоходя́щии же ху́ляху Его́, покива́юще глава́ми свои́ми, и глаго́люще: разоря́яй це́рковь и треми́ де́ньми созида́яй, спаси́ся Сам: а́ще Сын еси́ Бо́жий, сни́ди со креста́. Та́кожде же и архиере́е руга́ющеся с кни́жники, и ста́рцы, и фарисе́и, глаго́лаху: ины́я спасе́, Себе́ ли не мо́жет спасти́? Аще Царь Изра́илев есть, да сни́дет ны́не со креста́, и ве́руем в Него́. Упова́ на Бо́га: да изба́вит ны́не Его́, а́ще хо́щет Ему́: рече́ бо, я́ко Бо́жий есмь Сын. То́жде же и разбо́йника распя́тая с Ним поноша́ста Ему́. От шеста́го же часа́ тьма бысть по всей земли́, до часа́ девя́таго. О девя́тем же часе́ возопи́ Иису́с гла́сом ве́лиим, глаго́ля: Или́, Или́, лима́ савахфани́? Е́же есть, Бо́же Мой, Бо́же Мой, вску́ю Мя еси́ оста́вил? Не́цыи же от ту стоя́щих слы́шавше, глаго́лаху, я́ко Илию́ глаша́ет Сей. И а́бие тек еди́н от них, и прие́м гу́бу, испо́лнив же о́цта, и вонзе́ на трость, напая́ше Его́. Про́чии же глаго́лаху: оста́ви, да ви́дим, а́ще прии́дет Илиа́ спасти́ Его́. Иису́с же, па́ки возопи́в гла́сом ве́лиим, испусти́ дух. И се, заве́са церко́вная раздра́ся на дво́е, с вы́шняго кра́я до ни́жняго; и земля́ потрясе́ся, и ка́мение распаде́ся. И гро́би отверзо́шася, и мно́га телеса́ усо́пших святы́х воста́ша. И изше́дше из гроб по воскресе́нии Его́, внидо́ша во святы́й град, и яви́шася мно́зем. Со́тник же и и́же с ним стрегу́щии Иису́са, ви́девше трус и бы́вшая, убоя́шася зело́, глаго́люще: вои́стинну Бо́жий Сын бе Сей. Бя́ху же ту и жены́ мно́ги издале́че зря́ще, я́же идо́ша по Иису́се от Галиле́и, служа́ще Ему́. В ни́хже бе Мари́я Магдали́на и Мари́я Иа́ковля, и Иоси́и ма́ти, и ма́ти сы́ну Зеведе́ову.

Таже Стопы́ моя́ напра́ви по словеси́ Твоему́: Да испо́лнятся уста́ моя́ хвале́ния: Трисвятое. И по О́тче наш:

Кондак, глас 8:

Нас ра́ди Распя́таго, прииди́те, вси воспои́м. / Того́ бо ви́де Мари́я на дре́ве, и глаго́лаше: / а́ще и распя́тие терпи́ши, / Ты еси́ Сын и Бог Мой.

Таже Го́споди, поми́луй, 40. И́же на вся́кое вре́мя: Го́споди, поми́луй, трижды. Сла́ва, и ны́не: Честне́йшую Херуви́м: И́менем Госпо́дним благослови́, о́тче. Священник: Бо́же, уще́дри ны: Христе́, Све́те и́стинный:

ПОСЕМ ПОЕМ ТРЕТИЙ ЧАС.

Глаголем: Прииди́те, поклони́мся: трижды.

И псалом 34:

Суди́, Го́споди, оби́дящыя мя, побори́ борю́щыя мя. Приими́ ору́жие и щит, и воста́ни в по́мощь мою́. Изсу́ни мечь, и заключи́ сопроти́в гоня́щих мя. Рцы души́ мое́й: спасе́ние твое́ есмь Аз. Да постыдя́тся и посра́мятся и́щущии ду́шу мою́, да возвратя́тся вспять, и постыдя́тся мы́слящии ми зла́я. Да бу́дут я́ко прах пред лице́м ве́тра, и А́нгел Госпо́день оскорбля́я их. Да бу́дет путь их тьма и по́лзок, и А́нгел Госпо́день погоня́яй их. Я́ко ту́не скры́ша ми па́губу се́ти своея́, всу́е поноси́ша души́ мое́й. Да прии́дет ему́ сеть, ю́же не весть, и лови́тва, ю́же скры, да объи́мет и́, и в сеть да впаде́т в ню. Душа́ же моя́ возра́дуется о Го́споде, возвесели́тся о спасе́нии Его́. Вся ко́сти моя́ реку́т: Го́споди, Го́споди, кто подо́бен Тебе́? Избавля́яй ни́ща из руки́ кре́пльших его́, и ни́ща и убо́га от расхища́ющих его́. Воста́вше на мя свиде́теле непра́веднии, я́же не ве́дях, вопроша́ху мя. Возда́ша ми лука́вая воз блага́я, и безча́дие души́ мое́й. Аз же, внегда́ они́ стужа́ху ми, облача́хся во вре́тище, и смиря́х посто́м ду́шу мою́, и моли́тва моя́ в не́дро мое́ возврати́тся. Я́ко бли́жнему, я́ко бра́ту на́шему, та́ко угожда́х, я́ко пла́ча и се́туя, та́ко смиря́хся. И на мя возвесели́шася, и собра́шася, собра́шася на мя ра́ны, и не позна́х, раздели́шася, и не умили́шася. Искуси́ша мя, подражни́ша мя подражне́нием, поскрежета́ша на мя зубы́ свои́ми. Го́споди, когда́ у́зриши? Устро́й ду́шу мою́ от злоде́йства их, от лев единоро́дную мою́. Испове́мся Тебе́ в це́ркви мно́зе, в лю́дех тя́жцех восхвалю́ Тя. Да не возра́дуются о мне вражду́ющии ми непра́ведно, ненави́дящии мя туне и помиза́ющии очи́ма. Я́ко мне у́бо ми́рная глаго́лаху, и на гнев ле́сти помышля́ху. Разшири́ша на мя уста́ своя́, ре́ша: бла́гоже, бла́гоже, ви́деша о́чи на́ши. Ви́дел еси́, Го́споди, да не премолчи́ши. Го́споди, не отступи́ от мене́. Воста́ни, Го́споди, и вонми́ суду́ моему́, Бо́же мой и Го́споди мой, на прю мою́. Суди́ ми, Го́споди, по пра́вде Твое́й, Го́споди Бо́же мой, и да не возра́дуются о мне. Да не реку́т в сердца́х своих: бла́гоже, бла́гоже души́ на́шей, ниже́ да реку́т: пожро́хом его́. Да постыдя́тся и посра́мятся вку́пе ра́дующиися злом мои́м, да облеку́тся в студ и срам велере́чующии на мя. Да возра́дуются и возвеселя́тся хотя́щии пра́вды моея́, и да реку́т вы́ну, да возвели́чится Госпо́дь, хотя́щии ми́ра рабу́ Его́. И язы́к мой поучи́тся пра́вде Твое́й, весь день хвале́ Твое́й.

Псалом 108:

Бо́же, хвалы́ моея́ не премолчи́. Я́ко уста́ гре́шнича, и уста́ льсти́ваго на мя отверзо́шася, глаго́лаша на мя язы́ком льсти́вым. И словесы́ ненави́стными обыдо́ша мя, и бра́шася со мно́ю ту́не. Вме́сто е́же люби́ти мя, оболга́ху мя, аз же моля́хся, и положи́ша на мя зла́я за блага́я, и не́нависть за возлюбле́ние мое́. Поста́ви на него́ гре́шника, и диа́вол да ста́нет одесну́ю его́. Внегда́ суди́тися ему́, да изы́дет осужде́н, и моли́тва его́ да бу́дет в грех. Да бу́дут дни́е его́ ма́ли, и епи́скопство его́ да прии́мет ин. Да бу́дут сы́нове его́ си́ри, и жена́ его́ вдова́. Дви́жущеся да преселя́тся сы́нове его́ и воспро́сят, да изгна́ни бу́дут из домо́в свои́х. Да взы́щет заимода́вец вся, ели́ка суть его́, и да восхи́тят чужди́и труды́ его́. Да не бу́дет ему́ засту́пника, ниже́ да бу́дет ущедря́яй сироты́ его́. Да бу́дут ча́да его́ в погубле́ние, в ро́де еди́ном да потреби́тся и́мя его́. Да воспомяне́тся беззако́ние оте́ц его́ пред Го́сподем, и грех ма́тере его́ да не очи́стится. Да бу́дут пред Го́сподем вы́ну, и да потреби́тся от земли́ па́мять их. Зане́же не помяну́ сотвори́ти ми́лость, и погна́ челове́ка ни́ща и убо́га, и умиле́на се́рдцем умертви́ти. И возлюби́ кля́тву, и прии́дет ему́, и не восхоте́ благослове́ния, и удали́тся от него́. И облече́ся в кля́тву я́ко в ри́зу, и вни́де я́ко вода́ во утро́бу его́, и я́ко еле́й в ко́сти его́. Да бу́дет ему́ я́ко ри́за, в ню́же облачи́тся, и я́ко по́яс, и́мже вы́ну опоясу́ется. Сие́ де́ло оболга́ющих мя у Го́спода, и глаго́лющих лука́вая на ду́шу мою́. И ты, Го́споди, Го́споди, сотвори́ со мно́ю и́мене ра́ди Твоего́, я́ко бла́га ми́лость Твоя́. Изба́ви мя, я́ко нищ и убо́г есмь аз, и се́рдце мое́ смяте́ся внутрь мене́. Я́ко сень, внегда́ уклони́тися ей, отъя́хся, стрясо́хся я́ко пру́зи. Коле́на моя́ изнемого́ста от поста́, и плоть моя́ измени́ся еле́а ра́ди. И аз бых поноше́ние им, ви́деша мя, покива́ша глава́ми свои́ми. Помози́ ми, Го́споди Бо́же мой, и спаси́ мя по ми́лости Твое́й. И да разуме́ют, я́ко рука́ Твоя́ сия́, и Ты, Го́споди, сотвори́л еси́ ю́. Проклену́т ти́и, и Ты благослови́ши, востаю́щии на мя да постыдя́тся, раб же Твой возвесели́тся. Да облеку́тся оболга́ющии мя в срамоту́, и оде́ждутся, я́ко оде́ждею, студо́м свои́м. Испове́мся Го́сподеви зело́ усты́ мои́ми, и посреде́ мно́гих восхвалю́ Его́. Я́ко предста́ одесну́ю убо́гаго, е́же спасти́ от гоня́щих ду́шу мою́.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю, и грех мой предо мно́ю есть вы́ну. Тебе́ еди́ному согреши́х и лука́вое пред Тобо́ю сотвори́х. Я́ко да оправди́шися во словесе́х Твои́х, и победи́ши внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и Дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая, тогда́ возложа́т на олта́рь Твой тельцы́.

Слава, и ныне, аллилу́иа, трижды. Го́споди, поми́луй, трижды.

Слава, тропарь, глас 6:

Го́споди, осуди́ша Тя иуде́е на смерть, Жизнь всех, / и́же Чермно́е мо́ре жезло́м проше́дший, / на Кресте́ Тя пригвозди́ша: / и и́же от ка́мене мед сса́вшии, / желчь Тебе́ принесо́ша. / Но во́лею претерпе́л еси́, / да нас свободи́ши от рабо́ты вра́жия, / Христе́ Бо́же, сла́ва Тебе́.

И ныне, Богородичен: Богоро́дице, Ты еси́ лоза́ и́стинная, / возрасти́вшая нам Плод живота́, / Тебе́ мо́лимся: / моли́ся, Влады́чице, со святы́ми апо́столы / поми́ловати ду́ши на́ша.

И поем три тропари от двунадесяти, повторяюще я. Глас 8:

Стра́ха ра́ди иуде́йскаго, / друг Твой и бли́жний Петр отве́ржеся Тебе́, Го́споди, / и рыдая си́це вопия́ше: / слез мои́х не премолчи́, / рех бо сохрани́ти ве́ру Ще́дре, и не сохрани́х: / и на́ше покая́ние та́кожде приими́, и поми́луй нас.

Паки тойже. Таже стих: Глаго́лы моя́ внуши́ Го́споди, разуме́й зва́ние мое́.

Пре́жде Честна́го Твоего́ Креста́, / во́ином руга́ющимся Тебе́, Го́споди, / у́мная во́инства дивля́хуся: / обложи́лся бо еси́ венце́м поруга́ния, / зе́млю живописа́вый цве́ты, / багряни́цею поруга́ния оде́ялся еси́, / о́блаки одева́яй твердь. / Таковы́м бо смотре́нием разуме́ся Твое́ благоутро́бие, Христе́, / ве́лия Твоя́ ми́лость, сла́ва Тебе́.

Стих: Вонми́ гла́су моле́ния моего́, Царю́ мой и Бо́же мой.

И паки тойже.

Слава, глас 5: Влеко́мь на Крест, си́це вопия́л еси́, Го́споди: / за ко́е де́ло хо́щете Мя распя́ти, иуде́е? / Я́ко разсла́бленныя ва́ша стягну́х, / зане́ мертвецы́ а́ки от сна возста́вих, / кровоточи́вую исцели́х, ханане́ю поми́ловах. / За ко́е де́ло хо́щете Мя уби́ти, иуде́е? / Но у́зрите, в Него́же ны́не пробода́ете Христа́, беззако́ннии.

И ныне, паки тойже.

Прокимен, глас 4: Я́ко Аз на ра́ны гото́в, / и боле́знь Моя́ пре́до Мно́ю есть вы́ну. Стих: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Пророчества Исаиина чтение [Глава 50, ст. 4 – 11].

Госпо́дь дае́т мне язы́к науче́ния, е́же разуме́ти, егда́ подоба́ет рещи́ сло́во: положи́ мя у́тро у́тро, приложи́ ми у́хо, е́же слы́шати, и наказа́ние Госпо́дне отверза́ет у́ши мои́, аз же не проти́влюся, ни противоглаго́лю. Плещи́ мои́ вдах на ра́ны, и лани́те мои́ на зауше́ния, лица́ же моего́ не отврати́х от студа́ заплева́ний. И Госпо́дь Госпо́дь помо́щник ми бысть: сего́ ра́ди не усрами́хся, но положи́х лице́ свое́, а́ки тве́рдый ка́мень, и разуме́х, я́ко не постыжду́ся. Зане́ приближа́ется оправда́вый мя. Кто пря́йся со мно́ю? Да сопротивоста́нет мне ку́пно. И кто судя́йся со мно́ю? Да прибли́жится ко мне. Се Госпо́дь Госпо́дь помо́жет ми. Кто озло́бит мя? Се вси вы я́ко ри́за обетша́ете, и я́ко мо́лие изъя́ст вы. Кто в вас боя́йся Го́спода? Да послу́шает гла́са о́трока Его́. Ходя́щии во тьме, и несть им све́та, наде́йтеся на и́мя Госпо́дне и утверди́теся о Бо́зе. Се вси вы огнь раждиза́ете, и укрепля́ете пла́мень: ходи́те све́том огня́ ва́шего, и пла́менем, его́же разжего́сте. Мене́ ра́ди бы́ша сия́ вам, в печа́ли у́спнете.

Таже Апостол, к Римляном послания, зачало 88 от полу.

Бра́тие, Христо́с су́щим нам немощны́м, по вре́мени за нечести́вых у́мре. Едва́ бо за пра́ведника кто у́мрет: за блага́го бо не́гли кто и де́рзнет умре́ти. Составля́ет же Свою́ любо́вь в нас Бог, я́ко еще́ гре́шником су́щим нам, Христо́с за ны у́мре. Мно́го же у́бо па́че оправда́ни бы́вше ны́не Кро́вию Его́, спасе́мся Им от гне́ва. А́ще бо врази́ бы́вше, примири́хомся Бо́гу сме́ртию Сы́на Его́, мно́жае па́че примири́вшеся, спасе́мся в животе́ Его́.

Евангелие от Марка, зачало 66, 67 и 68, в ряд:

Во вре́мя о́но, во́ини ведо́ша Иису́са внутрь двора́, е́же есть прето́р, и созва́ша всю спи́ру. И облеко́ша Его́ в препря́ду, и возложи́ша на Него́ спле́тше терно́в вене́ц, и нача́ша целова́ти Его́, и глаго́лати: ра́дуйся, Царю́ Иуде́йский. И бия́ху Его́ по главе́ тро́стию, и плюва́ху на Него́, и прегиба́юще коле́на покланя́хуся Ему́. И егда́ поруга́шася Ему́, совлеко́ша с Него́ препря́ду, и облеко́ша Его́ в ри́зы Своя́; и изведо́ша Его́, да про́пнут Его́. И заде́ша мимоходя́щу не́коему Си́мону Кирине́ю, [гряду́щу с села́, отцу́ Алекса́ндрову и Ру́фову,] да во́змет крест Его́. И приведо́ша Его́ на Голго́фу ме́сто, е́же есть сказа́емо, Ло́бное ме́сто. И дая́ху Ему́ пи́ти есмирнисме́но вино́. Он же не прия́т. И распе́ншии Его́ раздели́ша ри́зы Его́, мета́юще жре́бий о них, кто что во́змет. Бе же час тре́тий, и распя́ша Его́. И бе написа́ние вины́ Его́ напи́сано: Царь Иуде́йск. И с Ним распя́ша два разбо́йника, еди́наго одесну́ю, и еди́наго ошу́юю Его́. И сбы́стся Писа́ние, е́же глаго́лет: и со беззако́нными вмени́ся. И мимоходя́щии ху́ляху Его́, покива́юще глава́ми свои́ми, и глаго́люще: уа́, разоря́яй це́рковь, и треми́ де́ньми созида́яй, спаси́ся Сам, и сни́ди со креста́. Та́коже и архиере́е руга́ющеся, друг ко дру́гу с кни́жники, глаго́лаху: и́ны спасе́, Себе́ ли не мо́жет спасти́? Христо́с, Царь Изра́илев, да сни́дет ны́не с креста́, да ви́дим и ве́ру име́м Ему́. И распя́тая с Ним поноша́ста Ему́. Бы́вшу же часу́ шесто́му, тьма бысть по всей земли́ до часа́ девя́таго. И в час девя́тый возопи́ Иису́с гла́сом ве́лиим, глаго́ля: Елои́, Елои́, лима́ савахфани́; е́же есть сказа́емо: Бо́же Мой, Бо́же Мой, почто́ Мя оста́вил еси́. И не́цыи от предстоя́щих слы́шавше, глаго́лаху: се Илию́ гласи́т. Тек же еди́н, и напо́лнив гу́бу о́цта, и возло́жь на трость, напоя́ше его́, глаго́ля: оста́вите, да ви́дим, а́ще прии́дет Илия́ сня́ти Его́. Иису́с же пущь глас ве́лий, и́здше. И заве́са церко́вная раздра́ся на дво́е, свы́ше до ни́зу. Ви́дев же со́тник стоя́й пря́мо ему́, я́ко та́ко возопи́в и́здше, рече́: вои́стинну Челове́к Сей, Сын бе Бо́жий. Бя́ху же и жены́ издале́ча зря́ще, в ни́хже бе Мари́я Магдали́на, и Мари́я Иа́кова Ма́лаго, и Иоси́и ма́ти, и Саломи́я. И́же и егда́ бе в Галиле́и, хожда́ху по Нем, и служа́ху Ему́; и и́ны мно́гия, я́же взыдо́ша с Ним во Иерусали́м.

И посем чтем по сказании, еже от Матфеа, слово крестное. Таже Госпо́дь Бог благослове́н: Трисвятое. И по О́тче наш: кондак: Нас ра́ди Распя́таго: Го́споди, поми́луй, 40. Молитва: И́же на вся́кое вре́мя: Го́споди, поми́луй, трижды. Сла́ва, и ны́не. Честне́йшую Херуви́м: И́менем Госпо́дним благослови́, о́тче. Иерей: Бо́же, уще́дри ны:

Влады́ко Бо́же О́тче Вседержи́телю, Го́споди Сы́не Единоро́дный Иису́се Христе́, и Святы́й Ду́ше, Еди́но Божество́, еди́на си́ла, поми́луй мя гре́шнаго и и́миже ве́си судьба́ми спаси́ мя недосто́йнаго раба́ Твоего́, я́ко благослове́н еси́ во ве́ки веко́в, ами́нь.

И АБИЕ ПОЕМ ШЕСТЫЙ ЧАС.

Глаголем: Прииди́те, поклони́мся: трижды. И псалмы.

Псалом 53:

Бо́же, во и́мя Твое́ спаси́ мя, и в си́ле Твое́й суди́ ми. Бо́же, услы́ши моли́тву мою́, внуши́ глаго́лы уст мои́х. Я́ко чу́ждии воста́ша на мя, и кре́пцыи взыска́ша ду́шу мою́, и не предложи́ша Бо́га пред собо́ю. Се бо Бог помога́ет ми, и Госпо́дь Засту́пник души́ мое́й. Отврати́т зла́я враго́м мои́м, и́стиною Твое́ю потреби́ их. Во́лею пожру́ Тебе́, испове́мся и́мени Твоему́, Го́споди, я́ко бла́го. Я́ко от вся́кия печа́ли изба́вил мя еси́, и на враги́ моя́ воззре́ о́ко мое́.

Псалом 139:

Изми́ мя, Го́споди, от челове́ка лука́ва, от му́жа непра́ведна изба́ви мя. И́же помы́слиша непра́вду в се́рдце, весь день ополча́ху бра́ни. Изостри́ша язы́к свой, я́ко змии́н, яд а́спидов под устна́ми их. Сохрани́ мя, Го́споди, из ру́ки гре́шничи, от челове́к непра́ведных изми́ мя, и́же помы́слиша запя́ти стопы́ моя́. Скры́ша го́рдии сеть мне, и у́жы препя́ша сеть нога́ма мои́ма. При стези́ собла́зны положи́ша ми. Рех Го́сподеви: Бог мой еси́ Ты, внуши́, Го́споди, глас моле́ния моего́. Го́споди, Го́споди, си́ло спасе́ния моего́, осени́л еси́ над главо́ю мое́ю в день бра́ни. Не преда́ждь мене́, Го́споди, от жела́ния моего́ гре́шнику: помы́слиша на мя, не оста́ви мене́, да не когда́ вознесу́тся. Глава́ окруже́ния их, труд усте́н их покры́ет я́. Паду́т на них у́глия о́гненная, низложи́ши я́ в страсте́х, и не постоя́т. Муж язы́чен не испра́вится на земли́: му́жа непра́ведна зла́я уловя́т во истле́ние. Позна́х, я́ко сотвори́т Госпо́дь суд ни́щым и месть убо́гим. Оба́че пра́веднии испове́дятся и́мени Твоему́, и вселя́тся пра́вии с лице́м Твои́м.

Псалом 90:

Живы́й в по́мощи Вы́шняго, в кро́ве Бо́га Небе́снаго водвори́тся. Рече́т Го́сподеви: засту́пник мой еси́, и прибе́жище мое́, Бог мой, и упова́ю на Него́. Я́ко Той изба́вит тя от се́ти ло́вчи, и от словесе́ мяте́жна. Плещма́ Свои́ма осени́т тя, и под криле́ Его́ наде́ешися, ору́жием обы́дет тя и́стина Его́. Не убои́шися от стра́ха нощна́го, от стрелы́, летя́щия во дни, от ве́щи, во тьме преходя́щия, от сря́ща и бе́са полу́деннаго. Паде́т от страны́ твоея́ ты́сяща, и тьма одесну́ю тебе́, к тебе́ же не прибли́жится. Оба́че очи́ма твои́ма смо́триши и воздая́ние гре́шников у́зриши. Я́ко Ты, Го́споди, упова́ние мое́, Вы́шняго положи́л еси́ прибе́жище Твое́. Не прии́дет к тебе́ зло, и ра́на не прибли́жится телеси́ твоему́. Я́ко А́нгелом Свои́м запове́сть о тебе́, сохрани́ти тя во всех путе́х твои́х. На рука́х во́змут тя, да не когда́ преткне́ши о ка́мень но́гу твою́. На а́спида и васили́ска насту́пиши, и попере́ши льва и зми́я. Я́ко на Мя упова́, и изба́влю и́; покры́ю и́, я́ко позна́ и́мя Мое́. Воззове́т ко Мне, и услы́шу его́; с ним есмь в ско́рби, изму́ его́ и просла́влю его́. Долгото́ю дней испо́лню его́ и явлю́ ему́ спасе́ние Мое́.

Слава, и ныне: Аллилу́иа, трижды. Го́споди, поми́луй, трижды.

Слава, тропарь, глас 2:

Спасе́ние соде́лал еси́ посреде́ земли́, Христе́ Бо́же, / на Кресте́ пречи́стеи ру́це Твои́ просте́рл еси́, / собира́я вся язы́ки, зову́щия: / Го́споди, сла́ва Тебе́.

И ныне, Богородичен: Я́ко не и́мамы дерзнове́ния за премно́гия грехи́ на́ша, / Ты и́же от Тебе́ Ро́ждшагося моли́, Богоро́дице Де́во, / мно́го бо мо́жет моле́ние Ма́тернее ко благосе́рдию Влады́ки. / Не пре́зри гре́шных мольбы́, Всечи́стая, / я́ко ми́лостив есть и спасти́ моги́й, / И́же и страда́ти о нас изво́ливый.

И поем 3 тропари от двунадесяти, глас 8, повторяюще я.

Сия́ глаго́лет Госпо́дь иуде́ом: / лю́дие Мои́, что сотвори́х вам? / Или́ чим вам стужи́х? / Слепцы́ ва́ша просвети́х, прокаже́нныя очи́стих, / му́жа су́ща на одре́ испра́вих. / Лю́дие Мои́, что сотвори́х вам? / Или́ что Мне возда́сте? / За ма́нну желчь, за во́ду о́цет: / за е́же люби́ти Мя, ко Кресту́ Мя пригвозди́сте. / Ктому́ не терплю́ про́чее, / призову́ Моя́ язы́ки, / и ти́и Мя просла́вят со Отце́м и Ду́хом, / и Аз им да́рую живо́т ве́чный.

Стих: Да́ша в снедь Мою́ желчь, и в жа́жду Мою́ напои́ша Мя о́цта.

Законополо́жницы Изра́илевы, иуде́е и фарисе́е, / лик апо́стольский вопие́т к вам: / се Храм, Его́же вы разори́сте: / се А́гнец, Его́же вы распя́сте, гро́бу преда́сте, / но вла́стию Свое́ю воскре́се. / Не льсти́теся, иуде́е: / Той бо есть, И́же в мо́ри спасы́й, / и в пусты́ни пита́вый. / Той есть Живо́т, и Свет, и Мир ми́рови.

Стих: Спаси́ мя, Бо́же, я́ко внидо́ша во́ды до души́ моея́.

Паки туюжде стихиру.

Слава, глас 5: Прииди́те, христоно́снии лю́дие, / ви́дим, что совеща́ Иу́да преда́тель, / со свяще́нники беззако́нными на Спа́са на́шего: / днесь пови́нна сме́рти, Безсме́ртнаго Сло́ва сотвори́ша, / и Пила́ту преда́вше, на ме́сте ло́бнем распя́ша. / И сия́ стражда́ вопия́ше Спас наш, глаго́ля: / оста́ви им, О́тче, грех сей, / да разуме́ют язы́цы из ме́ртвых Мое́ Воскресе́ние.

И ныне, тойже.

Прокимен, глас 4: Го́споди Госпо́дь наш, / я́ко чу́дно и́мя Твое́ по всей земли́. Стих: Я́ко взя́тся великоле́пие Твое́ превы́ше небе́с.

Пророчества Исаиина чтение [Глава 52].

Та́ко глаго́лет Госпо́дь: се уразуме́ет о́трок Мой, и вознесе́тся и просла́вится зело́. Я́коже ужа́снутся о Тебе́ мно́зи, та́ко обезсла́вится от челове́к вид Твой, и сла́ва Твоя́ от сыно́в челове́ческих. Та́ко удивя́тся язы́цы мно́зи о Нем, и заградя́т ца́рие уста́ своя́: я́ко и́мже не возвести́ся о Нем, у́зрят, и и́же не слы́шаша, уразуме́ют. Го́споди, кто ве́рова слу́ху на́шему? И мы́шца Госпо́дня кому́ откры́ся? Возвести́хом, я́ко Отроча́ пред ним, я́ко ко́рень в земли́ жа́ждущей, несть ви́да Ему́, ниже́ сла́вы: и ви́дехом Его́, и не имя́ше ви́да, ни добро́ты. Но вид Его́ безче́стен, ума́лен па́че всех сыно́в челове́ческих: челове́к в я́зве сый, и ве́дый терпе́ти боле́знь, я́ко отврати́ся Лице́ Его́, безче́стно бысть, и не вмени́ся. Сей грехи́ на́ша но́сит, и о нас боле́знует, и мы вмени́хом Его́ бы́ти в труде́, и в я́зве от Бо́га, и во озлобле́нии. Той же я́звен бысть за грехи́ на́ша, и му́чен бысть за беззако́ния на́ша, наказа́ние ми́ра на́шего на Нем, я́звою Его́ мы исцеле́хом. Вси я́ко о́вцы заблуди́хом: челове́к от пути́ своего́ заблуди́, и Госпо́дь предаде́ Его́ грех ра́ди на́ших. И Той, зане́ озло́блен бысть, и не отверза́ет уст Свои́х: я́ко овча́ на заколе́ние веде́ся, и я́ко а́гнец пред стригу́щим Его́ безгла́сен, та́ко не отверза́ет уст Свои́х. Во смире́нии Его́ суд Его́ взя́тся, род же Его́ кто испове́сть? Я́ко взе́млется от земли́ живо́т Его́, ра́ди беззако́ний люде́й Мои́х веде́ся на смерть. И дам лука́выя вме́сто погребе́ния Его́, и бога́тыя вме́сто сме́рти Его́: я́ко беззако́ния не сотвори́, ниже́ обре́теся лесть во усте́х Его́. И Госпо́дь хо́щет очи́стити Его́ от я́звы: а́ще да́стся о гресе́, душа́ ва́ша у́зрит се́мя долгоживо́тное. И хо́щет Госпо́дь руко́ю Свое́ю отъя́ти боле́знь от души́ Его́, яви́ти Ему́ свет, и созда́ти ра́зумом, оправда́ти пра́веднаго благослужа́ща мно́гим, и грехи́ их Той понесе́т. Сего́ ра́ди Той насле́дит мно́гих, и кре́пких раздели́т коры́сти: зане́ предана́ бысть на смерть душа́ Его́, и со беззако́нными вмени́ся, и Той грехи́ мно́гих вознесе́, и за беззако́ния их пре́дан бысть. Возвесели́ся, непло́ды неражда́ющая, возгласи́ и возопи́й, нечревоболе́вшая, я́ко мно́га ча́да пусты́я па́че, не́жели иму́щая му́жа.

Апостол ко Евреем, зачало 306:

Бра́тие, святя́й и освяща́емии от Еди́наго вси: ея́же ра́ди вины́ не стыди́тся бра́тию нарица́ти их, глаго́ля: Возвещу́ и́мя Твое́ бра́тии Мое́й, посреде́ Це́ркве воспою́ Тя. И па́ки: Аз бу́ду наде́яся Нань. И па́ки: се Аз и де́ти, я́же Ми дал есть Бог. Поне́же у́бо де́ти приобщи́шася пло́ти и кро́ви, и Той прии́скренне приобщи́ся те́хже, да сме́ртию упраздни́т иму́щаго держа́ву сме́рти, си́речь диа́вола. И изба́вит сих, ели́цы стра́хом сме́рти чрез все житие́ пови́нни бе́ша рабо́те. Не от А́нгел у́бо когда́ прие́млет, но от Се́мене Авраа́мова прие́млет. Отню́дуже до́лжен бе по всему́ подо́битися бра́тии, да ми́лостив бу́дет и ве́рен первосвяще́нник в тех, я́же к Бо́гу, во е́же очи́стити грехи́ людски́я. В не́мже бо пострада́, Сам искуше́н быв, мо́жет и искуша́емым помощи́.

Таже Евангелие от Луки, зачало 111:

Во вре́мя о́но, ведя́ху со Иису́сом и и́на два злоде́я с Ним уби́ти. И егда́ приидо́ша на ме́сто, нарица́емое Ло́бное, ту распя́ша Его́ и злоде́я, о́ваго у́бо одесну́ю, а друга́го ошу́юю. Иису́с же глаго́лаше: О́тче, отпусти́ им: не ве́дят бо что творя́т. Разделя́юще же ри́зы Его́, мета́ху жре́бия. И стоя́ху лю́дие зря́ще. Руга́хуся же и кня́зи с ни́ми, глаго́люще: ины́я спасе́, да спасе́т и Себе́, а́ще Той есть Христо́с Бо́жий избра́нный. Руга́хуся же Ему́ и во́ини, приступа́юще, и о́цет приде́юще Ему́. И глаго́лаху: а́ще Ты еси́ Царь Иуде́йск, спаси́ся Сам. Бе же и написа́ние напи́сано над Ним писмены́ е́ллинскими, и ри́мскими, и евре́йскими: Сей есть Царь Иуде́йск. Еди́н же от обе́шеною злоде́ю ху́ляше Его́, глаго́ля: а́ще Ты еси́ Христо́с, спаси́ Себе́ и на́ю. Отвеща́в же други́й, преща́ше ему́, глаго́ля: ни ли ты бои́шися Бо́га, я́ко в то́мже осужде́н еси́? И мы у́бо в пра́вду: досто́йная бо по дело́м на́ю восприе́млева: Сей же ни еди́наго зла сотвори́. И глаго́лаше Иису́сови: помяни́ мя, Го́споди, егда́ прии́деши во Ца́рствии Си. И рече́ ему́ Иису́с: ами́нь глаго́лю тебе́, днесь со Мно́ю бу́деши в раи́. Бе же час я́ко шесты́й, и тьма бысть по всей земли́ до часа́ девя́таго. И поме́рче со́лнце, и заве́са церко́вная раздра́ся посреде́. И возгла́шь гла́сом ве́лиим Иису́с, рече́: О́тче, в ру́це Твои́ предаю́ дух Мой. И сия́ рек и́здше. Ви́дев же со́тник бы́вшее, просла́ви Бо́га, глаго́ля: вои́стинну Челове́к Сей пра́веден бе. И вси прише́дшии наро́ди на позо́р сей, ви́дяще быва́ющая, бию́ще пе́рси своя́, возвраща́хуся. Стоя́ху же вси зна́емии Его́ издале́ча, и жены́ спосле́дствовавшия Ему́ от Галиле́и, зря́ще сих.

И посем чтение. Таже Ско́ро да предваря́т ны: Трисвятое. По О́тче наш: Кондак: Нас ра́ди Распя́таго: Го́споди, поми́луй, 40. И молитва: И́же на вся́кое вре́мя: Го́споди, поми́луй, трижды. Сла́ва, и ны́не: Честне́йшую Херуви́м: И́менем Госпо́дним благослови́, о́тче. Священник: Бо́же, уще́дри ны:

Таже молитва святаго Великаго Василиа:

Бо́же и Го́споди Сил, и всея́ тва́ри Соде́телю, И́же за милосе́рдие безприкла́дныя ми́лости Твоея́, Единоро́днаго Сы́на Твоего́, Го́спода на́шего Иису́са Христа́, низпосла́вый на спасе́ние ро́да на́шего, и Честны́м Его́ Кресто́м, рукописа́ние грех на́ших растерза́вый и победи́вый тем нача́ла и вла́сти тьмы. Сам, Влады́ко Человеколю́бче, приими́ и нас гре́шных благода́рственныя сия́ и моле́бныя моли́твы, и изба́ви нас от вся́каго всегуби́тельнаго и мра́чнаго прегреше́ния, и всех озло́бити нас и́щущих, ви́димых и неви́димых враг. Пригвозди́ стра́ху Твоему́ пло́ти на́ша, и не уклони́ серде́ц на́ших в словеса́, или́ помышле́ния лука́вствия, но любо́вию Твое́ю уязви́ ду́ши на́ша, да, к Тебе́ всегда́ взира́юще, и е́же от Тебе́ све́том наставля́еми, Тебе́ непристу́пнаго и присносу́щнаго зря́ще Све́та, непреста́нное Тебе́ испове́дание и благодаре́ние возсыла́ем Безнача́льному Отцу́, со Единоро́дным Твои́м Сы́ном, и Всесвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.

СОВОКУПЛЯЕМ ЖЕ И ДЕВЯТЫЙ ЧАС.

Глаголем: Прииди́те, поклони́мся: трижды.

Псалом 68:

Спаси́, мя, Бо́же, я́ко внидо́ша во́ды до души́ моея́. Углебо́х в тиме́нии глубины́, и несть постоя́ния. Приидо́х во глубины́ морски́я, и бу́ря потопи́ мя. Утруди́хся зовы́й, измолче́ горта́нь мой, исчезо́сте о́чи мои́, от е́же упова́ти ми на Бо́га моего́. Умно́жишася па́че влас главы́ моея́ ненави́дящии мя ту́не, укрепи́шася врази́ мои́, изгоня́щии мя непра́ведно: я́же не восхища́х, тогда́ воздая́х. Бо́же, Ты уве́дел еси́ безу́мие мое́, и прегреше́ния моя́ от Тебе́ не утаи́шася. Да не постыдя́тся о мне терпя́щии Тебе́, Го́споди, Го́споди сил, ниже́ да посра́мятся о мне и́щущии Тебе́, Бо́же Изра́илев. Я́ко Тебе́ ра́ди претерпе́х поноше́ние, покры́ срамота́ лице́ мое́. Чуждь бых бра́тии мое́й, и стра́нен сыново́м ма́тepe моея́. Я́ко ре́вность до́му Твоего́ снеде́ мя, и поноше́ния понося́щих Ти нападо́ша на мя. И покры́х посто́м ду́шу мою́, и бысть в поноше́ние мне. И положи́х одея́ние мое́ вре́тище, и бых им в при́тчу. О мне глумля́хуся седя́щии во врате́х, и о мне поя́ху пию́щии вино́. Аз же моли́твою мое́ю к Тебе́, Бо́же, вре́мя благоволе́ния; Бо́же, во мно́жестве ми́лости Твоея́ услы́ши мя, во и́стине спасе́ния Твоего́. Спаси́ мя от бре́ния, да не угле́бну, да изба́влюся от ненави́дящих мя и от глубо́ких вод. Да не потопи́т мене́ бу́ря водна́я, ниже́ да пожре́т мене́ глубина́, ниже́ сведе́т о мне рове́нник уст свои́х. Услы́ши мя, Го́споди, я́ко бла́га ми́лость Твоя́, по мно́жеству щедро́т Твои́х при́зри на мя. Не отврати́ лица́ Твоего́ от о́трока Твоего́, я́ко скорблю́, ско́ро услы́ши мя. Вонми́ души́ мое́й, и изба́ви ю́; враг мои́х ра́ди изба́ви мя. Ты бо ве́си поноше́ние мое́, и студ мой, и срамоту́ мою́, пред Тобо́ю вси оскорбля́ющии мя. Поноше́ние ча́яше душа́ моя́ и страсть; и ждах соскорбя́щаго, и не бе́, и утеша́ющих, и не обрето́х. И да́ша в снедь мою́ желчь, и в жа́жду мою́ напои́ша мя о́цта. Да бу́дет трапе́за их пред ни́ми в сеть, и в воздая́ние, и в собла́зн. Да помрача́тся о́чи их, е́же не ви́дети, и хребе́т их вы́ну сляцы́. Проле́й на ня гнев Твой, и я́рость гне́ва Твоего́ да пости́гнет их. Да бу́дет двор их пуст, и в жили́щах их да не бу́дет живы́й. Зане́ его́же Ты порази́л еси́, ти́и погна́ша, и к боле́зни язв мои́х приложи́ша. Приложи́ беззако́ние к беззако́нию их, и да не вни́дут в пра́вду Твою́. Да потребя́тся от кни́ги живы́х, и с пра́ведными да не напи́шутся. Нищ и боля́й есмь аз, спасе́ние Твое́, Бо́же, да прии́мет мя. Восхвалю́ и́мя Бо́га моего́ с пе́снию, возвели́чу Его́ во хвале́нии. И уго́дно бу́дет Бо́гу па́че тельца́ ю́на, ро́ги износя́ща и па́знокти. Да у́зрят ни́щии и возвеселя́тся: взыщи́те Бо́га, и жива́ бу́дет душа́ ва́ша. Я́ко услы́ша убо́гия Госпо́дь, и окова́нныя Своя́ не уничижи́. Да восхва́лят Его́ небеса́ и земля́, мо́ре и вся живу́щая в нем. Я́ко Бог спасе́т Сио́на, и сози́ждутся гра́ди Иуде́йстии, и вселя́тся та́мо, и насле́дят и́. И се́мя рабо́в Твои́х удержи́т и́, и лю́бящии и́мя Твое́ вселя́тся в нем.

Псалом 69:

Бо́же, в по́мощь мою́ вонми́, Го́споди, помощи́ ми потщи́ся. Да постыдя́тся и посра́мятся и́щущии ду́шу мою́, да возвратя́тся вспять, и постыдя́тся хотя́щии ми зла́я. Да возвратя́тся а́бие стыдя́щеся, глаго́лющии ми: бла́гоже, бла́гоже. Да возра́дуются и возвеселя́тся о Тебе́ вси и́щущии Тебе́, Бо́же, и да глаго́лют вы́ну, да возвели́чится Госпо́дь, лю́бящии спасе́ние Твое́. Аз же нищ есмь и убог. Бо́же, помози́ ми, Помо́щник мой, и Изба́витель мой еси́ Ты, Го́споди, не закосни́.

Псалом 85:

Приклони́, Го́споди, у́хо Твое́ и услы́ши мя, я́ко нищ и убо́г есмь аз. Сохрани́ ду́шу мою́, я́ко преподо́бен есмь; спаси́ раба́ Твоего́, Бо́же мой, упова́ющаго на Тя. Поми́луй мя, Го́споди, я́ко к Тебе́ воззову́ весь день. Возвесели́ ду́шу раба́ Твоего́, я́ко к Тебе́ взях ду́шу мою́. Я́ко Ты, Го́споди, благ, и кро́ток, и многоми́лостив всем, призыва́ющим Тя. Внуши́, Го́споди, моли́тву мою́, и вонми́ гла́су моле́ния моего́. В день ско́рби моея́ воззва́х к Тебе́, я́ко услы́шал мя еси́. Несть подо́бен Тебе́ в бозе́х, Го́споди, и несть по дело́м Твои́м. Вси язы́цы, ели́ки сотвори́л еси́, прии́дут, и покло́нятся пред Тобо́ю, Го́споди, и просла́вят И́мя Твое́, я́ко ве́лий еси́ Ты, и творя́й чудеса́, Ты еси́ Бог еди́н. Наста́ви мя, Го́споди, на путь Твой, и пойду́ во и́стине Твое́й: да возвесели́тся се́рдце мое́ боя́тися И́мене Твоего́. Испове́мся Тебе́, Го́споди Бо́же мой, всем се́рдцем мои́м и просла́влю И́мя Твое́ в век. Я́ко ми́лость Твоя́ ве́лия на мне, и изба́вил еси́ ду́шу мою́ от а́да преиспо́днейшаго. Бо́же, законопресту́пницы воста́ша на мя, и сонм держа́вных взыска́ша ду́шу мою́, и не предложи́ша Тебе́ пред собо́ю. И Ты, Го́споди Бо́же мой, ще́дрый и ми́лостивый, долготерпели́вый, и многоми́лостивый, и и́стинный, при́зри на мя и поми́луй мя, даждь держа́ву Твою́ о́троку Твоему́, и спаси́ сы́на рабы́ Твоея́. Сотвори́ со мно́ю зна́мение во бла́го, и да ви́дят ненави́дящии мя и постыдя́тся, я́ко Ты, Го́споди, помо́гл ми, и уте́шил мя еси́.

Слава, и ныне, Аллилу́иа, трижды. Го́споди, поми́луй, трижды.

Слава, тропарь, глас 8:

Ви́дя разбо́йник / Нача́льника Жи́зни на Кресте́ ви́сяща, глаго́лаше: / а́ще не бы Бог был вопло́щся, И́же с на́ми распны́йся, / не бы со́лнце лучи́ [своя́] потаи́ло, / ниже́ бы земля́ трепе́щущи трясла́ся. / Но вся терпя́й, помяни́ мя, Го́споди, во Ца́рствии Твое́м.

И ныне, Богородичен: И́же нас ра́ди рожде́йся от Де́вы / и распя́тие претерпе́в, Благи́й, / испрове́ргий сме́ртию смерть и воскресе́ние явле́й я́ко Бог, / не пре́зри, я́же созда́л еси́ руко́ю Твое́ю. / Яви́ человеколю́бие Твое́, Ми́лостиве. / Приими́ ро́ждшую Тя Богоро́дицу, моля́щуюся за ны. / И спаси́, Спа́се наш, лю́ди отча́янныя.

И поем тропари три от двунадесяти, глас 7:

У́жас бе ви́дети? / небесе́ и земли́ Творца́ на Кресте́ ви́сяща, / со́лнце поме́ркшее, день же па́ки в нощь прело́жшийся, / и зе́млю из гробо́в возсыла́ющу телеса́ ме́ртвых: / с ни́миже покланя́емся Тебе́, спаси́ нас. (2)

Стих: Раздели́ша ри́зы Моя́ себе́, / и о оде́жди Мое́й мета́ша жре́бий.

Глас 2: Егда́ на Кресте́ пригвозди́ша беззако́ннии Го́спода сла́вы, вопия́ше к ним: / чим вас оскорби́х? Или́ о чем прогне́вах? / Пре́жде Мене́ кто вас изба́ви от ско́рби? / И ны́не что Мне воздаете́, злая за блага́я? / За столп о́гненный, на Кресте́ Мя пригвозди́сте: / за о́блак, гроб Мне ископа́сте: / за ма́нну, желчь Мне принесо́сте: / за во́ду, о́цтом Мя напои́сте. / Про́чее призову́ язы́ки, / и ти́и Мя просла́вят / со Отце́м и со Святы́м Ду́хом.

Стих: Да́ша в снедь Мою́ желчь, / и в жа́жду Мою́ напои́ша Мя о́цта.

И паки тойже.

Слава, глас 6: Днесь ви́сит на дре́ве, / И́же на вода́х зе́млю пове́сивый: / венце́м от те́рния облага́ется, / И́же а́нгелов Царь: / в ло́жную багряни́цу облачи́тся, / одева́яй не́бо о́блаки: / зауше́ние прия́т, И́же во Иорда́не свободи́вый Ада́ма: / гвоздьми́ пригвозди́ся Жени́х Церко́вный: / копие́м прободе́ся Сын Де́выя. / Покланя́емся Cтрасте́м Твои́м, Христе́. / Покланя́емся Страсте́м Твои́м, Христе́. / Покланя́емся Cтрасте́м Твои́м, Христе́. / Покажи́ нам и сла́вное Твое́ Воскресе́ние.

И ныне, тойже.

Прокимен, глас 6: Рече́ безу́мен в се́рдце свое́м: / несть Бог. Стих: Несть творя́й благосты́ню, несть до еди́наго.

Пророчества Иеремиина чтение. [Глава 11, ст. 18 – 23: глава 12, ст. 1 – 15]

Го́споди, скажи́ ми, и уразуме́ю: тогда́ ви́дех начина́ния их. Аз же я́ко а́гня незло́бивое ведо́мое на заколе́ние не разуме́х, я́ко на мя помы́слиша по́мысл лука́вый, глаго́люще: прииди́те и вложи́м дре́во в хлеб его́, и истреби́м его́ от земли́ живу́щих, и и́мя его́ да не помяне́тся ктому́. Госпо́дь Савао́ф, судя́й пра́ведно, испыту́яй сердца́ и утро́бы, да ви́жду мще́ние Твое́ на них, я́ко к Тебе́ откры́х оправда́ние мое́. Сего́ ра́ди сия́ глаго́лет Госпо́дь на му́жы Анафо́фски и́щущия души́ моея́, глаго́лющия: да не проро́чествуеши о и́мени Госпо́дни: а́ще ли же ни, у́мреши в рука́х на́ших. Сего́ ра́ди сия́ глаго́лет Госпо́дь сил: се Аз посещу́ на них: ю́ноши их мече́м у́мрут, и сы́нове их и дще́ри их сконча́ются гла́дом. И оста́нка не бу́дет от них, наведу́ бо зла́я на живу́щия во Анафо́фе, в ле́то посеще́ния их. Пра́веден еси́ Го́споди, я́ко отвеща́ю к Тебе́, оба́че судьбы́ возглаго́лю к Тебе́: что я́ко путь нечести́вых спе́ется? Угобзи́шася вси творя́щии беззако́ния? Насади́л еси́ их, и укорени́шася: ча́да сотвори́ша, и сотвори́ша плод: близ еси́ Ты уст их, дале́че же от утро́б их. И Ты, Го́споди, разуме́еши мя, ви́дел мя еси́, и искуси́л еси́ се́рдце мое́ пред Тобо́ю, собери́ их я́ко о́вцы на заколе́ние, и очи́сти их в день заколе́ния их. Доко́ле пла́кати и́мать земля́, и трава́ вся се́льная и́зсхнет от зло́бы живу́щих на ней? Погибо́ша ско́ти и пти́цы, я́ко реко́ша: не у́зрит Бог путе́й на́ших. Но́зи твои́ теку́т, и разслабля́ют тя. Иди́те, собери́те вся зве́ри се́льныя, и да прии́дут сне́сти е́. Па́стырие мно́зи растли́ша виногра́д Мой, оскверни́ша часть Мою́, да́ша часть жела́емую Мою́ в пусты́ню непрохо́дную. Положи́ша в потребле́ние па́губы. Я́ко сия́ глаго́лет Госпо́дь о всех сосе́дех лука́вых, прикаса́ющихся насле́дию Моему́, е́же раздели́х лю́дем Мои́м Изра́илю: се Аз исто́ргну их от земли́ их, и дом Иу́дин изве́ргну от среды́ их. И бу́дет егда́ исто́ргну их, обращу́ся и поми́лую их, и вселю́ их, кого́ждо в достоя́ние свое́, и кого́ждо в зе́млю свою́.

Апостол ко Евреем, зачало 324:

Бра́тие, иму́ще дерзнове́ние входи́ти во свята́я Кро́вию Иису́с Христо́вою, путе́м но́вым и живы́м, его́же обнови́л есть нам заве́сою, си́речь пло́тию Свое́ю, и Иере́а вели́ка над до́мом Бо́жиим. Да приступа́ем со и́стинным се́рдцем во извеще́нии ве́ры, окропле́ни сердца́ от со́вести лука́выя, и измове́ни телеса́ водо́ю чи́стою. Да держи́м испове́дание упова́ния неукло́нное: ве́рен бо есть Обеща́вый. И да разумева́ем друг дру́га в поощре́нии любве́ и до́брых дел. Не оставля́юще собра́ния своего́, я́коже есть не́ким обы́чай, но (друг дру́га) подвиза́юще: и толи́ка па́че, ели́ко ви́дите приближа́ющся день (су́дный). Во́лею бо согреша́ющим нам по прия́тии ра́зума и́стины, ктому́ о гресе́х не обрета́ется же́ртва. Стра́шно же не́кое ча́яние суда́, и огня́ ре́вность, поя́сти хотя́щаго сопроти́вныя. Отве́рглся кто зако́на Моисе́ова, без милосе́рдия при двою́ или́ трие́х свиде́телех умира́ет. Коли́ко, мните́, го́ршия сподо́бится му́ки, и́же Сы́на Бо́жия попра́вый, и Кровь заве́тную скве́рну возмни́в, в не́йже освяти́ся, и Ду́ха благода́ти укори́вый. Ве́мы бо Ре́кшаго: Мне отмще́ние, Аз возда́м, глаго́лет Госпо́дь. И па́ки: я́ко су́дит Госпо́дь лю́дем Свои́м. Стра́шно есть е́же впа́сти в ру́це Бо́га Жива́го.

Евангелие от Иоанна, зачало 59, 60, 61:

Во вре́мя о́но, ведо́ша Иису́са от Каиа́фы в прето́р. Бе же у́тро: и ти́и не внидо́ша в прето́р, да не оскверня́тся, но да ядя́т фа́ску. Изы́де же Пила́т к ним вон, и рече́: ку́ю речь прино́сите на Челове́ка Сего́? Отвеща́ша и ре́ша ему́: а́ще не бы был Сей злоде́й, не бы́хом пре́дали Его́ тебе́. Рече́ же им Пила́т: поими́те Его́ вы, и по зако́ну ва́шему суди́те Ему́. Ре́ша же ему́ иуде́е: нам не досто́ит уби́ти никого́же. Да сло́во Иису́сово сбу́дется, е́же рече́, назна́менуя, ко́ею сме́ртию хотя́ше умре́ти. Вни́де у́бо па́ки Пила́т в прето́р, и гласи́ Иису́са, и рече́ Ему́: Ты ли еси́ Царь Иуде́йск? Отвеща́ ему́ Иису́с: о себе́ ли ты сие́ глаго́леши, или́ ини́и тебе́ реко́ша о Мне? Отвеща́ Пила́т: еда́ аз жидови́н есмь? Род Твой и архиере́е преда́ша Тя мне, что еси́ сотвори́л? Отвеща́ Иису́с: Ца́рство Мое́ несть от ми́ра сего́; а́ще от ми́ра сего́ бы́ло бы Ца́рство Мое́, слуги́ Мои́ у́бо подвиза́лися бы́ша, да не пре́дан бых был иуде́ом. Ны́не же Ца́рство Мое́ несть отсю́ду. Рече́ же Ему́ Пила́т: у́бо Царь ли еси́ Ты? Отвеща́ Иису́с: ты глаго́леши, я́ко Царь есмь Аз. Аз на сие́ роди́хся, и на сие́ приидо́х в мир, да свиде́тельствую и́стину: и всяк, и́же есть от и́стины, послу́шает гла́са Моего́. Глаго́ла Ему́ Пила́т: что есть и́стина? И сие́ рек, па́ки изы́де ко иуде́ом, и глаго́ла им: аз ни еди́ныя вины́ обрета́ю в Нем. Есть же обы́чай вам, да еди́наго вам отпущу́ на Па́сху: хо́щете ли у́бо, да отпущу́ вам Царя́ Иуде́йска? Возопи́ша же па́ки вси, глаго́люще: не Сего́, но Вара́вву. Бе же Вара́вва разбо́йник.

Тогда́ у́бо Пила́т поя́т Иису́са, и би Его́. И во́ини спле́тше вене́ц от те́рния, возложи́ша Ему́ на главу́, и в ри́зу багря́ну облеко́ша Его́. И глаго́лаху: ра́дуйся, Царю́ Иуде́йский. И бия́ху Его́ по лани́тома. Изы́де у́бо па́ки вон Пила́т, и глаго́ла им: се извожду́ Его́ вам вон, да разуме́ете, я́ко в Нем ни еди́ныя вины́ обрета́ю. Изы́де же вон Иису́с, нося́ тернове́н вене́ц, и багря́ну ри́зу. И глаго́ла им: се Челове́к. Егда́ же ви́деша Его́ архиере́е и слуги́, возопи́ша глаго́люще: распни́, распни́ Его́. Глаго́ла им Пила́т: поими́те Его́ вы, и распни́те. Аз бо не обрета́ю в Нем вины́. Отвеща́ша ему́ иуде́е: мы зако́н и́мамы, и по зако́ну на́шему до́лжен есть умре́ти, я́ко Себе́ Сы́на Бо́жия сотвори́. Егда́ же слы́ша Пила́т сие́ сло́во, па́че убоя́ся. И вни́де в прето́р па́ки, и глаго́ла Иису́сови: отку́ду еси́ Ты? Иису́с же ответа́ не даде́ ему́. Глаго́ла же Ему́ Пила́т: мне ли не глаго́леши? Не ве́си ли, я́ко власть и́мам распя́ти Тя, и власть и́мам пусти́ти Тя? Отвеща́ Иису́с: не и́маши вла́сти ни еди́ныя на Мне, аще не бы ти дано́ свы́ше: сего́ ра́ди предавый Мя тебе́, бо́лий грех и́мать. От сего́ иска́ше Пила́т пусти́ти Его́. Иуде́е же вопия́ху, глаго́люще: а́ще Сего́ пу́стиши, не́си друг ке́сарев. Всяк, и́же царя́ себе́ творя́й, проти́вится ке́сарю. Пила́т же слы́шав сие́ сло́во, изведе́ вон Иису́са, и се́де на суди́щи, на ме́сте глаго́лемем Лифострото́н, евре́йски же Гавва́фа. Бе же пято́к Па́сце, час же я́ко шесты́й. И глаго́ла Иуде́ом: се Царь ваш. Они́ же вопия́ху: возми́, возми́, распни́ Его́. Глаго́ла им Пила́т: Царя́ ли ва́шего распну́? Отвеща́ша архиере́е: не и́мамы царя́, то́кмо ке́саря. Тогда́ же предаде́ Его́ им, да ра́спнется. Пое́мше же Иисуса, и ведо́ша. И нося́ крест Свой, изы́де в глаго́лемое Ло́бное ме́сто, е́же глаго́лется евре́йски Голго́фа. Иде́же пропя́ша Его́ и с Ним и́на два, сю́ду и сю́ду, посреде́ же Иису́са. Написа́ же и ти́тла Пила́т, и положи́ на кресте́. Бе же напи́сано: Иису́с Назоряни́н, Царь Иуде́йский. Сего́ же ти́тла мно́зи что́ша от Иуде́й, я́ко близ бе ме́сто гра́да, иде́же пропя́ша Иису́са. И бе напи́сано: евре́йски, гре́чески, ри́мски. Глаго́лаху же Пила́ту архиере́е иуде́йстии: не пиши́, Царь Иуде́йский, но я́ко Сам рече́: Царь есмь Иуде́йский. Отвеща́ Пила́т: е́же писа́х, писа́х. Во́ини же, егда́ пропя́ша Иису́са, прия́ша ри́зы Его́, и сотвори́ша четы́ри ча́сти, коему́ждо во́ину часть, и хито́н. Бе же хито́н не швен, свы́ше истка́н весь. Ре́ша же к себе́: не предере́м его́, но ме́тнем жре́бия о нем, кому́ бу́дет: да сбу́дется Писа́ние, глаго́лющее: раздели́ша ри́зы Моя́ себе́, и о имати́сме Мое́й мета́ша жре́бия. Во́ини же у́бо сия́ сотвори́ша. Стоя́ху же при кресте́ Иису́сове Ма́ти Его́ и сестра́ Ма́тере Его́, Мари́я Клео́пова, и Мари́я Магдали́на. Иису́с же ви́дев Ма́терь, и ученика́ стоя́ща, его́же любля́ше, глаго́ла Ма́тери Свое́й: Же́но, се сын Твой. Пото́м же глаго́ла ученику́: се Ма́ти твоя́. И от того́ часа́ поя́т Ю учени́к во своя́ си. Посе́м ве́дый Иису́с, я́ко вся уже́ соверши́шася, да сбу́дется Писа́ние, глаго́ла: жа́жду. Сосу́д же стоя́ше полн о́цта. Они же испо́лнивше гу́бу о́цта, и на трость во́нзше, приде́ша ко усто́м Его́. Егда́ же прия́т о́цет Иису́с, рече́: соверши́шася, и прикло́нь главу́, предаде́ дух. Иуде́е же, поне́же пято́к бе, да не оста́нут на кресте́ телеса́ в суббо́ту, бе бо вели́к день тоя́ суббо́ты, моли́ша Пила́та, да пребию́т го́лени их, и во́змут. Приидо́ша же во́ини, и пе́рвому у́бо преби́ша го́лени, и друго́му распя́тому с Ним. На Иису́са же прише́дше, я́ко ви́деша Его́ уже́ уме́рша, не преби́ша Ему́ го́лений. Но еди́н от во́ин копие́м ре́бра Ему́ прободе́, и а́бие изы́де кровь и вода́. И ви́девый свиде́телствова, и и́стинно есть свиде́тельство его́, и той весть, я́ко и́стину глаго́лет, да вы ве́ру и́мете. Бы́ша бо сия́, да сбу́дется Писа́ние: кость не сокруши́тся от Него́. И па́ки друго́е Писа́ние глаго́лет: воззря́т Нань, Его́же прободо́ша.

Таже предлагается чтение: Слово крестное. Таже Не преда́ждь нас до конца́: Трисвятое. По О́тче наш: Кондак Нас ра́ди Распя́таго: Го́споди, поми́луй, 40. Молитва: И́же на вся́кое вре́мя: Го́споди, поми́луй, трижды. Сла́ва, и ны́не: Честне́йшую Херуви́м: И́менем Госпо́дним благослови́, о́тче. Иерей: Бо́же, уще́дри ны:

И молитва:

Влады́ко Го́споди Иису́се Христе́ Бо́же наш, долготерпе́вый о на́ших согреше́ниих, и да́же до ны́нешняго часа́ приведы́й нас, во́ньже на животворя́щем дре́ве ви́ся, благоразу́мному разбо́йнику, и́же в рай путесотвори́л еси́ вход, и сме́ртию смерть разруши́л еси́, очи́сти нас гре́шных, и недосто́йных раб Твои́х: согреши́хом бо и беззако́нновахом, и не́смы досто́йни возвести́ очеса́ на́ша, и воззре́ти на высоту́ небе́сную, зане́ оста́вихом путь пра́вды Твоея́, и ходи́хом в во́лях серде́ц на́ших. Но мо́лим Твою́ безме́рную бла́гость, пощади́ нас, Го́споди, по мно́жеству ми́лости Твоея́, и спаси́ нас и́мене Твоего́ ра́ди свята́го, я́ко исчезо́ша в суете́ дни́е на́ши. Изми́ нас из руки́ сопроти́внаго, и оста́ви нам грехи́ на́ша, и умертви́ плотско́е на́ше мудрова́ние, да ве́тхаго отложи́вше челове́ка, в но́ваго облеце́мся, и Тебе́ поживе́м на́шему Влады́це и Благоде́телю: и та́ко Твои́м после́дующе повеле́нием, в ве́чный поко́й дости́гнем, иде́же есть всех веселя́щихся жили́ще. Ты бо еси́ вои́стинну и́стинное весе́лие, и ра́дость лю́бящих Тя, Христе́ Бо́же наш, и Тебе́ сла́ву возсыла́ем, со Безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.

Таже блаженны скоро: Во Ца́рствии Твое́м, егда́ прии́деши: Сла́ва, и ны́не: Помяни́ нас, Го́споди: Лик небе́сный: Сла́ва: Лик святы́х А́нгел: И ны́не: Ве́рую во Еди́наго Бо́га: Осла́би, оста́ви: Посем О́тче наш: И кондак: Нас ра́ди Распя́таго: Го́споди, поми́луй, 40. И молитва: Всесвята́я Тро́ице: Таже Бу́ди и́мя Госпо́дне: трижды. Сла́ва, и ны́не: Благословлю́ Го́спода на вся́кое вре́мя: И отпуст.

Подобает же и сие ведати, яко прияхом в Палестине, в сей святый день Великаго Пятка, не творити Преждесвященную, ниже паки совершенную Литургию, но ниже трапезу поставляем, ниже ядим в сей день распятия. Аще же кто будет многонемощен, или престарелся, и не могий пребыти постен, дается ему хлеб и вода, по захождении солнца. Сице бо прияхом от святых заповедей святых апостол, не ясти в Великий Пяток. Господне бо слово, еже рече к фарисеем Господь: яко егда отымется от них Жених, тогда постятся в тыя дни. Зде блаженнейшии апостоли восприяша, и сие обрящеши во апостольских преданиих, внимательно сия проходя. Но и правильное послание святейшаго архиепископа Александрийскаго Дионисиа яве сие предпоставляет.

ВО СВЯТЫЙ И ВЕЛИКИЙ ПЯТОК ВЕЧЕРА

О десятом часе дне клеплет. И благословившу священнику, начинающуся светильничному, на Го́споди, воззва́х, поставим стихов 6: И поем стихиры самогласны.

Глас 1: Вся тварь изменя́шеся стра́хом, / зря́щи Тя на Кресте́ ви́сима, Христе́: / со́лнце омрача́шеся, и земли́ основа́ния сотряса́хуся, / вся сострада́ху Созда́вшему вся. / Во́лею нас ра́ди претерпе́вый / Го́споди, сла́ва Тебе́. (2)

Глас 2: Лю́дие злочести́вии и беззако́ннии, / вску́ю поуча́ются тще́тным? / Вску́ю Живота́ всех на смерть осуди́ша? / Ве́лие чу́до, / я́ко Созда́тель ми́ра в ру́ки беззако́нных предае́тся, / и на дре́во возвыша́ется Человеколю́бец, / да я́же во а́де у́зники свободи́т, зову́щия: / Долготерпели́ве Го́споди, сла́ва Тебе́.

Днесь, зря́щи Тя, Непоро́чная Де́ва, / на Кресте́ Сло́ве возвыша́ема, / рыда́ющи ма́тернею утро́бою, / уязвля́шеся се́рдцем го́рце, / и стеня́щи боле́зненно из глубины́ души́, / лице́ со власы́ терза́ющи. / Те́мже и пе́рси бию́щи, взыва́ше жа́лостно: / увы́ Мне, Боже́ственное Ча́до! / Увы́ Мне, Све́те ми́ра! / Что заше́л еси́ от о́чию Мое́ю, А́гнче Бо́жий? / Те́мже во́инства безпло́тных, / тре́петом содержи́ми бя́ху, глаго́люще: / Непостижи́ме Го́споди, сла́ва Тебе́.

На дре́ве ви́дящи ви́сима, Христе́, / Тебе́ всех Зижди́теля и Бо́га, / безсе́менно Ро́ждшая Тя вопия́ше го́рько: / Сы́не Мой, где добро́та за́йде зра́ка Твоего́? / Не терплю́ зре́ти Тя непра́ведно распина́ема. / Потщи́ся у́бо, воста́ни, я́ко да ви́жу и Аз / Твое́ из ме́ртвых тридне́вное Воскресе́ние.

Глас 6: Днесь Влады́ка тва́ри предстои́т Пила́ту, / и Кресту́ предае́тся Зижди́тель всех, / я́ко а́гнец приводи́мь Свое́ю во́лею: / гвоздьми́ пригвожда́ется, и в ре́бра пробода́ется, / и гу́бою напоя́ется ма́нну одожди́вый, / по лани́те зауша́ется Изба́витель ми́ра, / и от Свои́х раб поруга́ется Созда́тель всех. / О Влады́чняго Человеколю́бия! / О распина́ющих моля́ше Своего́ Отца́, глаго́ля: О́тче, / оста́ви им грех сей: / не ве́дят бо беззако́ннии, / что непра́ведное содева́ют.

Слава, глас тойже: О ка́ко беззако́нное со́нмище, / Царя́ тва́ри осуди́ на смерть, / не устыде́вся благодея́ния, / я́же воспомина́я предутвержда́ше, глаго́ля к ним: / лю́дие Мои́, что сотвори́х вам? / Не чуде́с ли испо́лних Иуде́ю? / Не мертвецы́ ли воскреси́х еди́нем сло́вом? / Не вся́кую ли боле́знь исцели́х и неду́г? / Что у́бо Ми воздаете́? / Вску́ю не по́мните Мя? / За исцеле́ния ра́ны Мне наложи́вше, / за живо́т умерщвля́юще, / ве́шающе на дре́ве, я́ко злоде́я, Благоде́теля: / я́ко беззако́нна, Законода́вца: / я́ко осужде́нна, всех Царя́. / Долготерпели́ве Го́споди, сла́ва Тебе́.

И ныне, глас тойже: Стра́шное и пресла́вное та́инство днесь де́йствуемо зри́тся: / неосяза́емый удержава́ется: / вя́жется, разреша́яй Ада́ма от кля́твы: / испыту́яй сердца́ и утро́бы, непра́ведно испыту́ется: / в темни́це затворя́ется, И́же бе́здну затвори́вый: / Пила́ту предстои́т, Ему́же тре́петом предстоя́т небе́сныя си́лы: / зауша́ется руко́ю созда́ния Созда́тель: / на дре́во осужда́ется, судя́й живы́м и ме́ртвым: / во гро́бе заключа́ется Разори́тель а́да. / И́же вся терпя́й милосе́рдно / и всех спасы́й от кля́твы, / Незло́биве Го́споди, сла́ва Тебе́.

Вход со Евангелием. Све́те ти́хий:

Прокимен, глас 4: Раздели́ша ри́зы Моя́ себе́, / и о оде́жди Мое́й мета́ша жре́бий. Стих: Бо́же, Бо́же Мой, вонми́ Ми, вску́ю оста́вил Мя еси́?

Исхода чтение. [Глава 33, ст. 11 – 23].

Глаго́ла Госпо́дь к Моисе́ю лице́м к лицу́, я́коже а́ще бы кто возглаго́лал к своему́ дру́гу, и отпуща́шеся в полк: слуга́ же Иису́с сын Нави́н, ю́ноша не исхожда́ше из ски́нии. И рече́ Моисе́й ко Го́споду: се Ты мне глаго́леши, изведи́ лю́ди сия́. Ты же не яви́л ми еси́, кого́ по́слеши со мно́ю. Ты же мне рекл еси́: вем тя па́че всех, и благода́ть и́маши у Мене́. А́ще у́бо обрето́х благода́ть пред Тобо́ю, яви́ ми Тебе́ Сама́го, да разу́мно ви́жду Тя: я́ко да обре́т бу́ду благода́ть пред Тобо́ю, и да позна́ю, я́ко лю́дие Твои́ язы́к вели́к сей. И глаго́ла [ему́ Госпо́дь]: Аз Сам предыду́ пред Тобо́ю, и упоко́ю тя. И рече́ к Нему́ Моисе́й: а́ще Сам Ты не и́деши с на́ми, да не изведе́ши мя отсю́ду. И ка́ко ве́домо бу́дет вои́стинну, я́ко обрето́х благода́ть у Тебе́, аз же и лю́дие Твои́, то́чию иду́щу Ти с на́ми; и просла́влен бу́ду, аз же и лю́дие Твои́, па́че всех язы́к, ели́цы суть на земли́? Рече́ же Госпо́дь к Моисе́ю: и сие́ тебе́ сло́во, е́же рекл еси́, сотворю́: обре́л бо сей благода́ть пре́до Мно́ю, и вем тя па́че всех. И глаго́ла Моисе́й: покажи́ ми сла́ву Твою́. И рече́ [Госпо́дь к Моисе́ю]: Аз предыду́ пред тобо́ю сла́вою Мое́ю, и воззову́ о и́мени Мое́м, Госпо́дь пред тобо́ю: и поми́лую, его́же а́ще ми́лую: и уще́дрю, его́же а́ще ще́дрю. И рече́: не возмо́жеши ви́дети Лица́ Моего́, не бо у́зрит челове́к Лице́ Мое́, и жив бу́дет. И рече́ Госпо́дь: се ме́сто у Мене́, и ста́неши на ка́мени. Егда́ же пре́йдет Сла́ва Моя́, и положу́ тя в разсе́лине ка́мене, и покры́ю руко́ю Мое́ю над тобо́ю, до́ндеже мимоиду́. И отыму́ ру́ку Мою́, и тогда́ у́зриши за́дняя Моя́: Лице́ же Мое́ не яви́тся Тебе́.

Прокимен, глас 4: Суди́, Го́споди, оби́дящия мя, / побори́ борю́щия мя. Стих: Приими́ ору́жие и щит, и воста́ни в по́мощь мою́.

Иова чтение. [Глава 42, ст. 12 – 17].

Госпо́дь благослови́ после́дняя И́овля, не́же пре́жняя: бя́ху же ско́ти его́, ове́ц четырена́десять ты́сящ, вельблю́дов шесть ты́сящ, супру́г воло́в ты́сяща, осли́ц ста́дных ты́сяща. Роди́ша же ся ему́ сы́нове седмь, и дще́ри три. И нарече́ пе́рвую у́бо, День: втору́ю же Касси́ю: тре́тию же, Амалфе́ев рог. И не обрето́шася подо́бнии в ле́поте дще́рем И́овлевым в поднебе́сней: даде́ же им оте́ц насле́дие в бра́тии их. Поживе́ же И́ов по я́зве лет сто се́дмьдесят: всех же лет поживе́ две́сти четы́редесять осмь. И ви́де И́ов сы́ны своя́, и сы́ны сыно́в свои́х, да́же до четве́ртого ро́да. И сконча́ся И́ов стар, и испо́лнь дней. Пи́сано же есть па́ки, воста́ти ему́, с ни́миже Госпо́дь возста́вит и́: та́ко толку́ется от си́рския кни́ги. В земли́ у́бо живы́й Авситиди́йстей, на преде́лех Идуме́и и Арави́и: пре́жде же бя́ше и́мя ему́ Иова́в. Взем же жену́ ара́вляныню, роди́ сы́на, ему́же и́мя Енно́н. Бе же той отца́ у́бо Заре́фа, Иса́вовых сыно́в сын, ма́тере же Восо́рры, я́коже бы́ти ему́ пя́тому от Авраа́ма.

Пророчества Исаиина чтение. [Глава 52, ст. 13 – 15; 53:1 – 12; 54:1]

Та́ко глаго́лет Госпо́дь: се уразуме́ет о́трок Мой, и вознесе́тся и просла́вится зело́. Я́коже ужа́снутся о Тебе́ мно́зи, та́ко обезсла́вится от челове́к вид Твой, и сла́ва Твоя́ от сыно́в челове́ческих. Та́ко удивя́тся язы́цы мно́зи о Нем, и заградя́т ца́рие уста́ своя́. Я́ко и́мже не возвести́ся о Нем, у́зрят, и и́же не слы́шаша, уразуме́ют. Го́споди, кто ве́рова слу́ху на́шему? И мы́шца Госпо́дня кому́ откры́ся? Возвести́хом, я́ко Отроча́ пред ним, я́ко ко́рень в земли́ жа́ждущей, несть ви́да Ему́, ниже́ сла́вы: и ви́дехом Его́, и не имя́ше ви́да, ни добро́ты. Но вид Его́ безче́стен, ума́лен па́че всех сыно́в челове́ческих: челове́к в я́зве сый, и ве́дый терпе́ти боле́знь, я́ко отврати́ся Лице́ Его́, безче́стно бысть, и не вмени́ся. Сей грехи́ на́ша но́сит, и о нас боле́знует, и мы вмени́хом Его́ бы́ти в труде́, и в я́зве от Бо́га, и во озлобле́нии. Той же я́звен бысть за грехи́ на́ша, и му́чен бысть за беззако́ния на́ша, наказа́ние ми́ра на́шего на Нем, я́звою Его́ мы исцеле́хом. Вси я́ко о́вцы заблуди́хом: челове́к от пути́ своего́ заблуди́, и Госпо́дь предаде́ Его́ грех ра́ди на́ших. И Той, зане́ озло́блен бысть, и не отверза́ет уст Свои́х: я́ко овча́ на заколе́ние веде́ся, и я́ко а́гнец пред стригу́щим Его́ безгла́сен, та́ко не отверза́ет уст Свои́х. Во смире́нии Его́ суд Его́ взя́тся, род же Его́ кто испове́сть? Я́ко взе́млется от земли́ живо́т Его́, ра́ди беззако́ний люде́й Мои́х веде́ся на смерть. И дам лука́выя вме́сто погребе́ния Его́, и бога́тыя вме́сто сме́рти Его́: я́ко беззако́ния не сотвори́, ниже́ обре́теся лесть во усте́х Его́. И Госпо́дь хо́щет очи́стити Его́ от я́звы: а́ще да́стся о гресе́, душа́ ва́ша у́зрит се́мя долгоживо́тное. И хо́щет Госпо́дь руко́ю Свое́ю отъя́ти боле́знь от души́ Его́, яви́ти Ему́ свет, и созда́ти ра́зумом, оправда́ти пра́веднаго благослужа́ща мно́гим, и грехи́ их Той понесе́т. Сего́ ра́ди Той насле́дит мно́гих, и кре́пких раздели́т коры́сти: зане́ предана́ бысть на смерть душа́ Его́, и со беззако́нными вмени́ся, и Той грехи́ мно́гих вознесе́, и за беззако́ния их пре́дан бысть. Возвесели́ся непло́ды, неражда́ющая, возгласи́ и возопи́й, нечревоболе́вшая, я́ко мно́га ча́да пусты́я па́че, не́жели иму́щая му́жа.

Прокимен Апостола, глас 6: Положи́ша Мя в ро́ве преиспо́днем, / в те́мных и се́ни сме́ртней. Стих: Го́споди Бо́же спасе́ния Моего́, во дни воззва́х и в нощи́ пред Тобо́ю.

Апостол к Коринфянам, зачало 125:

Бра́тие, сло́во кре́стное погиба́ющим у́бо юро́дство есть, а спаса́емым нам си́ла Бо́жия есть. Пи́сано бо есть: погублю́ прему́дрость прему́дрых, и ра́зум разу́мных отве́ргу. Где прему́др? Где кни́жник? Где совопро́сник ве́ка сего́? Не обуи́ ли Бог прему́дрость ми́ра сего́? Поне́же бо в прему́дрости Бо́жией не разуме́ мир прему́дростию Бо́га, благоизво́лил Бог бу́йством про́поведи спасти́ ве́рующих. Поне́же и иуде́е зна́мения про́сят, и е́ллини прему́дрости и́щут: Мы же пропове́дуем Христа́ ра́спята, иуде́ем у́бо собла́зн, е́ллином же безу́мие. Саме́м же зва́нным, иуде́ем же и е́ллином, Христа́, Бо́жию си́лу и Бо́жию прему́дрость. Зане́ бу́ее Бо́жие, прему́дрее челове́к есть, и немощно́е Бо́жие крепча́е челове́к есть. Ви́дите бо зва́ние ва́ше, бра́тие, я́ко не мно́зи ли прему́дри по пло́ти; не мно́зи си́льни; не мно́зи ли благоро́дни. Но бу́яя ми́ра избра́ Бог, да прему́дрыя посрами́т, и не́мощная ми́ра избра́ Бог, да посрами́т кре́пкая. И худоро́дная ми́ра, и уничиже́нная избра́ Бог, и не су́щая, да су́щая упраздни́т, я́ко да не похва́лится вся́ка плоть пред Бо́гом. Из него́же вы есте́ о Христе́ Иису́се, и́же бысть нам прему́дрость от Бо́га, пра́вда же и освяще́ние, и избавле́ние. Да, я́коже пи́шется, хваля́йся, о Го́споде да хва́лится.

И аз прише́д к вам, бра́тие, приидо́х не по превосхо́дному словеси́, или́ прему́дрости, возвеща́я вам свиде́тельство Бо́жие. Не суди́х бо ве́дети что в вас, то́чию Иису́са Христа́, и Сего́ ра́спята.

Аллилуиа, глас 1: Спаси́ Мя, Бо́же, я́ко внидо́ша во́ды до души́ Моея́. Стих: Поноше́ние ча́яше душа́ моя́ и страсть. Стих: Да помрача́тся о́чи их, е́же не ви́дети.

Евангелие от Матфеа, зачало 110:

Во вре́мя о́но, сове́т сотвори́ша вси архиере́е и ста́рцы людсти́и на Иису́са, я́ко уби́ти Его́. И связа́вше Его́ ведо́ша, и преда́ша Его́ Понти́йскому Пила́ту иге́мону. Тогда́ ви́дев Иу́да преда́вый Иису́са, я́ко осуди́ша Его́, раска́явся возврати́ три́десять сре́бреники архиере́ем и ста́рцем, глаго́ля: согреши́х, преда́в кровь непови́нную. Они́ же ре́ша: что есть нам? Ты у́зриши. И пове́рг сре́бреники в це́ркви, оты́де, и шед удави́ся. Архиере́е же прие́мше сре́бреники, ре́ша: недосто́йно есть вложи́ти их в корва́ну, поне́же цена́ кро́ве есть. Сове́т же сотво́рше, купи́ша и́ми село́ скуде́льниче, в погреба́ние стра́нным. Те́мже нарече́ся село́ то, село́ кро́ве, до сего́ дне. Тогда́ сбы́стся рече́нное Иереми́ем проро́ком, глаго́лющим: и прия́ша три́десять сре́бреник, це́ну Цене́ннаго, Его́же цени́ша от сыно́в Изра́илев. И да́ша я́ на селе́ скуде́льничи, я́коже сказа́ мне Госпо́дь. Иису́с же ста пред иге́моном. И вопроси́ Его́ иге́мон, глаго́ля: Ты ли еси́ Царь Иуде́йский? Иису́с же рече́ ему́: ты глаго́леши. И егда́ Нань глаго́лаху архиере́е и ста́рцы, ничесо́же отвещава́ше. Тогда́ глаго́ла Ему́ Пила́т: не слы́шиши ли, коли́ко на Тя свиде́тельствуют? И не отвеща́ ему́ ни к еди́ному глаго́лу, я́ко диви́тися иге́мону зело́. На всяк же пра́здник обы́чай бе иге́мону отпуща́ти еди́наго наро́ду свя́зня, его́же хотя́ху. Имя́ху же тогда́ свя́зана наро́чита, глаго́лемаго Вара́вву. Со́бранным же им, рече́ им Пила́т: кого́ хо́щете от обою́ отпущу́ вам; Вара́вву ли, или́ Иису́са глаго́лемаго Христа́? Ве́дяше бо, я́ко за́висти ра́ди преда́ша Его́. Седя́щу же ему́ на суди́щи, посла́ к нему́ жена́ его́, глаго́лющи: ничто́же тебе́, и Пра́веднику Тому́, мно́го бо пострада́х днесь во сне Его́ ра́ди. Архиере́е же и ста́рцы наусти́ша наро́ды, да испро́сят Вара́вву, Иису́са же погубя́т. Отвеща́в же иге́мон рече́ им: кого́ хо́щете от обою́ отпущу́ вам? Они́ же ре́ша: Вара́вву. Глаго́ла им Пила́т: что у́бо сотворю́ Иису́су, глаго́лемому Христу́? Глаго́лаша ему́ вси: да ра́спят бу́дет. Иге́мон же рече́: ко́е у́бо зло сотвори́? Они́ же и́злиха вопия́ху, глаго́люще: да про́пят бу́дет. Ви́дев же Пила́т, я́ко ничто́же успева́ет, но па́че молва́ быва́ет, прие́мь во́ду, умы́ ру́це пред наро́дом, глаго́ля: непови́нен есмь от кро́ве Пра́веднаго Сего́, вы у́зрите. И отвеща́вше вси лю́дие, ре́ша: кровь Его́ на нас, и на ча́дех на́ших. Тогда́ отпусти́ им Вара́вву: Иису́са же бив, предаде́ им, да Его́ про́пнут. Тогда́ во́ини иге́моновы, прие́мше Иису́са на суди́ще, собра́ша Нань все мно́жество во́ин. И совле́кше Его́, оде́яша Его́ хлами́дою червле́ною. И спле́тше вене́ц от те́рния, возложи́ша на главу́ Его́, и трость в десни́цу Его́. И покло́ньшеся на коле́ну пред Ним, руга́хуся Ему́, глаго́люще: ра́дуйся, Царю́ Иуде́йский. И плю́нувше Нань, прия́ша трость, и бия́ху по главе́ Его́. И егда́ поруга́шася Ему́, совлеко́ша с Него́ багряни́цу, и облеко́ша Его́ в ри́зы Его́, и ведо́ша Его́ на пропя́тие. Исходя́ще же обрето́ша челове́ка Кирине́йска, и́менем Си́мона: и сему́ заде́ша понести́ крест Его́. И прише́дше на ме́сто нарица́емое Голго́фа, е́же есть Кра́ниево ме́сто, да́ша Ему́ пи́ти о́цет с же́лчию сме́шен, и вкушь не хотя́ше пи́ти. Распе́ншии же Его́ раздели́ша ри́зы Его́, ве́ргше жре́бия. И седя́ще стрежа́ху Его́ ту. И возложи́ша верху́ главы́ Его́ вину́ Его́ напи́сану: Сей есть Иису́с, Царь Иуде́йский. Тогда́ распя́ша с Ним два разбо́йника: еди́наго одесну́ю, и еди́наго ошу́юю.

Еди́н же от обе́шеною злоде́ю ху́ляше Его́, глаго́ля: а́ще Ты еси́ Христо́с, спаси́ Себе́ и на́ю. Отвеща́в же други́й, преща́ше ему́, глаго́ля: ни ли ты бои́шися Бо́га, я́ко в то́мже осужде́н еси́? И мы у́бо в пра́вду: досто́йная бо по дело́м на́ю восприе́млева: Сей же ни еди́наго зла сотвори́. И глаго́лаше Иису́сови: помяни́ мя, Го́споди, егда́ прии́деши во Ца́рствии Си. И рече́ ему́ Иису́с: ами́нь глаго́лю тебе́, днесь со Мно́ю бу́деши в раи́.

Мимоходя́щии же ху́ляху Его́, покива́юще глава́ми свои́ми, и глаго́люще: разоря́яй це́рковь и треми́ де́ньми созида́яй, спаси́ся Сам: а́ще Сын еси́ Бо́жий, сни́ди со креста́. Та́кожде же и архиере́е руга́ющеся с кни́жники, и ста́рцы, и фарисе́и, глаго́лаху: ины́я спасе́, Себе́ ли не мо́жет спасти́? Аще Царь Изра́илев есть, да сни́дет ны́не со креста́, и ве́руем в Него́. Упова́ на Бо́га: да изба́вит ны́не Его́, а́ще хо́щет Ему́: рече́ бо, я́ко Бо́жий есмь Сын. То́жде же и разбо́йника распя́тая с Ним поноша́ста Ему́. От шеста́го же часа́ тьма бысть по всей земли́, до часа́ девя́таго. О девя́тем же часе́ возопи́ Иису́с гла́сом ве́лиим, глаго́ля: Или́, Или́, лима́ савахфани́? Е́же есть, Бо́же Мой, Бо́же Мой, вску́ю Мя еси́ оста́вил? Не́цыи же от ту стоя́щих слы́шавше, глаго́лаху, я́ко Илию́ глаша́ет Сей. И а́бие тек еди́н от них, и прие́м гу́бу, испо́лнив же о́цта, и вонзе́ на трость, напая́ше Его́. Про́чии же глаго́лаху: оста́ви, да ви́дим, а́ще прии́дет Илиа́ спасти́ Его́. Иису́с же, па́ки возопи́в гла́сом ве́лиим, испусти́ дух. И се, заве́са церко́вная раздра́ся на дво́е, с вы́шняго кра́я до ни́жняго; и земля́ потрясе́ся, и ка́мение распаде́ся. И гро́би отверзо́шася, и мно́га телеса́ усо́пших святы́х воста́ша. И изше́дше из гроб по воскресе́нии Его́, внидо́ша во святы́й град, и яви́шася мно́зем. Со́тник же и и́же с ним стрегу́щии Иису́са, ви́девше трус и бы́вшая, убоя́шася зело́, глаго́люще: вои́стинну Бо́жий Сын бе Сей.

Иуде́е же, поне́же пято́к бе, да не оста́нут на кресте́ телеса́ в суббо́ту, бе бо вели́к день тоя́ суббо́ты, моли́ша Пила́та, да пребию́т го́лени их, и во́змут. Приидо́ша же во́ини, и пе́рвому у́бо преби́ша го́лени, и друго́му распя́тому с Ним. На Иису́са же прише́дше, я́ко ви́деша Его́ уже́ уме́рша, не преби́ша Ему́ го́лений. Но еди́н от во́ин копие́м ре́бра Ему́ прободе́, и а́бие изы́де кровь и вода́. И ви́девый свиде́тельствова, и и́стинно есть свиде́тельство его́, и той весть, я́ко и́стину глаго́лет, да вы ве́ру и́мете. Бы́ша бо сия́, да сбу́дется Писа́ние: кость не сокруши́тся от Него́. И па́ки друго́е Писа́ние глаго́лет: воззря́т Нань, Его́же прободо́ша.

Бя́ху же ту и жены́ мно́ги издале́че зря́ще, я́же идо́ша по Иису́се от Галиле́и, служа́ще Ему́. В ни́хже бе Мари́я Магдали́на и Мари́я Иа́ковля, и Иоси́и ма́ти, и ма́ти сы́ну Зеведе́ову. По́зде же бы́вшу, прии́де челове́к бога́т от Аримафе́а, именем Ио́сиф, и́же и той учи́ся у Иису́са. Сей присту́пль к Пила́ту, проси́ телесе́ Иису́сова. Тогда́ Пила́т повеле́ да́ти те́ло. И прие́мь те́ло Ио́сиф, обви́т е́ плащани́цею чи́стою, и положи́ е́ в но́вем свое́м гро́бе, и́же изсече́ в ка́мени. И возвали́в ка́мень ве́лий над две́ри гро́ба, оти́де. Бе же ту Мари́я Магдали́на, и друга́я Мари́я, седя́ще пря́мо гро́ба.

Таже обычная ектения: Рцем вси от всея́ души́: И потом: Сподо́би, Го́споди: Испо́лним вече́рнюю моли́тву: И прочая.

И по возгласе поем от стиховных стихир подобны 4. Глас 2:

Егда́ от дре́ва Тя ме́ртва, / Аримафе́й снят всех Живота́, / сми́рною и плащани́цею Тя, Христе́, обви́в, / и любо́вию подвиза́шеся, / се́рдцем и устна́ми / Те́ло нетле́нное Твое́ облобыза́ти. / Оба́че одержи́мь стра́хом, / ра́дуяся, вопия́ше Ти: / сла́ва снизхожде́нию Твоему́, Человеколю́бче.

Стих: Госпо́дь воцари́ся, в ле́поту облече́ся.

Егда́ во гро́бе но́ве / за всех положи́лся еси́, Изба́вителю всех, / ад всесмехли́вый, ви́дев Тя, ужасе́ся, / вереи́ сокруши́шася, сломи́шася врата́, / гро́би отверзо́шася, / ме́ртвии воста́ша, / тогда́ Ада́м, благода́рственно ра́дуяся, / вопия́ше Тебе́: / сла́ва снизхожде́нию Твоему́, Человеколю́бче.

Стих: И́бо утверди́ вселе́нную, я́же не подви́жится.

Егда́ во гро́бе пло́тски / хотя́ заключи́лся еси́, / И́же естество́м Божества́ / пребыва́яй Неопи́санный и Неопределе́нный, / сме́рти заключи́л еси́ сокро́вища, / и а́дова вся истощи́л еси́, Христе́, ца́рствия: / тогда́ и суббо́ту сию́ / Боже́ственнаго благослове́ния и сла́вы, / и Твоея́ све́тлости сподо́бил еси́.

Стих: До́му Твоему́ подоба́ет святы́ня, Го́споди, в долготу́ дний.

Егда́ си́лы зря́ху Тя, Христе́, / я́ко преле́стника от беззако́нных оклевета́ема, / ужаса́хуся неизглаго́ланному долготерпе́нию Твоему́, / и ка́мень гро́ба рука́ми запеча́танный, / и́миже Твоя́ нетле́нная ре́бра прободо́ша. / Оба́че на́шему спасе́нию / ра́дующеся вопия́ху Ти: / сла́ва снизхожде́нию Твоему́, / Человеколю́бче.

Слава, и ныне, глас 5: Тебе́ оде́ющагося све́том, я́ко ри́зою, / снем Ио́сиф с дре́ва с Никоди́мом / и, ви́дев ме́ртва на́га непогребе́на, / благосе́рдный плач восприи́м, / рыда́я, глаго́лаше: / увы́ мне, Сладча́йший Иису́се! / Его́же вма́ле со́лнце на Кресте́ ви́сима узре́вшее / мра́ком облага́шеся, / и земля́ стра́хом колеба́шеся, / и раздира́шеся церко́вная заве́са, / но се ны́не ви́жу Тя, / мене́ ра́ди во́лею подъе́мша смерть. / Ка́ко погребу́ Тя, Бо́же мой, / или́ ка́кою плащани́цею обвию́? / Ко́има ли рука́ма прикосну́ся нетле́нному Твоему́ Те́лу? / Или́ ки́я пе́сни воспою́ Твоему́ исхо́ду, Ще́дре? / Велича́ю Стра́сти Твоя́, / песносло́влю и погребе́ние Твое́ со Воскресе́нием, зовы́й: / Го́споди, сла́ва Тебе́.

Таже Ны́не отпуща́еши: Трисвятое. По О́тче наш:

Тропарь, глас 2:

Благообра́зный Ио́сиф / с дре́ва снем Пречи́стое Те́ло Твое́, / плащани́цею чи́стою обви́в, / и воня́ми, во гро́бе но́ве покры́в положи́.

Другий тропарь:

Мироно́сицам жена́м при гро́бе предста́в А́нгел, вопия́ше: / ми́ра ме́ртвым суть прили́чна. / Христо́с же истле́ния яви́ся чуждь.

Отпуст:

И́же нас ра́ди, челове́ков, и на́шего ра́ди спасе́ния стра́шныя Стра́сти и Животворя́щий Крест, и во́льное погребе́ние пло́тию изво́ливый, Христо́с, и́стинный Бог наш, моли́твами пречи́стыя Своея́ Ма́тере, святы́х сла́вных и всехва́льных Апо́стол, святы́х пра́ведных Богооте́ц Иоаки́ма и А́нны, и всех святы́х, поми́лует и спасе́т нас, я́ко Благ и Человеколю́бец.

Повечерие же поем в келлиах,

на немже поем канон о распятии Господни и на плач Пресвятыя Богородицы. Ирмос по дважды, тропари на 4: последи же ирмос оба лика вкупе. Творение Симеона Логофета. Глас 6.

Песнь 1.

Ирмос: Я́ко по су́ху, пешеше́ствовав Изра́иль / по без́дне стопа́ми, / гони́теля фарао́на / ви́дя потопля́ема, / Бо́гу / побе́дную песнь / пои́м, вопия́ше.

Запев: Сла́ва Тебе́, Бо́же наш, сла́ва Тебе́.

Обе́шена я́ко ви́де на Кресте́, Сы́на и Го́спода, / Де́вая Чи́стая, терза́ющися, вопия́ше го́рце, / со други́ми жена́ми, стеня́щи, глаго́лаше.

Ви́жу Тя ны́не, / возлю́бленное Мое́ Чадо и люби́мое, на Кресте́ ви́сяща, / и уязвля́юся го́рце се́рдцем, рече́ Чи́стая, / но даждь сло́во, Благи́й, Рабе́ Твое́й.

Слава: Во́лею, Сы́не Мой и Тво́рче, / терпи́ши на дре́ве лю́тую смерть, Де́ва глаго́лаше, / предстоя́щи у Креста́ со возлю́бленным ученико́м.

И ныне: Ны́не Моего́ ча́яния, ра́дости и весе́лия, / Сы́на Моего́ и Го́спода лише́на бых: / увы́ Мне, боле́зную се́рдцем, / Чи́стая, пла́чущи, глаго́лаше.

Песнь 3.

Ирмос: Несть свят, / я́коже Ты, Го́споди Бо́же мой, / вознесы́й рог ве́рных Твои́х, Бла́же, / и утверди́вый нас на ка́мени / испове́дания Твоего́.

Стра́ха ра́ди иуде́йска Петр скры́ся, / и вси отбего́ша ве́рнии, оста́вльше Христа́, / Де́ва, рыда́ющи, глаго́лаше.

О стра́шном Твое́м рождестве́ и стра́нном, Сы́не Мой, / па́че всех ма́терей возвели́чена бых Аз, / но увы́ Мне, ны́не Тя ви́дящи на дре́ве, распала́юся утро́бою.

Слава: Хощу́ утро́бу Мою́ на руку́, / и́маже я́ко Младе́нца держа́х, / с дре́ва прия́ти, веща́ше Чи́стая, / но никто́же, увы́ Мне, Сего́ даде́.

И ныне: Се Свет Мой сла́дкий, / Наде́жда и Живо́т Мой Благи́й, / Бог Мой угасе́ на Кресте́, / распала́юся утро́бою, Де́ва стеня́щи глаго́лаше.

Песнь 4.

Ирмос: Христо́с моя́ си́ла, / Бог и Госпо́дь, / честна́я Це́рковь / Боголе́пно пое́т, взыва́ющи, / от смы́сла чи́ста о Го́споде пра́зднующи.

Со́лнце не заходя́й, Бо́же Преве́чный, / и Тво́рче всех тва́рей Го́споди, / ка́ко терпи́ши страсть на Кресте́? / Чи́стая пла́чущи глаго́лаше.

Пла́чущи, глаго́лаше Браконеиску́сная ко благообра́зному: / потщи́ся, Ио́сифе, к Пила́ту приступи́ти, / и испроси́ сня́ти со дре́ва Учи́теля Твоего́.

Слава: Ви́дев Пречи́стую го́рце слезя́щу, Ио́сиф смути́ся, / и пла́чася приступи́ к Пила́ту, / даждь ми, вопия́ с пла́чем, Те́ло Бо́га моего́.

И ныне: Уя́звена Тя ви́дящи, и без сла́вы, на́га на дре́ве, Ча́до Мое́, / утро́бою распала́юся, рыда́ющи я́ко Ма́ти, / Де́ва провещава́ше.

Песнь 5.

Ирмос: Бо́жиим / све́том Твои́м, Бла́же, / у́треннюющих Ти ду́ши / любо́вию озари́, молю́ся, / Тя ве́дети, Сло́ве Бо́жий, / и́стиннаго Бо́га, / от мра́ка грехо́внаго взыва́юща.

Растерза́яся и рыда́я, и дивя́ся вку́пе с Никоди́мом, / снят Ио́сиф, и уцелова́в Пречи́стое Те́ло, / рыда́ше и стеня́ше, и поя́ Его́ я́ко Бо́га.

Прии́мши Его́ с пла́чем Ма́ти неискусому́жная, / положи́ на коле́ну, / моля́щи Его́ со слеза́ми и облобыза́ющи, / го́рце же рыда́ющи и восклица́ющи.

Слава: Еди́ну Наде́жду и Живо́т, Влады́ко Сы́не Мой и Бо́же, / во о́чию свет Раба́ Твоя́ име́х, / ны́не же лише́на бых Тебе́, / сла́дкое Мое́ Ча́до и люби́мое.

И ныне: Боле́зни и ско́рби, и воздыха́ния обрето́ша Мя, / увы́ Мне, Чи́стая го́рце рыда́ющи глаго́лаше, / ви́дящи Тя, Ча́до Мое́ возлю́бленное, на́га и уедине́на, / и воня́ми пома́зана мертвеца́.

Песнь 6.

Ирмос: Жите́йское мо́ре, / воздвиза́емое зря напа́стей бу́рею, / к ти́хому приста́нищу Твоему́ прите́к, вопию́ Ти: / возведи́ от тли живо́т мой, / Многоми́лостиве.

Ме́ртва Тя зрю, Человеколю́бче, / оживи́вшаго ме́ртвыя, и содержа́ща вся, / уязвля́юся лю́те утро́бою. / Хоте́ла бых с Тобо́ю умре́ти, Пречи́стая глаго́лаше, / не терплю́ бо без дыха́ния ме́ртва Тя ви́дети.

Дивлю́ся, зря́щи Тя, / Преблаги́й Бо́же, и Преще́дрый Го́споди, / без сла́вы, и без дыха́ния, и безобра́зна, / и пла́чуся, держа́щи Тя, / я́ко не наде́яхся, увы́ Мне, / ви́дети Тя, Сы́не Мой и Бо́же.

Слава: Не изглаго́леши ли Рабе Твое́й сло́ва, Сло́ве Бо́жий? / Не уще́дриши ли, Влады́ко, Тебе́ Ро́ждшую, / глаго́лаше Чи́стая, рыда́ющи и пла́чущи, / облобыза́ющи Те́ло Го́спода Своего́.

И ныне: Помышля́ю, Влады́ко, / я́ко ктому́ сла́дкаго Твоего́ не услы́шу гла́са, / ни добро́ты Лица́ Твоего́ узрю́, / я́коже пре́жде Раба́ Твоя́: / и́бо заше́л еси́, Сы́не Мой, от о́чию Мое́ю.

Кондак, глас 8:

Нас ра́ди Распя́таго, прииди́те, вси воспои́м, / Того́ бо ви́де Мари́я на дре́ве, и глаго́лаше: / а́ще и распя́тие терпи́ши, / Ты еси́ Сын и Бог Мой.

Икос: Своего́ А́гнца А́гница зря́щи, к заколе́нию влеко́ма, / после́доваше Мари́я просте́ртыми власы́ / со ине́ми жена́ми, сия́ вопию́щи: / ка́мо и́деши, Ча́до? / Чесо́ ра́ди ско́рое тече́ние соверша́еши? / Еда́ други́й брак па́ки есть в Ка́не, и та́мо ны́не тщи́шися, / да от воды́ им вино́ сотвори́ши? / Иду́ ли с Тобо́ю, Ча́до, или́ па́че пожду́ Тебе́? / Даждь Ми сло́во, Сло́ве, / не молча́ мимоиди́ Мене́, Чи́сту соблюды́й Мя: / Ты бо еси́ Сын и Бог Мой.

Песнь 7.

Ирмос: Росода́тельну у́бо пещь / соде́ла А́нгел / преподо́бным отроко́м, / халде́и же опаля́ющее / веле́ние Бо́жие / мучи́теля увеща́ вопи́ти: / благослове́н еси́, Бо́же оте́ц на́ших.

Где, Сы́не Мой и Бо́же, благове́щение дре́внее, / е́же Ми Гаврии́л глаго́лаше; / Царя́ Тя, Сы́на и Бо́га Вы́шняго нарица́ше: / ны́не же ви́жу Тя, Све́те Мой сла́дкий, / на́га и уя́звлена мертвеца́.

Избавля́яй боле́зни, ны́не приими́ Мя с Тобо́ю, Сы́не Мой и Бо́же, / да сни́ду, Влады́ко, во ад с Тобо́ю и Аз, / не оста́ви Мене́ еди́ну, уже́ бо жи́ти не терплю́, / не ви́дящи Тебе́ сла́дкаго Моего́ Све́та.

Слава: С други́ми жена́ми мироно́сицами, / рыда́ющи Непоро́чная го́рце, / и носи́ма ви́дящи Христа́, глаго́лаше: увы́ Мне, что ви́жу! / Ка́мо и́деши ны́не, Сы́не Мой, / а Мене́ еди́ну оставля́еши?

И ныне: Изнемога́ющи и рыда́ющи Непоро́чная, мироно́сицам глаго́лаше: / срыда́йте Ми, и спла́читеся го́рце: / се бо Свет Мой сла́дкий, и Учи́тель ваш гро́бу предае́тся.

Песнь 8.

Ирмос: Из пла́мене преподо́бным ро́су источи́л еси́, / и пра́веднаго же́ртву водо́ю попали́л еси́: / вся бо твори́ши, Христе́, то́кмо е́же хоте́ти. / Тя превозно́сим во вся ве́ки.

Де́ву рыда́ющу Ио́сиф ви́дев, / растерза́шеся весь, и вопия́ше го́рько: / ка́ко Тя, о Бо́же мой, ны́не погребу́ раб Твой? / Каки́ми плащани́цами обвию́ Те́ло Твое́?

Па́че ума́ превзы́де стра́нное Твое́ виде́ние, / нося́щаго тварь всю Го́спода: / сего́ ра́ди Ио́сиф я́ко ме́ртва Тя на руку́ свое́ю, / и с Никоди́мом но́сит и погреба́ет.

Слава: Стра́нную ви́жу и пресла́вную та́йну, / Де́ва вопия́ше Сы́ну и Го́споду: / ка́ко в худо́м гро́бе полага́ешися, / ме́ртвыя повеле́нием возставля́яй во гробе́х?

И ныне: Ни от гро́ба Твоего́ воста́ну, Ча́до Мое́, / ни сле́зы точа́щи преста́ну Раба́ Твоя́, / до́ндеже и Аз сни́ду во ад: / не могу́ бо терпе́ти разлуче́ния Твоего́, Сы́не Мой.

Песнь 9.

Ирмос: Бо́га / челове́ком не возмо́жно ви́дети, / на Него́ же не сме́ют чи́ни А́нгельстии взира́ти; / Тобо́ю бо, Всечи́стая, яви́ся челове́ком / Сло́во воплоще́нно, / Его́ же велича́юще, / с Небе́сными во́и / Тя ублажа́ем.

Ра́дость Мне николи́же отсе́ле прико́снется, / рыда́ющи, глаго́лаше Непоро́чная: / Свет Мой и Ра́дость Моя́ во гроб за́йде: / но не оста́влю Его́ еди́наго, / зде же умру́, и спогребу́ся Ему́.

Душе́вную Мою́ я́зву ны́не исцели́, Ча́до Мое́, / Пречи́стая вопия́ше слезя́щи: / воскресни́, и утоли́ Мою́ боле́знь и печа́ль, / мо́жеши бо, Влады́ко, ели́ко хо́щеши, и твори́ши, / а́ще и погре́блся еси́ во́лею.

Слава: О ка́ко утаи́лася Тебе́ есть бе́здна щедро́т, / Ма́тери в та́йне изрече́ Госпо́дь; / тварь бо Мою́ хотя́ спасти́, изво́лих умре́ти, / но и воскре́сну, и Тебе́ возвели́чу, / я́ко Бог небесе́ и земли́.

И ныне: Воспою́ милосе́рдие Твое́, Человеколю́бче, / и покланя́юся бога́тству ми́лости Твоея́, Влады́ко: / созда́ние бо Твое́ хотя́ спасти́, / смерть подъя́л еси́, рече́ Пречи́стая: / но Воскресе́нием Твои́м, Спа́се, поми́луй всех нас.

Таже за Досто́йно: Ирмос: Бо́га челове́ком не возмо́жно ви́дети: Трисвятое. По О́тче наш: Кондак: Нас ра́ди Распя́таго: Го́споди, поми́луй, 40. И́же на вся́кое вре́мя: Го́споди, поми́луй, трижды. Сла́ва, и ны́не: Честне́йшую Херуви́м: И́менем Госпо́дним благослови́, о́тче. Иерей: Моли́твами святы́х оте́ц на́ших: И молитва: Нескве́рная, Небла́зная: И отпуст.

Полунощницу же поем в келлиах.

ВО СВЯТУЮ И ВЕЛИКУЮ СУББОТУ

клеплет ко Утрени в седмый час нощи. Начинаем Утреню по обычаю. И по шестопсалмии ектения великая.

На Бог Госпо́дь: тропарь, глас 2:

Благообра́зный Ио́сиф, / с дре́ва снем Пречи́стое Те́ло Твое́, / плащани́цею чи́стою обви́в, / и воня́ми во гро́бе но́ве покры́в положи́.

Слава: Егда́ снизше́л еси́ к сме́рти, Животе́ безсме́ртный, / тогда́ ад умертви́л еси́ блиста́нием Божества́. / Егда́ же и уме́ршия от преиспо́дних воскреси́л еси́, / вся си́лы небе́сныя взыва́ху: / Жизнода́вче Христе́ Бо́же наш, сла́ва Тебе́.

И ныне: Мироно́сицам жена́м, при гро́бе предста́в А́нгел вопия́ше: / ми́ра ме́ртвым суть прили́чна, / Христо́с же истле́ния яви́ся чуждь.

И, кадящу священнику весь храм, начинаем пети Непорочны со сладкопением, такожде по коемуждо стисе и похвалы.

Статия первая.

Возглашает певец, во глас 5: Благослове́н еси́, Го́споди, научи́ мя оправда́нием Твои́м.

1. Блаже́ни непоро́чнии в путь, / ходя́щии в зако́не Госпо́дни.

И похвалы, во глас 5:

Жизнь во гро́бе положи́лся еси́, Христе́, / и А́нгельская во́инства ужаса́хуся, снизхожде́ние сла́вяще Твое́.

2. Блаже́ни испыта́ющии свиде́ния Его́, / всем се́рдцем взы́щут Его́.

Животе́, ка́ко умира́еши? / Ка́ко и во гро́бе обита́еши, / сме́рти же ца́рство разруша́еши, / и от а́да ме́ртвыя возставля́еши?

3. Не де́лающии бо беззако́ния / в путе́х Его́ ходи́ша.

Велича́ем Тя, Иису́се Царю́, / и чтем погребе́ние и страда́ния Твоя́, / и́миже спасл еси́ нас от истле́ния.

4. Ты запове́дал еси́ за́поведи Твоя́ / сохрани́ти зело́.

Ме́ры земли́ положи́вый, / в ма́лом обита́еши, Иису́се Всецарю́, гро́бе днесь, / от гробо́в ме́ртвыя возставля́яй.

5. Дабы́ испра́вилися путие́ мои́, / сохрани́ти оправда́ния Твоя́.

Иису́се Христе́ мой, Царю́ всех, / что ища́ к су́щим во а́де прише́л еси́? / Или́ род отреши́ти челове́ческий?

6. Тогда́ не постыжу́ся, / внегда́ призре́ти ми на вся за́поведи Твоя́.

Влады́ка всех зри́тся мертв, / и во гро́бе но́вем полага́ется, / истощи́вый гро́бы ме́ртвых.

7. Испове́мся Тебе́ в пра́вости се́рдца, / внегда́ научи́ти ми ся судьба́м пра́вды Твоея́.

Животе́, во гро́бе положи́лся еси́, Христе́, / и сме́ртию Твое́ю смерть погуби́л еси́, / и источи́л еси́ ми́рови жизнь.

8. Оправда́ния Твоя́ сохраню́, / не оста́ви мене́ до зела́.

Со злоде́и я́ко злоде́й, Христе́, вмени́лся еси́, / оправда́я нас всех от злоде́йства дре́вняго запина́теля.

9. В чесо́м испра́вит юне́йший путь свой? / Внегда́ сохрани́ти словеса́ Твоя́.

Кра́сный добро́тою па́че всех челове́к, / я́ко беззра́чен мертв явля́ется, / естество́ украси́вый всех.

10. Всем се́рдцем мои́м взыска́х Тебе́, / не отри́ни мене́ от за́поведей Твои́х.

Ад ка́ко стерпи́т, Спа́се, прише́ствие Твое́, / а не па́че боле́знует омрача́емь, / блиста́ния све́та Твоего́ заре́ю ослепле́н?

11. В се́рдце моем скрых словеса Твоя́, / я́ко да не согрешу Тебе́.

Иису́се, сла́дкий мой, и спаси́тельный Све́те, / во гро́бе ка́ко те́мнем скры́лся еси́? / О несказа́ннаго и неизрече́ннаго терпе́ния!

12. Благослове́н еси́, Го́споди, / научи́ мя оправда́нием Твои́м.

Недоумева́ет и естество́ у́мное, и мно́жество безпло́тное, Христе́, / та́инства несказа́ннаго и неизрече́ннаго Твоего́ погребе́ния.

13. Устна́ма мои́ма возвести́х / вся судьбы́ уст Твои́х.

О чуде́с стра́нных! / О веще́й но́вых! / Дыха́ния моего́ Пода́тель бездыха́нен но́сится, / погреба́емь рука́ма Ио́сифовыма.

14. На пути́ свиде́ний Твои́х наслади́хся, / я́ко о вся́ком бога́тстве.

И во гроб заше́л еси́, / и недр, Христе́, Оте́ческих ника́коже отлучи́лся еси́: / сие́ стра́нное и пресла́вное ку́пно.

15. В за́поведех Твои́х поглумлю́ся, / и уразуме́ю пути́ Твоя́.

И́стинный небесе́ и земли́ Царь, / а́ще и во гро́бе мале́йшем заключи́лся еси́, / позна́лся еси́ всей тва́ри, Иису́се.

16. Во оправда́ниих Твои́х поучуся, / не забуду словес Твои́х.

Тебе́ положе́ну во гро́бе, Созда́телю Христе́, / а́дская подвиза́шася основа́ния, / и гро́би отверзо́шася челове́ков.

17. Возда́ждь рабу́ Твоему́, живи́ мя, / и сохраню́ словеса́ Твоя́.

Зе́млю содержа́й дла́иию, / умерщвле́н пло́тию, под земле́ю ны́не содержи́тся, / ме́ртвыя избавля́я а́дова содержа́ния.

18. Откры́й о́чи мои́, / и уразуме́ю чудеса́ от зако́на Твоего́.

Из истле́ния возше́л еси́, Животе́ Спа́се мой, / тебе́ уме́ршу, и к ме́ртвым прише́дшу, / и сломи́вшу а́довы вереи́.

19. Пришле́ц аз семь на земли́, / не скрый от мене́ за́поведи Твоя́.

Я́коже све́та свети́льник, / ны́не плоть Бо́жия, под зе́млю я́ко под спуд кры́ется, / и отгоня́ет су́щую во а́де тьму.

20. Возлюби́, душа́ моя́, / возжела́ти судьбы́ Твоя́ на вся́кое вре́мя.

У́мных стека́ется во́инств мно́жество со Ио́сифом и Никоди́мом, / погребсти́ Тя, Невмести́маго во гро́бе ма́ле.

21. Запрети́л еси́ го́рдым, / про́кляти уклоня́ющиися от за́поведей Твои́х.

Умерщвле́н во́лею, и положе́н под земле́ю, / жизното́чне Иису́се мой, / оживи́л еси́ умерщвле́на мя преступле́нием го́рьким.

22. Отыми́ от мене́ поно́с и уничиже́ние, / я́ко свиде́ний Твои́х взыска́х.

Изменя́шеся вся тварь стра́стию Твое́ю, / вся бо Тебе́, Сло́ве, сострада́ху, / Содержи́теля Тя ве́дуща всех.

23. И́бо седо́ша кня́зи, и на мя клевета́ху: / раб же Твой глумля́шеся во оправда́ниих Твои́х.

Живота́ ка́мень во чре́ве прие́м, / ад всея́дец, изблева́, / от ве́ка я́же поглоти́ мертвыя.

24. И́бо свиде́ния Твоя́ поуче́ние мое́ есть, / и сове́ти мои́ оправда́ния Твоя́.

Во гро́бе но́ве положи́лся еси́, Христе́, / и естество́ челове́ческое обнови́л еси́, / воскре́с боголе́пно из ме́ртвых.

25. Прильпе́ земли́ душа́ моя́, / живи́ мя по словеси́ Твоему́.

На зе́млю сшел еси́, да спасе́ши Ада́ма, / и на земли́ не обре́т сего́, Влады́ко, / да́же до а́да снизше́л еси́ ищя́й.

26. Пути́ моя́ возвести́х, и услы́шал мя еси́, / научи́ мя оправда́нием Твои́м.

Сотрясе́ся стра́хом, Сло́ве, вся земля́, / и денни́ца лучи́ скры, / велича́йшему в земли́ сокрове́нному Твоему́ Све́ту.

27. Путь оправда́ний Твои́х вразуми́ ми, / и поглумлю́ся в чудесе́х Твои́х.

Я́ко челове́к у́бо умира́еши во́лею, Спа́се, / я́ко Бог же сме́ртныя возста́вил еси́ от гробо́в, / и глубины́ грехо́вныя.

28. Воздрема́ душа́ моя́ от уны́ния, / утверди́ мя в словесе́х Твои́х.

Слезото́чная рыда́ния, на Тебе́ Чи́стая / ма́терски, о Иису́се, накрапля́ющи вопия́ше: / ка́ко погребу́ Тя, Сы́не?

29. Путь непра́вды отста́ви от мене́, / и зако́ном Твои́м поми́луй мя.

Я́коже пшени́чное зе́рно, / заше́д в не́дра земна́я, / многопе́рстный возда́л еси́ клас, / возста́вив челове́ки, я́же от Ада́ма.

30. Путь и́стины изво́лих, / и судьбы́ Твоя́ не забы́х.

Под земле́ю скры́лся еси́, я́ко со́лнце ны́не, / и но́щию сме́ртною покрове́н был еси́, / но возсия́й светле́йше Спа́се.

31. Прилепи́хся свиде́нием Твои́м, Го́споди, / не посрами́ мене́.

Я́коже со́лнечный круг луна́, Спа́се, сокрыва́ет, / и Тебе́ ны́не гроб скры, / сконча́вшагося сме́ртию пло́тски.

32. Путь за́поведей Твои́х теко́х, / егда́ разшири́л еси́ се́рдце мое́.

Живо́т сме́рти вкуси́вый Христо́с, / от сме́рти сме́ртныя свободи́, / и всем ны́не да́рует живо́т.

33. Законоположи́ мне, Го́споди, путь оправда́ний Твои́х, / и взыщу́ и вы́ну.

Умерщвле́на дре́вле Ада́ма зави́стно, / возво́диши к животу́ умерщвле́нием Твои́м, / Но́вый, Спа́се, во пло́ти явле́йся Ада́м.

34. Вразуми́ мя, и испыта́ю зако́н Твой, / и сохраню́ и всем се́рдцем мои́м.

У́мнии Тя чи́ни, просте́рта ме́ртва зря́ще нас ра́ди, / ужаса́хуся, покрыва́еми крилы́, Спа́се.

35. Наста́ви мя на стезю́ за́поведей Твои́х, / я́ко ту́ю восхоте́х.

Снем Тя, Сло́ве, от дре́ва ме́ртва, / во гро́бе Ио́сиф ны́не положи́, / но воста́ни, спаса́яй вся, я́ко Бог.

36. Приклони́ се́рдце мое́ во свиде́ния Твоя́, / а не в лихои́мство.

А́нгельская, Спа́се, ра́дость быв, / ны́не и печа́ли сим был еси́ вино́вен, / ви́димь пло́тию бездыха́нен мертв.

37. Отврати́ о́чи мои́, е́же не ви́дети суеты́, / в пути́ Твое́м живи́ мя.

Возне́слся еси́ на дре́ве, / и живу́щия челове́ки совозно́сиши: / под земле́ю же быв, / лежа́щия под не́ю воскреша́еши.

38. Поста́ви рабу́ Твоему́ / сло́во Твое́ в страх Твой.

Я́коже лев, Спа́се, усну́в пло́тию, / я́ко не́кий ски́мен мертв возстае́ши, / отложи́в ста́рость плотску́ю.

39. Отыми́ поноше́ние мое́, е́же непщева́х, / я́ко судьбы́ Твоя́ бла́ги.

В ре́бра прободе́н был еси́, / ребро́ взе́мый Ада́мле, / от него́же Е́ву созда́л еси́, / и источи́л еси́ то́ки чисти́тельныя.

40. Се возжела́х за́поведи Твоя́, / в пра́вде Твое́й живи́ мя.

Та́йно у́бо дре́вле жрется а́гнец: / Ты же я́ве жрен быв, Незло́биве, / всю тварь очи́стил еси́, Спа́се.

41. И да прии́дет на мя ми́лость твоя́, Го́споди, / спасе́ние Твое́ по словеси́ Твоему́.

Кто изрече́т о́браз стра́шный вои́стинну но́вый? / Влады́чествуяй бо тва́рию, / днесь страсть прие́млет, и умира́ет нас ра́ди.

42. И отвеща́ю поноша́ющим ми сло́во, / я́ко упова́х на словеса́ Твоя́.

Живота́ Сокро́вище, ка́ко зри́тся мертв? / Ужаса́ющеся А́нгели взыва́ху: / ка́ко же во гро́бе заключа́ется Бог?

43. И не отыми́ от уст мои́х словесе́ и́стинна до зела́, / я́ко на судьбы́ Твоя́ упова́х.

Копие́м прободе́ннаго, Спа́се, из ребра́ Твоего́, / живо́т живото́м из живота́ спа́сшаго мя иска́паеши, / и живи́ши мя с ним.

44. И сохраню́ зако́н Твой вы́ну / в век, и в век ве́ка.

Распросте́рт на дре́ве, собра́л еси́ челове́ки: / в ре́бра же прободе́н, / живото́чное всем оставле́ние источа́еши, Иису́се.

45. И хожда́х в широте́, / я́ко за́поведи Твоя́ взыска́х.

Благообра́зный Спа́се образу́ет стра́шно, / и погреба́ет Тя я́ко ме́ртва благообра́зно, / и ужаса́ется Твоего́ о́браза стра́шнаго.

46. И глаго́лах о свиде́ниих Твои́х пред цари́, / и не стыдя́хся.

Под земле́ю хоте́нием низше́д я́ко мертв, / возво́диши от земли́ к небе́сным, отту́ду па́дшия, Иису́се.

47. И поуча́хся в за́поведех Твои́х, / я́же возлюби́х зело́.

А́ще и мертв ви́ден был еси́, но живый я́ко Бог, / возво́диши от земли́ к небе́сным, отту́ду па́дшия, Иису́се.

48. И воздвиго́х ру́це мои́ / к за́поведем Твои́м, я́же возлюби́х.

А́ще и мертв ви́ден был еси́, но жив я́ко Бог, / умерщвле́ныя челове́ки оживи́л еси́, / моего́ умертви́в умертви́теля.

48. И глумля́хся / во оправда́ниих Твои́х.

О ра́дости о́ныя! / О мно́гия сла́дости! / И́хже во а́де напо́лнил еси́, / во днах мра́чных Свет возсия́в.

49. Помяни́ словеса́ Твоя́ рабу́ Твоему́, / и́хже упова́ние дал ми еси́.

Покланя́юся стра́сти, / воспева́ю погребе́ние, / велича́ю Твою́ держа́ву, Человеколю́бче, / и́миже свободи́хся страсте́й тлетво́рных.

50. То мя уте́ши во смире́нии мое́м, / я́ко сло́во Твое́ живи́ мя.

На Тя меч обнажи́ся, Христе́, / и меч кре́пкаго у́бо притупля́ется, / меч же обраща́ется еде́мский.

51. Го́рдии законопреступова́ху до зела́, / от зако́на же Твоего́ не уклони́хся.

А́гница Агнца зря́щи в заколе́нии, / о́стрием пробода́ема рыда́ше, / сподви́гши и ста́до вопи́ти.

52. Помяну́х судьбы́ Твоя́ от ве́ка, Го́споди, / и уте́шихся.

А́ще и во гро́бе погреба́ешися, / а́ще и во ад и́деши, / но и гро́бы истощи́л еси́, / и ад обнажи́л еси́, Христе́.

53. Печа́ль прия́т мя от гре́шник, / оставля́ющих зако́н Твой.

Во́лею снизше́л еси́, Спа́се, под зе́млю, / умерщвле́ныя челове́ки оживи́л еси́, / и возве́л еси́ во сла́ве О́тчей.

54. Пе́та бя́ху мне оправда́ния Твоя́ / на ме́сте прише́льствия моего́.

Тро́ицы Еди́н во пло́ти, / нас ра́ди поно́сную претерпе́ смерть, / ужаса́ется же со́лнце, и трепе́щет земля́.

55. Помяну́х в нощи́ и́мя Твое́, Го́споди, / и сохрани́х зако́н Твой.

Я́ко от исто́чника го́рькаго, / Иу́дова коле́на исча́дия в ро́ве положи́ша, / Пита́теля маннода́вца Иису́са.

56. Сей бысть мне, / я́ко оправда́ний Твои́х взыска́х.

Судия́ я́ко суди́мь пред Пила́том судие́ю, / и предста́, и сме́ртию непра́ведною осужде́н бысть, дре́вом кре́стным.

57. Часть моя́ еси́, Го́споди, / рех сохрани́ти зако́н Твой.

Го́рдый Изра́илю, / уби́йственнии лю́дие, / что пострада́вше, Вара́вву свободи́сте, / и Спа́са преда́сте кресту́?

58. Помоли́хся Лицу́ Твоему́ всем се́рдцем мои́м, / поми́луй мя по словеси́ Твоему́.

Руко́ю Твое́ю созда́вый Ада́ма от земли́, / того́ ра́ди естество́м был еси́ Челове́к, / и распя́лся еси́ во́лею Твое́ю.

59. Помы́слих пути́ Твоя́, / и возврати́х но́зе мои́ во свиде́ния Твоя́.

Послу́шав, Сло́ве, Отца́ Твоего́, / да́же до а́да лю́таго соше́л еси́, / и воскреси́л еси́ род челове́ческий.

60. Угото́вихся и не смути́хся, / сохрани́ти за́поведи Твоя́.

Увы́ Мне, Све́те ми́ра! / Увы́ Мне, све́те Мой, / Иису́се Мой возжеле́нный! / Вопия́ше Де́ва, рыда́ющи го́рько.

61. У́жа гре́шник обяза́шеся мне, / и зако́на Твоего́ не забы́х.

Зави́стливии, убийственнии и го́рдии лю́дие, / поне́ плащани́цы и сударя́ самаго́ стыдя́тся, воскре́сшу Христу́.

62. Полу́нощи воста́х испове́датися Тебе́ / о судьба́х пра́вды Твоея́.

Прииди́ у́бо, скве́рный уби́йце учениче́, / и нрав зло́бы твоея́ покажи́ ми, / и́мже был еси́ преда́тель Христо́в.

63. Прича́стник аз есмь всем боя́щимся Тебе́, / и храня́щим за́поведи Твоя́.

Я́ко человеколюби́в не́кто притворя́ешися бу́е, и сле́пе, / всегуби́тельнейший, неве́рный, Ми́ро прода́вый на цене́.

64. Ми́лости Твоея́ Го́споди, испо́лнь земля́, / оправда́нием Твои́м научи́ мя.

Небе́снаго Ми́ра ку́ю име́л еси́ це́ну Многоце́ннаго; / ко́е прия́л еси́ противодосто́йное; / неи́стовство обре́л еси́, прокля́тейший сатано́.

65. Бла́гость сотвори́л еси́ с рабо́м Твои́м, Го́споди, / по словеси́ Твоему́.

А́ще нищелю́бец еси́, / и о ми́ре печа́луеши истоща́емом во очище́ние души́, / ка́ко за зла́те продае́ши Светоза́рна?

66. Бла́гости и наказа́нию, и ра́зуму научи́ мя, / я́ко за́поведем Твои́м ве́ровах.

О Бо́жий Сло́ве! / О ра́досте Моя́! / Ка́ко претерплю́ тридне́вное Твое́ погребе́ние? / Ны́не терза́юся утро́бою ма́терски.

67. Пре́жде да́же не смири́ти ми ся, аз прегреши́х, / сего́ ра́ди сло́во Твое́ сохрани́х.

Кто даст Ми во́ду и слез исто́чники, / Богоневе́стная Де́ва взыва́ше, / да воспла́чу сла́дкаго Ми Иису́са?

68. Благ еси́ Ты, Го́споди, / и бла́гостию Твое́ю научи́ мя оправда́нием Твои́м.

О го́ры и хо́лми, и челове́ков мно́жества! / Воспла́читеся, и вся рыда́йте со Мно́ю, / Бо́га ва́шего Материю!

69. Умно́жися на мя непра́вда го́рдых, / аз же всем се́рдцем мои́м испыта́ю за́поведи Твоя́.

Когда́ ви́жду Тя, Спа́се, безле́тнаго Све́та, / ра́дость и сла́дость се́рдца Моего́? / Де́ва го́рько вопия́ше.

70. Усыри́ся я́ко млеко́ се́рдце их, / аз же зако́ну Твоему́ поучи́хся.

А́ще и я́ко ка́мень Спа́се, краесеко́мый, / Ты прия́л еси́ сече́ние, / но источи́л еси́ живу́ю струю́, / я́ко Исто́чник сый жи́зни.

71. Бла́го мне, я́ко смири́л мя еси́, / я́ко да научу́ся оправда́нием Твои́м.

Я́ко от исто́чника еди́наго сугу́бою реко́ю / ре́бром Твои́м излива́ющим напая́ющеся, / безсме́ртную приобрета́ем жизнь.

72. Благ мне зако́н уст Твои́х, / па́че ты́сящ зла́та и сребра́.

Во́лею яви́лся еси́ Сло́ве, во гро́бе мертв, но живе́ши, / и челове́ки, я́коже предре́кл еси́, / воскресе́нием Твои́м, Спа́се мой, воздвиза́еши.

Слава: Воспева́ем Сло́ве, Тебе́ всех Бо́га, / со Отце́м и Святы́м Твои́м Ду́хом, / и сла́вим Боже́ственное Твое́ погребе́ние.

И ныне, Богородичен: Блажи́м Тя, Богоро́дице Чи́стая, / и почита́ем тридне́вное погребе́ние / Сы́на Твоего́ и Бо́га на́шего ве́рно.

И паки первый припев оба лика вкупе. Таже ектения малая. И возглас на первую статию: Я́ко благослови́ся Твое́ И́мя, и просла́вися Твое́ Ца́рство, Отца́, и Сы́на, и Свята́го Ду́ха, ны́не и при́сно, и во ве́ки веко́в.

И, покадив, начинает вторую статию.

Статия вторая.

Начинает левый лик благочинно тропарь, во глас 5:

Досто́йно есть / велича́ти Тя Жизнода́вца, / на Кресте́ ру́це просте́ршаго, / и сокру́шшаго держа́ву вра́жию.

73. Ру́це Твои́ сотвори́сте мя, и созда́сте мя; / вразуми́ мя, и научу́ся за́поведем Твои́м.

Досто́йно есть / велича́ти Тя, всех Зижди́теля: / Твои́ми бо страда́ньми и́мамы безстра́стие, / изба́вльшеся от тле́ния.

74. Боя́щиися Тебе́ у́зрят мя и возвеселя́тся, / я́ко на словеса́ Твоя́ упова́х.

Ужасе́ся земля́, / и со́лнце Спа́се скры́ся, / Тебе́ Невече́рнему Све́ту Христе́, / заше́дшу во гро́бе пло́тски.

75. Разуме́х, Го́споди, я́ко пра́вда судьбы́ Твоя́, / и вои́стинну смири́л мя еси́.

Усну́л еси́, Христе́, / естественноживо́тным сном во гро́бе, / и от тя́жкаго сна грехо́внаго / воздви́гл еси́ род челове́ческий.

76. Бу́ди же ми́лость Твоя́, да уте́шит мя, / по словеси́ Твоему́ рабу́ Твоему́.

Еди́на жен, кроме́ боле́зней роди́х Тя Ча́до, / боле́зни же ны́не терплю́ Стра́стию Твое́ю нестерпи́мыя, / глаго́лаше Чи́стая.

77. Да прии́дут мне щедро́ты Твоя́, и жив бу́ду, / я́ко зако́н Твой поуче́ние мое́ есть.

Горе́ Тя Спа́се, неразлу́чно со Отце́м су́ща, / до́ле же ме́ртва просте́рта на земли́, / ужаса́ются зря́ще Серафи́ми.

78. Да постыдя́тся го́рдии, я́ко непра́ведно беззако́нноваша на мя, / аз же поглумлю́ся в за́поведех Твои́х.

Раздира́ется церко́вная заве́са Твои́м распя́тием, / покрыва́ют свети́ла Сло́ве свет, / Тебе́, скры́вшуся Со́лнцу под зе́млю.

79. Да обратя́т мя боя́щиися Тебе́, / и ве́дящии свиде́ния Твоя́.

Земли́ изнача́ла еди́нем ма́нием водрузи́вый круг, / бездыха́нен, я́ко челове́к за́йде под зе́млю: / ужасни́ся виде́нием не́бо.

80. Бу́ди се́рдце мое́ непоро́чно во оправда́ниих Твои́х, / я́ко да не постыжу́ся.

Заше́л еси́ под зе́млю, руко́ю Твое́ю созда́вый челове́ка, / да воздви́гнеши от паде́ния собо́ры челове́ческия всеси́льною держа́вою.

81. Исчеза́ет во спасе́ние Твое́ душа́ моя́, / на словеса́ Твоя́ упова́х.

Плач свяще́нный прииди́те воспои́м Христу́ уме́ршему, / я́ко дре́вле жены́ мироно́сицы, / да и ра́дуйся услы́шим с ни́ми.

82. Исчезо́ша о́чи мои́ в сло́во Твое́, глаго́люще: / когда́ уте́шиши мя?

Ми́ро вои́стинну еси́ Ты, Слове неистощи́мое: / те́мже Ти и ми́ра приноша́ху, / я́ко ме́ртву Живо́му, жены́ мироно́сицы.

83. Зане́ бых я́ко мех на сла́не, / оправда́ний Твои́х не забы́х.

А́дова у́бо погребе́н ца́рствия, Христе́, сокруша́еши, / сме́ртию же смерть умерщвля́еши, / и тле́ния свобожда́еши земноро́дныя.

84. Коли́ко есть дней раба́ Твоего́? / Когда́ сотвори́ши ми от гоня́щих мя суд?

То́ки жи́зни пролива́ющая Бо́жия Прему́дрость, / во гроб заходя́щи, животвори́т / су́щия в незаходи́мых а́довых ме́стех.

85. Пове́даша мне законопресту́пницы глумле́ния, / но не я́ко закон Твой, Го́споди.

Да челове́ческое обновлю́ сокруше́нное естество́, / уя́звлен есмь сме́ртию хотя́ пло́тию: / Ма́ти Моя́, не терза́йся рыда́ньми.

86. Вся за́поведи Твоя́ и́стина, / непра́ведно погна́ша мя, помози́ ми.

Заше́л еси́ под зе́млю, Светоно́сец пра́вды, / и ме́ртвыя я́коже от сна воздви́гл еси́, / отгна́в вся́кую тьму су́щую во а́де.

87. Вма́ле не сконча́ша мене́ на земли́: / аз же не оста́вих за́поведей Твои́х.

Зе́рно двоера́сленное естественножи́зненное, / в бока́ земна́я се́ется со слеза́ми днесь: / но прозя́бше мир радостносотвори́т.

88. По ми́лости Твое́й живи́ мя, / и сохраню́ свиде́ния уст Твои́х.

Убоя́ся Ада́м, Бо́гу ходя́щу в раи́: / ра́дуется же, ко а́ду соше́дшу, / пады́й пре́жде, и ны́не воздвиза́емь.

89. Во век Го́споди, сло́во Твое́ / пребыва́ет на небеси́.

Жрет Тебе́ же́ртвы сле́зныя ро́ждшая Тя Христе́, / пло́тию положе́на во гро́бе, вопию́щи: / воста́ни Ча́до, я́коже предре́кл еси́.

90. В род и род и́стина Твоя́, / основа́л еси́ зе́млю, и пребыва́ет.

Во гро́бе Ио́сиф благогове́йно Тя но́вем сокрыва́я / пе́сни исхо́дныя боголе́пныя пое́т Тебе́, / смеше́ныя рыда́ньми Спа́се.

91. Учине́нием Твои́м пребыва́ет день, / я́ко вся́ческая рабо́тна Тебе́.

Гвоздьми́ Тя Кресту́ пригвожде́на, / Ма́ти Твоя́ Сло́ве зря́щи, / гвоздьми́ печа́ли го́рькия пронза́ет, и стрела́ми ду́шу.

92. Я́ко а́ще бы не зако́н Твой поуче́ние мое́ был, / тогда́ у́бо поги́бл бых во смире́нии мое́м.

Тя всех наслажде́ние Ма́ти зря́щи, / питие́м напая́ема го́рьким, / слеза́ми лице́ омака́ет го́рце.

93. Во век не забу́ду оправда́ний Твои́х, / я́ко в них оживи́л мя еси́.

Уязвля́юся лю́те, и растерза́юся утро́бою Сло́ве, зря́щи непра́ведное Твое́ заколе́ние, глаго́лаше Пречи́стая с пла́чем.

94. Твой есмь аз, спаси́ мя, / я́ко оправда́ний Твои́х взыска́х.

О́ко сла́дкое, и устне́ Твои́ ка́ко заключу́ Сло́ве? / Ка́ко же Тя мертволе́пно погребу́? / Ужаса́юся, вопия́ше Ио́сиф.

95. Мене́ жда́ша гре́шницы погуби́ти мя, / свиде́ния Твоя́ разуме́х.

Пе́сни Ио́сиф и Никоди́м надгро́бныя / пою́т Христу́ уме́ршему ны́не, / пою́т же с ни́ми и Серафи́ми.

96. Вся́кия кончи́ны ви́дех коне́ц, / широка́ за́поведь Твоя́ зело́.

Захо́диши под зе́млю Спа́се, Со́лнце пра́вды: / те́мже Ро́ждшая Тя Луна́ печа́льми оскудева́ет, / ви́да Твоего́ лиша́ема.

97. Коль возлюби́х зако́н Твой Го́споди, / весь день поуче́ние мое́ есть.

Ужасе́ся ад Спа́се, зря Тя Жизнода́вца, / бога́тство о́наго упраждня́юща, / и я́же от ве́ка ме́ртвыя возставля́юща.

98. Па́че враг мои́х умудри́л мя еси́ за́поведию Твое́ю, / я́ко в век моя́ есть.

Со́лнце свет возсиява́ет по но́щи Сло́ве: / и Ты же воскре́с, просиява́еши по сме́рти я́сно, / я́ко от черто́га.

99. Па́че всех уча́щих мя разуме́х, / я́ко свиде́ния Твоя́ поуче́ние мое́ есть.

Земля́ Тя Созда́телю, в не́дра прие́мши, / тре́петом содержи́ма Спа́се трясе́тся, / успи́вши ме́ртвыя трясе́нием.

100. Па́че ста́рец разуме́х, / я́ко за́поведи Твоя́ взыска́х.

Ми́ры Тя Христе́, Никоди́м и Благообра́зный, / ны́не новоле́пно помазу́юще, / ужасни́ся, вопия́ху, вся земля́.

101. От вся́каго пути́ лука́ва возбрани́х нога́м мои́м, / я́ко да сохраню́ словеса́ Твоя́.

Заше́л еси́ Светотво́рче, / и с Тобо́ю за́йде свет со́лнца: / тре́петом же тварь содержи́тся, / всех Тя пропове́дающи Творца́.

102. От суде́б Твои́х не уклони́хся, / я́ко Ты законоположи́л ми еси́.

Ка́мень углажде́нный, краеуго́льный покрыва́ет ка́мень: / челове́к же сме́ртный я́ко сме́ртна, / Бо́га покрыва́ет ны́не во гро́бе: / ужасни́ся земле́.

103. Коль сладка́ горта́ни моему́ словеса́ Твоя́, / па́че ме́да усто́м мои́м.

Виждь ученика́, его́же люби́л еси́, / и Твою́ Ма́терь Ча́до, / и веща́ние даждь сладча́йшее, / взыва́ше пла́чущи Чи́стая.

104. От за́поведей Твои́х разуме́х, / сего́ ра́ди возненави́дех всяк путь непра́вды.

Ты Сло́ве, я́ко сый живота́ Да́тель, / иуде́ов, на Кресте́ простры́йся, не умертви́л еси́, / но воскреси́л еси́ и сих ме́ртвыя.

105. Свети́льник нога́ма мои́ма зако́н Твой, / и свет стезя́м мои́м.

Добро́ты Сло́ве пре́жде не име́л еси́, / ниже́ ви́да, егда́ страда́л еси́, / но воскре́с провозсия́л еси́, / удобри́в челове́ки Боже́ственными заря́ми.

106. Кля́хся, и поста́вих / сохрани́ти судьбы́ пра́вды Твоея́.

Заше́л еси́ пло́тию в зе́млю, Невече́рний Светоно́сец, / и не терпя́ зре́ти со́лнце поме́рче, / полу́дни еще́ су́щу.

107. Смири́хся до зела́ Го́споди, / живи́ мя по словеси́ Твоему́.

Со́лнце вку́пе и луна́ поме́ркше Спа́се, / рабо́м благоразу́мным образова́хуся, / и́же в че́рныя оде́жды облача́тся.

108. Во́льная уст мои́х благоволи́ же / Го́споди, и судьба́м Твои́м научи́ мя.

Ви́де Тя Бо́га со́тник, а́ще и умертви́лся еси́: / ка́ко Тя у́бо Бо́же мой, осяжу́ рука́ма? / Ужаса́юся, вопия́ше Ио́сиф.

109. Душа́ моя́ в руку́ Твое́ю вы́ну, / и зако́на Твоего́ не забы́х.

Усну́ Ада́м, но смерть из ребр изво́дит: / Ты же ны́не усну́л еси́ Сло́ве Бо́жий, / источа́еши от ребр Твои́х ми́рови жизнь.

110. Положи́ша гре́шницы сеть мне, / и от за́поведей Твои́х не заблуди́х.

Усну́л еси́ ма́ло, и оживи́л еси́ уме́ршия, / и воскре́с, воскреси́л еси́ спя́щия от ве́ка Бла́же.

111. Насле́довах свиде́ния Твоя́ во век, / я́ко ра́дование се́рдца моего́ суть.

Взят еси́ от земли́, / но источи́л еси́ спасе́ния вино́, живото́чная Лозо́: / прославля́ю Страсть и Крест.

112. Приклони́х се́рдце мое́, / сотвори́ти оправда́ния Твоя́ в век за воздая́ние.

Ка́ко у́мная чинонача́лия Тя Спа́се пою́т, / на́га, окровавле́на, осужде́на, / терпя́ще де́рзость распина́телей?

113. Законопресту́пныя возненави́дех, / зако́н же Твой возлюби́х.

Обруче́нный, стропо́тнейший ро́де евре́йский, / ве́дал еси́ воздвиже́ние хра́ма, / почто́ осуди́л еси́ Христа́?

114. Помо́щник мой, и Засту́пник мой еси́ Ты, / на словеса́ Твоя́ упова́х.

Во оде́жду поруга́ния Украси́теля всех облека́еши, / И́же не́бо утверди́, и зе́млю украси́ чу́дно.

115. Уклони́теся от мене́, лука́внующии, / и испыта́ю за́поведи Бо́га моего́.

Я́коже нея́сыть уя́звлен в ре́бра Твоя́ Слове, / о́троки Твоя́ уме́ршия оживи́л еси́, / иска́пав живо́тныя им то́ки.

116. Заступи́ мя по словеси́ Твоему́ и жив бу́ду, / и не посрами́ мене́ от ча́яния моего́.

Со́лнце пре́жде уста́ви Иису́с, иноплеме́нники секи́й: / Ты же скры́лся еси́, низлага́я тьмы нача́льника.

117. Помози́ ми, и спасу́ся, / и поучу́ся во оправда́ниих Твои́х вы́ну.

Недр Оте́ческих неисхо́ден пребы́в Ще́дре, / и Челове́к бы́ти благоволи́л еси́, / и во ад снизше́л еси́ Христе́.

118. Уничижи́л еси́ вся отступа́ющия от оправда́ний Твои́х, / я́ко непра́ведно помышле́ние их.

Взя́тся распны́йся, / и́же на вода́х зе́млю пове́шей, / и я́ко бездыха́нен в ней ны́не возлега́ет: / я́же не терпя́щи тряса́шеся лю́те.

119. Преступа́ющия непщева́х вся гре́шныя земли́: / сего́ ра́ди возлюби́х свиде́ния Твоя́.

Увы́ мне, о Сы́не, / Неискусому́жная рыда́ше глаго́лющи: / Его́же бо я́ко Царя́ наде́яхся, / осужде́на зрю ны́не на Кресте́.

120. Пригвозди́ стра́ху Твоему́ пло́ти моя́, / от суде́б бо Твои́х убоя́хся.

Сия́ Гаврии́л Мне возвести́, егда́ слете́, / и́же Ца́рство ве́чное рече́, Сы́на Моего́ Иису́са.

121. Сотвори́х суд и пра́вду, / не преда́ждь мене́ оби́дящим мя.

Увы́, Симео́ново соверши́ся проро́чество: / Твой бо меч про́йде се́рдце Мое́, Емману́иле.

122. Восприими́ раба́ Твоего́ во бла́го, / да не оклевета́ют мене́ го́рдии.

Поне́ су́щих от ме́ртвых постыди́теся, о иуде́е! / И́хже Животода́вец возста́ви, / Его́же вы уби́сте зави́стно.

123. О́чи мои́ исчезо́сте во спасе́ние Твое́, / и в сло́во пра́вды Твоея́.

Ужасе́ся ви́девшее, неви́димый Све́те, / Тебе́ Христе́ мой во гро́бе сокрыва́ема, бездыха́нна же, / и помрачи́ со́лнце свет.

124. Сотвори́ с рабо́м Твои́м по ми́лости Твое́й / и оправда́нием Твои́м научи́ мя.

Пла́каше го́рько Пренепоро́чная Ма́ти Твоя́ Сло́ве, / егда́ во гро́бе ви́де Тебе́ Неизрече́ннаго и Безнача́льнаго Бо́га.

125. Раб Твой есмь аз, вразуми́ мя, / и уве́м свиде́ния Твоя́.

Ме́ртвость Твою́ нетле́нная Христе́, / Ма́ти Твоя́ зря́щи, / го́рько к Тебе́ веща́ше: / не косни́ Животе́ в ме́ртвых.

126. Вре́мя сотвори́ти Го́сподеви, / разори́ша зако́н Твой.

Ад лю́тый потрепета́, / егда́ Тя ви́де Со́лнце Сла́вы Безсме́ртне, / и издава́ше ю́зники тща́тельно.

127. Сего́ ра́ди возлюби́х за́поведи Твоя́ / па́че зла́та и топа́зия.

Ве́лие и ужа́сное виде́ние ны́не зри́тся: / живота́ сый Вино́вный, смерть подъя́т, / оживи́ти хотя всех.

128. Сего́ ра́ди ко всем за́поведем Твои́м направля́хся, / всяк путь непра́вды возненави́дех.

Пробода́ешися в ре́бра, / и пригвожда́ешися Влады́ко рука́ми, / я́зву от ребра́ Ты исцеля́я, / и невоздержа́ние рук пра́отец.

129. Ди́вна свиде́ния Твоя́, / сего́ ра́ди испыта́ я́ душа́ моя́.

Пре́жде Рахи́лина сы́на пла́каше всяк и́же в до́му, / и Сы́на Де́выя рыда́ху учени́к лик с Ма́терию.

130. Я́вление слове́с Твои́х / просвеща́ет, и вразумля́ет младе́нцы.

Ударе́ние рук да́ша Христо́вой лани́те, / руко́ю челове́ка созда́вшаго, / и че́люсти зве́ря сокруши́вшаго.

131. Уста́ моя́ отверзо́х, и привлеко́х дух, / я́ко за́поведей Твои́х жела́х.

Пе́сньми Твое́ Христе́, ны́не распя́тие и погребе́ние, вси ве́рнии пра́зднуем, / изба́вльшеся сме́рти погребе́нием Твои́м.

Слава, Троичен: Безнача́льне Бо́же, Соприсносу́щне Сло́ве, и Ду́ше Святы́й! / Лю́ди правосла́вныя в ве́ре укрепи́ на ра́тныя, я́ко Благ.

И ныне, Богородичен: Жизнь ро́ждшая, / Пренепоро́чная Чи́стая Де́во, / утоли́ церко́вныя собла́зны, / и пода́ждь мир, я́ко Блага́я.

И паки первый тропарь оба лика. Таже ектения малая.

Возглас во вторую статию: Я́ко Свят еси́ Бо́же наш, И́же на престо́ле сла́вы Херуви́мстем почива́яй, и Тебе́ сла́ву возсыла́ем, со Безнача́льным Твои́м Отце́м, и с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.

И начинаем третию статию, кадящу священнику.

Статия третия.

Начинает паки со сладкопением десный, сиречь первый лик, на глас 3-й:

Ро́ди вси песнь / погребе́нию Твоему́ прино́сят, Христе́ мой.

132. При́зри на мя, и поми́луй мя, / по суду́ лю́бящих и́мя Твое́.

Снем с дре́ва и́же от Аримафе́а, / плащани́цею обви́в / во гро́бе Тя погреба́ет.

133. Стопы́ моя́ напра́ви по словеси́ Твоему́, / и да не облада́ет мно́ю вся́кое беззако́ние.

Мироно́сицы приидо́ша, / ми́ра Тебе́ Христе́ мой, нося́щия прему́дро.

134. Изба́ви мя от клеветы́ челове́ческия, / и сохраню́ за́поведи Твоя́.

Гряди́ вся тварь, / пе́сни исхо́дныя принесе́м Зижди́телю.

135. Лице́ Твое́ просвети́ на раба́ Твоего́, / и научи́ мя оправда́нием Твои́м.

Я́ко ме́ртва Жива́го / с мироно́сицами, вси миропома́жем му́дренно.

136. Исхо́дища водна́я изведо́сте о́чи мои́, / поне́же не сохрани́х зако́на Твоего́.

Ио́сифе треблаже́нне, / погреби́ те́ло Христа́ Жизнода́вца.

137. Пра́веден еси́ Го́споди, / и пра́ви суди́ Твои́.

Ихже воспита манною, / воздвиго́ша пя́ту на Благоде́теля.

138. Запове́дал еси́ пра́вду, свиде́ния Твоя́, / и и́стину зело́.

И́хже воспита́ ма́нною, / прино́сят Спа́су желчь ку́пно и о́цет.

139. Иста́яла мя есть ре́вность Твоя́, / я́ко забы́ша словеса́ Твоя́ врази́ мои́.

О пребезу́мия и христоуби́йства пророкоуби́йц!

140. Разжже́но сло́во Твое́ зело́, / и раб Твой возлюби́ е́.

Я́коже безу́мный служи́тель, / предаде́ учени́к бе́здну прему́дрости.

141. Юне́йший аз есмь и уничиже́н, / оправда́ний Твои́х не забы́х.

Изба́вителя оста́вив, / пле́нник оста́вися льсти́вый Иу́да.

142. Пра́вда Твоя́ пра́вда во век, / и зако́н Твой и́стина.

По Соломо́ну, ров глубо́кий, / уста́ евре́й беззако́нных.

143. Ско́рби и ну́жди обрето́ша мя, / за́поведи Твоя́ поуче́ние мое́.

В стропо́тных ше́ствиих евре́ов беззако́нных, волчцы́ и се́ти.

144. Пра́вда свиде́ния Твоя́ в век: / вразуми́ мя, и жив бу́ду.

Ио́сиф погреба́ет с Никоди́мом мертволе́пно Зижди́теля.

145. Воззва́х всем се́рдцем мои́м, услы́ши мя Го́споди, / оправда́ния Твоя́ взыщу́.

Жизнода́вче Спа́се, / сла́ва держа́ве Твое́й, ад разо́ршей.

146. Воззва́х Ти, спаси́ мя, / и сохраню́ свиде́ния Твоя́.

Лежа́ща Тя Пречи́стая ви́дящи, Сло́ве, / матероле́пно пла́каше.

147. Предвари́х в безго́дии, и воззва́х, / на словеса́ Твоя́ упова́х.

О сладча́йшая Моя́ весно́, сладча́йшее Мое́ Ча́до! / Где Твоя́ за́йде добро́та?

148. Предвари́сте о́чи мои́ ко у́тру, / поучи́тися словесе́м Твои́м.

Плачь сподвиза́ше Всечи́стая Твоя́ Ма́ти, / Тебе́ Сло́ве уме́ршу.

149. Глас мой услы́ши Го́споди, по ми́лости Твое́й, / по судьбе́ Твое́й живи́ мя.

Жены́ с ми́ры приидо́ша / пома́зати Христа́ Боже́ственнаго ми́ра.

150. Прибли́жишася гоня́щии мя беззако́нием, / от зако́на же Твоего́ удали́шася.

Смерть сме́ртию Ты умерщвля́еши Бо́же мой, / Боже́ственною си́лою Твое́ю.

151. Близ еси́ Ты Го́споди, / и вси путие́ Твои́ и́стина.

Прельсти́ся преле́стник, / прельсти́выйся избавля́ется, / прему́дростию Твое́ю Бо́же мой.

152. Испе́рва позна́х от свиде́ний Твои́х, / я́ко во век основа́л я́ еси́.

Во дно а́дово низведе́н бысть преда́тель, / в кла́денец истле́ния.

153. Виждь смире́ние мое́, и изми́ мя, / я́ко зако́на Твоего́ не забы́х.

Волчцы́ и се́ти путие́ / треокая́ннаго безу́мнаго Иу́ды.

154. Суди́ суд мой, и изба́ви мя, / словесе́ ра́ди Твоего́ живи́ мя.

Вси спогиба́ют распина́телие Твои́ Сло́ве, / Сы́не Бо́жий Всецарю́.

155. Дале́че от гре́шник спасе́ние, / я́ко оправда́ний Твои́х не взыска́ша.

В кла́денец истле́ния вси спогиба́ют му́жие крове́й.

156. Щедро́ты Твоя́ мно́ги Го́споди, / по судьбе́ Твое́й живи́ мя.

Сы́не Бо́жий Всецарю́ Бо́же мой, Созда́телю мой, / ка́ко страсть подъя́л еси́?

157. Мно́зи изгоня́щии мя и стужа́ющии ми, / от свиде́ний Твои́х не уклони́хся.

Ю́ница Тельца́ на дре́ве пове́шена взыва́ше зря́щи.

158. Ви́дех неразумева́ющия и иста́ях, / я́ко слове́с Твои́х не сохрани́ша.

Те́ло живоно́сное Ио́сиф погреба́ет с Никоди́мом.

159. Виждь, я́ко за́поведи Твоя́ возлюби́х Го́споди, / по ми́лости Твое́й живи́ мя.

Взыва́ше Отрокови́ца / те́пле сле́зы точа́щи, / утро́бою пробода́ема.

160. Нача́ло слове́с Твои́х и́стина, / и во век вся судьбы́ пра́вды Твоея́.

Све́те о́чию Мое́ю, / Сладча́йшее Мое́ Ча́до! / Ка́ко во гро́бе ны́не покрыва́ешися?

161. Кня́зи погна́ша мя ту́не, / и от слове́с Твои́х убоя́ся се́рдце мое́.

Ада́ма и Е́ву свободи́ти, Ма́ти не рыда́й, сия́ стражду́.

162. Возра́дуюся аз о словесе́х Твои́х, / я́ко обрета́яй коры́сть мно́гу.

Прославля́ю Твое́, Сы́не Мой, кра́йнее благоутро́бие, / его́же ра́ди сия́ стра́ждеши.

163. Непра́вду возненави́дех и омерзи́х, / зако́н же Твой возлюби́х.

О́цтом напое́н был еси́ и же́лчию Ще́дре, / дре́внее разреша́я вкуше́ние.

164. Седмери́цею днем хвали́х Тя, / о судьба́х пра́вды Твоея́.

На кресте́ пригвозди́лся еси́, / дре́вле лю́ди Твоя́ столпо́м о́блачным покрыва́яй.

165. Мир мног лю́бящим зако́н Твой, / и несть им собла́зна.

Мироно́сицы Спа́се ко гро́бу прише́дшия, / ми́ра принесо́ша Тебе́.

166. Ча́ях спасе́ния Твоего́ Го́споди, / и за́поведи Твоя́ возлюби́х.

Воста́ни Ще́дре, / от про́пастей а́дских возставля́яй нас.

167. Сохрани́ душа́ моя́ свиде́ния Твоя́, / и возлюби́ я́ зело́.

Воскресни́ Жизнода́вче, / ро́ждшая Тя Ма́ти сле́зы точа́щи глаго́лет.

168. Сохрани́х за́поведи Твоя́ и свиде́ния Твоя́, / я́ко вси путие́ мои́ пред Тобо́ю, Го́споди.

Потщи́ся воскре́снути, печаль разреша́я Сло́ве, / чи́сто Ро́ждшия Тя.

169. Да прибли́жится моле́ние мое́ пред Тя Го́споди, / по словеси́ Твоему́ вразуми́ мя.

Небе́сныя си́лы ужасо́шася стра́хом, / ме́ртва Тя зря́ще.

170. Да вни́дет проше́ние мое́ пред Тя Го́споди, / по словеси́ Твоему́ изба́ви мя.

Любо́вию же и стра́хом Стра́сти Твоя́ почита́ющим, / даждь прегреше́ний разреше́ние.

171. Отры́гнут устне́ мои́ пе́ние, / егда́ научи́ши мя оправда́нием Твои́м.

О ужа́снаго и стра́ннаго виде́ния, Бо́жий Сло́ве! / Ка́ко земля́ Тя спокрыва́ет?

172. Провеща́ет язы́к мой словеса́ Твоя́, / я́ко вся за́поведи Твоя́ пра́вда.

Нося́й Тя дре́вле Спа́се, Ио́сиф бе́гает, / и ны́не Тя ины́й погреба́ет.

173. Да бу́дет рука́ Твоя́ е́же спасти́ мя, / я́ко за́поведи Твоя́ изво́лих.

Пла́чет и рыда́ет Тя Пречи́стая Ма́ти Твоя́, Спа́се мой умерщвле́наго.

174. Возжела́х спасе́ние Твое́ Го́споди, / и зако́н Твой поуче́ние мое́ есть.

Ужаса́ются умы́ стра́ннаго, / и ужа́снаго Тебе́ всех Созда́теля, погребе́ния.

175. Жива́ бу́дет душа́ моя́, и восхва́лит Тя, / и судьбы́ Твоя́ помо́гут мне.

Излия́ша на гроб мироно́сицы ми́ра, / зело́ ра́но прише́дшыя.

176. Заблуди́х я́ко овча́ поги́бшее, / взыщи́ раба́ Твоего́, я́ко за́поведей Твои́х не забы́х.

Мир Це́ркви, / лю́дем Твои́м спасе́ние / да́руй воста́нием Твои́м.

Слава: О Тро́ице Бо́же мой, / О́тче, Сы́не и Ду́ше, / поми́луй мир.

И ныне: Ви́дети Твоего́ Сы́на Воскресе́ние, / Де́во, сподо́би Твоя́ рабы́.

И абие поем тропари сия, во глас 5:

Благослове́н еси́, Го́споди, / научи́ мя оправда́нием Твои́м.

А́нгельский собо́р удиви́ся, / зря Тебе́ в ме́ртвых вмени́вшася, / сме́ртную же Спа́се кре́пость разори́вша, / и с Собо́ю Ада́ма воздви́гша, / и от а́да вся свобо́ждша.

Благослове́н еси́, Го́споди, / научи́ мя оправда́нием Твои́м.

Почто́ ми́ра с ми́лостивными слеза́ми, / о учени́цы растворя́ете? / Блиста́яйся во гро́бе А́нгел мироно́сицам веща́ше: / ви́дите вы гроб и уразуме́йте, / Спас бо воскре́се от гро́ба.

Благослове́н еси́, Го́споди, / научи́ мя оправда́нием Твои́м.

Зело́ ра́но мироно́сицы теча́ху / ко гро́бу Твоему́ рыда́ющия, / но предста́ к ним А́нгел и рече́: / рыда́ния вре́мя преста́, не пла́чите: / Воскресе́ние же апо́столом рцы́те.

Благослове́н еси́, Го́споди, / научи́ мя оправда́нием Твои́м.

Мироно́сицы жены́, с ми́ры прише́дшия / ко гро́бу Твоему́ Спа́се, рыда́ху, / А́нгел же к ним рече́, глаго́ля: / что с ме́ртвыми Жива́го помышля́ете? / Я́ко Бог бо воскре́се от гро́ба.

Слава, Троичен: Поклони́мся Отцу́, / и Его́ Сы́нови, и Свято́му Ду́ху, / Святе́й Тро́ице во Еди́ном Существе́, / с Серафи́мы зову́ще: / Свят, Свят, Свят еси́ Го́споди.

И ныне, Богородичен: Жизнода́вца ро́ждши, / греха́ Де́во Ада́ма изба́вила еси́, / ра́дость же Е́ве / в печа́ли ме́сто подала́ еси́: / па́дшия же от жи́зни / к сей напра́ви, / из Тебе́ воплоти́выйся Бог и Челове́к.

Аллилу́иа, трижды.

Таже ектения малая.

Возглас: Ты бо еси́ Царь ми́ра, Христе́ Бо́же наш, и Тебе́ сла́ву возсыла́ем, со Безнача́льным Твои́м Отце́м, и с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.

И поем седален дне, глас 1. Подобен: Гроб Твой, Спа́се:

Плащани́цею чи́стою, и арома́ты Боже́ственными / Те́ло Честно́е, испроси́в у Пила́та миропомазу́ет, / и полага́ет Ио́сиф в но́вом гро́бе. / Те́мже ура́нше мироно́сицы жены́, возопи́ша: / покажи́ нам, я́коже предре́кл еси́ Христе́, Воскресе́ние.

Слава: Покажи́ нам, я́коже предре́кл еси́ Христе́, Воскресе́ние.

И ныне, другий подобен:

Ужасо́шася ли́цы А́нгельстии, / зря́ще Седя́щаго в не́дрех О́тчих: / ка́ко во гроб полага́ется, я́ко мертв Безсме́ртный! / Его́же чи́ни А́нгельстии окружа́ют / и сла́вят с ме́ртвыми во а́де, / я́ко Зижди́теля и Го́спода.

Таже бывает чтение во Евангелии толковом, от Матфеа, зачало 114: Во у́трий же день, и́же есть по пятце́: Воскресе́ние Христо́во: не глаголем. Но абие псалом 50. И поем канон, ирмос по дважды, а тропари на 12. И паки последи ирмос оба лика вкупе. Есть же канон, от первыя песни до шестыя, творение Марка монаха, епископа Идруитскаго: ирмосы же творение жены некия, Кассии именуемыя. От 6-я же песни до конца творение господина Космы. Краегранесие же канона: Каи́ си́мерон де Са́вватон ме́лпо Ме́га. Сиесть: И днесь же Суббо́ту пою́ Вели́кую. Глас 6.

Песнь 1.

Ирмос: Волно́ю морско́ю / Скры́вшаго дре́вле, / гони́теля мучи́теля, под земле́ю скры́ша / спасе́нных о́троцы; / но мы, я́ко отрокови́цы, / Го́сподеви пои́м, / сла́вно бо просла́вися.

{Κ} Го́споди Бо́же мой, / исхо́дное пе́ние, и надгро́бную Тебе́ песнь воспою́, / погребе́нием Твои́м жи́зни моея́ вхо́ды отве́рзшему, / и сме́ртию смерть и ад умертви́вшему.

{Α} Горе́ Тя на Престо́ле и до́ле во гро́бе, / преми́рная и подзе́мная, помышля́ющая Спа́се мой, / зы́бляхуся умерщвле́нием Твои́м: / па́че ума́ бо ви́ден был еси́ мертв, Живонача́льниче.

{Ι} Да Твоея́ сла́вы вся испо́лниши, / сшел еси́ в ни́жняя земли́: / от Тебе́ бо не скры́ся соста́в мой, и́же во Ада́ме, и погребе́н, / истле́вша мя обновля́еши, Человеколю́бче.

Песнь 3.

Ирмос: Тебе́, на вода́х / пове́сившаго / всю зе́млю неодержи́мо, / тварь ви́девши / на ло́бнем ви́сима, / у́жасом мно́гим содрога́шеся, / несть свят, / ра́зве Тебе́ Го́споди, взыва́ющи.

{Σ} О́бразы погребе́ния Твоего́ показа́л еси́, виде́ния умно́жив. / Ны́не же сокрове́нная Твоя́ богому́жно уясни́л еси́, и су́щим во а́де Влады́ко, / несть свят, ра́зве Тебе́ Го́споди, взыва́ющим.

{Η} Просте́рл еси́ дла́ни, и соедини́л еси́ дре́вле разстоя́щаяся. / Одея́нием же Спа́се, е́же в плащани́це и во гро́бе, / окова́нныя разреши́л еси́, / несть свят, ра́зве Тебе́ Го́споди, взыва́ющия.

{Μ} Гро́бом и печа́тьми, Невмести́ме, / содержи́мь был еси́ хоте́нием: / и́бо си́лу Твою́ де́йствы показа́л еси́, / богоде́йственно пою́щим: / несть свят, ра́зве Тебе́ Го́споди, Человеколю́бче.

Седален, глас 1:

Гроб Твой Спа́се, во́ини стрегу́щии, / ме́ртви от облиста́ния я́вльшагося А́нгела бы́ша, / пропове́дающа жена́м Воскресе́ние. / Тебе́ сла́вим, тли потреби́теля! / Тебе́ припа́даем, Воскре́сшему из гро́ба, / и Еди́ному Бо́гу на́шему!

Слава, и ныне, тойже.

Песнь 4.

Ирмос: На Кресте́ Твое́ / Боже́ственное истоща́ние / прови́дя Авваку́м, / ужа́сся, вопия́ше: / Ты си́льных пресе́кл еси́ / держа́ву Бла́же, / приобща́яся су́щим во а́де, я́ко Всеси́лен.

{Ε} Седьмы́й день днесь освяти́л еси́, / его́же дре́вле благослови́л еси́ упокое́нием дел: / прево́диши бо вся́ческая и обновля́еши, / суббо́тствуя Спа́се мой, и назида́я.

{Ρ} Си́лою лу́чшаго, победи́вшаго Тебе́, / от пло́ти душа́ Твоя́ раздели́ся, / растерза́ющи бо обоя́ у́зы, / сме́рти и а́да, Сло́ве, держа́вою Твое́ю.

{Ο} Ад Сло́ве, срет Тя огорчи́ся, / челове́ка зря обоже́на, / уя́звлена ра́нами, и Всесильноде́теля, / стра́шным же зра́ком поги́бе.

Песнь 5.

Ирмос: Богоявле́ния Твоего́ Христе́, / к нам ми́лостивно бы́вшаго, / Иса́ия Свет ви́дев Невече́рний, / из но́щи у́треневав взыва́ше: / воскре́снут ме́ртвии, / и воста́нут су́щии во гробе́х, / и вси земноро́днии возра́дуются.

{Ν} Новотвори́ши земны́я Созда́телю, пе́рстен быв, / и плащани́ца и гроб явля́ют е́же в Тебе́ Сло́ве, та́инство. / Благообра́зный бо сове́тник, Тебе́ Ро́ждшаго сове́т образу́ет, / в Тебе́ велеле́пно новотворя́щаго мя.

{Δ} Сме́ртию сме́ртное, / погребе́нием тле́нное прелага́еши, / нетле́нно твори́ши бо, / боголе́пно безсме́ртно творя́ прия́тие, / плоть бо Твоя́ истле́ния не ви́де Влады́ко, / ниже́ душа́ Твоя́ во а́де странноле́пно оста́влена бысть.

{Ε} Из Небра́чныя проше́д, и прободе́н в ре́бра Соде́телю мой, / из Нея́ соде́лал еси́ обновле́ние Е́вино, Ада́м быв, / усну́в па́че естества́ сном есте́ственным, / и жизнь воздви́гнув от сна и тле́ния, я́ко Всеси́лен.

Песнь 6.

{Σ} Ирмос: Ят бысть, / но не удержа́н в пе́рсех ки́товых Ио́на: / Твой бо о́браз нося́, / Страда́вшаго, и погребе́нию да́вшагося, / я́ко от черто́га от зве́ря изы́де. / Приглаша́ше же кустоди́и, / храня́щии су́етная и ло́жная, / ми́лость сию́ оставили есте́.

{Α} Бие́н был еси́, но не раздели́лся еси́ Сло́ве, / ея́же причасти́лся еси́ пло́ти: / а́ще бо и разори́ся Твой храм во вре́мя стра́сти, / но и та́ко еди́н бе соста́в Божества́ и пло́ти Твоея́. / Во обои́х бо Еди́н еси́ Сын, Сло́во Бо́жие, Бог и Челове́к.

{Β} Человекоуби́йственно, но не богоуби́йственно бысть прегреше́ние Ада́мово: / а́ще бо и пострада́ Твоея́ пло́ти пе́рстное существо́, / но Божество́ безстра́стно пребы́сть, / тле́нное же Твое́ на нетле́ние преложи́л еси́, / и нетле́нныя жи́зни показа́л еси́ исто́чник Воскресе́нием.

{Β} Ца́рствует ад, но не ве́чнует над ро́дом челове́ческим: / Ты бо поло́жся во гро́бе Держа́вне, живонача́льною дла́нию, / сме́рти ключи́ разве́ргл еси́, / и пропове́дал еси́ от ве́ка та́мо спя́щим, избавле́ние нело́жное / быв Спа́се, ме́ртвым пе́рвенец.

Кондак, глас 6:

Бе́здну заключи́вый, мертв зри́тся, / и сми́рною и плащани́цею обви́вся, / во гро́бе полага́ется я́ко сме́ртный Безсме́ртный: / жены́ же приидо́ша пома́зати Его́ ми́ром, / пла́чущия го́рько и вопию́щия: / сия́ суббо́та есть преблагослове́нная, / в не́йже Христо́с усну́в, воскре́снет тридне́вен.

Икос: Содержа́й вся на Крест вознесе́ся, / и рыда́ет вся тварь, Того́ ви́дящи на́га ви́сяща на дре́ве, / со́лнце лучи́ сокры́, и зве́зды отложи́ша свет: / земля́ же со мно́гим стра́хом поколеба́ся, и мо́ре побеже́, / и ка́мение распаде́ся, гро́би же мно́ги отверзо́шася, / и телеса́ воста́ша святы́х муже́й. / Ад ни́зу сте́нет, / и иуде́е сове́туют оклевета́ти Христо́во Воскресе́ние. / Жены́ же взыва́ют: / сия́ суббо́та есть преблагослове́нная, / в не́йже Христо́с, усну́в, воскре́снет тридне́вен.

Синаксарий.

Песнь 7.

{Α} Ирмос: Неизрече́нное чу́до, / в пещи́ изба́вивый / преподо́бныя о́троки из пла́мене, / во гро́бе мертв / бездыха́нен полага́ется, / во спасе́ние нас пою́щих: / Изба́вителю Бо́же, / благослове́н еси́.

{Τ} Уязви́ся ад, в се́рдце / прие́м Уя́звеннаго копие́м в ре́бра, / и воздыха́ет огне́м Боже́ственным иждива́емь, / во спасе́ние нас пою́щих: / Изба́вителю Бо́же, благослове́н еси́.

{Ο} Бога́т гроб, / в себе́ бо прии́м я́ко спя́ща Соде́теля, / жи́зни Боже́ственное сокро́вище показа́ся, / во спасе́ние нас пою́щих: / Изба́вителю Бо́же, благослове́н еси́.

{Ν} Зако́ном уме́рших / е́же во гро́бе положе́ние, всех прие́млет Жизнь, / и сего́ исто́чника показу́ет воста́ния, / во спасе́ние нас пою́щих: / Изба́вителю Бо́же, благослове́н еси́.

{Μ} Еди́но бя́ше неразлу́чное, / е́же во а́де, и во гро́бе, и во Еде́ме, / Божество́ Христо́во, со Отце́м и Ду́хом, / во спасе́ние нас пою́щих: / Изба́вителю Бо́же, благослове́н еси́.

Песнь 8.

{Ε} Ирмос: Ужасни́ся боя́йся не́бо, / и да подви́жатся основа́ния земли́: / се бо в мертвеце́х вменя́ется в вы́шних Живы́й, / и во гроб мал странноприе́млется. / Его́же о́троцы благослови́те, / свяще́нницы воспо́йте, / лю́дие превозноси́те во вся ве́ки.

{Λ} Разруши́ся Пречи́стый храм, / па́дшую же совозставля́ет ски́нию: / Ада́му бо пе́рвому Вторы́й, И́же в вы́шних Живы́й, / сни́де да́же до а́довых сокро́вищ. / Его́же о́троцы благослови́те, / свяще́нницы воспо́йте, / лю́дие превозноси́те во вся ве́ки.

{Π} Преста́ де́рзость ученико́в, / Аримафе́й же изря́дствует Ио́сиф: / ме́ртва бо и на́га зря, над все́ми Бо́га, / про́сит и погреба́ет, зовы́й: / о́троцы благослови́те, / свяще́нницы воспо́йте, / лю́дие, превозноси́те во вся ве́ки.

{Ω} О чуде́с но́вых! / О бла́гости! / О неизрече́ннаго терпе́ния! / Во́лею бо под земле́ю печатле́ется, И́же в вы́шних Живы́й, / и я́ко льстец, Бог оклевета́ется. / Его́же о́троцы благослови́те, / свяще́нницы воспо́йте, / лю́дие превозноси́те во вся ве́ки.

Песнь 9.

{Μ} Ирмос: Не рыда́й Мене́ Ма́ти, / зря́щи во гро́бе, / Его́же во чре́ве без се́мене зачала́ еси́ Сы́на: / воста́ну бо и просла́влюся, / и вознесу́ со сла́вою, непреста́нно я́ко Бог, / ве́рою и любо́вию Тя велича́ющия.

{Ε} В стра́ннем Твое́м рождестве́, / боле́зней избежа́вше па́че естества́, / ублажи́хся Безнача́льне Сы́не: / ны́не же Тя Бо́же мой, / бездыха́нна зря́щи ме́ртва, / ору́жием печа́ли растерза́юся лю́те, / но воскресни́, я́ко да возвели́чуся.

{Γ} Земля́ покрыва́ет Мя хотя́ща, / но устраша́ются а́довы вра́тницы, / оде́яна ви́дяще оде́ждею окровавле́ною, Ма́ти, отмще́ния: / враги́ бо Кресто́м порази́в я́ко Бог, / воскре́сну па́ки, и возвели́чу Тя.

{Α} Да ра́дуется тварь, / да веселя́тся вси земноро́днии, / враг бо плени́ся ад: / с ми́ры жены́ да срета́ют, / Ада́ма со Е́вою избавля́ю всеро́дна, / и в тре́тий день воскре́сну.

Ексапостиларий, глас 2: Свят Госпо́дь Бог наш. (3)

На хвалитех поставим стихи 4 и поем стихиры самогласны, глас 2:

Днесь содержи́т гроб Содержа́щаго дла́нию тварь, / покрыва́ет ка́мень Покры́вшаго доброде́телию небеса́: / спит Живо́т, и ад трепе́щет, / и Ада́м от уз разреша́ется. / Сла́ва Твоему́ смотре́нию, / и́мже соверши́в все упокое́ние ве́чное, / дарова́л еси́ нам Бо́же, / всесвято́е из ме́ртвых Твое́ Воскресе́ние.

Что зри́мое виде́ние? / Ко́е настоя́щее упокое́ние? / Царь веко́в, И́же стра́стию соверши́в смотре́ние, / во гро́бе суббо́тствует, но́вое нам подая́ суббо́тство. / Тому́ возопии́м: / воскресни́ Бо́же, судя́й земли́, / я́ко Ты ца́рствуеши во ве́ки, / неизме́рную име́яй ве́лию ми́лость.

Прииди́те ви́дим Живо́т наш во гро́бе лежа́щь, / да во гробе́х лежа́щия оживи́т. / Прииди́те днесь И́же из Иу́ды спя́ща зря́ще, / проро́чески Ему́ возопии́м: / возле́г усну́л еси́ я́ко лев, / кто воздви́гнет Тя Царю́? / Но воста́ни самовла́стно, / да́вый Себе́ о нас во́лею, / Го́споди сла́ва Тебе́.

Глас 6: Проси́ Ио́сиф те́ло Иису́сово, / и положи́ е́ в но́вем свое́м гро́бе: / подоба́ше бо Ему́ из гро́ба, / я́ко из черто́га проити́. / Сокруши́вый держа́ву сме́рти, / и отве́рзый врата́ ра́йская челове́ком, / Го́споди, сла́ва Тебе́.

Слава, глас 6: Дне́шний день та́йно вели́кий Моисе́й / прообразова́ше, глаго́ля: / и благослови́ Бог день седьмы́й, / сия́ бо есть благослове́нная суббо́та. / Сей есть упокое́ния день, / во́ньже почи́ от всех дел Свои́х Единоро́дный Сын Бо́жий, / смотре́нием е́же на смерть, пло́тию суббо́тствовав: / и во е́же бе, па́ки возвра́щься Воскресе́нием, / дарова́ нам живо́т ве́чный, / я́ко Еди́н Благ и Человеколю́бец.

И ныне, Богородичен, глас 2: Преблагослове́нна еси́ Богоро́дице Де́во:

Славословие великое. Священник же облачается во всю священническую одежду, и входит со святым Евангелием. По Трисвятом же глаголет священник: Во́нмем. Мир всем. Прему́дрость. И мы тропарь единожды: Благообра́зный Ио́сиф:

И глаголем тропарь пророчества, глас 2:

Содержа́й концы́, / гро́бом содержа́тися изво́лил еси́, Христе́, / да от а́дова поглоще́ния изба́виши челове́чество / и воскре́с оживи́ши нас, / я́ко Бог Безсме́ртный.

Слава, конец. И ныне, весь.

Таже прокимен, глас 4: Воскресни́ Го́споди, помози́ нам, / и изба́ви нас и́мене ра́ди Твоего́. Стих: Бо́же, уши́ма на́шима услы́шахом и отцы́ на́ши возвести́ша нам.

Пророчества Иезекиилева чтение. [Глава 37, ст. 1 – 14.]

Бысть на мне рука́ Госпо́дня, и изведе́ мя в ду́се Госпо́дни, и поста́ви мя среде́ по́ля, се же бя́ше по́лно косте́й челове́ческих. И обведе́ мя о́крест их о́коло, и се мно́ги зело́ на лицы́ по́ля, и се су́хи зело́. И рече́ ко мне: сы́не челове́чь, оживу́т ли ко́сти сия́? И реко́х: Го́споди Бо́же, Ты ве́си сия́. И рече́ ко мне: сы́не челове́чь, прорцы́ на ко́сти сия́, и рече́ши им: ко́сти сухи́я, слы́шите сло́во Госпо́дне. Се глаго́лет Адонаи́ Госпо́дь косте́м сим: ее Аз введу́ в вас дух живо́тен. И дам на вас жи́лы, и возведу́ на вас плоть, и простру́ по вам ко́жу, и дам дух Мой в вас, и оживете́, и уве́сте, я́ко Аз есмь Госпо́дь. И прореко́х, я́коже запове́да ми Госпо́дь. И бысть глас внегда́ ми проро́чествовати, и се трус, и совокупля́хуся ко́сти, кость к ко́сти, ка́яждо к соста́ву своему́. И ви́дех, и се бы́ша им жи́лы, и плоть растя́ше, и восхожда́ше, [и протяже́ся] им ко́жа верху́, ду́ха же не бя́ше в них. И рече́ ко мне: прорцы́ о ду́се, прорцы́ сы́не челове́чь, и рцы ду́хови: сия́ глаго́лет Адонаи́ Госпо́дь, от четы́рех ве́тров прииди́ ду́ше, и вду́ни на ме́ртвыя сия́, и да оживу́т. И прореко́х, я́коже повеле́ ми: и вни́де в ня дух жи́зни, и ожи́ша, и ста́ша на нога́х свои́х, собо́р мног зело́. И рече́ Госпо́дь ко мне, глаго́ля: сы́не челове́чь, сия́ ко́сти весь дом Изра́илев есть, ти́и бо глаго́лют: су́хи бы́ша ко́сти на́ша, поги́бе наде́жда на́ша, убие́ни бы́хом. Того́ ра́ди прорцы́ [сы́не челове́чь], и рцы к ним, сия́ глаго́лет Адонаи́ Госпо́дь: се Аз отве́рзу гро́бы ва́ша, и изведу́ вас от гроб ва́ших, лю́дие Мои́, и введу́ вы в зе́млю Изра́илеву. И уве́сте, я́ко Аз есмь Госпо́дь, внегда́ отве́рсти Ми гро́бы ва́ша, е́же возвести́ Ми вас от гробо́в ва́ших, лю́дие Мои́: и дам дух Мой в вас, и жи́ви бу́дете. И поста́влю вы на земли́ ва́шей, и уве́сте, я́ко Аз Госпо́дь: глаго́лах, и сотворю́, глаго́лет Адонаи́ Госпо́дь.

Прокимен, глас 7: Воскресни́ Го́споди Бо́же мой, да вознесе́тся рука́ Твоя́, / не забу́ди убо́гих Твои́х до конца́. Стих: Испове́мся Тебе́, Го́споди, всем се́рдцем мои́м, пове́м вся чудеса́ Твоя́.

Апостол к Коринфянам, зачало 133:

Бра́тие, мал квас все смеше́ние ква́сит. Очи́стите у́бо ве́тхий квас, да бу́дете но́во смеше́ние, я́коже есте́ безква́сни: и́бо Па́сха на́ша за ны пожре́н бысть, Христо́с. Те́мже да пра́зднуем, не в ква́се ве́тсе, ни в ква́се зло́бы и лука́вства, но в безква́сиих чистоты́ и и́стины. Христо́с ны искупи́л есть от кля́твы зако́нныя, быв по нас кля́тва. Пи́сано бо есть: про́клят всяк ви́сяй на дре́ве. Да в язы́цех благослове́ние Авраа́мле бу́дет о Христе́ Иису́се, да обетова́ние Ду́ха прии́мем ве́рою.

Аллилуиа, глас 5: Да воскре́снет Бог, и расточа́тся врази́ Его́, и да бежа́т от Лица́ Его́ ненави́дящии Его́. Стих: Я́ко исчеза́ет дым, да исче́знут, я́ко та́ет воск от лица́ огня́. Стих: Та́ко да поги́бнут гре́шницы от Лица́ Бо́жия, а пра́ведницы да возвеселя́тся.

Евангелие от Матфеа, зачало 114:

Во у́трий день, и́же есть по пятце́, собра́шася архиере́е и фарисе́е к Пила́ту, глаго́люще: го́споди, помяну́хом, я́ко льстец он рече́, еще́ сый жив: по трие́х днех воста́ну. Повели́ у́бо утверди́ти гроб до тре́тияго дне, да не ка́ко прише́дше ученицы́ Его́ но́щию, укра́дут Его́, и реку́т лю́дем: воста́ от ме́ртвых, и бу́дет после́дняя лесть го́рша пе́рвыя. Рече́ же им Пила́т: и́мате кустоди́ю, иди́те, утверди́те, я́коже ве́сте. Они́ же ше́дше утверди́ша гроб, зна́менавше ка́мень с кустоди́ею.

Таже ектения: Рцем вси: и прочая, яко обычно. Испо́лним утреннюю моли́тву нашу: Такожде и прочая, яко обычно. И бывает отпуст.

И бывает целование плащаницы, а идеже несть плащаницы, целуют образ; певцы же поют стихиру, глас 5:

Прииди́те, ублажи́м Ио́сифа приснопа́мятнаго, / в нощи́ к Пила́ту прише́дшаго, / и Живота́ всех испроси́вшаго. / Даждь ми Сего́ стра́ннаго, / И́же не име́ет где главы́ подклони́ти; / даждь ми Сего́ стра́ннаго, Его́же учени́к лука́вый на смерть предаде́; / даждь ми Сего́ стра́ннаго, / Его́же Ма́ти зря́щи на Кресте́ ви́сяща, / рыда́ющи вопия́ше, / и ма́терски восклица́ше: / увы́ Мне, Ча́до Мое́! / Увы́ Мне, Све́те Мой, / и утро́ба Моя́ возлю́бленная! / Симео́ном бо предрече́нное в це́ркви днесь собы́сться: / Мое́ се́рдце ору́жие про́йде, / но в ра́дость Воскресе́ния Твоего́ / плач преложи́. / Покланя́емся Страсте́м Твои́м, Христе́; / покланя́емся Страсте́м Твои́м, Христе́; / покланя́емся Страсте́м Твои́м, Христе́, / и Свято́му Воскресе́нию.

Первый же час поется в притворе: третий же час, шестый и девятый поются вкупе просто в притворе с блаженными во свое время.

ВО СВЯТУЮ И ВЕЛИКУЮ СУББОТУ ВЕЧЕРА

О часе десятом дне клеплет Вечерню. И облачается священник во одежду, и, благословившу ему, начинаем предначинательный псалом, посем ектения великая. Таже Го́споди, воззва́х, во глас 1. Обители же священницы и диакони вси, достигшу стиху, глаголющу: Паду́т во мре́жу свою́: полагающе поклон, отходят, и облачатся и сии во одежди, и творят проскомидию. И поставим стихов 8. Поем же стихиры воскресныя Осмогласника три, и от стиховны едину.

Воскресны, глас 1:

Вече́рняя на́ша моли́твы / приими́, Святы́й Го́споди, / и пода́ждь нам оставле́ние грехо́в, / я́ко Еди́н еси́, / явле́й в ми́ре Воскресе́ние.

Обыди́те лю́дие Сио́н, / и обыми́те его́, / и дади́те сла́ву в нем Воскре́сшему из ме́ртвых: / я́ко Той есть Бог наш, / избавле́й нас от беззако́ний на́ших.

Прииди́те лю́дие / воспои́м, и поклони́мся Христу́, / сла́вяще Его́ из ме́ртвых Воскресе́ние: / я́ко Той есть Бог наш, / от ле́сти вра́жия мир избавле́й.

Стра́стию Твое́ю Христе́, / от страсте́й свободи́хомся, / и Воскресе́нием Твои́м из истле́ния изба́вихомся: / Го́споди, сла́ва Тебе́.

Ины стихиры самогласны, Великия Субботы три, повторяюще едину, глас 8:

Днесь ад стеня́ вопие́т: / у́не мне бя́ше, а́ще бых от Мари́и Ро́ждшагося не прия́л: / прише́д бо на мя, держа́ву мою́ разруши́, / врата́ ме́дная сокруши́: / ду́ши, я́же содержа́х пре́жде, Бог сый воскреси́. / Сла́ва Го́споди, Кресту́ Твоему́, и Воскресе́нию Твоему́.

Днесь ад стеня́ вопие́т: / разруши́ся моя́ власть, / прия́х Ме́ртваго я́ко еди́наго от уме́рших, / Сего́ бо держа́ти отню́д не могу́, / но погубля́ю с Ним, и́миже ца́рствовах: / аз име́х мертвецы́ от ве́ка, / но Сей [се] всех воздвиза́ет. / Сла́ва Го́споди Кресту́ Твоему́, и Воскресе́нию Твоему́.

Днесь ад стеня́ вопие́т: / поже́рта моя́ бысть держа́ва, / Па́стырь распя́тся, и Ада́ма воскреси́: / и́миже ца́рствовах, лиши́хся, / и я́же пожро́х возмоги́й, всех изблева́х. / Истощи́ гро́бы Распны́йся, / изнемога́ет сме́ртная держа́ва. / Сла́ва Го́споди Кресту́ Твоему́, и Воскресе́нию Твоему́.

Слава, глас 6: Дне́шний день та́йно вели́кий Моисе́й прообразова́ше, глаго́ля: / и благослови́ Бог день седьмы́й. / Сия́ бо есть благослове́нная Суббо́та, / сей есть упокое́ния день, / во́ньже почи́ от всех дел Свои́х, Единоро́дный Сын Бо́жий, / смотре́нием е́же на смерть, пло́тию суббо́тствовав: / и во е́же бе, па́ки возвра́щься воскресе́нием, / дарова́ нам живо́т ве́чный, / я́ко Еди́н Благ, и Человеколю́бец.

И ныне, Богородичен, глас 1: Всеми́рную сла́ву / от челове́к прозя́бшую, / и Влады́ку ро́ждшую, / небе́сную дверь / воспои́м Мари́ю Де́ву, / безпло́тных песнь, и ве́рных удобре́ние; / Сия́ бо яви́ся не́бо, и храм Божества́; / Сия́ прегражде́ние вражды́ разруши́вши, / мир введе́, и Ца́рствие отве́рзе. / Сию́ у́бо иму́ще ве́ры утвержде́ние, / побо́рника и́мамы из Нея́ ро́ждшагося Го́спода. / Дерза́йте у́бо, дерза́йте лю́дие Бо́жии: / и́бо Той победи́т враги́ я́ко Всеси́лен.

Вход с Евангелием. Све́те ти́хий: Прокимен не глаголем, но абие: Прему́дрость. И начинает чтец чтения.

Бытия чтение. [Гл. 1, ст. 1 – 13]

В нача́ле сотвори́ Бог не́бо и зе́млю. Земля́ же бе неви́дима, и неустро́ена, и тьма верху́ бе́здны, и Дух Бо́жий ноша́шеся верху́ воды́. И рече́ Бог: да бу́дет свет. И бысть свет. И ви́де Бог свет, я́ко добро́, и разлучи́ Бог между́ све́том, и между́ тьмо́ю. И нарече́ Бог свет день, а тьму нарече́ нощь. И бысть ве́чер, и бысть у́тро, день еди́н. И рече́ Бог: да бу́дет твердь посреде́ воды́, и да бу́дет разлуча́ющи посреде́ воды́ и воды́. И бысть та́ко. И сотвори́ Бог твердь, и разлучи́ Бог между́ водо́ю, я́же бе под тве́рдию, и между́ водо́ю, я́же бе над тве́рдию. И нарече́ Бог твердь не́бо. И ви́де Бог, я́ко добро́. И бысть ве́чер, и бысть у́тро, день вторы́й. И рече́ Бог: да собере́тся вода́, я́же под небесе́м, в собра́ние еди́но, и да яви́тся су́ша. И бысть та́ко. И собра́ся вода́, я́же под небесе́м, в собра́ния своя́, и яви́ся су́ша. И нарече́ Бог су́шу, зе́млю, и собра́ния вод нарече́ моря́. И ви́де Бог, я́ко добро́. И рече́ Бог: да прорасти́т земля́ бы́лие травно́е, се́ющее се́мя по ро́ду и по подо́бию, и дре́во плодови́тое творя́щее плод, ему́же се́мя его́ в нем по ро́ду на земли́. И бысть та́ко. И изнесе́ земля́ бы́лие травно́е, се́ющее се́мя по ро́ду и по подо́бию, и дре́во плодови́тое творя́щее плод, ему́же се́мя его́ в нем по ро́ду на земли́. И ви́де Бог, я́ко добро́. И бысть ве́чер, и бысть у́тро, день тре́тий.

Пророчества Исаиина чтение. [Гл. 60, ст. 1 – 16]

Свети́ся свети́ся Иерусали́ме, прии́де бо твой свет, и сла́ва Госпо́дня на тебе́ возсия́. Се тьма покры́ет зе́млю, и мрак на язы́ки, на тебе́ же яви́тся Госпо́дь, и сла́ва Его́ на тебе́ у́зрится. И по́йдут ца́рие све́том твои́м, и язы́цы све́тлостию твое́ю. Возведи́ о́крест о́чи твои́, и виждь собра́ная ча́да твоя́: се приидо́ша вси сы́нове твои́ издале́ча, и дще́ри твои́ на ра́мех во́змутся. Тогда́ у́зриши, и возра́дуешися, и убои́шися, и ужа́снешися се́рдцем, я́ко преложи́тся к тебе́ бога́тство морско́е, и язы́ков и люде́й. И прии́дут к тебе́ стада́ вельблю́д, и покры́ют тя вельблю́ди Мадиа́мстии и Гефа́рстии: вси от Савы́ прии́дут, нося́ще зла́то, и лива́н принесу́т, и ка́мень че́стен, и спасе́ние Госпо́дне благовозвестя́т. И вся о́вцы Кида́рския соберу́тся тебе́, и овни́ Навео́фстии прии́дут к тебе́, и вознесу́тся прия́тная на же́ртвенник Мой, и дом моли́твы Моея́ просла́вится. Ки́и суть, и́же я́ко о́блацы, летя́т, и я́ко го́луби со птенцы́ ко Мне? Мене́ о́строви жда́ша, и корабли́ Фарси́йстии в пе́рвых, привести́ ча́да твоя́ издале́ча, и сребро́ и зла́то их с ни́ми, и́мене ра́ди Госпо́дня Свята́го, и за е́же Свято́му Изра́илеву сла́вну бы́ти. И созиждут сы́нове иноро́днии сте́ны твоя́, и ца́рие их предстоя́ти бу́дут тебе́: за гнев бо Мой порази́х тя, и за ми́лость Мою́ возлюби́х тя. И отве́рзутся врата́ твоя́ при́сно, день и нощь не затворя́тся, ввести́ к тебе́ си́лу язы́к, и цари́ их ведо́мыя. Язы́цы бо и ца́рие, и́же не порабо́тают ти, поги́бнут, и язы́цы запусте́нием запусте́ют. И сла́ва Лива́нова к тебе́ прии́дет, кипари́сом, и пе́вгом, и ке́дром, вку́пе просла́вити ме́сто свято́е Мое́, и ме́сто ног Мои́х просла́влю. И по́йдут к тебе́ боя́щеся сы́нове смири́вших тя, и раздражи́вших тя, и покло́нятся следа́м ног твои́х вси прогне́вавшии тя: и нарече́шися град Госпо́день, Сио́н Свята́го Изра́илева. За сие́, я́ко был еси́ оста́влен и возненави́ден, и не бе помога́ющаго ти, положу́ тя в ра́дость ве́чную, весе́лие родо́м родо́в. И иссе́ши млеко́ язы́ков, и бога́тство царе́й сне́си, и уразуме́еши, я́ко Аз Госпо́дь спаса́яй тя, и избавля́яй тя Бог Изра́илев.

Исхода чтение. [Гл. 12, ст. 1 – 11]

Рече́ Госпо́дь к Моисе́ю и Ааро́ну в земли́ Еги́петстей, глаго́ля: ме́сяц сей вам нача́ло ме́сяцей, пе́рвый бу́дет вам в ме́сяцех ле́та. Рцы ко всему́ со́нму сыно́в Изра́илевых, глаго́ля: в деся́тый ме́сяца сего́ да во́змет ки́йждо овча́ по домо́м оте́честв, ки́йждо овча́ по до́му. А́ще же ма́ло их есть в дому́, я́ко не дово́льным бы́ти на овча́, да во́змет с собо́ю сосе́да бли́жняго своего́ по числу́ душ, ки́йждо дово́льное себе́ сочте́т на овча́. Овча́ соверше́нно, му́жеск пол, непоро́чно и единоле́тно бу́дет вам, от а́гнец и от ко́злищ прии́мете. И бу́дет вам соблюде́но да́же до четвертагона́десять дне ме́сяца сего́: и зако́лют то все мно́жество собо́ра сыно́в Изра́илевых к ве́черу. И прии́мут от кро́ве, и пома́жут на обою́ подво́ю, и на пра́гах в доме́х, в ни́хже снедя́т то́е. И снедя́т мяса́ в нощи́ той пече́на огне́м и опресно́ки с го́рьким зе́лием снедя́т. Не сне́сте от них су́рово, ниже́ варе́но в воде́, но пече́ное огне́м главу́ с нога́ми и со утро́бою. Не оста́вите от него́ до у́трия, и ко́сти не сокруши́те от него́: оста́нки же от него́ до у́тра, огне́м сожже́те. Си́це же сне́сти е́: чресла́ ва́ша препоя́сана, и сапо́зи ва́ши на нога́х ва́ших, и жезлы́ ва́ши в рука́х ва́ших: и сне́сте е́ со тща́нием: па́сха есть Госпо́дня.

Пророчества Ионина чтение. [Гл. 1, ст. 1 – 16. Гл. 2, ст. 1 – 3]

Бысть сло́во Госпо́дне ко Ио́не сы́ну Амафи́ину, глаго́ля: воста́ни и иди́ в Ниневи́ю град вели́кий: и пропове́ждь в нем, я́ко взы́де вопль зло́бы его́ ко Мне. И воста́ Ио́на, е́же бежа́ти в Фарси́с от Лица́ Госпо́дня: и сни́де во Иоппи́ю, и обре́те кора́бль иду́щь в Фарси́с: и даде́ нае́м свой, и вни́де в онь плы́ти с ни́ми в Фарси́с от Лица́ Госпо́дня. И Госпо́дь воздви́же ветр ве́лий на мо́ри, и бысть бу́ря вели́кая в мо́ри, и кора́бль бе́дствоваше е́же сокруши́тися. И убоя́шася корабе́льницы, и возопи́ша ки́йждо к бо́гу своему́, и измета́ние сотвори́ша сосу́дов, и́же в корабли́, в мо́ре, е́же облегчи́тися от них: Ио́на же сни́де во дно корабля́, и спа́ше ту, и храпля́ше. И прии́де к нему́ ко́рмчий, и рече́ ему́: что ты хра́плеши? Воста́ни, и моли́ Бо́га твоего́, я́ко да спасе́т ны Бог, да не поги́бнем. И рече́ ки́йждо ко и́скреннему своему́: прииди́те ве́ржем жре́бия, и уразуме́ем, кого́ ра́ди есть зло сие́ на нас. И метну́ша жре́бия, и паде́ жре́бий на Ио́ну. И ре́ша к нему́: возвести́ нам, кого́ ра́ди сие́ зло на нас, и что твое́ де́лание есть, и отку́ду гряде́ши, и ка́мо и́деши, и от ко́ея страны́, и от ки́их люде́й еси́ ты? И рече́ к ним: раб Госпо́день есмь аз, и Го́спода Бо́га Небе́снаго аз чту, И́же сотвори́ мо́ре и су́шу. И убоя́шася му́жие стра́хом вели́ким, и ре́ша к нему́: что сие́ сотвори́л еси́? Зане́ разуме́ша му́жие, я́ко от Лица́ Госпо́дня бежа́ше, я́ко возвести́ им. И ре́ша к нему́: что тебе́ сотвори́м, и утоли́тся мо́ре от нас? Зане́ мо́ре восхожда́ше и воздвиза́ше па́че волне́ние. И рече́ к ним Ио́на: возми́те мя, и вве́рзите в мо́ре, и утоли́тся мо́ре от вас: поне́же позна́х аз, я́ко мене́ ра́ди волне́ние сие́ вели́кое на вы есть. И нужда́хуся му́жие возврати́тися к земли́, и не можа́ху, я́ко мо́ре восхожда́ше, и воздвиза́шеся па́че на них. И возопи́ша к Го́сподеви, и ре́ша: ника́коже Го́споди, да не поги́бнем души́ ра́ди челове́ка сего́, и не даждь на нас кро́ве пра́ведныя: зане́ Ты Го́споди, я́коже восхоте́л, сотвори́л еси́. И взя́ша Ио́ну, и вверго́ша его́ в мо́ре, и преста́ мо́ре от волне́ния своего́. И убоя́шася му́жие стра́хом вели́ким Го́спода, и пожро́ша же́ртву Го́сподеви, и помоли́шася моли́твами. И повеле́ Госпо́дь ки́ту вели́кому пожре́ти Ио́ну: и бе Ио́на во чре́ве ки́тове три дни и три но́щи. И помоли́ся Ио́на ко Го́споду Бо́гу своему́ от чре́ва ки́това, и рече́:

Молитва: [Гл. 2, ст. 4 – 11. Гл. 3, ст. 1 – 10. Гл. 4, ст. 1 – 14]

Возопи́х в ско́рби мое́й ко Го́споду Бо́гу моему́, и услы́ша мя: из чре́ва а́дова вопль мой, услы́шал еси́ глас мой. Отве́ргл мя еси́ в глубины́ се́рдца морска́го, и ре́ки обыдо́ша мя: вся высоты́ Твоя́, и во́лны Твоя́ на мне преидо́ша. И аз рех: отри́нулся от о́чию Твое́ю: еда́ приложу́ призре́ти ми к хра́му свято́му Твоему́? Возлия́ся на мя вода́ до души́ моея́, бе́здна обы́де мя после́дняя, понре́ глава́ моя́ в разсе́лины гор. Снидо́х в зе́млю, ея́же вереи́ ея́ закле́пи ве́чнии: и да взы́дет из истле́ния живо́т мой к Тебе́, Го́споди Бо́же мой. Внегда́ скончава́тися от мене́ души́ мое́й, Го́спода помяну́х, и да прии́дет к Тебе́ моли́тва моя́ к хра́му свято́му Твоему́. Храня́щии су́етная и ло́жная, ми́лость свою́ оста́виша. Аз же со гла́сом хвале́ния и испове́дания пожру́ Тебе́, ели́ка обеща́х, возда́м Тебе́ во спасе́ние мое́ Го́сподеви.

И повеле́ Госпо́дь ки́тови, и изве́рже Ио́ну на су́шу. И бысть сло́во Госпо́дне ко Ио́не втори́цею, глаго́ля: воста́ни, и иди́ в Ниневи́ю град вели́кий, и пропове́ждь в нем по про́поведи пре́ждней, ю́же Аз глаго́лах тебе́. И воста́ Ио́на, и и́де в Ниневи́ю, я́коже глаго́ла Госпо́дь: Ниневи́а же бя́ше град вели́к Бо́гу, я́ко ше́ствия пути́ трех дней. И нача́т Ио́на входи́ти во град, я́ко ше́ствие пути́ дне еди́наго, и пропове́да и рече́: еще́ три дни, и Ниневи́а преврати́тся. И ве́роваша му́жие Ниневи́йстии Бо́гови, и запове́даша пост, и облеко́шася во вре́тища от вели́ка их да́же до ма́ла их. И до́йде сло́во к царю́ Ниневи́йскому, и воста́ с престо́ла своего́, и све́рже ри́зы своя́ с себе́, и облече́ся во вре́тище, и се́де на пе́пеле. И пропове́дася, и рече́но бысть в Ниневи́и от царя́ и вельмо́ж его́, глаго́лющих: челове́цы и ско́ти, и воло́ве, и о́вцы да не вку́сят ничесо́же, ни да пасу́тся, ниже́ воды́ да пию́т. И облеко́шася во вре́тища челове́цы, и ско́ти, и возопи́ша приле́жно к Бо́гу: и возврати́ся ки́йждо от пути́ своего́ лука́ваго, и от непра́вды су́щия в рука́х их, глаго́люще: кто весть, а́ще раска́ется и умоле́н бу́дет Бог, и обрати́тся от гне́ва я́рости Своея́, и не поги́бнем? И ви́де Бог дела́ их, я́ко обрати́шася от путе́й свои́х лука́вых: и раска́яся Бог о зле, е́же глаго́лаше сотвори́ти им, и не сотвори́. И опеча́лися Ио́на печа́лию вели́кою, и смути́ся. И помоли́ся ко Го́споду, и рече́: о Го́споди, не сия́ ли у́бо словеса́ моя́, я́же глаго́лах, еще́ су́щу ми на земли́ мое́й? Сего́ ра́ди предвари́х бежа́ти в Фарси́с, зане́ разуме́х, я́ко ми́лостив Ты еси́ и щедр, долготерпели́в и многоми́лостив, и ка́яйся о зло́бах [челове́ческих]. И ны́не Влады́ко Го́споди, приими́ ду́шу мою́ от мене́, я́ко у́не ми умре́ти, не́жели жи́ти. И рече́ Госпо́дь ко Ио́не: а́ще зело́ опеча́лился еси́ ты? И изы́де Ио́на из гра́да, и се́де пря́мо гра́да, и сотвори́ себе́ ку́щу, и седя́ше под не́ю в се́ни, до́ндеже уви́дит, что бу́дет гра́ду. И повеле́ Госпо́дь Бог ты́кве, и возрасте́ над главо́ю Ио́ниною, да бу́дет сень над главо́ю его́, е́же осени́ти его́ от злых его́: и возра́довася Ио́на о ты́кве ра́достию вели́кою. И повеле́ Госпо́дь Бог че́рвию ра́ннему во у́трие, и подъяде́ ты́кву, и и́зсше. И бысть вку́пе внегда́ возсия́ти со́лнцу, и повеле́ Бог ве́тру зно́йну жегу́щу, и порази́ со́лнце на главу́ Ио́нину: и малоду́шствоваше, и отрица́шеся души́ своея́, и рече́: у́не ми умре́ти, не́жели жи́ти. И рече́ Госпо́дь Бог ко Ио́не: зело́ ли опеча́лился еси́ ты о ты́кве? И рече́ [Ио́на]: зело́ опеча́лихся аз да́же до сме́рти. И рече́ Госпо́дь: ты оскорби́лся еси́ о ты́кве, о не́йже не труди́лся еси́, ни воскорми́л еси́ ея́, я́же роди́ся обно́щь, и обно́щь поги́бе. Аз же не пощажду́ ли Ниневи́и гра́да вели́каго, в не́мже живу́т мно́жайшии, не́же двана́десять тем челове́к, и́же не позна́ша десни́цы своея́, ниже́ шу́йцы своея́, и ско́ти их мно́зи?

Иисуса Навина чтение. [Гл. 5, ст. 1 – 15]

Ополчи́шася сы́нове Изра́илевы в Галга́лех, и сотвори́ша па́сху в четвертыйна́десять день ме́сяца от ве́чера на за́паде на по́ли Иерихо́нском. И ядо́ша от пшени́цы земли́ о́ныя опресно́ки и но́вая. В той день преста́ ма́нна, повнегда́ ядо́ша от пшени́цы земли́, и ктому́ не бысть сыно́м Изра́илевым ма́нны, но ядо́ша от плодо́в земли́ Фини́ческия в ле́то о́ное. И бысть егда́ бя́ше Иису́с у Иерихо́на, и воззре́в очи́ма свои́ма, ви́де челове́ка стоя́ща пред ним, и меч его́ обнаже́н в руце́ его́. И приступи́в Иису́с рече́ ему́: наш ли еси́, или́ от супоста́т на́ших? Он же рече́ ему́: аз Архистрати́г си́лы Госпо́дни, ны́не приидо́х [се́мо]. И Иису́с паде́ лице́м свои́м на зе́млю, и поклони́ся ему́, и рече́: го́споди, что повелева́еши рабу́ твоему́? И рече́ Архистрати́г Госпо́день ко Иису́су: иззу́й сапо́г с ногу́ твое́ю, ме́сто бо на не́мже ты стои́ши свя́то есть. И сотвори́ Иису́с та́ко.

Исхода чтение. [Гл. 13, ст. 20 – 22. Гл. 14, ст. 1 – 32. Гл. 15, ст. 1 – 19]

Воздви́гшеся сы́нове Изра́илевы от Сокхо́фа, ополчи́шася во Офо́ме при пусты́ни. Бог же вожда́ше их, в день у́бо столпо́м о́блачным, показа́ти им путь, но́щию же столпо́м о́гненным, свети́ти им. И неоскуде́ столп о́блачный во дни, и столп о́гненный но́щию, пред все́ми людьми́. И рече́ Госпо́дь к Моисе́ю, глаго́ля: рцы сыно́м Изра́илевым, и обрати́вшеся да ополча́тся пря́мо придво́рию, между́ Магдо́лом и между́ мо́рем, пря́мо Веельсенфо́ну: пред ни́ми ополчи́шися при мо́ри. И рече́т фарао́н лю́дем свои́м о сыне́х Изра́илевых: заблужда́ют си́и по земли́, затвори́ бо их пусты́ня. Аз же ожесточу́ се́рдце фарао́ново, и пожене́т созади́ их: и просла́влюся в фарао́не и во всем во́инстве его́, и уразуме́ют вси еги́птяне, я́ко Аз есмь Госпо́дь. И сотвори́ша та́ко. И возвеще́но бысть царю́ еги́петскому, я́ко бежа́ша лю́дие. И преврати́ся се́рдце фарао́ново, и рабо́в его́ на лю́ди, и реко́ша: что сие́ сотвори́хом, отпусти́вше сы́ны Изра́илевы, да не рабо́тают нам? Впряже́ у́бо фарао́н колесни́цы своя́, и вся лю́ди своя́ собра́ с собо́ю. И поя́т шесть сот колесни́ц избра́нных, и вся ко́ни еги́петския, и триста́ты над все́ми. И ожесточи́ Госпо́дь се́рдце фарао́на царя́ еги́петскаго, и рабо́в его́, и погна́ созади́ сыно́в Изра́илевых: сы́нове же Изра́илевы исхожда́ху руко́ю высо́кою. И погна́ша еги́птяне в след их, и обрето́ша их ополчи́вшихся при мо́ри: и вси ко́ни и колесни́цы фарао́новы, и ко́нницы, и во́инство его́ пря́мо придво́рию, проти́ву Веельсепфо́на. И фарао́н приближа́шеся. Воззре́вше же сы́нове Изра́илевы очи́ма, ви́деша: и се еги́птяне ополчи́шася в след их, и убоя́шася зело́. И возопи́ша сы́нове Изра́илевы ко Го́споду, и реко́ша к Моисе́ю: за е́же не бы́ти гробо́м во Еги́пте, изве́л еси́ нас умертви́ти в пусты́ни; что сие́ сотвори́л еси́ нам, извед нас из Еги́пта? Не сей ли бя́ше глаго́л, его́же реко́хом к тебе́ во Еги́пте, глаго́люще: оста́ви нас, да рабо́таем еги́птяном; лу́чше бо бя́ше нам рабо́тати еги́птяном, не́жели умре́ти в пусты́ни сей. Рече́ же Моисе́й к лю́дем: дерза́йте, сто́йте, и зри́те спасе́ние е́же от Го́спода, е́же сотвори́т нам днесь. И́мже бо о́бразом ви́десте еги́птян днесь, не приложите́ ктому́ ви́дети их в ве́чное вре́мя. Госпо́дь побо́рет по вас, вы же умо́лкните. И рече́ Госпо́дь к Моисе́ю: что вопие́ши ко Мне? Рцы сыно́м Изра́илевым, и да путеше́ствуют. Ты же возми́ жезл твой, и простри́ ру́ку твою́ на мо́ре, и расто́ргни е́: и да вни́дут сы́нове Изра́илевы посреде́ мо́ря по су́ху. И се Аз ожесточу́ се́рдце фарао́ново, и всех еги́птян, и вни́дут в след их, и просла́влюся в фарао́не, и во всем во́инстве его́, и в колесни́цах, и в ко́нех его́. И уве́дят вси еги́птяне, я́ко Аз есмь Госпо́дь, егда́ просла́влюся в фарао́не, и в колесни́цах, и в ко́нех его́. Взя́тся же А́нгел Бо́жий ходя́й пред полко́м сыно́в Изра́илевых, и по́йде созади́ их: взя́тся же и столп о́блачный от лица́ их, и ста созади́ их. И вни́де посреде́ полка́ еги́петска, и посреде́ полка́ сыно́в Изра́илевых, и ста: и бысть тьма и мрак, и прии́де нощь, и не смеси́шася друг с дру́гом во всю нощь. Простре́ же Моисе́й ру́ку на мо́ре: и возгна́ Госпо́дь мо́ре ве́тром ю́жным си́льным всю нощь, и сотвори́ мо́ре су́шу, и разступи́ся вода́. И внидо́ша сы́нове Изра́илевы посреде́ мо́ря по су́ху: и вода́ им стена́ бысть одесну́ю, и стена́ ошу́юю. Погна́ша же еги́птяне, и внидо́ша в след их, и всяк конь фарао́нов, и колесни́цы, и вса́дники посреде́ мо́ря. Бысть же в стра́жу у́треннюю, и воззре́ Госпо́дь на полк еги́петский в столпе́ о́гненнем и о́блачном, и смяте́ полк еги́петский. И связа́ о́си колесни́ц их, и ведя́ше их с ну́ждею. И реко́ша еги́птяне: бежи́м от лица́ Изра́илева, Госпо́дь бо побора́ет по них на еги́птяны. И рече́ Госпо́дь к Моисе́ю: простри́ ру́ку твою́ на мо́ре, и да совокупи́тся вода́, и да покры́ет еги́птяны, колесни́цы же и вса́дники. Простре́ же Моисе́й ру́ку на мо́ре, и устро́ися вода́ ко дню на ме́сто: еги́птяне же бежа́ша под водо́ю: и истрясе́ Госпо́дь еги́птяны посреде́ мо́ря. И обрати́вшися вода́, покры́ колесни́цы и вса́дники, и всю си́лу фарао́нову, вше́дши в след их в мо́ре, и не оста́ от них ни еди́н. Сы́нове же Изра́илевы проидо́ша по су́ху посреде́ мо́ря: вода́ же им стена́ [бысть] одесну́ю и стена́ ошу́юю. И изба́ви Госпо́дь Изра́иля в день он из руки́ еги́петския: и ви́деша сы́нове Изра́илевы еги́птян изме́рших, при краи́ мо́ря. Ви́де же Изра́иль ру́ку вели́кую, я́же сотвори́ Госпо́дь еги́птяном: и убоя́шася лю́дие Го́спода, и ве́роваша Бо́гу, и Моисе́ю уго́днику Его́. Тогда́ воспе́ Моисе́й, и сы́нове Изра́илевы песнь сию́ Го́сподеви, и реко́ша глаго́люще:

Чтец глаголет: Пои́м Го́сподеви:

И поют на глас 5: Сла́вно бо просла́вися.

И чтец коемуждо лику стихи предглаголет: Коня́ и вса́дника вве́рже в мо́ре. Пои́м Го́сподеви:

И людие на оба лика поют: Сла́вно бо просла́вися.

Помо́щник и Покрови́тель бысть мне во спасе́ние. Пои́м Го́сподеви:

Сей мой Бог, и просла́влю Его́, Бог отца́ моего́, и вознесу́ Его́. Пои́м Го́сподеви:

Госпо́дь сокруша́яй бра́ни, Госпо́дь и́мя Ему́, колесни́цы фарао́новы, и си́лу его́ вве́рже в мо́ре. Пои́м Го́сподеви:

Избра́нная вса́дники триста́ты потопи́ в Чермне́м мо́ри. Пои́м Го́сподеви:

Пучи́ною покры́ их, погрязо́ша во глубине́ я́ко ка́мень. Пои́м Го́сподеви:

Десни́ца Твоя́, Го́споди, просла́вися в кре́пости. Пои́м Го́сподеви:

Десна́я Твоя́ рука́ Го́споди, сокруши́ враги́, и мно́жеством сла́вы Твоея́ стерл еси́ сопроти́вных. Пои́м Го́сподеви:

Посла́л еси́ гнев Твой, пояде́ я́ я́ко сте́блие, и ду́хом я́рости Твоея́ разступи́ся вода́. Пои́м Го́сподеви:

Огусте́ша я́ко стена́ во́ды, огусте́ша и во́лны посреде́ мо́ря. Пои́м Го́сподеви:

Рече́ враг: гнав пости́гну, разделю́ коры́сть, испо́лню ду́шу мою́, убию́ мече́м мои́м, госпо́дствовати бу́дет рука́ моя́. Пои́м Го́сподеви:

Посла́л еси́ Ду́ха Твоего́, покры́ я́ мо́ре: погрязо́ша я́ко о́лово в воде́ зе́льней. Пои́м Го́сподеви:

Кто подо́бен Тебе́ в бозе́х, Го́споди? Кто подо́бен Тебе́? Просла́влен во святы́х, ди́вен в сла́ве, творя́й чудеса́. Пои́м Го́сподеви:

Просте́рл еси́ десни́цу Твою́, пожре́ я́ земля́. Наста́вил еси́ пра́вдою Твое́ю лю́ди Твоя́ сия́, я́же изба́вил еси́. Пои́м Го́сподеви:

Уте́шил еси́ кре́постию Твое́ю во оби́тель святу́ю Твою́. Слы́шаша язы́цы, и прогне́вашася, боле́зни прия́ша живу́щии в Филисти́ме. Пои́м Го́сподеви:

Тогда́ потща́шася влады́ки Едо́мстии, и кня́зи Моави́тстии, прия́т я́ тре́пет: раста́яша вси живу́щии в Ханаа́не. Пои́м Го́сподеви:

Да нападе́т на ня страх и тре́пет, вели́чием мы́шцы Твоея́ да ока́менятся. Пои́м Го́сподеви:

До́ндеже про́йдут лю́дие Твои́ Го́споди, до́ндеже про́йдут лю́дие Твои́ си́и, я́же стяжа́л еси́. Пои́м Го́сподеви:

Введ насади́ я́ в го́ру достоя́ния Твоего́, в гото́вое жили́ще Твое́, е́же соде́лал еси́ Го́споди, святы́ню Го́споди, ю́же угото́васте ру́це Твои́. Пои́м Го́сподеви:

Госпо́дь ца́рствуяй ве́ки, и на век, и еще́. Егда́ вни́де ко́нница фарао́нова с колесни́цами и вса́дники в мо́ре, и наведе́ на них Госпо́дь во́ду морску́ю. Пои́м Го́сподеви:

Сы́нове же Изра́илевы проидо́ша су́шею посреде́ мо́ря. Пои́м Го́сподеви:

Слава: Пои́м Го́сподеви: И ныне: Пои́м Го́сподеви: И последи чтец поет тожде: Сла́вно бо просла́вися.

Пророчества Софониева чтение. [Гл. 3, ст. 8 – 15]

Та́ко глаго́лет Госпо́дь: потерпи́ Мене́ в день воскресе́ния Моего́ во свиде́тельство: зане́ суд Мой в со́нмища язы́ков е́же прия́ти царе́й, е́же излия́ти на ня гнев Мой, весь гнев я́рости Моея́: зане́ огне́м рве́ния Моего́ пояде́на бу́дет вся земля́. Я́ко тогда́ обращу́ к лю́дем язы́к в род его́, е́же призыва́ти всем и́мя Госпо́дне, рабо́тати ему́ под и́гом еди́нем. От коне́ц рек Ефио́пских, прииму́ моля́щия Мя, в разсе́янных Мои́х принесу́т же́ртвы Мне. В день он не и́маши постыди́тися от всех начина́ний твои́х, и́миже нече́ствовал еси́ в Мя: я́ко тогда́ отыму́ от тебе́ укори́зны досажде́ния твоего́, и ктому́ не и́маши приложи́ти велича́тися на горе́ святе́й Мое́й. И оста́влю в тебе́ лю́ди кро́тки и смире́нны, и бу́дут благогове́ти о и́мени Госпо́дни. Оста́нцы Изра́илевы, и не сотворя́т непра́вды, и не возглаго́лют су́етных, и не обря́щется во усте́х их язы́к льстив: зане́ ти́и пожиру́ют, и угнездя́тся, и не бу́дет устраша́яй их. Ра́дуйся дщи Сио́нова зело́, пропове́дуй дщи Иерусали́мова, весели́ся и преукраша́йся от всего́ се́рдца твоего́, дщи Иерусали́мля! Отъя́т Госпо́дь непра́вды твоя́, изба́вил тя есть из руки́ враг твои́х: воцари́тся Госпо́дь посреде́ тебе́, и не у́зриши зла ктому́.

Царств третиих чтение. [Гл. 17, ст. 8 – 23]

Бысть глаго́л Госпо́день ко Илии́, глаго́ля: воста́ни, и иди́ в Саре́пту Сидо́нскую, и пребу́ди та́мо: се бо запове́дах та́мо жене́ вдови́це препита́ти тя. И воста́, и и́де в Саре́пту Сидо́нскую, и прии́де ко врато́м гра́да: и се та́мо жена́ вдова́ собира́ше дрова́. И возопи́ Илия́ вслед ея́, и рече́ ей: принеси́ ны́не ми ма́ло воды́ в сосу́де, и испию́. И и́де взя́ти. И возопи́ вслед ея́ Илия́, и рече́ ей: приими́ у́бо мне и укру́х хле́ба в руце́ свое́й, да ям. И рече́ жена́: жив Госпо́дь Бог твой, а́ще есть у мене́ опресно́к, но то́кмо горсть муки́ в водоно́се, и ма́ло еле́а в чва́нце: и се аз соберу́ два поле́нца, и вни́ду, и сотворю́ е́ себе́ и де́тем мои́м, и сне́мы е́, и у́мрем. И рече́ к ней Илия́: дерза́й, вни́ди, и сотвори́ по глаго́лу твоему́, но сотвори́ ми отту́ду опресно́к мал пре́жде, и принеси́ ми: себе́ же и ча́дом свои́м да сотвориши послежде. Я́ко та́ко глаго́лет Госпо́дь Бог Изра́илев: водоно́с муки́ не оскуде́ет, и чва́нец еле́а не ума́лится до дне, до́ндеже даст Госпо́дь дождь на зе́млю. И и́де жена́, и сотвори́ по глаго́лу Илиину́, и даде́ ему́, и яде́ той и та, и ча́да ея́. И от того́ дне водоно́с муки́ не оскуде́, и чва́нец еле́а не ума́лися, по глаго́лу Госпо́дню, его́же глаго́ла руко́ю Илиино́ю. И бысть по сих, и разболе́ся сын жены́ госпожи́ до́му, и бе боле́знь его́ крепка́ зело́, до́ндеже не оста́ся в нем дух его́. И рече́ ко Илии́: что мне, и тебе́, челове́че Бо́жий? Вшел еси́ ко мне воспомяну́ти непра́вды моя́, и умори́ти сы́на моего́? И рече́ Илия́ к жене́: даждь ми сы́на твоего́. И взят его́ от не́дра ея́, и вознесе́ его́ в го́рницу, иде́же сам почива́ше, и положи́ его́ на одре́ свое́м. И возопи́ Илия́ ко Го́споду, и рече́: увы́ мне Го́споди, свиде́телю вдовы́, у нея́же аз ны́не пребыва́ю, Ты озло́бил еси́ е́же умори́ти сы́на ея́. И ду́ну на о́трочища три́жды, и призва́ Го́спода, и рече́: Го́споди Бо́же мой, да возврати́тся у́бо душа́ о́трочища сего́ в онь, и бысть та́ко. И возопи́ о́трочищ, и сведе́ его́ с го́рницы в дом, и даде́ его́ ма́тери его́. И рече́ Илия́: виждь, жив есть сын твой. И рече́ жена́ ко Илии́: се уразуме́х, я́ко челове́к Бо́жий еси́ ты, и глаго́л Госпо́день во усте́х твои́х и́стинен.

Пророчества Исаиина чтение. [Гл. 61, ст. 10 – 11. Гл. 62, ст. 1 – 5]

Да возра́дуется душа́ моя́ о Го́споде: облече́ бо мя в ри́зу спасе́ния, и оде́ждою весе́лия [оде́я мя]: я́ко на жениха́ возложи́ на мя вене́ц, и я́ко неве́сту украси́ мя красото́ю. И я́ко земля́ растя́щая цвет свой, и я́ко вертогра́д се́мена своя́ прозяба́ет: та́ко возрасти́т Госпо́дь Госпо́дь пра́вду, и весе́лие пред все́ми язы́ки. Сио́на ра́ди не умолчу́, и Иерусали́ма ра́ди не попущу́, до́ндеже изы́дет я́ко свет пра́вда моя́, и спасе́ние мое́ я́ко свети́ло разжже́тся. И у́зрят язы́цы пра́вду твою́, и ца́рие сла́ву твою́, и прозову́т тя и́менем но́вым, и́мже Госпо́дь наимену́ет е́. И бу́деши вене́ц добро́ты в руце́ Госпо́дни, и диади́ма ца́рствия в руце́ Бо́га твоего́. И не прозове́шися ктому́ оста́влен, и земля́ твоя́ ктому́ не нарече́тся пуста́: тебе́ бо прозове́тся во́ля моя́, и земля́ твоя́ вселе́нная: я́ко благоволи́ Госпо́дь в тебе́, и земля́ твоя́ вку́пе насели́тся. И я́коже живя́й ю́ноша с де́вою, та́ко поживу́т сы́нове твои́ с тобо́ю: и бу́дет я́коже ра́дуется жени́х о неве́сте, та́ко возра́дуется Госпо́дь о тебе́.

Бытия чтение. [Гл. 22, ст. 1 – 18]

Бысть по глаго́лех сих, Бог искуша́ше Авраа́ма, и рече́ ему́: Авраа́ме, Авраа́ме. И рече́: се аз. И рече́: пойми́ сы́на твоего́ возлю́бленнаго, его́же возлюби́л еси́ Исаа́ка, и иди́ на зе́млю высо́ку, и вознеси́ его́ та́мо во всесожже́ние, на еди́ну от гор, и́хже ти реку́. Воста́в же Авраа́м у́тро, оседла́ осля́ свое́, поя́т же с собо́ю два о́трочища, и Исаа́ка сы́на своего́, и растни́в дрова́ во всесожже́ние, воста́в и́де, и прии́де на ме́сто, е́же рече́ ему́ Бог, в тре́тий день. И воззре́в Авраа́м очи́ма свои́ма, ви́де ме́сто издале́че. И рече́ Авраа́м отроко́м свои́м: ся́дите зде со осля́тем: аз же и де́тищ по́йдем до о́нде, и поклони́вшеся возврати́мся к вам. Взя же Авраа́м дрова́ всесожже́ния, и возложи́ на Исаа́ка сы́на своего́: взя же в ру́ки и огнь, и нож, и идо́ста о́ба вку́пе. Рече́ же Исаа́к ко Авраа́му отцу́ своему́: о́тче. Он же рече́: что есть, ча́до? Рече́ же: се огнь и дрова́, где есть овча́ е́же во всесожже́ние? Рече́ же Авраа́м: Бог у́зрит Себе́ овча́ во всесожже́ние, ча́до. Ше́дше же о́ба вку́пе, приидо́ста на ме́сто, е́же рече́ ему́ Бог: и созда́ та́мо Авраа́м же́ртвенник, и возложи́ дрова́: и связа́в Исаа́ка сы́на своего́, возложи́ его́ на же́ртвенник верху́ дров. И простре́ Авраа́м ру́ку свою́ взя́ти нож, закла́ти сы́на своего́. И воззва́ и́ А́нгел Госпо́день с небесе́, и рече́: Авраа́ме, Авраа́ме. Он же рече́: се аз. И рече́: да не возложи́ши руки́ твоея́ на о́трочища, ниже́ да сотвори́ши ему́ что: ны́не бо позна́х, я́ко бои́шися ты Бо́га, и не пощаде́л еси́ сы́на твоего́ возлю́бленнаго Мене́ ра́ди. И воззре́в Авраа́м очи́ма свои́ма ви́де, и се ове́н еди́н держи́мый рога́ма в са́де саве́к: и и́де Авраа́м, и взя овна́, и вознесе́ его́ во всесожже́ние вме́сто Исаа́ка сы́на своего́. И нарече́ Авраа́м и́мя ме́сту тому́, Госпо́дь ви́де: да реку́т днесь, на горе́ Госпо́дь яви́ся. И воззва́ А́нгел Госпо́день Авраа́ма втори́цею с небесе́, глаго́ля: Мно́ю Саме́м кля́хся, глаго́лет Госпо́дь, его́же ра́ди сотвори́л еси́ глаго́л сей, и не пощаде́л еси́ сы́на твоего́ возлю́бленнаго Мене́ ра́ди: вои́стинну благословя́ благословлю́ тя, и умножа́я умно́жу се́мя твое́, я́ко зве́зды небе́сныя, и я́ко песо́к вскрай мо́ря: и насле́дит се́мя твое́ гра́ды супоста́тов. И благословя́тся о се́мени твое́м вси язы́цы земни́и, зане́же послу́шал еси́ гла́са Моего́.

Пророчества Исаиина чтение. [Гл. 61, ст. 1 – 9]

Дух Госпо́день на Мне, его́же ра́ди пома́за Мя, благовести́ти ни́щим, посла́ Мя, исцели́ти сокруше́нныя се́рдцем, пропове́дати пле́нником отпуще́ние, и слепы́м прозре́ние. Нарещи́ ле́то Госпо́дне прия́тно, и день воздая́ния, уте́шити вся пла́чущия. Да́ти пла́чущим Сио́на сла́ву вме́сто пе́пела, пома́зание весе́лия пла́чущим, украше́ние сла́вы вме́сто ду́ха уны́ния, и нареку́тся ро́дове пра́вды, насажде́ние Госпо́дне в сла́ву. И сози́ждут пусты́ни ве́чныя, запусте́вшия пре́жде воздви́гнут, и обновя́т гра́ды пусты́я, опустоше́нныя в ро́ды. И прии́дут иноро́днии, пасу́щии о́вцы твоя́, и иноплеме́нницы ора́тели, и виногра́дари ва́ши. Вы же свяще́нницы Госпо́дни нарече́теся, служи́телие Бо́га ва́шего, рече́тся вам: кре́пость язы́к сне́сте, и в бога́тстве их чу́дни бу́дете. Си́це зе́млю свою́ втори́цею насле́дят, и весе́лие ве́чное над главо́ю их. Аз бо есмь Госпо́дь любя́й пра́вду, и ненави́дяй грабле́ния от непра́вды: и дам труд их пра́ведником, и заве́т ве́чен завеща́ю им. И позна́ется во язы́цех се́мя их, и вну́цы их посреди́ люде́й: всяк ви́дяй я́ позна́ет я́, я́ко си́и суть се́мя благослове́нное от Бо́га и ра́достию возра́дуются о Го́споде.

Царств четвертых чтение. [Гл. 4, ст. 8 – 37]

Бысть во еди́н день, и пре́йде Елиссе́й в Сома́н, и ту жена́ ве́лия, и удержа́ его́ сне́сти хле́ба. И бысть ему́ входи́ти, и исходи́ти мно́жицею, и уклоня́шеся та́мо я́сти хле́ба. И рече́ жена́ к мужу своему́: се ны́не разуме́х, я́ко челове́к Бо́жий свят сей ми́мо хо́дит нас при́сно. Сотвори́м у́бо ему́ го́рницу, ме́сто ма́ло, и поста́вим ему́ та́мо одр, и трапе́зу, и престо́л, и све́щник: и бу́дет внегда́ входи́ти ему́ к нам, и уклоня́ется та́мо. И бысть во еди́н день, и вни́де та́мо, и уклони́ся в го́рницу, и спа та́мо. И рече́ ко Гиези́ю о́трочищу своему́: призови́ ми сомани́тяныню сию́. И призва́ ю́, и ста пред ним. И рече́ ему́: рцы у́бо ей, се удиви́ла еси́ нас всем попече́нием сим: что подоба́ет сотвори́ти тебе́? А́ще есть тебе́ сло́во к царю́, или́ ко кня́зю си́лы? Она́ же рече́: [несть.] посреде́ люде́й мои́х аз есмь живу́щи. И рече́ ко Гиези́ю: что подоба́ет сотвори́ти ей? И рече́ Гиези́й о́трочищ его́: вои́стинну сы́на несть у нея́, и муж ея́ стар. И рече́, призови́ ю́. И призва́ ю́, и ста при две́рех. И рече́ Елиссе́й к ней: во вре́мя сие́, я́коже час сей, живу́щи ты зачне́ши сы́на. Она́ же рече́: ни, господи́не, не солжи́ рабе́ твое́й. И зача́т во чре́ве жена́, и роди́ сы́на во вре́мя сие́, я́коже час сей живу́щи, я́коже глаго́ла к ней Елиссе́й. И возмужа́ о́трочищ: и бысть, егда́ изы́де ко отцу́ своему́, к жну́щим. И рече́ ко отцу́ своему́: глава́ моя́, глава́ моя́ [боли́т]. И рече́ ко о́троку: неси́ его́ к ма́тери его́. И несе́ его́ к ма́тери его́ и лежа́ше на коле́ну ея́ до полу́дне, и у́мре. И вознесе́ его́, и положи́ его́ на одре́ челове́ка Бо́жия: и затвори́ его́, и изы́де, и призва́ му́жа своего́, и рече́ ему́: посли́ ми у́бо еди́наго от о́трок, и еди́но от осля́т, и теку́ до челове́ка Бо́жия, и возвращу́ся. И рече́: что я́ко ты и́деши к нему́ днесь? Не нов ме́сяц, ниже́ суббо́та. Она́ же рече́: мир. И оседла́ осля́, и рече́ ко о́трочищу своему́: веди́, и иди́, да не удержи́ши мене́, е́же все́сти, я́коже реку́ тебе́. Гряди́, и иди́, и прииди́ к челове́ку Бо́жию на го́ру Карми́льскую. И и́де, и прии́де до челове́ка Бо́жия в го́ру Карми́льскую. И бысть я́ко ви́де ю́ Елиссе́й гряду́щую, и рече́ к Гиези́ю о́трочищу своему́: се у́бо сомани́тяныня о́ная. Ны́не тецы́ в сре́тение ея́, и рече́ши ей: мир ли тебе́? И тече́ во сре́тение ей, и рече́ ей: мир ли тебе́; мир ли му́жу твоему́; мир ли о́трочищу твоему́? Она́ же рече́: мир. И прии́де к Елиссе́ю на го́ру, и я́тся за но́зе его́: и прибли́жися Гиези́й отри́нути ю́. И рече́ Елиссе́й: оста́ви ю́, я́ко душа́ ея́ боле́зненна в ней, и Госпо́дь укры́ от мене́, и не возвести́ мне. Она́ же рече́: еда́ проси́х сы́на у господи́на моего́, я́ко реко́х: не прельсти́ мене́? И рече́ Елиссе́й ко Гиези́ю: препоя́ши чре́сла твоя́, и возми́ жезл мой в ру́це твои́, и иди́, я́ко а́ще обря́щеши му́жа, да не благослови́ши его́, и а́ще благослови́т тя муж, не отвеща́й ему́: и возложи́ жезл мой на лице́ о́трочища. И рече́ ма́ти о́трочища: жив Госпо́дь, и жива́ душа́ твоя́, а́ще оста́влю тебе́. И воста́ Елиссе́й, и и́де вслед ея́. И Гиези́й и́де пред не́ю, и возложи́ жезл на лице́ о́трочища, и не бе гла́са, и не бе слы́шания. И возврати́ся в сре́тение его́, и пове́да ему́, глаго́ля: не воста́ о́трочищ. И вни́де Елиссе́й в хра́мину, и се о́трочищ уме́рый положе́н на одре́ его́. И вни́де Елиссе́й в дом, и затвори́ дверь за двою́ собо́ю, и помоли́ся Го́споду. И взы́де, и ля́же на о́трочищи, и положи́ уста́ своя́ на усте́х его́, и о́чи свои́ на о́чи его́, и ру́це свои́ на ру́це его́, и плесне́ свои́ на плесну́ его́: и сляче́ся над ним, и ду́ну на него́, и согре́яся плоть о́трочища. И обрати́ся, и походи́ в хра́мине сю́ду и сю́ду: и взы́де и сляче́ся над о́трочищем седми́жды, и отве́рзе о́трочищ о́чи свои́. И возопи́ Елиссе́й ко Гиези́ю, и рече́: призови́ ми сомани́тяныню сию́. И призва́ ю́, и вни́де к нему́. И рече́ Елиссе́й: приими́ сы́на твоего́. И вни́де жена́, и паде́ на но́гу его́, и поклони́ся ему́ до земли́, и прия́т сы́на своего́, и изы́де.

Пророчества Исаиина чтение. [Гл. 63, ст. 11 – 19. Гл. 64, ст. 1 – 5]

Та́ко глаго́лет Госпо́дь: где возведы́й от земли́ па́стыря ове́ц свои́х? Где есть вложи́вый в них Ду́ха Свята́го? Возве́дшая десни́цею Моисе́а, мы́шца сла́вы Его́ раздели́ во́ду пред Лице́м Его́, сотвори́ти Ему́ и́мя ве́чно. Проведе́ их сквозе́ бе́здну, я́коже коня́ сквозе́ пусты́ню, и не утруди́шася, и я́ко скоты́ по по́лю, и сни́де Дух от Го́спода, и наста́ви их. Та́ко прове́л еси́ лю́ди Твоя́, сотвори́ти Тебе́ Самому́ и́мя сла́вно. Обрати́ся, Го́споди, от небесе́, и виждь от до́му свята́го Твоего́ и сла́вы Твоея́: где есть ре́вность Твоя́ и кре́пость Твоя́? Где есть мно́жество ми́лости Твоея́, и щедро́т Твои́х, я́ко терпе́л еси́ нам? Ты бо еси́ Оте́ц наш, поне́же Авраа́м не уве́де нас, и Изра́иль не позна́ нас, но Ты Го́споди, Оте́ц наш, изба́ви ны, испе́рва и́мя Твое́ на нас есть. Что уклони́л еси́ нас, Го́споди, от пути́ Твоего́, и ожесточи́л еси́ сердца́ на́ша е́же не боя́тися Тебе́? Обрати́ся ра́ди раб Твои́х, ра́ди племе́н достоя́ния Твоего́, да [поне́] ма́ло насле́дим горы́ святы́я Твоея́. Проти́вницы на́ши попра́ша святы́ню Твою́. Бы́хом я́ко испе́рва, егда́ не владе́л еси́ на́ми, ниже́ бе нарече́нное и́мя Твое́ на нас. А́ще отве́рзеши не́бо, тре́пет прии́мут от Тебе́ го́ры, и раста́ют. Я́ко та́ет воск от лица́ огня́ и попали́т огнь супоста́ты, и явле́но бу́дет и́мя Твое́ в сопроти́вных Твои́х: от Лица́ Твоего́ язы́цы возмяту́тся. Егда́ сотвори́ши сла́вная, тре́пет прии́мут от Тебе́ го́ры. От ве́ка не слы́шах, ниже́ о́чи на́ши ви́деша Бо́га, разве Тебе́, и дела́ Твоя́, я́же сотвори́ши жду́щим ми́лости. Ми́лость бо сря́щет творя́щих пра́вду, и пути́ Твоя́ помя́нутся.

Пророчества Иеремиина чтение. [Гл. 31, ст. 31 – 34]

Та́ко глаго́лет Госпо́дь: се дни́е гряду́т, и завеща́ю до́му Изра́илеву и до́му Иу́дину заве́т нов. Не по заве́ту, его́же завеща́х отце́м их, в день, во́ньже е́мшу Ми за ру́ку их, извести́ я́ от земли́ Еги́петския: я́ко ти́и не пребы́ша в заве́те Мое́м, и Аз небрего́х их, глаго́лет Госпо́дь. Я́ко сей заве́т, его́же завеща́ю до́му Изра́илеву по днех о́нех, глаго́лет Госпо́дь: дая́ зако́ны Моя́ в мы́сли их, и на сердца́х их напишу́ я́, и бу́ду им в Бо́га, и ти́и бу́дут Ми в лю́ди. И не научи́т ки́йждо бли́жняго своего́, и ки́йждо бра́та своего́, глаго́ля: позна́й Го́спода: я́ко вси позна́ют Мя от ма́ла да́же и до вели́каго их: я́ко ми́лостив бу́ду непра́вдам их, и грехо́в их не помяну́ ктому́.

Пророчества Даниилова чтение. [Гл. 3, ст. 1 – 88]

В ле́то осмонадеся́тое Навуходоно́сор царь сотвори́ те́ло зла́то, высота́ его́ лакте́й шести́десяти, и широта́ его́ лакте́й шести́: и поста́ви е́ на по́ли Деи́ре, во стране́ Вавило́нстей. И посла́ [Навуходоно́сор царь] собра́ти ипа́ты, и воево́ды, и местонача́льники, вожди́ же и мучи́тели, и су́щия на власте́х, и вся кня́зи стран, приити́ на обновле́ние куми́ра, его́же поста́ви Навуходоно́сор царь. И собра́шася местонача́льницы, ипа́ты, воево́ды, вожди́, мучи́тели вели́цыи, и́же над властьми́, и вси нача́льницы стран на обновле́ние те́ла, е́же поста́ви Навуходоно́сор царь: и ста́ша пред те́лом, е́же поста́ви Навуходоно́сор царь. И пропове́дник вопия́ше с кре́постию: вам глаго́лется, наро́ди, лю́дие, племена́, язы́цы. Во́ньже час а́ще услы́шите глас трубы́, свире́ли же и гу́сли, самви́ки же и псалти́ри, и согла́сия, и вся́каго ро́да мусики́йска, па́дающе покланя́йтеся те́лу злато́му, е́же поста́ви Навуходоно́сор царь. И и́же а́ще не пад покло́нится, в той час вве́ржен бу́дет в пещь огне́м горя́щую. И бысть егда́ услы́шаша лю́дие глас трубы́, свире́ли же и гу́сли, самви́ки же и псалти́ри, и согла́сия, и вся́каго ро́да мусики́йскаго, па́дающе вси лю́дие, племена́, язы́цы, покланя́хуся те́лу злато́му, е́же поста́ви Навуходоно́сор царь. Тогда́ приступи́ша му́жие халде́йстии и оболга́ша иуде́ев, отвеща́вше ре́ша Навуходоно́сору царе́ви: царю́, во ве́ки живи́. Ты, царю́, положи́л еси́ повеле́ние, да всяк челове́к, и́же а́ще услы́шит глас трубы́, свире́ли же и гу́сли, самви́ки же и псалти́ри, и согла́сия, и вся́каго ро́да мусики́йска, и не пад покло́нится те́лу злато́му, вве́ржен бу́дет в пещь огне́м горя́щую. Суть у́бо му́жи Иуде́е, и́хже поста́вил еси́ над де́лы страны́ Вавило́нския, Седра́х, Миса́х и Авденаго́, и́же не послу́шаша за́поведи твоея́, царю́, и бого́м твои́м не слу́жат, и те́лу злато́му, е́же поста́вил еси́, не покланя́ются. Тогда́ Навуходоно́сор в я́рости и гне́ве рече́ привести́ Седра́ха, Миса́ха и Авденаго́: и приведе́ни бы́ша пред царя́. И отвеща́ Навуходоно́сор, и рече́ им: а́ще вои́стинну, Седра́х, Миса́х и Авденаго́, бого́м мои́м не слу́жите, и те́лу злато́му, е́же поста́вих, не покланя́етеся? Ны́не у́бо, а́ще есте́ гото́ви, да егда́ услы́шите глас трубы́, свире́ли же и гу́сли, самви́ки же и псалти́ри, и согла́сия, и вся́каго ро́да мусики́йскаго, па́дше поклони́теся те́лу злато́му, е́же сотвори́х: а́ще же не поклоните́ся, в той час вве́ржени бу́дете в пещь огне́м горя́щую: и кто есть бог, и́же и́змет вы из руки́ моея́? И отвеща́ша Седра́х, Миса́х и Авденаго́, глаго́люще царю́ Навуходоно́сору: не тре́бе нам о глаго́ле сем отвеща́ти тебе́. Есть бо Бог наш на Небесе́х, Ему́же мы слу́жим, си́лен изъя́ти нас от пе́щи огне́м горя́щия и от руку́ твое́ю изба́вити нас, царю́. А́ще ли ни, ве́домо да бу́дет тебе́, царю́, я́ко бого́м твои́м не слу́жим, и те́лу злато́му, е́же поста́вил еси́, не кла́няемся. Тогда́ Навуходоно́сор испо́лнися я́рости, и зрак лица́ его́ измени́ся на Седра́ха, Миса́ха и Авденаго́, и рече́: разжжи́те пещь седмери́цею, до́ндеже до конца́ разгори́тся. И муже́м си́льным кре́постию рече́: окова́вше Седра́ха, Миса́ха и Авденаго́, вве́рзите в пещь огне́м горя́щую. Тогда́ му́жие о́нии окова́ни бы́ша с га́щами свои́ми, и покрыва́лы, и сапогми́, и со оде́ждами свои́ми, и вве́ржени бы́ша посреде́ пе́щи огне́м горя́щия. Поне́же глаго́л царе́в превозмо́же, и пещь разжже́на бысть преизли́шше: и муже́й о́ных, и́же вверго́ша Седра́ха, Миса́ха и Авденаго́, уби́ пла́мень о́гненный. И му́жие ти́и трие́, Седра́х, Миса́х и Авденаго́, падо́ша посреде́ пе́щи огне́м горя́щия око́вани, и хожда́ху посреде́ пла́мене пою́ще Бо́га, и благословя́ще Го́спода. И став с ни́ми Аза́риа помоли́ся си́це, и отве́рз уста́ своя́ посреде́ огня́, и рече́:

Благослове́н еси́, Го́споди Бо́же оте́ц на́ших, хва́льно и просла́влено и́мя Твое́ во ве́ки. Я́ко пра́веден еси́ о всех, я́же сотвори́л еси́ нам, и вся дела́ Твоя́ и́стинна, и пра́ви путие́ Твои́, и вси суди́ Твои́ и́стинни. И судьбы́ и́стинны сотвори́л еси́ по всем, я́же наве́л еси́ на ны, и на град святы́й оте́ц на́ших Иерусали́м: я́ко и́стиною и судо́м наве́л еси́ сия́ вся на ны грех ра́ди на́ших. Я́ко согреши́хом и беззако́нновахом отступи́вше от Тебе́, и прегреши́хом во всех. И за́поведей Твои́х не послу́шахом, ниже́ соблюдо́хом, ниже́ сотвори́хом, я́коже запове́дал еси́ нам, да бла́го нам бу́дет. И вся, ели́ка сотвори́л еси́ нам, и вся, ели́ка наве́л еси́ на ны, и́стинным судо́м сотвори́л еси́. И преда́л еси́ нас в ру́ки враго́в беззако́нных, ме́рзких отсту́пников, и царю́ непра́ведну, и лука́внейшу па́че всея́ земли́. И ны́не несть нам отве́рзсти уст, студ и поноше́ние бы́хом рабо́м Твои́м, и чту́щим Тя. Не преда́ждь у́бо нас до конца́ и́мене Твоего́ ра́ди, и не разори́ заве́та Твоего́. И не отста́ви ми́лости Твоея́ от нас, Авраа́ма ра́ди возлю́бленнаго от Тебе́, и за Исаа́ка раба́ Твоего́, и Изра́иля свята́го Твоего́, и́мже глаго́лал еси́ умно́жити се́мя их, я́ко зве́зды небе́сныя, и я́ко песо́к вскрай мо́ря. Я́ко Влады́ко, ума́лихомся па́че всех язы́к, и есмы́ смире́ни по всей земли́ днесь грех ра́ди на́ших. И несть во вре́мя сие́ кня́зя, и проро́ка, и вожда́, ниже́ всесожже́ния, ниже́ же́ртвы, ниже́ приноше́ния, ниже́ кади́ла, ни ме́ста, е́же пожре́ти пред Тобо́ю и обрести́ ми́лость, но душе́ю сокруше́нною, и ду́хом смире́нным, да прия́ты бу́дем. Я́ко во всесожже́ниих о́вних и ю́нчих, и я́ко во тмах а́гнец ту́чных, та́ко да бу́дет же́ртва на́ша пред Тобо́ю днесь, и да соверши́тся по Тебе́, я́ко несть студа́ упова́ющим на Тя. И ны́не возсле́дуем всем се́рдцем, и бои́мся Тебе́, и и́щем Лица́ Твоего́. Не посрами́ нас, но сотвори́ с на́ми по кро́тости Твое́й, и по мно́жеству ми́лости Твоея́. И изми́ нас по чудесе́м Твои́м, и даждь сла́ву и́мени Твоему́, Го́споди. И да посра́мятся вси явля́ющии рабо́м Твои́м зла́я, и да постыдя́тся от вся́кия си́лы, и кре́пость их да сокруши́тся. И да разуме́ют, я́ко Ты еси́ Госпо́дь Бог Еди́н, и сла́вен по всей вселе́нной.

И не преста́ша, вве́ргшии их, слуги́ царе́вы жгу́ще пещь на́ффою, и смоло́ю, и изгре́бми, и хвра́стием. И разлива́шеся пла́мень над пе́щию на ла́кти четы́редесять де́вять. И обы́де и пожже́, и́хже обре́те о́крест пе́щи халде́йския. А́нгел же Госпо́день сни́де ку́пно с су́щими со Аза́риею в пещь. И отрясе́ пла́мень о́гненный от пе́щи, и сотвори́ сре́днее пе́щи я́ко дух росы́ шумя́щь: и не прикосну́ся их отню́дь огнь, и не оскорби́, ниже́ стужи́ им. Тогда́ ти́и трие́ я́ко еди́ными усты́ поя́ху, и благословля́ху, и сла́вляху Бо́га в пещи́, глаго́люще:

Благослове́н еси́, Го́споди Бо́же оте́ц на́ших, и препе́тый и превозноси́мый во ве́ки; и благослове́но и́мя сла́вы Твоея́ свято́е, и препе́тое и превозноси́мое во ве́ки. Благослове́н еси́ в хра́ме святы́я сла́вы Твоея́, и препе́тый и превозноси́мый во ве́ки. Благослове́н еси́ ви́дяй бе́здны, седя́й на Херуви́мех, и препе́тый и превозноси́мый во ве́ки. Благослове́н еси́ на престо́ле сла́вы Ца́рствия Твоего́, и препе́тый и превозноси́мый во ве́ки. Благослове́н еси́ на тве́рди небе́сней, и препе́тый и превозноси́мый во ве́ки.

Востаем зде и поем:

Го́спода по́йте и превозноси́те во вся ве́ки.

Чтец же глаголет стихи:

Благослови́те, вся дела́ Госпо́дня,

И мы: Го́спода по́йте и превозноси́те Его́ во ве́ки.

Благослови́те А́нгели Госпо́дни,

Го́спода по́йте и превозноси́те Его́ во ве́ки.

Благослови́те небеса́,

Го́спода по́йте и превозноси́те Его́ во ве́ки.

Благослови́те во́ды вся, я́же превы́ше небе́с,

Го́спода по́йте и превозноси́те Его́ во ве́ки.

Благослови́те вся си́лы Госпо́дни,

Го́спода по́йте и превозноси́те Его́ во ве́ки.

Благослови́те со́лнце и луна́,

Го́спода по́йте и превозноси́те Его́ во ве́ки.

Благослови́те зве́зды небе́сныя,

Го́спода по́йте и превозноси́те Его́ во ве́ки.

Благослови́те всяк дождь и роса́,

Го́спода по́йте и превозноси́те Его́ во ве́ки.

Благослови́те вси ду́си,

Го́спода по́йте и превозноси́те Его́ во ве́ки.

Благослови́те огнь и вар,

Го́спода по́йте и превозноси́те Его́ во ве́ки.

Благослови́те студь и зной,

Го́спода по́йте и превозноси́те Его́ во ве́ки.

Благослови́те ро́сы и и́ней,

Го́спода по́йте и превозноси́те Его́ во ве́ки.

Благослови́те но́щи и дни́е,

Го́спода по́йте и превозноси́те Его́ во ве́ки.

Благослови́те свет и тьма,

Го́спода по́йте и превозноси́те Его́ во ве́ки.

Благослови́те лед и мраз,

Го́спода по́йте и превозноси́те Его́ во ве́ки.

Благослови́те сла́ны и сне́зи,

Го́спода по́йте и превозноси́те Его́ во ве́ки.

Благослови́те мо́лния и о́блацы,

Го́спода по́йте и превозноси́те Его́ во ве́ки.

Да благослови́т земля́,

Го́спода да пое́т и превозно́сит Его́ во ве́ки.

Благослови́те го́ры и хо́лми,

Го́спода по́йте и превозноси́те Его́ во ве́ки.

Благослови́те вся прозяба́ющая на земли́,

Го́спода по́йте и превозноси́те Его́ во ве́ки.

Благослови́те исто́чницы,

Го́спода по́йте и превозноси́те Его́ во ве́ки.

Благослови́те моря́ и ре́ки,

Го́спода по́йте и превозноси́те Его́ во ве́ки.

Благослови́те ки́ти и вся дви́жущаяся в вода́х,

Го́спода по́йте и превозноси́те Его́ во ве́ки.

Благослови́те вся пти́цы небе́сныя,

Го́спода по́йте и превозноси́те Его́ во ве́ки.

Благослови́те зве́рие и вси ско́ти,

Го́спода по́йте и превозноси́те Его́ во ве́ки.

Благослови́те сы́нове челове́честии,

Го́спода по́йте и превозноси́те Его́ во ве́ки.

Да благослови́т Изра́иль,

Го́спода по́йте и превозноси́те Его́ во ве́ки.

Благослови́те иере́и Госпо́дни,

Го́спода по́йте и превозноси́те Его́ во ве́ки.

Благослови́те раби́ Госпо́дни,

Го́спода по́йте и превозноси́те Его́ во ве́ки.

Благослови́те ду́си и ду́ши пра́ведных,

Го́спода по́йте и превозноси́те Его́ во ве́ки.

Благослови́те преподо́бнии и смире́ннии се́рдцем,

Го́спода по́йте и превозноси́те Его́ во ве́ки.

Благослови́те Ана́ния, Аза́риа и Мисаи́л,

Го́спода по́йте и превозноси́те Его́ во ве́ки.

Благослови́те Апо́столи, проро́цы и му́ченицы Госпо́дни,

Го́спода по́йте и превозноси́те Его́ во ве́ки.

Благослови́м Отца́, и Сы́на, и Свята́го Ду́ха,

Го́спода пое́м и превозно́сим Его́ во ве́ки.

И ны́не и при́сно, и во ве́ки веко́в, ами́нь.

Го́спода по́йте и превозноси́те Его́ во ве́ки.

Хва́лим, благослови́м, покланя́емся Го́сподеви,

Пою́ще и превознося́ще во вся ве́ки.

Таже ектения малая.

Вместо же Трисвятаго:

Ели́цы во Христа́ крести́стеся, / во Христа́ облеко́стеся. Аллилу́ия. (3)

Прокимен, глас 8: Вся земля́ да покло́нится Тебе́, и пое́т Тебе́, / да пое́т же и́мени Твоему́, Вы́шний. Стих: Воскли́кните Го́сподеви вся земля́, по́йте же и́мени Его́.

Апостол к Римлянам, зачало 91:

Бра́тие, ели́цы во Христа́ Иису́са крести́хомся, в смерть Его́ крести́хомся. Спогребо́хомся у́бо Ему́ креще́нием в смерть: да я́коже воста́ Христо́с от ме́ртвых сла́вою О́тчею, та́ко и мы во обновле́нии жи́зни ходи́ти на́чнем. А́ще бо сообра́зни бы́хом подо́бию сме́рти Его́, то и воскресе́нию бу́дем. Сие́ ве́дяще, я́ко ве́тхий наш челове́к с Ним распя́тся, да упраздни́тся те́ло грехо́вное, я́ко ктому́ не рабо́тати нам греху́. Уме́рый бо, оправди́ся от греха́. А́ще ли умро́хом со Христо́м, ве́руем, я́ко и жи́ви бу́дем с Ним: Ве́дяще, я́ко Христо́с воста́ от ме́ртвых, ктому́ уже́ не умира́ет, смерть Ему́ ктому́ не облада́ет. Е́же бо у́мре, греху́ у́мре еди́ною, а е́же живе́т, Бо́гови живе́т. Та́кожде и вы помышля́йте себе́: ме́ртвым у́бо бы́ти греху́, живы́м же Бо́гови, о Христе́ Иису́се, Го́споде на́шем.

Аллилуиа и псалом Давидов не глаголется: но по еже реши иерею: Мир ти, абие чтец глаголет, вместо аллилуиа, во глас 7:

Воскресни́, Бо́же, суди́ земли́, я́ко Ты насле́диши во всех язы́цех. И певцы поют тожде. И чтец, стих: Бог ста в со́нме бого́в, посреде́ же бо́ги разсу́дит. И певцы: Воскресни́, Бо́же:

Стих: Доко́ле су́дите непра́вду, и ли́ца гре́шников прие́млете? Воскресни́, Бо́же:

Стих: Суди́те си́ру и убо́гу, смире́нна и ни́ща оправда́йте. Воскресни́, Бо́же:

Стих: Изми́те ни́ща и убо́га, из руки́ гре́шничи изба́вите его́. Воскресни́, Бо́же:

Стих: Не позна́ша, ниже́ уразуме́ша, во тьме хо́дят. Воскресни́, Бо́же:

Стих: Да подви́жатся вся основа́ния земли́. Аз рех: бо́зи есте́, и сы́нове Вы́шняго вси. Вы же я́ко челове́цы умира́ете, и я́ко еди́н от князе́й па́даете.

И паки: Воскресни́, Бо́же, суди́ земли́, я́ко Ты насле́диши во всех язы́цех. Егда же поют: Воскресни́, Бо́же, суди́ земли́, тогда иереи и диакони извлачаются от черных одежд и облачаются в белыя.

Евангелие от Матфеа, зачало 115:

В ве́чер суббо́тный, свита́ющи во еди́ну от суббо́т, прии́де Мари́я Магдали́на, и друга́я Мари́я, ви́дети гроб. И се трус бысть ве́лий: А́нгел бо Госпо́день сшед с небесе́, присту́пль отвали́ ка́мень от две́рий гро́ба, и седя́ше на нем. Бе же зрак его́ я́ко мо́лния, и одея́ние его́ бело́ я́ко снег. От стра́ха же его́ сотрясо́шася стрегу́щии, и бы́ша я́ко ме́ртви. Отвеща́в же А́нгел, рече́ жена́м: не бо́йтеся вы, вем бо я́ко Иису́са распя́таго и́щете. Несть зде: воста́ бо, я́коже рече́. Прииди́те, ви́дите ме́сто, иде́же лежа́ Госпо́дь. И ско́ро ше́дше рцы́те ученико́м Его́, я́ко воста́ от ме́ртвых; и се варя́ет вы в галиле́и: та́мо Его́ у́зрите: се рех вам. И изше́дше ско́ро от гро́ба, со стра́хом и ра́достию ве́лиею, теко́сте возвести́ти ученико́м Его́. Я́коже идя́сте возвести́ти ученико́м Его́, и се Иису́с сре́те я́, глаго́ля: ра́дуйтеся. Оне́ же присту́пльше, я́стеся за но́зе Его́, и поклони́стеся Ему́. Тогда́ глаго́ла и́ма Иису́с: не бо́йтеся, иди́те, возвести́те бра́тии мое́й, да и́дут в галиле́ю, и ту мя ви́дят. Иду́щема же и́ма, се не́цыи от кусто́диа прише́дше во град, возвести́ша архиере́ом вся бы́вшая. И собра́вшеся со ста́рцы, сове́т сотвори́ша, сре́бреники дово́льны да́ша во́ином, глаго́люще: рцы́те, я́ко ученицы́ Его́ но́щию прише́дше украдо́ша Его́, нам спя́щим. И а́ще сие́ услы́шано бу́дет у иге́мона, мы утоли́м его́, и вас безпеча́льны сотвори́м. Они́ же прие́мше сре́бреники, сотвори́ша, я́коже науче́ни бы́ша. И промче́ся сло́во сие́ во иуде́ех, да́же до сего́ дне. Еди́нии же на́десяте ученицы́ идо́ша в Галиле́ю, в го́ру, а́може повеле́ им Иису́с. И ви́девше Его́ поклони́шася Ему́: о́ви же усумне́шася. И присту́пль Иису́с, рече́ им, глаго́ля: даде́ся Ми вся́ка власть на небеси́ и на земли́. Ше́дше научи́те вся язы́ки, крестя́ще их во и́мя Отца́, и Сы́на, и Свята́го Ду́ха, уча́ще их блюсти́ вся, ели́ка запове́дах вам. И се Аз с ва́ми есмь во вся дни, до сконча́ния ве́ка, ами́нь.

И по чину Божественная Литургия Великаго Василиа.

Вместо же Херувимския песни поется настоящий тропарь, глас 8:

Да молчи́т вся́кая плоть челове́ча, / и да стои́т со стра́хом и тре́петом, / и ничто́же земно́е в себе́ да помышля́ет: / Царь бо ца́рствующих, и Госпо́дь госпо́дствующих, / прихо́дит закла́тися и да́тися в снедь ве́рным. / Предхо́дят же Сему́ ли́цы А́нгельстии / со вся́ким Нача́лом и Вла́стию, / многоочи́тии Херуви́ми, / и шестокрила́тии Серафи́ми, / ли́ца закрыва́юще, и вопию́ще песнь: / аллилу́иа, аллилу́иа, аллилу́иа.

Вместо же Достойно, ирмос:

Не рыда́й Мене́, Ма́ти, / зря́щи во гро́бе, / Его́же во чре́ве без се́мене зачала́ еси́ Сы́на: / воста́ну бо и просла́влюся / и вознесу́ со сла́вою непреста́нно, я́ко Бог, / ве́рою и любо́вию Тя велича́ющия.

Причастен, глас 4: Воста́ я́ко спя Госпо́дь, / и воскре́се спаса́яй нас. Аллилу́иа, трижды.

По отпусте же дается от священника антидор, Таже бывает благословение хлеба и вина.

Диакон: Го́споду помо́лимся.

Хор: Го́споди, поми́луй.

Священник: Го́споди Иису́се Христе́ Бо́же наш, благослови́вый пять хле́бов и пять ты́сящ насы́тивый, Сам благослови́ и хле́бы сия́, пшени́цу, вино́ и еле́й: и умно́жи сия́ во гра́де сем (или в ве́си сей, или во святе́й оби́тели сей) и во всем ми́ре Твое́м: и вкуша́ющия от них ве́рныя освяти́. Я́ко Ты еси́ благословля́яй и освяща́яй вся́ческая, Христе́ Бо́же наш, и Тебе́ сла́ву возсыла́ем, со Безнача́льным Твои́м Отце́м, и Всесвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в.

Хор: Ами́нь.

Отпуст Литургии: Христо́с, И́стинный Бог наш:

Иный отпуст:

И́же нас pа́ди и на́шего pа́ди спасе́ния, смиpи́в Себе́ и в на́шy нищетý облече́ся и во́лею Стpа́сти пpетеpпе́ и смеpть вкyси́в и во гpо́бе положи́выйся Хpисто́с, И́стинный Бог наш, моли́твами Пречи́стыя Своея́ Ма́тере, святы́х сла́вных и всехва́льных Апо́стол, и́же во святы́х отца́ на́шего Васи́лия Вели́каго, архиепи́скопа Кесари́и Каппадоки́йския, и всех святы́х, поми́лyет и спасе́т нас, я́ко Благ и Человеколю́бец.

Долженствует же екклисиарх имети опасство, да егда скончавается Литургия, будет час вторый нощи. По отпусте же не исходим из церкве, но седим на местех наших: и входит келарь, и дает братии по единому укруху хлеба и по шести смоквей или фиников, и по единому красовулю вина. Нам же возлежащим, бывает чтение великое в Деяниих святых Апостол от начала. Глаголет же чтец начало. Священник же стих: Молитвами святых апостол, Господи Иисусе Христе Боже наш, помилуй нас. И по Амине начинает чтец чести. Таже начинаем ясти. И по скончании чтения вжигает кандиловжигатель вся кандила храма, и, исходя, ударяет в клепало: и престает чтый чтение. Благословившу же священнику, начинаем Трисвятое, и прочее. Прииди́те, поклони́мся, трижды. Псалом 50. И канон Великия Субботы: ирмосы по дважды, тропари же на дванадесять, со стихи песней. Катавасия, ирмос оба лика. По третней песни седален Великия Субботы: Гроб Твой, Спа́се: И чтение в слове святаго Епифаниа, егоже начало: Что сие́ днесь: Или от словес Златоустаго: ищи я в толковании на Евангелие от Матфеа, или на Иоанна, словеса воскресная. По 6-й песни кондак и икос Великия Субботы. Таже чтение. По 9-й же песни Трисвятое. И тропарь, глас 2: Егда снизше́л еси́: Ектениа. И отпуст.